Friday, 1 January 2010

كارثة بيئية تنتظر مصر بسبب بناء الجدار

الجدار ح يأثر على منسوب المطر في سيناء وممكن يسبب جفاف، وح يلوث مياه الابار اللي اهالي سيناء معتمدين عليها، يعني اهل سيناء ح يموتوا من العطش، انا فاكرة ان مجموعة علماء مصريين عملوا بحث وطلبوا من وزارة الزراعة انها تشجر مليون فدان في سيناء وده ح يعود بالنفع علينا ويغير خريطة المطر في مصر كلها وممكن نبقى دولة ممطرة ومش كل اعتمادنا يبقى على مية النيل، والدولة رفضت تشجير سيناء
!!!!!!!!!!!!!!!!!!
ودلوقت بتبني جدار ح يأثر على المطر ويلوث الابار!!!!! هو غبي وللا شرير واللا الاتنين مع بعض؟
كمان الحفر العميق في التربة ح يفككها لانها تربة رملية اصلا. وبعدين انا ما كنتش اعرف ان مصر ح تعدي من تحت الجدار انابيب لضخ الغاز والصرف الصحي، ايه موضوع الصرف الصحي اللي احنا عايشين حياتنا عشانه ده؟ انا باطالب المواطنين المصريين بالاعتصام والاضراب عن دخول الحمامات خالص لحد اما نشوف ح يعيشوا ازاي من غير صرفنا الصحي؟ طبعا فاكريني باستظرف دم اهلي، لا والله ماليش دماغ اهرج، اسرائيل فعلا كانت عايزة تشتري صرفنا الصحي، ومجلس الشعب كدب وقال رفضنا الصفقة، بس مدام مصر ح تمد تحت الجدار انابيب صرف صحي يبقى اكيد اسرائيل ح تاخده، اسرائيل عايزة تشتري البيبي بتاعنا ليه؟ لا مش عشان تاخد من اترنا وتعمل لنا عمل، عشان تعالجه كميائيا وتستفيد بيه. وراهم شغل مش قاعدين يشجعوا كورة ويقاطعوا الجزائر عشان ماتش.
المهم بقى ان مواسير الغاز والبيبي ح تفكك التربة وتسبب انهيارات لان التربة ضعيفة ورملية. ومد مواسير البيبي ح يخلي مياه الابار تختلط بالصرف الصحي والسكان هناك ح يجيلهم الامراض اللي عندنا بعد ما كانت صحتهم كويسة.
لا والنبها الناصحين، سمعوا كلام الخبراء المصريين بالعكس، بدل ما يشجروا مليون فدان، ح يزيلوا الاشجار الموجودة اصلا اللي زارعها الاهالي، وده بيشكل خطر على البيئة في رفح بالتحديد
ده ملخص المقال ده اللي بيشرح بالظبط المصايب اللي ح تحط على مصر من جراء بناء الجدار
مش معقولة كل انتخابات يدي اسرائيل حاجة؟ هي اسرائيل هي اللي بتشرف على الانتخابات؟ هو احنا قلنا له لا؟ ده احنا حتى ما بنروحش ننتخب عشان بيتشائم من وش الشعب وسايبنها له يعمل فيها اللي هو عايزه، المرة اللي فاتت عمل لهم اتفاقية الغاز، والمرة دي السور ده اللي ح يخرب بيتنا قبل ما يخرب بيت غزة
واللي بيحلم ان الجدار ده عشان التوريث يتغطى كويس، مافيش حد عايش على كرسي سلطة ح يدي اي حد كرسيه حتى لو ابنه، طب هو يدي ابنه الجزمة اللي بيدينا بيها ويقعد فاضي؟ يضرب مين بعدنا؟ الملك عقيم
معناتو ايه الحديت الماصخ ده؟ معناتو ان ابو التعالب ملك الفياجرا وقاهر الهكسوس (على رأي بهيج الشرير) ح يرشح نفسه عاشر، وكل مرة قبل الانتخابات ح يدي اسرائيل قطمة، لحد ما بعد عمر طويل جدا ييجي الامور الصغير، بعد ما يكحكح ويبقى مش قادر يمشي، يترشح ما يلاقيش بلد يترشح فيها بقى، يروح يترشح في اسرائيل بقى اللي ح تكون كلت البلد، وطبعا اسرائيل ح تسقطه، ماحدش كان ح ينجحه غيرنا عشان غلابة وطيبين ولقطة واي حكومة في الدنيا تتمنانا
انا بافكر اقترح على السفير ابراهيم يسري انه يجيب خبير جيولوجي مصري يعمل تقرير باضرار الجدار البيئية على شبه جزيرة سيناء وسكانها، ده اذا كان هو ما عملش حسابه على كده من الاصل، بسم الله ما شاء الله، ربنا يخليهولنا ويديله الصحة، محامي عقر فعلا، ح اسأله ان شاء الله
ما تنسوش بقى التوكيل الله يخليكوا، فيه واحد قال لي ان الشهر العقاري شغال يوم الجمعة من الساعة اتنين ونص الى الساعة اربعة ونص
تاني:
ح تاخد الرقم القومي، وورقة بيضا كده مكتوب فيها:
ابراهيم يسري سيد حسين. محامي بالنقض. العنوان: 11 شارع 213 دجلة - المعادي
وتعمل له توكيل قضايا
وتاخد التوكيل وتطلع على 1 شارع التوفيقية وتطلع الدور الخامس تلاقي مركز هشام مبارك للقانون، تقول لهم انا جاي اسيب التوكيل اللي نوارة ح تعدي يوم الاحد ان شاء الله تاخده، ح يقولوا لك عيني يا معلم، لو لقيت مافيش حد موجود (وده احتمال ضعيف جدا) تسيب التوكيل من تحت عقب الباب
بس خلاص
وعاشر: الحكاية دي مافيهاش اي حاجة تخوف، مش ح تتحول للتحقيق في الشغل، حتى لو كنت بتشتغل في امن الدولة نفسه وللا حتى في المخابرات، ومش ح يتقبض عليك، ومش ح يتفتح لك ملف في امن الدولة، مش ح يعملوا لك حاجة خالص لان ده قضاء وانت مواطن ورافع قضية، اقصى حاجة يعملوها انهم يحاولوا يعملوا حاجة في القضية نفسها مش فيك انت. ولما يحبوا يئذوا حد ح يئذوا السفير ابراهيم يسري، او يئذوا الناس اللي عاملة شبورة رغي زيي. مش انت يعني.
ما تخافش ما تخافش، مش بس ما يقدروش يعملوا لك حاجة، مش ح يعوزوا يعملوا لك حاجة، اقصى حاجة يحبوا يعملوها انهم ييأسوك، ماهم برضه مش قاعدين فاضيين لكل واحد قرفان، والا بقى ح يمسكوا تمانين مليون قرفان ويحبسوه؟ لا طبعا. هم غلسين، بس مش مجانين يعني. انا لسة ح اعرفهم النهاردة، دول عشرة عمر.
وعيب بقى.. نختشي على دمنا، امبارح مينا كاتب على التويتر:
"صديق ليا باعت يقول لي عارف المشهد عامل إيه في القاهرة؟ إحنا بنسكر والأجانب بتتظاهر... وندرفووول تشيرز يا شعب"
عيب بقى، امبارح طول الليل دايرين سكرانين في الشوارع يدوا كلاكسات تيت تيت تتيت تييييت والناس مضروبة عندنا ودمها سايح؟ فين الصعايدة اللي في البلد دي؟ اعدموهم؟ مافيش حد دمه يسخن يا ناس؟ والسكر ابتدا من الساعة عشرة بالليل وانا راجعة من الشغل وسايقين بطريقة مجانيني، اول مرة اشوف عربية بتتطوح، الله يرحمه اخر كلمة قالها شاندوشت مكرونة ده صدق اللي قال الفلاح اما يتمدن يجيب لاهله مصيبة، امال ايه الدراسة اللي بتقول ان المصريين اكتر شعب متدين في العالم دي؟ وللا ده كان بعد صلاة العشا ده وللا ايه؟
بقى الاجانب قاعدين فايقين وعاملين مظاهرات وناس سكرانين؟ واحلى حاجة بقى فجأتن كده الزينوفوبيا ظهرت علينا: يعني الامريكان والفرنساويين خايفين قوي على فلسطين؟ دول جايين يعملوا حاجة... دي مؤامرة غربية علينا.
هيهيهيهيهيييييييييييي من امتى الخواجات بقوا عدوين؟ مش ده حلم كل شاب مصري انه يتجوز مزة خواجاية تديله اي جنسية غير الجنسية المصري؟ فجأتن كده بعد الشوفونية، والنازية، والفاشية، والطائفية، والمذهبية، والهوموفوبيا، ظهرت عندنا الزينوفوبيا، وكمان سكرانين، اللهم صلي على حضرة النبي، اختصر وقول شامبانزي


 
لا مش ح ينفع كده، بجد والله، بالراحة كده، ده مش منظر بلد فيها خمستاشر واحد على بعض بيحبوها
المظاهرات ضد مصر ابتدت خلاص في عواصم العالم بعد ما ضربنا لهم عيالهم اللي جايين يتضامنوا مع ناس لا من جنسهم ولا ملتهم ولا يقربوا لهم حاجة لمجرد الانسانية
يا اخي لو بتكره العرب اعتبر ان اهل غزة دول قطط وكلاب وافتكر ان واحدة دخلت النار عشان جوعت قطة
لو مش خايف من النار خاف على سمعتك اللي بقت في الحضيض وكل الناس عمالة تتف عليك
لو ما يهمكش سمعتك خاف على مستقبل عيالك لما يفضلوا يحفروا في تربة ضعيفة لحد ما يجيبوا لنا زلازل ويلوثوا المية والبيئة ويعملوا لنا تسحر واحنا اصلا النيل عندنا مشاكل فيه والمستقبل لمياه الابار
لو مش خايف من ده كله افتكر ان اللي متغطي باسرائيل وامريكا عريان، لو بينفعوا كانوا نفعوا صدام وللا شاه ايران اللي خدمهم خدمة العبد للسيد
يا ناس البلد بتروح مننا يا ناس... البلد بتروح مننا


------------
اسرائيل فرحانة قوي بالفتوى الضرار اللي طلعها مجمع البحوث الاسلامية بوجوب بناء الجدار
حسبنا الله ونعم الوكيل... هي الناس نسيت اننا ح نموت ونقف قدام ربنا نتحاسب وللا ايه؟
على رأي مهندس مصري قال لي: دول بيفكروا ان ربنا غفور رحيم لكن مبارك ما بيرحمش

11 comments:

طيف بدر said...

كنا
بالأمس نطالب بتكوين رأي عام عالمي يقف وراء القضية الفلسطينية ...فلما
برز هذا الرأي العالمي أصبحنا نحن فيمن يقمعه و يلعنه و يطعن فيه !!!ما
أشبهنا بأهل الكوفة !!! أشعر أننا نعض اليد التي تمتد إلينا بالخير و بدلا
من أن نيسر لهم مهامهم نعسرها

يساري فلسطيني said...

حماك و رعاك الله ... انت بالف راجل

joyadz said...

أستاذة نوارة معقول 80 مليون مواطن مش قادر يغير ولا يخرج في مظاهرات حتى يغير هذا النظام الفاسد ...أظنها فرصة مناسبة للاطاحة بهذا النظام ...لا انتخابات ولا هم يحزنون ..رايي ان يكشر الشعب عن أنيابه...المشكلة ان المواطن المصري بنظرى وممكن جدا اكون على خطأ ...وجد نفسه في حالة دفاع مستمر عن نفسه في هذه الايام فقد وجد نفسه الكل ينتقده ويحلله ويصرخ بوجه واكثر الناقدين هم ابناء الملة الواحدة من العرب الاخرين الذين لا شغل لهم الا تحليل ونقد المصريين وهم جالسون في بيوتهم ...لو تقفل الافواه المصطنعة بقها ويتلهوا ...اكيد سنرى ما نحن متأكدين منه أن المصريون الذين على حق ...سيغيرون الاحداث كلها ..لانها فرصة مناسبة جدااااااا يجب استغلالها

علياء said...

معلومة
________________

تكلفة بناء الجدار
12
مليار جنية

!!!!!!!!!

يضاف إلى ذلك كم الخسائر التى يفوق حجمها التصور الناشئة عن بنائه

http://www.youm7.com/News.asp?NewsID=172782&SecID=65&IssueID=92

SpoiledEgy said...

Just like I can not comprehend why our regime decided to prevent all the activists from crossing over, etc, I can not also understand today's news that Hamas accepted to sign the Egyptian paper but refuses to sign it in Egypt!
Childish games are played on all sides and innocent ppl are suffering bec of that.

حـنــّا السكران said...

يا نوارة هذا جزء من تصريح مهندس مصري يعمل في مشروع الجدار :

وحول وضع مواسير لمياه البحر في باطن الأرض قال: "هذا الأمر حقيقي، فهناك
ماسورة رئيسية ضخمة تمتد من البحر غربًا بطول 10 كلم باتجاه الشرق، يتفرع منها مواسير في باطن الأرض مثقبة باتجاه الجانب الفلسطيني يفصل بين الماسورة والأخرى 30 أو 40 مترًا؛ حيث تضخ المياه في الماسورة الرئيسية من البحر مباشرة ومن ثم إلى المواسير الفرعية في باطن الأرض، وكون المواسير مثقبة باتجاه الجانب الفلسطيني؛ فإن المطلوب من هذه المواسير الفرعية إحداث تصدعات وانهيارات تؤثر في عمل الأنفاق على طول الحدود".

وأوضح أن ضخ المياه فترة طويلة من شأنه التسبب في مشكلات متفاقمة، قد تؤثر في مناطق واسعة في مدينة رفح وعلى قواعد وأساسات البناء خاصة في المنطقة المحاذية للحدود.

وأشار إلى خطورة تسرب مياه البحر في باطن الأرض، موضحًا أن المياه المالحة لها تأثير بالغ على التربة وأساسات المنشآت، وقال إن ماء البحر لو حدث أن تسرب في باطن الأرض سيؤدي إلى انهيار التربة في مناطق واسعة بمحاذاة الحدود"

مياه جاية من البحر يا نوارة و هيدا غير مواسير الصرف الصحي اللي رح يهديه للصهاينة .

بس بصراحة هيدي سابقة تاريخية جديدة لملك الفياغرا و قاهر الهكسوس .. حتى البيبي بتاع الشعب .. باعه ...أو منحه لأحبابه .

مواطن مصري said...

طيب ما بتوع لندن يتظاهرو ضد سفارة اسرائيل؟؟؟؟؟

هة
ولا بس يشتمو مصر و لندن تبوس ايد اسرائيل عشان ترضى عليهم
؟

و بعدين الناشط دة متفرجش ع المحلة قبل ما يجي

Amr said...

أنا اللى قريته أنه هايسبب مشاكل فى الناحيه الفلسطينيه من الحدود بسبب مياه البحر اللى هايفتحوها بواسطة انبوب ضخم علشان يغرقوا الأنفاق
أنما أول مره اعرف حكاية الأضرار على الناحيه المصريه
أعتقد أن الكلام ده لو وصل لبدو سيناء مش هايسكتوا وياريت السيد ابراهيم يسرى يعمل بنصيحتك ويجيب تقرير من لجنة خبراء مستقلين ويضم الأضرار دى لملف القضيه

شفت الفيديو بتاع ضرب المتضامنين الأجانب
الله أعلم - بس حاسس انهم مايضربوش بالمنظر ده الا لما يكونوا واخدين ضوء أخضر من السفارات هنا

overdose said...

معلش حد يقول عنوان مجلس الدولة ده بالظبط

زقزوق said...

اومال لما تعرفوا ان مخزون المياه الجوفية فى غزة فاضل له اربع سنين اصلا ويخلص بسبب سرقة وسحب اسرائيل للميه من ناحيتها تقولوا ايه

مصر 30 said...

ليه أحمد رجب فى نص كلمة بالأخبار كان بيساند بناء الجدار و بيعتبر إن الفلسطينيين بيتعدوا على حدود مصر ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟