دوري على شمشون يا دليلة

اصل انا الشاحن بتاع اللاب توب بتاعي كان بيفصل، وكنت ح اشتري شاحن جديد من راديو شاكر بس مالك مصطفى لحقني وانقذني، كالعادة، وكالعادة من غير ما اسأله ولا اطلب منه لوحده بيشم ان عندي مشكلة ويقب يحلها ويرجع يختفي تاني، اصله بعيد عنكوا ما بيعرفنيش غير عشان مصلحتي، الناس بقت وحشة قوي يا اخي، وبعتني لشمشون، في سوق العصر في الخليفة المأمون، الدور التاني، عموما اول ما تدخل سوق العصر وتقول شمشون ح يدلوك عليه واضح انه ذائع الصيط، واتعامل بجدية شديدة وصلح لي الشاحن واديني باكلمكوا من خلاله اهو

دي اول حاجة كويسة حصلت، تاني حاجة كويسة ان ايليا سليمان ادانا كلاس ساعتين وكان عثل عثل عثل، انا حبيته خلاص وبقيت كل ما يعدي قدامي ابص له زي المراهكات لما يبصوا لانور وجدي.... اه، انا يادوب من ايام مراهكات انور وجدي، بابربش

الحاجة التالتة الكويسة اني اخيرا اشتريت اللي كان نفسي فيه، بس مش ح اقول هو ايه، ده سر لحد ما اتمكن منه

الحاجة الرابعة اني اتفرجت على فيلم الزمن الباقي تاني، ولنا هنا وقفة، اولا كان قاعد جنبي ستتين كبار كده، ما اعرفش مين اللي شار عليهم ييجوا الفيلم ده؟ قعدوا طول الفيلم جنبي يقولوا: هو مش بيتكلم ليه؟ هم ح يتكلموا امتى؟ هو الممثل مش بيتكلم خالص ليه؟ يارب يتكلم بقى.. حاجة غريبة انه مش بيتكلم، طب يا ترى ايه سبب انه مش بيتكلم، ح يتكلم اهو، لا ما اتكلمش، طب ح يتكلم؟ وللا ايه؟ وللا مش ناوي يتكلم، ده اتكلم اهو، يوه، هو كده بس؟ دي جملة، الله، طب ما يتكلم

وعلى الناحية التانية كان قاعد واحد الظاهر كان داخل فيلم امير البحار ودخل الصالة دي غلط كان بيضحك كده: نياهيييق ايييييييييهههههه نياهييييق هيق هيق هيييييييق من غير مبربر واضح غير انه اهبل وابن هابلة 

بس شفت حسن حامد، كان واحشني قوي، وقلت له اني لسة باغني في الشغل، وشفت احمد غربية وكان باين عليه اثار العدوان من ضحك الواد الاهبل بعد الفيلم ولو كان استمرت حالة النهيق دي خمس دقايق كمان كان احمد غربية ح يقوم يصرخ اكتر من نادية الجندي في افلام الجاسوسية... كان بقالي كتير ما شفتوش

الحاجة السارة ال... كام دي؟

الكذا يعني اني لقيت فيلم اجورا على التورنت واللي عايز ترجمة يدور ويقول لي لقاها فين، انا لسة بانزله مش عارفة بقى ساعات الترجمة بتبقى متحملة اصلا، عموما لو مش متحملة ياريت حد بقى يدور على سابتايتل، انا مش باعرف اسباني :) ولقيت كمان فيلم يد الهية بتاع ايليا سليمان اهو على التورنت برضه

وبهاذوها المناسبة، انا مغيبة تماما عن الكون مما ساعدني في اجتياز مرحلة الاكتئاب بنجاح، ايه بقى اللي حاصل في الدنيا اليومين دولم؟ غير موضوع نصر حامد ابو زيد ده اللي الكويت مش عايزة تدخله قاموا اتخانقوا معاها وهزأوها عشان مش عايزة تدخل واحد اصلا بلده ادانته وفرقته عن مراته بحكم قضائي واحنا من الاساس رفضنا قبل كده ندخل نائب في البرلمان الكويتي من غير ابداء اسباب! مع ان النائب الكويتي بقى ممثل عن الشعب الكويتي فعلا لان عندهم انتخابات حرة وعليها اقبال كبير ومعاهم فلوس ماحدش بيشتري الاصوات هناك، ووالله لو كانوا دخلوا نصر ابو زيد كان طلع ناس تانية يقولوا الكويت بتتحدى القضاء المصري النزيه الشامخ وبتدخل بلدها واحد مدان قضائيا، ولما ما دخلوهوش في بلدهم اللي هم احرار فيها ومع ابداء الاسباب وبناء على طلب الجماهير كمان بيتهزأوا برضه، وح يتهزأوا في كل الاحوال، واي حد من اللي حوالينا ح يتهزأ بقى عشان نبقى على نور، احنا فاضيين لا شغلة ولا مشغلة وقاعدين زي الولية العجوزة المجنونة في الشباك نسب بالاب والام للي رايح واللي جاي، مع اننا لما منعنا الطبطبائي من دخول مصر من غير ابداء اسباب واحدة من عدوينه في الكويت قالت: مصر حرة مستقلة وعلى كيفها تمنع وتدخل اللي هي عايزاه، وانا باقول للانسة دي بوصفي مصرية اصيلة ابنة الكشري والفول والطعمية ان لو الموقف معكوس ونائب من الحزب الوطني اللي بينجحوا بالوجبات والخمسة جنيه المقسومة نصين اتمنع من دخول الكويت ومن غير ابداء اسباب كمان وبعد ما اتوجت له دعوة كان اعداءه قبل اولياءه هنا في مصر ح يساندوه ويهللوا على كرامة مصر اللي اتهانت باهانة عضو برلمان مصري، وبصراحة في دي ح يبقى معاهم حق، لان من حق نائب عن الشعب، ولو اسما، انه يعرف بيتمنع من دخول بلد معينة ليه؟ لانه مدعو بصفته ممثل لشعب مش لنفسه، لما يبقى يطلع من البرلمان ويمثل نفسه هم احرار يمنعوه من غير سبب، مش شطارة منها يعني انها تشمت في ممثل شعبها في البرلمان لمجرد خلاف سياسي بينها وبينه، دي قلة اصل منها، واحنا بقى العكس المتطرف، لو مبيض محارة اتمنع ح نرقع بالصوت زي الاخوة المثقفين ما بيرقعوا بالصوت على نصر حامد ابو زيد

انما يتحسدوا يعني، ماحدش جاب سيرة ياما اكلناكوا وشربناكوا والمدرسين والكراريس (مسطرة عربي وانجليزي وكراريس حساب مربعات وكراريس رسم من ام ورق فاخر) والبرايات والاساتيك الكبيرة من ام ريحة اللي كنا بنبعتها لكوا وما تمرش فيكوا، وللا جابوا سيرة وانا ما شفتش؟ اصل مش معقولة يفوتوا فرصة ذهبية زي دي، اكيد فيه حد جاب السيرة دي، ده كان يوم اسود يوم ما العرب عرفونا وللا قبلوا منا خيط في ابرة، بعد كده لو ح يموتوا من العطش ح يشربوا بولهم ولا انهم يشربوا من حنفية سبيل عاملها واحد مصري، ده احنا فضحناهم، ده لو عزمناهم على الغدا ح يحطوا لنا تمن الغدوة تحت الطبق عشان ما يجيش يوم ونقول لهم ياللي غديناكوا وحطينا لكوا نص فرخة عتاقي في الطبق وكانت معمولة بالحبهان وورق اللوري سفتها كلها يا عب عال وما سبتليش ورك

اما عجايب والله، بلدهم وهم احرار فيها، يوقع محفظته مطرح ماهو عايز، يعني احنا لينا عين بعد ما طردنا النائب بتاعهم نقول لهم ما دخلتوش الراجل اللي احنا اصلا طاردينه من عندنا ومالوش اي صفة ولا حيثية في بلده ليه؟ لمجرد انه معاه جنسية مصري؟ اهو، احنا نطلع تلاتيه ونخرب بيته ونطلقه من مراته ونكفره ونهججه من بلده ونطلع عينه وانتوا تشيلوه على راسكوا يا كلاب، وان كان عاجبكوا؟ ايه البلطجة دي؟

المهم يعني، انا مش عارفة اي حاجة بتحصل غير الموضوع ده، وان اية الله منتظري الله يرحمه مات، والايرانيين ح يعملوا مظاهرة عشان مات، دي عالم فاضية باينها، ح يتظاهروا ضد عزرائيل يعني؟ لا بجد مايصين قوي وبيدلعوا بزيادة يعني، ده ولا حتى ماتش، ولا حتى بنطلون اتقلع لمخمل باف ده واحد مات، امر الله يعني ح نعمل ايه؟ ايه المرعة اللي هم فيها دي؟ حالهم مايل قوي راخرين، اذا كنا احنا عاملين زي البت البايظة اللي مش فالحة وعيارها فلت، هم عاملين زي البت اللي ابوها لوا بوليس ومفهمها انها احلى واذكى واشطر واحدة في الدنيا عشان طالعة الاولى على طول وغير شطارتها في الدراسة ما بيخليهاش تعمل حاجة ابدا ولا بيحملها اي مسئولية ولما المدرسة تقول لها خطك وحش تجيب ابوها يشتكي المدرسة في المنطقة التعليمية وعشان لوا يرفد المدرسة، وللا انا بقيت كارهة للبشر ومش طايقة حد؟ انا خليني في السيما احسن