Saturday, 7 May 2011

انسانية كاميليا شحاتة!

طبعا احنا سيبنا اشغالنا، واعمالنا، وحالنا ومحتالنا، واللي ورانا، وبنتكلم عن كاميليا شحاتة دلوقت حاليا، وعايز اختي، وانت فين يا خالتي؟ واللي يتجوز امي اقوله يا عمي
مش ورانا حاجة غيرها
وامبارح كان فيه مظاهرة عند الكاتدرائية، سألتهم: هم انتوا مسيحيين ولا سلفيين احسن بقيت اتلخبط.. فضحكوا
لما ضحكوا بقى عرفت انهم مسيحيين
طب واقفين ليه؟
اصل السلفيين شتموا البابا بشتايم وحشة الاسبوع اللي فات
فقلت لهم وانتوا داخلين لبعض مظاهرات من الاسبوع للاسبوع؟ فضحكوا تاني... انت جاي تتظاهر ولا جاي تهرج؟ 
لا.. انت جاي تهرج، عشان هم شكلهم كده قالوا لهم اتظاهروا، هم مش بيتظاهروا من معاميق قلبهم، زي ايام ماسبيرو كده لما كنت باروح لهم اقولهم المظاهرة دي طائفية، قوم يقولوا لي: والله معاكي حق، المفروض نروح التحرير ونتظاهر مسلم ومسيحي، عموما، كلمي ابونا عشان ياخدنا! 
بس الشهادة لله.. المظاهرات دي مجرد ردود افعال
هيييييه... والله وجه اليوم على السلفيين اللي بقوا بيتكلموا فيه بكلام كفري والعياذ بالله.. زي انهم مثلا يقولوا: دي قضية حرية عقيدة.. دي قضية سيادة قانون.. دي قضية حقوق انسان
الله الله الله يا عبد الله... جامد قوي الكلام ده، وشكلكم قمر وانتوا بتقولوا الكلام ده
همممم.. ولو ان مافيش اي دليل مادي واحد انها قضية حرية عقيدة، أو حقوق انسان، أو سيادة قانون، لأن القانون مافيهوش ابو يحيى
وولو ان النيابة نفسها تجاوزت القانون لما خاطبت الكنيسة عشان تجيب لها مواطنة، مع ان المفروض ده دور الشرطة، والكنيسة غير ذات صفة، ولو ان فيه تناقض ما بين موقف النيابة نفسها، وموقف المطالبين بسيادة القانون، والكلام عن ضرورة ان الكنيسة في حد ذاتها ما تدخلش وفي نفس الوقت يخاطبوها كأنها جهة ذات صفة عشان تجيب لهم مواطنة، وانا مش فاهمة على اي اساس الكنيسة تجيب لهم المواطنة دي، ماهو يا الشرطة تروح تجيب كاميليا بنفسها عشان تمثل قدام النيابة، يا النيابة توجه اتهام للانبا اغابيوس بانه اختطف كاميليا والشرطة تروح تقبض عليه.. يعني ايه الكنيسة تسلم اي حد؟ هي مالها؟ ده في قانون ايه؟ ما هو يا الكنيسة متهمة، وفي الحالة دي مافيش حاجة اسمها الكنيسة متهمة، فيه افراد بيعملوا في الكنيسة متهمين ولازم يتقبض عليهم من قبل الشرطة، يا الكنيسة كنيسة وبس مش شغلتها تسلم ناس، هي ايه صفتها تسلم وتستلم؟ 
بس حنمشي قضية كاميليا قضية انسانية وحرية عقيدة وسيادة قانون.. كده بدون ادلة غير شهادة ابو يحيى
وانا مستعدة انضم لحملة كاميليا سيدة العصر والاوان... بس عشان تبقى قضية انسانية بقى فيه شروط:
1- الاخوة اللي راحوا يروعوا الناس قدام دار عبادتهم ويتظاهروا قدام جهة ليست ذات صفة مع ان القضية في ايد النيابة عايزة اشوفهم بيتظاهروا قدام سجن طرة للافراج عن المقبوض عليهم في قضايا "التشيع". اييييووون.. اييييوووووننن... ايه؟ هو التشيع ده مش حرية عقيدة برضه؟ يعني ايه يتقبض على ناس بتهمة التشيع مش فاهمة يعني؟ مافيش في القانون المصري تهمة اسمها التشيع، ومع ذلك، فيه ناس كتير اتقبض عليها بتهمة "التشيع". 
2- هم هم نفس الاخوة الاربعتلاف واحد اللي جم باتوبيسات سياحية يروعوا الناس قدام دار عبادتهم ويقولوا على البابا شنودة نجس... عايزة اشوفهم بيروحوا يتظاهروا قدام مجلس الدولة عشان يطالبوا بحق البهائيين في انهم يتكتبوا في البطاقة: بهائي. مش: --.. كأنه لفظ قبيح. وقالك يتكتبوا شرطة عشان احنا "مش معترفين بيهم". يعني ايه مش معترفين بيهم مش فاهمة؟ نمتوا مع الشغالة في الحرام وحملت خلفت بهائي؟ طب نعمل دي ان ايه. قالوا: لا.. اصل لو اعترفنا بيهم (اسمعوا بقى بتوع الانسانية) حيطلبوا معبد يصلوا فيه، ويمكن يطلبوا ان عيالهم في المدرسة ياخدوا دروس دين بهائية وما يحضروش مع المسلمين والمسيحيين! سامعين بتوع الانسانية وحرية العقيدة وسيادة القانون بيقولوا ايه؟ حق ان الانسان ياخد اودة يصلي فيها ويعلم ابنه ديانته... ده حق، مش مكرمة من سيادتكم، ومش مستني سيادتكم "تعترفوا" بيهم. هم بني ادمين، ولهم وجود، ومكونين من خلايا ولحم ودم، ومعتقدين في اعتقاد معين، والاعتقاد ده حقهم يتكتب في البوطاقة عدم اللا مؤاغزة، ولو عايزين مكان يصلوا فيه من حقهم، ولو عايزين يعلموا ولادهم ديانتهم من حقهم. وحكاية ان عددهم الفين واحد دي حاجة تحرق الدم فعلا.. لأن عدد كاميليا: 1 فرد. ولو اضفنا عليها الاخت تريزة والاخت وفاء بقوا: عدد 3 مزز. 
3- هم هم نفس الاخوة الاربعتلاف واحد ياخدوا بعضهم على مشايخ السلفية ويتظاهروا قدام بيوتهم ويطالبوهم بالاعتذار عن فتاويهم ايام الحرب على لبنان سنة 2006 لما قالوا على الاطفال الرضع اللي كانوا بيموتوا في جنوب لبنان "روافض" وحرام تدعوا لهم عشان "حزب الشيطان" و"حسن نصر اللات" اخطر على الامة من اسرائيل. اهي دي بقى لا حرية عقيدة، ولا سيادة قانون، دي ارواح.. ارواح اطفال وستات وناس بريئة، وهان عليهم يقولوا عليهم روافض، وهان عليهم يكرهوا الناس فيهم وهم بيموتوا، وهان عليهم يحرموا على الناس حتى الدعاء لهم بالنصر ومنظر الطفل الرضيع اللي راسه طايرة بيتذاع على كل القنوات. 
4- هم هم نفس الاخوة الاربعتلاف واحد ياخدوا بعضهم ويتظاهروا تاني قدام مجلس الدولة عشان كاميليا برضه، بس كاميليا أم اندرو وماريو اللي قلبها اتحرق وولادها اتخطفوا منها بحكم المحكمة، وفوق ده كله اتجبروا على ديانة هم مش عايزينها، وعلى العيشة مع راجل بيكرهوه، والقاضي قال في حيثيات الحكم "لأن الاسلام هو الدين الافضل"! 
5- هم ذات نفس الاربعتلاف واحد دولم، يشرخوا على الصعيد ويعملوا مظاهرة عشان اللي قطعوا ودن الواد يتحاكموا، واظن القضية دي اولى، لأن قضية كاميليا قدام النيابة، وقضية سلوى مقبوض على اللي قتلوها، لكن المقطوع ودنه اللي عملوا فيه العملة دي ما اتقبضش عليهم
في هاذوها الحالة
انا مدينة لفرقة كاميليا للانشاد الديني بالاعتذار، وابقى فعلا اسأت فهمهم، ويبقوا فعلا بيسعوا لدولة قانون وعدالة ومساواة، وبيستخدموا قضية كاميليا لتطبيق سيادة القانون، وحانزل اركب معاهم الاتوبيس السياحي والف معاهم على الشوارع وانام فيها كمان، انا اصلا باحب نومة الشارع
اما اذا تحججت فرقة كاميليا للانشاد الديني بان الروافض اخطر على الامة من اسرائيل، والبهائيين مؤامرة ماسونية، وفعلا الدين الاسلامي هو الدين الافضل، وايه يعني دي حتة ودن؟ 
يبقى حماسهم لقضية كاميليا - اللي تاني مافيش اي ادلة على ادعاءاتهم فيها الا شهادة ابو يحيى وشهادة ابو محمد وشهادة ابو جلمبو - هو حماس طائفي، وتبقى القضية دي قضية طائفية
واظن هم هم نفس الناس دي بنفسهم حكموا على اصحاب القضايا الطائفية لما قالوا ان ثورة البحرين انها ثورة طائفية، وبناء عليه، فيحل لملك البحرين انه يقتلهم، ويحط جرحاهم في التلاجات، وبعد ما يستنفد كل طاقة جيشه وشرطته، يستدعي لهم قوات اجنبية تدخل تضربهم... ويستاهلوا، اصل مظاهراتهم مظاهرات طائفية
حكمتم بنفسكم على نفسكم.... بالشفا

58 comments:

Ahmed said...

اللهم ان كانا علي احق اظهره و ان كنا علي الباطل اظهره

Anas Nabil Abdallah said...
This comment has been removed by the author.
negmat lail said...

موضوع قطع الودان ده مش طائفي اصلا ومش سلفيين اللي قاموا بيه بشهادة الشهود وراجعي كلام بلال فضل عن الموضوع

مواطن مصري said...

نوارة مقال في الجول
و زي ما كتبت قبل كدة مفيش حد

مقتنع بحرية العقيدة و كلها متاجرة

بالشعارات

أول موقف غريب أني لقيت نشطاء

و مراكز حقوقية قلبت الدنيا للدفاع عن حق حجازي في التنصير و غيرهم و التهديدات الي بتيجي

لحجازي و غيرهم بالقتل و التقارير السودة من اللجنة الدينية بالكونجرس و موقف الكنيسة بالنسبة

لمحمد حجازي و نجلاء الأمام و غيرهم الي أتنصرو كانو واخدين موقف دفاع عن حق حرية العقيدة

و الحريات و الدولة المدنية و الليبرالية و القاء التهم على الفريق التاني الي هما السلفين بسبب رفضهم

لتنصير حجازي و اخرين و كان تحقيق النصر لفريق الليبرالين و فريق المنظمات الحقوقية و الكنيسة

كان بيعتبر نصر سياسي و نصر طائفي و كسب شارع جديد للضغط على الدولة في المستقبل .

و الموقف التاني في نفس الموضوع هما السلفين و تقريباً نفس موقف الليبرالين فالسلفين مثلاً قالبين

الدنيا و بيدافعو عن ستات أسلمت تحت شعار حرية و القضية كقضية حقوقية أن صح أنهم أسلمو

يبقى الحق اننا ندافع عن حقها في حرية أختيار العقيدة لكن موقف السلفين بعدو الناس عن الدفاع

عنها و عملو زي ما عملت الكنيسة حولو القضية من قضية حريات لقضية طائفية ل أثبات

قوتهم في الشارع و التأثير على العقول و تحقيق نصر سياسي و نصر طائفي و كسب شارع جديد

للضغط على الدولة لتتحقيق مطالب في المستقبل تحت بند حرية العقيدة .


دة كنت كاتبة في نفس الموضوع

http://stories-from-my-life.blogspot.com/2011/04/blog-post_30.html

amer said...

اسال الله العظيم ان تحشري مع كلامك .. ام كان حق فمع الحق و ان كان غير ذلك فتحشري معه
و بالشفااااااا عليكي الشيعه و المسحيين

المهيس الأكبر said...

الحضن الحضن البوس البوس بلوبيف بلوبيف .. من طرف اخوكي اللمبي ...
جبتي من الأخر يا جميل ..
يا اميرة يابنت ألأمرا
عبدالرحمن كمال

ياسر كامل said...

برافو عليكى
ازاى يا رب واحد يشوف طفل ميت ويبقى عادى
ازاى استحلوا دم اهل البحرين
يا اوساخ يا ولاد الكلب
وده رغم انى مع ظهور كاميليا
لانها قضية حريات
بس السلفية مش عايزين حريات

المهيس الأكبر said...

جبتي من الأخر يا اميره يا بنت الأمرا ..
الحضن الحضن البوس البوس بلوبيف بلوبيف
من طرف اخوكي اللمنبي

negmat lail said...

ما موضوع كاميليا طبعا احنا ضد اي حد يتظاهر ويشتم قدام دار عبادة لأن كده حنولع في بعض ويا فرحة الأعادي ..بس الموضوع كان ممكن يخلص من زمان لو ظهرت بنفسها واتكلمت يعني الكل مخطئ المسيحيين والسلفيين

علان العلانى said...

المحترم أبو هاجر
أتابع تعليقاتك ومداخلتك كنصوص ترسم معالم خطابك الذي يدور في إطار التنوير بقناعاته العربية المترجمة
عندما طلب منك أن تعلن رأيك فيما يجرى في سوريا ذهبت شمال ويمين وتكلمت عن كتاب هو مجرد وجهة نظر تدور في فائض الغموض السياسي، ويعتمد على فائض الغموض في المعلومات عن نظام يحكم بقبضة من حديد ورصاص وقمع حرية الرأي بوحشية، ليس بداية من قطع يد ولسان سليم اللوزي ووضع قلمه في أحشائه الخلفية ، ولكن بداية من اعتماد معادلة القهر والصمت سياسة داخلية و الانتهازية الميكيافلية سياسة خارجية، إذا كنت صاحب رأي فعندك مدونة قل فيها ما تشاء وحينها سيقوم من يريد بمناقشتك أو محاورتك ، نواره تتكلم بلسان ثوري لا سياسي، وترصد إيقاع الثورة بحدسها وهي لا تبغي قيادة الثورة وكل ما تبغي هو قيادة عربتها بعد الثورة بدون أن تصاب بضغط الدم وحدس نوارة بالمناسبة ليس له مرجع أو كتاب ولكن يمكن أن يكتب عنه بعد ذلك كتب ستكون مراجع للسياسيين
أما عن سوريا فهذا الحزب العبثي الفاشي هو السبب في معظم مصائب الأمة، وإهدار طاقتها وثروتها والسياسي المخضرم عزمي بشارة نجح في صناعة رؤية بتروي وعزم متحسبا للظرف التاريخي ومحصنا بضرع تحولي، وهو يتعامل مع "المسألة السورية بصرف النظر عن النظام الذي هو أوهن من الدور التاريخي لسوريا وهو مجرد فائض جيوسراتيجي"للمكان" في غياب الممكن المنشود لنهضة حقيقية للأمة
سوريا ليست حافظ أو بشار أو حزب العبث، سوريا خاصرة الأمة، ولها دورها الجيوسياسي لم يتأهل له نظام منذ الانفصال عن الإمبراطورية العثمانية وحتى الآن إن الكتاب الذي ذكرته مجرد هامش على مقوله جون فوستر دالاس إن سوريا موقع حاكم في الشرق الأدنى. هذه أكبر حاملة طائرات ثابتة على الأرض في هذا الموقع الذي هو نقطة التوازن تماما في الإستراتيجية العالمية... ثم يضيف: هذا موقع لا يجازف به ..أحد.. ولا يلعب فيه طرف
أن إشكالية النسخة الركيكة العربية للتنوير أنها تتحرك في الأفق السياسي لسيكس بيكو باسم الواقعية السياسية وأمثال نواره وتميم البرغوثي وعلاء عبد الفتاح على سبيل المثال يحركهم الحدس السياسي مع اختلاف المرجعيات والغريب في مداخلاتك هو كيف لم تتنبه للقطيعة المعرفية التي تتقاطع فيها رؤيتك مع رؤية النوارة؟ رغم هذا الكم الضخم من النصوص المثبتة والمفهرسة في مدونة نوارة التي تكشف بكل وضوح عن رؤيتها وشبكة خطابها، إذا كنت من القارئين والذين ينصحون بالقراءة، فالخلاف بنيوي وليس مجرد تباين في وجهات النظر.

Anas Nabil Abdallah said...

سيبك من تيت أم السلفيين وبلاش تعميم . إتكلمي عن شخصيات لإن السلفيه ده منهج وفيه الوسطي والمتشدد والغبي وتشويهه ده بغباء البعض منهم غلط .. تمام .
أما بخصوص كاميليا الكنيسه هيا اللي إستلمتها أمن الدوله سلمها للكنيسه المطلوب ببساطه كمدافع عن الحريه بعيدا عن أي حوار بقي إني أطالب بحريتها تطلع .. إيه المشكله في كده ؟؟ ومش مريب التصريح بتاع أستراليا بتاع النهارده ده يا نواره !! وبعدين هتطلع علي قناه الحياه !! في حوار مسجل !! يعني بيقولوا للي شاكك تأكد . إيه المشكله لما تطلع للنيابه تكدب الشيخ أبو يحي وأبو محمد وأبو جلامبو وتخرصهم خالص وترفع عليهم قضيه تشهير كمان . !!!!!؟

سامح said...
This comment has been removed by the author.
Amgad said...

True and funny at the same time, which is hard to find these days.

عم مينا said...

مش عارف اقولك ايه.. بتجيبي من الاخر كالعادة

mido said...

كده السلفيين اتحطوا فى الركن :))
هما مش اصحاب حقوق انسان وقانون
هما لا يعترفوا بحقوق متساوية لاصحاب الملل والعقائد الاخرى وبيطلعولها تخريجة دينية تسند موقفهم
بس للامانة موقفهم من حزب الله وحربه مع الصهاينة مش موحد يعنى فيه منهم اعتبروه اخطر من (اليهود) والبعض ممكن يتحالف معاه (مرحليا) لو العدو مشترك

utopia said...

بهذه المناسبة اقتبس منك يا نوارة

(باشكر السلفية باشكر المجلس العسكرى...مافيش ثورة تانى
...مافيش مليونيات تانى...

لا بجد لعبوها صح المرة دى وكله ركز فى كاميليا وام عبده ونسى الثورة اللى رايحة فى ستين داهية
بجد احنا بنقع فى نفس الفخ كل مرة
ايه العبط والهبل اللى احنا فيه ده

اتخطفت ولا اتنيلت ما نطهر القضاء والشرطة الاول وبعدين هما يبقوا يجيبوا حق كل المظلومين
فعلا مافيش فايدة فينا
زيا اهلا بمصير تونس قريبا :(

utopia said...

بالنسبة للطرف التانى بقا فالكنيسة من الاخر برضه مش عاوزة تخلص
حرام نظلم السلفية لوحدهم
اللى ظبط عينى باردة عليه ظبط الموضوع من الناحيتين استاااااااذ
يالا بل هم بلا ثورة بلا بتاع
طب والله اكتر ناس كسبوا من اول 25 يناير لدلوقتى هما الشهداء ياليتنى كنت معهم فافوز فوزا عظيما
جتنا نيلة فحظنا الهباب

zenat_popo said...

وهي البهائيه دين نزل م السما امتى وانا مش واخده بالي!!!
عندنا 3 اديان بس مسلم مسيحي يهودي
والاختراعات دي مش مطالبين اننا نعترف بيها
هو اي حد موجود ومقتنع بحاجه يبقى مطالبين اننا نعترفله بيها؟؟ خليه براحته ويقتنع بمزاجه ما كل بني ادم في العالم ليه قناعته لوحده نكتبها بقى في البطاقه!!

والروافض دول مسلمين طائفه من المسلمين نختلف مع معتقدهم لكن منساومش على ارواحهم

واخيرا قضية كامليا العالم كله شايفها انتو اختزلتوها في السلفين ده موضوعكم ،، واللي عايز يقف معاها الامر ليه واللي مش عايز محدش هيبوس اديه

قضية قطع الودن طلع شيخ الازهر اعتذر بإسم المسليمن بالرغم من انها مش حادثه طائفيه وعالجها على حسابه
قولي بقى لحد مسيحي يطلع يعتذر عن مقتل سلوى واغتصاب رحمه وسلمى ويعالجهم!!!!!!!

ساعي الخير said...

بسم الله الرحمن الرحيم

الحمد لله رب العالمين
و اللهم صلي علي النبي

قلبك حنين يا نبي و ما فيش حنان علي كوكبي

صحيح الجماعة اللي بيسموا نفسهم بالسلفية

متقنعين بقناع حرية العقيدة و الفكر

جايز يكونوا صادقين في دعواهم و جايز كذابين

لكن في النهاية مش هم بس اللي بيطالبوا بحرية العقيدة

كلنا بنطالب بحرية الفكر و العقيدة

من حق البهائية يكتبوا في البطاقة اللي هم عايزينه و يربوا عيالهم زي ما هم عايزين
دي مشكلة أدارية مع سلطات الدول

و اللي بيعبدوا البقر كمان
أحرار
و كل من له نبي يصلي عليه

و ربنا هيحاسب الكل

بس ربنا ما يرضاش الظلم

و الناس دايماً مختلفين

نصاري يهود مسلمين هندوس يهود

فرق فرق و خلاف خلاف

و العدل هدف الكل

العدل فوق الكل

يا نوارة ثورة ما تحققش العدل

شدي عليها السيفون

أنتي خايفة ليه تواجهي الحقايق

جايز الحق النهاردة مع السلفيين

و بكرة عليهم

هو فيه بني آدم علي الحق علي طول

النهاردة ننصر الحق حتي لو كان مع السلفية

و بكرة ننصر الحق حتي لو كان علي السلفية

الناس بسيطة يا نوارة عايزة تعيش في هدؤ و سلام

ليه قيادات الدول و الكنيسة و القيادات الدينية

تعقد الأمور و تكره الناس في بعض

ليه الكره ليه

المسيحين اللي قابلتيهم بيضحكوا

و اللي قالوا لك عند ماسبيرو خلي أبونا يودينا التحرير أنتي معاك حق
احنا كده طائفيين

ليه قياداتهم تعذبهم كده و تخليهم في الموقف الصعب ده و ليه هم يرضوا بكده

نوارة الموضوع سهل

العدل

هدف كل ثورة بسيط و واضح

العدل

انسان واحد يستحق ان الدنيا تثور علشانه

مش لشخصه لكن لمعني
العدل و الحب و الجمال

و الخير

يا نوارة متغيريش الموضوع

حتي لو السلفيين طائفيين

فيه انسانة مشتبه أنها مظلومة

حتي لو كانت بتحب واحد

مش حكاية عقيدة

ده حقها برضة مش ده العدل

نوارة

العدل الأساس و اللي يخالف العدل ينداس

مش الثورة هدفها أن كل واحد ياخد حقه برضه

موفقين للخير

ساعي الخير said...

الثورة

هي تحقيق العدل للكل

العدل هو حرية العمل و التعليم

العدل هو القضاء المباشر المنصف

العدل هو الأهتمام بحق الفرد

كل فرد

لأن في ذلك كرامة المجتمع

Ms Venus said...

بصراحة يا نوارة انتى مية مية وجيبتى من الاخررررررررررررررر


طب ممكن الاخوة اللى بيتظاهروا علشان كاميليا يتظاهروا علشان البنات المسيحيات اللى اتخطفوا واللى عددهم لحد دلوقتى من بعد 25 يناير اكتر من 2 بنت !


من باب الانسانية بردو !

james green said...

اين الثوره السوريه في كتاباتك ولا حسن نصر الله مسمحش بالكلام لسه

mahmoud elsaid said...

ممكن اتفق مع كلامك واختلف مع طريقتك في أنك تتحايلي علي المسيحين ,,,,,
والمسيحي المصري زيه زينا بالظبط في حقوق المواطنه بس بقه رساله علشان انا بجد زهقت من المحايله علي الكنيسه اكتر من كده انا بقه يا ستي معايه واحد بقالي سنتين بنطلعله بطاقه علشان اسلم مش اعرفين والدير حاول يقبض عليه ولو عايزه كل أوراقه موجود علشان انا قرفت من الليبراليه اللي انتوا شوهتوها والديموقراطيه اللي بوظتوها
01511765984

james green said...

اين الثوره السوريه من كتاباتك والا حسن نصر الله مسمحش لسه

السلام عليكم said...

وانت ىمين قالك ان بتوع كاميليا بيدوروا عليها علشان حريه العقيده حريه العقيده والأنسانيه دى لما بيخاطبوا الاخر اللى كون الست اللى قالوا عليها مسلمه والكنيسه خطفتها لا يشفع لها كونها مسلمه او مش سبب كافى علشان بتوع حموم الانسان يدوروا عليها فالسلفيين بيخاطبوهم باللغه اللى بيفهموها يمكن يدوروا معاهم لكن السلفى اللى بيدور على كامليا بيدور علشان دى (يَا أَيُّهَا الَّذِينَ آمَنُوا إِذَا جَاءَكُمُ الْمُؤْمِنَاتُ مُهَاجِرَاتٍ فَامْتَحِنُوهُنَّ اللَّهُ أَعْلَمُ بِإِيمَانِهِنَّ فَإِنْ عَلِمْتُمُوهُنَّ مُؤْمِنَاتٍ فَلا تَرْجِعُوهُنَّ إِلَى الْكُفَّارِ لا هُنَّ حِلٌّ لَّهُمْ وَلا هُمْ يَحِلُّونَ لَهُنَّ وَآتُوهُم مَّا أَنفَقُوا وَلا جُنَاحَ عَلَيْكُمْ أَن تَنكِحُوهُنَّ إِذَا آتَيْتُمُوهُنَّ أُجُورَهُنَّ وَلا تُمْسِكُوا بِعِصَمِ الْكَوَافِرِ وَاسْأَلُوا مَا أَنفَقْتُمْ وَلْيَسْأَلُوا مَا أَنفَقُوا ذَلِكُمْ حُكْمُ اللَّهِ يَحْكُمُ بَيْنَكُمْ وَاللَّهُ عَلِيمٌ حَكِيمٌ
وتاكدى تماما هم مستغربيين زيك كده من موقفك من كامليا ووفاءوغيرهم زى ماانتى مستغربه من موقفهم وعايزهم يساعدوا البهائيين وام اندروا وماريو طيب ماانتى واخده موقف من وفاء وكاميليا لمحرد انهم بيقولوا انهم اسلموا يعنى عندك البهائى والبوزى والبقرى محترميين وليهم حقوق انما لو واحده ست اسلمت وفيه شبهه ان الكنبسه خطفتها دى بقى تستاهل اللى يجرلها والحريه تيجى لحد عندها وتخلص من السوق لا وايه كمان لما تطلع فى قناه مسيحيه تقول ما اسلمتش تبقى صفعه للسلفيين زى بالضبط كده ما تقرير اللجنه الثلاثيه بتاع السباعى طلع ايد الكلام اللى قاله التقرير الاول وخالد سعيد طلع شهيد البانحو وزى ما تجيبى المستشار مرتضى منصور وتخليه يحكم فى قضيه التربح المتهم فيها جمال مبارك والمفروض بقى انكم تقبلوا حكمه وتطلعوا تقولوا اسفيين يا ابن الريس

ويا ستىمتشكريين ليكى متطلعيش معاهم فى اى حته هم فعلا طائفيين ويستحقوا اللى يجرالهم بيدوروا على حقوق المسلميين السنه فقط والحقوق الدينيه فقط _معلش مخهم كده بقى _ اللى محدش غيرهم بيدور عليها وبعديين يا نحله لا تقرصينى ولا عايز عسل منك

ساعي الخير said...

نوارة الثورة ما نجحتش

لأن النظام ما تغيرش

و ما فيش مبادئ للتغيير

مبادئ مش قوانين

مبادئ تتغير علي أساسها القوانين

يعني مثلا أهم مبدأ لسه مختلفين عليه

و بنجادل و نلف و ندور

علشان ما نحققهوش

و هو العدل

الحرية محبوسة و كاميليا محبوسة و مصر برضه لسه محبوسة

ولية محبوسة و أنتي و أيمانات المسلمين اللي حكيتي حكايتها

و أنتي اللي شرشحتي لبتوع حموم الأنسان بسببها

و أنتي اللي عرفتيني سكة موقع المرصد الأسلامي علشان أعرف التفاصيل

و بعدين خوفتي و رجعتي

خايفة من أيه يا نوارة

من الدم

ما سال الدم جنبك علي الكوبري

خايفة من أيه يا نوارة

و أنتي اللي كاتبة

الحرية لم تخلق إلا لمن يحملون أرواحهم علي أكفهم

تلاتين سنة طرمخة علي حسني مبارك

و النتيجة لسه هنبني من جديد

أحنا ما بنحترمش لا شيخ أزهر و لا مفتي

أذا خالفوا الحق _ و من غير ما يخالفوا برضه دي آراء شخصية _ و في أوربا

لغوا قداسة

ما يعرف برجال الدين

هنا بقي مسيحيين مصر مأزومين و محرجين بالمذهب الأرثوذكي و تقديس البشر

الدولة بقي ذنبها أيه الطرمخة علي شنودة و قيادات الكنيسة ليه

أنتي تركعي ليه

الفكر يركع للبشر

كبرياء الحق و الحقيقة يركع للبشر

أنتي حرة مش دي المشكلة

المشكلة

كوني نوارة اللي بتنصر العدل

كوني نوارة اللي حبها للعدل

بيخللي السلفيين و المسيحيين

في مدونتها و مش راضيين يبعدوا عنها

نوارة سامحيني أذا كنت تجاوزت

لكن بأفكرك

مر الكلام زي الحسام

يقطع مكان ما يمر

اما المديح سهل
ومريح

يخدع لكن بيضر

و الكلمه دين من غير ايدين

بس الوفا عالحر

الوفا ع الحر يا نوارة

الوفا ع الحر يا حرة

يا بنت الحر

الوفا ع الحر يا نوارة

أنتي قولتي الكلام و ابتدأتيه

عن الحرية و العدل

كملي يا نوارة

وفي يا حرة

ما تخافيش

قولي الحق اللي انتي بدأتيه

في موضوع كاميليا و خالد سعيد

و الثورة

في نصرة العدل

الوفا ع الحر

يا حرة يا بنت الحر

مش فاهمه said...

معلهش احنا اهو بنتعلم فى بعض و بصراحه المكسب فى الموضوع ده ان نجيب جبرائيل محامى البابا هدد انه حايترك القضيه لو ان كاميليا رفضت المثول امام النيابه احنا بنسعى لدولة قانون و فيه ناس مخها جزم برضه عموما ياريت العقلاء ياخدوا المبادرة و مانقفش نتفرج و نسيب النار تشعلل اكتر و اكتر

محمد said...

مضمون كلامك:
الكنيسة ملايكة
المسيحيين غلابة ومجنى عليهم وتصرفاتهم رد فعل
السلفيين ظلمة وهمج ومخاخهم ضلمة زى يحيى الجمل ماقال
الشيعة ناس زى الفل

فهمت صح كده؟
....................
بس على فكرة انتى نسيتى ان الكنيسة اللى مش جهة تسليم وتسلم زى مابتقولى وبتهاجمى النيابة....هى نفس الكنيسة اللى كانت جهة تسليم وتسلم لما استلمت كاميليا وغيرها كتير من أمن الدولة

السلام عليكم said...

وبعديين بالنسبه للقاضى اللى قال ان الدين الاسلامى هو الدين الافضل لا هو بقى غلطان انا بقى طائفيه اكثر منه وباقولك هو الدين الوحيد الصحيح الدى يقبله رب العباد واقسم على دلك قسم انا مسؤله عنه يوم القيامه وان بنزول القران على سيدنا محمد انتفت صفه العباده عن باقى الاديان وانه من يبتغى غير الاسلام دينا لن يقبل منه وهو فى الاخره من الخاسريين بس كده وفعلا لا اكراه فى الدين من شاء فليؤمن ومن شاء فليكفر بس من الاخر يبقى عارف انه كافر وهو بقى حر فى اختياره لن يغصبه ربه على الايمان

كريم said...

وماله ؟؟؟

كريم said...

اولا محدش قالك تسيبى اشغالك وتروحى تتظاهرى عشان كاميليا ... ثانيا بلاش الاسلوب الحقير فى الكلام انك تقولى لما ضحكوا عرفت انهم مسيحيين ... ثالثا انت لسه عايشة فى الاوهام بتاعتك عشان تقولى قطع ودن والحكاية طلع ملهاش علاقة لا بسلفيين ولا خلفييين وطلعت شكلة بين ناس فى نفس المنطقة .. رابعا حلوة حكاية يروعوا الناس دى ... حد قالك انهم كانوا ماسكين مطاوى وسنج ... ولا كانوا واقفين يهتفوا زى اى مظاهرة فى الدنيا ... خامسا طب احنا ليه مشفناش وش سعادتك فى موضوع التشيع ده .. حد منهم قابلك وقالك انه مع القبض على اى حد ؟ ... واذا كانوا ضدهم فى المنهج فهم لم يذهبوا ليعتدوا عليهم وانما وضحوا مخالفة منهجهم للاسلام مثلا ... وبعدسن لو هم قصروا فى موضوع واتحركوا فى موضوع وانتى مال سيادتك ... حد طلب منك تساعديهم ... هتقولى يبقى الموضوع مش حرية وبتنجان ... طب خليها كده تطلع تقول انها مسيحية وشوفيهم هيعملوا مظاهرات تانى ولا لأ ... كفاية كده

Dina said...

يسلم بقك

Dina said...

يسلم بقك

elzahraamegahed said...

أيوه السلفيين طائفيين بس شنوده وقيادات الكنيسه أكثر طائفيه
وأيووووووه السلفيين اللى نازلين ف المظاهرات دول كانوا ضد الثوره وما خرجوش فيها وبالتالى قلبهم مش عليها ، بس شنوده وقيادات الكنيسه زيهم وأكتر وهما ضد الثوره وبيعتبروا عصر المخلوع أزهى عصورهم

أيوه المطالبه بكاميليا طلب طائفى بس عاااااااااادل ، وطرش الكنيسه اللى حابسها (لو مكنتش موتتها زى وفاء) أو بتعذبها زى ماريان وتريز) هو فعل أكثر طائفيه أكثر حقاره

لو كنتى هاجمتى السلفيين زى ما كنتى بتعملى ف المرات اللى فاتت كانت مصداقيتك هتتطلب إنك تنتقدى تصرفات الكنيسه اللى كانت هتولع لنا فى البلد ساعة مظاهرات ماسبيرو اللى أنتى أثبتى إن اللى قاموا بيها ما بيتحركوش غير بأمر أبوهم، لكن إنك تنتقدى السلفيين وتطبطبى على المسيحيين ؟؟؟؟؟؟؟

ودرءاً للشبهات كان المفروض تنوهى إن حزب الله (اللى كنت معظمه موقفه ساعة الحرب 2006 واللى كنت شايفاه رمز شريف) اتخرس بسبب طائفى برضه على المجازر اللى بيعملها العلوىين فى سنة سوريا

على فكره أنا مسلمه متصوفه وما بحبش السلفيين وما بكرهش الشيعه ولا عندى مشكله مع أخواتنا المسيحيين
بس الحياد والمنطق الى بتطالبى بيهم لازم يخلوكى تعرفى إن الدين الإسلامى أفضل للطفل لأنه بيعترف بالأديان الأخرى وإن الأطفال فى سائر الدنيا بيتبعوا ديانة أبوهم وانهم لما يكبروا لهم الحق انهم يختاروا دينهم ويغيروه

ملحوسه أخيره: سكليا بطلس لما كان بيطلع يشتم فى سيدنا محمد (ص) والناس طلبت من شنوده (اللى إنتى زعلانه أنت الناس بتشتم فيه ) أنه يوقفه رفض ،
وده كان سبب كافى لواحده زىى متربيه فى بيتها على السماحه لدرجة أمى لما تيجى مقابله لشنوده فى التليفزيون تقولى استنى أنا بحب الراجل ده وكلامه ، تكرهه وتعتبره عدو للإسلام،
مواقفه هو يانواره من زكريا بطرس ومن احتجاز وفاء قسطنتين هو اللى خلانى أشوفه نجس زى ما السلفيين بيقولوا عليه

وعلى فكره المسيحيين فى مصر على قلة عددهم وعلو صوتهم العالى وشكاويهم اللى ما بتخلصش من الإضطهاد المزعزم وتطاولهم على المسلمين وقناعتهم بإن مصر بلدهم لوحدهم ولازم نمشى منها وانها هترجع للمسيح ، بالضبط عاملين زى اسرائيل ، وشنوده بقى عامل زى المحرقه اللى محدش يقدر يقرب منها ولا يتكلم عليها

elzahraamegahed said...

أيوه السلفيين طائفيين بس شنوده وقيادات الكنيسه أكثر طائفيه
وأيووووووه السلفيين اللى نازلين ف المظاهرات دول كانوا ضد الثوره وما خرجوش فيها وبالتالى قلبهم مش عليها ، بس شنوده وقيادات الكنيسه زيهم وأكتر وهما ضد الثوره وبيعتبروا عصر المخلوع أزهى عصورهم

أيوه المطالبه بكاميليا طلب طائفى بس عاااااااااادل ، وطرش الكنيسه اللى حابساها (لو مكنتش موتتها زى وفاء) أو بتعذبها زى ماريان وتريز) هو فعل أكثر طائفيه وأكثر حقاره

لو كنتى هاجمتى السلفيين زى ما كنتى بتعملى ف المرات اللى فاتت كانت مصداقيتك هتتطلب إنك تنتقدى تصرفات الكنيسه اللى كانت هتولع لنا فى البلد ساعة مظاهرات ماسبيرو اللى أنتى أثبتى إن اللى قاموا بيها ما بيتحركوش غير بأمر أبوهم، لكن إنك تنتقدى السلفيين وتطبطبى على المسيحيين ؟؟؟؟؟؟؟

ودرءاً للشبهات كان المفروض تنوهى إن حزب الله (اللى كنت معظمه موقفه ساعة الحرب 2006 واللى كنت شايفاه رمز شريف) اتخرس بسبب طائفى برضه على المجازر اللى بيعملها العلوىين فى سنة سوريا

على فكره أنا مسلمه متصوفه وما بحبش السلفيين وما بكرهش الشيعه ولا عندى مشكله مع أخواتنا المسيحيين
بس الحياد والمنطق الى بتطالبى بيهم لازم يخلوكى تعرفى إن الدين الإسلامى أفضل للطفل لأنه بيعترف بالأديان الأخرى وإن الأطفال فى سائر الدنيا بيتبعوا ديانة أبوهم وانهم لما يكبروا لهم الحق انهم يختاروا دينهم ويغيروه

ملحوسه أخيره: سكليا بطلس لما كان بيطلع يشتم فى سيدنا محمد (ص) والناس طلبت من شنوده (اللى إنتى زعلانه أنت الناس بتشتم فيه ) أنه يوقفه رفض ،
وده كان سبب كافى لواحده زىى متربيه فى بيتها على السماحه لدرجة أمى لما تيجى مقابله لشنوده فى التليفزيون تقولى استنى أنا بحب الراجل ده وكلامه ، تكرهه وتعتبره عدو للإسلام،
مواقفه هو يانواره من زكريا بطرس ومن احتجاز وفاء قسطنتين هو اللى خلانى أشوفه نجس زى ما السلفيين بيقولوا عليه

وعلى فكره المسيحيين فى مصر على قلة عددهم وعلو صوتهم العالى وشكاويهم اللى ما بتخلصش من الإضطهاد المزعزم وتطاولهم على المسلمين وقناعتهم بإن مصر بلدهم لوحدهم ولازم نمشى منها وانها هترجع للمسيح ، بالضبط عاملين زى اسرائيل ، وشنوده بقى عامل زى المحرقه اللى محدش يقدر يقرب منها ولا يتكلم عليها

e said...

ﻋﺎﺭﻓﺔ ﻟﻴﺔ ﺍﻧﺎ ﺑﺤﺒﻚ ﻋﻠﺸﺎﻥ ﺍﻧﺘﻲ ﻋﺎﻣﻠﺔ ﺯﻱ ﻣﺼﺮ ﻣﻌﺠﻮﻧﺔ ﻭﻣﺸﻴﻄﻨﺔ ﺑﻤﻠﻴﻮﻥ ﺣﺎﺟﺔ ﺍﻣﺒﺎﺭﺡ ﺑﺘﺘﺮﺣﻤﻲ ﻋﻠﻱ ﺍﻝﻲ ﻣﻴﺘﺴﻤﺎﺵ ﻭﺍﻟﻨﻬﺎﺭﺩﺓ ﻭﺍﻗﻔﺔ ﻓﻲ ﺍﻟﻜﻨﻴﺴﺔ ﻋﺎﻳﺰﺓ ﺗﺤﻤﻴﻬﺎ ﻋﻈﻴﻤﺔ ﻳﺎ ﻣﺼﺮ

Ahmed . M . Abdulrahman said...

كلام سليم

قد يكون قاسى ولاكن الدواء دوماً طعمه مر

وانا اؤكدلك ان 95 % ان لم يكن اكثر من السلفين

مسيرين

و 5% واضعى خطط الاشعال

فمثلا هائولاء عندما تحاولى الاطلاع على افكارهم عن قرب

تجدى اشياء يرفضها اى منطق او دين

ليست هذه هى القصه ولاكن القصه فى ان معظمهم لا يعى ماذا يقول

فهو سمع الشيخ فلان الفلانى يقول هذا حرام وتلك بدع و و هائولاء ذبانيه الشيطان

فتبعه

لمجرد انه ملتحى و ارتدى جلباب و افتى كما يريد و ليس كما يريد الحق

من واجبنا ان ننبه المغفلين عن الحقيقه

فالحلال بين و الحرام بين فتقوا الشبهات

والله ان كان قد بث فى دنيانا بعض الجهلاء فهذا لل اختبار

فالله خلق خلق العقل ليس لنخزنه فى الثلاجه ونجرى وراء الجلاليب

انما لنعمل به و نستكشف قدرته

فمن امن امن و من كفر كفر

نحن كل ما علينا هو الدعوه للحق

لا اكراه فى الدين قد تبين الرشد من الغى

والحقيقه اننا نعامل نفسنا على اننا اقليه

مع اننا السواد الاعظم لمصر

الان يأتى اليوم الذى يكون فيه العقل اساس

ربما هو قريب ربما

انا اجزملك ان ما يفعله من يدعى السلفيه وهو اساسا لا يفهم معناها و لو فهم لنكر كل مايفعله من تناقضات و تخلف

مجرد مسير فى ركب

هو راى الشيخ علان ابن فلان يطالب بكذا و كذا ويقول ابو كذا شهد كذا

فيجرى ورائهم ضعيف العقل هذا ويتظاهر

وعندما يشتد السخط عليهم يقولوا ان ما يفعلوه هو نوع من انواع حقوق الانسان و المطالبه بها

و يردد ضعيف الفكر هذا الكلام

بلا تفكير

انا اسئله التمهل و العوده الى كتاب الله

و الاعمال به

و اقسم بالله انه سيكون شخص طبيعى طبيعى

لا تعقيد فيه

وسيعمل عقله بكفائه

________________

و متزعليش لو حد شتمك
عادى
سلام مؤقتاً يا نواره
___________________________

اقرأ مقال الا من وقفه للحمقى ( لمنع تفتيت الرموز المصريه )

اقرأ و متكسلش

على مدونه مصر .........الروح والنصر ادعمها تدعم مصر والثوره

http://misr25jan2011.blogspot.com/2011/05/blog-post_06.html

_________________________
الى عاوزنى يجينى
http://misr25jan2011.blogspot.com

e said...

ﻋﻠﻲ ﻓﻜﺮﺓ ﻣﻮﺿﻮﻉ ﺍﻟﺴﺖ ﻛﺎﻣﻠﻴﺎ ﺭﻭﺣﻮﺍ ﺍﻗﺮﻭﺍ ﻟﻟﺪﻛﺘﻮﺭﺓ ﻟﻤﻴﺲ ﺟﺎﺑﺮ ﻓﻲ ﺍﻟﻤﺼﺮﻱ ﺍﻟﻴﻮﻡ ﻫﻲ ﺟﺎﺑﺖ ﺍﻟﻤﻔﻴﺪ

haroon said...

بس الشهادة لله.. المظاهرات دي مجرد ردود افعال....
ازاي حكمت ان المظاهرات بتاعة الاخوة المسيحييين ردود أفعال ؟؟؟؟؟؟؟؟؟؟ وليه متقوليش ان مظاهرات السلفيين هي اللي ردود افعال ؟؟ يا نوارة الدائرة مغلقة ...بصراحة كلامك تحيز ضد السلفيين ...بالعقل والمنطق لو كاميليا اسلمت فعلا يبقي الكنيسة هي اللي بتولع الامور لو محتجزاها فعلا ..ولو ما أسلمتش يبقي الكنيسة برضه تطلق حريتها وتسيبها تظهر بشكل علني وتقول انها مازالت مسيحية والموضوع ينتهي ..

haroon said...

خرفت منك أوي المرة دي

haroon said...

كلامك بيناقض نفسه ..في حين بتطالبي ان كل واحد حر ف عقيدته ..يكون بهائي بوذي اي كلام فاضي ..طب ليه بتنكري حق العقيدة علي كاميليا وتريزا ؟؟ وليه الكنيسة اللي انت شايفة ان السلفيين اتظاهروا قدامهم وخوفوهم مش ضد حرية العقيدة؟؟ رغم ان الكنيسة ف ايدها حل المشكلة رحت تهاجمي السلفيين اللي تظاهرهم هو اللي رد فعل مش العكس ...بصراحة تهييس شعبي بجد

ملكش دعوة said...

طب انا نفسي اشوفك بتتبني قضيه حريات خاصه بالمسلمين المضطهدين بنفس الحراره يعني انتي بتسفهي من قضيه امرأه حبت تختار معتقدها وبتقولي "انجزوا بأه مش ناقصين وجع دماغ "وبعدين انا عايزه اصدق فعلا انك توجهك ليبرالي صرف لكن ساعات بتنحازي بشكل مريب وده اللي بيحير الناس فيكي مش بهاجمك بس عايزه اعرفك انك لو عيزاها شمال علطول ماشي بس متجيش مره واحده وتاخدي يمينك هتخبطي كتير والناس هيقولوا ملهاش في السواقه.... سمعت كتير في مدونتك بيقول متناقضه .. ارائك مضطربه .. انتي شايفه ايه !!!!!!

meleswey said...

كده حضرتك بتحترمي الشيعة و البهائيين و النصارى و كل الملل برجاء إحترام الآخر ولو حد ليه أخ شيعى في طرة يروح يدور عليه و روحي معاه لو حبيتي
بس بطالباك بالاعتراف بحقوق الاخر في المجتمع و أي حد مكتوب في بطاقته مصري و مسلم

kandil86 said...

ربنا يكافئك على اجتهادك يا نوارة ويغفر لك اخطاءك لان انا متاكد ان كلامك بيعلى قيمة مهمة وهى الانسانية والعدل التى اقرها الاسلام كمبدا اساسى قبل نشر الشريعة ولنا فى قول رسول الله (ص) فى اول سنوات نشر الرسالة ( الناس كأسنان المشط )مبدا فوق مبادىء الدساتير الغربية ومبدئيا فى موضوع كاميليا احنا لازم نقدر غيرة السلفيين لان الموضوع خطير وهو كلام عن تغيير ديانة انسان بالقوة والقهر وبيقولوا عندهم ادلة على الكلام دة والصح تقديم الادلة والشهود للقضاء وننتظر العدالة ولا نحرق بلد بهوس قلة من اى من الجانبين ومنخليش حد يمسك علي المسلمين حاجة ويقول ان احنا بنهدد حد فى دار عبادتهم لان الاسلام اكبر من انة يتحط فى ميزان واحد مع مجموعة مهاويس ومن تحركهم الانسانية لا يبالون بمسيحى او شيعى او سنى او بهائى او بوذى لان القضية مش قضية عقيدة دة قضية رابط اكبر وهو رابط الانسانية ودة سبب تعاطفنا مع اليابان فى كارئة الزلزال بالرغم من انهم لا يدينون بدين سماوى فكيف يستكثرون تعاطفنا وتضامنا مع اخوتنا فى الغروبة والوطن ولبالنسبة للشيعة الشسخ سالم عبد الجليل قال ان الشيعة منخم من ينطقون بكفر ولكنهم ليسوا بكفار فلذلك هم مسلمون فى الاول والاخر ومصر اللى وقفت امام موجات التشيع فى اوجها ايام الدولة الاسماعيلية (الفاطمية) لن تخاف من شوية ناس بيعتنقوا المذهب الشيعى واخيرا الاسلام حضنا على الوقوف بجانب البشر اى كانت معتقدانهم وافكارهم ونجادلهم بالتى احسن واخنتم باية
بسم الله الرحمن الرحيم
( ولو شاء الله لجعلكم أمة واحدة ولكن يضل من يشاء ويهدي من يشاء ولتسألن عما كنتم تعملون ( 93 ) ولا تتخذوا أيمانكم دخلا بينكم فتزل قدم بعد ثبوتها وتذوقوا السوء بما صددتم عن سبيل الله ولكم عذاب عظيم ( 94 ) ولا تشتروا بعهد الله ثمنا قليلا إنما عند الله هو خير لكم إن كنتم تعلمون ( 95 ) ما عندكم ينفد وما عند الله باق ولنجزين الذين صبروا أجرهم بأحسن ما كانوا يعملون ( 96 ) ) صدق اللعه العظيم

حازم الهواري said...

مساء الخير يا نوارة دياما كعادتك كلامك فى الصميم وعلى الوجع وبيطرب الواحد وانا معاكى ان موضوع كاميليا ده بقى حاجة كده زي هبلة ومسكوها طبلة وخلاص مشاكلنا اتحلت وبقت فلة وجايين على موضوع كاميليا ده وهو اللى هيسقط الدولة او هيسقط الاسلام لا قدر الله والاخوة دول بقى يا ستى فى دماغهم انهم هما المسلمين والباقى كفرة انا فى السعودية وواحد مرة بيقولى شعرك طويل قلتله لو قل ادبه عليك اقصه فورا ثم يا عم الحاج قبل ما تقولى شعرك طويل وقصير تعالى نشوف مين فينا حافظ قرآن اكتر ولا بلاش نصارع بعض ونشوف مين فينا ارجل ؟؟؟ وانا واثق انى هشقك نصين بيدي ولا اقولك تعالى نشوف مين فينا نسبه اشرف انا جدى الرسول صلى الله عليه وسلم انت جدك مين ؟؟؟؟ وطبعا ده شىء مش مقبول الفخر بالانساب بس دول عالم ماعندهوش ريحة الدم وفاكرين ان الناس زنادقة وهما اللى فى اديهم كروت الجنة والنار ربنا يهديهم وعلى فكرة بقى الموضوع ده خنقنى وخنق كل الناس ما يتلموا فى حتة على جنب ويقعدوا ساكتين مش هما دول بتوع حرام الخروج على الحاكم ؟؟؟ رغم ان مبارك علماني ومش بيحكم بشرع الله وهما برضه اللى اتظاهروا وسبوا شيخ الازهر هو حرام التظاهر على حسنى اللى ما كانش بيركعها وحلال التظاهر وسب شيخ الاسلام احمد الطيب ؟؟؟ ومش حرام برضه سب رجل دين من المسيحيين الرسول صلى الله عليه وسلم حرم علينا اننا فى الدعاء نتعدى والقرآن الكريم حرم ذلك بسم الله الرحمن الرحيم((ادعوا ربكم تضرعاً وخفية إنه لا يحب المعتدين )
سورة الاعراف آية 55 ده فى الدعااااااااااء اللى ما حدش هيسمعه غير بنا امرنا ما نتعداش على اصحاب الملل التانية حتى لا تكون فتنة فى الارض واول حد هيسبوه رد على تعديك عليهم رسولنا الكريم صلوات ربي وسلامه عليه فسيبك منهم يا نوارة الكلام معاهم قلته مصلحة بس لى عتاب عليكي يا بنت عمي لان موضوع الشيعة بالفعل خطرهم اشد لان دول مش اصحاب عقيدة وبلاش تفسري كلامي غلط وتطلع نرفوزتك عليا اقسم بربي انى عاشرتهم وما يكنونه للسنة اقسم بالله شىء فى منتهى منتهى الخطورة واللى عملوه فى العراق يشيب له الولدان انا مش بحب الطائفية بس المسيحيين على راسى وراس ابويا من فوق ديانة سماوية امرنا ديننا ان نتحرمها ونحرتم معقتنها واليهودية ايضاً انما يا ست نوارة لما يكون المعتقد ده هيضر فعلا بمصلحة البلد ولو عايزة اقولك هيضرنا ازاى ده يطول شرحه وهبعت لحضرتك اميل لو حبيتى موثق باللى هقوله يبقى السجن عليهم قليل اما البهائيين يا نوارة ده مش دين وما تنسيش ان النقاب بيحرموه فى اوروبا بلد التنوير والدولة المدنية وذبح الاضاحي واى مظهر من مظاهر الاسلام يعنى يا ست نوارة مش هنبقى احنا يعنى اللى فندة عن الخلق ونجيب المجوس والهندوس ونقولهم تعالوا خدوا راحتكم فى بلدنا دحنا بلد الديمقراطية اظن يا نوارة اننا يجب علينا حماية مجتمعنا من اى شىء ممكن يضره سواء المغلاة فى الدين اى دين او التفريط فى المسائل بالشكل ده وبالمرة ندي لعبدة الشيطان حقوق برضه ونكتبه فى البطاقة الديانة عبد ابليس ونعملهم معابد وبالمرة برضه اللى بيعبدوا حاجت تخدش الحياء لو قلتها من العلويين نديهم حقوقهم يا نوارة عتابي لكى من محبة وعشم وقبل ما تفكرى تردي عليا بقسوة او بتهكم ارجعى لكلامي ولو حبيتى هبعتلك ادلة كتير موثقة على اللى بقوله وعلى فكرة انا لا اخوان مسلمين ولا سلفى ولا اتبع لاى زفت الطين من الحجات دي انا مصري بحب بلدى وبحب كل البشر ومش بكره حد واى مصري سواء مسيحي او مسلم بيحب مصر والله ابوس قدمه وايده

حازم الهواري said...

مساء الخير يا نوارة دياما كعادتك كلامك فى الصميم وعلى الوجع وبيطرب الواحد وانا معاكى ان موضوع كاميليا ده بقى حاجة كده زي هبلة ومسكوها طبلة وخلاص مشاكلنا اتحلت وبقت فلة وجايين على موضوع كاميليا ده وهو اللى هيسقط الدولة او هيسقط الاسلام لا قدر الله والاخوة دول بقى يا ستى فى دماغهم انهم هما المسلمين والباقى كفرة انا فى السعودية وواحد مرة بيقولى شعرك طويل قلتله لو قل ادبه عليك اقصه فورا ثم يا عم الحاج قبل ما تقولى شعرك طويل وقصير تعالى نشوف مين فينا حافظ قرآن اكتر ولا بلاش نصارع بعض ونشوف مين فينا ارجل ؟؟؟ وانا واثق انى هشقك نصين بيدي ولا اقولك تعالى نشوف مين فينا نسبه اشرف انا جدى الرسول صلى الله عليه وسلم انت جدك مين ؟؟؟؟ وطبعا ده شىء مش مقبول الفخر بالانساب بس دول عالم ماعندهوش ريحة الدم وفاكرين ان الناس زنادقة وهما اللى فى اديهم كروت الجنة والنار ربنا يهديهم وعلى فكرة بقى الموضوع ده خنقنى وخنق كل الناس ما يتلموا فى حتة على جنب ويقعدوا ساكتين مش هما دول بتوع حرام الخروج على الحاكم ؟؟؟ رغم ان مبارك علماني ومش بيحكم بشرع الله وهما برضه اللى اتظاهروا وسبوا شيخ الازهر هو حرام التظاهر على حسنى اللى ما كانش بيركعها وحلال التظاهر وسب شيخ الاسلام احمد الطيب ؟؟؟ ومش حرام برضه سب رجل دين من المسيحيين الرسول صلى الله عليه وسلم حرم علينا اننا فى الدعاء نتعدى والقرآن الكريم حرم ذلك بسم الله الرحمن الرحيم((ادعوا ربكم تضرعاً وخفية إنه لا يحب المعتدين )
سورة الاعراف آية 55 ده فى الدعااااااااااء اللى ما حدش هيسمعه غير ربنا امرنا ما نتعداش على اصحاب الملل التانية حتى لا تكون فتنة فى الارض واول حد هيسبوه رد على تعديك عليهم رسولنا الكريم صلوات ربي وسلامه عليه فسيبك منهم يا نوارة الكلام معاهم قلته مصلحة بس لى عتاب عليكي يا بنت عمي لان موضوع الشيعة بالفعل خطرهم اشد لان دول مش اصحاب عقيدة وبلاش تفسري كلامي غلط وتطلع نرفوزتك عليا اقسم بربي انى عاشرتهم وما يكنونه للسنة اقسم بالله شىء فى منتهى منتهى الخطورة واللى عملوه فى العراق يشيب له الولدان انا مش بحب الطائفية بس المسيحيين على راسى وراس ابويا من فوق ديانة سماوية امرنا ديننا ان نتحرمها ونحرتم معقتنها واليهودية ايضاً انما يا ست نوارة لما يكون المعتقد ده هيضر فعلا بمصلحة البلد ولو عايزة اقولك هيضرنا ازاى ده يطول شرحه وهبعت لحضرتك اميل لو حبيتى موثق باللى هقوله يبقى السجن عليهم قليل اما البهائيين يا نوارة ده مش دين وما تنسيش ان النقاب بيحرموه فى اوروبا بلد التنوير والدولة المدنية وذبح الاضاحي واى مظهر من مظاهر الاسلام يعنى يا ست نوارة مش هنبقى احنا يعنى اللى فندة عن الخلق ونجيب المجوس والهندوس ونقولهم تعالوا خدوا راحتكم فى بلدنا دحنا بلد الديمقراطية اظن يا نوارة اننا يجب علينا حماية مجتمعنا من اى شىء ممكن يضره سواء المغلاة فى الدين اى دين او التفريط فى المسائل بالشكل ده وبالمرة ندي لعبدة الشيطان حقوق برضه ونكتبه فى البطاقة الديانة عبد ابليس ونعملهم معابد وبالمرة برضه اللى بيعبدوا حاجت تخدش الحياء لو قلتها من العلويين نديهم حقوقهم يا نوارة عتابي لكى من محبة وعشم وقبل ما تفكرى تردي عليا بقسوة او بتهكم ارجعى لكلامي ولو حبيتى هبعتلك ادلة كتير موثقة على اللى بقوله وعلى فكرة انا لا اخوان مسلمين ولا سلفى ولا اتبع لاى زفت الطين من الحجات دي انا مصري بحب بلدى وبحب كل البشر ومش بكره حد واى مصري سواء مسيحي او مسلم بيحب مصر والله ابوس قدمه وايده

meleswey said...

في حد قالها لك قبل كده
وهقولها لحضرتك ثاني
عشان تعرفي السلفي بيفكر إزاي وتردي عليه صح
بصي يا سيدتي عندنا حديث بيقول إنما الاعمال بالنيات........
يعني لازم قبل العمل يكون فيه نية ....
و النية بتيجي قبل العمل اللي موافق للكتاب (القرآن) والسنة...
لما السلفيين طلعوا التحرير بنية ....من رأى منكم منكراً فليغيره بلسانه وفيه حاجات ثانية بس ممكن أكون مش عارفها ....و بالتالي بسألك أنتي نيتك إيه ؟

islam said...

في حاجة مهمة أوي فاتت عليكي تخلي كل الكلام اللي أنتي كاتباه ما لوش لازمة ألا وهي أن مش كل اللي ورا قضية كاميليا شحاته سلفيين وايه علاقة السلفية بالموضوع..أنا مش سلفي وفي نفس الوقت شايف أنه اللي حصل في قضية كاميليا شحاته ده استهبال من الكنيسة لأنهم اتمرعوا في عهد حسني مبارك.ودي واحدة أسلمت ونطقت الشهادتين والكنيسة احتجزتها ده مش مخالف للقانون؟

ملكش دعوة said...

وبعدين ما تناقشي بموضوعيه من الطرف الاخر
ليه المدعوه كاميليا تعمل توكيل للمدعو جبرائيل هي مدانه ولا حاجه لا سمح الله
عمر الليثي كان ناقص يحب علي رجليه عشان بصفته محاميها وقريب الصله بيها ومتصورين مع بعض صوره اسريه انه يخليها تتكرم وتتعطف وتمثل امام النيابه
ده الناس بتبوس الايادي عشان يطلعوا في التليفزيون وبالذات اخوانا النصاري وصمت شنوده الغير مبرر ... الله دنته رمز المسيحيه يا عم قول حاجه بدل منته سايب الناس كده تتجني عليك
واخيرا سؤال صغنن ... هيبقي شكلك ايه لو البنت دي فعلا طلعت مختطفه او معذبه او محبوسه ساعتها هيبقي شكلك وححححشششششش

ملكش دعوة said...

انتي بتقري التعليقات ولا لأ
عزيزتي النواره التثبث بالرأي ليس خطأ ولكن عدم الاستماع للرأي الاخر هو عين الخطأ

qqq said...

ما شاء الله، ابقي خدي بالك من الهوا و انتي نايمة بالليل، و منه لله جمال غيطاس اللي خلاني أهتم بالرد عليكي هنا لان سيادته قال إن المدونة من أكثر المواقع انتشارا، و قبل أن أرد عليكي أحب أقولك إنه مع الأسف انتي جمعتي بين التشوش الفكري و حب الحواديت والكلام المرسل اللي عامل زي الكلام اللي بيتقال في قعدة الفسحة عن البت مستورة اللي هي أستغفر الله أستغفر الله كدة و بس، و الحدق بقي يفهم هل استغفر الله سرقت و لا أستغفر الله زنت و لا أستغفر الله نسيت سنة الفجر، المهم إنها أستغفر الله أستغفر الله كدة و بس. و بعدين هو من إمتى يعني سيادتك إشتغلتي شيخة و فقيهة لا و ما شاء الله قاضية كمان، طب إيه رأيك بقي إنه بعد اللي قلتيه ده أنا بقيت فعلا متأكد إن المادة التانية للدستور دية هي أهم مواده على الإطلاق و ليهم حق اللي بتسموهم سلفيين يموتوا نفسهم عشانها، يا ظالمة يا مفترية دا حتى في ألمانيا و أوروبا فيه قوانين بتعاقب اللي بيؤمنوا بأفكار معينة زي معادة السامية مثلا، و إخواتك الأرذوسكس نفسهم على إستعداد إنهم يموتوا نفسهم و لا واحد منهم يبقى كاثوليكي، و بعدين هو لما سيادتك يعني كله عندك سداح مداح ليه يعني لم تذكريي البابا مكسيموس اللي البابا شنودة حاربه في المحاكم و النظام السلبق منعه من إصدار بطاقة يكتب فيها إنه بابا مجمع كنائس أمريكا، هو فيه إية؟؟؟ ماهو بصي يا أمي هو أصلة لأي مجتمع لا بد من عقد إجتماعي يرتضيه الأغلبية العظمى في المجتمع و الباقي عليه يتكيف مع هذا العقد، ما هو لما ييجي مجموعة تبقى عايزة تعاطي المخدرات يكون مسموح لو المجتمع سمح ليها يبقي ماشي زي هولندا مثلا و لو المجتمع رفض يبقى مافيش حاجة اسمها حرية هنا بقى، و بعدين يعني أنا موش قادر أفهم إنتي قارشة ملحة كاميليا ليه؟ بصي يا أمي اللي بتسميهم سلفيين منطقيين جدا في قضية كاميليا لأنهم ما قالوش يتجبوها مسلمة ينموتها، وبعدين فية بلاغ باختطاف المذكورة و لا بد من البحث عنها لحد ما تظهر، و المتهمين بخطفها أعلنوا بوضوح إنها عندهم بس يا عيني ما أسلمتش، و هو يا غبي منك له و لها هو حد من اللي بتسموهم سلفيين كان قال يتجبوها مسلمة يا بلاش؟ و هو كونها مسلمة و لا نصرانية ليه علاقة بالإختطاف؟ هي تظهر يا حلوين و تقول إنها سليمة و تحدد اللي هي عايزاة و احنا ما يهمناش أي دين هي عايزاة، شوفي يا أمي الإسلاميين كانوا واضحين و صادقين مع نفسهم لما قالوا إن مرجعية الدولة و هويتها لا بد تكون الإسلام و لما تكوني يا شاطرة عايزة تزنقيهم فكريا و تكسيفيهم يبقي تجيبي ما يثبت إن الإسلام يسمح للبهائي بحرية العقيدة زيه زي النصراني و يسمح الكنيسة انها تحبس كاميلياوهو شيخ الأزهر عندك أهة روحي و هاتي منة الفتوى، لاكن الله يخليكي ظبطي كلامك و أفكارك لإنها موش طالبة استفزاز و تضيع وقت عشان نشرح في المشروح و تانى مرة خليكي واضحو و قوللي من اللي حرم الدعا للاطفال في لبنان و امتى و ازاي و بطلي كلام قعدة الفسحة دة يا مطلعة يا مثقفة، و منه لله جمال غيطاس تاني.
يا دماغيي يا دماغيي
الله في عونك يا دماغي

يا دماغيي يا دماغيي
الله في عونك يا دماغي

متفائل said...

كلامك منطقي ميه في الميه ماهو يا إما الحرية والإنسانية للكل من غير خيار وفقوس يا إما نسك ع الليلة كلها .. يسلم فمك

hardway said...

نـرنـر ما تكلمي بلال فضل وأتصلي بعمو ابراهيم عيسي مش معقول الناس السلفيين دول...ثورتنا هاتضيع يا جماعه....
ممكن تكلمي الشاب/شادي الغزالي حرب
الواد ده واصل وساويرس بيموله كويس
ممكن يعمل حاجة يانرنر!!!!!!!!!!!!
ولا اقول لكي سيبك من كل اللي فوق دول
اللي هايجيب الفايدة كلها ..كلها..
وهيخلي السلفيين يحترموا نفسهم بالجامد
حبيبي وحبيبك وحبيب مصر 25 يناير..
الجـــــــاااااااااااااااامد
جــــــــداااااااااااااااااااا
تميم ..عمري كله..تميم البرغوتي..
شفتي المفاجأة دي...مافيش بعد كده

محمد نبيل said...

الحل ان الحكومة تتعامل بحسم وشفافية وتدى رسالة مفادها "مافيش ياما ارحمينى فى التعامل مع القضايا الطائفية"

- الكنيسة لازم تفهم ان عهد الدولة داخل الدولة انتهى وعهد تعذيب اتباعها اللى سابوا دينهم زى القرون الوسطى انتهى، لأن الكلام دة موثق بشهادات ناس بالفيديو، لازم أى تورط جديد من الكنيسة فى كلام زى دة يتم فضحها واتخاذ الاجرائات القانونية مع المتورطين منها ولو فيهم البابا نفسه

- المسلم اللى يعتدى على مسيحيين لأسباب طائفية، ولا المسيحى اللى يروح يقتل أخته عشان أسلمت لازم يطبق عليهم أقصى عقوبات قانونية بشفافية وبدون جلسات عرفية.

- التأكيد على حرية تغيير العقيدة وحماية من يغيرون عقيدتهم من أى اضطهاد أو ملاحقة.

Ahmad Tawfek Ahmad said...

سبحان الله
كل حاجة بتعمليها متميزة حتى العجين اللي بتعجنيه متميز
و تظل القاعدة
اهو كلام و الكلام ما عليهوش جمرك
يصلح كلامك عنوان فيلم سخيف اسمه
و نطق الرويبضة ان ان ان

Hisham Ibrahim said...

نوارة

قبل الخوض فى موضوع البهائية ده بالذات اسألى أهل العلم

الدكتور سليم العوا ليه باع فى الموضوع ده .. و ده قبل كل شىء و أى شىء راجل فقيه قانونى محنك .. مش على غرار مرتضى منصور يعنى لأ .. راجل بيخشى الله

فا بدل ما تخوضى فى كلام يزعلنى منك و يخالف عقيدتنا اللى هى الإسلام لله بدون تعمد منك .. أدعوكى تاخدى رأى الدكتور .. وان شاء الله منتظر رسالة منك تقوليلى أنا سمعت نصيحتك و سألته .. لإنك كده بتزعلينى منك بجد .. وانا مش عايز أزعل من حد باحترمه و باعتز بيه .. لإنه بيحيد عن الحق بدون علم
منتظر ردك .. و يا ريت تاخديه مأخذ الجدّ ، و ما تقوليش أنا عارفة رأي الدكتور أو تعملى أى حاجة .. غير انك تسمعى نصيحتى .. و تسأليه وجها لوجه .. هاتوضحلك حاجات كتير غايبة

ZAMALEK said...

والله انتى كلامك زى العسل وفى الصميم يانوارة
فعلا بنت ابوكى يسلم فومك على كلامك الرائع

ahmed elnagar said...

ممك اسأل يانواره بس يعني اوه مظاهرات المسيحيين ردود أفعال أرجو التوضيح بجد