Sunday, 29 May 2011

حاضر

البيان ال59 للقوات المسلحة 
الله ينور
صح الكلام ده.. اقصد النصائح اللي بتقول للقوى السياسية بطلوا تشدوا شعر بعض واحترموا نفسكم
بس والنبي خلي اللواء ممدوح شاهين يبطل يقول الشعب صوت على شرعية القوات المسلحة، لإن ده كلام مش حلو، وكأن فيه 22 في المية مش مؤمنين بشرعية القوات المسلحة؟ القوات المسلحة شرعية بوصفها القوات المسلحة اللي بتحمي البلد ومافيش مواطن مصري واحد يعتقد في عدم شرعية وجودها، ايه الكلام ده؟ 
ثم ان الشعب صوت على التعديلات الدستورية... القوات المسلحة ما كانتش نازلة في استفتاء تسأل الشعب بتحبوني ولا بتكرهوني!
اللي بيكره القوات المسلحة المصري يحب مين؟ اسرائيل؟ 
واذا كان اللواء ممدوح شاهين قال هم صوتوا على شرعية ادارة المجلس العسكري لشئون البلاد... بعد اذنه يعني، حد يقول له ان مش مبارك هو اللي نزل الجيش.. اللي نزل الجيش هم الثوار لما يوم 28 قالوا: الشرطة بتضرب فينا عايزين الجيش يحمينا واحد اتنين الجيش المصري فين.. بس الاستفتاء كان على التعديلات الدستورية.. الاستفتاء كان على التعديلات الدستورية الاستفتاء كان على التعديلات الدستوري
يعني الشعب ما قالش للدين نعم... لإن الاتنين وعشرين في المية ما كانوش بيقولوا للدين لا
وما قالش للجيش نعم.. لان الاتنين وعشرين في المية ما كانوش بيقولوا للجيش لا
لا الدين ولا الجيش ولا العلم ولا النشيد الوطني ولا ميدان سفنكس كانوا نازلين في الورقة محل التصويت.. الورقة محل التصويت لها كان مكتوب فيها مواد دستورية.. مواد دستورية.. مواد دستورية
وسواء النتيجة لا او نعم في كل الاحوال المجلس كان حيقعد امال كان حيروح فين، لكن التصويت بنعم بيحدد قعاد المجلس لحين انتهاء الانتخابات في الموعد المنصوص عليه، لكن التصويت لو طلع بلا كان المجلس حيقعد لاجل غير مسمى لحد ما يحددوا موعد تاني للانتخابات.. يعني لو كانت النتيجة طلعت لا كنتوا حتسيبونا؟ طب ايه؟ كنا حنعمل ايه يعني؟ كنا حننتخب مجلس رئاسي؟ طب ما المجلس الرئاسي حيبقى بوجود المجلس العسكري برضه، ما هي هي
وبعدين ما تخلوش اللواء ممدوح شاهين يقول للناس: ما تقولوش عليها مظاهرة حاشدة.. عشان ما كانتش حاشدة، لو كانت عشرتلاف واحد كانت حتبقى حاشدة برضه، لما تبقى 200 واحد تبقى مش حاشدة
وما تخلوش اللواء الرويني يقول لنا: الشعب هو السبب في الانفلات الامني والشرطة قايمة بواجبها على اكمل وجه.. يعني نعمل ايه في الشعب؟ نقتله ولا نرميه ولا نهجره ولا نعمل فيه ايه بالظبط؟ الشعب هو الغلطان؟ طب مش الشعب ده اللي قال للمجلس العسكري نعم؟ يعني الشعب قال للمجلس العسكري نعم وهو منفلت وقليل الادب ومحترم وابن ناس وبيعمل وقيعة بس هو كويس
والنبي خلوا العصار وحجازي هم اللي يكلمونا... بعد اذنكم يعني
وعداكم العيب في البيان ده.. فعلا القوى السياسية لازم يبوسوا بعض ويتوحدوا تاني لإن اللي بيعملوه ده قلة ادب فعلا، وحينتهي بينا اننا نبقى شبه المشهد الاخير في فيلم العار
القوى السياسية لازم يبوسوا بعض.. لايموها بقى، كسفتونا الله يكسفكم.. كده المجلس العسكري خلقه حيضيق، وكمان الشعب حيبتدي يزهق منكم وهو كفاية اللي شافه في حياته بقى، ارحموه شوية
------
اه نسيت.. والنبي المسيحيين لازم يهدوا شوية ويبطلوا يخافوا ويتخضوا كده، عشان اجيب لكم من الاخر: الجيش مش اخوان
الجيش مش اخواااااااان
الجيش مش اخوااااااااااااااان.. وبالعكس، يمكن كمان مش بيحبهم قوي، هو بيعرف يتكلم معاهم عشان هم تنظيم هرمي زيهم، لكن مش متفق معاهم في حاجات كتير
وتربية المؤسسة العسكرية وعقيدتها مختلفة كتير عن الاخوان
المفروض ان الجيش مش مسيس، بس لو مصممين تقاربوا عقيدة الجيش مع فصيل سياسي فهم اقرب للناصريين والقوميين... مش الاخوان
اهدوا شوية.. المشير مش اخوان... وان شاء الله القوى السياسية الاخرى لو شدت حيلها تقدر تاخد مقاعد كويسة في البرلمان
-------
اه.. نسيت حاجة مهمة قوي.. ماحدش يزعل المسيحيين، اللي حيزعل المسيحيين حارميه من الشباك، هم مخضوضين وعايزين حد يطمنهم، وشافوا كتير في حياتهم، وبلعوا دخان كتير وبيكحوا تراب دلوقت بقى.. واولى الناس بالتمييز الايجابي في المرحلة دي هم المسيحيين والفقرا، عشان غلابة ما عملوش لحد حاجة والكل بييجي عليهم من غير سبب.. واللي حيضايقهم ربنا حينتقم منه ويجعله عبرة عشان تبقوا فاهمين، ومش حيكسب، والله العظيم
بدل ما تقعدوا تقولوا لنا الاستقرار الاستقرار الاستقرار وانتوا مش فاهمين معنى الكلمة، الاستقرار الحقيقي ان المسيحيين يطمنوا ويرتاحوا واعصابهم تهدا وما يحسوش ان فيه حاجة بتحاك ضدهم بليل، والاستقرار الحقيقي ان الفقرا ياخدوا حقهم والرعاية اللي يستحقوها وناخد من الحرامية ونديهم بدل ما تقعدوا تشتموا في الباعة الجائلين، والشرطة ما تتعرضلهمش تاني بقى، ومش كل ما تستفقروا عيل تمسكوه وتقولوا عليه بلطجي
احسن ويمين الله ربنا حيورينا كلنا ايام سودا.. الا الافترا على الغلابة، والمسيحيين والفقرا غلابة، وما اذوش حد في حاجة، ليه هم الحيطة المايلة دايما؟

77 comments:

heba662004 said...

الحمد لله الناس اهم بيهتموا بالرد وتاكيد عدم الانحياز لاى طرف ربنا يعدى الفترة دى على خير ويارب الاخوان توصل لهم الرسالة وكمان الاطراف الاخرى ربنا يحمى مصر وتكمل ديمقراطية صح ان شاء الله

Bassem Zakaria El-Samragy said...

أنا نفسي أفهم ليه الحساسية المفرطة من تصريحات شاهين دي
"نعم" في الاستفتاء كانت نعم على التعديلات والسيناريوا كله اللي من ضمنه إن المجلس العسكري يديري شؤون البلاد في الفترة الانتقالية دي مش مجلس رئاسي أو أي حاجة تانية وده اللي بيقوله ممدوح شاهين لأنه مع ده بيؤكد على التزام المجلس الأعلى بالسيناريو وبإنهم عايزين يسيبوا الحكم في أسرع وقت

لكن يبدو إن في ناس اتربّت إن يبقى في حد مخوّفها وماتقدرش تتحرك من غير خوف فبتدور على أي حاجة من أي حد تخوّفها وخلاص

heba662004 said...

آه كنت هانسى .. والنبى ما تفرحوا فينا عمرو اديب شفت برنامجه امبارح بالليل رفعلى الضغط .. هو مصدوم لان شعبيته فى الارض يعنى انا مثلا مش ممكن اقلب على عمرو واسيب يسرى فودة وكمان الباقيين كلهم بقوا احسن منه منى وريم وحتى شريف هربنا يريحنا منه هو ورولا وهبة الاباصيرى ولبنى عسل ياااارب

Bassem Zakaria El-Samragy said...

أنا نفسي أفهم ليه الحساسية المفرطة من تصريحات شاهين دي
"نعم" في الاستفتاء كانت نعم على التعديلات والسيناريوا كله اللي من ضمنه إن المجلس العسكري يديري شؤون البلاد في الفترة الانتقالية دي مش مجلس رئاسي أو أي حاجة تانية وده اللي بيقوله ممدوح شاهين لأنه مع ده بيؤكد على التزام المجلس الأعلى بالسيناريو وبإنهم عايزين يسيبوا الحكم في أسرع وقت

لكن يبدو إن في ناس اتربّت إن يبقى في حد مخوّفها وماتقدرش تتحرك من غير خوف فبتدور على أي حاجة من أي حد تخوّفها وخلاص

Bassem Zakaria El-Samragy said...

أنا نفسي أفهم ليه الحساسية المفرطة من تصريحات شاهين دي
"نعم" في الاستفتاء كانت نعم على التعديلات والسيناريوا كله اللي من ضمنه إن المجلس العسكري يديري شؤون البلاد في الفترة الانتقالية دي مش مجلس رئاسي أو أي حاجة تانية وده اللي بيقوله ممدوح شاهين لأنه مع ده بيؤكد على التزام المجلس الأعلى بالسيناريو وبإنهم عايزين يسيبوا الحكم في أسرع وقت

لكن يبدو إن في ناس اتربّت إن يبقى في حد مخوّفها وماتقدرش تتحرك من غير خوف فبتدور على أي حاجة من أي حد تخوّفها وخلاص

Mohammed said...

يا نوارة ما هي غزوة جمعة الغضب دي اللي خسر فيها الاخوان هتعمل انقسام تاني زي ما حصل من غزوة الصناديق

ما كانش صح الدعوة للغضب من الجيش والحشد بالطريقة دي ثم التراجع في اخر لحظة عن مهاجمة الجيش

كانت خطر وكانت غلطة

برضه مش كل اللي ما نزلش
كان اخوان
ولا سلفي
ولا فلول

كان مصري وطني وله رؤية معينة

عموما


الحمد لله
الحمد لله
الحمد لله
الحمد لله



بس احنا كنا على مشارف خطر عظيم


و ربنا سلمها من عنده
مع حكمة الجيش برضه



بس المهم ان بعد اليوم ده


نقفل الملف ده تماما


لا يعتبر هذا انتصار على الاخوان1-


وطبعا اعتباره انتصار على الاخوان في حد ذاته مش مشكلة كبيرة


اهو يبقى كويس عشان يفتكر الفريق الثاني انه قوي بس المفروض ما يتغروش



بس اللي احنا خايفين منه ان يتم تخوين الاخوان واتهامهم بالتخلي عن الثورة والمحلسة للمجلس العسكري او التظبيط معاه


وهذا غير صحيح لأنها كانت مجرد رؤية سياسية


(صحيحة فيما أظن)


فليس من الحكمة تخوين الاخوان او محاولة اقصاءهم من المشهد الوطني


وهذا خطأ كبير سيصيب الاخوان وايضا باقي القوى



والافضل هو نسيان الماضي واعتبار ما حدث اختلاف رؤى في عائلة وطنية واحدة



ويجب احتواء الاخوان في ائتلاف عام يضم القوى الوطنية ويدخل الانتخابات بقائمة واحدة ستمنع نجاح كل الفلول وستضمن عدم نجاح الاخوان الا بنسبة محدودة متفق عليها سلفا


2- لا يجب ان يغتر المجلس العسكري بالقلة النسبية للاعداد ويتصور ان الشعب موافق على اخطاؤه وتباطؤه
وبالتالي تزيد الفجوة بين الجيش والشعب

يجب ان نتمتع جميعا بأدب الاختلاف ورحابة الصدر حتى نعمل للوطن

sum_1_ said...

العدل أساس الملك
مفيش عدل = مفيش أساس = مفيش ملك
اللي عاوز يقعد على الكرسي من غير ما حد يقولو ارحل يحكم بالعدل
كل دة مهاترات طول ما مبارك في شرم و أهالي الجرحى مش لاقيين يعالجوا ولادهم
أطالب وزارة الصحة بتوزيع الجرحى على مستشفيات الداخلية و المستشفيات الخاصةو مستشفيات القوات المسلحة كمان مش هما دول اللي كانوا بيحاربو لما كان الجيش بيتفرج؟

keno_2010 said...

تمام يافندم وربنا يوفقكم

ام العيال said...

والمصابين ياعيال محدش ينساهم والا هيبقى ظالم وخاين وربنا يبارك له محمود سعد

ام العيال said...

والمصابين ياعيال اوعوا تنسوهم لنبقى ظلمة وملناش خير فى ومحمودسعدالله يبارك له نساعده

kbahey said...

لماذا يكذب اعضاء المجلس العسكري


من واقع تقرير تقصي الحقائق الرسمي

http://ffnc-eg.yahyaonline.com/assets/ffnc-eg_final.pdf


لماذا ينكر اللواء الرويني انه يعلم هوية القناصة في ميدان التحرير و لا يعرف الجهة التابعة لهم في حين ان تقرير لجنة تقصي الحقائق اكد انهم تابعين لامن الدولة شعبة مكافحة الارهاب، و انه تم القبض على احدهم في الجامعة الامريكية و تسليمه الى الجيش؟

http://www.shorouknews.com/ContentData.aspx?ID=465372

لماذا سمح الجيش بمرور بلطجية النظام و الجمال و الخيول و سيارات نقل تحمل كسر رخام و تيل فرامل كما هو واضح في اكثر من فيديو لوكالات انباء عالمية؟ الم يكن الجيش يفتش الجميع في كل الايام السابقة و التالية؟

kbahey said...

يوجد خلاف في خارطة الطريق بين الوزارة و المجلس العسكري


مثلا قال عصام شرف على الهواء انه يتمنى ان يوضع دستور قبل الانتخابات

http://gate.ahram.org.eg/News/73470.aspx


و طالب وزير العدل بتأجيل الانتخابات البرلمانية

كما هاجم المحليات و اعتبرها جزء من الحزب الوطني المنحل

http://youm7.com/News.asp?NewsID=423064

و لكن في مقابل هذا نجد موقف المجلس العسكري حسب تصريحات اللواء الرويني هي

إجراء الانتخابات البرلمانية في موعدها قبل نهاية شهر سبتمبر

و قال إنه لن يمر هذا العام إلا وينتخب رئيس للجمهورية

ونفى اللواء الرويني إمكانية حل المجالس المحلية متعللا بأن القانون ينص على إجراء انتخابات بعد 60 يوما من قرار الحل.

http://www.shorouknews.com/ContentData.aspx?ID=465372

و معنى هذا ان البرلمان الجديد سينتخب لجنة للدستور و تكتب الدستور و عرضه للمناقشة و الاستفتاء عليه في اقل من شهرين تمهيدا لانتخاب الرئيس في ظل الدستور الجديد

هل هذا واقعي؟

sa6560 said...

عارفه يانواره أنا بحب أتابعك ليه؟؟؟علشان بتتكلمي الكلام اللي الناس العاديه بتفكر فيه وبتقوله،،الناس اللي ملهاش أي ميول سياسه غير إن مصر تبقي أحسن بلد ف الدنيا ...ناس عاديه زي أناوولادي وأقرايبي وأصحابي ..بس يا ريت يكون المجلس ود.عصام يكونوا بيتابعوا الكلام ده..وياريت يفتحوا باب حوار بجد مع كل التيارات قبل أي قرارات أوتصريحات....ربنا معاكي

arabian_faithful said...

أفهم بقى نقطتين لوجه الله

دلوقتى غزالى حرب و جورج إسحاق بيقولوا أن الجمعة اللى فاتت كانت علشان تبين أن الشعب يريد الدستور أولاً وتأجيل الإنتخابات لمنح الجميع فرصة متساوية
طيب مش ده كلام يفقع المرارة مش ده كلام يخلينا ننزل الشارع بملايين بقى بحق ربنا مش ده كلام معناه أنك ضحكتى علينا لما قلتلنا محدش طلب مجلس رئاسى ولا دستور أولاً



تانى حاجة مال الأخوان ومال المسيحيين نفسى أفهم عملوا أيه الأخوان لدول كمان ياشيخة والله العظيم أنا دلوقتى بأحس أن الأخوان مضطهدين فى بلدهم أكتر من أى حد طيب أنا عاوز أعرف المسيحيين شافوا عشر اللى شافوه الأخوان على مدار عمرهم كله أتقى الله أتقى الله أتقى الله
حرام عليكى ترمى الناس بالباطل والله العظيم أخر رمية الناس بالباطل دى مش كويسة

المولى عز و جل بينتقم لكل مظلوم ولو بعد حين

14681324-88c3-11e0-8e24-000bcdcb5194 said...

بجد يا ست نوارة انتى عندق اى اعتقاد ان جمعة 27 نجحت باى شكل من الاشكال.. طيب خلينا كدة نحللها .. اولا المكاسب صفر بمعنى الكلمة رد فعل المجلس العسرى كان تهكم يصل لدرجة الاحتقار والازدراء وبالتالى الرسالة موصلتش اصلا .. وازدادوا عندا فى تطبيق خارطة الطريق المتفق عليها ... وطبعا الاخوان والسلفيين وكل القوى الايديولوجية طلعت كسبانة مليون فى المية .. ودة بشاهدة صحيفة لوس انجلس تايمز مش كلامى انا .. واخيرا كم التلاسن والتراشق الحقير والوضيع اللى شفناة .. بجد يمكن ان تسمى هذة الجمعة بجمعة العار والشنار وجمع الخسائر ..نفسى افهم من العبيط المختل اللى خطط ليها اصلا .. غير اننا كنا نتمنى نشوفك وانتى بتترمى تحت دبابة زى ما قلتى لو متحققتش نتائج ... واللة يا نوارة انتى اخداكى الجلالة على الاخر وطلعتى بنتائج هى والعدم سواء

د: اسامة

Tears said...

انتى مصرة تعلمى نفسك مش شايفة

ايوه المجلس مش اخوان لكن مصلحته معاهم على المدى القصير و تحالفهم ح يضرهم همه الاتنين و ح يولع مصر و ح تشوفى

الصفقة هى الشرعية مقابل الشارع بس يوم الحمعة اللى فاتت حسس المجلس انه اشترى سمك فى ميه او تقريبا ماطلعش سمك اساسا

سبب كل المشاكل اللى بنعانى منها حاليا مش الاخوان انما المجلس...قلنا الف مرة عارفين ان كل النظام فاسد لكن مادام وقفتم معانا او احنا بنقنع نفسنا بده فملناش دعوه بفسادكم قبل 25 يناير بس همه مش مصدقين و دى المشكلة

hardway said...

مش مبارك هو اللي نزل الجيش.. اللي نزل الجيش هم الثوار لما يوم 28 قالوا: الشرطة بتضرب فينا عايزين الجيش يحمينا واحد اتنين الجيش المصري فين.
.....................................
أنت %100 دماغك ضربت من يوم جمعة 27 قرطاس
لالالا..الفيوزات كلها لمست والدماغ أنهارت
معقول ده كلام ناس محترمة..لما تقول ان جيش دوله محترمةيترك ثكناته وينزل المدينة علشان قلنا له واحد أتنين..معقول عيب
أما لو قلتي له تلاتة أربعة كان عمل ايه..؟؟؟؟؟؟؟؟؟؟؟
يا أخ سناريست..يا أخ يعقوبيان..
فهموا الحاجة ان هذا الكلام عـيـب
وعيب أكثرلما يكون علي جيش مصر
واحد اتنين تلاته اربعة ده في سيرك القراطيس

sum_1_ said...

للأسف يا أستاذة نوارة فساد العلاقة بين المسلمين و المسيحيين هو جزء من فساد علاقة المسلمين بربنا
ربنا يهدينا

magda said...

أكيد طبعا الاخوان مستهدفين والكل يعمل علي اغتيالهم معنويا وكل الإعلاميين المتصدرين للمشهد السياسياجتمعوا علي ذللك بمنتهي القوة والإصرار مع انهم ليسوا الوحيدين الذين لم يشاركوا في المظاهرات يمكن البيان اللي اصدروه خانهم التعبير فيه بس مايكونش النتيجة الهجوم عليهم بذلك الشكل وحتي التشكيك في اهم جزء من الثورة بلاش ظلم

candy said...

معلش اسمحيلى اختلف معاكى

الأخوان أخدوا أكنر من مساحتهم بسماح من الجيش ... مش ذنبنا أنهم القوى الوحيدة المنظمة ، بس الحمد لله أهم دلوقتى -وشئ لايصدقه عقل- عاملين حملة بيكرهوا الناس فيهم بأمانة وأخلاص مالهمش حدود ، من أول الامتناع عن المشاركة الجمعة اللى فاتت ، واللى خلت الناس تطلعلهم القديم والجديد وتقولهم أنهم أصلا كانوا مطلعين بيان رسمى أنهم مايشكركوش ، نهايتا بالأخ صاحب نظرية الفلوطة ، واللى كان فى لجنة تعديل الدستور.

ثانيا المسيحيين ركبهم مش بتخبط فى بعض ولا حاجة ، وثقتنا فى ربنا ، وفى مصر ، وفى المصريين المصريين بجد بتخلينا ننام من غير كوابيس عادى.
أحنا مش جالية هاتترحل ، ومستنين حد يقول أنهم مادولنا الفيزا.

عارفة أن أنتى مش قصدك كدة ، وأنك ممكن تكونى بتتلكمى من واقع شفتيه ، وبدافع المحبة الوطنية الخالصة.

بس أنا برضه بقربلك وجهو نظر أغلب المسيحيين اللى عارفين من تاريخهم أنه "ياما دقت ع الراس طبول" وعادى ... من غير حماية دولية ولامهلبية أحنا مصريييييييييييين.

اللى عايز يمشى زيه زى أحد تانى طفش من البلد ولا يكلف الله نفسا غلا وسعها ... ونسبة الطفشان من المسلمين والمسيحيين متساوية لأن كلهم كفروا خلاص.

بس اللى ناوى يقعد من بيتشكك من تصريح هنا ، وإشاعة هناك ، وقنبلة ، وعايز أختى والليلة الخربانة دى.

Jameel said...

بسرعة بسرعة و هيه لسة العواطف مشعللة يترتب لجمعة مليونية (10 يونيو مثلا ) و إديها توحيد مطالب و مصالحة و طنية و كتابة ميثاق شرف للعمل السياسي ( خالي من التخوين و التكفير ) و يقسم الجميع على الإلتزام به في ميدان التحرير. و منصورة يا مصر بشعبك العظيم
ملاحظة : عجبني رأي عصام العريان في الشرطة أنا من زمان بقول يغورو و الشعب يحمي نفسه بنفسه لحد ما يتم تكوين جهاز أمن مدني غير مركزي و إذا خايفين على ال 1% الشرفاء في الشرطة ممكن يساعدو في تكوين و إدارة الجهاز الجديد.
أصلا إلي مقوي عين البلطجية هوه إنو مأمنين للشرطة و عارفين آخرهم

ساعي الخير said...

الأستقرار الحقيقي في العدل

و ان اللي يغلط يتحاسب

و المسيحيين مش كلهم أرثوذكس

و الأرثوذكس هم اللي بيحيكوا حاجات ضد الشعب

و هم اللي بيولعوها برة و جوة

و هم اللي عايزين دولة زي الفاتيكان

و هم اللي هتفوا عايزين حماية دولية

و هم اللي بيظلموا بعض و يعملوا محاكم تفتيش

و ربنا ما يرضاش الظلم و الطرمخة

و ما تطرح ما تحطي راسك حطي رجليكي

يا شيخة قولي الحق كفاية بقي

حرام عليكي

بلاش تولعيها بالأنحياز الأعمي

إلهي اللي ما يرضي بالعدل و يقول الحق

يعمي

و تتوفقي للخير و الخير لأهله نعمة

bang887 said...

------------------------------------
وتربية المؤسسة العسكرية وعقيدتها مختلفة كتير عن الاخوان
------------------------------------

تقصدى فى السياسة، أن المؤسسة العسكرية تطعن فى الظهر وكلمتها زى كلمة البرادعى كل واحد ممكن يفهمها لصالحه؟

أم تقصدى فى الدين إن عقيدة المؤسسة العسكرية تحلل الخمر وتبيح الزنا؟

bang887 said...

لماذا يضيع اللبراليون والعلمانيون الوقت والمجهود والأموال فى مهاجمة الإخوان المسلمين. إليس الأجدى أن يستفيد العلمانيون من هذا الوقت والمجهود والأموال لتعريفنا بمن هم؟ من هم؟ .... كل ما أعرفه عنهم أنهم الشتامون لأى شىء إسلامى.

حواديت مصرية said...

تانى غلطة للاخوان بعد الاستفتاء ولازم يفهموا ان الناس كانت بتدى صوتها للاخوان نكاية فى الحزب الغير وطنى والان بعد زوال المخلوع وحزبه سنعطى صوتنا للاخوان نكاية فى من فى الشعب انا اسف والى الاخوان انتم على طريق خسارة كل الاصوات التى كانت مؤيدة لكم وموضوع نسبة الاخوان فى الوطنى لم ولن تزيد عن العشرين فى المائة انتم تبحثون عمن يعقد معه صفقات ونحن كشعب لانعقد صفقات مع احد

Ahmed said...

الله..الله
اية الطيبة و حسن النية دى كلها
المجلس العسكرى بيعرف يتعامل الناس كلها كويس اوى و يتعامل حتى مع الجن الازرق مش مستنى يبقاله شكل هرمى عشان يعرف يتعامل معاة و اظن مافيش اكبر من هرم الكنيسة و مع ذلك مش عارف يتعامل معاها غير بنفس الطريقة بتاعى ة الرئيس المخلوع
ثم ان هناك مقولة شهيرة جدا اسمها فرق تسد
المبدأ دة اصلا مبدأعسكرى بالاساس و الجيش عموما بيعرف يستخدمة كويس جدا جدا جدا
اما بالنسبة لكلام الاخ اللواء ممدوح شاهين فهلينا ننظر ابعد منة شوية
المجلس العسكرى لو عاوز يقدر يعمل متحدث رسمى او اعلامى ناخد منة الكلام ويبقى مسرل عن اللى بيقولة او حتى يكتفى ببيانات الفيس بوك انما من الواضح انة مش عاوز حاجة زى دى لأن دى عملية توزيع ادوار عشان يعرف يعمل الباللونات بتاعة كل مرة من غير ما حد يلوم على المجلس

جبهة التهييس الشعبية said...

اي كلب حيشتم المسيحيين ما يجيش هنا تاني

متفائل said...

واولى الناس بالتمييز الايجابي في المرحلة دي هم المسيحيين والفقرا، عشان غلابة ما عملوش لحد حاجة والكل بييجي عليهم من غير سبب.. واللي حيضايقهم ربنا حينتقم منه ويجعله عبرة عشان تبقوا فاهمين، ومش حيكسب، والله العظيم

أولاً : إسلوب (اللي حايجي على المسيحيين مش حيكسب) ده .. ليس إسلوباً يصلح لبناء الدول .. دي (إسلوب خالتي) وهو يصلح لقعدة المصاطب لا لتأسيس دولة سيادة القانون التي يتساوى فيها الجميع في الحقوق والواجبات فلا تطغى فئة على أخرى ولا تحتاج فئة أن تكون متميزة عن الأخرى
ثانياً : تصور أن المسيحيين فقط هم من يخشون وصول الإخوان إلى الحكم هو تصور خاطيء ولا علاقة له بالحقيقة .. هناك قطاع كبير جداً من المسلمين يشاركون المسيحيين ذات المخاوف ويرفضون إنفراد الإخوان بالحكم ذات الرفض ولقد قابلت في محيط عملي الكثير والكثير جداً من هذه النماذج
ثالثاً : محاولة الوقيعة بين شباب الإخوان وشيوخهم تلك التي تحاولينها لعبة قديمة جداً ومهروشة جداً ولن تنطلي عليهم .. إلعبي غيرها يا بنت عم نجم

yosef200077 said...

طنط نوارة و حياة طنط صافى وعم نجم تبطلى تهرتلى و تقولى الجيش حيزهق و يمشى و الكلام الهطل ده
الجيش ده موظفين عند البلد بيقبضوا و احنا عطناهم مهمة ينفذوها يعنى شغالين عندنا بمرتب اللى يزهق يستقيل يا حبيبتى او يدور على عقد عمل

bang887 said...

أخونا (مؤمن عربى) ، ليه تطلب المستحيل؟ ... تقول لنوارة "حرام عليكى ترمى الناس بالباطل" ..... إزاى تطلب من إعلامي أن يمتنع عن رمى الناس بالباطل؟

وبعدين كلمة "حرام" دى، يعنى إنت بتدخل الدين فى الدنيا والمعاملات، وده ممنوع عند الليبراليين.


نوارة تعمل بمبدأ أن ربنا قال {فَوَيْلٌ لِّلْمُصَلِّينَ }الماعون4،
ولم يقل ويل لأى حد تانى.

علشان كدة تلاقى نوارة لما المسملين يندبحوا ويتحبسوا فى الكنائس والأديرة لا تسمع لها حساً.
ولو واحد من الأوغاد "المصلين" تعرض لننوس من "غير المصلين" تجدها
{... سَلَقُوكُم بِأَلْسِنَةٍ حِدَادٍ ... }الأحزاب19


يا نوارة :

{... فَسَوْفَ يَأْتِي اللّهُ بِقَوْمٍ يُحِبُّهُمْ وَيُحِبُّونَهُ أَذِلَّةٍ عَلَى الْمُؤْمِنِينَ أَعِزَّةٍ عَلَى الْكَافِرِينَ ... }المائدة54
يا نوارة، أقوالك وأفعالك ذليلة لمين، وعزيزة على مين؟!!!

{مُّحَمَّدٌ رَّسُولُ اللَّهِ وَالَّذِينَ مَعَهُ أَشِدَّاء عَلَى الْكُفَّارِ رُحَمَاء بَيْنَهُمْ ... }الفتح29
يا نوارة، أفعالك وأقوالك شديدة على مين، ورحيمة على مين؟!!!!

{لَا تَجِدُ قَوْماً يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءهُمْ أَوْ أَبْنَاءهُمْ أَوْ إِخْوَانَهُمْ أَوْ عَشِيرَتَهُمْ .... }المجادلة22
يا نوارة، الود كله عندك لمين؟

arabian_faithful said...

أحنا حنرجع تانى لمسلمين و مسيحيين!!
هوا فى حد قال حاجة ولا أنتى شفتى حاجة جديدة!

أنا ساعات بأحس أنك مبترديش تكتبى كل اللى أنتى عاوزة تقوليه

بس أنا مش طالب منك غير الحقيقة فى وصفك لأى مشهد
الحقيقة و بس أنا بصراحة بأثق فيكى و نفسى أنتى كمان تثقى فينا أننا حنستحمل أى حاجة فى سبيل الحفاظ على الأمل بس لوجه الله نفسى تاخدى عهد على نفسك أنك دايماً حتقوليلنا الحقيقة زى ما هيا و بدون حذف حاجة و بدون تجميل و بدون تحريف

و ياريت نفكر فى حاجة تجمعنا نعملها كلنا نعمل إكتتاب عام لأى مشروع قومى نطلب من الدولة تطرح أذون خزانة صفرية الفائدة لمساعدة الإقتصاد نعمل حملة تبرعات للعشوائيات دول أهم ناس لازم نهتم بيهم
نعمل أى حاجة تحسسنى أنى فعلاً بأعمل حاجة لمصر مش لحزب أو جماعة
نعمل أى حاجة نفتخر بيها أمام المولى عز و جل

الشبكة المستقلة said...

اللي بيأولوا ان مفيش خوف من المجلس العسكري انة ياخود السلطة فياريت يقرأوا تاريخ كويس و هو فعلاً عملها قبل كدة
ما ننساش انهم ادونا اكبر خازوق و هو مبارك

mgamal said...

د.عماد جاد خبير بمركز الأهرام للدراسات صرح فى برنامج صباح الخير يا مصر على الفضائية المصرية يوم السبت 28-5 -2011 الساعة 9:20 دقيقة بأن المظاهرات فى ميدان التحرير يوم الجمعة 27-5 فاقت النصف مليون خلاف باقى المحافظات - الإستفتاء كان على بعض بنود فى الدستور وليس على شرعية المجلس العسكرى او شرعية الاخوان او شرعية السلفيين وايضا ليس ضدهم او الدستور الاول ولا مجلس الشعب الاول وكفاية لعب على الناس - المارد خرج من القمقم والشعب اتعلم ومش ح ينضحك عليه تانى ابدا

Ahmed said...

كان يصح تقرى الكلام و تفهمية كويس و كمنى هاتلاقى نفسك فى غنى عن الشتيمة والعواء

وعلى فكرة ..رغم ان دة لا يعنينى و مش موضوعنا انما اللى بتعملية دة مش هايثبت حبك للمسيحيين قد ما هيثبت كرهك للمسلمين

Ahmed said...

انا هاكتفى بأن الناس تشوف اسلوبك

arabian_faithful said...

أنا أسف ماكنتش واخد بالى أن فى حد بيخرف شوية هنا

بس متزعليش من حد و حاولى تفهمى الناس أحنا سهل أننا نهاجم بعض بس الصعب أننا نحاول نكلم بعض و نوضح الحقايق لبعض بلاش كل حد يغلط نهاجمه نفسى نزود السماحة شوية فى حياتنا أكتر من كده


كلمة أخيرة للأخ اللى بيهاجم المسيحيين أنا كنت فى مدرسة أسمها المحبة وأنا صغير وكانت تحت إشراف الكنيسة الأرثوذكسية و والله العظيم قضيت فيها أحلى أيام عمرى و عمرى ما حسيت بفرق بينى و بين أى حد بس يمكن أياميها كانت البراءة و السماحة أكتر من الأيام دى شوية بس مش مهم أنا متفائل فى وجه الله عز و جل خير وحاسس أن مصر حتبقى أحلى دولة فى الدنيا كلها وياريت بس نحب البلد شوية أكتر من كدا لأنها تستحق مننا أكتر من كدا

Abo Maro said...

نوارة ممكن لو سمحتى تنشرى الفيديو ده http://www.youtube.com/watch?v=0MppnW4AUaI

Struggler said...

لما تبطلى سب دين يبقى نسمع منك

nosseir said...

الحل مش فى تأجيل الانتخابات ..لو اتأجلت مليون سنة برضة الاخوان هيكسبوا لانهم بادئين من زمان ولهم حق...والحل مش فى دستور اولا لان خلاص الناس اختارت مسار معين ومحدش يقوللى المجلس غلط وقفز على التعديلات بلاعلان الدستورى ززززغلط طبعا لان ما كنش ينفع يرجع الدستور القديم الذى لا ينص اصلا ولا يحتوى على مكان للمجلس الاعلى كقائد مكان رئيس الجمهورية ..يعنى كان هيبقى وجود المجلس الاعلى غير شرعى اساسا فى حالة عودة الدستور القديم
طب اية الحل؟ احل يا ناااااااااااس هو اجبار الاخوان على التوافق لاخراج الدستور القادم....التواااااااااافق...طب دة يبقى مبمؤتمر حوار وطنى وقومى والكلام دة؟ لا كل دة فشنك...الحل هو تعديل صغير يعملة المجلس الاعلى فى الالية اللى هيخرج بيها الدستور الجديد للناس عشان يستفتوا علية الحل هو الاتى
تعالوا نحل مشكلة الخوف من انفراد الاخوان بعمل الدستور الجديد فى ضوء المسار الذى تم الاستفتاء علية فى 19 مارس الماضى
اقترح ان يتم وضع شرط موافقة 85 % من اعضاء مجلس الشعب القادم على الدستور الجديد قبل عرضة على الناس فى الاستفتاء
ونظرا لانة مستحيل حصول الاخوان على اكثر من 40 % فى المجلس القادم
وحتى لو اضفنا لهم القوى الاسلامية الاخرى فلن يذيد مجموع التيار الاسلامى عن 60 % من المجلس
وبهذا يتم دفع التيار الاسلامى بشكل عام الى التوافق مع القوى الاخرى
حتى يستطيع اخراج الدستور الذى يحتاج 85 % من اصوات اعضاء المجلس
وبهذا نخرج بدستور يرضى عنة الجميع بدون الانقلاب على المسار الذى تم اختيارة فى الاستفتاء
ارجو نشر الاقتراح

amal said...

ايه الكلام الكبير ده يا نوارة برافوا عليكى عايزة اقولك , وجون ..وجون ..وجون بس يارب الحدق يفهم , وبس مش حقول اكتر من كده, بس عايزه اتكلم على موضوع انا شايفه انه مهم جدا : شاهدت حلقه لوائل الابراشى عامل مناظرة بين ائتلاف شباب الليبرالى و ائتلاف شباب الاخوان , والشباب الليبرالى لفت النظر لموضوع عجبنى جدا وهو انهم طالبين من مجموعه من العلماء والخبرا مثل الشيخ القرضاوى مثلا بان يضعوا مفهوم الدوله المدنيه والمفهوم اللى سيتم التعامل بيه على اساسها لانهم يروا ان مفهوم الدوله المدنيه يحتمل اكثر من معنى اى مطاطى وغير واضح وعوزين تعربف موحد يتفق عليه كل قوى الشعب ويتم اثباته فى الدستور الجديد حتى لايستخدمه من سيتولى السلطه على اساس مفهومه هو , لان كل حزب او مرشح بيقول انه حيعمل على ان تكون الدوله دوله مدنيه طب ايه قصده بالدوله المدنيه دى علشان نتفق على اسس معينه الكل يلتزم بيها وتبقى ثابته وماتتغيرش حتى لوتغيرت السلطه ..ياريت تهتمى بالموضوع ده, لانى اعتقد انه فعلا مهم حتى لو كنا واثقين فى نية المرشح الحاضر لا نعرف مرشح المستقبل ماذا تعنى الدوله المدنيه عنده , وربنا معاكم ويوفقكم ويحرس مصر دايما وتكبر بيكم ان شاء الله

lastcrazyboys said...

قــانون مجلس الشعب يقر نسبة الـ50% فلاحين وعمــال

على الرغم من إني مش متوافق مع القــانون ده

بس الحـاجة الوحييييدة اللي بسطتني .. إنك كنتي مستنية خبـر حلو ليكي كـده

وبصفتـك "فتـاة الثورة" الحقيقية اللي مابتجريش ورا التلافزيونات

أحب أهنيكي بغض النظـر عن رؤيتي الشخصية للقـانون

هنئيــاً لك يا اختــاه .. وهنيئــاً لمصــر بك


وخلاااص بقى عشان انا ديمعتي قريبة زي مانتي عـارفــة

Ibrahim said...

المفروض من دلوقتي يكون شعارنا
(( مرحلة ما بعد المجلس العسكري ))
المجلس العسكري خلااص عمال يفلفص و يقول سيبوني اروح بقه
و إحنا عاملين زي الأطفال اللي مصممين يمسكوا في الأب الحنون اللي يحقق مطالبهم
و خايفين من كل حاجة
أظن إحنا كبار و نقدر نتولي مسئوليتنا بنفسنا
قدامنا انتخابات برلمان و انتخابات رئاسية و دستور نكتبه و بلد ننظفخا و نبينها
شكرا يا مجلس يا عسكري و باي باي

بالا نكبر و نتحمل مسئولية

ملكش دعوة said...

هههههههههههه عجبتيني اوي وانتي بتحسسي علي الاخوه النصاري وبتقوليلهم متخافوش يا حبايبي الجيش مش اخوان مش هيطلع باليل ياكلكوا متخافوش
يا ست الكتكوته انتي لو حلفتيلهم علي الانجيل طالما انك ضد رغباتهم مش هيصدقوكي واسألي اونكل ساويرس
لا بس حلوه منك ههههههههههههه

ملكش دعوة said...

اي كلب حيشتم المسيحيين ما يجيش هنا تاني
ودي بأه حلوه موووت منك تصدقي حبيتك بجد
انا بس عايزاكي تهدي عشان النرفزه مش حلوه علشانك البوست ده واللي قبله انتي مش تماااام
ما تقيسي الضغط

Struggler said...

برضة مش هتبطلى سب دين

أبو هاجر said...

ست الكل مساء الخير

عن المسيحيين أتحدث

شوفي يا النوارة، أنت تضعين مقدمة غير صحيحة ، تاليا نتائجك كلها غير صحيحة . أنت تتحدثين عن المسحيين وكأنهم كتلة واحدة متجانسة ،بل حديثك بالطريقة العاطفية يوحي وكأنهم مجموعة من ذوي الاحتياجات الخاصة تحتاج إلى رعاية خاصة .وهذا كلام غير صحيح . المسيحيين غير متجانسين وهم جزء من نسيج مصر الاجتماعي، بمعنى توجد من ضمنهم طبقة رأسمالية وطبقة وسطى ،كما يوجد فقراء منهم والطبقة الرأسمالية المسيحية تستحوذ على جزء كبير من الاقتصاد المصري بعض الباحثين يرون انه لا يتناسب مع حجمها الحقيقي وهذه الطبقة جزء كبير منها مرتبط بمنظومة الفساد وكانوا جزء مكون للنظام السابق ،كما كانوا داعمين له لارتباط المصالح حتى بعض رؤوس الكنسية كانوا قلبا وقالبا مع النظام ومع التوريث ودافعوا عنه حد الاستماتة .ولا أستبعد أن البعض منهم لازال متحالفا حاليا مع بقايا النظام . أما الفئات الوسطى المسيحية فهي الأخرى غير متجانسة ولا أريد أن اذكر أسماء لكن لا يستوي من هم مرتبطين بالسفارات الأجنبية مع جورج اسحق هذا المناضل الوطني ولهذا فالحديث عن المسيحيين بذلك الأسلوب وتلك الطريقة لا يسهم إلا في التعمية الفكرية ولا يقدم إي معرفة حقيقية عن حقيقة هذا الجزء المكون للمجوعة الوطنية .
تحياتي الخالصة

Ahmed elshebli said...

?

مصطفى شعبان said...

ان عوامل نجاح الثوره هى وحدها الكفيله باستمرارها رغم كل العقبات التى تقابلها مهما اختلفت هذه العقبات - اما عن هذه العوامل فاولها :
- وحده الهدف ووحده الكلمه
- كان الجميع يتكلم فقط عن مصر ولا يرفع الا علم مصر
- التجرد وانكار الذات وعدم البحث عن تحقيق مكاسب شخصيه
- ان يتحمل كل المصريين مسئولياتهم تجاه مصر

مصطفى شعبان said...

على كل القوى الوطنيه والائتلافات والرابطات ان توحد كلماتها وتنسى كل شئ الا مصر فمن اجلها لابد ان نضع ايدينا فى ايد بعض - لابد الا نرفع شعارا ولا راية الا علم مصر - فمصر فوق الجميع

hitham_47 said...

شوفي يا نوارة و اسمحي ليه اقولك نواره كده حاف يعني اولا لازم تعرفي انك من دلوقتي شخصيه عامه يعني لازم تستحملي ساخافات من الي شوفتيها النهارده في الكومنتات دي بس انا عايز اقولك انتي يا بنت الحلال صح و انا مقتنع بكل الكلام الي انتي قولتي و مش مهم اكون انا او حتي مصر كلها مقتنعه قد ما مهم انك تكوني انتي مقتنعه برأيك و انا مش هعمل زيهم و افضل ارزع فيهم شتيمه و كلام بيوجع زي انك انتي ارجل من كتير منهم ( و ارجل دي متمنعش انك زي القمر ) و انك كنتي قاعدة في وسط الميدان و الله اعلم بالي بيشتمو دول كانو بيعملو ايه ساعتها لكن انا استفزني اوي البني ادم الي زعلان اوي عشان انتي بتقولي ان الجيش نزل عشان احنا قلنا واحد اتنين الجيش المصري فين عايز اقوله هو الجيش ده بتاع مين مش بتاع الشعب و لما الشعب يكون بيضرب عليه نار و بيتقتل و يطلب حمايه الجيش بهتاف زي الي هتافات كتير اتقالت مطلوب من الجيش يعمل ايه ينفذ التعليمات الي كانت عنده و يضرب في الشعب هو كمان يا اخي.... ولا اخي ايه يا راجل ... ولا حتي يا راجل كمان.. بص يا بني ادام انت اتق الله و فكر شويه قبل ما ترمي الدبش الي بترميه ده ولو قعدت ارد علي الكومنتات الي مش عجباني مش هخلص المهم انا بوجه كلامي لنواره سيبك من كل السخافات دي و خليكي في رايك و دماغك و خليكي واثقه انك صح حتي لو في عندك غلط كل بني ادم خطاء بس صدقيني انتي معندكيش غلط ربنا معاكي

hitham_47 said...

شوفي يا نوارة و اسمحي ليه اقولك نواره كده حاف يعني اولا لازم تعرفي انك من دلوقتي شخصيه عامه يعني لازم تستحملي ساخافات من الي شوفتيها النهارده في الكومنتات دي بس انا عايز اقولك انتي يا بنت الحلال صح و انا مقتنع بكل الكلام الي انتي قولتي و مش مهم اكون انا او حتي مصر كلها مقتنعه قد ما مهم انك تكوني انتي مقتنعه برأيك و انا مش هعمل زيهم و افضل ارزع فيهم شتيمه و كلام بيوجع زي انك انتي ارجل من كتير منهم ( و ارجل دي متمنعش انك زي القمر ) و انك كنتي قاعدة في وسط الميدان و الله اعلم بالي بيشتمو دول كانو بيعملو ايه ساعتها لكن انا استفزني اوي البني ادم الي زعلان اوي عشان انتي بتقولي ان الجيش نزل عشان احنا قلنا واحد اتنين الجيش المصري فين عايز اقوله هو الجيش ده بتاع مين مش بتاع الشعب و لما الشعب يكون بيضرب عليه نار و بيتقتل و يطلب حمايه الجيش بهتاف زي الي هتافات كتير اتقالت مطلوب من الجيش يعمل ايه ينفذ التعليمات الي كانت عنده و يضرب في الشعب هو كمان يا اخي.... ولا اخي ايه يا راجل ... ولا حتي يا راجل كمان.. بص يا بني ادام انت اتق الله و فكر شويه قبل ما ترمي الدبش الي بترميه ده ولو قعدت ارد علي الكومنتات الي مش عجباني مش هخلص المهم انا بوجه كلامي لنواره سيبك من كل السخافات دي و خليكي في رايك و دماغك و خليكي واثقه انك صح حتي لو في عندك غلط كل بني ادم خطاء بس صدقيني انتي معندكيش غلط ربنا معاكي

hardway said...

اي كلب حيشتم المسيحيين ما يجيش هنا تاني
....................................
تربية أسطبل عنتر

kokekak83 said...

على اد ما كنت هتجنن ومبارك وولاده يغوروا م البلد على اد ما كان نفسى ان الثوره دى يبقى ليها راجل واحد ....صحيح اننا ثوره شعبيه بس بقت ملخبطه ع الاخر ...عجبنى ان التوانسه واخدينها واحده واحده مش هرجله زينا او يمكن علشان لا عندهم طائفيه ولا اخوان ولا سلفيين...اه اسفه نسيت اننا كلنا سلفيين ...بس بجد حاسه نفوخى هيطق ...دم العيال اللى فى رقبتنا ولسه مخدناش تارهم ...ولو ع الفلوس فى داهيه البلد دى بتتسرق من 7000 سنه ولسه لاقيين العيش الحاف مش دشكله هنبنيها وهتظبط وتبقى نجف ...بس الخلاف السياسى ده هيودينا لفين لو مسكنا الاخوان والجماعات السلفيه ...قولوا علينا يا داهيه دقى وهيحرموا البنات حتى انهم يقولوا رأيهم ويبقى البت ملهاش الا بيت جوزها ...لالالالالالالالالالالالالا بعد الشر ...بس تفتكروا ايه الحل

kokekak83 said...

على اد ما كنت هتجنن ومبارك وولاده يغوروا م البلد على اد ما كان نفسى ان الثوره دى يبقى ليها راجل واحد ....صحيح اننا ثوره شعبيه بس بقت ملخبطه ع الاخر ...عجبنى ان التوانسه واخدينها واحده واحده مش هرجله زينا او يمكن علشان لا عندهم طائفيه ولا اخوان ولا سلفيين...اه اسفه نسيت اننا كلنا سلفيين ...بس بجد حاسه نفوخى هيطق ...دم العيال اللى فى رقبتنا ولسه مخدناش تارهم ...ولو ع الفلوس فى داهيه البلد دى بتتسرق من 7000 سنه ولسه لاقيين العيش الحاف مش دشكله هنبنيها وهتظبط وتبقى نجف ...بس الخلاف السياسى ده هيودينا لفين لو مسكنا الاخوان والجماعات السلفيه ...قولوا علينا يا داهيه دقى وهيحرموا البنات حتى انهم يقولوا رأيهم ويبقى البت ملهاش الا بيت جوزها ...لالالالالالالالالالالالالا بعد الشر ...بس تفتكروا ايه الحل

kokekak83 said...

على اد ما كنت هتجنن ومبارك وولاده يغوروا م البلد على اد ما كان نفسى ان الثوره دى يبقى ليها راجل واحد ....صحيح اننا ثوره شعبيه بس بقت ملخبطه ع الاخر ...عجبنى ان التوانسه واخدينها واحده واحده مش هرجله زينا او يمكن علشان لا عندهم طائفيه ولا اخوان ولا سلفيين...اه اسفه نسيت اننا كلنا سلفيين ...بس بجد حاسه نفوخى هيطق ...دم العيال اللى فى رقبتنا ولسه مخدناش تارهم ...ولو ع الفلوس فى داهيه البلد دى بتتسرق من 7000 سنه ولسه لاقيين العيش الحاف مش دشكله هنبنيها وهتظبط وتبقى نجف ...بس الخلاف السياسى ده هيودينا لفين لو مسكنا الاخوان والجماعات السلفيه ...قولوا علينا يا داهيه دقى وهيحرموا البنات حتى انهم يقولوا رأيهم ويبقى البت ملهاش الا بيت جوزها ...لالالالالالالالالالالالالا بعد الشر ...بس تفتكروا ايه الحل

BestItalianPizza said...

مصرية تخطب فى مظاهرات اسبانيا و تبث فيهم روح ميدان التحرير وسط استحسان الجماهير
http://www.youtube.com/watch?feature=player_embedded&v=HZXlbGrEYmk#at=100

Mohamed said...

مساء الخير ياجبهه ،6 / 6 /2010، هو تاريخ مقتل خالد سعيد فى بلدكم بتاع التصييف ، فى فعاليات كتيره للاحتفال به هنا فى الاسكندريه - من محاسن الصدف أن هذه الذكرى سوف توافق الجمعه - ليه مايتعملش جمعه للاحتفال بالشهداء فى ميدا ن التحرير و أكيد كل القوى الوطنيه هتشارك و يبقى زى ما مقتل خالد سعيد ساهم فى بدايه التحركات للثوره يبقى ذكراه وذكرى كل الشهداء تساهم فى وحده صف الثوره - شغلى الفهامه يا نواره

om said...

و قال إيه فعلا القوى السياسية لازم يبوسوا بعض و يتوحدوا تانى!! كإنها خناقة من طرفين!! إنتى مش واخدة بالك إن فيه فريق مهاجم و فيه فريق مدافع؟؟!! واللا المطلوب كمان إن المدافع ما يدافعش عن نفسه و إلا يبقى بيعمل فرقة وطنية!؟؟ إنقلاب الموازين عندكم سافررررر...
و بتقولى كدة كمان و كإنك بريئة براءة الذئب من دم يوسف!! دانتى أول واحدة المفروض تنصح نفسها بإنها تبطل تشطشط الأمور!!! مش إنتى إللى ليل نهار تشكرى فى الإخوان من ع الوش و من تحت لتحت تحرضى عليهم؟؟! "قد بدت البغضاء من أفواههم و ما تخفى صدورهم أكبر...".. و تشكرى فى المجلس من ع الوش و من تحت لتحت تحرضى عليهم، و تهاجمى بتوع طلبات الثلاثى المرح من ع الوش -قال عشن ما نتفرقش- و من تحت لتحت تشتركى معاهم فى المظاهرة و تجمعيلهم ناس و –إنتى عارفة إن فيه ناس هتهتف بالثلاثى المرح- و الأدهى بعد المظاهرة تقولى الحمد لله و كإن مرادك اتحقق!! إنتى ما بتقريش جرايد واللا معتمدة بس على شبكة الإشاعات الخاصة بيكى إللى بتصدرى على أساسها بيانتك الوهمية؟!! يعنى إنتى بقى كان دة غرضك، إن دى جمعة طلبات الثلاثى المرح !! و بتلومى ع الإخوان إنهم كشفوا غرضكم و مارضيوش ينزلوا ليه بقى؟؟؟
...........تابعوا البقية...........

om said...

إيه إللى وصل الأمور للدرجة دى يا بنتى؟ دة إنتى كنتى من أعقل الناس و أنقى الناس و أصدق الناس و أرشد الناس؟؟
أنا شايفة السبب ورا التغيير المفاجئ فى شخصيتك دة (أو ع الأقل أنا اتصدمت فيكى لإنى ما كنتش واخدة بالى من الأول من الأسباب دى عندك):
1- عدم تحرى الدقة فى الأخبار---إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين
2- سوء الظن ---اجتنبوا كثيرا من الظن إن بعض الظن إثم.. و سوء الظن من أكذب الحديث
3- الكبر عن الاعتراف بالحق و الاغترار بالذات--- الكبر هو إنكار الحق و احتقار الناس، لا يدخل الجنة من كان فى قلبه مثقال حبة من خردل من كبر، و فوق كل ذى علم عليم
4- شؤم المعاصى (و أولها سيل الشتايم إللى لا يخلو منها بيان من بياناتك تقريبا)--- ليس المسلم بالطعان ولا باللعان و لا بالفاحش ولا بالبذئ

فهل من مدكر؟؟

آخر ملحوظة: جملتك "الجيش مش اخواااااان.. وبالعكس، يمكن كمان مش بيحبهم قوي"... أيه دليلك؟ أطالبك بالدليل يا ست العارفين يا إللى جمجمتك فيها موسوعة المعارف كلها يا معين شائعات لا ينضب!!... خصوصا إنك كاتبة الكلمة السم العايمة دى "يمكن" بتاعة الكدابين، عشن محدش يتهمك إنك قلتى "أكيد"... و إحنا فى انتظار الدليل...

om said...

أشادت اللجنة العامة لحقوق الإنسان بالنقابة العامة للمحامين بموقف (إخوان أون لاين)، الموقع الرسمي لجماعة الإخوان المسلمين، في احترام إرادة الشعب المصري، ورفض انقلاب بعض النخب على استفتاء التعديلات الدستورية.

وقالت- في بيان وصل (إخوان أون لاين) نسخة منه-: "إنه من الواجب تقديم الشكر العميق لكلٍّ من جماعة الإخوان المسلمين، وموقع (إخوان أون لاين) والسلفيين ومواقعهم الإلكترونية؛ على موقفهم الحضاري في احترام إرادة الشعب المصري، وتفويت الفرصة على مَن أراد الوقيعة والفوضى باستغلال الحشد الكبير، فلما انكشفوا انفضحوا وهاجوا وماجوا ولم يلتزموا بقواعد الديمقراطية الرأي والرأي الآخر، فلم يتحملوا الآخر".

وأضافت أنه عقب فشل جمعة الغضب لم يجد الكثير من الموتورين جهةً يصبون عليهم غضبهم غير جماعة الإخوان وموقع الإخوان الإلكتروني والسلفيين ومواقع الإسلاميين.
وأشارت إلى أنه لم تحدث فوضى مادية، لكنَّ الصحيح أنه كانت هناك دعوات ثابتة للفوضة الأمنية، بخلاف أن جمعة 27 مايو حفلت بالفوضى السياسية، ومطالبة السلطة بخيانة إرادة الشعب في الاستفتاء، وحضور الإخوان والسلفيين وغيرهم من الوطنيين كان سيعطي مشروعيةً لدعوات خيانة إرادة الشعب.

وقالت: "ثم هذه هي الحرية.. أنت لك رأيك وأنا لي رأي، ولكن الذي أغضب هؤلاء انكشافهم أمام الشعب، وبيان حقيقة وجودهم الذي لا يمثل حتى 10% من متظاهري مليونيات التحرير، وهذا لا يعيبهم، ولكن يعيبهم محاولة تغطية فشلهم الشعبي بتوجيه حرب همجية إعلامية مموَّلة نحو الإخوان والسلفيين لأغراض ليست شريفة، ولا لمصلحة مصر، وإنما للهجوم على الإسلام تحت غطاء الهجوم على الإخوان والسلفيين".

وأضافت أنه من الطريف أن الحقيقة تقول بأعلى صوت، وماذا فعلوا إلا استخدام حقهم المشروع في رفض وجود أو رفض مطالب، وهل يكون الإخوان والسلفيون ممتازين إذا وافقوا على حضور جمعة الغضب الفاشلة، واشتركوا في الانقلاب على إرادة الشعب المصري في استفتاء 19 مارس؟!

om said...

هام جدا للجميع أرجو القراءة

كلمتين على قلبى أرجوكى مش عارفة أزوقهم، إحنا برضه إخوات.. طالما محدش بيزوق الكلام فى المدونة دى –إلا من رحم ربى- فسامحينى ع إللى هقوله و اعتبرينى يا ستى غير دبلوماسية و تقبليهم منى من غير غضاضة.. زى ما أنا بقرا "الزلط" إللى بتكتبيه و بلتمسلك العذر..

أنا بدأت أحس إنك كل شوية برأى!! تبقى حامية أوى على المجلس العسكرى، و لما يصدر بيان يطلعكم غلطانين ألاقيكى تقولى "الله ينور صح الكلام دة .. يا ريت الناس تسمع و تعقل بقى"، كإن ككلام المجلس دة هو كلامك من الأول و هو إللى بتحاولى تقنعى بيه الناس بس الناس هى إللى معترضة، مع إنك سبب رئيسى ورا تلات إربع بيانات الجيش ردا على إللى بتعملوه أصلا!!.. و تتهموا الناس بالكدب و إنتوا بتعملوا ألعن من الكدب: الغش و التمثيل.. عشن ما تعترفوش بخطأكم!!

مش إنتى إللى بلسانك قايلة زمااااااااان إن المجلس العسكرى لما بيلاقى مظاهرات أقل من 100 ألف بيعتبرها أى كلام و قلة مندسة!! إزاى تقولى دلوقتى إنه المفروض يعتبر 10 ألاف حاشدة؟ طبعا غير حاشدة لما تقارنيها بالشعب يا بنتى أو حتى بالأغلبية!! أو حتى بالجمع المعروفة قبل كدة!! و لمصلحة مين إنتى نفسك تبينى إنها حاشدة لمصلحة إللى بيطالبوا بدستور جديد و تأجيل الانتخابات و مجلس رئاسى (الثلاثى المرح)؟؟ هو إنتى شوية معاهم و شوية ضدهم (زى حالك مع الإخوان و المجلس و السلفيين بالظبط)؟؟ يا ريت تقرى المصرى اليوم (نجيب ساويرس) و تشوفى إعلانات الصفحة الأولى (المطالب الرئيسية للثوار فى جمعة الغضب الناجحة هى دستور جديد و تأجيل الانتخابات).. اتقرطستوااااااااااا... و بتحاولوا تبينوا شكلكم حلو.. و هتودوا البلد فى داهية لو مابطلتوش هرتلة و تهييس... و المصيبة إنكم مش واخدين بالكم بعد كل دة...

إللى بتعملوه دة غلط، و غركم اعتصامكم الوهمى بالله، بتوهموا نفسكم إن ربنا معاكم و كرمنا كرم كبير أوى ى ى ى و دة عشان نيتنا حلوةةةة....
"قل هل أنبئكم بالأخسرين أعمال.. الذين ضل سعيهم فى الحياة الدنيا و هم يحسبون أنهم يحسنون صنعا"...
مش كل حد يقول "أنا بعمل دة لله و أنا أهم حاجة عندى ربنا" نصدقه، طالما عمله مخالف لرضا الله (بيشق الصف الوطنى زى ما نتوا ناوين!!)
و النية الصالحة لا تصلح العمل الفاسد..

ثانيا : إنتى إللى عمالة تقولى الإخوان عملوا صفقة مع الجيش، يعنى اتهام مباشر للجيش بالخيانة!! و ناس تانية على المدونة بتتهم الجيش رسمى إنه بيعمل كل دة تمثيلية عشان هو حاطط فى دماغه هيحكم حكم عسكرى و يدينا بالشلوت بس مستنى اللحظة المناسبة ، و سيادتك ما علقتيش و مررتى التعليقات على طريقة "ما شتمك إلا إللى بلغك".. قام الجيش أصدر بيان تانى عشان الهرتلة بتاعتكم يتفى فيه التهمتين إللى أهبل من بعض..
اتقوا الله و ما تعملوش فيها جايبين الديب من ديله و فاهمين الكفت و إنتوا هتودونا فى داهية بسبب الكبر بتاعكم...
كل ابن آدم خطاء و خير الخطائين التوابون...

و بالنسبة –يا أزكى إخواتك- لجملة "الشعب صوت على شرعية المجلس العسكرى" فقصده بالتصويت دة يعنى موافقة الشعب ضمنيا على كل إجراءات المجلس، على طريقة إن لو الشعب كان رافض الجيش من الأول كان الشعب نظم مليونيات لرفض الاستفتاء أساسا و المطالبة بذهاب الجيش للثكنات... يعنى براحته لما يقول الشعب صوت على المجلس العسكرى ... فيها إيه دى كمان؟؟ والله إنتوا خلاص مش بالعين لهم أى كلمة و عاوزين تعلموهم كمان يتكلموا إزاى و يشاوروا إزاى و يعطسوا إزاى... إيه دة يا بنتى... رحم الله امرء عرف قدر نفسه.

و قال إيه فعلا القوى السياسية لازم يبوسوا بعض و يتوحدوا تانى!! كإنها خناقة من طرفين!! إنتى مش واخدة بالك إن فيه فريق مهاجم و فيه فريق مدافع؟؟!! واللا المطلوب كمان إن المدافع ما يدافعش عن نفسه و إلا يبقى بيعمل فرقة وطنية!؟؟ إنقلاب الموازين عندكم سافررررر...
و بتقولى كدة كمان و كإنك بريئة براءة الذئب من دم يوسف!! دانتى أول واحدة المفروض تنصح نفسها بإنها تبطل تشطشط الأمور!!! مش إنتى إللى ليل نهار تشكرى فى الإخوان من ع الوش و من تحت لتحت تحرضى عليهم؟؟! "قد بدت البغضاء من أفواههم و ما تخفى صدورهم أكبر...".. و تشكرى فى المجلس من ع الوش و من تحت لتحت تحرضى عليهم، و تهاجمى بتوع طلبات الثلاثى المرح من ع الوش -قال عشن ما نتفرقش- و من تحت لتحت تشتركى معاهم فى المظاهرة و تجمعيلهم ناس و –إنتى عارفة إن فيه ناس هتهتف بالثلاثى المرح- و الأدهى بعد المظاهرة تقولى الحمد لله و كإن مرادك اتحقق!! إنتى ما بتقريش جرايد واللا معتمدة بس على شبكة الإشاعات الخاصة بيكى إللى بتصدرى على أساسها بيانتك الوهمية؟!! يعنى إنتى بقى كان دة غرضك، إن دى جمعة طلبات الثلاثى المرح !! و بتلومى ع الإخوان إنهم كشفوا غرضكم و مارضيوش ينزلوا ليه بقى؟؟؟
...........تابعوا البقية...........

om said...

إيه إللى وصل الأمور للدرجة دى يا بنتى؟ دة إنتى كنتى من أعقل الناس و أنقى الناس و أصدق الناس و أرشد الناس؟؟
أنا شايفة السبب ورا التغيير المفاجئ فى شخصيتك دة (أو ع الأقل أنا اتصدمت فيكى لإنى ما كنتش واخدة بالى من الأول من الأسباب دى عندك):
1- عدم تحرى الدقة فى الأخبار---إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين
2- سوء الظن ---اجتنبوا كثيرا من الظن إن بعض الظن إثم.. و سوء الظن من أكذب الحديث
3- الكبر عن الاعتراف بالحق و الاغترار بالذات--- الكبر هو إنكار الحق و احتقار الناس، لا يدخل الجنة من كان فى قلبه مثقال حبة من خردل من كبر، و فوق كل ذى علم عليم
4- شؤم المعاصى (و أولها سيل الشتايم إللى لا يخلو منها بيان من بياناتك تقريبا)--- ليس المسلم بالطعان ولا باللعان و لا بالفاحش ولا بالبذئ

فهل من مدكر؟؟

آخر ملحوظة: جملتك "الجيش مش اخواااااان.. وبالعكس، يمكن كمان مش بيحبهم قوي"... أيه دليلك؟ أطالبك بالدليل يا ست العارفين يا إللى جمجمتك فيها موسوعة المعارف كلها يا معين شائعات لا ينضب!!... خصوصا إنك كاتبة الكلمة السم العايمة دى "يمكن" بتاعة الكدابين، عشن محدش يتهمك إنك قلتى "أكيد"... و إحنا فى انتظار الدليل...

ملكش دعوة said...

om احييكي علي كل اللي كتبتيه هو ده اللي نفسي اقوله لنواره انا اكتر من مصدومه والله
وحياه غلاوتك اللي كانت ملهاش حد " وانا عمري ما كرهت حد " لكن الا الظلم الا التحيز الاعمي
يا نواره اذا كنت فعلا بتقري التعليقات وانا عارفه انها غالبا قاسيه بس هي ردود علي كلماتك الاكثر قساوه انا لا اطلب منك التحيز لاني ارفضه ولم اعهد فيكي الا العدل وكلمه الحق تنطلق حره علي لسانك ولكن اذا كان هذا منطق التعامل الكيل بمكياليين وتصيد الاخطاء فلا تستنكري ان نتبع معك هذا الاسلوب
يومين هجوم حاد وغير مبرر علي السلفيين لمجرد ان الاعلام الاعمي المتعصب المتغطرس اراد ذلك فليكن ونحن وراءه كالقطيع
الاخوان ... هجوم حاد واحكام مجحفه بلا مبرر ايضا
تحيز غير مفهوم لطائفه بعينها في عز ما كان يصدر منهم افعال زي الطين تصنف تحت مسمي الخيانه العظمي
كلمات لاذعه وسخيفه لا اعلم لمن توجه ولكنها اغلب الظن توجه لمن ينتقدك مسبقا حتي من قبل ان ينتقد
وفي حاله عجزك التام عن استيعاب المواقف وتبريرها والرد الموضوعي تتبني فكره الردح الادبي "والذي هو اخر اسلحتك
بصي انا لا شئ .... غير اني اكن لك قدر من الحب الصادق واريد ان اري النواره كما عهدتها .. اذا كانت لعبه السياسه هتغيرك بلاش منها فضيها سيره وعودي يا هاميس
لا بجد عودي كما عهدناك

arabian_faithful said...

علشان خاطرى يا نوارة أقرى التعليقات وردى على المتشابه منها على الأقل أرجوكى أحترمى الناس اللى بتثق فيكى علشان بجد عدم الرد ده بيخلى الواحد يفكر ألف مرة قبل ما يصدقك
أنا لقيت ناس كتير بتقول أن مطالب يوم الجمعة كانت غير ماإنتى قلتلنا خالص !

amr565 said...

علي فكرة كلام الاخت الاخير ام انا قلته لناس صحابي في الخارج بالميلي لما شافوني سالوني علي حال مصر واسكندرية واللي بيحصل المهم وبعد ما عملت ابو العريف اتت سيرة الاوضاع السياسية وبعد ما تطرق الكلام علي البنت اللي بتقول اشكر تونس ومفيش ظلم تاني ضحكت وقتلهم اه دي واحدة خفيفة هي مخلصة لكن سطحية جدا وتقول الشي ونقيضه وتعتقد بالشي وبعد شهر تقوله عكسه وتتنبناه بتطرف وضربت مثال علي كده بموضوع كاميليا بعد بوست تعاطف يتيم ومسرحي وبعد ما الكنيسة طلعت الفيديو الاول نلاقي صاحبتنا ما صدقت وهي اينعم سمعت شوية نميمة من الابراشي مقدرش يطرشهم في حلقة ابو يحيي لانه راخ سمعهم من هليس اخر وهلم جرا وضربت مثال بالجيش حبيبي الجيش خطيبي وانا كنت اول واحد عارف انها حتغير رايهابعد فترة مش بعيدة فواحد منهم كان بيدخل المدونة هنا قالي بس البنت قالت نعم في الاستفتاء قلتله يعني هي لو قالت لا كانت حتبقي وحشة المشكلة ان لو ميعاد الاستفتاء كان طول شوية اسبوع ولا اتنين كانت حتغير رايها لانها في الاخر كانت علي وشك وبتشحر واللي اكد ده انهالبدت في الدرة لغاية موضوع كنيسة امبابة فطالبت بالمجلس الرئاسي كان المجلس الرئاسي دواء شافي لكل الامراض وانا عارف انها ما صدقت لقت حجة علشان كانت سلمت خلاص للي بيلعبوا في دماغها وما هو الزن شديد برده وهي حابسة نفسها في مستنقع وهمي تويتر وفيسبوك وعمر طاهر وبلال فضل وسي ابراهيم طقمةعاوز الحرق فاكيد اكيد حتميل حتميل وبعد ما خلصت كلامي راهنت عليكي عارفة راهنت علي ايه يا جديدة قلتلهم هي بصراحة بتدافع عن المادة التانية الان بس طبعا مش دفاع عقائدئ دفاع فلكلوري هي بتعتبر الاسلام هوية ومكون وليس شريعة مطبقة وده اللي انا فهمته من كلامك يعني زي الجيبة الاسكتلندي الشهيرة والعقال العربي والجلبية المغربي حاجة فاتنستك كده اانا هنا لا اتكلم عن الاسلام والشريعة لكني اتكلم عن فكرتك عن الهوية الحضارية وفي احسن الاحوال حتكوني زي مكرم عبيد وهو النصراني ورؤيته عن الاسلام كمكون حضاري اه ده اقصي شي ممكن يطلع من مسيحيي ونحييه عليه كمان لكن بالنسبة للمسلم اعتقد انه محتاج مراجعة عن مفهومه للشريعة والاسلام ككل المهم انا راهنت ان الشي العدل والكويس اللي فيكي اللي هيا دفاعك عن المادة التانية حتتغير في اقرب نقاش مجتمعي عليها ومع اول حادثة لاقدر الله لكنيسة او لواحد مسيحي محفظته اتنشلت ويكون في نقاش في المجتمع عن المادة التانية حتطللعي علينا بهلا هلا علي الجد والجد هلا هلا عليه لو كانت المادة التانية حتخلي مية الغسيل الوسخ ينزل في بلكون المسيحي لا يبقي يفتح الله ومش عاوزها شوفتي الخفة يا جديدة .... يالا شهرتك في بلاد الكفرة ونميت عليكي واشعرتك باهميتك انك شي علشان بس متقوليش ان المسلمين حرمينك من حاجة... تخدي بقي شوية فسدق مميز اخ ده انا نسيت التميز الايجابي للمسيحي فقط ولا فسدق ولا بتنجان انا اسف انااسف اني تعديت علي الباشا المسيحي المميز

Ola A.Aziz said...

نوارة، البنات المغتصبات من قوات القذافى فى ليبيا أسرهم بتقتلهم عشان العار والستات المتجوزين اجوازهم بيطلقوهم....ده بدل ما المجتمع يقف جنبهم ويعالجهم؟؟ ده دورك يا إعلامية يا كبيرة تنشرى الموضوع ده وتعملى اتصالاتك

وأنا بجمع توقيعات على ده
http://www.change.org/petitions/stop-killing-women-raped-by-gaddafi-forces-thats-a-twice-abuse

Amr said...

مش عارف ليه البعض بيعتبر الجمعة اللي فات كانت انتصار على الأخوان .. هي كانت رسالة مش أكثر ... انتم مش لوحدكم على الساحة و أسلوب التعالي على الآخر مش هيجيب نتيجة لكن التواصل و التحالف في المرحلة دي أهم بكثير من أي مصالح شخصية أو حزبية .. أحنا في مرحلة بناء يعني مش وقته لعب العيال اللي ساعات بيعملوه الأخوان .. اللي فجأة حسسوني أنهم عايشين في برج لوحدهم و الباقي ولاد البت تفيدة الخدامة ... خلاص زمن العبيد و قطيع الغنم خلص لخلاص .. إذا ما حطناش أيدينا في أيدين بعض نبني لبكره يبقى خلاص البلد دي هعمرها ما هترجع زي ما كانت لكن هنبقى عاملين زي العراق و الصومال و السودان اللي كل واحدة فيهم أتقسمت و بقت عاملة زي جوز الشربات لما يقدم

احلام جوليا said...

نواره اكيد قريتي عن خبر تخفيف الحراسة في مستشفى شرم الشيخ والشكوك حوالين عدم تواجده حاليا فيها وانه تم نقله لمكان لا يعلمه الا الله هنا بالخليج يقولون انه خرج خارج مصر يا ترى الحقيقة فين ومن يؤكد لنا وجوده بمصر ومحاكمته متى ؟؟ افضل النكات التي سمعتها تصور لسنة 2017 يقول : الخبر الرئيس المخلوع تحسنت صحته وبانتظار نقله من مستشفى شرم الشيخ سرعة السلحفاه التي يمشي بها قضاءنا الا تشكك في عدل قضاءنا ولماذا لا يكون الفساد وصل القضاء كذلك ما دام كان رئيس المحكمة بالتعيين المباشر من ولي النعم

tarek said...

والله يانوارة انتى بمليون راااااااجل
بحبك بعشقك
tiko

mahmoued abdulsattar bayomi said...

كل التحقيقات وكل الاتهامات لنظام مبارك غير صحيحة وباطلة واسالوا وزير العدل الذي جاء فقط لينتقم فلا تفرحوا فالعدل اساس الملك

Passant said...

http://www.facebook.com/l.php?u=http%3A%2F%2Ftwitter.com%2F3arabawy%2Fstatus%2F75174904173051904&h=ed0e3

هو التعليق الوحيد مش ممكن يبقى حاجة تانية غير A 7 A

ساعي الخير said...

أنا ما شتمتش المسيحيين

و ما بحبش الشتايم

انا اتكلمت عن الأرثوذكس ... الرهبان الأرثوذكس

و تعليقاتي اللي بتوضح قصدي عن تعصب الرهبان الأرثوذكس

أنتي ما نزلتيهاش

و ده معناه أنك كنت تقصديني بالشتيمة

ماشي يا نوارة

قالته om عموما اللي

هو ذات أغلب اللي كنت عايز أقوله

و أنا مسامحك في الشتيمة

و سامحيني أذا كان كلامي عليكي شديد

بس و الله العظيم الطرمخة ما

هتنفع

لازم نقول للغلطان أنت غلطان

لازم نحكم بالعدل

لازم نقول كلمة الحق

أنا مش ضد المسيحيين

لكن ضد الظلم و الطرمخة

علي حقوق الناس

ضد التطرف من أي طرف

نوارة الله ينور عليكي

الله ينجح لك المقاصد

و ما يوقعك يارب أبداً في رئيس تحرير

يحجب مقالاتك


الهي ما تتمنعي من النشر أبدا

و لا يحكم عليكي بيها

ده طعمها وحش قوي الحكاية دي

ساعي الخير said...

و بعدين يا نوارة انتي اللي أستفزتيني

الأرثوذكس مش أطفال في الروضة

و الشعب مش غلبان

الشعب بيعرف يثور و يقلب الحكام

و الرهبان الأرثوذكس بيعرفوا يتكلموا

و ياخدوا حقهم و يحرضوا علي أحتلال

بأسم الحماية الدولية و أحنا كلنا في حمي العدل

و كل اللي يغلط يتحاسب و العدل فوق الكل

و هي و بس كلمة الحق

و الكلمة دين

من غير ايدين

بس الوفا ع الحر

يا حرة يا بنت الحر

أعمل طيب يا نوارة

مندفع و فاجومي

متعلم منه و شعره طلب معايا كده

غصب عني ماليش دعوة

بالحسابات السياسية

طب أعمل ايه طاه

زيديني شتماً زيديني

يا أوحش نوبات جنوني

مدونتك صارت تؤذيني

تشتمني لكن تشجيني

تتعبني و حيناً ترضيني

صارت عندي كالأفيون

و قد صرت ب بوست ك مجنوني

فتارة ... للحق تناديني

تنشر تعليقي ... وتدنيني

و تارة ... تحجبني فتشقيني

زيديني شتماً زيديني

يا أوحش نوبات جنوني

أختاري الحق

أو اللا _ حق

علشان بجد تعبتينـــــــــــــــي

زيديني ... شتماً ... زيدينــــــــــــــي

ساعي الخير said...

و كانه لا توجد طبقة وسطي

بين مسلمين و مسحيييـــــــــــــني

أنا شتمتك انتي لوحدك مشتمتش المسحييني

و ده علشان الحق نور عينـــــــــــــــــــــي

و هتزعلي ليه أني شتمتك

طب ما انتي برضه شتمتينـــــــــــــــــــــي

زيديني شتماً زيدني

و الحق هيفضل

نور عينـــــــــــــــي

ساعي الخير said...

و كانه لا توجد طبقة وسطي

بين مسلمين و مسحيييـــــــــــــني

أنا شتمتك انتي لوحدك مشتمتش المسحييني

و ده علشان الحق نور عينـــــــــــــــــــــي

و هتزعلي ليه أني شتمتك

طب ما انتي برضه شتمتينـــــــــــــــــــــي

زيديني شتماً زيدني

و الحق هيفضل

نور عينـــــــــــــــي

mohyeldien said...

زعلانة على المسيحين يا حاجة نوارة طيب و هم ايه ناقصهم دول واخدين اكثر من حقهم
حتى القانون اللى طلبوه بتاع دور العبادة رفضوا ان يراقبوا حساباتهم أو يفتشوا علىيهم
و بعدين ده المسلمين اللى غلابة يا ست نوارة و اصبحوا كلايتام على موائد اللئام و طبعا عارفة مين اللئام أنتم العلمانيين و نصارى المهجر المجانين

mohyeldien said...

يا حاجة نوارة المسيحين اللى زعلانة عليهم واخدين حقهم و نص كفاية بيعملولهم قانون دور العبادة تفصيل عليهم و بعد ممكن تقوليلى هم مضهدين فى ايه دول واخدين حقهم تالت و متلت الباقى و الدور على المسلمين اللى صاورا كالايتام على موائد اللئام و طبعا انتى عارفة مين اللئام العلمانيين امثالك و نصارى المهجر الكلاب