Tuesday, 30 March 2010

وزير الداخلية والتعليق

تحديث:
لا مؤاغظة... دخلت عليكوا حامية ونسيت احكي لكوا الحكاية:
الحكاية ان ابن وزير الداخلية الاسبق (انا اقصد ابن زكي بدر، لاني بصراحة مستخسرة فيه لقب وزير التربية والتعليم) هجم على مدرسة حكومة، وزارها زيارة مفاجئة.. لحد كده تمام، لقى المدرسة زي ما كلنا عارفين، مافيش اي مفاجآت في الموضوع ده على فكرة، كل الناس عارفة ان المدارس الحكومة مزبلة التاريخ.. ماشي، كويس كده، لحد كده فيلم امبراطورية ميم شغال
اذ بينا نفوجأ بقى بان سعادة الوزير، وزير التربية والتعليم، ماسك المدرسين وهاتك يا تهزيء فيهم، وبيتكلم في الموبايل وبيطلع قرار بنقل كل المدرسين - كده بلا اي تحقيق ولا تحويل شئون قانونية ولا دياولو - للفيوم، وبيهين مدرس قدام الطلبة، وجه الناظر، قام قدام الطلبة والمدرسين مسح بيه البلاط وهزأه باسلوب ظباط الشرطة، وبعدين دخل فصل ومسك عيل يا عيني في رابعة ابتدائي لقاه مش معاه شنطة مدرسة، مسح بيه البلاط وقال له انت جاي المدرسة تعمل ايه واداله فصل خمستاشر يوم من المدرسة
طب دي تربية دي؟ اهانة الناس وبهدلتهم وارعابهم ده اي تربية وللا تعليم؟ زار المدرسة وشافها، بيهزأ الناس ويهينهم ليه؟
-------
ازاي يتجرأ يهزأ ناظر قدام الطلبة والمدرسين بتوعه؟ وازاي يتجنن في مخه ويرعب طفل ويهينه ويهزأه بالطريقة دي؟ ده ظابط شرطة ضل طريقه
ايه المجنون ده؟ هتلر؟ وفين التربية في انه يهين الناس ويخوفهم بالطريقة دي؟ وفين التعليم اللي هو مستنيه من مدرسين بياخدوا ميتين جنيه؟
انا الطفل اللي هو هزأه ده قعدت اعيط عليه وجالي صداع نصفي.. الواد حيقعد يحلم بيه ويعملها على روحه بالليل
ايه الانحطاط ده؟ هو مين اللي حاطط السيستم الفاسد؟ الناظر؟ المدرسين؟ العيل الصغير اللي هو مسح بيه البلاط ورعبه؟ ما راحش ليه سأل على المنطقة التعليمية اللي تابعة لها المدرسة؟ ما سألش ليه على المفتشين اللي بيفتشوا على المدرسة؟ ما سألش عن نفسه هو ليه؟ بيدي المدرسين كام؟ بيصرف على المدارس قد ايه؟ ايه النظم والقوانين المحطوطة عشان تضبط المدارس؟ بدل ما يفتري على الغلابة؟
لا والناس فرحانة بيه كمان.. ايه اللي يفرح؟ مش باقول لكوا مجتمع فاشيست

40 comments:

حسن على said...

طيب نعرف هو مين وحصل اية؟؟؟؟؟؟؟؟؟؟؟

Ahmed said...

خير ان شاء الله, ايه اللي حصل
طب شفتي دي و لا معدتش عليكي

http://www.youm7.com/News.asp?NewsID=206999&SecID=65&IssueID=105

هم كلهم دائما قالبين على أبو جهل و أبو لهب ليه.
و في الأخر يطلع واحد منهم في التليفزيون يقول لك دي حوادث فردية, منين حوادث و منين فردية, ربنا ياخدهم.

نعيب زماننا

Ahmed said...

و بعدين انتي بتعيطي ليه,,, مش قلنا لو
عايزين تبقوا قضاة متعيطوش

نعيب زماننا

Ahmed said...

و بعدين انتي بتعيطي ليه,,, مش قلنا لو
عايزين تبقوا قضاة متعيطوش

نعيب زماننا

dr.lecter said...

اطبخي باجاريه كلف ياسيدي ده المفيد

جبهة التهييس الشعبية said...

ههههههههههه لا مؤاخذة

انا عملت تحديث اشرح فيه الموضوع

جبهة التهييس الشعبية said...

ايه ده يا احمد ده الخبر ده؟ هو انا ناقصة

يخرب بيت الظالم ع المظلوم يا لهويييييييييي

Ahmed said...

معلش عشان الفهم يكون واضح أنتي تقصدي ابن وزير الداخلية السابق ذّكي بدر و وزير التعليم الحالي,,, لأن أنا عمال بفكر في ابن العادلي, و أقول هو عمل حملة علالمدرسة ليه, يكون فيها مخدرات و لا دعارة!!!!!
و بالنسبة للأخبار هو ده اللي موجود, مفيش غيره, و لا هشام مبارك و لا حتى هشام السادات حيلاحقوا على اللي بيحصل,,, ربنا يكون في عونهم.

نعيب زماننا

مواطن مصري said...

يعني يشوف الساد و يسكت يشوف المدرسين مش موجودين و يسكت

طب لو مكانة هيسيب التسيب دة

dr.lecter said...

بكره ابن وزير الصحه ييجي يتهجم علي المستشفيات ويهين رؤساء الاقسام علشان هو الغالي ابن الغالي

مواطن مصري said...

طيبب يا نوارة هتعملي اية مكانة؟

جبهة التهييس الشعبية said...

لو انا مكانه احاسب نفسي واهزأ نفسي واخصم لنفسي عشان انا الوزير وانا المسئول عن النظام ده

هو بيستعبط؟ هو مش عارف ان ده حال كل مدارس الحكومة بروح امه؟

لورنس العرب said...

هو يعني المدرسين هايجيبوا مقشات ويكنسوا المدرسه بإديهم
انا جنبي مدرسه ايتدائيه باستمرار المجاري بتطفح فيها
والكلام ده من 20 سنه من ايام ما كنت انا في ابتدائي
هو يمكن يكون عاوز يعمل له منظر بس مش أكتر
واديه هاينقل المدرسين ويجازي المدير
عدي على المدرسه دي كمان 6 شهور ويبقي قابليني لو لقيتي فيها حاجه محترمه حصلت
وأهي كلها مناظر
التنظيف عاوز فلوس
والفلوس مش موجوده
الناس تصرف على المدرسه من جيوبها
أهو ده اللي ناقص

Tamer said...

هو اشتغل بمبدأ اضرب المربوط يخاف السايب , و هو مبدأ امني اصيل فعلا

اللي عمله انه ضحى - و نمشيها ضحى - بمدرسة باللي فيها و عملها عبرة للباقيين عشان يتعدلوا

مش هانقول انه فعل صحيح , لكن في المقابل المدرسة مش على حق , و العقاب الرسمي يستحقوه هو و غيرهم
احنا لينا معارف في التربية و التعليم و بيروحوا و بيشتغلوا عادي جدا , و كل واحد مفروض طالما اشتغل الشغلانة دي و هو عارف اولها و اخرها يا يشتغلها بضمير لا يشوف غيرها , يعني نقطة نقص المرتب محتاجة تتتظبط لكنها مش عذر للاهمال و التقصير

هو داس عليهم , لكن هما مقصرين و يستحقوا العقاب الرسمي , و مشكلتهم انهم اتاخدوا قبل غيرهم

اما نقطة ان معروف ان المدارس عك دي فمش عذر لمدرس ولا موظف مزوغ , هما اختاروا يبقوا امعات ان احسن الناس احسنوا و ان اساء الناس اساؤا , هما اختاروا انهم يمشوا بالعقاب مش بالضمير , و باقول تاني , اللي شايف الشغلانة مش جايبة همها يسيبها و انا اعرف كذا واحد عملوا كده

اما نقطة يروح يهزأ نفسه دي , فهايهزأ نفسه على ايه ؟ هو استلم الوضع كده و بيحاول يعدله
اسلوبه منيل بستين نيلة , صح و مش هانختلف , لكن لازم يبقى فيه ثواب و عقاب عشان الدنيا تتعدل

في النهاية
ده مش دفاعا عن الراجل ده
انا اصلا مش طايقه من ايام ما كان رئيس الجامعة , بس معنى ان يبقى مافيش ثواب و عقاب , ان الدنيا تبقى موروستان , و هو الوضع الحالي اللي هو بيغيره , رغم الاعتراض على الاسلوب ( اللي بالمناسبة متبع حتى بين المدرسين و بعض مش بس المديرين و المدرسين )ـ

ماجد العياطي said...

من شابه اباه فما ظلم

زي مانتي قولتي

ظابط شرطة ضل طريقه

العيب مش فيه

العيب في اللي عينوه في المنصب ده

المنصب ده مش بتاعه

حسبي الله ونعم الوكيل

طنطـــاوى said...

ناكشة شعرك علينا وماسكة لنا الخرزانة وعاملة فيها عندك الضغط والشرايين عشان احنا ضيوف عندك فى المدونة ؟؟؟!!!!!

انماابة يا عم الحلاوة والمربى دى ؟؟وخياة الربونة انت كنت منورة قناة الحياة والحياة كلها

دة انت بتتكلمى وتبتسمى زى البنى ادمين بالظبط :))

مع انك الوحيدة اللى بخاف منها اكتر من خوفى من الست حماتى لكن كنت سعيد جدا وانت منورة شاشة تلفزيون بيتا وبيت دوار العمدة

مش تبقى تكتبى لنا وتقولى لنا على مواعيد البرامج دى بدل ما نشوفها صدفة ؟؟

واحد عادى said...

فيه ايه يا نواره – مالك كل حاجه مش عاجباكى – فلقتينا يا شيخه – انا مواطن عادى لا اتعاطى السياسيه حرصا على صحتى وكرامتى ولكنى متابع لوزير التعليم ومجهوده من اول ما مسك الوزاره – لاول مره من عقود طويله ييجى فى مصر وزير فاهم حدود سلطاته وصلاحياته ويمارسها - اول حاجه عملها انه بيعيد هيكله وتنظيم الهيئه العامه للابنيه التعليميه المسئوله عن اصلاح وتطوير المدارس بعد ما انتشر فيها الفساد واهدار الملايين بدون عائد – وبعدين اتجه لتطوير مركز تطوير المناهج والمسئول عن تبويظ المناهج على حد وصف الوزير ودلوقتى بيتجه ان كل عنصر من عناصر العمليه التعلميه يكون ملتزم – يعنى الواحد لما يكون ملتزم دا دخله ايه بانه يكون غلبان – ان الناظر يكون قدوه للمدرسين وللاداريين وييجى فى ميعاده دا دخله ايه بانه غلبان – ان المدرسين يدخلوا الفصول ويشرحوا للعيال دا دخله ايه بانهم غلابه – ان العيال تيجى معاها كتبها اللى استلموها من المدرسه دا دخله ايه بانهم غلابه – بالمنطق ده خلى البلد كلها تروح فى ستين داهيه لان الشعب المصرى كله غلبان – كان الوزير لازم يعمل كده خصوصا اما الكاميرا لانه عارف ان ده ح يكون عبره لكل مدراس الجمهوريه ولانه ببساطه ما يقدرش يلف على كل مدراس الجمهوريه واحده واحده – انزلى النهارده وشوفى المدارس وازاى ان كل مدرس او ادارى متسيب او هاربان او مزوغ جرى زى الفرخه المذعوره وشاف شغله – لانه ولاول مره فى مصر يكون فيه وزير جاد وانه فعلا بيعمل زيارات مفاجئه وكل مدرس او ادارى حاسس ان الوزير مكمن يكون فوق دماغه فى اى لحظه – تقويم العنصر البشرى من اهم معطيات تطوير اى نظام – اذا كان البشر غير ملتزمين مش ح ينفع معاهم اى تطوير ولا اى فلوس فى الدنيا ممكن تخليهم افضل لانهم ح يكونوا زى القربه المقطوعه – كل ما تمليها مش ح تلاقى فيها حاجه – ياريت تنظرى للوزير بنظره اكثر موضوعيه وشموليه وبلاش تتعاملى معاه بانه ابن زكى بدر – هذا الرجل استاذ فى كليه الهندسه ورئيس جامعه يعنى من صفوه العقول فى مصر - وشكرا

طنطـــاوى said...

طيب ما هوة بروح امة زى ما بتقولى بيحاول يصلح ويعدل

مدرسين صييع وتلامذة زبالة ؟؟
ناس مهانيين اصلا
مدير مدرسة مجاش غير لما الفراش اتصل بية ومدرسين متخلفين والتلميذ ننوس عينة اللى صعبان عليكى ومقطع قلبك مجابش الادوات المدرسية بس لو قلبتية حتلاقى معاة سيجارتين بانجو وصباع حشيش بالجاز ومطوة سوستة بتاعة الاشبال وحتلاقى قرن الغزال مع المدرسين

ارحمينا بقى وسيبى الناس تشتغل وتنضف .... ربنا يوعدنا بالف وزير زية كان الحال انصلح مش بالتوقيعات والتوكيلات والبردعاوية السيس ؟؟
اسألى زمايلك المدرسين هوة عمل اية فى الكبير قبل الصغير .... اسالى عمل اية فى اللجان ومافيا الكتب الخارجية وغيرهم ؟؟؟؟

لكن واضح ان جينات عائلة نجم بتكرة اى داخلية حتى لو كان ابن الوزير مش الوزير نفسة

إنترنتاوي said...

سيبك من الموضوع ده
قوليلي أنتي كنتي حاطه رجل على رجل في وش الست اللي جنبك في برنامج الحياة اليوم أمبارح ليه؟؟
مع إنك كنتي أصغرهم سنا لكن طول الوقت حاطه رجل على رجل

شريف طلال said...

ازيك يا نواره فكرانى
بقالى سنه مدونتش لظروف خاصه

عامتاً الموقف ده فكرنى بعادل إمام فى فيلم التجربه الدنماركيه لما قال
انا وزير الشباب و الرياضه يا ولاد الكلب و قلع الجزمه و نزل ضرب فى مركز الشباب

واللهى الوزرا بتوعنا بقوا مسخره الزمن ده و بكره هيبقوا مزبله التاريخ

Ahmed Mosallam said...

L2a mesh da 7al kol el madares. We ely 3amalo da walahi 2olayel ana law makano adrabhom bel rosas. Moshkelet el sha3b el masry eno ba2a kolo fased sawa2 sha3b, 7okoma aw 7ata elly fakreen nafsohom no7'ba. etfo 3aleko koloko

مـــروة كمــال said...

بصراحة ، أنا شايفة إنه معاه حق

منذ يومين قابلت صديقة من أيام ثانوي ن وعرفت أنها تعمل الآن مُدرِّسةإعدادي ، فبدأت أذكرها بعظم دورها وأنها في وضع يجب أن تستغله في زرع القيم والمباديء في جيل بأكمله
فأجابتني بسخرية : أزرع قيم ومبادي في فصل لا يعرف القراءة والكتابة منهم سوى ستة تلاميذ ؟!!!
وبدات تسرد لي مهازل تحدث في مدرستها .. فهي لم تذهب إلى المدرسة منذ يومين ، وغيابها متظبط
وهذا المدرس يترك لجنة الامتحان ويقف خارج الفصل ليسمح للتلاميذ بالغش
وهذه الأستاذة تحضر على موعد حصتها وتغادر المدرسة بعدها
وغيرها كثير
فعلا ، كدت أبكي على حال التعليم
وبيني وبين نفسي .. شعرت أن هذه الطبقة من المدرسين الجدد يحتاجون لأسلوب القهر كي ينصلح حالهم
ولا حول ولا قوة إلا بالله

الخوجة said...


هى الجولات والزيارات المفاجئة لمعالى الوزير لاتشمل مدارس الأقاليم - صباح الخير




تعليم بركة السبع - Education in Berkt Assab - المخراز

الخوجة said...


هى الجولات والزيارات المفاجئة لمعالى الوزير لاتشمل مدارس الأقاليم - صباح الخير




تعليم بركة السبع - Education in Berkt Assab - المخراز

الخوجة said...


زيارة د. احمد زكى بدر لمدارس ادارة حدائق حلوان التعليمية

السلام عليكم said...

'طيب ماشى اللى عمله

اللى لاقاه متسيب نقله ليه علشان يروح يتسيب بعيد

العيال اللى فى الفيوم ذنبهم ايه يجلهم ناظر متكدر ومدرسين معاقبين

هى المشرحه ناقصه قتلى

ola said...

إمبارح كنت نمت خلاص لما ماما ندهتلي : إلحقي نوارة في التليفزيون ، علشان تعرفي إنت مشهورة في بيتنا و كدة :) ، استغربتك في التليفزيون ، دا إنتي طلعتي بنوتة على الآخر وصوتك بنانيتي قوي :)) ، المهم أنا اتضايقت من جعارة اللي كل شوية تقاطعك و تقول كلام كله لف ودوران حول الحقيقة اللي الحقيقة بأحسدك على طول بالك و إصرارك ، المرأة بنت مجتمعها مش منفصلة عنه ، الهباب اللي عايشين فيه مأثر على الكل ، مش شايفة جدوى لمناقشة وضع المرأة كحالة منفصلة

لما قطعوا على الحوار وجابوا الفيديو ابن وزير الداخلية على قولك ، أنا سبت البرنامج و رجعت للنوم ، ماما الصبح قالت لي إن واحدة من الضيوف علقت بس مظهرش مين و قالت يجازيهم ماشي بس ما يهزأهمش كدة
الحقيقة أنا قلت لماما إن دي أكيد إنت
و مع كل الناس الفرحانة دي بفضيحة ناس على الهواء مباشرة حتى لو الناس دي مخطئة
أشكرك على تمسكك بعقلك و بصيرتك وسط هذه الفاشيستية
بس والنبي حد يقول للبنى و شريف فاشيست ؟؟ هههه

هراء لا داعى له ..... said...

تقريبا كدا الحادثة إللى قولتيها حصلت عندنا فى كفرالشيخ

فى المدرسة القريبة من بيتنا

لإن كل إللى قولتيه دا سمعنا بحدوثه وقتها

إلا إذا كان عمل نفس العمايل فى مدرسة تانية فى محافظة تانية


بس عامة ....إن جه العيب من أهل العيب يبقى مش عيب

maher said...

هو مش ده اللي لغى زيادة المرتب للناس اللي محضرة ماجيستير ودكتوراه وقال لانهم بيدرسوا نفس المنهج اللي بيدرسوا المدرس العادي

شمس العصارى said...

احلى كلام
و الكلام عن التعليم يطول و محتاج ايام
يا نوارة الحلجة الوحيدة الى خلت احمد زكى بدر وزير تعليم هو انه شكم و لم دكاترة عين شمس - بحسب رؤية البهوات - فعلشان كده جابوه وزير تعليم علشان مش كل شوية الناس و المدرسين يبنبكوا و متنسيش انتخابات الرئاسة قربت
ثم الى عمله ده شو اعلامى علشان الاعلام الحكومى يقول اهه الوزرا ماشاء الله عليهم شغالين و الناس هى الى وحشة
بس هو خدته الجلالة و حب يشعر انه وزير و افتكر انه ابن وزير الداخلية الاسبق لكنه نسى انه وزير تعليم
من الاخر قبضة امنية فى التعليم و الراجل اثبت كفائته سابقا فى جامعة عين شمس فى النقطة دى
ــــــــــــــــــــــــــــــــــــ
على الهامش
كل الناس ما شاء الله بتتكلم حلو قوى بس للاسف هما مش فى واقع تعليمى علشان يقولوا الكلام ده
ببساطة التعليم عملية ليها دمخلات و ليها مخرجات
المخرجات = انسان قوى عاقل فاهم يستطيع ان يتعلم ذاتيا و يستطيع تطبيق ما تعلمه
المدخلات = مدارس - ابنية و مكاتب و ديسكات و اجهزة - + مناهج + مدرس - فاهم و يعمل بجد- + طالب - مؤدب و تحتيها الف خط و ملتزم و يريد التعلم + نظام - سواء ادارى او تعليمى
دى المعادلة
كل المدخلات فى التعليم المصرى زفت و مش موجودة و ان وجدت مش كاملة
واساسا النظام الحاكم مش عاوز تعليم فعلى علشان ميجيش افراد يطالبوا بحقوقهم و حقوق اهاليهم
و عليه
احه ثم احه ثم احه ثم احه
لكل من يتحدث عن التعليم المصرى
و لكل من يطالب المدرسين بانهم يشتغلوا
ولكل واحد عاوز طلبة فاهمين و كويسين
و لكل من يريد ان يبقى منصب وزير التعليم سياسيى بحت
ولكل المتفلسفين و الحكماء من المعلقين و من المجتمع و الى بيقدموا روشته مضروبة لكل نقطة على حده
احه دى اعتراض باللغة العربية الفصحى و انا بكده مخرجتش عن الذوق العام
- ابكى يا نوارة دلوقتى كتير علشان كل الناس دى حتبكى دموع و دم بعد 10او 20سنة بالكتير فى وقت مش حينفع فيه البكاء و الندم
نلتقى بعد التعليم المصرى
و بعدين ايه فاشيست دى هو انا مش واحد من المجتمع ده و ده نسميه ايه هههههههههههههههههههههههههههههههههههههههههههه

شمس العصارى said...

بعيدا عن الموضوع
الى حاملى هموم المرأة المصرية
هما مش دول سيدات و نساء برضه ولا ايه
http://www.youm7.com/News.asp?NewsID=207780&SecID=65&IssueID=105

Ahmed said...

خير يا جدعان ايه التعليقات الغريبة اللي بتتقال دي, طيرتوا الحجرين اللي في دماغي, مش فاضل غير تقولوا أيوه ظباط الشرطة حقهم يضربوا الناس في الأقسام, و المدرس اللي مش حيشتغل كويس حنبعتوا رحلة للاظوغلي.
الأخ اللي بيقول المدارس النهارده منتظمة عشان الرجل نزل على المدرسة و بهدل الناس, سيادتك اللي حصل ده بنج لأ مش بنج ده مسكن موضعي, هو الراجل حينط على المدارس كل يوم عشان يشوفهم ملتزمين و لا لأ, أكيد كلنا عارفيين أنها فورة كدة و حتهدأ و الناس حترجع زي ما كانت لما تلاقي الموضوع هدأ و مفيش متابعة. و بعدين من الذي قال أن الاعتراض هنا على متابعة الوزير و تفتيشه بنفسه, الاعتراض على الأسلوب. يعني ايه يتخذ بنفسه كدة قرار بنقل الناس من بلادها للفيوم كدة من غير مجالس تأديب أو شئون قانونية. هو فيه ايه, ايه سياسة العبيد دي, مين قالك أن العبد بيشتغل بضمير, الناظر و المدرس العبد حيرسملك الصورة أنه شغال و بيبذل المجهود لأنه خايف من الكرباج لكن لحظة واحدة يحس السيف مش على رقابته حيبرطع, و حتى و الكرباج مرفوع و حينزل على ظهره, حيعمل نفسه بيشتغل و يقف أمام العيال في الفصل و الوزير حينبسط منه لكن أدائه الفعلى صفر, هو ده اللي عايزينه منظر و خلاص. و بعدين من قال أن سياسة اضرب المربوط يخاف السايب صح أصلا, مش يمكن واحد منهم لحظه السيء كان عنده ظروف جعلته يقصر اليوم ده, مش المفروض تكون في لجان تحقق في خطأ كل واحد و ظروفه و هل هو من معتادي الاهمال أم لا قبل الحكم عليه بالنفي. طب انت ترضاها لنفسك و لو الولد ده ابنك ترضى يحصل فيه كدة.أمال بتطالبوا بديمقراطية و دولة تديرها المؤسسات ازاي و أنتم مؤيدون لبلطجة الرجل بالشكل ده. و مين قال أنه قوي و حازم أنه شتم الناس و بهدلهم أمام طلابهم, طب المدرس لا يستطيع الرد لأن روحه في يد الوزير, (رحمك الله يا ابن الخطاب أيها الفاروق, عندما قلت لرجل لا تجاورني فأني لا أحبك قال له الرجل أينقص هذا من حقي شيئا فقال له لا, فقال الرجل إنما يبكي على الحب النساء). أنا أعرف ناس بنظرة عين من غير متتكلم المقصر يعرف نفسه و يصلح خطأه, و في نفس الوقت الناس دي محبوبة جدا رغم أنها حازمة و لا تقبل الخطأ. هذه القوة الحقيقية و التحفيز الحقيقي للمرئوسيين أما سياسة الكرياج دي حتخلينا دائما ورا, و اللي مؤيدها حيفضل ورا. الوزير شخصيته ضعيفة و مكروه عشان كدة بيستخدم الكرباج و لا يستحق الوزارة مطلقا

منكم لله, خليتوا الدم يغلي في عروق الواحد

نعيب زماننا, و احنا و لاد ستين ومنستهلش نعيش, ربنا يخليلكم عوكل عشان تستحقوه

karakib said...

اولا نقلهم للفيوم معناه انه الفيوم دي منفي و انه المدرسين اللي هناك درجة تانيه او بيتعاقبوا لمجرد كونهم من محافظة خارج العاصمة
ثانيا هو بيتكلم عن سوء مستوي المدرسة .. ما اتكلمش ليه علي سوء مرتبات المدرسين !!!؟ محدش قال لنا هما بياخدوا كام يعني ؟؟ و كان بالاولي يعمل اللي عليه و يعمل لهم مرتب معقول يوفر لهم حياة كريمة و بعد كده يحاسبهم
ثالثا هو مش من حقه يهزق الناس بالطريقة دي و لا يكلمهم كده ... من حقه يحولهم للتحقيق و ما تسفر عنه التحقيقات يتم اتخاذ اجراء علي اساسه
رابعا انا قرفان اوي من الفيديو اللي هو طالع فيه ده حاسس بكم من المهانه غير طبيعي

شمس العصارى said...

خارج الموضوع برضه
خبر يستحق المناقشة و التعليق
ويستحق بوست كمان
http://www.shorouknews.com/Columns/Column.aspx?id=200550
كعادة استاذنا التعمق و التحليل

مش فاهمه said...

مش معاكى يا نوارة او تقدرى تقولى معاكى نص نص انا ضد سخريته من ناظر المدرسه و المدرسين دون عمل تحقيق و يجيب رجل الوزرا السابقين كلهم لازم يتعاقبوا بصراحه لكن فى ذات نفس الوقت المدرسين و انا ام و عندى ولاد فى المدرسه ماعندهومش ضمير للأسف حاتقولى لى مش بيقبضوا كويس طيب انا ذنبى ايه بنطلع مشاكلنا و احباطاتنا على بعض ليه ليه كل واحد مايؤديش واجبه المفروض عليه بذمه و ضمير و اللى مش عاجبه مرتبه و حاله يشتكى يعتصم يتفلق لكن رضيت انك تكون معلم لازم تقوم بواجبك
انا شايفه انه كان شو اكتر منه تفتيش و غيره و الدليل انه ساحب كاميرات و شئ و شويات لكن فى نفس الوقت المدرسين و القائمين على الأداره عايزين الحرق ولا مؤاخذه ده انا بادعى دعا على المدرسين و المدارس ربنا يجعله من نصيبهم
على فكرة العمليه عامله زى البيضه الأول ولا الفرخه الفساد اللى فوق خلانا فاسدين كلنا ولا علشان احنا فاسدين فاستحققنا الفساد اللى بيحكمنا لما نجاوب على السؤال ده حا نعرف مين الغلطان الوزير اللى هزأ طاقم المدرسه ولا طاقم المدرسه اللى استحق التهزئ

wahat_alshohada said...

فعلا وزير زبال تربيتة زبالة ابن وز- هو اصلا وجودة كوزير غلط هو المفروض يشتغل عشماوى ولانه غبى فبدأ من القاع كالعادة المفروض يبدأ من نفسة وبعدين ينظم و يرتب و يفهم و بعدين يبدأ بقى شغل بس "بأدب" واول شئ فى القصة لازم ينصف المدرسين و يديهم اعلى رواتب - انا دائما اقول فيه وظائف لازم تاخد اعلى مرتبات مش اقل من 5 الاف جنية فى الشهر - المدرس و الطبيب و الظابط - حتى لا يسيئوا استخدام وظائفهم لانهم مش لاقيين ياكلوا لازم اصحاب هذه الوظائف يكونوا فى احسن حال و يحسوا بالاحترام
اذا مرتب ممتاز للمدرس ثم اصلاح وتنظيم عملية التعليم و تضبيط المناهج اللى اصبحت صعبة جدااا ولا ادرى السبب؟
وتنظيم اليوم الدراسى و النظام كله من اوله لاخره

لو المدرس بياخد مرتب محترم يكفية و زيادة كمان والمناهج تكون معقولة - دة انا كنت بتابع مع العيال الدروس و بحل معاهم غلط من صعوبتها- هيرتاح المدرس نفسيا فهيشرح كويس
والعيال هتفهم لما المناهج تتسهل شوية
وهتنتهى ظاهرة الدروس الخصوصية
انا عمرى ما اخدت درس خصوصى و لا حتى فى الثانوية العامة
علشان المناهج كانت معقولة و المدرسين ممتازين و عندهم ضمير
الله يجزاهم كل خير

أبو أمك said...

حتى لو عمل كده وأكتر
برضه مايصحش تشتميه شتيمة قبيحة زي دي وتقولي ابن زكي بدر

حسن على said...

التطاول والبذائة والفتونة هى اشهر صفات الوالد المرحوم. و"الولد سر ابية" كمايقول المثل العربى. كما أن شهاب الدين" اظرط من ابية"كمايقول مثل عربى حديث!!! ثم ان "الناس على دين ملوكهم" كمايقول مثل ثالث.

شمس العصارى said...

الاخت ايمان wahat_alshohada
اتفق معكى
وهذا لم ولن يفهمه هذا المجتمع
وعلى راى الشاعر الى مش عارف اسمه يتحدث عن المعلم ويقول
ضاقت عليه حياته و تكدرت .... بالله كيف ينير بعد عقولا
ان المعلم ان اهنت حياته ..... اعطاك عقلا مظلما مشكولا
هو ده فعلا حال المعلمين و المتعلمين فى مصر
اهانة المعلم معيشيا = جيل فاسد
لازم المجتمع ده يفهم يعنى ايه التعليم هو الى بيبنى الدولة
الا هو مين الى بيطلع الدكاترة و المهندسين و الظباط و التجاريين و العلماء
مش هو المعلم برضه و المدرسة
ولازم المجتمع يجبر النظام ان يصرف على التعليم و مش اقل من 15 % او 20% من الناتج القومى
يعنى اختصارا بدل ما يسرقوا الفلوس يعملوا تعليم وصحة كويسين
وساعتها محدش حتى حيفكر فى السياسة
لكن هيهات هيهات هيهات ان يفهم المجتمع ثم الف هيهات ان يعمل النظام
و عليه سيستمر الكلام بنفس الحال و الطريقة الحالية
نلتقى بعد الناتج القومى المسروق
او نلتقى بعد التعليم المصرى المضروب

الخوجة said...

شوفوا التظاهرات الطلبة والمدير وفيديو الواقعة
تطور زيارة د. احمد زكى بدر لمدارس ادارة حدائق حلوان التعليمية الى قضية رأى عام