بلدي في خطر واللي يدوس لها على طرف حادبحه في الشارع

تحديث:
انا لبست ونازلة اهو ان شاء الله... نازلة وانا خايفة ومش مسامحة اي حد يتأخر عن بلدي، ولو اتأخرتوا عليها انا حاشيل القصيدة بتاعة تميم دي
<<<<<<
انا قلابة.. وحاقلب عليكم كلكم لو حصل اي حاجة لبلدي، وحاقلب على تميم كمان.. بس هه.. عشان اداني امل
تحديث:
ابوس ايديكم اقروا بلال فضل.... ويالا بينا على ماسبيرو دلوقت
تحديث:

الفلسطينيين زعلانين قوي وعمالين يعيطوا، لإن اللي بيحصل عندنا ده حيفشل لهم يوم 15 مايو، احنا لازم نحل المشكلة دي بسرعة قبل 15 مايو عشان الناس حاطين امل علينا، واسرائيل متحزمة وبترقص من اللي بيحصل عندنا لانها كده معتبرة ان يوم 15 مايو فشل، وحلني بقى على ما نحل اللي عندنا، المشكلة دي مش حتتحل الا مسلمين كتير قوي ينزلوا ماسبيرو ويبقى عددهم اكتر من المسيحيين ويطالبوا بحق المصري والمتورطين يتحاكموا، وينفع نحلها احنا المهم عددنا.. معلش، ناس كتير متعلقة في رقبتنا، مش لازم نخذلهم

انا ماليش فيه.. دلوقت انا لا باكلم الجيش، ولا باكلم العيسوي، ولا باكلم النائب العام

انا باكلم الناس اللي عملت الثورة، والمصريين اللي البلد دي مسئوليتهم يحموها ويحافظوا عليها

كنت في اعتصام ماسبيرو والوضع مش لطيف، مش لطيف ابدا

اولا، الاعلام المصري بقى قذر اخر تلات حاجات

مش صحيح ان كان فيه ضرب مولوتوف عند ماسبيرو، انا عند ماسبيرو من الساعة ستة ونص لحد الساعة حداشر ومافيش اي حاجة من الكلام ده

كان فيه عند رمسيس هيلتون تحديف طوب، ما كانش فيه ضرب نار

خلوا بالكم بقى، عشان الظاهر ان حتى صحف زي المصري اليوم والاهرام الى جانب سوابق اليوم السائع، ضالعين في مصايب بعلمهم ولا من غير علمهم، مش اي حاجة تتكتب تصدقوها

ثانيا: الناس هناك قلبها محروق

احساسهم ان خلاص بقى.. ما فيش غيرهم في البلد دي، ايام مبارك بينضربوا، وبعد ما مبارك مشي بينضربوا، و"ايه بقى؟ الثورة عملت لنا ايه؟ عملناها ليه الثورة دي؟ كسرنا كلام القساوسة ونزلنا ننام في التحرير ومات منا الشهدا ودي اخرتها؟ كنايسنا تتحرق؟"

ده الكلام اللي قالوه

وواد قلبه محروق عشان كان في امبابه وابوه لما عرف اللي بيحصل خلا امه تكلمه وتقول له ابوك بيموت عشان يرجع بسرعة لانه لو عرف اللي بيحصل كان راح يضرب.. وقلبه محروق عشان حاسس انه متهم انه جبان وما اخدش حقه بايده وما حدش خد له حقه، وده واد من شبرا، يعني من الاخر كده ما يعرفش الكلام بتاع المسيحيين ده اللي هو "احنا مش بنرد على الشر بشر" والكلام اللي هو بيعتبره ماصخ ده، ده لا مسلم ولا مسيحي، ده شبراوي.. شبرا دي دين لوحدها زي ما كلنا عارفين

وعيال عمالين يقولوا لي: فين المسلمين؟ احنا كنا فاكرين بعد الثورة المسلمين حيبقى عددهم اكتر من المسيحيين.. ولا بقى ما كانتش المشكلة في مبارك زي ما فهمتونا.. يبقى هم المسلمين بيكروهنا فعلا؟ مش مبارك هو اللي كان بيعمل فينا كده؟ امال مشيناه ليه وكنا حنموت في الشوارع؟ 

وطبعا سمعنا طراش طائفي بالهبل... مفهوم، والمفروض نستحمل

وممدوح جلال من الاخوان راح ساحب معاه اتنين سلفيين وجم ودخلوا وسمعوا كلام زي الطين، واستحملوا، والمفروض ناس قدهم الف مرة ييجوا ويستحملوا اللي حيسمعوه

احنا في خطر.. احنا في خطر

اسعااااف.. اسعااااااااف.. اسعاااااااااااااااااااااااف

مصر في خطر

والنهاردة كل اللي يشوفني يقول لي: فيه حاجة غلط.. دي خطة تقسيم خارجية وبتتنفذ

مالك عدلي قال لي باللفظ: دي خطة تقسيم رسمي

ومينا زكري قال لي: انا خايف يا نوارة شكلها خطة تقسيم

وماحدش حاطط في بطنه بطيخة صيفي غير تميم البرغوتي، بس تميم حاطط في بطنه بطيخة صيفي عشان مراهن علينا.. على الشعب، وبيقول لي المصريين مش حيستكوا على كده ومش حيسمحوا للخطة دي تتنفذ

اكسفوه بقى... اكسفوه وهو حاطط كل اللي في جيبه عليكم

ومش هو بس.. مصر الغلبانة دي اللي ما شافتش يوم عدل في حياتها، حاطة حالها ومالها وصيغتها عليكم

مافيش حل غير ان بكرة عدد المسلمين قدام ماسبيرو يبقى تلات اضعاف المسيحيين 

مش رايحين يطبطبوا، ولا راحين يهدوا

رايحين يقولوا: عايزين حق المصري. ويحرقوا آخر كارت لابن الوسخة اللي نايم في المستشفى ومش عايز يتحاكم والسعودية وامريكا صارفين مليارات.. مليارات، عشان يعملوا اللي بيعملوه عندنا ده وهو يفلت وما يتحاكمش، مش عشان سواد عينيه، عشان لما يتحاكم فضايحهم حتطلع

المظاهرة اللي في ماسبيرو لحد دلوقت طائفية، والمسلم اللي بيروح فرداني بيسمع احلى خرا، وبيستحمل، ولازم يستحمل، وغصب عن عين اللي خلفوه حيستحمل لحد ما الناس نارها تبرد، ولحد ما عدد المسلمين يبقى قد عدد المسيحيين تلات مرات هناك

ساعتها بقى مش حيبقى فيه هتاف الحماية الدولية الخرا ده

المظاهرة الطائفية ممكن تتحول لمظاهرة مصرية بكرة الصبح.. بس ده في ايد المسلمين بس

ومافيش حاجة اسمها خايف اروح لبعدين يتخانقوا معايا، ما يتخانقوا معاك يا اخي، يتخانقوا معاك وتستحمل وتسكت، يعني ما خفتش من الرصاص وخايف من اخوك يفش غله فيك؟ ما كنيسته اتحرقت.. كنيسته اتحرقت.. ده مالك عدلي بيقول لي دي عمرها ما حصلت من ايام الفتح الاسلامي، وانا مش عارفة حصلت ولا ما حصلتش من ايام الفتح الاسلامي، لكن انا ما اوعاش على كنيسة اتحرقت في عمري

حنصحى الصبح كلنا ونشرخ على اعتصام ماسبيرو بكرة

لا لنا صالح بجيش ولا بنائب عام ولا بشرطة.. لنا صالح ببلدنا وبس، مالهاش غيرنا، وطول عمرها مالهاش غيرنا، ولا حد بينفعها غيرنا

المسلمين حيروحوا اكتر من المسيحيين بكتير، والمسلم اللي مش حيروح يبقى بيخون بلده

والمسلم اللي حيروح مش حيروح يقولهم اهدوا.. عشان كده هو حيعصبهم اكتر

حيقولهم: انا جاي عشان عايزين حقنا من اللي عمل فينا كده في امبابة. بس. 

المسيحيين مش عايزين حماية دولية، فعلا مش عايزينها، بس واحد بيمسك الميكروفون ويخري الخرا ده والناس سخنانة بتقول وراه، لكن لما المسلمين يبقوا تلات اضعافهم ماحدش حيمسك الميكروفون ويقول الكلام ده، حنقول: عايزين حقوقنا.. احنا المصريين، عايزين حقوقنا

انا ما اعرفش حد يقعد لي على النت يشير لنكات ويقعد يحلل في بول ويقول: اصل دي فلول، اصل دول سلفيين، اصل دول مش سلفيين، اصل مؤامرة اصل نيلة على دماغه... ده بيض ده... حي على الجهاد

حي على الجهاد بقى

مصر محتاجانا.. مصر اتكعبلت وعايزة اللي يلحق يقومها، مش يقعد يتفرج عليها وهي واقعة عشان يعرف اتكعبلت في طوبة ولا في حفرة.. المهم انها اتكعبلت وخلاص

الكورة في ملعب المسلمين.. اللي مش حيروح يبقى خانها

واي حد تشوفه بيشحن طائفي وعايز اختي وعايز بنت خالتي وشنودة يمشي وسلاح الكنيسة والقرف ده اشمطه وخلي اللي ما يشتري يتفرج عليه، ده خاين ده، خاين، زي الجاسوس الاسرائيلي، وزي الفلول، ويمكن يكون جاسوس اسرائيلي فعلا انت ايش ضمنك؟ ده خاين وقاتل.. بيقتل مصر

مصر لو اتقسمت عشان واحدة ست انا مش عايزة ابص في وش جنس مسلم مصري هنا في البلد دي.. وايوة انا باحمل المسئولية للمسلمين المصريين... المسئولية مسئوليتهم دلوقت، ومصر محتاجاهم دلوقت، ومتعلقة في رقبتهم

وروها نفسكم... وروا الدنيا نفسكم اذا كنتوا مصريين بجد ولا لا

استعنا ع الشقا بالله

اول حاجة ده فيديو الدعوة للتضامن تنشره وتوزعه على اوسع نطاق

تاني حاجة، حاجات من اللي توقعتها في البوست اللي قبل اللي فات حصلت
يعني مثلا، المتظاهرين ابتدوا يهدأوا ويقبلوا التضامن من المسلمين، وده اثار رعب الداخلية امبارح، امبارح مسلمين كتير رواحوا يتضامنوا مع المعتصمين الاقباط في كنيسة العدرا في المسرة والامن منعهم، وبقى يشوف البطاقات الشخصية، المسيحي يدخله والمسلم يمنعه، ولما المسلمين اعتصموا برة اتقبض على كتير قوي منهم ودلوقت بيتحقق معاهم وممكن تتابعوا مسار التحقيق على الاكاونت بتاع مالك على التويتر، حتى لو مش مشترك على التويتر تقدر تشوف التويتات بتاعته


اذن الوضع كالآتي: الجماهير المسيحية الغاضبة اللي كانت مش طايقة تشوف مسلم، بدأت تركز وفورة الغضب بتاعتها اللي كانت بتطرطش على اي حد ابتدت تاخد مسارها الصحيح وابتدوا يوجهوها للأمن فقط، ونسبة كبيرة منهم بترحب بالتضامن الاسلامي
وده تطور طبيعي لاي بني ادم مش لازم يبقى عنده خبرة بالنفس بالبشرية، بس على الاقل يبقى عنده شوية دم واحساس


دلوقت اللي بيمنع المتضامنين المسلمين من التضامن هم الامن، وبعض القساوسة اللي قاعدين يقولوا للمسيحيين التظاهر حرام ويشكروا رجال الامن على جهودهم!


الحاجة التالتة واللي برضه توقعناها، يبدو ان التضامن الاسلامي المكثف مع الغضب المسيحي شكل تهديد حقيقي لامن الدولة وابتدا يعمل لعب وسخ من تحت الترابيزة
لسه عارفة دلوقت ان في المنيا فيه ورق بيتوزع على الناس بتحريم المعايدة على المسيحيين
قشطة جدا، الداخلية نزلت كلابها... طيب، واحد حيقول لي ايش عرفك انهم داخلية؟ ما يمكن ناس دماغها كده
حلو قوي، المية تكدب الغطاس
لو عايز تتضامن فعلا، وعايز تنقذ البلد من مصير اسود، اي حد يديلك الورقة دي، تاخدها منه، وتركز في اوصافه كويس، ولو نفع اسأله على اسمه، وروح لأقرب قسم شرطة جنبك وبلغ فيه انه بيعمل فتنة طائفية وسلمهم الورقة دي
والله قبضوا على الناس اللي بتعمل كده زي ما قبضوا على المتضامنين مع المسيحيين والموضوع اتلم، يبقى الناس دي مش تبع الامن ولا حاجة، ويبقى الامن براءة من الفتنة الطائفية، وتبقى خدمت بلدك وانقذتها من كارثة
ما قبضوش عليهم، تبلغنا احنا بقى، واحنا نعمل فضيحة للداخلية ونقول انها منزلة ناس يوزعوا ورق يعمل فتنة طائفية والكلام ده ننشره في كل حتة بحيث يوصل لكل مواطن مصري مضحوك عليه


الحاجة الرابعة
حنروح ان شاء الله يوم الخميس ستة يناير نحاول ندخل الكنيسة ويا نعيد ما المسيحيين يا نموت معاهم، ما نفعش ندخل حنحاوط الكنيسة باجسامنا، ويا يطلعوا لنا بالسلامة ونروح سوا، يا نموت كلنا سوا
فيه احتمالات كتير
فيه احتمال ان الامن يزرع بلطجية وسط المسيحيين عشان يطفشوك.. طنش خالص، وما تديلوش اي فرصة، ولا اقول لك، قول له في وشه كده انت امن وانا عارفك، ومش حامشي، بس بهدوء كده، من غير خناق ولا مشاكل
حتلاقي ناس تحاول تستفزك عشان يتخانقوا معاك، دول امن، ما تديهمش فرصة للخناق، مهما يعملوا، تفضل ثابت في مكانك، ومن غير خناق، خد مهدئ ولا اشرب يانسون قبل ما تروح وخليك باااااااااااااااااااااارد
ممكن تلاقي حد مش امن ولا حاجة بس لسه غضبان او محروق، استحمله، استحمله له حق عرب عليك، واستحمله عشان ياما استحملك، واستحمله عشان مصر غالية، واستحمله عشان انت حتحافظ على مصر يعني حتحافظ عليها
يستحسن تخش مع واحد صاحبك مسيحي
وتخلي على الدايل نمرة محامي
وانا برضه حاشوف مع مالك مصطفى عشان احنا كنا رايحين الكنيسة والمفروض ان هشام مبارك كان حيساعدنا في الموضوع ده
حتتفق مع صحابك المسلمين وعلى الاقل صاحب واحد مسيحي، وتروحوا اقرب كنيسة لكم
وانت قتيل البلد دي... يا تحافظ عليها وتحميها، يا تموت
مالهاش غيرنا... مسكينة ومالهاش غيرنا، لا لها رئيس، ولا لها امن، ولا لها حماية، ولا لها حد يخاف عليها غيرنا
وهي مسئوليتنا.. واللي يئذيها ناكله بسنانا

اسلمى يا مصر إننى الفدا

ذى يدى إن مدت الدنيا يدا

أبدا لن تستكينى أبدا

إننى أرجو مع اليوم غدا

ومعى قلبى وعزمى للجهاد

ولقلبى أنت بعد الدين دين

لكى يا مصر السلامة

وسلاما يا بلادى

إن رمى الدهر سهامه

أتقيها بفؤادى

واسلمى في كل حين

أنا مصري بنانى من بنى

هرم الدهر الذى أعيا الفنا

وقفة الأهرام فيما بيننا

لصلوف الدهر وقفتى أنا

في دفاعى وجهادى للبلاد

لا أميل لا أمِل لا ألين

لكى يا مصر السلامة

وسلاما يا بلادى

إن رمى الدهر سهامه

أتقيها بفؤادى

واسلمى في كل حين

ويك يا من رام تقييد الفلك

أى نجم في السما يخضع لك

وطن الحر سمًا لا تمتلك

والفتى الحر بأفقه ملك

لا عدا يا أرض مصر بكى عاد

أننا دون حماكى أجمعين

لكى يا مصر السلامة

وسلاما يا بلادى

إن رمى الدهر سهامه

أتقيها بفؤادى

واسلمى في كل حين

للعلا أبناء مصر للعلا

وبمصر شرفوا المستقبلا

وفدًا لمصرنا الدنيا فلا

نضع الأوطان إلا أولا

جانبى الأيسر قلبه الفؤاد

وبلادى هى لى قلبى اليمين

لكى يا مصر السلامة

وسلاما يا بلادى

إن رمى الدهر سهامه

أتقيها بفؤادى

واسلمى في كل حين

الغلابة ليهم مين غيرك يا رب؟

 تحديث:
دول ولا حتى مهتمين بغزة في السيول، هي لازم تبقى قنابل عشان يهتموا؟ واسرائيل فتحت السد ونزحت المية على غزة على اساس انها بلاعة يعني


@mohammedatef للمساعدة والتبرعات فى مواجهة سيول أسوان .. جمعية رسالة مصر , مصر الجديده ميدان الحجاز خلف سيتى بنك 0112964480
-----------

يعني اللي بيموتوا في الصعيد وفي سينا دول مش بني ادمين يا ناس؟ ولا كلمة عليهم؟ امبارح يقولوا حداشر ماتوا في سينا والنهاردة يقولوا سبعة؟ اربعة صحيوا؟

وواحدة رسامة صاحبة ماما قالت ان فيه قرية في الصعيد اتشالت باللي فيها وهي عرفت عشان هي رسمتها ولها صلة بيهم

والناس عمالة تتصل ببعض عشان تسمع اخبار ناسنا اللي في بلدنا وماحدش سائل فيهم، ولا حتى قناة الجزيرة جايبة سيرتهم، والناس اتقطع عليها الكهربا والتليفونات ومش عارفين يكلموا حد.. والظاهر بقى الصحفيين خايفين يروحوا لهم ليروحوا ما يرجعوش، طب عرفوا منين انهم سبعة بس وهم مقطوعة الاتصالات بيهم؟ طب صوروا القرى للذكرى طيب يمكن تتشال وتغرق وتبقى اثر

يارب يا بتاع الغلابة يارب، مالهمش غيرك يارب، لا حد سائل فيهم، ولا حتى عايز يعرف جرا لهم ايه؟

لا وسبحان الله، الحمد لله الحمد لله الحمد لله: الصعيد وسينا اغلب ناس.. اغلب ناس فيك يا بلد

قدر الله وما شاء فعل، الحمد لله على قدر الله، راضيين يارب، راضيين يارب، احنا امتى ما كناش راضيين؟ الواحد بس بيصعب عليه الغلبان يدفن في الضلمة ولا حتى يتصلى عليه

ماحدش يشتكي من اخلاق اي حد تاني

اي بلد في الدنيا اقتصادها معتمد على البقشيش والسمسرة مش ح يبقى فيها ناس عندهم اخلاق، عشان لا الشحاتة ولا الحنجلة بتنتج بني ادمين محترمين

ماحدش بقى يكلمني على الدين، وللا الاخلاق، وللا قيم، ولا البلد مافيهاش رجالة، ولا فيها رجالة

احنا اتسترنا في السبعينات عشان كان فيه فرصة ان بعض المصريين يسافروا الخليج ويضخوا فلوس للبلد، لكن تجريف الاراضي وهدم الصناعة ابتدى من السبعينات، ولولا سفريات الخليج كان زمان البلد دلوقت معتمدة على....ما تخلوناش نتكلم

وعمالين يتمادوا في الخطة الاقتصادية اللي ابتداها السادات ودلوقت وصلت لذروتها

خصوصا بعد ما العراق (اللي كانت ساترة بيوت كتير برضه) اتهدت على دماغ المصريين ورجعوا هربانين وشقا عمرهم راح عليهم

يعني مافيش فرصة ان واحد يشتري حتة ارض ويزرعها

ولا حتى يعمل صناعة صغيرة

ودلوقت البلد بتاكل عيشها منين؟ من ناس تيجي من برة تصرف فلوسها علينا، يا نمد ايدنا وناخد تيبس (دلوقت الناس بقت تقول على الشغل: طالع لي "حسنة" كويسة منه) يا نهنكر ونشتغل سماسرة ونطلع كوميشن

دي مش شغلانات، دي سفالة، وانحطاط، وقلة ادب، وكل حاجة بقت معتمدة على البقشيش والسمسرة، حتى الطب، والهندسة، والفن، والصحافة، ده التدوين بقى كده، كل حاجة، كل حاجة

صلي بقى وربي دقنك وصوم اتنين وخميس، وحج بالفلوس اللي انت شاحتها كل سنة، مهما تعمل، انت عايش عيشة مش محترمة ومش ح تبقى محترم، انت متسول وفي احسن الحالات شماشيرجي بتطلع بسبوبة

من هنا بقى لحد ما ربنا يفك اسرنا من الورطة اللي ورطها لنا السادات وبينفذها مبارك بكل الاخلاص والتفاني - مما يجعله الوحيد اللي مخلص في شغلته ومهمته في البلد

نستحمل بعض بقى، نستحمل بعض على قد ما نقدر، ما نمشيش نشتم في اخلاق الناس، شوف اخلاقك الاول، اكيد اتأثرت بشغلانتك يعني، واللي مرتاح سنة يستحمل اللي تعبان اكتر منه، ما تبقاش راكب عربية مكيفة وتتخانق مع سواق ميكروباص وسواق عربية نص نقل وسواق تاكسي، احترم نفسك وخلي عندك كرامة - لما تفتري على الاضعف منك (حتى لو غلطان) يبقى انت بني ادم لا عندك كرامة ولا عندك دم ولا احساس، كتر خيره انه ما رفعكش بالمطواة عشان ياخد حقه، ما تبقاش راجل وتتخانق مع ست، ما تبقاش شاب وتتخانق مع راجل كبير (حتى لو قليل الادب - مش عارفة ايه اللي حصل الرجالة الكبار بقوا قلالات الادب قوي - بس استحمله بكرة تبقى قده) ما تبقاش مسلم وتتخانق مع مسيحي، ما تبقاش قوي او مرتاح شوية او عندك اي امكانية على اي مستوى وتتخانق مع الاضعف وللا الاتعب وللا الاعجز، احترم نفسك، لا بنشتغل شغلانات محترمة، ولا عايشين في بلد محترمة يبقى على الاقل نتصرف بشكل محترم عشان بس يبقى فيه امل

دي بلد لا فيها انتاج ولا فيها قانون يعني مافيهاش اي حاجة تخلي البني ادم عنده مرجعية اخلاقية، حتى الدين بيتفسر على مزاج صاخيب المخيل، وفيها ناس تعبانين، نساع بعضينا شوية، ونستحمل بعضنا شوية

لو الرحمة كمان راحت من البلد يبقى دي بلد ليه بقى؟ يبقى مالهاش لازمة اصلا، ربنا ح يجيب ضرفها، ولو جاب ضرفها مش حلو علينا 

العشوائيات وأطفال الشوارع

السلام عليكم

أحب أن أدعوكم إلى ندوة عن العشوائيات وأطفال الشوارع على هامش لقاء الأف طفل الجمعة الساعة الثالثة في مسرح النيل مدينة الإنتاج الإعلامي الثالث من يوليو ان شاء الله

يوجد عربيات لنقل الضيوف و المتطوعين

محاربة الفقر وتقدم الأمم

العشوائيات-أطفال الشوارع

يشكل سكان العشوائيات في مصر نسبة 45 بالمائة من تعداد سكان القاهرة وفقا للتقارير الرسمية التي تم نشرها في جريدة الأهرام القومية. وتعد المناطق العشوائية، بما فيها من نموذج حياة غير إنساني، هي أخطر ما يهدد النهضة والتقدم في أي دولة، ناهيك عن دولة تعاني من أزمات اقتصادية، وسياسية، واجتماعية مثل مصر.

ولأن الفقر بشكل عام هو عائق أمام نمو الإنسانية، فقد نهض العالم والمجتمع الدولي لمحاربته والتصدي لأسبابه من خلال برنامج الأمم المتحدة لمحاربة الفقر. إلا أن محاربة الفقر في كل دولة وتنمية الإنسان، والذي هو أهم مورد اقتصادي لأي أمة على الإطلاق، هو مسئولية كل عناصر المجتمع السياسية، والاقتصادية، والاجتماعية، والفكرية، والإعلامية.

لنتمكن من معالجة مشكلة العشوائيات علينا أن نتعرف على خلفيتها التاريخية، كيفية تكونها، كيفية تنميتها، التحديات التي تواجه التنمية للمواطنين في العشوائيات، ودور الإعلام في كل ما سبق. ثم إيجاد حلول اقتصادية، واجتماعية، وثقافية لإنجاز التالي:

أولا: تجفيف منابع تكون العشوائيات والحد من توسع رقعتها.

ثانيا: وضع خطة تغطي كل المستوايات العملية والمعنوية لتنمية الإنسان الذي وجد، دون ذنب، في العشوائيات، منزوعا منه المهارة المهنية، والكرامة الإنسانية اللتان تضمنان له الحياة التي يستحقها أي إنسان.

ثالثا: توعية المجتمع المحيط بالعشوائيات بخطورة تجاهل وجود هذا النوع اللا إنساني من الفقر، وبدور كل فرد في المجتمع لمحاربة الفقر والنهوض بالمواطن والقضاء على كل الظواهر التي تهدر من كرامة الإنسان وتعوق تقدمه.

تدور الندوة حول ثلاثة محاور:

1- المحور الاقتصادي: يتحدث فيه الدكتور جلال أمين حول تاريخ تكون العشوائيات وكيفية وضع خطة اقتصادية للنهوض بالعشوائيات.

2- المحور الاجتماعي: يتحدث فيه الشاعر وسفير الفقراء أحمد فؤاد نجم.

3- المحور الثقافي: يتحدث فيه أستاذ أسامه غريب.

زوروا موقع صحبة خير 

لو يطلع كل ده كابوس

واصحى الصبح يبقى كل ده ما حصلش

مافيش حاجة من دي حصلت

مافيش مراقبين امريكان على الانفاق في مصر

ولو يطلع الكلام ده ما اتقالش

ولو يطلع ان ابو الغيط امبارح ما قالش: احنا مش بنسرب لهم اسلحة، كل اللي بيجيلهم بيجيلهم من البحر

!!!

كأنه عيل في مدرسة بيفتن على زميله

ولو يطلع مافيش حاجة من دي، كل ده ما حصلش، انا باحلم، حلم بايخ ومزعج وح اصحى منه ان شاء الله على خير

اقول لكوا حاجة انانية شوية؟

انا زعلانة على مصر اكتر ما زعلانة على غزة، في غزة اهم بيموتوا شهدا وح يدخلوا الجنة ان شاء الله وبيقاوموا بكل طاقتهم واكتر من طاقتهم شوية

لكن انا زعلانة علينا قوي، والكل زعلان علينا ومننا

العالم دلوقت مقسوم لنصين

نص بيحتقرنا زي جورج بوش اللي جه في وش الرئيس بتاعنا يقول له في شرم الشيخ: في البلاد المتخلفة التي يظل الرئيس يحكم فيها لما يقرب من ثلاثين عاما بينما منافسيه في السجن

او زي روبرت فيسك اللي قال على ريسنا: الحاكم الاقليمي القائم على مصالح امريكا في مصر، وقال على الشعب المصري بيصلوا ويرتشوا ويصلوا ويزوروا ويصلوا ويعذبوا بعض، ومهما حسن نصر الله نادى عليهم من هنا للصبح مش ح يتحركوا لان الفساد متغلغل فيهم

او زي اوباما اللي الريس اتصل بيه عشان يهنيه فما ردش المكالمة وتعمد بقى ان كل الناس تعرف ويتنشر الكلام ده في الجرايد عندهم وفي الصحف العربية، وطبعا مصر ما جابتش سيرة

والنص التاني زعلان مننا من منطلق: ماكانش والله العشم، تعمل كده يا حسين، واللي بنيته اتهدم، وراح في غمضة عين

اللي هم العرب يعني

ومافيش حد بيدافع عننا ومبسوط مننا غير اتنين: اسرائيل والسعودية

والله وباضت لك في القفص يا اوووووووووووووسسسسسسسااااااااااااااااا

واللي مزعلني اكتر واكتر ان فيه ناس، بعض ناس مش كل الناس (على فكرة اتضح ان بتوع مؤامرة شتيمة مصر دول عددهم قليل وصوتهم عالي)

فرحوا قوي لما بوش هزأ الريس بتاعنا، وفرحوا قوي لما اوباما ما ردلوش المكالمة ولا حتى عبره، وفرحوا قوي لما روبرت فيسك شتم المصريين باتهامات انا شايفة انها مجحفة وتلخيص مخل وتعميم كمان

وزعلوا قوي لما العرب قالوا لنا: ليه كده؟ بقى هي دي مصر ام الدنيا؟ ما كانش العشم

وده ينم عن مرض اضافي، يعني ما عندهمش مانع ان حد يعاملنا باحتقار مدام خواجة وبيدينا معونة، شبشبه على راسنا وينسله كمان على وشنا لو حب

لكن عندهم مانع ان العرب يتعشموا فينا، ولما يجيلهم احباط ويعبروا عن غضبهم واحباطهم فجأة يبقوا بيدافعوا عن سمعة مصر!

يعني ما يدافعوش عن سمعة مصر قصاد الناس اللي بتقول: دول فسدانين ومافيهمش امل

ويدافعوا عن سمعة مصر قصاد الناس اللي بتقول: انتوا احسن من كده، واحنا كنا فاكرين انكوا احسن من كده، وكنا عشمانين انكوا احسن من كده

لا ويبقى ردهم ايه؟: يا اخي واحنا مالنا؟ يعني بيأكدوا اتهامات روبرت فيسك ان احنا مافيناش امل

وردح بقى وشرشحة ومعايرة...اعوذ بالله، ايه روح المنوفية اللي سيطرت على البلد دي؟

يعني كده لا كرامة جوة البلد ولا براها، ووفقا لكلام فيسك، لا دنيا ولا آخرة كمان

طب انا بقى مش حسنة النية، ومش شايفة ان الناس اللي قالت واحنا مالنا واحنا ياما عملنا لكوا واحنا ياما سوينا لكوا دول ناس بريئة ولا ناس مش فاهمة بتقول ايه ولا بتعمل لمصلحة مين؟

بجد بقى، ماهو مش ممكن كل ده مصادفة وحسن نية، لا

مؤامرة مؤامرة، ونظرية مؤامرة صح مية في المية بقى

عشان تمثيلية الغيرة على سمعة مصر دي تمثيلية اصلا مش لايقة عليهم اولا (لو ح نعتبر ان مصر ليها سمعة زي البت اللي مستنية عدلها يبقى هم اول ناس بوظوا سمعة مصر وهم اللي اوحوا لفيسك بالكلام ده)، ثانيا بتحمل ضمنيا تشويه حقيقي لصورة المصريين، وتأكيد لكلام روبرت فيسك وتبرير لاحتقار بوش واوباما، وتاني انا مش شايفة ان بوش واوباما وفيسك غلطوا بشأن الحكومة المصرية، بس فيسك فعلا كان متجني على الشعب المصري

ماهو لما فيسك يقول: ما تتعبش نفسك يا نصر الله دول مافيهمش امل

وبتوع سمعة مصر يقولوا: واحنا مالنا سيبوا الشعب المصري في حاله، ويزيدوا من الشعر بيتا بردود تنم عن انعدام الذكاء وعدم وجود الحد الادنى لاي تسلسل منطقي في التفكير زي:

- ما تفتحوا المعبر

- يا سلاااااااااااام طب ما ايران تحارب

ويخلوا الناس تقول لهم: ايه الغباوة دي؟ انتوا اغبيا وللا ايه؟

يبقى فيسك بيغني وهم بيردوا عليه، وحسن الظن مش من حسن الفطن

انا متضايقة، انا عارفة ان دي قلة ادب مني، اقصد يعني الناس عمالة تموت وانا عمالة اقول انا زعلانة علينا احنا، بس ما كلنا ح نموت، وكلنا لنا معاد، ماحدش ح يقدم عن معاده ولا ح يتأخر، والستمية اللي ماتوا في حداشر يوم احنا بالصلاة ع النبي نعمل قدهم مرتين في نص ساعة بعبارة وللا قطر وللا عمارة، بس الستمية اللي ماتوا في غزة معاهم ناس بتنتقم لهم وبتاخد لهم حقهم والمقاومة واللي بيساندوها مش محتاجين حد يعلمهم الحساب ولا حاجة زي ما جيمي بيقول، عشان احنا بروح اهلنا بنموت بضعف العدد ده في اقل من عشر الوقت ده وماحدش بياخد حقنا ولا حتى بيسجن المتسبب في قتل كل دول، ولا حتى بيخسره فلوس، بالعكس ده بيكسب فلوس، طب على الاقل المقاومة بتكبدهم فزع نفسي، بتكبدهم فلوس، بتكبدهم قطن وشاش يعالجوا جرحاهم بيه، لكن احنا ولا اي حاجة من دي، دلو كل ما يموتوا مننا كل ما يكسبوا اكتر على كل المستويات، وفوق ده كله، هم الوحيدين اللي حاسين بالامان هنا، ومتهيالي الخوارزمي وارسطو كمان لو بعثوا ح يسألوا عن عنوان اللي بيسفه من انجازات المقاومة، وح يعلموه ببلاش عشان ياخدوا فيه ثواب، خدمة له وللانسانية

وزي ما قلت امبارح: فيه واحد بيموت بكرامة، وواحد بيموت في جلده

وكلنا ميت

وانا مش عايزة اموت في جلدي....انا متضايقة

هو روبرت فيسك بيحزنا على نفسنا ليه؟

انا لما قريت المقالة دي عيطت، هو بيوكسنا تاني ليه؟ وايه الندب ده الله يخرب بيته، ده بيفكرني بالفلاحات اللي راحوا يعزوا طنط شاهندة في كمشيش وقعدوا يقولوا لها: ياللي عمرك ما قلعتي الاسود، ياللي ما شفتيش يوم عدل في حياتك، ياللي من ساعة ما ابوكي راح وانت في بكا وعياط من ابوكي لاخوكي لابن عمتك لجوزك، يا حرقة قلبك ياختي...لما كانوا ح يموتوا الست وابنها الكبير جات له ازمة وما بقاش عارف ياخد نفسه وبنتها داخت وكانت ح يغمى عليها لدرجة ان ابن اخوها قال لي: يعني هم جايين يعزوا وللا جايين يشتموا مثلا؟

خدوا المقال الندابة اهو:

صرم يا نفيسة، نسيت اترجم العنوان: روبرت فيسك: الدولة المصرية المتعفنة اضعف وافسد من ان تتحرك
Robert Fisk: The rotten state of Egypt is too powerless and corrupt to act

There was a day when we worried about the "Arab masses" – the millions of "ordinary" Arabs on the streets of Cairo, Kuwait, Amman, Beirut – and their reaction to the constant bloodbaths in the Middle East. Could Anwar Sadat restrain the anger of his people? And now – after three decades of Hosni Mubarak – can Mubarak (or "La Vache Qui Rit", as he is still called in Cairo) restrain the anger of his people? The answer, of course, is that Egyptians and Kuwaitis and Jordanians will be allowed to shout in the streets of their capitals – but then they will be shut down, with the help of the tens of thousands of secret policemen and government militiamen who serve the princes and kings and elderly rulers of the Arab world.
في يوم ما اصابنا القلق بشأن الجماهير العربية – ملايين العرب "العاديين" الذين نزلوا الى شوارع القاهرة والكويت وعمان وبيروت – وردود افعالهم على ديمومة حمام الدم في الشرق الاوسط. هل يستطيع السادات السيطرة على غضب هؤلاء الناس؟ والآن – بعد مرور ثلاثة عقود على حكم حسني مبارك – هل يستطيع مبارك (او البقرة الضاحكة كما يسمونه في القاهرة) السيطرة على غضب هؤلاء الناس؟ والاجابة، بالطبع، هي ان المصريين والكويتيين والاردنيين سيسمح لهم بالصراخ في شوارع عواصمهم – ثم يتم حبسهم بعد ذلك، بواسطة عشرات الالاف من العناصر السرية للشرطة والمليشيات الحكومية التي تخدم الامراء والملوك والعجائز من حكام العالم العربي.
Egyptians demand that Mubarak open the Rafah crossing-point into Gaza, break off diplomatic relations with Israel, even send weapons to Hamas. And there is a kind of perverse beauty in listening to the response of the Egyptian government: why not complain about the three gates which the Israelis refuse to open? And anyway, the Rafah crossing-point is politically controlled by the four powers that produced the "road map" for peace, including Britain and the US. Why blame Mubarak?
يطلب المصريون من مبارك فتح معبر رفح، وقطع العلاقات الدبلوماسية مع اسرائيل، وارسال السلاح لحماس. ويمكننا أن نلحظ براعة التضاد حين نسمع رد الحكومة المصرية: ولماذا لا يشتكي أحد من عدم فتح المعابر الإسرائيلية الثلاثة؟ على أية حال، فإن هناك اربعة جهات تسيطر على معبر رفح، وذلك وفقا "لخارطة الطريق"، وتتضمن هذه القوى بريطانيا والولايات المتحدة، فلماذا يلام مبارك وحده؟
To admit that Egypt can't even open its sovereign border without permission from Washington tells you all you need to know about the powerlessness of the satraps that run the Middle East for us.
الاعتراف بأن مصر لا تستطيع أن تمارس سيادتها على حدودها بدون اخذ الاذن من واشنطن يشي بحجم الضعف الذي اصاب الحاكم الاقليمي الذي يدير مصالحنا في الشرق الاوسط.
Open the Rafah gate – or break off relations with Israel – and Egypt's economic foundations crumble. Any Arab leader who took that kind of step will find that the West's economic and military support is withdrawn. Without subventions, Egypt is bankrupt. Of course, it works both ways. Individual Arab leaders are no longer going to make emotional gestures for anyone. When Sadat flew to Jerusalem – "I am tired of the dwarves," he said of his fellow Arab leaders – he paid the price with his own blood at the Cairo reviewing-stand where one of his own soldiers called him a "Pharaoh" before shooting him dead.
افتح المعبر – او اقطع العلاقات مع اسرائيل – وستنهار المؤسسة الاقتصادية المصرية. واي زعيم عربي سيقوم بخطوة مشابهة سيجد ان المعونات الاقتصادية والعسكرية الغربية تتراجع. بدون معونات، ستفلس مصر. ويمكن قراءة الجملة بالعكس ايضا. ولن يبدي الزعماء العرب اي تعاطف تجاه احد. حين سافر السادات الى القدس قال للزعماء العرب: لقد سئمت من الاقزام. ودفع ثمن ذلك من دمه في القاهرة حين اسماه احد جنوده بالفرعون ثم اطلق النار عليه.
The true disgrace of Egypt, however, is not in its response to the slaughter in Gaza. It is the corruption that has become embedded in an Egyptian society where the idea of service – health, education, genuine security for ordinary people – has simply ceased to exist. It's a land where the first duty of the police is to protect the regime, where protesters are beaten up by the security police, where young women objecting to Mubarak's endless regime – likely to be passed on caliph-like to his son Gamal, whatever we may be told – are sexually molested by plain-clothes agents, where prisoners in the Tora-Tora complex are forced to rape each other by their guards.
العار الحقيقي لمصر لا يكمن في في رد فعلها تجاه مذبحة غزة، وانما يكمن في الفساد الذي تغلغل في المجمتع المصري حيث لا خدمات صحية، او تعليم، او امن حقيقي يحظى به المواطن العادي. انها ارض تكون فيها مهمة الشرطة حماية النظام، وضرب المتظاهرين، والتحرش الجنسي بالشابات المعارضات لنظام مبارك اللا نهائي (والذي من المتوقع ان يخلفه ابنه جمال بصرف النظر عما يخبرنا النظام به) من قبل عملاء الشرطة الذي يرتدون ملابس مدنية. حيث يجبر المساجين على اغتصاب بعضهم البعض باوامر من حرس السجن.
(هو جاب الكلام ده منين؟ اقصد عرفه منين؟)
There has developed in Egypt a kind of religious facade in which the meaning of Islam has become effaced by its physical representation. Egyptian civil "servants" and government officials are often scrupulous in their religious observances – yet they tolerate and connive in rigged elections, violations of the law and prison torture. A young American doctor described to me recently how in a Cairo hospital busy doctors merely blocked doors with plastic chairs to prevent access to patients. In November, the Egyptian newspaper Al-Masry al-Youm reported how doctors abandoned their patients to attend prayers during Ramadan.
تم تغيير طبيعة الدين، حيث محيت الحقيقة الفعلية للاسلام واقتصر على المظاهر فقط. عادة ما تجد التزاما دينيا مظهريا واضحا لدى موظفي ومسئولي الحكومة المصرية، الا انهم يتسامحون او يتجاهلون التلاعب بالانتخابات، وانتهاك القانون، والتعذيب في السجون. اخبرني احد الاطباء الامريكيين ان الاطباء في في مستشفيات القاهرة يغلقون الابواب بالكراسي البلاستيكية لمنع تدفق المرضى. وفي نوفمبر الماضي كتبت صحيفة المصري اليوم عن الاطباء الذي اهملوا مرضاهم لحضور صلاة التراويح في رمضان.
(هو جه مصر؟ هو عرف الكلام ده منين؟)
And amid all this, Egyptians have to live amid daily slaughter by their own shabby infrastructure. Alaa al-Aswani wrote eloquently in the Cairo paper Al-Dastour that the regime's "martyrs" outnumber all the dead of Egypt's wars against Israel – victims of railway accidents, ferry sinkings, the collapse of city buildings, sickness, cancers and pesticide poisonings – all victims, as Aswani says, "of the corruption and abuse of power". Opening the Rafah border-crossing for wounded Palestinians – the Palestinian medical staff being pushed back into their Gaza prison once the bloodied survivors of air raids have been dumped on Egyptian territory – is not going to change the midden in which Egyptians themselves live.
وفي خضم كل ذلك، على المصريين التعايش مع المذابح اليومية التي تلحقها بهم بنيتهم التحتية المتآكلة (هي شابي ترجمتها الحرفية: متدهولة). في صحيفة الدستور وصف علاء الاسواني، ببلاغة، حال "شهداء" النظام الذين تخطى عددهم عدد الشهداء في الحرب مع اسرائيل – ضحايا الطرق، غرقى العبارة، انهيار المباني، المرض، السرطان، تسمم المبيدات – كل هؤلاء الضحايا، كما يقول الاسواني، هم "ضحايا الفساد وسوء استغلال السلطة". وفتح المعبر للجرحى الفلسطينيين – الفريق الطبي الفلسطيني تم دفعهم قسرا الى غزة التي اصبحت سجنا بمجرد القاء الجرحى داخل الاراضي المصرية – لن يغير شيئا من المهانة التي يعيشها المصريون انفسهم.
Sayed Hassan Nasrallah, the Hizbollah secretary general in Lebanon, felt able to call on Egyptians to "rise in their millions" to open the border with Gaza, but they will not do so. Ahmed Aboul Gheit, the feeble Egyptian Foreign Minister, could only taunt the Hizbollah leaders by accusing them of trying to provoke "an anarchy similar to the one they created in their own country."
شعر السيد حسن نصر الله الامين العام لحزب الله في لبنان بامكانية دعوة المصريين الى الانتفاض بالملايين لفتح الحدود مع غزة، لكنهم لن يفعلوا ذلك. احمد ابو الغيط، وزير الخارجية المصري الضعيف، لم يسعه إلا أن يوجه النقد لقيادات حزب الله واتهامهم بمحاولة خلق فوضى "كتلك التي خلقوها في بلادهم".
But he is well-protected. So is President Mubarak.
لكن ابو الغيط ينعم بالحماية، تماما كالرئيس مبارك.
Egypt's malaise is in many ways as dark as that of the Palestinians. Its impotence in the face of Gaza's suffering is a symbol of its own political sickness.
اكتئاب مصر لا يختلف في قتامته عن الاكتئاب الفلسطيني (والله ماما من كام يوم رجعت من برة وقالت لي باللفظ: البلد مكتئبة). وعجزها امام معاناة غزة ماهو الا رمز على مرضها السياسي.

رد احمد ماهر على ما اشيع حول انقسام داخل ستة ابريل

قبل ما انشر الرد، انا مش عايزة جليطة وتكبر وخنفان من توجهات سياسية وناشطين فشلوا في اللي نجح فيه مجموعة من الشباب وبدل ما الواحد يفرح بيهم يقوم يتنطط عليهم، ماحدش قال ان شباب ستة ابريل مسييسين ولا مفكرين ولا حد فيهم ماركس ولا حسن البنا ولا حد فيهم ادعى حاجة زي دي، بس هم شباب قرر يبقى ايجابي ويشارك انشالله حتى بتواجده عشان بلده تبقى احسن، والحقيقة انا سافرت معاهم في سراندو وشفت الاسلوب اللي بعض الناس اللي كانت موجودة بتتعامل معاهم بيه: انت يابني قاري ايه؟ انت يابني تصنيفك ايه؟ انت يابني ثقافتك ايه؟ وتسفيه وتغليس لحد ما مشيرة ردت على واحد فيهم وقالت له: انت ما تقعدش تجيبني في ندوات وترغي في ودني، انا عايزة اعمل حاجة، قول لي اعملي حاجة مفيدة وانا انزل من بيتي واروح اعملها

طيب ده سلوك المعارضة المصرية تجاه شباب قرر انه بدل ما يروح حفلة تامر حسني وللا يشرب بيرة في حفلة منير يعمل حاجة مفيدة للبلد، وعملوا نشاطات كتير يشكروا عليها، غير الاضراب بتاعهم اللي كان ناجح، ما اتأخروش في اي حاجة ولا في اي قضية

لما العيال دي يجيلهم دعوة من الخارجية الامريكية بوصفهم اهم وانشط واشطر..الخ، والله انا لو مكانهم وفي ظل التسفيه المتعمد والتربص الدائم المحيط بيا من المعارضة قبل الحكومة كنت ح اتلوح، خصوصا لما ابقى تلاتة وعشرين اربعة وعشرين سنة

لكن اللي حصل ان معظمهم ما اتلوحوش ولا حاجة، وقالوا احنا مش بنتعامل مع حكومات! يعني الكلام بتاع: انت يابني قاري ايه؟ وفاهم ايه؟ وتنظيمك ايه؟ وكادرك ايه؟ وكل القرف ده مالوش اي لازمة ولا له محل من الاعراب، ومش كل فاشل يستكبر ان غيره ينجح في حاجة، ولو المعارضة المصرية مخلصة فعلا المفروض تتعامل معاهم باحترام اكتر من كده وتعترف بان الحركة نجحت في اللي هم فشلوا فيه وتنسق معاهم، بدل ما تسيبهم لقمة للي يسوى واللي ما يسواش والنهاردة هم صبروا وجم على نفسهم وما انبهروش بالدعوة ماحدش عارف لما يفيض بيهم الكيل ح يعملوا ايه؟ انكت منهم وراح يشحت من الامريكان

وفي كلام احمد ماهر ابلغ رد:

مفيش اساسا انقسام ده كله حوار و عنوان مثير كعادة فاروق الجمل اللى بيحب يحور فى الكلام عموما مش هاطول عليكى يا نواره الحركه زى ما انتى قولتى مش حكر على حد الحركه اتكونت من الشباب اللى دعى لاضراب 6 ابريل و حب يكمل مش اللى قال انا حرمت و توبت و بطلت سياسه و حطينا مبادىء و اهداف و كمان لينا هيكل و مسئولين و حوارت كتير مش مكانها على النت اساسا و الجديد بقى يا نواره ان معظم الاعضاء الجداد دلوقتى ماشاركوش فى الدعوه للاضراب و فيه اعضاء ماعندهومش نت اساسا.. ولا كمبيوترتقوليلى ازاى .. اقولك هاحكيلك لما اشوفك .. اصل اكيد هاشوفك فى يوم من الايام المهم ان فيه ناس دعوا للاضراب.. و الجروب اتعمل و حصل اللى حصل فى 6 ابريل فيه ناس كملت فى فكرة تكوين حركه شبابيه مستقله تهدف للتغيير السلمى و ناس اتمسكت بالصدفه و خارجين عاملين فيها مناضلين بالاسم و ناس بطلوا و حرموا و تابوا و ناس مقتنعين بالفكره و مصممين على الانتشار و التوعيه المستمره وسط الناس فى الشارع بهدوووء .. و هدفها فى الاخر هو التغيير زى ما كلنا عايزين ووسائلهم متعدده و مبتكره بعضهم ليه بعض الخبره السياسيه من 2005 و بعضهم مدونين .. و الاغلبيه منهم هما اللى شاركوا لاول مره فى حياتهم فى حدث سياسى يوم 6 ابريل او فى الدعوه ليه يعنى اللى دعى للاضراب يشكر و زى الفل لكن عضو الحركه هو اللى كمل شغل بعدهاو عضو الحركه هو اللى بيفكر مع باقى اخواته و يناقش و ياخد دور و ينزل ينفذ مش اللى يقعد يتمنظر على الناس و يقول انا اتسجنت كام يوم فى اضراب 6 ابريل و هو اساسا بطيخه و اغلبية الاعضاء رفضوا المشاركه فى مؤتمر منظماه الخارجيه الامريكيه .. و زى ما هايفيدوا .. برضه هايستفادوا اغلبية الاعضاء اتناقشوا على الملأ و رفضوا يبقى اللى مصمم يروح مش تبع الحركه و اللى فرحان بالاضواء و امريكا و السبوبه يتحمل هو النتيجه يعنى هو يروح و يتظبط و احنا هنا نشيل مسئوليته ايه رايك؟؟

------------

انتهى رد احمد ماهر

انا عايزة بس اقول حاجة، اللي يعارض حكومته يبقى عيب عليه يروح يتمسح وياخد دعم من حكومات تانية حتى لو حكومة الكونغو

واللي بيروح امريكا يستنجد بيها على مبارك يبقى ايه الفرق بينه وبين الجلبي واياد علاوي؟ وانا الحقيقة مش ح استجيب للارهاب الفكري اللي بيمارسه البعض لمجرد ان الواحد بيوصف الامور وبيسمي الاشياء بمسمياتها: دي اسمها خيانة، مالهاش اسم تاني، انت رايح تستجلب قوة خارجية، سواء بقى بالسلم وللا الحرب، على بلدك

حاجة كمان، مبارك بيتعامل مع الادارة الامريكية، والحقيقة هو له صفة وله عذر كمان انه يتعامل مع الادارة الامريكية، بس مبارك قاعد في الحكم اساسا بسبب الادارة الامريكية، ولو علاقة اي معارض باي شيء حكومي امريكي شبه علاقة مبارك تبقى الروس اتساوت في النقطة دي ونبتدي المقارنة بقى ما بينه وبين مبارك في اي حاجة تانية غير ان مبارك قاعد على قلب شعبه بغير رغبتهم بسبب دعم الادارة الامريكية، لان اللي رايح يقول لامريكا هاتيني بدل مبارك ما يصحش يعيب على مبارك تزوير الانتخابات وفرض نفسه على شعب مش عايزه لانه هو بيعمل نفس الحكاية، ولو المنافسة وصلت للنقطة دي بصراحة يبقى مبارك يكسب

على الاقل اخدنا عليه واخد علينا وعرفنا طبع بعض، وايه الاكل اللي بيحبه وايه الاكل اللي بيكرهه، وبينام الساعة كام الضهر

احنا مش ح نقعد نغير في وكلاء الادارة الامريكية هنا..هي مش غية يعني

ووالنبي بلاش الكلام بتاع سعد زغلول ومصطفى كامل ده عشان انا باتنقط، خللي عندنا كرامة بقى، واقع الامر ان مافيش احتلال امريكي في مصر، احنا ليه مصممين نتعامل مع امريكا على انها حكومة الانتداب؟ الناس نفسهم ما قالوش كده، ده ايه تلقيح الجتت ده؟

اتفرجوا يا بتوع السلام..يا ملوك الطوائف

نؤسف نؤسف نؤسف يا حضرات عسر هضمي
الامن المصري هو اللي قبض على العناصر بمساعدة استخبارات صديقة
لا مؤاخذت. وبكده بقت سينا رجعت قسم لينا ومصر اليوم، مصر اليوم مصر المخبر ابو جلابية وبالطو وجرنال مخروم. انا كنت فاهمة غلط والله

الصحف الاسرائيلية بتقول انها قبضت على ناس في سيناء بمساعدة اجهزة استخباراتية صديقة! وبتقول ان العناصر دي تنتمي الى حزب الله وكانت ناوية تعمل عمليات في سيناء!
بصرف النظر عن عدم منطقية التهمة، يعني حزب الله الاقرب يعمل عمليات في فلسطين ايه اللي يسفره سيناء عشان يعمل فيها عمليات؟
مش ده المهم ولا ده اللي ازعجني في الخبر
اللي ازعجني ان سينا اللي رجعت كاملة لينا ومصر اليووووووووووم تشك تشك تشك تشك مصر اليوم في عيد هياااااااا مصر اليوم في عيد ..الله...مصر اليوم في عييييييييييييييييييييييييييييييييييييييييييييييييييييييييييييييد
سينا دهين بقى بتتحرك فيها اجهزة استخبارات دول "صديقة" و"مجاورة" واسم الله على مقامها بتقبض على ناس وتعتقل ناس وتحقق مع ناس واحنا كومودينو في القعدة
يعني بفرض ان دي خلية ارهابية من حزب الله الارهابي الشيعي الشيوعي الشائعي الوحش
المفروض مين اللي يتعقبه ومين اللي يقبض عليه ومين اللي يحقق معاه؟
مش احنا برضه؟ مش دي ارضنا اللي رجعت لنا؟ مش المفروض انها رجعت لنا وبقت بتاعتنا؟ وللا دي منطقة محايدة اي حد يدخل فيها ويدور فيها ويقبض فيها على ناس؟
المواطنين اللي اتقبض عليهم دول ايه؟ مصريين؟ والمصريين اسرائيل تقبض عليهم ليه؟
لبنانيين؟ لبنانيين على ارض مصرية المفروض برضه مصر اللي تقبض عليهم اسرائيل تقبض عليهم ليه؟
فلسطينيين؟ مصر برضه اللي تقبض عليهم اسرائيل ايه دخلها تدخل ارضنا وتقبض على ناس؟ دول لو هم نفسهم اسرائيليين ايه دخل اسرائيل تقبض عليهم على ارضنا؟
ولا قالوا لنا مين دول، ولا جنسيتهم ايه، ولا كانوا ناويين يعملوا ايه، وايه طبيعة العمليات اللي عايزين يعملوها في سينا؟ هي دي مش بلدنا؟
وايه حكاية حزب الله عايز يعمل عملية في سيناء؟ وللا ده توطئة لحاجة معينة؟
يعني لما الفلسطينيين الجعانين زقوا الجدار ودخلوا من الجوع والحصار والمرض قلنا السيادة المصرية
امال عمل استخبارات في بلدنا ده ايه؟ طيب حتى لو الاستخبارات الاسرائيلية وصلت لنتائج المفروض تبلغنا واحنا اللي نقبض عليهم...مش احنا تبقى شغلتنا "استخبارات صديقة" على ارضنا
بقينا صديقة على ارضنا
اتفووووووووووووووو

على رأي جلال امين: ماذا حدث للمصريين

ما الازمة الاقتصادية على كل الناس زي ماهي علينا يعني، واحنا احسن من غيرنا كتير بموجب الحكمة الشهيرة اللي قالها الشاعر الشعبي: الفقر حشمة
وعادة يعني اللي في القاع مش ممكن يقع
ايه ده بقى؟ يعني ده مش اول مجنون يعمل حركات هيستيرية بالطريقة دي
قبل كده واحد رمى نفسه في النيل عشان مش عارف يجيب لبس المدرسة لعياله، واحد تاني طبخ مكرونة لعياله بالسم واكلها معاهم عشان يموتوا ويرتاحوا من الفقر، طب يا عم ما انت لاقي مكرونة احمد ربنا فيه ناس بتاكل من الزبالة، واحد تاني قتل عياله قدام مراته عشان مش لاقي يأكلهم، واحد انتحر عشان خسر فلوسه في البورصة
وده بقى اللي ولع في الاسرة كلها
ايه اللي حصل لنا احنا اتجننا وللا ايه؟ يعني ده احنا مشهورين بحمد ربنا وشكره على اي حاجة والحمد لله الذي لا يحمد على مكروه سواه وكده يعني. ايه اللي حصل لنا؟ ليه كترت ما بينا ردود الافعال الهيستيرية كده، وليه كلها منصبة في تدمير الذات بس...بس.
من كام يوم واحد صاحبي بيقول لي: احنا مجتمع يغلب عليه الشر. زعلت بصراحة ما باحبش حد يتكلم علينا كده، ثم انا شايفة الناس طيبة يعني ماحدش وحش ولا حاجة، يعني اوحش ناس في الدنيا قابلتهم في حياتي غلابة برضه، انا قابلت ناس وحشة بالتصنيف المصري بس بالتصنيف العالمي وفي السياق اللي هم فيه ماهماش ناس وحشة ولا حاجة دول غلابة، قمت كلمت مالك وقلت له احنا ناس وحشة يا مالك؟
قال لي احنا مش ناس وحشة احنا ناس طيبة بس اللي حوالينا بيخلينا ناس وحشة، قلت له بس انا مش شايفة ناس وحشة قال لي عشان ما تعاملتيش في الفلوس واكل العيش، الحاجات دي بتطلع من الناس الحاجات الوحشة غصب عنهم بس هم مش وحشين.
طب الفلوس واكل العيش تخليك تدمر اللي حواليك عشان انت تكسب، لكن ايه الاتجاه الانتحاري اللي بقى عندنا ده؟ تمشي في الشارع الناس ترمي نفسها قدام العربية، انا والله باعدي الناس في كل فرصة باقصى ما استطيع عشان من وانا صغيرة ماما قالت لي اللي ماشي على رجليه اهم من اللي راكب العربية والراجل اللي علمني السواقة قال لي لو ح تختاري انت اللي تموتي وللا اللي ماشي في الشارع موتي انت عشان تخشي الجنة احسن ما تقتلي واحد وتخشي النار :)، لا بالصلاة ع النبي انا ربنا بيوعدني بشوية ناس يعني زي الفل، ويقولوا المصريين اشرار؟ بس ان اللي واقف على الرصيف يتعمد انه يستناك لحد ما تمشي وتدوس بنزين وبعدين يروح رامي نفسه قدامك قال يعني بيعدي يبقى ده اسمه ايه؟
واحد خسر فلوس، او مش لاقي فلوس يدخل عياله مدرسة، او مش لاقي يا كل يا اخي اعمل مقلب في حد، اسرق حد، رفع حد بمطواة، انشل في الاتوبيس، اسرق، اسرررررررررق، انشالله تسرق بنك يا اخي، انشالله تقتل الراجل الغني وتاخد فلوسه، انشالله تسرق صندوق فلوس الجامع، متهيالي دي الحاجات اللي بتخطر على بال واحد ح يموت على الفلوس، مش عايز تبقى مجرم، او خايب ومش عارف تبقى مجرم، ارضى باللي قسمه ربنا زي ما احنا متعودين بقالنا سبعتلاف سنة، بلاش انصب على حد وبيع شقتك لاكتر من مالك مثلا وسافر برة البلد، انشالله تشحت في الشارع، استلف من حد واهرب بالفلوس، اقول لك، اتكل على الله واشتغل رقاصة، اقول لك ايه؟ يا اخي انشالله تتجار بمراتك يا اخي، انما تموت نفسك وعيالك ليه؟ وليه دي بقت اول حاجة تخطر على بال الناس؟

لا اخترناه ولا بايعناه نجح ازاي؟ سبحان الله

عرفت من الجايكو النهاردة ان النهاردة عيد ميلاد حكم مبارك الـ27 كل سنة وانتوا طيبين
طب وربنا احنا ناس زي الفل
ناس زي الفل
طب وربنا ما باهرج
على راي مالكوم اكس الشعوب زي الافراد، تخيل فرد كان عايش عيشة ضنك وفضل يجاهد ويعافر عشان يخرج منها، وبعدين حصلت له حاجة حسسته انه الحمد لله ربنا فرجها عليه وخرج من الغلب والنكد والضنك: حتة الارض اللي كانت مسروقة منه المحكمة رجعتها له واستلف عشان يبني البيت وجاب احسن مقاول يبني البيت، والمقاول بيبني على اقل من مهله، وصاحب البيت فضل يا قلب امه عنده امل، ويستحمل وعنده امل، وصابر وعنده امل، ورابط الحزام وعنده امل، واذ فجأتن البيت اتهد على راسه، بعد ما كان قعد يبني فيه مدة طويلة، لا والمقاول عمال يوعده ان البيت ده متين متين...ماتين ولا عنب زيه. بعد ما البيت اتهد على راسه ولسة جاي يقول: بقى هو ده اللي ماتين ولا عنب زيه؟ راحوا شاخطين فيه: شششش لا وقت للدموع...انت ح تقعد تعيط؟ قوم يا راجل قوم البيت اتهد نبنيه تاني، وفضل يا قلب امه يشتغل ويحط كل فلوسه في بنى البيت كله وهو اللي يبنيه، يعني يشتغل الصبح عشان يكلف بنى البيت ويشتغل بعد الضهر عشان يبني البيت بنفسه، يوفر يعني فلوس الصنايعية ويضمن انه يبني بنفسه البيت عشان ما يتهدش تاني وهو عمال يبني يبني، واول ما علي بالدور الاولاني اذ بيه يفوجأ ان البيت اتباع من وراه لعيلة الدهاشنة عدوينه اللي كانوا عمالين يقولوا له جتك خيبة مش ح تعرف تبني البيت، واساسا سارقين منه بيت تاني. وبعدين بعد ما بنى البيت بفلوسه وجهده قعد فيه بالايجار وبيدفع الايجار لعيلة الدهاشنة وعمالين يذلوا فيه ويقولوا له احمد ربنا اننا طلع عندنا اصل وسايبينك قاعد فيه، لا والبجح اللي باع البيت من وراه يقول له مش انا اتوسطت لك عشان تقعد فيه بالايجار؟ ده بدل ما تشكرني؟ وكل سنة الدهاشنة يعلوا الايجار، ويضحكوا عليه، ويقولوا له يا عبيط ده في مصلحتك، شوية كده ونرجع الملكية تاني...يعني ح ترجع يا عويس؟ ح ترجع امال...وانا برضه ابيعك؟ وبعدين قاعد يا قلب امه يشتغل صبح وبعد الضهر عشان كل يوم الايجار يزيد، وفوق البيعة لقى المية مقطوعة والمجاري طافحة، والسقف بيخر، وكل حتة في البيت عمالة تتهد حتة حتة، مع انه كان بانيه بنفسه يعني عشان يتأكد انه ما يقعش زي المرة اللي فاتت
كلللللللللللللللللللللل ده وهو مصمصم يفضل قاعد في البيت، وما يسيبهوش، ولما ييجي عيل من عياله يزهق ويقول له طب انا بقى اروح اشوف لي سكنة في حتة تانية وهو بيعدي الشارع عربية تطسه ويطلع الحق على ابنه ويدفع كمان هو غرامة، ابوه طبعا العيل المات.
تصوروا الراجل ده لسة قاعد في البيت، وبيضحك، وبيشتغل وبيصلي وبيصوم رمضان مع ان اودة النوم وقعت على مراته في رمضان اللي فات والمطبخ ولع بالتلاجة اللي هو لسة جايبها جديد، اه ماهو لسة بيجيب جديد بعد كل اللي حصل له ده، والصالة ولعت بكل العفش اللي سابهوله المرحوم جده وهو لسة بيرمضن وبيعيد وبيضحك وبيشتغل وبيصلي وبيصوم
يبقى الراجل ده ايه؟
يبقى الراجل ده البعيد ما عندوش دم

مصر: القائد الأعلى للقوات العربية

صورة من مذكرات الجمسي
مالحقناش احنا مصر في عزها ايام ما كانت القائد الأعلى للقوات العربية اللي شاركت في حرب اكتوبر على التلات جبهات: مصر - سوريا - الاردن
هي اللي حددت الجبهات دي
وهي اللي وزعت ادوار الدعم على الدول الاتية:
العراق/ السعودية/ الكويت/ ليبيا/ الجزائر/ المغرب/ السودان
وتقول يمين يبقى يمين وتقول شمال يبقى شمال وما حدش يقدر يفلفص
لحد كامب ديفيد
من ساعتها واحنا دلاديل
بنروح نزرع قطن في الكونغو هئ هئ هئ هئ

فين العز ده؟ ولا نحلم بيه دلوقت...وماحدش عايز يرحم عزيز قوم ذل
---
ملحوزة بس: طبعا ده كان الاتفاق لكن الجبهة الاردنية ما اتفتحتش للقتال
ههههههههههه طبعا يعني حسين بقى

مصر وحشتني

هي مصر راحت فين؟ وح ترجع امتى؟ ما قالتش؟ طب ماحدش سأل عليها؟ يمكن تكون تاهت في السكة، او راحت عليها نومة، او عجبتها القعدة بعيد عنا..لا مش معقول اكيد وحشناها
وهي كمان وحشتني قوي...
قوي
مين اللي خدها مني؟

الذل

بتذلونا ليه؟ السؤال ده بيطرح نفسه ارضا، سألته في بوست 5 مايو ايام العلاوة ومصطفى سأله في تعليقه على موضوع اسطبل عنتر وناس كتير بتسأله
بتذلونا ليه؟
الذل هو اللي بيكسر نفسك ويخليك ترضى بقليلك
الذل هو اللي بيخليك جبان وخايف حتى من نفسك
الذل هو اللي بيخليك تتوقع الأسوأ من بكرة دايما عشان كده مش عايز النهاردة يخلص ابدا
الذل هو اللي بيخليك ندل وسلبي ومش قادر تاخد خطوة تصلح بيها امورك
الذل هو اللي بيكسر مناخيرك ويحسسك انك حشرة وتتصرف على انك حشرة
الذل هو اللي بيخليك كلب تلحس رجلين سيدك اللي بيذلك مهما يعمل فيك
الذل هو اللي بيخليك اول ما تقدر على واحد اضعف منك ما ترحموش حتى لو كان ابنك عشان نفسك تتقمص شخصية اللي بيذلك بس على حد ضعيف
الذل هو اللي بيخليك تكره نفسك وتحتقرها ولو كرهت نفسك يبقى كرهت كل البشر وتكره اكتر اهلك وناسك وما تحبش غير اللي بيذلك ونفسك يرضى عنك عشان يرحمك
الذل لما بيطول بيك بيحسسك انك انت السبب في اللي بيحصل لك وانك ما تستاهلش احسن من كده
الذل بيخليك تكسر مقاديف اي حد يحاول يشيل عنك الذل لانه بيفكرك بانك مقصر وانت مش مقصر ولا حاجة انت تعبان...انت مذلول
الذل بيخليك قاسي
الذل بيخليك غلاوي ومتلاعب وما تقدرش تواجه
الذل بيخليك وضيع
الذل بيخليك دون
الذل بيخليك واطي
الذل بيخليك تقول ياللا نفسي
خصوصا لما تبقى مش عارف انت بتتذل ليه؟
خصوصا لما اللي بيذلك هو اللي مفروض عليه يعزك
لما الاحتلال بيذل المواطنين الاصليين بيبقوا فاهمين هم بيتعمل فيهم كده ليه وده اللي بيخليهم يتحدوا المحتل بكرامتهم
لكن لما تتذل من ناسك...من حكومتك...ومن غير سبب، وانت ما عملتش حاجة
بتبقى حيران: ياترى الغلط فيا؟ اكيد الغلط فيا...طب هو انا عملت ايه؟ هو ربنا غضبان عليا؟ طب ليه؟ ويمكن تكفر ويمكن تكفر غيرك وفي الحالتين انت كافر
الذل كافر
وعلى طول تبقى حاسس بانك عملت ذنب مش قادر تحط ايدك عليه
الذل هو اللي بيخليك عدواني
الذل بيخليك حاسس انك ضعيف وان اللي بيذلك قوي...مع انه انسان زيه زيك وفيه من ضعفك بس انت ما جربتش تواجهه لانك خايف منه
مش ممكن الذل يجتمع من الانسانية
يا اما انسان يا اما ذليل ما ينفعش الاتنين مع بعض
انا انسان وانت انسان وماحدش بيموت ناقص عمر والارزاق على الله
الحياة بالذل مالهاش اي طعم الموت اهون
الموت احلى
الموت اكرم
موت بانابيب الغاز وما تتذلش
موت زي ما تموت...بس تبقى واقف على رجليك
ما تتذلش يعني: ما تستقواش على الضعيف اللي زيك...وما تسكتش على مذلة الاقوى منك
انت انسان حر
"إن فرعون علا في الأرض وجعل أهلها شيعا يستضعف طائفة منهم يذبح أبناءهم ويستحيي نساءهم، إنه كان من المفسدين. ونريد أن نمن على الذين استضعفوا في الأرض ونجعلهم أئمة ونجعلهم الوارثين. ونمكن لهم في الأرض ونري فرعون وهامان وجنودهما منهم ما كانوا يحذرون."
المستضعفون هم من اختارهم الله...فكن مع المختارين

عيدكم مبارك غصب عن عين ابوكوا

بمناسبة حلول عيد الفطر الماسي، تعلن كتائب الشهيد ماس كهربائي، الجناح العسكري لحركة مصر بتولع بينا المحزوءة عن تقديم هدايا علبة كحك وجركن جاز وسخ لكل مواطن
عيدكم مبارك غصب عن عين ابوكوا

هو احنا مش ح نعمل حاجة

اي حاجة انشالله اضراب تاني وللا اي حاجة، بس ما ييجيش واحد يقول نعمل اضراب اول يوم العيد
احنا قبل كده عملنا حاجات كويسة، مالنا؟ مالنا كده عاملين زي الملاكم اللي اخد بونيات كتير ورا بعض في وشه وعمال يطوح

اما ناس هايفة صحيح

بقى عشان اربعة ماتوا بوش يعلن تكساس منطقة كوارث؟ طب ده احنا بالصلاة ع النبي مات لنا الف في البحر الاحمر، وزي الفل لا منطقة كوارث ولا حاجة، مات لنا تقريبا قدهم في الدويقة، وبسم الله ما شاء الله كل حاجة ماشية تمام التمام، لا منطقة كوارث ولا حاجة، اتقلب لنا كام قطر مات فيهم اعداد بسيطة كده ميايتين تلاتة كده وللا حاجة، وبرضه عادي، انا ما احبش الناس اللي تيجي ع الهايفة وتتصدر، هم بقى كل اعصار ح يعملوا لنا الوش ده؟ وبعدين حرام عليهم هم كده بيخضوا الناس، ليه بقى؟ لان الاحتياطات الزيادة دي بتوهم الواحد، انما لو اتعاملت عادي، الصخور تتهد عادي، الناس تحت الانقاض عادي، يتصلوا يصوتوا من تحت عادي، يموتوا تحت عادي، فيه تهديد بصخور تانية ح تتهد عادي، كده انت بتهدي الناس وبتحسسهم انهم عادي مافيش حاجة، انما توهم الناس وتقول لهم منطقة كوارث وتحزنهم على نفسهم؟ دول ممكن ما يزعلوش من الحادثة ويحزنوا على نفسهم من الرغي والندب الكتير...طب ليه كده طه؟
ناس قليل العقل صحيح
احنا الحمد لله...عندنا قيادات رشيدة

بعد الصاق التهمة باهالي الدويقة...الان يلصقون التهمة بالله سبحانه

المهم ان الحكومة مش غلطانة وخلاص، يعني يا اما سكان الدويقة هم اللي سابوا القصور والفلل وراحوا عاشوا بالعند في الحكومة في العشوائيات، خصوصا ان القدر لم يمهل اهالي الدويقة زي ما قال نظيف، ومن حظهم الاسود انهم يادوبك رجعوا من مارينا حصلت لهم المصيبة دي، وكله بسببهم لانهم جرابيع ومعفنين ومصممين يسيبوا النضافة لانهم مدمنين عشوائيات وبيشموا زبالة
طيب مين بقى اللي بيدير التنظيم التدميري لاهالي الدويقة الاشرار اللي باتوا في الدويقة عشان يرموا بلاهم على الحكومة البريئة؟
استغفر الله العظيم يارب، اقول ايه بس يا ربي
معلش انا باحب الدكتور سليم العوا وشايفة انه لازم يراجع نفسه في الكلام ده:
وأضاف أن الله يغضب علي المستضعفين في الارض كما حدث لأهالي الدويقة لأنهم استكانوا وسكتوا عن الحق وتولوا الطواغيت وقوما غضب الله عليهم وراحوا يصوتون لهم في الانتخابات ويهتفون بحياتهم.
يعني يا دكتور سليم والنبي الله يكرمك ويخليك ويهدينا ويهديك، ابوس ايدك يعني الكلام ده يوجع القلب حرام عليكوا
انتوا بتكرهوا الناس في ربنا ليه؟ هو موت وخراب ديار ومقابر جماعية وكمان تقولوا لهم ربنا غضبان عليكوا
ده لما الرسول قال للصحابة انتوا بتضحكوا على ايه لو تعلمون ما اعلم لبكيتم كثيرا ولضحكتم قليلا، قام ربنا ارسل اليه جبريل يقول له: يا محمد ان ربك يقرؤك السلام ويقول لك: لم تقنط عبادي مني؟
ما قالهمش ربنا غضبان عليكوا قال لهم ايه لزوم الضحك الكتير، بس
انت عارف الناس دي اللي مش بتفك الخط وبتنتخب بتوع الحزب الوطني بوجبة فيها ربع فرخة ومكرونة فشامنة، هم كمان اللي بيمارسوا البلطجة على المتظاهرين برضه بربع فرخة وخرطة مكرونة فشامنة
وساعات بساندوتش فينو فيه صباعين كفتة
يا دكتور سليم الله يعزك، انت دقت الجوع؟ انت عرفت يعني ايه تنام طول الليل على غازات وابور الجاز عشان ما عندكش بطانية في عز الشتا؟ انت عرفت يعني ايه واحدة تبيع نفسها عشان طبق عسل اسود ونص رغيف؟ (الواقعة دي حصلت بجد) انت عرفت يعني ايه واحدة تبيع ضناها عشان تاكل؟
لما الحزب الوطني كل دورة انتخابية يوزع عليهم بطاطين ووجبات عشان ينتخبوه، تفتكر ح يكون رد فعلهم انهم يعتصموا ويطلعوا يقولوا: يسقط يسقط حسني مبارك؟ تفتكر اصلا هم عارفين مين رئيس الجمهورية؟ والله العظيم فيه ناس في عزبة خير الله (واللي هي حالها احسن من الدويقة كتير) فاكرة ان رئيس الجمهورية انور السادات
انا بقى اللي باسألك يا دكتور سليم، وربنا يعلم احترامي ليك قد ايه، انت كنت فين من الناس دي؟
مين نزل لهم ووعاهم وللا عبرهم؟ مين اهتم يعلمهم وللا يأكلهم وللا يعرفهم حتى حقوقهم؟ الناس دي ما عندهاش احساس ان لها حقوق، دول حاسين انهم زوايد بشرية، هم حاسين بنفسهم كده مش بس الحكومة ولا حضرتك، ده احساسهم هم كمان، جربت يا دكتور سليم تنزل لهم من غير وجبات ولا بطاطين حتى وتقول لهم: انت انسان، انت لك كرامة، ولك حقوق، انت مسروق، انت مواطن والبلد دي بلدك، انزل اطلب حقوقك
ما فكرتش تقول لهم مقولة ابو ذر الغفاري: اذا جاع احد المسلمين فلا مال لاحد؟
ما فكرتش تنزل تقول لهم: خدوا حقكوا، الناس اللي مش بتفتكركوا غير كل دورة انتخابية هم اللي سارقين فلوسكوا؟ هم ايش عرفهم بالكلام ده اذا كان الناس المحترمة اللي زي حضرتك مش معبرينهم اصلا؟
سايبهم يا دكتور سليم ويوم ما يموتوا تقول ربنا غضبان عليهم؟
وراضي عن مين يا دكتور؟ لما يغضب على ناس بتسف التراب وراضية، تاكل من الزبالة وراضية، تنضرب الجزمة وراضية، تبيع عيالها وراضية، تبيع اعضاءها وراضية، عيالهم يلعبوا بالعقارب وراضية، جلدهم بيشقق ويتجرح من كتر البرد في الشتا وراضية، الصراصير تطلع تاكلهم في عز الحر وراضية، المجاري محاوطاهم من كل ناحية وراضية، جركن المية الملوثة بيشتروه باربعة جنيه وراضية، شايفين اللي رايح بالعربية ستة متر واللي جاي مش قادر يمشي من كتر التخن والشحم المتكوم على جتته ومش باصين لهم وراضين
وراضين يا دكتور
وبيقولوا الحمد لله
انا سمعتهم بوداني بيقولوا الحمد لله
وبيقولوا احنا احسن من غيرنا كتير
مش عارفة انا غيرهم ده شكله ايه
لما ربنا يغضب على دول..امال يرضى عن مين؟
يرضى عن اللي قاعدين في التكييف بياكلوا في قتة محلولة ومش حاسين بغيرهم؟
غيرهم اللي بيدوق الذل والنار والمرار
وفي الاخر يدفنوا بالحيا تحت الصخور ويترش عليهم فينيك عشان احنا قرفانين منهم، قرفانين منهم احياء واموات
وبرضه راضيين
لا وايه، وكمان عايز تفهمهم ان بعد ماهم راضيين باللي ربنا كتبه عليهم ده كله ربنا كمان هو اللي مش راضي
انتوا عايزين تكفروهم؟ مش باقي لهم غير ربنا، مالهمش غيره، عايزين تاخدوا منهم ربنا ليه؟ بتكفروهم كمان ليه؟ يعني لا دنيا ولا اخرة؟ وللا هو المهم ان الحكومة مش غلطانة وخلاص؟
يعني الغلط يا منهم يا من غضب ربنا، منكوا لربنا بقى اسطفلوا معاه وطلعوا الحكومة من دماغكوا
مش كده؟
ما كانش والله العشم

جدر البطاطا اللي كان السبب يا ضنايا

حال مصر بيفكرني بفيلم هو فيه ايه لما العصابة كانوا ح يرموا محمد فؤاد واحمد ادم في البحر فقالوا لهم:
يا باشا احنا مش بتوع الجمرة خبيثة احنا نطينا في المركب عشان نهرب من جثة القتيل
- قتيل؟ وكمان قتالين قتلا؟
- لا يا باشا احنا وقعنا على جثة القتيل لما جوز عزيزة دخل لقانا عندها في الشقة بالملابس الداخلية
- وكمان هلاسين وبتوع نسوان؟
- لا يا باشا احنا نطينا في شقة عزيزة عشان كنا مع حرامية الغسيل
- وكمان حرامية غسيل
- لا احنا اللي زنقنا مع حرامية الغسيل الواد بتاع البانجو
- وتجار مخدرات؟
- لا احنا رحنا مع تاجر البانجو بعد خناقتنا مع طلبان..احنا وشنا منك في التراب يا باشا...ارمينا في البحر
من تلاتين سنة قررنا انه "نو مور وور" وعليه عملنا اتفاقية سلام مع اسرائيل تشترط علينا نغير نظامنا الاقتصادي ونفتح اقتصاديات السوق والبنك الدولي هو اللي يشرف علينا زي عبد السلام النابلسي وامريكا هي اللي تسلخنا وتدرب قواتنا المسلخة، ووعدونا بالرخاء وشقة ع النيل وعربية تاكسي لكل مواطن في مقابل اننا نبقى في حالنا ويا نحلة لا تقرصيني ولا عايز عسل منك خصوصا ان العرب جرب واحنا اخدنا ايه من وراهم
وبناء عليه قرر البنك الدولي اننا لازم نخصخص، خصخص يا زكي قدرة، يخصخص زكي قدرة، افتح استثمارات يا زكي قدرة، يفتح زكي قدرة، اطرد الفلاحين من ارضهم يا زكي قدرة يطرد زكي قدرة، بيع يا زكي قدرة، يبيع زكي قدرة، افشخ العمال يا زكي قدرة يفشخ زكي قدرة، اعمل تسهيلات لرجال الاعمال يا زكي قدرة يسهل زكي قدرة، ما تضايقش المستثمرين بالضرايب وافحت المواطنين يا زكي قدرة، يفحت زكي قدرة، قرن في شارع جامعة الدول يا زكي قدرة، يأرييل زكي قدرة
لحد ما بقى الحال كده

لحد ما كل اقتصادنا وفلوسنا بقت في ايد رجال الاعمال ده غير انهم كمان في الحكومة
وبقى رجال الاعمال هم النواب وهم اعضاء مجلسي الشعب والشورى المحروق بجاز وسخ وبقوا يقوموا بواجباتهم تجاه الناخبين كده

ايه ده؟ ده ولا لبنان ايام حرب تموز، بس الفرق ان اللي عمل فيهم كده اسرائيل، وانهم كانوا بيحاربوا وهم عارفين انهم بيحاربوا ماحدش ضحك عليهم وفهمهم انهم رايحين يضربوا بلانصات في السيرك، وانهم استحملوا لحد ما انتصروا، وان المواطن الاسير له سعر
احنا بيتعمل فينا كده ليه؟ ما احنا ما بنحاربش ولا حاجة، وعملنا سلام ووئام ونيام نيام، يموت لنا مدنيين وعساكر غلابة على الحدود، يبقى المسامح كريم، يموت لنا بمبوطي، عليه العوض ومنه العوض، اقفل المعبر يا زكي قدرة يقفل المعبر زكي قدرة
نو مور وور
no more war
Mai più guerra
مش عايز ولادي يموتوا
واحدة صاحبتي كلمتني النهاردة بتقول لي: بيموتوا الناس بكل اللي الرسول استعاذ منه: الغرق والحرق والهدم
لا لسة
لسة اللدغ
وفيه حاجة الرسول ما تعوذش منها
الموت من النقطة
يعني ما نبناش من معاهدة السلام غير تهميش دورنا وعدم ثقتنا في جيشنا اللي بقى دوره دلوقت ينزل الشارع المصري بدل ما ينزل الجبهة وبقينا في قعر المجتمع الدولي وفوق ده كله اقتصادنا خربان وجعانين والناس بررررررضه بتموت بنفس الاعداد والكميات والكيفيات اللي كانوا ح يموتوا بيها لو كانوا بيحاربوا
احنا بقينا في نعل شبشب المجتمع الدولي...والمنظر زي ما شفتوا ولو كنا عشنا التلاتين سنة اللي فاتوا تحت القصف ما كانش جرا لنا اللي جرا لنا
على الاقل كنا ح نبقى عارفين احنا بنموت ليه؟
بنموت ليه؟
ليه؟
لييييييييييييييييييييييييييييه؟ ايه السبب؟ مين السبب غير جدر البطاطا؟
جدر البطاطا اللي كان السبب يا ضنايا...واحنا اكلنا ايه وشربنا عليه مية؟
استغفر الله العظيم
البقاء لله في المشير ابو غزالة

مش عايزينك

من عند مواطن مصري