وزير الداخلية والتعليق

تحديث:
لا مؤاغظة... دخلت عليكوا حامية ونسيت احكي لكوا الحكاية:
الحكاية ان ابن وزير الداخلية الاسبق (انا اقصد ابن زكي بدر، لاني بصراحة مستخسرة فيه لقب وزير التربية والتعليم) هجم على مدرسة حكومة، وزارها زيارة مفاجئة.. لحد كده تمام، لقى المدرسة زي ما كلنا عارفين، مافيش اي مفاجآت في الموضوع ده على فكرة، كل الناس عارفة ان المدارس الحكومة مزبلة التاريخ.. ماشي، كويس كده، لحد كده فيلم امبراطورية ميم شغال
اذ بينا نفوجأ بقى بان سعادة الوزير، وزير التربية والتعليم، ماسك المدرسين وهاتك يا تهزيء فيهم، وبيتكلم في الموبايل وبيطلع قرار بنقل كل المدرسين - كده بلا اي تحقيق ولا تحويل شئون قانونية ولا دياولو - للفيوم، وبيهين مدرس قدام الطلبة، وجه الناظر، قام قدام الطلبة والمدرسين مسح بيه البلاط وهزأه باسلوب ظباط الشرطة، وبعدين دخل فصل ومسك عيل يا عيني في رابعة ابتدائي لقاه مش معاه شنطة مدرسة، مسح بيه البلاط وقال له انت جاي المدرسة تعمل ايه واداله فصل خمستاشر يوم من المدرسة
طب دي تربية دي؟ اهانة الناس وبهدلتهم وارعابهم ده اي تربية وللا تعليم؟ زار المدرسة وشافها، بيهزأ الناس ويهينهم ليه؟
-------
ازاي يتجرأ يهزأ ناظر قدام الطلبة والمدرسين بتوعه؟ وازاي يتجنن في مخه ويرعب طفل ويهينه ويهزأه بالطريقة دي؟ ده ظابط شرطة ضل طريقه

ايه المجنون ده؟ هتلر؟ وفين التربية في انه يهين الناس ويخوفهم بالطريقة دي؟ وفين التعليم اللي هو مستنيه من مدرسين بياخدوا ميتين جنيه؟

انا الطفل اللي هو هزأه ده قعدت اعيط عليه وجالي صداع نصفي.. الواد حيقعد يحلم بيه ويعملها على روحه بالليل

ايه الانحطاط ده؟ هو مين اللي حاطط السيستم الفاسد؟ الناظر؟ المدرسين؟ العيل الصغير اللي هو مسح بيه البلاط ورعبه؟ ما راحش ليه سأل على المنطقة التعليمية اللي تابعة لها المدرسة؟ ما سألش ليه على المفتشين اللي بيفتشوا على المدرسة؟ ما سألش عن نفسه هو ليه؟ بيدي المدرسين كام؟ بيصرف على المدارس قد ايه؟ ايه النظم والقوانين المحطوطة عشان تضبط المدارس؟ بدل ما يفتري على الغلابة؟

لا والناس فرحانة بيه كمان.. ايه اللي يفرح؟ مش باقول لكوا مجتمع فاشيست