Thursday 30 June 2011

فيديوهات/ التحرير


انا جيت استحمى واريح شوية ونازلة اهو ودول اتنين فيديو صورتهم يوم 28 بالليل
دي شهادة احد المصابين اللي كانوا معتصمين في ماسبيرو



ودي مطالب اهالي الشهداء اللي وزعوها علينا امبارح:


1- مطلوب ضم جناية حسني مبارك وجميع جنايات قتل المتظاهرين واصابة الثوار بالقاهرة الكبرى لجناية حبيب العادلي الى القضية رقم 1227 لسنة 2011
2- مطلوب تفرغ هيئة المحكمة المختصة بقضايا قتل واصابة الثوار بعد ضمهم ولحين الفصيل فيهم
3- حبس جميع الضباط وامناء الشرطة المتهمين بقتل اواصابة الثوار احتياطيا لوقف تأثيرهم على الشهود
4- مطلوب توسيع دائرة الاتهام بقتل واتصابة الثوار لتشمل:
- احمد نظيف رئيس مجلس الوزراء السابق
- انس الفقي وزير الاعلام السابق
- طارق كامل وزير الاتصالات السابق
- حاتم الجمبلي وزير الصحة السابق
5- مطلوب نقل وقائع جلسات المحاكم مباشرا على التلفزيون المصري لما له من اهمية
- تحقيق لمبدأ الشفافية
- المردود الايجابي على الاقتصاد المصري
- انهاء حالة الاحتقان الشعبي في هذا الشأن
6- صرف معاش استثنائي فوري لجميع مصابي الثورة مع علاجهم على نفقة الدولة بالداخل والخارج
-----------
امبارح مالك عدلي بيقول لي العيال اللي كانت بتشتبك مع الداخلية عن الوزارة عمالين يهزروا مع بعض وبيجروا ناحية الرصاص وهم بيهرجوا ويقولوا: يالا بقى نستشهد احنا عملنا ذنوب كتير في حياتنا... ويقول لي اقول للعيل فيهم ياد ارجع شوية يقول لي: لا انا رايح اخد طلقة، انا جاي اموت.. ويروح ضاحك ويقول له: اصل عملت ذنوب في حياتي
وزي ما احنا عارفين دي طبيعة اي بلطجي في الدنيا
وانا كبلطجية ماسونية حافضل قاعدة مع ائتلاف شباب بلطجية ثورة 25 يناير زملائي
ده فيديو برضه صورته يوم 28 لائتلاف بلطجية الثورة

يالا.. اشوفكم هناك بقى
اه نسيت.. المدون والناشط لؤي نجاتي اترحل على السجن الحربي بوصفه احد البلطجية اللي هجموا على ماسبيرو!!!!!!!!!!!!!
انبي تعوض عليا عوض الصابرين يارب



بيقول حنموتكوا يا ولاد "المتنـ.." هههههههههه حيموتونا؟ على اساس ما عملوهاش قبل كده؟ وعلى اساس احنا اصلا بنخاف من الموت؟ هم مش جربونا ولقونا مستبعيين على عمرنا؟ ما يجربوا حاجة تانية؟ يجيبوا لنا بون بون زي ما شفيق قال


Wednesday 29 June 2011

احنا في الميدان...

بالمختصر كده عشان الحق انزل تاني
ناس جات لاهالي الشهدا قالت لهم فيه تكريم في مسرح البالون، فيه بعض من اهالي الشهدا راحوا عشان التكريم، اول ما اكتشفوا انه كمين واتضربوا واتقبض على سبعة منهم، الخبر وصل لاهالي الشهدا المعتصمين في ماسبيرو، راح حوالي ستين واحد عند الداخلية يتظاهروا، بمجرد وصولهم عند الداخلية راحت الشرطة ضاربة عليهم قنابل مسيلة للدموع، انا معايا فيديوهات وشهادات بس مش عندي وقت انزل حاجة، لو ربنا كتب لي عمر حانزلها، لو ما كتبش تليفوني حاديه لاي حد ينزل منه الفيديوهات
ما كانش فيه بلطجية امبارح في الميدان... انا من اللي كانوا في الميدان لو بتعتبروني بلطجية كل اللي هناك زيي، وعلاء سيف ومالك مصطفى ومالك عدلي وسلمى سعيد وامينة وليلى حسن سليمان، انا باقولكم الاسامي دي عشان كل الناس عارفة انهم مش بلطجية، وكل ما حافتكر حد من صاحبي حاقولكم، ما شفتش انا بلطجية خالص امبارح وكل الناس اللي اعرفهم امبارح كانوا في الميدان، وايوة الناس حدفت طوب على الداخلية لان الداخلية بتضربنا بقنابل ريحتها فظيعة ورصاص وسلطت علينا بلطجية، واول ما العيسوي قال الداخلية حتنسحب قلت لهم يبقى حيبعت بلطجية فزعقوا لي وقالوا لي ما تخوفيش الناس - على اعتبار ما كان من المعتاد في الحالات اللي زي دي - بس اخوف مين، الناس مش خايفة
انا حاروح واحنا محتاجين ادوات طبية، سرنجات ومشارط ومقصات وانتي بايوتيك وشاش وقطن وكده عشان المستشفى الميداني
واحنا قاعدين ومطلبنا حل الداخلية القائمة واعادة بناء داخلية جديدة
الامن المركزي يتلغي، والمجندين اللي بيقضوا جيشهم في الحرب على الشعب يرجعوا الجيش عشان يخدموا الوطن، مش ياكلوا ويشربوا على حسابنا ويضربونا، الشعب مش هو العدو، ماحدش يقضي فترة جيشه في ضرب الشعب، ما يرجعوا الجيش يعملوا حاجة مفيدة، انشالله يعملوا شاي وقهوة للظباط ارحم من القرف اللي بيعملوه ده، وظباط الامن المركزي اللي شغالين في الاصل في الداخلية يخدموا في قطاع الامن، يحفظوا الامن مش يضربونا، ومش ظابط امن يطلع يقول لنا في الميكروفون: "يا شعب ابن متنـ.. احنا حنعلمكم الادب ونربيكم.." وبعد ما ينضرب يقول: الله الله.. هي دي سلمية الثورة يا شباب؟
هههههههههههههههههههههههههه الله... طب كنت عامل سبع ليه بس؟
الامن الوطني يتحل ويشغلوهم في المطار ولا في المرور ولا في اي داهية تشيلهم، يشوفوا لهم لقمة حلال انشالله يدوهم حتة ارض يزرعوها... اللي عمل الكمين ده لاهالي الشهدا هو الامن الوطني
ام القنابل المسيلة للدموع اللي جايبينها من امريكا يضربونا بيها دي تتصادر منهم، وامريكا القذرة باعتة لهم شحنة جديدة لقنابل غريبة كده لون الغاز بتاعها اسود، اوباما يضحك في وشنا ويبعت للداخلية قنابل جديدة تضربنا بيها؟
احنا الداخلية دي ما عادتش تنفعنا ولا عاد ينفع تبقى موجودة في البلد، يا احنا يا هم في البلد دي
ووزير الداخلية يبقى مدني... مين اللي ادا الامر لضرب الناس بالقنابل المسيلة غير العيسوي؟ ده الضرب كان عند وزارة الداخلية.. العيسوي يمشي، وما يجيش اي ظابط شرطة وزير
دي مطالبنا وده اخرنا معاهم... وادي احنا بنقول للمجلس العسكري اهو.. زي ما كان الاختيار يا مبارك يا الشعب وهم اختارونا، هم دلوقت قدام اختيار تاني، يا الداخلية يا الشعب
وكده كده الداخلية دي حنمشيها تكلم نفسها.. فاحسن يختاروا الشعب بقى ويعملوها بجميلة... الداخلية دي مش نافعة، وعشان نروح لازم يصدروا قرار فوري باعادة هيكلة الداخلية، والغاء التجنيد في الامن المركزي وحل الامن الوطني 
لو مش عارفين ازاي يعيدوا هيكلة الداخلية... يرجى الاتصال على الشعب.. احنا عندنا خطة كاملة متكاملة لاعادة بناء الداخلية عشان تبقى حاجة محترمة
كلمة اخيرة: 
متشكرين قوي للقوى السياسية القذرة اللي قاعدة تتخانق على الدستور والانتخابات واتخلت عنا واحنا بننضرب وقبلت يتقال علينا اننا بلطجية وكمان بيروجوا للكلام ده... مش حننسى جميلهم اللي على راسنا ده ابدا، احنا حننسل الدستور والانتخابات على راسكم دول
مافيش لا دستور ولا انتخابات في ام البلد دي.. فيه شعب، وميدان، وابقوا خلوا اللي بتعملوه ده ينفعكم... والله العظيم قيادات القوى السياسية كلها من اقصى اليمين لاقصى الشمال حتقضي بقية خدمتها في شرم جنب مبارك... يالا بقى، خليكوا في كوزكوا لما نعوزكوا.. واحنا مش عايزينكم، احنا ما نزلناش نموت عشان انتوا تقسموها، ده بعينكم، انتوا عبارة عن مباركات بس على صغير، وعلى فكرة قواعد القوى السياسية من الشباب كلها معانا في الميدان، يعني هم اصلا عيالكم كده كده حيقلبوكوا
البلد دي بلدنا، وحتتعمل زي ما شعبها عايزها، مش زي ما الاوامر بتيجي من برة مع القنابل المسيلة للدموع... وابقوا روحوا اقعدوا مع الامريكان تاني يا عالم ناقصة، وماحدش يسألني تقصدي مين... كل قيادات القوى السياسية قعدوا مع الامريكان.. 
نتقابل في الميدان... كرسي العرش بتاع الشعب

Sunday 26 June 2011

تابع التذكرة: 29/1 الذين استجابو في ساعة العسرة.. واهل مصر صحابي وأولياء الله

تحديث:
اه... نسيت اقولكم كمان ان من ضمن الحاجات اللي فاجئتني وخلتني احب الجيش بعد ما كنت خايفة منه، اني وانا باقول للاتنين ظباط: غمض عينيه افتكرته نام طلع مات.. دوروا وشهم الاتنين وقعدوا يعيطوا والعساكر اللي كانوا على العربية وطوا راسهم وعيطوا
بصراحة بالنسبة لي واحد لابس ميري وعنده دم وبيعرف يحس ناهيك بقى عن انه يعيط دي معجزة بعد ما قعدت يوم كامل قدام حلاليف بيقتلوا الناس ومافيش اي تعبير على وشهم كأنهم روبوت مش بني ادمين زي اسرائيل لما بتضرب في الفلسطينيين
فيه فيتيون جديد نزل بس اكيد مش انا اللي مصوراه هههههههه مافيهوش الشلل الرعاش بتاعي، انتوا عارفين بصمتي
شوفتوا الولي ده:





ده فيديو واحد يوم 29، انا رحت يوم 29 اجيب عربيتي من عند مسجد مصطفى محمود، ما اخبيش عليكم كان جسمي كله لسه بيترعش بعد ما واحد فضل يطلع في الروح جنبي، وبعد ما هدومي غرقت دم، يوم 28، كانت الناس على آخر اليوم بتقول: واحد اتنين الجيش المصري فين.. الشرطة بتضرب فينا، عايزين الجيش يحمينا
وبصراحة اكتر، لو تراجعوا فيديوهات يوم 28 حتلاقوني ما كنتش باسرسع معاهم، ده الهتاف الوحيد اللي ما قلتوش، ولما فاطمة عابد قالت لي حاسة ان الجيش حينزل قلت لها بعد الشر، ولما لقيتهم بيهتفوا الهتاف ده رقعت بالصوت وقلت لهم: اسكتوا.. انتوا عارفين لو نزل حيعمل فينا ايه؟ ده جيش مبارك.. ممكن يضربنا
الناس كلها هبوا فيا، وكنت حانضرب.. تاني، بعد ما انضربت من الامن، المتظاهرين كانوا حيضربوني، وقالوا لي: ما تقوليش كده، ده جيش مصر.. الجيش معانا
بعد ما خلصنا، عربيات الامن انسحبت وشوية منها ركن على جنب، الظباط اختفوا واللي فضلوا العساكر، واحنا ماشيين بنت تفت عليهم وقعدت تصرخ في وشهم: يا اسرائيليين يا اسرائيليين.. اتفو عليكم.. اتفو عليكم يا كلاب... الاسرائيليين احسن منكم.. تقتلوا اهلكم وناسكم؟
انا كنت متنحة، ورجليا بتترعش، والشباب فضلوا يهدوا البنت وواحد قالها: سيبيهم خلاص.. اخدوا نصيبهم، ما تهينيش واحد مهزوم
والله العظيم.. نفسي الاقيه الواد ده.. ده كده عيل صغير، وشكله من اللي تشوفهم في الشارع تحس ان مالوش في حاجة خالص وبيتفرج على افلام احمد السقا ويسمع تامر حسني وامينة.. قالها كده باللفظ: ما تهينيش واحد مهزوم
بعدها مشيت في الشارع لوحدي رايحة على البيت.. امشي واقع.. امشي واقع.. لحد ما عربية جيش معدية والناس عمالة تصقف لهم في الشارع شافوني.. وانا بصراحة كل ده مرعوبة لسه منهم، مش عارفة حيعملوا ايه، راح نازل منها اتنين ظباط جيش وقوموني وسندوني ودي كانت اول مرة اعيط، من الصبح ما نزلتش دمعة.. انا.. انا ام قويق.. ما عيطش خالص طول اليوم، بس اول ما ظباط الجيش قوموني انفجرت في العياط، وقعدت اقولهم: واحد مات جنبي.. واحد مات جنبي.. فضل يطلع في الروح كتير.. كنت عايزة اجيب له الاسعاف.. عينيه خضرا.. بس لما غمض افتكرته نام.. طلع مات.. مات
وقعدت اهذي بهيستيريا كده
قعدوا يطبطبوا عليا ويقولوا لي: بس بس.. اهدي.. انت ساكنة فين؟ قلت لهم آخر الشارع ده.. قالوا لي تعالي حنوصلك.. بصراحة خفت تاني.. مش حاكدب يعني.. قلت لهم لا.. خلاص انا حاعرف امشي، كان شباب واقفين في الشارع الظاهر لاحظوا اني لسه مش مآمنة قوي، قالوا لهم: ما تقلقش يا فندم، احنا حنوصلها
فالظابط قالهم: دي مش عارفة تمشي، تيجي تركب معانا 
قالوا له: معلش.. هي اصلها مش قادرة تشوف حد بميري.. احنا عارفين انكم جيشنا ونازلين تحمونا وانتوا مش زي الشرطة.. بس هي فعلا مش قادرة، احنا معاها ما تخافوش عليها
ايه ده بقى؟ ايه ده؟ ملايكة دول ولا ملهمين ولا بينزل عليهم وحي؟ والله ولا اعرفهم العيال دي ولا شفتهم تاني ولا فاكرة اشاكلهم خالص، عرفوا منين اني مش قادرة اشوف ميري؟ ايه الحساسية والنباهة دي؟ ده لو قلب الام مش حيحسوا بيا كده
انا بصراحة من الموقف ده حبيت الجيش قوي، وده يمكن الفرق بيني وبين اللي زعلانين من الجيش دلوقت
هم كانت توقعاتهم من الجيش اعلى من الواقع، وانا توقعاتي كانت ادنى من الواقع كتير، فكل واحد فينا مشاعره كانت تابعة لتوقعاته مش لتقدير محايد للموقف
لإني كنت متوقعة انهم حيقتلونا وما قتلوناش فحبيتهم.. ولانهم كانوا متوقعين ان الجيش حيبقى العصا السحرية في ايدهم وما بقاش عصا سحرية فكرهوهم
تاني يوم رحت اجيب العربية او اتفقدها لانهم قالوا فيه انفلات امني وقلت اكيد العربية اتكسرت... رحت لقيت العربية زي الفل، بس فضلت متنحة كده، ومش عارفة سوقت ازاي، رجليا كانت بتترعش على الدبرياج
بس وانا ماشية لقيت الشباب بينظموا المرور.. ولقيت مظاهرة في الشارع، وما كنتش اتوقع ابدا بعد اليوم العصيب ده ان حد ينزل مظاهرة تاني في الشارع، توقعت انهم حيريحوا اليوم ده وينزلوا الاحد، ولما شفتهم افتكرت الذين استجابو في ساعة العسرة، لما الرسول قالهم تعالوا نظهر القوة تاني يوم احد فمشيوا بجراحهم وطلعوا عشان يظهروا القوة

يا اوليا لسه في العشرين وفي التلاتين، يستنجدوا المؤمنين في المأزمة بيكم، يا فارجين الكرب بين العرب عناوين:



هو فيديو واحد... معلش.. انا اسفة يا اوليا، اليوم ده ما كنتش مع الاوليا، كنت ولية

تحت امرك يا.. يا دكتوووووور

احنا اول شعب دكتور في الدنيا.. جامعة سان فرانسيسكو منحت الدكتوراه الفخرية للشباب المصري وتسلمها نيابة عنا محمود ساندمانكي، ومن هنا ورايح احنا مش حنكلم بعض غير بدكتور
ما عادش حد بقى يقول: انا مش شباب الثورة دي تاني والنبي احسن بتنقطني، حضرتك تعرف نفسك اما بالدكتور فلان، او لو مش مع الثورة تبقى الفلول فلان
يبقى البلد دي فيها دكاترة وفلول، بالنسبة للفلول، المفروض ان المجلس العسكري يبقى عنده تقدير سليم للامور ويتضامن مع الدكاترة اللي نزلوه بنفسهم وقالوا له واحد اتنين الجيش المصري فين... ويخلص لنا على الفلول واحنا حنغني له الاغنية دي



وبالنسبة لمبارك.. بما اننا ضكاطرة، فاحنا عملنا قونصولطو وقررنا ان مبارك صحته زي البمب ويقدر يروح طرة يمسح الكبينيهات
وبخصوص تأجيل محاكمة العادلي، يا ريت تيجوا دوغري معانا وتفهمونا انكم ناويين تأجلوا الحساب ليوم الحساب وربنا احسن من الكل عشان نعصركم تنزلوا غوغاء صغيرين
احنا ضكاطرة ونفهم في الصحة اكتر منكم، تأجيل المحاكمات ده بيتسبب في تسلخات خطيرة قد تؤدي الى مرض الايدز وتعرض المريض للذبحة الصدرية... وبعد كده اي روشتة نكتبها تتصرف دوغري، ما توجعوش قلبنا بقى، وما تقطعوش كورس الدوا اللي احنا كاتبينه من نصه، عارفين احنا الطريقة دي... ما خلصتش كورس الدوا ليه؟ يقولك ما انا بقيت كويس.. ماهو انت كده حتتنكس
كان كابير السوايدة قال اننا نستاهل جايزة نوفل.. فين؟ ولا هو كلام وخلاص؟ احنا بنتكلم كلام علمي هنا وما نحبش بقى كلام في الهوا كده
بعد ما خدنا الضكطرة عايزين جايزة نوفل عشان بقى نعرف نتفرغ لشغلنا وابحاثنا ونعرف نساعد طلبة المؤهلات العليا اللي حوالينا ونبتكر لهم طريقة لاستئصال الاورام الاستبدادية تبقى احسن وتوفر جهد احسن ده اليمن وسوريا وليبيا والبحرين الورم عندهم عضال
وبعدين فين الدكتوراه بتاعة تونس؟ دول مقدمين عليها من بدري، هو ده خيار وفقوس.. لما ناخد جايزة نوفل حندي الدكتوراه لتونس ونعمل لنا جايزة باسمنا ونديها لهم ولا الحوجة للخواجات بقى... ادونا فرصتنا بقىىىىىىىىىىىىى
وبعد الفحص اتضح ان حالة ابناء مبارك اسفين يا ريس خطيرة محتاجين عملية تحويل نوع وزرع مخ، احنا جربنا في القرد وطلع فيه تشابه كبير بينه وبين ابناء مبارك وان شاء الله ربنا يوفقنا نسبة نجاح العملية - 90 وان شاء الله نعمل لهم العملية وتنجح ويفيصوا
والله الموفق

Friday 24 June 2011

التذكرة: 28 يناير/ كربلاء المصرية... يا شعب ياللي دفع تمن الشوارع دم، احفظ اسامي اللي ماتوا في الشوارع صم

ده يوم 28 يناير.. برضه اللي صورته
اوعى وشك.. الشلل الرعاش على اصله، ما عرفتش اصور اللي فرفر جنبي لاني كنت باشيل بطارية الموبايل وارجعها قال ايه كده بقى الشبكة حترجع.. حترجع اعمل بيها ايه؟ اطلب الاسعاف
ايييييييييييييه الغباوة اللي انا فيها دي؟ مخي كان فين ساعتها؟ البطارية مالها ومال الشبكة، ثم اسعاف ايه اللي حطلبها في المقتلة دي؟ 
بس حتسمع صوتي وانا باسرسع، مش حتقول ابدا اني روحت وهدومي غرقانة دم جرحى وناس ماتت.. ما تفهمش ايه الهلاهوطة اللي كانت نازلة عليا دي.. ما اعرفش كانت سرقاني السكينة ولا ايه؟
المرة الجاية ابقوا فكروني بحاجتين: اولا ما اسرسعش وانا باصور، ثانيا لما الضرب يبتدي ما ابطلش تصوير
انا مسمية اليوم كربلاء المصرية، وتميم قال لي ما تسميهوش كده، سميه بدر المصرية.. الا هو عدد اللي مات من الشرطة قد ايه؟ قلت له هو احنا كان معانا حاجة نموتهم بيها؟ احنا كنا بنرفع ايدينا ونقول لا اله الا الله فكانوا بيضربوا علينا
فيه حكاية تانية بقى، بما اني باحكي حكاياتي الشخصية ومغامراتي مع امي.. امي كانت كوميدية جدا في المرحلة دي
فيه يوم عمر عفيفي طلع وهبش مخ كل الامهات.. فجأة لقينا امهاتنا بتتصل بينا كلنا، انا وفاطمة وبنات كتير، وولاد كمان، وبيقولوا لنا الكلام اللي عمر عفيفي قاله.. امي اتصلت بيا: يا نوارة.. الراجل التخين بيقول ان اسرائيل حتيجي تضربكم دلوقت
قلت لها: يا ماما بيخرف..
قالت لي: وافرضي ماب يخرفش؟
قلت لها: افرضي يا ماما.. حاعمل ايه يعني؟ حاسيب الميدان؟
سكتت شوية وقالت لي: لا طبعا.. ما تسيبيش الميدان.. صليتي العصر؟ 
قلت لها: اه 
قالت لي: كويس.. تصلي بقى اول ما الادان يدن عشان احنا مش ضامنين ايه اللي حيحصل
قلت لها: يا ماما لو مت وعليا صلاة او اتنين وانا ميتة شهيدة اكيد ربنا حيسامحني
قالت لي: وليه نجازف؟ ما تصلي صلاة الخوف...
صوتها كان بيترعش، قلت لها: انت بتعيطي يا ماما؟
قالت لي: واعيط ليه؟ هي حاجة وحشة انك تروحي الجنة؟ انا جدعة لعلمك..
ههههههههههههه امي حبيبتي
نسيت احكي لكم بقى على بابا.. كان يوم 25 يناير، اتصل بيا وانا في الشارع على الضهر كده وقال لي: ايه نوارة انت فين؟
قلت له: يا بابا انا في وسط البلد
قال لي: بتعملي ايه؟
قلت له: بنحرر مصر..
فسكت حبة كتير.. وبعدين راح قافل من غير ما يقول لي حاجة
ام زينب بتقول لي انه قعد يعيط بعد ما قفل معايا.. ما اعرفش عيط ليه؟ باقول له بنحرر مصر.. يقوم يعيط؟ ولا عيط على هبلي ساعتها ولا ايه؟ 


يوم 28 بقى... كل الناس بلا استثناء واحد كانت نازلة تموت... تموت بس، مافيش حاجة تانية في دماغها.. وكل واحد كان فاكر ان اللي مستعد يموتوا زيه مش كتير.. وما كانش فاكر ان كل دول عايزين يموتوا

انا مش حاتفرج تاني عشان تعبت قوي وانا بانزلهم.. اتفرجوا انتوا بقى واتعبوا زيي: 
يا موتي قوم امتحني اعتذر منهم، اشمعنى يا كلب تستثنيني من بينهم، يوم الخطر قبلها ما كنت اجبنهم، يا موت تعالى اعوض غربتي ومنفاي، يا موت تعالى احاسبك ع القديم والجاي، يا موت تعالى ونتقاسمك انا وعداي، ولا تطال عزوتي وانا بعيد عنهم

Wednesday 22 June 2011

فإن الذكرى تنفع المؤمنين: 25/1 يوم الإخلاص.. والخلق كانوا مدركين لكنهم مش كلهم متأكدين

انا كنت صورت فيديوهات في الثورة، مش دايما كنت باقدر اصور، مش دايما كنت بابقى عايزة اصور، احيانا كنت باعمل حاجة او ببساطة الشحن قاطع
غير اني باصور وحش، تصويري سريالي
ما فتحتش الفيديوهات من ساعتها، كل ما احاول افتحها يجيلي انهيار بمعنى الكلمة وما اقدرش اكمل، النهاردة واحد على التويتر انب لي ضميري وقال لي نزليهم.. ده واجب وطني، فتحتهم، ونوة عياط وصويت افتحت... المشاهدة اصعب كتير من المشاركة، انا ما كنتش باعيط وانا في الشارع، بس الفرجة جابت لي اكتئاب وتعب
المهم.. انا شايفة اننا محتاجين نشوف يومياتنا تاني في الثورة.. عشان الظاهر نسينا
ما تنسوش يا مصريين... انا اتفرجت على الفيديوهات وجالي اللي جالي، فكرت اخد مهدئ وانام، وبعدين لقيت نفسي اتمليت غل تاني، قلت لا، انا مش حاخد مهدئ، ومش حانام، انا حافضل بالحالة دي لحد ما اجيب حق شقانا وتعبنا على الاقل اذا ما كناش حنجيب حق الشهدا
اجيب حق قلق امي اللي يوم تمانية وعشرين وانا نازلة قعدت تقول لي: خلي بالك بقى من نفسك، لو لقيتي حاجة خطر ارجعي على طول.. مش شطارة انك تتصابي ولا تتحبسي.. انت بتعملي دور و..
قلت لها: ماما... انا نازلة واحتمال تسعين في المية ارجع لك جثة.. واحتمال عشرة في المية ما يلاقوش جثتي
سكتت شوية وبعدين قالت: وانت احسن من مين؟ اكتبي إن الذي فرض عليك القرآن.. يمكن ترجعي.. لا إله إلا الله
محمد رسول الله
بس يوم 25 كان مختلف خالص.. يوم 25 ده يوم الاخلاص، يوم ما كل واحد فينا كان نازل وفاكر ان هو الوحيد اللي نازل وان الباقيين خافوا من تهديدات الداخلية
وما كانش حد فينا جواه لوم على الباقيين اللي كان متأكد انهم مش نازلين.. لإن اكيد خايفين ولهم حق.. بس كل واحد فينا قال في نفسه، هم معاهم حق يخافوا.. لكن انا زهقت واتخنقت.. ويا رب ما ارجع بيتنا تاني
وحياة قلق امي عليا وهي مالهاش غيري ما سايباك يا مبارك، لا انت، ولا داخليتك، ولا حزبك الوطني، ولا دلاديلك، ولا اللي بيحموك كمان
ابتدينا اولنا يوم 25.. يوم ما قلنا يا مبارك يا مبارك جدة جدة في انتظارك.. خبز حرية كرامة وطنية.. يا محمد قول لبولس بكرة مصر تحصل تونس.. الكلام ده كان الساعة واحدة الضهر.. قبل ما نقول اسقاط النظام الساعة خمسة العصر
نعتذر عن تصويري السيريالي... وعن صوتي المسرسع :)

استفتحنا: ارقينا وارقيهم يا عم الشيخ، فى حاجة خلت يشمك التاريخ، ينزل عن الوجه الجميل فيبان



































اقتراح محسن بركات: جمعة 8 يوليو يكون شعارها "المصريون اولا" ها؟

ما تنسوش يا مصريين.. ما تنسوش


الزميل على التويتر اقترح ان عنوان جمعة 8 يوليو تبقى: المصريون اولا
وتبقى المطالب لها علاقة بحياتهم المباشرة
يعني مثلا الحد الاقصى للاجور في مؤسسات الدولة عشان يتم التحكم في الاسعار واعادة بناء داخلية جديدة والغاء الامن الوطني، ده رجع يتصل بالناس تاني من برايفيت نمبر زي زمان

وانا مش فاهمة الغاء الامن الوطني مستحيل ليه؟ انا عارفة ان المصريين قلبهم ... بس انا باقول لهم لو كان الـ... بينفع كان نفع نفسه
ثم هم حيتوزعوا على بقية الاجهزة، جوازات بقى مرور اي داهية
مش عايزينه احنا، اهم غيروا اسمه ومافيش لا اشراف قضائي ولا حقوقي عليه، وبعدين ليه الفلوس دي كلها، ما يروحوا اجهزة تانية ويحلوا ده
مافيش حاجة عدلة حتتعمل في البلد دي طول ما الداخلية شغالة بنفس الطريقة القديمة، الداخلية دي لازم يتعمل لها اعادة هيكلة، الداخلية والامن الوطني بالتحديد هم المسئولين عن الخطاب المضاد للثورة، وهم المسئولين عن البلطجية، وهم المسئولين عن تعطيل بقية الوزارات انها تعمل اي حاجة مفيدة تمس الناس في حياتهم وتحسسهم ان فيه ثورة في البلد
وبعدين راجعين بنفسية منتقم مع ان هم الفئة الوحيدة في البلد دي اللي استفادت من الثورة، هم اللي مرتباتهم زادت مية في المية، وعبء الشغل قل من عليهم، واخدوا حوافز ومكافأة زيادة، ومافيش اي ضرر وقع عليهم خالص بالعكس، كله جاي عليهم بفوايد.. بس قالك: نفسيتهم تعبانة، شيل الشرطة من الارض، ادي الشرطة لابوه، يا عيني الشرطة بتعيط
وكذا حد منا انا واصحابي قابلنا ظباط شرطة صغيرين، نقيب او رائد، وقالوا لنا في الشارع: قياداتنا بتقول لنا احنا عايزين البلد تخرب.. وبيقولوا لنا سيبوا البلطجية واقرفوا الناس العادية
ده كلام شباب من جهاز الشرطة نفسه، مش ممكن كل دول متواطئين على الكذب، والعيال فيه منهم عنده استعداد يدلي بشهادته في الاعلام، وفيه شباب في الشرطة كتير مستعدين يتعاونوا ضد قياداتهم وبيقولوا احنا عايزين نشتغل كويس ومش عايزين الناس تكرهنا ولا عايزين نرجع للوضع السابق.. عيال صغيرة ولسه ما لحقوش يستلذوا طعم الفساد وعايزين يعيشوا في اطار كويس ويشتغلوا على نضافة
يبقى لازم ناخد موقف
قلتوا ايه في اقتراح محسن بركات؟

شالوا الدستور اولا الحمد لله.. حطوا ايه بقى؟

كويس انهم شالوا الدستور اولا ويا ريت ينشروا الكلام ده في كل الصحف عشان نبقى واضحين مع بعضينا بالذات في المصري اليوم والشروق والاهرام اللي نشروا انها عشان الدستور اولا، وكمان يبلغوا قناة التحرير، ابراهيم عيسى كمان يبلغوه ان يوم 8 يوليو مش عشان الدستور اولا والكل يبطل يتكلم في ان يوم 8 يوليو عشان الدستور اولا.. بتاتا قطعيا تماما، ويتوضح ده في كل حتة
قشطة
ايه بقى؟ ايه المطالب يعني؟ 
فكروا في مطالب والحقوا عشان نشتغل فيها لاني انا شخصيا روحي في مناخيري وخلقي ضيق اليومين دول ومزاجي مش عال العال يعني، فما بقاش فيا خلق للمناهدة والمحايلة كتير، وزهقت من كتر ما بابعتر دلع يمين وشمال لحد ما الناس تتمرع عليا، فمن هنا ورايح بقى مافيش دلع
خلصوني.. ايه ام المطالب في الليلة دي، بعد الشكر على الغاء مطلب الدستور اولا

Tuesday 21 June 2011

مبادرة

ان شاء الله الامور تمشي على خير، بس تميم حيبقى مسافر شوية وسايبني البس لوحدي :) بس ان شاء الله ربنا يسهلها وهو ظبط كام حاجة قبل ما يسافر
المهم اقروا المقال بتاعه اللي نشره في الشروق وبعدين نتكلم مع بعض عشان نفعل المبادرة ان شاء الله
قوة الشارع وسراب السلطة.. مبادرة


تميم البرغوثي


نحن فى خطر. قامت هذه الثورة بإجماع الناس وتفكك أجهزة الدولة القمعية، واليوم يعاد تركيب أجهزة الدولة القمعية ويتفكك إجماع الناس. افترق الناس على مسألة الدستور قبل الانتخابات أو الانتخابات قبل الدستور، وقبلها اختلفوا على الاستفتاء، ولا يخفى على أحد أنه خلاف على السلطة، يريد كل فصيل أن يحكم، ويظن كل فصيل أن باب الحكم هو التحالف مع حكام البلاد الحاليين ضد الفصيل الآخر. ولا يخفى على أحد أيضا أن هؤلاء المختلفين لا يستطيع أى منهم أن يحشد الملايين فى الشوارع وحده. ولذلك فهو فى موقع ضعف أمام الحاكمين يفى لهم بوعوده أملا فى أن يفوا له بوعودهم، إلا أنه لا يستطيع ضمان وفائهم له بحال من الأحوال. وقد وقع فى هذا طرفا الخلاف، فترى أن معارضى المجلس الأعلى للقوات المسلحة اليوم إنما يعارضونه لأنه اختار سواهم حليفا، وهم على أتم الاستعداد أن يؤيدوه إذا حالفهم هم.


إن الشارع لا يمتلئ إلا بالإجماع، والناس الذين نزلوا بالملايين أيام الثورة لم ينزلوا بأمر من أى فصيل سياسي، بل نزلوا لأنهم أدركوا أن الكل مجمعون على زوال النظام، ونزلوا لأنهم يكرهون وجه هذا النظام الأقبح المتمثل فى وزارة الداخلية. ولو بقينا غارقين فى خلافاتنا اليوم فإن وزارة الداخلية ستعود كما كانت، ولن نضمن إجراء الانتخابات فى موعدها، ثم لن نضمن أن تكون الانتخابات نزيهة ولا تزور، ثم لن نضمن إذا غضبنا من هذا كله أن نقدر على حشد الناس فى الشوارع لأننا متفرقون، فإذا دعا البعض الناس للنزول دعاهم خصمه السياسى للبقاء فى بيوتهم، وإذا اعترض طرف ما على نتيجة الانتخابات فإن خصمه سيقبلها. وكما ترون فأنا لم أسم الأطراف السياسية كالإخوان والليبراليين لأن كليهما معرض لأن يحل محل صاحبه وسيخسر الطرفان فى هذه اللعبة وتكون وزارة الداخلية، هى المنتصر الوحيد. وحين أقول إن وزارة الداخلية ستكون هى المنتصر الوحيد فأنا أعنى أن الديمقراطية الحقيقية فى مصر ستدفن قبل أن تولد، وهو بالضبط ما تريده الولايات المتحدة وإسرائيل. تعلم الولايات المتحدة أن الديمقراطية فى مصر تعنى بالضرورة سعى المصريين لمصلحة مصر، وتعلم الولايات المتحدة أن مصلحة مصر تتعارض مع مصلحتها فلها من يد ضاربة مسلحة تقمع بها الشعب المصرى وتمنعه من ممارسة حقه فى تقرير مصيره واختيار حكامه.


إن الضمانة الوحيدة ضد هذا السيناريو هو عودة القدرة على حشد الناس فى الميادين، وهذه لا تكون إلا بإجماع كافة الأطراف السياسية أولا، ثم باختيارهم لهدف يقبل الناس أن ينزلوا إلى الشوارع من أجله، أما الصراع على سلطة ليست بعد فى يد أحد منهم، ولن تكون فى يد أحد منهم فخطر عليهم جميعا. الشوارع هى الحصن ضد السلاح وقنابل الغاز والهراوات، وهذا السلاح أمريكى المنشأ والهوى. ولذلك فأننا نجتهد فى البحث عن النقاط العامة التى تجمع عليها القوى الوطنية فى مصر، ونطلق من هاهنا مبادرة للتفاهم بين هذه القوى تعيد للجميع قدرة الحشد، وتضمن أن تجرى الانتخابات حين تجرى على أساس نزيه، وأن لا يفرض أحد على المصريين شيئا بالقوة سواء من داخل البلاد أو خارجها. ونقاط الإجماع هذه لا تزيد على ثلاثة عناوين كبرى: أولا: هوية البلاد وعلاقتها بالآخر: لا يختلف الناس على انتماء مصر لمحيطها العربى والإسلامي،وأنها لا يجوز أن تكون حليفة للولايات المتحدة وإسرائيل، وأن القضايا العربية والإسلامية هى فى صلب المصلحة القومية المصرية وأن فصل مصر عن أمتها فيه إضعاف لها وللأمة. فلتكن الهوية والمرجعية والدفاع والاستراتيجية العامة والسياسة الخارجية فى أيدى من يؤمنون بانتماء مصر هذا. ثانيا: علاقات أهل البلاد بأنفسهم وبحكامهم: لا يختلف الناس على الحرية الكاملة فى التعبير والتنظيم السياسى وعلى الالتزام الكامل بحقوق الإنسان. سيستفيد الجميع من ذلك، من كان ذا قدرة دعوية كبيرة وانتشار بين الناس سيستفيد من رفع القيود عنه ولن يخاف من منافسيه، ومن لم يكن ذا حضور شعبى كبير لحداثة عهده بالتنظيم أولحداثة خطابه السياسي، سيستفيد من حماية حقه فى الاختلاف مهما كان. لذلك فليكن أمر السياسة الداخلية والحقوق السياسية موكلا لمن يؤمنون بالحرية المطلقة وحقوق الإنسان. ثالثا: الاقتصاد:لا يختلف المصريون على العدالة الاجتماعية، وأن وضع الطبقات المظلومة فى هذا البلد لم يعد محتملا، ولو كان محتملا لما قامت الثورة. وإن الأحزاب والجماعات اليسارية هى الأكثر اهتماما بمسألة الاقتصاد وحقوق المظلومين، فليوكل الاقتصاد إذن لهم، فهو ما يحسنون. 
إن تفاهما كهذا يلغى خوف الأطراف السياسية من استئثار بعضها بالسلطة دون بعضها الآخر، فلكل من التيارات السياسية الكبرى فى البلد: الإسلاميين والليبراليين واليساريين نصيب فى هذا التفاهم. فإن قبلوا به أصبح ممكنا أن يعملوا سويا وأن لا يستقوى أحد منهم على أخيه بغيره. وأول عمل لهم هو استكمال هذه الثورة التى قامت أساسا يوم عيد الشرطة وباسم شاب قتل تحت التعذيب، فلا يجوز أن يسمحوا أن يعاد بناء وزارة الداخلية بنفس الكوادر القديمة ونفس الضباط ونفس القواعد الإدارية والرقابية. فليطالبوا جميعا ببناء وزارة داخلية جديدة ينعدم فيها الأمن السياسي، فلا يكون هناك جهاز لأمن الدولة مهما تغير اسمه، ولا يعمل فى هذه الوزارة الجديدة من كان يعمل فى الوزارة القديمة، فلا بد لها أن تكون جديدة تماما. لقد قال مستشار رئيس الوزراء منذ عدة أيام على التلفزيون المصرى أن مستوى الجريمة فى مصر لم يتغير قبل الثورة وبعدها، ما يعنى أن مستوى الجريمة لم يتغير بوجود الشرطة وبغيابها. هذه الشرطة لم يكن لها دور فى مكافحة الجريمة بل كان دورها سياسيا محضا، وكل الكلام عن غياب الأمن فى البلد إنما هو كلام سياسى الهدف منه إعادة تسليح الدولة ضد مواطنيها واستعادة قدرتها على ممارسة العنف. لا يكفي، ليحكم شعب ما نفسه، أن تكون حكومته رافضة لممارسة العنف ضده، إنما يجب أن تكون عاجزة عن ممارسة العنف ضده. باختصار، نريد أن يكون ضابط الشرطة كما كان ضابط الجيش فى الثورة، إذا جاءه أمر بإطلاق النار على الناس، ولو كان من رئيس الجمهورية، فإنه يرفض، فيعجز آمره عن إصدار أمر كهذا. 
أيها الناس، إذا افترقنا فأبشروا بالشرطة تعود إليكم كما كانت، فليثق الأعزل بالأعزل، إن من يسعى للسلاح لن يملك السلاح بل سيملكه السلاح، ولو كان هذا السلاح قنبلة غاز وهراوة، فكلها مصنوع فى الولايات المتحدة الأمريكية، وهى كانت الحاكم الفعلى للبلد ثلاثين عاما، وساذج من يظن أنها ستسمح له سماحا أن يحكمها، إنما يجب أن تجبر على ذلك قسرا وهذا لا يكون وإلا ونحن جميعا فى الميادين، الشعب والشعب يدا واحدة. 
---------------------------------
بيكتب حلو قوي مش كده؟ :) امال انا قافشة في رقبته واحتليته وجبت له حمى ليه؟ 
بصوا بقى
اللي حصل بقى ان انا رحت اسلم عليه لما جه من امريكا، ورغينا شوية، وعبر عن قلقه مما اقلقني لانه متعود يطمني، فقال فكرة ان التيارات السياسية بتختلق المشاكل، لكن لو مرشحين الرئاسة ممكن يتبنوا مبادرة للمصالحة الوطنية وتبقى فعالة وقال: وممكن نقابلهم انا وانت.. بس.. كانت آخر كلمة قالها قبل ما يخش في الأسر بقى.. قفشت انا في الكلمتين دولم واحتليته زي حلف شمال الناتو لما بيتلكك بأي استغاثة
رحنا بقى اخدنا لفة على مرشحي الرئاسة واللي ابدوا استعدادهم لتبني المبادرة دي هم تلاتة:
د. عبد المنعم ابو الفتوح، د. محمد البرادعي، حمدين صباحي
وعندهم حلول لخلافات الدستور اولا دي، وكان حمدين قال لنا انه قال في اجتماع انها تتحل بمواد فوق دستورية، بعدها الدكتور البرادعي كتب مبادرة المواد فوق الدستورية وهو كمان كان شغال فيها من قبل كده
د. عبد المنعم ابو الفتوح موافق معانا على كل الكلام اللي مكتوب في المقال
مركز هشام مبارك عنده مبادرة لإعادة بناء الداخلية، وانا رايحة احضر الاجتماع بتاعهم النهاردة ان شاء الله، عشان نشوف ونعرضها على مرشحي الرئاسة يتبنوها سوا ولما ان شاء الله يطلقوها كمبادرة للاجماع الوطني لجان الدفاع عن الثورة تحاول تفعلها على الارض 
وبكده يبقى فيه كذا جهة اتربتطت مع بعض
احنا كنا فكرنا ان الخطوة الجاية ان شاء الله المرشحين التلاتة يقعدوا مع بعض قعدة ودية، وبعدين يطلعوا مع بعض عند بلال - لسه ما كلمتوش بس ده انا احتليته من زمان فخلاص ما بقاش يطالب بحق تقرير المصير - ويطلقوا المبادرة دي من عنده
وقولوا يا رب... ان شاء الله ربنا يسهلها المهم ان تلاتة من تلات اتجاهات اشار لهم تميم في مقاله حيعلنوا انهم مش متخانقين ولا حاجة
وحنحاول نقابل حد من الاخوان برضه
بس تميم سافر... هو ازاي يخلع كده ويسيبني؟ عموما هم كام يوم انا حاشيل مؤقتا ولما يرجع حابقى اطلعه عليه بقى

هههههههههههههههه لا حول ولا قوة الا بالله

يا عيال.. انتوا عاملين وقفة قدام المجلس العسكري؟ 
طب الداخلية عايزة تعرف مين بقى اللي داعي لها هههههههههههههههههههههههههه
صحيت الصبح لقيت الدكتور صفوت حجازي متصل بيا، كلمته فقال لي: هو انت عاملة مشكلة مع المجلس او داعية لوقفة ضده؟
قلت له: انا؟ 
قال لي: ما انا قلت كده برضه.. اصل احد مساعدين وزير الداخلية اتصل بيا وقال لي فيه وقفة قدام المجلس العسكري هو انت اللي داعي لها؟ فقلت له لا.. فقال لي طب نوارة اللي داعية لها؟ قلت له نوارة؟ ممكن حد من المجلس نفسه بس نوارة مش ممكن
فقلت للدكتور صفوت: لاااااااااااااااا حووووووول ولاااااااا قووووةةةةة الا بالله.... سبحان المعز المذل يا ربي، وهم يا عيني مش عارفين مين اللي داعي لها، وبيتصلوا بالناس يقولوا لهم: انت اللي عملت الصوت ده يا لئيم؟ خلاص بقى.. هم عايزين يعرفوا ليه؟ يسيبوا العيال هم حيروحوا ويرجعوا اخر النهار ولو استعوقوهم يدوهم ميسد
هههههههههههههههههههههه
لا بس جامدين يعني.. برضه مصممين يعرفوا، مش عشان حاجة، بس اهي معلومة
ممكن يخشوا على الايفينت.. انما هي الوقفة ليه؟ عشان حاجة معينة ولا مجرد انت مش لابس الطاقية ليه؟ 
قال وانا اللي مخضوضة وباقول الداخلية استعادت نفسها.. هههههههههههههههه يا عينييييييي

Sunday 19 June 2011

طب هو ايه الغلط في مقال رشا عزب؟

انا مش عارفة انا كنت فين ومش دريانة بالدنيا.. هو انا عارفة انا كنت فين، كنت مشغولة شوية، بس خبر زي استدعاء عادل حمودة ورشا عزب للنيابة العسكرية عشان مقال في جرنال الفجر المفروض ان الناس على الاقل تبعته لبعض على موبايلاتها.. ولا الهوا، وكنت مش باخش التويتر كتير، امبارح قالوا عادل حمودة استدعوه في النيابة العسكرية، وما اعرفش انهم استدعوا معاه رشا عزب
وبصراحة بقى، ما اتخضتش على عادل حمودة، اقصد يعني افتكرت انهم مستدعيينه عشان مقال كتبه ولا حاجة، فكبرت يعني، عادل حمودة وواصل وكده، حيروح يشرب قهوة ويرجع
بس دلوقت عرفت انهم استدعوه عشان نشر مقال رشا عزب ده
وبما ان موقع الفجر تقيل ومش بيفتح بسهولة فانا حانشر المقال اهو اللي استدعوهم عشانه: 
نشرت جريدة الفجر في عددها الاخير الصادر بتاريخ 20/6/2011 تحقيقا للصحفية رشا عزب تناولت فيه خوفها على المكتسبات التي حققها ملايين الثوار في التحرير عندما رفعوا هتافا خرج من قلوبهم قبل حناجرهم " الجيش والشعب ايد واحدة "


ثم تناولت في تحقيقها ما اعلنه بعض النشطاء عن وقائع تعذيب واصرار المجلس العسكري على التكذيب ورفض التحقيق رغم اصداره البيان رقم 50 ينفي فيه ما جاء في البيان 45 وتأكيده انه سيفرج عن الثوار المقبوض عليهم في 9 مارس، ثم اضافت بعض ما رأته من تجاوزات حدثت بمقر الشرطة العسكرية بمدينة نصر.


وكتبت تقول :






تفاصيل اجتماع ساخن داخل مقر المنطقة العسكرية






وقفت علي باب الجنة..أحرسها وحدي..أنا رضوان الميدان وأيوب الليالي الطويلة السوداء..أنا النجمة الوحيدة في سماء العدل..أنا اليقين في زمن الشك والسعيد بفطريتي القادر علي تحويل اللغة الجافة إلي ذات ومعني ونبض في الجسد المرتخي..أنا الشعب الذي حمي ثورته وحدي لا شريك لي..العسكر الذين يرتدون ملابس الجندية والشرطية يتبعونني.. النسر والسيوف المعلقة علي أكتافهم.. منحة مني وليست علي ..لأنني أصل الأشياء جميعا.






يستحق هذا الشعب أفضل من هذه الكلمات وأعرق..يستحق لأنه انتفض وقدم التضحيات جميعا سواء علي مستوي اليوم العادي والنضال من أجل تعليم الأبناء..من أجل شراء أنبوبة البوتاجاز ورغيف الخبر الفقير وحتي الوقوف علي أبواب ثورته ليشعلها ويحميها.. وحماية الثورة ليس شأنا تعني به المؤسسة العسكرية وحدها..فلا يمكن حرمان الصانع من صنعته والخباز من خبزه.. ولا يمكن أن نظل ننادي علي المطالب والحقوق التي انتزعناها بالدم والروح.. لا يمكن أن نبيع أهم ما في ثورتنا هو شعورنا بالكرامة..لا يمكن ان تغلق سجون الداخلية لتفتح سجون الحربية ولا يمكن أن تتحول منطقة مجمع المحاكم العسكرية إلي لاظوغلي جديد.. يواصل النشطاء والثوار معركتهم ضد التعذيب والمحاكمات العسكرية للمدنيين، ضد سيطرة أي مجموعة علي مكتسبات حققتها الملايين.. هذه هي الرسالة التي وجهت لقيادات المجلس العسكري في الاجتماع الأخير الذي حضره عدد من النشطاء والذي انتهي بثلاث توصيات مهمة تنتظر جدولا زمنيا لتنفيذها وهي الوعد بمناقشة نقل ملف المحاكمات العسكرية إلي قاضي تحقيق وإعادة النظر في وقف المحاكمة العسكرية للمدنيين بشكل عام والتعهد بالإفراج عن الثوار بالإضافة إلي التحقيق الكامل في جميع الانتهاكات التي وقعت من أفراد من الجيش خلال الشهور الماضية.






ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ






مواجهة الرويني بفيديوهات تعذيب الثوار






1 - اللواء الرويني يبدو مذهولا من صور التعذيب ويعتذر لإحدي الفتيات عما جري لها في السجن الحربي


2-اللقاء كان مشروطاً بدعوة نشطاء المحاكمات السياسية والحديث


في الملفات المسكوت عنها






في تمام الثامنة والنصف من مساء يوم جمعة الغضب 28 يناير في ميدان التحرير، شاهد المصريون لأول مرة الدبابات تسير بجوارهم.. شاهدوا أفراد الصاعقة بالملابس العسكرية المميزة وشاهدوا المدرعات تقف علي أبواب الشوارع..في هذه اللحظة كانت الجماهير قد أجهزت علي الداخلية خلال أربع ساعات ولم يكن هناك حل لدي النظام سوي أن ينزل الجيش..






لا يعرف أحد منا كيف خرج الهتاف الشهير "الجيش والشعب ايد واحدة" لكننا ادركنا علي الفور أن الهتاف خرج كنوع من "التثبيت" وهي طريقة مصرية خالصة يقوم بها الناس لتحييد الغريب القادم وغير المعروفة ميوله.. ولذلك خرج الهتاف لضمان الأمان واجتناب حدوث أي معركة اخري في وقت متوتر.. ظلت العلاقة علي هذه الوتيرة رغم كل المهازل التي وقعت في موقعة الجمل علي مرأي ومسمع من قوات الجيش، إلا أن الشعور العام داخل الميدان كان يشير دائما الي عدم المواجهة والحماية تحت مظلة هتاف"الجيش والشعب ايد واحدة"الذي تحول الي"اكليشيه"من اكليشيهات الثورة..






وبالتوازي مع الدور السياسي الذي يلعبه المجلس العسكري باعتباره ممثل السلطة السياسية الوحيدة للبلاد، كانت هناك ممارسات لهذه السلطة علي الارض خاصة مع الغياب الأمني المتعمد للشرطة..هذا الدور الواضح للشرطة العسكرية وغيرها من القوات التابعة للجيش ظل يحكمه توتر مكتوم حتي وقعت أحداث فجر 26 فبراير وهو تاريخ اول اعتصام يفضه الجيش بالقوة وتم الاعتداء علي المعتصمين ثم الاعتذار لهم في صحف اليوم التالي، ثم هدأت العاصفة باستمرار الاعتصام لإسقاط حكومة شفيق وبالفعل تغيرت الحكومة بالكامل بعد عشرة ايام من الاعتصام..وفي 9 مارس دخلت المواجهة الي منطقة جديدة أكثر صدامية حين فض اعتصام التحرير قرابة السادسة مساء بالتعاون بين قوات الجيش وافراد مدنيين ساعدوا علي ذلك تبين بعد ذلك انهم من التحريات العسكرية وتم إلقاء القبض علي 200 ناشط سياسي من الموجودين في ميدان التحرير وتعرض غالبيتهم للتعذيب والإهانة بجوار المتحف المصري، وظل المتحف المصري ايقونة للتعذيب لفترة بسبب إلقاء القبض علي النشطاء وتعرضهم للتعذيب بجواره..توالت عملية فض الاعتصامات بالقوة من قبل الجيش وتكررت في كلية الإعلام وفي ماسبيرو وتجلت في 9 أبريل الذي اطلقنا عليه"جمعة الرصاص"وفي كل الحالات السابقة وقعت حوادث عنف كثيرة من قبل أفراد في الجيش ونبهت جماعات حقوقية ومجموعات من النشطاء السياسيين الي تكرار حوادث العنف والتعذيب لكن البيانات العسكرية كانت قد رفضت مطلقا الاعتراف بهذه الوقائع وأعلن المجلس العسكري أنه يحمي الثورة والثوار، وبالتالي ظل الصدام هو واقع الحال الدائم بين النشطاء والمجلس العسكري الذي تكررت ممارساته في هذا الصدد لفترة قاربت الاربعة اشهر..






في هذه الفترة تراوح أداء المجلس العسكري بين الحوار الضعيف مع بعض القوي السياسية والصدأم العنيف، فلم يكن مقبولا بشكل او بآخر أن يعلن النشطاء دائما عن وقائع تعذيب بينما يصر المجلس علي رفض وتكذيب هذه الوقائع دون الإعلان عن التحقيق فيها أو النظر في صحتها.. لكن بعد مرور كل هذا الوقت علي انتهاكات الشرطة العسكرية، لم يعد ينفع الاكتفاء بالتكذيب، بل اصدر المجلس العسكري بيانه رقم 50 ينفي ما جاء في بيانه رقم 45 واكد أنه سيفرج عن الثوار المقبوض عليهم في أحداث 9 مارس بعدما كان ينفي هذه الحقيقة وأنه لا يقبض سوي علي البلطجية والخارجين علي القانون، وبالتدريج ومع استمرار الضغط السياسي من مجموعة "لا للمحاكمات العسكرية" التي تكونت عقب فض اعتصام 9 مارس وعملت بشكل منظم علي توثيق انتهاكات الشرطة العسكرية وأفراد الجيش، بدأت الصورة تتغير وصارت هذه القضايا مطروحة علي الاجندة السياسية في مصر بعدما كانت في خلفية الصورة بسبب تقاعس القوي السياسية القديمة والوليدة علي طرحها سياسيا بسبب صدامها المباشر مع رأس السلطة السياسية في مصر الان..






ونظرا للأسباب سالفة الذكر، حاول المجلس العسكري الرد بإقامة لقاءات ومؤتمرات مع شباب الثورة لمحاولة تغيير الصورة التي تصدرت منذ فترة، وتمت الدعوة الي مؤتمر تحدث فيه قيادات المجلس بينما ظل الشباب جالسين في خلفية القاعة، بالإضافة الي تنظيم مظاهرة علي باب مسرح الجلاء الذي نظم فيه مئات من الشباب ردا علي المؤتمر بسبب تصريحات قيادات الجيش علي انتهاكات فحص عذرية المتظاهرين، وبالطبع خرج اللقاء كأي مؤتمر نظم من أجل التلميع السياسي وخرجت مجموعات أكبر من الشباب أكثر صدمة من أداء المجلس العسكري بالإضافة الي مقاطعة عدد كبير من المجموعات الشبابية للقاء من الاساس..






لم يعد يبقي سوي المواجهة إذن.. ولم يعد هناك مفر سوي رؤية الواقع علي حقيقته، حين تقدم الدكتور ممدوح حمزة المتحدث الإعلامي للمجلس الوطني بمذكرة مبسطة عن تجاوزات المجلس العسكري خلال الاربعة اشهر الماضية واحدثت نقاشا واسعا داخل المجلس العسكري الذي طلب دعوة المجموعة القائمة علي رصد انتهاكات الشرطة العسكرية والمعروفة إعلاميا بمجموعة "لا للمحاكمات العسكرية" لعرض الملف الكامل الذي أعدوه خلال الفترة الماضية بالوثائق والشهادات..عرضت الفكرة علي المجموعة بشكل داخلي ووضعت شروطا لهذا اللقاء ومنها أن للمجموعة الحق في اختيار من يذهب للقاء بالإضافة الي تحديد موضوعات النقاش وهي المحاكمات العسكرية والانتهاكات والتعذيب وقضية كشوف العذرية وبناء علي ذلك تم تجميع الملفات اللازمة التي قدمت لممثلي المجلس العسكري مع تحديد مطالب واضحة قبل اللقاء لتكون نواة أساسية للحوار. مع اختيار ثلاثة من المجموعة للحديث في هذه الملفات وهم احمد راغب المحامي وراجية عمران المحامية ومني سيف الناشطة في مجموعة «لا للمحاكمات العسكرية» بالإضافة الي الدكتورة أهداف سويف فضلا عن شهادتين لشاب وفتاة من الذين ألقي القبض عليهم في التحرير وتعرضوا لتعذيب نفسي وبدني..وبالطبع بحضور الدكتور ممدوح حمزة.






وخلال خمسة ايام، عملت مجموعة «لا للمحاكمات» علي إعداد هذه الملفات الساخنة لتقديمها الي المجلس العسكري كوثيقة للحوار، وفي صباح يوم الاثنين في تمام الثانية عشرة ظهرا وصلت المجموعة الي مقر المنطقة العسكرية المركزية بالعباسية ليبدأ الحوار مع اللواء حسن الرويني قائد المنطقة العسكرية المركزية واللواء سعيد عباس واللواء مجدي بركات..وعلي عكس غالبية الحوار مع المجلس العسكري، بدأ النشطاء والمحامون في الحديث بينما ظلت القيادات العسكرية يستمعوا الي الملفات المتعددة التي تؤكد تجاوزات وانتهاكات عديدة.. لم يجد جنرالات الجيش أي جدوي سوي مواجهة هذه المعلومات ولا فرار من إنكارها.. ولكن هذا لم ينفي أن اللواء الرويني بدا مذهولا مما يراه من صور للتعذيب وما يسمعه من شهادات حية"، كما اعتذر اللواء الرويني لمروة عما جري لها في السجن الحربي، مؤكدا أن التصرفات الفردية لا تعبر عن اخلاقيات الجيش ومبادئه الاساسية.






ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ






ملف التعذيب والانتهاكات وكشوف العذرية..






تهديد المعتصمات بتوجيه تهمة الدعارة






انفجر هذا الملف علي مصراعيه، وحظي بنصيب الأسد في الجلسة نظرا لاشتباك موضوعاته وتفاصيله وحالاته الكثيرة، وربما لأنه اللغم الذي فجر العلاقة بين الثوار والمجلس العسكري في الفترة الماضية..احتوي الملف علي عدد من الانتهاكات طبقا لتصنيفها كما جاء في الملف..انتهاكات جسدية مثل التعذيب الجسدي المبرح الذي تعرض له عدد كبير من الثوار بجوار المتحف المصري يوم 9 مارس..ما جري في هذا اليوم يتلخص في جمع عدد كبير من المعتصمين داخل ساحة مفتوحة وتم إلقاؤهم علي الأرض دون ان يرفع احد رأسه حيث بدأت حفلة التعذيب الكبري باستخدام أسلاك الكهرباء والكرابيج والعصي والجلد الأسود السميك ولم يسلم أحد من الـ «170 شاباً» من نار التعذيب التي تشابهت مع حفلات تعذيب أمن الدولة المعروفة..وبالطبع كشفت هذه القضية بعضاً مما خرجوا في هذا اليوم مثل المغني رامي عصام الذي غني للثورة كثيرا داخل الميدان وتعرض لحفلة تعذيب خاصة بالإضافة إلي حلاقة شعره بالموس وتركيعه لفترة طويلة..قدمت شهادة رامي عصام بالفيديو والفوتوغرافيا التي التقطت له فور خروجه من المتحف وهو يحكي عن تجربته المريرة..بجانب شهادة رامي قدمت شهادة الممثل علي صبحي الذي استكمل رحلة التعذيب حتي السجن الحربي وهناك تعرضوا لأبشع انواع الإهانة وفي مقدمتها أنهم شاهدوا صورة الرئيس المخلوع داخل السجن الحربي ولم يصدقوا ما يحدث!!






تضمنت الشهادات عدد 35 شهادة من الثوار والمواطنين الذين تم اعتقالهم منذ بداية أحداث الثورة وهي الشهادات التي كشفها مركز النديم للتأهيل النفسي، وهذه الشهادات قدمت معلومات هائلة عن تحول قضية التعذيب إلي أداة ومنهج متبع مع كل المقبوض عليهم منذ 9 مارس ومن بينهم عمال وصحفيون ومديرو شركات وربات بيوت وطلاب ومهندسون وكلهم قبض عليهم في التحرير أو أثناء فض مظاهرة لاظوغلي وكان واضحا من جميع الشهادات أن المقبوض عليهم تعرضوا للإيذاء النفسي والإهانة وكذلك تعمد إهانة الثورة ومن قام بها ..ومن الملاحظ أن الشهادات تضمنت شهادة «5» من المنصورة وتم إلقاء القبض علي أصحابها في3 فبراير أي أثناء الثورة، مما يدل علي حقيقة أن إلقاء القبض وتعذيب الثوار بدأ من فترة طويلة، بينما تسارع الأحداث جعل هذه القضية بعيدة عن الأنظار، كما أكدت هذه الشهادة أن الثوار كان يجري تعذيبهم أثناء الثورة في السجن الحربي بسبب مشاركتهم في المظاهرات والأحداث الجارية..ليس هذا فقط بل أكدت الشهادات ان التحقيق والتعذيب كان يتم داخل مقر الشرطة العسكرية بمدينة نصر منذ الأيام الأولي او بالسجن الحربي بالهايكستب..ومن بين الحالات التي خرجت من السجن، خرجت دون ملابس تقريبا وتم إلقاؤهم في الصحراء وبعضهم لقي حتفه بسبب ما تعرض له في الطريق، وبالنسبة لمعاملة البنات وسط هذه الأزمات، فغالبية الشهادات أجمعت أن افراد القوات المسلحة يتعاملون معهن باعتبارهن خريجات بيوت دعارة ويتعمدون الإساءة من هذا المستوي لضمان الإيذاء النفسي وهذا ما تجلي في قضية كشوف العذرية التي دافعت عنها قيادات المجلس العسكري لكونها إجراء طبيعياً يتخذه الجيش مع العاملات فيه..وبالطبع تم توقيع الكشف علي البنات بالقوة وبعد صعق معظمهن بالكهرباء بعدما رفضن هذا الإجراء الصارخ، هددوهم بأن أي فتاة ستوجه لها تهمة الدعارة بجانب التهم الاساسية إذا لم تخضع لفحوص كشف العذرية..






ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ






ملف المحاكمات العسكرية..






آلاف المتظاهرين في السجون منذ 28 يناير






ملف المحاكمات العسكرية التي شهدتها مصر خلال الفترة الماضية وبالتحديد منذ نزول الجيش إلي شوارع مصر في 28 يناير، وتضمن الملف نصوص البيانات العسكرية بداية من البيان رقم 1 مرورا بالبيانات رقم 23 و24 و34 و35 و45 وأخيرا البيان 50 حيث تضمنت هذه البيانات العسكرية التزاما واضحا بحماية المتظاهرين والثوار ووصولا إلي قرارات اعتقال بعضهم ثم الإفراج عنهم بعد رحلة عذاب استمرت شهوراً طويلة.. وفي هذا الملف تم الحديث عن آلاف من المصريين الذين طالتهم المحاكمات العسكرية دون أن يتوافر أي ضمانات قانونية للدفاع عنهم أو حتي معرفة ذويهم مواقعهم علي وجه التحديد وأكد المحامون المشاركون في الجلسة أن محاكمة المدنيين أمام المحاكم العسكرية هو خرق لحق إنساني أصيل بالأساس.. كما كشف المحامون عن تعرضهم للمضايقات وسوء المعاملة داخل النيابات العسكرية، وعدم معرفة أي معلومات واضحة وكافية عن المتهمين وطرق محاكمتهم أو حتي سبل الدفاع عنهم، مما يعيق عملية العدالة بشكل واضح ومقلق.. كما أكدت المعلومات أن هناك أعداداً كبيرة تصل الي الآلاف قدموا إلي المحاكمات العسكرية دون محامين وتم إلقاء القبض عليهم من التحرير والأحياء والمحافظات المختلفة وتم توزيعهم علي سجون القطا والفيوم والوادي الجديد.. لذلك طالب المحامون بسرعة الكشف عن أسماء جميع المحبوسين علي ذمة القضاء العسكرى وتحويل ملفهم الى قاض مدى مع إعادة المحاكمات فى ظروف أفضل وفى وجود المحامين كما تقديم قائمة مبدئية تضم 153 اسماً للمقبوض عليهم ومحاكمتهم دون وجود محام.










وفى تعقيب على ما تم نشره بالجريدة ارسل الدكتور ممدوح حمزة بيانا الى رئيس تحرير الفجر الاستاذ عادل حمودة وتم نشره على الموقع الالكترونى أول امس الخميس بتوقيت 16/06/2011 06:17:15 موهو ينص على الأتى:








بيان عاجل وهام من د . ممدوح حمزة










السيد الاستاذ / عادل حمودة : رئيس تحرير جريدة الفجر










بعد التحية






طالعتنا جريدة الفجر في عددها الصادر بتاريخ اليوم عن اجتماع جري داخل المنطقة العسكرية واشير للموضوع في الصفحة الاولي ونشر علي الصفحة الخامسة.






وحيث انني كنت من ضمن المجتمعين فإنني اتقدم لسيادتكم بالملاحظات الاتية التي يجب وضعها لتصويب الامور :-


ان الاجتماع داخل المنطقة العسكرية لم يكن ساخنا وانما كان اجتماعا هادئا جدا واتسم بالود والعلاقة الطيبة ولم يعل صوت واحد طوال الاجتماع.


لم يتم عرض اي فيديوهات من اي نوع وبناء عليه لم يكن هناك مواجهات .






تم تقديم بعض الصور التي كانت موضع بحث من الجانب العسكري بالاجتماع ولم تؤد هذه الصور الي ذهول من الجانب العسكري فالصور كانت لبعض العلامات البسيطة علي الجسم ولم تكن تصور اشخاصا تعذب.






انا لم اسمع ولم ار ان قام اي جانب في الاجتماع بالاعتذار للجانب الاخر لكن كان هناك عرض وشرح واتفاق علي تشكيل لجنة مصغرة من الجانبين باستمرار الحوار في ملفات المحاكمات العسكرية.






لم اسمع تهديدا بتهمة الدعارة اثناء الاجتماع .






واخيرا كان لي شرف الاعداد لهذا الاجتماع ولم يكن هناك اي شرط لطرف من الطرفين لحضور الاجتماع فكل شيء كان مطروحا للمناقشة وكان الاجتماع ايجابيا لابعد الحدود حتي تم التوصل الي نتائج جيدة ومثمرة .






وانني اتقدم للمنطقة العسكرية المركزية بوافر الشكر والاحترام علي قبول الدعوة لهذا الاجتماع والعمل بجدية لانهاء اي سوء فهم او خلافات مع الشباب .






ممدوح حمزة






وقد تم انشاء صفحة على الفيس بوك اسسها شباب الثورة الحملة الشعبية للتنديد بإستخدام الجيش للعنف و التعذيب واعتقاله للمتظاهرين بعنوان :معاً للتضامن مع رشا عزب وعادل حمودة






http://www.facebook.com/event.php?eid=174854415908758
------------
طب معلش.. ممكن اعرف ايه اللي يضايق في المقال ده؟
انا عمري ما كنت اتخيل ابدا ان رشا عزب تكتب عن القوات المسلحة بالعاطفة دي كلها، ده انا قعدت اعيط وانا باقرا المقال، هي اصلا ولا باين عليها كل المشاعر دي ههههههههه، وما كنتش اعرف ان الحكاية كده، ما كنتش اعرف انها من كتر ما بتحب الجيش زعلانة منه وده اللي بيخليها عنيفة في ردودها كده
وكل الكلام اللي يدوب الحجر ده تكون نتيجته انهم يستدعوها في النيابة العسكرية؟ 
:'(
وبعدين يقولوا نشرت اخبار كاذبة.. ايه الاخبار الكاذبة؟ انها قالت ان الرويني كان مذهول واعتذر لمروة وقالها دي تصرفات فردية
طب على فكرة، لما اللواء الرويني يقول دي تصرفات فردية ده يعد اعتذار لانه مش حيقول لها انا اسف يا بنتي وايده تترعش.. مجرد انه يقول ده تصرف فردي نقدر نعتبره اعتذار ضمني، فده مش كدب، ثانيا بدا مذهولا... ده تقدير شخصي، يعني يستدعيها في النيابة العسكرية يقولها لا ما كنتش مذهول؟ والنبي ده اسمه كلام؟ وكل الكلام المؤثر اللي خلاني اعيط وانا متخانقة معاها ده ما اثرش فيهم؟ دي كان ناقص تكتب في آخر المقال: ما كانش العشم
وبعدين انا مش شايفة المقال فيه اي ادانة للمجلس، بالعكس، ده فيه كمان تبرئة لهم من اللي حصل وانهم ما يعرفوش ان ده بيحصل، وانه بيجتمع بالناس ويسمعهم، يعني مقال في صالح المجلس مش ضده
ده حتى لو اللي نقل لها نقل لها غلط وهي كتبت حاجات غلط زي ماهو واضح في جواب ممدوح حمزة، بس الحاجات اللي اعترض عليها ممدوح حمزة كلها في صالح المجلس ومخلية صورته حلوة بشكل مؤثر جدا
بعدين ماهم نشروا جواب ممدوح حمزة وصححوا.. وهي لو عواطفها كده ناحية الجيش يبقى المفروض ما يزعلوهاش تاني بقى.. انا عمالة اعيط
:'(

لو 8 يوليو للدستور انا شخصيا مش نازلة

الليلة دي لازم تتحل عشان نشوف اللي ورانا، احنا كده حنفضل متعطلين 
لو الكلام ده صحيح ودعوة يوم 8 يوليو للدستور اولا يبقى انا شخصيا مش حانزل، جرا ايه فيه ايه؟ هو كل ما النتيجة مش حتعجبكم حتعيدوا الماتش؟ وده حيحصل بقى في الانتخابات البرلمانية والرئاسية؟ حتفضلوا تعملوا زي عم ايوب وتقولوا: لأ.. تؤ.. انا حايس احد هناااااك انا مش مرتاح في السرير ده
لو تم تجاهل نتيجة الاستفتاء واتعمل الدستور اولا عكس الرغبة الشعبية تبقى سابقة خطيرة ويبقى عمرنا حيبقى عندنا ديمقراطية ابدا، وكل ما تطلع النتيجة كخة حتغيروها، ايه الحمرأة دي؟
لو ده عنوان يوم 8 يوليو انا مش نازلة... هو مش دور كوتشينة خسرتوه وبتفركشوا الورق
وبلاش سفسطة بقى وكلام في الفاضي
بتوع الدستور اولا دول بيعطلونا عن القضايا الحقيقية اللي احنا محتاجينها زي اكمال محاكمة مبارك، وفتح قضايا زي القديسين والطيارة اللي كان فيها الظباط، وبناء داخلية جديدة، والغاء الامن الوطني، والحد الادنى والاقصى للاجور
وبدل ما يحققوا مطالب الشعب عايزين يعادوا الشعب
انتوا متسلطين علينا ولا ايه؟ لا انا كده ابتديت اشك بقى، ده مش خلاف في الرأي ولا وجهات نظر، ده اصرار على تفريق الصف، وعلى اهدار طاقتنا في حاجات ما تهمش الناس، واصرار على الابتعاد عن اهداف الثورة.. كده تبقوا متسلطين علينا
والله اعلم بقى مين اللي مسلطكم، المجلس ولا امريكا ولا الفلول.. المهم ان ريحتكم بقت نتنة وفاحت 
انا مسئولة عن نفسي بس.. 
انا مش نازلة

Saturday 18 June 2011

توكلنا على اللي بيأكلنا

مبدئيا: طوني بلير اتحشر وبيقول لنا اجلوا الاستنخابات... مين الحمار ده؟ صنعته ايه يعني؟ هو مال امه؟ 
ثم... أأمن حاجة لضمان الديمقراطية ان شاء الله، اننا نعمل انتخابات، وبعدين نكتب الدستور
ولما نكتب الدستور، الجيش بتاعنا حيبقى وضعه زي سابق، يعني حبة علينا وحبة عليه، يعني مش حنتدخل في مالياته، وهو ما يتدخلش في سياستنا
الحقيقة اقتراح ان جيش مصر يبقى زي جيش تركيا يرقى الى الخيانة العظمى
الجيش المصري عقيدته حماية الوطن وسلامة اراضيه وحماية الشعب.. الجيش التركي زي الداخلية، شغلته حماية الدولة والنظام، الجيش التركي انقلب على الديمقراطية اكتر من مرة، الجيش التركي له صلاحيات حماية علمانية الدولة والدستور لإن اتاتورك عمل انقلاب.. الاتراك ما بيعملوش ثورة كل تلاتين سنة زينا... ما بيعملوش ثورة خالص، اللي بيقلب نظام الحكم هو اللي حقه يبقى له الصلاحيات
واللي قلب نظام الحكم عندنا هو الشعب.. وبالتالي هو اللي يبقى له الصلاحيات
الجيش وقف جنب الشعب يوم 11 فبراير، وعشان كده ما قبل 11 فبراير احنا ما نعرفش عنه حاجة ومش عايزين نعرف عنه حاجة، واللي بيهدد بفتح ملفات ما قبل 11 فبراير مش عايز يفتح الملفات دي الحقيقة، هو عايز يقعد الجيش لحد ما يعمل معاه الصفقة الآتية، بمساندة وموافقة من امريكا
انا حالخص لكم الموضوع ايه بالظبط على لسان واحد قال لي كده في وشي وما اتكسفش يصارحني، والحمد لله ان كان فيه شاهد قاعد، الحكاية وما فيها كما يلي:
رحنا للشخص الفلاني ده، انا وصديق، ضمن لفة كنا بنلفها بحثا عن الاجماع الوطني وتوحيد الصف. الشخص الفلاني ده الظاهر انه اهم مما يبدو.. ده شخص يبدو انه حد مالوش سلطات كتير، وفيه ناس بتثق فيه، بس يعني مش الموفي ستار ولا حاجة، لكن هو هو نفس الشخص ده قابلته كذا مرة وقال لي على كذا حاجة بعدها بيومين لقيتها بتتحقق، بعدها بشهر لقيتها بتتحقق، بعدها باسبوع لقيتها بتتحقق، طبعا انا واحدة سليمة النية، نقية السريرة، مرهفة الانف والاذن والحنجرة قلت سبحان الله.. راجل عنده بعد نظر
بس بعد اللي هو قاله، ثم اللي عرفته بعد كده، يبدو ان الراجل ده بعيد النظر، طايل الايد، مسموع الحس مشرئب الفلنكات شلولخ، وهو ما يفسر التكبر اللي كان بيكلمنا بيه
قال لنا الآتي:
اهم حاجة فك الارتباط بين المجلس وبين الاخوان، دلوقت المجلس متخوف من فتح الملفات المالية بتاعته، ففريق القوى الوطنية اللي مش اخوان المفروض يقدم للمجلس حاجتين، اول حاجة انه ما يتحاسبش ماليا، تاني حاجة ان يبقى له سلطات حماية علمانية الدولة والدستور فهو كده حيلاقي نفسه كسبان، ودي حتبقى قضية اجماع وطني... من غير الاخوان طبعا. والاخوان حيضطروا يسكتوا والا حيبقى قدامهم انهم يواجهوا الجيش وهم مش حيواجهوه
انتهى
ههههههههههههههه
اجماع وطني من غير الاخوان ده بيبقى فيه مين؟ انا وتلاتة صحابي صح؟
طبعا انا ما اعرفش صاحبي اللي حضر معايا حيزعق لي اني قلت الكلام اللي دار ده ولا لا.. بس عادي يعني، علقة تفوت ولا حد يموت بجملة خنقته مني، المهم اني احذر من خطورة الكلام ده، لإنه خطر على مصلحة الوطن وعلى مصلحة القوات المسلحة وعلى مصلحة الثورة وعلى مصلحة اي حاجة في الدنيا وما بيصبش غير في مصلحة امريكا 
اولا: الفرق بين القوات المسلحة المصرية وبين الداخلية زي ما قلنا ان القوات المسلحة بتحمي الشعب والوطن والداخلية بتحمي النظام، واحنا عايزين نعيد بناء الداخلية بحيث انها تحمي الشعب مش تحمي النظام، مش اننا نغير عقيدة الجيش بحيث يبقى الداخلية والجيش ضد الشعب لصالح النظام
ثانيا: يعني ايه الاخوان حيضطروا يسكتوا والا حيواجهوا الجيش؟ هي بقت كده؟ تهديد بالسلاح يعني؟
ثالثا: عجبك ولا ما عجبكش المؤسسة العسكرية المصرية مؤسسة وطنية.. وطنية يعني ايه؟ يعني ولاءها للوطن مش للدولة. وده اللي نفعنا. وده اللي احنا عايزينه يستمر.. ولازم يستمر، ليه؟ لإن بقى بجد مصر ليست تركيا، احنا شعب بيعمل ثورة كل تلاتين سنة:
1882
1919
1952
1977
2011
يعني على الفين حاجة واربعين عيالنا حيعملوا ثورة كمان.. 1882 كانت هوجة عرابي، شعب وجيش، 52 كانت اعتصامات شعبية ثم الحركة المباركة للجيش، 77 السادات نزل لنا الجيش وفضل يبوس في الناس والناس تبوس فيه، 2011 مبارك نزل لنا الجيش فخلعه، بس تغيير عقيدة الجيش بالطريقة دي - وهو ما تسعى له الولايات المتحدة بقالها تلاتين سنة وما عرفتش في عز ايام المخلوع - حيخلي عيالنا لما يعملوا ثورة سنة 2046 الجيش يضربهم، لان شغلته يحمي الدستور بقى.. مش يحميهم هم
يعني مبارك ما يعرفش يغير عقيدة الجيش واحنا اللي نغيرها له بعد الثورة؟
رابعا: ماحدش عايز يفتح ملفات الجيش المالية.. الرغي ده مجرد تهديدات لاجبار الجيش انه يفضل قاعد، لكن ساعة الجد ما عملنهاش قبل كده ومش حنعملها، دي حاجة كده زي المادة التانية، ماحدش قابل اي تغيير فيها
خامسا: احنا في التوقيت الحالي لنا وضع حرج.. احنا موقعين اتفاقية حاطانا كلنا في مزنق ابن كلب، واللي يقرا ويكيليكس يعرف ان الجيش فضل يتحايل على الضغوط الامريكية من خلال تذرعه بالرغبة الشعبية، وولاء الظباط الصغيرين، وعقيدته اللي تنص على حماية الوطن فقط... و"كان على عيني والله يا امريكا... بس ما باليد حيلة بقى وآدي الله وآدي حكمته، لو نفذنا اللي بتقولي عليه الظباط الصغيرين والشعب المصري اللي ولاءنا له حينقلبوا علينا.. والله لنسيبها لكم ونستقيل ومنكم للناس بقى، احنا مافيش في ايدنا حاجة نعملها"... وشغالين على كده بقالهم تلاتين سنة، وده اللي نفعهم وخلاهم ما يشاركوش في الحرب على الارهاب، ويفضلوا يتدربوا على الجبهة الشرقية، وما يتعاونوش عسكريا مع اسرائيل.. الخ الخ الخ.. تعالى انت بقى لبس الجيش بتاعنا في الحيط واديله صلاحيات تعريه قدام امريكا: على عينك فين بقى؟ ما انت عندك صلاحيات اهي، استخدمها ونفذ اللي احنا طالبينه ماذا والا حطربقها والله.. 
سادسا: ايه الهوس بتركيا ده؟ ايه تركيا دي معلش؟ انتوا صدقتوا نفسكم؟ ايه تركيا؟ ايه تركيا؟ ايش جاب لجاب يعني ما تخلوناش نقول كلام شوفيني، هي تركيا عملت ثورة عمرها؟ احنا كل ما حد يكلمنا نعمل ثورة، ايه الشعب اللي زاهد في الحكم ده؟ يعمل ثورة وعايز غيره يحكم ليه؟ وبعدين الشعب ملزوم يحمي قواته المسلحة، مش يعريها قدام الاجانب
يا اما بقى عايزين تعملوا العمايل دي في الدستور يبقى تلغوا اتفاقية كامب ديفيد.. مش تعدلوها، تلغوها... خالص، لان ده اسمه تسليم اهالي ده
السلطة تبقى في ايد الشعب
حماية الدستور مهمة الشعب
حماية القوات المسلحة وعقيدتها مهمة الشعب
البلد دي بلد الشعب ومافيش مؤسسة مهما علا شأنها يبقى لها سلطة على الشعب، الشعب هو اللي له سلطة على كل المؤسسات وهو حر فيها يفردها ويتنيها، بفلوسه وشقاه وضرايبه وتعبه، وبمزاجه بيسيب حاجة ويقول مش عايز اعرفها، وبكيفه يقول لا كده ما ينفعش... ما تحكموش على رقبته حد.. ابدا، مافيش غير ربنا بس هو اللي يتحكم على رقبته، ولا عايزينا نبقى زي الجزائر؟
واللي خايف من الشعب بقى يروح
ايه يا اخواتي ده؟
هو الشعب ده عفريت بيطلع لكم بالليل؟
النخبويين خايفين من الشعب لينتخب الاسلاميين
والجيش خايف من الشعب لينتخب لهم واحد خاين يعمل فيهم اللي عمله مبارك
وامريكا وبلير خايفين من الشعب لينتخب لهم واحد ضد اسرائيل
بالنسبة للنخبويين، يقدروا يشوفوا لهم شعب تاني مدام احنا مش لادين عليهم... والشعب ده ينتخب اللي هو عايزه، والبلد حتتعمل زي ما هو عايز، وبطلوا تفضلوا تقولوا حنبقى ايران.. يا كدابين يا كدابين يا كدابين يا كدابين.. احنا حنبقى ايران؟ هو فيه بلد في الدنيا فيها محجبات بيرقصوا في زفة في الشارع غير عندنا؟ حنبقى ايران ازاي يعني؟ حيعملوا ايه؟ واحنا من امتى بنسمع كلام حد اصلا؟ البنات بتلبس حجاب لوحدها، لو الدولة طلعت قرار بفرض الحجاب البنات كلها حتمشي بالمايوه في الشارع... ويافطة ممنوع الوقوف قطعيا اللي تحتها عربيات راكنة صف اول وتاني وتالت وعربية كارو تشهد على كده... حيعملوا لنا ايه الاسلاميين؟ 
والمسيحيين اللي خايفين من الاخوان.. وحياة اعتصام ماسبيرو اللي عملتوا فيه قسم رجالي وقسم نسائي ولما جيت اولع سيجارة فضحتوا امي وواحدة ست لابسة تايير اسود وطرحة سودا وجزمة ريم سودا قالت لي: احنا في مكان محترم يا انسة اطفي السيجارة، فيه ست محترمة تشرب سجاير؟ وكمان قدام الناس؟
انا؟
طب بذمة النبي انت بالذات الاخوان حيعملوا فيكي ايه اكتر من اللي انت عاملاه في نفسك؟ حبست لي دمي وقعدت اقول يا رب جوزها يكون بيخونها مع طوب الارض وهي مسودة عليه عيشته كده، بعد شوية جوزها جه ياخد منها ساندوتشات عبر الحاجز اللي بين الحريم والرجالة وشفته بقى الحاج... يخون مين؟ ده يوم ما يحب ينحرف حيتفرج على ليلى الشايب في قناة الجزيرة 
طب الاسرة دي السلفيين حيصوروهم من كل الزوايا ويكتبوا تحت صورتهم: اسرة من اهل الجنة، ويعلقوها على المنبر 
بالنسبة للجيش اللي خايف منا ننتخب له حد خاين يعمل فيه اللي مبارك عمله فيه
طيب على فكرة احنا عمرنا ما انتخبنا حد خاين.. احنا خلعنا الخاين.. اللي عمرنا في حياتنا ما كنا انتخبناه، لا هو ولا الخاين اللي قبله، ومش احنا اللي يتخاف منا فيما يخص الخيانة دي ابدا.. ابدا.. ده احنا فللي 
بالنسبة لامريكا.. نعم؟ مين دخلكوا علينا اودتنا واحنا بقميص النوم؟ ايه دول اصلا؟ 
-------
الاخوان بيتصرفوا بغباوة؟ عادي.. طول عمرهم، بس لهم حق النصيحة علينا
حوار الدستور اولا ده حوار فاكس وما حدش مهتم بيه ولا يهم اي حد من الناس، بس فيه خطورة ان امريكا تضغط في سكته والناس بتوع الدستور اولا صوتهم عالي، ما بيوصلش للشارع، لكن بيوصل لبلاد الفرنجة
ضغط بلاد الفرنجة مالوش اي وزن لو الشارع صاحي
والشارع مش حينزل يقول: الدستور مش اولا
العودة لقضايا الاجماع الوطني هي الاساس
فيه قضايا اجماع وطني كتير جدا، زي الامن الوطني، الداخلية، الحد الادنى والاقصى للاجور، محاكمة مبارك اللي ضربوا عليها طناش، استرداد الفلوس، حتى ممكن المجلس العسكري يساعدنا ويعمل بالونة من بالونات الاختبار، زي مثلا انه يقول انه حيفرج  عن جمال مبارك مثلا.. قوم الناس تسخن، كده يعني، لاغونا، انشالله حتى فتح المعبر بشكل طبيعي يا اخي، ولما قضايا الاجماع الوطني صوتها بيعلا الخوازيق اللي بتزرعها امريكا بتتلاشى، خصوصا ان البرادعي حلها حل لطيف وكويس ورخيص وابن ناس وقال نعمل وثيقة فوق دستورية.. اهو عداه العيب اهو الراجل، حتى لو مش عاجباك يا سيدي كل المواد اللي هو اقترحها، نتناقش فيها، انما من حيث المبدأ وماله، اظن دي تخرس بتوع الدستور اولا خالص.. ولا هه؟
كل الاطراف دلوقت غلطت... واما البشر يتفرقوا تلقي السما بتنفض.. كده السما انفضت كده
يوم 8 يوليو جاي، وعايزين نعمله للداخلية، بلا دستور اولا بلا دستور ثانيا بلا دستور خالص... احنا عشنا 18 يوم من غير دستور، حصل ايه؟ انجلترا عايشة من غير دستور
احنا حنولع في امه الدستور ده.. مش عايزين حد يمضينا على كومبيالات، من النهاردة مافيش دستور.. احنا الدستور.. احنا الدستور
وبلا اسلامية بلا علمانية بلا نيلة
احنا نتكلم في التفاصيل ثم التفاصيل ثم التفاصيل، تفاصيل بناء الدولة دي، عايزينه يبقى ازاي؟
اول تفصيلة: عايزين وزارة الداخلية بتاعتنا يبقى شكلها ايه؟
ومن هنا لحد 8 يوليو الاخوان يبطلوا غباوة والا حيلبسوا في الحيط، والقوى الوطنية الاخرى تبطل حركات قرعة واتصالات مش تمام، والنشطاء يسيبوا الجيش في حاله، هو من ايد الشعب دي لايد الشعب التانية بس انتوا وضحوا للشعب نفسكوا يعني وهو يكلمهولكوا... احنا عايزين نستعيد قدرتنا على الحشد
وعايزين حوار مجتمعي في تفاصيل بناء الدولة، مش عناوين لا تودي ولا تجيب ولا لها اي اثر مباشر على حياة المواطن وعاملة كده كأن حد بيحاول يجرنا نمضي على كامب ديفيد تاني
لا يا عم يفتح الله.. ما بنمضيش على ورق، احنا بنايين مش كتبة
نبتدي باعادة بناء الداخلية اول حاجة، ونحشد ليوم 8 يوليو على كده، ثم ننتقل بقى الى تفصيلة اخرى، الناس مش حتتصالح عشان قلبها على البلد، الناس حتتصالح عشان مصلحتها، والاخوان من ناحية، وبقية القوى الوطنية من ناحية تانية بيضروا بمصالحهم هم المباشرة... وانا عارفة انهم ما تهمهمش مصلحة البلد، بس مصلحتهم في خطر، وحسبي الله ونعم الوكيل
اه نسيت
بالنسبة للمسيحيين.... ماحدش يعملهم حجته، المسيحيين مش عايزين حاجة غير يصلوا بس، على فكرة، سيبوا لهم كنايسهم، وسيبوهم يبنوا كنايس ويفضلوا يصلوا يصلوا يصلوا... ما بيعملوش حاجة في حياتهم غير الصلاة، ما تسيبوهم يصلوا، اهي بركة

Thursday 16 June 2011

تويت ندوة

يوم 21 يونيو الساعة 6:30 على مسرح روابط ندوة تويت او تويت ندوة
الناس اللي على التويتر حتتجمع وتتكلم
الفكرة اصلا فكرة علاء، اننا نتجمع من آن لآخر ويبقى بينا تواصل على الارض زي التواصل اللي بينا على التويتر
الندوة اللي فاتت حرارتي كانت 39 وما عرفتش اروح
الندوة دي ان شاء الله حاروح بقى لازم
حيبقى فيه ناس بتتكلم اساسي وبعدين الكل حيتكلم
انا مبسوطة من الخطوة دي، لإن امبارح كنت قاعدة مع عزمي بشارة وقال لي القوى السياسية التقليدية بتتعامل معاكم على انكم خلاص شكرا عملتوا الثورة وانبسطوا؟ امشوا بقى، خشوا ناموا دلوقت عشان اللي حنقوله دلوقت كلام كبار ما يصحش تسمعوه، وراحوا راجعين بالزمن لما قبل الثورة وابتدوا يخشوا في سجالات ما كانتش مطروحة وانتوا بتعملوا الثورة، بس هي سجالاتهم القديمة اللي لا عملت ثورة ولا انتوا عملتوا الثورة عشانها، وقال لي استغنوا عنهم دلوقت زي ما استغنيتوا عنهم قبل كده، هم لازمتهم ايه في حياتكم؟ هم عملوا حاجة اصلا؟ وبعدين ايه الاعمار الكبيرة دي اللي تصدرت الشاشة فجأتن؟ 
وطبعا دي شكوانا كلنا
فاحنا احسن حاجة نشبك مع بعضينا، زي ما عرفنا نشبك الكترونيا حنعرف نشبك وشا لوشيا
نشوفكم هناك بقى، وان شاء الله اللي برة مصر حنتوت لهم على التويتر

Tuesday 14 June 2011

من الذي قتل رفيق الحريري؟

هو مبدئيا مصر دي اسمها المحروسة، والاوليا زاينين ترابها، وربنا ساترها معاها، واحب اقول للناس اللي بتضعف حديث "مصر كنانة الله في ارضه من ارادها بسوء قصمه الله" وبيحاولوا يضعفوا كل حديث في فضل مصر - وهم عارفين نفسهم كويس - العبرة مش بمحاولاتكم في تضعيف الحديث، العبرة بالواقع، الواقع بيقوي الحديث اهو
ايه لازمتها المقدمة الشوفينية دي؟ 
بالصلاة ع النبي، انتوا عارفين طبعا ان نجاتي بينفخ البلالين عشان عيد الميلاد، وموضوع محاكمة مبارك ده مش نازل لنجاتي من زور، والحقيقة من الناحية الانسانية انا مقدرة موقف نجاتي، بس انا لو مكانك يا نجاتي اطب ساكتة بما ان قلبي مش مطاوعني، واسيب غيري يتصرف، لكنك يا نجاتي مصمم تحنن قلبنا عليه
عمل ايه نجاتي، راح جاب لنا شمشرجي من القصر الرئاسي وخلاه يطرش الكلام اللطيف ده في روز اليوسف
سيبكم بقى من الفطار وكوباية العصير وفريدة ونادي الظباط، والريس اللي بياكل نفس الاكل اللي بياكله الشعب بالظبط الا وهو: الحيسمون والبامية ام صوص ابيض وكوب البرتقال الدموي وعصير الجريب فروت... وزي ما احنا عارفين محلات الحيسمون مالية البلد، وهو ما كانش بيجيب الاكل من برة
وقالك بيصلي ويصوم ويعبد الحي القيوم واتفاجئ لما لقى الناس بتموت تحت العربيات وبتموت وهي واقفة قام اخد خطوة جريئة وراح واقف قدام الشاشة البلازما من قريب
كوووووووووووووووول ده رغي
بص على ده

ايه ايه ايه ايه؟ مين؟ فين؟ ليه؟ واط؟ وير؟ باط هوين؟ 
رفيق الحريري كان بيمول بن لادن، وقال لمبارك، ومبارك كان بيتغدى معاه يوميا قبل ما يموت بشهور؟
طباخ الريس ده يتجاب من قفاه ويشهد قدام المحكمة الدولية بالكلام ده
دي شكلها احلوت قويييييييييييييييييييييييي
------
للامانة والتاريخ:
مينا زكري بقاله فترة بيقول لي ان معسكر الاعتدال هو اللي بيمول القاعدة عشان يخلطها بحركات المقاومة ويتحطوا كلهم في سلة واحدة وانا ساعتها ما صدقتوش وقلت عليه مجنون
واللي خلاني قلت عليه مجنون اكتر ان قال لي: يا نوارة مبارك هو الداعم الاول لما يسمى بالارهاب، وهو على رأس معسكر الاعتدال اللي بيمول القاعدة
وبصراحة كنت باسمعه واقول: يا حبيبي يا مينا... مبارك لسع لك مخك يا قلبي.. وكنت باسكت، صاحبي، حاعمل فيه ايه يعني؟ حارميه؟ 
بس كده يبقى في الامور امور