Thursday 31 December 2009

بعد وعد غالي بتطليع دين اللي خلفونا: نائب الوطني يسب الدين لنائب الاخوان

تحديث وتصحيح:
النائب بدر الدين القاضي ما قالهمش ينعل دين ابوكوا، عشان الظلم حرام برضه ربنا يحاسبني، قال لهم: "يا ولاد دين الكلب ح نطلع دين ابوكوا يا إخوان يا كفرة احنا ح نبني الجدار واللي ح يتكلم ح نطلع دين امه وح نعمل الجدار وح نكهربه"
هيهيهيهيييييييييي مصر ح تبقى سنية كهربا لا والابعد كمان اطرش، نائب جماعة هاني شاكر قال: انتوا عندكوا نتانياهو واسرائيليين. فسمعها: انتوا اسرائيليين. فراح رادد: انا اشرف منك يا ابن الكلب ولو ما سكتش ح اديك بالجزمة
ومادو بيقترح ان شعار مؤتمر الحزب الوطني القادم: من اجل دين امك انت
بالنوسبة لجماعة هاني شاكر المزنوقة فهي قبلت اعتذار احمد عز، وقالوا الطيب احسن: حبايب قلبي، ربنا يخليكوا ليا، ربنا ما يحرمنيش منكوا، اني احبك في الله
اللي لسة ما اتنقطش في البلد دي ح يتنقط منهم
احمد عز ده ح يمشي يعتذر عن سب دين مين وللا مين؟
وانا بدوري باقترح المرة الجاية في كلمته، احمد عز يحيي مفجر ثورة سب الدين لدين ابو ميتين ام الشعب ابن الـ....، وللا نقط ليه، ابن الوسخة، وده تطور طبيعي لتصريحات ابو الغيط اللي قال مصر بترعى القضية الفلسطينية من قبل ما تولدكوا امهاتكوا
امهاتهم ولدتهم منين؟ هذا ما سيوضحه السادة الوزراء ونواب الحزب الوطني في الحلقة القادمة
وسمعونا سلام يا ... امك يا ... امك يا ... امك ده الـ... ابوك والـ.... امك بتاعة سيد مكاوي الله يرحمه


النائب بدر الدين القاضي قال الشعب الفلسطيني على راسنا لكن ولاد الوسخة... ههههههههههه على حماس، فنواب الاخوان طبعا يعني يا عيني زعلوا، وانتوا عارفين الاخوان هاني شاكر من زمان، قالوا له: عيب كده

قال لهم: ينعل دين ابوكوا
طبعا نواب الاخوان يا عيني ما عرفوش يردوا
(الاخوان متعودين يواكبوا التطورات السياسية، انا شايفة انهم يدربوا مجموعة متخصصة في سب الدين والميتين والاب والام)
ونائب اخواني قرر يرد بطريقة هاني شاكر برضه راح الراجل قايل له انا اشرف منك يا ابن الكلب ولو ما سكتش ح اديك بالجزمة
--------
احمد عز دافع عن بطرس غالي وقال: لا.. الظلم حرام، بطرس غالي ما قالش ح اطلع دين اللي خلفوهم، قال ح اطلع روح اللي خلفوهم
--------
ايها السادة نحن في انتظار الشخرة او التدريعة القادمة... على الله ما تاخدهمش الجلالة بس ويعملوا زي الناس على الشعب وللا يعملوا زي المشجع الجزائري اللي عور فردوس عبد الحميد في عقلها الباطن
-------
مازال مناصري غزة من الفرنجة الصليبيين احفاد ريتشارد ولويس معتصمين في ميدان التحرير وقدام السفارات وقريت على التويتر ان فيه ظابط ضرب فرنساوي على وشه وجرحه
حقة لو الامن عملها وسلط المشايخ اللي هو مجندهم وطالقهم على العشوائيات بقاله سنين ومسميهم سلفية وهم خريجين اعلام والسن ومافيهمش واحد خريج شريعة، وخلاهم يفتوا بان ده غزو صليبي ينجس ارض الكنانة الطاهرة وراحوا مسخنين بتوع العشوائيات وطلعوهم يتصدوا للحملة الصليبية
ليه باقول كده؟ عشان النهاردة الصبح الفكرة دي خطرت في بالي، وانا مافياش شيء لله ولا حاجة، بس زي قلب الام كده، ماهو اللي ربى خير م اللي اشترا، بما انهم مش قادرين يضربوهم ممكن يسلطوا عليهم بلطجية
ده تحذير يا جماعة لاي حد له صلة بالشباب دول، الله يخليكوا حد يفهمهم يحموا نفسهم
بالنسبة لنا احنا بقى، احنا عايزين نعمل حاجة للمصريين بس، انا بجد صعبانة علي نفسي قوي
ندى قصاص بعتت لي نكتة، بس انا لما شفت النكتة عيطت، حسيت انها شبهنا:
واحد دخل لقى راجل غريب مع مراته، راح يجيب السكينة عشان يقتله الراجل قال له: استنى.. احنا الكاميرا الخفية. قام جوزها ضحك وقال: مش ممكن يا جماعة، دي خامس مرة وما تذيعوهاش
------------
الليلة دي في خسوف جزئي للقمر، قال صحيح يا شباب انه على مصر بس؟ لا مش معقول، حتى القمر مش طايقنا؟ لا لا، حد بقى يقول لي انه على اي بلد تانية غيرنا
طب ما تنسوش صلاة الخسوف بقى عشان لو ربنا غضبان على البلد نخلع احنا منها ونستندل معاها

انا جالي تخلف

اتفرجت على حلقة العاشرة مساء اللي استضافت عماد اديب.. بس بس بس.. اسكت يا لساني اسكت يا لساني، انا قفلت التويتر عشان كنت ح اقول كلام يعاقب عليه العرف والقانون وكل الشرائع السماوية والوضعية وحقوق الانسان وجمعية الرفق بالحيوان

حتى لما عبد الله الاشعل اتصل يبل ريقنا (الحقيقة غسل عماد اديب) قامت منى قاطعت عبد الله الاشعل وقفلت عليه و..و...و... ليه؟ ليه؟ ليه وسنة جديدة داخلة علينا يعملوا فينا كده؟ مين اللي له مصلحة في انه يقامر بمرارة وكبد وقلب وفشة و... اعضاء اخرى للشعب؟ مين؟
انا متأكدة ان الخط البياني للزيادة السكانية ح يتخسف بيه الارض بعد الحلقة دي... تستاهلوا، عمالين يقولوا لكوا بطلوا خلفة، اوعي يا شابة تنسي الحبة، ركبوا لولب
اهم ركبوا لكوا عماد اديب وروني ح تخلفوا رجل كرسي ازاي بعد كده، وللا خفة دمه خفة دمه نقطاني يا ناس خفة دمه، ونقطة ومن اول السطر، نقطة ومن اول السطر، كل قنبلة من قنابله يقولها ثم يشفعها بجملته المأثورة: نقطة ومن اول السطر واحد مسلطينه على الشعب عشان ينقطه من اول سطر في السنة

مش ممكن، مش معقول، انا مش مصدقة اللي شفته بمناخيري وسمعته بصوابع رجليا، انا جالي البواسير في مخي، وماحدش يسالني قال ايه؟ ما تتصورش، ما تتخليش، ما تصدقش
وشعب التويتر كله من شرقه الى غربه ومن يساره الى يمينه بقوا ولا ضحايا هيروشيما ونجازاكي انا سبتهم في اخر ربع ساعة وما بصيتش عليهم تاني ومش عارفة عدد القتلى والجرحى والمشوهين واللي نكشوا شعرهم ونزلوا يجروا عريانين في الشارع الساعة اتنين بالليل وصل لقد ايه دلوقت، بس دي جريمة حرب


وانا ناوية اشتكيه انا والتلاتة اللي فضلوا عايشين وبكامل قواهم العقلية وقادرين على الكلام من شعب التويتر ونقدمه لمحكمة دولية


ده في حالة اذا قمت بكرة الصبح


Wednesday 30 December 2009

خبر عاجل من على التويتر

من مالك مصطفى عشان هو في هشام مبارك وهم اللي متابعين قضية الدويقة
النائب العام احال محافظ القاهرة ورئيس حي منشية ناصر الى التحقيق بسبب احداث الدويقة 
يييسسسسسسسسسسسسسسسسسسسسسسسسسسسسسسسسسسسسسسسسسسسس
طب وبغدادي؟ مش ح يحول بغدادي للتحقيق، حيدر بغدادي النائب عنهم في مجلس الشعب، لما الصخرة اتهدت على راسهم راحوا له مشاهم ولا سأل في قرعتهم وبس بيطلعوه في الجزيرة يقول اسرائيل ما بتخافش غير من مبارك ولولا خافت من مبارك ما كانتش وقفت حرب غزة قامت خديجة بن قنة قالت له طب ليه ما خوفش اسرائيل من اول يوم قام قال لها: لا ماهو لازم يتم ردع حماس برضه
ههههههههههههههه
مش ح يتحول للتحقيق ده؟ ده طرد سكان الدويقة لما راحوا له، هو لازمته ايه؟
الخبر التاني من نورا يونس على التويتر برضه ان فيه مظاهرات كبيرة في جامعة الازهر احتجاجا على الجدار
بس انا مبسوطة بخبر الدويقة ده، يارب ياخدوا حق الغلابة اللي ماتوا ويدوا اللي عايشين شقق ويعيشوا زي البني ادمين
----
آه ونسيت، مصر تتهم حسن نصر الله بالعمالة للنظام الايراني 
انا سألت سؤال قبل كده وماحدش رد عليا: المسرحية الهزلية المكونة من سبعمية سبعة وتمانين فصل دي ح تنتهي امتى؟ انا مش ح اقول اللي اختشوا ماتوا لان الله يرحمهم قبل ما يموتوا ما عدوش في الشارع اللي احنا ساكنين فيه اساسا ولا حتى سلموا على جار طليق بنت عمة جدتنا فاحنا ما نعرفهمش وبالتالي مش زعلانين عليهم ولا بنحيي ذكراهم السنوية، ودي اول مرة نسمع عنهم والله، ومش عارفين البني ادم لما بيختشي بيحصل له ايه؟ 
يعني نظام بيبني جدار لحصار اهل غزة بالتعاون مع اسرائيل وامريكا وفرنسا عدوان رباعي على اطفال وحريم لما وصل الامر ان اسرائيليين جم يتضامنوا يعني صعبوا ع الكافر والراجل ما كانش يقدر يعدي مناسبة عاشوراء من غير ما يتكلم عن اهل غزة يعني ضميره ما يسمحلوش، ماهو فضل ساكت وبيتقي شر لسان النظام المصري ولهم عين يقولوا له يا عميل ايران؟ أأأ....إإإ مين اللي جاب القلعة جنب البحر؟ مين اللي جاب القلعة جنب البحر؟

ماذا حدث للمصريين

يا اخي العالم المسأفين دولم بيكبروا الامور قوي، وماشيين يضربوا كف على كف، والدكتور جلال امين يكتب دراسة كبيرة عنوانها "ماذا حدث للمصريين" ويعمل لها منهج بحث وحكاية
مع ان كل اللي حصل للمصريين مش اكتر من كده


مافيش اكتر من انهم دخلونا درج المعالك من تلاتين سنة ايام اتفاقية السلام، صحينا بعدها بتلاتين سنة وهم بيصلوا علينا عشان يدفنونا لقينا القلعة جنب البحر والهرم في الغردقة ونهر النيل تحت السرير، اللي دفنونا بالحيا اتخضوا واحنا كمان اتخضينا
قمنا عملنا مدونات وقررنا نناضل كدهو



وفي الاخر اغمى علينا، واحنا دلوقت حاليا مغمى علينا، مش عارفة بقى حسن حسني ح يطلع لنا امتى عشان يفوقنا؟

العملية في النملية والوقفة الاحتجاجية عدت على خير

تحديث:
الساعة 14:43 بتاريخ 30 ديسمبر 2009 
حسام الحملاوي نزل فيديوهات هنا 
ومحمد عبد الغني نزل الصور هنا 
 فيه خبر بقى بيتناقله الفلسطينيين على وكالاتهم ان العمال المصريين رفضوا استكمال العمل في الجدار وبيقولوا ان الوفد هي اللي قالت كده، انا عايزة لنك الخبر من الوفد عشان نتأكد من الخبر لان الخبر ده لو طلع مش صحيح يبقى الفلسطينيين يا عيني وصلوا لمرحلة خطرة جدا من الانكار النفسي وابتدوا يكتبوا احلامهم على انها اخبار، كده يبقى احنا ضربنا مخ الناس خالص، على رأي فيصل: وانا اللي كنت فاكره يائس؟ اتاريه كان لسة عنده امل فيا. 
امبارح قريت مقال بعته لي مهندس حر، واحد فلسطيني من غزة بيتكلم عن سواقين التاكسي الغزاوية اللي كل ما غزة تنضرب يطلعوا اشاعات ان مصر بعتت كتيبة جيش سرية عشان تنقذهم
بس عادي سواقين التاكسي بيقولوا كلام، زي ما سواقين التاكسي عندنا في مصر مقتنعين ان "التعلب بتاعنا هو اللي ح يقضي على اسرائيل بس هو بيجيب رجلهم" ماهو واحد بيلف طول النهار في الشوارع وبيقابل خلق كتير تقرف الكلب الحزين، لازم يحلم عشان يسلي نفسه
لكن لو وصل الامر انهم ينزلوا احلامهم اخبار يبقى كده حاجة تقطع القلب، جننا الناس خالص يعني؟ عموما هو الخبر نزل هنا وانا مش عارفة الوكالة دي الخبر نصه الاولاني صحيح ان فيه ملثمين فلسطينيين اطلقوا النار على معدات البناء بتاعة الجدار وكانوا حريصين انهم ما يصيبوش بني ادمين، بس النص التاني بيقول ان عمال المقاولين العرب امتنعوا عن استكمال البناء، حد عنده مصدر تاني للخبر؟ اصل فيه مهندس مصري بيقول كلام تاني

يارب يطلع الخبر صحيح بس عشان الغلابة دول يتجبر بخاطرهم، انا ما كنتش اعرف ان احنا حطمناهم قوي كده...والنبي يارب ما تصدمهم اكتر من كده، الجدع الفلسطيني اللي كاتب المقال بيقول احنا اخدنا على صدمات كتير وبنعرف نتصرف ونتعايش بس موضوع اننا نتصدم في مصر ده لسه مش عارفين نتعامل معاه!!!! كده وجع قلب بقى، هو احنا ناقصين تأنيب ضمير؟ احنا قربنا نتحول لجوريسيك بارك من كتر تأنيب الضمير، عشان لما احنا لما بنحس بتأنيب الضمير بنبقى متوحشين شوية، والاخ الفلسطيني اللي كان عايز يساعدنا نحفر انفاق عشان نعرف نمشي في بلدنا يقول لي مظاهراتكوا انتوا عشانا لها طعم تاني، وقبل كده مدونة مصرية سافرت الاردن وحكت انها قابلت سواق تاكسي فلسطيني وقال لها احنا مستنيين مصر وح ننضم للجيش المصري لما مصر تنوي تحرر فلسطين واحنا عارفين ان مصر هي اللي ح تحرر فلسطين احنا مستنيينها، طبعا ردت عليه بالبرود العاطفي اللي عند المصريين (على رأي مهندس حر) وقالت له واحنا مالنا، الواد واقف مستني القطر وهي بتقول له واحنا مالنا وش كده....تؤ، انا ما اقدرش على وجع القلب ده، ده مشهد مؤثر قوي، بيفكري بمنظر لواحدة كنت اعرفها عايزة تخرج وتتفسح وتسهر وتنبسط وكل شوية ابنها (كان عنده تمن سنين اياميها) يتصل بيها ويقول لها: تعالي اقعدي معايا يا ماما انا باحبك. وهي تقعد تقول لي: يييييي ابني بيتصل، ردي عليه وقولي له ماما في الحمام. وانا طبعا اقعد اعيط. طب حد من صحفيين الدستور يتأكد من الخبر ده؟ طب حد يوحي للعمال طب.. طب نأجر لهم ناس تعمل نفسها عمال وتمثل انها مضربة؟ ماهو مش معقولة كسرة الخاطر دي، طب بصوا، فيه لجنة في سيناء طلعت البيان ده

محمود ساندمانكي اتصل بيا دلوقت وقال لي انه متضايق لانه اكتشف ان موضوع الامريكان اللي انضربوا قدام السفارة ده طلع اشتغالة وطلع الامن المصري ما ضربهمش ولا حاجة
بصراحة وانا كمان اتضايقت، مش اتضايقت يعني كان نفسي ينضربوا، بس اللي مش عايش في القاهرة لازم ييجي يتفرج على الامن اللي واقف قدام الاجانب مش قادر يعمل لهم حاجة ونازل بهدلة في الناس اللي معدية، مش بيتظاهروا، ولا حتى دريانين بحاجة، دول ماشيين في الشارع، زي الراجل اللي مديره في الشغل يهزأه يقوم راجع البيت ضارب مراته: وكمان بتقولي مساء الخير؟
الناس تبقى ماشية في الشارع فجأتن حتة امين شرطة: امشي من هنا يا خـ... يا ابن المتـ... يا ابن الـ... ينعل ... امك. 
كده، من غير اي حاجة
طبعا كامل تعاطفي مع الامريكان لو كانوا اتضربوا، بس الواحد يحس بالمساواة يعني، دول حتى مش عايزين يحترمونا شوية والضيوف عندنا







تحديث:
الساعة 13:03 يتاريخ 30 ديسمبر 2009
ايمان بدوي اخدت صور وده فيديو



بس ازاي السفارة الامريكاني تقفل الباب وتخلي الامن المصري يضرب المواطنين بتوعها؟ لا بجد انا منبعجة وفاتحة بقي كدهو، ده ساركوزي اللي الواد جاي مستحلف له ما هانش عليه يعمل كده والفرنساويين بقالهم تلات ايام معتمصمين قدام السفارة الفرنسية، ازاي امريكا تعمل كده في مواطنيها؟ دي لو كانت حصلت معانا في اي داهية كان زمانا قلبنا الدنيا صويت وعياط وكرامة مصر وكرامة المصريين وكنا رحنا اشتكينا لامريكا من حكومتنا اللي بتنتهك حقوقنا، طب والامريكان ح يسكتوا؟

تحديث:
الساعة 00:36 بتاريخ 30/12/2009
غفاري جاب لي فيديو للمظاهرة بس مش عارفة بقى انا حاسة ان ده في اول المظاهرة خالص، او في اخرها خالص، ومستنيين حسام الحملاوي ينزل فيديوهاته



بسم الله الرحمن الرحيم الاجابة تونس

عدنا بحمد الله من الوقفة الاحتجاجية اللي كانت على سلم النقابة، انا رحت من صلاح سالم وفنون راحت من كوبري اكتوبر فهي وصلت اسرع مني، وصلت ستة الا ربع وانا وصلت ستة الا سبع دقايق عشان اول ما وصلت طلبتها في الموبايل والموبايل عامل ستة الا سبع دقايق
اول ما وصلت العدد ما كانش كبير، يعني عشرات، حوالي خمسين، سبعين بالكتير، فبعت رسالة لمهندس حر اقول له العدد قليل، قام هو نزل ان العدد قليل على التويتر، شوية وهوب هوب العدد فضل يزيد يزيد يزيد بقى مئات، على ما وائل خليل وصل بقى حوالي ستمية، اول ما شاف وشي: حرام عليك، ده انا مش عارف احط رجليا على الارض تقومي تبعتي تقولي العدد قليل
طبعا اللي على التويتر عارف ان وائل خليل الوحيد لما بيذنبني مش بافتح بقي معاه لما بيقول لي بننننننننننننننننت بابص في الارض، مين بقى فرح فرحة الاعمى وكان سعيد قوي وفضل يسخنه، محمود صابر، اقول له اول ما جيت كان العدد قليل، يقوم محمود صابر يقول له: مش صحيح.. انا هنا من خمسة، العدد كان كده واكتر، وراخر خالد عبد الحميد يغني معاه، اه والله، بيكدبوا عشان يستمتعوا وهم بيشوفوني باضرب مسطرتين على ايدي ومش قادرة ارد. بس انا اثبت صحة كلامي، الا الكدب، ماحبش حد يطلعني كدابة وانا باقول الحقيقة بتصعب عليا نفسي، سبت المظاهرة ومشيت زي الهابلة الم ناس: انت هنا من الساعة كام؟ طب بذمتك العدد مش كان قليل..لحد ما صدقني
فنون بقى، هههههههههههههههههههههه، مبدئيا هي بتقترح هتيفة يبقوا ستايل اكتر من كده، والحمد لله ما اقترحتش ان المرة الجاية نعمله في الجورمانديز او سنجاريا، او نعمله في الغردقة الطف، بس هي طبعا بصراحة يعني معذورة شوية، يعني الهتاف ده كلمتين وخلاص، مش قصة ضياع فلسطين من سنة تمانية واربعين ح نهتفها وواحد يطلع: رب قوم والناس وراه: رب قوم.. ذهبوا الى قوم.. ذهبوا الى قوم.. وما لقهومشي.. وماههبلولااالالا.. الناس ضاعت منك كده خلاص، احم، طيب، هو الوقفة كان فيها اجانب كتير، وكان فيها حاخام من ناتورا كارتا تقريبا لابس بادج عليه: انا يهودي ولست صهيونيا
بالعربي، وطبعا انا وفنون حبيناه قوي، وفنون قعدت تقول: يا جميلة، كميل قوي، تعالي نتصور معاه. وبما اني اصلا كنت صاروخ وسخطوني بني ادم، اي حد يسخني وانا انطلق، رحت قلت له عايزين نتصور معاك قال لي: انا اسف، بس حرام راجل يتصور مع ست، انا اسف ده دين.
قلت له: لالالالا ولا يهمك. ودي طبعا تقول له: وماله، طبعا معاك حق، احنا متفهمين... ماهي مش هي اللي اكلت الكبسة
بس ما كانتش كاشة زي ما كنت متوقعة، دي كانت جاية مستحلفة وجايبة معاها واحد جندته وخلته ييجي من اسكندرية عشان يتضامن

وشفت تميم البرغوتي، قال لي: كان فيه يافطة متعلقة بالعبري بس احنا نزلناها. قلت له: ماهو فيه اسرائيليين
طب نعمل ايه يعني؟ ح نطردهم؟ بامارة ايه؟ اسرائيليين جايين يتضامنوا مع غزة ضد الجدار اللي بتعمله مصر تضامنا مع اسرائيل، حاجة تضايق قوي، بس انا مش عايزة اعيط بقى النهاردة، انا تعبانة وصوتي رايح
هو تميم ما عندوش زينوفوبيا ولا حاجة، فوبيا الاجانب يعني، بس قال لي: انا كنت فاكر ان الوقفة دي للمصريين
قلت له: مافيش حاجة في البلد دي يا تميم للمصريين
حسيت انه اتخنق كده، وراح داخل جوة.. بصراحة انا كنت مبسوطة من العدد وما كنتش عايزة اتنكد، يمكن يومين كده ويصعب عليا نفسي واتنكد، خصوصا ان كان فيه مصريين على الصف التاني بيبصوا لنا بحسرة كده والامن يهشهم زي المعيز وهم بيمشوا عمالين يبصوا لنا برضه، المنظر ده وجعني قوي، يعني لو كانوا بصوا قدامهم ما كنتش اتوجعت كده، بس هي جات مع خالد عبد الحميد بتهريج: ده تدويل فلسطين مش تدويل القدس، مش عارف بقى فلسطين ح تبقى عربية بعد كده ازاي؟
ثم كويس يعني ان فيه عدد كبير في العالم متضامن معانا، كان فيه ايطاليين، وانجليز، امريكان (انا عرفت ان الامريكان انضربوا النهاردة قدام السفارة الامريكية والسفارة قفلت الباب وقالت مالناش دعوة وماما بتخمن ان تكون هي السفارة اللي ادت الكارت بلانش للامن انه يضربهم) وكان فيه فرنساويين كتير، وواحد فرنساوي حد فهمه ان دي وقفة احتجاجية ضد ساركوزي، هو جاي لساركوزي مش لاي حد تاني، مشاعره ناحية ساركوزي زي مشاعري ناحية علاء مبارك (مش انا خليت كريم البحيري بيهتف ورحت موسوسة في وده: وعلاء مبارك، راح قايل يسقط يسقط علاء مبارك هههه الحمد لله)، ومشاعر سلمى سعيد ناحية مبارك، جاية شايلة يافطة: تحرير القدس يبدأ من تحرير القاهرة. وجايبة معاها واحدة انجليزية تقريبا، بس هي خواجية من القللي واضح، بتزغرد وتتكلم عربي وتهتف يسقط يسقط حسني مبارك، طبعا سلمى يعني، ماشية تصاحب كل الاجانب وتحفظهم يسقط يسقط حسني مبارك وانا بتنبأ لها انها ح تشتغل مدرسة في حضانة عشان تاخد الجيل اللي جاي من بابه (ماهو الباشا قاعد معانا شوية) وتعمل لهم اغنية اطفال اسمها يسقط يسقط حسني مبارك وتحكي لهم حدوتة امنا الغولة مبارك والشاطر يسقط يسقط. الاخ الفرنساوي ده بقى، واضح انه عايز يلف العالم عشان يشتم في ساركوزي بس، وقاعد ح يموت، كل شوية يروح طالع لوحده ويهتف ضد ساركوزي لما قلت لخالد عبد الحميد: ادي الجدع ده الميكرفون احسن ح يموت لو ما هتفش ضد ساركوزي، الراجل جاي من اخر الدنيا يعني ادوله فرصة. وبعد ما فش غله في ساركوزي شتم برلسكوني والاتنين دول عاملين له مشكلة كبيرة على فكرة، واول ما تقول ساركوزي يروح ملفوت ناحية الصوت: انت بتقول عز؟
قال وعايز يقنعني انا وفنون ان ساركوزي زي مبارك، وفنون راخرة بتاخده على قد عقله وتقول له: طبعا طبعا
بس هو اللي خلا فنون نفسها في هتيفة ستايل، ان طبعا الهتيفة التقليديين حبوا يجاملوا العدد الغفير ده من الاجانب فقرروا يهتفوا بالانجليزي فبقت
down with the wall
داويييين زا ووووووووووووووووول
free gaza
بقت



فريضام غزة

وبعت رسالة لحسام الحملاوي اللي كان واقف قدام هو ومحمود صابر اقول لهم: يخرب بيت الانجليزي ما تهتفوا انتوا..
ما اعرفش ليه ما اخدوش كلامي بجدية، حسام ابتسم لي من بعيد، ومحمود صابر ساب قدام وجه وقف ورا جنبي عشان يضمن اني ما اطلبش منه حاجة
بس فيه عدد كويس والله العظيم من المصريين، يعني المصريين كانوا بالمئات، غير اللي كانوا واقفين على الصف التاني بيبصوا لنا بصة توجع القلب، نظرة كده شبه واحده مثلا بياخدوا منها ابنها ويحطوه في الملجأ. وفيه كان بيعدي يبص ويخاف من الامن لوحده ويمشي، وبعدين الامن بقى فعلا مشى اتنين بغلاسة كده، لكن ساب الباقيين يقفوا يتفرجوا ويمشوا
على فكرة كان فيه اخ فلسطيني صعبنا عليه وقال مدام المصريين مش عارفين يمشوا في بلدهم نقدر نبعت لكوا حد من عندنا يعمل لكوا انفاق عشان تروحوا مشاويركوا بس
المهم، بلاش نكد بلاش نكد، الوقفة كانت ناجحة فعلا، كان فيه عدد مصريين كبير وعدد اجانب اكبر
ومواطن مصري جه.. تصدقوا؟ بس ما شفتوش يا خسارة، انا وفنون كنا عايزين نشوفه واضح انه كان في الجنب اللي قاعد فيه الاجانب لانه بعت على التويتر: جنبي خواجات مخابيل.. بس فرحت قوي انه راح وكنت عايزة اشوفه

فيه كنيسة قدام النقابة، تصدقوا بايه؟ بقيت كل شوية ابص على الكنيسة على امل ان العدرا تظهر :) هي العدرا مش فلسطينية برضه؟ مش مفروض تساندنا في حاجة زي دي؟
اه بالحق كنت ح انسى، محمود صابر اخد صور هنا حلوة قوي
اهم حاجة بالنسبة لي عدد المصريين وعدد المصريين كان كبير، بس خسارة محمود ما اخدش صور للناس اللي على الناحية التانية
ده اللي انا فاكراه دلوقت
لو افتكرت حاجة تانية ح اقول لكوا

Tuesday 29 December 2009

كيليلو فوتر اوبريسيون اباوت زا ماتش سيلفو بليه؟

تحديث قد يبدو مالوش علاقة بالجدار بس الحقيقة هو له علاقة وثيقة بالجدار:
الساعة 01:22 بتاريخ 29 ديسمبر 2009
بطرس غالي قال: ح اطلع دين المخالفين في عزبة الهجانة، وده طبعا افشاء لاسرار عسكرية وتهديد للامن القومي، لانه بيكشف علنا الاستراتيجية السرمدية للنظام المصري، وطبعا بما انه خلاص كفرنا فمش لاقي حاجة يطلعها قام راح لغزة يطلع دينهم فهمتوا بقى؟ بطلوا ظلم، الناس عايزة تطلع دينا ودين اللي حوالينا عشان تشطفه وتغسله وتسرحه وتلبسه لبس العيد وترجعه مكانه
لا والنبيه الناصح بيبرر بانه قاله في حديث جانبي، انا ما عنديش مانع اني اتحكم باوساخ، بس عندي مانع اني اتحكم بهبل معلش... توووو ماتش، واحد يقول الغالي والرخيص، وواحد يقول بتوع القافلة كانوا جايين بتأشيرة سياحة وما احترموش كلمتهم، وده طالع يقول: انا والله سبيت الدين للشعب في جلسة جانبية مش علنا
احنا ح نحجر على مين وللا مين؟




تحديث:
الساعة 23:55 بتاريخ 28 ديسمبر 2009
المصدر: كريم البحيري
كريم اتصل بيا وقال لي انه راح عند السفارة الفرنسية عشان يصور، اول ما شافوه بيطلع كاميرا شقطوه، قال لهم انا صحفي وممكن اجيب لكوا اذن من وزارة الداخلية، قام الظابط قال له: انا مش تبع وزارة الداخلية انا تبع مديرية امن الجيزة :)
احنا ح نفضل عايشين في الهزل ده كتير؟
كريم بيقول باللفظ: "بدون مبالغة بتاع خمسين الف عسكري امن مركزي محاصرين العيال الفرنساويين، انا عمري ما شفت الرصة دي لا ايام القضاة ولا حتى ايام المحلة...الرصة دي رصة غدر"
ربنا يستر.. طب على الله يعملوها على الله
حسام ذكي مش عايز يسمي الجدار جدار، ولا عايز يسميه سور، عايز يخليه كده اللي ما يتسمى، وحسب اميرة هويدي، القوافل اخطرتهم بخط سيرها من اول ما قرروا يعملوا قوافل، يعني راجل في سنه كده وبيكدب؟ مش عيب؟
طب يارب مراته تسجل له الحوار ده عشان يسمع نفسه، فيه حد في الدنيا يقول: الجدار او السور دي اسماء اعلامية لا ادعمها؟ ده تامر امين اللي هو تامر امين قال له: طب نسميه ايه يعني؟  





تحديث:
الساعة 23:16 بتاريخ 28 ديسمبر 2009
الافراج عن احمد رجب ومصطفى بهجت وجانو شربل


تحديث:
الساعة 22:30 بتاريخ 28 ديسمبر 2009
المصدر: محمد مرعي

التحضير لمظاهرة امام السفارة المصرية بلندن الخميس وفرنسا يوم الاربعاء ودعوات لتنظيم مظاهرات ضخمة امام السفارات المصرية فى اوروبا
وبالمناسبة دي، ح نتآنس ونتشرف ونتنور بالخواجة يانّي جاي ينضم لزملاته هنا



تحديث:
الساعة 22:03 بتاريخ 28 ديسمبر 2009
المصدر محمد مرعي
منظمات حقوق انسان سويسرية تبحث امكانية رفع قضية دولية ضد مصر لبنائها الجدار الفولاذى ومنعها قافلة شريان الحياة من المرور الى غزة

تحديث:

الساعة 21:56 بتاريخ 28 ديسمبر 2009
المصدر: محمود صابر/ حرنكش
المجموعة اللي رجعوهم من شارع الاسماعيلية رجعوا الاوتيل بعد ما فشلوا في التظاهر في ميدان الاوبرا، والمجموعة المعتصمة في شارع مراد متحاصرين، معاهم صحفيين، ماحدش عارف يدخل لهم ولا يخرج من عندهم، احمد رجب وبهجت اعتقلوا من هنا، من وسط مجموعة السفارة مش شارع الاسماعيلية، ولسة معتقلين


عاجل:
الساعة 20:18 بتاريخ 28 ديسمبر 2009

اعتقال احمد رجب ومصطفى بهجت اثناء محاولة تغطية اعتصام الناشطين الفرنسيين بالقاهرة


تحديث:
الساعة 20:16 بتاريخ 28 ديسمبر 2009
المجموعة التانية بقى بتاعة جالاواي فيفا بلاستاين جه خبر على التويتر ان فيه فرصة ضئيلة جدا انهم يسيبوا العقبة الساعة خمسة الصبح ويرجعوا سوريا تاني عشان يروحوا هناك ويرجعوا في الديد لاين اللي مديهولهم ابو الخيط عشان ياخدوا خط السير المحكم بتاع الدائري رمسيس ميدان لبنان صلاح سالم التحرير رفح


تحديث:
الساعة 20:01 بتاريخ 28 ديسمبر 2009
ما تنسوش وقفة بكرة في نقابة الصحفيين الساعة ستة ان شاء الله، وح تبقى برضه احتجاجا على زيارة نتنياهو

تحديث:
الساعة 19:39 بتاريخ 28 ديسمبر 2009

من احمد رجب، الامن عرض على الفرنسيين الموقوفين في شارع الاسماعيلية تلات حلول، يستنوا ليوم الجمعة، يسافروا فرنسا بكرة، او يعتصموا في ليسيه الهرم
ههههههههههههههههههه انا متأكدة ان الامن ده كل معلوماته عن الخواجات مستمدة من ميسز بوكس اللي كان بيطلعها محمد صبحي وكانت بتقول: ايجيبش ح يبوسني

تحديث:
الساعة 18:57 بتاريخ 28 ديسمبر 2009

المجموعة الفرنسية العدد 250 موقفينهم من ثلاثة ساعات اول شارع الاسماعيلية على بعد اتنين كيلو من المطار وقالوا لهم شرطة السياحة مش موافقة انكوا تكملوا الطريق
محتاجين حالا صحفيين بكاميرا يروحوا لهم بسرعة
رجاء الاتصال:
0185188562
ح يرد عليكوا واحد اسمه سامي


الساعة 18:37 بتاريخ 28 ديسمبر 2009
احد الناجين من الهولوكست تضرب عن الطعام لفك الحصار عن غزة
بالعربي جبته من شمبونجو.. ما تعرفوش انتوا شمبونجو دي، النجمة الاكثر شعبية على التويتر :) كل الناس بتحبها


تحديث:
الساعة 18:18 بتاريخ 28 ديسمبر 2009
اتصلت بيا المخرجة عرب لطفي وابلغتني ان المجموعة الفرنسية المسافرة الى رفح تم اعتراضها في الاسماعيلية، وادتني نمرة واحد معاهم اسمه سمير باتصل بيه دلوقت كذا مرة مش بيرد، لما يرد عليا ان شاء الله ح اوافيكم بالتفاصيل


تحديث: الساعة 17:49 28/12/2009:
المتظاهرون بيغنوا، معاهم اكرديون وكمنجة وبيغنوا راب فلسطيني والخبر من احمد رجب، انا والله امبارح كنت باتكلم على التويتر وقلت لهم نعمل فرقة موسيقية ما اخدونيش بجدية، انا طالبة حفظ حقوق الاقتراح ليا

دلوقت حاليا جالي تعليق ان ماليزيا وتركيا بيتوسطوا عند مصر عشان تدخل لغزة اكل ودوا وبطاطين
وجالي خبر على التويتر ان تركيا بتتكفل بنفقات ذهاب القافلة من العريش للاذقية عشان ترجع تاني تاخد الدائري على رمسيس على ميدان لبنان تنزل في التحرير على طول تمشي الحتة الصغيرة دي تلاقي نفسها في رفح على حسب خط السير اللي رسمته مصر
نداء اخير لبتوع كللللللل مرة اللي ما بنشوفش خلقتهم لما بتحصل مصيبة في مصر وما بيفتكروش مصايب مصر غير لما نتكلم على غزة وده وفقا لخطة المعونة الامريكية اللي بيقبضوها (وطبعا اللي نزلوا للعبارة والدويقة هم اللي بينزلوا لغزة واللي بيقولوا مالنا ومال غزة هم نفسهم اللي ما شفناش خلقتهم في العبارة والدويقة)، يتخصم لك الشهر ده احسن ما تنضرب بالشباشب، للاسف الجهود المرة دي سوف تبوء بالفشل، طبعا انتوا ما بتنزلوش ولا بتروحوا ولا بتيجوا فمش دريانين الناس عاملة ازاي، مكتومين كتمة الكحك، تخطوا مرحلة التعاطف والغضب وعاملين بيبي على روحهم من الكسفة وما ح يصدقوا يفشوا غلهم فيكوا
تحديث الساعة 17:31 28/12/2009
ملحوظة: العيال المزقوقة في كل مرة عشان تقول مالنا ومال فلسطين اللي تعوزه مصر يحرم على فلسطين مافيش داعي يحرجوا نفسهم، المرة دي الناس فعلا مخنوقة ومش قابلة الكلام ده، انا مقدرة انهم بيجروا على اكل عيشهم واللي بيصرفوا لهم المرتبات ح يطلبوا منهم ملف باللي عملوه الشهر ده، بس فيه ديمقراطية مش كده؟ يقدروا يقولوا لهم الناس ح تدينا بالجزمة



تحديث الساعة 17:22 28/12/2009:
الامن يحاصر القافلة بالعريش الان
التفاصيل هنا

تحديث الساعة 16:45 28/12/2009:
الامن يا ضنايا اللي محبوس دمه بقاله يومين مش عارف يضرب الادانب، استلقط واحدة فلسطينية وراح ضاربها، طبعا النباهة والذكاءة والفكاكة خلتهم يستلقطوا اللي لونها بني، اي حاجة بيضا بيبعدوا عنها، بس فيه اختراع اسمه جنسية، مش باللون يعني، البنت معاها جنسية امريكية، وراحت السفارة الامريكية بالصور والفيديو تشتكي، هوبا تيتو مامبو، الخبر من التويتر
هرررررررررررررررررررررر

موضوع ان حماس بتبيع لنا مخضروات ده الظاهر صحيح، لأن الحقيقة السلاطات المصرية بتعمل حاجات وتصرفات تنم عن انهم عاملين دماغ جامدة قوي، وبما اننا مالناش اعداء دلوقت غير الجزائر والسودان وغزة وسوريا وايران وانجلترا والناشطين في حقوق الانسان من كل انحاء العالم (حتى اليابان) وفي اورومبا وامريكا والدول المتغدمة بس...وبما ان سيف ابن ذي يشل اللي بيطلع لنا في كل البرامج يقول: اسرائيل عمرها ما موتت ظابط مصري على الحدود، اسرائيل عمرها ما اجتاحت حدودنا، اسرائيل بتحترم السيادة المصرية مش زي حماس. فأكيد الدماغ الوسخة اللي عاملاها الحكومة دي من انتاج حماس طبعا، مين له مصلحة ان كل الناس تضحك علينا غيرهم؟

مبدئيا عشان يبقى عندنا معلومات كويسة او فكرة عن قافلة شريان الحياة والاخوة الادانب اللي جم عملوا لنا شبورة قلق في بلدنا الامنة المطمئنة اميرة هويدي عاملة هنا صفحة بتشرح بالظبط هم مين وليه بيعملوا كده؟ وليه بيغلسوا علينا الغلاسة دي كلها، وهل ناويين يبطلوا غلاسة وللا دماغهم صعيدي وكل ما تعاندهم يعندوا اكتر؟

وتحقيق اميرة هويدي برضه يوضح الصورة للاخ الظابط اللي قال امبارح للمعتصمين الفرنسيين: يو دونت نو بالاستاين يو اونلي نو زا نيم...

وكان ناقص يقول لهم: فلسطين دي اولها فلس واخرها طين، والفلسطينيين دول يهود العرب انتوا ما تعرفهومش، دول اخر مرة دخلوا عندنا جابوا دورارات مزورة وخلصوا على كل مخزون سجاير الال ام والكولوباترا السوبر وكنا بندوخ عشان نلاقيها بعد ما مشيو، بقوا يشتروا بالخراطيش كده، واتسللوا للقاهرة عشان يدخلوا السيما، اي هاف تو ايز اند اي كان سي اي ام تولف ييرز اولد

احمد رجب كان بيغطي على التويتر وقائع المسرحية الهزلية، جابوا لهم عربيات مطافي عشان يرشوهم بالمية وقالوا لهم بالفرنصاوي في الميكروفون: احنا صبرنا عليكم كتير لكن للصبر حدود، كيليلو فوتر اوبرسيون يو بارل فرناصيه؟زمالك ايه فريه اند اهلي ايه فريه؟
الله يرحمها، جات لها ازمة قلبية مالهاش اي مبررات ولا مقدمات غير انها اكيد كانت ست طيبة وربنا نشلها واداها افراج
المهم فضلوا نايمين لهم في الشارع ولبسوا لهم هدوم ووتر بروف اول ما شافوا عربيات المطافي جاية



وقعدوا يقولوا لهم "جازا ليبيغيه..جازا ليبيغيه" فطبعا مش اقل من انهم يفهموهم انهم هم كمان بيعرفو فغانسيه، وكمان بيعرفوا يغنوا لهم اغنية الست للصبر حدود بالفرنصاوي فريرو جاكو دورمي فو سيلولو ماتينا دينج دونج دو




وزي ما انتوا شايفين كده قاعدين في وسط الشارع قدام العربيات في شارع مراد يصوتوا في وش الناس وانا المفروض اضحك بس باعيط دلوقت حاليا
او المفروض اعيط بس وانا باعيط باضحك برضه
مش عارفة ايه المفروض وايه الغريب، وللا الاتنين اغرب من بعض
بس اللي عرفته من احمد رجب من ساعة ان مجموعة اسرائيلية انضمت للمعتصمين بتوع غزة ليبيغيه، وامبارح كان فيه مجموعة رافعة يافطة:
I am Jewish, I am not Zionist
انا يهودي، بس مش صهيوني
كده قفلت زي الدومنة ايها الفرعون الاكبر، قول لنا بقى فلوسنا بتتصرف على ايه؟ على اننا، على رأي مهندس حر، نتهش من شوارعنا اللي مسفلتينها بضرايبنا زي الفراخ قدام العالم كله ولما نحب نفضل في الشارع، بتاعنا، اللي في بلدنا، اللي احنا بنصرف عليها وعليكوا زي الرقاصة اللي بتصرف على بلطجي، من غير ما نتضرب زي ما اتضربت الصحفية مهرة غزالي نضطر نتحامى في الاجانب؟
طب فرعون لما كان بيعاير موسى ويقول له ياللي لمناك من الشارع وربيناك في القصر واكلناك وشربناك انت مين انت؟ (الظاهر داء المعايرة ده في الجينات) وقعد يمن عليه انه عبد بني اسرائيل، وقال: ام انا خير من هذا الذي هو مهين ولا يكاد يبين، (ترجمتها في العصر الحالي الرسالة اللي اتدورت على النت: رسالة الى كل جزائري: انا مصري انت مين؟) بس فرعون كان عنده حاجة يتنطط بيها، حتى لما استخف قومه فأطاعوه لأنهم كانوا قوم سوء فاسقين كان عنده شوية حاجات يزغللهم بيها قوم لما يقول لهم ما أريكم إلا ما أرى وما أهديكم إلا سبيل الرشاد ممكن يفكروا مرتين، مش كان عريان الـ... ويتأمز تأميز ويقول باب الخمارة فين، حتى ربنا قال عليه "علا في الأرض" مش شحت في الارض وكمان قاعد يقول: ما تقداااااارش، وكان بيضلل قومه او بيرهبهم، مش بيحرجهم ويكسفهم ويخلي رقبتهم قد السمسمة اديني امارة للفتونة دي

اقترح، بعد نجاح حملة الاعلام المصري: لماذا يكرهوننا؟ نبتدي حملة جديدة: تدوني الشايب ليه؟ انا وحشة وللا ايه؟ انا حلوة وعارفة ان انا حلوة


طبعا موضوع فلوسنا ده فيه بعض الاخوة المصريين، اللي هم ميدو ومهندس مصري بدون ذكر اسماء، صابتهم حالة سنية: لا ما تقولش لا بس ما تقولش بس مش ما تقولش مش ما تقولش مش ما تقولش مشششششششششششش
وما حرقهمش غير: لا بقى، الجدار بيبتني بالمعونة الامريكية.. احم، لا، هم ادونا فلوس واحنا اشترينا من روسيا، لالالالالالا مش احنا اللي دافعين مش احنا اللي دافعين، لا ما تقوليش كده ما تقوليش كده

ماهو الجدار ده واضح انه مكلف، وبما ان مافيش ادلة واضحة على ان امريكا هي اللي صارفة عليه من بابه، ح نفترض ان امريكا دافعة فيه جزء من الفلوس، واكيد اسرائيل مش ح تدفع حاجة، حد عمره سمع ان اسرائيل بتدفع وللا بتمول اي حاجة؟ لكن المنطق بيقول (الى جانب الخبر بتاع الوفد) ان اكيد مصر دافعة فلوس برضه فيه، ماهم عاملين جمعية، والا، لو الحكومة المصرية مش دافعة فيه فلوس، امال مش عايزة تقول لنا مصدر تمويله ليه؟ وليه امريكا كمان مش عايزة تقول، دول اسخم مننا في المعايرة والشرشحة، لما بيدفعوا قرش بيقعدوا يعايروا بيه خمسين سنة لقدام، دول بيعايروا العراقيين انهم صرفوا على غزوهم
امبارح بقى، في العريش، قواتنا قبضت على 38 اجنبي، هههههههههه، اه يا قلبي، اضحك وللا اعيط؟ انتوا اتجننتوا؟ اتجننتوا؟ لا بجد، كلمونا كده زي ما بنكلمكوا، طب اسرائيل لما بتعدي بالدبابة على مواطنة امريكية اهي مقطعة البطاقة وعارفة ان ماحدش يقدر يكلمها واللي عاجبه ع الكحل يتكحل اللي مش عاجبه يترحل، وقصاد دورها كـ"كلب حراسة امريكي في الشرق الاوسط" زي ما ريجان قال مدلعينها ومدينها راحتها، انتوا مسنودين على ايه؟ انتوا بقالكوا كتير ما سافرتوش؟ هم دول زينا ياخدوا على قفاهم وماحدش يسأل عليهم؟ دول لهم سفارات وممكن يشحوروكوا، ولهم مستثمرين هنا، وبيدوكوا معونة، يعني تمدوا ايدكوا تشحتوا من الناس وتقبضوا لهم على مواطنينهم؟
برضه بس للتوضيح: الاشقاء الاجانب، اي فلوس الحكومة المصرية بتشحتها منكوا حد الله ما بينا وبينها، احنا ما بيوصلناش حاجة، احنا بنشتغل زي التور في الساقية وبنصرف عليهم ونتضرب ويطردونا من الشارع كمان، عمركوا شفتوا شعب بينطرد من الشارع؟ احنا بقى، ده حتى لما الشيخ زايد اتبرع باسكان شباب للمصريين، اخدوه من الشيخ زايد ببلاش وباعوه للمصريين بمئات الالاف وبالملايين كمان، وعملوه اسكان فاخر
رسالة ايمان بدوي على الميل بتسأل سؤال: هل ستحارب مصر العالم؟
يا سلام.... اقل منها يعني؟ ده احنا جامدين قوي
نداء الى الفضائيات المصرية المشينة اللي مافيهاش قناة واحدة محترمة:
بطلوا بقى اللي بتعملوه ده، كفاية نافع هو اللي بيحبك نافع هو خطيبك، شكلكوا عاااااااااااااااااااااااااااااار، انتوا بتعملوا ايه بالظبط؟ ها؟ ايه؟
يعني بتضحكوا على العالم اللي اتفضحنا قدامه؟ وللا بتضحكوا علينا؟ طب المرة دي مش عارفين تضحكوا علينا، الناس العادية فعلا اللي اتكلمت معاهم في الشارع والشغل والتاكسيات وشهم منكوا في التراب يا آمنة، وحاسين انهم هنادي، حتى جمهور عمرو اديب اللي هو كناسة الشعب المصري بقى يتصل بيه يهزأه
والفيلم بتاع حماس بتصدر لنا روسيات ومخدرات وبتدخل لنا سلاح ده بيزيد موقفكوا احراجا، بس بس بس بس بس
بسسسسسسسسسسسسس، تجاهلوا الموضوع طيب، اعملوا نفسكوا ما تسمعوش عنه، المرة دي مش زي ايام الجزائر، معلش بقى الناس مش للدرجة دي متخلفة ومغيبة، حتى لو اعتبرتوهم ما عندهمش مخ بعد ما فرعون طير لهم الربع اللي فاضل، هم عندهم احساس، ولو شوية يعني، احنا بني ادمين انتوا فاكرينا ايه؟ ده واحد بياع قال لي: خلاص بقى، ما تتكلموش في الموضوع ده، الواحد مكسوف قفلوا على السيرة.
هههههههههههههههه، عجبتني قوي قفلوا على السيرة، محسسني اني قلت له بنتك ظبطناها ورا العمارة مع ابن الجيران بيطقطق لها صوابعها
---
الا هو لما ربنا غرق فرعون وجنده عمل فينا احنا ايه بعد كده؟ حد عارف؟ وللا بتوع المرة دي اهيف من انهم حتى يتعاقبوا؟
على رأي حسين كمال لما قال لعفاف راضي: يا مدام عفاف انت ولا حتى ح تفشلي


Monday 28 December 2009

رسالة من النشطاء الغربيين الى مصر والمصريين

انا اتصلت بالنشطاء الغربيين اللي اتوقفوا في شارع الاسماعيلية وراجعين دلوقت ميدان الاوبرا
انا اتصلت بالنمرة دي
0185188562
وهم مش معاهم احمد رجب، واحمد تليفونه مقفول ح اتصل بنمرة تانية بس اهم حاجة ابلغكوا الرسالة دي، اللي رد عليا قال لي انا باتكلم باسم كل النشطاء اللي معايا واحنا عددنا 250 واحد وارجوك توصلي الكلام ده عبر المدونة بتاعتك:
احنا مش جايين هنا ضد مصر ولا ضد المصريين، ومش عملاء لحماس زي ما الاعلام بتاعكوا بيقول، واحنا مش منافقين عشان نحمل مصر لوحدها مسئولية حصار قطاع غزة، انا فرنسي وباحمل حكومة فرنسا المسئولية، معايا ايطاليين، وانجليز، وامريكان، ومن جنسيات كتيرة قوي، وكل واحد فينا بيحمل حكومته مسئولية حصار غزة، واحنا مش جايين نضايق المصريين، احنا طالبين من مصر انها تدينا فرصة نروح غزة عشان نعتصم على الحدود بتاعة اسرائيل، لفك الحصار عن غزة وادانة اسرائيل، لأن المسئول الاول عن اللي بيحصل اسرائيل، وهي المدان الاول، هي الاحتلال، وهي اللي عنصرية واسرائيل بتلعب بكل العالم، وبتلعب باوباما، وبتلعب بحكومات اوروبا، واحنا منزعجين جدا من الكلام اللي المصريين بيقولوه علينا، ارجوك عدونا لغزة، ده كل مطلبنا منكوا، ونحب نقول ان مش كل واحد يقول على نفسه فلسطيني مهتم بقضية فلسطين، فيه ناس عايشة معاها فلوس ومبسوطة وبتتاجر باسم فلسطين، وبتتواطأ مع حكوماتنا عليها. 
وراح انفعل وزعق في ودني: 
We want nothing from youuuuuuuuu, our target is Israel not youuuuuuuu, our aim is to condemn Israeeeeeel noooooooot YOUUUUUUUUUUUUU WHY CAN'T YOU UNDERSTAND THIIIIIIIIIIIIIIIS
خرم لي ودني الصراحة
وراح اللي حواليه مصقفين وقال لهم: انتوا وافقين على الكلام اللي قلته؟
راحوا مزعقين ييييييييييييس ييييييييييييييييييس

اظرف والطف واخف دم بلد شفتها في حياتي

لو فيه حد بيحصل عنده في بلده اللي ح احكيه ده ياريت يطمني اهو احس بالونس شوية:
- مجموعة المسيرة الادانب كانوا عايزين يعملوا وقفة احتجاجية بالشموع، يركبوا مركب ويحطوا الشموع في فيل ويسيبوها في النيل :) قام الامن قال لهم لا ما تاخدوش مركب ده تجمع واحنا عندنا قانون طوارئ انتوا مش فاهمين حاجة، على اساس يعني خواجات ومش عارفين قانون الطوارئ ده بيبقى ايه بما انه اصلا معمول بالشطة وهم معدتهم ما تستحملش الحاجات دي، قام راحوا وقفوا بالشموع على الكورنيش، قام جه المخبرين فضلوا يزقوهم وينفخوا في الشمع عشان يطفوه، الظاهر افتكروه عيد ميلاد وهم قايمين بدور نجاتي اللي بينفخ البلالين، خصوصا انهم بيضغطوا على ابو الخيط باعياد الميلاد بتاعتهم دي وابو الغيط سبق ووضح ان مصر بذلت "الغالي والرخيص" من اجل فلسطين، احنا على ايامينا في حصص التعبير كانوا بيعلموها لنا "الغالي والنفيس" ما اعرفش ايه الرخيص ده اللي بنعاير بيه فلسطين؟ شباشب بلاستك ولبان سمارة مثلا؟ هو ادري حيث انه خريج تانية ابتدائي انجليش
- رحت انا بقى على نقابة المحامين بعد ما كلمتني مها وقالت لي انها راحت ولقت الامن مالي الدنيا ومافيش حد، المهم كلمت الشخص اللي كان عامل الدعوة على الفيس بوك وقال لي هم بيمشوا الناس واحنا جوة مش عارفين نطلع حاولي تيجي نقابة المحامين
رحت نقابة المحامين لقيت الامن المركزي عامل وقفة احتجاجية على وجود الشعب في الحياة على سلم نقابة المحامين، وقدام نقابة المحامين، وعلى جنب نقابة المحامين وعلى سلم نقابة الصحفيين وعند دار القضاء العالي، كتائب شهداء الامن المركزي
حابسين بتاع تسع محامين جوة لا عارفين يخرجوا ولا فيه حد عارف يدخلهم، مجرد عديت من قدام الباب الاقي لك الامن بيصرخ في وشي: امشي من هنا، امشي من هنا، كأني عندي جذام. عملت كام تليفون والاقي لك لواء شخصيا بيزعق لي: امشي من هنا.. امشي
طبعا انا زعلت قوي انه بيزعق لي
قلت له: من فضلك ما تزعقليش انا مواطنة ماشية في الشارع مش باشتغل عندك
قام قال لي: امشي من هنا بالذوق احسن لك. اي والله، كانوا متوحشين قوي النهاردة، حتى واحد يعني ماشي في الشارع كده في امان الله مع مراته وسمعته بيقول: عمالين يزعقوا ويشتموا، مع انه ما كانش جاي لوقفة ولا حاجة ده ماشي في الشارع، واخو المدون ماك جاي نقابة المحامين عادي مالوش هو دعوة بالوقفة قالوا له: تعالى بعد بكرة الصبح.

قابلت عبد الرحمن فارس وقال لي ده فيه ناس بتنضرب عند دار القضاء العالي تعالي نروح لهم مشيت انا وهو لدار القضاء العالي قاموا بعتوا مخبر شبه ده



وما كانش ناقص غير جزمته تزيق، فضل ماشي ورانا.. لا الحقيقة هو كان ماشي جنبنا، عشان اكون دقيقة هو كان ماشي في وسطنا انا وعبد الرحمن ولما عبد الرحمن اتكلم في التليفون قرب وحط ودنه ع السماعة عشان يسمع اللي معاه على الخط التاني بيقول ايه. اكيد طبعا شخص ما ح يظن اني انسانة مريضة او بابالغ في حكاية انه حط ودنه على التليفون بتاع عبد الرحمن، لكن عبد الرحمن عندكوا اهو اسألوه، مالناش مصلحة ان احنا الاتنين نكدب ولما بصينا له قام بص في السما

رجعنا تاني عشان نقابل ندى عند نقابة الصحفيين لقينا على ناصية الشارع باقة من امتع المخبرين اللي باينين قوي لدرجة ان الناس اللي ماشية في الشارع ومش عارفين حاجة قعدوا يشاوروا عليهم ويقولوا: المخبرين اهم المخبرين اهم

كأنهم نجوم سينما، وراح عبد الرحمن استنى لما قربنا منهم قوي، وبص لواحد اقرع فيهم وقال: سلومة الاقرع ما يعرفش اخوه

برضه فيه شهود على الكلام اللي باحكيه ده تقدروا تسألوا ندى قصاص وعبد الرحمن لو فاكريني عندي ضلالات

-جم المجموعة من بتوع المسيرة (انا كنت كاتبة انهم من مجموعة جورج جالاواي بس اميرة هويدي صححت لي وقالت لي ان دول من مجموعة المسيرة) ووقفوا مزبهلين، باهزر مع واحدة وباقول لها الشرطة عاملة وقفة احتجاجية ضد الشعب لقيتها ما ضحكتش وقالت لي: فعلا دي حقيقة انا اول مرة اشوف حاجة كده وبان من الاكسنت بتاعتها انها بريطانية

وفضلنا واقفين عند البنك كده احنا نبص للمخبرين اللي كل اللي رايح واللي جاي يشاور عليهم على طول دراعه: بصوا بصوا المخبرين.. وهم يبصوا لنا بالنظرة اللي في عينيهم دي، عارفينها؟ اللي شبه نظرات ابو الغيط شوية لما يا عيني يبقى مش عارف هي الناس متضايقة منه ليه؟

وكل ركنة او جهة عليها كتيبة امن مركزي او اتنين على حسب التساهيل

بس انا حاسة بالاهمية وماحدش ح يعرف يكلمني بعد كده، اولا لان اللي زعق لي لوا، ثانيا لان المخبر اللي كان عايز يصاحبنا ومصمم يتمشى معانا وانا وعبد الرحمن دلقناه وما عزمناهوش على ترمس

بس انا ح اروح وقفة الثلاثاء ان شاء الله، هم لما بينزلوا بالاعداد المهولة دي بيزهقوا ويتضايقوا، خلاص، مدام مضايقينا يبقى يتضايقوا معانا

وباشكر كل اللي اتصلوا واطمنوا عليا وكل اللي تابعوا معانا على التويتر

انا بس عندي سؤال، على ايامينا اول ما فتحت المدونة المظاهرات اللي عشان فلسطين كانت بتتساب وما كانش الامن بيعامل الناس كده ابدا... واخر مرة كان ايام حرب غزة، بداية من الحفر تحت بيت المقدس ومصادرة البيوت ابتدوا يغلسوا على الناس ليه؟ هي فلسطين طلعتنا من كاس العالم؟


Sunday 27 December 2009

يادي النيلة ما عندناش منتجات تقاطعوها

حد يفهمهم دول تجليات حكمة الرئيس اللي خلانا ما عندناش منتجات عشان لما حد يحب يقاطعنا يتحبس دمه وما يلاقيش حاجة يقاطعها
وبرضه لما نحب نقاطع حد ما نعرفش نقاطعه بايه؟ يعني مثلا لما حرمنا الجزائر اللي افلامها بتتمثل في مهرجانات عالمية وبتاخد جوائز من فيلم امير البحار اكيد يعني ما ناموش الليل
واحنا ناويين نحرم غزة من فيلم امير البحار برضه، لا ده احنا قاسيين قاسيين
وحلقة العاشرة مساء النهاردة استضافت مواطن ومخبر وحرامي، المواطن هو حسن نافعة، وفيه بقى اتنين كان مخبر وحرامي
انما قالوا ايه؟ كلام لوز، الحمد لله ربنا مسلط عليهم غباوتهم لدرجة ان واحد اتصل وقال: يا استاذة منى انا واحد بالاعدادية، ياريت بقى تفهمونا كده بالراحة احنا عدونا غزة والجزائر وسوريا وحبيبتنا اسرائيل؟ اصل لو كده فهمونا يعني، ماهو الكلام مالوش معنى الا كده
وانا ما اعرفش حسن نافعة ماله فتح بقه وذهل كده ليه؟ الراجل جات له كتمة من الكلام اللي اتقال
قال ايه ياخويا، طلعت حماس دي بقى ايه؟ اسمع:
اولا بتهرب سلاح الى داخل مصر.. لا مش منها، بتدخل لنا احنا سلاح، بتجيببه من انهي داهية وهي اصلا مالهاش منفذ غيرنا؟ دي كلها تفاصيل صغننة
ثانيا بتدخل لنا نسوان روسيات بيشتغلوا في استغفر الله العظيم الدعارة، ولما حد يكلمها تقول لهم انتوا ازاي تشتشهجموا على الناس في بيوتش الدشعارة؟ البلد مليانة كانون
ثالثا بتعمل لنا دماغ، بتدخل لنا حشيش وبانجو وهورايين وكودايين وسرنجات
وغالبا هي اللي ورا انتشار انفلوانزا الخنازير، وهي حماس اللي عدت من النفق تحت البحر الاحمر وراحت رابطة العبارة في حجر وربطت الحجر في بق حوت وراحت مولعة في ديله قام الحوت جاري والعبارة غرقت، وهي اللي نشرت فيرس سي، وهي اللي شخت لنا في المية فبقينا نشرب مية بمجاري وناكل خضار مسقي بالمجاري، وهي اللي تفت لنا في الفراخ قام تفتهم خلت الفراخ تبرد وجابت لهم انفلوانزا الطيور وهي اللي قتلت الجيش المصري وهي اللي عذبت عماد الكبير وهي اللي رمت لنا عمل على العتبة وقفت حالنا وهي اللي نبرت علينا وخلت النفس تمسكنا وهي اللي خسرتنا في ماشت الجزائر، وهي اللي خلت الواد الجزائري يقلع المنطلون لفردوس عبد الحميد ويعورها في عقلها الباطن، اصلا بيقول لك ان الجزائريين دول بربر زي ما احنا عارفين، والبربر دول اصلا غزاوية بس مش قايلين، ولعلمكوا الهكسوس دول اصلا من غزة، والحيثيين كمان وهي السبب في حالة العته اللي صايبانا والكل ملاحظها، دعت علينا وقالت: الهي تبقوا فرجة العالم يا بعدا
وعليه، فاي انسان بيحب مصر واسرائيل وبيكره الجزائر وفلسطين يبقى مواطن مصري اصيل ولازم يقف مع سد يأجوج ومأجوج
عشان الفلسطينيين دول ح ياكلونا... يامي يامي يامي يامي، ح ياكلنا العو يامي
ودول بيستهبلوا، قال جعانين قال، دي سهوكة، دي عيال صايعة ومعاها مخدرات ونسوان روسيات
مع ان، والله العظيم، والله العظيم، والله العظيم، الصحف والمدونات الاسرائيلية هي اللي قالت ان الاسرائيليين هم اللي بيبعتوا لنا مخدرات وروسيات وبونيات وكل حاجة، بس احنا عارفين ان اسرائيل بتضحي بنفسها عشان غزة تعيش، واحنا ما نرضاش ان اسرائيل في انكارها لذاتها تظلم نفسها بالطريقة دي
ومصر كبيرة، كبيرة كبيرة كبيرة كبيرة كبيرة كبيرة كبيرة، بتاعة خمسين طن كده لا وطول بعرض يعني
وفرنسا بتحبنا، وبتساعدنا مع امريكا واسرائيل اننا نبني الجدار ده ده جدار جامد جامد، زي خط بارليف، اه، احنا هدينا خط بارليف ونرجع نبنيه تاني امال انتوا فاكرينا ايه؟
ده احنا جامدين قوييييييي
انا باحبك قوي يا عووووووكل، يا مسيطني، عمرنا ما اترمينا في مزبلة التاريخ زي ايامك كده
اتارييييييييييييييييييك يا عكرووووووووووووت عملت موضوع الجزائر ده بروفة ومررت في وسطه على لسان ابنك: طظ في القومية العربية، كفاية بقى، ينعل ابو غزة (ده في النص كده والجزائر بتتشتم) احنا المصريين والمصريين احنا ومش عايزين حد يحبنا كل الناس بيكرهونا
انت بتحضرنا يعني عشان لما كل الناس يكرهونا ما نتصدمش؟
بس الشهادة لله يا عوكل الناس المرة دي مش بالعة موضوع الجدار ده، تصدق بالله؟ يعني هم ظلطوا موضوع الجزائر واتكرعوه، بس المرة دي انت اديتهم على قفاهم يا عوكل كالعادة، زي حكاية العلاوة كده، تسخنهم وتطلعهم ومرة واحدة تروح لاسعهم على قفاهم وتسيبهم فاتحين بقهم وريالتهم نازلة على صدرهم، ده كل الناس يا عوكل، كل الناس حتى اكثر الناس توحشا ايام الجزائر صايبهم الهلاهوطة ومش مصدقين نفسهم، وابتدوا يقولوا الحكاية بدأت من ايام الجزائر كان بيحضرنا
معلش احنا اصلنا زي الحمار اللي ضحك على النكتة بعد يومين، ما انت اللي رابطنا في ساقية وعلى ما بنفهم بتكون خربت مالطة من اللي انت عامله فينا
الا يا عوكل انت نهايتك ح تبقى ازاي؟ انا نفسي اعرف ربنا ح يعمل فيك ايه؟ وللا هو سايبك خلاص كده بيعذبنا بيك ويجعلنا عبرة خلقه من خلالك؟ وللا انت مستر اكس مالوش نهاية؟ انت عمال يا راجل تصغر تصغر تصغر تصغر لما ح نلاقيك بتاكل سيريلاك وقاعد على البوتي بتعمل إإح.
روح يا شيخ.. وللا ح تروح فين انت شكلك مش رايح في حتة.. اروح انا بقى

Saturday 26 December 2009

عاجل وقفة احتجاجية بكرة في المحامين الساعة ستة

انا لسة عارفة دلوقت ان بكرة ان شاء الله في نقابة المحامين في وقفة احتجاجية الساعة ستة ودي غير الوقفة الاحتجاجية بتاعة نقابة الصحفيين يوم الثلاثاء الساعة ستة برضه
انا عارفة ان الاخطار جه متأخر، بس ارجوك اعملوا اللي تقدروا عليه عشان تيجوا، انا رايحة ان شاء الله برضه
عشان كده الصحفيين ما عرفتش تعملها يوم الاحد، الامن ح يحرس مين وللا مين؟ 

Friday 25 December 2009

وقفة احتجاجية بنقابة الصحفيين الثلاثاء

 تحديث:
تصحيح الوقفة الاحتجاجية يوم الثلاثاء للاسف مش الاحد حصلت لخبطة الساعة ستة
وانا برغم من اني اتغاظت قوي ان المعاد طلع بعيد كده، وبالرغم من اني يوم التلات عندي حاجة مهمة جدا جدا جدا الساعة سبعة بس ان شاء الله رايحة برضه
مش عشان حاجة غير كلمة قالها السيد حسن نصر الله:
بعض المثقفين عم يقولوا شو جدوى انو ننزل ونتظاهر.. لك انت ياللي قاعد تحت التكييف ما بتعرف شو جدوى التظاهر بس نحنا ياللي بالجبهة بنعرف شو جدواها انو حدا بينزل ويتظاهر لحتى يدعمك
حاضر
على راسي واروحها على رموش عينيا، ده اقل من اقل الواجب
هو ما رضيش يتكلم عن موضوع الجدار المصري خالص، طبعا، ما القبيحة ست جيرانها، اللي هزم اسرائيل بيتقي شر لسانا... سبحان الله، ده الرسول عليه الصلاة والسلام قال على اللي الناس بتتقي لسانه اشر الناس




الثلاثاء القادم القادم الساعة ستة مساء بنقابة الصحفيين لجنة الحريات عاملة وقفة احتجاجية 
وماحدش يتريق ولا يسفه ولا يقل ادبه، لازم تيجوا بقى، مدام بتزعلوا من شتيمة الناس لينا يبقى لازم تيجوا، اعملوا حسابكوا احنا لسة ح نتشتم اكتر، مؤسسات حقوق الانسان والنشطاء الاوروبيين والامريكان لسة بيسخنوا، مش زينا بعد شوية بيزهقوا دول اوبة وح يلبدوا في قفانا زي الاراضة ومش ح يسيبونا الا لما يخلونا ما نسواش تلاتة نكلة، هم دول اللي فضلوا يزنوا على دماغ انجلترا لحد ما امتنعت عن تسليح اسرائيل.. بريطانيا العظمي، اللي اسست اسرائيل نفسها، زهقت من زنهم لحد ما بطلت تسلح بنتها من وشهم، وهم دول (مؤسسات بعينها والله ومعروفة بالاسم) اللي مسكوا تسيبي ليفني خلوها مش عارفة تخرج من فلسطين المحتلة، وقبلها ايهود باراك، وهم نفسهم دول بقى حاطينا المرة دي في دماغهم
اديني جبتها لكم على بلاطة اهو عشان عارفة اننا بقينا كلنا محجوب عبد الدايم ومش هاممنا اننا بنعمل جريمة بس هاممنا اننا نتعاقب عليها
ح نتعاقب، العرب دول امرهم سهل، اخرهم يتنرفزوا ويشتموا وبعد شوية يعيطوا ويقولوا ابو خالد ابو خالد والله يرحم ايام ابو خالد (ابو خالد ده يبقى عبد الناصر لو كنتوا نسيتوه يعني.. ضيع لهم فلسطين وبيحبوه بس عشان لسانه حلو، مش باقول لكوا امرهم سهل)، هبل واحنا حاطينهم في جيبنا الصغير، لكن الحيزبونات بتوع اوروبا وامريكا دول دماغهم سم وميتهم ما يدفنش ولما بيحطوا حد في دماغهم بيخلوه عبرة لمن يعتبر
اديني باقول لكوا اهو، احترموا نفسكوا بقى، شغل التبجيح والزغاريد والشرشحة ده بيخوف العرب بس، ما بيخوفش الخواجات، بيخليهم يعندوا، وحسن حسني قالها كلمة حكمة في فرحان ملازم آدم: اعمل الغلط طول ماهو فيش حد شايفك، لو حد شافك بجح، لو اللي قدامك ما خافش من بجاحتك طاطي
اييييييييوة كده، خليكوا حلوين، انا بقى لا ح اقول لكوا ربنا، ولا ح اقول لكوا انسانية، ولا تاريخ، ولا مصر، ولا دور مصر ولا الكلام الخرا ده عشان ما نضحكش على بعض، احنا لابنعرف ربنا ولا عندنا انسانية من الاخر كده ولا يهمنا التاريخ في حاجة، فلوسك في معاك، سجايرك في جيبك، دفيان ومعاك حق طاقة العشا يولع التاريخ والبلد مش كده؟ 
بس احنا ح ننضر بقى، في اكل عيشنا يعني، شفتوا بقى صراحة اكتر من كده؟ شفتوا بجاحة اكتر من كده؟ 
غير سمعتنا اللي ح تبقى زي الطين، زيادة ماهي مطينة وكل اللي بيشوفنا بيتف علينا، الناشطين الاوروبيين والامريكان لو ما لايمنهاش ح يمسكوا دماغ المستثمرين اللي هنا ويخربوا بيتنا عربي وانجليزي، وكل مصري عايش برة ح يتعامل زي الدبانة اللي واقفة على الزبالة، الاسرائيليين دلوقت ما بيعرفوش يسافروا في اي دورات رياضية من كتر التهزيء والبهدلة، وعشان تبقوا عارفين بقى، اسيادكوا الخواجات متغاظين مننا احنا اكتر ماهم متغاظين من اسرائيل، عشان مش شايفين لينا اي مبرر، شر لوجه الله كده
وقفتكوا الاحتجاجية ح تعمل ايه؟
لا ح تعمل، برضه خلينا نتكلم على مية بيضا، لما يوصل للناس ان فيه عدد كبير من المواطنين المصريين ضد بناء الجدار ده ممكن يحسن موقفنا ويخلي الناس تفتكر، وانا باقول تفتكر يعني لأن احنا دافنينه سوا، ان الشعب ده طيب وغلبان ومغلوب على امره، ومبارك هو المجرم الاثيم والقاتل اللئيم وممكن يراجعوا مسألة معاقبة الشعب كله بذنب مبارك، وما تخافوش من مبارك انه يقول مثلا: كحك، وانا اشيلها لوحدي؟
هو راجل عاقل وما عندوش مانع انه يطلع هو الشرير وانتوا الطيبين حفاظا على الاستثمارات

لكن لما كل واحد قاعد على مؤخرته والكلام الخرا اللي بتطلعوا تقولوا وتكتبوه في كل داهية ده والتليفونات الطين اللي بتعملوها لعمرو خرا اديب، ده ياكل مع العرب ده، ما ياكلش ما اللي بيأكلوكوا، لايموها واعرفوا مقامكوا كده عشان احنا زودناها قوي ونسينا نفسنا.... على نفسها جنت براقش
المرة دي مش العرب الغلابة اللي لسة عايشين على ذكرى ابو خالد وكلمة تجيبهم وكلمة توديهم اللي متصدرين لنا... دول قبائل الفايكينجز اشربوا بقى
تاني، المعاد يوم الثلاثاء  القادم في نقابة الصحفيين الساعة ستة، مش ح يحصل لنا حاجة، ح نروح نناضل ببلاش ونشيل اعلام ونضحك للصورة عشان تطلع حلوة ونغسل ايدينا زي هيرود ما غسل ايديه من دم المسيح ونبيض وش البلد ونبقى واو ومصر لسة بخير
ومعلش... ما عرفتش ادعوكوا للفاعلية بطريقة أأدب من كده، انا قرفانة من نفسي ومنكوا ومن حياتي ومن الدنيا كلها
مالكوش دعوة بقلة ادبي، ماهي الصراحة بقت قلة ادب... اهدوا كده واشربوا لكوا كوباية شاي اخضر واعقلوا الكلام ومافيش داعي بقى لحكاية الكرامة دي، دي مش الجزائر، دي اورمبا والدول المتغدمة، يعني المام يا روح ماما
---
اه.. نسيت اديكوا كام لنك كده يا حلوين
ده وصف لخط بارليف الجديد، بس اللي عاملاه مصر وامريكا واسرائيل بقى المرة دي
زي الزفت طبعا ما اقولكوش، مافيش امل نقنع اسيادنا اللي بيأكلونا ان معانا حق
وعلى فكرة يعني اسرائيل تبيعنا في اول منحنى، اصلا هي خسرانة خسرانة وبتقع دوليا وبتوقعنا معاها، وامريكا ح تعمل عبيطة واحنا اللي ح نلبسها لوحدنا
واللوم القانوني واقع علينا لوحدنا يا عثل احنا يا عثل هيع هيع هيييييييييييييع
يعني قريب قوي ح نبقى ملاحقين دوليا زي اسرائيل
اسفخص

ذنبه ايه الباسبور المصري؟

انا مش متأكدة من المعلومة دي، بس فيه حد على التويتر قال ان في سفارات برة بعض المصريين حرقوا الباسبور المصري بتاعهم احتجاجا على ما يحدث في غزة
ااااااااااااااه ياااااااااااااانا، اااااااااااااه ياااااااااااانااااااااااااا اعمل فيكوا ايييييييه؟ اعمل فيكوا ايييييييييييييييييييييييه؟ هو يا اما تقولوا فلسطين اولها فلس واخرها طين يا اما تحرقوا الباسبور المصري؟ مافيش حد عايز يطلع نفسه غلطان ابدا؟ يا اما فلسطين اللي غلطانة يا اما مصر اللي غلطانة؟ ماحدش عايز يواجه نفسه بحقيقة اننا جيل عرة واننا احنا اللي عرينا مصر مش مصر اللي عرتنا؟ واننا فضحناها ووكسناها وكسفناها ولوثنا تاريخها وعمرها في تاريخها الطويل ما شافت اللي شافته على ايدينا؟ ده الباسبور المصري لو بينطق كان قال لنا حلوا عني حرام عليكوا كسفتوني
قدر من تحمل المسئولية، احنا الغلطانين، ومصر مبلية بينا، مصر دي مش اسرائيل عشان باسبورها يتحرق، الاسرائيليين اللي حرقوا باسبورهم عملوا كده عشان يتبرأوا من الصهيونية ويقولوا احنا اتخدعنا واكتشفنا حقيقة الخديعة ان الدولة دي مش مفروض كانت تتوجد اصلا، ايه وجه المقارنة بقى ما بين كيان مصطنع الناس اللي اخدت جنسيته راجعت نفسها واكتشفت حقيقته وما بين مصر اللي عندها سبعتلاف سنة اظلمهم المرحلة اللي احنا اتولدنا فيها، لا كانت كده قبل ما نتولد ولا ح تبقى كده بعد ما نغور في داهية، هو احنا ايه؟ يا اما بغبغنات نكرر الكلام ورا عمرو اديب يا اما قرود بنقلد اي حاجة نشوفها؟ اعمل فيكوا اييييييه؟ ايه الغباوة دي؟ ايييييييييييه دين ام الغباوة ديييييي؟ ح امووووت حرام عليكوا، ومش ح اموت شهيدة كده ح اموت منقوطة
المعلومة دي على مسئولية غفاري على التويتر، يارب يطلع غلطان، افش غلي فيه هو احسن ما اموت كمدا

Thursday 24 December 2009

رقية السادات عم بتزت حكي

ماهو حاجة من الاتنين، يا المرة دي مهبوشة وربنا صايبها في فصوص مخيخها بعاهات نادرة مالهاش علاج ومفسخهولها من بعضه ومنطوره في انحاء مختلفة من جسمها واطرافها ومخارج معدتها وفي الحالة دي اكرام الميت دفنه شوفوا لها مصحة تقضي بقية عمرها فيها، يا اما رباية ابوها صح، وفي كل الاحوال هي بنت حلال مصفي وولد السو يجيب لاهله اللعينة
اسمعوا وشنفوا اذانكوا وصدقوا عينيكوا:
رقية السادات ترحب بتكريم إسرائيل للزعيم المصري الراحل


رحبت أسرة الرئيس المصري الراحل أنور السادات بإطلاق مدينة حيفا، ثالثة المدن الإسرائيلية، أمس الأول الثلاثاء اسم السادات على ساحة بوسط المدينة الواقعة شمال إسرائيل.


واعتبرت رقية السادات ابنة الرئيس الراحل أن هذا الحدث يمثل تكريما لوالدها من أعدائه السابقين. وقالت لـ"العربية نت" في مقابلة خاصة "من كانوا أعداءنا المفترضين يكرمونه وليس بلاده".



تجاهل رسمي


وأضافت بانفعال واضح "يكفيه أن من يكرمه ويقدر قيمته هم من انتصر عليهم، بينما في بلده لا يتلقى التكريم المفروض".
(لا يلقى تكريم هنا ازاي؟ امال الخرا اللي احنا عايشين فيه ده كله جلبة مين؟)

وسألها "العربية.نت" عما إذا كانت تشعر بأنه يتم نوع من التجاهل الرسمي للسادات في مصر، فقالت "طبعا! وهذا واضح في كل شيء. لكنها شددت في المقابل على أن والدها الزعيم الراحل يكفيه أنه حفر اسمه في التاريخ".
(من ناحية حفر هو حفر.. حفر وثبتنا في الحيطة، ان شاء الله لما الجيل ابن الحرام سليل معاهدة السلام ده يغور في داهية قبورهم ح تغرق وسط تفافة الاجيال الجاية)



وتابعت "المفروض أن التكريم في مصر يكون على مستوى زعامة السادات لأنه إذا كانوا ( المصريين) الآن ينعمون بالأمن والسلام فالسادات هو من فعل ذلك ولولاه لكنا مثل بعض الدول العربية من حولنا".
(واي نعمة، عقبالك كده لما تشوفي النعمة اللي شايفها سكان العشوائيات والفلاحين اللي ابوك طردهم من اراضيهم والعمال اللي متوقعين في رحمة المالك الاسرائيلي)



ولفتت إلى أن كتب التاريخ في المدارس لا تقدم سوى كلمتين للتلاميذ عن سيرة الراحل. وقالت "أعتقد أنه شيء مقصود. ويكفي والدي أنه الميت الحي لأن سيرته تخيف البعض"، على حد تعبيرها.
(ما بلاش.. ما تخليهم ساكتين احسن لك واحسن له، وللا ينشروا نصوص المعاهدة اللي ابوك نفسه كان مخبيها علينا وما طلعتش غير لما كلب العرب اندبح؟)



وردا على اقتراح بعض أفراد أسرة السادات ومن بينهم طلعت السادات نجل شقيقه والنائب بمجلس الشعب المصري بإطلاق اسم عمه السادات على ميدان التحرير أحد أكبر ميادين القاهرة وأكثرها شهرة وازدحام، قالت بلهجة عامية مصرية "تكريم والدي ليس بشارع ولا تمثال. وبعدين هو يعني بعد 28 سنة ها يعملوا له تمثال. ميدان التحرير كان المفروض يتسمى باسمه لكنهم عدلوا".
(حد يفهمني الجملة دي.. دي بتتكلم زي اللمبي: زمن اللللل.. خلاص انتهى)



وأضافت "إنجازاته ثابتة وواقعة موجودة لأنه حفر اسمه بحروف من ذهب في سجل التاريخ".


وقالت: "حتى المثقفون والصحفيون والجميع لم يفهموا والدي فالعيب فيهم لأنهم لم يكونوا على قدر فكره ولا حنكته وسياسته، حبه لبلدها وترابها وليس للكرسي. وضع ملايين الخطوط تحت هذه الكلمة. كانت مصر معشوقته حتى أكثر منا نحن أسرته وأولاده".
(لا طبعا، ما كانش بيطيق الكرسي، بامارة تعديل الدستور: "مدد" تالية، ثم مش مهم نفهم حنكته، كفاية ان احنا عايشين فيها اهو بالصلاة ع النبي، الا مافيه بني ادم ما بيتفش علينا من تحت راسه، حتى الامريكان والسويسريين بتوع المآذن ماحدش بيحبنا دلوقت غير ليبرمان ونتانياهو اتنين من اجن تلاتة في العالم، طبعا معروف مين التالتة)



ومضت إلى القول "ربنا كرمه واختاره شهيدا. ما يعزيني هو أنه رغم التجاهل الرسمي هنا. لازال أعداء والدي السابقين يعرفون قدره".


ونفت رقية السادات لـ"العربية.نت" تلقيها دعوة لزيارة إسرائيل، وقالت لم أتلق دعوة لزيارة إسرائيل ولا توجد قنوات اتصال. تلقيت في السابق دعوات لحضور حفلات رسمية للسفارة الإسرائيلية لكني لم أذهب ولم ألب الدعوة.


واستطردت قائلة: "لكن أشكرهم جدا جدا لأن من هزمهم هم يكرمونه. هذه خبطة لنا ومش عارفة الناس هنا ليه مش مكسوفين من نفسهم".
(انت يا ولية هابلة؟ هابلة وللا بتستهبلي وللا جين العته ده مادد في العيلة وللا ايه بالظبط؟ هو فيه دولة في الدنيا بتكرم اللي هزمها؟ ده حتى المانيا ما بعد النازي ما كرمتش تشرشل مع انها تابت وانابت وعادت الى حظيرة الربرارية سالمة وبقت تحب اليهود موت موت موت وتطلعه على ميتنا احنا.. انت مجنونة يا ولية؟ مجنونة؟ انت مصدقة نفسك؟ يعني هو هزمهم وهم بيكرموه؟ طب احنا ما عملناش ميدان موشيه ديان ليه عشان اتهزم لنا؟ واحنا اللي مش مكسوفين من نفسنا؟ احنا؟ ده اللي اختشوا ماتوا واندفنوا وبقوا حفريات وبترول يا شيخة دول حتى ما عبروكيش بدعوة



ولاحظت أن ما وصفته بإنجازات والدها الراحل على مدى سنوات حكمه البالغة 11 عاما تحتاج إلى مائة عام لتقييمها
هو فيه مائة عام ح ندفع فيهم تمن انجازات ابوك بصراحة، ده احنا لسة بنقول يا هادي، احنا لسة شفنا حاجة؟ ابوك قتل امين عثمان عشان جوز مصر لانجلترا جواز كاتوليكي وراح منيمنا مع اسرائيل في الحرام مقابل "عشرات المليارات نازلة ترف علينا والحمد لله من غير الامة العربية" فاكراه لما كان قاعد يترقص ويقول الكلمتين دول؟ وادي عشرات المليارات خلصت واحنا عجزنا وبقينا عجر وجمالنا راح وبقينا ندفع فلوس لاسرائيل ونقلع لها مالط ونرقص لها رقصة المجنونة عشان بس ترضى تتحرش بينا حتى، وان رضيت تحسس في اي مكان ان شالله على ارنبة مناخيرنا نفقع زغرودة
وما نابناش غير خلفنا جيل كامل لقيط ابن حرام وواخد على الحرام وما ياكلش غير الحرام وماحدش عايز يعترف بيه، وكل الناس عمالة تقول له زي عماد حمدي: اننننننننت مش ابنيييييييي حسني مبارك بس هو اللي ابنيييييييي انت لقيط لقيط لقيط فاهم يعني ايه لقيط؟  بعد ما الباشمهندز اسرائيل ضحك على هنادي ابوكي واديه راح في الوبا وسابنا احنا لمصيرنا

ده عمرها ما حصلت ان كل الدول العربية والافريقية والاوروبية ومنظمات حقوق الانسان في امريكا كلها كلها كلها بتسب الدين لمصر، دول عمالين يقولوا لنا ده اسرائيل ارحم منكوا، انتوا ايه عذركوا؟

فيه كده في الدنيا؟ فيه حد يتمكن من ده كله في حداشر سنة بس؟ 
فعلا ظاهرة فذة لا وما رضاش المرحوم يمشي ويسيبنا في حالنا، ساب لنا خلفته السو بجيناته المشوهة قاعدة تعمل زي الناس من بقها في دماغنا ومش عايزة تتلط وتسكت بقى على وكستها وهي وانجازاته العظيمة تتضافر جهودهم عشان يجيبوا للراجل الشتيمة في قبره

طب واست شيهان بنت الانجليز مش ح تتحفنا هي كمان بكلمتين؟ وللا ناوية تاخد الطيارة على تل ابيب على طول وتأنسهم هناك
طاااااااااب يا امورة، مدام مبسوطة بتكريم اسرائيل لابوك روحي لهم بقى، ماهو يا خدمهم يا خدمنا، لاننا كنا في حالة حرب، وما ينفعش في حالة الحرب زعيم طرف من الطرفين يخدم الطرفين المتحاربين، ده بالمنطق كده يعني، كومن سنس وللا ايه؟ وتجاهل الاعلام المصري لابوك ده حماية له من اللعن اللي ح ياخده، واذا كنتوا طلعتوا الجمسي حاقد، والشاذلي مجنون، وعصمت سيف الدولة حنجوري... اهي اسرائيل اهي، اصدق انباء من الكتب
اكتر واحدة شهادتها مش مجروحة على خيانة ابوك لبلده اللي كانت معشوقته، بس الظاهر هو كان غاوي عشق عنيف شوية 

يحدث في المدينة الباسلة

 تحديث:
احيه احيه احيه يا بو سوس احيه بنتك ح ترقص وانت ح تفتح للزباين
منظمات امريكية عاملة حملة ضد مصر، فين برامج الفضائيات المصرية تسأل السؤال التاريخي: لماذا ماحدش طايق ريحتنا؟ 
يا ترى ليه؟ عالم ظلمة بعيد عنكوا
------------------

يا مصر بعض التسامح يبقى عار وبأجر/ افتكري "لا تحسبن" مكتوبة فوق كام قبر/ والتار يبات يصحى تاني لو يشيب الدهر
(تميم البرغوثي - قالوا لي بتحب مصر)

وفي بورسعيد (المدينة الباسلة) لا تحسبن مكتوبة تقريبا فوق تسعين في المية من شواهد القبور، وفي بورسعيد المدينة الباسلة، الدولة باعت مصنع مصري بورسعيدي عمله المصريين بعرقهم ومالهم وكبروه بضرايبهم لشركة باجير الاسرائيلي، ده من سنين، وانا مواطنة مصرية صالحة، باسمع الكلام وبادفع الضرايب وبنقدم ورق بالشقة اللي قاعدين فيها للضرايب العقارية، اول مرة اسمع الخبر ده النهاردة
والاكادة، ان صاحب العمل الاسرائيلي فصل مدير مصري عشان "يجيب للعمال حقوقهم" لا.. انا ما اتجننتش ولا باخرف
انا بقى الدموع نازلة كده.. سبحان الله، مش باعيط يعني ولا حاجة، هي نازلة كده لوحدها، حاسة ان حد شد كوبس الكهربا وسابني لوحدي في ليلة مافيهاش قمر، واحنا اصلا ما عندناش نجوم في القاهرة بسبب التلوث، ومش عارفة ليه افتكرت حاجة غريبة قوي، افتكرت جومانة مراد في فيلم كباريه وهي ماشية تقول: طرحة سودا استر بيها نفسي.. اي حاجة استر بيها نفسي... ادوني حاجة استر بيها نفسي

فيه ايه؟ ايه التلطيش اللي من كل ناحية ده؟ مين بيعمل كده فينا؟ ايه اللي فجأة كركب الدنيا على دماغنا من كل ناحية؟ بتعمل ايه يا عوكل؟ بتعمل ايه بالظبط؟
ما تفهمنا يا عم نبوس ايدك، احنا بقالنا قد ايه مضحوك علينا الله يخليك؟ ما خلاص، الطوبة وقعت في المعطوبة ومش عارفين نعمل لك حاجة، صارحنا بقى، يعني ايه اسرائيل تحتفل بثورة اتنين وخمسين مع السفارة المصري ونتانياهو يقطع علم مصر اللي مرسوم على تورتة؟ يعني ايه اسرائيل تحتفل بعيد ميلاد انور السادات وتعمل له ميدان باسمه وكل الاسرائيليين حتى الاكثرهم تطرفا وعنصرية يقبلوا بكده؟ شوف؟ شوف وصلنا ان احنا عادي قابلين، بس هم قابلين ازاي؟ الا اذا كانوا عارفين انه خدمهم خدمة تستحق ان واحد عربي مسلم واسمر (وهم عندهم عنصرية ضد اللون) يتحط اسمه على ميدان في "ارض الموعد" المخصصة لشعب الله المختار. هي دي حاجة بالساهل يعملوها يا ناس؟ يعني ايه تبني سد يأجوج ومأجوج عشان "تحمي" مصر من الغزاوية وانت بلسانك اللي طلعت مرة وقلت لصحفية اسرائيلية: ما انتوا ياما دخلتوا لنا من الحدود جواسيس وتجار مخدرات ودعارة ورجعناهم لكوا في الكتم!  وبايع كام حاجة في البلد لشركات اسرائيلية؟ يعني انا دلوقت الكرسي اللي انا قاعدة عليه ده بتاعي وللا ايه؟ ما تكلمنا يا سيدي ربنا ما يحير لك ولايا، احنا كنا عملنا لك ايه؟ من امتى بتضحكوا علينا؟ من امتى؟ من سبعة وسبعين؟ وللا من تلاتة وسبعين؟ وللا من سبعة وستين وللا من اتنين وخمسين؟ وللا من تمانية واربعين؟ نعرف بس

اه.. انا نسيت انك مش عايز حد يكلمك في الموضوع ده دلوقت: لالالالالالالا ارجوك ارجوك ارجوك
معلش.. انت عارف الستات رغايين بقى، ما تاخدش في بالك
طب اعمل ايه دلوقت؟ انا لسة باحبها


الاسرائيليين بيخنقوا غزة.. واحنا معاهم

بما ان موضوع الجزائر ده صدمة عمري، وعمري ما ح انساه، وبصراحة اكتر عمري ما اسامح الشعب المصري الشقيق على اللي عمله في شعب الجزائر اللقيط عايزة اعرف علاء مبارك ح يعمل ايه في الحملة الاوروبية لمقاطعة مصر؟
(اه ما نسيت اقول لكوا ان علاء مبارك مسيطر على كل مراكز الغيظ في مخي)
واحب اكرر تاني ان اثناء حرب غزة السنة اللي فاتت علم مصر اتحرق في واشنطن، لندن، سيدني
الخبر اللي فوق مادو جابهولي وفيه اخبار تانية بقى زي ان مصر مثلا تقول مش ح اتكلم في الموضوع ده وبعدين ترجع تقول لا مش بنبنيه ولا حاجة، تصدقوا، والله لسة قريب يعني قايلة مش بنبنيه ده غير منع مسيرة غزة
طبعا هو الشعب الاوروبي الشقيق بيعمل كده عشان موضوع الحصار والجدار ده اللي حكومتنا كل ما نقول لها إإ تقول: تؤ تؤ تؤ تؤ...ماحدش يكلمني في الموضوع ده خااااااااااااااااااااااااااااااالص دلوقت.. سيبوني ارجوكوا سيبوني في اللي انا فيه
انا مش فاهمة يعني كل ما نكلمهم يقولوا ماحدش يتكلم في الموضوع ده خالص، ههههه كان عندي واحدة صاحبتي جوزها كان بيخونها، والله الحكاية دي صحيحة، فطبعا بعد ما قفشته كذا قفشة وبتاع، بقت تدور في الموبايل بتاعه تلاقي نمر الحريم اياهم، تقول له: ايه النمر دي ياراجل؟ يرد عليها، والله العظيم، بالظبط كده: لالالالالالا ارجوكي ارجوكي ارجوكي.. ويسيبها وينزل من البيت
بس انا مش غايظني في ده كله غير كلمة واحدة: مصر من حقها تحمي امنها القومي.. من الغزاوية، من الجعانين والعيانين
وانا ما اعرفش دولة بتحمي امنها القومي بانها تعمل جدار فصل عنصري
وبعدين الشهادة لله، الشعب المصري الشقيق، هو شراني ويحب الاذية زي عينيه وكل حاجة، بس الشهادة لله المرة دي والله متضايقين، متضايقين من موضوع الجدار ده، حتى سواقين التاكسي بتوع علاء مبارك، ومش شايفين اي حماية لمصر ولا حاجة، وفيه برلماني مصري رفع قضية على الفولاذ ونتائج استطلاعات الرأي بتقول ان اغلبية المصريين الجدد متضايقة من الجدار ده، ييجي واحد يقول لي: خير ان شاء الله، يعني ح نشوف الشماليل بتوع مظاهرات الجزائر نازلين يعترضوا على الجدار
ح ارد عليه واقول له: ارجوك خليك صريح، كفاية كده تجريح
هي اسرائيل دخلت كاس العالم وطلعتنا؟ ايه لزومها النزول في البرد ده؟
احسن، يارب الاوروبيين يولعوا في علم مصر كمان وكمان قدامنا كده وانا عارفة ان مافيش حد ح يفتح بقه زي لما ما فحتوش بقهم في يناير اللي فات لما حرقوه في لندن، يارب يعملوا علينا حملة مقاطعة ويقولوا علينا ما قال مالك في الخمر، ده كل المقالات اللي بتتكتب على مدونات وصحف في اورومبا والدول المتغدمة دلوقت ما بتقولش علينا غير خونة، وكلام روبرت فيسك بتاع: المصريين دول يصلوا ويسرقوا ويصلوا ويرتشوا ويصلوا يعذبوا. اتعمم والله على كل المقالات دي
احسن احسن احسن، اهو جالنا اللي يشتمنا ويدينا بالجزمة وما نعرفش نفتح فيه عملا باخلاق القرية اللي علمها لنا الرئيس الممحن بصل الحر والصنان انور السادات اللي اسرائيل ح تحتفل بعيد ميلاده وتعمل له ميدان باسمه في حي مناحم بينجن والمقروصة رقية ما فتحتش بقها، انا عايزة اسمع صوتها تاني عشان مالهاش عندي غير القبقاب بقى والسفارة المصري بتحضر الاحتفال وعلى الله جيهان تحضر الاحتفال هي كمان، ماهي صحابها الاسرائيليين اكتر من صحابها المصريين
على رأي الباشا اللي قال: بكرة الخواجة ييجي يأدبكوا
وروني بقى ح تحرقوا علم الاتحاد الاوروبي وتقولوا "... امك" يا اوروبا وعلاء مبارك يقول لسفراء الاتحاد الاوروبي لو عندك كرامة امشي ازاي؟


Tuesday 22 December 2009

وانا كل ما اقول التوبة ترميني اسرائيل

ينعل ابو شكلك يا سادات ع المسا، الهي يبقوا معلقينك من حواجبك هناك وبيشووك لحد ما تتفحم ولا حتى تنفع كفتة تاكلها الكلاب، الله يرحم اللي قتلك ويتقبله في الشهداء بس انا زعلانة منه، اتأخر قوي، استنى لما المصيبة حصلت؟ طب كلنا ايه احنا وشربنا عليه مية؟

انا كل ما انسى الراجل ده يرجعوا يفكروني بان كل مصيبة وكل كارثة في حياتنا هو السبب فيها، اسرائيل بتخلد ذكراه وفاء للخدمة الجليلة اللي عملها لها بانه خصا لها مصر وخلاها ما تسواش تلاتة نكلة في سوق الكانتو وقلعها مالط كمان عشان الناس تتفرج على عملية الاخصاء وتضرب كف على كف، الله يخرب بيته، ربنا ياخده كمان وكمان، الواحد يصحى على خبر مهبب زي ده، عشان احنا اصلنا ناقصين فضايح وعار وكسفة، ده الدنيا كلها من اقصاها الى اقصاها غرقت وشنا تفافة، ده العلم المصري كل ما حد يشوفه بيحرقه، اتحرق في واشنطن، واتحرق في سيدني، واتحرق في لندن، الجزائر ما كانتش بدعا من الامم يعني، بس طبعا ده تراث الرئيس الراحل اننا ناخد بالجزمة من الخواجات ونقول كمان ولما واحد عربي يفتح بقه نخلي اللي ما يشتري يتفرج عليه، مش ده علامه؟ مش دي ربايته وقيمه؟ بعد كده الناس ح تولع فينا احنا شخصيا، والسفير المصري ح يحضر الاحتفالية كمان، طبعا، ماهو لولا المجحوم ما كانش هو بقى سفير ولا كان ريسه بقى وزير ولا كان ريس ريسه بقى رئيس وزرا ولا كان ريس ريس ريسه بقى رئيس جمهورية ولا كان ولاد ريس ريس ريسه بقوا رجال اعمال وزعماء واحد زعيم الكورة والتاني زعيم الحزب الوطني وعاملين علينا كماشة من كل ناحية

وح يحطوا اسمه على شارع بس؟ انا باقول يحطوه على ماركة لبسة كمان ده انسب مكان لاسمه، وبرضه يلبسوه للسفير المصري ويعمل بيه ديفيليه ويمشي يتمشكح كده بيه على المسرح والاسرائيليين يصقفوا

على الله ساداتي من اللي قالعين مالط وبيعايروا اللي لابسين هدومهم بانهم لسة لابسين يعدي من هنا عشان ياخد اللي فيه النصيب هو والست والدته واللي خلفت والدته، ماحدش من الاشكال دي يعدي عندي تاني، مافيش اختلاف في الرأي في ام المدونة دي هنا، انا باكره الاختلاف في الرأي خلاص، بالجزمة هنا، ده مش اختلاف دي بجاحة عاهرة بتعاير واحدة شريفة بانها عانس، والعاهرة مالهاش عندي غير الجزمة، ح اشأمظ امها واطلع عليها كل قرفي، مافيش في المدونة دي واحدة لابسة بدلة رقص وفي بيت دعارة، فيه بوليس اداب، الناس تسيب صدقة جارية وده سايب لعنة وفضيحة جارية منه لله ومتخلفين ربايته كمان وبقى كل وسخ ذكي ونبيه وكل شريف حنجوري زي قوم لوط لما قالوا: اخرجوا آل لوط من قريتكم إنهم أناس يتطهرون

هم الاسرائيليين بيفضحونا تاني ليه؟ مش اشتروا البلد بحكومتها وخلاص؟ وعمالين نبني لهم سد يأجوج ومأجوج اهو؟ واعدمنا لهم آخر راجل في البلد دي من تمانية وعشرين سنة عشان قتل لهم حبيبهم اللي عايشين على ذكراه زي الارملة المخلصة؟ لزومه ايه، في التوقيت ده بالذات اثناء بناء الجدار، يعملوا فرح بلدي والرقاصة اللي جايبنه يحضر الفرح عشان ما تفوتهوش النقطة ده راخر؟  بيفكرونا يعني ان اننا راكبنا وسخين وقوادين مسرحينا من زمان؟ ما احنا عارفين ما يحلوا عننا بقى الناس اكلت وشنا، ده تنكيل ده، ده زي اللي رايح بيت دعارة وطول ماهو قاعد يقول لصاحبة البيت: يا قوادة يا قوادة يا قوادة.. الله، يا سيدي عرفنا، امال انت هنا ليه؟ ما انت عارف انت فين، وهي عارفة هي مين، بجد يعني ده سب دين مالوش اي مناسبة خالص، بيذلونا يعني؟ طب بمناسبة ايه بيعملوا الحكاية دي؟ ها؟ بمناسبة ذكرى ايه؟ وللا عيد ايه؟ مش معقولة يكون عشان عيد ميلاد المجحوم! مش ممكن، هو اصل عيد ميلاده يوم خمسة وعشرين الشهر ده، معقولة يكونوا بيحتفلوا بعيد ميلاده زي مابيحتفلوا بعيد ميلاد بن جوريون؟ لالالالالالا، كده كتير، كتير، كتير حرام عليهم، الانسان مهما كان يبقى في قلبه رحمة، مش ممكن كل ما يقدروا ما يعفوش كده ابدا، احنا كنا عملنا ايه عشان كل الذل ده كله؟ وللا صحيوا من النوم وجالهم مزاجهم يقولوا لنا ارقصي يا جارية على السطوح عشان الناس كلها تشوفك؟ 

ده ايه العكننة دي ع الريق النوم ياربي؟ استغفر الله العظيم ده انا ما صدقت اروق مزاجي، كان  لزومها ايه العاصفة الخماسينية دي؟ الله ينكد عليهم ويذلهم زي ما بينكدوا علينا ويذلونا ويفضحونا ونازلين فينا تشايلد ابيوز، هم وجوزهم السابق والحالي
حد الله ما بيني وبين اي ساداتي، ولا له عندي سلام ربنا، لما ابقى اتجوز اسرائيلي ابقى اصبح على ساداتي