Thursday, 5 May 2011

احنا مش لازم ننسى وقفة الناس الحلوة دي جنبنا

الفلسطينيين... يا عيني
واقفين دلوقت رافعين اعلام مصر وعمالين يقولوا شكرا ام الدنيا.. حاجة توجع القلب، عشان اساسا المصالحة دي ماهياش حاجة فظيعة ولا حاجة، ومش اول مرة تحصل، ما السعودية صالحتهم قبل كده وما قالولهاش شكرا ابو الدنيا، بس هم مش بيحبوا يكسفوا ايدنا
فاكرين ايام مبارك لما اسماعيل هنية طلع تهنئة بفوز المنتخب المصري وقال لنا الف مبروك وبالمناسبة السعيدة دي افتحوا لنا المعبر؟
احنا بقى مش لازم ننسى وقفة الناس الحلوة دي جنبنا، ده كانوا هم تقريبا الوحيدين في العالم اللي عندهم امل فينا، ومن كتر املهم كنت باقولهم: الاخوة الفلسطينيين اللي مستنيين مصر على الغدا... كلوا انتوا واحنا لما نيجي حنسخن وناكل
بس الشهادة لله ما سمعوش كلامي، فضلوا مجوعين نفسهم وعمالين يقولوا ده مصر دي.. دي حتبقى عروسة، بكرة تشوفوا، ده اجدع ناس المصريين دول
فاحنا كده بقى عايزين ناخد خطوات جادة، لإن الثورة بتاعتنا ممكن يحصل لها انتكاسة ويرجع لنا نظام زي نظام مبارك واوسخ لو فضلنا محاطين بجو عدائي، وفضلوا اعداء الثورة في المنطقة اقويا، وحبايبها ضعفا
لازم حبايب الثورة يبقوا اقويا لان ده حيأثر علينا بشكل مباشر، انا طبعا مقدرة ان السادات زرع ثقافة متخلفة تخلي الناس مش عارفة تربط ما بين الشأن الخارجي والداخلي
طيب.. هي اولا فلسطين مش شأن خارجي، ثانيا.. اي كيان دولة بالاساس شأن خارجي، واي حاجة لها علاقة بالشأن الداخلي، من اول البطالة والفقر وسعر الطماطم، حلها في الشأن الخارجي اساسا، لإن الدولة المضغوط عليها من قوى خارجية مش بتعرف تبقى دولة محترمة، واديكوا شفتوا، مبارك كان حيفلت من المحاكمة بسبب ضغوط خارجية، ولولا اننا بنتحرك في سكة تقوية علاقتنا الخارجية بحبايب الثورة ما كانش بقى عندنا ورقة ضغط نقاوم بيها الضغوط الخارجية، ولسه فيه ضغوط علينا عشان مبارك ما يتحاكمش، ولسه احنا بنحاول نقوي شبكة علاقتنا الخارجية بحبايب الثورة عشان نعرف نحاكمه.. وهكذا
المهم يعني، مافيش حد يبقى ساكن في امان وتبقى الشقة اللي على يمينه والشقة اللي على شماله مولعين
معلش مضطرة اشرح البديهيات دي، ومنه لله السادات مطرح ما راح
دلوقت اسأل اي ظابط جيش صاحبك ده من اللي بتسأله دايما وتيجي تقول لي ظابط جيش صاحبي قال لي، عشان تعرف احنا بقالنا 30 سنة ما حاربناش ليه
بقالنا 30 سنة ما حاربناش عشان فيه مقاومة فلسطينية مشكلة حائل ما بينا وبين اسرائيل، ولو المقاومة دي - لا قدر الله - انكسرت، ولو تمكنت اسرائيل من السيطرة على الفلسطينيين تماما، اسرائيل كده راجعة سينا راجعاها مافيش كلام
يعني اكذوبة ان مبارك هو اللي ما خلناش نحارب دي تبقوا تتغطوا بالليل كويس عشان ما تحلموش بيها، والكلام ده عارفه الجيش كويس، من اكبر راس لحد ظابط الجيش صاحبك 
امبارح خالد مشعل قال لازم فيه آلية جديدة لمواجهة الاحتلال، مش معناها نعلن الحرب، بس السلام فشل، ولازم نلاقي طريقة جديدة
الراجل بيتكلم صح
وده امن قومي مصري مافيش كلام
شعب فلسطيني قوي وموحد = أمن قومي مصري ودور مصري اقليمي قوي = مصر قوية اقتصاديا وسياسيا = طفرة في القضية الفلسطينية
هي دايرة
هو كده، شئنا ام ابينا، توأم ملتصق حنعمل ايه؟ عشان كده اسرائيل مش عايزة مصر تبقى ديمقراطية 
دلوقت المصالحة دي ماهياش القشطة قوي ولا حاجة، وممكن تفشل، والفلسطينيين فرحانين يا عيني مش عشان هم عبط ولا عشان هم مش فاهمين ان المصالحة دي هشة، بس عشان جاية من وش مصر وهي كانت واحشاهم وعايزين اي حاجة من ناحيتها يمسكوها ويقعدوا يشموا فيها
مافيش بقى حاجة تضمن اننا حطينا رجلنا على الطريق الصحيح غير الاقتراح اللي قاله تميم البرغوثي في الندوة بتاعته هنا في القاهرة:
انتخابات يشارك فيها كل الفلسطينيين في الداخل وفي الشتات، مش بس الضفة وغزة
هو الاقتراح ده ممكن يلاقي اعتراض من اسرائيل لو تضمن عرب 48، ولو ما اتضمنوش حيبقى ظلم لهم، بس يستحملوا شوية
ممكن كخطوة اولى يبقى فلسطينيين الضفة وغزة وفلسطينيين الشتات، في الحالة دي مافيش فصيل حينفرد بتمثيل الشعب الفلسطيني، وحيبقى قيادة توافقية ماحدش حيقدر يعترض عليها، وفي الحالة دي مصر تدي كل الدعم للقيادة التوافقية دي، وما يبقاش فيه فصيل حاسس بالظلم، وممكن مصر تتولى التنسيق بين الفصائل او حتى تحط آلية للتنسيق لو هم مش طايقين بعض خالص يعني
كده مصر ضمنت انها امان من ناحية اسرائيل لانها حتبقى بنت حائط سد بينها وبين اسرائيل من البشر الفلسطيني المتوحد ما تقدرش اسرائيل تخترقه عشان تعمل فينا اللي كانت بتعمله ايام المخلوع
تقوم مصر يبقى عندها وقت ومجال تقوي نفسها، قوم لما مصر تبقى قوية تعرف تسند الحائط البشري الفلسطيني من ضهره كويس، فهو يقوى، يقوم يقومي موقف مصر، قوم مصر تبقى اقوى فتقويه، يبقى زي فرعين معشقين في بعض كل واحد فيهم شايل التاني
كده تمام من الناحية الشرقية يبقى امنا نفسنا، وده حينعكس علينا اقتصاديا بقوة، نقدر بقى ننمي سيناء، ونستغل كل الموارد اللي فيها واحنا حاسين بامان، لو زرعنا مليون فدان في سيناء خريطة المطر حتتغير، والاقتصاد يحصل فيه طفرة، وده مش حينفع يحصل طول ما الفلسطينيين ضعفا واسرائيل نايمة مشتحة ودراعها فارد على سيناء، قوم لما احنا ننمي سيناء، يبقى فيه فرصة ان الفلسطينيين ما يبقوش تحت رحمة الاقتصاد الاسرائيلي ويتذلوا له، يبقى تنمية سيناء تنمي مصر وتسند الفلسطينيين اقتصاديا، قوم هم يبقى وضعهم احسن في مواجهة اسرائيل، قوم يشكلوا حائط سد اقوى بينا وبينها، قوم احنا ننطلق اكتر في التنمية الاقتصادية من غير مخاوف ولا ضغوط، اديني عمالة الت واعجن اهو واشرح بالتفصيل عشان ما يجيش ابن ... سادات يقول لي: احنا مالنا ومال فلسطين، قوم نبقى اقويا سياسيا، ومستقلين بالقرار، وادي شرف بيحاول مع دول حوض النيل
فاضل بقى الناحية الغربية
تونس عندها مشاكل
مشاكلهم شبه مشاكلنا صحيح وده بيخلق مشكلة تالتة ان احنا الاتنين ممكن نقعد نندب جنب بعض: اه والنبي ياختي، انت حتقولي لي؟
بس كده مش حينفع، احنا لازم ننسق مع بعض، انا لساني اتدلدل
مش حكومة شرف اللي حتنسق مع الحكومة التونسية لان الحكومة التونسية مش قد كده، ومخترقة
التنسيق المرة دي لازم يبقى بين النشطاء والثوار من البلدين، احنا نساعدهم في حاجات وهم يساعدونا في حاجات
تقوم لما احنا الاتنين نحقق تقدم نزنق القذافي في النص ونأمن شره، لانه مؤذي قوي الراجل ده، ربنا يخلصنا منه على خير
لازم نوجد وسائل للتواصل ما بينا وبين النشطاء التونسيين بحيث هم يطرحوا مشكلتهم ونشوف ممكن نساعدهم فيها ازاي، واحنا نطرح مشكلتنا ونشوف هم يساعدونا ازاي
فيه مشكلة اساسية دلوقت بتواجه تونس، ان الاسلاميين والعلمانيين بينهم مشاكل، وفيه تسريبات ان فيه تهديدات بانقلاب عسكري لو الاسلاميين نجحوا، والاسلاميين في تونس حينجحوا طبعا لانهم مش شبه الاسلاميين بتوعنا، مخهم نور كده ومتفتحين، فما فيش حجة لحد يسقطهم
والخلاف ده غلط، مدام الاسلاميين في تونس متفتحين يبقى فيه مجال ان العلمانيين ينسقوا معاهم ويعملوا برلمان ائتلافي
حد يعقلهم لان لو حصل بينهم مشادات جامدة الجيش حيتدخل والجيش مش حلو يتدخل في الفترة دي والجيوش بقى بتتعلم من بعض واحنا حنتئذي في الليلة دي كده 
هم ايه اللي حصلهم خدوا عين؟  دول كانوا اسياد العاقلين
بالنسبة لنا احنا ممكن يساعدونا هم في موضوع الفتنة الطائفية ده، الاسلاميين اللي عندهم ممكن يعقلوا لنا كتائب كاميليا شحاتة للانتاج الفني، ولو نسقوا مع بعض يبقى حلو، ولو ان دي فيها اذية على حزب النهضة، يعني التنسيق ما بين الاسلاميين المصريين والتوانسة حيبقى في صالح الاسلاميين المصريين، والاسلاميين التوانسة حيتفضحوا عندهم فضيحة المطاهر انهم بيتعاملوا مع مجانين مصريين
بس مش لازم يتعاملوا مع مجانين، يتعاملوا مع العاقلين اللي عندنا وفي نفس الوقت كل فصيل في بلده ينسق مع الفصائل التانية عشان تعدي، مش حينفع اي فصيل سياسي ينفرد بالبرلمان في اي من البلدين، والاسلاميين لو حريصين على بلادهم فعلا يسعوا لبرلمان ائتلافي، سواء في مصر او تونس... أم الصبي هي اللي ما ترضاش سليمان يقسم لها ابنها نصين، لازم الاسلاميين في البلدين ينسقوا مع العلمانيين عشان البرلمانين يبقوا اتئلافيين، ولازم العلمانيين يبطلوا الاسلاموفوبيا اللي عندهم
ولو انه صعب
اذا كنت انا في الاسبوع الاخير ده اصابتني اسلاموفوبيا من تحت راس فرقة كاميليا للانشاد الديني... بس معلش، فيه ناس عاقلة وينفع الكلام معاها
لو تونس فشلت - لا قدر الله - احنا حنفشل. وش كده مافيش كلام، لان ده حيدي امل لكل الصراصير انها تطلع علينا، كمان الانظمة الاستبدادية مع بقايا الانظمة البائدة بينسقوا مع بعض لحد دلوقت
ما ننسق احنا مع بعض كمان

40 comments:

aly said...

تمام كدة ركزي في المهم اللي عليه اجماع وسيبك من طنط شاهندة

aly said...

موضوع تونس والتهديد بالانقلاب العسكري دي مش هتكون أول مرة وأملنا أن العلمانيين يعرفوا أن دي مش مصلحة تونس ولا مصلحتهم ولا مصلحة حتى أفكارهم لا على المدى القريب ولا البعيد

أما نفيك تشبيه اسلاميين تونس بمصر فلأنك عندك اسلاموفوبيا مش لان الاسلاميين وحشين وواضح انك مصاحبة طنط شاهندة ومش مصاحبة واحدة من السلفيين والا فالوضع متشابه هنافي مصر

ياريت تقولي لاصحابك بتوع الليبرالية والعلمانية وبتوع اليسر يبطلوا يركزوا مع الاسلاميين ويركزوا مع البلد والشعب ومصلحة البلد

وصدق ربنا سبحانه وتعالى فأما الزبد فيذهب جفاء وأما ماينفع الناس فيمكث في الأرض

aly said...

موضوع كاميليا ده انا مش فاهمك فيه؟
يعني اللي يحاول يسلم بعد كدة نمنعه ونرده للكنيسة حفاظا على الوحدة الوطنية؟
هو لما نرفع قضية دفاعا عن حقها ف الاسلام لو كانت اسلمت فيها ارهاب وتطرف؟
طيب واللي بيدخلوا المسيحية وهاتك يا سب في الالام والمسلمين والرسول واحنا سايبينهم عشان الحرية اخبارهم ايه مع حضرتك ماينفعش يبقى فيه تعامل بالمثل؟

مشوار من كاميليا للنيابة تقول انا مسيحية ومع ذلك الكنيسة رافضة وبتراوغ او كاميليا نفسها رافضة بحد زعم الكنيسة ؟ وفي الاخر نحمل السلفيين الذنب؟

يا فيه معلومات انتي تعرفيها من البابا نفسه قالهالك عن طريق طنط شاهندة يا اما انتي بتقاوحي بس عشان مش عاجبك افكار الاسلاميين؟ في الحالتين انتي فيه حاجة غلط عندك ياحاجة نوارة

AMOON said...

طقة بقي في دماغي ومقتنع قوي الايام دي اننا يعني الجيش بتاعنا يخش ليبيا من ناحيتنا كدة من عند السلوم ويسيطر عليها علي الناحية اللي جنبينا وبعدين نبقي نشوف المرحلة اللي بعد كدة ودي فيها ايجابيات كتيرة اوي لينا ولليبيين .اة يعني جحا اولي بلجم تورة من ناحية هنقول لاسرائيل احنا اهو لان اعتقد كدة احنا مش اد حرب مع اسرائيل بس طبعا لما الجيش يعمل كدة هيكشوا مننا ويقوموا يحترمو الفلسطنيين .شايفين الاستراتيجية بقي طبعا الموضوع مش بالبساطة دي ومحتاج تمهيدات وتفكيرات وكدهون بس بسرعة برضك يعني قعدتين من المجلس العسكري بتاعنا علي شوية مساندة من الثوار الليبين ونتكتك بقي

Adb El-Hameed Riad said...

حركه النهضه قالت انها عايزه 35% من البرلمان . وفعلا الشعب فى تونس موقفه وحش . هو اه اطاح ببن على بس السلطه اليوميين دول عليها صراع بين اتباع امريكا واتباع فرنسا والشعب غايب!

aboo_sala7 said...

مقال خطير .... أتفق تماما مع كل ما ورد فيه

ليا فقط تعقيب بسيط فى نقطة كاميليا شحاته .... القضية عندى مش كاميليا

القضية فى حرية التدين ، مش كل واحد يسيب دينه ، يطلع ناس يقولوا ده اتعملوا غسيل مخ .. ده اتخطف ...الح

القضية بتاعت كاميليا لو تم حسمها ، فملف حرية التدين هيتم ترسيخه ، وبالتالى نتجنب آلاف المشاكل المستقبلية بإذن الله

dalyanassar_15 said...

صح جدا جدا الكلام ده

أبو هاجر said...

ست الكل مساء الخير
إيه حكاية يساعدونا ونساعدهم هو أنتم فاتحين جمعية خيرية بينكم وبين التوانسة . المسألة يا النوارة أعقد بكثير مما تتصورين . لقد أشرت إلى مسألة على غاية من الأهمية و الحساسية و الخطورة وهي مسألة الداخل و الخارج لكنك لم تستفيدي منها في تحليلك . عموما الخارج لا يرى في تونس سوى مسبح بخاصة لما الجار الأكبر لم يتحرك بعد لأنه هو الوحيد القادر على لم الشمل ولهذا هم يعملون جاهدين لاستتباب الأمن وهذا حديث آخر .
أما بخصوص مصر فالخارج لن يسمح لها أن تستمر كثيرا ماشية على حل شعرها لأنها إذا استمرت على هذا الحال فإن مصر ،كما علمنا التاريخ ، ستشجع الأخوات الصغيرات على التمرد وحل الشعر عندها يطالبن بالخلع .عندها تعم الثورة العربية الشاملة ويصبح شعارها "شعب واحد لا شعبين من مراكش إلى البحرين " وهذا لن يسمح به الخارج. من هنا أهمية تعميق الثورة في مصر وتعميق مطالبها لأنها هي القاطرة لكن في نفس الوقت نجاح ثورة مصر واستمرارها وديمومتها مرهون بتعميمها عربيا هنا ندخل في جدل الوطني القومي .ما يستلزم ضرورة و أهمية التنسيق بين كل القوى الثورية العربية على امتداد الساحة العربية من أحزاب ومنظمات ومؤسسات المجتمع المدني حتى الإسلاميين المستنيرين الذين يناهضون المشروع الاستعماري ويؤمنون بقيم العصر، هؤلاء أيضا يجب أن تكون لهم مكانة .لكن ما يجب التركيز عليه بشكل كبير في إطار جدل الوطني و القومي هو عدم الخلط بين الوطني و القومي ولا نعيد تجربة الخمسينيات و الستينيات الفاشلة .يجب ترتيب الأولويات أحيانا يسبق الوطني قبل القومي وكما قال لينين العظيم: الوطني الحق هو القومي الحق.
ملحوظة
وأنا قادم عندك إلى المدونة شاهدت ساعي البريد يحمل لك رسالة يبدو أنها مستعجلة لقد وضعها في بريدك على الفيس بوك
تحياتي الصادقة

أبو هاجر said...

ست الكل مساء الخير
إيه حكاية يساعدونا ونساعدهم هو أنتم فاتحين جمعية خيرية بينكم وبين التوانسة . المسألة يا النوارة أعقد بكثير مما تتصورين . لقد أشرت إلى مسألة على غاية من الأهمية و الحساسية و الخطورة وهي مسألة الداخل و الخارج لكنك لم تستفيدي منها في تحليلك . عموما الخارج لا يرى في تونس سوى مسبح بخاصة لما الجار الأكبر لم يتحرك بعد لأنه هو الوحيد القادر على لم الشمل ولهذا هم يعملون جاهدين لاستتباب الأمن وهذا حديث آخر .
أما بخصوص مصر فالخارج لن يسمح لها أن تستمر كثيرا ماشية على حل شعرها لأنها إذا استمرت على هذا الحال فإن مصر ،كما علمنا التاريخ ، ستشجع الأخوات الصغيرات على التمرد وحل الشعر عندها يطالبن بالخلع .عندها تعم الثورة العربية الشاملة ويصبح شعارها "شعب واحد لا شعبين من مراكش إلى البحرين " وهذا لن يسمح به الخارج. من هنا أهمية تعميق الثورة في مصر وتعميق مطالبها لأنها هي القاطرة لكن في نفس الوقت نجاح ثورة مصر واستمرارها وديمومتها مرهون بتعميمها عربيا هنا ندخل في جدل الوطني القومي .ما يستلزم ضرورة و أهمية التنسيق بين كل القوى الثورية العربية على امتداد الساحة العربية من أحزاب ومنظمات ومؤسسات المجتمع المدني حتى الإسلاميين المستنيرين الذين يناهضون المشروع الاستعماري ويؤمنون بقيم العصر، هؤلاء أيضا يجب أن تكون لهم مكانة .لكن ما يجب التركيز عليه بشكل كبير في إطار جدل الوطني و القومي هو عدم الخلط بين الوطني و القومي ولا نعيد تجربة الخمسينيات و الستينيات الفاشلة .يجب ترتيب الأولويات أحيانا يسبق الوطني قبل القومي وكما قال لينين العظيم: الوطني الحق هو القومي الحق.
ملحوظة
وأنا قادم عندك إلى المدونة شاهدت ساعي البريد يحمل لك رسالة يبدو أنها مستعجلة لقد وضعها في بريدك على الفيس بوك
تحياتي الصادقة

Hala Al Haddad said...

كلام عسل في الحتة الشرقية بس الحتة الغربية لسه عايزة شغل، متهيألي صابتهم عين التوانسة، وبرده صابهم القذافي، هو انتي مستقلة الضغط بتاع الحدود مع ليبيا...فعلا في ناس لازم تتفرغ لدعم التوانسة علشان احنا كلنا شايلينلهم جميلة كبيييييررررة

بساطه said...

ده حلمي والله ان يحصل ائتلاف بينا وبين تونس يااارب الف بين قلوبنا يارحمن.... شرح رائع لاهمية فلسطين جزاك الله خيرا

حلم بيعافر said...

على فكرة فرقة كامليا للانشاد الدينى دى مش صناعة اسلامية بس ...الموضوع من اوله لاخره عبارة عن خازوق من خوازيق الكنيسة...انا مش قادر افهم ليه مطلعتش من ساعتها فى برنامج ع الاهوا وقالت انها مسيحية او حتى بتعبد البقر


المهم

كلامك عن التنسيق بيننا وبين الثوار ومساندة الفلسطينيين والافادة والاستفادة كلام ميطلعش غير من حد عنده ضمير

انت من الاحرار يانوارة)))

negmat lail said...

قوووووووووووم نوارة تطلع هيه رئيس المجلس الأعلى للثورات العربية الشعبية..يا ريت تحاولي انت بنفسك تفتحي السكك دي بين مصر وتونس في الواقع مش بالتوجيه بس..ربنا يكرمك

كلزارزوزو said...

طبعا فاكرين ومش ناسين بس هما يخلوهم على ما بدأوة

omima said...

يا نوارة انا معاكى لازم الثورة تنجح فى البلاد العربية لكن المؤذى القذافى اوى الحكام الدكتاتوريين اللى زى بشار واصبح فية ثورة مضادة عربية للثورات الناجحة المفروض نحاول نقضى على الثورة المضادة اللى فى الداخل واضح انهم لابيموتو ولا ربنا بياخدهم طالعين امبارح يحتفلوا بعيد ميلاد ابو الفساد شباب طبعا اولاد المنتفعين المحبوسين واللى لسة برة وواضح انهم لايعدموا الوسيلة هناك من يخطط ويفتعل مشاكل ويبدوا ان الاخوة الفلسطنيين انفشهم قلقانيين على مصر لان الفترة دى مش واضح مين معانا ومين ضدنا وربك والحق بدات اقلق انا وكتييرزى

Amr Ebaid said...

طب انت مش حتشيلي صورة "الخاين محمود عباس" دي بقى.. مش ماشية مع المصالحة بقى و بتاع.. أنا عارف إنه أقرع و عبيط و زمباوي.. بس برضه عشان ما نزعلش حد

qqq said...

لا لا... براحة الله يكرمك، معلش يا أختي موضوع مجانين و غير هذا من الشتائم موش مقبول خالص، على الرغم من إني كنت لا أحبذ موضوع كامليا حاليا بس معلش الموضوع مهم جدا و يمس سيادة الدولة و سلطة القانون و كان يمكن احتواءه و وضعه في الإطار الصحيح لو سيادتك و غيرك من النشطاء نزلوا الشارع و هتفوا بسيادة القانون و مسابوش السلفيين لوحدهم يبانوا و كأنهم خارج السرب، و بعدين معلشي يعني هو سيادتك موش قابلة الإسلاميين ليه؟ يبدوا إنك أسيرة الخرافات و الأساطير بتاعة السلفي أبو رجل مسلوخة، ثم هو على حد علمي، الناس اللي بتنادي بتحرير كاميليا مطلبها عادل و واضح لأنهم ما قالوش كاميليا يا تبقي مسلمة يا نموتها، هم كل اللي طلبوه أنها تبقى حرة في قرارها و ما حدش يعذبها أو يخطفها، من الأخر انتي فعلا ملخبطة كالعادة و محتاجة بلال فضل يظبطك. سلام

Mostafa said...

You misunderstood Sadat 5alis

سكوت هنصوت said...

فكرة تميم عبقرية...بس ازاي تتنفذ؟؟

فكرة ان الإسلاميين ينسقوا مع بعض...وراد في الإخوان لإنهم بالفعل متصلين ببعض...لكن مع السلفيين يا نوارة!!!! انت شايفه اي عقل في كلام السلفيين عشان ينسقوا مع بعض؟؟

تفتكري ممكن نعمل ايه تاني نحاول بيه اننا نقوي الموقف التونسي ونساعدهم بيه؟؟

nashwa said...

طب هااقولك حاجة لو واحدة مسلمة مرات شيخ وطلبت معاها تتنصر قولنا براحاتها الدين لله والوطن للجميع قوم الاخوة السلفيين ما خلصهمش الحكاية دى وخطفوها وحبسوها فى احد مساجدهم كانت الحكاية ازاى بئة فى الاسلام فوبيا برضة
ولا الحكاية هى حرية البنى ادم المنصوص عليها فى المادة الاولى من الدستور حرية الاعتقاد حرية التعبير كما ان احتجاز المواطنين حق اصيل للدولة ضمن معايير وضوابط لاتقبل الاستثنائات والا
اية الفرق بين أمن دولة وامن كنيسة ولاامن جامع الحرية للجميع وان كان اخوانا السلفية مزودنها حبتين معذوريين الحرمان يااختى

كيوبيد said...

كلامك عن فلسطين اكتر من الرائع هو ده الكلام المنتظر والى المفروض يحصل حاليا احنا نساعد بكل قوة الفلسطينين وهما يتعملو مع اسرائيل بطريقه الى تعجبهم هما اعلم الناس بطريقة التعامل مع اسرئيل ان كانت مقاومة والى محدثات ام بخصوص موضوع تونس يارب يسمع منك ربنا ويكون التيار الاسلامى فى مصر زى الاسلامى فى تونس فى تفتحه ومعرفته بخصوص فرقة كامليا الانشاد الدينى اهى دى هى الفتنة الطائفى على حق ربنا المفروض ان فيه حرية عقيدة يعنى احنا لو سالمنا كاميا دلوقتى مش بعيد بعد شوى نلقى ناس طالعه عايزه الى اسلامو وراجعو للمسيحية تطبق عليه حد الرده وتقولك ان ده مرتد وعايزين دمو المجلس العسكرى يطلع قانون باحكام رادعه ضد ها التيار بتاع التدخل فى حرية الاعتقاد عند الناس ان كان من السلف او من الكنيسه والاخت كامليا ما تظهر وتبان علية الامان وتقول هى ايه مسيحى والى مسلمة وتسكت اى حد بايتكلم ان كان من عندنا والى من عندهم وان كانت مسيحى خلاص هى حره وان كانت مسلمه بردو هى حره والى انتى شايفه ايه ؟؟؟

طبيب بيطري said...

طيب يا نوارة
هي كيميا يعني
ما احنا قولنا علي موضوع تونس دا م الاول وانتي معبرتيش - مش مشكلة - طبعا بالنسبة للقضية الفلسطينية لازم يحصل برضوا تقوية علاقات بالشباب زي اللي هيحصل باذن الله مع تونس شوفي وفد الدبلوماسية الشعبية اللي راح اثيوبيا
ولميلك شوية مقاطيع كدا من الصحفيين والواجهات وشباب الثورة وشدي علي تونس ومن تونس عدل علي فلسطين
مش ملاحظة ان الدنيا بتتغير والدبلوماسية الشعبية بقت اهم من الوفود الرسمية
----
ملحوظة : ابقي اعرفيلك ناس من السلفيين المعتدلين صدقيني مبيعضوش وخصوصا ان تفكيرهم اتغير وهنسيبنا بقي من موضوع الدعم السعودي والبتنجاني
لازم تلميلك شوية شباب كدا من كل لون يعني لو باقي ف مصر يهود حتي خدي اتنين تلاتة ف الوفد وشدي ع المجلس العسكري ولا عصام ابو الشرف - حبيب هارتي - واستلفوا من عندهم طيارة بالسواق والبنزين عليهم كمان وروحوا تونس ومؤتمرين تلاته وخدوا شوية شباب من تونس وشدوا علي فلسطين وبردوا مؤتمرين تلاته وبعدين شوية من فلسطين وشدوا علي مصر وغداكم عندي
انجزي ولا شاطرة تركزي ف المدونة وتفضلي قاعدة ف الفضاء الالكتروني لغاية لما خلاص هتقضيها كتابة وبلوج وتويتر

محمد نبيل said...

http://www.alfikra.org/

asifofo said...

النصر لمصر

omar said...

والله يا نواره انا مخنوق منك جدااااا
مفيش مقال الا وتلسنى فيه على السفيين
فى ايه مش فاهم
انتوا بتطالبوا وأد الفتنه من الطرف الخطأ
واد الفتنه يتطلب من المدعى عليه مش من المدعى
اتقوا الله بقى شويه واحده مسلمه اسيره وكتير غيرها ذنبهم فى رقبتنا وانتى قاعده تتريقى
وبعدين على فكره حزب النهضه التونسى ده حزب اخوانى يعنى زيه زى الاخوان المسلمين بالظبط وزى حزب العداله والتنميه كلنا زى بعض يعنى مش الأسلاميين عندنا هطل وهناك مفتحين
احترمى عقول الناس واتجاهاتهم
السلفيين همهم الاول تصحيح العقيده وهما عايشين علشان كده قوم بدل ما نتحترم دا فيهم نزلين شتيمه فيهم ليل نهار
اتقوا الله بقى

negmat lail said...

انا حاسة ان احنا بنكلم نفسنا...موضوع تكسير المحكمة دي ما هو لما يبقى مفيش عدل ما تطلبش من الناس تكون مثالية دايما عايزين شوية عدل قبل موضوع مواجهة البلطجة .. كيف يطلق سراح ضباط متهمين بقتل المتظاهرين ويتركوا في اماكنهم ليمارسوا الضغوط على الناس وتزييف الحقائق في الشهادات .. اليست تلك حكومتنا الوطنية ... عايزين شوية عدل ...كفاية كده ..ناس عيالهم استشهدت... ووجدت الظلم في مكان العدل واستنجدوا بالقضاة لحمايتهم من ضغوط الضباط ولم يستجاب لهم ..يعني ممكن نطهر النيابات والقضاة قبل تطهير الشوارع من البلطجة.. الشوارع ساعتها هتنضف لوحدها من البلطجية ...يا رب العدل .. من عندك ..مش عارفة ليه محدش بياخد راينا في حاجة زي موضوع تصويت الجيش والشرطة يعني احنا مثاليين لدرجة الاطمئنان لحاجة زي دي لازم تحييد الجيش والشرطة بعيدا عن اي اتجاه سياسي على الأقل دلوقتي

magda said...

ياريت يااخت نوارة تحسني لهجة خطابك مع السلفيين ليس مهم ان نوافقيهم لكن الاحترام واجب

واحد من الناس said...

هو انتو بتشوفوا بعين واحدة , هما البني ادمين دول قالوا عايزين كاميليا يا بلاش واحد غيره مينفعناش و
بيقولوا كلمة واضحة وصريحة ومطلب عادل واللي ميشوفوش يبقى اعمى
فيه واحدة اتخطفت من الشارع من امن الدولة واعترف اغابيوس انهم بيغسلولها المغسول , كلمي باباك شنودة يطلعها وكل حاجة تخلص
مطلعتش يبقى انت ي والنشطاء المشبوهين امثالك والمخبرين بتشتغلوا بأجندة مقطوع منها ورقة الحرية والعدل

negmat lail said...

بخصوص موضوع كاميليا يعني ممكن اللي عايز يقدم بلاغ عن الواقعة ويجيب شهود ووثائق ومحامين زي ما هو عايز بلاش المظاهرات قدام الكنيسة وبعدين المسيحيين يعملوا مظاهرات ضد الجامع وبعدين نضرب في بعض ونولع في بعض

حبيبة said...

المفروض يكون فى تنسيق بين كل الثوار فى الدول العربية مش مصر وتونس بس لما الثوار فى ليبيا واليمن وسوريا يلاقونا واقفين جانبهم ده هيقويهم قدام اللى لازقين فى الكراسى وفاكرين انهم هياخدوها معاهم فى القبر
اما بقى حكاية كاميليا شحاتة اللى انتى عمالة تتريقى عليها وعلى السلفيين اللى مش عاجينك دول وناقص تقولى نلمهم كلهم كده ونحطهم فى سجون امن الدولة بدل ما هى فاضية كدة لو عندك معلومات عن موضوع كاميليا غير انها اسلمت ومخطوفة فى الدير والمسيحين مش عايزين يطلعوها تتكلم قوليها غير كده بطلى تريقة وحسى شوية بانسانة الله اعلم هى فين دلوقتى ولا بيحصلها ايه لمجرد انها اختارت لنفسها طريق مش عاجب ناس تانية

كمونة said...

انا بحب الفلسطنيين جدا ويوم خلع مبارك جابوا ع الجزيرة طفلة من غزة قالت انها عيطت لما سمعت الخبر وكانت بتعيط بجد

كمونة said...

بالنسبة لتريقتك ع كاميليا:
انا هسألك اسئلةمن المقال ده
http://www.tanseerel.com/main/articles.aspx?selected_article_no=22131


في غالبية مقالات أدعياء العلمانية والليبرالية السفلة ، كانت هناك جملة مشتركة بينهم " هل نخرب الوطن من أجل امرأة " ؟! وهذه العبارة خطيرة للغاية لأنها تثبت أنهم هم من يزدرون المرأة وينظرون إليها باعتبارها مجرد أداة للمتعة الجنسية فقط وفق قانون " الاستنارة "


كل ما سر شنودة عند عبدته وسدنته جميل ُ .. خطف كاميليا عند أدعياء العلمانية والليبرالية جميل .. قتل وفاء قسطنطين عند أولاد الأفاعي جميل .. تظاهر النصاري أمام ماسبيرو وقطع الطرق وتخريب المنشآت جميل ُ .. كل ما سر شنودة في صحف الدعارة وعلب الليل الإليكترونية جميل ُ .

كمونة said...

العجيب أن أولاد الأفاعي كتبوا معلقات عن حب الوطن ومنع الفتنة ولم يتحدثوا في صلب الموضوع : لماذا لا يتم الإفراج عن كاميليا وجميع المختطفات ؟؟ هل من يطالب بحرية هؤلاء السيدات هو الذي يصنع الفتنة أم الذي يُصر علي حبسهن ؟؟ مالكم كيف تحكمون يا أولاد الأفاعي والحيات ؟؟


ثم من الذي حضر عفريت المظاهرات الطائفية ؟؟ أليس هو الشقي نظير جيد الذي كان يأمر أساقفته لتشحن القطعان الضالة من الصعيد والبحيرة للمطالبة بـ " مرات أبونا " ؟!
المثل يقول " اللي يحضر العفريت يصرفه " ..

كمونة said...

فوقت مظاهرات النصاري بالكاتدرائية كانت الحياة لونها بمبي .. أما مظاهرات السلفيين فمصر علي فوهة بركان !
لقد تنصر بعض السفلة ولم تقم مظاهرة واحدة فى الأزهر تطالب بالقبض علي المتنصر لغسل مخه ولم يتم حبسه في مسجد أو زاوية ، ولم يتم حبس متنصرة سفيهة مع سيدات منتقبات بحجة " الراحة النفسية " أو القيام بـ " ترجمة معاني القرآن الكريم "مثلما ادعي أسقف البحيرة أن وفاء قسطنطين تقوم بترجمة مخطوطات الكتاب المقدس في الدير !


وياريت تقوليلنا اجوبتك

mahmoud said...

تعرفي اني كل مابفتح المدونة دي بحس بالغيرة منك والفخر بيكي في نفس الوقت وبالمسؤلية اللي انا وغيري مش لازم نقصر فيها بس بخصوص كاميليا انا حاسس انها مقهورة هي وبنات تانيين ودي انسانة واحتمال كبير انها مسلمة والكنيسة عنيدة والشعب المسيحي مش مساعدنا احنا بس عايزينه علي الحياد احنا للاسف مش قادرين نساعدها وشنودة ماسكنا من ايدنا اللي بتوجعنا ولو اتحركنا حيقلبها حرب اهلية والبلد تبوظ منه لله بس البلد اللي بتحلمي بيها لازم يكون فيها عدل دون اعتبار لجامع يزعل او كنيسة تغضب بس لو دي اخر خطوة ولسا مشوار الاصلاح طويل عبال مانوصلها يبقي ربنا معاكي ياكاميليا وسامحينا مش قادرين غير اننا ندعيلك دلوقتي ويارب مستقبلنا يكون احسن واللي حيكونوا بعدك القانون يحميهم في مصر المحترمة اللي بنحلم بيها

Ahmed . M . Abdulrahman said...

عزيزتى نواره

المسئله ليست بالسهوله الموصوفة

انا اقدرك كثيراً

تقريباًافكارك مشابه لما يدور برأسى

ولا اريد احد ان يظن انى اعقدالامر

ولاكن هناك سبيل واحد لحمايه الوطن العربى و دعم الثورات العربيه

السبيل هو نظام " الخلايا"

و نظام الخلايا لن يتم الا اذا حددنا جبهة قيادة للثوره المصريه

الاتلاف الحالى هزيل جداً و حاله يصعب على الكافر يكفى اننا اصبحنا بلا صوت موحد و كل فرد يسير فى بحر الدوله بقاربه

اما فى الاتجاه المعاكس او فى سكه مختلفه

و قروش الثوره المضاده العالميه ليست فقط الموجوده فى مصر وانما التى تريد تفتيت الوطن العربى

تتربص و تترصد و تنتظر اللحظه المناسبه لتاكل كل القوارب و من فيها

وكلما ابتعدت القوارب كلما ازداد معدل الافتراس

الذئب يأكل من الغنم القاصيه

الخلايا هى الحل الوحيد علينا زرع خلايا ثوريه سلميه داخل مناطق الثورات

1- لتقرب و جهات النظر بين الطوائف السياسه فى كل دوله محرره من الطغيان

وليست العلمانيه و الاسلاميه فقط

دعم الثورات الناشئه و الثورات التى فى مرحله النشاط الثورى

الامداد بالمعونات الاساسيه

شد اذر الثائرين

يجب تمثيل جبهة قويه وموحده للثوره المصريه بعيداً عن هذا الاتلاف الهزيل

تتخذ مواقف تقصم بها الحق والباطل وتكون هى ممثله الشعب المصرى لدى العالم المدنى والحكومه المصريه

هذا باختصار ماأردته حاولى تطبيقه على كل الاطراف وسينجح ان شاء الله

سلام مؤقتاً يا نواره
_______________________
الى عاوزنى يجينى
http://misr25jan2011.blogspot.com

mejdi_mejdi said...

نوارة...لماذا قلت ان الحكومة التونسية مخترقة ..ارجو الأجابة

mejdi_mejdi said...

نوارة ..أريد لماذا قلت أن الحكومة التونسية مخترقة ..أرجو الأجابة

ph.zeinab said...

بالنسبه لقصة الإسلاموفوبيا دى لو الإسلاميين عملوا أيه سيظل العلمانيين المدعومين من الخارج يشككوون فيهم ويقولوا لا هما بيقولوا كده وجواهم حاجه تانيه وأحب أقلك إن حتى فى تركيا اللى ماشيين على النظام العلمانى لا ينفكوون يشككوون فى نوايهم وأحب أقلك ملحوظه كل واحد لازم يؤمن بيها نحن قوم أعزنا الله بالإسلام فإن ابتغينا العزة فى غير ذلك أزلنا الله مصر محتاجه عشان تزرع قمح بس إنها تقف فى وجه أمريكا من من القوى الساسيه يستطيع الوقوف فى وجه أمريكا؟

shorouq_hamza said...

خلتيني أعيط ,,أنا معاكم بدمي وبروحي ,,مش عايزة أقول ضد اللي بيحكموا مصر بس عايزة أقول ضد اللي في مكان ومش قده,,ضد إننا مايتاخدش حقنا أنا ضد اللي يهين كرامتنا وعزتنا ,مش خلصنا من مبارك وعصابته نقع في مصيبة ,,إحنا لسه بنقول ياجيش إحنا اللي رفعناك قدام الأمم فبلاش نموت بإيديك ,,إن ماكانتش تفرق معاك فأرجوك بعد ماتقتلني قول إن كان عليها طار أو سلفية وإتجننت أو دي مندثة إوعى العالم يعرف إنك خونتنا