هي مالها او تي في؟

انا اصلي من ايام ما كنت في اولى ابتدائي وماما لما كانت تقول لي الفيلم اللي جاي في السهرة النهاردة مش ح نشوفه عشان قلة ادب، وتقطع صفحة احسان عبد القدوس من الاهرام (اه وانا في اولى ابتدائي ماما كانت بتخليني اقرا الاهرام) وتقول لي في وشي: انا قطعت صفحة احسان عبد القدوس عشان عيب، ههههههه لا وانا الهابلة كنت اسمع الكلام وما اشوفش الافلام دي ولا اقرا الصفحة دي وطبعا في اولى ابتدائي ما كانش حد من زمايلي بيجيب احسان عبد القدوس، ولما رحت اعدادي البنات اللي كانوا بيجيبوا احسان عبد القدوس ونزار قباني ما كنتش بارضى اكلمهم. من اياميها بقى وانا لما حد يقول لي الفيلم ده قلة ادب وللا الرواية قلة ادب مش بارضى اشوف الفيلم ولا اقرا الرواية، وما اتفرجتش على الريس عمر حرب ولا فيلم الخادمة حتى اللي كل الناس شافته عشان قلة ادب، ولا اي فيلم من افلام نادية الجنسي الا مهمة في تل ابيب، كنت في اعدادي وواحدة صاحبتي قالت لي: تعالي نصيع، وودتني مهمة في تل ابيب.
قوووووم فيه ناس قالوا لي ان او تي في قلة ادب، قمت انا ما اتفرجتش على او تي في بقى بما انها قلة ادب، خصوصا ان فيه بعض البانرات نشرت بانر: انا اشاهد او تي في. قال يعني تحدي وللا حاجة
قلت يبقى دي قلة ادب اكيد
لحد ما مرة واحدة صاحبتي كانت فاتحة الاو تي في في الشغل، ما لقتش فيها قلة ادب ولا حاجة
واتفرجت على كذا برنامج ولقيتها عادية يعني، مالها؟ مالها يعني الاو تي في عشان ناس تهاجمها او ناس تعمل لها بانرات؟ دي شبه نجوم اف ام بس على تلفزيون