Tuesday, 29 December 2009

كيليلو فوتر اوبريسيون اباوت زا ماتش سيلفو بليه؟

تحديث قد يبدو مالوش علاقة بالجدار بس الحقيقة هو له علاقة وثيقة بالجدار:
الساعة 01:22 بتاريخ 29 ديسمبر 2009
بطرس غالي قال: ح اطلع دين المخالفين في عزبة الهجانة، وده طبعا افشاء لاسرار عسكرية وتهديد للامن القومي، لانه بيكشف علنا الاستراتيجية السرمدية للنظام المصري، وطبعا بما انه خلاص كفرنا فمش لاقي حاجة يطلعها قام راح لغزة يطلع دينهم فهمتوا بقى؟ بطلوا ظلم، الناس عايزة تطلع دينا ودين اللي حوالينا عشان تشطفه وتغسله وتسرحه وتلبسه لبس العيد وترجعه مكانه
لا والنبيه الناصح بيبرر بانه قاله في حديث جانبي، انا ما عنديش مانع اني اتحكم باوساخ، بس عندي مانع اني اتحكم بهبل معلش... توووو ماتش، واحد يقول الغالي والرخيص، وواحد يقول بتوع القافلة كانوا جايين بتأشيرة سياحة وما احترموش كلمتهم، وده طالع يقول: انا والله سبيت الدين للشعب في جلسة جانبية مش علنا
احنا ح نحجر على مين وللا مين؟




تحديث:
الساعة 23:55 بتاريخ 28 ديسمبر 2009
المصدر: كريم البحيري
كريم اتصل بيا وقال لي انه راح عند السفارة الفرنسية عشان يصور، اول ما شافوه بيطلع كاميرا شقطوه، قال لهم انا صحفي وممكن اجيب لكوا اذن من وزارة الداخلية، قام الظابط قال له: انا مش تبع وزارة الداخلية انا تبع مديرية امن الجيزة :)
احنا ح نفضل عايشين في الهزل ده كتير؟
كريم بيقول باللفظ: "بدون مبالغة بتاع خمسين الف عسكري امن مركزي محاصرين العيال الفرنساويين، انا عمري ما شفت الرصة دي لا ايام القضاة ولا حتى ايام المحلة...الرصة دي رصة غدر"
ربنا يستر.. طب على الله يعملوها على الله
حسام ذكي مش عايز يسمي الجدار جدار، ولا عايز يسميه سور، عايز يخليه كده اللي ما يتسمى، وحسب اميرة هويدي، القوافل اخطرتهم بخط سيرها من اول ما قرروا يعملوا قوافل، يعني راجل في سنه كده وبيكدب؟ مش عيب؟
طب يارب مراته تسجل له الحوار ده عشان يسمع نفسه، فيه حد في الدنيا يقول: الجدار او السور دي اسماء اعلامية لا ادعمها؟ ده تامر امين اللي هو تامر امين قال له: طب نسميه ايه يعني؟  





تحديث:
الساعة 23:16 بتاريخ 28 ديسمبر 2009
الافراج عن احمد رجب ومصطفى بهجت وجانو شربل


تحديث:
الساعة 22:30 بتاريخ 28 ديسمبر 2009
المصدر: محمد مرعي

التحضير لمظاهرة امام السفارة المصرية بلندن الخميس وفرنسا يوم الاربعاء ودعوات لتنظيم مظاهرات ضخمة امام السفارات المصرية فى اوروبا
وبالمناسبة دي، ح نتآنس ونتشرف ونتنور بالخواجة يانّي جاي ينضم لزملاته هنا



تحديث:
الساعة 22:03 بتاريخ 28 ديسمبر 2009
المصدر محمد مرعي
منظمات حقوق انسان سويسرية تبحث امكانية رفع قضية دولية ضد مصر لبنائها الجدار الفولاذى ومنعها قافلة شريان الحياة من المرور الى غزة

تحديث:

الساعة 21:56 بتاريخ 28 ديسمبر 2009
المصدر: محمود صابر/ حرنكش
المجموعة اللي رجعوهم من شارع الاسماعيلية رجعوا الاوتيل بعد ما فشلوا في التظاهر في ميدان الاوبرا، والمجموعة المعتصمة في شارع مراد متحاصرين، معاهم صحفيين، ماحدش عارف يدخل لهم ولا يخرج من عندهم، احمد رجب وبهجت اعتقلوا من هنا، من وسط مجموعة السفارة مش شارع الاسماعيلية، ولسة معتقلين


عاجل:
الساعة 20:18 بتاريخ 28 ديسمبر 2009

اعتقال احمد رجب ومصطفى بهجت اثناء محاولة تغطية اعتصام الناشطين الفرنسيين بالقاهرة


تحديث:
الساعة 20:16 بتاريخ 28 ديسمبر 2009
المجموعة التانية بقى بتاعة جالاواي فيفا بلاستاين جه خبر على التويتر ان فيه فرصة ضئيلة جدا انهم يسيبوا العقبة الساعة خمسة الصبح ويرجعوا سوريا تاني عشان يروحوا هناك ويرجعوا في الديد لاين اللي مديهولهم ابو الخيط عشان ياخدوا خط السير المحكم بتاع الدائري رمسيس ميدان لبنان صلاح سالم التحرير رفح


تحديث:
الساعة 20:01 بتاريخ 28 ديسمبر 2009
ما تنسوش وقفة بكرة في نقابة الصحفيين الساعة ستة ان شاء الله، وح تبقى برضه احتجاجا على زيارة نتنياهو

تحديث:
الساعة 19:39 بتاريخ 28 ديسمبر 2009

من احمد رجب، الامن عرض على الفرنسيين الموقوفين في شارع الاسماعيلية تلات حلول، يستنوا ليوم الجمعة، يسافروا فرنسا بكرة، او يعتصموا في ليسيه الهرم
ههههههههههههههههههه انا متأكدة ان الامن ده كل معلوماته عن الخواجات مستمدة من ميسز بوكس اللي كان بيطلعها محمد صبحي وكانت بتقول: ايجيبش ح يبوسني

تحديث:
الساعة 18:57 بتاريخ 28 ديسمبر 2009

المجموعة الفرنسية العدد 250 موقفينهم من ثلاثة ساعات اول شارع الاسماعيلية على بعد اتنين كيلو من المطار وقالوا لهم شرطة السياحة مش موافقة انكوا تكملوا الطريق
محتاجين حالا صحفيين بكاميرا يروحوا لهم بسرعة
رجاء الاتصال:
0185188562
ح يرد عليكوا واحد اسمه سامي


الساعة 18:37 بتاريخ 28 ديسمبر 2009
احد الناجين من الهولوكست تضرب عن الطعام لفك الحصار عن غزة
بالعربي جبته من شمبونجو.. ما تعرفوش انتوا شمبونجو دي، النجمة الاكثر شعبية على التويتر :) كل الناس بتحبها


تحديث:
الساعة 18:18 بتاريخ 28 ديسمبر 2009
اتصلت بيا المخرجة عرب لطفي وابلغتني ان المجموعة الفرنسية المسافرة الى رفح تم اعتراضها في الاسماعيلية، وادتني نمرة واحد معاهم اسمه سمير باتصل بيه دلوقت كذا مرة مش بيرد، لما يرد عليا ان شاء الله ح اوافيكم بالتفاصيل


تحديث: الساعة 17:49 28/12/2009:
المتظاهرون بيغنوا، معاهم اكرديون وكمنجة وبيغنوا راب فلسطيني والخبر من احمد رجب، انا والله امبارح كنت باتكلم على التويتر وقلت لهم نعمل فرقة موسيقية ما اخدونيش بجدية، انا طالبة حفظ حقوق الاقتراح ليا

دلوقت حاليا جالي تعليق ان ماليزيا وتركيا بيتوسطوا عند مصر عشان تدخل لغزة اكل ودوا وبطاطين
وجالي خبر على التويتر ان تركيا بتتكفل بنفقات ذهاب القافلة من العريش للاذقية عشان ترجع تاني تاخد الدائري على رمسيس على ميدان لبنان تنزل في التحرير على طول تمشي الحتة الصغيرة دي تلاقي نفسها في رفح على حسب خط السير اللي رسمته مصر
نداء اخير لبتوع كللللللل مرة اللي ما بنشوفش خلقتهم لما بتحصل مصيبة في مصر وما بيفتكروش مصايب مصر غير لما نتكلم على غزة وده وفقا لخطة المعونة الامريكية اللي بيقبضوها (وطبعا اللي نزلوا للعبارة والدويقة هم اللي بينزلوا لغزة واللي بيقولوا مالنا ومال غزة هم نفسهم اللي ما شفناش خلقتهم في العبارة والدويقة)، يتخصم لك الشهر ده احسن ما تنضرب بالشباشب، للاسف الجهود المرة دي سوف تبوء بالفشل، طبعا انتوا ما بتنزلوش ولا بتروحوا ولا بتيجوا فمش دريانين الناس عاملة ازاي، مكتومين كتمة الكحك، تخطوا مرحلة التعاطف والغضب وعاملين بيبي على روحهم من الكسفة وما ح يصدقوا يفشوا غلهم فيكوا
تحديث الساعة 17:31 28/12/2009
ملحوظة: العيال المزقوقة في كل مرة عشان تقول مالنا ومال فلسطين اللي تعوزه مصر يحرم على فلسطين مافيش داعي يحرجوا نفسهم، المرة دي الناس فعلا مخنوقة ومش قابلة الكلام ده، انا مقدرة انهم بيجروا على اكل عيشهم واللي بيصرفوا لهم المرتبات ح يطلبوا منهم ملف باللي عملوه الشهر ده، بس فيه ديمقراطية مش كده؟ يقدروا يقولوا لهم الناس ح تدينا بالجزمة



تحديث الساعة 17:22 28/12/2009:
الامن يحاصر القافلة بالعريش الان
التفاصيل هنا

تحديث الساعة 16:45 28/12/2009:
الامن يا ضنايا اللي محبوس دمه بقاله يومين مش عارف يضرب الادانب، استلقط واحدة فلسطينية وراح ضاربها، طبعا النباهة والذكاءة والفكاكة خلتهم يستلقطوا اللي لونها بني، اي حاجة بيضا بيبعدوا عنها، بس فيه اختراع اسمه جنسية، مش باللون يعني، البنت معاها جنسية امريكية، وراحت السفارة الامريكية بالصور والفيديو تشتكي، هوبا تيتو مامبو، الخبر من التويتر
هرررررررررررررررررررررر

موضوع ان حماس بتبيع لنا مخضروات ده الظاهر صحيح، لأن الحقيقة السلاطات المصرية بتعمل حاجات وتصرفات تنم عن انهم عاملين دماغ جامدة قوي، وبما اننا مالناش اعداء دلوقت غير الجزائر والسودان وغزة وسوريا وايران وانجلترا والناشطين في حقوق الانسان من كل انحاء العالم (حتى اليابان) وفي اورومبا وامريكا والدول المتغدمة بس...وبما ان سيف ابن ذي يشل اللي بيطلع لنا في كل البرامج يقول: اسرائيل عمرها ما موتت ظابط مصري على الحدود، اسرائيل عمرها ما اجتاحت حدودنا، اسرائيل بتحترم السيادة المصرية مش زي حماس. فأكيد الدماغ الوسخة اللي عاملاها الحكومة دي من انتاج حماس طبعا، مين له مصلحة ان كل الناس تضحك علينا غيرهم؟

مبدئيا عشان يبقى عندنا معلومات كويسة او فكرة عن قافلة شريان الحياة والاخوة الادانب اللي جم عملوا لنا شبورة قلق في بلدنا الامنة المطمئنة اميرة هويدي عاملة هنا صفحة بتشرح بالظبط هم مين وليه بيعملوا كده؟ وليه بيغلسوا علينا الغلاسة دي كلها، وهل ناويين يبطلوا غلاسة وللا دماغهم صعيدي وكل ما تعاندهم يعندوا اكتر؟

وتحقيق اميرة هويدي برضه يوضح الصورة للاخ الظابط اللي قال امبارح للمعتصمين الفرنسيين: يو دونت نو بالاستاين يو اونلي نو زا نيم...

وكان ناقص يقول لهم: فلسطين دي اولها فلس واخرها طين، والفلسطينيين دول يهود العرب انتوا ما تعرفهومش، دول اخر مرة دخلوا عندنا جابوا دورارات مزورة وخلصوا على كل مخزون سجاير الال ام والكولوباترا السوبر وكنا بندوخ عشان نلاقيها بعد ما مشيو، بقوا يشتروا بالخراطيش كده، واتسللوا للقاهرة عشان يدخلوا السيما، اي هاف تو ايز اند اي كان سي اي ام تولف ييرز اولد

احمد رجب كان بيغطي على التويتر وقائع المسرحية الهزلية، جابوا لهم عربيات مطافي عشان يرشوهم بالمية وقالوا لهم بالفرنصاوي في الميكروفون: احنا صبرنا عليكم كتير لكن للصبر حدود، كيليلو فوتر اوبرسيون يو بارل فرناصيه؟زمالك ايه فريه اند اهلي ايه فريه؟
الله يرحمها، جات لها ازمة قلبية مالهاش اي مبررات ولا مقدمات غير انها اكيد كانت ست طيبة وربنا نشلها واداها افراج
المهم فضلوا نايمين لهم في الشارع ولبسوا لهم هدوم ووتر بروف اول ما شافوا عربيات المطافي جاية



وقعدوا يقولوا لهم "جازا ليبيغيه..جازا ليبيغيه" فطبعا مش اقل من انهم يفهموهم انهم هم كمان بيعرفو فغانسيه، وكمان بيعرفوا يغنوا لهم اغنية الست للصبر حدود بالفرنصاوي فريرو جاكو دورمي فو سيلولو ماتينا دينج دونج دو




وزي ما انتوا شايفين كده قاعدين في وسط الشارع قدام العربيات في شارع مراد يصوتوا في وش الناس وانا المفروض اضحك بس باعيط دلوقت حاليا
او المفروض اعيط بس وانا باعيط باضحك برضه
مش عارفة ايه المفروض وايه الغريب، وللا الاتنين اغرب من بعض
بس اللي عرفته من احمد رجب من ساعة ان مجموعة اسرائيلية انضمت للمعتصمين بتوع غزة ليبيغيه، وامبارح كان فيه مجموعة رافعة يافطة:
I am Jewish, I am not Zionist
انا يهودي، بس مش صهيوني
كده قفلت زي الدومنة ايها الفرعون الاكبر، قول لنا بقى فلوسنا بتتصرف على ايه؟ على اننا، على رأي مهندس حر، نتهش من شوارعنا اللي مسفلتينها بضرايبنا زي الفراخ قدام العالم كله ولما نحب نفضل في الشارع، بتاعنا، اللي في بلدنا، اللي احنا بنصرف عليها وعليكوا زي الرقاصة اللي بتصرف على بلطجي، من غير ما نتضرب زي ما اتضربت الصحفية مهرة غزالي نضطر نتحامى في الاجانب؟
طب فرعون لما كان بيعاير موسى ويقول له ياللي لمناك من الشارع وربيناك في القصر واكلناك وشربناك انت مين انت؟ (الظاهر داء المعايرة ده في الجينات) وقعد يمن عليه انه عبد بني اسرائيل، وقال: ام انا خير من هذا الذي هو مهين ولا يكاد يبين، (ترجمتها في العصر الحالي الرسالة اللي اتدورت على النت: رسالة الى كل جزائري: انا مصري انت مين؟) بس فرعون كان عنده حاجة يتنطط بيها، حتى لما استخف قومه فأطاعوه لأنهم كانوا قوم سوء فاسقين كان عنده شوية حاجات يزغللهم بيها قوم لما يقول لهم ما أريكم إلا ما أرى وما أهديكم إلا سبيل الرشاد ممكن يفكروا مرتين، مش كان عريان الـ... ويتأمز تأميز ويقول باب الخمارة فين، حتى ربنا قال عليه "علا في الأرض" مش شحت في الارض وكمان قاعد يقول: ما تقداااااارش، وكان بيضلل قومه او بيرهبهم، مش بيحرجهم ويكسفهم ويخلي رقبتهم قد السمسمة اديني امارة للفتونة دي

اقترح، بعد نجاح حملة الاعلام المصري: لماذا يكرهوننا؟ نبتدي حملة جديدة: تدوني الشايب ليه؟ انا وحشة وللا ايه؟ انا حلوة وعارفة ان انا حلوة


طبعا موضوع فلوسنا ده فيه بعض الاخوة المصريين، اللي هم ميدو ومهندس مصري بدون ذكر اسماء، صابتهم حالة سنية: لا ما تقولش لا بس ما تقولش بس مش ما تقولش مش ما تقولش مش ما تقولش مشششششششششششش
وما حرقهمش غير: لا بقى، الجدار بيبتني بالمعونة الامريكية.. احم، لا، هم ادونا فلوس واحنا اشترينا من روسيا، لالالالالالا مش احنا اللي دافعين مش احنا اللي دافعين، لا ما تقوليش كده ما تقوليش كده

ماهو الجدار ده واضح انه مكلف، وبما ان مافيش ادلة واضحة على ان امريكا هي اللي صارفة عليه من بابه، ح نفترض ان امريكا دافعة فيه جزء من الفلوس، واكيد اسرائيل مش ح تدفع حاجة، حد عمره سمع ان اسرائيل بتدفع وللا بتمول اي حاجة؟ لكن المنطق بيقول (الى جانب الخبر بتاع الوفد) ان اكيد مصر دافعة فلوس برضه فيه، ماهم عاملين جمعية، والا، لو الحكومة المصرية مش دافعة فيه فلوس، امال مش عايزة تقول لنا مصدر تمويله ليه؟ وليه امريكا كمان مش عايزة تقول، دول اسخم مننا في المعايرة والشرشحة، لما بيدفعوا قرش بيقعدوا يعايروا بيه خمسين سنة لقدام، دول بيعايروا العراقيين انهم صرفوا على غزوهم
امبارح بقى، في العريش، قواتنا قبضت على 38 اجنبي، هههههههههه، اه يا قلبي، اضحك وللا اعيط؟ انتوا اتجننتوا؟ اتجننتوا؟ لا بجد، كلمونا كده زي ما بنكلمكوا، طب اسرائيل لما بتعدي بالدبابة على مواطنة امريكية اهي مقطعة البطاقة وعارفة ان ماحدش يقدر يكلمها واللي عاجبه ع الكحل يتكحل اللي مش عاجبه يترحل، وقصاد دورها كـ"كلب حراسة امريكي في الشرق الاوسط" زي ما ريجان قال مدلعينها ومدينها راحتها، انتوا مسنودين على ايه؟ انتوا بقالكوا كتير ما سافرتوش؟ هم دول زينا ياخدوا على قفاهم وماحدش يسأل عليهم؟ دول لهم سفارات وممكن يشحوروكوا، ولهم مستثمرين هنا، وبيدوكوا معونة، يعني تمدوا ايدكوا تشحتوا من الناس وتقبضوا لهم على مواطنينهم؟
برضه بس للتوضيح: الاشقاء الاجانب، اي فلوس الحكومة المصرية بتشحتها منكوا حد الله ما بينا وبينها، احنا ما بيوصلناش حاجة، احنا بنشتغل زي التور في الساقية وبنصرف عليهم ونتضرب ويطردونا من الشارع كمان، عمركوا شفتوا شعب بينطرد من الشارع؟ احنا بقى، ده حتى لما الشيخ زايد اتبرع باسكان شباب للمصريين، اخدوه من الشيخ زايد ببلاش وباعوه للمصريين بمئات الالاف وبالملايين كمان، وعملوه اسكان فاخر
رسالة ايمان بدوي على الميل بتسأل سؤال: هل ستحارب مصر العالم؟
يا سلام.... اقل منها يعني؟ ده احنا جامدين قوي
نداء الى الفضائيات المصرية المشينة اللي مافيهاش قناة واحدة محترمة:
بطلوا بقى اللي بتعملوه ده، كفاية نافع هو اللي بيحبك نافع هو خطيبك، شكلكوا عاااااااااااااااااااااااااااااار، انتوا بتعملوا ايه بالظبط؟ ها؟ ايه؟
يعني بتضحكوا على العالم اللي اتفضحنا قدامه؟ وللا بتضحكوا علينا؟ طب المرة دي مش عارفين تضحكوا علينا، الناس العادية فعلا اللي اتكلمت معاهم في الشارع والشغل والتاكسيات وشهم منكوا في التراب يا آمنة، وحاسين انهم هنادي، حتى جمهور عمرو اديب اللي هو كناسة الشعب المصري بقى يتصل بيه يهزأه
والفيلم بتاع حماس بتصدر لنا روسيات ومخدرات وبتدخل لنا سلاح ده بيزيد موقفكوا احراجا، بس بس بس بس بس
بسسسسسسسسسسسسس، تجاهلوا الموضوع طيب، اعملوا نفسكوا ما تسمعوش عنه، المرة دي مش زي ايام الجزائر، معلش بقى الناس مش للدرجة دي متخلفة ومغيبة، حتى لو اعتبرتوهم ما عندهمش مخ بعد ما فرعون طير لهم الربع اللي فاضل، هم عندهم احساس، ولو شوية يعني، احنا بني ادمين انتوا فاكرينا ايه؟ ده واحد بياع قال لي: خلاص بقى، ما تتكلموش في الموضوع ده، الواحد مكسوف قفلوا على السيرة.
هههههههههههههههه، عجبتني قوي قفلوا على السيرة، محسسني اني قلت له بنتك ظبطناها ورا العمارة مع ابن الجيران بيطقطق لها صوابعها
---
الا هو لما ربنا غرق فرعون وجنده عمل فينا احنا ايه بعد كده؟ حد عارف؟ وللا بتوع المرة دي اهيف من انهم حتى يتعاقبوا؟
على رأي حسين كمال لما قال لعفاف راضي: يا مدام عفاف انت ولا حتى ح تفشلي


33 comments:

elmonadel said...

احنا مش بنى آدمين - احنا ندفن نفسنا بالحيا.

الاجانب يعتصموا فى الشارع و يناموا على الرصيف فى البرد فى شارع مراد و احنا قاعدين نتفرج زى الشراميط.

اللهم اهلكنا و استبدل بنا قوما صالحين

جبهة التهييس الشعبية said...

بس بس
ماحدش يدعي علينا
واحنا مهما كان غلابة، برضه غلابة، وخايفين، هو فيه ذل اكتر من اننا نتهش من الشارع
بقى الاجانب دول لو كانوا مصريين كانوا عدوا عليهم بالدبابات يا اخي
ربنا يجيب لنا اللي ينصرنا عليهم ويصلحنا ما تدعيش علينا ادعي لنا ربنا يفك اسرنا

جبهة التهييس الشعبية said...

لا انا عيطت دلوقت
:(
ماحدش يدعي علينا مش كفاية الذل اللي احنا فيه؟

ggt1230 said...

انا عندي نظرية

الحكومات العربة اما انها في منتهى الغبااااااء الاعلامي و السياسي بحيث بدل عن ان تطفىء نار التضامن مع غزة تقوم باشعالها .... او انها تعمل لصالح اهدافنا القومية و ضد اسرائيل

ماهو يا اصدقائي مش معقول اللي انا اشاهده ... هي اي حمااااااار يفهم شوية في سيكولوجية الاعلام الجماهيري يقوم بتنفيس الاحتقان و ليس بارسال اغبياء للتعامل مع مظاهرة للاجانب .... بتعرفي حتى الاجهزة الامنية ... ولا بلاش

faissl said...

في تفسيرات بتقول لك ان اللي استخفهم وأطاعوه هما أنفسهم جنوده اللي غرقوا معاه، وده بيدعم زيادة نظرية انه يكون أحد ملوك الهكسوس لأن ذكر في مكان آخر ان كل اللي بناه هو وقومه تم تدميره، وبالفعل مصر كلها مفيهاش حجر واحد يعود لعصر الهكسوس..
المهم يعني ان المعادل الموضوعي هو أمن الدولة وللأسف الأمن المركزي وكل من يعاون مبارك في إحكام قبضته على البلد، واستخفهم فأطاعوه.
اما أحنا، زي ما قلت لك قبل كده، ح نقول كنا مستضعفين في الأرض حيتقال لنا ألم تكن أرض الله واسعة، ح نقول هؤلاء أضلونا فآتهم عذابا ضعفا من النار حيتقال لنا لكل ضعف
مش ح تكون لنا حجة إلا المقاومة
وعشان كده لميس الحديدي بتقول للأسف مصمم يبقى مقاوم يا حرام

doudou said...

كله كوم و الوساطة التركية و الماليزيه كوم.........محتاجين حد يتوسط علشان إعانات للغزاوية(كان فيه غزه المصريه و غزه الفلسطينيه كده زي مصر الجديدة و مدينة نصر يعني دول تلاقيهم مصريين أو أقرب ناس للمصريين) أكل و بطاطين و ناس تقف جنبهم و تقول لهم احنا حاسين بيكم
ممكن يا نوارة متخنقنيش قال بطلوا تدعوا علينا احنا غلابه قال
والنبي احنا مش مهم خالص

جبهة التهييس الشعبية said...

ههههههههههه
انا مبسوطة قوي من الهكسوس اللي كل ما حتة في تاريخنا ما تعجبناش نقول دي كانت ايام الهكسوس

الحقيقة لا
اللي كان ايام الهكسوس هو الملك الطيب بتاع يوسف

وبتاع موسى ده فرعون مصري

وده ثابت بالواقع اللي احنا عايشينه
ماهو يا اما احنا هكسوس يا اما فرعون موسى مصري

جبهة التهييس الشعبية said...

الوساطة الماليزية دي حلوة قوي

يا حبايبي
طب دول كتاكيت يعني، هم دول حد يرفض لهم طلب؟

مهندس مصري said...

ماشي ماشي
هو احنا فينا من سياح
طيب صبرك عليا يا نوارة

احمد العربي said...

عدد سكان غزة مليون ونص يعني هما يا دوب نص عدد سكان حي شبرا، لما معمر المجنون شال الحدود بالتسعينات دخل ليبيا من الحدود المصلرية في 3 اسابيع مليونين مصري ولم نسمع عن مخدرات ولا روسيات ولا مدغشقريات. التخلف الكبير والذي يدمي القلب والله إنو في ناس بتقول عن نفسها مؤدبة ممكن تطلع في برامجها وتقول إنو غزة بتورد مخدرات لمصر ولا روسيات، هو في حد ممكن يعني يتناول عن روسية كدة بسهولة!!!! بصراحة المفروض روسيا تعترض لى الأمر ده إحنا لازم نترجم برنامج عمر الوفت ده بالروسي وبعدين هماحيجيبوا الحاجات دي منين يعني، يمكن حماس عاملة أنفاق عابرة للقارات بتجري تحت المتوسط وبحر البلقان والبحر الأسود وبتجيب حريم من هناك، يعني هو اللي بيحكي الحاجات دي ما عندوش أي ذرة من العقل علشان بس يقول الكلام ده. والله العظيم مره عقيد في الجيش ومامته بتحلف بحياتة وكأنة نابليون عصرة قالهالي في وشي كدة إحنا قافلين الحدود علشان المخدرات اللي بتدخل مصر من غزة تصوروا الباطنية يا وولداه مش لاقيين يعمروا دماغهم إلا من الحشيش المقدس من الأرض المقدسة ****
خبر على الجزيرة بقول إن شريان الحياة تغير مسارها عن طريق سوريا_ ميناء اللاذقية ثم ميناء العريش تحت إصرار الحكومة المصرية
****
بصراحة الأخبار من مصر وعن مصر بتخنق كده من الآخر والله مش ممكن يكون اللي بيحصل ده في مصر
الحكومة المصرية أصبحت هي البلطجي اللي بيدافع وبيشدد في الحصار وكأنو أهل غزة منتظرين بأسلحتهم للهجوم على القاهرة لو تم فتح المعبر المقدس
إحنا عشنا سنين تحت الحكم المصري ومع ذلك لم نهرب من غزة لضفاف النيل الجميل ولم نترك منازلنا قبل الأحتلال ولا بعد الإحتلال ولا أثناء الحرب ولا بعدها
هما خايفين منا ليه كده؟ خايفين على إيه؟ إحنا مالناش أي أهداف في مصر ولا مصالح يعني حنحتل مصر ليه يعني؟ لا نطالب بوقف الجدار مطالب برفع الحصار

زقزوق said...

احنا مش شراميط ولا غلابة ولا هكسوس
ولا حوار فيم كنتم دا هيجرى معانافى الاخرة.. احنا محتلين زى فلسطين بالظبط

زقزوق said...

الافرنجة جايين يهتفوا لغزة فى شوارعنا
منظر غررريب ومخزى وفاضح

wahat_alshohada said...

ممتازة يا نوارة متابعتك
انا حاسة انى بلف فى الغسالة
او تهت فى المولد
مش قادرة اركز

خيرالدين said...

نواره
الناشطين الفرنسيين قرروا يرجعوا القاهره وتحديدا عند نادى القاهرة

ggt1230 said...

الوضع سخيف و اولاد العم لعبوها صح
قرات اللي مكتوب عندك
التحضير لمظاهرة امام السفارة المصرية بلندن يوم الخميس وفرنسا يوم الاربعاء ودعوات لتنظيم مظاهرات ضخمة امام السفارات المصرية فى اوروبا


اتفوووو علينا كلنا

احنا جرب و ليس عرب كوكب الارض

شفتيهم المتظاهرين ... شفت البطولة و الحضارة

معهم دائما

وتابعين

Sosso said...

ya Nawwara beta3 el 5argeyya mesemmi el gedar incha2et handaseyya !!!! ya dmeghouuuu

Sosso said...

انا اتشليت من البيض بيضك

الجمل said...

ياجماعة المشكلة ان مافيش ولا قناة فضائية سمعت عليها الموضوع ده انا حاسس ان احنا في دنيا غير الدنيا ماينفعش الخواجات يعتصموا عشان فلسطين واحنا تنفرج عليهم احنا المفروض نعتصم معاهم ونعديهم لغزة لو علي عربية بحمار او علي فلوكة وحرس سواحل اسرائيل يقتلوهم وتبقي فضيحة

مسلم said...

انا مقريتش الموضوع بالكامل بصراحه بس قريت مقاطع منه؛ و الحقيقه إحنا دلوقتي وصلنا في مصر لمرحله مهمه؛ مرحلة السكوت و العمي الحيثي؛ يعني يحصل مهما يحصل إحنا مبنتكلمش؛ و لا حد بينطق؛ و ده حصل مره قبل كده في تاريخ هذه البلد؛ و منذ آلاف السنين
عندما إستكان المصريين لفرعون و تماشوا وراءه دون أي تحكيم لعقولهم و خرجوا خلف نبي الله موسي عليه السلام و من تبعه فقال فيه رب العالمين

"إن فرعون و هامان و جنودهما كانوا خاطئين"

و كانت النتيجه

"فأغرقناهم أجمعين" ربنا يستر

mony said...

اتفضلي يا ستي http://www.elaosboa.com/elaosboaonline/news/show.asp?fesal_hussien=add&id=5449&vnum=fesal&readmore=x

كريم البحيرى said...

دى حاجة مسخرة وكان نفسى اعرف القط اى صورة قبل ما الظابط ابن الخروف اللى شكلنا عكننا عليه ومنعنا بس بجد العدد مهول حاجة كدا فوق الوصف الرقم بتاع خمسين الف لان انا مشيت انا وعبد الرحمن فارس كتير جدا على ما قدرنا وصل لاخر ام الحصار دا دا غير العربيات اللى فى الشوارع الجانبية زى ما يكونوا ولاد الجزمة ريحين يحاربو طبعا رقم خمسين ممكن يكون للناس رقم مبالغ فية وطبعا انا معدتش كل الناس بس بجد الرقم مهول يعنى عساكر الامن المركزى اللى على الشارع ومحاصرين العيال هما ولوائتهم اللى واقفين بتاع عشرين الف واللى فى العربيات بتاع 7 الاف واللى فى الشوارع بقا العدد فى الليمون رقم هولامى علشان كدا بقول ان رقم خمسين هو رقم تقدير ظاهرى لكن اقسم برب الكعبة ان العدد لم اراه من قبل فى اى مظاهرة فى مصر وانا شفت اللى كانوا فى المحلة بعنيا ما كانوا بالعدد دا وكأننا رايحيين نحارب
يعنى ربنا ياخد الامن المصرى اللى عرفت انه اتبرع بالرحاسة الامنية دى وان السفارة بنت المفضوحة الفرنسية مطلبتش دا بس الامن المصرى حس ان العيال الفرنساويين دول قلة مندسة رايحيين شكلهم يولعوا بومب فى السفارة فاتبرعوا بحماية السفارة من هذه القلة المندسة عموما انا عملت تقرير عن اللى شفتة انا وعبد الرحمن فارس على مدونتى
http://egyworkers.blogspot.com/2009/12/blog-post_29.html

Shoukry said...

شكلناوحشششششششششششششششششش و من الاخر شكلنا مش رجالة- الله يخرب بيوتهم - خلونا مستعرين من نفسنا و الواحد عنده احساس بالدونية غير عادي. انا اول مرة شوفت صورة االجدار كانت عندك مكونتش عايز اصدق. لو علي المخدرات - وهوكلام صحيح - يروحوا يشوفوا الحشيش اللي بيتباع في مطروح في الشارع في عز الظهرو علي كدا بقي احنا عايزيين جدار بطول الحدود مع ليبيا.

الله يخرب بيت ام الثورة اللي خلتنا كتاكيت بمراكز القوي بتاعتهم و خلتنا شعب جبان بعد ما كانت الثورة عندنابتشيل حكومة. احنا شكلنا وحش بجد احنا كدا شكلنا وحش اوي اوي. وام الكرامة المصرية اللي نقحت اوي في القافلة! ما تدخل من اي مكان يعني هية ايه المشكلة؟؟؟ احنا كده واقفين قرني اوي و كأننا مستنيين اما اسرائيل تخلص مع فلسطين و شكلنا مش وحش. لأ ده بقي وسخ. هيكرهونا في البلد. حسبي الله و نعم الوكيل ربنا ينقم منهم و سياستهم الوسخة.

انا كنت مع الحكومة وقت الحرب لأني ضد سياسةحماس وسياسة السلاح و حاسس ان اسرائيل عايزة تخلي بتوع غزة لاجئين في سيناء زي ماهما لاجئين في لبنان و سوريا و الاردن وان فتح المعابر يكون بحساب و كنت حاسس انه علي قد ما فيه ظلم للفلسطينيين بس كان هيفوت الفرصةعلي الاوساخ و مش هيصفي غزة من اهلها. بس استمرار غلق المعابر بالشكل ده و دخول الاعاناااااااااات بحساب كمان؟؟؟ لية؟؟ انا حاسس بالعاااااار. احنا التاريخ مش هينسي الموقف ده. ربنا يرحمنا.

لو القرنين دول عشان يرضوا و يخلوا جيمي يمسك. انا اول واحد هأنتخبة و ييجي بقي و نخلص بس بجد كفاااااية كده. ربنا يسامحكم فوقتونا علي كابوس ان احنا بقرنيين فعلا

حسن مدني said...

دول تجاوزوا موضوع مزبلة التاريخ
وبقينا مهزلة التاريخ يا بنت العم

يعني الفرنجة بيتظاهروا عشان غزة، ضد الحكومة المصرية،
وسويسرا اللي لسه بنشتمها امبارح عشان المآذن بتفكر تقاضي مصر عشان إخواننا في غزة.

مش عارف بجد أضحك واللا أعيط واللا ألطم.
بس بجد خايف ولادنا يلعنونا.

تحياتي

Invest said...

"Private Fund Management S.A.” او بالعربية هي "شركة ادارة الاموال الخاصة ذات المسؤولية المحدودة" ,شركتنا تساعدك على الحصول على دخل مالي من استثماراتك وهي شركة وساطة استثمارية ذات نمو مضطرد,من اولويات الشركة هو توفير اكبر قدر ممكن من الخدمات التي نقدمها للمستثمرين من جميع المستويات الاستثمارية وذلك للاحترافية الكبيرة لموظفينا واعتمادنا لاحدث التقنيات في التجارة. لقد احترفنا تقديم خدمات على اعلى مستوى وباقل كلفة حيث ان سياستنا الانمائية الداخلية تهدف الى تقديم الخدمات لعملائنا باي في العالم وبجودة عالية جدا وحرصنا الدائم على حصول عملائنا على دخل من الاستثمار.
استثمر الان في موقعنا https://www.my-investment.com/

saheda.com said...

د/ حمدي حسن

بمناسبة إنشاء جدار مبارك الفولازي مع حدود غزة
يا حكومتنا : أَلَيْسَ مِنكُمْ رَجُلٌ رَّشِيدٌ ؟
ليت حكومتنا تفهم أن معبر رفح بالنسبة للفلسطينيين مثل نهر النيل بالنسبة للمصريين

• أين الأمن القومي والسيادة المصرية من السماح بدخول الصهاينة سيناء بدون تأشيرة ؟
• أين الأمن القومي والكرامة المصرية من اختطاف سفينة كسر الحصار من مياهنا الأقليمية ؟
• نشكر الحكومة أنها لم تقتل النشطاء الأوربيين المتظاهرين كما قتلت السودانيين بميدان مصطفي محمود!
• أنبوب مياه البحر جريمة ضد الإنسانية لأنه سيفسد آبار المياه العذبة القليلة , فمن سيتحمل عواقبها ؟
• ماذا سنفعل وكيف سنتصرف اذا استخدمت اثيوبيا ودول منبع نهر النيل منطق حكومتنا الأعوج في مفهوم السيادة والأمن القومي وبنو سدودا وحواجز تحجز مياه النيل عنا ؟
• يا حكومتنا : السلطة والقوة ليست دائمة والتاريخ لن يرحم أحدا وسيظل جدار مبارك الفولازي شاهد علي هذه الفترة المخزية من تاريخ مصر

معتزعادل said...

انا ممعتصم مع الناس الي فس السفاره الفرنسيه ومصور كل حاجه من يومين فيديو وصور لو عايزاهم يا نواره ممكن ابعتهملك بس ابعتيلي ايملك علي الايميل ده mo3taz_3adel@hotmail.com

وللاسف المصريين ميزدوش عن 5 هنا
ومحدش بيشارك يا ريت تبعتي رساله للشعب المصري يفوق

ggt1230 said...

اما هبل ...ال ايه هم اجوا بتاشيرات سياحية. ليش هو فيه تاشيرات للمظاهرات

..

انتو بتجيبو وزراء منتهية صلاحيتهم ولا ايه الحكاية

ggt1230 said...

انتي بتخلي الناس تحط اعلانات يا نوارة


Invest said...
"Private Fund Management S.A.” او بالعربية هي "شركة


و اللي معوش يستثمر

joyadz said...

سلام الله عليكم ..استاذة نوارة اهون عليا انى اقتنع بان حكومة مصر هي التى تمول جدار العار لتحمي امنها القومي كما تقول...ممكن مع الزمن نستطيع ان نفهم هذه الفلسفة ..اما ان تمله امريكا او اسرائيل فهنا خيانة من طرف الحكومة الى تقوى جهة العدو وتضعف جهة المقاومة الفلسطينية ...لا اظن مثلا ان يكون مجرد قرض من امريكا او معونة لوجه الله ؟؟؟..امريكا او اسرائيل ليست دويلات حنينة لهم نظرة ابعد وابعد ونحن نعرفها ..الا اذا كانت حكومة مصر نية كيما نقولوا احنا ..ولا أظنها كذلك ...ربي يجيب الى فيه الخير ويرحمنا من هذه الانظمة العربية المتعفنة

فتاه من الصعيد said...

ده تعليق معلق فلسطيني في مدونتي على موضوع كتبته بخصوص الجدار المحرج

وهو مدون مهذب كمعظم اهل فلسطين وصديق لمعظم المدونين المصريين ويحرج من الحديث في مثل هذه المواضيع الشائكه حفاظ على مشاعرنا

بس الراجل نطق

انا بقدمه للي بيقولوا ان الجدار موش مضر لغزه .... ومهم لمصر


4.Mr.Hazem قال,
ديسمبر 26, 2009 في 3:46 م

بما انك فتحتيلي مجال لأحكي بالسياسة شوي , فرجاءً الجميع يتحملني , رغم اني من زمان مش حابب احكي بهيك موضوعات ولكن لم اعد احتمل أكثر من ذلك ..
فشعبي يموت كل يوم مائة الف مرة ..
الاطفال يملئون المستشفيات وامهاتهم ينظرون اليهم ويودعونهم لأنهم يعلمون انه لا يوجد لهم علاج
اصحاب الامراض المزمنه لم يعد لهم وجود في غزة , فجميعهم انقرضوا بسبب الحصار وجميعهم استشهدوا بأمراضهم
الجدار الفولاذي الذي تبنيه مصر يسبب خلل في توازن المياة الجوفية الموجوده في باطن الاارض في قطاع غزة , هذا يجعلنا امام منعطف جديد بأن المياة الجوفية في غزة لن تتجدد وانه قد يتسبب بجفاف في مناطق معينة
المنفذ الوحيد لقطاع غزة هي الانفاق مع مصر الشقيقه , ولكن الان منفذنا الوحيد هو ان نرمي انفسنا بالبحر
اخونا الشقيق الأكبر ” مصر ” ممثلة بحكومتها تخلت عنا ,, فمن من الاخوة الاخرين سيقف معنا ..
دول الخليج بأكملها غارقة في نومها وثباتها فلم نسمع دولة منهم تحدثت عن الوضع في فلسطين لا بالايجاب ولا بالسلب , وحينما تحدث احد المغفلين العرب معمر القذافي قال اقيموا دولة واحد لاسرائيل وفلسطين واسموها اسراطين !
العراق الداعم الوحيد لفلسطين على مر عصور طويلة لقد تم اغراقه بمستنقع من الدماء بمشاركة قوية وعلنية من دول ملاعين كدولة الكويت , وان كنا نتفاوت بقناعاتنا تجاه هذه الدولة , الا انه يجمعنا قاسم مشترك وهو العروبة والهوية الاسلامية , فعيباً علينا ما نفعل ..
لا ننكر الدور المصري الذي تلعبه من اجل القضية الفلسطينية ولكن وكأنها الان تقول لنا نحن نندم لأننا وقفنا الى جانبكم ..

لو اردت ان اتحدث اكثر جرئة سألوم جميع الشعوب قبل رؤسائهم ,
ولكن سنبقى نحبكم اتعرفون لماذا , ؟
لأنكم شعوب طيبة , لنكم تحاولون الوقوف الى جانبنا , لأنكم متعاطفون معنا بالكلمة
ادرك جبروت وطواغيت حكوماتكم ولعل هذا ايضاً كان دافعاً لأن ارفع العتب عنكم
ادرك احمرار وجنتيكم فلا تقلقون , لأننا نعلم جيداً ما هو صحيحاً وما هو خطأً , ومن من الشعوب يحبنا ومن لا يطيقنا ..
ندافع عن كرامة الامة , وندفع ثمن تخاذلها , ونحمي شرفهم المتمثل بالاقصى ,, ولكن !! ,,, وآآآاسفاه نقابل بالحصار ,,
لن اطيل عليكم , ولكن الالم يعتصرني كما يعتصر كل طفل فلسطيني
احبتي اصدقائي
سامحوني ان كنت جرحت احدكم بكلمة , ولكن حروفي تتناثر لوحدها , حروفي كتبتها دموعي دون ان يدركها عقلي
مع حبي
مدونة حازم

زقزوق said...

الظاهر الواد بتاع الهجانة
بتاع الحكومة الكافرة المصرائلية
نفذ تهديده
http://www.bbc.co.uk/arabic/middleeast/2009/12/091213_am_egypt_demolition_clashes_tc2.shtml

joyadz said...

انا ضد اي كلمة تمس الشعب المسلم المصري ..لا اعرف لماذا لا نفرق بين نظام الحكومي والشعب ..صراحة يقلقني هذا .ارى بوضوح ان التعميم اصبح يسود مواقفنا وتدخلاتنا ..خاصة من يتهم الشعب المصري بالسكوت .ليس معناه ان الشعب المصري لا يملك القدرة على التغيير بالعكس 80 مليون نسمة تستطيع ان تغير اي نظام ..لكن مادامت الشعوب العربية تتهم الجانب المصري .. من اجل الاتهام فقط فهي هكذا تنقص من عزيمته واظن هذا ما يريده العدو والنظام ..ان يجلعنا نتهم بعضنا ...كفاية اقولها لكم لسنا موحدين هذه نقطة ضعفنا ..وكل الشعوب العربية لها عيوبها لننظر الى القضية بحدود الانظمة الحكومية فقط

زقزوق said...

معظم اصحاب الامراض المزمنة انقرضوا

موجعة جدا

فعلا يعنى ايه مصير مريض الفشل الكلوى مثلا فى غزة ؟؟؟
!!!!!!