معبر رفح اتفتح بشكل دائم

خدوا دي بقى احفظوها عشان شكلنا حنغنيها قريب في مناسبة سعيدة ان شاء الله 

:)

مليونية صلاة الفجر يوم الجمعة الجاية عشان فلسطين

تحديث:
اقروا بقى الكلام العنب اللي حينفعنا في حياتنا
تحديث:
الشيخ جبريل عامل مليونية فجر في عمرو بن العاص، بس انا حاحاول اوصل له عشان يعملها في التحرير احسن
تحديث:
اسكندرية اجدع ناس
تحديث:
وفي اليوم ده فيه ناس رايحة رفح
هاااااييييل.. اللي حيروحوا رفح كام؟ الف الفين تلاتة عشرة؟ 
عايزين بقى مليون واحد بيصلي الفجر في التحرير من اللي مش رايحين رفح
بحيث دولم يبقوا رايحين رفح... وناس تانية بتصلي في التحرير في ضهرهم، في الفجر
دي احسن فرصة لقتل الفتنة الطائفية
واحسن فرصة للعودة للاجماع الوطني
واحسن فرصة للتأكيد على مطالب الثورة...
-----------
أظن فيلم النسوان والمسلمين والمسيحيين ده خلصنا منه بعد ما طلع ان اللي دبروه واحد مسلم وواحد مسيحي ايد واحدة اسم الله عليهم، ومقبوض عليهم الاتنين دلوقت وبيتشمطوا

دماغنا بقى شوية من الوش ده

اي حمار بديل وبردعة في البلد دي خلاص عرف ان اللي عمل احداث امبابة كان عاملها عشان يفشل مشاركة مصر - التي لا يستهان بها ابدا - في الانتفاضة التالتة

مشاركة مصر حتبقى مليونية صلاة الفجر يوم 13 مايو

هم كاتبين مساجد... مساجد ايه؟ هو فيه مسجد في مصر يساع مليون؟ ده اولا

ثانيا: انت حيجيلك عيال مش بيركعوهاش ويمكن جايين من غير وضوء اساسا عشان يخوفوا اسرائيل من منظرهم وهم بيصلوا، يعني العيال دي جاية تخوف اسرائيل... مين حيصورهم جوة المسجد؟ 

التحرير... التحرير... مليونية صلاة الفجر في التحرير.. والتجمع يبدأ من الساعة 2 بالليل. واللي جاي حيبقى مسلمين ومسيحيين

بالنسبة لاسكندرية ما يتخافش عليهم.. بالنسبة للسويس ما يتخافش عليهم.. بالنسبة لاي محافظة تانية ما يتخافش عليهم

وبصراحة لو الصعيد عرف يعمل مليونية واحدة في صلاة الفجر يبقى معجزة.. ولا بلاش لتقلب بخناقة في اخر اليوم... خليكم خليكم، انا عارفة انكم بتزعلوا من الكلام ده، بس بصراحة.... ولا بلاش... طب ما تورونا نفسكم يعني، اعملوا مليونية صلاة فجر، مسلمين ومسيحيين، وما تمسكوش في بعض اخر اليوم وبعدها يبقى لكم حق تزعلوا لما اتكلم انا كده.. وساعتها حادور بميكروفون اقول انا اسفة يا صعيد

المسيحيين كمان عندهم صلاة الفجر، ومش بيصلوها برضه زي اغلب الشباب المسلم المصري ههههههههههههههههههههههههه والنبي احنا مسخرة

النداء دلوقت موجه الى كل من:

1- الاخوان المسلمين اللي اختفوا في ظروف غامضة... مش عارفة ساكتين اليومين دولم ليه؟ مافيش يا عيني غير صفوت حجازي اللي عمال يصلح ده، ويكلم ده، ويهدي ده.. وسايبينه لوحده

2- ائتلاف شباب الثورة

3- مينا زكري يكلم الكنائس عشان قداس الفجر

4- يسري فودة بالاسم

5- الجزيرة مباشر مصر

6- ابراهيم عيسى ومحمود سعد وبلال فضل بالاسم

7- صفحة خالد سعيد.. اللي هو وائل غنيم بالاسم

مليونية صلاة الفجر للمسلمين والمسيحيين في التحرير، ويتحشد لامها بقى من دلوقت وبسرعة، كل مرة نحشد من يوم الاربع كده؟

مليونية كله ييجي يصلي... مسلمين ومسيحيين ييجوا يصلوا، انتوا ما بتفلحوش الا وانتوا بتصلوا، عشان بتبقوا ساكتين ما بتقولوش كلام من مخكم.. بتقولوا كلام ربنا بس

المليونية دي للاهداف التالية:

1- دعم الانتفاضة التالتة 

2- وحدة وطنية

3- التأكيد على مطالب الثورة

4- واهم حاجة... مصر ما عادتش تعيد تاني على اسرائيل في "عيدها القومي" زي ايام المخلوع

مافيش انقاذ للبلد غير اليوم ده.. لو سمحتوا اهتموا شوية، ووزعوا على قد ما تقدروا، ونزلوها في كل حتة

اديني خلصت ضميري من ربنا واللي يكسل بقى الذنب في رقبته.. انا كده براءة يا رب

ملحوظة اخيرة:

الدول العربية كلها عاملة مليونية صلاة الفجر.. حيبقى شكلنا عاااااااار لو اكبر تعداد سكان في العالم العربي فشل يعمل مليونية وتيجي الدول اللي تعدادها خمسة وعشرة مليون يفلحوا ويعملوها... لو حصل ده ما ترجعوش بقى تتنططوا على الناس تاني

الللللللللعععععععععععععببببببببببببب... مظاهرات في جزيرة العرب

اوعى اوعى...

الا دي بقى.. 

الا دي.. حقة يا عيال.. حقة لو الجزيرة العربية نورت، مش الارض تنور، ده المجرة كلها تنور... 
نور للأمم بجد بقى

ترجع لنا بقى.. ترجع لنا بالسلامة، ترجع للانسانية بقى وتنور علينا، اوعى.. دي حتبقى نجمة الشاشة الاولى، وحتاكل الجو من مصر حتى

قولوا يا رب

اوعى اسمع حد يقول العدد قليل.. الله يرحم سلم النقابة، انتوا حتتنططوا على الناس؟ احنا كنا نحلم؟ ده ولا في الاحلام.. بس ادعوا لهم، وقولوا يا رب
ملحوسة طائفية قذرة على جنب: دول مش شيعة

احنا مش لازم ننسى وقفة الناس الحلوة دي جنبنا

الفلسطينيين... يا عيني

واقفين دلوقت رافعين اعلام مصر وعمالين يقولوا شكرا ام الدنيا.. حاجة توجع القلب، عشان اساسا المصالحة دي ماهياش حاجة فظيعة ولا حاجة، ومش اول مرة تحصل، ما السعودية صالحتهم قبل كده وما قالولهاش شكرا ابو الدنيا، بس هم مش بيحبوا يكسفوا ايدنا

فاكرين ايام مبارك لما اسماعيل هنية طلع تهنئة بفوز المنتخب المصري وقال لنا الف مبروك وبالمناسبة السعيدة دي افتحوا لنا المعبر؟

احنا بقى مش لازم ننسى وقفة الناس الحلوة دي جنبنا، ده كانوا هم تقريبا الوحيدين في العالم اللي عندهم امل فينا، ومن كتر املهم كنت باقولهم: الاخوة الفلسطينيين اللي مستنيين مصر على الغدا... كلوا انتوا واحنا لما نيجي حنسخن وناكل

بس الشهادة لله ما سمعوش كلامي، فضلوا مجوعين نفسهم وعمالين يقولوا ده مصر دي.. دي حتبقى عروسة، بكرة تشوفوا، ده اجدع ناس المصريين دول

فاحنا كده بقى عايزين ناخد خطوات جادة، لإن الثورة بتاعتنا ممكن يحصل لها انتكاسة ويرجع لنا نظام زي نظام مبارك واوسخ لو فضلنا محاطين بجو عدائي، وفضلوا اعداء الثورة في المنطقة اقويا، وحبايبها ضعفا

لازم حبايب الثورة يبقوا اقويا لان ده حيأثر علينا بشكل مباشر، انا طبعا مقدرة ان السادات زرع ثقافة متخلفة تخلي الناس مش عارفة تربط ما بين الشأن الخارجي والداخلي

طيب.. هي اولا فلسطين مش شأن خارجي، ثانيا.. اي كيان دولة بالاساس شأن خارجي، واي حاجة لها علاقة بالشأن الداخلي، من اول البطالة والفقر وسعر الطماطم، حلها في الشأن الخارجي اساسا، لإن الدولة المضغوط عليها من قوى خارجية مش بتعرف تبقى دولة محترمة، واديكوا شفتوا، مبارك كان حيفلت من المحاكمة بسبب ضغوط خارجية، ولولا اننا بنتحرك في سكة تقوية علاقتنا الخارجية بحبايب الثورة ما كانش بقى عندنا ورقة ضغط نقاوم بيها الضغوط الخارجية، ولسه فيه ضغوط علينا عشان مبارك ما يتحاكمش، ولسه احنا بنحاول نقوي شبكة علاقتنا الخارجية بحبايب الثورة عشان نعرف نحاكمه.. وهكذا

المهم يعني، مافيش حد يبقى ساكن في امان وتبقى الشقة اللي على يمينه والشقة اللي على شماله مولعين

معلش مضطرة اشرح البديهيات دي، ومنه لله السادات مطرح ما راح

دلوقت اسأل اي ظابط جيش صاحبك ده من اللي بتسأله دايما وتيجي تقول لي ظابط جيش صاحبي قال لي، عشان تعرف احنا بقالنا 30 سنة ما حاربناش ليه

بقالنا 30 سنة ما حاربناش عشان فيه مقاومة فلسطينية مشكلة حائل ما بينا وبين اسرائيل، ولو المقاومة دي - لا قدر الله - انكسرت، ولو تمكنت اسرائيل من السيطرة على الفلسطينيين تماما، اسرائيل كده راجعة سينا راجعاها مافيش كلام

يعني اكذوبة ان مبارك هو اللي ما خلناش نحارب دي تبقوا تتغطوا بالليل كويس عشان ما تحلموش بيها، والكلام ده عارفه الجيش كويس، من اكبر راس لحد ظابط الجيش صاحبك 

امبارح خالد مشعل قال لازم فيه آلية جديدة لمواجهة الاحتلال، مش معناها نعلن الحرب، بس السلام فشل، ولازم نلاقي طريقة جديدة

الراجل بيتكلم صح

وده امن قومي مصري مافيش كلام

شعب فلسطيني قوي وموحد = أمن قومي مصري ودور مصري اقليمي قوي = مصر قوية اقتصاديا وسياسيا = طفرة في القضية الفلسطينية

هي دايرة

هو كده، شئنا ام ابينا، توأم ملتصق حنعمل ايه؟ عشان كده اسرائيل مش عايزة مصر تبقى ديمقراطية 

دلوقت المصالحة دي ماهياش القشطة قوي ولا حاجة، وممكن تفشل، والفلسطينيين فرحانين يا عيني مش عشان هم عبط ولا عشان هم مش فاهمين ان المصالحة دي هشة، بس عشان جاية من وش مصر وهي كانت واحشاهم وعايزين اي حاجة من ناحيتها يمسكوها ويقعدوا يشموا فيها

مافيش بقى حاجة تضمن اننا حطينا رجلنا على الطريق الصحيح غير الاقتراح اللي قاله تميم البرغوثي في الندوة بتاعته هنا في القاهرة:

انتخابات يشارك فيها كل الفلسطينيين في الداخل وفي الشتات، مش بس الضفة وغزة

هو الاقتراح ده ممكن يلاقي اعتراض من اسرائيل لو تضمن عرب 48، ولو ما اتضمنوش حيبقى ظلم لهم، بس يستحملوا شوية

ممكن كخطوة اولى يبقى فلسطينيين الضفة وغزة وفلسطينيين الشتات، في الحالة دي مافيش فصيل حينفرد بتمثيل الشعب الفلسطيني، وحيبقى قيادة توافقية ماحدش حيقدر يعترض عليها، وفي الحالة دي مصر تدي كل الدعم للقيادة التوافقية دي، وما يبقاش فيه فصيل حاسس بالظلم، وممكن مصر تتولى التنسيق بين الفصائل او حتى تحط آلية للتنسيق لو هم مش طايقين بعض خالص يعني

كده مصر ضمنت انها امان من ناحية اسرائيل لانها حتبقى بنت حائط سد بينها وبين اسرائيل من البشر الفلسطيني المتوحد ما تقدرش اسرائيل تخترقه عشان تعمل فينا اللي كانت بتعمله ايام المخلوع

تقوم مصر يبقى عندها وقت ومجال تقوي نفسها، قوم لما مصر تبقى قوية تعرف تسند الحائط البشري الفلسطيني من ضهره كويس، فهو يقوى، يقوم يقومي موقف مصر، قوم مصر تبقى اقوى فتقويه، يبقى زي فرعين معشقين في بعض كل واحد فيهم شايل التاني

كده تمام من الناحية الشرقية يبقى امنا نفسنا، وده حينعكس علينا اقتصاديا بقوة، نقدر بقى ننمي سيناء، ونستغل كل الموارد اللي فيها واحنا حاسين بامان، لو زرعنا مليون فدان في سيناء خريطة المطر حتتغير، والاقتصاد يحصل فيه طفرة، وده مش حينفع يحصل طول ما الفلسطينيين ضعفا واسرائيل نايمة مشتحة ودراعها فارد على سيناء، قوم لما احنا ننمي سيناء، يبقى فيه فرصة ان الفلسطينيين ما يبقوش تحت رحمة الاقتصاد الاسرائيلي ويتذلوا له، يبقى تنمية سيناء تنمي مصر وتسند الفلسطينيين اقتصاديا، قوم هم يبقى وضعهم احسن في مواجهة اسرائيل، قوم يشكلوا حائط سد اقوى بينا وبينها، قوم احنا ننطلق اكتر في التنمية الاقتصادية من غير مخاوف ولا ضغوط، اديني عمالة الت واعجن اهو واشرح بالتفصيل عشان ما يجيش ابن ... سادات يقول لي: احنا مالنا ومال فلسطين، قوم نبقى اقويا سياسيا، ومستقلين بالقرار، وادي شرف بيحاول مع دول حوض النيل

فاضل بقى الناحية الغربية

تونس عندها مشاكل

مشاكلهم شبه مشاكلنا صحيح وده بيخلق مشكلة تالتة ان احنا الاتنين ممكن نقعد نندب جنب بعض: اه والنبي ياختي، انت حتقولي لي؟

بس كده مش حينفع، احنا لازم ننسق مع بعض، انا لساني اتدلدل

مش حكومة شرف اللي حتنسق مع الحكومة التونسية لان الحكومة التونسية مش قد كده، ومخترقة

التنسيق المرة دي لازم يبقى بين النشطاء والثوار من البلدين، احنا نساعدهم في حاجات وهم يساعدونا في حاجات

تقوم لما احنا الاتنين نحقق تقدم نزنق القذافي في النص ونأمن شره، لانه مؤذي قوي الراجل ده، ربنا يخلصنا منه على خير

لازم نوجد وسائل للتواصل ما بينا وبين النشطاء التونسيين بحيث هم يطرحوا مشكلتهم ونشوف ممكن نساعدهم فيها ازاي، واحنا نطرح مشكلتنا ونشوف هم يساعدونا ازاي

فيه مشكلة اساسية دلوقت بتواجه تونس، ان الاسلاميين والعلمانيين بينهم مشاكل، وفيه تسريبات ان فيه تهديدات بانقلاب عسكري لو الاسلاميين نجحوا، والاسلاميين في تونس حينجحوا طبعا لانهم مش شبه الاسلاميين بتوعنا، مخهم نور كده ومتفتحين، فما فيش حجة لحد يسقطهم

والخلاف ده غلط، مدام الاسلاميين في تونس متفتحين يبقى فيه مجال ان العلمانيين ينسقوا معاهم ويعملوا برلمان ائتلافي

حد يعقلهم لان لو حصل بينهم مشادات جامدة الجيش حيتدخل والجيش مش حلو يتدخل في الفترة دي والجيوش بقى بتتعلم من بعض واحنا حنتئذي في الليلة دي كده 

هم ايه اللي حصلهم خدوا عين؟  دول كانوا اسياد العاقلين

بالنسبة لنا احنا ممكن يساعدونا هم في موضوع الفتنة الطائفية ده، الاسلاميين اللي عندهم ممكن يعقلوا لنا كتائب كاميليا شحاتة للانتاج الفني، ولو نسقوا مع بعض يبقى حلو، ولو ان دي فيها اذية على حزب النهضة، يعني التنسيق ما بين الاسلاميين المصريين والتوانسة حيبقى في صالح الاسلاميين المصريين، والاسلاميين التوانسة حيتفضحوا عندهم فضيحة المطاهر انهم بيتعاملوا مع مجانين مصريين

بس مش لازم يتعاملوا مع مجانين، يتعاملوا مع العاقلين اللي عندنا وفي نفس الوقت كل فصيل في بلده ينسق مع الفصائل التانية عشان تعدي، مش حينفع اي فصيل سياسي ينفرد بالبرلمان في اي من البلدين، والاسلاميين لو حريصين على بلادهم فعلا يسعوا لبرلمان ائتلافي، سواء في مصر او تونس... أم الصبي هي اللي ما ترضاش سليمان يقسم لها ابنها نصين، لازم الاسلاميين في البلدين ينسقوا مع العلمانيين عشان البرلمانين يبقوا اتئلافيين، ولازم العلمانيين يبطلوا الاسلاموفوبيا اللي عندهم

ولو انه صعب

اذا كنت انا في الاسبوع الاخير ده اصابتني اسلاموفوبيا من تحت راس فرقة كاميليا للانشاد الديني... بس معلش، فيه ناس عاقلة وينفع الكلام معاها

لو تونس فشلت - لا قدر الله - احنا حنفشل. وش كده مافيش كلام، لان ده حيدي امل لكل الصراصير انها تطلع علينا، كمان الانظمة الاستبدادية مع بقايا الانظمة البائدة بينسقوا مع بعض لحد دلوقت

ما ننسق احنا مع بعض كمان

تميم البرغوثي: مطلب صعب

مطلب صعب


تميم البرغوثي
نقلا عن الشروق


لا يصبر أحد على القتل، إلا من أراد الحرية فلا سبيل له سواه، ورغم ما جرى فى سوريا يوم الجمعة الماضى، لا يسعنا إلا التأكيد على السلمية المطلقة للمظاهرات لكى لا ننقل ليبيا إلى الشام.


إن كلاما كثيرا يدور فى واشنطن عن العالم العربى وتحديدا عن تعويض الولايات المتحدة خسارتها فى مصر بإطالة الحرب فى ليبيا واستحداث حرب أهلية فى سوريا. والهدف من الحرب الأهلية فى سوريا انحلال الحلف الذى كتبنا عنه مرارا والذى أصبح يضم كلا من إيران وتركيا والعراق وسوريا ولبنان ومصر وغزة.


إن حربا أهلية طائفية فى سوريا لا سمح الله ستؤدى إلى توتر إيرانى تركى حيث سيتحالف أحد أطراف الحرب مع تركيا ويبقى طرفها الآخر على حلفه مع إيران، كما ستؤدى إلى تأجيج التوترات الطائفية فى لبنان ما يضع ضغطا كبيرا على مقاومته النبيلة المنتصرة ويفقد العرب أنجح وسائلهم فى الضغط على إسرائيل.


ولا يوجد ما يمنع هذه الحرب أن تنتشر إلى العراق، حيث يعاد تفعيل التوتر الطائفى فيه فيجد الأمريكيون فى ذلك حجة للبقاء ويتأخر انسحابهم من هناك، فيخرج بذلك العراق من الحلف، وقد تصطف مصر الثورية مع من ترى فيهم ثوارا يشبهونها.


فتخرج كذلك منه. بتعبير آخر، إن السيطرة الأمريكية التى تكاد تكون احتلالا مباشرا والتى عانينا منها عقودا طويلة كادت أن نتنتهى إلى غير رجعة بانتصار المقاومة العراقية والمقاومة اللبنانية والثورة المصرية والديمقراطية التركية، والحرب الأهلية فى سوريا تهدد بعودة هذا الاحتلال وانشقاق الأمة.


ولا يمكن لأحد أن يطلب من الشعب السورى أن يتنازل عن حقه المشروع فى الحرية والديمقراطية حفاظا على هذا الحلف، بل يجب علينا أن نطالب الحكومة بالوقف الفورى للعنف ضد المتظاهرين، وقد كتبت سابقا وأكرر هنا.


إن كل رصاصة فى قلب متظاهر هى رصاصة فى ظهر مقاوم. وفى المقابل، ولدرء المخاوف من الحرب الأهلية فإن على من يطالبون بالحرية فى سوريا الالتزام الكامل بسلمية المظاهرات وأن يعلموا أن كل طلقة فى بر الشام تطلق على غير إسرائيل ولغرض غير حماية المقاومة، إنما هى طلقة إسرائيلية.


كما أرى خطرا عظيما فى أن ينشأ توتر بين المطالبين بحرية البلد فى سوريا والمقاتلين من أجل حريتنا جميعا فى لبنان. إن موقفا واضحا مؤيدا للمقاومة فى لبنان.


ومعاديا للولايات المتحدة وإسرائيل هو من ضرورات تحقيق المطالب الشعبية فى سوريا، ويسحب ورقة مهمة من أيدى خصومها.


ولا بد أن يصدر هذا الموقف الداعم للمقاومة حتى وإن لم يكن الود متبادلا بين طرفيه، فدعم القوم للمقاومة غير مشروط بدعمها لهم، إنما تُدعم المقاومة لأنها تقاتل إسرائيل فعلا لا قولا وتنتصر حقا لا خيالا، وتعيد أرضا وأسرى، وتبقى لبنان بعيدا عن حرب تقدر عليها وتنفر منها.


وتُدعم المقاومة أيضا لأن باراك أوباما ربط بين مصالح السوريين المشروعة فى الحرية والديمقراطية، وبين الانقضاض على ما أسماه هو بالإرهاب ويقصد به المقاومة. أعرف أن هناك تعديا صارخا فى أن يطلب أى أحد أى شيء من ناس يموتون بالعشرات كل جمعة لأنهم يريدون حقوقهم، ولكن سبق وطلبنا من الحكومة وقف القتل أو إيقافه، ولا يبدو أن مطلقى النار يسمعون، فبقى أن نطلب من الضحايا.


وهو مؤلم لنا ولهم، لكنه السبيل الوحيد لنجاح مطالبهم ومنع تحويل ما يجري، لا إلى حرب أهلية واحدة، بل إلى ثلاث حروب فى ثلاث دول.


لقد ذهب الليبيون إلى الثورة فى شرق البلاد قبل غربها، وفى الوقت الذى كان عليها فيه الانتقال من الشرق للغرب ارتكب القذافى من القتل ما أجبر الثوار على التسلح، فلما تسلحوا دخلنا فى الحرب الأهلية، وأتى الأجانب لا لإنهائها بل لضمان بقائها، فهم يرون الإخوان المسلمين فى جهة والقذافى فى الجهة الأخرى فلا دافع لهم أن ينصروا طرفا على آخر.


والدليل على ما أقول هو قضية السلاح الإسرائيلى الذى وصل إلى القذافي، فإن كانت إسرائيل تسلح القذافى والناتو يوفر الغطاء الجوى لخصومه، فنحن أمام سياسة احتواء مزدوج كتلك التى طبقها الغرب أيام الحرب العراقية الإيرانية: يسلحون الطرفين لإطالة الحرب وبقائهم فى المنطقة.


واليوم أكرر أنهم يريدون تكرار النموذج الليبى فى سوريا، والقتل الذريع الذى حصل يوم الجمعة جريمة فى حقنا جميعا وفى حق سوريا والسوريين ويدفع بالجميع إلى حافة الهاوية.


هذا الكلام يعلنه الأمريكيون فى الندوات وينشرونه فى أوراقهم البحثية وهو يملأ واشنطن أكثر من هوائها، وهم لا يخجلون منه.


فهل فى سوريا من يسمع؟ هل يسمع الضابط الذى يطلق النار على المتظاهرين؟ هل يسمع المواطن أن هذا القتل إنما يتعمد استفزازه ليتسلح فيقع فى الفخ؟ هل يسمع المواطن أيضا قلق جيرانه من فتنة طائفية لا تبقى ولا تذر إلا إسرائيل؟ سلمية الاحتجاج المطلقة وانحياز المحتجين المطلق للمقاومة مهما كان موقفها وموقف حلفائها مطلب صعب.


خاصة أننا نطلبه من ناس يموتون فى الشوارع ساعين إلى حقهم فى العيش الحر، ولكنه الضمانة الوحيدة للنجاح والضمانة الوحيدة لكى لا ينفك هذا الحلف المعادى لإسرائيل.


أما الحكومة، فالتسريع بسياسة الإصلاح والاستجابة غير المشروطة ولا المؤجلة لمطالب الناس العادلة يفيدها ولا يضرها ويقويها ولا يضعفها، ولا أرى فى تعدد الأحزاب والقضاء على بعض الفاسدين وإن علا شأنهم تهديدا لأمن سوريا القومي.


ولكن التهديد هو فى قتل الناس فى الشوراع. لا أعرف سوريا يعترض على السياسة الخارجية لبلاده إنما خلافهم على السياسة الداخلية، والحرية والديمقراطية حق لهم فلتتغير السياسة الداخلية وليحتفظ بالسياسة الخارجية رغم صعوبة ذلك الجمة، ولكن الشعوب دائما أعلى وأحكم، وضباط الأمن دائما على العكس من ذلك.

احب على رجلين السوريين.. بلاش تدخل دولي

عقوبات ايه بقى؟

انا مش عايزة عقوبات على بشار

ده خازوق مغري للثوار السوريين.. يوه.. نسيت، تميم قال لي كلميهم بالفصحى احسن بيفتكروكي بتتخانقي

طيب

هذا خازوقٌ سيثبت بالغراء ولن يخرج أبدا يا أهل الشام. أي نعم. آخر ما تحتاجه الثورة السورية هو التدخل الدولي ولو بكلمة دعم، وأكثر ما يحتاجه النظام السوري هو ذات التدخل الدولي بنفس كلمة الدعم. 

إذا كنا نسخر من تصريحات الديكتاتوريات العربية "مصر ليست تونس"، "ليبيا ليست تونس ومصر"، "اليمن ليست تونس ومصر وليبيا"، "البحرين ليست تونس ومصر وليبيا واليمن".. فنحن نواجه حقيقة واقعة قد لا تجد صدى عند البعض بسبب ابتذالها: سوريا ليست تونس ومصر والبحرين وليبيا واليمن. تختلف سوريا عن بقية الدول العربية في أنها تنتمي إلى معسكر الممانعة، وأن فزعا يتملك الأغلبية الصامتة، التي لام عليها الثوار، من الشقاق الطائفي. 

انا زهقت

ايه اللي انا باكتبه ده؟ طب انا حاكمل عادي ويبقى حد يترجم لكم بقى

بصريح العبارة كده، اهالي دمشق وحلب اللي انتوا نازلين فيهم شتيمة دول عندهم اسباب تخليهم يحجموا عن المشاركة

اولا: لأن المقاومة والاستقلال من ثوابت المجتمع السوري

ثانيا: لإنهم خايفين من شبح الطائفية

وبصراحة ناس عداها العيب وقزح.. حتفهموها دي؟ اقصد: لهم كل الحق في التمسك بثوابتهم والخشية على بلادهم من التمزق الطائفي.

جه بقى امريكا عايزة تحط صباعها في الليلة عشان تجيب ضرفها

اللي هو: التدخل الامريكي لا يصب في مصلحة الثوار بالمرة، بل على العكس... هو يخدم النظام السوري، ويزيد من شعبيته، ويحزم أمر المتردد ويجعله ينحاز لمعسكر النظام إلى غير رجعة. 

هارش؟ اللي هو: فهمت علي؟

انا عايزة افهم، الثوار السوريين ما بيمسكوش علم فلسطين ليه؟ مكلف العلم يعني؟ بكام ليرة يعني العلم الفلسطيني عشان مكسلين تشيلوه؟ 

الرجل يطرح نفسه بوصفه: الداعم للمقاومة، وحامي حمى بر الشام من التمزق والاحتلال، وهو خطاب يلقى صدى في نفس أي سوري وطني. 

ليه بقى انت يا كابتن ما تطرحش نفسك كالآتي:

ولو.. وأنا كمان مع الاستقلال وضد التدخل الأجنبي، وأنا كمان مع المقاومة، وأنا كمان ضد الطائفية... بس أنا سلمي وهو مسلح، أنا طالب حرية وهو قمعي.

خلاص.. خلصت الليلة كده.. اللي هو: قضي الأمر الذي فيه تستفتيان، ورجحت كفة الثوار. 

ماذا وإلا حيطربقها والله ويهرب فلوسه ويسافر قوامان

اللي هو: إذا لم يتمسك الثوار بالمبالغة في سلمية الثورة، والتأكيد على الثوابت الوطنية للمجتمع السوري والتي تحظى فيها المقاومة بالأولولية، ورفض اي تدخل أجنبي، ولو بكلمة دعم، ولو بفرض عقوبات، فإن الخيار الوحيد المطروح أمام الثوار هو العودة للمنازلهم فورا إن كانوا لا يرغبون في إشعال حرب أهلية في بلادهم.

والله الموفق. 

حد فهم من امي حاجة في الليلة دي؟

ما تقسوش على الناس اللي متعاطفة بشار

في موضوع سوريا ده، الموضوع مش ابيض واسود لاسباب كتير

يعني مثلا انا عرفت ان غسان بن جدو استقال من الجزيرة، وغسان بن جدو راجل شريف مائة بالمائة، بس هو مصدق الرواية السورية الرسمية للاحداث

مش لازم في الموضوع ده اللي ما يساندش الثوار يبقى شخص مش نضيف، بس ممكن يبقى شخص طيب زيادة، غسان مثلا ضحى بأكل عيشه، واحتمال كبير ما يلاقيش في التوقيت ده مكان يشتغل فيه، لأن كل القنوات الفضائية اللي ينفع غسان يشتغل فيها بتغطي سوريا ومش بتغطي البحرين.. وش كده، وهو استقال عشان عدم تغطية البحرين، وعشان هو بيقول ان التغطية لما يحدث في سوريا اثارية ومش جايبة وجهتين النظر

الكلام ده ممكن يبقى مزعج لحد زيي مثلا، بس انا مش حاتهم غسان في ذمته ابدا، لأسباب كتير، أولا لإن ذمته نضيفة فعلا، ووطني فعلا، ثانيا لأن اساسا معسكر الممانعة دول مش معاهم فلوس يشتروا بيها ذمم، دول هم دولتين تحت الحصار، وحركة تحت الحصار، وحزب بيعمل ماجات ودبابيس عشان يلاقي يصرف على نفسه لو اي حد من حلفائه خلي بيه، ولو معاهم فلوس كانوا اشتروا ذمم وخلصوا من زمان، واللي حيقول لي لا معاهم فلوس وبيشتروا ناس حاقول له حضرتك كحيان وما شفتش يعني ايه فلوس يا جعان، جرب كده تشتغل مع السعودية ولا مع امريكا وهم ينغنغوك، امال يعني الفرقة اللي بتشتغل مع السعودية كبيرة والفرقة اللي بتشتغل معاهم هم عددها قليل ليه؟ 

وانا مش فاهمة ليه فيه ناس كتير من المتعاطفين مع معسكر الممانعة مصدقين رواية الاعلام السوري مع انها مش معقولة ابدا

وناس انا باثق فيهم عمالين يبعتوا لي ميلات يقولوا لي ما تنسيش ان بشار عمل اكتفاء ذاتي من القمح، وعمل تطوير للصناعة، وساند المقاومة، وعمل وعمل

طب يا جماعة استنوا خمسين سنة عشان تقولوا الكلام ده لو سمحتوا، ما ينفعش الكلام ده تقولوه وفيه ناس بتموت، وما يصحش تقولوا لي عدد القتلى 400 بس! استنوا خمسين سنة، التاريخ لسبب ما لا يعبأ بالدم، ولا يعبأ بالقهر، ولا يعبأ بالظلم، ولا يعبأ بواحدة زي طل الملوحي، بعد خمسين سنة حيقولوا على بشار اللي بيقال على محمد علي وعبد الناصر، عشان هو فعلا عمل كل اللي قلتوه ده واكتر، بس دلوقت ما تضغطوش على اعصاب الناس، واعصابي انا بالتحديد وتقولوا لنا الكلام ده، وما ينفعش كمان تطلبوا من ناس خرجت تطلب حرية ارجعوا بيوتكم عشان ده عمل اكتفاء ذاتي من القمح والمحاصيل الاستراتيجية وطور الصناعة السورية، طيب دول بني ادمين اللي خرجوا دول، مش مشنة قمح، ولا مكنة في مصنع، دول بني ادمين، ومقهورين، وزهقانين، ومظلومين، واتقتلوا، و400 في خمس اسابيع مش شوية، و4 يتقتلوا مش شوية، ودم البني ادمين غالي، اغلى من ستميت مصنع، والف غيط قمح، وعشر حروب ينتصر فيها على اسرائيل، وانا ماليش دعوة بإن فيه ناس من مأجورين السعودية وامريكا سخنانين على الثورة في سوريا، انا مالي؟ انا ضميري ما يسمحليش اشوف ناس بتتقتل واسكت، وما ينفعش تربط الولاء الوطني بشخص، وكأن الشعب السوري في اساسه خاين وبشار هو اللي حايشه عنا، وبعدين، طب ما يسيب للناس نفس يتنفسوه يعني، كابس على انفاسهم لما انفجروا فيه ليه؟ ما يخليهم يتكلموا زي ما الناس بتتكلم، ويفرج عن المعتقلين ويسيبهم يعيشوا، ويعمل اصلاحات سياسية، هو بيربي مواشي في زريبة عشان يقولهم مالكوش عندي غير الاكل والشرب والحماية؟ بيخوفهم ليه؟ انت لو قابلت سوري في الدنمارك وقلت له: ايه حكاية المظاهرات في سوريا، حيسيبك ويمشي من كتر الرعب... طب ليه بيعمل كده يعني؟ ايه المبرر لده؟ وحزب البعث ده الحزب النازي العربي، والناس بتقعد تدافع عشان خايفة لبعدين اللي مراقبها يروح يقول ان الزعيم اتشتم وهي سكتت، وكل واحد مراقب التاني، واخرتها يموتهم ويدخل لهم الدبابات؟ وانتوا مصدقين ان الثوار مسلحين؟ وبعدين الاعلام السوري بيقول الثوار مسلحين وبيطخوا على الجيش والشرطة

طيب ماشي

مسلحين وبيطخوا على الجيش والشرطة، ويروحوا جايبين لك فيديو بتاع نضال ده، مسكوه بيقولك سحلوه وبعد ما ضربوه دبحوه بالسكينة.. الله! وليه المجهود ده كله في شخص واحد؟ هم مش برضه مسلحين ومعاهم قناصة وسلاح جايبينه من - قال ايه -  سعد الحريري.. سعد الحريري التافه ده بيعرف يسلح حد؟ طيب يا سيدي، سعد الحريري التافه بيعرف يسلح حد، بس حتى الفيديو ده اللي جايبه التلفزيون السوري نفسه ما شفتش فيه سلاح، وبعدين هو باين فيه حاجة؟ واحد مضروب لما معدوم العافية، وكل دول ملمومين حواليه، كل الشعب ده ملموم عشان يقتل واحد؟ ومسلحين؟ دول لو كان معاهم طوبة كبيرة شوية كانوا خلصوا بدل الهلولة دي

افففففففففففففف

الموقف تراجيدي فعلا

تراجيدي لإن اللي واخدين موقف متعاطف مع بشار مش ناس مأجورة، بس زي ما يكونوا كده سلموا مخهم لنظرية المؤامرة لابعد الحدود، وزي ما يكونوا مش عارفين ما يصدقوش الاعلام السوري اللي كدبه مفضوح لإن لسان حالهم: طب يعني هو معقولة واحد بيطور الصناعة والزراعة ويساند المقاومة يكدب؟ 

اه معقولة على فكرة يكدب... واساسا القمع والقهر اللي هو فارضه على الناس ده مالوش اي مبرر، وحبس عيلة عندها 19 سنة خمس سنين حبس عسكري بتهمة الخيانة العظمى مالوش مبرر، والطخ على الناس مالوش مبرر، و400 قتيل مالوش مبرر، ومافيش حاجة تشفع لده كله، حياة الانسان اغلى من اي حاجة

وفيه من اللي واخدين موقف مساند للثورة مغرضين ويا اما طائفيين ومرضى بالفاشية ضد الشيعة، يا اما هم اصلا من القبيضة فعلا بقى، لإن السعودية وامريكا بيعكموا كويس، وعندهم امل ان بشار يتشال وييجي مكانه حد زي السادات كده يبيع لهم سوريا، او عندهم امل ان سوريا تبقى زي ليبيا وتقلب حرب اهلية

ومش شرط ابدا املهم يتحقق، لإن اولا ربنا موجود، ثانيا القياد في ايد الثوار ويقدروا يسيطروا على الموقف، ثالثا، السوريين وطنيين فعلا، عشان تلاقي واحد عميل امريكاني وسطهم، حياكلوه اكل وهو واقف كده

والخلاصة بالنسبة لي، انا ماليش دعوة مين واخد موقف مع مين ومين مع ايه؟ انا ليا دعوة بالحق

الانسان من حقه يعيش حر، ومن حقه انه لا يقمع، ولا يقهر، ومش يتجبر انه يعلق صورة الزعيم، ويبقى عايش حياته خايف يتكلم، واخوه بيكتب فيه تقارير وهو بيكتب تقارير في اخوه، ولما الناس تخرج وتقول زهقنا، من حقهم يخرجوا ويقولوا زهقنا، وماحدش يطخ عليهم، وماحدش يخوفهم، ولا يموتهم، وماحدش فوق ده كله يتهمهم بالعمالة، والطرف الاقوى هو اللي يلام

وممكن تبقى مشكلة تلخبط الناس لما يبقى المختلف عليه واحد زي بشار مش زي مبارك، حيث ان مبارك لا بنى دولة، ولا احترم انسان، لكن بشار بنى دولة، لكنه ما احترمش الانسان

وانا ما اعرفش ليه فيه ناس حاسة ان الاولوية مش للانسان؟ ليه يعني؟ طظ في الدولة على فكرة، انشالله يبقوا عايشين في خيم يا اخي بس في امان وكرامة وما يخافوش من حد، حتعمل ايه بانسان مرعوب ومش قادر ينطق ولا يتنفس؟ مالوش قيمة الانسان ده، مالوش اي قيمة خالص.. واللي يكسر حاجز الخوف تحت حكم قمعي بالشكل ده مالوش عندي غير الاحترام والمساندة، واللي يقف يقابل الرصاص بالطريقة دي يبقى شهيد... ايا كانت تبعات تحركاته، وايا كانت الجهات اللي حتشمت واسبابها.. الانسان له الاولولية

قضي الامر الذي فيه تستفتيان

قوموا صلوا.. سوريا يا رب

تحديث:
كلنا رايحين ان شاء الله.. يالا، اتند
---------
بشار داخل بالجيش لدرعا

قوموا صلوا وادعوا لسوريا الجميلة يسلمها من كل شر، ويحررها من الطاغية

في درعا الجيش انقسم، وانا مش عارفة ازاي اوصل لسوريين لانه قاطع الاتصالات، بس الحاضر يعلم الغايب لحد ما توصل لسوريا، لازم يحتفظوا بسلمية ثورتهم، انا عارفة ان الطلب صعب، بس الضباط اللي انضموا للثوار لازم يلقوا سلاحهم زي ضباط اليمن، مش لازم يحصل اي طخ من ناحية الثوار، مش لازم يحصل السيناريو الليبي، انما النصر صبر ساعة، وان شاء الله ينتصر الدم على السيف، واحنا كلنا معاهم وبندعي لهم، وكل طلقة بتصيب سوري بتدمي قلوبنا كلنا، يا ريتني كنت معاهم.. اموت ولا اني اقعد اتفرج عليهم وهم بيموتوا كده

بس الصبر.. الصبر

سلمية سلمية... سلمية سلمية.. زي اليمن، والنصر قريب

والله يا سوريا محضرة لك يوم فرحك زغرودة احلى من زغرودة خلع مبارك.. بس استعينوا بالله واصبروا

اصبروا وما تلوثوش ايديكم باي دم، وقولوا يا رب

قوموا صلوا

خطة غاندي لسوريا، خطة مصر لليمن، خطة اليمن للبحرين، خطة ربنا معاكوا لليبيا

بسم الله الرحمن الرحيم الاجابة تونس

- بالنسبة لمصر.. هو حد خايف من بتوع اسفين يا ريس غيري؟ يمكن انا بقيت برانويد

اصل يعني بتوع اسفين يا ريس دول بيهلوسوا، يعني مش لما يخرجوه من السجن الاول يبقى يتكلموا عن اسفين يا ريس؟ هو ريس؟ وبعدين دي لابساه لابساه، لو تهرب من الفساد المالي، حيتهرب ازاي من القتل، لو اتهرب من القتل، حيتهرب ازاي من الاهمال، لو اتهرب من الاهمال حيتهرب ازاي من الخيانة العظمى

لابس لابس يعني

طب امال انا بقيت قلقانة على طول ليه؟ وحاسة ان المصريين كلهم بقوا من النوع القلقان عمال على بطال

طيب.. عموما احنا معانا الله

واحب اقول ملحوسة.. الصعايدة محتاجين يورونا نفسهم بقى شوية، من غير زعل كده، لقد ثبت ان القمر افيد من الشمس، لان القمر بينور بالليل والدنيا ضلمة والشمس بتنور بالنهار والدنيا نور، من الآخر كده، ولاد البحر ورونا نفسهم وكانوا اجدع ناس، والصعايدة محتاجين يورونا نفسهم، من زمان المفروض ان الصعايدة دول مخزون مصر الاستراتيجي.... مش يعملوا لنا فتنة طائفية ويحبوا عمرو موسى وشفيق، هو فيه ايه؟ ماحدش يقول لي الصعيد كان مهمل، على اساس ان السويس هي اللي كانت باريس يعني؟ 

احنا قلنا في آخر يومين في الثورة للعمال: اتأخرتوا علينا، وبصراحة ما تنوش لنا كلمة وعملوا اضراب وبعدها بيومين المخلوع اتخلع

دلوقت بقى بنقول للصعيد لسه متأخرين علينا... وعندنا لسه مشاكل، منها اسفين يا ريس دول.. فين بقى جدعنة الصعايدة؟ الثورة المضادة مسئولية الصعيد يتصدى لها بقى، دوره جه.. لا بس باقولكم ايه؟ سلمية سلمية.. احسن تاخدوا الفرفر وتطخوهم ولا حاجة ههههههههههه

-----------

بالنسبة لسوريا

خطة التصدي: بالنسبة للبلطجية (الشبيحة) وقوات الامن، تتصدوا لهم بالطوب

بالنسبة للجيش تناموا لهم في الشارع وسلمية آخر حاجة قصاد الجيش، الجيوش لا تهزم الا بالدم، واي رد على الجيش حيكبدنا ارواح عشر اضعاف اللي حنتكبدها في المواجهة السلمية

القوة في العدد، والخطة تبقى زي خطة غاندي، سلمية بغباوة، والسلمية يعني تقابل الرصاص بصدر عاري، افواج افواج

لو الجيش انقسم يبقى العناصر المنضمة للثوار من الجيش تلقي سلاحها قبل ما تنضم

------

اليمن

خطة التصدي: خطة مصر.. اتحركوا بقى.. ناحية القصر، ناحية اي حاجة حيوية. واضراب كامل في البلد، مافيش عجلة على عجلة تشتغل

وانا شخصيا مش عاجباني المبادرة الخليجية، دول بيحاولوا ينقذوه

لا.. وقفوا له البلد خالص بقى، واتحركوا انتوا بنفس سلميتكم دي

----

البحرين

خطة التصدي: خطة اليمن.. تفضلوا في الشارع كده وسلمية سلمية بغباء 

-------

ليبيا... ربنا معاكم بقى

ايه حكاية البدو المصريين اللي بيشتغلوا مع القذافي دول؟ 

عمر سليمان لازم يتحبس، هو اللي كان بيشتغل مع احمد قذاف الدم من زمان، الفلسطينيين لازم يساعدونا، لازم اي فلسطيني عنده قضية تعذيب يتصل بينا عشان عمر سليمان لازم يتحبس والا حتحصل كارثة في ليبيا

وممكن مصريين كتير يتئذوا في الظرف الحرج ده وهم يبقوا ابرياء، بس ما تلومش على حد انه في ظرف الناس فيه بتموت ممكن ياخد عاطل في باطل

وفين الدماء الصعايدة الحارة بقى؟ اهو ده دور الصعايدة اللي قاعدين في ليبيا، لازم ينضموا للثوار، او على الاقل يقفشوا المصريين المتعاونين مع القذافي، يعملوا عليهم لجان شعبية استخباراتية

وبدو سيناء برضه ملزومين يتصلوا بينا عشان القضايا اللي ضد عمر سليمان

اتصلوا بمالك عدلي

0101044264

والله الموفق

شايفين آخرة سكوتنا على ثورة البحرين؟ قابلوا بقى

عصام شرف، رئيس وزراء الثورة، اتمنع من دول خليجية عشان بنحاكم مبارك، وعايزين يفرضوا علينا سياستنا الخارجية كمان

احسن.. احسن.. ولسه

انتوا فاكرين الطغاة بيشبعوا؟ رحتوا قرنتوا عليهم بسبب الغل والحقد والكره المرضي للشيعة اللي مالي قلوب البعض وهم كل غلهم من ثوار البحرين انهم خايفين يبقى فيه ملكية دستورية في البحرين، ومن ثم حرية ومساواة ومواطنة، ومن ثم هم كلهم يطيروا من الخليج 

وكل ما نتكلم عن البحرين تقولوا الوضع مختلف وتسكتوا

انتوا اتهبلتوا في مخكم؟ اتهبلتوا؟ كل بلد قامت فيها ثورة قالوا وضعنا مختلف

بن علي قال الارهابيين حيحكموا البلد وانا مش حاستقيل واسيب البلد للمتطرفين

مبارك قال انا لو سبت البلد حييجي الاخوان انتوا اصلكم ما تعرفوش الشعب المصري ده مش مستعد للديمقراطية

القذافي قال لو سبت البلد القاعدة هي اللي حتمسكها

بشار قال لو سبت البلد عملاء امريكا واسرائيل هم اللي حيمسكوا البلد

اليمن قال ايه؟ اصله هطرس كتير مش فاكرة له بصراحة، اه.. اتكلم عن القطار، وقعد يقول فاتكم القطار فاتكم القطار، الظاهر وهو صغير حد كان بيقول له تعالى اوريك القطر

وكل بلد من دول قالوا مصر ليست تونس ليبيا ليست تونس ومصر اليمن ليست تونس ومصر وليبيا سوريا ليست تونس ومصر وليبيا واليمن وطبعا بقى البحرين ليست تونس ومصر وليبيا وسوريا واليمن 

ايه حكاية ثورة طائفية دي؟ ها؟ مين اللي بيتكلم عن الطائفية وثوراتها؟ بتوع كاميليا شحاتة؟

بلد اغلبيتها شيعة الثوار حيبقوا ايه؟ طيارين؟ يعني احنا كنا ثورة سنة عشان اغلبية الثوار كانوا سنة ونسبة المسيحيين فيها كانوا اقل من نسبة المسلمين؟ طب ما طبيعي يعني

طب ويا ترى الثورة الطائفية دي قامت ليه؟ عشان عايشين سعدا ومبسوطين وواخدين حقهم تالت ومتلت؟ عشان كده كان مطلبهم ملكية دستورية وحقوق مدنية؟ دي مطالب ناس واخدة حقها تالت ومتلت دي؟ هي الناس اللي واخدة حقها في بلدها تالت ومتلت بتبقى تحت حكم اقلية محتكرة للحكم؟ يعني الاخوة اللي معبيين كره دول لناس ومستحليين دمهم لمجرد انهم مختلفين في المذهب، ايه رأيهم لو رئاسة الجمهورية يحتكرها المسيحيين؟ وهل يا ترى المظاهرات الطائفية تبرر ان ملك البحرين بعد ما يستنفد كل طاقاته الامنية والعسكرية ضد الثوار يستدعي لهم السعودية ودول الخليج تحتل له بلده وتقتل ولاد البلد عشان بيطالبوا بحقوق مدنية ومواطنة ومساواة؟ ويعني ايه مظاهرات طائفية يعني؟ مظاهرات طائفية يستاهلوا يموتوا؟ لو المطالبة بالمواطنة والملكية الدستورية والمساواة والحقوق المدنية طائفية امال التظاهر عشان مرا يبقى ايه؟ على كده بتوع كاميليا شحاتة كانوا يستاهلوا نرمي عليهم نووي، ولا اللي اعتصموا قدام ماسبيرو بعد كنيسة اطفيح كنا ندخل الاردن تحتلنا وتقتلهم

لا انسانية ولا اخلاق ولا حتى تفكير في مصالح؟

دلوقت احنا عملنا ايه لانظمة الخليج عشان تناكف فينا وتجر في شكلنا بالطريقة دي؟ عملنا لهم ايه؟ احنا احرار نعمل علاقات مع ايران مع الهند مع السند مع بلاد تركب الافيال، هم مالهمش انهم يهينوا رئيس وزراء الثورة بالطريقة دي

واحنا احرار نحاكم مبارك نعلقه نفرده نتنيه، هم مش عارفين يصدقوا اننا ما بقيناش خدامين خلاص؟

طب بقى احنا مش حينفعنا التعامل بالطريقة دي

ثوار البحرين ربنا يوفقهم وينجحهم وييأيدهم ويقدروا يحصلوا على ملكية دستورية ويعملوا دولة ديمقراطية، وان شاء الله وضع البحرين في الخليج يبقى زي وضع تونس في شمال افريقيا، وتبقى هي بداية الشرارة

وبصراحة الجزيرة واخدة موقف اي كلام جدا من ثورة البحرين

مافيش انسانية حتى؟ دول ماتوا ليه؟

ويهدوا لهم مساجد ليه؟

ايه حكاية شيعة دي؟ هم الشيعة دول مش بني ادمين ولا ايه؟
وايه حكاية عملا لايران دي؟ وفضلوا يفتروا عليهم ويعملوا لهم صور بالفوتوشوب انهم رافعين علم ايران واتكشفت الخدعة وطلعوا كدابين، يعني ايه عملا لايران؟ وحياة علم السعودية اللي اترفع في قنا؟
لو كنا احنا ايام الثورة عملا لاسرائيل وايران وحزب الله وامريكا، ولو كان السوريين عملا للسعودية، ولو كان اليمنيين عملا لايران واسرائيل يبقى البحرينيين عملا لايران
انتوا عقلكم فين؟ وتدخل ايراني ايه؟ بقى يدخل قوات سعودية ويقول ايران بتدخل؟ طب ايران ضربت الاحواز بسبب انه دخل قوات سعودية البحرين، يعني مش بس قتل ناسه، وقتل الناس اللي في الاحواز كمان
اللي عنده ضمير يدعم ثورة البحرين
اللي عنده انسانية يدعم ثورة البحرين
اللي عنده مخ حتى يدعم ثورة البحرين
انا شخصيا نفسي ومنى عيني اشوف دولة خليجية ديمقراطية وفيها حرية ومساواة وعدالة اجتماعية ومواطنة، ودي حاجة حتعود علينا كلنا بالنفع، وعشان كده بترعب الطغاة والمأجورين للريال اللي بيعملوا لنا فتنة طائفية هنا ويعايبوا على ناس مظلومة بتطالب بحقها ويقولوا عليهم ثورة طائفية قال.. الثورة عمرها ما تبقى طائفية، الطائفية هو انك تضطهد طائفة لحد ما تخليها تثور

بالنوسبة للمحافظين

طب واحنا ايه اللي يخلينا احنا نقبل بتعيينات وبعد ما يعينوا نعمل لهم مظاهرات.. مدام كده كده بننزل الشارع ونبات فيه يبقى ننتخب المحافظ

ييجي واحد يقول لي: لا مافيش وقت

مافيش وقت لايه يا امور؟ هو بس فيه وقت للنومة في الشارع وقطع السكة الحديد؟ احنا ورانا ايه يعني؟ ننتخب المحافظين في الشهرين الجايين دولم

بص يا سيدي

انتخاب المحافظين له منافع عدة، وممكن يتعمل بخطة سهلة

اولا: المنافع

1- اهم منفعة للقوى السياسية الناشئة واللي لسه ما اشتغلتش على الارض وقاعدة تقول الاخوان اكلوا الساندوتش بتاعي

مرة واحد قريبنا، عنده اربع سنين، فجأتن لقيته لطش ابن خالته اللي في نفس السن بالالم على وشه، وراح فاتح جاعورته وقعد يعيط، الواد اللي ضرب مش اللي انضرب هو اللي بيعيط، اللي انضرب ما عيطش، وراح قايل: عااااااا... مش عااااييييززز يلعب معااااايااااااا مش عااااايز يلعب معااااايااااا.. فاخدته على جنب وقلت له: ماهو يا حبيبي لو هو مش عايز يلعب معاك مش حتخليه يلعب معاك لما تلطشه بالالم.. هات لعبك، واقعد العب بيها لوحدك، وهو لما يلاقي اللعب حلوة حييجي يلعب معاك، لكن لما تلطشه بالالم على وشه مش حيبقى عايز يلعب معاك ولا عايز يشوف خلقتك تاني

بدل ما القوى السياسية المختلفة مجتمعة قاعدة تعيط وتقول الاخوان مش عايزين يلعبوا معايا.. العبوا بقى انتوا 

نعمل انتخابات محافظين، وانتخابات محليات، وده يبقى تدريب كويس للقوى السياسية اللي مش بتعرف تتعامل مع الشارع انها تنزل النقابات وتنزل العشوائيات والضواحي والقرى النائية وتعمل حملات، ممكن ما تنجحش، بس اهي تبقى اتدربت، عرفت نقط ضعفها فين، ونقط قوتها فين، وتبتدي تحاول تعالج نقاط الضعف وتدعم نقاط القوة عشان لما تيجي انتخابات المجلس تبقى على الاقل عرفت تعمل شوية تربيطات على الارض، ماهم مش حينزلوا يشتغلوا على الارض الا بالطريقة دي، لإنهم كسالى.. كسالى جدا، وعشان كده بيتخانقوا مع المجلس العسكري لإنهم عايزينه يجيب لهم الرضعة وهم قاعدين في السرير

وهو ما ينقلنا للنقطة التانية

2- بدل ما كل شوية الناس تمسك في خناق المجلس العسكري - وطبعا مش بتمسك في خناق عصام شرف مهما عمل لانه جاي على هواها، عادي يعني ماهم مطففين - ما المجلس العسكري يريح دماغه من الهوسة دي وينزل الناس تنتخب محافظينها ولو حد فتح بقه بقى معاهم يقولهم: هاااه؟ انا مالي؟ الناس هي اللي انتخبت، ومش ذنبي والله انكم فشلة، هو انتوا كل ما تفشلوا تمسكوا في خناقي انا؟ اديني اديتكم فرصة تانية بعد الاستفتاء عشان تورونا شطارتكم

كمان ده تدريب كويس للمجلس العسكري على ادارة انتخابات المجلس بدل ما يمسكوا في خناقه ويقولوا له انت اخوان انت سلفي انت فلول، اهو يشوف على الارض يقدر ازاي يغطي الانتخابات، ويشرف عليها، وينظمها، زي ما عمل في الاستفتاء، يعني باللغة العسكرية تبقى تطعيم للمعركة.. زي حرب الاستنزاف كده، انتخابات على نطاق ضيق ينفع يتم السيطرة عليه لو فشل، ولو نجح يحسس الناس بالثقة في نفسهم وفي نفس الوقت يبقى تدريب على المعركة الكبيرة

اي خسارة في معركة المحافظين والمحليات يمكن تداركها، لكن الخسارة في معركة المجلس حتبقى مصيبة

وبدل ما تباغتوا الناس وتفاجئوهم ان التظاهر ممنوع، ما تشغلوهم في حاجة تلهيهم عن التظاهر، ماهو لو نازل انتخابات المحافظين والمحليات وخلافه، مش حيعمل مظاهرة، يعمل مظاهرة ليه؟ حينزل الاماكن ويعمل مؤتمرات شعبية ويلف على الاحياء والقرى اللي تابعة للمحافظة بتاعته، مش عنده وقت يتظاهر، واللي مش عاجبه مرشح ينزل مرشح قدامه

3- ده كويس للاقتصاد على عكس ما اي حد تاني ممكن يفتكر

فلسوا اللي معاهم فلوس شوية، عارفة ان فيه ناس حتستغل الفلوس، يا ريت.. كل اللي جيبه معبي مخزن فلوسه للمجلس، لا... خلوه يحل الكيس بدري بدري، والناس ايام مبارك اللي هو مبارك كانوا بياخدوا الفلوس ويضربوا عليها وما يروحوش الانتخابات او يروحوا وينتخبوا اللي على مزاجهم.. مش وحش ان حد نازل انتخابات المحافظين والمحليات ويخش على الناس برشة جريئة، خليه يدفع احسن من عينه، واهو يشيل الاقتصاد شوية بدل ما الناس عمالة تقر وتشتكي ان كل حاجة غالية، واحنا نمشي وراه ونقول للناس: الحرامي اهو.. الحرامي اهو.. ومن غير ما نمشي وراه، الناس عارفة انه حرامي من ايام مبارك، ايام مبارك ماحدش كان بيعرف ينزل قدامه، وماحدش كان بيعرف يراقب تزويره، وماحدش كان بيعرف يلقطه

اييييووووةةةة يلقطه، وهو ما ينقلنا الى النقطة الرابعة

4- قالك.. اديني فرصة تانية اثبت لك فيها حبي

اللي هم الاخوة اللي كانوا بينزلوا يقفلوا الصناديق ويقدموا رشاوى ويشتروا اصوات.. نعمل ايه؟ نديهم فرصة ولا نوئدهم؟ 

انتخابات المحافظين والمحليات حتخلينا نعرف، بسرعة لو عملنا انتخابات وكل واحد نزل بالمرشح بتاعه، حنعرف مين اللي بيقدم فلوس وبيشتري اصوات ونعمل لامه فضيحة ونخلي اللي ما يشتري يتفرج عليه، ونعرف بقى هو بيمثل انهي اتجاه، واسمه ايه؟ ومين اللي بيشتغل معاه؟ عشان نجيبه من قفاه... اييييوووةةة اييييووووةةةة.. زي ما عملتوا في الظباط المعتصمين وجبتوا لنا هلع.. فاكرين؟

سيبتوهم يخشوا الميدان عشان تعرفوا عددهم وقوتهم وشكلهم واولهم واخرهم وبعدين دخلتوا وقعتوا قلبنا احنا عشان تجيبوهم بعد ما اتأكدتوا ان عددهم قليل ومالهمش وزن، واحنا اللي اتخضينا وشعرنا طقطق 

مدام قلبكم جامد كده وبتجربوا فينا عادي، ما تجربوا فينا برضه عشان تعرفوا مين المرتشي ومين الحرامي ومين المزور، واهي حاجة يمكن تداركها

5- المحافظ مش مهم ابدا.. ايا كان اللي حينجح في الانتخابات، ده لو طلع وحش اللي انتخبوه يشيلوه، واضراره مش مهمة، وصلاحياته مش كتيرة، وممكن يتعفق بسهولة، طب ما تخلونا احنا وانتوا والقوى السياسية نجرب نفسنا في منصب مش مهم عشان تبقى دي اقل الخسائر

ثانيا: الاعتراضات على الاقتراح

1- قالك مافيش وقت... ايوة يعني انت بتعمل ايه دلوقت؟ مافيش وقت لايه؟ انت وراك ايه دلوقت حاليا؟ بتخترع الذرة ومش فاضي لنا؟ لا بقى.. احنا دلوقت فاضيين، وفاضيين زيادة عن اللزوم، وده كخ علينا

انا فخورة طبعا اني مصرية، والشعب المصري شعب عسل عسل عسل.. بس لما بيلاقي دقيقة فاضية في حياته بيبقى ابن ستين كلب 

ما ينفعش الشعب ده يفضى، احنا الشعب الوحيد اللي كان بيستعجل مبارك يمشي لان وراه شغل

يا سيدي ما ينفعناش احنا نفضل فاضيين، لما بنفضى بنتخانق مع بعض وبيطلع منا اوسخ مافينا وبنبقى عاملين زي اركان حرب متقاعد بيوقف عياله طابور صفر وانتباه على الفطار الصبح احنا لو من هنا لحد كمان شهرين ولا حتى شهر ونص استعدينا لانتخابات محافظ حنشتغل بايدينا وسنانا بدل ما نقعد نمسك في خناق بعض

2- الانتخابات مكلفة.. يا سلااااااااااااام، هو انت بتخسر كام دلوقت؟ بالعكس، الانتخابات دي حتطلع فلوس كتير تحت البلاطة، خلي الحرامية يفلسوا، ماهو انت دلوقت بتخسر فلوس عشان الناس نايمة لك في الشارع، الناس كده كده بتنزل الشارع، تطلع قانون، تطلع روحهم، هو حد بيعرف يسيطر على الناس دي؟ خليهم ينزلوا الشارع بحاجة مفيدة، وعلى الاقل نزلتهم يغطي تكلفتها ولاد الحرامية اللي بينزلوا الانتخابات بالفلوس، وحش ده؟ 

وبعدين احنا طول عمرنا بنجيب الجون في الوقت بدل الضائع، يعني احنا مش بنعرف نشتغل الا تحت ضغط، وكل ما الوقت قل كل ما مجهودنا اتضاعف واداءنا بقى احسن.. احنا كده دي طبيعتنا

3- لا لا لا مش حينفع... لو عملنا انتخابات للمحافظين في الوقت القليل ده السلفيين حينجحوا

ااااه.. السلفيين، اللي بقوا موازين لابو رجل مسلوخة

كويس.. خليهم ينجحوا، المحافظ اصلا منصب مش مهم للدرجة دي، منصب النائب في البرلمان اهم، واهي المية تكدب الغطاس

يا اما نخلص من بعبع السلفي اللي بياكل عيال صغيرة ده، ولما ينجح كمحافظ يخدم الناس ويتقي ربنا في الميزانية اللي في ايده، ويكشف الحرامية ويقدمهم للتحقيق وينضف المحافظة، ويبقى ساعتها الناس اللي بتنام تحلم بالسلفيين وتصحى مفزوعة دي تتبط شوية وتعرف ان الواحد ممكن يبقى سلفي ومش بيقطع ودان ولا بياكل دراعات ولا بيشرب عصير دم مسيحيين

يا اما يطلعوا السلفيين دول مازينجر، ويحجبوا البنات بالعافية، ويمنعوا الشباب من القعدة على الكورنيش، ويخربوا بيوت الكازينوهات، ويقفلوا القهاوي، ويمنعوا ترميم الكنائس، ويهدوا الاضرحة، وينكدوا على الناس وفي الحالة دي الناس حتتخنق منهم، المصريين ما بيبحوش الخنقة، اه نصلي ونصوم ونعمل عاشورا.. بس ما تخنقش عليا، احنا الشعب الوحيد في العالم اللي المحجبات فيه بيصلوا ويصوموا ويقروا قرآن ويرقصوا في الافراح قدام الناس كلها والرجالة اللي قاعدين ما بيحسوش ان فيه حاجة غلط بتحصل، عادي ماهو فرح، والرخم اللي بيتدخل عشان يقعد البنات اللي بترقص بيبقى عبرة خلقه في وسط الفرح.. خلاص دي طبيعتنا وماحدش حيقدر يغيرها واللي حيحاول يغيرها حيترمي من الشباك، ولو نزلوا لهم شرطة الحسبة في المحافظة يبقى السلفيين كده اتحرقوا الى غير رجعة، وخلصنا منهم الى الابد، والناس حتعتصم لأم المحافظ المجنون ده وتقول له غور في داهية ده انت ابن تيت، وبعد كده لو اي سلفي عدى في الشارع حينضرب، ومش حيعتبوا المجلس

اظن كده فير ايناف؟ مدام هم قطاع موجود في المجتمع، من حقهم يتحطوا في الاختبار، لو طلعوا ناس كويسة مش من حقك تشتمهم، والاصول تعتذر لهم عشان عممت عليهم وصنفتهم انهم كلهم زي محمد حسين يعقوب، ولو طلعوا مهابيش الناس حتشيلهم، وحترتاح يا سيدي من وشهم الى الابد... استبينا؟ اظن كده حق ربنا

ثالثا: الطريقة

سهلة قوي

حكومة عصام شرف تعلن ان المحافظين الموجودين دول محافظين لتسيير الاعمال، وتقول اننا حنعمل انتخابات كمان شهر ونص او شهرين على الاكثر للمحافظين، وتنزل شروط الترشح للمحافظين

الموضوع ده يتعمل في اسبوع من دلوقت، بس الاعلان يبقى دلوقت حالا اننا بنفكر نعمل انتخابات محافظين، وفي خلال اسبوع حننزل تصورنا والشروط للترشح

الناس اول ما حتسمع كده، المعتصم حيروح

اللي بيتخانق حيبطل خناق عشان يلحق يلم نفسه ويختار مرشح

اول ما يتم اعلان قبول الترشح الناس حتنظم نفسها عشان تنزل في لجان للاحياء والضواحي والقرى التابعة للمحافظة

وماحدش له حق يقول انا مش مستعد، مش مستعد اديني باديلك فرصة اهو تستعد وتتعرف على الشارع، وتنظم نفسك، واصلا لو خسرت الانتخابات دي مش مشكلة خالص، خالص يعني، المهم تبقى دربت نفسك وقست قوتك

اسألوني انا بقى واحدة كانت بتجيب نمر عالية من غير ما تذاكر

عمري في حياتي ما فتحت كتاب ولا عملت واجب ولما كبرت شوية ما بقتش احضر اساسا

بس قبل الامتحان بأسبوعين افضل احل في امتحانات احل في امتحانات احل في امتحانات واجيب نمر اعلى من اللي قاعد يدح ويحفظ من اول السنة

مافيش حاجة تقوي اتصالك بالشارع وقدراتك على الشحن وكسب اصوات غير انك تنزل الانتخابات وتشتغل عملي بدل ما تقعد تنظر على ام الناس وتخنق عليهم وعايز المجلس العسكري يحبس لك الاخوان على ما تعمل انت بادي بيلدينج

لا اشتغل بقى

والله الموفق

--------

بالنوسبة ليحيى الجمل الطود الراسخ

احنا عايزين نخلص منه الراجل ده.... لا بجد، حد يشيله ولا نشيله احنا؟ 

عصام شرف ملزوم يشيل لنا الطود الراسخ.. فورا

---------

بالنوسبة للي بيقولوا لي: خلينا في نفسنا. تعليقا على كلامي لما باتكلم عن الثورات العربية

على فكرة.. دي غباوة، وانا لا اتورع اني اقول للي بيقول كده: انت غبي

الثورة دي ما كانتش حتقوم اساسا لو كنا فضلنا في نفسنا.. هو لولا تونس كنا عملنا ثورة؟ 

تاني عشان نوضح الواضحات

لو كنا فضلنا في نفسنا ما كناش اهتمينا بثورة تونس، ولو ما كناش اهتمينا بثورة تونس ما كناش عملنا ثورة

لو كنا فضلنا في نفسنا ما كناش تابعنا تطورات ثورة تونس، ولو ما كناش تابعناها ما كناش حلينا امن الدولة ولا الحزب الوطني ولا حاكمنا مبارك، لاننا بنستفاد من خبرات بعض، هو احنا مش كل يوم بنعمل ثورة يعني

ولو فضلنا في نفسنا وما دعمناش الثورات العربية اللي حوالينا اجهزة الاستخبارات بتاعة الانظمة الاستبدادية اللي حوالينا مش حتسيبنا في حالنا

احنا لو فضلنا في نفسنا، النظام السعودي مش حيفضل في نفسه، ولا ناسيين انه كان بيضغط عشان مبارك ما يتحاكمش؟ وقبل كده كان بيضغط عشان ياخد مبارك عنده في تبوك، لو نجحت ثورة اليمن اللي السعودية متدخلة عشان تفشلها، وثورة سوريا اللي برضه السعودية متدخلة عشان تفشلها، مش حنلاقي حد رافع علم السعودية في قنا وعامل لنا فتنة طائفية هنا في البلد، وحيبتدي النظام السعودي يتعامل مع امر واقع حواليه في المنطقة، ونجاح الثورات اللي حوالينا حيساعدنا ويدعم موقف ثورتنا في الداخل، وتبادل الخبرات حيقوينا، وممكن نساعد بعض اقتصاديا ونقف جنب بعض وبالتالي الازمة الاقتصادية اللي عندنا ممكن تتحل لو احنا وتونس وبقية الدول اللي فيها ثورات - تنجح ان شاء الله - اتسندنا على بعض حنشكل كيان اقوى، واقتصاد اقوى، وبالتالي دعم اقوى لقيم الثورة، وهكذا وهكذا

بلاش خيبة والنبي

مشاكل كتير داخلية تفصيلية تتحل لو الثوارت اللي حوالينا نجحت

انا مش باحب الغباوة على فكرة

كمان مافيش وقت عندنا للغباوة.. اهي دي الحاجة الوحيدة اللي احنا ما عندناش وقت ليها، غير كده احنا فري بعد الضهر ممكن نشرب قهوة سوا

قولوا للقلقان ما يقلقشي.. دولة الاحلام ما تقلقشي

خلاص كده

خلاص

حيوا اهل الشام يا أهل الله

شمروا وابتدوا الجهاد ضد الطاغية

دلوقت سوريا دي بالذات لازم تتوزن بميزان من دهب، ولو الميزان اتظبط سوريا دي حتبقى عسل عسل عسل، وحتتقدم بسرعة الصاروخ وتسبق كل اللي في المنطقة

بس لو لا قدر الله الميزان خسع، يبقى احنا كلنا.. كلنا.. حنرجع خمسين سنة لورا، لو سوريا لا قدر الله حصل فيها اي حرب اهلية، او ميزانها اتشقلب، او اتقلبت طائفية، يبقى خلاص، كلنا روحنا في ستين داهية.. كلللللللللللننننننااااااااااااا

وبالتحديد احنا هنا في مصر، سوريا امن قومي، وامداد استراتيجي

طيب

الاخوة في سوريا ان شاء الله ربنا يوفقهم، ويكتب لهم النجاح، بس هم عندهم كام خطوة كده يعملوها وان شاء الله ينجحوا نجاح باهر يذهل العالم اجمع، بس الخطوات دي محتاجة صبر، ومثابرة، وضبط نفس، وسيطرة على كل المجاميع الكبيرة دي لإن اي غلطة فيها ضياع

اول حاجة، بشار ده زي ما احنا شفنا كده النهاردة، قاتل، ومن زمان وهو قاتل

بس كان بيستمد شرعيته من حاجتين، وحاجتين كل واحدة فيهم اقوى من التانية

الحاجة الاولى: انه بيحمي البلد من الفتنة الطائفية

الحاجة التانية: انه بيساند المقاومة ضد اسرائيل وهو من دول الممانعة

والحقيقة هو ساعد المقاومة فعلا، وفيه ناس مهمة قوي هو آنيهم ولو اتسلموا اسرائيل عايزة رقبتهم، وربنا يستر عليهم بصراحة

طيب.. هم دول حاجتين حيويتين، يعني الاستقرار الداخلي، والامن القومي دول هم اللي بيعملوا الدولة اساسا

يبقى ايه؟ يبقى على الثوار انهم يسلبوه الركيزتين دول، لإنه ما يستاهلهمش، هو تاجر، وبيتاجر بيهم، وساعة الجد قتل ناس، كان ممكن اقترح ان بشار يعمل اصلاحات واسعة الخطوات حفاظا على مساندته للمقاومة وحفاظا على سوريا من الفتن الداخلية، بس الكلام ده كان ينفع قبل ما يقتل كل الناس دي، دلوقت مات الكلام

ده قاتل

قاتل

قاتل

وعلى الثوار انهم يعملوا تلات حاجات رئيسية، التلات حاجات دول محتاجين تظبيط جامد قوي، وضبط نفس شديد، بس لو ظبطت معاهم هم كده خلاص كسبوا الماتش واخدوا البطولة

1- زي ما قلنا قبل كده، الحفاظ على سلمية الثورة، عايزين سلمية بغباء، عايزين نزايد على اليمنيين في سلميتهم كده، تبقى اسلم سلمية في كل السلميات اللي في الدنيا، كده اكيد مية في المية مش حتحصل حرب اهلية، مش انا كنت قلت للسوريين مسموح لكم تستخدموا الطوب وده آخركم؟ لا.. غيرت رأيي، ولا الطوب، انا عايزاكم تبقوا مسيحيين كده، تتمسكوا بالاحتجاج السلمي، مظاهرات، اعتصامات، اضرابات، وتنضربوا وما تقولوش أي.. ومش بس لما تنضربوا ما تقولوش اي.. ولما تتشتموا كمان ما تردوش، وهو ما ينقلنا للنقطة التانية

2- اسحبوا منه الشرعية العربية، بشار مفهم الناس انه لو مشي اسرائيل حتاخد البلد.. لا، انتوا موقفكم المعادي لإسرائيل، والمساند للمقاومة، والداعم للقضية الفلسطينية لازم يبقى واضح وضوح الشمس، ولازم تركزوا عليه، وما تطلعوش الا في ايدكم علم فلسطين، ومعلش، امسحوها في وشي انا، حقكم عليا انا اذا كان اي حد زعلكم من فصائل المقاومة، حتى لو هم شتموكوا انتوا ما تشتموهمش.. احرجوهم كده في نفسهم، وندموهم انهم اخدوا الموقف ده، عشان لما تنتصروا ان شاء الله يقعدا يعضوا في بنان الندم كده، ما تدوش مبرر لأي حد انه يقف ضدكم، عشان اللي يبقى ضدكم يبقى مدان فعلا، ارفعوا الحرج عن الناس اللي بشار عامل تربيطات معاهم، عشان لو وقفوا ضدكم يبقى هم اللي بيحرجوا نفسهم وما يبقاش لهم اعذار

انا عارفة ان الشعب السوري وطني اكتر من بشار بستميت مرة، ولو سوريا بقت ديمقراطية، وحتبقى ان شاء الله، اسرائيل حتبل المرتبة بالليل، والنظام السعودي حيقلع عريان ويطلع يجري في الشارع وهو ناكش شعره، دولة عربية ديمقراطية وضد اسرائيل وبتدعم المقاومة دي حاجة تنزع فتيل اي عميل في المنطقة، وتفقد اي ديكتاتور شرعيته وتبقوا كسبتوا ثواب في المنطقة كلها

ولو تلاحظوا ان امريكا واسرائيل مش واخدين موقف مساند للثورة في سوريا زي ما عملوا مع المعارضة الايرانية لانهم عارفين يعني ايه سوريا تبقى حرة وديمقراطية، يعني خراب بيتهم المستعجل ان شاء الله

واحسن برضه انهم حلوا عن راسكم، هم عمرهم ما بينفعوا حد، هم مضرين، ولو كانوا بينفعوا كانوا نفعوا المعارضة الايرانية

واندال واقذار وما عندهمش اخلاق، امريكا دي بلد قذرة، عشان ما اخدتش اي موقف مشرف من اي ثورة محترمة غير خناقة الشرشحة اللي حصلت بين طرفي النظام في ايران، وغير كده ادتنا كلنا الطرشا، وهي مصلحتها ان اي طاغية يستمر في الحكم، ومصلحتها ان بشار يفضل عشان يبقى الوحيد اللي من العرب بيساعد المقاومة هو انسان طاغية ومفتري، ومش عايزين نموذج ديمقراطي يدعم المقاومة ولا يبقى وطني، ومش عايزين نموذج ديمقراطي عربي من الاساس، امال حيبرروا احتلالنا واستغلالنا ازاي الا انهم يقولوا علينا غير اهل للديمقراطية

والسعودية بتحب تساعد الطغاة كنوع من انواع المبدأ، حتى لو الطاغية عدوها، مش مهم، النظام السعودي ماشي بمبدا انا والاحتلال على العالم العربي وانا والانظمة المستبدة على الشعوب، ونظام بيحتقر ارادة الشعب، وبيحتقر الشعوب بالاساس وبيسميهم "العامة" والرويبضة 

واحسن برضه ان السعودية اول امبارح بعتت لبشار فلوس، امال الكتكوت كان بيقول ان بندر بن سلطان وسعد الحريري بيهربوا للثوار سلاح ليه؟ هو فين السلاح ده؟ الناس ماتت في الشارع ومافيش بمبة اتفقعت.. وكويس، انا مش عايزة بمبة تتفقع، كده تمام

وهو ما يقودنا للنقطة التالتة

3- ابعدوا عن سعد الحريري والسعودية واي قوى طائفية في المنطقة، انا عارفة ان اتهامات "سلفية" والتورط مع الحريري وبندر وسلاماندر وكل ده كلام فارغ، بس احتياطي، ممكن تلاقوهم عايزين يركبوا عليكم لما يلاقوكم قربتوا تنتصروا، لا.. ابعدوا عنهم، دي ناس طائفية وما تفرقش عن بشار حاجة، انتوا عايزين ايه؟ اي مساندة احنا هنا في مصر سدادين، مافيش مصري ما بيحبش سوريا ويتمنى لها كل خير وسعادة وحرية، وانتوا مش محتاجين اكتر من دعم لقضيتكم ونقل للحقائق، واحنا رقبتنا يعني.. وحاجة تانية اهم، هي تبدو طائفية شوية بس انتوا محتاجينها في المرحلة دي: اي علوي معاكم اعملوه نجم الشاشة، العلويين مش سعداء في حياتهم في سوريا ولا حاجة، هم منسحقين، وهم مش بيحكموا البلد، اللي بيحكموا البلد علويين، لكن العلويين مش هم اللي بيحكموا البلد، لو معاكم انشالله واحد علوي بس، خلوه هو اللي يتكلم باسم الثوار في الجزيرة، وابرزوه، عشان تبعدوا اي شبهة طائفية عن ثورتكم

بس كده، يبقى سلمية بغباء، موقف واضح ووطني من القضية الفلسطينية واسرائيل والمقاومة، وما تخشوش في مهاترات مع حد، وموقف وطني ضد الطائفية واضح برضه. كده الخطة 424 وقريب قوي حنقول لكم مبروك، وحاسبوا من المندسين، واي مندس ينضرب عشان يحرم يندس وسطكم، واوعوا اوعوا اوعوا تصطدموا بالجيش

معلش.. انا عارفة ان الجيش السوري فيه شوية مشاكل كده، معلش، امسحوها في وشي برضه، مش كويس تصطدموا بيه، لئن بسط اليكم يده ليقتلكم ما أنتم بباسطين إليه أيديكم لتقتلوه.. 

واهم حاجة:

قولوا يا رب

وخدوا بوسة.. ودي هدية من  مصر

حيث لا تلتام.. جراحات

حيث لا تلتام.. ولا تذبل

حيث كل ختام.. لآهاتي

يبتدي من الآن.. من الآتي 

مثل موج البحر.. مثل الموج

قولوا للقلقان.. ما يقلقشي

دولة الاحلام.. ما تقلقشي

حيوا اهل الشام.. يا اهل الله

-------

المصريين.. خدوا انشروا اسماء الشهداء السوريين، وكل ما بيرتفع شهيد الاسماء حتزيد، ربنا يطهر بدمهم سوريا

صباح الفل يا سوريا

والنبي يا سوريا مش بانام بسببك، وبالي مشغول عليكي

بصوا بقى

خصيمكم النبي تتمسكوا بسلمية الثورة... تمسكوا بيها بغباء، مهما يحصل، اوعى اوعى اوعى مهما يعمل بشار تردوا عليه، مهما يضرب قولوا له الله يسامحك، مش دايما القوة مرجلة.. ساعات بتبقى جبن وغباوة

شايفين اليمن؟ اجدع ناس... اجدع ناس بحق، لإنهم اساسا مجتمع مسلح، وقبائل، بس بيتعاملوا مع سلمية الثورة على انها عقيدة ايمانية، مش مهم ان الوقت طول معاهم شوية عشان آل سعود بيبعتوا للموكوس ناس وسلاح، مش مهم، حيمشي حيمشي ان شاء الله، وحيحافظوا على الثورة من انها تخش على حرب اهلية

كان ليا اصدقاء عاملين نفسهم يساريين، هم عبارة عن كمبيوتر ومتسطب عليه برنامج شيوعية، يعني زي ما قرا في الكتاب كده بيسمع من غير تفكير، عشان كده باقول عاملين نفسهم يساريين، لإن الغباوة لا دين لها، الغباوة موجودة في كل حتة، كانوا فرحانين في الاول بليبيا عشان سلاح بقى ودم وقال ايه، عمالين يقولوا: يا ريتنا عملنا زي ليبيا.. بس البعدا مش سامعة لهم حس دلوقت! مش سامعة لهم حس فيما يخص ليبيا، بس سمعت لهم حس في "المواجهة مع الجيش مسألة وقت"... ماهو الغبي حيفضل غبي طول عمره، عشان لينين تصادم مع الجيش فهم حافظين بقى مش فاهمين.. بس برضه اتكتموا خلاص لما الناس فشلت لهم موضوع المواجهة ده

انا مؤمنة بالكفاح المسلح ضد الاحتلال.. بس ده مش احتلال، ده حاكم ظالم ومعاه طوائف وناس، اوعى تمد ايدك عليه
خلوا شعاركم:
لئن بسطت يدك إلي لتقتلني، ما أنا بباسط يدي إليك لأقتلك.

اليمن كانت معرضة في ثانية انها تخش على حرب اهلية، وخلاص، لو لا قدر الله عملت كده كانت الثورة خلصت

وزي ما التوانسة قالوا لنا في اول اربع ايام من الثورة: انتوا بتتعاملوا مع ذخيرة وهم بيتعاملوا مع بشر، الذخيرة بتخلص، البشر مش بيخلص

اوعى اوعى اوعى

تفضلوا ماسكين في سلمية سلمية.. انا عايزاكم تتغابوا في السلمية، آخركم تحدفوا طوب، دي اقصى حاجة مسموح لكم تعملوها في مواجهة البطش، ومعلش.. ودعوا اهاليكم، السلمية مش معناها انك تجري من الضرب، السلمية معناها انك تستقبل الرصاص بصدر مفتوح.. غاندي قال كده، ونفعت

امبارح عرفت ان فيه قبيلة في اليمن مشهورة بإنها ما بتنساش تارها ولا بعد ميت سنة، لو واحد اتقتل منهم بيقتلوا قدامه عشرة، القبيلة دي اتقتل منها ناس كتير في الثورة، وقعدوا يقولوا سلمية سلمية، مع ان معاهم دبابات اساسا

جدعان جدعان جدعان جدعان جدعان جدعان.. رجالة على حق

اهو انا عايزة السوريين يعملوا كده، تحت اي ظرف يفضلوا كده.. دي الوسيلة الوحيدة لنجاح الثورة، اي طاغية بيتمنى من قلبه ان البلد تقلب على حرب اهلية لإن ده اكسب له، هو القذافي مشي؟ ولو مشي حيكون مشي بعد ايه؟ كله بسبب انه لما ضرب ردوا عليه، صحيح ابن الكلب ضرب بالطيران، بس شوية صبر على الموت كانت حتهدم نظامه ويمشي.. يالا.. قدر الله وما شاء فعل

علي عبد الله صالح حيمشي.. وربنا حيخرب بيت اللي بيساعدوه، ان شاء الله ربنا حيخرب بيتهم، منهم لله، انا قابلت هنا سعوديين قاعدين يقولوا لي: ما تزعلوش منا، احنا مالناش ذنب.. ادعوا لنا

ربنا يفك اسرهم

وان شاء الله يفك اسر سوريا.. بس يتمسكوا بالطرق السلمية، اعملوا اي حاجة، افضلوا تظاهروا، اقعدوا له في البيت وما تشغلوش اي مصلحة حكومية، اقطعوا له الشارع وافضلوا نايمين له فيه، مهما يضرب استحملوا الضرب.. حيخلص حيخلص كده

وقولوا يا رب

اه نسيت.. اي حد يقول هتافات طائفية او مذهبية اضربوه. لا بجد، امسكوه في الشارع كده رنوه علقة معتبرة بحيث يبقى عبرة لغيره، وشوفوا لكم علويين متضررين منه، اكيد حتلاقوا، وحاولوا تبرزوهم، احيانا لمحاربة الطائفية بنعمل طائفية ايجابية مضادة

واحنا كمان بيحاولوا يلعبوا في الطائفية عندنا، تميم البرغوتي بيقول لي ده آخر كارت لامريكا في مصر، لو عديتوا منه تبقوا في الامان
احنا مقتلنا في الطائفية.. كلنا كلنا كلنا، بلا استثناء واحد، مقتلنا في الطائفية، وده كارت اسرائيل، وكارت امريكا، وكارت الطغاة، لازم نحرقه
لازم نحرقه
وعايزين في مصر نطلع قانون ضد الطائفية، الطائفي يتحكم عليه انه يخش المتحف ويفضل جوه لحد ما يكفر فيبطل طائفية بقى
الطائفي كفره حلال.. بل هو من المستحبات

يا رب