Tuesday 31 May 2011

الشرطة رجعت بكامل طاقتها وكفائتها وحمد الله على سلامتها وربنا ياخدنا احنا

أول قضية تعذيب بعد ثورة 25 يناير هنا
ودي بقى قضية وقعت عليها في ميدان التحرير، واحد راح يخلص توك توك اخوه من ايد ظابط كان طالب اتاوة راح الظابط ضاربه بالنار وملفق له تهم
القصة كاملة هنا
حمد الله ع السلامة يا ولاد الـ...
شرفتنا يا سيادة اللواء العيسوي يا بتاع: الشعب مش عايز اسقاط النظام، ده كان عايز اصلاحه بس
والحمد لله هو صلح لنا الداخلية بعد ما ضربناها، واخدها وش دوكو ورجعها لنا كأنها داخلية جديدة بورقها
امشي يا حاج عيسوي... امشي بدل ما تسمع لك كلمتين مالهمش لازمة من الشعب ده، ده شعب قليل الادب وانا عارفاه
خير؟ هو مفعول علقة 28 راح ولا ايه؟ هو احنا كل شوية حنضربكوا؟
مش قلت لكم مافيش اجماع وطني يبقى مافيش ثورة... ادي احنا رجعنا لحوادث التعذيب في الاقسام تاني، وكلها اسبوعين ونقف على سلم النقابة
لايموها بقى.. النظام رجع، لا مش حيرجع.. هو رجع خلاص
احنا بقى عايزين نعفق الشرط عفقة كويسة عشان مش كل شوية حترجع لنا زي القرش البراني
اسمعونا بقى يا اي حد في ام البلد دي
يا تجمدوا نشاط الداخلية دلوقت حالا لاعادة هيكلتها واحنا رقبتنا سدادة في اللجان الشعبية، وتعملوا فورا اشراف قضائي وحقوقي مستقل على الامن الوطني
يا نرجع لكم تاني.. بس ساعتها مش احنا اللي حنرجع.. الغلابة دول هم اللي حيرجعوا، ودول زعلهم وحش قوي... قوي يعني، صدقوني انتوا ما شفتوش زعلهم لحد دلوقت، وعمالين تخنقوا عليهم وتعملوا لهم ازمات اقتصادية ومرجعين لهم الشرطة بنفس طريقتها القديمة وفاكرين حتكسروا مناخيرهم، دول بعد ما شموا الكرامة لو جوعتوهم وعذبتوهم انا مش مسئولة عن ردود افعالهم
انسوا سلمية سلمية دي خاااااااااااااااالص
احنا قلنا لكم اسقاط النظام وما قلناش اسقاط الدولة... انتوا بالحماقات دي حتسقطوا الدولة
القوى السياسية دلوقت مدقوق اسفين ما بينهم ومش حيعرفوا يسيطروا على زعل الغلابة، وبتوع سلمية سلمية اتخبلوا في مخهم وفاكرين نفسهم هم اللي عملوا الثورة واللي بيعمل ائتلافات واللي مشغول في الانتخابات واللي بيتخانق على هيافات.. يعني برضه مش فاضيين للغلابة
وانتوا بتقرفوا الغلابة دوبل قال ايه.. ناصحين قوي، فاكرين ان ده حيكره الشارع في الثورة.. ابسلوتلي.. ده حيندم الشارع ان ثورته كانت سلمية
اسمعوني بقى انا ناصحة امينة... كخ كده.. كخ قوي.. والايام بينما، صحيح القوى السياسية حترجع سلم النقابة
بس القوى الشعبية رجعتها وحشة.. انتوا ما تحبوش حتى تسمعوا هم ممكن يعملوا ايه
الا هل بلغت؟ اللهم فاشهد

SOS

آخر نداء استغاثة:
الثورة = الإجماع الشعبي
لا إجماع شعبي = لا ثورة
ألا هل بلغت.. اللهم فاشهد

Monday 30 May 2011

حسام الحملاوي وريم ماجد غدا امام النيابة العسكرية

مطلوبين للتحقيق معاهم بكرة الساعة عشرة الصبح
هي في الحي العاشر بيقولوا
بس للاسف معاهم نبيل شرف الدين... ينفع نتضامن معاهم ونطالب بسلخ قرعة نبيل شرف الدين؟

شبكة رصد وشها اسود ومناخيرها بقت قد الكوز من كتر الكدب

انا قلت كده امتى؟ اولا ده مش الاكاونت بتاعي
ثانيا انا ما قلتش الكلام ده.. الشهادة لله صحبي صالح لم يكسب اي تعاطف من اي حد، واولهم انا، لإنه كداب، ثم انا ما باحبش خالد منتصر بس ما قلتش عليه الكلام ده، ومش شايفة اي حد متحامل على صبحي صالح غير لسان صبحي صالح
وبعدين بقىىىىىىىىىىىىىىى
وبعدين بقىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى
ايه القرف ده
طب لو سمحتوا بقى شير البوست ده على اوسع نطاق عشان شبكة رصف دي تبطل فشر

..روحوا..... لازم.. ابوس ايديكوا

لو سمحتوا روحوا، وابعتوا ناس محترمة لو سمحتوا، لو سمحتوا، لو سمحتوا، ما تبعتوش ناس حونينة من الاخر، ابعت حد يقول كل اللي في قلبه وقلب الناس 
ما تبعتش عيال بتتخض
ما تبعتش عيال معروف عنهم انهم بيسلكوا مصالح شخصية
ما تبعتش عيال قلبهم رهيف
روحوا ابوس ايديكم روحوا... احب على رجليكم روحوا، وحضروا نقط عليها اجماع وطني
ابوس ايديكم
ابوس ايديكم
مصر محتاجاكم يا ولاد
بالنسبة للمزايدات.. كده كده بيتزايد عليكم.. واصلا فيه ناس عايشة في حياتها عشان تزايد، انت رايح تخدم بلدك ولا رايح تاخد سوكسيه بما انه مسرح؟ انا لسه قبل ما امشي من على التويتر قلت لهم بعد كده كل واحد فيكم حيشكك في نسب نفسه عشان يطلع امه مش محترمة وابوه قرطاس بما انهم سلطة ابوية وعايز يزايد عليهم ويبقى ثوري
مالكوش دعوة بالناس دي، لو حد فيهم اتعرض لكم قولوا لهم نوارة اللي قالت لنا نروح واحنا وثقنا فيها وضحكت علينا طلعت عميلة الجيش ولحاسة بيادة... هاتوها فيا وانا اشيل.. بس ابوس ايديكم روحوا
مالكوش دعوة بيهم
لكم دعوة بمصر.. نقط سريعة ومختصرة وواضحة وعليها اجماع شعبي... وعيال حلوة ومخلصة وقلبها جامد اللي تروح، ومالهاش مصالح، تبقى مستبيعة على عمرها كده

Sunday 29 May 2011

حاضر

البيان ال59 للقوات المسلحة 
الله ينور
صح الكلام ده.. اقصد النصائح اللي بتقول للقوى السياسية بطلوا تشدوا شعر بعض واحترموا نفسكم
بس والنبي خلي اللواء ممدوح شاهين يبطل يقول الشعب صوت على شرعية القوات المسلحة، لإن ده كلام مش حلو، وكأن فيه 22 في المية مش مؤمنين بشرعية القوات المسلحة؟ القوات المسلحة شرعية بوصفها القوات المسلحة اللي بتحمي البلد ومافيش مواطن مصري واحد يعتقد في عدم شرعية وجودها، ايه الكلام ده؟ 
ثم ان الشعب صوت على التعديلات الدستورية... القوات المسلحة ما كانتش نازلة في استفتاء تسأل الشعب بتحبوني ولا بتكرهوني!
اللي بيكره القوات المسلحة المصري يحب مين؟ اسرائيل؟ 
واذا كان اللواء ممدوح شاهين قال هم صوتوا على شرعية ادارة المجلس العسكري لشئون البلاد... بعد اذنه يعني، حد يقول له ان مش مبارك هو اللي نزل الجيش.. اللي نزل الجيش هم الثوار لما يوم 28 قالوا: الشرطة بتضرب فينا عايزين الجيش يحمينا واحد اتنين الجيش المصري فين.. بس الاستفتاء كان على التعديلات الدستورية.. الاستفتاء كان على التعديلات الدستورية الاستفتاء كان على التعديلات الدستوري
يعني الشعب ما قالش للدين نعم... لإن الاتنين وعشرين في المية ما كانوش بيقولوا للدين لا
وما قالش للجيش نعم.. لان الاتنين وعشرين في المية ما كانوش بيقولوا للجيش لا
لا الدين ولا الجيش ولا العلم ولا النشيد الوطني ولا ميدان سفنكس كانوا نازلين في الورقة محل التصويت.. الورقة محل التصويت لها كان مكتوب فيها مواد دستورية.. مواد دستورية.. مواد دستورية
وسواء النتيجة لا او نعم في كل الاحوال المجلس كان حيقعد امال كان حيروح فين، لكن التصويت بنعم بيحدد قعاد المجلس لحين انتهاء الانتخابات في الموعد المنصوص عليه، لكن التصويت لو طلع بلا كان المجلس حيقعد لاجل غير مسمى لحد ما يحددوا موعد تاني للانتخابات.. يعني لو كانت النتيجة طلعت لا كنتوا حتسيبونا؟ طب ايه؟ كنا حنعمل ايه يعني؟ كنا حننتخب مجلس رئاسي؟ طب ما المجلس الرئاسي حيبقى بوجود المجلس العسكري برضه، ما هي هي
وبعدين ما تخلوش اللواء ممدوح شاهين يقول للناس: ما تقولوش عليها مظاهرة حاشدة.. عشان ما كانتش حاشدة، لو كانت عشرتلاف واحد كانت حتبقى حاشدة برضه، لما تبقى 200 واحد تبقى مش حاشدة
وما تخلوش اللواء الرويني يقول لنا: الشعب هو السبب في الانفلات الامني والشرطة قايمة بواجبها على اكمل وجه.. يعني نعمل ايه في الشعب؟ نقتله ولا نرميه ولا نهجره ولا نعمل فيه ايه بالظبط؟ الشعب هو الغلطان؟ طب مش الشعب ده اللي قال للمجلس العسكري نعم؟ يعني الشعب قال للمجلس العسكري نعم وهو منفلت وقليل الادب ومحترم وابن ناس وبيعمل وقيعة بس هو كويس
والنبي خلوا العصار وحجازي هم اللي يكلمونا... بعد اذنكم يعني
وعداكم العيب في البيان ده.. فعلا القوى السياسية لازم يبوسوا بعض ويتوحدوا تاني لإن اللي بيعملوه ده قلة ادب فعلا، وحينتهي بينا اننا نبقى شبه المشهد الاخير في فيلم العار
القوى السياسية لازم يبوسوا بعض.. لايموها بقى، كسفتونا الله يكسفكم.. كده المجلس العسكري خلقه حيضيق، وكمان الشعب حيبتدي يزهق منكم وهو كفاية اللي شافه في حياته بقى، ارحموه شوية
------
اه نسيت.. والنبي المسيحيين لازم يهدوا شوية ويبطلوا يخافوا ويتخضوا كده، عشان اجيب لكم من الاخر: الجيش مش اخوان
الجيش مش اخواااااااان
الجيش مش اخوااااااااااااااان.. وبالعكس، يمكن كمان مش بيحبهم قوي، هو بيعرف يتكلم معاهم عشان هم تنظيم هرمي زيهم، لكن مش متفق معاهم في حاجات كتير
وتربية المؤسسة العسكرية وعقيدتها مختلفة كتير عن الاخوان
المفروض ان الجيش مش مسيس، بس لو مصممين تقاربوا عقيدة الجيش مع فصيل سياسي فهم اقرب للناصريين والقوميين... مش الاخوان
اهدوا شوية.. المشير مش اخوان... وان شاء الله القوى السياسية الاخرى لو شدت حيلها تقدر تاخد مقاعد كويسة في البرلمان
-------
اه.. نسيت حاجة مهمة قوي.. ماحدش يزعل المسيحيين، اللي حيزعل المسيحيين حارميه من الشباك، هم مخضوضين وعايزين حد يطمنهم، وشافوا كتير في حياتهم، وبلعوا دخان كتير وبيكحوا تراب دلوقت بقى.. واولى الناس بالتمييز الايجابي في المرحلة دي هم المسيحيين والفقرا، عشان غلابة ما عملوش لحد حاجة والكل بييجي عليهم من غير سبب.. واللي حيضايقهم ربنا حينتقم منه ويجعله عبرة عشان تبقوا فاهمين، ومش حيكسب، والله العظيم
بدل ما تقعدوا تقولوا لنا الاستقرار الاستقرار الاستقرار وانتوا مش فاهمين معنى الكلمة، الاستقرار الحقيقي ان المسيحيين يطمنوا ويرتاحوا واعصابهم تهدا وما يحسوش ان فيه حاجة بتحاك ضدهم بليل، والاستقرار الحقيقي ان الفقرا ياخدوا حقهم والرعاية اللي يستحقوها وناخد من الحرامية ونديهم بدل ما تقعدوا تشتموا في الباعة الجائلين، والشرطة ما تتعرضلهمش تاني بقى، ومش كل ما تستفقروا عيل تمسكوه وتقولوا عليه بلطجي
احسن ويمين الله ربنا حيورينا كلنا ايام سودا.. الا الافترا على الغلابة، والمسيحيين والفقرا غلابة، وما اذوش حد في حاجة، ليه هم الحيطة المايلة دايما؟

الى قيادات الاخوان: انقذوا الجماعة.. وارحلوا

تحديث:
ربنا يسعد ايامك يا د. عصام العريان ويهدي الحال ويروق الجو وينور سكتك يا مصر
-----------
ييجي واحد يقول لي: وانت حارقة نفسك عليهم ليه يعني؟
ما احرقش نفسي ازاي؟ مش ولاد بلدي؟ وشفت شباب الاخوان بعيني وهم مخيطين من كل ناحية وعمالين يجروا ناحية القناصة وهم بيزكوا على رجلهم ويقولوا: الى الشهااااااادةةةة؟ وواحد سعودي حكى لي انه كان جاي مصر عشان معرض الكتاب يوم 28 لقى الناس بتثور قام قال لمامته انا قاعد بقى معاهم، وقعد معانا في التحرير وواحد اخواني بيزك وبيقول الى الشهادة وهو بيجري مسك ايده وقال له: يالا يا اخي الى الشهادة قال له: يا عم حل عني انا سعودي وكنت جاي اتفسح لقيتكم بتستشهدوا. 
:))))))
وفوق ده كله تنظيم سياسي قوي.. ما هواش اقوى التنظيمات بحيث يقدر ينفرد لوحده بالساحة السياسية، واهو يوم الجمعة اثبت ان لو القوى كلها اتكتلت ضده تقدر تعزله لو عايزة
وده مش حلو.. مش مبسوطة انا كده، لا غالب ولا مغلوب.. لا غالب ولا مغلوب يا مصريين، انا لا عايزة الاخوان ينفردوا بالساحة، ولا عايزاهم يتحاصروا، لا هم ولا اي فصيل سياسي تاني، من اقصى اليمين الى اقصى اليسار، افتكروا الست اللي احنا مش عارفين اسمها وكانت بتصرخ على الجزيرة: مصر محتاجاكم يا ولاد.. مصر محتاجاكم يا ولاد... ياللي ما حافظتوش على البلد
ايوة.. مصر محتاجة كل الناس، زي ما الميدان كان محتاج كل الناس، واحنا دلوقت مش في وقت ينفع فيه النهش المتبادل ده، احنا لسه محتاجين للاجماع الوطني بتاع التحرير، لسه لسه.. لسه ما خلصناش حاجة، لسه البلد في حالة سيولة، لسه لسه.. اصبروا، حتقطعوا في بعض بعدين، مش دلوقت

اللي بيحصل ده رونج رونج رونج
ايه اللي بتعملوه ده يا اخوان؟ ايه ده؟
بقى هالله هالله ع الجد والجد هالله هالله عليه.. قيادات الاخوان دي على العين والراس تاريخها وكل حاجة بس مش نافعة الاخوان في المرحلة دي، وبصراحة اكتر، اللي قدم التضحيات واللي دماغه اتفتحت واللي مات هم شباب الاخوان، اللي حسن البنا كان في سنهم لما عمل الجماعة... ما عادش فيها كسوف، ياما اعملي معروف، قومي افتحي له الباب
قومي يا قيادات الاخوان افتحي للشباب الباب.. ولا اناديله ياما أما
ايه اللي حصل ده؟ ها؟ ايه ده؟ كل ده عشان مظاهرة؟ هو حد كان رفعكم بالمسدس وقالكم شاركوا فيها؟
اسمعوني بقى عشان ما يسبقش السيف العذل زي ما حصل مع السلفيين وماشيين يقولوا مش بناكل ودان وربنا وربنا ما بنشرب دم مسيحيين وكتاب الله المجيد

بقى كان واضح ان السلفيين بيتفرد لهم عشان يتحرقوا، واقول مهما اقول ما اخدتش من السلفيين غير الشتيمة وانا كنت بانصحهم لوجه الله
خلصوا السلفيين كده وامبابة كانت اخر شوت ليهم
دلوقت لازم الاخوان يتحرقوا.. واتحرقوا بالحركة اللي عملوها، ما تقعدوش تدفنوا راسكم في الرمل وتقولوا واااالاااااا يهمنا، ولا اساسا نزل في المظاهرة دي غير خمستلاف، ولااااااا احنا هنا اصلا.. ولاااااا يفرق معانا اساسا
لا بقى.. لا.. انتوا حظكم احسن من السلفيين عشان انتوا تنظيم هرمي وينفع يعاد هيكلته
ايه بقى؟
ناس اعلنت عن مليونية يوم 27، وانتوا من الاخر كده اتفقتوا مع الجيش انكم مش مشاركين.. قشطة، ايه سوء الادارة ده؟ ليه تطلعوا نفسكم اندال ومبلغاتية وتقولوا كلام مليان هلاوس سمعية وبصرية وكدب كدب كدب.. الكدب وحش جدا على فكرة، ربنا يعافينا يعني يا رب وما يكتبش على حد انه يكدب سواء كان واعي او ساهي، ده طعم الصدق في البق زي السكر.. ليه الكدب ليه؟ احسن حاجة الواحد يقول كل حاجة، بالتفصيل، وبامانة، كده انت ضامن انك في امان.. الصدق منجاة
عارفين سوء الادارة جاي من ايه؟ ومن غير زعل؟ من العقول القديمة، اللي حتعمل في العيال اللي فتحوا دماغهم على مصر نفس اللي اتعمل سنة 54 و65.. ليه كده؟ هو اتكتب عليهم يعني؟ قضاء وقدر؟ 
انتوا مستعيلينهم ليه دول شباب زي الفل ودماغهم توزن بلد وبيعرفوا حاجات كتير انتوا ما تعرفوهاش وعندهم قدرات هايلة لادارة اي ازمة
بصوا بقى.. انا حانصحكم وتشتموني وانبسط عشان انا بانبسط من الشتيمة عشان اخد الثواب كله من ربنا وماحدش يديني ثواب بكلام حلو
اولا: شبكة رصد دي تتقفل فورا.. لا مش تتعدل، تتقفل، ما بقتش نافعة، ما بقاش لها اي مصداقية وبقى لما ييجي منها اي خبر يقولوا: شوفوا لكم مصدر تاني دي اخوان فشارة
انتوا بقى شوفوا لكم منفذ تاني غير رصد
ثانيا: موقع اخوان اون لاين، كل الهبل اللي حصل فيه ده يتم التحقيق فيه فورا، وتنزلوا اعتذار على الموقع
اسمعوني بقى.. تاني حاجة تنجي الانسان بعد الصدق انه لما يغلط يقول انا غلطت.. كده انت في سليم السليم، الكبر بطر الحق وغمط الناس، وانتوا عملتوا الاتنين.. اعتذروا، الاعتذار يكسر الكبر ويدخلك جنة الدنيا والاخرة ويخلي الناس تحترمك واللي ما يحترمش اللي بيعتذر هو نفسه مش محترم، اللي يغلط يراجع نفسه ويغير موقفه فورا ويتراجع عن الغلط اللي عمله وما يتكسفش من اللي مش محترم اللي بيعتبر ان الجدعنة انك تفضل ماسك في موقفك حتى لو كان غلط.. ده مش محترم ده
ثالثا: كنوا بقى شوية عشان الناس روحها في مناخيرها منكم.. وبطلوا ادعاء انكم مالكين الشارع ده، الكلام ده بيستفز الناس، افتكروا احد اسباب حرق السلفيين انهم كانوا بيقعدوا يقولوا احنا مع الناس والناس احنا واحنا الناس ونبقى نقابلكم في الصناديق الشفافة وغزوة الصناديق والكلام ده، الطريقة دي بتستفز كل الاطراف وكل الناس وبتخليهم ينفروا
افتكروا ان البرادعي اتشتم لما واحد من حملته قال البرادعي احد اسباب الثورة، ولما راح الميدان بعدها قابلوه وحش قوي
اي حد بيعمل وصي على الشارع بيتلفظ، فوقوا بقى، الناس ما عادتش زي الاول تاني، ومش قابلة زعامات ولا قابلة ان كفة ترجح على كفة
رابعا: اجتماع عاجل كده بتقارير صادقة وواضحة.. اللي يعملها شباب الاخوان نفسهم التقارير دي، عشان القيادات اخدت على انها تضحك على نفسها، لا.. الشباب اللي انتوا مستعيلينهم دول هم اللي يكتبوا لكم تقرير مفصل بما حدث في ادارة ازمة جمعة 27 ويكتبوا لكم توصياتهم
خامسا: القيادات الكبيرة دي تتنحى.. معلش.. كل الكبار بيمشوا دلوقت، ومش حيترموا في شرم ولا حاجة، يشكلوا لجنة حكماء يبقى دورها استشاري وما تبقاش هي اللي بتصنع القرار
سادسا: يتم نقل القيادة لشباب الاخوان فورا، مش حاقول المرشد يبقى في سن البنا وقت ما اسس الجماعة (22 سنة وعمل كل حاجة وخلصها ومات 43 سنة.. ايه العضام الكبيرة دي بقى اللي ماسكة الجماعة؟).. يا سيدي ما يقلش عن 33 سنة وما يزيدش عن 40 سنة، عشان يكون خلص كول كورسات الكتب اللي بتقروها لهم، عدانا العيب كده؟ ومافيش حاجة اسمها مرشد مدى الحياة، يقعد عشر سنين بحد اقصى وبعد كده يتم انتخاب مرشد تاني في حدود السن ده، وعندكم في السن ده اعداد كبيرة وناس زي الفل، وبعدين هم دول العيال اللي دايرين في الشوارع وبينزلوا البلاعات، وانا شخصيا لما بانزل اي بلاعة بالاقيهم، وهم دول اللي بيعملوا الجهد في الشارع اللي بتتآلطوا بيه على بقية الناس، وهم دول اللي راح منهم شهدا، وهم دول اللي منهم جرحى، يبقى هم اولى ياخدوا القرار مدام ايدهم في الشغل
ومن غير زعل كده، دماغهم انضف كتير، ما عندكم عشرميت واحد كان يقدر يحل المشكلة دي من غير ما يستفز كل الناس دي عليكم وتروحوا تستفزوا الناس وتطلعوا بيانات فظيعة وبعدين ترجعوا تقولوا بيتصيدوا لنا، وتضغطوا على اعصاب شباب الاخوان وتخلوهم يرددوا الكلام ده ويبقوا محرجين ولما يتزنقوا في المناقشة ما يردوش مش لانهم ما بيعرفوش يردوا بس لانهم مش مقتنعين باللي بيقولوه
يا سيدي انت ما كانش فيه داعي ابدا انك ما تنزلش يوم 27، اجيبها لك على بلاطة، ما كانش فيه داعي ابدا انك تعمل اتفاق انك ما تنزلش
خالص يعني، وبعد كده اللي يتكلم مع الجيش الشباب برضه، اركنوا بقى انتوا شوية من غير زعل كده ولكم كل الاحترام، عشان حتى لو حيعملوا اتفاق يعملوا اتفاقات مافيهاش الشرقة اللي انتوا فيها، فيه فرق احساس الى جانب فرق الفهم
الكبار بيفرحوا قوي باي حد مسئول في البلد يتعامل معاهم على انهم مش محظورة وبينهاروا على اعصابهم وبيعملوا اي حاجة تنطلب منهم
الشباب، زيهم زي بقية شباب البلد دلوقت، حاسين انهم في السما، وانهم يقعدوا على البساط ويختاروا ست البنات، ومبروك عليكي انا.. ده انا فلة وبطل واحط رجل على رجل والدنيا كلها تجيلي لحد عندي، ده انا مشيت اسرائيل تكلم نفسها، وخليت امريكا تنافقني وتشتري رضايا وانا مش راضي كمان
فهمتوا؟
يعني حتى لو عايز تعمل صفقات، ما تبعتش واحد شرقان كده.. تبعت واحد مناخيره في السما عشان يجيب لك شروة عدلة بدل الوكسة دي
انتوا بتتصرفوا غلط، ومش عارفين حاجة، برضه من غير زعل.. ولا بزعل بقى.. اه مش عارفين حاجة ابدا، في عز ما العيال كانت بتموت في التحرير رحتوا اجتمعتوا مع عمر سليمان عشان فرحانين ان اخيرا نظام مبارك بيتعامل معاكم ومش بيقول عليكم المحظورة، ايه سقف الطموحات المتدني ده؟ العيال انا كنت شاهدة وهم حيموتوا كمدا في التحرير لما عرفوا بالمصيبة دي وكل واحد فيهم قعد يلطم على وشه من حماقة التصرف
انتوا مش عارفين حاجة.. مش عارفين حاجة ابدا، ولا عارفين تتصرفوا
يعني مثلا اضرب لك مثل باللي حصل في يوم 27، لنفرض انك خلاص رحت اتورطت واتفقت انك مش نازل
هات بقى اي واحد من اللي انت مستعيلهم دول، احمد عبد الفتاح - اخر عهدي بيه كان اخوان، ولا طفشتوه؟ طفش؟ على الله ما يكونش طفش - ولا احمد سمير، ولا احمد نصر حتى ابعت استدعيه، ولا اي حد من العيال الحلوة المطقطقة دي
وقول له دبرني يا وزير احل المشكلة ازاي؟
طبعا انا مش عارفة كل واحد فيهم حيحل المشكلة ازاي، بس انا واثقة انه كان حيحل المشكلة باقل الخسائر ويمكن بمكاسب كمان، ومش عارفة بالظبط الخطة اللي كان حيحطها وكان حيعمل ايه؟ بس عارفة بالظبط كل واحد فيهم كان مش حيعمل ايه
1: ولا واحد فيهم كان حيقول "عرفني.. قال لي انت مخبر يالا" اللي انتوا قلتوها في البيان دي.. ازاي تروح تتفق مع الجيش وبعدين تجيب سيرة الجيش في البيان؟ ايه الغباوة دي؟ اي حد من الشباب دول ولا كان حيجيب سيرة الجيش اساسا، لا بالخير ولا بالشر
2: ما كانش حد فيهم ابدا حيتهم القوى اللي نازلة بإنها بتقفز على ارادة الشعب والشارع ويتكلم نيابة عن "شعب مصر بأكمله"، بالعكس، كان اول استفتاحنا حيبقى احنا بنحترم كل القوى اللي نازلة ومؤمنين بحريتهم في التعبير ومشاركينهم في كتير من المطالب، وبنطالب معاهم بحقهم في التظاهر، لكن عندنا اسباب لعدم النزول.. الا وهي.. ويروح راصص اسباب محترمة مالهاش علاقة بالتخوين ولا بالتلطيش في الناس ولا بـ"الوقيعة".. وقيعة ايه؟ مين اللي قالكم تكتبوا التعبير الفاكس ده؟ ايه القلش ده بجد؟
3: ما كانش حد فيهم ابدا حيعمل الحملات البدائية العبيطة دي عشان يحشد لعدم النزول وينزل ناس بميكروفونات عشان ما تنزلش ويوزع الورق العبيط اللي خليتوهم يوزعوه وهم في نص هدومهم كده
خالص.. بالعكس.. كان حيخش دخلة محترمة، وبعدين يسرد اسبابه لعدم النزول، وانا اؤكد لكم ان احمد سمير مثلا لو كان كتب البيان ده كان كل اللي قراه ما نزلش.. عشان بيعرف يتكلم.. بيعرف يتنيل يتكلم مش يهطرس ويحط شطة في ودان اللي بيسمعه ويخليه يبقى عايز يلطشه بالالم ويرفع الضغط عند كل اللي بيقراه ويسمعه.. هو راح فين الجدع؟ انا من ساعة الموضوع ده وشايفاه خفيان؟ ايه؟ محرج منكم ولا طفشتوه راخر؟ ما هو كل عيل فالح حتطفشوه بقى
وبعدين انتوا ليه اساسا تورطوا نفسكم في انكم ما تنزلوش؟ كان جرا ايه لو نزلتوا؟ بتعملوا اتفاقات ليه؟ مش قلنا نبطل الحركات دي؟ ويا ريتكم بتعرفوا تخبوا وتدكنوا، الا كل حاجة تتفضحوا عليها
بلاش
ما عملتوش زي المجلس العسكري نفسه ليه؟ "احد قيادات القوات المسلحة" قال وماله؟ انزلوا، لا.. ده احنا كمان عايزينكم تنزلوا عشان ننفذ طلباتكم، وراحوا قالوا لنا: ويالا احسن شباب.. احموا نفسكم، واللي عايز يبات سابوه يبات كمان.. وادي اليوم خلص والدنيا ميت فل وسبعتاشر
ولا الناس اتخانقت مع المجلس، ولا حد شتم الجيش، ولا اي حاجة، فلة كده فلة.. مين اللي لبس؟ 
ااااااه.. انتوا اللي شيلتوا الليلة كلها، والناس سابت كل خناقاتها ومسكت فيكم
مسكت فيكم ليه؟ عشان لاسباب غير معلومة وغير مبررة وغير مفهومة قررتوا تتصرفوا زي الحزب الوطني
ايييييييييييه ده؟ ايييييييييييييييييييييييييييهههههههههههههه ددددددددددههههههههههههههههههه؟
انتوا ازاي تطلعوا د. عصام العريان يقول 30 الف؟ وازاي تتخانقوا على الاعداد بالطريقة الطفولية دي؟ ايه الهيافة دي؟ وازاي في الاول تقولوا خمستلاف وبعدين عشرتلاف وبعدين تلاتين الف وتمشوا تدوروا على الجزيرة مباشر وعلى العربية وتقولوا للناس قولوا انها 30 الف؟ ما كل حاجة بتتفقس.. وانتوا في القنوات دي بتتعاملوا مع صحفيين.. فاهمين يعني ايه صحفيين؟ يعني شغلتهم الاساسية انهم فضحية، وفضحوكوا ومشيوا في كل حتة يقولوا الاخوان بيتصلوا بينا وبيقولوا لنا نقول كذا
ومن غير ما هم يقولوا، انتوا ازاي تكتبوا على موقع اخوان اون لاين الكلام ده؟ وازاي د. عصام العريان يقول كده؟ وازاي تعملوها خناقة اعداد بالطريقة دي؟ هو حد بيعد نفر نفر؟ ويوصل بيكم الامر انكم تقولوا اصلا الميدان ما يشيلش اكتر من 200 الف؟ انتوا اتخبطوا في مخكم؟ انتوا بتضربوا مشاركتكم انتوا في الثورة؟ انتوا ناسيين ان اول واحد اقترح كلمة "مليونية" دي كان البلتاجي؟ يعني بتقولوا على نفسكم ان انتوا كنتوا بتكدبوا لما قلتوا مليونية بس عشان تقولوا ان حتى لو الميدان مليان كده ماهماش مليون؟ 

يعني انتوا عايزين تنسفوا شرعية الثورة من اساسها عشان يطلع اللي كانوا في الميدان قليلين من غيركم؟ فرقتوا ايه عن اللي قالوا ايام الاستفتاء: اللي قالوا لا هم الثوار واللي قالوا نعم هم اللي كانوا ضد الثورة؟
ايه التخريف ده؟ طب ايه؟ نروح نجيب مبارك تاني ولا ايه؟ 
مش نافع كده.. مش نافع خالص.. كده الكل حيطلع خسران
اتكلوا على الله بقى.. وصبحي صالح ده حد يسكته، الراجل طالع يحلف كدب على الهوا؟ 
لا بقى.. كنوا شوية.. كنوا وعيدوا هيكلة التنظيم عشان يفلح، والا العيال اللي راسها اتفتحت دي، يا حتطفش منكم وانتوا مالكوش غيرهم، يا حيتلبسوهم في حيطة حرام عليكم
تاني الخمسين قفا اللي على سهوة.. ما اتعلمناش من ايام 52 ان مافيش نجدة لاي فصيل او مجموعة غير الاجماع الوطني، وان اي فصيل او مجموعة تسول له نفسه انه ممكن ينفرد بالسلطة او ياكل من تعشيم بانه ينفرد بالسلطة اخرته وحشة، طمعنجي بنى له بيت فلسنجي سكن له فيه
القوى السياسية الاخرى حتندبح لو الاخوان اتصفوا، ولو الاخوان طمعوا حيتصفوا، والمعادلة دي سهلة وبسيطة على فكرة وواضحة، انا مش فاهمة ايه الصعب في فهمها؟ 
وايه الصعب في فهم اننا دلوقت مش وقت مشاحنات سياسية والحوار الفاكس بتاع: علمانية ولا اسلامية اللي كان على العاشرة مساء ده؟ علمانية ايه واسلامية ايه هو احنا عندنا دولة من اساسه؟ احنا كل اللي عندنا دلوقت وقفات احتجاجية وظباط.. مارشات عسكرية وقرآن.. ولو فضل السجال الفاشل ده مرسي الزناتي حيتهزم يا منز
والدولة اللي حتتبني حاجة من الاتنين مالهاش تالت:
يا دولة ائتلافية توافقية بين كل القوى السياسية بمبدأ لا غالب ولا مغلوب.. وتبقى دولة ديمقراطية مدنية مافيهاش حد كعبه عالي على التاني، وبصريح العبارة اكتر، كل واحد صباعه في بق التاني وده التشكيل الوحيد اللي يصب في مصلحة الشعب الغلبان ده اللي عمره ما شاف يوم عدل.. ارحموه بقى
يا دولة عسكرية بقى اخر ما المجلس العسكري يزهق منكم ومن تفاهاتكم وخناقتكم على الاعداد اللي في الميدان، ويقولكم يالا ياض بقى انت وهو من هنا جاتكم خابط ده انتوا معاتيه وحتضيعوا البلد، وده اللي عملتوه من ستين سنة وبرضه الجيش قالكم يالا ياض انت وهو جاتكم خابط ده انتم معاتيه وحتضيعوا البلد
احنا حنعيده تاني؟

Saturday 28 May 2011

معبر رفح اتفتح بشكل دائم

خدوا دي بقى احفظوها عشان شكلنا حنغنيها قريب في مناسبة سعيدة ان شاء الله 
:)

Thursday 26 May 2011

استااااااععععععععععدددددددددددددد


تحديث:
عزيزي الجيش.. الشخص اللي شار عليك بإنك تنسحب من الميدان ده بني آدم بيفهم وقلبه على البلد.. يا ريت تبقى تستشيره دايما
اوحش حاجة ممكن تحصل ان يحصل مواجهة بينا وبين الجيش، لإن الطرفين حيطلعوا خسرانين
واي حاجة تانية يمكن السيطرة عليها.. احنا شعب كارم كل من حكمه والدولة دي عارفة تحكم بس من كرمه
ونقدر نحمي البلد، ونحمي الميدان، اي مندسين من وسطنا يحاولوا يخربوا حينضربوا لما يتفسخوا من بعضهم
اي بلطجية حيهجموا علينا حيحصل فيهم اللي يتوب بلطجية العالم ويخليهم يجاوروا الحسين
ولو الشرطة حاولت تضربنا.. يا ريت.. عشان نعصرهم ينزلوا عساكر صغيرة، والشرطة مش حتحاول تضربنا خالص بالمناسبة، بس على الله تجرب
كده تمام.. وانا شايفة ان قرار عدم نزول الجيش ده قرار حكيم وفي صالح كل الاطراف
احنا بقى... بيقولوا لنا: يالا احموا البلد يا شاطرين.. هاه؟ نقدر نحميها ولا ما نقدرش؟ 
نقدر ولا ما نقدرش؟
تحديث:
المفاجعة... الجيش مش نازل الميدان
نزل بيان بيقول كده
عارفين ده معناه ايه؟ يعني بلطجية حينزلوا لنا او امن مركزي
لو امن مركزي قشطة.. خليهم ينضربوا
لو بلطجية
احنا عارفين حنعمل ايه.... بس البلطجية حيخشوا وسطنا عشان الناس تتخانق مع بعض، وحيحاولوا يخربوا محلات ويمكن يحاولوا يقتحموا اقسام عشان نبقى احنا اللي بنخرب البلد
فاهمين طبعا، يعني مش احنا اللي حننضرب، ده ناس حيندسوا وسطنا ويبان كأنهم متظاهرين وحيحاولوا يخربوا
كده هايل.. عارفين طبعا حنعمل ايه

اولا:
حتقرا المقال ده بالتفصيل، سطر سطر، كلمة كلمة، حرف حرف، زنجة زنجة... 
بلال قايل كل اللي نفسي فيه، كله كله... عشان كده ابوس ايدك ركز وانت بتقرا، عشان انا حطيت المقال على التويتر ولاحظت ان ردود الافعال برضه لسه في اطار "الطفولة الثورية" اللي بيتكلم عليها بلال في المقال.. ماما دح بابا كخ.. لسه
امال الراجل ناتع المقال اللي قد اللحاف ده كله ليه؟ ركز الله يخليك
----------
ثانيا:
عندنا استعدادات بكرة
1- من المنتظر ان تقوم جهات غير معلومة - او معلومة انت ونيتك بقى - بمحاولة افساد تحريرية بكرة بإنها تحط ناس تتعمد الاشتباك مع الجيش، او تصعيد الموقف. ايه الهدف؟
الهدف انها تخلص بنهاية مأساوية تخلي الناس متهوبش بقى ناحية ميدان التحرير تاني
مين اللي بيعمل كده؟ الله اعلم، مالكش دعوة
انت لك دعوة بالاتي:
أ- لجان شعبية شديدة الحراسة، وتفتيش دقيق جدا، حيبتدي من الليلة
ب- مراقبة كاملة للمداخل والمخارج، على اللجان الشعبية اللي واقفة انها تبذل كل ما في وسعها عشان تبعد اي متظاهرين عن الدبابات لو فيه دبابات واقفة، او عن الشرطة العسكرية لو فيه شرطة عسكرية واقفة، لازم المسافة بينهم وبينا تبقى كبيرة
ج- اللجان تبقى وش وضهر.. معلش، حنتعبكم يا شباب.. يعني لجنة لاستقبال اللي داخل من برة، ولجنة لحراسة الوضع من جوة.. شرطة شعبية يعني، عشان ممكن حد يخش من غير اي سلاح، ولا اي حاجة، ويختلق خناقة جوة الميدان عشان يعمل بلبلة قد تتطور لعنف تستدعي تدخل الشرطة العسكرية.. فحتعملوا مجموعات جوة الميدان تمشي تقول: هااااا مين هناك
2- انت بقى كإنسان عادي مش في اللجنة الشعبية عليك حماية الميدان برضه
اي حد تشوفه بيحاول يتحرش بالشرطة العسكرية او بالجيش تمسكه وتديله واحدة سلمية سلمية وتطلع بطاقته وتعرف لنا مين ده، عشان نعرف مين اللي كان حاطط خطة افشال بكرة
حتلاقي ناس بتفتعل خناقات، شغلتك تفضها، واي حد بيفتعل خناقة برضه تديله سلمية سلمية وتطلع بطاقته وتخلي اللي ما يشتري يتفرج عليه
3- هالله هالله ع الجد والجد هالله هالله عليه.. مافيش هتافات مش عليها اجماع وطني
وانا احب اوضح هنا ان الناس اللي بتنادي بمجلس رئاسي او الدستور اولا دول مش خونة ومش طالبين تغيير عقيدة الجيش ولا طالبين حماية السفارة الاسرائيلية (ها؟ ها؟) ولا بيقولوا مش علم اسرائيل اللي حينزل لباس امك هو اللي حينزل (واخد لي بالك؟) دول مواطنين محترمين، بيحاولوا يلاقوا حلول للازمة القائمة
ومن حيث المبدأ مافيش حاجة غلط في اللي بيقولوه، بس كان من الاول الكلام ده، يعني كان ينفع يتعمل من اربع شهور، طرحه دلوقت مش واقعي، وتنفيذه حيبقى صعب، ومش حننتخب مجلس رئاسي في شهر عشان يقعد شهر، ولا ينفع اننا نتجاوز فكرة ان الناس صوتت على التعديلات الدستورية وما تشتغلوش الناس وتقولوا اصلهم اضافوا عليها مواد ماحدش استفتى عليها، لو كانت مش عاجبة الناس في وقتها كانوا نزلوا في ساعتها برضه
فخليك في نفسك وما تخليناش نسلط عليك القلم واللسان
الخلاصة يعني، الكلام بتاع المجلس الرئاسي والدستور اولا ده حكي في المحكي وتضييع وقت
المطالب اللي الكل عايزها اهي سواء اللي عايز مجلس رئاسي او اللي مش عايز
الى جانب يعني ان الهلاوس اللي عند بعض الناس والمرتبطة بالبدلة مالهاش اي اساس من الصحة، مين قال انك لما تجيب مجلس رئاسي حتروح البيت وترتاح وتنام ملء جفنيك؟ لا.. حتفضل صاحي له، وبرضه حيحاول يلعب بديله - على اوسخ كمان لانه مسيس - وحيحاول يديك على قفاك
عادي.. البشر بشر والبدلة ما بتفرقش.. والسلطة سلطة والكرسي ما يتسابش
فإحنا للاسف، في كل الاحوال، ولى عهد النوم يا خديجة.. ولى عهد النوم يا خديجة
حنفضل ورانا شغل كده.. واي كلام في قضايا خلافية في التوقيت اللي البلد دلوقت في حالة سيولة، حيجرنا للرذيلة.. نسيب شغلنا بقى ونتفرغ للرذيلة؟ 
ام الصبي هي اللي تدي ابنها لغريمتها مش ترضى بإنه يتقسم نصين بالسكينة عشان تاخد حتة منه
انا عارفة ان فيه ناس حتقولي: ماهو كنتي بتقولي كده عشان الاخوان ينزلوا واهم خلوا بينا.. لا مش باقول كده عشان الاخوان ينزلوا، باقول كده عشان ما اشوفش ناس بتتخانق في الميدان
الشعب يريد محاكمة السفاح
الشعب يريد تطهير البلاد
الشعب يريد حد ادنى واقصى للاجور
الشعب يريد الغاء المحاكمات العسكرية
الشعب يريد حرية
ما تشمتوش فينا اللي نزلوا امبارح بيان يبلغوا فيه ويقولوا: دول عايزين يعملوا وقيعة بين الجيش والشعب
مافيش حاجة تطلعهم كدابين غير اننا نكدب ظنهم.. لو كدبنا ظنهم حيعضوا بنان الندم، وبعد البيان بتاع امبارح مات الكلام، ما ينفعش يقولوا ما احنا نزلنا ولا احد ينكر اسهامتنا
لو هبلنا في الهتافات بتاعة اسقاط المشير ومجلس رئاسي والدستور اولا حيقولوا: شفتوا؟ كان معانا حق ولا ما كانش معانا حق؟ 
ساعتها بقى الروس حتتساوى.. هم استندلوا، واحنا عبطنا، وعادي يعني.. عيان بيـ... بوس في ميت
مجلس رئاسي ودستور اولا دي احد الوسائل المطروحة للوصول للهدف بس مش هي الهدف
ولو هي الهدف يبقى انت بتاع مصالح وعارف انك حتسقط في الانتخابات فعايز المجلس العسكري يغير لك البامبرز وبتقول له حوش عني الاخوان يا سي عبده اه يا سي عبده 
وفي الحالة دي يبقى معاهم حق ياخدوا الموقف ده لإن ده حيبقى صراع وجود.. انت عايز تنهي وجود الاخوان؟ 
حيبان في الميدان بكرة... ابوس ايدك
ابوس ايدك
ابوس ايدك
ابوس جزمتك من قعرها
طلعهم غلطانين... طلعهم غلطانين لانهم غلطانين فعلا.. ولانهم عارفين انهم غلطانين فعلا حيحاولوا يتصيدوا اي همسة اي كلمة اي لمسه... اعيش خدامتك طول العمر لو ما ادتهمش الفرصة دي
4- اسمحوا لي اغني خارج السرب كعادتي عشان الكل يزعل ويتفلق وانا انبسط واحس اني صح
بلاش قلة اصل
بلاش قلة اصل
بلاش قلة اصل
بلاش قلة اصل
بلاش قلة اصل
ابوس ايدك يا جعيدي بطل قلة اصل
يابني اسمعني انا زي امك.. امي انا؟ ايوة.. امك انت
انت يابني لو فضلت ناصب المقصلة للناس ومسمي نفسك راديكالي عشان مكسوف تقول انا قليل الاصل راسك حتطير تحتها بعد شوية وحينتهي بيك الامر لحاجتين مالهمش تالت:
يا اما حتنتهي نايم على الرصيف ولابس بالطو وسخ وفي ايدك ازازة سبرتو احمر
يا اما حتنتهي علي الدين هلال وجهاد عودة
بص على كل اللي وسخوا لما كبروا حتلاقيهم اكتر ناس كانوا بيقولوا على نفسهم راديكاليين في شبابهم
يا ابني يا حبيبي.. الحركة اللي الاخوان المسلمين عملوها دي حركة مش محترمة وغير اخلاقية ومالهاش ما يبررها ابدا.. ابدا
ادعاء ان اصل "هناك بعض الناس ممن يطلقون دعاوى المجلس الرئاسي والدستور اولا" ده ادعاء بيرد على نفسه.. لما انت بتقول بعض الناس، ما تنزل انت وتبقى اغلبية الناس وتسحب من تحت رجليهم البساط وبعددك الكبير وصوتك الاعلى وسيطرتك على الاعلام - واهمها الجزيرة مباشر اللي بقت مقر المرشد - حتقدر تسيطر على الموقف وتحول مجرى المطالب.. اللي بيقولوا الكلام ده زي ما بلال بيقول بالظبط.. خلاص.. حطوا صوابعهم في الشق وطلعوا من هدومهم، ما لو لبستوهم هدومهم وجوزتوهم هنومة واتنفذت كل المطالب العادلة اللي مش محتاجة كيميا ولا خارطة طريق ما كانوش نكشوا شعرهم كده
كمان ادعاء ان الدعوة بتاعة بكرة "للايقاع بين الجيش والشعب" ياااااااااااااا... وسخ وسااااخةةةةةةة.... وسخخخخخ وساااااااااخةةةةةةةة وسسسسسسسسسخخخخخخخخخخخخخخ وسسسسسسسساااااااااااااااااخخخخخخخخخخخخخةةةةةةةةةةةةة
اييييييه القرف ده؟ 
بقى ناس بتقول مجلس رئاسي عشان طلعت من هدومها بتوقع بين الجيش والشعب؟ اه.. طب واللي استقبل ظباط جيش انقلابيين نازلين في التحرير بالافرول يقولوا يسقط المشير، وطلعهم على منصته، والاكتر من كده، دخلهم من اللجان الشعبية اللي اساسا كان مسيطر عليها الاخوان كلهم، واصلا كان نازل وعارف ان فيه ظباط نازلين وانا بنفسي مكلمة قيادات من الاخوان وكان ناقص ابيع لهم شرفي عشان يمنعوا حاجة زي دي انها تحصل وولا سألوا فيا.. اللي عمل كده يبقى ايه؟ 
من امتى قلب الام ده على الجيش؟ حصلت امتى الحادثة دي؟ 
بس يابني يا حبيبي.. ما تطلعليش إذ فجأتن وتمسح كل اللي الاخوان عملوه عشان دي اسمها قلة اصل
يابني انت وهو بطلوا قلة الاصل دي في الاخر حتلبسونا في واحد نصاب... والله العظيم تلاتة قلة اصلكم دي حتلبسنا في عمرو موسى.. ايه رأيكم بقى؟ وبرضه حتناموا على الرصيف بالبالطو وازازة السبرتو الاحمر
اه.. الموقف اللي اخده الاخوان ده لا اخلاقي وغير مبرر. نقطة من اول السطر. ما تطلعش بقى تقولي والاخوان بقى ولا حتى شاركوا في الثورة، والاخوان بقى ولا حتى عملوا اي حاجة، والاخوان بقى اساسا هم اللي ركبوا على الثورة، والاخوان بقى ولا لهم اي لازمة في الحياة، والاخوان بقى اصلا كل الناس بتكرههم ومالهمش شعبية في الشارع
ايه ايه ايه ايه؟ 
ايه؟ 
انت اهبل ولا بتضحك على نفسك؟
لا.. الاخوان كانوا جزء هام جدا وحيوي جدا في الثورة، وقدموا شهداء، وقدموا تضحيات، وعملوا بطولات، وكانوا من اجدع الناس في الميدان ان لم يكونوا اجدعهم على الاطلاق.. والفرق بين اي شباب وبين شباب الاخوان ان الشباب كان جاي يتظاهر وما جراش حاجة لو مات.. شباب الاخوان كان جاي يموت وما جراش حاجة لو فاته الموت النهاردة ممكن يلحقه بكرة
دي حقيقة تسجل للتاريخ.. ومافيش حاجة اسمها الاخوان بيكتبوا نهايتهم.. مش حتنتهي الاخوان، اخرها حيتعمل لها مذبحة زي بتاعة اربعة وخمسين، عادي، ماهم بيكرروا نفس الاخطاء، بس مش حينتهوا
والاخوان منهم جرحى كتير.. وشهدا كتير.. وعشان كده انا زعلانة منهم وواخدة على خاطر، عشان الموقف اللي هم واخدينه النهاردة ده ياخده الحزب الوطني... مش ناس قدمت كل التضحيات دي
والتبرير بإن اصلهم عملوا كده عشان بيتشتموا!!!!!!!!!!!!! انما يبكي على الحب النساء
وطلعوا ما بيبكوش.. انا ما بابكيش على الحب... طلع الرجالة اللي بشنب ودقن هم اللي بيبكوا على الحب، ولو اني مش شايفة ان ده تبرير حقيقي، دي مجرد ذريعة
وبكرة الاخوان يعرفوا انهم بيئذوا نفسهم، وانهم بيستخدموا دلوقت كمكنسة يكنسوا بيها القدرة على الحشد وبعدين حيتحرقوا ويتعمل فيهم اللي اتعمل فيهم.. اتعمل فيهم طول عمرهم، وبياكلوا خمسين قفا على سهوة
وانا من موئعي هذا بادعو شباب الاخوان للثورة... مش نافعة القيادات العجوزة دي.. تفكيرها قديم وحتلبسكم في حيطة، انتوا مستعيلين نفسكم ليه؟ ما حسن البنا كان قدكم لما عمل الجماعة.. الجماعة مؤسسها شاب ومرشدها والقيادات اللي فيها لازم يبقوا شباب، ويتنحوا عند سن 49 سنة، السن اللي مات فيه البنا
-----------
معلش.. شدة وتزول.. انقسام الصف ده شدة وتزول.. لو احنا عايزينه يزول، وكل واحد ييجي على نفسه ويحط مصلحة مصر قبل صراعاته واحقاده ومصالحه
اليوم ان شاء الله حيعدي على خير قوي وبسلام وامان اذا احنا عايزينه يعدي على خير وبسلام وامان وما طرحناش قضايا خلافية وحمينا الميدان من المندسين اللي عايزين يصعدوا ويلبسونا في حيط
اديني باقولكم اهو
لو حصل تصعيد من جانبنا بكرة حتبقى آخر مرة مخلوق ينزل فيها الميدان
لو حصل تصعيد من جانبنا بكرة حتبقى آخر مرة مخلوق ينزل فيها الميدان
لو حصل تصعيد من جانبنا بكرة حتبقى آخر مرة مخلوق ينزل فيها الميدان
عايزة اكتبها 13859 مرة والله
اوعى.. اوعى.. اوعى... مافيش مخلوق يصعد بكلمة، مش حاقول بحركة، واللي حيصعد حينضرب لما يتفسخ من بعضه، وسلمية برضه
اوعى تمد ايدك ولا تسيب حد يمد ايده ناحية الجيش ولو من بعيد
اوعى تطرح قضية خلافية ولا تسيب حد يطرح قضية خلافية ولو بالتلميح
انقاااااذ مصر واااااااااااجب وطنييييييييييييي
حاشوف بكرة في الميدان مين ام الصبي في قصة سيدنا سليمان... اوعى نشمت فينا حد
انا عايزة بكرة يبقى احلى يوم للميدان من يوم 25 يناير.. وربنا قادر، واحنا اذا عايزين حنقدر، اوعى تفتكر ان المؤامرات بتنجح الا اذا انت نجحتها
كل واحد فينا بكرة الميدان ده ابنه اللي في الحضانة وخايف عليه من الهوا... لو ابنك مات اعرف ان انت اللي قاتله
وحنعمل تاني؟ حنعمل اللي بنعمله كل مرة:
يااااااا رب... يا رب.. يا رب
خد.. اتسلى وانت ماشي

ايه ايه ايه ايه؟ صلوا ع النبي صلوا ع النبي

ايه ايه ايه؟
بتقبضوا على العيال اللي بتوزع الدعوات بتاعة بكرة ليه؟ 
وقابضين على بنت كمان؟ يعني هي عايدة الكاشف ما تشبهش سوزان مبارك؟ ماعهاش 24 مليون جنيه معلش
المقبوض عليهم من الشرطة العسكرية اثناء توزيع دعوات بكرة
عايدة الكاشف، محمد فهمي، عبد الرحمن امين، ابراهيم عابد
ايه بقى؟ بيتقبض عليهم ليه؟ هي دي اول مرة الناس توزع ورق عشان الجمع؟ ولا ده استجابة للبلاغ اللي قدمه الاخوان في اللي نازلين بكرة؟ 
بعدين انا عايزة اعرف ايه المشكلة؟ لا بجد وربنا ايه المشكلة؟ ماهو في اون تي في "احد قيادات القوات المسلحة" قال ليسري لازم تنزلوا مليونيات عشان نعرف مطالبكم ونستجيب لها
طب الناس حتنزل ازاي من غير ما حد يوزع دعوات؟ يعني تقولوا لنا انزلوا وبعدين تاخدونا على خوانة؟ 
بتقبضوا على الناس ليه؟
هو توزيع الورق ممنوع؟ طب قشطة... بتقبضوا على الاخوان اللي بيوزعوا ورق يقولوا فيه ماحدش ينزل بكرة؟ ولا ايه؟

مبارك كان يعلم بكل طلقة وكل طفل وشهيد سقط ولم يعترض

يا عدلك يا رب
الجرنال اللي ياما ممتاز القط قلب بطننا فيه هو اللي بينزل ادلة الادانة على مبارك.. هيهيهيهيهييييييييي منتاز القط.. والنبي وحشني
شهادة رئيس المخابرات السابق أدانته بقتل المتظاهرين
وشهادة محافظ جنوب سيناء ادانته بالرشوة
عمر سليمان‮: ‬مبارك گان يعلم بگل رصاصة أطلقت وكل شهيد وطفل سقط ولم يعترض
ممدوح الزهيري‮: ‬الرئيس السابق أمرني بمنح ملايين الأمتار لحسين سالم في مقابل قصر و‮٤ ‬فيللات
مصادر قضائية‮: ‬تعدد جرائم مبارك گان‮ ‬السبب في احالته للمحگمة منفردا بعيدا عن العادلي وسامح فهمي
اتهامات مبارك تنوعت من القتل للرشوة الي التربح‮.. ‬وعلاء وجمال متهمان بالرشوة فقط
(نينتك سودا يا مبانك نينتك سودا)
علمت‮ »‬الأخبار‮« ‬أن أدلة ادانة الرئيس السابق حسني مبارك ونجليه علاء وجمال وصديقه حسين سالم تضمنت العديد من المفاجآت الصارخة‮.. ‬ومبارك‮ ‬متهم بالاشتراك في قتل الثوار والرشوة والاضرار العمدي بالمال العام،‮ ‬وحسين سالم متهم بتقديم الرشاوي والتربح بينما علاء وجمال متهمين فقط بالحصول علي منافع ورشاوي من حسين سالم مقابل استغلاله لنفوذ والدهم‮.‬
عمر سليمان
وتضمنت الادلة شهادة اللواء عمر‮ ‬سليمان نائب رئيس الجمهورية ورئيس‮ ‬المخابرات السابق والتي اكدت تورط الرئيس السابق في جريمة قتل الثوار وادانته بالجريمة‮.. ‬حيث اكد سليمان ان مبارك كلف القوات المسلحة والمخابرات العامة بمتابعة المظاهرات وموقف المتظاهرين وانه كان يتلقي التقارير كل ساعة من حبيب العادلي وزير الداخلية الاسبق وينقلها فورا الي الرئيس السابق‮.. ‬وكانت التقارير تتضمن كل عمليات اطلاق الرصاص الحي والمطاطي علي المتظاهرين في محاولة لافشال الثورة والتمكين لاستمرار مبارك في الحكم ولم يعترض الرئيس السابق مطلقا علي اطلاق الرصاص الحي‮..‬
(وانت ايه وضعك يا سليمان؟ فاكراك انا يا شقي لما قلت لنا ما تخلونيش اعمل لكم انقلاب واعاملكم معاملة قاسية)
واكد سليمان ان مبارك كان لديه علم كامل بكل رصاصة اطلقت علي المتظاهرين وباعداد كل من سقط سواء شهيدا أو جريحا وحتي الشهداء الاطفال (آه.. يا كلب يا كلب يا كلب .. يا حقير يا سفاح.. الله يلعنك في كل كتاب الله يلعنك ويلعن اللي يطلب لك العفو ويحشر كل بتوع آسفين يا ريس معاك في نفس السويت اللي محجوز لك في قعر جهنم، الهي كل من يطلب لك العفو ولا يسعى لك فيه ولا يقبل بيه يدوق حرقة امهات الاطفال والشهداء، قادر الكريم يا رب يا رب يا رب من قلبي يا رب .. قولوا آمين.. قولوا آمين) وبكل التحركات العنيفة للداخلية في التصدي للمتظاهرين ودهسهم بالسيارات ومحاولات تفريقهم بالقوة ولم يأمر مبارك علي الاطلاق برفض هذه الممارسات العنيفة أو اطلاق الرصاص الحي،‮ ‬بما يؤكد موافقته الكاملة‮ ‬علي هذه الاجراءات واشتراكه فيها‮.‬ (يا عمر يا سليمان، مسئولين ليبيا وسوريا احرجوك لما استقالوا من مناصبهم.. بس حاقول ايه؟ واحد كان بيعذب بايده تحت اشراف جمال مبارك، حيبقى بيحس؟)
ممدوح الزهيري
وتضمنت الادلة شهادة اللواء‮ ‬ممدوح الزهيري محافظ جنوب سيناء الاسبق عام ‮٧٩٩١ ‬والتي كشفت العلاقة المشبوهة بين مبارك وصديقه رجل الاعمال الهارب حسين سالم‮ (الله الله الله.. مش عايزين قلق في القعدة لو سمحتوا.. هي وصلت انها بقت مشبوهة؟).. ‬حيث شهد الزهيري‮ ‬بأنه في احد المرات كان في استقبال حسني مبارك بالمطار وكان معه حسين سالم ورغم ان البروتوكول ينص علي ان‮ ‬يجلس كمحافظ بجوار مبارك الا ان الرئيس السابق طلب مني ان أجلس بعيدا في المواجهة،‮ ‬بينما طلب من حسين سالم ان يجلس بجواره‮ (استغفرررر الله العظييييييييم... مش قادرين يمسكوا نفسهم في المطار؟).. ‬وقال المحافظ الاسبق ان حسين سالم اصطحب حسني مبارك بعد ذلك الي‮ ‬شاطيء البحر بشرم الشيخ (ولعبوا مع بعض راكيت وجريوا ورا بعض زي افلام نجلاء فتحي وحسين فهمي؟) حيث شاهدا معا قطعة الارض التي منحها حسين سالم لمبارك بعد ذلك ووافق عليها‮ ‬مبارك‮.. ‬وباعها له حسين سالم بسعر صوري علي عقد صوري بمبلغ‮ ٠٠٥ ‬ألف جنيه وبني له عليها قصر و‮٤ ‬فيللات تتجاوز اسعارها ‮٠٥ ‬مليون جنيه‮.‬
واضاف الزهيري انه اثناء عمله كمحافظ كان دائم الاختلاف مع حسين سالم وفي كل مرة كان يختلف فيها كان يفاجأ بالرئيس السابق مبارك يتصل به ويأمره بالاستجابة‮ ‬لكل طلبات‮ ‬حسين سالم في الحصول علي ملايين الامتار بشرم الشيخ في أكثر من المواقع تميزا وبأسعار بخسة،‮ ‬بما يؤكد ان مبارك حصل علي الأرض والقصر والفيللات الاربع في مقابل منح الأراضي لحسين سالم‮.‬
الغاز والقتل
وكشف مصدر قضائي ل‮ ‬‮»‬الاخبار‮« ‬انه بشأن ما يتردد من تساؤلات عن اسباب عدم صدور قرار بإحالة‮ ‬مبارك للمحاكمة بتهمة قتل الثوار في نفس القضية المتهم فيها حبيب العادلي وزير الداخلية السابق ومساعديه الستة‮.. ‬كشف ان النيابة اسندت الي الرئيس السابق عدة اتهامات بارتكاب ‮٥ ‬جرائم مختلفة من بينها الاشتراك في قتل المتظاهرين وجرائم اهدار المال العام واستغلال النفوذ لدي السلطات العامة والاضرار العمدي بالمال العام والتربح في موضوعات تصدير الغاز‮ ‬لاسرائيل ومنح الاراضي لحسين سالم وبالتالي فقد وجدت النيابة العامة ان احالة مبارك الي محكمة واحدة لنظر كل الاتهامات المسندة اليه يتفق مع صحيح وحكم القانون‮.‬
(بالنوسبة للخيانة العظمى؟ ايه؟ وبعدين هو مش المشير اعترف انه امرهم بقتلنا وهو رفض؟ ايه؟ دي خيانة عظمى)
اما بالنسبة لمسألة ضم الوقائع المنسوب لمبارك ارتكابها بالاشتراك مع آخرين سبق احالتهم للمحاكمات في قضايا سابقة ومنها الاشتراك في قتل الثوار مع حبيب العادلي ومساعديه‮ ‬الستة،‮ ‬والاشتراك في تصدير الغاز لاسرائيل مع سامح فهمي ومسئولي البترول فهو أمر يخضع لتقرير المحكمة الجنائية التي سيتم نظرا القضية امامها والتي تنظر القضايا السابقة،‮ ‬حيث يجوز لكل محكمة ان‮ ‬تفصل في الواقعة المعروضة امامها خاصة وانه سيكون أمامها صورة‮ ‬كاملة من التحقيقات في باقي القضايا التي سبق احالتها للمحاكم،‮ ‬كما ان للمحكمة ان تطلب ضم صورة من‮ ‬التحقيقات في القضايا الاخري.
-------
الكلب.. الكلب
اسمع كلب ولا حقير يطلب العفو لمبارك.. اسمع عن كلب ولا حقير ولا نجس يسعى له في العفو.. اسمع حد بيطرح الموضوع للتفكير او للمناقشة او بيقول لنا "بصوا لقدام" الكلمة القذرة اللي كلهم بقوا يقولوها دي... نبص لقدام ازاي بعد ما اتعمل فينا من الخلف كل ده؟ 
اسمع حد بيقول الكلام ده.. مش حاقوله غير: قادر الكريم يدوقك حرقة قلب اهالي الشهدا، قادر الكريم تدوق المرار واليأس والاكتئاب اللي داقه كل الجرحى، قادر الكريم تعرف معنى الفقر والفاقة اللي ملايين عاشوا فيهم وهو عمال يبرطع في فلوسنا ويبقشش بيها كمان على صاحبه اللي معاه باسبور اسرائيلي وهربان في اسرائيل دلوقت واسرائيل مش عايزة تسلمه 
قادر الكريم تحس بكل اللي انا حاسة بيه دلوقت وانا باقرا الخبر وصورة كل شهيد وكل جريح عجزه جرحه بتمر قدامي زي الشريط
قولوا آمين
حد ينطق احنا آسفين يا ريس ولا يقول في مبارك ده كلمة عدلة.. قادر ربنا يجمع كل احزان المصريين اللي هو اتسبب فيهم ويحطها عليه

Tuesday 24 May 2011

دول حقهم لسه ما جاش

ومش حييجي لو فضلنا نايمين كده وناس بتكلمنا على المصالحة


انا شخصيا نازلة عشان دول.. حيتعمل فيهم زي جرحى 73 وفي الاخر اللي ياكلها واحد نصاب ويقعد على قلبنا تلاتين سنة ويقول لنا انا صاحب اول طلعة تحريرية ويعيشوا يندموا انهم ضحوا عشان البلد زيهم زي اللي قبلهم، انا شخصيا مش حاسكت لحد ما يتعمل فيهم كده... ده واحد، وانا امبارح قابلت 19 مصاب، كلهم عانوا اكتر من كده كمان، دول بني ادمين مش قراطيس لب عشان الناس تنساهم والاسهل طبعا الاتجار بدم الشهدا عشان ما بيكلفوش علاج وسؤال ومش عايشين عشان يقولوا على اللي قتلهم
جرحى مش لاقيين اللي يسأل عليهم ومبارك قاعد في شرم الشيخ بنصرف عليه عشان يتعالج نفسيا من الصدمة العاطفية اللي احنا اتسببنا له فيها! ووزير الصحة يقول الدولة مش بنصرف عليه... ده مصلحة السجون هي اللي بتصرف عليه، على اساس ان مصلحة السجون دي بتصرف عليه من تحويشة العمر بعد ما فكت الوديعة، هو مبارك بيتكافئ انه قتلنا والجرحى بيتعاقبوا انهم ضحوا عشان البلد؟
هي دي كانت ثورة ولا نكتة بايخة؟

Monday 23 May 2011

اسم الله عليكم يا ولاد مصر

تحديث:
حاخام اسرائيلي يطلق اول حملة دينية لاطلاق سراح مبارك
==========
في فترة الاكئتاب دي...  انا مش مراهنة غير على ان مصر بتعرف تخلف، وخلفها ما بيتقطعش ابدا
اييييووووون
تعاونوا معانا بدل ما تضربونا
احنا معانا ورد.. انتوا معاكم ايه؟ كان بيبقى معاكم عصير وبسكوت وكنتوا بتلففونا بالدبابة وتأكلونا.. فاكرين الايام الخوالي؟ 

Sunday 22 May 2011

شابو للثورة المضادة

تحديث:
اه صحيح.. لو الثورة المضادة جابت فينا جون يوم 27 ده حيحمسهم.. ودي احد اسباب نزولي، انا نازلة وحاجيب معايا كل اللي اعرفهم، ولازم كل واحد ينزل ويجيب معاه كل اللي يعرفهم، ولا انتوا مش ملاحظين ان بتوع اسفين يا ريس شامين نفسهم اليومين دول قوي، ولو فشلنا يوم 27 حيحسوا انهم بيحققوا نتائج
استهدوا بالله.. ده فيه دم ساح
حرام عليكم.. انا شخصيا حاعمل الواجب اللي عليا وابري ذمتي قدام ربنا وحسبي الله ونعم الوكيل في المتخلي والندل واللي له حسابات واللي بيفرق الصف عشان مصالح
بالنسبة للسلفيين
كل اصحابي السلفيين نازلين، ايه بقى الموقع اللي عامل نفسه سلفي وبيقول الكفار هم اللي نازلين يوم سبعة وعشرين ده؟
------------------
كده ضربتوا لنا يوم 27؟ 
احنا النهاردة يوم الاحد وفيه مجال يتلحق لو اتعمل شوية حاجات
1- تلغوا مطلب المجلس الرئاسي
2- الاخوان يبطلوا اللي بيعملوه ده.. على الاقل لو مش نازلين يسكتوا
3- تكلموا بعض، القوى السياسية تكلم بعضها
يوم 27 مهم.. كل بتوع الاستقرار وعجلة الانتاج واسفين يا ريس والعفو عند المقدرة وحسنة قليلة تمنع بلاوي كتيرة عاملين حملة كبيرة على النت عشان يحبطوا يوم 27
ومن المؤسف ان الاخوان وسليم العوا يشاركوا في ده
ومن المؤسف ان بعض الداعين ليوم 27 يشاركوا في ده ويتكلموا عن مجلس رئاسي وهم عارفين انهم بيستهبلوا وان ماحدش حيرضى بيه
لا الجيش حيرضى بيه
ولا الاغلبية عايزاه
ثم مالوش لازمة.. مالوش لازمة غير بالنسبة لنا احنا عشان زهقنا من ضرب الشرطة العسكرية
لكن المجلس الرئاسي حننتخبه في شهر وييجي يقعد شهر؟
ولا حنخلي الجيش هو اللي يختاره لنا ويبقى عملنا ايه؟ هي دي ديمقراطية؟ مدام كده كده الجيش بيدير يبقى يدير بنفسه، ونقول له يبطل ضرب فينا بقى
ولا خمستاشر واحد حيقترحوا اسماء ويفرضوها على 85 مليون؟ انتوا اتجننتوا وافتكرتوا نفسكم مين مش عارفة؟ 
ولا حتأجلوا الانتخابات بقى عشان المجلس الرئاسي يقعد له كمان ست شهور؟ طب الناس مش عايزة تأجل الانتخابات
ثم ليه يعني؟ ادوهم سبب، انا عندي سبب اني زهقت من الضرب
وفيه غيري شايفين ان مشكلة الضرب دي تتحل بالمحايلة والعدد الكبير وشهرين يعدوا بالطول ولا بالعرض لحد اما نخلص
كده كل الاطراف تآمرت على يوم 27 بما فيهم بعض الداعين له
وعشان كل الاطراف بما فيهم الداعين لليوم مش عايزينا ننزل انا نازلة، نفسي افهم ايه اللي في اليوم ده بالتحديد اللي مخليهم مش عايزينا ننزل
انا نازلة ومش حاطالب بمجلس رئاسي عشان ده ضد ارادة الشعب اللي عامل الثورة مش الكام مجنون اللي عاملين ايفينتات
ونازلة عشان حاجة كمان... مش عايزة العيال نفسها تتكسر، القوى اللي بتحبط اليوم ده عايزة تكسر نفس العيال، خصوصا اللي انضربوا عند السفارة، وعايزين يقولوا لهم: لا بقى.. مش كل ما تعوزوا تنزلوا حتنزلوا
لا بقى
كل ما يعوزوا ينزلوا حينزلوا.. وماحدش يكسر نفسهم.. وماحدش ينزلهم على ركبهم.. وماحدش يجيب مناخيرهم الارض
لو نزل 200 واحد انا معاهم.. لو نزل الف انا معاهم.. لو نزل مليون انا معاهم.. لو نزلت وما لقتش حد حاروح بيتنا، المهم اني ما اسيبش الناس
وايه ده بقى؟ ها؟ ايه؟ هي بقت كده؟
اللي انكسر ينفع يتصلح، والامور ينفع تتعدل بس اتصلوا ببعض، وهدوا الامور، بتعندوا على بعض ليه الله يكسفكم؟
بجد شابو للثورة المضادة اللي فرقت الصف وفشلت الناس بالطريقة دي، علاء الاسواني قال يوم ما نفقد القدرة على الحشد يبقى الثورة المضادة نجحت
ومتشكرين قوي للاخوان والليبراليين واليساريين والسلفيين اللي بذلوا كل جهد عشان يفقدونا القدرة على الحشد
نردها لكم في الافراح... اذا كنا عايشين يعني
يوم 27 ده لو فكس مبارك حياخد عفو
من الآخر كده... والذنب في رقبة اللي فرق الناس واستهبل 
ولا تنازعوا فتفشلوا وتذهب ريحكم 
اهو.. ده ربنا اللي بيقول اهو
انتوا اتنازعتوا
ربنا ما يقولش الا الحق.. انتظروا بقى الفشل وذهاب الريح

Saturday 21 May 2011

الايفينت بتاع يوم 27 مايو


تحديث:
د. صفوت حجازي حيبقى مسافر الجمعة 27 بس قال لي ان بكرة اجتماع اللجنة التنسيقية ولسه حيقرروا اذا كانوا نازلين يوم 27 ولا لا بناء على التقارير اللي بتجيلهم بشكل اسبوعي
كمان قال لي ان اكتر من نص الشباب بتوع السفارة خرجوا وان فاضل منهم 60 واحد ان شاء الله حيخرجوا بكرة، الراجل بقاله 3 ايام متشحطط في النيابة العسكرية
وفي كل الاحوال اللجنة التنسيقية حتطلع بيان
ويا رب خير يا رب
تحديث:
اربعة مليار؟ ايه شغل الجرابيع ده؟ عشان كده شيخ الازهر بيقول الرحمة فوق القانون في التعامل مع مبارك؟ 
اتاريها الاربعة مليار فوق القانون
ايه اربعة مليار دي؟ ايه شغل الجربعة ده؟ احنا مش عايزين من ملك السعودية حاجة، مش عايزين من اللي شتموا شهدائنا وقالوا عليهم خارجين عن الحاكم حاجة، مش عايزين من اللي بيقولوا على الشعب المصري قليل الاصل حاجة، مش عايزين من اللي بيتحدوا القانون المصري وعايزين يهربوا طريد العدالة المخلوع من المحاسبة حاجة
ايه ده؟
اربعة مليار؟
ايه ده؟ ايه شغل الشحاتة ده؟ اربعة مليار دول نجيبهم لكوا في اسبوع
الفنانين اللي بياخدوا مليون جنيه في الفيلم، لعيبة الكورة اللي خانوا شهداء الالتراس وكل واحد فيهم كان بياخد مليون جنيه لما يتهزم، رجال الاعمال، شرفاء بقى ولا مش شرفاء، اللي فيهم مش عايز يدفع بمزاجه اقسم وسطه ضرايب
واعمل حملة تبرعات واحنا نجيب لك قد الفلوس دي عشر مرات، ومش عايزين منك شكرانية يا سيدي
ايه ياختي ده؟ 
رجعوا له الفلوس دي، حد الله ما بينا وبينها
تحديث:
وادي بالونة تانية اهي
قالك مبارك حيطلع وثائق تدين مسئولين كبار في الدولة لو ما تمش العفو عنه
اه.. انهي مسئولين يعني؟ 
اصل المسئولين عندنا نوعين، نوع وقف جنبنا يوم 11 فبراير، ونوع ما وقفش جنبنا يوم 11 فبراير
بالنسبة للي ما وقفش جنبنا اليوم ده مالوش حاجة عندنا غير الحبس
بالنسبة للي وقف جنبنا يوم 11 فبراير، احنا مسامحينه... مسامحينه مسامحينه مسامحينه
ثم اصلا مبارك ده راجل كداب.. مين اللي حيصدق مبارك؟ مبارك ده صاحب اسرائيل والسعودية وممكن جدا يزوروا له وثائق، الوثائق مكتوبة او مسموعة او مرئية تتزور بسهولة ودلوقت ما بقاش حد يقدر يعرف الحقاني م البراني
وطبيعي انه يقول الكلام ده دلوقت لما يحس انه بيتحاكم.. ولو الحكاية دي ما عملش كده ليه من اول ما طلبوا منه يتنحى بدل ما كان يبعت لعبد اللطيف المناوي قرار انقلابي؟ ولو هم عارفين انه ماسك عليهم ذلل ما كانوش اتجرأوا ينحوه
تتحل تتحل دي.. شفتوا؟ اهو باب زويلة يفوت عشر جمال اهو
هاه... خلصونا بقى، احنا لا سننا ولا صحتنا يستحملوا: مش سونيا اتصلت بيا؟ - سونيا؟ انت رجعت تلعب بديلك تاني يا راجل؟ - لا.. ما انا قفلت السكة في وشها.. باقولك... عايزة حاجة مني وانا راجع؟ - راجع منين؟ انت خارج؟ انت مش قايل انك قاعد معانا النهاردة وحتخرج العيال؟ - يا ستي باتكلم على بكرة.. وانا راجع من الشغل يعني
اه... كده صعب قوي، خصوصا يعني انها جوازة متعة بالمدة مش طالبة حرقة الدم دي
واحنا نازلين برضه يوم 27 نرفع عنكم الـ... لا مؤاغزة حرج
تحديث:
النطق بالحكم في قضية الشهيد خالد سعيد اتأجل ليوم 30 يونيو على ما يكونوا شافوا صرفة فينا او احنا شفنا صرفة فيهم
تحديث:
تم تكذيب خبر براءة الضابط قاتل خالد سعيد على نفس صفحة الفيس بوك اللي نشرته عشان احنا اصلنا ناقصين بلالين.. نجاتي انتشر على فكرة
تحديث:
الظابط اللي قتل خالد سعيد اخد براااااااااااااااااااااااااااءءءءءةةةةةةةة
احنا بيتعمل فينا حاجة قلة ادب 


تحديث:
انا اتكلمت مع كذا حد اخوان على التويتر وبيقولوا لي: واحنا كل شوية ننزل وبعدين نتشتم ولما تحتاجونا تقولوا لنا تعالوا؟
سبحان الله
جماعة قوامها تلاتة مليون نفر زعلانة عشان خمستاشر واحد بيشتمها؟ ومستعدين تغامروا بأن مبارك يطلع، وجمال يطلع، وعلاء يطلع، والنظام يعيد انتاج نفسه عشان مقموصين؟ 
ده بجد ده ولا هم كام واحد بيفضفضوا اللي في قلبهم؟ ولا هي حجة؟ 
امال انا اعمل ايه بقى؟ انا فرد لوحدي وفيه مجموعات كاملة من البشر عايشة عشاني اساسا وما وراهش غيري؟ اروح انتحر بقى... هو اللي بيعرف ربنا بيقول كده؟ تطوير نظرية داروين ان الانسان اصله وسخ فما تتغرش بناس بتقولك انك حلو لانهم بعد شوية حيقولوا لك انك وحش، لان كل انسان ملكوت لوحده وبيحكم على الناس من نظره هو، لو اتفقت معاه تبقى حلو وجدع وبميت راجل ولو اختلفت معاه تبقى ابن كلب، ويا سلام بقى، يا سلام بقى لما تبقى واحدة ست في المجتمع الوسخ ده، بس اللي شاف ناس بتفرفر قدامه لحد ما تطلع في الروح يعرف ان دي اتمان رخيصة قوي، واللي نازل عشان الناس تقول عليه حلو ما ينزلش، واللي مقموص عشان الناس قالت عليه وحش بالسلامة، واللي فارق معاه محبة الناس وكراهيتهم يروح يدور على قصة حب من بتاعة منى واحمد، وعلى فكرة، حتى قصص الحب بعد شوية بتقلب بملل، ايه نقص الحنان ده؟ وسيدنا عمر بيقول "إنما تبكي على الحب النساء"؟ والنبي انا نساء اهو، او شبه نساء يعني، وما بابكيش على الحب ولا فارق معايا بتلاتة نكلة اللي بيقول لي باحبك من اللي بيقول لي باكرهك ولا فاكرة اساميهم حتى.. واللي قاعدين يبكوا على الحب جماعة عمرها تمانين سنة
ماحدش يزعل.. ماحدش يزعل
اللي نازل نازل عشان ينقذ بلده، لو كل الناس نزلت كتر خيرهم، لو ماحدش غيرك نزل احمد ربنا انك نلت الشرف ده وغيرك لا، وانت ميت وغيرك ميت، موت وانت محترم وغيرك يموت وهو ندل، المهم اللي بعد الموت مش اللي قبله
المهم اللي بعد الموت مش اللي قبله
ومدام مستبيع على روحك يبقى حنتمسك بمطالب الاجماع الوطني عشان ما نديش فرصة لحد انه يمسك علينا غلطة، ولا ندي حجة لحد انه يبقى قاعد في بيته وهو ضميره شبه مرتاح
والله الموفق
------------
تحديث:
مش انا اللي عاملة الفيديو ده، ده واحد اخده مني في الميدان لما لقاني عمالة اصوت واعيط لما عرفت ان جمال مبارك اتحفظ معاه التحقيق
بس كل واحد فينا بقى يعمل فيديو زي ده يقول ليه نازل يوم 27، يقول رأيه بمنتهى الحرية، واياك يفتح سيرة المجلس الرئاسي، مش عايزين حد يمسك علينا غلطة



تحديث:
لو سمحتوا اطبعوا الورقة دي كل واحد يطبع على الاقل عشر نسخ وينزل يوزعها على في الشارع على ناس ما يعرفهمش غير العشرة اللي هو يعرفهم وحيجيبهم معاه
بدل القعدة دي اللي مالهاش اي لازمة، ده فرض عين عليك تطبعها وتوزعها 
انا بيدخل لي عشرين الف في اليوم، حنقول نصهم مش موافق او مش في مصر، يبقى فيه عشرتلاف، لو كل واحد فيهم طبع 10 ورقات ووزعهم وقال لعشر بني ادمين يعرفهم يبقى كده جبنا 200 الف.. غير كده تبقى مالكش لازمة بصراحة.. اتنحرر بقى الله يكرمك
فين ام روح التحرير بقى؟ 
--------------
والنبي الله يكرمكم نركز.. ونحاول نجمع الصفوف، احنا ما اتاكلناش على قفانا كده الا لما اتفرقنا وبقى اليساريين والليبراليين يشتموا في الاخوان والاخوان يغطسوا ويروحوا يجيبوا ورقة بوستة والسلفيين والمسيحيين يقعوا في بعض والدنيا تشرذمت خالص
صلوا ع النبي كده وموسى نبي عيسى نبي محمد نبي وكل من له نبي يصلي عليه
وبحق من قال لموج البحر يهتدي، لتقولوا يا عزيز
انا مش شايفة الناس مختلفة على الاهداف، انا شايفاهم مختلفين على الحلول
والاختلاف على الحلول مش مشكلة... فيه حل كلنا مجمعين عليه اللي هو وقفتنا في الميدان
اللي بيقول تأجيل الانتخابات ده عيل ساقط وعايز يأجل الامتحان
واللي عايز مجلس رئاسي كفران زيي، بس مش لازم يجبر الناس توافق معاه على حاجة هم مش عايزينها، خلاص يا شباب، ننزل على الاجماع واللي يحب البلد اكتر ييجي على نفسه
واللي بيتحجج انه مش نازل عشان اللي بيقولوا تأجيل الانتخابات ومجلس رئاسي بيناقد نفسه، وبيشتغلنا بصراحة، لأنه في نفس الجملة بيقول الاغلبية مش عايزة كده، طيب يا عم انت الاغلبية، ما تنزل تاكل الميدان لصالحك، انت حتشتغلنا؟ 
الله.. جرا ايه؟ ما نزلتوا اليوم اللي ظباط التحرير نزلوا فيه وكان فيه ناس بتقول نازلين نسقط المشير ولما انتوا نزلتوا الميدان اتاكل لصالحكم وبتوع يثقط المثير دول بقوا نملة في غيط
من بات في بيته سلم اصحابه
حد مختلف على ان مبارك وحاشيته لازم يتحاكموا؟ ومش بس يتحاكموا على الفلوس يتحاكموا على الدم؟
حد مختلف ان فيه حاجة مش تمام بتحصل وانهم بيتسرسبوا الواحد ورا التاني؟
حد مختلف ان دول لو خرجوا حيبقى نهارهم نادي ونهارنا احنا اللي مش باين؟ 
حد مختلف على ان التهديد بالازمة الاقتصادية لوي دراع وان مصر فيها اقتصاديين عباقرة يحلوا الازمة الاقتصادية دي في يوم ونص؟ 
حد مختلف على ان التحجج بالازمة الاقتصادية لعدم محاسبة رجال الاعمال الفاسدين ورجال الوطني حجة مش مقبولة؟
حد مختلف على حد ادنى واقصى للاجور؟ 
حد مختلف على ان ما ينفعش شباب طاهر ونقي يتقدم لمحاكمة عسكرية في نفس الوقت اللي الجمل بيدعو فيه للمصالحة مع الحرامية؟
حد مختلف على ان الجمل لازم يمشي امبارح؟
حد مختلف على ان عمر سليمان بيلعب في اساسنا بالفتن الطائفية ولازم يتجاب؟ 
حد مختلف على ان عودة امن الدولة بالشكل ده مش مقبولة وانهم لازم يبقوا تحت اشراف قضائي وحقوقي؟
حد مختلف على ان الشرطة عاد لينتقم.. واذا كان على الشرطة امرها سهل تنضرب تاني مدام بقت مدمنة ضرب، لكن ينفع الجيش يكتفنا للشرطة، خلاص.. الجيش يخلي بينا وبين الشرطة ولا يتدخل لا لصالحنا ولا لصالحهم، واحنا نتصرف معاهم، لكن ظابط شرطة يقول لظابط جيش قدام العيال بتوع السفارة: انا جاي اخد تاري؟ الله الله الله.. هي بقت كده؟ 
من هنا ليوم الجمعة ممنوع الآتي:
1- الخلاف والشقاق
2- الاتهام والتخوين
3- طرح قضايا خلافية
كل واحد حييجي على نفسه عشان اخوه، المهم نرجع الميدان رجعة قوية ويبقى شكلنا محترم
المجانين يمتنعون.. المهم وحدة الصف
الاندال يتنحررون.. عشان وكتاب الله المجيد انتوا اول الناس حتندبحوا، لايموها بقى، بقاء المجانين كمعارضة في مصلحة النظام القديم اللي بيعيد انتاج نفسه لانهم اساسا تغور المعارضة من وشهم، الناس بتكرههم وما بيعرفوش يكسبوا الشارع، بالعكس، كل لما يتبنوا قضية الناس تكرهها كأنهم ثورة مضادة على نفسهم، الناس كرهت العمال من وشهم، وكرهت البرادعي من وشهم، وكرهت الديمقراطية من وشهم، وكل ما يحطوا صباعهم في حاجة يكرهوا الناس فيها.. بالصلاة ع النبي، عاملين زي مبارك ربنا مسلط عليهم نفسهم
فدول مافيش اي خطر عليهم، حيتسابوا يعني، عشان النظام القديم الجديد يشاور عليهم ويقول: لو عارضت حتبقى زي عمو الجرسون 
انما اللي بيعرف يكسب الشارع هو ده اللي حيندبح، وحتبقى مدبحة تاريخية، ومدبحة بتشويه، ومش بعيد يطلعوكوا عملاء وجواسيس وقرف.. لايموها بقى، بلاش غباء
مافيش داعي للندالة
انت بتستندل مع نفسك كده
الايفينت بتاع يوم 27 مايو اهو لو سمحتوا اعملوا اتند وشيروه وفيه المطالب اللي عليها اجماع وطني