يحدث في المدينة الباسلة

 تحديث:

احيه احيه احيه يا بو سوس احيه بنتك ح ترقص وانت ح تفتح للزباين

منظمات امريكية عاملة حملة ضد مصر، فين برامج الفضائيات المصرية تسأل السؤال التاريخي: لماذا ماحدش طايق ريحتنا؟ 

يا ترى ليه؟ عالم ظلمة بعيد عنكوا

------------------

يا مصر بعض التسامح يبقى عار وبأجر/ افتكري "لا تحسبن" مكتوبة فوق كام قبر/ والتار يبات يصحى تاني لو يشيب الدهر

(تميم البرغوثي - قالوا لي بتحب مصر)

وفي بورسعيد (المدينة الباسلة) لا تحسبن مكتوبة تقريبا فوق تسعين في المية من شواهد القبور، وفي بورسعيد المدينة الباسلة، الدولة باعت مصنع مصري بورسعيدي عمله المصريين بعرقهم ومالهم وكبروه بضرايبهم لشركة باجير الاسرائيلي، ده من سنين، وانا مواطنة مصرية صالحة، باسمع الكلام وبادفع الضرايب وبنقدم ورق بالشقة اللي قاعدين فيها للضرايب العقارية، اول مرة اسمع الخبر ده النهاردة

والاكادة، ان صاحب العمل الاسرائيلي فصل مدير مصري عشان "يجيب للعمال حقوقهم" لا.. انا ما اتجننتش ولا باخرف

اعرفوا تفاصيل الحكاية كاملة هنا من بورسعيد - المدينة الباسلة - قلب الحدث

انا بقى الدموع نازلة كده.. سبحان الله، مش باعيط يعني ولا حاجة، هي نازلة كده لوحدها، حاسة ان حد شد كوبس الكهربا وسابني لوحدي في ليلة مافيهاش قمر، واحنا اصلا ما عندناش نجوم في القاهرة بسبب التلوث، ومش عارفة ليه افتكرت حاجة غريبة قوي، افتكرت جومانة مراد في فيلم كباريه وهي ماشية تقول: طرحة سودا استر بيها نفسي.. اي حاجة استر بيها نفسي... ادوني حاجة استر بيها نفسي

فيه ايه؟ ايه التلطيش اللي من كل ناحية ده؟ مين بيعمل كده فينا؟ ايه اللي فجأة كركب الدنيا على دماغنا من كل ناحية؟ بتعمل ايه يا عوكل؟ بتعمل ايه بالظبط؟

ما تفهمنا يا عم نبوس ايدك، احنا بقالنا قد ايه مضحوك علينا الله يخليك؟ ما خلاص، الطوبة وقعت في المعطوبة ومش عارفين نعمل لك حاجة، صارحنا بقى، يعني ايه اسرائيل تحتفل بثورة اتنين وخمسين مع السفارة المصري ونتانياهو يقطع علم مصر اللي مرسوم على تورتة؟ يعني ايه اسرائيل تحتفل بعيد ميلاد انور السادات وتعمل له ميدان باسمه وكل الاسرائيليين حتى الاكثرهم تطرفا وعنصرية يقبلوا بكده؟ شوف؟ شوف وصلنا ان احنا عادي قابلين، بس هم قابلين ازاي؟ الا اذا كانوا عارفين انه خدمهم خدمة تستحق ان واحد عربي مسلم واسمر (وهم عندهم عنصرية ضد اللون) يتحط اسمه على ميدان في "ارض الموعد" المخصصة لشعب الله المختار. هي دي حاجة بالساهل يعملوها يا ناس؟ يعني ايه تبني سد يأجوج ومأجوج عشان "تحمي" مصر من الغزاوية وانت بلسانك اللي طلعت مرة وقلت لصحفية اسرائيلية: ما انتوا ياما دخلتوا لنا من الحدود جواسيس وتجار مخدرات ودعارة ورجعناهم لكوا في الكتم!  وبايع كام حاجة في البلد لشركات اسرائيلية؟ يعني انا دلوقت الكرسي اللي انا قاعدة عليه ده بتاعي وللا ايه؟ ما تكلمنا يا سيدي ربنا ما يحير لك ولايا، احنا كنا عملنا لك ايه؟ من امتى بتضحكوا علينا؟ من امتى؟ من سبعة وسبعين؟ وللا من تلاتة وسبعين؟ وللا من سبعة وستين وللا من اتنين وخمسين؟ وللا من تمانية واربعين؟ نعرف بس

اه.. انا نسيت انك مش عايز حد يكلمك في الموضوع ده دلوقت: لالالالالالالا ارجوك ارجوك ارجوك

معلش.. انت عارف الستات رغايين بقى، ما تاخدش في بالك

طب اعمل ايه دلوقت؟ انا لسة باحبها