Sunday 20 March 2011

بان كي مون... ايه فكرك بيا، بعد السنين ديه

تحديث:
فيه واحد على التويتر قال لي ان بان كي مون وصل النهاردة
طيب.. لو عمل الاجتماع خلاص، يبقى ياريت اللي حضر الاجتماع يطلع بيان باللي حصل بشكل واضح، ومافيش برضه حد يخونه، لأن دي حسابات سياسية مش لازم نتفق عليها كلنا وكل واحد له وجهة نظر، لو لسه ما الاجتماع ما حصلش، يكون احسن لو اعتذرتوا لو سمحتوا
لا مش لو سمحتوا
ارجوكم واحب على رجليكم اعتذروا
--------
اسكتوووواااا
مش انا واحدة من الامم المتحدة اتصلت بيا الخميس اللي فات ده على طول عشان تدعوني لمائدة مستديرة مع بان كي مون وباين مؤتمر بعد كده حاجة كده
انا اسفة اني نسيت اقولكم، اتلخمت في التعديلات، بس انا متعودة اقول كل حاجة زي ما انتوا عارفين
هي مصرية البنوتة اللي اتصلت بيا، قالت لي انه جاي... بس ناسية يوم ايه، باين التلات ولا ايه
مش فاكرة والله، وقالت لي رشحي اسماء معاكي
المهم يعني اجبتها الاجابة اللي انا متعودة ارد بيها على اي دعوات اجنبية من جهات حكومية او جهات قذرة:
أنا آسفة أنا باعتذر ومش حاقدر أرشح أسماء
قالت لي:
ممكن أعرف السبب؟
قلت لها:
عشان انا ما باحبش النفاق والادعاء، كان فين بان كي مون طول التمنتاشر يوم واحنا بنتقتل؟ لا، كانت فين الامم المتحدة كلها عشرات السنين اللي فاتت؟ كان موقفها ايه من انتهاك حقوق الانسان من قبل الانظمة العربية الموالية لأمريكا؟ دلوقت جاية كلينتون وبان كي مون والسادة الخواجات عشان يجتمعوا بالثوار؟ احنا كل شهدائنا ماتوا برصاص صنع في أمريكا، تلاتين سنة ذل وحبس وانتهاك لحقوق الإنسان وفقر ولا مرة الامم المتحدة فتحت ملف الحريات وحقوق الانسان والحقوق الاجتماعية والاقتصادية بشكل جاد ضد مبارك، كل ده عشان كان بيخدم اسرائيل وامريكا زي ما كلينتون نفسها قالت؟ 
انا مش حاكلمك عن موقف الامم المتحدة من افغانستان، ومن احتلال العراق، ومن الاحتلال الصهيوني، ولا حتى من مواقفهم من ثورة اليمن والبحرين وليبيا وحتى تونس قبلنا، لأن للأسف دلاديل أمريكا في مصر تمكنوا من إغراقنا في الشأن الإقليمي الداخلي، وده منهج فوق انه منزوع الانسانية ضار بمصالحنا، احنا فشل الثورة الليبية بيضر بمصالحنا الوطنية بشكل مباشر مثلا، احتلال العراق خرب بيتنا اقتصاديا، احتلال افغانستان بهدل امننا القومي وحطنا تحت ضغوط وسابنا فريسة للديكتاتور اللي كان بيخدم امريكا والامم المتحدة ساكتة له عشان اكبر تمويل بيجيلها بيبقى من امريكا، وعشان عيون فلوس امريكا احنا نعيش تحت حكم الديكتاتور تلاتين سنة نتعذب بأدوات تعذيب امريكية، ونتقتل برصاص امريكي، ونتخنق بقنابل غاز امريكية، ونتحرم من مواردنا لصالح امريكا ونجوع عشان نمول اسرائيل بتلاتة مليار لجل عيون امريكا، دلوقت بس افتكرونا وجايين بالميكروباصات يباركوا ويهنوا؟
يعني هم مع المنتصر على طول الخط كده زي الرقاصة اللي مع البلطجي لو جه بلطجي اقوى منه ضربه تخلع من رفيقها الاولاني وتطبطب على الجديد وتقول له تسلم يا سيد الرجالة؟ مافيش اي معايير اخلاقية بتحكمهم خالص كده؟
طبعا كل الكلام ده ورا بعضه
قالت لي: طيب انا محترمة وجهة نظرك، بس انت مش شايفة ان الكلام ده لازم يتقال له؟
قلت لها: على اساس انه طفل مغرر بيه مش عارف سياسة الامم المتحدة وهم بيعملوا ايه طول الوقت؟ ولا على اساس انه فاكرنا بريالة وانا حاجي افهمه اننا مش بهايم ومش بريالة واننا فاهمين هم بيعملوا ايه بالظبط؟
أنا آسفة.. بان كي مون غير مرحب بيه
والحاجة الوحيدة اللي ممكن اعملها ازاء زيارته هو اني ادعو لوقفة احتجاجية يوم ما ييجي عشان نقول له: 
انت غير مرحب بيك.. 
--------
انا عارفة ان البنوتة المسكينة اللي وقعت تحت ضرسي من غير ذنب دي اكيد كلمت شباب كتير، وكالعادة مش بيقولوا
بس نصيحة لوجه الله.. وانا مش بازايد على حد ولا باخون حد انا بانصح لوجه الله:
بلاش تحضروا الاجتماع، اذا كنتوا مش عايزين نعمل وقفة احتجاجية نقول له اطلع برة - وكان مفروض نعملها لما كلينتون جات - يبقى بلاش تحضروا، حيبقى موقف سياسيا مش صح، واسهمكم حتقل في الشارع وانتوا في عرض سهم واحد واظن الاستفتاء اثبت كده ولا ايه؟ 
خدوا موقف مشرف اذا ما كانش عشان عدم مقابلته حتمية اخلاقية، يبقى تعاملوا مع الموقف بشكل برجماتي وخدوا بنط عند الناس وطلعوا بيانات
(طبعا المنطق البرجماتي ده موجه لليبراليين اللي ماشيين بمبدأ: وايه المشكلة؟.. فيه مشكلة، على الاقل مشكلة مصالح طيب مدام ما بتفهموش غير اللغة دي)
لما كلينتون جات كلكم رفضتوا تقابلوها
بس كان واجب عليكم ما تخافوش، كنتوا طلعوا بيان وقولوا انتوا ليه رفضتوا تقابلوها، مش تطبوا ساكتين كده، انتوا غلطتوا، بعد ده كله مش عارفين ان اللي في ايده موازين القوى الحقيقة هو الشارع؟ 
هو جه ولا لسه الراجل؟
لسه مش كده؟
طب جاي امتى؟ التلات فعلا زي ما انا فاكرة ولا انا مخي فوت؟ 
المهم.. انا شايفة ان بيان ووقفة احتجاجية حتبقى حاجة ممتازة، ممتازة على كل المستويات، اخلاقيا، وسياسيا كمان
انا قلت اخلص ضميري من ربنا عشان ماحدش يرجع يقول لي ما قلتيش من بدري ليه

25 comments:

mido said...

ائتلاف الثورة رفض مقابلتها فعلا وطلع بيان

Unknown said...

نوارة الله ينور عليكي , انا بصراحة حاولت اتصل بيكي بس للاسف فشلت فشل زريع, وبعتلك ايميل قبل كده بس انا هعتبر ان ما اتحلقليش وانك مشغولة - اه جبت رقمك منين سؤال وجيه من ناس في الائتلاف لو دماغي فاكرة كويس - عموما مش ده موضوعنا, انا عايز اقول ان موضوع عدم محاكمة مبارك , ولا اي حد من رجالته الدراعات اليمين فارسني , لا زكريا عزمي ولا صفوت الشريف ولا فتحي سرور. من الاخر حاسسس اننا بنتضرب على قفانا, وحكاية ان فيه ضغوط عربية عشان ما يتحاكمش والكلام الي يفرس ده , انا شايف ان احنا ننزل وقفة ما نروحش لغاية ما يمسكوهم من قفاهم, او فكرة اننا نشد الرحال على شرم الشيخ, كانت فكرة حلوه مش عارف وقفت ليه؟ انتي ايه رايك نورينا

mostafa alzanaty said...

نوارة هو هتبقى قى مشكله لو مصالح امريكا بقت معانا مثلا ...بس واحنا فى موقف قوة
بمعنى انها تبقى مصالح مشتركه.....ووفى نفس الوقت ما نخونش اى دولة شجيجه لنا عشان احنا هنبقى فى موقف قوة وقتها

Unknown said...

ائتلاف الثورة ده تبعنا

مش المشكلة في ائتلاف الثورة لأن مواقفه الميزان، ومع ذلك بيتشتموا برضه يا عيني زي ما باتشتم انا.. المشكلة في بقية الائتلافات

Unknown said...

ساسا الزناتي

هو حضرتك بتحب انور السادات مش كده؟

باين من كلامك كده انك بتحبه

بس بص على تبعات سياساته اللي عملها وما عرفناش نخلص منها لحد دلوقت اقربها الدستور اللي احنا محتاسين فيه ده وانت تعرف ان طريقة تفكيره غلط ويا ريت ما تبقاش تتأثر بيه

Mohamed kharoub said...

الله عليكي يا نوارة الانتصار

Unknown said...

من قال لا لم يقرا الشارع المصرى كويس ياجماعة هناك فجوة كبيرة جدا بين المسمين نفسهم مثقفين والشارع المصرى انا من حكم عملى فى العمل الخيرى فى المناطق الشعبية اقول لكم ان الاحزاب المصرية دى كلها فى الطراوه دول ناس خارج نطاق الزمن والواقع وفاكرين نفسهم ليهم راى - الراى فى الواقع لمن يلتحم بالشعب وهم التيارات الاسلامية بجميع اطيافهم ومن يريد ان يحكم مصر لا بد ان يدخل من بوابة التيار الاسلامى غير كدة مش هاينجح

الفت سلطان said...

ايوة احنا كان شكلنا زفت لما التوانسة عملو مظاهرات ضد كلينتون علشان موقف امريكا من ليبيا, و احنا هنا خليناها تتمشي في التحرير و تسلم علي الاطفال :(

nour1971 said...

انا حا اسألك سؤال ملوش علاقه لالي انتي كتباه عن بان كي مون و يا ريت تردي عليا. انتي مش واخده بالك انهم بيلهوا الشعب بالتعديلات الدستوريه بئالهم مده و الناس كلها سابت محاسبه رئوس الفساد و محدش جاب سيره علي المحاكمه بتاعت المخلوع و + اخبار زكريا عزمي علي صفوت علي فتحي شرور علي ميد شهاب علي ............ كل دول فين من انا حاسه ان الناس نسيت كل دول و الفساد اللي كان منتشر في اليلد و عماله تتخانق اه و لا لاءه و نسينا الاساس اللي لازم نحاكمهم مش عارفه كلامي صح ولا وجهه نظري دي غلط بس ده احساسي كل المسيحين و المسلمين اللي اعرفهم بقالهم اسبوع بتخانقوا علي التعديلات و يابه الاهم من الدستور اللي كده كده حا يتغير

Unknown said...

نوارة قليلي الله يخليكي ايه رايك في الي قلته؟؟

Unknown said...

http://www.gn4me.com/gn4me/details.jsp?artId=3923449

بصي الرابط ده

Unknown said...

nour1971
هو ده الي انا بقوله, نواره انا حاولت اوصلك ثاني وفشلت. عموما احب اسمع رايك كاحد افراد جبهة حماية الثورة في المسئلة

Anonymous said...

يسلم فمك يا احلى نوارة د ا لو كل المصريين زيك كنا بقينا احلى واجمد بلد فى الدنيا بصراحة بقى انا عايزاكى ترشحى نفسك لرئاسة الجمهورية وساعتها هتعلمى الامريكان وولاد الكلب الصهيانية الادب على حق

Unknown said...

الله يكثر من امثالك انتم ياشباب رواد الحرية الكلمة والموقف ، أتمنى لو تضلوا على الموقف دا لانه دا الي بيخلي العرب يرتفع نجمهم مرة اخرى في السماء والعزة للاسلام، بنت اليمن

Unknown said...

مشاهدات لملصقات تهاجم الإخوان المسلمين بالمنيا وتصفهم بالحزب الوطني الملتحي

http://www.youtube.com/watch?v=OMX8d1zhG6U

بهيج الشرير said...

والنبي ياأبلتي أنا عندي سؤال! ليه اللبو المخلوع (ملك الفياجرا وقاهر الهكسوس سابقا) لسه عايش هو وعيلته بإمتيازات ومخصصات رئيس الدولة؛ يعني ليه الحرس الجمهوري لسه بيحرسه وإيه العربيات دي كلها اللي في شرم الشيخ و بعدين القصر اللي قاعد فيه ببلاش ده لازم يدفع تمنه أو يرجعه للدولة

سؤال تاني؛ إيه أخبار الواد إبن أخت عفاف شعيب مفجوع الريش والبيتزا؟ المفروض يكون إتفطم ودلوقتي بياكل كوارع ولحمة راس ومخاصي

يقول أنى امرأة said...

عجبتنى اوى وانتم فى عرض سهم واحد ... اظن ان فيه ناس كتير محتاجين يعتذرو على موقفهم تجاة اى حد قال نعم لانهم زى ما الحزب الوطنى ما قال اول الثورة ان كل فى التحرير اخوان اتقال بردو ان كل الى قال نعم اخوان او جهله ... انا حسيت بالعنصريه الشديدة و بنظرة التعالى تجاة اى حد كان مقتنع بنعم

محمد صبرى said...

موقفك مشرف كالعادة يافندم

hayat ank said...

فعلا عظمه على عظمه ياست برافوا عليكى تانى هاقول الى عايزين يشوفوا محمد الظواهرى اتاخد ليه وفين والى بيسالوا هو النظام بعتاولته لغايه دلوقتى ما اتحاسبوش ليه وهما بره لغايه دلوقتى ليه استغاثه ياهووووووووووووووووووووووو اسمعوا صوت الراجل ده هو الى عنده الاجابه ناصر امين مدير المركز القومى لاستقلال القضاء الراجل بيقول ثلاثه مؤسسات لابد من تطهيرها عقب اى ثوره لو عايزينها تنجح تتعمل لجنه نحايده اسمها العداله الانتقاليه الجنه فيها ممثل قضائى اول مهام الجنه دى هو تطهير الشرطه القضاء الاعلام وبعدين باقى مؤسسات الدوله ولجان الحقيقه والمصارحه تزيل القيادات او اول طبقتين من كل مؤسسه وتحاسبهم وبعدين القيادات الصغيره والمدان يحاسب وتوجد جلسه يعترف فيها المخطئ بخطئه امام الضحيه وتحدث عمليه تطهير علنيه وبكده الشعب يتطهر ونبنى مجتمع جديد وده بعد تحقيق القصاص والمحاكمات العادله بعيده عن النظم الموجوده حالياهو ده الحل التطهير والا سلمولى على الثوره ومصر هاتبقى كسكسى على حمصى وادينا شوفنا فى اسبوع واحد حدثين تلاته واضحين من مافيا ومليشيات وناس بتاخد طارها بنفسها وبتظلم ناس تانيه اخرها عمله السلفيين والاخوان السودا شويه وكلنا هانحارب بعض

hayat ank said...

يعنى لا هايكون فى محاكمات لصفوت ولا زكريا ولا سرور وهما هايلعبوا على كيفهم ولا راس النظام نفسه دانا سمعت واحد من الاهرام اشهر مؤسسه اعلاميه بيقول احنا نحاسب سوزان وابنى الرئيس السلبق لان جوده الملط مش هايقدر يقف قدام المخلوع ويحاسبه ولا القضاء مش هايقدر يحط المخلوع فى القفص ولا كمان ميييييييييييييييييييييين ومش عليزه اقول اكتر من كده احسن تزعلى يانونو

hayat ank said...

ايوه فى عرض سهم علشلن الى حصل امبارح 4 من 14 بالزمه خيبه قويه بيقولوا% 77

The Dagger said...

Nawara,

Totally agree with you!

Nicholas Urfe said...

اولا تحياتي للموقف الحكيم يا نوارة ،،

من ناحية اخرى ، الائتلاف صحيح طلع بيان ، لكن احنا مش بنتكلم على الائتلاف بس، في ناس راحت ، واعتقد انا شفت لقطة اسراء عبد الفتاح كانت قاعدة مع كلينتون وكان في شباب غيرها لكن مش فاكر اساميهم

Nicholas Urfe said...

لما بعض الشباب راح قابل كلينتون ، بعض غير المصريين ممن اعرفهم استغلوها فرصة للتشكيك في مصرية الثورة !

Nicholas Urfe said...

@sfikhair

الخطاب الاسلامي الحالي اصلا بطبيعته شعبي وقريب من قلب الجماهير ، والدكتور حسن حنفي كتب من اكثر من 20 سنة ان الوصول للجماهير هيكون عبر تطوير الخطاب الاسلامي، وعمل اتجاه اسمه اليسار الاسلامي وعمل شمروع نهضة قابل للتطوير،،

مش قصدي الفت النظر لحسن حنفي قد ما غرضي هو بدء التفكير في كيفية تطوير عمل كل من هم ليسوا اخوان ولا اسلاميين كي يصلوا لرجل الشارع ، الذي هو بالمناسبة لا يوصف بالبسيط ( اصل في ناس يقولك رجل الشارع البسيط ودي بحسها قلة ادب )