Tuesday 30 September 2008

هو عيد وللا عند؟


هم صومونا بالعند يعني، خاصة اني اعرف ان فيهم ناس مش بتصوم يعني وربنا حليم ستار بلاش نتكلم بدون ذكر اسماء الريس نفسه ومرة قال كده في الاهرام :)) من غير ما ياخد باله في حوار مع صلاح منتصر كان بيتكلم عن حرب ستة اكتوبر وبعدين قال هم ادونا اوامر ما نتكلمش ولا نفتح بقنا ولا حتى نقول حاجة لزوجاتنا ونتصرف زي اي يوم عادي جدا، صحيت من النوم يوم ستة اكتوبر في معادي الساعة ستة فطرت وشربت الشاي ولبست والعربية جات لي الساعة تمانية زي كل يوم
:))
المهم ما علينا يمكن عنده عذر وللا حاجة طيب يعني عشان انت يا ريس فطرت وشربت الشاي تقوم تصومنا بالعند في كل الدول العربية؟
ازاي السعودية تعيد النهاردة وليبيا تعيد النهاردة واحنا العبيطة اللي في النص ما شفناش الهلال؟
يا جدعان احنا السما ملوثة وعمرنا ما ح نشوف الهلال في سماء مصر المحروسة الا يوم 14 في الشهر العربي...ساعتها ممكن نشوف الهلال بس لا...يوم خمستاشر ح يبان بقى انه بدر...آه احنا واعيين قوي
طب حد يديني عقله
الدولة اللي على يمينا لو انت قاعد في المدرجات اللي على اليمين عيدت والدولة اللي على شمالنا عيدت
ولو انت قاعد في المقصورة تبقى الدولة اللي تحتنا والبحر اللي فوقينا
كل دول شافوا الهلال وجه عندنا احنا وحرن مش عايز يبان؟
احنا هلكنا السنة دي استغفر الله العظيم، ورمضان كان كل يوم جايب لنا مفاجعة
نفسنا نحس بالمية السخنة بتاعة حماية العيد الكبير...آه العيد الكبير ...ماهو بما ان كل الدولة العربية عملته العيد الصغير احنا بقى بالعند ده العيد الكبير، واعملوا حسابكوا بقى بكرة على دبح
بس هه

شهامة وجدعنة الانسان المصري

مرة واحد صاحبي حكى لي عن اول يوم ليه في الجيش، هو مؤهلات طبعا وهم بيتلذذوا باذلال المؤهلات عشان زي ما انتوا عارفين الذل بيطلع رجالة وبيقفوا وقفة رجالة
المهم ادوله عصايا ووقفوه حراسة في الصحراء على الباب، بيقول لي: واقف بعصايا ولو كانوا ادوني سلاح ما كنتش ح اعرف استخدمه، لقيت كلب جاي عليا بس انا مش مستكلبه قوي يعني.
اظن انتوا عرفتوا ايه اللي جاي عليه، هو خالد في الموقف ده مش ندل ولا جبان ولا حاجة لانه معاه عصايا وفي الصحرا وبالليل وديب جاي عليه ايه اللي ممكن يعمله يعني غير انه يتسمر مكانه من الرعب؟
الندالة والوضاعة والجبن جم منين بقى؟ من صاحبه اللي واقف على البرج معاه سلاح معمر وما طلعش من كمه يعمل اي حاجة غير ينادي على خالد من فوق: سيبه ده ديب...
خالد قال له: اسيبه؟ على اساس اني انا اللي راسي والف سيف اجري ورا الديب؟ ده جاي عليا....
المهم ربنا الهمه يتنح..الديب وقف شوية كده وبعدين بص له بشفقة وراح متدور وماشي
يعني الديب طلع اجدع من المجند اللي ع البرج
-------------
انا باخاف من كلاب الشارع على فكرة، بس خوفي من كلاب الشارع بيتوارى لما ابقى ماشية مع واحد شنبه من ودنه اليمين لودنه الشمال ويتحامى فيا من الكلب
----------
وكمان باخاف من تعدية الشارع، بس احيان كتير بابقى نفسي ارمي نفسي تحت اي اتوبيس لما ابقى برضه باعدي مع حد صاحبي المفروض انه في البطاقة ذكر ويحطني انا ناحية العربيات
------
آه...طبعا ح يدخل شوية ناس يبضنوني ويقولوا لي مافيش داعي للتعميم
ليه؟ لان الاخوة الرجالة اسم الله على ننوس عينهم بيزعلوا لدرجة انهم يعملوا اكاونتات وسخة ويدخلوا يشتموني بيها عشان زعلانين على نفسهم
امال احنا ما بنزعلش ليه؟ الست المصرية نكدية، الست المصرية بعد الجواز بتفشكل، الست المصرية مملة، الست المصرية مهملة، الست المصرية رغاية، الست المصرية بتطفش جوزها من البيت
الكلام ده عندنا بيه تراث من السينما والمسرح والمسلسلات والروايات
اعمال فنية وادبية كاملة متأسسة على شتيمة الست المصرية ان لم يكن كلها بما فيهم مسرحية العيال كبرت
وما بنزعلش..حد زعلان يا بنات؟ فيه واحدة زعلانة؟ اهو...مافيناش ولا واحدة زعلانة ولا واحدة اتعوجت وقالت: مافيش داعي للتعميم
ده حتى فيه ستات مازوخيات بيكرروا الكلام ده
ولما واحدة زيي تقول الرجالة عقولهم ضيقة يقوم مجموعة من الرجالة يزعلوا بجد ويعملوا اكاونتات يخلوني اعمل لها مودريشن مما يؤكد ان لو كل الناس عقولها واسعة دول بالذات عقولهم ضيقة، وياريتهم رجالة صح بيواجهوا
اقول لكوا من الاخر، يعني ايه رجولة: يعني شهامة وشجاعة وجدعنة
مرجلة كده يعني معروفة دي؟
طيب الكائنات اللي فيهم الصفات دي لما بيبقوا موجودين في مكان بيبان عليه
البلد دي باين عليها اي حاجة من دول؟

ايوة كده شاطرين

ايه الحلاوة دي؟ ايه الطعامة دي؟ شدوا حيلكوا شوية انا عايزة عبقريتكوا القذرة تتجلى في الفشل اكتر واكتر
انا احب الناس الفاشلة بابداع

يا فشلة
يا فشلة
يا فشلة
انتوا الاتنين افشل من بعض
انتوا بتثبتوا اننا امة واحدة مافيش اي اختلاف في داخلها لان كلنا نفس العته
جتكوا القرررررررررررررررررررررف في العيد
عيد خرا على دماغكوا الهي تولعوا بجاز وسخ...ما كنتوش انتوا بدل المسرح القومي

غرق 80 شاب كانوا رايحين اليونان


من مدونة احترس انت الان في مصر :) لا واللنك بتاعها يالهوي
هههههههههه
اموت واعرف مين الدماغ اللي اختار الاسم ده

القبض على 22 مواطن من الدويقة

الشرطة قبضت على 22 مواطن من الدويقة واتنين اصيبوا ودلوقت المحامين رايحين ومحتاجين اعلام كاميرات يصورهم لمزيد من التفاصيل رجاء الاتصال باحمد عزت 0103978913

بصوا طفاطيفو عمل ايه


الحق يتقال:
مزايا عهد مبارك
اولا: اننا ولا لحظة حسينا بملل...كل يوم في مصيبة جديدة
ثانيا وده الاهم: انه خلا شباب كتير يكتشف قدراته الابداعية وبقى كل واحد بيتفنن ازاي يعبر عن قرفه
بكل الوسائل الابداعية

Monday 29 September 2008

عيدكم مبارك غصب عن عين ابوكوا

بمناسبة حلول عيد الفطر الماسي، تعلن كتائب الشهيد ماس كهربائي، الجناح العسكري لحركة مصر بتولع بينا المحزوءة عن تقديم هدايا علبة كحك وجركن جاز وسخ لكل مواطن
عيدكم مبارك غصب عن عين ابوكوا

عاجل: اتجاه لوقف تنفيذ الحكم ضد ابراهيم عيسى


مكرم محمد احمد بيقولوا بيعمل تحركات لوقف الحكم ومسئول امني بيقول فيه اتجاه لوقف الحكم
!!!!!!!!!!
الخبر اهو
طب وهو وقف تنفيذ الحكم ح يلغي الادانة؟
هو الحكم حبس شهرين، بس فيه ادانة، طيب لو ح يبقى فيه وقف حكم يبقى من الامن وللا من المحكمة؟

فين حسام الوكيل

احنا جايزة كبرى؟ الله يكرم اصلهم

قال الامريكان قالوا بعد غزو العراق ان مصر جايزة كبرى...والله كتر خيرهم ده بس من ذوقهم واصلهم واخلاقهم...ده انتوا اللي عنيكوا حلوة
طب العراق وعندها بترول..احنا عندنا ايه؟ الفدانين اللي كنا بنزرعهم اتجرفوا، الصحرا يا اما فيها بمب مش عارفين نشيله من ايام الحرب العالمية يا اما رمال متحركة، النيل ماحدش بيشرب منه غيرنا عشان احنا بينا عشرة لكن اي حد ييجي بنقول له يشرب من مية معدنية عشان يروح بلده سالم، قناة السويس وبيعدوا منها ويموتوا المواطنين كمان، عندنا ايه؟ عندنا فشل كلوي وسرطان اطفال اللي عايز ييجي يشيل يشيل
بسسسسسسسسسسسس اختصر وقول شامبنزي
بصوا تحليل جو غانم هنا بخصوص الحرايق المتوالية وبصوا على البوست نفسه كمان...التحليل ده مقنع جدا، بس على فكرة يا جماعة هم كده ح ياخدوا مهموز معتبر يعني بيتعبوا نفسهم وبيكلفوا جيوبهم على الفاضي والخازوق ح يطلع من نافوخهم...واجب علينا من حيث العروبة والدين والانسانية اننا نوعيهم احسن يقعوا وماحدش يسمي عليهم
مصر ما عادش فيها الا الشعب، والشعب لو قافلة طبية بربع جنيه جات كشفت عليه ح ترميه كله في النيل جنبا الى جنب مع البلهارسية صديقة الانسان احنا عايشين ببركة دعا الوالدين
آآآآآه يكونوا طمعانين فيه...دعا الوالدين يعني...طب ما تدعوا لهم من هنا في الايام المفترجة دي، اي والدين يقعدوا يدعوا دلوقت
ادعوا له ادعوا له

حيثيات الحكم على عيسى...ده ايه الفتوح ده كله

يا ماشاء الله ايه يا هيئة المحكمة الموقرة ده؟
ايه الفتوح ده كله:
اولا : أذاع أخبار وبيانات وإشاعات كاذبة من شأنها إلحاق الضرر بالمصلحة العامة ، وذلك بان نشر بالعدد رقم 130 من جريدة الدستور والتي يتولي رئاسة تحريرها والكتابة فيها خبرا كاذبا بعنوان " أنباء عن سفر الرئيس مبارك مريض بقصور بالدورة الدموية مما يقلل من نسبة وصول الدم إلي أوعية المخ " وعنوانا أخر أورد فيه " مستقبل مصر مرهون بقرارات عاطفية يتخذها الرئيس لحظة المرض "

طب ماهو قايل انباء وبعد شوية كاتب شائعة..يعني هو نفسه قال شائعة...

بسم الله ما شاء الله ده انت ملك:

كما نشر بذات العدد مقالا تحت عنوان " الإلهة لا تمرض تضمن أخبارا وبيانات كاذبة أكد فيها شائعات المرض ، مما أدي إلي انخفاض مؤشر البورصة بصورة غير عادية وتصفية المستثمرين الأجانب لاستثمارات بلغت قيمتها أكثر من ثلاثمائة وخمسين مليون دولار الأمر الذي اضر بالمصلحة السياسية والاقتصادية للبلاد علي النحو المبين بالتحقيقات ،

ايوة يعني من امتى القاضي بياخد بالظن؟ فين الادلة المادية على ان البورصة انخفضت بالذات عشان مقال الالهة لا تمرض؟

وللا اسم الله عليه قايل ايه:

نشر بسؤ قصد – وبأحدي طرق العلانية – أخبارا وإشاعات وبيانات كاذبة كان من شأنها إلحاق الضرر بالمصلحة العامة ، بأن نشر بسؤ قصد وبطريق الكتابة والرسوم التوضيحية في عددي جريدة الدستور المشار إليهما الأخبار والبيانات والإشاعات الكاذبة موضوع الاتهام السابق ، مواليا تكرار النشر دون اعتبار للثابت من عدم صحتها إذ نشر بالعدد رقم 132 مقالا تحت عنوان " زيارة مبارك إلي برج العرب فشلت في القضاء علي شائعة مرضه " أكد خلاله تلك الأخبار والإشاعات مما الحق الضرر بالمصلحة العامة علي النحو المبين تفصيلا بالتهمة الأولي وبالتحقيقات وطلبت عقابه بموجب المادتين 102 مكررا فقرة 1 و 188 من قانون العقوبات .

بسوء قصد...وتاني بسوء قصد...القاضي مكشوف عنه الحجاب...مداااااااااااد حصنتك بالشبشب والصندل من شر المنقلة والبرجل
ومن عين ابراهيم عيسى اللي لاخر لحظة بيطلع الجرنال قبل ما يسلم نفسه
ومن عين مرات ابراهيم عيسى اللي انصحها تصلي صلاة الليل وبعدين تقعد ووشها للقبلة وتقول كده: الذين قال لهم الناس إن الناس قد جمعوا لكم فاخشوهم فزادهم إيمانا وقالوا: حسبنا الله ونعم الوكيل
وتيجي عند حسبنا الله ونعم الوكيل وتقولها 950 مرة بالظبط
وبعد ما تخلص العدد تكمل: فانقلبوا بنعمة من الله وفضل لم يمسسهم سوء واتبعوا رضوان الله والله ذو فضل عظيم
ومن عين عيال ابراهيم عيسى اللي ح يعيدوا من غير ابوهم
وحرقها شمهوووووووووورش خطي عليها
الاولة بسم الله:
قضت محكمة أول درجه حضوريا بتوكيل / بمعاقبة المتهم بالحبس ستة أشهر مع الشغل وكفالة مائتي جنية لإيقاف التنفيذ مؤقتا مع إلزامه بالمصروفات الجنائية

والتانية يعوض الله:
ثانيا : بعدم قبول الدعويين المدنيتين وألزمت المدعيين بالحق المدني كل في دعواه بمصروفاتها ومبلغ خمسون جنيها مقابل أتعاب المحاماة

والتالتة منك لله:

ثالثا : برفض الدعوي المدنية المقابلة والمقامة من المتهم سمير محمد الششتاوي وألزمت المتهم بمصروفاتها ومبلغ خمسون جنيها مقابل أتعاب المحاماة

وشوووووووووووبش وحصوة في عين اللي شافك ولا صلاش على رسول الله لولولولولولولوييييييييي

وعاشت اسيوط حرة مستقلة

ديجافو


من عند ميييين؟ ايوة اسم الله عليكوا

Sunday 28 September 2008

يادي صحة الرئيس

خلاص...خلاص...عرفنا انه لابس الشورت والفالنة الكات وبيلف الترك 57 مرة وانه ح يدفنا كلنا خلاص
حيثيات الحكم على ابراهيم عيسى
لما ارجع من الشغل نبقى نتكلم فيها

المستشار طارق البشري يكتب فتنة السنة والشيعة


عن جريدة الدستور:

فشت الفاشية في الأيام الأخيرة، من عدد من علماء المسلمين من السنة والمهتمين بالشأن الإسلامي العام، حول ما وصفوه بأنه نشاط للتبشير الشيعي في صفوف سنة المسلمين، وإحياء لما ردده بعض غلاة الشيعة قديماً عن الصحابة، مما تستنكره الغالبية منهم، وتعميماً لأقوال قديمة لهذه القلة بحسبانه من أصول المذهب الشيعي، ومؤاخذة لجمهور العامة بأقوال هذه القلة المستهجنة.

ونحن في هذا الأمر نريد أن نضع أمام القارئ المسائل الآتية:


أولاً: أن مذهب الشيعة الجعفرية وهو من مذاهب المسلمين ترضاه غالبية الشيعة الغالبة، وهو يدور في إطار أصول الدين الإسلامي التي تعتبرها جماعة المسلمين من ثوابتها العقيدية، والخلاف بينه وبين مذاهب أهل السنة خلاف في الفروع، وهذا موقف جمهرة المسلمين في بلادنا ومؤسساتهم العلمية والدعوية الرسمية وغير الرسمية.

ثانياً: أن الحراك الذي قد يجري بين مذاهب المسلمين المعتبرة هو حراك داخل الجماعة الإسلامية، مادام يقوم في إطار الالتزام بثوابت الدين وأوامره ونواهيه، وهو بهذه المثابة يمثل نوعاً من تعدد الاجتهادات وتنوع النظر في الشئون الجارية مادام ينطلق من ضوابط العقيدة الإسلامية بوصفها المرجعية العامة.

ونحن إن كنا نحذر من أن يتخذ هذا الحراك أساليب تؤدي إلي الاحتكاك بين ذوي المذاهب المتعددة، إلا أننا نلفت النظر إلي ما ينبغي من وضع هذه المسألة في مصاف الأمور الثانوية، مقارنة بما يواجه الإسلام والمسلمون الآن من محن ومخاطر وأزمات.

ثالثاً: إننا في ظروف تاريخية وسياسية تستوجب علينا أن نجعل معيار التصنيف والتمييز للمواقف والجماعات والأحزاب والمؤسسات والأشخاص، هو مقاومة العدوان والتهديدات الاستعمارية والصهيونية علي شعوبنا وبلادنا وأراضينا وثقافاتنا دون تفرق بين فريق وفريق داخل أهل كل مذهب، فلا ننظر للموالين لكل مذهب بحسبانهم جماعة واحدة، ولكن نتعامل مع كل فريق بموجب اندراج أهله في صفوف المقاومة والمنعة أو في صفوف المتخاذلين والمتهاونين.

رابعاً: أن تفشو الفاشية الآن باسم السنة جميعاً ضد الشيعة بعامة، لهو أخطر ما يمكن أن يواجه الأمة الإسلامية، لأنه يحوِّل بأس المسلمين إلي بعضهم البعض، بدلاً من أن يكون بأسهم من المعتمدين عليهم الغازين لأرضهم المستبعدين لأوطانهم.

وليس مما يصح في موازين تقدير الواقع أن يثير البعض مخاوف أهل السنة جميعاً وهم أربعة أخماس المسلمين من خمسهم الآخر، وذلك بزعم غير محقق ولا مؤكد عن أن لهم نشاطا دعوياً مذهبياً بين أهل السنة.

وليس يصح في تقدير الأحجام والأوزان البشرية، أن تنظر الغالبية السنية إلي شهادة تسعة أعشار المسلمين بحسبانها «طائفة» إزاء العشر الباقي، ولا يصح أن يخفي علي هذه الغالبية أنها بموجب حجمها ووزنها عليها المسئولية الأكبر في حفظ وحدة الجماعة واحتضان فصائلها والتقريب بين بعضهم البعض.

خامساً: لو كنا ذوي أديان مختلفة لحق علينا أن نتوحد في مواجهة أعدائنا المشتركين العادين لنا والمعتدين علينا، لا أن نتخالف هكذا في مواجهة ما نلقاه من عدوان وغزو ومحاولات للمحو والسحق.

أنها ريح تأتي من غير أحباب المسلمين، وهي لا تفرق في كرامتها لنا وطمعها فينا بين سني وشيعي وهي تهدف لإرساء الفرقة بيننا لنكون ألين مكسراً.

سادساً: إننا نعجب أن هذه الفاشية جمعت بين من عرفوا بالاعتدال والوسطية وبين من عرفوا بالغلو ودعوا للعنف، جمعت بينهم في ذات الموقف السياسي وفي ذات التوقيت وجمعت بينهم بمبادرة منهم، دون أن تقوم مناسبة تستوجب تخويف سنة المسلمين من شيعتهم، ودون أن يثور حدث يفسر شيئاً من ذلك، إنما ظهر الأمر بالأقوال والتصريحات والأحاديث والبيانات، ليثير الأحداث ويقلِّب الواقع ويصرف الناس من شأن إلي شأن.

ويجري ذلك في الوقت الذي تعمل فيه السياسة الأمريكية الإسرائيلية علي محاصرة حزب الله اللبناني وتصفيته، وهو الآن من أهم قوي المقاومة الوطنية الضاربة القليلة التي يملكها العرب وهو الداعم لحركة المقاومة الفلسطينية السنية، كما تعمل ذات السياسة علي ضرب النظام الوطني في إيران المناوئ للعدوان الأمريكي الإسرائيلي في المنطقة وتهددها إسرائيل بضربة عسكرية سريعة ومن ثم تسعي السياسة الأمريكية الإسرائيلية إلي عزل قوي المقاومة هذه في محيطها العربي الإسلامي ليسهل ضربها، وعلي تحويل كراهة المسلمين من الخطر الصهيوني الحقيقي إلي خطر شيعي متوهم.

سابعاً: أن هذه الفاشية نكاد نلحظ في دوافعها موقف بعض الدول بالمنطقة، التي اعتادت أن تنطق باسم الإسلام والسنة، واعتادت مناصرة السياسة الأمريكية المناصرة للموقف الإسرائيلي، وهي ذاتها من كانت تضع أيديها في أيدي شاه إيران الشيعي الفارسي «الصفوي» في ستينيات القرن العشرين ضد سياسة مصر الوطنية ومنها السياسات العربية الوطنية وقتها، رغم أنها كانت سياسات عرب وسنة مسلمين فليس الثابت هو الموقف من الشيعة، ولكنه الموقف المؤازر للسياسة الأمريكية.

ثامناً: إننا نرجو من علمائنا الذين نعرف فضلهم وقدرهم في الاجتهاد الفقهي والدعوة الإسلامية والمواقف الوطنية، أن ينأوا بأنفسهم عن أن تستخدم آراؤهم في غير ما يحبون وفي غير ما قضوا حياتهم وبذلوا جهودهم في الدفاع عنه، وهو نهضة المسلمين ومقاومة أعدائهم.
--------
لا فض فوك يا سيادة المستشار...خلصت في الكلام


تغطية عزة مغازي كاملة من موقع الحدث


Saturday 27 September 2008

هو احنا مش ح نعمل حاجة


اي حاجة انشالله اضراب تاني وللا اي حاجة، بس ما ييجيش واحد يقول نعمل اضراب اول يوم العيد
احنا قبل كده عملنا حاجات كويسة، مالنا؟ مالنا كده عاملين زي الملاكم اللي اخد بونيات كتير ورا بعض في وشه وعمال يطوح

صور الحريق من عند احمد عبد الفتاح




مدونة يالاللي
وده الرابط اللي عليه كل الصور
يا عيني يا مصر...مصر الحلوة الجميلة يتعمل فيها كده؟

مصر شمعة تحترق بجاز وسخ

بيقول لك خشب في قطيفة

تفتا بتي بان ساكلامان
قال انا باقول لهم على الجايكو، وانا فاكرة نفسي بقى اني خلاص اتجننت وكده يعني وباهيس، باقول لهم بكرة يقولوا لنا اصل المبنى خشب في خشب في خشب انما يستاهل حريقة دهب
قوووووووم مريم عمران تبعت لي تقول لي: لا يا نوارة ماهر سليم بيقول ان المبنى خشب في قطيفة
انا قلت يا ضنايا يا بنتي ده البت لسعت اكتر مني، قلت استفهم منها لقيتها بتحلف بالله العظيم انه قال كده
طب الحريق الجاي ح يقولوا بمبة في اصفر كاروهات عشان كده اتحرق؟

عاجل: المسرح القومي بيتحرق


تحديث:
الحرائق سوء قدر...اكفروا بقى
تحديث:

AzzaMoghazy said:

sms

الامن ابتدي مصادرة الموبايلات و الكاميرات و اقتياد اصحابها للبوكسات


تحديث: قناة النيل للاخبار بتدعي ان المطافي سيطرت على الحريق وعزة مغازي هناك بتقول المبردات شغالة من فوق بس الدور الاول ومخزن الديكور وحجرة الوثائق والعين وقاعة عب رحيم الزرقاني الله يرحمها ويحسن اليها، هي دي السيطرة؟


من اليوم السابع

تحديث:

القوات المسلحة تتدخل لإخماد حريق "القومى"


تحديث:

AzzaMoghazy said:

sms

عاجل: الحريق يعاود الاشتعال الان في مخزن الديكور

تحديث: اصابة اتنين من بتوع المطافي باختناق، المصدر قطة الصحرا على جايكو
ما تيجوا ع الجايكو بدل ما انا عاملة زي الكلب الحيران كده

تحديث: نسألكم الفاتحة على روح قاعة عبد الرحيم الزرقاني


تحديث: بيقول لك ماس...هع هع هع، ده في العيد الماسي للمسرح القومي


تحديث من عزة مغازي: هي في موقع الحدث وبتقول الاتي:

لامن يعتدي علي يسري حسان الصحفي بالجمهورية و رئيس تحرير مسرحنا و عدد اخر من الصحفيين

تحديث: عزة مغازي الصحفية راحت تغطي الامن رش عليهم مية ومنعهم من التصوير والتحرشات الجنسية اون هيز ايرز يعني على ودنه

تحديث: وخدوا دي كمان....ماهر سليم وكيل وزارة الثقافة بيقول ان الناس هي المسئولة عن الحريق، لان فيه ناس مش كويسة بتستخدم سطح المسرح كمسكن، زي ما اتفقنا يعني طبعا قبل كده دي ناس سايبة فيللها وبيسكنوا في الاماكن الغريبة دي، والناس دي الوحشة دي الكخة دي القطة دي البطة دي بتستعطى مخضروات وطبعا زي ما احنا عارفين الفحم والكرسي وخلافه...هو ده بقى السبب في الولعة، خصوصا انهم ما عزموش عليه بنفس ولاد النتنة مما اغضب قلبه وربه عليهم والدنيا ولعت

مش بعيد نلاقي مسئول طالع يقول: دي عين وصابتنا
اتشليتوا وللا لسة؟ اتشليتوا؟ انا لسة ما اتشلتش على فكرة...حد اتشل؟ طيب تصدقوا بايه؟ احنا ناس، وانا اولكم عشان ما حدش يدخل يسفسط عليا، احنا ناس ما عندنا نقطة...هسة...فسوة من الاحمر ده اللي بيبقى عند البني ادمين عشان بيتعمل فينا ده كله ولسة واقفين على رجلينا
ماهو يا تبنوا لنا بيوت يا توفروا لنا الكلة
--------
والنبي الاخ اللي ماسك البلد يحقرها حتة حتة...السيدة في ضهرك يا شيخ هات من الاخر وخلصنا كلنا، وقوع البلا ولا انتظاره

انا برضه اللي تهييس؟


ده انا ست العاقلين، لو انا تهييس امال ده يبقى ايه:

الأهرام المصرية

أما في مصر، فقد أدت مفارقة طريفة أدت إلى فوز أحد المسيحيين بالقرعة المخصصة لاختيار سعداء الحظ الذين سيذهبون لأداء فريضة الحج مجانا، وفقا لما أوردته صحيفة "الأهرام" المصرية اليومية.

وقالت الصحيفة القاهرية إن "الواقعة الطريفة حدثت حين أقامت إحدى شركات الصلب بمنطقة السويس شرق العاصمة القاهرة حفل إفطار جماعيا لعمالها."

وقد أقامت إدارة الشركة قرعة علنية على أسماء جميع العاملين بالشركة لمنح ستة عاملين فرصة الحج هذا العام إلا أن القرعة فجرت مفاجأة بأن أحد الفائزين مسيحي. وقامت إدارة الشركة بتحويل الجائزة إلى جائزة مالية، وفقا للصحيفة.


الامن المركزي من اهل الجنة


والله لا يؤمن
والله لا يؤمن
والله لا يؤمن
من بات شبعانا وجاره جائعا وهو يعلم
.

.

.
بس ما قالش بقى يؤمن بالسني وللا بالشيعي
وما قالش عربي وللا فرعوني
وما قالش ايراني وللا سعودي
ودي طبعا زي ما انتوا عارفين معضلة كبيرة جدا والامر يستلزم البحث والتحليل وعلى علمائنا الافاضل انهم يفيدونا عشان احنا بنقرقض ضوافرنا:
ماذا لو واحد سني مستقيم عربي ضامن الجنة في جيبه طبعا اكتر ماهو ضامن ان الرقم القومي في جيبه بات شبعانا وجاره جائعا وبايتا في الشارع وميتا تحت صخرة ومضروبا بشومة من الامن المركزي لحد ما مات وهو يعلم
وجه واحد من عباد الصليب الانجاس او الشيعة المبتدعين واكله ورحمه
؟؟؟؟؟؟؟
اكيد السنة ح يدخل الجنة برضه ده اساسي يعني
مهما نعمل
وعلى فكرة كمان...الامن المركزي سنة على الصراط المستقيم
يعني داخل الجنة داخلها مهما ضرب بالشوم
ده احنا جامدين قوييييييي وواخدين توكيل من ربنا ومتسجل في الشهر العقاري كمان حد له شوق في حاجة؟

Friday 26 September 2008

خذوا النقطة من افواه الاعلانات


اولا كمية الحملات القومية اللي بتعلم الناس الوطيان في الشهر الفضيل ده غير طبيعية
اعلانات عشان تعلم الناس التوفير تقوم تعلمهم النتانة وكل اخلاق الرجالة اللي نسوانهم بيتريقوا عليهم زي الراجل اللي بيزعق: النور...النور يا كفرة...بطلوا تفتحوا باب التلاجة كتير....هو انا بالاقي الفلوس في الشارع؟
طيب زمان ايام البركة كان فيه ناس فعلا لما بتستنتن على اهل بيتها بتعرف توفر، لكن حد يقول لي البني ادم وفر مهما وفر ح يكفي ايه وللا ايه في الغلا ده؟ يعني في الغلا احنا كمان اللي طلعنا غلطانين ومبذرين
اعلانات بتعلم الناس ان الادب والاخلاق يبقى مع السياح بس، عشان السياح بيشخطوا فينا كلنا في اخر الاعلانات، لكن طبعا التحرش والغش مع المصريين مافيهوش حاجة لانه ما بيخسرش فلوس
يعني مش بس عقدة خواجة، لا وعقدة خواجة نتنة كمان، بما ان السياح بيدفعوا يبقى لازم تحترمهم الخواجة بيدفع بالدولار، المصري بيدفع بالجنيه المعفن يبقى ياخد بالجزمة مافيهاش حاجة يعني، والراجل يقول لمراته زعلانة على عيني تقول له انا صعبان عليا العربية! ماشاء الله ده ايه الحنان الاسري ده؟
اعلانات طبعا في عز انيهارات الصخور بتقول لك: من حقك يبقى بيتك اوسع....من حقك يبقى عندك حمام سباحة....احمد حبيبي وجايب ضيوف معاك، واحمد حبيبي هو وامه شعرهم اصفر وعينيهم زرقا، بقى الولية دي مخلفة احمد؟ امال انا اخلف ايه؟ ظرمبيح؟
ماهم دول بتوع
you brought a friend home
بس ترجموه عشان الغوغاء والدهماء من امثالنا يتنقطوا بالعربي
واعلان فيه بمب العيد، وانا باكره بمب العيد
زمان وانا في اولى ابتدائي كان فيه اعلانات اسمها: لحظة من فضلك، كانت بتعلم الناس ما ترميش الزبالة في الشارع وتدي شوية تعليمات "دي زبالة يا جاهل" حاجات كده زي الست سنية سايبة المية ترخ ترخ من الحنفية، ما كانوش بيقولوا ان الاخلاق واحترام الناس في الشارع وعدم غش الزباين مقصور على الاجانب عشان بيدفعوا فلوس: مش بس انت اللي ح تخسر احنا كمان ح نخسر
ما تخسر يا سيدي، ما تخسروا كلكوا الناس بتخسر ارواحها في العبارات والقطارات وتحت الصخور
i cannot walk freely in this country anymore
في ستين داهية يا مزة...غوري من هنا وشوفي لك كانتري تانية تكون محترمة عشان احنا ناس مهزئين لما نسمح لجربوعة زيك تزعق لشعب بحاله في التلفزيون وتلاقيكي في بلدكوا بتشتغلي استغفر الله العظيم....وللا هي الخواجاية عندها كرامة واحنا اللي ما عندناش
ده غير بقى الضرايب تقليبك اولا لا وببجاحة يقولوا لنا اخدنا ضرايبكوا بنينا بيها انفاق وكباري
يعني لما كنا بنقول حكومة الكباري ما كناش بنتريق بقى، هم نفسهم واخدين استراتيجية الكباري في كل سياساتهم
واحنا اكبر كوبري في البلد

واجلب أموالاً إلى حملتها الانتخابية باسم المسيح..وايه يعني؟

انا مش شايفة في الموقف ده حاجة يعني. جرا ايه لما اخدت بركة؟ وبعدين هم ليه كاتبين مشعوذ وهو مش مشعوذ هو قس. وفيها ايه لما قال وهو بيباركها "واجلب اموالا الى حملتها الانتخابية باسم المسيح"؟ بصوا يعني هو صحيح تركيب الجملة يضحك شوية، يعني المسيح اللي عاش فقير وزاهد وقال الاغنيا دخولهم للجنة زي دخول الجمل من خرم الابرة، يتجلب اموال لحملة انتخابية باسمه من شركات متعددة الجنسيات بتتاجر في كل حاجة والبني ادمين على رأس تجارة الشركات متعددة الجنسيات؟ هههههههه، ناقص يقول: ونغنغنا كده يارب، واسترها معانا، ح يسترها مع اتنين قتالين قتلا ازاي؟ بس هو بيدعي لها يعني وانا مش شايفة انها غلطت في حاجة لما اخدت بركة من رجل دين يعني
ليه عاملين الموضوع نكتة؟ وعمالين يقولوا الجمهوريين محطوطين في موقف محرج وموقف عبود؟ هو ده يحرج الجمهوريين وانها تدفع رشاوي وتستغل سلطاتها وجوزها حرامي ما يحرجش الجمهوريين؟ وانها تقول ان حرب العراق هي امر الهي؟ يعني ربنا هو اللي قال لهم بنفسه موتوا الناس بالقنابل العنقودية والاسلحة البيولوجية واعملوا حرب اهلية ولوثوا البيئة والمية وامرضوا الناس؟ ده عايز يدخلهم النار من اوسع ابوابها بقى
واكتر من كده، ما يحرجش الجمهوريين ان الست المتدينة دي اللي نور التقوى والايمان بيشع من قفاها، مشيها قفاها، حرامية ومرتشية ومستغلة للسلطة وبنتها لامؤاخذة حامل؟ ازاي كده وازاي كده يعني؟
يعني هي ما تعرفش من ربنا حاجة غير تموت الناس؟ بتشتغل عزرائيل بعد الضهر يعني؟
طيب الناس عادة بتقول، اهو برضه اللي بيعرف ربنا لما يغلط تقدر تقول له اتقي الله يقوم يخاف، ودي الحقيقة متجربة يعني مع ناس، طيب دي الواحد ينفع يقول لها اتقي الله مدام انت ست كده بتعرفي ربنا ورايحة تاخدي بركة وانت حرامية يا حرامية، يا حرامية، يا حرامية، وجوزك حرامي، وبنتك باسم الله ما شاء الله على التربية والاخلاق، ورايحة تاخدي بركة يعني هو ربنا يعني..استغفر الله العظيم انتوا ح تخرجوني عن شعوري ليه؟ هو ربنا بينضحك عليه والعياذ بالله؟ لو الحكاية للاستهلاك المحلي واللعب على مشاعر الناس يبقى ياريت، والله لو كده ح اعذرها، على الاقل افهم وجهة نظرها، المصيبة انها تبقى فاكرة نفسها بجد من اولياء الله الصالحين

أخخخخخ امي اتعلمت الكمبيوتر

والنت، وبقينا يا عم كمبيوترايزد قوي، وتكلمني عن ناس تقول لي: انا عملت لهم ديليت من حياتي
وتقول لي: انا كنت متضايقة النهاردة...عملت سيرش في دماغي عشان اعرف ايه اللي مضايقني بالظبط
ومش ناقص غير ادخل عليها الاقيها بتعمل شات بالمايك والكاميرا مع واحدة صاحبتها تبقى متعلمة الكمبيوتر جديد برضه
مش دي المشكلة، المشكلة انها حطت التهييس في الفيفرتس وكل شوية تدخل عندي. اممممممممم انا قلت لكوا اني ما كنتش باقريها المدونة والاقيها جاية تقول لي فيه ناس بتقول لي انك كتبت كذا. وبرضه اللي يسمع غير اللي يشوف
كل شوية داخلة على المدونة وجاية تتخانق معايا لان اللي على المدونة بيحطم يا عيني تصورها عني، انا عندها في البيت ملاك ينقصه الجناحين، وهادية وساكتة، لقيتها جاية بتقول لي: اتاريكي قاعدة خرسا طول النهار ما انت نازلة رغي على النت
اخر حاجة بقى لقيتها زعلانة قوي وبتقول لي: انت ايه اللي بتقوليه على المصريين ده؟ ده مش المصريين دول بتوع الرز في الطبق الغويط والمعلقة، دول الغجر بس...هو لازم الواحد يبقى غجري عشان يبقى مصري؟
وطبعا ده فتح ما بينا حوار بكيزة وزغلول المتكرر والمعتاد اللي مش باحب افتحه مع ماما عشان بينتهي زي مناقشات بكيزة وزغلول بالظبط: انت جربوعة حومارة...
وزغلول اللي هي انا تقعد تبرطم وتخاف بكيزة تسمعها
اييييييييييه
ايها الاخوة المواطنون اننا مع مدونتنا العزيزة المهيسة مقبلون على منحنى خطر وعلينا ان نتاكتف جميعا ...عشان ما انطردش من البيت
----
اه نسيت اسألكوا
هي ليلة القدر كانت واحد وعشرين وللا تلاتة وعشرين؟

Wednesday 24 September 2008

يحيا العدل يحيا العدل...سكنوا اسرتين

هم طردوا 120 اسرة في اسطبل عنتر، واستجابة لنداء الجماهير فقد تفضل جلالته ووافق على تسكين اسرتين في شقة 34 متر فيها حمام ومطبخ وكتر خيرهم على كده، باقي ال118 اسرة ان شاء الله ح يسكنوا
بس لما امشي في الجزمة الاول

هو انت ليه مش مصري يا حسني؟

انتوا مش ملاحظين الحكاية دي؟ الواحد مش حاسس انه مصري خالص
بجد يعني طلعنا وللا نزلنا عبد الناصر والسادات كانوا مصريين
مصريين يعني، بينكتوا، بيقولوا قفشات، عبد الناصر لما يتخانق مع حد يمسح بكرامة امه البلاط ويخلي اللي ما يشتري يتفرج ويضحك البشرية كلها عليه بما فيهم الشخص اللي بيتهزأ نفسه يلاقي نفسه بيضحك على روحه، وبيقول قاصاد، ولما يتغاظ من حد يعايره بامه، ولما دماغه تقفش تبقى قفشت خلاص ويغتت على مراته غتاتة صعيدي بمحبة وهي ما تبقاش متضايقة ما اعرفش ليه مع انه بيبقى بيغتت، عادي يعني راجل مصري غتت وست مصرية مبسوطة قوي ان جوزها غتت
السادات، مع انه كان عايش في دور اللورد وبيشرب بايب وبيقول ماي وايف ايز هاف انجيليييييش، بس كان بيبعت كحك وغريبة وعاشورا للجيران، لا مش وهو في مجلس قيادة الثورة، وهو في الرئاسة، مش عارفة بقى هل كانوا هم الاتنين (ناصر والسادات يعني) بيفتحوا باب البيت طول النهار عشان يعملوا تيار مع الشباك ويرشوا قدام الباب ويشربوا شاي بنعناع ساعة العصر ويوصوا في البيت ستاتهم يمسحوا كل جمعة بالجاز وللا لا؟
بس اكيد
اقصد يعني فيه حاجة في ناصر والسادات تحسسك انهم في البيت عندهم بيمسحوا بالجاز وبياكلوا كشري وبيفطروا شاي بلبن وطعمية وعلى الاكل العيلة كلها يشربوا في كوباية مية واحدة تلف على كل اللي قاعدين ياكلوا (يعععععععع ما اعرفش ليه بيعملوا كده ولما اقول لحد انا باقرف يزعل) اه بس لو كنت قلت لناصر والسادات انا باقرف اكيد كان حطني في السجن، وبيرشوا قدام البيت حتى لما غيروا العنوان وبقى بيتهم بيت الريس وشكلهم كده كانوا بياكلوا الرز في طبق الشوربة بالمعلقة زي بقية المصريين ويفرشوا تحت الاكل جرايد ويتكلموا في اللي ما يعرفوش فيه، ولازم يبقى على السفرة عيش حتى لو كل الاكل مكرونة ورز ولو مافيش عيش يبقى مافيش اكل
حتى مآخذي انا على عبد الناصر هي مآخذي على اي صعيدي يعني، خصوصا لما يبقى صعيدي اسكندراني
وغيظي من السادات زي غيظي من اي منوفي مافيهوش حاجة زيادة عنهم
اشمعنى حسني مبارك؟ ليه الواحد مش حاسس انه مصري؟ ولا ابنه، ولا مراته، ماحدش يقول لي مراته امها ويلش، طب ما جيهان اللي كانت بتتكلم بايديها وبالتشه كانت امها انجليزية يعني وما كانش ناقصها غير تتربع على الارض وتزغد المذيعة في ركبتها كل دقيقة ونص وهي بتتكلم وبين كل جملة وجملة تقول لها واخدة بالك؟
طب اشمعنى العيلة المالكة دي الواحد مش حاسس انهم مصريين، ولا حاسس انهم خواجات كمان، ولا عرب ولا عجم، ولا فلاحين ولا ترك، ولا شرقيين ولا غربيين
طب ايه؟ تقفيل صيني وللا ايه؟

في اسطبل عنتر تتجلى اسمى معاني الوحدة الوطنية

حامد مخلوف وام عماد هما حسن ومرقص اسطبل عنتر
حامد مخلوف شاف نفسه بينطرد من بيته والامن المركزي بيتهجموا عليه بالشوم قام طابب ميت
ام عماد اختلف في طريقة وفاتها، فيه ناس بتقول ازمة قلبية وناس بتقول اخدت شومة في راسها
حامد مخلوف مسلم وام عماد مسيحية
ونتقدم بخالص الشكر للامن المركزي الذي اثبت ان مصر مقبرة لكل المصريين
والغريبة الكل قاعد بيتفرج عليهم...طب ليه؟
يا بتوع المادة التانية...ام عماد مسيحية
يا ايتها النخبة العظيمة بتاعة الدولة المدنية...ام عماد مسيحية
يا منظمات اقباط المهجر اللي رامية راسها على كتف امريكا وهاتك يا عياط....ام عماد مسيحية
يا بتوع غضب ربنا....ام عماد مسيحية وحامد مخلوف مسلم...يبقى مين فيهم اللي غلطان
اكيد البوذيين
الا سيد درويش لما قال: كلنا جميعا للوطن ضحية...كان يقصد ايه؟ دي نبوءة دي؟ بيقولوا الفنانين ربنا بيديهم بعد نظر انتاجهم الفني دايما فيه نبوءات، هو طبعا كان يقصد يقول كلنا نضحي للوطن، بمزاجنا يعني، بس بمزاجنا وللا مش بمزاجنا كلنا جميعا للوطن ضحية
مصرنا وطنا
حزنها سكنا
كلنا جميعا
لمبارك ضحية
نجمع صليبنا ويا هلالنا
في شومتك انت يا داخلية


اتنين ماتوا والامن بيزيل بيوت تانية في اسطبل عنتر

انا لسة صاحية على الاخبار اللي تشرح دي، جات لي رسالة بتقول لي اتنين ماتوا في اسطبل عنتر واتنين جالهم جلطة. اتصلت وعرفت ان الاتنين اللي ماتوا، ماتوا بسبب الصدمة، جات لهم سكتة قلبية وهم بينطردوا من البيوت وبينضربوا وماتوا
دلوقت مواطن بيقول ثورة جياع ح تيجي، بتوع اسطبل عنتر غلابة قوي، لا ح يعرفوا يعملوا ثورة جياع ولا نيلة، اذا كان بتوع الدويقة اللي كانوا مطلعين عليهم انهم انسان الغاب طويل الناب طلعوا اهم اغلب من الغلب وبينطردوا من الشارع
فيه بعض الاسر رجعت اسطبل عنتر امبارح من ستة اكتوبر، وقاعدين بيحكوا على البهدلة اللي شافوها والضرب اللي انضربوه
ومش عارفة ح يقعدوا فين؟ اذا بيوتهم في اسطبل عنتر اتزالت طيب ح يفضلوا كده في الشارع؟
ماحد من الاعلام يروح يا اخوانا يصور، اسطبل عنتر اخر شارع السعادة

عاجل: الامن المركزي يحاوط الاعلام ويمنعهم من تصوير مأساة اسطبل عنتر


تحديث هام:
جات لي الرسالة دي على الموبايل:
كارثة: نساء واطفال، 120 اسرة الآن بصحراء مدينة 6 اكتوبر. الامن المركزي ازال بيوتهم الصبح بالقوة في منطقة اسطبل عنتر، بكرة ح يهدوا بيوت اخرى، ومنتظر عنف ضد الاهالي من الامن بعد اللي حصل النهاردة. دلوقتي الناس بجةت نة نفيش فير الاكشاء الخشية المؤقتة المخصصة لمبيت عال لا يوجد بها مياه ولا كهرباء ولا صرف ولا تصلح لسكن الاسر والاهالي ثائرة والامن يحيطهم ومانع الدخول والخروج حتى ولو لشراء دواء.
---------
والنبي بلاش الكلام بتاع ماهم اصلا كانوا ساكنين في عشش، طيب خلاص كانوا يسيبوهم في العشش. الانسان عنده كرامة، وهم انسان بالمناسبة يعني شفتوا المفاجأة؟ وتصوروا...والله العظيم بيحسوا وبيفهموا زي اي بني ادمين....آه والله العظيم يعني
-------
دلوقت حالا في مدينة اوراسكم في ستة اكتوبر الناس واقفة وخايفة تنزل حاجتها لانهم مش عايزين يقعدوا في الاود دي، اود لا فيها مية ولا كهربا ولا حمامات وسقفها خشب والاعلام بيحاول يصور راح الامن المركزي محاوطهم من كل ناحية واخد الافلام من الناس

انتحار احد ابناء اس او اس لبلوغه السن القانوني

لسة ميار صاحبتي مكلماني دلوقت
الولد قصته زي قصة مئات غيره، بل الاف، ابناء المؤسسات لما بيوصلوا لسن قانوني بيبقى عادة 18 سنة، بيمشوهم من المؤسسة، ده بالنوسبة للمؤسسات الحكومية، المؤسسات الاهلية بيمشوهم 12، 13 سنة ويودوهم للحاكومة، كده....باي مع السلامة، لا بيجيبوا له شقة، ولا شغل ولا اي حاجة، واحد طول عمره في مؤسسة مش بيخرج منها غير في رحلة مع اصحابه والمشرفين، فجأتن يلاقي نفسه في الشارع وهو عنده 18 سنة. مين فين ليه؟ ماحدش يعرف
الولد ده في اس او اس، يعني جمعية كويسة بتعامل الناس كويس، هو عرف انه بلغ 13 سنة وانهم ح يودوه مؤسسة حكومية، وما ادراك بقى مؤسسة حكومية، يعني بالصلاة ع النبي ضرب وتعذيب واغتصاب وتسريح بمخدرات ومسروقات وخلافه
قعد يعيط ويستنجد ولا من مجيب، راح شانق نفسه
الله يرحمه

Tuesday 23 September 2008

عاجل: الحكومة بتنصب على سكان اسطبل عنتر اللي طردتهم

النهاردة الشرطة راحوا اسطبل عنتر عند مسجد الرشاد في آخر شارع السعادة (انا مش عارفة فين السعادة دي) ولحد آخر الجبل، (نهاية اسطبل عنتر وبداية دار السلام) واخلوا الناس بالعافية، 120 اسرة، واللي ما رضيش يخرج ضربوه بالشوم، ولما جات صحفية من الدستور اسمها سوسن تصورهم وهم بينضربوا منعوها، وبعدين قالوا لهم روحوا ستة اكتوبر لمساكن اوراسكم ح تلاقوا ناس يسلموكوا الوحدات وقالوا لهم الوحدات اودتين وصالة وحمام
الاهالي على امل تسلم الوحدات راحوا في عربيات نقل على حسابهم ووصلوا مدينة ستة لمساكن اوراسكم امام مدينة الانتاج الاعلامي لقوا الوحدات كالآتي:
كل اسرة لها غرفة 42 متر، مافيهاش حمام، السقف خشب، ومافيش مية. العربيات بتروح تملا جراكن مية.
ما يسمى بالوحدات دي، هي استراحات العمال اللي كانوا بيشتغلوا في المشروع، وبعد ما المشروع خلص رموها في وش الناس
مش بس كده
لما الناس اعترضت قالوا لهم اشربوا من البحر، عاجبكوا على كده عاجبكوا مش عاجبكوا اخبطوا راسكوا في الحيط، عايزين شقق اشتغلوا عشان تجيبوا الشقق
انا مش قادرة اتكلم على فكرة
مش عارفة اقول ايه

مثلت في الذكرى هواك وفي الكرى

Monday 22 September 2008

آه والله

هو بهيج بيكتب روايات؟

اصلي لقيت رواية اسمها تيس عزازيل في مكة، قربت اخلصها لانها قصيرة، مكتوبة باسلوب بهيج بالظبط بالظبط بالظبط. اكيد هو اللي كاتبها، سبحان الله، يخلق من بهيج يوتا
--
جيت على الربع الاخير وزهقت قوي...هي فين الرواية؟ ده واحد قاعد على الشيزلونج بيحكي كوابيسه وضلالاته
شفيتم يا حاج يوتا...على فكرة صعب عليا، ياللا ربنا يشفيه

Sunday 21 September 2008

خلي مبارك ينفعك يوم القيامة يا عبده مباشر

ينفع كده يعني؟:

الخروج علي الحاكم وعواقبه
بقلم‏:‏ عبده مباشر


اختلف بعض أنصار سيدنا علي بن أبي طالب ـ رضي الله عنه ـ معه حول مجريات الصراع مع معاوية والي الشام‏,‏ ونادوا بالحاكمية‏,‏ أي بالحكم لله‏,‏ وخرجوا عليه‏,‏ فكان رد الخليفة أمير المؤمنين بالغ الدقة والشمول والعمق‏,‏ حيث قال‏:‏ كلمة حق يراد بها باطل‏.‏ وقرر الخوارج قتل كل من سيدنا علي ومعاوية وعمرو بن العاص‏,‏ ولم يتمكنوا سوي من قتل أمير المؤمنين‏,‏ قتله عبدالرحمن بن ملجم وهو خارج لصلاة الفجر‏.‏ وكانت النتيجة استقرار معاوية علي قمة الخلافة الإسلامية‏,‏ وانفراد عمرو بن العاص بحكم مصر‏,‏ الجوهرة التي تطلع للفوز بها من وراء تحالفه مع معاوية‏,‏ ثم تمكن معاوية من تحويل الخلافة إلي ملك يخلفه فيه أولاده ومن يأتي بعدهم من أسرته‏.‏ وفي ظل سلطة معاوية لم يعد بيت المال‏,‏ بيت مال المسلمين‏,‏ بل بيت مال الخليفة‏,‏ يستخدمه كما يشاء لتحقيق أهدافه‏,‏ أما الخوارج فقد طوردوا‏,‏ وأعمل فيهم البيت الأموي السيوف وقتلوا منهم ما لا يمكن إحصاؤه‏,‏ وانتهي الأمر بهم إلي الخروج من التاريخ‏.‏ فهل كانت تلك النتيجة هي التي تطلعوا إليها؟

أبدا‏..‏ لقد تصوروا أنهم أفقه من الإمام علي‏,‏ وأكثر حرصا علي شريعة الله من ابن عم رسول الله وزوج ابنته وأول من أسلم من الشباب‏,‏ وأنهم الأكفأ والأقدر علي إحقاق الحق‏,‏ والحكم بما أنزل الله‏,‏ لذا قرروا الخروج عليه‏,‏ ولم يحصدوا من وراء هذا الخروج سوي نشر وتعميق الفتنة‏,‏ وشق صفوف المسلمين‏,‏ وإسالة الدماء بغزارة‏,‏ وهذه الفتنة لم يبرأ منها العالم الإسلامي حتي الآن‏,‏ ولم يستفد من خروجهم‏,‏ ونجاحهم في قتل سيدنا علي رضي الله عنه‏,‏ سوي معاوية بن أبي سفيان‏.‏ ويتكرر مشهد الخروج علي الخلافة‏,‏ عندما يقرر الحسين بن علي الخروج علي يزيد بن معاوية‏.‏ وكان معاوية قد ألزم الناس بمبايعة ابنه يزيد في حياته‏,‏ إن بالسيف‏,‏ أو بالمال‏,‏ وعندما مات معاوية بايع المسلمون يزيدا‏,‏ ولكن نفرا من المسلمين رفضوا مبايعته وفي مقدمتهم الحسين بن علي‏.‏ وقرر ابن بنت رسول الله التوجه إلي الكوفة لينال بيعة أهل العراق‏,‏ ولكنه فوجئ بالخذلان‏,‏ وفي كربلاء سالت دماء آل بيت الحسين الذين خرجوا معه‏,‏ وقتل الحسين بعد أن حالوا بينه وبين الماء هو وأهله‏,‏ ثم قطعوا رأسه وحملوها إلي يزيد‏.‏ لقد قرر الحسين الخروج علي الخليفة دون أن يتحسب أو يحسب للموقف حسابه‏,‏ ولم يستجب لنصيحة الناصحين وهم كثر في مقدمتهم شقيقه الحسن وابن عباس‏,‏ فماذا جري؟

لقد تمكن منه جنود يزيد‏,‏ وانتهي الأمر بقطع رأسه‏.‏ ولم يستطع الحسين أن يتبين قبل أن يخرج علي الحاكم أن الأمر ليس نزهة‏,‏ وأنه لا يملك القوة التي تساعده علي مناوأة الحاكم‏,‏ وأنه لا يمكن الوثوق بالوعود التي قطعت له‏,‏ إذا ما كانت السيوف والأموال تؤدي وظيفتها لمصلحة الحاكم‏,‏ فيتزايد أنصاره في حين ينفض الناس عمن خرج عليه‏.‏ وسرعان ما يقرر عبدالله بن الزبير الخروج علي الخليفة دون أن يستفد من درس الحسين‏,‏ فتتقدم جيوش السلطة‏,‏ أي جيوش الحاكم وتقتحم عليه مكة‏,‏ ولا يكتفي القائد بالتمثيل بجثة ابن الزبير‏,‏ بل وينتهك حرمة بيت الله‏.‏

هذه الدروس الثلاثة يعرفها الناس‏,‏ ومع ذلك يتكرر خروج البعض علي الحكام دون أن يتعمقوا في فهم ما جري‏,‏ ودون أن يدركوا أنهم لن يحققوا من وراء هذا الخروج أي خير‏,‏ فالحاكم يملك القوة‏,‏ والإمكانات والحرص علي الاحتفاظ بالسلطة‏,‏ ومن حوله قوي أكثر حرصا علي بقائه إن طمعا أو خوفا من التغيير أو من القوي الخارجة عليه‏,‏ وإذا لم تتوافر للخارجين علي الحاكم قوي وإمكانات وقدرة علي الاستمرار في الصراع فإن الخروج ليس أكثر من عملية انتحار‏.‏

وأول منظر أو مفكر معاصر طرح آراءه حول هذه القضية هو سيد قطب‏,‏ وقد انتهي علي حبل المشنقة‏,‏ أما الثاني فهو شكري مصطفي‏,‏ ولم يختلف مصيره عن مصير سيد قطب‏,‏ وإن صحب معه كثيرا ممن آمنوا بفكره‏,‏ وكان الثالث صالح سرية قائد انقلاب الكلية الفنية العسكرية‏,‏ وبعد الفشل المتوقع لمثل هذه العملية الساذجة‏,‏ التقي ونفر من جماعته بملك الموت‏.‏

وتعددت الجماعات التي أعلنت الخروج علي الحاكم‏,‏ ولم تتغير النتيجة‏,‏ انتحار جماعي‏,‏ وتغييب للآلاف خلف أسوار السجون والمعتقلات‏.‏

هذا بالنسبة للخارجين في مصر‏,‏ أما بالنسبة للخارجين علي الحكام في العالم العربي‏,‏ ففي مقدمتهم الخارجون علي السلطة بالجزائر‏,‏ وتوضح أرقام الضحايا أنهم في المقدمة‏,‏ فقد ذبحوا وقتلوا عشرات الآلاف من الأبرياء‏,‏ وسقط منهم عشرات الآلاف‏,‏ ولم تتغير النتيجة‏..‏ انتحار جماعي للخارجين علي الحاكم‏,‏ ومن بعدهم من خرجوا علي حكام المملكة السعودية‏,‏ بدءا من جهيمان العتيبي حتي المجموعات الحالية‏,‏ وكل هؤلاء لم يتورعوا عن انتهاك حرمة الكعبة ومدينة مكة‏.‏

هذا بالنسبة للجماعات التي قررت الخروج‏,‏ أما بالنسبة للإسلام والمسلمين والأوطان‏,‏ فإن النتيجة شديدة الوضوح‏,‏ لقد نجحوا في تشويه صورة الإسلام‏,‏ ودفعوا السلطات إلي تبني سياسة تجفيف المنابع‏,‏ بما يعني الحد من التعليم الديني‏,‏ والتضييق علي الجميع‏,‏ والسيطرة علي المساجد والدعاة‏,‏ ووضع الكثيرين تحت رقابة صارمة‏,‏ أما بالنسبة للمسلمين فقد سالت الدماء بأيدي مسلمين آخرين في اقتتال بلا جدوي‏,‏ وبلا عائد‏,‏ وسادت الفتنة‏,‏ وانتشرت الشكوك والمخاوف‏,‏ وتراجعت القضايا الدينية‏,‏ خاصة قضايا التطوير والتحديث الفكري‏,‏ والعمل علي مواكبة الفكر الإسلامي للعصر‏,‏ وبعد أحداث‏11‏ سبتمبر حوصر الإسلام والمسلمين بالاتهامات‏,‏ ووضع الجميع في موقف الدفاع‏,‏ وبدأ العالم حربا ضد الإرهاب قضت علي نظام طالبان‏,‏ وأدت إلي احتلال العراق‏,‏ وتزايدت الضغوط علي إيران وسوريا‏.‏

وعندما يسأل المخلصون من أبناء الأوطان التي تعرضت وعاشت هذه المأساة أو تلك المآسي‏,‏ عن الجدوي من وراء ما جري؟ ومن الذي استفاد؟ ستكون الإجابة شديدة الإيلام‏,‏ فالخاسر الأكبر هو جموع المسلمين‏,‏ والأوطان‏,‏ ثم هذه الجماعات التي فقدت عشرات الآلاف من أعضائها‏,‏ أما المستفيد أو المستفيدون فهم الأعداء‏,‏ أيا كانت الأسماء أو المسميات‏.‏

وإذا كانت هناك جماعات قد استعادت وعيها وتراجعت عن فكر ومنطق وأسلوب الخروج المسلح علي السلطة‏,‏ وتبنت منطق الصلح مع النظام باعتباره خيرا‏,‏ ودونت فكرها ومنطقها الجديد الذي أكد فساد فكرة الحاكمية‏,‏ ومنطق تكفير الحاكم أو النظام أو الشعب في مجموعة كتب صدرت تباعا‏,‏ فإن ذلك مؤشر واضح علي مدي نضج هؤلاء الناس‏,‏ ووضوح رؤيتهم‏,‏ وحسن استفادتهم من الدروس التي كشفت عنها سنوات الصراع الدامي‏,‏ وقد استند أصحاب الفكر والمنظرون في تراجعهم إلي أسانيد من القرآن والسنة والتاريخ للرد علي فكرة الحاكمية‏.‏

ويظل السؤال‏:‏ وهل سيؤدي ذلك إلي توقف توالد الجماعات الساعية للخروج علي النظم الحاكمة والحكام؟ وهل هناك أمل في توقف الموجات الإرهابية أيا كانت الرايات الإسلامية التي ترفعها‏,‏ أو الفكر الذي تستند إليه؟

وبصورة أخري‏..‏ هل سيتوقف المسلمون عن قتل المسلمين‏,‏ وتخريب أوطانهم‏,‏ وتبديد قدراتهم علي إعادة البناء‏,‏ وتجاوز ما هم فيه من تخلف وانهيار؟
---------
ينفع كده؟ يعني عشان يقول لنا ما تخرجوش على مبارك يطلع الحسين ابن علي وعبد الله بن الزبير اعضاء في جماعة محظورة؟
ولما اشتم في النخبة يزعلوا مني؟
ثم نصيحة الحسن للحسين دي كانت امتى؟ الحسن مات قبل ثورة الحسين، اتقتل، اتقتل مسموم مع انه ما ثارش وقال نحقن دماء المسلمين وانا متنازل عن حقي
يعني ده اتقتل وده اتقتل
والناس المردوم عليها تحت الانقاض وجالهم وباء ومنين ما يروحوا ينطردوا كأنهم حشرات دول كانوا ثاروا على مين وللا خرجوا على الحاكم امتى؟ وللا يعرفوا الحاكم اصلا؟ ده غادة كمان فكرتني بالست اللي في اسطبل عنتر اللي كانت فاكرة ان الرئيس هو جمال عبد الناصر! وده طالع يقول لنا الخروج على الحاكم ما منوش فايدة وفي رمضان وفي الايام المفترجة دي هان عليه يطلع من ايده يشهد ضد الامام الحسين سبط الرسول وسيدنا عبد الله بن الزبير الصحابي ابن الصحابي والصحابية وحفيد الصحابي، يعني هو بيفهم والاتنين اللي رباية الرسول ما بيفهموش
وقبل كده واحد كتب يقول ايه حكاية ابو ذر ابو ذر...ابو ذر ده كان قاطع طريق، وواحد يقول لي: عمر غلطان انه ما قطعش ايد السارق في عام الرمادة الجوع مش عذر للسرقة
طيب باقي مين؟ باقي سيدنا محمد بقى نفسه...هو كمان بقى غلطان عشان ثار على النظام الاجتماعي في مكة مع ان الناس كانوا زي السكرة وامرا وقالوا له لك يوم ولنا يوم، وابعد عن العبيد بتوعنا ما تحرضهمش علينا وهو ابدا مصمم، لا وايه..استنوا كمان، وغزوة بدر دي حرب اهلية كمان، وسيدنا محمد كمان اشعل الحرب الاهلية وزعزع الامن العام وهذا ليس من الاسلام في شيء
هئ هئ هئ هئ

حقة تخيلوا لو واحد طلع يقول لنا كده، ويطلع سيدنا محمد كمان تصرفاته ليست من الاسلام في شيء
كررررررررررررر انا اسفة انا اسفة انا عارفة ان الكلام ينقط بس مش قادرة امسك نفسي من الضحك
يالهوي لو حاجة زي دي حصلت...معقول؟ والله ليه لا؟ لو سيدنا الحسين خارج عن السلطة وارعن ومش بيحسب حسابات وما كسبش حاجة واهي راسه اتقطعت زي ما بيقول عبده مباشر
يبقى ليه سيدنا محمد كمان ما يطلعش كده، وما كسبش حاجة برضه ومات ودرعه مرهون عند يهودي عشان يجيب اكل للبيت
انا مش قلت ربنا بيحبس الشياطين في رمضان عشان يعرفنا ان فيه بني ادمين الشياطين يقولوا لهم يا اونكل؟
ايه توقيت السفسطة دي دلوقت والناس مرمية في الشارع؟ هو لو كان مرمي في الشارع كان قال الكلام ده؟ كل ده عشان ماحدش يتكلم عن مبارك؟ طب خليه ينفعه بقى يوم القيامة، وللا ينفع نفسه حتى
اجازة ايه بقى
الاجازة في الازازة

عاجل: الامن المركزي يزيل اماكن في اسطبل عنتر ويطرد الاهالي

جاني اتصال دلوقت وعرفت منه ان الامن المركزي دلوقت حالا بيزيل منطقة العزبة القبلية والعزبة البحرية والعرب في عشوائيات اسطبل عنتر، وبيطرد الاهالي وبيقول انه ح يسكنهم في خيم، واللي اتصل بيا بيقول ان نواب مجلس الشعب عن المنطقة دي واقفين بيقولوا لهم مش ح تخرجوهم غير بشقق
-------
بالنسبة للدويقة مالك باعت على التويتر بيقول ان اكتر من 120 طفل مصابون بمرض غريب صنفه الاطباء على انه وباء، وهم مستنيين يعرفوا اسم الدوا اللي كتبه الاطباء عشان ينزلوه واللي عنده امكانية انه يتبرع بالدواء يجيبه عيني مش مادي ولسة ح اعرف لكوا مين اللي ح يتسلم الدوا
ان شاء الله بعد الفطار اكون عرفت اسم الدوا ومين اللي ح ياخده من اللي عايز يتبرع بالدواء، تاني باكرر ماحدش بياخد فلوس

Saturday 20 September 2008

الاجازة مش داخل فيها الدويقة

ملحوسة: الافتراض السابق طلع خاطئ القرين مش معانا على الجايكو ولا حاجة
نعتذر لهذا العسر الهضمي
---------
احنا اتفقنا اني مريحة شوية فيما عدا ما يخص الدويقة، اهالي الدويقة يعاودون الاعتصام مرة اخرى امام المحافظة اليوم بعد المغرب الخبر من عند
مالك

ومدام الواحد دخل بقى يبقى بالمناسبة السعيدة دي شوفوا الخبر ده وما يحدث في الدنمارك بلد حرية الابداع وسب اديان الناس والمشي في الشوارع توبليس

وبعدين شوفوا ده عند ابي، وده عند قطة، طيب انا وقطة لينا اعداء ابي ليها اعداء كمان؟ طب دي حتى ابي امبارح تلبستها روح عم مدبولي وقعدت تقول لقناوي: قوم يا قناوي انا جبت لك المهر في جيبي اهو، قوم البس بدلة الفرح، بس هو جري بقى وما ركبش الاسعاف
عموما انا عارفة من زمان ان مستشفى العباسية بتسرب المرضى
بس ما كنتش اعرف انهم بيزودوهم بلاب توب وهم ماشيين
يا اخوانا مافيش حد هاكر ابن حلال كده يجيب الاي بي ادرس ويدخل على جهازه يلغمهوله على الله ينفجر فيه؟
احنا اتأكدنا امبارح ان قرين ابي هو قريني بس لسة ح نشوف بقى هل هو نفسه قرين قطة وللا لا
يا ماااااااااااااااااااااالك يا جاااااااااااااااااااااااااااابر يا احمد يا غربية انتوا مش باشمهندزين قد الدنيا ما تشوفوا لنا الموضوع ده

Friday 19 September 2008

العشرة الايام الاخيرة

مضطرة اقطع الاجازة عشان اقول كلمة واحدة
العشرة ايام الاخيرة في رمضان جات، لو حد اذاني انا مسامحاه، ولو اذيت حد انا باستسمح الكل

Thursday 18 September 2008

بمناسبة الاجازة اللي واخداها

من هنا لحد ما ارجع من الاجازة من المدونة انا شخصيا ح افكر في كام حاجة واللي عايز يفكر هو كمان يفكر:
ح افكر ان عندي سقف وغيري لا
ح افكر ان باكل وغيري لا
ح افكر ان عندي كهربا وغيري لا
ح افكر ان عندي مية وصرف صحي وغيري لا
ح افكر ان في امان الحمد لله وغيري لا
ح افكر ان عندي شغل وغيري لا
ح افكر ان عندي صحة وغيري لا
واني لو عييت ح الاقي اتعالج وغيري لا
ح افكر اني باقول الحمد لله عشان فعلا انا في نعمة وغيري بيقول الحمد لله على البلا
ح افكر اني مش احسن من غيري دول في حاجة عشان هم يعيشوا كده وانا اعيش كده
وح افكر في ان اللقمة تنزل لي بالسم الهاري لو استطعمتها وهم نايمين في الشارع
وح احط ايدي على خدي: ربنا ح يعمل فيا ايه عشان انا سايبة الناس دي كده عشان انا مكسلة وللا مشغولة وللا مش هاممني احس بغيري وللا خايفة من الحكومة؟
يا ترى ح يعمل فيا ايه؟

ح افكر في منولوج شكوكو: ليلي طال ليلي طال...وليله لأ وليله لأ وليله لأ
دمتم بخير

براءة ان شاء الله

طب وايه لزوم التأجيل يعني ما براءة ان شاء الله، وح يطلع الاغذية كويسة ومرضى السرطان هم اللي ما عرفوش ياكلوا، كانوا بيمضغوا بطريقة غير صحية جابت لهم سرطان
معروفة دي وخير الشر عاجله يعني
---
على فكرة مالك النهاردة بعت على الجايكو ان 25 اسرة من اهالي الدويقة قالوا لهم امكوا في العش وللا طارت قاموا عملوا اعتصام على مزلقان الدويقة
مش عارفة بقى ايه اللي حصل تاني
ومش شايفة اخبار جديدة على الجايكو ولا على هشام مبارك
على اي حال انا واخدة اجازة لظروف عوائلية في الفترة اللي جاية الا لو فيه حاجة قهرية بخصوص الدويقة

ولا كل من ركب الجمل جمال


بعد النجاح المنقطع الجماهير لبانرات طلب التنحي للسيد الرئيس، قام طفاطيفو بعمل بانرات للترحيب بولي العهد سماحة السيد جمال مبارك هدا الله سره مع خديجة واسعده وابعده
وبما ان جمال مبارك اسمه جمال، فاحنا كده ح يحكمنا جمال اس اتنين، مما يدفعك قسرا للمقارنة
لا يا اخي لا...مهما كان الكبير كبير والنص نص نص والصغير ح يركب على رقبتنا قريب
دي تبقى هفأت قوي
بقية البانرات اهي




انا هابلة

تصدقوا انا هابلة؟ مخ اللمبي على جسم رياض المنفلوطي
اللي بالي بالك بقى
لما باسمع اغنية وطنية باعيط زي الهابلة، لدرجة اني لما باسمع يبقى انت اكيد اكيد في مصر باعيط، وباعيط لما باسمع الى رحاب يثرب بتاعة فيلم الشيماء، وباعيط والطيارة طايرة من مطار مصر، وباعيط لما باشوف مصر من فوق وانا راجعة، وباعيط واحنا بنعمل لاندينج وباسقف زي العبيطة، وباعيط لما باسمع اغنية حلوة بلادي السمرا بلادي الحرة بلادي السمرا بلادي، وباعيط لما باسمع قرار تأميم قناة السويس وباعيط لما باسمع الاغنية دي

اخدتها من مدونة كويتية اتربت في اسكندرية وكاتبة بوست عن مصر وقعدت اعيط وانا باقرا البوست بتاعها
فيه معلق كويتي كاتب لها: انا ما اعرف انت وعالية شنو حبكم لمصر؟ من زينها؟
الترجمة: انا مش عارف انت وعالية بتحبوا مصر ليه؟ من حلاوتها؟
راحت رادة عليه: مصر التي في خاطري وفي فمي/ احبها من كل روحي ودمي...
مصر يا حلاتها
يا حلاة ناسها وخفة دمهم

حتى المترو بزحمته وعفسته حلو
حتى الشوارع الملوثة حلوة
حتى راعي التاكسي اللي يحن على راسك سوالفه حلوة

مكتباتها
جناينها
نيلها
الشعراء، الفن، الاغاني، الافلام، المسلسلات
النكت والأمثال الشعبية
حتى النصب ع السواح
والشعبطة في الباصات
والتكاسي اللي توصل مشوارين وثلاثة مع بعض
حلوة

ما راح أخلص....
----
انا شفت ردها ده رحت معيطة تالت عيطت جامد قوي طول ما انا باقرا ردها اعيط اعيط اعيط وانا بانقله اهو عمالة اعيط لما مش شايفة قدامي الحروف خالص لما الليلة كلها بقت عياط
انا الظاهر باحب مصر وللا ايه؟ مش باقول لكوا هابلة؟

هو انت ع التويتر

طب سيب التويتر وتعالى هنا
http://jaiku.com/
طبعا مالك هو اللي عرفني عليه انا كنت ح اعرف الحاجات دي منين؟ وتقدر بقى تشوف ازاي تفعل الموبايل بتاعط عليه من هنا
وبيشغل ام نبيل كمان، احسن من التويتر وبيوصل الرسايل اسرع

احذر المرضى النفسيين على الشبكة الالكترونية

فيه بعض الهاربين من مصحة امراض عقلية منتحلين اسمي واسم ابي واللي منتحل اسم ابي بيدخل يشتمني واللي منتحل اسمي بيدخل يشتم عند ابي
عموما خذوا حذركم يا شباب
اللي منتحل اسم ابي مش على الجوجل
واللي منتحل اسمي الفرق بيني وبينه اني انا
جبهة ت ت ت ت التهييس الشعبية
وهو جبهه هو هو هو هو التهييس الشعبية
انا بالتاء المربوطة وهو بالهاء المربوطة عشان بيهوهو
انا مش عارفة مين الناس الفاضية دي الحقيقة، طب انا مستفزة عادي، لكن ابي الغلبانة دي عملت ايه لاي حد عشان يعمل معاها كده؟

Wednesday 17 September 2008

وثائقي هام جدا ضروري تشوفوه

عاجل: حتى لا تتكر مأساة الدويقة

مشروع حلم أسطبل عنتر يحتاج إلى مساعدتكم في رمضان

حتى لاتتكرر حادثة الدويقة في اسطبل عنتر

تبنى المشروع أسس التنمية و التمكين ليستطيع سكان العشوائيات (مثل عزبة خير الله و اسطبل عنتر و التي بها مساكن تماثل حالة الدويقة) رفع مستوى معيشتهم و التحكم في زمام أمورهم

في عام 1999 بدأ الاهتمام بمنطقة اسطبل عنتر وعزبة خير الله العشوائية، وتمثل الاهتمام بالقيام بدارسة اجتماعية لحالة أهالي المنطقة، وعليه بدأ العمل الخيري بتقديم كفالات ومساعدات مالية وعينية لأهالي المنطقة، ثم بدأ المشروع يقدم قروض متناهية الصغر لدعم من يقدر على إقامة أي مشروع في المنطقة إلا أن معظم هذه المشروعات لم تنجح، فأجري المشروع المزيد من الدراسات على أهالي المنطقة فتبين أن 75% منهم باعة جائلين أو 'شيالين' وأنهم يفتقروا لأية مهارات أو حرف تؤهلهم للكسب الذي يكفل لهم عيشة كريمة. قرار، وترتب عليه أن قرر المشروع إقامة برنامج يؤهل أهالي المنطقة بتعليمهم حرفة أو مهنة يتكسبون منها إضافة إلى العمل على محو أميتهم.

في عام 2003 بدأ المشروع بإقامة مشغل للخياطة والتريكو لإنتاج الزي المدرسي لأولاد فقراء المنطقة و تطور المشغل و أدخلت الأشغال اليدوية و أصبح ينتج مختلف المنتجات ذات الجودة العالية، تلى ذلك سنوات من التدريب و مراقبة الجودة ,وقد نجح المشروع في غرس قيمه في المشاركين، فارتفع مستوى وعيهم واستشعروا بالخطر و أهمية الكسب الحلال والحصول على عيشة كريمة فتمكنوا من الإنتقال إلى مساكن آمنة بعيدة عن الخطر

ثم بدأ الحلم يتطور ويتوسع ليقدم مختلف المساعدات لأهالي أسطبل عنتر، ولكن وجدنا أنه مهما زادت التبرعات وكثرت لن تعدو أن تكون مساعدات خيرية قد تستمر وقد تنتهى ، لذلك تقرر تعليم أهالي المنطقة كيفية مساعدة أنفسهم عن طريق تعليمهم حرفة يمتهنونها وبدأنا بإقامة ورشة للتدريب على صناعة السجاد، ولكن نحتاج إلى مكان أكبر يستوعب أكبر عدد ممن يتخرجون من ورشة تعليم صناعة السجاد والمتسربين من التعليم حتي يجدوا مكانا للكسب العيش الشريف. وفي سيعنا لذلك نحن لا نخدم أهالي المنطقة فقط ولكن نخدم مصر بأكملها حيث يمكن أن تصبح المنطقة المكان الذي نعيد فيه إحياء الحرف اليدوية التي كادت تندثر في مصر.

ومن هنا نحن نناشدكم جميعا أن تعاونونا في جمع مبلغ 250,000 جنيه مصري وذلك لتمويل المشروعات الحالية بعضها قائم ولكن يحتاج إلى توسع والتطوير والتحديث حتي يؤتي أكله والمشروعات هي كالآتي

1- مدرسة الفصل الواحد للأطفال

2- مدرسة السجاد للأطفال

3- محو الأمية للسيدات

4- محو أمية للرجال

5-تربية دينيةو أخلاقية و تحفيظ قرآن

5- التأمين الصحي للأسرة

7- انشطة رياضية للأطفال و الشباب

8- أنشطة فنية للأطفال

9- نشاط المسرح (التنمية من خلال الفن)

10- برنامج شامل للتوعية

11- قروض لعمل مشروعات للرجال

وكما ترون أن المشروع لا يهتم فقط بالجانب الاقتصادي في المنطقة و لكن أيضا بالجانب التربوي حيث يسعى إلى توفير الترفيه جنبا إلى جانب التعليم والتدريب لأن ذلك سيساعد في تنشأة أطفال وفتيان المنطقة بشكل صحي وقويم ينأى بهم عن تعاطي المخدرات وارتكاب الجرائم

للإتصال غادة 0105470806

نيفين 0105215288

مشروع اسطبل عنتر 0189540193 العنوان 4 شارع الرماية اسطبل عنتر زهراء مصر القديمة



النخبة المصرية العزيزة: على رأي السعوديين قبح الله وجوهكم


الاخوة بتوع النخبة ونضال اخر زمن في الفضائيات ومعاهم الطبقة المتوسطة المغيبة الانانية اللي مش هامها حاجة غير انها تزعق للبواب عشان تثبت ان العين ما تعلاش عن الحاجب ارحموا ابونا بقى، قاعدين تتكلموا في
التمييز الديني لا مش التمييز الديني
احنا فراعنة لا احنا مش فراعنة
المادة التانية لا مش المادة التانية
الادان مزعج لا الادان مش مزعج
الشيعة كفرة لا مش الشيعة كفرة
الدولة المدنية لا مش الدولة المدنية
الليبرالية لا مش الليبرالية
ازمة الهوية لا مش ازمة الهوية
السجارة والمجارة
الفرح والمرح
العروسة والمروسة
القهوة والمهوة
برتستو ومرتوستو
كفاية بقى ومفاية بقى....قرفتونا ومرفتونا وصدعتونا ومدعتونا جك قلع عينكوا ومينكوا وكسر راسكوا وماسكو حلوا عنا ومنا واتوزعوا واتمزعوا خنقتونا ومنقتونا ارحمونا ومرحمونا
النخبة اللي بتقول على نفسها معارضة: داخلين مع بعض في معارك ما تهمش غيركوا وقاعدين تغنوا وتردوا على بعض وفوق البيعة كمان قرفانين مننا
الطبقة المتوسطة: قاعدين تحكموا على الناس اقول ايه بس؟ ربنا يدوقكوا اللي الناس فيه عشان تحسوا بيهم؟ موحولين في مشاكلكوا التافهة واللي هي اصلا طبقية كلها ومظهرية ومتركزة في انك مش عارف تدخل ابنك مدرسة بعشرتلاف جنيه عشان التعليم في مدارس الحكومة "لامم" وصعبان عليكوا روحكوا وانتوا واكلين ساكنين شاربين متعالجين...مالكوا فيه ايه؟ قاعدين تندبوا على روحكوا ليه: الطبقة المتوسطة في اضمحلال...ما تضمحلوا وللا تغوروا في داهية بقى
انا مافيش حد اتكلمت معاه من الطبقة المعفنة دي - الا قليل جدا - : الا وقال لي..ماهم اللي بلطجية هم اللي عاملين في نفسهم كده هم اللي مش عارف ايه...حرامية..شحاتين...بيبيعوا نفسهم..انا مش ممكن اتعاطف مع حرامي حتى لو جعان..يموت ولا انه يسرق
طبعا ماهو كرشه قدامه تلاتة متر يعني هو يعرف ايه عن الجوع
طب والحشرات دول؟

والصراصير دول؟
ما بتعبروهمش ليه؟
يفهموا ايه دول في ام ازمة الهوية اللي واكلة دماغكوا واكلتوا دماغنا بيها؟ ويهمهم ايه في اضمحلال الطبقة المتوسطة اللي مالهاش دور في حياتهم غير انها تقفل شباك العربية في وشهم لما يشحتوا منها في الاشارات بعد ما يقولوا لهم بقرف: ماتروح تشتغل؟


اسطبل عنتر والحجارة وعزبة خير الله مهددين انهم في خلال شوية صغيرين ح يبقوا زي الدويقة، وللا دول مش مهم؟
آه...ده انا نسيت، دول بلطجية ومبرشمين ومغضوب عليهم ولا الضالين آمين وهم اللي عاملين في نفسهم كده
ياريتهم كانوا بلطجية، على الاقل كانوا عرفوا ياخدوا حقهم من حبابي عينيكوا، على الاقل كانوا طلعوا عليكوا بالمطاوي وبجوكوا بجيج، ماهم لو بلطجية ماكانوش سابوا كل الكروش دي تتخن في البلد، ودلوقت بقت كل الناس شريفة وهم كمان اللي ولاد كلب ويستاهلوا اللي هم فيه
ده انتوا يوم ما اهتميتوا بيهم قلتوا عليهم عندهم زنا محارم، ويوم ما قررتوا تعملوا عليهم افلام طلعتوهم سفلة وكرهتوا الناس فيهم
اه..ماهم يتكرهوا صحيح
طبعا اكيد، ماهم سايبين التدريس في جامعة السربون والعيادات والمكاتب اللي فاتحاها الدولة ليهم بمرتبات خيالية وبيسربوا ولادهم من المدارس المجانية الشيك قوي وسايبين داماك ومدينتي والرحاب وسايبين دورهم السياسي النضالي الحضاري وقاعدين في العشوائيات يبلطجوا وينتخبوا الحزب الوطني بخمسين جنيه، "مع انهم شافوا اللي حصل في قلعة الكبش وما عملوش حاجة ليهم"
وساكتين على الظلم جاتهم القرف:
الا عمر ما واحد من سكان العشوائيات كتب مقال في جرنال الاهرام يشرح فيه معاناة اهله ومصممين يشتغلوا مع ممتاز القط ويتملقوا السلطة ويهتفوا بحياة الظالم
الا عمرهم ما عملوا حركة عشوائيون من اجل التغيير
عمرهم ما عملوا وقفة احتجاجية على سلم الخرابة ولا حتى عملوا ندوة فكرية بعنوان العمل السياسي بين العولمة في غياب المضمون والخيارات الايديولوجية للتيار الوطني فوق اي بلاعة مفتوحة وطافح منها المجاري
الا عمرهم ما حضروا محاضرة سياسية محترمة في قاعة جبل الزبالة اللي جنب السبع بنات ومصممين يحضروا حفلات تامر حسني
الا عمرهم ما حضروا حفلة واحدة لوجيه عزيز
ناس زبالة فعلا وتستاهل تموت
خلينا احنا نتكلم في المفيد: يا ترى عبد الله بن سبأ شخصية حقيقية وللا شخصية خيالية؟
هي دي الحملة اللي مفروض نتبناها