Wednesday, 16 December 2009

ملحوظة

انا مش عايزة الواد ده يحصل له حاجة

تحت اي مسمى مش عايزة يحصل له حاجة، انا عارفة ان السلاب وفتحي سرور ح يبيعوه عند اول مزنق، بس الواد ده لو اتقبض عليه وللا اتأذى بأي شكل من الاشكال ح اعمل حملة لاعتقال علاء مبارك اللي هييج الناس ودعاهم للتظاهر والشغب وعمل ازمة دبلوماسية مع دولة بينا وبينها معاهدات ومواثيق ونتيجة لتحريضه 35 من رجال الامن اصيبوا وكل ده عشان ماتش كورة وكام ازازة مية بلاستك اتحدفت عليه 
الواد ده بيدافع عن فلوسه وحقه، وبيوصل صرخة الناس، يعني من الاخر كده اي تهم من بتوع التحريض وزعزعة السلم والامن والكلام الهجص ده اللي ما حيلتهمش غيره اولى واحد بالاتهامات دي علاء مبارك نفسه
يا تسيبوا الواد وماحدش يمس منه شعرة،يا اما ويمين الله يا انا يا علاء مبارك في البلد دي، ح اتفرغ له واسخر له حياتي، يتقبض عليه هو كمان وينضرب في القسم زيه زي اي "قلة مندسة" بتحرض الناس على الشغب

بس هه


13 comments:

adham said...

المفروض إن حضرتك بتقرأي سورة الكهف كل إسبوع و المفروض أنك تعرفي أن ذي القرنين رجل صالح مكن الله له في الأرض و اتاه من كل شيء سببا
و أنه بنى هذا السد بناء على طلب من القوم المستضعفين ليحميهم من يأجوج و مأجوج
لازم تتراجعي عن الخطأ اللي وقعتي فيه و تعديلة البوست
لأن أهانة رجل صالح مذكور في القرآن قد يصل الى مرتبة الأنبياء و الله أعلم خطأ أخاف عليكي من هذا الذنب العظيم
ربما فعلتيه لخطأ أو جهل منك
و نحن جميعا بشر نجهل و نخطئء و الكمال لله

Amr said...

ومين قال أنه هايحصله حاجه

الواد ده هايتنفخ بس

ولو دورتى عليه هاتلاقيه دلوقتى بيتجهز للعمليه


المفروض حد يجيب بياناته ويبأه موجود ومعروف وسط أهالى العزبه علشان لو حد حاول يجيبه

helperF1 said...

اما انت نفسك شخصيا بتتكلمي عنه كانه عربجي و بتقولي و تعيدي الواد ده
مسوش واد
انت تحب حد يشير ليكي ب
البت دي
؟

Dr Nemo said...

انا عارف انك هتتضايقى منى ... بس الواد ده مخه اصلا مش مظبوط ... شوفتله فيديوهات قبل كده وتقريبا مش مظبط خالص
المهم اننا متفقين سواء كان عاقل ولا لا انه محدش يلمسه

عمرو امام said...

يا نوارة ازيك يا رب كلة يبقى تمام

طبعا انا متضامن قلبا وقالبا مع الناس وقبلهم ان شاء الله هناك

بس دة واحد مجون انا مش متعود اقول على حد كدة بس دة لا يرقوا انك تفرجية للناس
دة مش اسلوب للم الناس ولا اسلوب للاعلان عن تظاهره
هو انتى مشتغلتيش سياسة ولا اية يا رفيقة
مع فائق احترامى

mido said...

نفس فكرة البوست ده

فاكرة ؟

:)

خلوا بالكوا من بلال دياب

خواطر شابة said...

"ويمين الله يا انا يا علاء مبارك في البلد دي، "
تفتكري تقدري?

مايهمش said...

ايه يانوارة

ايه التهريج ده؟

ايه الواد أبو لسان تقيل وعنين وارمة وشكله لسه شارب قرش حشيش ولا خابورين بانجو ده؟

وناس ايه اللى جاية من اسرائيل وسينا؟

عبيط ده؟

ده شكل واحد ليه "استثمارات" زى مابيقول؟ ده كبيره ديلر بانجو ع الدائرى

وايه دخل علاء مبارك والهجانة بالجزائر؟ انتى لسه ماصدقتيش انهم نصابين وكدابين؟ قالوا "ست الناس" بتاعتهم بتشحت وانتى عملتى مناحة ولما واحد جاب لك دلائل انها مليونيرة وعايشة فى قصور وان كل ده ابتزاز عملتى نفسك مش واخدة بالك

ويمين بالله انتى أو علاء مبارك فى البلد؟
لأ طبعا علاء هو اللى حايقعد فيها.. والواد ده حايعملوا فيه اللى هما عايزينه لو ليه لازمة.. ولو انه مالوش لزمة

وانتى استعدى لكفارة اليمين..وبالكتير
حاتنزلى كام بوست من عينة "أنا مش قادرة أصدق..هى بقت كده..بقت كده...حسبى الله ونعم الوكيل...أنا عمالة أعيط"...بلاش كلام كبير ع الفاضى يانوارتنا

مواطن مصري said...

اول المعتذرين من الجزائرين

كريم زياني يعتذر للمصريين عن أحداث مباراة الجزائر بالسودان


صرح الدولي الجزائري كريم زياني لاعب فريق فولفسبورج الألماني لوسائل الإعلام الألمانية يوم الأربعاء انه يأسف للأحداث التي شهدتها أرض الخرطوم من اعتداءات جزائرية على عدد كبير من المشجعين المصريين.
وقال زياني في تصريحات لقناة زد دي إف الألمانية ونقلتها صحيفة جزائر تايمز: "ما حدث في الخرطوم إساءة بحق الشعب المصري ونتمنى ألا يبالغ المصريون بردة فعلهم إزاء هذه التصرفات الصبيانية التي قام بها مشجعون جزائريون متعصبون".
وأضاف زياني: "سأحاول القيام بزيارة إلى القاهرة للاعتذار إلى عاصمة العرب وأرض الكنانة مصر عما بدر من متحمسين جزائريين غير منضبطين".


http://www.masrawy.com/News/Egypt/Sports/2009/december/16/zayani_egypt.aspx

جبهة التهييس الشعبية said...

يعني هو الواد عشان بيقول كلام عكس بعضه يقوم يتحبس وللا يتضرب؟
ايا كان راي اي حد فيه ما يحصلوش حاجة وما يتمسش منه شعرة هو ما عملش حاجة
هو فيه تهمة في القانون اسمها: الحديث بهبل؟

جبهة التهييس الشعبية said...

يا ادهم انا ما اقصدش ذو القرنين اللي مذكور في القرآن انا اقصد الناس اللي بتتعامل مع الجدار على انه هو اللي ح يحمي مصر وانه من حقنا!!!! انت ما بتسمعش الناس بتقول ايه؟ بيقولوا ده حماية لمصر وكأنهم مقتنعين فعلا ان اهل غزة دول يأجوج ومأجوج وان مبارك ذو القرنين

طنطـــاوى said...

وربنا عمرى فى حياتى ما ضحكت على حاجة زى ما ضحكت على الكلمتين دول
واضح ان برودة الجو والتراب اللى مالى البلد خد من مودك كتير
صباح الفل يا معلم ... حياتك اية وتسخير اية ؟؟؟ دة 80 مليون مصرى مسخرين ومش عارفين يعملوا حاجة ؟؟
وربنا من كتر الضحك مش عارف اكتب اى رد
اشوف وشك بخير وهابى رمضان
يا نهار اسود ومطين بطين دى الحكاية ولعت معاكى خالص .... وحتودية القسم ؟؟؟ يا جامد انت ... طيب ابقى اتصلى بية اوصيلك علية الصول مجاهد ابن عمتى يروق هولك .... يا نهار اسود هوة احنا عندنا اغلى منك فى بر مصر كلة ؟؟؟ دة طلع تهييس وبحق وحقيقى مش اسم بلوج وخلاص ؟؟؟

يعنى معملتيش اى حاجة ل80 مليون مصرى طالع ميتين ابوهم من 30 سنة وحتحبسى علاء مبارك عشان الواد المدمن السوابف دة ؟؟؟

بهيج الشرير said...

إيه ده ياأبلتي!! إنتي جايبة واد مبرشم فجل وضارب إبر برسيم