Sunday 31 January 2010

السر مش في جدو.. السر في التليفون اللي في الحمام

 تحديث:
ماما: علاء وجمال مسافرين على حساب باباهم وللا على حساب ابو الهول؟


تحديث:
ماما مصممة تتابع احداث الماتش بمنتهى الثقة
الجزيرة بتقول: الناس تهتف باسم جدو
ماما: الله.. غسان بن جدو ايه اللي وداه الماتش؟ 
ثم اضافت: هو ده حسن شحاتة؟ طب ما يترشح للرئاسة، لو نزل قدام البرادعي ح يكسب، هو البرادعي جاب لنا جون؟
وبعدين بصت على الناس في الاحتفالات وهي بتولع نار وراحت مزعقة لهم في التلفزيون: بس يا ولد انت وهو.. ليه كده تلويث البيئة والفوضى دي
وبعدين اتنهدت وقالت: يوم اعلان الوحدة بين مصر وسوريا الناس كانت عاملة كده بالظبط
انا قاعدة مع امي النهاردة لانها معلش تايهة شوية في الليلة دي، واي تجديدات ح نوافيكم بالتفاصيل
----------------
اكيد حد من البعثة المصرية اللي مع المنتخب قاعد على التويتر، عادي يعني ممكن يبقى حد مقرب من حسن شحاتة والمنتخب متابع بالتليفون
لأننا كنا قاعدين على التويتر عمالين ندي تعليمات لحسن شحاتة ونفذها، فيه واحد طلب من حسن شحاتة يطلع متعب وينزل جدو عمل كده
قبلها فيه اخت طلبت في نداء الى علاء وجمال مبارك انهم يخرجوا خمس دقايق خلي الجون ييجي بقى
وانا طلبت من اصحاب القلوب الرحيمة ان حد ياخدهم خمس دقايق بس يعزمهم على قهوة وشيكولاتة برة، مافيش شوية وراح جدو جايب الجون
مش ممكن انا عمري ما شفت ماتش كده، كان راكبه النحس بطريقة غريبة وكذا جون ضاع برضه بطريقة غريبة، والعيال جالهم حالة حول ما تفهمش
لحد ما، اكيد اكيد اكيد، حد راح لعلاء وجمال قال لهم يافندم جالكوا ترانك في الحمام وراحوا قافلين عليهم لحد ما جدو جاب الجون
مالهاش تفسير الا كده
-------
هو انا عايشة في بلد غير البلد، اصل الشوارع فاضية، رحت الشغل اول ما جون جدو جه قلت الحق قبل ما الناس تنزل، نزلت من الشغل وجيت في ربع ساعة من كتر ما الشوارع فاضية
هو حتى الاحتفالات بالماتشات حددوا لها اماكن معينة وعلى السادة المحتفلين خارجها ما يتوجدوش خالص؟ 
------
ماما بتقول لي: احنا بنلعب مع الجزائر برضه؟
- لا يا ماما دي غانا
- والنتيجة كام؟
- صفر صفر
- وده حلو وللا وحش؟
-.......
بعد شوية
انا: جوووووووووووووووووووووووون جدوووووو جدوووووو
ماما: ايه فيه ايه؟
- جون يا ماما جون
- ده ايه؟
- احنا جبنا جون
- وده يبقى ايه؟
- يبقى كويس
- كسبنا يعني؟
- اه كسبنا
رحت الشغل ورجعت
ماما: ها؟ كسبنا وللا خسرنا؟
- يا ماما باقول لك كسبنا
- وبعد كده ح يحصل لنا ايه؟
- مش ح يحصل لنا حاجة اخدنا كاس افريقيا
- وح ياخدوا فلوس؟
- آه
- كتير؟
- ايوة يا ماما ملايين
- طيب بقى... يبيعوا ابو الهول ويدوهم فلوس.. امال ح يجيبوا لهم فلوس منين؟

قاطعوا عمرو اديب ومدحت شلبي

ما يوصلش الامر انهم يصبعوا لنا على الهوا






الدقيقة 5:53


وكمان يقولوا نكت قبيحة وعنصرية على االهوا
مافيش حد في الدنيا بيعمل كده، ولا اوبرا وينفري اللي بتقدم برنامجها لاقبح شعب في العالم كله وكل كلامهم فاك ومابين فاك وفاك آس وشيت
وفيه فرق ما بين الاعلام الشعبي والاعلام المهني، ومن سمات الاعلام الشعبي اللي الناس بتتف فيه وتشخر وتصبع وتعمل كل اللي هي عايزاه ان اللي بيعملوه ما بياخدوش فلوس عليه
ما بياخدوش فلوس عليه
عشان الـ..
liberté de penser

ده واحد بيقول شيت في اغنية شعبية، مش ح يطلع اعلامي فرنسي كبير يقول شيت هو كمان
اذا كانوا فاكرين انهم بيقلدوا المدونات عشان يتقربوا من الشعب يبقى اتهبلوا رسمي فعلا، للدرجة دي هم عارفين انهم مكروهين وبعاد عن الناس؟ وللدرجة دي اغبيا كمان؟ ايه الفوضى دي؟ مش كفاية خرجين اعلام ملقحين على القهاوي وخريجين الملاعب هم اللي بيشتغلوا اعلاميين؟ كمان مش عارفين يدوهم دورة في الاعلام تعرفهم الف باء المهنية؟
طب ما امتحنوش طيب؟ امال حسن حامد قبل ما يعينا فحتنا امتحانات ليه؟ الله يرحم ايامه الراجل ده، فلتة الزمن، لو جاله علاء مبارك عشان يتعين وسقط في الامتحان ما يعينوش واللي مش عاجبه مطرح ما يحط راسه يحط رجليه، امال هم طيروه ليه؟ 
حاجة تقرفففففففففففف



طالبان

في ظل هذا الظرف الانساني والاجواء الحماسية اللي بثها زعيم الامة عيلاء موباراك لازم الواحد يسجل اعجابه وانبهاره بطالبان
اللهم صلي ع النبي، ما شاء الله لا قوة الا بالله، ربنا يحميهم، مديين الامريكان علقة ما اخدهاش متحرش في اتوبيس وغارسين ضوافرهم في لحم وش الامريكان وكرازاي: يهديكوا يرضيكوا.. ابدا، قاعدين على على الارض مربعين كده بالجلاليب والتونيك والشباشب وتحس انهم راكزين على صدر الامريكان وهاتك يا هبد وهربدة فيهم لما خلوهم ما يسووش تلاتة نكلة في سوق الكانتو وضحكوا عليهم اللي يسوا واللي ما يسواش والامريكان بيكابروا: شيلوه من فوقي لاموته.. طب نتفاهم طاه.. يتفاهموا مع مين؟ دول عالم فاقدة باينهم وقطر مالوش فرامل ويا عيني ماسكينهم: انت مش لابس الطاقية ليه؟ من كتر الضرب اللي نازل عليهم مسكوا في الايطاليين وقالوا لهم انتوا ليه مش بتضربوا زينا؟ اكيد بتدفعوا فلوس لطالبان عشان ما تضربكوش 
حاجة تصيب الانسان بالاندهاش فعلا
ما شاء الله، ربنا يزيدهم وينفخ في صورتهم ويأييدهم.. اديله ما تريحوش، انا عايزهم كده كل ما يلاقوا نفسهم فاضيين يخطفوا لهم عسكري امريكاني وما يموتهوش.. يلبسوه جيبة فوق الركبة وعليه الصديري اللي هم بيلبسوه فوق التونيك ده وصندل بوردة برتقاني ويخلوه يلف حوالين الجبل تلاتين مرة وهو بيقول: نحن غرابة عت عت، ويصوروا ويبعتوا لنا
مافيش حد قادر على الامريكان ولا بيفش غلنا منهم الا دول.. ربنا ينصرهم ويجبر خاطرهم زي ماهم جابرين بخاطر الغلابة اللي واخدين على قفاهم ومش عارفين يعملوا حاجة
وماحدش سائل فيهم ولا بيساعدهم ولا حتى بيشكرهم، والنكتة انهم هم نفسهم مش مهتمين يعرفوا راي اي حد فيهم ولا عايزين مساعدة من خلقة حد، وتبص في وشهم ولا حتى تحس انهم تعبانين، اللهم صلي ع النبي، اللهم صلي ع النبي، الله اكبر في عيني وعين اللي شافهم ولا صلاش ع النبي 
هو احنا لو خطفنا واحد منهم وحللناه جينيا وحاولنا نستنسخ منه هنا في مصر بدل الوكسة اللي احنا فيها دي، ح ينفع؟ وللا الراجل ح ييجي يقعد اسبوع وشوية وتلاقيه نازل بيشجع في ماتش حرس الحدود ومزارع دينا؟ 

عاااااجل: قناة العبرية شالت خبر حكم ماتش مصر والجزائر

 ميدو جاب لي الكود ده ارجوكوا تتفضلوا تاخدوه





قشطة جدا، قناة العبرية مش مكفيها كل اللي هي بتعمله، كمان مش بتشتغل بمهنية، يعني لا موقف مشرف، وبيسرقوا فيديوهات من الجزيرة وكمان مافيش مصداقية؟ اختصر وقول شامبانزي
قناة العبرية نزلت خبر طويل عريض وجه عليه تعليقات وبعدين شالته 
بس على مييييييييييييييييييييييييييين
يعني الخبر طلع سيفون سبورت
على الله حد يجيب لنا خبر من قناة العبرية دي، وانا عايزاكوا بقى تشردوا لقناة العربية دي وتقولوا في كل حتة انها الفت الخبر وتوزعوا السكرين شوت ده في كل حتة ينوبكوا في قناة العبرية ثواب


Saturday 30 January 2010

امن جامعة حلوان يعذب سائق ميكروباص

التفاصيل هنا

للمهتمين بالماتش.. للاسف، غالبا ماتش غانا طار خلاص

تحديث:
ميدو اخد سكرين شوت للخبر بتاع العربية في حال ما العربية شالت الخبر، وهو متوقع انها تعمل كده، ليه؟ لان الخبر ده مش موجود في اي مكان صحرا ان كان او بستان الا على العربية، ولا حتى على مواقع الكورة بالعربي والانجليزي والفرنساوي مافيش
يعني قناة العبرية دي مش اول مرة في حياتها تضرب اخبار وتسرق فيديوهات من الجزيرة، وبعدين انا قدام الجزيرة اهو ومافيش اي اثر للخبر ده
ان شاء الله ح نعمل لها فضيحة محترمة على بكرة كده وللا بعده
بس انا برضه مش حاسة ان دخلت جمال وعيلاء على البطولة ح تعدي بخير

تحديث:
العببببب يا معلللللللللللللللللللللب، بشاير سفر جمال وعيلاء
الحكم بتاع ماتش مصر والجزائر ح يتوقف، دول لسه في الطيارة ياربي، امال لما يوصلوا... يا دهوتيييييييييييييييييييييييي
انا سمعت ان عيلاء بيشجع الزمالك وتهربت من الحقيقة دي... لو سمحت يا كابتن، الاهلي محتاجك، عاطف عاطف فيه مكان في الاهلي، سيبنا شوية الله لا يسيئك


تحديث:
بالنوسبة لتوقعات الماتش (انا عادة باتوقع نتائج الماتشات وبتصيب زي قلب الام) بس المرة دي مش عارفة اتوقع، البنورة السحرية مغبشة عشان علاء دخل فيها وعفرها
الماتش دلوقت بين ايادي رب كريم
الخوف بقى ان يكون المشجعين الجزائريين لسه موجودين ما سافروش، وهم غالبا ما سافروش لسه، لو اتغلبنا من غانا ح يرجعوا يقولوا لنا المشجعين الجزائريين كانوا لابدين لنا في الدرا وضربونا عشان نتلهي عن هزيمة الماتش زي المرة اللي فاتت
عموما، انا عشان اشبع تعطشي الكروي قاعدة اتابع ماتش مابين فريقين اسمهم الشرطة والجيش لبلد عربي مش عارفة هو ايه؟ وماتش ايه، فاشل فاشل فااااااشل، العيال بيتكعبلوا في ركبهم
:((
منك لله يا علاء
---------
انا ما اعرفش فردوس رايحة وللا لا، بس يمكن بسام رجب واحمد عبد الوارث ح يروحوا تاني، ولو ما راحوش
دلوقت في عاملين في منتهى الخطورة بيهددوا ماتش بكرة
الاول: ان المنتخب المصري مش خايف وواخد ثقة في نفسه، وهو عادة ما بيلعبش كويس غير لما بيبقى خايف
التاني والاهم والاخطر: ان علاء وجمال رايحين ومعاهم مشجعين
ليه كده؟ ليه؟ ده انا الشرانية اللي بقيت اكره الكورة من التأثير السلبي اللي عاملاه على الناس ما يهونش عليا انكد عليهم للدرجة دي، اخري لما يفرحوا بالفوز اتلوي واخد لي جنب، لكن ليه الاذية؟ ليه؟ في النهاية دي ناس غلابة، واللي حاصل لهم مش بايديهم، قدر ومكتوب
لا حول ولا قوة الا بالله
انا لله وانا اليه راجعون، الانسان مها كان بني ادم برضه وعنده قلب، ذنبها ايه الناس دي؟ وانا... انا ذنبي ايه؟ انا كنت باحب الكورة زمان، نفسي اتفرج على ماتش واحد بمزاج يا ناااااااااااااااااااااس
ليه لازم يحطوا لي دبانة في كوباية القهوة، ده ايه قلة المزاج دي؟ طب ماتش غانا ده انا كنت ناوية اشجع فيه، يعني فوتوا مني ماتش الجزائر وما شجعتش، كمان ح يفوتوا مني الماتش ده؟
دلوقت حسن شحاتة قدامه معركتين، معركة انه يكربج المنتخب ويخوفه عشان يلعب ماتش كويس، ودي سهلة، الجيل ده بيسمع الكلام زي عساكر الامن المركزي
والمعركة التانية مع النحس
ودي بقى في ايد ربنا... بس المهم استعدوا نفسيا لاي حاجة بقى

في انتظار الحثالة

مقال وائل عبد الفتاح النهاردة

Friday 29 January 2010

هو احنا مش كسبنا؟

وعلاء مبارك قال الاوامر المرة دي التهدئة؟ من امبارح قلة الادب ليه؟
 ايه ده
وايه ده 
وده 
وده 
على فكرة الاعلام كده شراشيح في الحزن والفرح؟ وبعدين كل الناس اللي عندها حد ادنى من المخ عندهم قرف من الحالة دي، انا امبارح اتفقت في الراي مع ناس عمري في حياتي ما اتفقت معاهم في حاجة، بس كلنا قرفانين من الحالة دي، وكلنا كنا بنشجع كورة من زمان
والناس عمالة تقول دي مش كورة
لا، دي كورة، اقصد اللي في الملعب، دي كورة
البلدين اللي جاي منهم منتخبين الكورة هم اللي ما بقوش بلاد خلاص
 

هو تامر امين واعي للكلام اللي بيقوله؟

لقيته لقيته، العيال جابوهولي على التويتر:
استمع الى الالبون الجديد لعيلاء مبارك: اللي ما يحبناش ما يلزمناش

وبدأ بالعزاء للاخوة المصريين وباقول الاخوة المصريين في نجع حمادي، حبيت بس اقول دي عشان احنا كده يعني...
كده يعني ايه؟ كده يعني في السليم؟ وبعدين ادوس انا وللا تدوس انت
وبيقول لنا في وشنا ان فيه تعليمات بتهدئة والا انا لو اتكلمت انت ما تبقاش في الاستوديو :((

ده احتراف من الاخ عيلاء ان التصعيد كان باوامر، وبيقول لنا بقى دوقت الاوامر الجديدة والا خالد الغندور مش ح يبقى في الاستوديون
هو عمره العقلي كام سنة؟



ولو سمحت ما تضحكش كده عشان احنا بنهدي!!!!!!!!!!! قلتوا له الاي كيو كام؟ وللا كلهم بقوا بيستحطوا نفس الصنف وللا ايه؟



وقال: فيه انجازات في مصر تانية غير الكورة...
ايوة، انا كنت فاكراه ح يتكلم عن الصناعة
قال لك: فيه العاب تانية كتير غير الكورة عايزين نركز فيها ونشجع
هههههههههههههههههههههههههههههههههههههههههههههههههههههههه
الله يسعدك يا امور



اولا انا سمعت مكالمة علاء مبارك مع مدحت شلبي وعلاء مبارك بيقول لمدحت شلبي: والله انا كان نفسي اكلم حضرتك من زمان

:)
بصراحة صعب عليا، كان نفسه يكلم مدحت شلبي ليه؟ عشان مشهور؟ ما داهية يكون لما بيقابل اللعيبة بيخليهم يمضوا له على الجبس، وللا لما قال انا لما جه الجون الرابع كان ح يغمى علي!!!! ده كبير، عنده تمانية واربعين سنة
المهم، انا احب اشوف حفلة اللي ما يحبناش ما يلزمناش، عشان عبد الله كمال كان على التويتر امبارح وفيصل بيقول لي ده قال نفس الكلمة
---------
المهم بس، ياريت حد يكون سجل الاعترافات الخطيرة لتامر امين
انا مش مصدقة الطفرة الجينية اللي حصلت دي، تامر امين طالع امبارح يقول: الحكومة لازم تشكر المنتخب لان الناس اللي خارجة دي فرحانة فيها واحد جعان فيها واحد فقير
الكلام ده واحد كتبه على التويتر، رحت فاتحة على برنامج البيت بيتك
تصدقوا بلا إله إلا الله؟
عادها تاني عشان ربنا كاتبهالي
سمعته بودني بيقول الآتي: انا باكرر فعلا الحكومة لازم تشكر المنتخب، لان دي الحاجة، مش عايز اقول الحاجة الوحيدة اللي بتفرح الناس، بص على الناس، الناس دي فيها اللي مش لاقي يعالج ابنه، اللي مش لاقي يعلم ابنه، اللي ح يروح مش ح يلاقي العشا، وكلهم فرحانين فعلا الحكومة لازم تشكر المنتخب
!!!!!!!!!!!!!!!!!!!!!!!!!!!!!!!!!!!!!!!!!!!!!!!!
وفعلا انا لازم اشكر تامر امين

احلى تعليق على المباراة

واحد مصري طلع يقول: الحمد لله على النصر ده وبنقول للمنتخب الجزائري هارد لاك وان شاء الله يطلعوا كاس العالم بفكر جديد
بالنوسبة للاخوة في غزة اللي نزلوا يحتفلوا، انا متشكرة ليكوا على ذوقكوا قوي، ميرسي ليكوا كتير، وفيه زميل بيقول لي ما يمكن لما يعبروا عن مشاعرهم ناحيتنا يحننوا قلب مبارك! هأ

فري فري موباراك

Thursday 28 January 2010

تحذير الى اهل غزة

لو شفت خلقتكوا تاني في الشوارع نازلين تحتفلوا بفوز مصر زي ما عملتوا المرة اللي فاتت انا ح انزل اشجع الجدار الفولاذي واغني: فري فري موباراك
انا تعبت من هاني شاكر خلاص

Wednesday 27 January 2010

كلام عجبني عن فيلم افاتار

انا اصلي كنت محرجة من نفسي ومخضوضة على نفسي في ذات الوقت، ومش فاهمة الناس مهبولة على الفيلم ده ليه؟ يمكن عشان الدعاية؟ مش معقولة الدعاية تعمل ده كله، ده على رأي مواطن مصري عامل زي بوكاهنتس

السفارة الفرنسية بالقاهرة تحذر رعاياها قبل مباراة مصر والجزائر

ايه ده؟ هو احنا ضربنا الفرنساويين عشان الجزائر غلبتنا؟ يا عييينييييييييييييي 
حراااام
 هم الجزائريين ح يزعلوا من ضرب الفرنساويين؟ دول ح يفرحوا، ده فرنسا هي اللي كانت محتلة الجزائر، يعني الجزائريين لما يحبوا ينتقموا منا يضربوا الانجليز؟ هههههههههههههههه يا حرااام
خلاص بقى نخلي بالنا، عشان لو الجزائر غلبت مصر الخميس اللي جاي ياريت كل رعايا ساحل العاج يهاجروا لانهم بيتكلموا فرنساوي وفي افريقيا وكانوا بيلعبوا مع الجزائر ماتش واظن واضح ان ضرب البوركينافاسويين حاجة تجرح مشاعر الجزائريين فارجو المواطنين المصريين الحفاظ على رابطة الاخوة بينا وبين الدنمارك وعدم التعرض خاااااااااااالص لرعايا تايوان اللي في امريكا
نهدا شوية

خلاص بقى، والنبي الجزائريين لو لسة زعلانين مننا يبقى دمهم تقيل فعلا، بقى احنا ناس يتزعل منها؟ ايه البواخة دي... تاكلوا عسلية؟

عمرو اديب جاب لي بقع في وشي

لا مش هزار، ده بجد، اول ما خلص حواره مع خالد مشعل وشي نطر بقع انا مش عارفة ده ينفع طبيا ده؟ ينفع الواحد تجيله حساسية من عمرو اديب؟ اهو نفع اهو
الضكاترة بقى يعملوا بحث على الموضوع ده، ده غير اني باكلمكوا والصداع النصفي ماسك الجنب الشمال
انا ما كنتش كده؟ انا كنت زي الوردة المفتحة، وبعدين ظاهرة الصداع النصفي ابتدت تبان اعراضها عليا لما بازعل في 2009 بس ظاهرة وشي اللي نطر بقع دي لسه ظاهرة النهاردة بس......... الحمد لله، وصوابعي سخنة، كأن حد حاططهم في مية مغلية
المهم سيبكوا بقى من المشتشفى دي، احنا لسه ياما ح نشوف تحت نير عوكل وتوابعه واتفرجوا على الحلقة، بصراحة انا اول ما ابتديت الحلقة قلت: هو خالد مشعل ايه اللي عمله في نفسه ده؟ ازاي يقعد ويكلم الشخص ده اساسا؟ خلاص مافيش توك شو غير ده؟ مافيه منى الشاذلي، مافيه المسلماني، مافيه محمود سعد، انشالله تامر امين، انشالله معتز الدمرداش، مالهم دول مش بني ادمين؟ ما يجيش غير على القاهرة اليوم ويشمها؟ وبعدين مؤدب قوي، فقعني بادبه، والتاني قليل الادب، لا مش قليل الادب، الادب ما عداش من الشارع اللي جنب بيتهم اصلا، ماحدش حاول يربيه اصلا ده تربية الطبيعة كده
لكن سبحان الله، اتبع معاه استراتيجية حماس: الصمود. لحد ما عمرو اديب بقى بيتمرجح في الاخر وقال: مع حلقة جديدة غدا ابقوا معنا
!!!!
اتفرجوا
الجزء الاول بعنوان: ليه بتعملوا مظاهرات؟ احنا زعلانين من الموضوع ده



الجزء الثاني: معاهم فلوس يسرقوا ليه؟





الجزء الثالث: لو مقدر مصر كنت مضيت





الجزء الرابع والخامس والسادس الى الاخر موجودين هنا انا مش قادرة خلاص دلوقت حاليا جنابي ابتدت توجعني
فضحناااااا فضحناااااااااااااااا

وابقوا اسألوا عليا بكرة، وصيتكوا العيال يا بتعة
اه نسيت، بعد ما تتفرجوا، البقية اللي ح تفضل عايشة تدخل هنا وتشارك 


Tuesday 26 January 2010

ماحدش بيشجع كورة بالطريقة المريضة دي

ماحدش يقول لي تشجيع الكورة كده في كل حتة في الدنيا.. في كل حتة في الدنيا برامج التوك شو بتطلع قبل الماتش بيومين تقول: ح يضربونا؟ وللا مش حيضربونا؟ لو ضربونا نضربهم؟ وللا المسامح كريم؟ 
وكدبوا الكدبة وصدقوها ولسه بيقنعوا الناس ان فيه حاجة حصلت في السودان، اذا كان خلاص الناس فاقت وعرفت انها اتاكلت على قفاها يفضلوا يذيعوا الفيديو بتاع تونس بتاع المطاوي لسه؟ 
والجزائر بيستعدوا للمعركة مع آل فرعون
الاتنين دول مالهمش كورة لمدة خمسين سنة، والله الواحد زعلان عليهم، انا حاسة اني ظبطت وكيل وزارة بيلعب بلي في الشارع مع العيال
نصيحة لكل الناس اللي صعبان عليهم وكيل الوزارة بقى، خطة الحفاظ على الصحة:
1- بلوك عمرو اديب
2- شفر كل قنوات الرياضة المصريثة
3- ما تفتحش جرايد جزائرية.... بصراحة مافيش غيركوا بيقراها
4- اللي على التويتر: بلوك لكل جحافل معركة الجزائر السابقة ولكل اللي بيعمل لهم ريتويت
من دلوقت ولحد بعد الماتش بعشر ايام خمستاشر سنة كده

ابراهيم عيسى جات له حالة التلطيش

هههههههههههههه باحبه قوي لما يبقى قاعد كده ومرة واحدة يروح قايم جايب كل الناس من شعرها وهاتك يا تلطيش بالاقلام، الحالة دي بتجيله بعد فترة من المذاكرة للواد الساقط: هاااااا، تاني، اتنين في اتنين بكااام؟ ما تبصش في السقف ركز معايا.. ها، ياللا، واحدة واحدة، ماشي احسبها على ايدك زي بعضه
واذ فجأتن يروح قايم جايب الخرزانة بقى
وانا اكيد بني ادمة مريضة عشان بافرح وانا باتفرج عليه وهو نازل بالخرزانة على الواد
البلد كله بقى جونجز!


ابراهيم عيسى


اكتشفت الحكومة منذ سنوات أن هناك جمعيات أهلية غير حكومية في مصر عاملة قلقاً شديداً وصداعاً أشد للنظام من ثلاث نواحٍ:


الأولي: أنها تتحدث عن حقوق الإنسان وتطالب بحرية الرأي والتعبير، وتفضح انتهاكات الحكومة، وتجمع رموزاً من الشخصيات اليسارية والليبرالية المزعجة والمعارضة مما لا تنتمي لأحزاب المعارضة النائمة في أحضان الحكومة وتحت قدميها.


الثانية: أن هذه الجمعيات مؤثرة جداً في قرارات وسياسات الغرب، وأن الحكومات الغربية تنتبه لما تقول هذه الجمعيات وتردده وتدين الحكومة بناء علي تقاريرها.


الثالثة: أن هذه الجمعيات تتلقي معونات من حكومات وجهات أجنبية معلنة ومشروعة دولياً، وأن الولايات المتحدة الأمريكية والاتحاد الأوروبي يضعان في ميزانيتهما مخصصات لهذه الجمعيات ويعتبرانها جزءاً من المنح للدول في العالم العربي!


الحكومة أدركت مأزقها السخيف، فهذه الجمعيات طالعة في المقدر جديد، وفجأة العالم كله بيتكلم عن المجتمع المدني والمنظمات والجمعيات غير الحكومية التي تعمل وتنشط في خدمة بلادها وأصبح لها كلمة مسموعة والأهم من ذلك أن هناك مئات الملايين من الدولارات يتم منحها وصرفها لهذه الجمعيات قدام عين الدولة التي لا تجرؤ علي محاسبة جمعية لأنها تلقت أموالاً من الخارج لأن الخارج نفسه يعطي للحكومة نفسها ولأن الخارج قد يعاقب الحكومة إذا عاقبت هذه الجمعيات!


الحكومة تعرف العفريت مخبي ابنه فين، وهذه الأنظمة التي نجحت في البقاء مدي الحياة علي مقاعد الحكم لن يأتي شوية عيال وأفندية أراذل ويضايقونها ويزعجونها بفيلم المجتمع المدني ده، هنا تألقت عبقرية الاستبداد الشريرة فقررت إنشاء جمعيات حكومية غير حكومية، يعني إيه ؟


تماماً كما استطاعت الحكومة إنشاء أحزاب معارضة غير معارضة، اسمها أحزاب وبتقول عن نفسها وبتقول الحكومة عنها إنها معارضة لكن الحقيقة هي أحزاب أخرجتها الحكومة وجهاز أمن الدولة كي تمثل أنها أحزاب وأنها معارضة وتستدعي هذه الأحزاب ساعة ما تحتاجها فتشكر في الحكومة وتشتم في المعارضة اللي بجد وتهاجم وتهجم علي حماس وحزب الله وإيران وقطر وقناة الجزيرة وحركة كفاية والإخوان وكلشنكان مزعل الحكومة، هي مجرد أحزاب ديكور تافهة صنعتها الحكومة كي تقول للخارج إن في مصر أحزاباً، وكي تحصل علي مشاركة هذه الأحزاب إذا قاطعت المعارضة الحقيقية الانتخابات، فيُستدعي بعض النكرات من بعض هذه الأحزاب كي تشارك في التمثيلية. وكما فعلت الحكومة أيضاً مع الصحف المستقلة حيث وافقت علي وساهمت في صحف تدعي أنها مستقلة بينما هي عميل نائم للنظام وأمانة سياساته يتم إدخالها المعركة ساعة الجد للتشويه والتشهير بالمعارضين والتعمية والحشد في القضايا الخارجية. وهو نفس ما فعلته الحكومة مع القنوات الخاصة التي تشتغل بعض أبواقها خدماً للسياسة الإعلامية الحكومية، وبنفس المنهج ظهرت تلك الجمعيات الحكومية غير الحكومية، وهذه الظاهرة الجديدة كانت موضع دراسة للباحثين كارولين نانزير وخميس شماري تحت عنوان (المنظمات غير الحكومية التابعة للحكومات ) تقول الدراسة المنشورة في تقرير حرية التجمع والتنظيم الذي أصدرته الشبكة الأوروبية المتوسطية لحقوق الإنسان إنه علي مدي السنوات القليلة الماضية ظهرت جمعيات داخل المجتمع المدني تتظاهر بأنها منظمات غير حكومية، وإنما هي في الواقع مرتبطة ارتباطاً مباشراً وغير مباشر بحكوماتها، كما لا يخفي تقاربها السياسي مع السلطات الحكومية، وتعرف هذه المنظمات المؤيدة للحكومة باسم «المنظمات غير الحكومية التابعة للحكومات» أو «GONGOS» بالإنجليزية. وتضيف الدراسة أن هذه الجمعيات الجونجز تتألف لجانها التنفيذية بصورة أساسية من ممثلين عن الحكومة أو أشخاص مقربين من السلطة ويأتي تمويلها- رغم عدم شفافيته في كثير من الأحيان- من مصادر حكومية في المقام الأول ولا يقتصر هدفها علي دعم تنفيذ السياسات التي تبادر بها حكوماتها فحسب، وإنما تعمل علي إضفاء الشرعية عليها دون التعبير عن أي انتقاد وفي حالات معينة تشترك هذه الجمعيات بنشاط في حملات تستهدف تشويه سمعة منظمات غير حكومية أخري «مستقلة» بهدف تقويض عملها، ويشيع هذا الوضع ـ بخاصة ـ عندما يتعلق الأمر بمنظمات تدعم حقوق الإنسان وسيادة القانون، وبوصفها عميلاً لإحباط الديمقراطية تتدخل هذه المنظمات ضمن مؤسسات الأمم المتحدة والمؤتمرات الدولية الكبري لإضفاء الشرعية علي السياسات التي تنفذها حكوماتها وتشكر وتمدح وتمجد وتعلي وتصفق لرؤساء دولها، هذه الجمعيات تملأ مصر الآن في الحقيقة وتجد علي رأسها وزراء سابقين ورجال أمانة السياسات ومليارديرات وقيادات في الحزب الوطني وتتلقي معونات من أمريكا وأوروبا وتخصص لها الحكومة المصرية جزءاً ضخماً من المال السايب الذي تصرفه المعونة الأمريكية عن طريق الحكومة لجمعيات المجتمع المدني!


لم تعد الصحافة المستقلة مستقلة، ولا أحزاب المعارضة معارضة، ولا الفضائيات الخاصة خاصة، ولا الجمعيات غير الحكومية غير حكومية، ولم نعد عارفين أدهم من بدران ولا وشنا من قفانا ومن ثم لم تعد مصر هي مصر!
-----------------


ايوة كده، بالجزززززمة والنبي الخرزانة مش كفاية، بقالك ساعة معاه على اتنين في اتنين بكام

Monday 25 January 2010

انا ابتديت استمتع خلاص

خلاص انا مش متضايقة، اقصد من حال البلد، مش متضايقة والله، ح الاقي فين بلد تضحكني كده؟ وللا حوار وزير الداخلية مع مفيد فوزي، انا عمري ما ح اسامح نفسي على اللي عملته في وزير الداخلية قبل كده، ده صعب عليا قوي، قوي، قوي
والله العظيم صعب عليا جدا
بس انا ماليش ذنب، نظام مبارك فضل مخبيه عننا وما خلاهوش يتكلم الا دلوقت، طب انا كنت ح اعرف منين؟ 
استغفر الله العظيم من الظلم يارب
شوف الانسان ممكن يبقى ظالم من غير ما يحس ومن ناحية عمره ما كان يتخيلها، مين كان يقول اني ممكن اكون باظلم وزير الداخلية
ده راجل مبتلى، كفاية نضارة مفيد فوزي وكرافتته ومنديله الموف فيهم كور بيضا
طب والله غلبان... والله حرام يا عيني
طب الحوار بيني وبينكوا، لو الدمعة ما فرتش من عينيكوا ابقى انا ما بافهمش حاجة
خلاص
ماحدش يضايقه بقى تاني

اسرائيل بتتاجر في الاعضاء في هيتي

تابعوا الناشط ده على القناة بتاعته على اليوتيوب وهو كشفهم في السي ان ان
كمان انا مش عارفة نورمان فنكلشتاين اتجنن وللا ايه؟ ناشر مقال لواحد زعلان ان فيه واحد بيقول اسرائيل بتتاجر في الاعضاء وبيقول اسرائيل بلد زي اي بلد فيها الكويس والوحش! ما كانش كده الراجل كان بعقله
ثم اسرائيل والصين من اكبر الدول اللي بتتاجر في الاعضاء، زي ما الدول العربية كده من اكبر الدول اللي بتورد المواد الخام للتجارة دي






وبعدين مين دولة رايحة تعمل خير لوجه الله هناك؟ ده فرنسا وامريكا ماسكين شواشي بعض على هيتي كأنهم بيتخانقوا على حتة تورتة، هو فيه ناس رايحة تعمل خير تتخانق مع بعض عشان كل واحد ياخد الحتة الاكبر؟ واسرائيل ممكن تعمل خير؟ عشان كده فتحت السد عشان تنزح المية على غزة بالجلدة؟ ازاي يعني؟ لا انا مش باقنعكوا، انا بارد على مونولوج داخلي اصابني بعد ما قريت المقال اللي ناشره نورمان فنكلشتاين اتغاظت منه قوي لا وواخده من هاآرتس كمان

احمد الصباغ طلع كتاب يا مينز

تشتروا الكتاب بقى

Sunday 24 January 2010

اختفاء ناشطة امريكية

وصلتتتتتتتتتتت وصلتتتتتتتت بالسلااااامة، وقعوا قلبنا
خالتها بتقول انها اتصلت بيها وح تقول لنا كانت مختفية فين


Shannon Hughes
اسمها شانون هيوز، كانت في الالف وربعميت ناشط اللي جم هنا عشان يروحوا غزة، موعد وصولها الولايات المتحدة كان السبت اللي هو امبارح، ما وصلتش، والسفارة بتقول انها مش في القاهرة
لمعرفة التفاصيل روحوا التويتر
وده الاكاونت بتاع خالتها كريستين كار انا لسه عاملة لها فولو، اي حاجة ح اعرفها ح اقولها لكوا، بس اهم حاجة، تنشروا صورة البنت في كل حتة وتكتبوا انها مفقودة، وفاقدين الاتصال بيها، لانها ممكن تبقى في خطر، وتعملوا اكاونت على التويتر وتعملوا فولو لخالتها عشان نعرف الاخبار اول باول وربنا يستر
على فكرة ما ينفعش كده، لا ينفع اللي مصر بتعمله ولا ينفع اللي امريكا بتعمله، كفاية انها قفلت سفارتها هنا وادت تعليمات للامن يسيح دم النشطاء
ومش في القاهرة على حسب السفارة الامريكية
امال فين؟ خطفوها في جوانتانمو وللا ايه؟
واحنا كمان، مش معقولة البنت تيجي تساعدنا وتتخطف كده كأننا في الادغال

هو الريث متعثب ليه؟

شفتوا الخطبة بتاعة الريث النهاردة؟ هو متعثب ومتنرفذ ليه؟ احنا ذعلناه في حاكة لا ثمح الله؟
انا ما لقيتش لثه الفيتيون بتاع الخطبة
بس خطبة ايه؟ خطبة خبطة يعني، وبيعمل بابهامه كدهو

يا مبارك يا حبيب يا مدمر تل ابيب

انا مش مصدقة عينيا.. ايه ده؟ 
دي مش اول مرة، قبل كده الجماعات الاسلامية اللي قعدت سنين مولعة في الصعيد دخلت السجن خرجت بتقول: الحسين كان غلطان ومبارك هو اللي صح
الانبا كرليس وصل بيه الامر انه قال سيدنا محمد عليه السلام ومينا بيخمن انه كان يقصد سيدنا محمد حسني مبارك
ودلوقت اتنين من خلية حزب الله؟
طب تصدقوا بقى ده ذنب الانبا كرليس عشان ظلمناه وقلنا ازاي يغير اقواله؟ اذا كان اللي بيحاربوا اسرائيل لدعوا
لا تعليق لا تعليق لا تعليق لا تعليق

لا مش قادرة مش قادرة، مش قادرة اسيبكوا كده من غير ما انقل العصيدة:


مصر بلدنا وأمننا.. واللى يعاديها يضرنا.. الحزب الوطنى بشبابه، أعدائه كتير لكن خابوا.. مصر لمبارك.. ومبارك لمصر..
يا مبارك يا حبيب.. يا مدمر تل أبيب.. يا مبارك ياحبيب النور.. دا أنت بتكره قول الزور.. يا مبارك أنت أحق.. ومفيش غيرك على حق
---
يا عيني.. يا عيني... لا حرام، حرام والله، لا حول ولا قوة الا بالله، ههههههههههه، مش قادرة ابطل ضحك... بس لا، لا، حرام، حرام والله، ياعيني لا صعبوا عليا
لا حرام، حسبي الله ونعم الوكيل
طب بس عموما دول هم اتنين بس، يمكن اتاخدوا في الرجلين كده من غير ما يبقى لهم علاقة فعلا.. وللا لهم علاقة، خلاص بقى

والنبي ياريس تسيبهم، الرحمة ربنا يخليك ويديك عمر تاني على عمرك، لهم علاقة ما لهمش علاقة هم دلوقت ما بقوش ينفعوا ببصلة، لوجه الله وحياة اغلى حاجة عندك خلاص.. طلعهم بقى حتى يتعالجوا على حساب اهاليهم بدل ما يخربوا خالص ما ينفعش معاهم ولا حتى كهربا
-----------
ههههههههههههههههههههههههههههههه آآآآآآآآآآآآآآه واحد من المعلقين:
هاهم السلفيون يعودون بنا الي العصور القديمة ونفاق الحكام وهم يتصورون كما تصور الافلام والاعلام انهم يستطيعون الحصول علي حريتهم بالنفاق وهذا يثبت انهم فعلا متورطون وانهم شيعة من الالف الي الياء
لالالالالالالالا
السلفيون اثبتوا انهم شيعة على حق، والشيعي اللي على حق ما يقولش للسلفي لا، الله، ربنا يخليك ياريس، ايه الدماغ دي؟ الشعب كله عامل دماغ كيميا

اتفضلوا:


البلد اتهبلت.. طب اعضاء الخلية اتعذبوا، المعلقين وزعيم الهجانة مين اللي عذبهم؟

Saturday 23 January 2010

هيه هيه، مبارك ح يجيب لنا الاحتلال

انا مش كنت قلت لكوا على مشروع امريكا وتسميتها لمصر بالجائزة الكبرى وانتوا ما صدقتونيش؟
اهي ابتدت اهي، طلب احاطة في الكونجرس وفوق البيعة وفد جاي يزورنا وياخد واجب الضيافة
وقبل ما تعلموا زي الناس ايام التتار والمغول كل ما يجيلهم خبر ان مدينة جنبهم استبيحت من التتار يقولوا: لااااا، بس احنا حاجة تانية
اقروا المشروع وقولوا لي يعني اشمعنى الحادثة دي بالذات؟ وازاي يعني الحادثة مدبراها الحكومة وقايلة لنا في وشنا انها مدبراها بالوضوح ده وبتاخد دعم من امريكا وامريكا جاية تحقق معاها؟ ح تدين مين بقى؟ ما هي اللي بتدفع له معونة وهي اللي مقعداه وموافقة على ابنه، وهو اللي عمل الفتنة الطائفية، لا والحزب الوطني ادا عضوية لاهالي ضحايا نجع حمادي عشان يسكتهم، يعني اهو، اهو.. ايه بقى؟ جايين يحققوا في ايه؟ ومع مين؟ ح يعاقبوا مين يعني؟ ح يعاقبوا الشعب؟
هو عمال يكلمنا عن الخروج الامن وشكله عايز يسيبنا ويخلع ويسلمنا بقى اللي حطوه وفقا لكلام مصطفى الفقي اللي قال الرئيس المصري لازم تجيبه امريكا
خلاص، احنا نستعد لكل حاجة وما نتضايقش بقى، احنا مع بعض، هو فضل قاعد هو مشي، الموضوع عدا على خير ما عداش خالص، احنا مع بعض، واي موقف بقى نواجهه

Friday 22 January 2010

انا متضايقة قوي من موضوع حظر النقاب

قوي يعني، متغاظة جدا.. ومش عارفة اعمل ايه وللا اقول ايه؟ بس متغاظة متغاظة، والموضوع اتعمل كده بلطجة، ونفسي اعرف ايه السر وراه، ايه اللي حصل مثلا؟ هل حصلت جريمة؟ لا، عصابة منقبات لسرقة البنوك؟ ابدا، وبعدين ايه موضوع الغش في الامتحانات ده؟ هل اتظبطت بنت منقبة بتغش قريب؟ مش على حد علمي
طب ايه؟ ده حتى النقاب مش منتشر ولا حاجة، ده واحد في المية بس وتلاتة وتمانين في المية محجبات حجاب عادي
ايه؟ هاه؟ ايه؟ حد يديني سبب للهبل ده غير موضوع الامن والغش في الامتحانات  والنبي، ما بقتش صغيرة على الكلام ده، انا باعرف كل المنقبات من غير ما يكشفوا وشهم ولا حاجة
فرنسا دفعت لهم فلوس؟ ممكن والله

امريكا احتلت هيتي اخيرا

بعد سنين طويلة من التجسس، وشغل المخابرات، وخطط وتدخلات وانقلابات ولعب من تحت الترابيزة، واخيرا... آن آن آآآآآن
جه الزلزال منح هيتي لامريكا لوزة مقشرة... فعلا: لكل مجتهد نصيب
البني ادم برضه لما يشتغل بذمة وضمير ربنا بيكافئه
هو ده بقى، هو ده، مدام عندك تفاني في العمل لازم تعبك ما يروحش هدر ابدا
هييييييييييييييييييييييييييييه
الحمد لله الحمد لله.. ده الهيتيين.. مش هي بتتقال كده؟ اهل البلد يعني، عاملين مظاهرات عشان يقيلوا الرئيس، صحيح، اعمل الخير وارميه في امريكا، طلبتها ونلتها يا حاج
---
ما تنسوش والنبي المساعدات لمركز هشام مبارك 1 شارع التوفيقية، بطاطين، ومعلبات، وهدوم تقيلة، من هنا لحد يوم 24 الصبح الله يخليكوا، مش طالبة امريكا تيجي تساعدنا احنا كمان، لحد دلوقت مصايبنا على قد صبرنا الحمد لله، ربنا بيقدر ويلطف

Thursday 21 January 2010

عاااجل لدعم منكوبي السيول

جات لي الرسالة دي من الاستاذ احمد سيف الاسلام:
ندعوكم لدعم قافلة عاجلة لمنكوبي السيول في سيناء وأسوان، نحتاج:
بطاطين وملابس ثقيلة وأغطية ومعلبات غذائية جافة.
سننتظر دعمكم حتى صباح 24 يناير حيث ستتحرك القافلة في المساء من مقر اللجنة الشعبية لدعم منكوبي السيول بمركز هشام مبارك
1 شارع سوق التوفيقية
للمزيد:
خالد عبد الحميد
0106114257
او احمد سيف الاسلام
0122259860
----
المركز فاتح من الساعة عشرة الصبح لحد الساعة تسعة بالليل والقافلة ان شاء الله ح تتحرك يوم 24 بالليل
ارجوكوا اللي يقدر يودي اي حاجة يوديها ده اضعف الايمان يعني
---
اه، نسيت حاجة مهمة، اقروا الخبر ده.. انا مش فاهمة ازاي واحد يتحبس عشان بوظ سلك نت؟؟؟ يتحبس عشان رخامته ماشي، لكن سلك نت.. لالالالالا يا ح الظابط، مكشوفة قوي، ده حتى انا مش قادرة اسكت يعني
-----------
 

لتبرع لضحايا سيول أسوان وسيناء وزلازل هيتي لدى لجنة الإغاثة والطوارئ باتحاد الأطباء العرب:


مكتب القاهرة الرئيسي: 42 شارع قصر العيني ـ دار الحكمة – القاهرة


ت : 0227961792 ف : 0227940518


موبايل : 0104002121 - 010440004


------


مكتب القاهرة - مدينة نصر: ش علي أمين ـ متفرع من ش مصطفى النحاس – الحي السابع ت 0224019369


------


مكتب الإسكندرية: 373 ش جمال عبد الناصر ـ العصافرة


22 شارع بور سعيد ـ الشاطبي ت : 035907590
موبايل : 0100545152


------


مكتب العريش : شارع الجمارك – أمام مسجد نجمة سيناء
ت: 0683365466 ف : 0683365466
موبايل : 0175405635


------


مكتب جنوب الصعيد: إدفوـ الميدان البحرى،أمام مسجد الشبان المسلمين – شقة 5
ت: 0974712583 ف: 0974712583
موبايل : 0144908085

حوار بين مهندس وظابط

تحديث:
شفتوا، شفتوا، طلع كلامي صح، سمك المريوطية فيه ديدان والدكتور ثابت قال ان الديدان بتأثر في "الأماكن الحساسة مثل المخ والقلب" شفتوا بقى؟ يعني الاماكن الحساسة عند المصريين الجدد هي المخ والقلب، صح... صح والله صح، عشان لما بيشلغوا مخهم ويبتدوا يقولوا افكارهم بتحس انهم بيعملوا بيبي تقيلة، ومشاعرهم ريحتها فعلا فيها حاجة... صح صح، صح والله يا دكتور فعلا، كتر خيرك، احنا اهو تحليل الحالة بيبان واحدة واحدة، الحمد لله، يبقى بياكلوا سمك المريوطية، خلاص ادفنوا المريوطية دي حفاظا على الاجيال القادمة
---------------
الحوار ده حصل فعلا، مش بألفه ولا باتخيل منه حاجة، مهندس اتصالات كان قاعد مع ظابط شرطة وظابط الشرطة بيفهم مهندس الاتصالات، الغبي، ازاي يفكر تفكير سليم ويسيبه بقى من الشعارات اللي ما بتأكلش عيش، طبعا صديقي المهندس هو فيه عادة منيلة كده، لما يلاقي اللي قدامه بيخرف خالص يبتدي ياخده على قد عقله، هو انسحب من لسانه وقال قدام الظابط ان ما بقاش فيه احترام للعلم ولا اهتمام بالعلماء

وبمناسبة عيد العلم احب اعرض لكوا وجهة نظر ظابط الشرطة واكتبوها يمكن تنفعكوا، انبرى يقول للباشمهندز:
اهو ده بقى التفكير القديم... انتوا بتقولوا اي كلام مافيش تخطيط خالص ولا فيه رؤيا ولا تفكير في المستقبل بس بتكرروا شعارات وكلام تلفزيونات.. دلوقت انت لو عندك عالم، لازم يعيش في مستوى معين، يركب عربية، يسكن في منطقة معينة، ولاده يدخلوا مدارس معينة، وانت عايز الدولة تدعم ده كله او توفر له ده كله بانها تديله مرتب على الابحاث اللي هو بيعملها، عشان يسكن ويركب عربية وعياله يدخلوا مدارس كويسة مش اقل من ان الدولة تصرف عليه بتاع خمسين الف جنيه في الشهر، كده انت رميت خمسين الف جنيه في الارض، اخدت بيهم ايه؟ شوية ورق، الخمسين الف جنيه دي تأكل حي بحاله، طب وليه؟ البني ادم كل ما مستواه التعليمي قل بقى سهل انك تأكله، لكن يفضل ياخد في شهادات ويقرفك ويتآلط عليك ويكلف الدولة فلوس؟ عشان ايه؟ تتمنظر بيهم وتقول عندنا علماء، وبعدين؟ غير لما يبقى عندك بقى رجل اعمال هو بيصرف على نفسه وعلى البلد، والناس مستواها التعليمي اقل يبقى احتياجاتها اقل، كده الامور تمشي والفلوس تكتر في البلد

طبعا صديقي المهندس فتح بقه وقال له: يا سلاااام، تصدق ما كنتش واخد بالي خالص؟
الظابط: طبعا، ما انتوا بتتكلموا وخلاص، ما فيش تفكير في بكرة
فهمتوا يا بهايم؟ ناس اغبيا فعلا
هو ده بقى المصريين الجدد، اصل انا شفت غلاف كتاب اسمه المصريون الجدد، الاستاذ فهمي هويدي شهرني ههههه، بس هم المصريين الجدد دول لهم صفات كده
يعني لا هم عملاء، ولا هم حرامية، ولاهم ناس وحشة يعني، هم دماغهم كده، ما يقصدش حاجة والله، هو فعلا مقتنع، ومنتشرين في كل طبقات المجتمع، واشكالهم شبه بعض، تحس انه كان مفروض يكمل وبعدين حاجة حصلت اتولد كده، مش قصير، مش قزم، لا، هو فيه حاجة، يعني تركيب العظام فيه حاجة معينة كانت مفروض تكمل وما كملتش، وبيتكلموا زي بعض، بس على حسب المستوى الاجتماعي، لو اغنيا كلهم بيتكلموا بنفس الصوت ونفس التعبيرات ونفس الحركات، لو متوسطين برضه كده، ولو فقرا بيتكلموا زي بعض وبيمشوا في مجموعات، ما تلاقيش واحد منهم هربان لوحده كده الا في النادر
وكل كلامهم ومنطقهم من الشمال لليمين، او بالورب، يعني طريقة تفكير ملتوية جدا، تحس انك مش عارف ايه اللي بيزعله ايه اللي بيفرحه، التصرفات اللي مفروض تتفسر على محمل معين عنده لها تفسيرات تانية خالص، وتفضل انت تتفاجئ
زي مثلا احداث التحرش، يعني مثلا انا فاكرة ايام التحرش كنا كلنا بنسأل: ليه؟ ليه بيضربوا البنات وبيشتموهم؟ هي دي طريقة معاكسة وللا تحرش؟ ما بقاش فيه حد بيقول يا جميل يا قمر والحاجات دي؟ وبعدين حتى لو ح يتحرش بالايد، بيضرب ليه؟ وبعدين ماله فرحان كده؟ وايه سر ارتباط الحوادث دي بالعيد؟ وليه يخرجوا من صلاة العيد يعملوا كده؟
لا ما تحاولش تفهم، وعلى طول كده بقى، على طول ردود افعاله بالطريقة دي، ما تبقاش فاهم لما تعمل ايه يقوم يحصل ايه؟
وكلهم اسطامبات كده، حتى صوتهم زي بعض، اتحداك تعرف صوت واحد فيهم في التليفون، ايا كان مستواه الاجتماعي، هم كده باقات من البشر مافيش اي نوع من التفرد، وبيلبسوا نفس اللبس كأنه يونيفورم، وايه البنطلونات الجينز اللي واخدة فرشة بوية بيضا وش وضهر دي؟ وبتظهر في العيد فجأة وتختفي بعد العيد، كأنهم تنظيم
وطلعوا في مظاهرات الجزائر برضه، وضربوا الامن من غير اي سبب واضح، وعلاقتهم بالشرطة علاقة متميزة جدا
الاغنيا منهم بيحبوا الشرطة قوي وعندهم تصور ان اي حاجة بيحلها ظابط الشرطة، والفقرا من المصريين الجدد كده برضه بس بيخافوا منهم، لكن مش بيكرهوهم
وبعدين تيجي تكلمه تلاقي كل حاجة بالشقلوب لدرجة انك تحس ان فيه في مخك حاجة غلط، يقعد مثلا يحكي لك خناقة:
جالي وقال لي ازيك.. قال لي ايييه؟ ازيك.. طبعا انا فهمت على طول، قمت قلت له لا ابدا مافيش حاجة، (ويروح غامز) ماهو انا برضه ايه؟ اشتري ما ابعش، وانا ماليش في السلك ده ابدا، ييجي يقول لي ايه آه.. لا، جبت من الاخر وخلصت
ولو سألت تبقى حمار، ولو جات لك الشجاعة: لا معلش انا مش فاهم؟
الله.. انت معايا وللا معاه؟
وممكن تقلب بخناقة، ولو زعقت له يقول عليك حنين، ولو كلمته كويس يتخانق معاك ويقول انك بتلون عليه
تقول له كلام تلاقيه بيرد على كلام تاني خالص
وفيه بقى من المصريين الجدد اللي انا اشرت اليهم قبل كده، عاملين زي الست اللي لامؤاخذة مشيها بطال وبتعاير الشريفة انها مش لاقية راجل يبص في وشها، بس دول بيبقوا من المصريين المثقفين الجدد
وحالة عبثية اخلاقية بقى، لازم المجرم معاه حق والضحية هو اللي غلطان، امال ايه؟ الغباوة انك تبقى محترم، والنباهة انك تبقى واطي، وفيه خلط رهيب مابين الوطيان والذكاء، ودول بقى تلاقيهم بيقولوا جمل كده شبه: انا عندي الاسرائيلي اللي بيدخل باحترامه احسن من الجزائري اللي يشوح بالمطوة.. انا عندي الاسرائيلي اللي يدخل فلوس للبلد كسائح احسن من الغزاوي اللي بيعدي من الانفاق.. انا عندي المصري اللي بيتعامل مع اسرائيل احسن من السنغالي اللي بينام في الشارع.. انا عندي الحرامي اللي بيقول انا حرامي احسن من اللي بيصلي وهو بياكل كتير... انا عندي الرقاصة اللي بتبسط الجماهير احسن من المرة بوز الاخص النكدية... انا عندي تديني بالبونية احسن ما تجيب لي ايس كريم.. انا عندي اللي يتف في وشي احسن من يطلع بطاقة الرقم القومي.. انا عندي ارمي نفسي من الشباك احسن ما انام بعد الغدا ..إلخ، طول النهار عايشين في مقارنات كده تبقى مش عارف ترد تقول ايه؟
تحس كده انهم عاملين دماغ كيميا وسخة، وكل نظرياتهم زي نظريات الظابط كده، يعني لما تسرق وتأكل اللي حواليك احسن ما تعيش لي شريف بمرتبك.. بطلوا كلام الستينات ده
اه
المصري الجديد يتعرف من
key sentence
بطلوا كلام الستينات... اي حاجة بقى: العيب الحرام اللي ما يصحش كل ده كلام ستينات، اشمعنى ستينات؟ ليه مش خمسينات؟ ليه مش تلاتينات؟ ليه مش كلام قديم وخلاص؟ ما تعرفش، بس هي الجملة دي انتشرت
يعني مثلا انا بهت امبارح لما كنت باتريق على احمد عز عشان عايز يقنن بيع الاثار قام واحد من المصريين الجدد (وبرضه نفس التركيب الجسماني ده ونفس الصوت) قال لي: ماهو احنا مصريين ودي حاجات اجدادنا، جرا ايه لما كل واحد يشتري حتة؟ اشمعنى الحكومة تحتكرها؟ بطلوا كلام الستينات ده، هو قال لك ح نطلعها برة؟ ده بيدي فرصة ان المصريين يبقى عندهم الحاجات دي في البيت كده بدل ما كل حاجة تبقى بتاعة الحكومة ويحطوها في المتاحف وياخدوا عليها فلوس، طب احنا ليه ما نشتريهاش؟ ومنكن مثلا تبقى وسيلة كويسة للمشاريع، واحد مثلا يشتري مجموعة ويفتح متحف على حسابه ويكسب، ويبقى كده وفر للدولة وح تاخد منه ضرايب وفي نفس الوقت هو استفاد، هم دول مش اجدادنا؟ وبعدين عندهم كتير في المخازن ما يطلعوه والناس تستفاد بيه
طب انت مكاني دلوقت.. ترد تقول ايه؟
بلاش، مرة واحد قعد يقنعني ان رجل اعمال راجل كويس عشان كان بيتبرع للفقرا مع انه حرامي وعليه قضية: وفيها ايه؟ ما الحكومة بتسرق ومش بتدينا حاجة، هو بيسرق وبيدي الفقرا، يبقى ليه يقبضوا عليه؟
طب ترد تقول ايه؟ وملحوظ انك مثلا ممكن تشتمه بجد يضحك، تقول حاجة مش قصدك بيها شتيمة يزعل، وموضوع الجزائر ده كان فضيحة لأنه كان جامع شامل لكل المصريين الجدد، مافيش واحد من المصريين الجدد تخلف عن غزوة الجزائر، وبرضه بيتكلموا كده: يقلعوا البنطلون لفردوس عبد الحميد وبنت مصرية تقلع التي شيرت؟ ده بيأكد ان مافيش قومية عربية
هم فريق ضعيف.. كسب ازاي؟ قال بلد المليون شهيد قال، طب بصي على المنتخب بتاعهم، اصلا نسوانهم مش كويسة
هم جبنا جدا لعلمك وبيخافوا من خيالهم وفيهم عنف وهمجية وقلبهم ميت وما بيخافوش من حاجة
لا مش احنا اللي ننضرب ونجري احنا جامدين قوي وصيع احنا ما انضربناش على فكرة هم ولاد كلب ضربونا والناس جريت من الخوف ومعذورين ما تتريقيش عليهم، احنا جرينا عشان احنا شعب متحضر مش صيع

ايوة طبعا كرامة مصر لما جزائري يضرب محمد فؤاد بالطوب، دي تختلف عن اي مواطن مصري يتهزأ برة لان محمد فؤاد مشهور
معلش محمد فؤاد ما اتعورش بس خاف.. تختلف عن انا وانت لما نتعور لانه مطرب طبعا
طب ما مروة الشربيني اتقتلت.. يبقى ليه فردوس عبد الحميد يتقلع لها البنطلون؟ هو احنا كل مرة؟

احنا على طول عايشين العيشة دي مع المصريين الجدد على فكرة، وساعات بيبقى فيهم طفرة جينية من وسط القطيع اللي عادة بيبقى ماشي مع بعضه تلاقي واحد لوحده كده شكله قديييييييييييييييييييييييييييييييييييييييييييييييييييييييييييييييييم، شكله مدرس عربي من الاربعينيات، وعامل شعره كده زي ايام الاربعينيات، وده بيبقى المثقف اللي في القطيع ده، وبيستخدم تعبيرات عمرك في حياتك ما سمعتها غير في افلام يوسف وهبي، يعني مثلا بيقول: يصح ان الانسان...إلخ. ويبقى هو اصلا عنده واحد وعشرين سنة، وماشي مع المجموعة بتاعته عادي، وهم بيحترموه قوي، عشان بيقول يصح. والملحوظ ان فيهم رجالة رفيعين وعندهم صدر، والبنات كلهم بيلبسوا نفس اللبس، وبتلبس محزق قوي عشان الواسع بيتخنها، هي دايما تقول كده، وهي بتقول كده وهي يا اما رفيعة رفع مجاعات الصومال ومحتاجة اي حاجة تملاها، يا اما تخينة قوي وبتلبس اقل منها بنمرتين فتحس ان الهدوم ح تنفجر في وشك والزراير ح تطير فجأة وتدخل في عينك.
وقيس بقى على منطق بتاع الجزائر كل حاجة، برضه موضوع غزة، موضوع الظابط المصري، موضوع رجال الاعمال، كل حاجة كل حاجة طول الوقت بتسمع جمل شكلها كده
تعمل ايه انت بقى؟ تعمل زي اتنين صحابي بقوا يكلموا القطط والكلاب ولما اضحك يتنرفزوا مني ويقولوا لي انهم بيفهموا، والموضوع وصل بواحدة فيهم انها شاكة في سلوك القطة اللي رمت ضناها وبتدور ورا القطة عشان تعرف مين الشاب المستهتر اللي خطفها من عيالها.. والله ما كانوا كده، دول كانوا اخر اتنين عاقلين شفتهم، الله يرحمهم بقى

لا إله إلا الله

مواطن مصري جاب لي الفيديو ده


وانا لقيت الفيديوهات دي







وح تلاقوا تغطية كويسة على النت ودي التغطية الوحيدة الكويسة، الاعلام مش مغطي ولا معبرنا، اكتب على اليوتيوب سيول مصر سيول العريش لو كتبت سيول اسوان مش ح تلاقي فيديوهات كتير بس اكتبها برضه يمكن حد ينزل فيديوهات

فيه حد في سيناء بيقول مافيش اي اثر للصليب او الهلال او حتى الشمعدان الاحمر

فيه واحد من الصعيد بيقول برضه مافيش اثر للدفاع المدني

وطبعا احنا مش عارفين لان مافيش تغطية كويسة، مافيش غير الفيديوهات اللي على النت، انا باقول لكوا اللي الناس بتقوله ومش لازم يبقى صح ومش لازم يبقى غلط، بس مع تجاهل الاعلام يبدو انه صح

مين بقى دعى علينا؟ انا مش قلت بطلوا دعا علينا؟ يعني ح تستفيدوا ايه لما نبقى عبرة خلقه؟ ادعوا لنا بالصلاح والهداية احنا مقصود انه يتم عزلنا عن محيطنا عشان فيه حد معين عايز يستفرد بينا

يعني مثلا لو مصر لا قدر الله كانت انضربت السنة اللي فاتت كانت الدنيا اتقلبت في العالم العربي وما كانتش ح تعدي بالساهل لانها بقى القلب والنني، السنة دي بعد الحملة المنظمة اللي قادها علاء وجمال مبارك والفرقة الماسية بقيادة احمد عز عشان يكرهوا فينا طوب الارض لو اي حاجة حصلت لنا الناس ح تقول يغوروا في داهية، انا باتهمهم بحاجة؟ ماعنديش ادلة غير تصرفاتهم، مين مصلحته ان مصر تبقى مكروهة من محيطها ومافيش عين تبكي عليها لو حصل لها حاجة؟ طيب مين اللي بيعمل كده؟ اكيد مش الجزيرة، مش ذنبها الجزيرة انها بتنقل الاخبار والتصريحات الفضيحة اللي بيقولها ابو الغيط، ذنب اللي بيعمل الاخبار، مين اللي بيعمل الاخبار؟ مين اللي بيقود حملة منظمة عشان يقول تصريحات ويعمل تصرفات تبين ان مصر دي ام الهطل وعلى السادة المقيمين خارجها مراعاة الظروف اللي احنا فيها؟ مافيش حد غير اسرائيل.. وش كده بقى
لما علاء مبارك يعمل كام مكالمة يهبل فيهم ويكره فينا كل محيطنا ماحدش مستفيد غير اسرائيل
لما جمال مبارك يقود حملة لاحياء القومية الفرعونية عشان يعزل مصر عن محيطها ماحدش مستفيد غير اسرائيل
لما احمد عز يهدد قطاع غزة بان مصر ح تضربه عسكريا ماحدش مستفيد غير اسرائيل وهو عارف اننا لا ح نضربهم ولا نيلة بس بيعملوا زي البرص يبخوا في الملح ما يسموش بس يربوا عداوة
انا مش عارفة، هي اسرائيل ناوية تعمل فينا حاجة؟ الظاهر انها ناوية تعمل فينا حاجة، والظاهر انه مش السنة دي، بس هم قالوا لنا في وشنا ان مصر "الجائزة الكبرى" والجائزة الكبرى دي مش ح تقع بالساهل كده الا كل الناس تكرهها ومهما يحصل لها وللا تصوت ماحدش ح يسأل فيها
وحملة ثلاثي اضواء المرسح جابت نتيجتها لما مذيع مصري قال للعيب كرة تونسي: طبعا فوز مصر فخر لكل العرب فاللاعب التونسي (اللي انا طبعا مش فاكرة اسمه) قال له مال مصر بقى ومال العرب؟ انتوا مش قلتوا القومية العربية ماتت واحنا مش عرب؟ خليك في مصر افرح بيها بقى
الحاجة التانية، معلش يا اخوتي في الوطن احب ابشركوا ان برضه ماحدش متعاطف معانا في موضوع السيول ده، بيجيبوا سيرة غزة اكتر، ويمكن خايفين يجيبوا سيرتنا لبعدين نشرشح لهم: ااااه انتوا بتقولوا عندنا سيول؟ لااااااا مش احنا اللي عندنا سيول، شوفوا قطر، شوفوا ايران، مش مصر اللي يبقى فيها سيول
بجد الخطاب السياسي المصري خطاب كأنهم قاصدين ان كل الناس تكرهنا وما يبقلناش حد في الدنيا كأنهم قاصدين يضرونا او بيحضرونا لحاجة وعايزينا نبقى مقطوعين عن العالم لخطة معينة بتتعمل لنا، كأنهم قاصدين يقولوا كلام مجانين عشان الناس تضحك علينا وتقول المصريين اتهبلوا
انا باقول لكوا من دلوقت عشان لو حان موعد استلام الجائزة الكبرى وقعدنا نصوت وماحدش سأل فينا ما تتفاجئوش، الا اذا حاولنا نصلح من الطين اللي عمله الحرس الجديد في الحزن الوثني، ولازم نبتدي نصلح من دلوقت
واحمد عز ده انا عايزة اعرف ايه اللي بينه وبين مصر؟ بيكرهها ليه؟ احنا عملنا له حاجة؟ الراجل عايز يبيع اثارنا ويقنن بيع الاثار، هم خلاص البلد اتباعت كلها مش لاقيين حاجة يبيعوها غير الاثار؟ وبعد كده ح يقفونا ويقولوا لنا ارقصي يا جارية؟ انا عايزة اعرف ايه حكايته الراجل ده؟ مش ممكن غبي، ده مهندس، يعني جايب مجموع في الثانوية العامة، ايه اللي بيعمله ده بالظبط؟ هي اشاعة ان امه يهودية دي صحيحة؟
والنبي والنبي والنبي ماحد يدعي علينا، والنبي، بالذات الفقرا والمظلومين والمجاهدين عشان ربنا بيستجيب لهم، والنبي تدعوا لنا، احنا اسرى وزي ما الشيخ القرضاوي قال احنا في كابوس كبير، والنبي تدعوا لنا بفك الكرب وصلاح الحال، ما احنا لو اتوحدنا واتاكلنا مش ح تستفيدوا حاجة، ربنا يخلصنا من العصابة دي على خير
ده فيه مصريين شمتانين في مصر... هو فيه كده يا ناس؟

Wednesday 20 January 2010

اشمعنى طلعت السادات اتحبس؟

ماحدش متغاظ من بيان المية وخمسين نائب بتوع الحزب الوطني غيري، هم مش متغاظين لانه عارفين انه كلام فض مجالس ومالوش اي قيمة، لان التلويح الجاد بالحرب او اعلان الحرب ده اختصاص القائد الاعلى للقوات المسلحة او ينوب عنه وزير الدفاع، اي حد يقول اي كلام تاني يبقى بيخرف. وانا بقى متغاظة لنفس السبب اللي هم مش متغاظين عشانه
انا باحترم الجيش المصري وباحبه ومش ح تصدقوا اني لما باشوف ظابط جيش مصري في الشارع باقف عشان اعديه، سواق ماشية على رجليا او سايقة عربية ولولا الملامة كنت وقفت اديت التحية العسكرية، بس باخاف الناس تقول عليا مجنونة، طيب ده مش تطاول على الجيش المصري؟ مين احمد عز والكام نائب دول عشان يتطاولوا على المؤسسة العسكرية ويتكلموا نيابة عنها في حاجة مش اختصاصهم؟ طلعت السادات كان نائب وله حصانة ولما اتكلم عن المؤسسة العسكرية اتحبس، وانا بصراحة ما كنتش متعاطفة معاه، لاني مؤمنة فعلا انه لا يجوز التطاول على المؤسسة العسكرية، مش كل الدول بتعمل كده، بس احنا في مصر لنا تقليد وهو احترام المؤسسة دي وعدم المساس بها
طيب كمان المية وخمسين نائب دول هددوا بضربات عسكرية وماحدش فيهم عسكري اساسا ناهيك عن انهم تجاوزوا القائد الاعلى للقوات المسلحة ووزير الدفاع، ازاي يتجرأوا يعملوا كده؟ ده تطاول، مافيش حاجة اسمها فض مجالس فيما يخص الجيش، الجيش المصري له احترامه وقدسيته، يفضوا مجالس في اي حاجة لكن فيه خطوط حمرا، هي ما سابتش للدرجة دي يعني
اذا كان الكلام جاد، وده مستحيل طبعا لان الجيش مش ممكن ح يسيبنا نعرف حاجة زي من ناس مالهمش صفة، يبقى المسئولين العسكريين بس هم اللي يبلغونا بحاجة زي دي، واذا كان هلس وتهديد وفض مجالس، ودي الحقيقة، يبقى عيب عيب عيب، وغلط، وخطر، وتجاوز، وتطاول، الجيش المصري مش لعبة عشان يهرجوا فيه، انا متعلمة كده في كتاب التربية القومية اللي كنا بناخده، ايه؟ دي كمان علموها لنا غلط؟ 
علمونا في المدرسة ان اسرائيل عدوة وكانوا بيدونا في دروس القراءة حاجات عن ابطال حرب اكتوبر، وطلع غلط، علمونا ان فلسطين دي بتاعة مصر ومصر بتاعة فلسطين وماحدش لفلسطين غير مصر، وطلعت دي غلط، علمونا ان كلنا مصريين ومافيش فرق بين مسلم ومسيحي، وطلعت دي غلط، علمونا ان مصر دولة عربية، وطلعت دي غلط، بس لا، كله الا الجيش، لا، لا، لا، انا متمسكة بقدسية المؤسسة العسكرية اللي بتحمينا وبتنقذنا في السيول وبتأكلنا العيش لما نقص كمان من السوق، ماحدش يهوب ناحية الجيش
والمية خمسين نائب دول لازم يتعاقبوا على جرأتهم على الجيش

الغلابة ليهم مين غيرك يا رب؟

 تحديث:
دول ولا حتى مهتمين بغزة في السيول، هي لازم تبقى قنابل عشان يهتموا؟ واسرائيل فتحت السد ونزحت المية على غزة على اساس انها بلاعة يعني


@mohammedatef للمساعدة والتبرعات فى مواجهة سيول أسوان .. جمعية رسالة مصر , مصر الجديده ميدان الحجاز خلف سيتى بنك 0112964480
-----------

يعني اللي بيموتوا في الصعيد وفي سينا دول مش بني ادمين يا ناس؟ ولا كلمة عليهم؟ امبارح يقولوا حداشر ماتوا في سينا والنهاردة يقولوا سبعة؟ اربعة صحيوا؟
وواحدة رسامة صاحبة ماما قالت ان فيه قرية في الصعيد اتشالت باللي فيها وهي عرفت عشان هي رسمتها ولها صلة بيهم
والناس عمالة تتصل ببعض عشان تسمع اخبار ناسنا اللي في بلدنا وماحدش سائل فيهم، ولا حتى قناة الجزيرة جايبة سيرتهم، والناس اتقطع عليها الكهربا والتليفونات ومش عارفين يكلموا حد.. والظاهر بقى الصحفيين خايفين يروحوا لهم ليروحوا ما يرجعوش، طب عرفوا منين انهم سبعة بس وهم مقطوعة الاتصالات بيهم؟ طب صوروا القرى للذكرى طيب يمكن تتشال وتغرق وتبقى اثر
يارب يا بتاع الغلابة يارب، مالهمش غيرك يارب، لا حد سائل فيهم، ولا حتى عايز يعرف جرا لهم ايه؟
لا وسبحان الله، الحمد لله الحمد لله الحمد لله: الصعيد وسينا اغلب ناس.. اغلب ناس فيك يا بلد
قدر الله وما شاء فعل، الحمد لله على قدر الله، راضيين يارب، راضيين يارب، احنا امتى ما كناش راضيين؟ الواحد بس بيصعب عليه الغلبان يدفن في الضلمة ولا حتى يتصلى عليه

Tuesday 19 January 2010

ده هزار وللا جد؟

يعني بعيدا عن نبيه الوحش اللي سخر حياته لرفع قضايا على عمرو دياب، ده مش مهم انما ايه بيان مجلس الشعب ده؟
"وكان مجلس الشعب المصري قد شهد أيضا جدلا حادا بعد مطالبة 150 عضوا من الحزب الوطني الحاكم حركة حماس بتسليم قاتل أحمد شعبان.


وتلا أمين التنظيم في الحزب الحاكم أحمد عز بيانا وقعه 150 عضوا بالحزب يتضمن هجوما وصف بأنه غير مسبوق على الفلسطينيين, ولم يستبعد أي عمل بما فيه العسكري من أجل القصاص ممن وصفهم بـ"مليشيات فلسطينية" قامت بقتل الجندي شعبان.


وقال عز "إن صبر مصر ينفد لأن دم أحد أبنائها أهدر". وطالب عز السلطة التي تمثلها حماس بأن تثبت حسن نواياها بتسليم من سماه "القاتل المجرم الآثم".


نعم؟ نعم؟ نعم؟ نعم؟ مين ايه يضرب ايه عمل فين عسكري ليه؟ بتقولوا ايه يا امور انت وهو؟ والقاتل اللي قاعد بينكوا اللي شتم الست وقال لها انت مجرمة عشان كشفته وكلكوا غطيتوا عليه؟ وقائمة المصريين اللي اتقتلوا على الحدود المصرية من اسرائيل؟ انا عارفة ان كلام مجلس الشعب كلام فض مجالس مالوش اي قيمة، بس ايه اللهجة دي؟ طب يا كتكوت انت وهو ما طالبوا "العمل العسكري" ده انه يدخل يحرر غزة اللي احتلت وهي تحت حكمنا احنا واحنا اللي ضيعناها ويرجعها بقى تحت الوصاية المصرية لحد ما ربنا يأذن

والكلام ده بجد وللا بيفرقعوا كلام زي الكلام اللي قالوه على اليمن؟ اصل الواحد ما بقاش عارف لهم، مرة يفرقعوا تصريحات كده ولا ليها اي لازمة وينسوها بعد شوية، ومرة يقولوا كلام ويطلعوا كدابين، ومرة يقولوا لنا كلام غريب مالوش اي علاقة بحاجة ويطلعوا بيمهدوا لنا لحاجة تانية خالص، ومرة يفضحوا عضو مجلس شعب ويقولوا لنا في وشنا انه هو المحرض على القتل ويرجعوا يقولوا مافيش حاجة كله تمام، ومش بيبطلوا يفاجئونا
ده هزار وللا جد وللا هلوسة من اللي هم معتادين يقولوها، وللا تمهيد لما اسرائيل تضرب غزة اننا ما نفتحش بقنا، وللا ح نضربها بدل اسرائيل وللا هم مش دريانين بيقولوا ايه وبيتعاطوا حبوب هلوسة وكتاب الله، طب يمين بالله ده ماهو كلام ناس عقلها في راسها ابدا ولا مجمعين ولا عندهم سلك واحد موصل على التاني في مخهم
احنا ايه؟ انا مش مستوعبة، بس.. بصوا احنا ح نستنى، ح نعمل ايه طيب؟ ماهو انت لو بتكلم انسان عاقل تعرف تاخد وتدي معاه في الكلام، لكن لما تبقى عايش حياتك كلها في ناس بتهطرس لا عارف جدهم من هزارهم ولا كدبهم من صدقهم ح تعمل ايه؟ ح تستنى، يايرحلوا، يا تيجي مصيبة تاخدنا احنا لان شكلهم كده ولا حتى المصايب مستنضفاهم عشان تاخدهم 

من كشف التاريخ الاجرامي لمستر اكس؟

انا لازم اعرف مين اللي سرب المستندات دي لاحمد يسري؟

الجريمة لا تفيد



الخط في بداية تاريخه المهني حيث بدأ السلم من اوله وعمل كناضورجي
هذا وقد تعهد زعيم المطاريد اللي هو انا بالانتقام من كل من تسول له نفسه استغلال هذه المستندات ضد مشروعه التوسعي... وزي ما انتوا شايفين في الصورة 2.. احنا ناس مقطعين البطاقة

امريكا تضع ايات من الانجيل على سلاح الجيش

يا حيييييلووووة، تخيل كده حاطط كلام ربنا على سلاح بيموت الاطفال والحريم ويحتل الناس في ارضهم، ايه الروحانية دي كلها؟ 
وبعدين هو ده ينفع ده يا كابتشن؟ على اي اساس امريكا دولة علمانية يعني؟ رئيس جمهوريتها بيفتتح فترة ولايته بصلاة، والجيش بتاعها حاطط ايات من الانجيل على السلاح، طب افرض الجندي مش مسيحي؟ افرض بوذي، يهودي، مسلم، ملحد، وللا هم بيمتحنوهم في الدين قبل ما يدخلوهم الجيش وللا ايه؟
وبعدين آيات من الانجيل على سلاح محتل؟ ده ينفع ده؟ اقصد دينيا ينفع يعني؟ تيجي تظبطها من ناحية ان امريكا دولة علمانية تلاقيها مش راكبة خالص، تيجي تظبطها من ناحية دينية ان سلاح يتحط عليه ايات من كتاب مقدس وهو بيقتل اطفال وستات ويحتل اراضي ويسرق ثروات برضه مش راكبة
اه.. انا عارفة انها بلطجة كده يعني.. انا بس باقول، بافك عن نفسي
لا وبعد ده كله ماشية تهزأ الناس عشان ما عندهمش ديمقراطية... شبه بتاعة العراق كده.. لا شكرا الله لا يسيئكوا او يسيئكوا.. زي ما يشوف يعني

Monday 18 January 2010

احنا معانا احسن ست، اوعي تنخي يا جورجيت

مواطن مصري جاب لي الخبر ده
ايه المهزلة دي؟ الموضوع اتلم؟ اتلم؟ انا اتلهيت في العيال اللي اتقبض عليهم وما اخدتش بالي من اخبار لم الموضوع
اتلم ازاي؟ وبيهددوا جورجيت؟ بيهددوها عيانا بيانا كده في وضح النهار؟
امال ايه بقى فهمونا انهم ح ياكلوا الغول والشاطر حسن ح يضرب الغول في وركه وكل الكلام ده، دول شككونا ان الغول يكون مظلوم من كتر ما نزلوا عليه هبد
خلاص؟ بعد ما اتفضح الفضايح دي ح يكمل عادي عضو مجلس شعب عاتشي يعني عاتشي؟ لا وايه؟ جورجيت هي اللي بتتهدد؟ والمحافص ح يكمل عادي بعد ما طلع يبرر للقاتل؟ والكموني ح يلبسها لوحده عشان يا قلب امه غار على شرف البنت المسلمة؟ مشجل خيطر عنده شرف

ايه اللي بيعملوه ده؟ في وشنا؟ في وشنا كده؟ بيقولوا لنا في وشنا احنا اللي مدبرين الحادث واحنا ح نلمه وماحدش له عندنا حاجة؟ زي ما مصطفى الفقي قال لنا احنا محتلين من امريكا واسرائيل والريس اللي ييجي لازم الباب العالي يوافق عليه؟
مش المفروض الرقاصة بتقول على نفسها فنانة استعراضية؟ فيه رقاصة بتقول انا رقاصة وفتاحة للزباين ما شاء الله ما شاء الله؟ ايه الوضوح ده؟
لا.. طب انا انهارت دلوقت حاليا، انهارت لما النظام قال لي انه رقاصة وفتاحة للزباين ماشاء الله ما شاء الله، عايزاهم يرجعوا يقولوا انا فنانة استعراضية
ما يقلعوش مالط، لو سمحتوا احنا مالناش ذنب نشوف المناظر دي
وبعدين ايه ده؟ ها؟ ايه ده بجد؟
"رد بسم ناقع"
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ثم عيب يعني، ده راجل قد والده، هو صحيح قال لنا في وشنا: في المديرية.. في المديريييييية
بس هو خلاص الحزب الوطني بقى شرشوح رسمي نظمي؟ مين اللي بيدربهم؟ ههههههه طب احنا مدونين، احنا مدونيييييييييييييين، فاهمين يعني ايه مدونيييييين، احنا لقيط لقيط فاهم يعني ايه لقيط، فاتحين المدونات دي عشان ناخد راحتنا، مش ح اروح شغلي اكتب الكلام ده
وبعدين عيب كده، تعملوا زي العيال؟ ده حتى فيه مثل صعيدي بيقول: دلع الكبار زي حك الزيار

ثم ايه ده؟ ايه ايه ايه؟ مين اللي بيعمل كده؟ مين المسئول عن حالة احلى هبل اللي احنا عايشين فيها دي؟ دول لازم بيتعاطوا حاجة، مش ممكن دي دماغهم الطبيعي سادة كده
هههههههههههه والله حرام عليهم، هم لو يعرفوا اللي احنا فيه ح يطبطبوا علينا ويبوسونا ويحطونا جنب الحيط زي ما خالد مشعل عمل في مؤتمر المقاومة في لبنان، والله انا لما سمعت كلمته قلت ده هاني شاكر، بس بعد ما شفت حالنا قلت الراجل حاسس بينا واحنا صعبانين عليه، قعد يقول: مصر حلوة، مصر جميلة، وشعب مصر طيب، وحياة حبيبك النبي يا مصر ما تعملي كده، قناوي يابني، قوم يا قناوي ده انا جبت لك بدلة الفرح، ده انا ح اجوزك هنومة، وجايب لك المهر في جيبي اهو، وبعدين مش عاجبكوا ايران؟ بلاش.. وحشة ايران، امشي يا ايران.. امشي، اهي مشيت اهي، شايفين تركيا؟ ايه رأيكوا؟ اجيب لكوا فستان زي اللي تركيا لابساه؟ هاه؟ والنبي ما تزعلي نفسك يا مصر.. ده انا باحبك
وعلى رأي واحد على التويتر قال: خالد مشعل طالع بيقول لمصر بلاها سوسو خد نادية، بلاها ايران خدي تركيا
وبعدين واحد طالع مع خالد الغندور يقول: اهم حاجة في العلاقة ما بين اللاعب والمدرب انها تكون علاقة "يشوبها" التدين
هو فيه ايه؟
----
ايه ده ايه ده؟ ايه الحوار ده؟ بصوا بصوا:
وهاجم اللواء عبد الفتاح عمر الفضائيات، وقال إنها كانت لها اليد الأولى لإشعال الفتنة فى مصر. وأضاف لا تستمعوا للفضائيات وقال إن أنس الفقى لا يملك أن يوقفها عند حدها مشيراً إلى ضرورة إصدار تشريع لمواجهتها.


وقال لم أسمح بوجود فتنة طائفية فى نجع حمادى ولم يسمع بها أهالى قنا ـ وإنما أنتم من ترددونها الآن كما لو كنتم تحرضون البرلمان الأوربى للتدخل فى شئون مصر وتابع قائلاً بس المجلس الأوربى رئيس أوربا وأمريكا
(الاتحاد الاوروبي رئيس امريكا؟ والسنغال طبعا.. نسي السنغال) .


وقاطعة سرور مطالباً بحذف سبه لأوربا وأمريكا
( هو شتم اوروبا وامريكا في ايه؟ ايه ده؟ فيه ايه؟ ماهو يا اما اللي كتب الخبر مجنون يا السادة اعضاء مجلس الشعب كانوا شامين غازات سامة قبل الجلسة، طب اشمعنى جورجيت وابتسام ما شموش حاجة؟ طب كاتب الخبر مجنون، طب اشمعنى مش بيحط على لسانهم هلاوس زي اللي على لسان السادة النواب التانيين؟
وتصدقوا بالله؟ النائب الوحيد، الراجل، اللي قال كلام كويس هو نائب الاخوان)


وأكد حسين إبراهيم نائب رئيس الكتلة البرلمانية للإخوان. إدانته لما حدث وثقفة فى القضاء ولكنه أشار إلى أنه يتمنى أن تكون هذا الحادث هى الأخيرة، ولكن ليس بالتمنى سيتحقق الأمر. وطالب بأن تكون سيادة القانون هو أساس الحكم عندما تقع أى مشكلة وأضاف أن هذه المشكلة ليست حصرية على جهد واحدة مشيراً إلى أن الأمن لم يكون قادراً على حلها.


وقال نحن فى أشد الحاجة إلى حوار حقيقى وليس حوار شكلى، يتم فيه تبادل القساوس والشيوخ الأحضان والقبل، مشيراً إلى ضرورة أن يضم الحوار جميع طوائف المجتمع لا يتم إقصاء أى طرف منه.
(طب يبقى العيب مش من الصحفي اهو، وبعدين جورجيت وابتسام حبيب وحسين ابراهيم مع بعض في جبهة لوحدهم وبقية المجلس بيقول لهم انتوا بتشعللوها ليه؟ عشان عايزين الناس تاخد حقها، كده يا اما جورجيت وابتسام رجالة يا اما حسين ابراهيم ست، ويا اما جورجيت وابتسام اخوان يا حسين ابراهيم مسيحي، وعموما هم التلاتة تبع الاتحاد الاوروبي اللي بيحكم امريكا والسنغال والتبت ومزارع دينا)
وبعدين السي اي ايه بعد ما جندت الكبار في مصر فتحت قسم للاشبال
لا فيه حاجة مش مظبوطة، يا اما انا اللي اتجننت بقى، مش ممكن كل الناس دي غلط وانا وجورجيت وابتسام وحسين ابراهيم بس اللي صح

Sunday 17 January 2010

ماحدش فاهم عبد الناصر غيري

لا اللي بيحبوه فاهمينه ولا اللي بيكرهوه فاهمينه، انا بس اللي فاهماه عشان هاطلة زيه
ولما شفت المقدمة بتاعة الكتاب ده تأكدت اني فاهماه كويس
بصوا كاتب يقول ايه عن السادات... ده عبد الناصر، مش موسى صبري:
أن شخصية أنور السادات، لجديرة بالإعجاب، خليقة بالإطراء، فبعبقريته العسكرية الممتازة، وشجاعته، ورباطة جأشه، و إخلاصه وتفانيه في خدمة المثل العليا، إلي جانب قوة أرادته، وتنزهة عن الغرض، ورقة عواطفه، وميله الغريزي للعدالة والأنصاف ، كل هذه الصفات جعلته أهلا للقيام بدور هام في التمهيد لثورة 23 يوليو 1952 ، والسير بها قدمًا في سبيل النجاح.
-----
ههههههههههه ح اموت من الضحك، ااااااه يا قلبي، ورشاقة قوامه، وبهاء طلعته، ورقة نظراته، وتهادي خطواته، وضياء بسماته، وطعامة سندوشتاته، وخفة دم نكاته، ونصاعة اسنانه، وضوافره اللي دايما قاصصها، ودقنه اللي دايما حالقها، وحلاوة برفانه، ونومه بالشراب في الشتا، كل ذلك ادى الى انه يبقى له دور رئيسي في قطع تذكرة للسيما ودب خناقة من غير اي لازمة والشغل في الحرس الحديدي والتخطيط لقتل النحاس والخلعان من زمايله لما العملية تفشل، وهو دور محوري في ثورة يوليو لانه بيثبت ان الثورة تضم كل طوائف الشعب ونجحت في استقطاب العال والدون واللي يسوى واللي ما يسواش والرمة والواطي ووالاهبل وابو ريالة يابو خالد هههههههه ايه يابو خالد اللي انت كاتبه ده يابو خالد؟ ده انا في اوحش مراحل هطلي عمري ما كتبت الكلام ده على امي حتى.. امي؟ يارب ما تشوف الكلام ده، ح تعيشني شهر تشتم لي في عبد الناصر وتعصر فيا عشان تنتزع مني اعترافات تحت التعذيب
انا كان قلبي حاسس، اكتر من مرة الضباط الاحرار يمسكوا السادات ويمرجحوه عشان يحدفوه من الشباك وعبد الناصر هو اللي يلحقه على آخر لحظة، بس والله انا فاهماه، اصل انا ساعات باعمل كده
ومالك مصطفى يتهمني بالتقرين لا مؤاخذة، ويتشال ويتحط: ح تاخدي على قفاكيييييييي، بتعمليييييي كده لييييييييييييييييييييييييييييه؟
واكتر من مرة يحاول يقطع صلته بيا بس في الاخر باصعب عليه وانا لخمة وام دمعة كده
اصل انا مثلا بافكر، ييجي واحد مثلا ابقى انا لا مؤاخذة باقرن عليه، ييجي واحد، اللي هو مالك مصطفى بس، يقول لي: بتقرني عليه ليه يا نوارة؟ ليه ياماما بتعملي كده؟ انت مش عارفة انه وسخ؟ انت مش عارفة انه عمل كذا؟ انت مش عارفة انه سوا كذا؟
قوم انا بقى اقعد اهز راسي واامن على كلام مالك مصطفى، بس في الاخر باعمل اللي في دماغي، باقول يعني: هو عمل كده عشان عايز ايه؟ عايز شهرة؟ عايز تزييط؟ عايز دعم معنوي؟ عايز يبقى محاط بالناس ومحبوب؟ طب ما انا اديله اللي هو عايزه واحاول اساعده بس في السكة الصح، وبكده ابقى كسبت ثواب في بني ادم كان ماشي في الغلط وانا ورطته في الصح وعملت له اللي هو عايزه
صح؟
لحد دلوقت غلط الحقيقة، كل مرة باعمل كده وباخد على قفايا يعني، وارجع اصعب على مالك مصطفى بعد ما قرر يقطع صلته بيا
بس انا ميييين، عمري ما بيأس، ولا بابطل، ولا ح ابطل، دماغ جزمة جزمة يعني، واخد مالك على عقله واعمل اللي في دماغي برضه، لحد دلوقت وفي المستقبل لحد ما اموت مسمومة ان شاء الله، ماهو انا لازم اثبت صحة نظيرتي... بس بصراحة عمري ما اجرؤ اكتب الكلام اللي ناصر كاتبه على السادات ده ولا على حسن نصر الله نفسه
ههههههه والنبي لتحملوا الكتاب، الكتاب ده يضع كل الناس في موقف محرج، الناصريين والساداتيين وكل الناس، مافيش غيري انا اللي مش محرجة، كنت احرجت من نفسي قبل ما احرج من عبد الناصر
انا سايبة الشباب على التويتر يقروا ويلطموا
وابراهيم عيسى كتب عن الكتاب ده هههههه بس حرام عليه والله، قلبه قاسي