Wednesday, 20 January 2010

اشمعنى طلعت السادات اتحبس؟

ماحدش متغاظ من بيان المية وخمسين نائب بتوع الحزب الوطني غيري، هم مش متغاظين لانه عارفين انه كلام فض مجالس ومالوش اي قيمة، لان التلويح الجاد بالحرب او اعلان الحرب ده اختصاص القائد الاعلى للقوات المسلحة او ينوب عنه وزير الدفاع، اي حد يقول اي كلام تاني يبقى بيخرف. وانا بقى متغاظة لنفس السبب اللي هم مش متغاظين عشانه
انا باحترم الجيش المصري وباحبه ومش ح تصدقوا اني لما باشوف ظابط جيش مصري في الشارع باقف عشان اعديه، سواق ماشية على رجليا او سايقة عربية ولولا الملامة كنت وقفت اديت التحية العسكرية، بس باخاف الناس تقول عليا مجنونة، طيب ده مش تطاول على الجيش المصري؟ مين احمد عز والكام نائب دول عشان يتطاولوا على المؤسسة العسكرية ويتكلموا نيابة عنها في حاجة مش اختصاصهم؟ طلعت السادات كان نائب وله حصانة ولما اتكلم عن المؤسسة العسكرية اتحبس، وانا بصراحة ما كنتش متعاطفة معاه، لاني مؤمنة فعلا انه لا يجوز التطاول على المؤسسة العسكرية، مش كل الدول بتعمل كده، بس احنا في مصر لنا تقليد وهو احترام المؤسسة دي وعدم المساس بها
طيب كمان المية وخمسين نائب دول هددوا بضربات عسكرية وماحدش فيهم عسكري اساسا ناهيك عن انهم تجاوزوا القائد الاعلى للقوات المسلحة ووزير الدفاع، ازاي يتجرأوا يعملوا كده؟ ده تطاول، مافيش حاجة اسمها فض مجالس فيما يخص الجيش، الجيش المصري له احترامه وقدسيته، يفضوا مجالس في اي حاجة لكن فيه خطوط حمرا، هي ما سابتش للدرجة دي يعني
اذا كان الكلام جاد، وده مستحيل طبعا لان الجيش مش ممكن ح يسيبنا نعرف حاجة زي من ناس مالهمش صفة، يبقى المسئولين العسكريين بس هم اللي يبلغونا بحاجة زي دي، واذا كان هلس وتهديد وفض مجالس، ودي الحقيقة، يبقى عيب عيب عيب، وغلط، وخطر، وتجاوز، وتطاول، الجيش المصري مش لعبة عشان يهرجوا فيه، انا متعلمة كده في كتاب التربية القومية اللي كنا بناخده، ايه؟ دي كمان علموها لنا غلط؟ 
علمونا في المدرسة ان اسرائيل عدوة وكانوا بيدونا في دروس القراءة حاجات عن ابطال حرب اكتوبر، وطلع غلط، علمونا ان فلسطين دي بتاعة مصر ومصر بتاعة فلسطين وماحدش لفلسطين غير مصر، وطلعت دي غلط، علمونا ان كلنا مصريين ومافيش فرق بين مسلم ومسيحي، وطلعت دي غلط، علمونا ان مصر دولة عربية، وطلعت دي غلط، بس لا، كله الا الجيش، لا، لا، لا، انا متمسكة بقدسية المؤسسة العسكرية اللي بتحمينا وبتنقذنا في السيول وبتأكلنا العيش لما نقص كمان من السوق، ماحدش يهوب ناحية الجيش
والمية خمسين نائب دول لازم يتعاقبوا على جرأتهم على الجيش

23 comments:

هندسة وصفية said...

http://arz.wikipedia.org/wiki/اللغه_المصريه_الحديثه
هو ايه ده؟؟

ehabafndy said...

يا أخت نواره إنتى بتصطادى فى الميه العكره لا حياه لمن تنادى الموءسسه العسكرية المصريه محيده تماما و لا و لن يكون لها دور فى الحياه السياسية المصريه و كلمتين التسخين دول مش هيعملوا أى حاجه

جبهة التهييس الشعبية said...

انا لا باسخن ولا باصطاد في المية العكرة

انا متضايقة فعلا

انتوا ازاي مش بتضايقوا عشان الجيش
هم لغوا التربية القومية وللا ايه؟

Lina said...

أنا مش فاهمة مين اللي مش متضايق؟
كل الناس "اللي بيفهموا" متضايقين طبعاً
ومحروق دمهم
ومتغاظين
وهايطقّوا
ومش عارفين يعملوا إيه

بس خلاص
في ناس وصلت لدرجة إنهم اتعودوا ع البهدلة وقلة القيمة
وخلاص بقى مابقتش فارقة مين يتكلم باسم مين ولا بيان إيه اللي يصدر منين

أصلها بقت فوضى
:(
تقريباً هي دي الفوضى الخلاقة اللي كانت بتتكلم عليها الست كونداليزا
فوضى "خلاقة" للمصريين الجدد
اللي بيتكلم عنهم الراجل المحترم دا
فهمي هويدي

http://aljazeera.net/NR/exeres/3108BDDB-2B64-49E2-AC64-315DDABFAC18.htm

عبد الزهراء المصري (علي الحسيني) said...

هههههههههههههههه لأول مرة أتفق زوار مدونتك يانوارة لأن أنا لقيتك في مقالك بتقولي للجيش زي مازعلت من الاستاذ المحترم طلعت السادات أزعل من الحزب الوثني وأنا أحب أطمنك أنه لأ الجيش ولا شعبكم المتخلف ده هيتحرك ، أصلهم وأكلين فووووول يعني مبرررررررشمين هههههههههههههههه

تقبلي تحياتي

مواطن مصري said...

نوارة المؤسسة العسكرية مش بتاخد قرارات من عز لو عاوزة تطير عز هطيرة

و مش هتستنى قرار من عز

في رجال شرفاء في القوات المسلحة المصرية


المؤسسة العسكرية مش بتشتغل سياسة

المهدى said...

كل كلامك صحيح وسليم وأبصم معاك بالعشرة لكن قبل ما أبصم لفت نظرى سؤال عفوى أرجو أن يلفت نظرك وهوإزاى يتجرأوا؟ و أعتقد أن الإجابة
تبدأ من تحديد من هم؟

هم من خلطوا كل المفاهيم التى
تعلمناها والتى ذكرتى بعضا منها
هم من حاولوا من قبل عن طريق صحافتهم وطبول إعلامهم شن الحرب على غزة وقت ما سموه إنقلاب حماس وجمعوا وحشدوا وتحالفوا مع كل العالم ثم أوقفهم حبايبك الذين يعنون بأمن هذا الوطن

هم أصحاب مشروع التوريث وإن كنت أعتقد أنهم على أتم الإستعداد للتخلى عنه الأن فى سبيل صيانة مصالحهم

هم صهاينة أكثر من الصهاينة وأمريكان أكثر من الأمريكان

هم المسئولين الأن عن الأعلام والصحافة والتنظيم فى ما يعرف بالحكومة من الآخر أصحاب المصالح والسبايب المحلية والدولية
هم فى وجودهم وفى مشروعهم الملعون تجرأوا على الدولة و جيشها وشرعية الحكم فيها كجمهورية

أخيرا هل الجيش محيد ؟
لا أظن ولو كان كذلك طب ليه جمال مبارك لم يصبح الرئيس جمال مبارك حتى الأن ؟ خايفين منك ؟ والا من القوى الوطنية المهلهلة والمنتفعة ؟ والا يمكن من الإخوان المسلمين ؟
شوفى الدولة الأن دولتين دولة بتتاجر فى العيش ودولة بتتدخل لتوفير العيش
دولة بتفرض الضرايب وتسن القوانين الفاشلة ودولة أخرى تتدخل لإلغاء كل هذا العبث
والسؤال مدام محدش قادر يحشد الشعب يبقى العسكرى والا جمال وشلة المنتفعيين؟

faissl said...

يعني هو مش مباشرة كده
هما لغوا التربية على حدة ولغوا القومية على حدة
فطلع لنا الجيل الأمور اللي انتي شايفاه ده
على فكرة: بقى اسمها تربية وطنية، كل حاجة عليها كلمة القومية اتغيرت أو اختفت، القومية للبريد بقت البريد المصري، القومية للاتصالات بقت المصرية للاتصالات وهكذا...
وسلم لي على المترو
سكك حديد مصر حاليا..!

أبو أمك said...

ياريت بس الكلام ده مايكونش ليه علاقة بحاتي الجيش اللي في باب اللوق
مش مهم بقى بعد كده الحزب والمجلس كله
وعلى رأي المثل...عض نوابي ولا تعض كبابي

شمس العصارى said...

ذوق وذق ذوق ذوق يا نوارة
ده بس علشان بتعدى ظباط الجيش
بدايتا الحديث عن الجيش يحتاج لايام و شروحات كتيرة لتفنيد ما يعتقده الناس عن الجيش المصرى
مش موضوعنا دلوقتى
قرار الحرب فى يد القائد الاعلى للقوات المسلحة - الى هو الرئيس- لكن لا ينوب عنه القائد العام - وزير الدفاع- ده قانونا كده - لان فعليا القائد الاعلى مش حياخد قرار الا باستعدادات القائد العام_....
العقيدة العسكرية الحالية هى جيش مصر لحماية مصر وليش لاى شئ اخر
يعنى لو القائد الاعلى - الرئيس - قالهم اضربوا غزة و الله و الله والله العظيم حيضربوها بدم بارد
انتى طبعا مذهولة و مش مصدقة بس ده كلام واحد خدم فى الجيش و كنا نشوف و نسمع بلاوى
و تصديقك من عدمه لن يغير من الواقع
و بما ان عز و الكلاب الى معاه على مقربة من جمال و طبعا جمال ابن البيه وكلامه بيتسمع
-لا زالت حالة الزهول و عدم التصديق منتاباكى-
بس للاسف هما ممكن يعملوا كده
بس مش دلوقتى لان حاليا الشعب ممكن ينفجر فى وشهم - ده الشئ الوحيد الى رادعهم و الشى الى اهم منه ان مش كل الظباط حيوافقوا على كده
غزة اصبحت قربان للتوريث
نلتقى بعد الجيش

مواطن مصري said...

شفتي الكليبات دي

في سيناء السيول سقوط المنزل

http://www.youtube.com/watch?v=QbrR-VJVCQU

احمد سعيد said...

حد شاف احمد منصور النهاردة ؟؟؟
احمد منصور دة جااااااااامد
مشك الراجل بتاع المخابرات
يالهووووووى
شطفه
مثال للاعلامى النموذجى
اهو دة لو عوكل فكر يعمل معاة لقاء
مش هيخرج منه
لانه هيموت بالسكته القلبيه فى اول عشر دقايق
:))))

احمد سعيد said...

بطلى تسخيييييين
شكلك عاوزة تتحبسى يانوارة ..

احمد سعيد said...

نوراة ,,,انتى عايشه فى وهم

احمد سعيد said...

شيطااااااااااانه

احمد سعيد said...

ايهاب افندى

احييك على تقديرك الفنى

احمد سعيد said...

حدفت فاصبت والله ياابنى ..

احمد سعيد said...

بتفكرنى بقصه ست حلوةودمها خفيف وجوزها ولامؤاخذة مبيغيرش
قعدت تسخن فيه
النهاااااردة ياسداحمد ياخووووياااا
اتنين رجاله طلعو عليا ونا ماشيه عازراعييييه
وجعدم كدة بيصولى بصات كدة ياخوياااااا
العيال دول انى عارفااااهم
دول من بيت ابو اسمعايل اللى جنب بيت
اخووووويا



وصاحبنا منففففففففففض

amr565 said...

كلام سليم

مواطن مصري said...

كاميرا بهاء من العريش ترصد سيول سيناء 5.mp4


http://www.youtube.com/watch?v=SUNPRhg4Nu4

شخص افتراضي said...

مع احترامي لحماسك العسكري

الجيش مايختلفش في حاجة عن النظام اللي هو بيحميه
ثم أنه هو اللي بيصدر لنا عناصر النظام الفاسد اللي مستعبدنا من سنين

وأنا باقول أنه بيحمي النظام لأني مش شايف بصراحة شيء يثبت أنه موجود علشان يحمينا احنا
إذا كان دخوله لأكثر المناطق خطورة من ناحية الأمن القومي محدود باتفاقية كامب ديفيد، يبقى بيحمينا ازاي، ومن مين بالظبط؟

ehabafndy said...

أنا معدتش عارف حاجه بصراحةيا أخت نواره أنا متلخبط و كتبت عن اللخبطه دى أدعوكى إنك تقريها فى مدونتىhttp://ehabafndy.blogspot.com/2010/01/blog-post_20.html

احمد سعيد said...

مواطن مصرى

لو سمحت

الحاجه اللى متعرفهاش متفتيش فيها