Wednesday 31 March 2010

هو مش المؤمن لا يكذب برضه؟

عثل والله عثل



يا ترى جاب الحيلة الجميلة دي من انهي كنيف؟ وميت مرة قلت يصلحوا سيفونات الحمامات العامة عشان مالناش ذنب المجاري تطفح علينا.. هو ده الاسلام الصحيح، هو ده الاسلام الجميل، هو ده الاسلام الرحيم، هو ده اسلام السلف الصالح.. يااااا ده الواحد كان عايش في ظلمات الجهل يا اخي.. انا على ايامي كانوا قالوا لي ان الرسول قال يكون المؤمن بخيلا ويكون المؤمن جبانا ولما قالوا له يكون المؤمن كذابا قال لا، وقالوا لي أن الله لا يهدي كيد الخائنين، وعلى ايامي قالوا لي ان القرآن بيقول: فاجتنبوا الرجس من الأوثان واجتنبوا قول الزور. وعلى ايامي قالوا لي ان الرسول قال ان المؤمن ممكن يزني وممكن يسرق لكن مش ممكن يكدب، الحيلة الجميلة دي كدب؟ وللا خيانة؟ وللا قول زور؟ وللا التلاتة مع بعض؟ ايه السفالة دي؟ لا بجد، بجد يعني، انا مخنوقة بقى اخر حاجة.. اخر حاجة.. اخر خنقة الواحد ممكن يتخنقها، يعني فرقة شكوكو للدين الكوكو دول حللوا الشتيمة وادعوا مش بس ان الشتيمة حلال دي واجب على كل مسلم ومسلمة وقالوا على النسوان الجهل متفشي فيهم بالطبيعة وقالوا الشيعة بيموتوا السنة بالشنيور هههههههههههههههه مش فاهمة ليه؟ ده حتى ياخد وقت، ما الانسانية تطورت وبقى فيه مسدسات ويخلصوا، وقالوا الفتوحات باب استرزاق حلو للمسلمين ولازم نرجع نفتحه تاني عشان لما تبقى مفلس تطلع غزوة وترجع معبي، وقالوا الستات ما تحطش مزيل عرق عشان ريحة العرق زي المسك عند ربنا ده غير برصيصة
كمان بيحللوا الكدب والخديعة والخيانة؟
حسبي الله ونعم الوكيل.. حسبي الله ونعم الوكيل.. حسبي الله ونعم الوكيل.. حسبي الله ونعم الوكيل.. حسبي الله ونعم الوكيل.. حسبي الله ونعم الوكيل.. حسبي الله ونعم الوكيل عليهم كلهم

فلتحيا التفانين

بلغني ايها الملك البعيد ذو السد الشديد ان عمرو اديد بيقول ان الحشيش فيه ازمة عشان سدينا الانفاق قال يعني كده بيفرح المصريين بقى وبيشوه سمعة حماس
هههههههههههههههههههههههههه، هو ما يعرفش ان لو المصريين اقتنعوا ان حماس هي اللي بتدخل لهم الحشيش حينتخبوها للرئاسة؟ 
ثم مش كويس ابدا البانجو والحشيش المكميك على صحة شبابنا
اجعلها ليلة مملكة يا كريم.. نحن في انتظار ثورة الحشيش

عصيدة قصماء بمناسبة عودة الفحل

جابهالنا محمود صابر على التويتر

بس يا ترى مين الشاعر عبد اللطيف احمد فؤاد ده اللي كتب الشعرم البليخ ده كله؟ انا فيه بيوتات شعرم عجبتني فحت، ملوناها بالازرق من كتر ما بهرتني

يعود الرئيس يصل القمر

تصل الشموس مع المطر

يهبط ملك البناء والثمر

مبارك اليوم أمير الأعياد

يا ساكن شريانى وفؤادى

يا سُكّر ونور الدلتا والوادى

الناس إلى المساجد تجرى

ولسلامتك تحمد الله وتصلى

يا مبارك يا عاصمة العطاء

ندعوا لك عند نوم الصباح

وندعوا لك عند نوم المساء

فاستجاب للدعوات القضاء

يا ناثر على الكون الضياء

فراشات ارتدين أحلى الثياب

للقاء أجمل الصقور والأحباب

يا أزهار انطلقن إلى المطار

وأسرعوا قبلهم يا كل البحار

معى لنستقبل رئات الديار

قلوب غردوا لرافعنا للسُحب

فعن صبره أكتب آلاف الكُتب

اليوم عيدك يا بلد اليوم عيد

فعاد الحكيم بعد غياب ٍ مديد

افرحوا يا ملايين الكواكب

فقد شفى الله أمير العجائب

يا طويل البال وأسد الرجال

يا منقذ العرب مِن الأدغال

يا حافظ مصر مِن الغيلان

يا مصر تشرق شمسك الآن

يا مصر تُورق أفراحكِ الآن

يا بلادى يَغرب حزنك الآن

يا شعبى يا سلطان الأزمان

أجد مبارك مع زهر القيروان

وفى الأرجنتين وفى أسوان

وفى كل كبدٍ وفى كل مكان

يا مبارك المدارس تناديك

يا حبيبى النسائم تلاغيك

و كل الريف قلوبه تناجيك

وبكل غالٍ وبالأرواح نفديك

فكم تحمينا مِن الموت والنار

وننتظرك فى مهبط المطار

وفى السماء وعلى الرصيف

قبل كبير الوزراء أحمد نظيف

فالحياة بدونك برزخٌ مخيف

وقبل بزوغ عائلتك الصغيرة

ننتظرك بأندى الورود الجميلة

بعد الرحلة القصيرة الطويلة

لو نملك البواخر أوالطائرات

لذهبنا معك بألوف المليارات

ولكننا لا نمتلك إلا الكلمات

ولكننا لا نملك إلا المفردات

وسأكتب عنك بكل اللغات

وفى كل حياةٍ وبعد الممات
(ملحوظة: الشاعر يقصد بعد مماته هو طبعا)
كما يُسجّل تاريخ الحروب

اغراقك الأعداء فى الهموم

كما يكتب تاريخ العاشقين

أنك يا مبارك ضياء العيون

ثلاثون عاماً أجملها طلعتك

وكل الخلايا معك فى رحلتك

وكالرُسل أجروا لك جراحتك

وفى كل جسمٍ مفروشة فيلتك

وفى كل قلبٍ مُزينة شقتك

فأسرع لتنير قلوبنا أبا علاء

فأنت تسافر فى وريدنا كالدماء

فأنت تسافر فى وريدنا كالدماء
-------------
الله الله الله الله.. عظمة على عظمة على عظمة يا ست
وقد الهمني هاذوها الشعرم والهب قريحتي واليكم اسهامي البسيط في حب الوطني اللي هو مبارك طبعا:
مرحبا بك يا ابا علاء
نزلت اهلا يا مفور الدماء
قلبي شاليه في مرينا
ينتظر طلة اخينا
يا طويل البال والتيلة
دماغك جامدة وتقيلة
يا ملك الزهور والاشجار
قلب اعاديك مولع نار
يا سكر يا قشطة يا عسل
جمالك سيصيبنا بالخلل
يا صقر البلاد وختم النسر
ظهورك ملأ قلوبنا بشر
يا امير العجائب يا هيركليز
يا مفلس بنك باركليز
يا من هزمت عماشة في الادغال
سيبك من الحاسدين دول بغال
كشفنا راسنا ودعينا لك
والسعد اهو جالنا وجالك
وكما قال شاعر اشعر
وصلت الشمس مع المطر
والصبح بالليل الصبح بالليل
والفارة كلت كباب وركبت الخيل
سنكتب عنك بكل اللغات
بون جور بونسوار وبلح امهات
سيلفو بليه يا ريس
قول لنا انك كويس
ده كل الخلايا سألت عليك
والقنوات الدمعية بروحها تفديك
وطبلة ودانا جالها التهاب
لجل عيونك يا احب الاحباب
ولو نملك لدفعنا مئات المليارات
بس انت فلستنا وبعت حتى الغيارات
اي هاف تو ايز اي كان سي
قلقنا عليك وعملنا على روحنا بيبي
عملنا على روحنا بيبي
عملنا على روحنا بيبي

Tuesday 30 March 2010

وزير الداخلية والتعليق

تحديث:
لا مؤاغظة... دخلت عليكوا حامية ونسيت احكي لكوا الحكاية:
الحكاية ان ابن وزير الداخلية الاسبق (انا اقصد ابن زكي بدر، لاني بصراحة مستخسرة فيه لقب وزير التربية والتعليم) هجم على مدرسة حكومة، وزارها زيارة مفاجئة.. لحد كده تمام، لقى المدرسة زي ما كلنا عارفين، مافيش اي مفاجآت في الموضوع ده على فكرة، كل الناس عارفة ان المدارس الحكومة مزبلة التاريخ.. ماشي، كويس كده، لحد كده فيلم امبراطورية ميم شغال
اذ بينا نفوجأ بقى بان سعادة الوزير، وزير التربية والتعليم، ماسك المدرسين وهاتك يا تهزيء فيهم، وبيتكلم في الموبايل وبيطلع قرار بنقل كل المدرسين - كده بلا اي تحقيق ولا تحويل شئون قانونية ولا دياولو - للفيوم، وبيهين مدرس قدام الطلبة، وجه الناظر، قام قدام الطلبة والمدرسين مسح بيه البلاط وهزأه باسلوب ظباط الشرطة، وبعدين دخل فصل ومسك عيل يا عيني في رابعة ابتدائي لقاه مش معاه شنطة مدرسة، مسح بيه البلاط وقال له انت جاي المدرسة تعمل ايه واداله فصل خمستاشر يوم من المدرسة
طب دي تربية دي؟ اهانة الناس وبهدلتهم وارعابهم ده اي تربية وللا تعليم؟ زار المدرسة وشافها، بيهزأ الناس ويهينهم ليه؟
-------
ازاي يتجرأ يهزأ ناظر قدام الطلبة والمدرسين بتوعه؟ وازاي يتجنن في مخه ويرعب طفل ويهينه ويهزأه بالطريقة دي؟ ده ظابط شرطة ضل طريقه
ايه المجنون ده؟ هتلر؟ وفين التربية في انه يهين الناس ويخوفهم بالطريقة دي؟ وفين التعليم اللي هو مستنيه من مدرسين بياخدوا ميتين جنيه؟
انا الطفل اللي هو هزأه ده قعدت اعيط عليه وجالي صداع نصفي.. الواد حيقعد يحلم بيه ويعملها على روحه بالليل
ايه الانحطاط ده؟ هو مين اللي حاطط السيستم الفاسد؟ الناظر؟ المدرسين؟ العيل الصغير اللي هو مسح بيه البلاط ورعبه؟ ما راحش ليه سأل على المنطقة التعليمية اللي تابعة لها المدرسة؟ ما سألش ليه على المفتشين اللي بيفتشوا على المدرسة؟ ما سألش عن نفسه هو ليه؟ بيدي المدرسين كام؟ بيصرف على المدارس قد ايه؟ ايه النظم والقوانين المحطوطة عشان تضبط المدارس؟ بدل ما يفتري على الغلابة؟
لا والناس فرحانة بيه كمان.. ايه اللي يفرح؟ مش باقول لكوا مجتمع فاشيست

Monday 29 March 2010

السادة المعلقين.. هو حضراتكوا ما بتفهموش؟

تحديث:
ده تقريبا فيه ناس مش بس مش فاهمة اني ما بانزلش تعليقات طائفية وعنصرية، دول كمان مش فاهمين ايه الطائفي وايه العنصري وايه المذهبي
احم.. طيب، بالبلدي كده:
الاساءة لمجموعة بشرية، او تحقيرها، او اطلاق احكام عامة عليها بسبب دينها او مذهبها او عرقها او جنسها. مثال:
النصارى عباد الصليب.. النصارى عباد الخروف.. الشيعة الانجاس.. الروافض ابناء المتعة.. الامازيغ الهمج.. العرب جرب.. اليهود الخنازير.. المسلمين الارهابيين.. الاسلام دين عنف.. "الملمين" - يعني المسلمين - الغزاة...إلخ
الاساءة الى ما اقرت المجموعة البشرية بشبه اجماع انه يشكل رمز لها:
زي الكعبة والنبي محمد عليه الصلاة والسلام والمقدسات عند المسلمين، الصليب والمسيح والمقدسات عند المسيحيين، الشمعدان واللبس اليهودي عند اليهود، وهم مش بيهتموا بالانبياء والرموز قوي هم بيهتموا بالمجموعة البشرية اليهودية اكتر، يعني رسم اليهودي مثلا بانف معقوف يعد اساءة للمجموعة دي، علم بلد - نستثني من ده علم الكيان الصهيوني عشان هي مش بلد اصلا ولا نستثني العلم الامريكي لانه بلد وانا مش فاهمة بيحرقوه ليه - الخ.
بالمختصر كده.. قبل ما تشتم الناس فكر ان الكلام ده بيتقال عليك.
ودي الحاجة اللي ما عرفتش الامم المتحدة تعملها: انها تنص على ان كل انسان بصدق يحب لأخيه ما يحب لنفسه.لا وقال "لا يؤمن" لا يؤمن أحدكم حتى يحب لأخيه ما يحب لنفسه.. ومافيش اكتر من اللي بيقولوا انهم مؤمنين هم اللي ما بيحبوش لاخيهم ما يحبون لانفسهم. اخوك هو اي انسان زي ما الامام علي قال: الناس اما اخ لك في الدين او اخ لك في الخلق.
------------
أنا تقريبا المدونة الوحيد - في حدود علمي - اللي حاطة قانون ثابت وواضح للتعليقات، وغيري بينزل تعليق او ما ينزلوش يخليه او يمسحه على حسب مزاجه لان دي مدونته وهو حر فيها، مالوش قانون معين، على حسب مزاجه
انا الوحيدة اللي حاطة لنفسي قانون وبامشي عليه واظن اني وضحت القانون ده قبل كده.. بعض السادة المعلقين واضح انهم ما بيفهموش لا مؤاخذة.. طب نعيد تاني:
1- ممنوع منعا باتا التعليقات الطائفية
2- ممنوع منعا باتا التعليقات المذهبية
3- ممنوع منعا باتا التعليقات العنصرية
وطبقا للقوانين الدولية، التلاتة اللي فوق دول لا يندرجوا تحت بند حرية الراي والتعبير لانهم خطاب كراهية - وبيحطوا معاهم كمان التشهير بس انا مش حاطاه - ايه بقى ماسورة التعليقات العنصرية والطائفية والمذهبية اللي طفحت في ام المدونة دي؟ 
ماهو حاجة من تلاتة، يا اما اللي بيعلق التعليقات دي عايز يغلس، يا اما ما بيفهمش، يا اما ما عندوش تعريف واضح للطائفية والعنصرية والمذهبية:
ما يدخليش مسلم يشتم المسيحيين هنا
ولا مسيحي يشتم المسلمين
ما يدخليش سني يشتم الشيعة هنا
ولا شيعي يشتم السنة
ما يدخليش مصري يشتم العرب والجزائريين على وجه الخصوص
ولا مش مصري يشتم المصريين

وحيث ان الغالبية بيبقوا رجالة مصريين مسلمين سنة بيشتموا في غير المصريين اللي مش مسلمين او مش سنة، فاحب اقول لحضراتكوا ان اي حد فيكوا لو اتولد مسيحي كان حيبقى مسيحي، ولو اتولد شيعي كان حيبقى شيعي، (لا معلش ما كنتش حتفكر كده وتقرا في الديانات وتغير دينك او مذهبك، لان عادة المتعصب ما بيفهمش وما عندوش الحياد اللي يخليه يقرا غيره بموضوعية ويحكم بالحق، فزي ما اهله علموه حيمشي وراهم وحيبقى قفل بصرف النظر عن دينه او مذهبه او جنسيته، هو فيه مذهب لوحده كده اسمه مذهب الاقفال) وقطعا لو كنت مش مصري كنت حتفضل مش مصري يعني
مافيش بقى واحد عشان فاشل ومش عارف يعمل حاجة في حياته تخليه يفتخر بنفسه يقوم يلجأ الى انه يفتخر بانه اتولد راجل او مسلم او سني او مصري.. دي حاجة مالكش فضل ولا ذنب فيها، سواء كانوا فضل او ذنب
وما يجيش واحد معقد من حياته وكاره الدنيا يصب جام كراهيته على ناس مالهاش ذنب في اللي حصله في حياته، لو شخص محترم يروح يشوف مين كرهه في عيشته وينتقم منه
احترم نفسك كده لو عايز الناس تحترمك، كل واحد شايف دينه وجنسيته ومذهبه احسن حاجة
وانا باعترف اني تسيبت اخر حاجة في التعليقات مؤخرا ودي قلة ادب مني، لاني المفروض التزم بالقانون اللي حطيته لنفسي
ومن هنا ورايح مافيش تعليقات طائفية ولا مذهبية ولا عنصرية ح تنزل
اللي عايز يطرش يروح يطرش في حتة تانية

:D

ههههههههههههههههه صيع

Saturday 27 March 2010

اردوغان يا عسسسسسسسسسسسسسسسسسلللللللللللل

يارب يخليك يا شيخ ويديك الصحة ويكفيك شر اعداءك وشر الجيش الاتاتوركي وشر مؤامرات اسرائيل وامريكا
بث ثؤال محرج والله يا ابلة:
هو برلسكوني ايه وضعه بالنوسبة للكمة العربية يعني؟
وما حدش يقول لي يعني هو اردوغان اللي عربي؟ عربي غصب عن عين الـ300 مليون كلهم
وعمرو موسى كانت كلمته اكثر من رائعة، بس للاسف دي اقتراحات واللي حياخد القرار الناس اللي مفروض ربنا ياخدهم اساسا 

Friday 26 March 2010

ذكرى المعاهدة المشئومة

تحديث:
المؤتمر الساعة واحدة الضهر
والوقفة الساعة خمسة العصر
يوم السبت 27 مارس
يوم السبت بعد بكرة ان شاء في نقابة الصحفيين الساعة 5 وقفة احتجاجية ومؤتمر في الذكرى المشئومة لاتفاقية كامب ديفيد. 
انا رايحة ان شاء الله، يارب في المؤتمر حد يقول لنا نخلص من الورطة السودا دي ازاي مش بس يعبروا عن غضبهم. لو فيه طريقة قانونية، مش مهم تاخد حيز التنفيذ دلوقت حالا، بس المهم ناخد بيها ورق
يعني مثلا، فيه بنود كتير قوي في الاتفاقية غير دستورية وتتعارض مع القانون المصري والمصالح الاقتصادية والامنية للبلد، وفيه منها بيتعارض مع عقيدة الجيش ومواد القانون الخاصة بالجيش والمخابرات، ممكن بدل ما نمسك الاتفاقية كلها ونقول مش عايزينها، ناخد مادة مادة ونرفع بيها قضايا، ومش مهم تتنفذ دلوقت، بس المهم الاجيال الجاية يبقى معاها ورق
ماهو ده اللي حصل، ماهو ايام توقيع كامب ديفيد مش كل البنود اتنفذت، وما كانش يهم اسرائيل وامريكا انه يتم التنفيذ دلوقت حالا فورا، اللي يهمهم ان الاجيال الجاية، اللي هي احنا، يبقى عليها كومبيالات، واللي اهاليهم موظفين اكيد سمعوا منهم الكلمة دي: عك زي ما انت عايز، بس ما تكتبش على نفسك ورق
احنا كتبنا بقى على نفسنا ورق.. واتفاقية كامب ديفيد هي السبب في ان مبارك قاعد على قلبنا تلاتين سنة وما يتعتعش ابدا الا امريكا تبقى متأكدة ان الجاي ح يتلزم بكامب ديفيد بنفس التفاني والاخلاص
واتفاقية كامب ديفيد هي اللي خلتنا نكتب على نفسنا ورق للبنك الدولي ويدونا فلوس بالفايظ وما نعرفش نسددها فالقطاع العام بتاعنا يتباع والعمال يتشردوا، لان دي شروط اللي احنا ادينا له الحق الحصري في تمويلنا وتسليحنا وتدريبنا، ولو خالفنا الشروط يدينا بالجزمة 
واتفاقية كامب ديفيد هي اللي خلتنا نغير سياستنا الاقتصادية من انتاجية الى استهلاكية عشان صاخب المخيل يرضى يدينا المرتب الشهري
واتفاقية كامب ديفيد هي اللي فتحت البلد على البحري للمؤسسات الاجنبية والامتيازات الاجنبية بتاعة الاحتلال رجعت تحت مسمى تاني
واتفاقية كامب ديفيد هي اللي عزلتنا وخلتنا مش عارفين نعمل سوق عربي مشترك ولا نتعاون عسكريا ولا علميا مع اللي حوالينا مما تسبب في تراجعنا وتراجعهم، لان الطبيعي الدولة اللي عايزة تتقدم بتتعاون مع ناس في حجمها، مش اكبر منها بكتير، لان لو اكبر منها بكتير عمر ما الدولة الصغيرة بتتقدم، وانما بتفضل تابع، لكن لما بتتعاون مع ناس قدك بتكبروا سوا لان ده مصلحتك ومصلحته
وامريكا واخدة الحق الحصري في مصر... مافيش نملة تدخل ولا تخرج منها الا امريكا تبقى عارفة وموافقة.. وده يا سيدي في حد ذاته مش عيب، ما احنا ياما كنا واقعين تحت احتلال ما جاتش عليهم، المشكلة ان امريكا يهمها امن اسرائيل وملتزمة بيه
امن اسرائيل في التفوق على كل دول المنطقة في كل حاجة.. وده اهم من السلاح النووي، مش ممكن ابدا دولة لازقة في اسرائيل يسمح لها بتقدم علمي، ولا ديمقراطية، ولا ازدهار اقتصادي ابداااااااااااااااا، امال ايه تميز اسرائيل بقى لو اي حد من اللي حواليها حقق تقدم؟ ولما امريكا تاخد الحق الحصري في مصر، خلاص، يسهل بعد كده اي دولة مجاورة تتبلع، واحدة بالحصار، واحد بالفتن الطائفية، واحدة اصلا ما كانتش دولة واتعملت وطبقتها الحاكمة تدين بالولاء للي عملوهم حكام وهكذا، ده كلام كارتر مش كلامي، وكارتر دلوقت بيضرب نفسه بالجزمة وعمال يعتذر.. يعتذر.. مين ح يسامحه؟ الله يخرب بيته هو وروزالين في ساعة واحدة
واتفاقية كامب ديفيد هي اللي ضيعت استقلالنا وخلتنا لا نملك دستورنا ولا حكمنا ولا فلوسنا ولا مصانعنا ولا زراعتنا ولا اي حاجة
وكله بالورق والعقود وماضيين على نفسنا ورق جتنا خييييييييييييبة 
انا كان عندي يضيع البلد كلها وللا يحطها حتى تحت الاحتلال بس ما يمضيناش على ورق، عشان على الاقل يبقى الوضع مش قانوني
ده الفلسطينيين كده عندهم امل اكتر مننا، على الاقل مش ماضيين ورق على اللي حاصل لهم، ويظل وضع الاحتلال غير شرعي وغير قانوني
لكن كل اللي احنا فيه ده، من ديكتاتورية، وفساد، واقتصاد خربان، وزراعة منهارة، وصناعة في الباي باي، وانعدام سيادة، وعدم قدرة على السيطرة على الحدود، كلللللللللللل ده بالورق والامضا والبصم، ما نعرفش نتكلم
احنا خلاص ضعنا.. وكل واحد منه لله
المهم الجايين، مالهمش ذنب يفضلوا واقعين زي الدبانة في العجين بالطريقة دي، لما يبقى معاهم ورق ان الاتفاقية دي او على الاقل بعض بنودها باطلة بالقانون يمكن يبقى عندهم صيغة يعرفوا ينفذوا بيها الاحكام دي لكن لو فضلنا ما نحاولش نعمل اي حاجة، اي حاجة خالص، ولا حتى نحاول نطعن في بعض البنود كده حال الجايين مش ح يبقى زينا، ح يبقى اوحش
فكر فيها على مستوى فردي، واحد ابوه باع البيت اللي هم ساكنين فيه عشان يصلح المنور بالفلوس اللي اخدها من الشاري، الشاري مضى العقد وما طردش ابوه، وابوه صلح المنور فعلا، ومات، الواد قاعد في بيت متباع، الشاري قال له: ده بيتي، ادفع ايجار. عشان الواد ما يخرجش بيدفع ايجار
وهي دي فلوس الضرايب اللي احنا بندفعها، احنا بندفع فوايد الفلوس المركبة، والكلام ده اتكتب في الواشنطن بوست، وفي صحف امريكية كتير، ان المصريين ما بيتلقوش خدمات بضرائبهم لان اصلا ضرائبهم بتروح فوايد للبنك الاحتياطي الفدرالي والبنك الدولي
ماشي، هو دلوقت بيدفع ايجار، بس افرض صاحب البيت قرر في يوم من الايام يطرد عياله بعد ما هو يموت؟ عايز يهد العمارة ويبنيها مول، عايز يبيعها انقاض، عايز يخرطها للوز، ماهو ملكه
على الاقل امشي في قضية ابطال البيع واذا كان الشاري بلطجي وبيهددك بالسنجة، ح تفضل تدفع ايجار صحيح، بس على الاقل لما تموت انت مش ح يقدر يطرد عيالك من البيت بالقانون على الاقل، لو ح يطردهم بالسنجة يا سيدي يمكن هم يبقوا اجدع منك ويعرفوا يتصدوا له
وضحت؟
الموضوع لا له علاقة بالسادات ولا عبد الناصر ولا نجيب ولا فاروق ولا حجا ولا الملك مينا موحد القطرين
الله يرحمهم جميعا، وللا يجحمهم وللا يعمل فيهم اللي هو عايزه بقى احنا مالنا، مش ممكن نفضل ماسكين في اللي فات بالطريقة دي، ومش ممكن يفضل كل همنا مصبوب على اننا نحمل اللي فاتوا مسئوليات عشان نلاقي وسيلة نتهرب بيها احنا من مسئولياتنا.. خلاص يا سيدي، كللللللللللللل اللي فاتوا ولاد كلب.. حلو كده؟
او
كللللللللللللللل اللي فاتوا اجدع ناس.. حلو كده؟ اختار اللي يعجبك وانساهم بقى شوية
وافتكر ان فيه اجيال جاية ذنبها ح يبقى في رقبتك، اللي حصل حصل، دلوقت احنا قدام مشكلة حقيقية، اتفاقية كامب ديفيد، والاتفاقيات المبنية عليها مع البنك الدولي، والتعديلات الدستورية اللي مبنية عليهم هم الاتنين هم مشكلتنا الحاضرة والحقيقية، وواجبنا نحلهم او نحاول نحلهم
فوقوا بقى
احنا واقعين تحت احتلال، ونظام مبارك ده الحاكم الاقليمي، ولو حيمشي وييجي غيره ح يبقى حاكم اقليمي برضه لو فضل الوضع على ماهو عليه، مش ممكن ابدا الاجيال الجاية تيجي تقول علينا: ولاد الكلب ولا حتى حاولوا
عيبة في حقك.. ح ييجي يوم والناس تقول لعيالك: ياللا من هنا يا كابتن، مالكش فيها مش بلدك اصلا احنا شارينها والعقد اهو
ده كابووووووووووووووس.. تخيل كمان عشرين سنة في استيطان في بلدك
فوق بقى
وبناء على كل الرغي السابق، انا طالبة من الجميع الحضور بكرة
لو عايز مصر مستقلة وديمقراطية وحرة ومتقدمة او حتى عندها امكانية تقدم في الميت سنة الجاية
ومش وقت سفسطاط وحياة والدك... عيب عليك تتمسك باحتلال لبلدك عشان ماسكك العند

Thursday 25 March 2010

عاجل :- القبض على المدون كريم رضا مطلق دعوة اضراب بتروتريد

نورمان فنكلستاين بيربيكوا

هو الاخ البحر ده انا مش عارفة اسمه، بس هو حب يكفر عن خطيئته لانه فضل يعذبني بمقالات اكسلانت ناو ناو فجاب الفيتيون ده
اكاديمي يهودي، اترفد من شغله في امريكا لانه هو اللي عمل الصور المقارنة ما بين النازي والصهيوني، فاكرينها؟ واسرائيل مانعاه من الدخول وهو بيقول ومين عايز يروح اسرائيل :)) في المقابلة دي ماسك بت لبنانية بيعلمها معنى الكرامة
ماسك بت لبنانية بيعلمها معنى الكرامة... ربنا يخليه، ويديله الصحة، ويحميه




اسمع بقى واحد من بتوع الخنازير والقرود بيفتح بقه.. في الفيديو ده انا مش شايفة قرد وخنزير غير العربية
وزي ما قلت لهم على التويتر، الصهيونية عندها كل حاجة الا الاخلاق، ولو اللي بيشتموا اليهود وبيحبوا هتلر فضلوا على حالهم ح يتساووا في الاخلاق مع الصهيونية وما عندهمش اللي عندها من قوة وسلاح وفلوس وسيطرة على العالم، يبقى اكيد الصهيونية هي اللي ح تكسب
نورمان فنكلستاين اهله من ضحايا الهولوكوست الاجرامي


اصل على التويتر فيه مناقشة طويلة بخصوص المجحوم ابدا هتلر، وقبل كده ابو اسحاق الحويني استشهد بيه، حاجة غريبة، هو هتلر ده مش من النصارى عباد الصليب يا حويني وللا ايه؟ اشمعنى من كل "النصارى الانجاس" ما عجبكش الا هتلر؟
ومافيش انسان عنده الحد الادنى من السواء النفسي يستشهد بالكلب الاجرب اللي اسمه هتلر
يعني لا انسانية ولا حتى مخ؟ لو ما عندكش انسانية واخلاق تخليك تتعاطف مع ابرياء، على الاقل يا اخي خليك نبيه وفكر في مصلحتك.. حاجة تقرففففففففف

-------
بناء على طلب الجمانهور اللي هو لاست كريزي بوي، اتفضلوا اسمعوا الضرر



وطبعا لو كان سمع كلام ابو اسحاق وقتل كل يهودي ما كانش نورمان فنكلستاين اتولد بس كانت الصهيونية اتولدت، لانها انتاج غربي مش متصل بالديانة .. قمر والله، مخ ظري

الحكم على 22 من اهالي المحلة

الخبر زي ما كتبه محمد مرعي على التويتر
محكمة امن الدولة طوارىء حكمت على 22 من ابناء المحلة بالسجن لمدد تتراوح ما بين 3 الى 5 سنوات على خلفية اضراب ابريل 2008
----
لا تعليق. والا ح اقول كلام قبيح 

بيان مركز هشام مبارك بشأن ازمة اسلام اون لاين

أزمة إسلام أون ﻻين:انتهاك لحرية التعبير وحقوق الصحفيين
ورقة موقف مركز هشام مبارك للقانون
القاهرة فى 21 /3/2010

يعتصم منذ 15 مارس الحالي (2010) أكثر من 300 من العاملين والصحفيين بموقع إسلام أون ﻻين وذلك بعد أن إرسلت إدارة الموقع لجنة قانونية للتحقيق مع 250 منهم لإرسالهم رسالة للشيخ القرضاوي رئيس مجلس إدارة جمعية البلاغ القطرية المالكة للموقع http://www.hmlc-egy.org/node/1391
،وقد تطور الاعتصام فى ظل تعنت مالكي الموقع وإتخاذهم قرارات وإجراءات استفزازية منها السيطرة على كلمات مرور(باس ورد) الموقع، مما دفع المعتصمين لتطوير اعتصامهم لإضراب عن الطعام حيث دخل أمس 20 مارس أثنين من الصحفيين إضراباً عن الطعام والشراب.http://www.hmlc-egy.org/node/1393 .
ويعتبر موقع إسلام أون ﻻين من أشهر المواقع الإلكترونية الإسلامية ليس فى مصر والمنطقة العربية وحسب وأنما فى العالم، والموقع الذى تأسس فى عام 1999 بتمويل خليجي( قطري – سعودي ) وإدارة مصرية، وبحسب المعلومات المتداولة فأن الموقع يتبع جميعة البلاغ القطرية والتى أنشئت عام 1998، ويبدو أن تلك الجمعية قد جعلت من شركة مساهمة مصرية بأسم ( ميديا أنترناشنول) واجهه لإدارة الموقع بما فيها التعاقد مع الصحفيين.
ورغم أن رئيس مجلس إدارة جميعة البلاغ المالكة للموقع"الشيخ يوسف القرضاوي" قد أشيع أنه أصدر قرارات بإقاله المتسببين عن الأزمة إلا أنه يبدو أن تلك القررات لم تفعل بعد حيث ﻻ يزال الأمر كما هو منذ إندلاع الأزمة.
ويطالب الصحفيين والعاملين بالموقع بوقف تخريب الموقع وإعادة سيطرتهم على الموقع مرة أخري ووقف الإجراءات التعسفية ضدهم من قبل ممثلي مالكي الموقع.
شركاء ﻻ أجراء
شعار رفعه المعتصمين من العاملين والصحفيين بمدينة 6 أكتوبر غرب القاهرة بمقر موقع إسلام أون ﻻين، وهو شعار يعكس بدرجة ما ارتباط العاملين بالموقع برسالة الموقع وأهدافه وتخوفاتهم من الإجراءات التعسفية التى اتخذتها الجمعية المالكة للموقع، وتأثيرها السلبية على مشروع إسلام أون ﻻين.
معركة"السيرفر" وتقييد حرية التعبير والنشر... فتش عن الرقابة
تصريحات مسئولي جميعة البلاغ على قناة الجزيرة من أنه قرروا استعادة سيطرتهم على الموقع، والتى سبقتها تصريحات منشورة بجريدة الشرق الأوسط من أن الهدف من السيطرة على السيرفر هو أن يتم النشر من مقر الجمعية بقطر وليس من القاهرة.
هذه التصريحات تعكس النية المبيته لفرض رقابة على محتوي موقع إسلام أون ﻻين أي الرقابة على إدارة تحرير الموقع من قبل الإدارة والمالك للموقع فى قطر، وهو الأمر الذى يعد بلا شك تقييد لحرية التعبير وانتهاكاً لحقوق الصحفيين وحق النشر، ويخالف المواثيق الدولية والدستور والقانون المصري.
فمالكي الموقع بهذه الإجراءات ﻻ يختلفوا عن الصحف المصرية فى حقبة الستينات عندما كان هناك رقيب مهمته مراقبة هذه الصحف.
التهديد والتحقيق بسبب إرسال الشكاوي والبيانات
أن ما قام به العاملين والصحفيين بموقع إسلام أون ﻻين من إرسال شكاوي وبيانات لرئيس مجلس إدارة جميعة البلاغ القطرية يدخل فى نطاق حقهم المشروع فى التعبير عن أرائهم، وﻻ يجوز بأي حال من الأحوال معاقبتهم وعلى ملاك الموقع التحقيق فى أسباب الشكوي وليس معاقبه مرسيلها.
انتهاك ملاك الموقع للأصول المهنية للصحافة والنشر
مثلت الإجراءات التى قام بها ملاك موقع إسلام أون ﻻين انتهاكاً خطيراً للأصول المهنية المرعية لمهنة الصحافة، وعلى رأس هذه الأصول المهنية مبدأ الفصل بين الإدارة والتحرير أو الفصل وبشكل خاص الفصل بين التمويل والتحرير، فهذه القاعدة الذهبية وضعت من أجل الحفاظ على إستقلال الصحفيين عن مالكى وسائل الاعلام.
تغيير السياسة التحريرية تقتضي مناقشة إدارة التحرير وﻻ تجيز فصل الصحفيين
لم تتضمن التشريعات القانونية أي نص يبيح لمالكي وسائل الإعلام عند تغيير السياسة التحريرية لهذه الوسائل أن تقوم بفصل العاملين والصحفيين بسبب تغير السياسة التحريرية، بل تلزم الاصول المهنية لمهنة الصحافة مناقشة إدارة التحرير فى السياسة التحريرية قبل إقرارها.
وتضمن قانون تنظيم الصحافة المصري والحاكم للعلاقة بين موقع إسلام أون لاين والصحفيين العاملين به، نصوصاً تضمن للصحفين الحق فى فسخ التعاقد بإرادة منفردة والتعويض (المادة 13 من القانون 96 لسنة 1996)، بينما لم يعطي المشرع هذا الحق للمؤسسة الإعلامية.
فصل تعسفي أم قرار بإغلاق الموقع بمصر
أن المتابع الجيد لأزمة إسلام أون ﻻين لن يستطيع أن يعرف حقيقة الإجراءات التى تتخذها جميعة البلاغ القطرية هل هي قرارات فصل تعسفي أم قرار بالإغلاق لمقر الموقع بمصر، فتصريحات مسئولي البلاغ من أن ليس لديهم عاملين بمصر تتناقض مع اللجنة القانونية التى تسببت فى الأزمة.
أن ملابسات أزمة إسلام أون ﻻين تدل بلا شك عن نيه مالكي الإدارة – حتى الأن – هو نقل مقر إسلام أون ﻻين من القاهرة إلى قطر، وهو ما يقتضي إغلاق المقر بمصر أو على الأقل تصفيته وإغلاقة بشكل جزئي، بما يعنى الفصل التعسفي لمئات العاملين بالموقع.
.
لقراءة كامل الورقة
http://www.hmlc-egy.org/node/1394
------------
بس دول طلعوا عالم واطية اخر حاجة.. انا كنت فاكرة على الاقل ح يحترموا القرضاوي بعد السنين دي كلها.. لا عالم واطية واطية يعني، نيموذج للوطيان على ابوه

Wednesday 24 March 2010

انا شرقت من الضحك وانا باقرا المقال ده

القهوة وقفت في زوري وشرقت وقعدت اكح... هههههه يا عيني علينا، والله احنا غلابة قوي، طب وربنا غلابة، طب تصدقوا انا فعلا مش باكرهه، انا باكره علاء مبارك، باكرهه قوي يعني، بس حسني، عادي يعني، عايزة اغير بس، ومش عايزة جمال رئيس، بس هو شخصيا عادي يعني مش باكرهه

اخلص بقى علتنا

هي ايه الحكاية؟ ما داهية الدكتور البرادعي فاكر الشعب نايم على ودانه؟ امال الاعتصامات اللي كل يوم دي ايه؟ في كل حتة، موظفين، وعمال، وفلاحين وسواقين وكل الناس بتعتصم
الليلة استوت وهو بس جاي يقطف.. ما يخلصنا بقى ايه؟ ايه؟ ايه الشلل ده؟ جه عمل كان لقاء تلفزيوني، وراح مسافر شهر كده بدون ايتها سبب، حد بيستلم جايزة في شهر؟ وبعدين جاي يقول لنا انا مش حصان ابيض انا كبريت جنب البنزين. وعمال يقول لنا ساعدوني ساعدوني، نساعده نعمل له ايه يعني؟ ما يتحرك بقى.. ده علنا، ح يعمل حاجة وللا جاي يخرط على قلبنا بصل؟ يقول لنا بس بدل التوقيعات واللجان ووجع الراس خلينا نلتفت بقى لاشغالنا.. ده ايه الخايلة الكدابة دي؟
الناس اهي زي الفل، مطرح ما يحب يروح يتفضل، عايز يروح اعتصامات عمال اهلا وسهلا، عايز يروح يزور فلاحين اهم قاعدين، عايز يروح نقابة الصحفيين اهم هناك ع السلم، عايز موظفين اهم هناك برضه، وكله مش ساكت، مافيش حد ساكت غيره، ما ياللا بقى انجز خنقتنا
ايه ده؟
خلصناااااااااااااااااااااا.. بلا كبريت بلا ولاعة

Tuesday 23 March 2010

عفوا قداسة البابا تاني

ماهو انا كل ما اتضايق منه اجيب له العنوان ده عشان عنوان سخيف
والبروتستانت دول كمان روافض؟ اه، عشان بروتستانت يعني المعترضون
يبقوا روافض
هي ايه الحكاية؟ 
يعني احنا قدامنا عدة اخطار دلوقت يا شباب لازم نتصدى لها
مبدئيا: النصارى عباد الصليب
ثانيا: الروافض الانجاس
ثالثا: البروتستانت الالتراس
رابعا: الجزائريين والامازيغ
خامسا: المتصوفة المبتدعة
سادسا: اي حد مش مصري
سابعا: اي حد ما يعجبكش
المهم ما يكونش اسرائيلي.. الاسرائيلي يتسلل الحدود ويرجع متشال على كفوف الراحة بعد اسبوع وكمان يعمل لك فضيحة بجلاجل براحته
اصلهم اهل كتاب، وربنا يوفق، ويتمم بخير ونعمل شكبة وكبت كتات، وربنا يسامحنا على الجيريمة اللي ع نعملها في الكون دي
والله يا قداسة البابا انا مش فاهمة ازاي يعني تبقى زعلان على الكراهية المتنامية من المسلمين للمسيحيين في مصر وزعلان قوي ان المسلمين بيقولوا على المسيحيين كفار وحضرتك بتحرم على مسيحيين انهم يصلوا في كنايس مسيحيين زيهم؟ 
احنا عارفين نلاحق على السلفيين المسلمين لما نلاحق على السلفيين المسيحيين؟

رسالة عاجلة

تليفون صحاني بدري جدا، لقيت واحدة بتعيط وبتقول لي: حضرتك ما تعرفنيش، انا ساكنة هنا في تفاهنا الاشراف ميت غمر محافظة الدقهلية. (طلع فيه حاجة اسمها تفاهنا البلد فعلا مش تريقة) واللي حصل ان قوات الامن جات اقتحمت البيت اللي انا ساكنة فيه، انا ساكن فوق مني طلبة ازهر، وفي الشقة اللي تحت كمان طلبة ازهر، هم مغتربين مش من هنا (قصدها من محافظات تانية)، جم صحوا العيال الساعة تلاتة الصبح وقلبوا لهم الشقة، وقبضوا على العيال اللي في الشقة اللي تحت، جم يطلعوا للشقة اللي فوق قام العيال اللي في الشقة اللي فوق علوا صوتهم وانا بصراحة صوتت، قام خافوا من انهم يعملوا قلبان ودوشة سابوهم، ودلوقت هم واخدين خمسة
- ليه؟
- عشان عملوا معرض لفلسطين
وبعدين قعدت تعيط: والله انا ما ليا فيه، بس دول زي عيالي، حرام
اسماءهم:
أنس الغندور - اولى شريعة
اسلام احمد جمال - اولى شريعة
عبد الباسط عبد الله - اولى شريعة
احمد صلاح - اولى شريعة
عبد السلام كمال - تانية شريعة
------------
معظمهم اولى... فاهمين يعني ايه اولى؟ يعني عندهم ما بين 17 الى 18 سنة، قصر يعني
قالت لي: انا اتصلت بالمصري اليوم قالوا لي اتصلي كمان شوية الساعة عشرة ونص الصبح بصفحة الحوادث، اكلم مين
طبعا اديتها نمرة هشام مبارك، واديتها نمرة ابراهيم منصور في الدستور، لانها لو صحت دعاء الساعة تسعة الصبح ممكن تطالب باعدامهم ههههههههه
كل ده عشان معرض لفلسطين... طب ما كانوا يعملوا معرض للمنتخب ويشتموا فيه الجزائر عشان ياخدوا جايزة

Saturday 20 March 2010

يا عيني يا فايزة لما تبقي عايزة

للكبار فقط.
تحذير: 
هذا البوست لا يناسب كل من:
1- من هم دون الثامنة عشر
2- من لم يسبق لهن الزواج
تحذير:
المقال المنشور بالبوست قد يحتوي على مشاهد خادشة بالحياء لغير المتخصصين في موضوع البحث
تنبيه:
ارتأت إدارة المدونة إضافة بعض العناوين والتعليقات باللون الاحمر اضافة الى الصور المتحركة لتوضيح بعض النقاط العلمية
قام بتدشين هذا البحث العلمي بمعرفة معهد البحر للعلو...م والتكنولوبيا
مقدمة:



كلام يبقي


حمدا لله علي السلامة


بقـلم‮:‬ مـمـتـــــــاز القــــــــط*
(فوت نوت: اكسلانت ناو ناو)


سيادة الرئيس‮..‬
الناس كلها عايزة تاخد تأشيرة‮.. ‬وتروح المانيا عشان تزورك وتقولك ألف مليون سلامة عليك‮.. ‬وحمدالله علي سلامتك‮.‬
الناس في بلدنا طيبة واللي في قلبها علي لسانها‮.. ‬الناس في بلدنا بتحبك وبتدعي ربنا ليل ونهار إنك ترجع لنا وإنت بكل صحة وعافية‮.‬
لكن يا سيادة الريس إحنا في العشرة أيام الأخيرة من الشهر‮.. ‬يعني المرتبات خلاص‮!! ‬وكمان هدايا عيد الأم‮.. ‬وكلها مصاريف زيادة‮.. ‬قلنا نبعت لك جواب‮.
ياتري نكتبه إزاي؟‮! ‬بكلام الجورنالجية‮.. ‬ولا بكلام عبدالباسط ومحمدين ومرقص وأم محمد‮.. ‬قلنا ياريس نكتبه بلغة المصريين ولاد البلد اللي بيحبوها‮.. ‬واللي عارفين إنك أكتر واحد بتحبها وبتحبهم‮.‬
وبعد‮ ..‬
يصل ويسلم للسيد الرئيس‮..‬
‮ ‬ألمانيا‮.. ‬مستشفي هايدلبرج
البند الأول: تدريس الصحة الجنسية في المدارس
يا ريس‮:‬
ألف ألف مليون سلامة عليك‮.. ‬وترجع لنا بألف سلامة وبسرعة‮.. ‬بصراحة يا سيادة الريس مفيش حاجة في مصر كلها لها طعم من‮ ‬غير متكون معانا‮.. ‬خدنا علي كده‮.. ‬شايفينك ليل ونهار رايح جاي عشانا وعشان ولادنا وعشان مصر اللي إنت أكتر واحد بتحبها‮.. ‬وحياتك كلها كانت عنوان لكل مصري أصيل حب بلاده‮.. ‬وكان همه كله انها تفضل دايما راسها مرفوعة في العلالي‮... ‬يعني فوق‮.. ‬في السما اللي كتبت منها في ‮٣٧ ‬أحلي أنشودة للنصر‮... ‬لسه وهنفضل طول العمر بنغنيها‮.‬
أنا‮ ‬عارف يا سيادة الريس إنك متضايق قوي عشان إنت بعيد عن مصر وعايز ترجع بسرعة‮.. ‬مش هنسي يوم من الأيام كنا مع سيادتك وسافرنا ‮٥ ‬دول من دول الخليج في ‮٦٣ ‬ساعة‮... ‬يعني يوم ونص‮.. ‬ننزل في مطار ونطلع لمطار‮.. ‬من مباحثات لمباحثات‮.. ‬وساعتها كلنا حسينا بالتعب وكانت أول مرة نعرف فيها إن منصب الرئيس ده حاجة تانية‮ ‬غير اللي إحنا فاكرينها‮.. ‬يوميها سألت سيادتك ليه يا ريس مستعجل دايما‮.. ‬ليه مانبتش يوم في كل دولة نستريح فيها‮!!‬
يوميها يا سيادة الريس قلت حاجة مش هانساها‮: »‬انتوا عايزين تباتوا عشان تلفوا وتروحوا تشتروا حاجات وتشوفوا البلد‮.. ‬أنا بقي هعمل إيه‮.. ‬هستني جوه الفندق ولا القصر‮.. ‬يعني سجن‮.. ‬لا هعرف اروح ولا آجي‮.. ‬أحسن نروح بلدنا نشوف شغلنا‮«.

عنوان جانبي: ممكن واحد في حجمك يفسي؟ يفسي.. انازر

يوميها بس يا سيادة الريس عرفت إن الرئاسة مش جاه وأبهة وبروتوكولات وموتوسيكلات‮.. ‬دي هم كبير أوي‮.. ‬ومتعب قوي‮.. ‬ربنا بيختار له ناس قدرهم مابيبقاش ملك إيديهم‮.‬
‮> > >‬
ساعتها يا سيادة الريس رجعت لزمان‮.. ‬يوم نصر أكتوبر‮.. ‬يوميها ياريس كنت بالنسبة لنا البطل‮.. ‬في مدرسة المساعي المشكورة كنا كلنا فخورين قوي إنها مدرسة البطل حسني مبارك صاحب الضربة الجوية‮.. ‬كل واحد حاسس إنه جزء من الضربة الجوية‮.. ‬كل واحد كان عاين صورتك معاه‮.. ‬وكنا بنتمنظر علي زمايلنا في المدارس التانية إننا في مدرسة حسني مبارك صاحب ضربة النصر‮.
البند الثاني: تخريب الصحة الجنسية في المدارس
بعدها اختارك الرئيس السادات نائب له‮.. ‬يعني منصب وصلت له وأنت أصلاً‮ ‬في قمة المجد والنصر‮.. ‬مش هننسي أبداً‮ ‬ياريس يوم لما وضعوا نياشين النصر ورتبة الفريق أول علي كتفك وسط هتاف نواب الشعب‮.. ‬الشعب البطل اللي السادات وحسني مبارك كانوا ولاده‮.. ‬كانوا رجاله لأنهم اختاروا طريق صعب‮.. ‬طريق‮ ‬يرجعوا فيه كرامة بلدهم‮.. ‬حتي لو كانت حياتهم هي التمن‮.. ‬اختاروا إنهم يعملوا اللي عليهم والباقي علي ربنا‮.. ‬حياتكم يوميها ياريس كان ثمنها‮ ‬غالي‮.. ‬ثمنها كان عرض وشرف وكبرياء مصر‮.. ‬مصر اللي العالم كله افتكر إنها خلاص في خبر كان بعد هزيمة مُرة‮.... ‬هزيمة ماحاربش فيها جيشنا خالص‮.‬
صدقني ياريس بكلمك من قلبي‮.. ‬طول اليومين اللي فاتوا الناس في بلدنا زعلانة أوي‮.. ‬زعلانين عشان عملت عملية‮.. ‬حاسين ياريس إن إحنا السبب‮.. ‬إحنا تعبناك قوي‮.. ‬طول عمرك شايل همنا وبلدنا مليانة مشاكل‮.. ‬تعبناك لأنك بدأت من أول السطر‮.. ‬البلد كانت مفلسة‮.. ‬يوميها مكانش فيه ولا مليم عشان نشتري قمح‮.. ‬وساعتها عارفين إنك اتصرفت ياريس‮.. ‬ومن يوميها بدأت تبني مصر كلها من أول وجديد‮.. ‬شوارع وبيوت وكهربا وميه وتليفونات‮.. ‬هَم مايتلم‮!! ‬لكنك كنت قدها وقدود‮..‬
‮> > >‬

بصراحة إحنا عارفين‮.. ‬عارفين إنت عملت إيه لبلدنا‮.. ‬وازاي حافظت عليها من كل المؤامرات‮.. ‬لكن دايما إحنا بننسي‮.. ‬أصلنا طماعين‮!! ‬وما صدقنا إن فيه واحد بيحبنا وبيسمعنا وعمره ما زهق ولا هيزهق مننا‮.. ‬وهنفضل دايما نقولك عايزين وعايزين‮.. ‬وعمرنا ماهنقولك كفاية‮.. ‬أصل البحر بيحب الزيادة‮. ‬وإنت طلعتنا من القمقم يا ريس‮.. ‬كنا فين وبقينا فين‮.. ‬معدش حد في وجودك يا ريس ممكن يروح ورا الشمس‮.. ‬وزوار الفجر يا ريس‮.. ‬خدوها من قصيرها من يوم ما اختارك شعبنا عشان تكمل بينا
المشوار‮.



ياريس معلهش‮.. ‬عايز أقولك حاجات كتيرة‮.. ‬لكن أنا متلخبط‮.. ‬مش عارف اقولك علي اللي في قلبي وقلوب كل المصريين‮.. ‬حاجات ياريس هي اللي خلتنا نحبك‮.. ‬بصراحة مش هنحبك لله في لله‮!! ‬لكن إنت ابتديت ياريس من أول يوم‮... ‬اسمك عرفناه وقبله كلمة بطل‮.. ‬أول‮ ‬يوم عرفناك كنت في قمة المجد‮ ‬يا ريس‮.. ‬الرئاسة عمرها ما كانت في بالك وتاريخك قبلها هو سجل شرف وعزة وكرامة‮.. ‬من أول‮ ‬يوم رئاسة شفناك بتطلع الناس من المعتقلات وبدون ضجة ولا شوشرة‮.. ‬شفناك يوم ما عملت أول مؤتمر اقتصادي‮.. ‬شفناك وإنت بتلف في المصانع والمزارع‮.. ‬بتكلم العمال والفلاحين‮.. ‬بساطتك ياريس وحبك لشعبك‮.. ‬خلت الناس كلها تحبك وروحها دايماً‮ ‬معاك‮.. ‬دي حقيقة والله يا ريس‮.. ‬حتي اخوتنا اللي لسانهم طويل الأيام دي‮!! ‬عارفين قلبك وحبك وسماحتك‮.. ‬عارفين إنك إنت اللي فتحت باب الحرية وشجعت الناس‮ ‬يقولوا ويشاركوا‮.‬
خليت الناس‮ ‬يا ريس في مصر الفرعونية‮ ‬ينسوا كلمة الخوف من الحاكم‮...(فوت نوت: يجدر الاشارة الى كشف علمي في هذا البحث) ‬لأول مرة من ‮٨ ‬تلاف سنة‮.. ‬صحيح اللي بيقولوه الجماعة إياهم زاد شويتين عن الحد‮!! ‬لكن صدقني ياريس كله عارف ومتأكد من صبرك وحبك وحلمك‮.. ‬عمرك ما‮ ‬غضبت من أي واحد فينا‮.. ‬إنت صحيح بتغضب لينا لكن مش علينا‮.. ‬بتغضب لو أي حد مس مصر بأي كلمة ولا همسة‮.
البند الثالث: المعلومات الخاطئة عن الصحة الجنسية الشائعة بين المراهقين

كلنا عارفين ياريس إنك كبير في تعاملاتك مع كل دول العالم اللي بيحبونا واللي بيكرهونا واللي نص نص‮!! ‬ساعات بتعدي‮... ‬بس بمزاجك‮... ‬وساعة الجد يا ويله يا سواد ليله اللي يفكر يهوب بكلمة علي مصر‮..‬
‮> > >
عنوان جانبي: أهمية العقاقير المهدئة لعلاج الحالات الملحة:‬
عايزينك ترجع بسرعة ياريس‮.. ‬مش هننسي عملت إيه في بني سويف الأسبوع قبل اللي فات‮.. ‬كل الحكومة مشغولة في حل أزمة البوتاجاز والكيروسين والبطاقات الذكية واللي مش ذكية‮ !! ‬فجأة شافوك ياريس وبحاستك ونظرتك اللي دايما باصة لقدام بتقول للحكومة‮.. ‬شوفوا حل للبطالة‮.. ‬خلوها أولوية قبل أي حاجة‮.. ‬الظاهر الحكومة كانت بدأت تنسي حكاية البطالة وفاكرة إن التلاتة ونصف مليون فرصة عمل اللي اتوفروا في التلت سنين اللي فاتوا كفاية يسدوا رمق الناس‮.‬
صدقني ياريس ساعتها ربكت الحكومة‮.. ‬وعرفتها إنك علي طول أقرب واحد لينا‮.. ‬عارف إيه مشاكلنا‮.. ‬بتعيش معانا همومنا‮.. ‬وكمان بتحلم نفس أحلامنا‮.. ‬إنت منا ياريس وعمرك ما كنت أبداً‮ ‬بعيد عنا‮.
البند الرابع: الاثار السلبية لهجرة الازواج الى الخليج على الاسر المصرية: ‬

ياريس من‮ ‬يوم ما حضرتك رحت ألمانيا‮.. ‬وعملت العملية‮.. ‬الناس حاسة إن فيه حاجة نقصاها‮.. ‬حاجة كبيرة وغالية علينا قوي ياريس‮.. ‬الناس كلها بتسأل إمتي هترجع‮.. ‬وحشتنا‮ ‬يا ريس كلنا‮.. ‬وحاسين إن الأيام اللي‮ ‬غبت عنا فيها سنين طويلة وصعبه علينا‮.‬
الـ ‮٨٨ ‬مليون‮ ‬يا ريس قلوبهم بتدعي ربنا سبحانه وتعالي إنك ترجع لنا بألف مليون سلامه‮.. ‬سلامتك‮ ‬يا ريس هي سلامة مصر كلها‮.. ‬لكن اسمح لي أقولك ياريس عايزينك ترجع‮.. ‬عشان حاجات كتيرة عايزينك تكملها‮.‬
قلت لسيادتك إحنا طماعين‮!! ‬لكن إنت عودتنا علي كده‮.. ‬طول عمرك بتوفي معانا بأي وعد لك‮.. ‬والبرنامج الرئاسي لسه عايز زقة‮.. ‬وانسي ياريس إن قرار ترشيحك مرة تانية مش هيبقي ملك لك‮.. ‬القرار ملك لشعبك‮.. ‬وطول عمرك ياريس كنت جاهز دايماً‮ ‬للندا‮.. ‬ندا الواجب‮.. ‬طول عمرك ماردتش طلب لشعبك‮.‬
صدقني ياريس عايزينك ترجع لنا بسرعة‮.. ‬الشعب كله ياريس بيتحاما فيك‮.. ‬ولو الحكومة عملت حاجة كده ولا كده‮!! ‬عارفين إنك مش هتسكت وأول واحد هيقولهم‮ »‬استوب‮«.. ‬كله إلا الغلابة‮.. ‬إنت الوحيد اللي حاسس بينا‮.‬
عمرك ماكنت بعيد عنا إلا ساعة الشديد القوي‮.. ‬وربنا ما‮ ‬يعيدها ولا تشوف حاجة وحشه أبداً‮ ‬تاني‮.. ‬والحمد لله ربنا استجاب لدعاء ‮٨٨ ‬مليون مصري‮ »‬في وش العدو‮« ‬مش عايزين حد يحسدنا‮.. ‬وأولهم الدكتورة مشيرة خطاب وزيرة السكان‮!!‬
‮> > >‬
عايزينك ترجع ياريس عشان الدكتور يوسف بطرس‮ ‬غالي يخف علينا شوية‮!! ‬ويشوف له حل في حكاية الضريبة العقارية‮.. ‬ويعمل التعديلات اللي سيادتك قلت عليها‮.. ‬صحيح إحنا عارفين اللي فيها‮... ‬عارفين إن مواردنا مش أد كده‮.. ‬عارفين إن سباق الأرانب اللي دخلنا فيه وبقينا ‮٨٨ ‬مليون بياكلوا كل حاجة‮.. ‬ونتيجة أي اصلاح ما بنحسش بيها‮.. ‬عارفين إن الموازنة فيها عجز‮.. ‬ولكن ربنا دايماً‮ ‬ساترها معانا ياريس‮.. ‬والله
العظيم طول ما إنت معانا‮..



عايزينك ترجع لنا بسرعة ياريس عشان تفتح بقية مشروعات المية والصرف‮.. ‬وجودك ياريس معانا ومتابعتك لكل حاجة‮.. ‬هي الحاجة الوحيدة اللي مطمنانا إن إحنا ماشيين دايماً‮ ‬لقدام‮.‬
عايزين نشوفك تاني بسرعة‮ ‬ياريس مع العمال في المصانع الجديدة اللي في وش العدو بقوا ‮٠٥١١ ‬مصنع‮.. ‬مش ألف بس‮!! ‬عايزين نشوفك معاهم‮.. ‬وهما بيضحكوا من قلبهم لما تكلمهم وتسأل عن أحوالهم‮.. ‬عايشين فين؟‮.. ‬بيركبوا إيه من البيت للشغل؟‮.. ‬بياخدوا كام؟
عايزينك ترجع بسرعة ياريس عشان فيه شوية قوانين جديدة كده ممكن الله أعلم‮.. ‬تحتاج منك توصية‮.. ‬ولا ضبط للبوصلة‮.. ‬زي قانون التأمينات الجديد وقانون التأمين الصحي‮.
البند الخامس: انحراف الزوجات في ظل غياب الازواج
عايزينك ترجع ياريس عشان تروح بنفسك تشوف الهايبرات الجديدة بتاعة رشيد‮.. ‬بتشغل ناس وكمان بتبيع بأسعار أقل‮.. ‬عشان بتبيع كتير‮.. ‬وإنت طالبت بزيادتها‮.. ‬ودي هتوفر ‮٠٠٧ ‬ألف فرصة عمل‮.‬
عايزينك ترجع بسرعة ياريس عشان تروح المصانع الجديدة والمناطق الصناعية والمناطق الحرة‮.. ‬عايزينك تفتح بقية الموانئ اللي بنيتها ياريس‮.‬
عايزينك ترجع بسرعة ياريس عشان هيعملوا الموازنة الجديدة‮.. ‬ولازم توصيهم علي العلاوة الاجتماعية الجديدة في‮ ‬يوليه عشان‮ ‬يعملوا حسابها من دلوقتي‮.. ‬ومحدش‮ ‬يفكر‮ ‬يلغيها ولا‮ ‬يقصولها‮!!‬
‮> > >‬
عايزينك ترجع بسرعة ياريس عشان تتابع بنفسك حل مشاكل الفلاحين اللي إنت بتنصرهم ودايماً‮ ‬واقف معاهم‮.. ‬وشلت ديونهم‮.. ‬أصل الدين هّم‮ ‬يا ريس‮.. ‬وكلهم ملهمش إلا إنت ابن أرضهم الطيبة ياريس‮.‬
عايزينك ترجع بسرعة ياريس عشان تشوف أخبار حكومتنا الذكية‮.. ‬وبيعملوا إيه؟‮! ‬وبيفكروا في إيه وناويين علي إيه؟‮! ‬وأهو الأمر ميسلمش‮.. ‬كام اجتماع وزاري موسع يظبط المسائل معاهم‮.. ‬في مشاكل كتيرة‮ ‬يا ريس حسينا إن لولا تعليماتك‮.. ‬مكنوش عارفين هيعملوا إيه‮!!‬

عايزينك ترجع بسرعة ياريس‮.. ‬عشان نعمل سياسة جديدة للحفاظ علي الأرض الزراعية بطريقة عملية‮.. ‬تاخد في اعتبارها طبيعة الفلاحين وشعورهم بالغربة لو سكنوا بعيد عن أرضهم اتنين تلاتة كيلو‮!! ‬وهيبنوا‮ ‬يعني هيبنوا‮!!‬
عايزينك ترجع بسرعة عشان نعمل كردونات جديدة‮.. ‬وبرسوم يدفعها اللي عايز يبني‮.. ‬وتروح حصيلتها لاستصلاح أراضي جديدة‮.‬
‮> > >‬
عايزينك ترجع بسرعة ياريس عشان نعمل سياسات سكانية جديدة‮.. ‬مش بالندوات والوعاظ والدعاة‮.. ‬ولكن بالدعم والمساندة‮... ‬بحوافز وكمان بقرص الودن‮!!‬
عايزينك ترجع بسرعة ياريس عشان نعمل سياسات لحماية المعاقين‮.. ‬وعدم تهميشهم‮.. ‬والاكتفاء بذكرهم في القوانين وبس‮.‬
عايزينك ترجع ياريس بسرعة عشان تكمل إنصاف العاملين‮.. ‬وتنشر مظلة الأمان الصحي علي كل المصريين‮. ‬وكلنا عارفين وشفناك مرات كتيرة بتدي تعليمات عشان علاج الغلابه‮.. ‬وأمرت ببناء معاهد لعلاج الأورام والامراض في كل المحافظات‮.‬
عايزينك ترجع ياريس عشان تكمل دعمك للمرأة‮.. ‬أمي وزوجتي وبناتي‮.. ‬الظاهر إن سي السيد عايز يرجع تاني‮ ‬يا ريس وصعبان عليه المرأة تكون علي منصة القضاء‮.. ‬خايف منها أحسن توريه الويل وتدوقه من الكأس اللي شربهولها طول عمرها‮.. ‬رغم إنها كانت هي الأساس في كل حاجة‮.
البند السادس: ارتفاع معدلات الانهيار العصبي
عايزينك ترجع بسرعة ياريس عشان نربط حوافز الاستثمار بعدد العمال الجداد في كل مصنع‮.. ‬ونشوف حل لمشاكل العمال‮.. ‬ونراجّع مرة تانية وتالتة عقود الخصخصة‮.‬
عايزينك ترجع بسرعة ياريس عشان نرجع تاني معدلات النمو اللي حققناه من سنتين‮.. ‬لولا الأزمة بنت الإيه‮!!.‬
‮> > >‬
عايزينك ترجع بسرعة ياريس عشان القدس تفضل عربية‮.. ‬واخوانا البعدا يبطلوا حركات النص كم اللي بيضحكوا بيها علي بعض العرب‮.

عايزينك ترجع بسرعة ياريس عشان نرفع راسنا لفوق وإنت بتحط حجر الأساس لأول محطة نووية سلمية‮.. ‬وترفع عليها علم مصر‮.. ‬العلم اللي الأيام دي بنحتفل بذكري رفعه في طابا‮.
الخلاصة: وصول العلم إلى حمل الرجال
عايزينك ترجع بسرعة ياريس عشان المرارة اللي في حلقنا من يوم ما عرفنا انك بعافية شوية تروح‮.‬
مش عايزين نحملك الهم ياريس‮.. ‬ولما ترجع بالسلامة هنقولك علي بقية الحاجات اللي إحنا عايزينها‮.. ‬إنت اللي علمتنا نقول‮.. ‬علمتنا منخفش‮.. ‬علمتنا نقولك علي كل حاجة‮. ‬وزي ما قلت لسيادتك قبل كده إحنا طماعين‮.‬
وعشان اللي فات ده كله ياسيادة الريس‮.. ‬عايزينك ترجع بألف ألف مليون سلامة‮... ‬يا حتة‮ ‬غالية قوي من مصرنا‮. ‬يا حتة بتنبض في قلوب ‮٨٨ ‬مليون مصري‮.. ‬وألف ألف مليون سلامة‮.



هو انا بس اللي متغاظة من تعيين احمد الطيب؟

هو الازهر ان جنرال ما بيعملش حاجة، بس ليه اختيار واحد له تاريخ في انه فتح الحرم الازهري لقوات الامن اللي كانت مترددة تدخل وهو اللي اصر يدخلها وضيع مستقبل عيال صغيرة؟ مدام شيخ الازهر ما بيعملش حاجة كده كده، وموظف بينفذ اوامر، ما كانوا يجيبوا اي حد ينفذ الاوامر؟ وللا هو لازم ينفذ الاوامر ودمنا يتحبس من الغيظ كل ما نشوفه في ذات الوقت؟

Friday 19 March 2010

هههههههههههههههههههههههههههههههههههههههههههههههههههههههههه

اللللللللللللففففففففففففففففففففففف حمد الله ع السلامة، هي كده تبقى علقة سخنة؟ 
واول ما فاق راح معين لنا احمد الطيب شيخ الازهر.. سبحان الله، عموما في سياق الاحداث دي مش مفروض هو اللي يتعظ
المفروض الشعب هو اللي يتعظ بقى
------------
نفسي اقول حاجة تبان قلة ذوق وعدم مراعاة لمشاعر الناس المأزومة في مشكلة اسلام اون لاين، بس لازم الواحد يقولها: 
هو انتوا فاكرين عشان اسمها "اسلام" ح تبقى عادلة؟ اي منظومة رأسمالية في الدنيا كده، اسمها اسلام اسمها مسيحية اسمها تامر مالهاش اسم خالص، مدام منظومة رأسمالية لازم تدوس على الناس وتظلمهم واللي مش عاجبه يخبط راسه في الحيط
هي اللعبة كده واللي عاجبه على الكحل يتكحل واللي مش عاجبه يترحل، لا القرضاوي ولا سيدنا محمد نفسه يعرف يتوسط عند رأسمالي عشان يدي الناس حقوقها
الناس عند الرأسمالي زي المكن وقطع الغيار، اللي مالوش لازمة يترمي، وعنوان الاسلام بالنسبة له عنوان مربح عشان له جمهور، ولو سب الدين مربح هو نفسه الرأسمالي ح يشتغل فيه، اذا كان فيه يهودي عمل مشروع سجاجيد صلاة عشان ده مشروع مربح، واللي بيخش في منظومة رأسمالية لازم يتوقع كده، مافيش حاجة في الرأسمالية اسمها عدل، ده كلام ما يأكلش عيش ولا يكسب فلوس، فوقوا بقى، وكان المفروض ان الدكتور القرضاوي يتوقع حاجة زي دي عشان ما يحرجش نفسه

Wednesday 17 March 2010

صلاح الدين وعلاء الدين

ايوة والنبي يا استاذ ابراهيم قول لهم.. انت برضه راجل وح يسمعوا كلامك
جات له حالة الخرزانة والربط في السرير والضرب بالحزام اللي بتجيبوهاله من آن لآخر لما بتخنقوه:

إبراهيم عيسى يكتب: العرب بين صلاح الدين وعلاء الدين!


أقرأ شعار (أين أنت يا صلاح الدين؟) مكتوبا بكل حب وصدق وحماس في لافتات يرفعها الشباب في مظاهرات التضامن مع المسجد الأقصي هذه الأيام فأشعر بالشفقة علي فلسطين من مناصريها وأحس بالفزع علي المسجد الأقصي من المدافعين عنه، إلي هذا الحد لايزال العنوان خاطئا!


أين صلاح الدين؟

صلاح الدين مات!


ثم من أين يأتي صلاح الدين بذمة أبيكم؟


لقد كان صلاح الدين حاكما لمصر فهل تتوقعون من حاكمها السيد الرئيس محمد حسني مبارك أن يكون صلاح الدين؟


ثم صلاح الدين لم يكن وحده ولم يأت بالدعاء ولم يظهر استجابة لشعارات مظاهرات لأجل الأقصي في شوارع القاهرة المعزية أو حواري دمشق القديمة!


الحاصل أن إحدي علامات العجز العربي المقيم والمقيت هو هذا الشعار أين أنت ياصلاح الدين؟ فنحن لا نفعل أي شيء كي يظهر صلاح الدين ونحن لا نقوم بأي خطوة من أجل تغيير الواقع العربي كي يظهر صلاح الدين، بل الحقيقة التعسة أن الأداء العربي الشعبي أليق به أن يصرخ وينادي أين أنت يا علاء الدين وليس يا صلاح الدين؟ فالشعوب العاجزة عن تغيير حكامها أو سلاطينها وأمرائها، والشعوب المشلولة عن مواجهة وزراء داخليتها أو مباحثها، والشعوب العربية التي لا تملك قدرة علي قول كلمة لا أمام ملك مستبد أو رئيس ديكتاتوري أو حاكم مهووس أو سلطة فاسدة لايمكن أن يظهر منها وفيها صلاح الدين! تشعر أن الشعوب تطالب بمصباح علاء الدين تحكه فيتحرر الأقصي وتتطهر القدس من دنس الاحتلال، العرب يحلمون بعلاء الدين يخرج من المصباح فيفعل ما تفعله الجن من معجزات، هؤلاء عرب علاء الدين وليسوا عرب صلاح الدين أبدا!


طيب افرض جاء صلاح الدين وقال أريدكم للحرب؟


ماذا ستفعلون هل العرب العاربة والمستعربة مستعدة للحرب ولمواجهة إسرائيل؟


طبعا سيجد الأخ أبومازن ورفاقه من حكام الاعتدال يطالبون صلاح الدين بضبط النفس وبأن ننتظر الضغط الأمريكي علي حكومة تل أبيب، وسوف يقول له الرئيس مبارك في اجتماع القمة العربية إنه لايمكن أن يورط بلده في مواجهة مع إسرائيل، حد برضه ياصلاح يا أخويا يحط ذراعه في بق الأسد، وسيسمع طبعا تحفا فكرية من الأخ العقيد قائد الثورة المستمرة منذ أربعين عاما تثور علي روحها، وكذلك سيعلن الرئيس السوداني تطوعه للحرب مع صلاح الدين لكن بالعصا التي يمسكها للتلويح للمحاكمة الجنائية الدولية وللرقص في الاحتفالات، ويطالبه الرئيس التونسي بمنع الحجاب أولا، أما الرئيس السوري فسوف يؤكد استعداد بلاده لعقد مؤتمر لمناصرة صلاح الدين، ثم النظر في توصيات المؤتمر للبت في موقف سوريا من التحالف مع صلاح الدين، أما الرئيس العراقي فسوف يطلب الاستئذان أولا من هيلاري كلينتون قبل أن يرد علي دعوة صلاح الدين!، أما الرئيس اليمني فسوف يؤيده بكل قوة لكنه سيطلب وقتًا لحل مشكلة صعدة والحراك الجنوبي ثم يستجيب بعد أن يتعافي اليمن الذي كان سعيدا مع صلاح الدين، أما سعد الحريري فسوف يؤكد أهمية التوافق في لبنان ومن ثم لابد أن يعرف رأي سمير جعجع وطبعا سيكون رأي جعجع أن صلاح الدين شيعي إيراني دسيسة (لاحظ أن صلاح الدين الأيوبي ذبح الآلاف من الشيعة في مصر داخل مساجدهم ومدارسهم!!).


الوضع العربي الآن ياللعجب هو نفس وضع العرب قبل أن يتمكن صلاح الدين من ضرب كل هؤلاء الحكام العرب في زمانه وأيامه ويهزم كل قلاع وقصور الحكم في مصر ودمشق وحلب وبغداد ويعلن الدولة العربية الواحدة التي حررت المسجد الأقصي فعلا!


إذن صلاح الدين ليس هو الحل.. بل حل صلاح الدين هو الحل، أن نتخلص من ديكتاتورية وفساد واستبداد السلطات العربية!


أما السكوت علي هؤلاء فليس معناه بالفعل إلا انتظار علاء الدين ومصباحه.. أما صلاح الدين وصباحه فلن يشرق قريبا!


Tuesday 16 March 2010

اخواني الولايا.. النبي تتلهوا

انا بقى المرة دي على اخري اخر حاجة، حد تاني يدخل يقول لي افيقوا يا مسلمين، الاقصى سيضيع عاااااااااااااااااااااااا
ح اعلق مشنقة على المدونة واضربه بالرصاص
يا تقولوا لي نعمل ايه وانا معاكوا يا اما تبطلوا صريخ عشان نريح ضميرنا ونحس اننا عملنا حاجة
لا
لا 
لا
ما عملناش حاجة ومش بنعمل حاجة واحنا ولايا.. كلنا ولايا، وولايا موكوسة كمان
انجزوا... عايزين نعمل ابطال على قفا الناس؟ لا احنا مش ابطال بقى، احنا سيس 
تمانين مليون سيسي
خلاص؟ خلاص يا امور انت وهو؟
تقولوا نعمل ايه؟ تقولوا نعمل ايه؟ او هم يقولوا لنا نقدر نساعدهم ازاي وانا اللي ح يقولوه ح اعمله على طول
يا اما تسكتوا بقى
لكن فتح الجواعير ده ما بقتش اعصابي ولا صحتي تستحمله
انا ح استناهم يقولوا حاجة.. يعني لو طلبوا من العرب حاجة معينة نعملها، وهم يا عيني عادة مش بيطلبوا منا طلبات صعبة عشان عارفين خيبتنا كعرب بشكل عام
بس خيبتنا في مصر بشكل خاص مالهاش زي، واجهوا نفسكوا بقى عشان على الاقل نعرف نحط ايدنا على بيت الداء، احنا ماضيين على نفسنا كمبيالات
كمبيالة الدستور اللي جردتنا من حقنا في حكم نفسنا
وكمبيالة البنك الدولي اللي جردتنا من فلوسنا ومصانعنا وفلاحتنا
وكمبيالة كامب ديفيد اللي جردتنا من ملابسنا
وطول ما فيه ناس مش دريانة باهمية الدستور وبتدافع عن الرأسمالية وبيع القطاع العام وبتقول السادات كان ذكي عشان مضى اتفاقية السلام يبقى احنا مافيناش امل بقى، اذا كنا مش عارفين داءنا ح نساعد الناس؟
يا تقولوا نعمل ايه يا تسكتوا... ونعيش حياتنا بقى في ظل الظرف الراهن مدام عاجبنا، ونبقى صرحا كده ونقول والله الواحد كل ما بيشوف اللي اسرائيل بتعمله بيحمد ربنا على اللي هو فيه ويولعوا احنا مالنا.. حتى عشان نبقى متسقين مع نفسنا
 انما ابقى قاعدة في بيت دعارة والطم عشان بنت الجيران واحد اتحرش بيها؟ لا بقى، يا اقفل بيت الدعارة يا اما اخش اشوف الزباين بقى واقفل الشباك
انا قلبي ما عادش يستحمل

ماي نيم إيز خان أند أي أم أه متسول

يعني بخلاف انه فيلم هندي على اصوله من بتوع اميتاب باتشان
وبخلاف انك كل شوية يتهيالك ان الفيلم خلص قوم يطلع ما خلصش ولا حاجة
وبخلاف الميلودرامية الخرافية
وبخلاف المشاهد اللي مالهاش اي لازمة
ايه كمية التسول والنفاق ومسح الجوخ والشحاتة والصعبانية دول؟ يا عم ما كنت ترجع بلدك بدل البهدلة دي

Sunday 14 March 2010

تقرير العطيفي

لا ومينا مستغرب قوي انهم قروا التقرير وما اخدوش اي اجراءات بالرغم من التقرير بيوضح لهم اسباب الفتنة الطائفية وكيفية معالجتها
ههههههههه والله ما فيه اغلب من العطيفي غير مينا نفسه، هم بيسألوه ايه اللي بيعمل الفتنة الطائفية عشان يشدوا حيلهم فيها شوية يا نبيه انت والعطيفي 
---------
هههههههههههه احمد الصباغ ماسك محمود عبد الرازق عفيفي ستميت بوست عنه، كاتب ليستة باسامي كتبه ما عدا كتاب واحد الظاهر اتكسف يكتب عنوانه ههههههههههههه

Friday 12 March 2010

طب اسمع زياد هنا بقى

بما اني ما سمعتش زياد لما رحت الحفلة يبقى اسمعه هنا بقى
















انا باحب زياد... وباكره محمد الصاوي