Monday 31 August 2009

اليوم العاشر

الا باين ان "هامش" الحرية ده دايما بيبقى مصاحب للطغيان
الاستاذ فرعون كان مدي هامش حرية كبير قوي، يعني انا عمري ما شفت رئيس جمهورية يتناقش بنفسه وجها لوجه مع رئيس العمال مثلا وللا فلاح وللا اي ناس غلابة، حتى لما السادات كان بيحب يعمل "حوار" كان بيستنضف، مش اي حد يكلمه كده
بني اسرائيل دول كانوا عبيد، وسيدنا موسى بالنسبة لفرعون زعيم العبيد، وقال له حاجة شبه انت مين انت، وطبعا ما نسيش يعايره بانه لحم كتافه من خيره (امال يبقى مصري ازاي؟ ده احنا اللي بيشرب عندنا بق مية بنفضحه خمسين سنة قدام)
بس في النهاية اتكلم معاه يا ناس، اتكلم معاه بشخصه ونفسه وذات نفسه واخد وادا معاه في الكلام، بنفسه، ما سلطش عليه رئيس تحرير حيطة في معبد، لا وايه كمان؟ وقال له حدد المعاد اللي يعجبك، وقال للسحرة آمنتوا من غير ما تاخدوا اذن؟ يعني هو ده كل اللي فارق معاه؟ :) برضه الادب فضلوه عن العلم، ده فرعون الطاغية وربنا قال عليه علا في الارض وقال عليه طغى
ياااااااا، ده ربنا عامل كرامة للبشر والواحد له حقوق كتير وهو مش واخد باله
طب من لغاليغه ان ما كان اياميها فيه ناس بتقول: مش كفاية انه كلمه واتناقش معاه؟ مش كتر خيره انه ما دبحهوش هو والعبيد بتاعه؟ قليل الاصل اكل وشرب في قصر الراجل ولما شد حيله قلب عليه، ده في سن والده على الاقل يحترمه، عايزين يضربوا استقرار مصر، وراح مدين وشوه سمعة مصر، وهم اصلا جم عندنا واستضفناهم واكلناهم وشربناهم، وعاملين تنظيم سري عشان يقلبوا نظام الحكم
انا متأكدة، متأكدة ان كان فيه ناس بتقول كده، انا سامعاهم اهو
واكيد كمان بعد ما مات فرعون بتلاتين سنة لقى ناس تقول عليه كان راجل ديمقراطي وبعيد النظر وفضلوا ناصبين له معزى بعد موت بعشرميت سنة
ومتأكدة من نظرية جمال حمدان ان الفلسطينيين انثروبولجيا هم بني اسرائيل
امال احنا مستقصدينهم ليه يعني؟

Sunday 30 August 2009

اليوم التاسع

الدعاء ده انا باحبه، قريته في كتيب صغير كده وحفظته:
اللهم احرسني بعينك التي لا تنام، واكنفني بركنك الذي لا يرام، وارحمني بقدرتك علي، فلا أهلك وانت رجائي، فكم من نعمة انعمت بها علي قل لك عندها شكري، وكم من بلية ابتليتني بها قل لك عندها صبري، فيا من قل عند نعمته شكري فلم يمنعني، ويا من قل عند بليته صبري فلم يخذلني ويا من رآني على الخطايا فلم يفضحني، يا ذا المعروف الذي لا ينقضي ابدا، ويا ذا النعماء التي لا تحصى عددا، اسألك ان تصلي وتبارك على سيدنا محمد وعلى آله، وبك اللهم أدرأ في نحور الأعداء والجبارين، اللهم اعني على ديني بالدنيا، وعلى آخرتي بالتقوى، واحفظني اللهم فيما غبت عنه، ولا تكلني الى نفسي فيما حضرته، يا من لا تضره الذنوب، ولا تنقصه المغفرة، هب لي ما لا ينقصك واغفر لي مالا يضرك انك انت الوهاب، اللهم اني اسألك فرجا قريبا، وصبرا جميلا، ورزقا واسعا، واسألك العافية من كل بلية، وأسألك تمام العافية، وأسألك دوام العافية، وأسألك الشكر على العافية، وأسألك الغنى عن الناس، وأسألك السلامة من كل سوء في الدنيا والآخرة ولا حول ولا قوة الا بالله العلي العظيم
واللي بيشحتوا على المرضى والفقرا ح يجيلهم ويحط عليهم ان شاء الله عشان اصلا دول ما كانوش مفروض يبقوا موجودين
اللي سرطن الناس المفروض كان يبقى في السجن
واللي فقر الناس المفروض كان يبقى تحت القطر
يمرضوا الناس ويفقروهم وياكلوا على قفاهم عيش ويشحتوا عليهم وكمان عايشين لي في دور المحسنين عمار؟
حسبي الله ونعم الوكيل

Saturday 29 August 2009

حكمة اليوم الثامن

لو الواحد عرف يحط نفسه مكان اللي "بيعطف" عليهم مشاكل كتير ح تتحل
يعني هو مافيش وسيلة يعلنوا بيها عن الصدقة (والله حتى الجملة نفسها تضحك) غير انهم يهينوا الفقرا والمرضى ويشحتوا عليهم؟
ما الانسان يحس باحساس طفل مريض بيعرض مرضه في التلفزيون عشان يعمل دعاية ويعمل من فقره ومرضه فرجة
لو ده ابن، لا قدر الله، المخرج وللا حتى الدكاترة  والمتبرعين "العطوفين" كانوا عرضوهم كده؟
لو "المحسنين" لطشت معاهم ولبسوا مقطع زي الواد اللي بنشوفه في "اعلان الصدقة" كانوا رضيوا على نفسهم يطلعوا في التلفزيون بالمنظر ده؟
تفيد بايه هدومك المستعملة بعد ما تقلع الناس من كرامتهم؟
هو العيل اللي جايبينه في اعلان الصدقة ده بجد وللا ممثل؟ اصل شكله عنده انيميا فعلا

Friday 28 August 2009

حكمة اليوم السابع

مش مهم في الواحد العيوب اللي عارفها في نفسه، المهم العيوب اللي مش عارفها، والمصيبة في العيوب اللي هو فاكر في نفسه عكسها، ده يبقى حتة مقلب
أعمل ايه انا دلوقت؟

Thursday 27 August 2009

حكمة اليوم السادس

"من نازعك في دينك فنازعه ومن نازعك في دنياك فألقها في وجهه"
الامام علي
بس انا شايلة من واحدة اكلت الشيكولاتة بتاعتي من حوالي خمستاشر سنة، انا باتكلم بجد، اصلها كانت لوح شيكولاتة كبير قوي بالمكسرات واكلته كله من ورايا
اكيد لسة شايلة بدليل اني لسة فاكرة، شيكولاتة دي اكيد مش دين طبعا، ياللا بالهنا والشفا، ماهو ايام سيدنا علي ما كانش فيه شيكولاتة بالمكسرات، الا هم صحيح الاكل على ايامهم كان حاجة اي كلام خالص، ما كانش عندهم فرايتيز كتير، لهم حق يخسوا

Wednesday 26 August 2009

اليوم الخامس... سؤال

دلوقت في تفسير ابن كثير لما بيفسر: وإذ أخذ ربك من بني آدم... الآية. بيقول ان في عالم الارواح فيه ارواح بتخير تيجي الدنيا وللا ما تجيش وبيتعرض عليها حياتين وفقا لاختياراتهم هم الحياة اللي ح يعيشها لو اختار الشر والحياة اللي ح يعيشها لو اختار الخير وحتى بيستدل بالكلام ده بآية وهديناه النجدين. وبيعرض عليهم الامانة ومكافئتها والعقوبة واللي بيختار من عالم الارواح ويقبل ربنا بيبعته وبيستدل على كده بآية إنا عرضنا الأمانة..الآية
بجد؟
انا مش باكذب ابن كثير، انا باستفهم لاكون فاهمة غلط، هي من حيث المنطق تمشي لان الانسان هو المخلوق الوحيد اللي عنده حرية اختيار، بس بجد يعني مليارات البشر دول اختاروا البلوة دي؟ طب انا، وانا عارفة، طول عمري غبية وباخد قرارات غلط، فعادي يعني لما اتهور واقبل امانة وارجع اضرب نفسي بالجزمة، بس كل الاخوة الزملاء دول اختاروا زيي؟
الكلام ده صحيح كده وللا انا فاهمة غلط؟

Tuesday 25 August 2009

حكمة اليوم الرابع

"خذ العفو وأمر بالعرف وأعرض عن الجاهلين"
من واقع محاولاتي الفاشلة لمحاسبة نفسي اللي استمرت سبع ثواني ثم اقلعت عنها، عرفت قد ايه التأنيب والتوبيخ مزعجين، وعرفت ان الواحد لو مش عايز ربنا يحاسبه بالتنتوفة ما يحاسبش الناس بقى
والله هم كلهم صعبين، ان الواحد يحاسب نفسه قبل ما ربنا يحاسبه، صعبة قوي، صعبة وغلسة وتجيب اكتئاب، حد جربها؟ اصل الانسان ما يحبش يشوف نفسه وحش، اكيد احب اشوف نفسي ان "اهم عيوبي اني طيبة زيادة عن اللزوم، وبانسى الاساءة، ما باعرفش ازعل من حد وقلبي ابيض" وانا طبعا لا طيبة ولا متسامحة وبازعل عادي يعني واحقن واغل في نفسيتي، بس قعدت كده افتكر كام حاجة غلط عملتها لقيت الحساب صعب، لمجرد اني فكرت نفسي بيهم
طب الواحد لو استنى ربنا يحاسبه طب ما دي وقعة سودا
مافيش غير ان الواحد يتجاوز عن الناس عشان ربنا يتجاوز عنه، هي صعبة، صعبة قوي، خصوصا لواحدة غلاوية زيي، بس، طب على الاقل مافيش داعي لتوبيخ الناس، ما انا لما جربت اوبخ نفسي لقيته احساس وحش، مافيش داعي اعرض الناس لاحساس يضايقهم عشان ربنا ما يعرضنيش لنفس الاحساس ده، الاية اللي فوق دي بتسهل الموضوع على فكرة
يعني لو الواحد عفا بينه وبين نفسه وقال اللي يخلصه من ربنا وضرب طناش وسقع دماغه عن الناس اللي ممكن يسفهوا عليه ممكن يسهل موضوع العفو ده

تنويه تغطاطيسي

اشتروا الدستور الاسبوعي عشان انا منزلة فيه مقال
لازم يحسوا ان التوزيع زاد لما انا كتبت
:))

Monday 24 August 2009

حكمة اليوم الثالث

إنكم اليوم في زمان كثير علماؤه، قليل خطباؤه، من ترك عشر ما يعرف؛ فقد هوى ويأتي من بعد زمان: كثير خطباؤه، قليل علماؤه، من استمسك بعشر ما يعرف؛ فقد نجا
-------
النشاط الوحيد اللي كلنا مجمعين عليه، وانا لما باقول كلنا اقصد العالم كله عدا الصينيين، اننا بنرغي كتير، انا والله مش باسقط عيوبي على غيري، بس هي الثورة العالمية اللي حولت العالم الى قرية صغيرة ايه غير انها ثورة رغي؟ وحرية التعبير ايه غير حرية رغي؟ ده حتى اعلان موبينيل: "كل الناس ح تتكلم".. ده اعلان ده وللا تهديد؟
انا مش باعترض، باتأمل بس
طب حد بيسمع حس للصين؟ وللا بيتكلموا صيني وانا مش فاهماهم؟

Sunday 23 August 2009

نصيحة لوجه الله تعالى

قانون المرااااااغي
اتفرجوا على قانون المراغي ضروري، مش بس عشان خالد الصاوي رائع، امبارح اول حلقة ما تمكنتش من اني احكم غير على خالد الصاوي، مبدع كالعادة
بس النهاردة تاني حلقة والمسلسل سخن، تصدقوا بالله؟ المسلسل سخن في تاني حلقة؟ حتى المشاهد اللي بتستخدم في المسلسلات عشان تطول الحلقات معمولة حلو جدا، وعاجبني قوي رسم شخصية غادة عبد الرازق، كل الناس عندها يا اما محترمين يا اما غلابة ههههههه لطيف قوي ان يبقى فيه شخصية مرسومة كده :) وشخصية المراغي مرسومة حلو برضه لحد دلوقت، انا مبسوطة قوي، من كل حاجة بس احنا لسة في الحلقة التانية، يارب بقية الحلقات تمشي كده
الا خالد الصاوي بيعمل كده ازاي؟ بيلبس ازاي كده الشخصية لحد ما يتهيالك انك شفت البني ادم ده قبل كده في حياتك العادية؟ على فكرة ده ح يتجنن، الممثلين اللي بيعملوا كده بيلسعوا في الاخر زي جاك نيكلسون، ايوة، هو عامل فعلا زي جاك نيكلسون، من هنا ورايح ح اسميه جاك نيكلسون مصر، هههههههههه كان لازم تشوفوه وهو بيترافع امبارح، فريد الديب ياربي؟

حكمة اليوم الثاني

ينفع وزارة النقل تعمل اعلان في رمضان بمليون جنيه عشان تقول لنا ندفع السبعين جنيه تمن تذكرة القطر وما نسطحش ولا نتشعبط؟
ليه؟ عشان الدخل ما يقلش ويعرفوا يعملوا صيانة، يعني اتضح انهم مش عارفين يعملوا صيانة بسببنا
وقال وزارة النقل بتقول لنا احنا: قول للغلط لأ.
حكمة اليوم:
بدل ما ابوظ صيامي على وزارة النقل، أنقر هنا

Saturday 22 August 2009

حكمة اليوم

من قال فسد الناس فهو أفسدُهم
ترجمة الحكمة بالبلدي:
اللي فيه حاجة بيجيبها في الناس ويقول الناس بقت وحشة
-----
عملتوا ايه النهاردة؟ مش جابوا فيلم الشيماء؟ انا لسة مش مستوعبة ان عربية حرة تمشي تتصرمح في الصحرا وهي بتغني

Thursday 20 August 2009

Tuesday 18 August 2009

دحلاب هو اللي بيمول انصار الله؟

يعني سبعة مليون طوال عراض ما عندهمش رصاصة بربع جنيه تخلص العالم من الخراب ده؟ ده اكبر مخرب في التاريخ، ده ولا راسبتوتين
انا بقى مش صعبان عليا غير العيال الصغيرة اللي هو ضحك عليهم وجندهم وجننهم ودفع لهم فلوس عشان يموتوا نفسهم وغيرهم

حلم


كان حلم... ناس قالت على صاحبه مجنون وناس تانية قالت كداب
بس الحلم بقى حقيقة... عشان ما كانش مجرد حلم
كان ايمان
ايمان بحقيقة

Sunday 16 August 2009

ايه انصار الله دول بقى؟

هم حاطين لهم اصانص جنان في المية؟ مهابيش دول؟
لا حول ولا قوة الا بالله
والله انا عذارهم، الفلسطينيين يعني، بيفكروني بعيال الدار، من كتر ما المشرفين بيعذبوهم ويعلقوهم يستنوا لما يكبروا واول ما ربنا يديهم صحة يمسكوا العيال اللي اصغر منهم وينزلوا فيهم ضرب
ستين سنة ذل كتير برضه، زهقوا، واللي ما زهقش ومستحمل ده ح يفضل عقله سليم يعني؟ ليه مش بني ادم؟ اذا كنا احنا ما شفناش واحد على مليون من اللي بيشوفوه وضربنا خلاص
على رأي عمر طاهر: شكلها باظت 

Friday 14 August 2009

هو يدوبك كده

يعني عبد الحليم يغني لناصر، فايدة كامل تغني للسادات، ومحمد ثروت يغني لمبارك وصفاء ابو السعود تشلت على المسرح لمبارك برضه
انما ايه اللي جمال مبارك جايبهولنا ده؟ استفتاحنا لبن يا معلم، ده عتر عليه في انهي غرزة؟
هو يدوبك على قد كده، مش اكتر

بس بيقول في الاغنية: سيبك م التهييس! ايه ده؟ لالالالالالالالالالالا انا ما احبش تلقيح، خليك جدع كده وكلمني راجل لراجل
يعني يا جيمي ما لقيتش ابغل من ده عشان يعمل لك دعاية؟
"طيب ليه ما يحكمشي؟ طيب ليه ما يمسكش"
يمسك ايه بالظبط؟ لا مؤاخذة يعني، احنا اشرف م الشرف، وماحدش يمسك عندنا حاجة الا بالحلال وعلى رأي اللي قال: ده مش حلال، لانه لا يجوز ان ينكح ما نكح اباه

Thursday 13 August 2009

عاجل: مواطن مصري يستغيث

انا مش ح اقدر اتابع لاني الفترة دي فعلا مشغولة، بس ارجو من الجميع مساندة الراجل ده
هي السفارة المصرية لازمتها ايه في الحياة؟

هم عايزين منه ايه ولاد التيت دول؟

يعني اوباما نازل قتل في الافغان علاولة زي ما موت الدبانة على ايده، وبيعمل لهم تأمين صحي عايزه يبقى زي كندا وبريطانيا كده، نازلين فيه شتيمة وبيقولوا له انت ح تموتنا بالاشتراكية بتاعتك؟
هم اللي بيعملوا كده متخلفين وللا حيوانات؟
هي الناس في كل حتة فوتت وللا ايه؟ انا فاكرة ده عندنا احنا بس عشان التلوث

Tuesday 11 August 2009

مولاي صلي وسلم دائما ابدا على حبيبك خير الخلق كلهم


ومبلغ العلم فيه أنه بشر
وأنه خير خلق الله كلهم




يا خير من دفنت بالقاع أعظمه
فطاب من طيبهن القاع والأَكم
نفسي في الفداء لروض أنت ساكنه
فيه العفاف وفيه الجود والكرم


كل سنة وانتوا طيبين.. ريحة رمضان ابتدت تهل، والبكس ح يلم الشياطين وح نهيص
يارب يعذبوهم

Monday 10 August 2009

انا مستعدة اثور بس اثور ازاي؟

على التويتر الشباب لنكوا اللنك ده
ثورة مستخدمي الانترنت، طب انا مستعدة اثور من دلوقت اهو، بس اعمل ايه يعني؟ اقفل الراوتر مثلا؟
ياريت حد يشرح لي
وبالمرة الموبايل بقى، نقفل الموبايل كمان
بس لو قفلنا الموبايلات والنت هم ح يخسروا يعني؟ لو ح يخسروا اخسر ابوهم عادي انا باحب اخسر اللي معاهم فلوس كتير حتى من غير ما يعملوا حاجة، محبة كده لوجه الله
مستعدة انضم لو حد فهمني

Friday 7 August 2009

انا لسة باذاكر بس بالنوسبة للميتال

اصل انا مش بت كول، كل ما اكلم حد اليومين دول ياخويا الاقيهم بيقولوا لي: باسمع ميتال
هي هوجة الميتال دي طلعت تاني؟ مش كانت طلعت من ييجي عشر سنين ايام العيال العبيطة اللي اتهموهم بانهم عبدة شيطان وهم مش اكتر من عيال سيس؟
اياميها قريت عن الميتال بس ما اهتمتش اسمعه، واليومين دولم ناس محترمة كده والاقيهم بيقولوا لي باسمع ميتال قلت اما اسمعه
ايه ده؟ ده بالنوسبة لايه يعني؟
انا مش عايزة ازعل حد مني، بس الفنون بشكل عام والمزيكا بشكل خاص متصلة بالمشاعر، والمشاعر دي مفتاح شخصية اي بني ادم، وبارتياح تقدر تقول انا اعرف شخصية البني ادم الفلاني لما تعرف هو بيسمع ايه، عشان اللي بيسمعه بيعبر عن مشاعره، ايه اللي بيفرحه، ايه اللي بيحرك مشاعره ويخليه يعيط مثلا، ايه اللي بيحسسه انه في حالة حب..إلخ
اللي بيسمع ميتال ده، لو عايز يسمعها عشان يبقى واد كول وطالعة مودا على عيني وعلى راسي، كل العيال الصغيرة بيحبوا يبقوا كول
لو مؤمن بالفلسفة بتاعتها برضه على راسي هو حر انه شايف الشيطان مظلوم :) هو ادرى، والاخوة الخواجات لهم حق يشوفوا الشيطان مظلوم لما يقارنوا افعاله بافعالهم وكم القتل اللي بيقتلوه للناس والبلطجة اللي بيبلطجوها على البشر
لكن اللي كبر على انه يعمل كول في سنه ده (زي الناس اللي انا اعرفهم دول) وانا عارفة انهم مش شايفين الشيطان مظلوم ولا حاجة ولا لهم فلسفة اصلا في الحياة، بيسمعوا المزيكا دي عشان ايه؟ عشان يستطعموها؟ وتحرك مشاعرهم؟ مشاعر ايه اللي بتحركها؟
تاني انا مش عايزة ازعل حد مني بس يسمحوا لي اقول لهم: ايه كمية غلظة الحس والمشاعر الحلاليفي اللي جواكوا دي؟ دي مشاعر حلاليفي، وانا لما سمعتها ما قدرتش اكملها وما اثارتش جوايا حاجة غير اني اتخنقت، حسيت (بجد وبدون مبالغة/ اول مرة احس الحساس ده) ان فيه واحد ماسك رقبتي وبيحاول يخنقني
الواحد لما يبقى متضايق وللا عنده مشاكل بيسمع مزيكا عشان يروق دماغه، لكن الواحد عشان يسمع حاجة زي دي، لازم يبقى قاتل قتيل وناشره بالمنشار وساب جتته جنبه لما عفنت ونفسه ينسى
انا شخصيا مش ح اعرف الناس دي تاني، ونصيحة لوجه الله ما تعرفش انت كمان حد بيسمع ميتال، لما دي المزيكا اللي بيسمعوها امال لما بيتخانقوا وبيشتموا بيعملوا ايه؟ 
الفيديو ده مدته اربع دقايق، انا وصلت لحد الدقيقة 1:46 وما قدرتش اكمل لان اللي كان بيخنقني اتك على رقبتي قوي
بالنوسبة للي فتح الفيديو... انا اسفة، اتضايقتوا؟

Wednesday 5 August 2009

طب وهو السادات عربي؟

ايه الاهانة للعرب يعني في انهم يسموا اسم كلب على اسمه؟ يعني ممكن ناس تزعل عشان بتحب السادات ده موضوع تاني، بس ان ناس تقول دي اهانة للعرب، هو السادات عربي؟ مش هو ده صاحب الكلمة الشهيرة: العرب جرب؟ ومش هو اللي قال على العرب: دول اعراب والاعراب اشد كفرا ونفاقا، اذا كان ربنا بيقول عليهم كفار
:)
والله كان راجل انتيكا
على اي حال، هو كان بيحب الامريكان موت موت موت موت موت مووووووووووووووت مووووووووووووت
وباع لنا البلد لجل عيونهم
والامريكان بيحبوا الكلاب موت موت موت موت موت مووووووووووووووت
وعلى رأي الاخ ده بيعاملوهم احسن من عيالهم
It should be noted that in the United States, people treat their dogs better than they treat their children. This is why someone here will demean another by calling him a “child.” Naming dogs after people is often seen as an honorific. So there can be cultural disconnect over the dog issue.

طب المرحوم كان بيحب الامريكان و"عشان خاطر كارتر عشان خاطر كارتر" على راي بطرس غالي اللي سماها اتفاقية عشان خاطر كارتر، والامريكان بيحبوه وبيحبوا الكلاب وبيعاملوهم احسن ما بيعاملونا احنا واحسن ما بيعاملوا حتى عيالهم واحسن حاجة يعملها امريكي مخلص لصاحبه انه يسمي اسم الكلب على اسمه كنوع من انواع التكريم
(يعني منتظر يا عيني ما عرفش يشتم بوش.. اتاريه الابعد كان بيضحك)
والمرحوم كان بيكره العرب كأنهم اتجوزوا امه وعلى راي النكتة الشهيرة: طلع الاسرائيليين من سينا ودخل الامريكان مصر
مالنا احنا بقى زعلانين ليه؟
واللي زعلان يزعل براحته، ح يتمحك في العرب واهانة العرب ليه؟ دلوقت بقى افتكروا ان فيه حاجة اسمها عرب؟ لا وح يعملوه رمز عربي كمان؟ ده من امتى الكلام ده؟ ده لو كان عايش وحد قال له انت رمز عربي كان 
"فررررمه"   

Monday 3 August 2009

بمناسبة اللي لا بيفهم ولا بيحس

عوكل عمل فكر فيه وللا حس بايه لما عرف ان سر نجاح فيلم الجزيرة الجملة دي

وللا ما خطرش في باله يفكر او حتى يحس؟
وللا كلهم من اولهم لاخرهم حسوا وللا فكروا في ايه لما شافوا ان الناس متعاطفة مع تاجر مخدرات ضد الحكومة؟
انا باحب منصور... باحبه قوي

كام سؤال كده عشان مش قادرة امسك نفسي على ما ارجع بقى

ايه اللي وليد جنبلاط عمله ده؟
هههههههههههههههههه
لا حول ولا قوة الا بالله
احسن
----
ليبرمان طلع له علاقة بغسيل الاموال وبيع الكلاوي؟ اخصصصصصصصصص، امال عامل لي متدين ومتشدد كمان، هم المتدينيين المضروبين دول في كل حتة وللا ايه؟
----
فيه حاجة في الاجزخانة اسمها زيت الحشيش، كويسة قوي لسقوط الشعر، قام ميدو جاب لي لنك بيقول لي ان زيت الحشيش ممكن ينضرب بس عموما اللي باجيبه مش مضروب (مالوش ماركة، اسمه زيت الحشيش في ازازة كده تقرف الكلب الحزين، والزيت اخضر غامق قوي)، وبعدين من ضمن الحاجات اللي بعتها لي ميدو واحد شيخ سعودي بيقول على زيت الحشيش حرام!!!!!!! حرام نحطه على شعرنا!!!!! طب انا افهم واحد حشاش يقول كده: "نسوان مخها فاضي صحيح؟ بقى يحطوا نعمة ربنا على شعرهم عشان يطول؟ حلال ده وللا حرام؟ ما انشالله عنه ما طول، ما يحلقوا نمرة واحد، يعني انا لما الفلوس تقصر معايا اروح احرق شعر مراتي واشمه؟"
لكن شيخ بيقول كده ليه؟ ده زرع، يعني اكيد ربنا خلقه لسبب، واكيد ما خلقوش عشان الناس تشربه، يبقى فيه فايدة تانية، يعني لما نستخدمه للفايدة اللي ربنا خلقه عشانها يبقى حرام؟
انا الحقيقة اول ما اشتريته ما خطرش في بالي انهم يقصدوا الحشيش الحشيش، افتكرته النجيلة، بس اللي فهمته من الشيخ السعودي انه الحشيش الحشيش وقال ايه، زيت الحشيش في حكم دهن الخنزير والميتة!!!!
طب الشيخ ده لما بيتعور ما بيحطش سبرتو على الجرح؟ ده فيه مشكلة في المخ على فكرة، مش حكاية تشدد
بس حلو اشتروه يا بنات، بيطول الشعر وبيمنع سقوطه
(نعتذر للاخوة الرجالة عن حديث ربات البيوت المفاجئ)
بركات طالبان دي، انا والله باحبهم من زمان، من قبل ما يساعدوني ان شعري ما يقعش
-----
فيه بني ادم ما بيحسش وما عندوش دم، بس ربنا مديله نباهة في مخه، دحيح يعني، زي الكمبيوتر كده
وفيه بني ادم مش نبيه ولا حاجة، وممكن يبقى ما بيفهمش خالص، بس عنده دم وبيحس
(فيه ناس بتحس وبتفهم بس دول زي زيت الحشيش اللي مش مضروب، ناااااادرين جدا)
اهو اللي ما بيحسش تعرف تفهمه، اللي ما بيفهمش تعرف تحسسه
لكن اللي لا بيحس ولا بيفهم ده عايش ليه؟ حتى لما ينضرب مش ح يحس غير الوجع الوقتي وبعد شوية لا ح يفكر: هي الناس ضربتني ليه؟ ولا ح يحس ان كرامته واجعاه
طب ده عايش ليه؟ اه، عايش عشان الناس تقول له: الله.. بصوا الراجل ده، لا بيحس ولا بيفهم... ياااااه سبحان الله
-----
اسيبكوا واكمل اللي ورايا

Sunday 2 August 2009

Saturday 1 August 2009

معلش انا باذاكر

بس حبيت اسقط بعض اللي ذاكرته على السياسة
عوكل مش شخصية درامية، ده زي شخصية عبد السلام النابلسي وعبد المنعم ابراهيم في الافلام، وقالوا لنا في المعهد ان ده غلط اننا نعمل شخصيات كده في الدراما
عبد الناصر والسادات شخصيات درامية
صحيح الاولاني بروتاجونيست والتاني انتاجونيست، بس مهمين الاتنين
انما عبد المنعم ابراهيم مش مهم
اسيبكوا بقى عشان اكمل مذاكرة