Monday 21 December 2009

دوري على شمشون يا دليلة

اصل انا الشاحن بتاع اللاب توب بتاعي كان بيفصل، وكنت ح اشتري شاحن جديد من راديو شاكر بس مالك مصطفى لحقني وانقذني، كالعادة، وكالعادة من غير ما اسأله ولا اطلب منه لوحده بيشم ان عندي مشكلة ويقب يحلها ويرجع يختفي تاني، اصله بعيد عنكوا ما بيعرفنيش غير عشان مصلحتي، الناس بقت وحشة قوي يا اخي، وبعتني لشمشون، في سوق العصر في الخليفة المأمون، الدور التاني، عموما اول ما تدخل سوق العصر وتقول شمشون ح يدلوك عليه واضح انه ذائع الصيط، واتعامل بجدية شديدة وصلح لي الشاحن واديني باكلمكوا من خلاله اهو
دي اول حاجة كويسة حصلت، تاني حاجة كويسة ان ايليا سليمان ادانا كلاس ساعتين وكان عثل عثل عثل، انا حبيته خلاص وبقيت كل ما يعدي قدامي ابص له زي المراهكات لما يبصوا لانور وجدي.... اه، انا يادوب من ايام مراهكات انور وجدي، بابربش
الحاجة التالتة الكويسة اني اخيرا اشتريت اللي كان نفسي فيه، بس مش ح اقول هو ايه، ده سر لحد ما اتمكن منه
الحاجة الرابعة اني اتفرجت على فيلم الزمن الباقي تاني، ولنا هنا وقفة، اولا كان قاعد جنبي ستتين كبار كده، ما اعرفش مين اللي شار عليهم ييجوا الفيلم ده؟ قعدوا طول الفيلم جنبي يقولوا: هو مش بيتكلم ليه؟ هم ح يتكلموا امتى؟ هو الممثل مش بيتكلم خالص ليه؟ يارب يتكلم بقى.. حاجة غريبة انه مش بيتكلم، طب يا ترى ايه سبب انه مش بيتكلم، ح يتكلم اهو، لا ما اتكلمش، طب ح يتكلم؟ وللا ايه؟ وللا مش ناوي يتكلم، ده اتكلم اهو، يوه، هو كده بس؟ دي جملة، الله، طب ما يتكلم

وعلى الناحية التانية كان قاعد واحد الظاهر كان داخل فيلم امير البحار ودخل الصالة دي غلط كان بيضحك كده: نياهيييق ايييييييييهههههه نياهييييق هيق هيق هيييييييق من غير مبربر واضح غير انه اهبل وابن هابلة 
بس شفت حسن حامد، كان واحشني قوي، وقلت له اني لسة باغني في الشغل، وشفت احمد غربية وكان باين عليه اثار العدوان من ضحك الواد الاهبل بعد الفيلم ولو كان استمرت حالة النهيق دي خمس دقايق كمان كان احمد غربية ح يقوم يصرخ اكتر من نادية الجندي في افلام الجاسوسية... كان بقالي كتير ما شفتوش

الحاجة السارة ال... كام دي؟
الكذا يعني اني لقيت فيلم اجورا على التورنت واللي عايز ترجمة يدور ويقول لي لقاها فين، انا لسة بانزله مش عارفة بقى ساعات الترجمة بتبقى متحملة اصلا، عموما لو مش متحملة ياريت حد بقى يدور على سابتايتل، انا مش باعرف اسباني :) ولقيت كمان فيلم يد الهية بتاع ايليا سليمان اهو على التورنت برضه
وبهاذوها المناسبة، انا مغيبة تماما عن الكون مما ساعدني في اجتياز مرحلة الاكتئاب بنجاح، ايه بقى اللي حاصل في الدنيا اليومين دولم؟ غير موضوع نصر حامد ابو زيد ده اللي الكويت مش عايزة تدخله قاموا اتخانقوا معاها وهزأوها عشان مش عايزة تدخل واحد اصلا بلده ادانته وفرقته عن مراته بحكم قضائي واحنا من الاساس رفضنا قبل كده ندخل نائب في البرلمان الكويتي من غير ابداء اسباب! مع ان النائب الكويتي بقى ممثل عن الشعب الكويتي فعلا لان عندهم انتخابات حرة وعليها اقبال كبير ومعاهم فلوس ماحدش بيشتري الاصوات هناك، ووالله لو كانوا دخلوا نصر ابو زيد كان طلع ناس تانية يقولوا الكويت بتتحدى القضاء المصري النزيه الشامخ وبتدخل بلدها واحد مدان قضائيا، ولما ما دخلوهوش في بلدهم اللي هم احرار فيها ومع ابداء الاسباب وبناء على طلب الجماهير كمان بيتهزأوا برضه، وح يتهزأوا في كل الاحوال، واي حد من اللي حوالينا ح يتهزأ بقى عشان نبقى على نور، احنا فاضيين لا شغلة ولا مشغلة وقاعدين زي الولية العجوزة المجنونة في الشباك نسب بالاب والام للي رايح واللي جاي، مع اننا لما منعنا الطبطبائي من دخول مصر من غير ابداء اسباب واحدة من عدوينه في الكويت قالت: مصر حرة مستقلة وعلى كيفها تمنع وتدخل اللي هي عايزاه، وانا باقول للانسة دي بوصفي مصرية اصيلة ابنة الكشري والفول والطعمية ان لو الموقف معكوس ونائب من الحزب الوطني اللي بينجحوا بالوجبات والخمسة جنيه المقسومة نصين اتمنع من دخول الكويت ومن غير ابداء اسباب كمان وبعد ما اتوجت له دعوة كان اعداءه قبل اولياءه هنا في مصر ح يساندوه ويهللوا على كرامة مصر اللي اتهانت باهانة عضو برلمان مصري، وبصراحة في دي ح يبقى معاهم حق، لان من حق نائب عن الشعب، ولو اسما، انه يعرف بيتمنع من دخول بلد معينة ليه؟ لانه مدعو بصفته ممثل لشعب مش لنفسه، لما يبقى يطلع من البرلمان ويمثل نفسه هم احرار يمنعوه من غير سبب، مش شطارة منها يعني انها تشمت في ممثل شعبها في البرلمان لمجرد خلاف سياسي بينها وبينه، دي قلة اصل منها، واحنا بقى العكس المتطرف، لو مبيض محارة اتمنع ح نرقع بالصوت زي الاخوة المثقفين ما بيرقعوا بالصوت على نصر حامد ابو زيد

انما يتحسدوا يعني، ماحدش جاب سيرة ياما اكلناكوا وشربناكوا والمدرسين والكراريس (مسطرة عربي وانجليزي وكراريس حساب مربعات وكراريس رسم من ام ورق فاخر) والبرايات والاساتيك الكبيرة من ام ريحة اللي كنا بنبعتها لكوا وما تمرش فيكوا، وللا جابوا سيرة وانا ما شفتش؟ اصل مش معقولة يفوتوا فرصة ذهبية زي دي، اكيد فيه حد جاب السيرة دي، ده كان يوم اسود يوم ما العرب عرفونا وللا قبلوا منا خيط في ابرة، بعد كده لو ح يموتوا من العطش ح يشربوا بولهم ولا انهم يشربوا من حنفية سبيل عاملها واحد مصري، ده احنا فضحناهم، ده لو عزمناهم على الغدا ح يحطوا لنا تمن الغدوة تحت الطبق عشان ما يجيش يوم ونقول لهم ياللي غديناكوا وحطينا لكوا نص فرخة عتاقي في الطبق وكانت معمولة بالحبهان وورق اللوري سفتها كلها يا عب عال وما سبتليش ورك
اما عجايب والله، بلدهم وهم احرار فيها، يوقع محفظته مطرح ماهو عايز، يعني احنا لينا عين بعد ما طردنا النائب بتاعهم نقول لهم ما دخلتوش الراجل اللي احنا اصلا طاردينه من عندنا ومالوش اي صفة ولا حيثية في بلده ليه؟ لمجرد انه معاه جنسية مصري؟ اهو، احنا نطلع تلاتيه ونخرب بيته ونطلقه من مراته ونكفره ونهججه من بلده ونطلع عينه وانتوا تشيلوه على راسكوا يا كلاب، وان كان عاجبكوا؟ ايه البلطجة دي؟
المهم يعني، انا مش عارفة اي حاجة بتحصل غير الموضوع ده، وان اية الله منتظري الله يرحمه مات، والايرانيين ح يعملوا مظاهرة عشان مات، دي عالم فاضية باينها، ح يتظاهروا ضد عزرائيل يعني؟ لا بجد مايصين قوي وبيدلعوا بزيادة يعني، ده ولا حتى ماتش، ولا حتى بنطلون اتقلع لمخمل باف ده واحد مات، امر الله يعني ح نعمل ايه؟ ايه المرعة اللي هم فيها دي؟ حالهم مايل قوي راخرين، اذا كنا احنا عاملين زي البت البايظة اللي مش فالحة وعيارها فلت، هم عاملين زي البت اللي ابوها لوا بوليس ومفهمها انها احلى واذكى واشطر واحدة في الدنيا عشان طالعة الاولى على طول وغير شطارتها في الدراسة ما بيخليهاش تعمل حاجة ابدا ولا بيحملها اي مسئولية ولما المدرسة تقول لها خطك وحش تجيب ابوها يشتكي المدرسة في المنطقة التعليمية وعشان لوا يرفد المدرسة، وللا انا بقيت كارهة للبشر ومش طايقة حد؟ انا خليني في السيما احسن  


33 comments:

يساري فلسطيني said...

رغاية ... بس رغيك حلو
عقبال منشوف فلم من اخراجك
و يبربشولك المراهكين

على فكرة احمد غربية هادا تبعنا ... يعني من عندنا من فلسطين

و بخصوص شرب ال.. و ترك حق الغداء تحت الصحن ... يعني , مصر برضه حررت دول عربية و علمت غيرها .. و الجميع يترحم على ابو خالد

الافلام مخدر لذيذ
ننصحك بعدم الامتناع عنه

تحياتي

SmartDomainers said...

Hi,
It looks like this domain/ website is going to be expired and it will be stop working in one week.
So pls inform the webmaster to renew the domain urgently or the website will be stoped working within 4 days.

يساري فلسطيني said...

بس كويس انك بتحبي افلام ايليا
رغم طابعها المغرق في المحلية الفلسطينية و رمزيتها المكلكعة ... انا اعتبر افلامه قريبة من اسكيتشات المسرح التجريبي و في بعض الاحيان قربة من الكاريكتير السياسي

شوفي افلام الثنائي شمعون و المصري
خلطة فلسطينية لبنانية تقدمية تشفي من البلاوي الحكومية و انفلونزا الدستور و تعالج الكابة

تحياتي

dr.lecter said...

يد الهيه عندي من زمان وشفته بس فيه حاجات مافهمتهاش لانه كذا فصل

اما اجورا انصحك تشوفيه في السينما لانه فيلم ضخم جدا بس اهم حاجه انه مايتقطعش منه حاجه علشان كنت سمعت ان الانبا بيشوي اعترض علي الفيلم وطلب منعه في مصر علشان طبعا بيتكلم عن نفس موضوع عزازيل

Unknown said...

هو مين الاخ الصيني اللي دخل عندي ده يعرفني منين

ووالنبي القرد اللي دخل لي ده وما نزلتلوش تعليقاته
يا عم انا ممثلة وكدابة وبنت كلب ما تبقاش تدخل مدونتي تاني عشان ما تضايقش نفسك صحتك بس

عم مينا said...

نوارة معلش أنا عارف ان ده ملوش علاقة بالموضوع بس أنا النهاردة اكتشفت ان فرنسا معدلين الدستور بتاعهم من يوليو ٢٠٠٨ و لغوا موضوع المدد المفتوحة بتاعة الرئاسة
http://voice-of-egypt.blogspot.com/2009/12/blog-post_21.html
و رغم كده لسة الإخوة في الحزب الوطني كل ما حد يفتح بقه علي المادة ٧٧ يقولولوا ما تشوف فرنسا
هو الموضوع ده معروف و أنا اللي بقالي سنة و نص نايم و لا الناس دي بتضحك علينا كده عيني عينك؟

Ahmed Awadalla said...

ايه ده صحيح؟ انتي بتنزلي اجورا ليه؟ اوعي يكون وصلك اخبار ان عرضه اتلغى في البانوراما الاوربية؟

mido said...

بالنسبة لنصر حامد أبوزيد :

دلوقتى هو الراجل ده خطف منك ساندوتش الحلاوة بتاعك و انت فى المدرسة ولا ايه ؟

:P

اللى حصل ان تيار متشدد فى البرلمان الكويتى رفض زيارة ابو زيد للكويت بصفته كافر او زنديق

ليه قارنتى بينه و بين الطبطبائى؟

الطبطبائى اخوان و دول مغضوب عليهم خاصة انه انتقد تعامل النظام المصرى مع غزة بقوة

و انا موافقه

لكن مين بقى اللى هاجم الكويت غير الحقوقيين و المهتمين بحرية الرأى و التعبير ؟

هاجموا النظام الكويتى زى مهاجموا سويسرا


منع الطبطبائى و نصر مرفوض فى الحالتين

حتى لو برلمان منتخب وافق على منعه فهو مرفوض أيضا زى مرفضنا الاستفتاء السويسرى

الخوجة said...

مبروك تصليح الشاحن مع انه نادر مايتصلح والتانية هو سر انتى اشتريتى موبايل جديد مش كدة ونوكيا شبه الااى فون هو انتى مقرشة اليومين دول يعنى معاكى فبوس منين دانتى اللى فى ايدك مش ليكى كريمة ممكن سلفة
اليوم الأسود فى تاريخ التعليم | الخوجة

Unknown said...

لا يا ميدو
ده اسمه نفاق عشان الطبطبائي اخوان يبقى
it goes without saying
انه يتمنع وماحدش يعترض ولا حتى يسأل؟ ده منطق ايه ده؟
وطبعا مافيش مقارنة ما بين الطبطبائي وابو زيد
عشان الطبطبائي نائب برلماني يعني ممثل للشعب الكويتي
لكن نصر حامد ابو زيد ده
بقى احنا بالذات احنا بالذات اللي كفرناه وطلقناه من مراته ومشي من مصر عشان يعرف يعيش مع مراته لانه لو كان عاش معاها هنا كان ممكن اللي رفعوا عليه قضية يعملوا له قضية زنا او حتى يسلطوا عليه الجيران؟
طب هم في الكويت عاملين مناقشة عندهم عشان يقولوا القرار صح وللا غلط
احنا بقى بنتكلم باي عين
هم عملوا مناقشة في البرلمان
احنا ولا حتى سألنا الطبطبائي ما دخلش ليه
عادي يعني انشالله عنه ما دخل
ولو كانت الكويت فتحت بقها كانت اتهزأت وبقت شعب لقيط هي كمان
واحنا طاردين الراجل وخاربين بيته وبنتكلم؟ هم اللي بيتكلموا دلوقت عملوا له ايه لما اتكفر واتطلق من مراته بالغصب ومشي من البلد؟ عملوا له ايه؟ اذا كانوا ما قدروش على نظامهم هنا بيتشطروا على الكويت؟

هتشوفوا said...

بالنسبة لموضوع نصر حامد ابو زيد, كل الحكاية أن وزير الداخلية كان عنده استجواب الصبح وفعلا كان في موقف حرج, يعني كان بسهولة قوي تنسحب منه الثقة,فقالوا مش عايزين دوشة ووجع دماغ, لكن لو كان في أي وقت تاني كان دخل, والأخ اللي بيقول أن الطبطبائي أخوان, لأ هو مش اخوان بس متحالف معاهم هو د. فيصل المسلم في كتلة التنمية والاصلاح. الأخوان بس اللي في المجلس د. جمعان الحربش,

Unknown said...

بص يا هتشوفوا
فيه قرد دخل لي الصبح النهاردة من المرضى اللي بيكرهوني وقاعدين على المدونة ليل نهار، مع ان انا لما باكره حد ما بابصش على مدونته، بس فيه ناس مازوخية
المهم قال لي: يعني انت عايزة المصريين يسكتوا خالص؟
بصراحة اه
اه بصراحة اه
اه عايزاهم يسكتوا اه جابوا لنا الكلام
بس بقى
بس
احنا عاملين دوشة كتير ومضحكين علينا الناس
لسة مانعين واحد من الدخول واللي عاملين نفسهم مثقفين دول ما عبروش امه وعمالين يهللوا على واحد هم نفسهم ما عرفوش يعملوا له حاجة لما اتبهدل في بلده
يعني الناس تقول علينا ايه؟ مجانين؟ مجانين؟ طب مجانين يبقى مكانا المصحة العقلية
كفاية بقى كل ما نفتح بقنا الناس بتضحك
انا بقيت اتضايق فعلا

Unknown said...

عم مينا

اللنك بتاعك مش خارج موضوع البوست ولا حاجة

موضوع البوست ان الناس بتضحك علينا

كل الناس بتضحك علينا

وانا مش مبسوطة من الحكاية دي

وموضوع البوست بتاعك

(اهو يا جماعة لازم تقروه http://voice-of-egypt.blogspot.com/2009/12/blog-post_21.html)

برضه ان الناس بتضحك علينا
وانت برضه مش مبسوط ان الناس بتضحك علينا

انا عايزة اعرف يا مينا بقى
ليه فيه ناس مننا مش فارق معاهم اننا بينضحك علينا وبقينا مسخة العالم شرق وغرب؟ وللا هم مش مصدقين؟ وللا مش سامعين الناس بتقول علينا ايه؟ وللا مش شايفين الناس وهي بتكتم ضحكها علينا؟ وللا عايشين في الوهم؟ ايه حكايتهم بالظبط؟

Unknown said...

ggt1230

ابو خالد؟ الله يرحمه ويحسن اليه

ايليا سليمان حساس ومليان مشاعر

انا برضه بانزل افلام لحد ما اتهبل وانفصل عن الواقع

Unknown said...

dr.lecter

ح احاول اشوفه في السينما

بس النهاردة بقى ح اتفرج على يد الهية ان شاء الله

Unknown said...

احمد

هو انا عرفت ان الانبا بشوي بيحاول يلغيه
بس لسة بقى مش عارفة ان كان ح يتعرض وللا لا، لحد دلوقت المفروض انه ح يتعرض بكرة حفلة تسعة ونص ان شاء الله

Unknown said...

اهو مواطن مصري الحمد لله ما خيبش ظني وساب تعليق عنصري ومعيراتي عن الكويت وما نزلتوش
مش بس عشان التعليق عنصري
لكن فيه اسباب تانية اقوى
زي مثلا ان مواطن جاب سيرة تحرير الكويت بينما احنا اخدنا فلوس من الكويت ومن امريكا اياميها ده غيرالفلوس اللي كنا واخدينها من العراق قبل كده
السبب التاني وهو الاهم
اني ما احبش نقع في الكويتيين لانهم الحقيقة لسانهم اطول من لسانا وح نحتاس فيهم بصراحة
خلينا كده على قد فلسطين والجزائر والناس الحلوة اللي بتتشتم وتفتح بقها من الذهول دي
الكويتيين ح يمسحوا بينا البلاط

مواطن مصري said...

محدش من الكويت يتكلم لأن العيب راكبهم

كفاية انهم شاركو في ضرب العراق من على

أراضيها

دي عيبة كبيرة اوي اوي اوي

مواطن مصري said...

و بعدين فين الحلقة الي قعدنا ساعة نستناها
؟؟؟؟

و سمعنا في الأخر اغاني

LiNa Sh said...

سؤال حيوي
فيلم الزمن المتبقي
أو الأفلام دي بصفة عامة

لازم حجز قبلها عشان بتكون زحمة ولا إيه النظام؟؟

mido said...

و أنا مالى؟

انا مش من المثقفين اللى بوشين دول

موقفى هو نفسه من الازمة السويسرية و المأذن

ضد منع دخول الطبطبائى و نصر ابوزيد


--------

عشان كده لما توجهى كلامك تحددى الفئة اللى تقصديها

مش كله واحد

Unknown said...

بص يا مواطن

انا نزلت تعليقك
مش ايمانا بحرية التعبير ولا حاجة، بس باعمل فيك مغرز، انا حبيت احميك في الاول بس انت ابيت الا انك ترمي نفسك في التهلكة
ياااارب يااااااااااارب واحد كويتي يعدي من هنا ويشوف تعليقك عشان يديك اللي فيه القسمة والنصيب

انت باين عليك ما تعرفهمش
على الله واحد كويتي يعدي ويغسلك ويعصرك وينشرك ويكويك
ويغسلنا كلنا معاك ويخلينا ما نسواش تلاتة نكلة دول بعشر السن

Unknown said...

لينا

لا روحي بس بدري ساعة وللا حاجة وشوفي ايه النظام

اول يوم كان زحمة قوي

امبارح ما كانش زحمة موت يعني

مش عارفة بكرة ايه النظام

Unknown said...

ميدو

لا احنا مالناش نتكلم ونعدل على الناس
نعدل على نفسنا الاول عشان بس ما نجيبش لنفسنا الكلام بس

soreal said...

normally speaking, when i want to find a subtitle for a movie, i find it at www.opensubtitles.org

however, the film has to be available in dvd (commercially or as a screener) to have the subtitle available there.

agora is still a new film, and its not available on dvd as of yet.. that specific torrent you are using is a telesync, which mean that this is the movie as captured by a camcorder in a cinema theater

its unlikely that you will be able to find subtitles now.

you best bid, if this torrent is not english subed, is to wait for the movie to come on dvd, you can then get it in its original language, english

سامي said...

كدا يعنى
طب خلى حد كويتى يهوب جمب الواد مواطن
انا متعاطف معاه

Kontiki said...

ازيك يا نوارة
انا مبسوطة انك مبسوطة
وبمناسبة الافلام نفسى و الله نعمل فيلم تسجيلى عن التطرف
نفسى نفوق والله
اسفة انى حذكر شىء بعيد عن موضوع البوست يا نوارة
اخر واقعه من كلية التربية اسكندرية لايف
قامت المنقبات بخلع مراية حمام الكلية فى قسم ما لانه بيساعد الطالبات على التبرج
وقمن بلصق ايات قرانية واحاديث شريفة على جدران الحمام لتشجيع الطالبات على عدم الاستجابة لدعوة الشيطان لهن و التبرج
وعندما قامت طالبة بمناقشتهم ان وضع اسم الله فى الحمام حرام ودة شىء بديهى لم يردوا
وعندما حاولت مناقشتهم ان خلع المراية عمل ينتفى معه حرية بقية زميلاتهم
فى القسم ردوا ان لا حرية مع مخالفة الشرع
اصبح جنود الجماعات الاسلامية هم واضعوا الشرع ومفسرية ومطبقية بالقوة
لا تعليق

Kalimalhus said...

بصى بقى .. بما إننا مش على راسنا بطحة نحسس عليها و اللى يقفش علينا تناقض يجيب دليله فى إيده يا يخللى ديله بين رجليه و بما إن القاعدة الثابتة عندنا هى إن مش من حق حد إنه ينتقص من الحقوق الطبيعية لأى إنسان بغض النظر عن جنسيته و عن كون حكومة بلده وسخة أو نضيفة و كون شعبه بيعرص و ألا لأ ..

بما إننا كل الكلام ده و اللى ليه حاجة عندنا ييجى ياخدها و عليها جزمة قديمة .. فأنا أرفض إن مجلس النواب الكويتى و ألا الشعب الكويتى يحرم مواطن من أى دولة من حقه فى الحركة و الدخول السلمى لدولة لأسباب تنطوى على التفتيش فى ضميره و محاسبته على موقف فكرى ..

الكلام نفسه ينطبق على حالة النائب الكويتى و على غيرهم..

مش صحيح إن من حق مجلس النواب الكويتى يعمل كده لأنه بيخالف إعلان حقوق الإنسان الملزم لكل الدول اللى وقعت عليه و يعتبر جزء من قوانينها و مش من حق الحكومة المصرية اللقيطة بنت صناديق الإنتخاب الملعوب فى أساسها إنها تعمل كده لنفس السبب..

و مش عشان عايش فى دولة وسخة و شعبها مضروب ميت جزمة وساكت يبقى لازم أحط الجزمة فى بقى و أخالف ضميرى .. أنا معنديش حاجة أتكسف منها و لا أستحى بسببها..

Unknown said...

الو

شمس العصارى said...

انا ليا ساعتين بحاول اوصل للمدونة
قلت ايه اتمنعت المدونة كمان ولا ايه
هههههههههههههههههه
و بعد تعب و اعياء و بحث فى جوجل وصلت دلوقتى حالا اهه الساعة 12.19 بتوقيت مطار الكويت الدولى
هههههههههههههههههههههههه
فيها ايه لم الكويت تمنعه
طيب ما احنا الى دولة تساعد و تعاون شاذين فكريا
يعنى ابوزيد ده ينفع ببصلة
و الله انا مرضاش استبدله بفردة شراب مقطوعة
و انتى زعلانة ليه من القضايا الى عليه واحد بيخرف يعملوله ايه تانى يعنى
نلتقى بعد ابوزيد الله يحرقه

mido said...

الو

هو حصل ايه فى الدومين لتانى ؟

شمس العصارى said...

هههههههههههههههههههه
هههههههههههههههههههههههه
ههههههههههههههههههه
ضحكت من قلبى على مقولة " الكويت ضربوا العراق من على ارضهم "
هههههههههههههههههه
ههههههههههههههههههه
هههههههههههههههههههههههههههه
معلش ماهو ده اخرت الاعلام الحكومى الموجه و القناة الاولى ههههههه
طب دول سمحوا باستخدام اراضيهم فى ضرب العراق
امال احنا الى رحنا فى 90 نضرب العراق نبقى ايه اصمله علينا
هههههههههههههه
هههههههههههههه
هههههههههههه
تكملة الضحكة التانية مش ضحكة جديدة

عم مينا said...

يا نوارة الناس مش عارفة انها بينضحك عليها.. يا نوارة احنا عندنا ملايين من الناس مش بتعرف تقرأ و تكتب و حتي اللي بيعرفوا يقروا بيصحوا الصبح يقروا الأهرام و الأخبار و الجمهورية و فاكرين انه هو ده اللي بيحصل في البلد..
احنا عايشين في عالم هنا أعدين بنكلم نفسينا و فاكرين ان الناس كلها داريانة باللي بيحصل.. و ده مش حقيقي.. الأغلبية العظمي بتجري وراء أكل عيشها و مش عارفة أي حاجة.. تفتكري كام واحد في مصر يعرف يعني ايه المادة ٧٧ أصلاً؟
التعليم يا نوارة.. احنا مش هيقوملنا قومة غير بالتعليم.. و النظام عارف كده و علشان كده علي مر السنين محدش عاوز يغيير النظام التعليمي بتاعنا.. علشان هما عارفين كويس قوي انه الناس دي لو اتعلمت و عرفت حقوقها صح هتقلب عليهم!