Sunday 31 January 2010

السر مش في جدو.. السر في التليفون اللي في الحمام

 تحديث:
ماما: علاء وجمال مسافرين على حساب باباهم وللا على حساب ابو الهول؟


تحديث:
ماما مصممة تتابع احداث الماتش بمنتهى الثقة
الجزيرة بتقول: الناس تهتف باسم جدو
ماما: الله.. غسان بن جدو ايه اللي وداه الماتش؟ 
ثم اضافت: هو ده حسن شحاتة؟ طب ما يترشح للرئاسة، لو نزل قدام البرادعي ح يكسب، هو البرادعي جاب لنا جون؟
وبعدين بصت على الناس في الاحتفالات وهي بتولع نار وراحت مزعقة لهم في التلفزيون: بس يا ولد انت وهو.. ليه كده تلويث البيئة والفوضى دي
وبعدين اتنهدت وقالت: يوم اعلان الوحدة بين مصر وسوريا الناس كانت عاملة كده بالظبط
انا قاعدة مع امي النهاردة لانها معلش تايهة شوية في الليلة دي، واي تجديدات ح نوافيكم بالتفاصيل
----------------
اكيد حد من البعثة المصرية اللي مع المنتخب قاعد على التويتر، عادي يعني ممكن يبقى حد مقرب من حسن شحاتة والمنتخب متابع بالتليفون
لأننا كنا قاعدين على التويتر عمالين ندي تعليمات لحسن شحاتة ونفذها، فيه واحد طلب من حسن شحاتة يطلع متعب وينزل جدو عمل كده
قبلها فيه اخت طلبت في نداء الى علاء وجمال مبارك انهم يخرجوا خمس دقايق خلي الجون ييجي بقى
وانا طلبت من اصحاب القلوب الرحيمة ان حد ياخدهم خمس دقايق بس يعزمهم على قهوة وشيكولاتة برة، مافيش شوية وراح جدو جايب الجون
مش ممكن انا عمري ما شفت ماتش كده، كان راكبه النحس بطريقة غريبة وكذا جون ضاع برضه بطريقة غريبة، والعيال جالهم حالة حول ما تفهمش
لحد ما، اكيد اكيد اكيد، حد راح لعلاء وجمال قال لهم يافندم جالكوا ترانك في الحمام وراحوا قافلين عليهم لحد ما جدو جاب الجون
مالهاش تفسير الا كده
-------
هو انا عايشة في بلد غير البلد، اصل الشوارع فاضية، رحت الشغل اول ما جون جدو جه قلت الحق قبل ما الناس تنزل، نزلت من الشغل وجيت في ربع ساعة من كتر ما الشوارع فاضية
هو حتى الاحتفالات بالماتشات حددوا لها اماكن معينة وعلى السادة المحتفلين خارجها ما يتوجدوش خالص؟ 
------
ماما بتقول لي: احنا بنلعب مع الجزائر برضه؟
- لا يا ماما دي غانا
- والنتيجة كام؟
- صفر صفر
- وده حلو وللا وحش؟
-.......
بعد شوية
انا: جوووووووووووووووووووووووون جدوووووو جدوووووو
ماما: ايه فيه ايه؟
- جون يا ماما جون
- ده ايه؟
- احنا جبنا جون
- وده يبقى ايه؟
- يبقى كويس
- كسبنا يعني؟
- اه كسبنا
رحت الشغل ورجعت
ماما: ها؟ كسبنا وللا خسرنا؟
- يا ماما باقول لك كسبنا
- وبعد كده ح يحصل لنا ايه؟
- مش ح يحصل لنا حاجة اخدنا كاس افريقيا
- وح ياخدوا فلوس؟
- آه
- كتير؟
- ايوة يا ماما ملايين
- طيب بقى... يبيعوا ابو الهول ويدوهم فلوس.. امال ح يجيبوا لهم فلوس منين؟

12 comments:

Anonymous said...

حلوة التلفون اللي في الحمام
بس انت طلعت استخباراتية ممتازة يا نوارة بتعرفي نتايج المبارت قبلها و من على بعد

ما شاء الله ده وراثة و لا طفرة ؟
هنعيينك وزيرة الاستشعار عن بعد

أبو عمر - الصارم الحاسم said...

الحاجة بدعت

http://www.almesryoon.com/news.aspx?id=24096

عقبالك يااللي في بالي....{بنا يهديكي

شمس العصارى said...

حد تقل التعليمات لشحاته لالالالالالالالالالا
انما تليفون الحمام اكييييييييييد اه
و الله ربنا عاوز يفرح الناس الطيبة الغلابانة بس
علشان كده كسبنا
ده الواد بتاع غانا فى الدقيقة 89 و قدام الستة ياردة و ساب الكورة
يبقى فين عبقرية شحاته و جهبزة عيلاء و جيمال
ده كرم من ربنا فقط
و اكيد كمان دعاء المصريين و اكيد الاستاذة صافيناز دعت كمان
و انتى تقوليلها حيدوهم فلوس ليه
هههههههههه
نلتقى فى غينيا 2012
بس اكيد مش حناخدها

شمس العصارى said...

شوفت اللينك الى حاطه الصارم الحاسم
و قريت المقال
هو جميل فعلا و قيم
بس ليه هى رافضة مقولة " الدين لله و الوطن لله " مش يمكن المقصود بالمقولة دى " الحاكمية لله" اى ان نظام الحكم فى المجتمع اطاره شريعة الله
اساليها كده يا نوارة
المهم المقال حلو كعادة كلام الاستاذة
الى مستغربلوا لغاية دلوقتى و مش فاهمه
" انتى ليه مش واخدة فكرها "
نلتقى بعد رفعت السعيد

مواطن مصري said...

http://stories-from-my-life.blogspot.com/2010/01/blog-post_31.html

لية ميبقاش فية دوري كرة قدم ل الأحزاب السياسة في مصر؟؟؟

مبروك لمصر

شمس العصارى said...

و الله هى عندها حق
بس سؤال البهوات مسافرين على حساب مين مينفعش يتسأل
السؤال يبقى كده : كويس ان البيه صاحب العزبة وولاده مستحملينا فى العزبة بتاعتهم ...........
و بعدين الوحدة مع سوريا = العداء مع الجزائر
الاتنين الناس فيهم فرحانة و بتولع نار
بس ممكن البرادعى ينافس شحاته على منصب المدير الفنى لمنتخب مصر ههههههههههه
اييييييييييييه الدنيا اتغيرت يا استاذة و الاوضاع اتقلبت
فين ايامكم بس
نلتقى بعد صاحب العزبة

lastcrazyboys said...

ربنـــا يبـــارك في عمـــرها ..ويخليها لينا

وبلغيها اعتــذاري عشان العيال ولاد الـ.......... مخلونيش امبارح اعــرف اتابع
OTVاللقاء بتاعها في البرنامج على
عشان شايفين ان دي ناس بتوع سياسة وفاضيين ياعم ..هاتلنا التشكيل بتاع ماتش بكرة ..ولا لقاءات اللاعيبة
==

المهم هــو انتي ليه مش جايبة تغطيــة افــراح غـــزة

ولو ان لي رؤية مغايرة لوجهة نظرك انهم في ايه ولا ايه
بالعكـــس ..الناس دول عايزين يردوا على اي حــد بيتــاجر باسمهم ..وبيحاول يضرب مصر بيهم
مستغلين وقفة النظام ..عشان اجي انا وانتي والجمهور بتاع الكورة ..نقول في الاآخـــر ..عليكم وعلى غــزة بتاعتكم

بس كسفوهم كسفة ..زي الطين

حسن مدني said...

مصر أمنا كلنا

ومش عيب أبداً إن حد يسافر على حساب والدته.
ايه الحقد بتاعكو ده؟

تحياتي

taima said...

الله يخلي السيده الفاضله صافيناز ... هم اكيد اجاهم تليفون يا نواره انا دايما بقول ما بعرف ولا شي قبل لنواره تشوف كرتها السحريه وتقلي السبب ..مت لشفنا الهدف .. شكرا لمصر اللي فرحتنا الليله ..وشكرا لكره نواره .. ولتحليل السيده صافيناز للمباره الممتع الله يعطيها الصحه ..نواره انتي ماتتغيري لتشبهي حد انتي عبقرونه نتاج عبقريين الله يحميهن ..انتي هيك ميه ميه ..مبروك علينا الفرحه ومبروك لام الدنيا

Anonymous said...

جدو جدو هو انا كسبت ازاي..ينفع نشيل ريس ونجيب بدالوه ريس بماتش!!!





يعني بدال صناديق الاقتراع وكركبه الشعب وزعاج النايمين..مباراه تقام والغالب هو الريس المنتخب للشعب.


.
ماينفعش


اجل سلام.

Unknown said...

واحد 7 مريار والتانى 15 مريار هايسافروا على حساب مين يعنى ؟

على حساب الحكومه والحزب طبعا"

auroramoslema said...

خدي دي يا أستاذة نوارة..
تفتق عنها ذهني بوحي من الأفراح الشيعبية وفرحة الشيعب كله
ولااااااا!! اييييييييه؟.. ولااااااااا!!! ايييييييييه؟؟!! عارفين حسني بيوصي الحكومة ع الشعب يقولها ايه؟.. اييييييييييه؟؟.. عارفين حسني بيوصي الحكومة ع الشعب يقولها ايه؟؟ اييييييييييه؟؟..
عايز تهده .. هات له جدو..
وعايزه ينام.. هاتله زيدان..
عايز تنهب.. هات له متعب..
عايز تلبه .. هات له عبد ربه..
عايزه معوق.. هات له معوض..
عايزه في البلالاا.. هات له شيكابالا
عايزه عاطل .. هات له وائل..
عايزه بلاطة.. هات له شحاتة..

وابقي كملي انتي بقية التشكيل :))
...