Saturday 30 June 2007

جلسة قضية هويدا بنت ابويا الشيخ طه

النهاردة ما كانش الحضور الاعلامي مكثف زي المرة اللي فاتت
حضر من الدفاع عن هويدا الدكتور سليم العوا
والاستاذ احمد حلمي
والاستاذ طاهر من مركز هشام مبارك
والحمد لله الصحفيين ما انضربوش
مع اني كنت
لابسة لبس الضرب
وفي بيت شرارة
http://www.youtube.com/watch?v=2MOm4j8ybOs
الحقيقة المرة دي المعاملة كانت ذوق ذوق ذوق
حتى سعادة الضابط اللي مسح بينا البلاط المرة اللي فاتت
حب برضه يحسسنا ان المعاملة فيها نظام
قال لمينا وريني الكارنيه
مينا قال له ماعيش كارنيه
قال له طيب
وبص لي انا: وريني الكارنيه
مش عارفة ليه وريتهوله مع ان كان ممكن اقول له ماعيش كارنيه
وكان ح يقول لي طيب برضه
المرة دي الظاهر عندهم اوامر انهم يبقوا غاية في التهذيب
والظاهر بقى ان كان عندهم اوامر المرة اللي فاتت بالعكس
المهم
هويدا بت ابويا الشيخ طه كان شكلها حران ومتوتر
شكلها عمالة تبص حواليها كأنها بتقول: انا باعمل هنا ايه؟
والله كان بودي اجاوب ع السؤال ده
بس الحقيقة انا كمان مش عارفة هي بتعمل في المحكمة ايه
وليه اساسا راحت المحكمة
وليه فيه قضية عليها من الاصل
يعني الجو في جلسة هويدا غير جلسة عماد خالص
في جلسات عماد فيه قضية
لكن انا مش عارفة فين القضية في قضية هويدا
بدأت الجلسة بتحليف القاضي للشهود
http://www.youtube.com/watch?v=4B-1b3fWKTg
اللي هم اعضاء اللجنة اللي ح تقوم بتفريغ الشرائط
وبعدين تكتب تقرير عنها
ووقعوا على المحاضر
وبعدين النيابة اعترضت على طلب الدفاع بانه ياخد نسخة
من الاحراز على نفقته
http://www.youtube.com/watch?v=2PrqIuGSzdQ
وقال: ما هي اتعرفت على الاحراز ولما عرضت عليها
اقرتها
مش عارفة طيب اذا الدفاع ح يدفع من جيبه تمن النسخة
النيابة متضايقة ليه؟
ما داهية يكونوا سجلوا عليها الفيديو كليب بتاع: ابقى نفسي أا..أا
سليم العوا اعترض على اعتراض النيابة
واحمد حلمي قال ان الاحراز دي احنا شاكين في تسريبها
لانه عرض منها مقتطفات في يوم مصادرتها في برنامج
البيت بيتك
وبعدين رفعت الجلسة
http://www.youtube.com/watch?v=BeglflXSpH4
وكل شوية ينادوا على هويدا والدكتور سليم
http://www.youtube.com/watch?v=4XKX-ZjSInk
وبعدين يطلعوا
ويقولوا لسة شوية
لسة شوية ايه يا هويدا
لسة شوية ما حضروش المحضر
وبعدين ينادوا عليها تاني
وتخرج
لسة شوية
لسة شوية ما حضروش المحضر
وفضلت كده بتأدي دور رئيسي في "هويدا رايح جاي"
لحد ما اخيرا اشتاتا اشتاتا المحضر حضر
بس لسة شوية
لسة شوية ايه
لسة ما جابوش الاحراز
!!!!!!!!!!!
مش باقول سجلوا عليها ابقى نفسي أا...أا
وبعدين الاحراز جم الاحراز جم
خمسين شريط
تسلمتها اللجنة في حضور هويدا والدكتور سليم العوا
وبعدين طلعت هويدا
وبعدين نادوا على هويدا
http://www.youtube.com/watch?v=PnRH1h__0Jo
الاستاذ طاهر من مركز هشام مبارك
شرح لنا بالظبط الدفاع طلب ايه
والنيابة معترضة على ايه
وبعدين مينا اكل دماغ احمد حلمي
وحلمي حاول يقهره بس فشل
فقعد يفش غله فيا انا ويفهمني اني بطحجية زيادة عن اللزوم
وانا بطحجية الشهادة لله
بس برضه دي ما كانتش وسيلة لقهر مينا
http://www.youtube.com/watch?v=_-dB9kXcK4Y
بالصلاة ع النبي مينا قوة اكل دماغ ثلاثية
بدون منازع سوى علاء سيف
(تايسون المدونين سابقا)
بس الظاهر آكلي دماغ البشر دول
هم اللي بيبقوا مصحصحين وجايبين التايهة
كل ده واحنا قاعدين مستنيين بقى
والناس عمالة تحسبن علينا
ليه؟
عشان معطلينهم واحنا اول الرول
اللجنة طلبت شهر ونص
طبعا كمان شهر ونص المحاكم في اجازة
فاجلوا الجلسة ليوم 16 سبتمبر
http://www.youtube.com/watch?v=eMZLj2ownjk

Friday 29 June 2007

حملة افترائية استباقية على عماد الكبير

اتصل بيا دلوقت حالا الاستاذ ناصر امين محامي عماد الكبير
وقال لي ان امبارح قام بعض البلطجية باختلاق عركة
وحصلت خناقة وكسروا ميكروباصات في بولاق
وعماد ما كانش طرف في الموضوع خالص
ولكن رئيس المباحث نزل واول ما نزل قال: هاتوا لي عماد
فعماد اتصل بالاستاذ ناصر فالاستاذ قال له ما يروحش ولو القسم
عايزه يبعت له بشكل رسمي
فالمأمور قال: خلاص خلاص
!!!!!!!!!
وبعدين الشهود والمضروبين قالوا ان عماد مالوش دخل بالموضوع
وانه ما كانش طرف في الخناقة
لكن ظهر بعض الناس اللي افتعلوا الخناقة وقالوا ان عماد كان طرف فيها
والغريبة بقى
ان القاهرة اليوم نزلت على طول القسم
وسجلت مع الناس دي اللي اتكلموا عن عماد وقالوا انه ضربهم
المفروض ان عماد بكرة ح ياخد الشهود اللي شهدوا ان عماد
ما لوش دخل في الخناقة ويروح النيابة
===
وده اسمه ايه ده بقى؟
قبل الجلسة الاخيرة بخمس ايام يتم التآمر بالشكل ده
عشان عماد ما ياخدش حقه
ويتعمل عليه كمان حملة اعلامية
احنا كنا فاكرين ان القاهرة اليوم محايدة
ما كناش نعرف انها قناة فضائية فرع وزارة الداخلية
==

http://www.youtube.com/watch?v=4iez20eP-ic

اخدت فكرة تفريغ الشريط من

:مراقب مصري
عماد: الله يكرمك يا باشا
يا باشا معلش
يا باشا معلش
اسلام: ياللا يا بن المتناكة
ياللا يا كس امك
يا باشا انا اسف عماد:
يا باشا انا اسف
آآآآآآآآآه
آآآآآآآآآآآآآآآه
رضا فتحي: ياللا ياد يا بن المتناكة
اسلام: حلوة يا خول حلوة يا خول
حلوة
ها
حلوة ياه
ايه رأيك فيها يا بن المتناكة
ايه رايك يا خول يا عرص
يا عرص
بكرة في الموقف زمايلك كلهم ح يشوفوا الكلام ده يا عرص
عماد: آآآآآآآآآآآه يا باشااااااا
رضا فتحي: قول بولاق مافيهاش راجل يا بن المتناكة
قول انا خول

التفريغ ده للناس اللي مشاعرها رقيقة ومش عايزة تشوف الفيديو
===
بقي سؤال: بفرض ان عماد اتخانق وللا ضرب وللا انضرب
وده ما حصلش
لكن بفرض ان فيه ناس استفزوك انت في الشارع
ودفعوك لخناقة
هل ده يبرر ان اسلام يدخل في مؤخرته عصايا
من سنتين؟
افهم من كده ان اسلاك ده مكشوف عنه الحجاب
وعارف ان بعد سنتين عماد ح يتخانق
فقال يسبق ويعذبه
وهل البني ادم لما يتخانق
وللا حتى يبقى بلطجي وابن ستين في سبعين
هل التعامل القانوني معاه انه يتعذب؟ ويهتك عرضه؟
اذا دي المعاملة القانونية يفهمونا
عشان نهاجر
==

الاستاذ ناصر اتصلت بيه قال لي ان عماد

راح النهاردة النيابة ومعاه الشهود والناس اللي انضربت

واللي شهدوا ان عماد ما كانش موجود في اثناء الخناقة اساسا

وكان قاعد ع القهوة

ملحوظة تانية اللي نزل مش مأمور القسم

ولكن رئيس المباحث

وهو اللي دور على عماد وراح له ع القهوة

يقول له اركب معايا البوكس

ربنا يستر انا مش عارفة الناس دي مش خايفة من ربنا وللا ايه؟

الجيش اللبنان يقتل اثنين ويصيب عدد من اللاجئين في نهر البارد

ما تبس بقى
جتكوا القرف في اشكالكو الوسخة
هاي هي المرجلة على رأي المجحوم؟
يعني قاعدين ع الحدود زي الشلت
لا تفجيرات بتكتشفوا
ولا امن بتحفظوا
ولا حرب حاربتو
ولا ليكوا اي لازمة في الحياة اساسا كلها
وكل ما تاخدوا دبوس...مشيها دبوس
تنزلوا ضرب في الحريم والعيال والعزل
واحد من اللاجئين الفلسطينيين طالع في الجزيرة
يقول: ماذا يريد الاخوة في لبنان؟ يريدون ان يلقوننا في البحر؟
اللاجئين الفلسطينيين اللي اتهجروا من بلدهم
واتسندوا على حيطة مايلة
راح الجيش اللبناني المغوار هجرهم من مخيامتهم اللي هم اصلا متهجرين ليها
يعني بقوا مهجرين اس اتنين
كل ده بحجة فشخ الاسلاك
واخدوا قال سلاح من امريكا
كان فين السلاح ده السنة اللي فاتت؟
اللي يشوفكوا دلوقت ما يشفكوش السنة اللي فاتت
وانتوا مستخبيين تحت ترابيزة السفرة وبتأتتوا حزب الله
من خلال الشنطة
وفين بقى فشخ الاسلاك دلوقت يا سباع الامة؟
يطلع كاتيوشا من الحدود اللي انتوا بتحرسوها
وانتوا قاعدين
تفجيرات في كل حتة في البلد
وانتوا قاعدين
ويوم ما ربنا ينفخ في صورتكوا وتتمهمزوا وتحركوها
تلجّأوا اللاجئين وبعدين تموتوهم
الناس عملوا مسيرة سلمية عشان يرجعوا لمخيماتهم
بدل ماهم بايتين في الشارع
واحد فلسطيني فانلته غرقانة دم كان بيقول: كنا ماشيين الجيش قال وقفوا
وقفنا
قال اسكتوا
سكتنا
قال ارجعوا
قلنا لا ما منرجع
قوصوا بالهوا وقال ارجعوا
قلنا لا... منوقف لكن ما منرجع
ما شفنا الا وهني بيقوصوا علينا
ما ميزوا لا مرة ولا طفل ولا ختيار ولا رجال
كل اللي كان بالصف الاول اتقوص عليه
===
جتكوا خيبة
جتكووووووووووا خييييييييييييببببببببببببة
قرفففففففففففففففففف
صدق المثل اللي قال: عريان الـ...ويتأمز تأميز ويقول باب الخمارة فين
قبح الله وجوهكم ووجوه اللي معينكم ووجوه اللي بيساعدكم ووجوه
اللي يعتمد عليكوا ووجوه اللي بيبعت لكوا سلاح
ووجوه اللي يتمزع ويقول: الجيش اللبناني
الا صحيح لو حزب الله ده دولة جوا دولة زي ما بيقولوا
يبقى كتر خيره انه مبيض وش دولة
ما تفرقش كتير عن بقية الدول العربية

العميل بابل ما تجوزش عليه الا الرحمة

ليه بقى؟
هلبت ما فجأة وبدون مقدمات إسرائيل قررت
تكشف المعلومات عن العميل بابل
وقالوا انه حذر اسرائيل من ضربة مصرية عشية ستة اكتوبر
بس اسرائيل ما اخدتش التحذيرات على محمل الجد
وان العميل بابل كان قريب جدااااااااااااااا من عبد الناصر
وقريب ايضا من السادات
وبيشتغل في البزنس دلوقت
عروستي؟
الناموسية
وبعدها على طول
المرحوم اشرف مروان وقع من البلكونة
عاتشي يعني
ما كل اللي بيروح لندن بيقع من البلكونة
هو ده النظام هناك
هي بلكونات لندن كده غدارة ومالهاش امان
بس فيه حاجة
من كام يوم ابن اشرف مروان اتقبض عليه
لانه كرا بلطجي على واحد ماسك عليه شيكات
مين بقى هذوها الصخص
تلكمو الصخص واحد بيشتغل مع ساويرس
وكمان اشرف باشا مروان كان بيكتب مذكراته
يعني الدنيا اتدربكت على دماغ البرنس فجأة
ابنه يتقبض عليه
واسرائيل تفضحه
وهو بقى عيان والعضمة كبرت
ومن امتى ولاد رجال الاعمال بيتقبض عليهم؟
ما بيضربوا بعض وبيبلطجوا على بعض
وبيدوسوا الناس بالعربيات
وبيطلعوا منها زي الشعرة من العجين
اشمعنى يعني دلوقت ودلوقت بالذات
ابن اشرف مروان يتقبض عليه
كأنها اول حادثة من النوع ده
فيه حاجة تانية غريبة
البوليس البريطاني اتعرف على اشرف مروان
قبل ما حد من اهله يتعرف عليه
على طول قالوا ده اشرف مروان رمى نفسه من الشباك
يا سبحان الله
الدنيا دي غريبة يا جدع
اشرف مروان ده اتجوز منى عبد الناصر وهو ما حيلتوش اللضا
وبقى صخص مهم وجوز بنت الراجل الكبير
وبعدين بقى صخص مهم وبطل الاخضر واتكرم بعد حرب تلاتة وسبعين
وبعدين بقى صخص مهم وحوت كبير قوي في البزنس
وفي آخر عمره اللي استغلوه ورفعوه سابع سما
اذا كانت بقى اسرائيل
وللا المتواطئين مع اسرائيل
يفضحوه
ويرموه من الشباك
زي ورقة كلينكس نفوا فيها ورموها
ياريت كل واحد بيدب ع الارض وفاكر نفسه ملك الدنيا يعتبر
هيييييييييييييييييييييييييييييييه
دنيا فونيا
======
قالوا زمان دنيا دنية غرورة
وقلنا واللي تغره يخسر مصيره
قالوا الشيطان قادر وله الف صورة
قلنا ما يقدر ع الخيره لغيره

Thursday 28 June 2007

بيان وصلني من الهامي الميرغني

البيان ده وصلني من الاستاذ الهامي الميرغني
ورأيت وجوب نشره
:اليكم البيان
لتتوحد القوى الوطنية والديموقراطية من أجل إنهاء وتجاوز الحرب الأهلية

في هذه اللحظة المأسوية من تاريخ أمتنا فجع الرأى العام على اتساع العالم العربى بانفجار الحرب الأهلية فى غزة وباحتمال امتدادها بالتصعيد المتبادل الى الضفة الغربية بما يمثل نكبة جديدة للشعب الفلسطيني.

إن ممارسات حركة فتح داخل السلطة وفساد بعض القيادات أخرج فتح من قيادة حركة الكفاح الوطني الفلسطيني وساهم في دفع الجماهير للبحث عن بديل ، كما أن ممارسات حركة حماس الأخيرة كشفت جوهر حماس وحقيقية الديمقراطية التي تبشر بها.

إن النتائج المريرة والدموية لهذه المؤامرات التي يقودها الاحتلال الاسرائيلى والاستعمار الأمريكي مع قوى اليمين المتطرف والعصب العنصرية تتداعى بصورة بالغة القسوة والعنف بسبب فراغ القيادة في العالم العربي وانتقال السلطات البيروقراطية والاستبدادية في بلاد عربية كثيرة إلى الحلف الاستعماري أو خواء الادعاءات الوطنية لبعض هذه السلطات وانتهاجها لسياسات قمعية ضد شعوبها ومثقفيها وتبنيها لمنهجية الإرهاب السياسي ضد معارضيها ومجتمعاتها بصورة عامة وأحيانا محاولتها مد سلطتها القمعية إلى بلاد عربية مجاورة بالتحالف مع أصوليات دينية أو قومية أو عرقية ومذهبية، إن جوهر الهجوم الإمبريالي علي المنطقة يستهدف تفكيك البنيان الاجتماعي لصالح المزيد من الاستبداد والتبعية.

إن الأحداث المأسوية فى غزة وفلسطين المحتلة كلها تحتاج إلي سرعة العمل من أجل انهاض الكتلة الحية أو الكتلة الثالثة المتجذرة فى مجتمعاتنا المدنية ودعوتها لتصعيد النضال من أجل انجاز برنامج متماسك لدرء الحرب الأهلية وتجاوزها جذريا ووضع رؤية أكثر تماسكا للتحرر واعادة بناء المجتمع والسياسة فى فلسطين وشتى الأقطار العربية، ومن أجل بناء دولة ديمقراطية علمانية علي كامل التراب الوطني الفلسطيني.

إننا نناشد الرفاق في اليسار الفلسطيني بأهمية توحيد الصفوف من أجل الإنقاذ الوطني في فلسطين المحتلة من خلال :
1) إدانة كافة الممارسات التى قادت الى تفجير الحرب الأهلية فى غزة والوقف الفورى لجميع العمليات العسكرية من جميع الفرقاء.
2) الرفض التام للاحتكام للسلاح فى الأرض المحتلة ودعوة جميع الأطراف لاتخاذ كافة التدابير لمنع امتداد الحرب الأهلية للضفة الغربية.
3) الدعوة الفورية لبناء حكومة فلسطينية من شخصيات عامة محايدة تتمتع بثقل أخلاقى ومدنى بين الجماهير والنخب الفلسطينية.
4) دعوة الكتلة الثالثة المؤلفة من القيادات الوطنية والديموقراطية للفعل والحضور الفورى فى الفضاء العام الفلسطينى بما فى ذلك التظاهر وتسيير المسيرات وعقد المؤتمرات الشعبية وتثبيتها لتحقيق حضور شعبى دائم يفصل بين المحاربين ويجسد مبدأ سيادة الشعب.
5) اعادة توحيد اليسار الفلسطيني والقوى الوطنية والديموقراطية والقوى التى تناضل من أجل دولة ديموقراطية مستقلة فى فلسطين بعيدا عن منظومة وسياسات الاستقطاب الثنائى فى الأرض المحتلة.
6) رفض عزل شعب غزة أو الأرض المحتلة وتحطيم أسوار العزل المالى والاقتصادى والعنصرى للشعب الفلسطينى ودعوة جميع القوى المعادية للاستعمار والعنصرية لمد يد المساعدة الفورية للشعب الفلسطينى ضد سياسات العزل والالحاق والاستيطان والعنف العنصرى الاسرائيلى.
7) اعادة تأكيد عروبة القضية الفلسطينية والضرورة العاجلة للاسناد الشعبى العربى للقضية الفلسطينية فى هذه المرحلة الصعبة بكل الوسائل الممكنة بما فى ذلك حشد المسيرات الشعبية من أجل وقف الحرب الأهلية ومنطق الاحتكام للسلاح.

الاتحاد من أجل العدالة والحرية والمساواة (اتحاد اليسار المصري)

معناتو ايه الحديت الماصخ دهون

وانا نازلة من بيتنا النهاردة لقيت العربية دي راكنة قدام العمارة
حد بقى يقول لي ايه ده؟

انا اقول لكو

ده علم السعودية واخد الازاز الوراني كله بتاع العربية

وفي كنفه علم مصر صغير

مش بس كده

ده السيف اللي في علم السعودية بيغز في جنب علم مصر

معناتو ايه الكلام الماصخ ده؟

احنا في العمارة ما عندناش سعوديين

وما اعتقدش ان صاحب العربية سعودي

لانه لو سعودي مش ح يحط علم مصر

وبالمناسبة السعيدة دي احب اذكر حقيقة تاريخية

سيدنا محمد عليه الصلاة والسلام لما وحد جزيرة العرب

ما سمهاش المحمدية ولا المطلبية ولا الهاشمية

ولا ورث حد من اهله الحكم

بأمارة ايه ارض الحجاز بقى اسمها السعودية

كأنها محل بقالة

وكمان حاطة لنا سيف بيغز في جنبنا

طيب ما تقولوهاش في وشنا كده
وائل عباس بيأكد ان السطر المكتوب بالابيض

ع الجنب ده هو

USA

طبعا انا اصلي اميرة قوي

لما شفتها قلت: لا لا انا قارية غلط

تلاقيها

U&A

دي مش

S

دي

&

ولما وائل بعت لي بيقول لي مش شايفة اليو اس ايه

قلت له لا يا شيخ دي يو آند ايه

كبر الصورة عندك واتأكد لي

برضه وائل ممكن يبقى شكاك

ممكن تعملوا كليك ع الصورة وتشوفوا اذا كانت

يو آند ايه زي ما انا باقول وللا يو اس ايه زي ما وائل بيقول؟

انا كبرتها ومش متأكدة برضه

وبصراحة كمان مش مصدقة

ان شالله ما تطلعش يو اس ايه

ان شاء الله

وللا ايه يا اخوانا؟

هي بقت كده؟

خلاص؟

Wednesday 27 June 2007

عاجل للجميع: اخص عليكي ياما

اولا اللي عايز يتطوع في العمل الخيري
في المناطق دي
فيه جمعيات كتير بتشتغل هناك
انا شخصيا بارشح جمعية صحبة خير
وح اجيب لكوا نمرة تليفونها النهاردة بالليل
ما ارشحش الجمعيات الطائفية
زي رسالة بدون ذكر اسماء
ما بتشتغلش قال مع المسيحيين
يعني انا اعرف ناس لادينيين في جمعية رسالة دي
هم بقى المسيحيين اللي تف عليهم الكلب؟
جمعية صحبة خير بتعمل دروس توعية
ومحو امية وكفالات ايتام ومشغل خياطة وتريكو
وبصدد انها تعمل ورشة نجارة وبتشتغل مع اي مواطنين
المصريين والشرطها الوحيد انهم يكونوا مخلصين
ده للي عايز يتطوع بدل ما يقلب دماغي انا
والمتعصب طائفيا يبقى يروح الجمعيات اياها
احسن عشان يتكوموا في حتة واحدة ويقعدوا كده
بوزهم في بوز بعض ويرحمونا احنا
====
بالنسبة للافلام فحقوق نشرها محفوظة لاي حد يقدر ينشرها
في مدونة او موقع او حتى على حبل الغسيل
ياريت كل واحد يلطش الفيديوهات دي وينشرها عنده
الاستاذ عزت هلال قال لي حاجة بخصوص تجميع الافلام
طبعا انا مش عارفة تتعمل ازاي دي
ح ابقى اسأل مالك وللا مينا
واللي يعرف يقول لي برضه
واديني قصيت حتة من لساني يا استاذ عزت عشان خاطرك انت بس
والله لو جيت معايا مرة ح ترجع بتشتم كل البشرية
:الفيديوهات اللي ارجو منكم لطشها اهه
====
دول كانوا اولا وثانيا
ثالثا بقى
مازالت لسة روحي في مناخيري من زيارة امبارح
وما حدش يقرفني قبل ما يشوف الفيديوهات كلها
واحد واحد
ويقول لي
دي عيشة بني ادمين وللا حتى حيوانات؟
اخص عليكي يا مصر
ما كانش العشم ياما

Tuesday 26 June 2007

اتفرج وقولي ح تدي ايه لمصر؟ يا قليل الادب

ما تقولش ايه اديتنا مصر
عيب
ما يصحش
عايز تقول ايه اديتنا مصر قولها في حتة تانية
عشان دي مدونة محترمة صاحبتها محترمة
وبيدخلها ناس محترمين
ساعات ناس مش محترمين يدخلوا
بس مش بيعمروا معانا


بما ان فيه ناس مشاعرها رقيقة ومش راضية تروح العشوائيات
وناس تانية اقول لهم فيه ناس مش لاقية تاكل
يقوم يقول لي انا مش لاقي اكل
قلت بقى اجيب لكوا العشوائيات لحد عندكوا
والنبي ما انتوا قايمين


بعد ما تتفرج
وتعرف ايه اديتنا مصر
وما تقولش زي ما اتفقنا
عشان المدونة دي طاهرة
وح تفضل طول عمرها طاهرة
بس اسمح لي اسألك
ح تدي ايه لمصر بعد ما تشوف الحلاوة دي؟



وللا دي



ودي




ودي كمان عشان النبي



وخدوا البهروزين دولم ورا بعض




دي جامدة بس اللي بيقرف
يتفرج غصب عنه




اسمع يا كابتش انت وهو وهي
ح تتفرجوا يعني ح تتفرجوا
وانا مصورة لكوا جبل الزبالة
اللي الاطفال في العشوائيات بيلعبوا فيه
لعبتهم الشهيرة: يدوروا ع العقارب
والمسابقة ان النفر فيهم يمسك العقربة من غير ما يتقرص
واللي يتلدغ يطلع برة اللعبة
خسران بقى
===
للاطلاع على الملف الكامل
لينكات الفيدوهات اهي
بصوا بقى الراجل ده من اعيان المنطقة
جزار بالقسط
وادي بقية اللي اخدوا من مصر
فيه من ضمن الفيديوهات واحدة ست هزأتني ومسحت بيا البلاط
عشان شافتني وانا باصورها وقالت لي: هو انا ح اشحت
ح تصوريني جنب الزبالة
قعدت اعتذر لها وهي مكشرة في وشي
ولما مشيت قالت لي جتك القرف
بس مش عارفة ليه فرحت
مش فرحت ان جاتني القرف
لانه جاتني فعلا
انا وغادة وقع علينا جردل مجاري واحنا طالعين بالعربية
وواحد في الشارع ضحك وقال لنا رزقكوا
انا بس فرحت لانها غضبانة من اللي هي فيه
ودي حاجة مش شائعة زي ما حتشوفوا في الفيديو
احنا طلعنا ووقع علينا كاكا عشان نجيب لك عيالك يا مصر
تشوفيهم
بعد ما اديتيهم
مدام يا حلوة مش عايزة تهزي طولك وتروحي بنفسك
ولما بيجولك بيقفوا ع الباب
اللي عمره ما بيتفتح
ودي اغنية وطنية هدية للاخت مصر



في وسط ده كله جيمي وماك اتصلوا بيا
ولما قفلت عليهم قال شكوا في سلوكياتي
لما رجعت لقيت جيمي بيتصل وبيقول لي: ماك بيقول لك سلمي لي على صاحبك
قلت له: صاحبي؟
قال لي: همممممممممم انت كنتي فين يا نووووارررة
ومشوار ايه ده اللي يخليكي تقلبيني وتقفلي على ماك؟
قلت له: كنت في العشوائيات
سكت ثانيتين وبعدين قال لماك: يا عم كانت في العشوائيات..مش قلت لك
ح يطلع مشوار اهبل زيها؟
ايه ده؟ قصده ايه جيمي؟
عموما صاحبي اللي كنت معاه اهو
هاه؟
ح تدي ايه لمصر؟
بس خلاص...ما تقلش ادبك هنا

Monday 25 June 2007

أيمن الظواهري

يا دكتور يا ابن الناس وسليل البشوات
بهدلت نفسك وانت ابن عز
وشحططت اهلك وراك وهم الارستقراطيين
ومراتك ماتت في غارة في افغانستان وهي بنت العائلات
وقلبت الدنيا
وكله ع الفاضي
والدنيا من سيء لاسوأ
وبعد ما خسرت كل حاجة قاعد تحت الكنبة تطلع تصريحات
وتدي اوامر
وحياة الحاجة نفسية والدة الابلة ظاظا
تقعد ساكت بقى
وكفاياك بهدلة في نفسك وفي اللي منك
وفي الدنيا كلها

المخطط الصهيوني ضد الارمن..سمعت عنه قبل كده؟

الا انا عمالة اقرا في كتاب عن الارمن والاتراك
وصلت لحد تلتينه كده
وما قدرتش امسك نفسي وما اتكلمش عليه لحد ما اخلصه
الكتاب اصلا اللي عامله الارمن
ومترجم عن الارمنية
الحقيقة انا كان عندي واحدة صاحبتي ارمنية
كنت باموت فيها وفي مامتها
وكانت بتكره الاتراك زي ما انا باكره الاسرائيليين كده
وانا يعني الاتراك ما يفرقوش معايا قوي
بس كنت باستغرب يعني واقول لها مافيش شعب كله وحش
دول غير اسرائيل لان اسرائيل مش شعب
ده كيان وسخ عمل استدعاء لكل العناصر الوسخة اللي في العالم
وقال لهم يا حبايب ربنا تعالوا استوطنوا عندنا
بس هي كانت بتزعل من كلامي ده
وتتشال وتتحط
فكنت باسكت..خصوصا ان مامتها بتطبخ حلو وما عنديش استعداد
اضحي باكل طنط مارو عشان الاتراك
ياعم يغوروا
الكتاب اللي انا باقراه ده واللي عامله مجموعة من الباحثين الارمن
بيفسر لي آني كان مالها ومال الاتراك
فعلا هم بالنسبة لهم زي اسرائيل
لدرجة ان كل الابحاث اللي قريتها في الكتاب لحد دلوقت
كتابها بيؤكدوا ان حركة البانتوركية
او الاتاتوركية
هي حركة صهيونية ماسونية توسعية امبريالية
بجد مش باهرج كاتبين كده
ماشي يعني طول عمرنا بنسمع الناس اللي بتتكلم عن اتاتورك
على انه من يهود الدونمة والكلام ده
بس اول مرة اسمع الكلام ده من ناس مش عرب
عشان بقى عمالين تقولوا علينا نظرية المؤامرة
والعرب مسيطر عليهم نظرية المؤامرة
اهو كتاب اهو مترجم عن اللغة الارمنية
واللي كاتبه مجموعة من الارمن ابا عن جد
ونظرية المؤامرة واكلة دماغهم لدرجة اني شكيت في امي
وحسيت ان اختي زينب ممكن تكون مدسوسة عليا
وكل شوية يقولوا كلام شبه: والكاتب البانتركي المشهور اللي مسمي نفسه مش عارف ايه اغلو وكل الناس فاكراه اغلو وهو الحقيقة كوهين وامه من يهود الضاهر
لسة فاضل لي تلت الكتاب
بس لحد دلوقت
اللي قدرت اجمعه من الكتاب
ان القوى الامبريالية العالمية تشكلت في صيغة الصهيونية
وانها هي اللي خلقت البانتركية
وهي اللي زقت مصطفى كمال الشهير باتاتورك اي ابو الترك
وان بتوع الاتحاد والترقي اسمهم كوهين وياكوف وحنا
ومستخبيين في اسامي تانية
وان الاتراك بيصطنعوا تاريخ مالوش وجود
وان الطورانية مالهاش علاقة بالاتراك
وان قطعة الارض التابعة للاتحاد السوفيتي واللي سموها اذربيجان
ما اسمهاش اذربيجان
اسمها اجفانك
وهم سموها كده توطئة لاحتلال اذربيجان الاصلية التابعة لايران
وان الاتراك عندهم مخطط توسعي وعايزين يخلو كل الناس تتكلم تركي
وانهم بيدعوا انهم من سلالة الحيثيين والطوران وده مش صحيح
وان مافيش في تاريخ المنطقة حاجة اسمها اتراك
وان الاتراك دول مش موجودين اساسا
وان مافيش حاجة اسمها تركيا
(والله قالوا كده)
وان العلمانية والباناسلامية والبانتركية والليبرالية
كل دول صنيعة الماسونية الصهيونية
بس ما جابوش لسة سيرة الشيوعية
لحد دلوقت
لو جابوا سيرتها ح ابقى اقول لكوا
آه وان اللي عمل مذبحة الارمن هم بتوع الاتحاد والترقي
لانهم كانوا هم اللي مراكز قيادية في الفترة دي
وان السلطان عبحميد ده راجل اهبل وهم اللي اوغروا صدره ع الارمن
لان هرتزل هو اللي اقنع بتوع الاتحاد والترقي انهم يدبحوا الارمن
وان هرتزل كان عايز يخلص ع الارمن وعلى نفوذهم
في المنطقة لانهم كانوا تجار وكانوا بينافسوا اليهود
في سيطرتهم على اقتصاد المنطقة
وانه وعد بتوع الانتحار والترزي انه ح يوصلهم
للحكم ويئلش عبحميد ويدعمهم بالمال
ويقنع العالم كله بانه يساندهم
لو خلصوه من ام الارمن دولم
وان الصهاينة هم السبب في ان الارمن
ما اخدوش حقهم لحد النهاردة
وهم اللي بيأثروا على قرارات مجلس القمل
والقلل المنتحرة
والحقيقة اللي كاتبين الابحاث
جايبين اشارة لمراجع
بس الله اعلم
كل شيء جايز
والنبي صعبوا عليا
لا حول ولا قوة الا بالله
ده الظلم بيطير العقل يا اخي

Sunday 24 June 2007

ربنا يسهل واعرف اروح


مركز الدراسات الاشتراكية

دعوة من مركز الدراسات الاشتراكية لحضور ندوة

فتح ضد حماس
حقيقة الصراع الدائر في فلسطين

المتحدثون
د. عصام العريان (عضو مكتب إرشاد جماعة الإخوان المسلمين)
د. أحمد ثابت (أستاذ العلوم السياسية بجامعة القاهرة)
م. وائل خليل (مركز الدراسات الاشتراكية)

وذلك يوم الخميس 28 يونيو في تمام الساعة السابعة مساء
بمقر مركز الدراسات الاشتراكية: 7 شارع مراد – ميدان الجيزة
========
اظنها ح تبقى كويسة لان المتحدثين كويسين قوي
ربنا يسهل واعرف اروح
ممكن لو ما عرفتش اروح حد يسجلها لي ع الموبايل
مرة من نفسي
بس ان شاء الله ح ابذل كل جهدي اروح
وابقى انا اللي اسجلها لكوا

العلم لا يكيل بالبتنجان


انا ما عنديش ثقة في ام العلم ده
باحب اقرا فيه
زي ما باحب احل الكلمات المتقاطعة ومربع الحسابات
بس ما باصدقوش
زمان بقى وانا غرة غريرة كنت باقول العلم لا يكيل بالبتنجان
بس لقيته عامل زي الراجل الندل
يقول الكلمة ويخليني اصدقه
وبعدها بشوية يلحس البقين اللي قالهم ويرجع يقول كلام تاني خالص
وكل ما الدنيا بتتقدم
كل ما بيزداد ندالة
يعني زمان على ما اكتشفوا ان الارض كروية
اخدوا وقت شوية
على ما اكتشفوا ان القلب عضلة والعقل هو المسئول عن العواطف
اخدوا وقت شوية
دلوقت
هوب كلوب
كل ساعة بنظرية عكس النظرية اللي قبلها
اكيد فيه شوية مننا شافوا البرنامج الوثائقي
اللي بيقول ان العلم
اللي اتسبب في ان ناس كتير تطلع من دينها
وناس تانية تدور على تفسيرات ملتوية
تلزقها وترقعها عشان تتفق مع العلم
هذوها العلم
بعد كل السنين دي
اكتشف ان القلب فيه خلايا مخية
وانه عقل تاني
وانه بيستجيب للمتغيرات وبيرسل انفعلات
منفصلة عن استجابات المخ
وساعات اسرع
وابتدى الموضوع ده لما عملوا عمليات زرع قلب
ولقوا واحد جاهل ابتدى يكتب شعر
وواحد غلس بقى لطيف
والناس اللي بتركب قلوب
شخصياتها بتتغير وبيزيد عليها مهارات
وبتفقد مهارات
فابتدوا يدوروا في الموضوع
هم لسة بيدوروا
لحد دلوقت ما عندهمش ادلة غير الخلايا المخية اللي لقوها في القلب
والتغيرات اللي بتحصل للناس اللي بتزرع القلب
والتجربة اللي عملوها وشفتها في البرنامج
حطوا حاجة كده شبه الكوبس ع المخ وع القلب
عشان يسجلوا الانفعالات ولقوا ان القلب بينفعل بشكل منفصل
واسرع من المخ
مش دي اول حادثة خلتني افقد الثقة في العلم
اللي عامل زي حنفي: خلاص تنزل المرة دي
بس كمان قراءاتي عن النظريات العلمية
والناس اللي نقدوها
وحججهم
كلها حاجات بتقول ان العلم ده مش موضوعي ولا حاجة
وانه بيخدم مصالح
ومثلا الحاج داروين كان متأثر بفكرة رقي الجنس الابيض
وحب يرسخ للمفهوم ده من خلال نظرية النشوء والتطور
واللي من خلالها يثبت ان كل ما الانسان كان لونه اغمق
دل على انه اقرب للقرد
وكل ما كان افتح كل ما ده دل على انه اكثر تطورا
وعليه فالانسان الابيض هو ارقى الاجناس البشرية
وبالتالي فهو من حقه يحتل الناس ويطلع تلاتين الاجناس التانية
لانهم ولاد قرود والنفر فيهم كان قرد اول امبارح
وان كنتوا نسيتوا اللي جرا هاتوا الدفاتر تنقرا
وهكذا
الراجل الرمة بتاع نظرية الجريمة
ناسية اسمه
بس هو الماني على ما اظن
اللي كان بيقول ان المجرم له سحنة
وعمل علم فراسة اجرامي
اثبت فيه ان كل الافارقة مجرمين
لان المجرم لازم تبقى شفايفه غليظة
وكل الشرق الادنى اغبيا
لان الغباء دليله هو الجبهة الضيقة
اللي بيتميز بيها الاجناس في الشرق الادنى
وكل الشرق الاقصى اشرار ولا اخلاقيين
ومتخلفين عقليا كمان
لانهم قصيرين وعيونهم ضيقين على راي عمو فؤاد
وطبعا مافيش ذكي ولا اخلاقي ولا طيب ولا متطور
غير الجنس الاوروبي
طيب جورج بوش ده نموذج للانسان الاوروبي
طويل القامة وشفايفه رفيعة
وجبهته عريضة ومناخيره مدببة
بذمة النبي
ده عنده مخ وللا اخلاق وللا انسانية
وللا متطور باي شكل من الاشكال؟
الحقيقة انا كمان ازدادت عدم ثقتي في العلم
مش بس عشان هو حنفي
انما كمان عشان عامل زي اللي بيلف حوالين نفسه
وعامل دوشة
وهو في الواقع ما بيعملش اي حاجة
عمالين نهيص
التقدم العلمي
ثورة الاتصالات
البتنجان
والعلم لحد اللحظة دي
ما قدرش يسعد انسان سعادة حقيقية
ما قدرش يرتقي بخلق شخص واحد
ما قدرش يوقف الحروب ليوم واحد
ما قدرش يعالج الانسان من مرض الظلم
ولا عرف يزرع له عدالة
ولا طلع من كمه يركب له صدق ولا امانة
ما قدرش يحمينا من الكوارث الطبيعية
بل العكس
ده اتسبب في زيادتها
بس برضه باحب اقرا فيه
عشان مسلي
اكتر من رجل المستحيل

Saturday 23 June 2007

أمي وأحمس والأنبا صموئيل

ماما كانت بتدرس في امريكا في الستينيات
بتقول لي انها لما كانت في امريكا
كانت بتدرس وبتشتغل في مركز الاعلام العربي
عشان تصرف على دراستها
وهي في اتحاد الطلبة العرب طبعا اتخانقت مع كل المديرين
بما فيهم سعد الدين ابراهيم
وشخطت فيه وقالت له انت مش عارف الفرق ما بين
السكرتيرة والشغالة
وبتقول لي انها كانت قرفانة قوي من كل العناصر اللي كانت بتشتغل هناك
عشان معظمهم كان في الاتحاد الاشتراكي وجايين يتجسسوا على المصريين
في امريكا
مافيش حد ماما كانت بتحترمه غير الدكتور احمس
اللي ساب بلده وجه يشتغل في مركز الإعلام العربي التابع للجامعة العربية
ساعي
ماما لما شافته اتخضت وكل ما يعدي
تقف له وتحييه: اهلا يا دكتور
وتبص للناس: ده الدكتور احمس
المهم الراجل طبعا تأثر من تقديرها ليه وعيط على كتفها وعرفها على مراته
اللي قالت لها انهم كانوا عايشين كويس في مصر وكانوا ساكنين في فيلا
وحالتهم ممتازة وهو اللي صمم يسافروا امريكا وباعوا اللي وراهم واللي قدامهم
عشان يروحوا الجنة الموعودة
هي وولادها لقوا شغل وهو ما لقاش غير ساعي في مركز الاعلام
واالمركز ده واضح انه قذر عشان يشغل دكتور شغلانة زي دي
ماما قالت لاحمس ما تروح لسابا باشا اللي بيشغل الاقباط
قال لها ما احبش ابقى تحت ايد حد وسابا ده كان في امريكا
بيشتم النظام وعبد الناصر وبيدعي ان عبد الناصر بيضطهد الاقباط
والشهادة لله عبد الناصر ما اضطهدش الاقباط
بالذات يعني
هو كان جو اضطهاد عام
المهم الراجل احمس ده واضح ان الهكسوس اكلوا له دماغه
ساب مراته وراح اتجوز واحدة امريكية
طلق مراته ازاي وهو ارثودكس
وازاي اتجوز واحدة تانية
ماما ما تعرفش بس تعرف انها صعبت عليها مراته اللي اطلقت في الغربة
وصاحبتها وفضلت معاها على طول
في يوم الست دي قالت لماما ده انا رايحة الكنيسة عشان يوم سبعة يناير
ماما قالت لها اجي معاكي
راحت بقى لقت الانبا صموئيل اللي بعد كده اتقتل مع السادات
وقعد يقول موعظة وماما تعيط
- اصل امي زيي كده بدمعة -
وبعدين صاحبتها قالت له: دي صافي ناز يا ابونا صوتها حلو قوي
وبتغني ترتيلة مريم البكر بتاعة فيروز
فالانبا صموئيل قال لها تعالي غني
ماما بقى غنتها وكل اللي في الكنيسة قعدوا يعيطوا
والانبا صموئيل قال لها: يابنتي الرب اداكي نعمة
صوت حلو ونفس طاهرة حافظي عليهم
وواحد من المهمين جالها على جنب وقال لها: كنت قاعد
متربص لك..لو كان صوتك طلع وحش وللا نشزتي
ما كنتش ح ارحمك
بس زي بعضه بقى طلع صوتك حلو
لما ماما رجعت وحكت للمرحوم فيليب جلاب
وقالت له انها حبت الانبا صموئيل
قال لها: ده امريكاني حقير
قالت له: وهو الانبا صموئيل المفروض يبقى شيوعي ليه
====
هو ينفع دلوقت واحدة مسلمة تحضر سبعة يناير وتغني كمان في الكنيسة؟

Wednesday 20 June 2007

كتب محمود الزهيري عن معاوية ويزيد

وانا على فكرة علموني وانا صغيرة ما ازهقش من قول الحق
ده اولا
ولا اكابر - زي ناس - والحمد لله دي هبة من ربنا
ماليش فضل فيها
وكمان ما اخافش ولا اتهت لما بيتسلط عليا
ناس تتهمني عشان تخليني اتراجع عن اللي شايفاه حق
وما فيش حاجة تخليني اتراجع
غير اني اشوف فعلا اني كنت غلطانة
وعمري ما باتكسف اعتذر
ولا ليا حسابات تنظيمية تخليني اقول ع الصح غلط والغلط صح
وسبق وقلت
لا بالعب سياسة
ولا بالعب طاولة
ولا بالعب في مناخيري
والحق احق ان يتبع
:هاكم مقال محمود الزهيري عسى الله ان ينفع به قوم يعقلون
عن الإقتتال الفلسطيني : من منكم ليس معاوية , ومن منكم ليس يزيد ؟!!
محمود الزهيري
moudelzohery@yahoo.com
مشاهد العنف والإرهاب الفلسطيني / الفلسطيني , تحمل قدراً كبيراًُ من الرعب , ولكن للشعب الفلسطيني في المقام الأول , أما في البسط , فإن التأزيم يمتلك المهتمين بالشأن الفلسطيني , علي كافة المستويات , وكأن صراع ماتعارف علي تسميته , بالكذب والزور والبهتان , فهذا نفاق سياسي / إعلامي , يستخدمه البعض للتزلف إلي الطرفين المتقاتلين , وكانت المصلحة من وراء هذا التزلف سبيلاً مشروعاً للعديد من القوي التي تلعب بأوراق الكوتشينة الفلسطينية , بالمقامرة والمغامرة أحياناً , والتسلية , وإضاعة الوقت بالترفيه أحياناً أخري , وكانت الأوراق في أحيان كثيرة يقدمها الفلسطينين أنفسهم للمقامرين , وطالبي الترفيه والتسلية !!
ولكن أن يصل الأمر إلي القتل , وإراقة الدماء , فهذا أمر يحمل قدراً كبيراً من السفه والعته , بل وإن شئنا الحقيقة يكون الجنون , الذي مردوده مردوداً دينياً بالنسبة لمنظمة حماس , وسياسياً مبنياً علي المصلحة بالنسبة لحركة فتح , ومابين الدين والمصلحة يتوه الشعب الفلسطيني , والذي ينتحر بيد أبناء قومه وعشيرته , وكأن أمر الإقتتال والتحارب أمراً عادياً .
ولكن الغريب في الأمر أن التياران المتقاتلان , يذهبا إلي أن أسباب هذا الإقتتال يرجع في أسبابه إلي نظرية المؤامرة , تلك النظرية التي تحيك خيوطها أطراف خارجية لها مصلحة في إدارة الصراع الفلسطيني , وإطالة أمده , وهذا لون من ألوان السفه الغير مقبول من الفلسطينيين أنفسهم , إذ ماهو الغرض من هذا الإقتتال والتحارب , وإراقة الدم الفلسطيني رخيصاً مهدراً علي الأرض الفلسطينية بأيادي فلسطينية ؟!!
وإذا كان الجميع يعتقد بأن هناك مؤامرة فلماذا لايتم قطع الطريق في وجه أصحاب المؤامرة ؟!!
أظن أن منظمة حماس مازالت تعيش المأساة الخاصة بتولي السلطة , وقيادة المجتمع الفلسطيني الأسير بين الدولة العبرية , والتخاذلات , والخيانات العربية , ولكن الحادث في المشهد الفلسطيني أصبح يؤكد بدلالاته المعتبرة في الواقع أن الخيانات المتعددة , والتخاذلات أصبحت فلسطينية بجدارة , لأن الدم الفلسطيني المراق هو دليل الخيانة , ورمز السفالة , لأن القتل والإحتراب علي كرسي الحكم الملعون من أيام الصراعات التي توالت علي المجتمع الإسلامي ومنذ عهد عثمان بن عفان , وعلي بن أبي طالب , ومعاوية ويزيد بن معاوية , والدم يراق والقتلي تتوزع أشلاؤهم علي طرقات شوارع أدعياء الإسلام , أدعياء نظرية الحقيقة المطلقة , التي يمتلكها كل دعي للإسلام , والذي يحضرني الآن هو هذا التساؤل عن حقيقة هذا الإحتراب , عن التياران المتحاربان , وهو من منهم يقوم بدور علي , ومن منهم يقوم بدور معاوية , ومن منهم يقوم بدور الحسين , ومن هو القائم الفعلي بدور يزيد بن معاوية ؟!!
إن العرب لايستحون , وإن إستحوا لايحركوا ساكناً , وإن حركوا ساكناً كان ضد من هو من جلدتهم , فالغالبية تبحث عن القيادة , والجميع يبحثوا عن السيادة , لقد تذكرت ماقاله هيكل علي لسان حيدر عبد الشافي في أثناء مفاوضات الفلسطينيين في واشنطن مع الجانب الإسرائيلي , وأورده في كتابه سلام الأوهام : نحن وفد منقسم علي نفسه , وفي الحقيقة فنحن أربعة عشر وفداً فلسطينياً , وكل وفد فينا وفد مستقل , وكل واحد يمثل نفسه ,وله إتصالاته , وله ميادينه .
ويستطرد هيكل معقباً علي كلام عبد الشافي أثناء مشاركة الوفد الأردني في المفاوضات : لعل أكثر ما ضايق الوفد الأردني هو ماوجده من حساسيات بين أعضاء الوفد الفلسطيني مبعثها كما _ قدروا _ المنافسة الشديدة علي الأضواء فكلهم أصبحوا نجوماً : حنان عشراوي , نجمة كبيرة , وفيصل الحسيني يحاول أن يلحق بها , وصائب عريقات يجرب حظه , وشيئاً فشيئاً بدأ يستقر في يقين الوفد الأردني أن محادثات واشنطن لن تسفر عن شئ له قيمة بسبب الفوضي السائدة في الوفد الفلسطيني .
وإذا كان هو حال الفلسطينين في مفاوضات الدولة العبرية طرفاً فيها , فما بالنا والمفاوضات فيما بين الفلسطينين أنفسهم , وماذا يمكن أن نعتقد إذا كانت المفاوضات بالرصاص الحي , والدانات , والمدافع ؟!!
ولكن الملاحظ أن الفلسطينين من الجانبين المتحاربين , لايستحون , وليست لهم أنوف , يشمون بها رائحتهم التي أزكمت أنوف من إقترب منهم بحديث أو جاورهم في طاولة مفاوضات , ولكن ولأن العرب تعاملوا مع الفلسطينين بلغة الولد اليتيم , والمستحق للتدليل والرعاية , والإهتمام , فقد بدا أن الفلسطينين , لم يريدوا أن يستشعروا أنهم قد بلغوا سن الرشد , ويتوجب عليهم الفطام , أو هكذا يذهب العديد من المهتمين بالشان الفلسطيني المأزوم دوماً , وبالفلسطينين أنفسهم , وبخياناتهم , وبخيانات العرب .
إن مشهد أنصار حماس , وأنصار فتح يثير الرعب ويهدد الفرص التي قد تكون متاحة لتقرير مصير الشعب الفلسطيني في المستقبل , خاصة , وأن كلا الطرفين يحمل السلاح ضد الآخر , بل ويعتبر البعض من أنصار حماس أن الإستيلاء علي مقر الأمن الوقائي بمثابة فتح مكة , وأنهم تدافعوا سجداً بأسلحتهم علي أرض مقر الأمن الوقائي , وكأن فتح , وأنصارها قد إستعادوهم من أعماق التاريخ العربي , ليمثلوا أدوار الكفار , أو كأنهم هم اليهود الحقيقيين , وكان لزاماً علي منظمة حماس والأنصار لها , أن يطهروا مقر الأمن الوقائي المقدس , من دنس منظمة فتح , والذي يؤكده واقع الحال , بل وان كتائب القسام تتدخل في المسألة بإعتبارها الذراع العسكري لحماس , وتعلن أنها سوف تخلي سبيل الأسري من منظمة فتح , وقيادييها المأسورين بإرادة عسكرية / جهادية دينية , من قادة حماس المجاهدين ضد فلول منظمة فتح الكافرة , حسب التصور الديني لحماس , وإلا مامعني السجود لله شكراً علي أرض مقر الأمن الوقائي , ولماذا هتافات الله أكبر في وجه فتح ؟!!
ولماذا الزغاريد والأهازيج وتوزيع الحلوي ؟!!
هل بمناسبة القتلي والجرحي والمصابين من الطرفين ؟!
أم أن الإسلام سيكون هو الحاكم علي يد حماس وسيكون المن والسلوي طعاماً لأنصار حماس , والقمل والضفادع والدم , ستصب لعنات علي منظمة فتح ؟!
اعتقد أن حماس , وفتح يستحقان اللعنة , ولكن المتوجب عليه توجيه اللعنات هم المأزومين من فتح وحماس , أقصد الشعب الفلسطيني ذاته , لأنه لن توفر فتح الأمن , ولن تستطيع حماس أن توفر القوت , وضرورات المعيشة , ورواتب الموظفين , ولن توفر الوقود والطاقة , وسيكون رغيف الخبز عزيزاً , وكوب الحليب لرضيع أمراً مستحيلاً , ويتوه الفلسطينين في متاهة البحث عن كوب الماء الضائع , وكوب الحليب المفقود , وتضيع الآمال , والذي سيصبح وجوده حقيقياً وفارض نفسه علي الجميع , هو فقط كرسي الحكم , الذي تنازع عليه معاوية , ليكون كل من فتح , وحماس , يمثلان سوياً نفس الدور الذي قام به معاوية , ويزيد ابنه , في حالة إستجلاب لأحداث الماضي السوداوية , ويستمر الصراع محتدماً , حتي يقول الكثير من المنافقين :
إن الفتنة نائمة لعن الله من أيقظها !!
وإذا كانت الفتنة نائمة والله لاعن من يوقظها , فا بالنا بمن يصنع الفتنة ؟!!
وهل من شهداء لفتح , أو شهداء لحماس في هذا الإقتتال ؟!!
معذرة كلكم معاوية , وكلكم يزيد بن معاوية !!
محمود الزهيري
mahmoudelzohery@yahoo.com

كتبت ايمان بدوي عن فتح/ غزة

ايمان بدوي
اللي ما يعرفهاش اعرفها له
ما حدش يقدر يزايد عليها في اخلاصها للقضية الفلسطينية
لحد ما القضية دي جابت لها الكلام
من كتر اخلاصها لها
:بعتت الرسالة دي على المجموعات البريدية
السلام عليكم
كل الكلمات لا تستطيع ان تصف الفاجعة التى نحس بها بسبب ما يحدث فى غزة
كنت دائما ومازلت اقف على الحياد و ليس معنى انى اغلط طرف انى انحاز للاخرالطرفان مخطئان.... لكنما فعلته حماس فى اليومين الماضيين ذهب بما تبقى لها من رصيد عند الناس
من كل المقالات التى وصلتنى و الاتصالات و المراسلات و المحادثات اقول لحماس ان الرأى العام المصرى انفض من حولك لقد كتبتى وبكل غباء شهادة وفاتك بيدك لا يمكن ان يقبل احد ان يتحول صراع على سلطة
الى بحور دم تنحر الوطن من الوريد للوريد
شاهدت فيديو به مشاهد اعدام سميح المدهون الذى تقول حماس
انه مسئول عن فرق الموت بغزة
لماذا لم يحاكموة على الملاء ؟
لكن الخطأ كان اعدامه على الملاء و ليس هذا فحسب
بل لقد اطلقوا عليه كما سمعت 100 رصاصة!!
وليس هذا فحسب ايضا - بل لقد سحلوة فى الشوارع بعد مقتلة و دهسوا جثتة بالاقدام وعلى الشريط صوت رجل يقول لهم " الرجل مات خلاص - الزلمة مات حرام
هذا ما بيجوز.." ولا فائدةهل هذا هو الاسلام الذى تدعوا اليه حماس هل هذه هى اخلاق الاسلام يا حماس؟؟؟؟؟هل هذه هى الرسالة التى ستصل العالم عن الاسلام!!وهل يسمح الاسلام بالتمثيل بجثث الموتى و دهسهم بالاقدام فى الشوارع؟

طيب قبل ما تقوموا "بتحرير غزة " و رفع "علم حماس" عاليا على المبانى
والركوع لله شكرا على النصر على" الكفار" !!
هل خططتم للخطوات القادمة على مدى الاسابيع و الشهور القادمة ورد فعل العالم؟
ام كما قال احد الاخوة - تاركين الامور "على البركة" -هل تعرفون خطواتكم القادمة و انتم تحت احتلال و حصار عربى قبل الاجنبى يعنى العرب ايدكم منهم و الارض كالعادة
طيب الم تفكروا فى خطورة نقل ما يحدث للضفة و الانتقام الاعمى
الذى ممكن ان يحدث هناك؟والله لا ارى بركة و لا ارى الا كارثة لن يدفع ثمنها الا الشعب الفلسطينى المسكين المطحون

فلنرجع للوراء سنتينعند بداية الانتخابات التشريعية التى اوصلت حماس للحكمكم نصحهم الاخوة ان لا تنجروا للعبة الانتخابات فهذا ليس وقتة و لا هذا مشروعكم
انتم جماعة مقاومة مشروعكم التحرير وليس السلطة و الكراسىطيب
فزتم فى الانتخابات اجعلوا نوابكم فى التشريعى تكون عينا على السلطة و الفسادولا تنجروا وراء السلطة و الكراسى و اجعلوا عيونكم على القدس و على التحريرهل صدقتم ان هناك سلطة و الا دولة و الا شئانتم تحكمون على ورق - فى الهواء .. حرروا الارض ثم انظروا للحكم
لو كانت حماس وقفت عند نجاحها فى التشريعى و اثبتت وجودها و قوتها فى الشارع
وعادت لمربع المقاومة لكان اشرف لها
ولم يكن ليحدث كل هذه المقتلة البشعة

مبروك للصهاينة فقد حان وقت راحتكم الان فقد كفتكم حماس وفتح تعب الحرب

انقل لكم فقط بعض ما قالة لى بعض الاخوة
ازيك وايه رايك فى اللى بيحصل
كارثة مصيبة مش كدة حماس فقدت كل شيء ووقعت في الشرك الامريكي والاسرائيلي
تمام اللي صار كارثة وعلى فكرة الراى العام المصرى على العموم انفض من حولها
لانها كان لازم تغلب مصلحة الوطن و التصرف لا يمكن يكون بالشكل اللى حصل
السيناريوهات المطروحة كارثية بمعني الكلمة هذه كارثة
ورب الكعبة هو دة اللفظ اللى قلتة النتيجة كارثية
انا زعلانة لا تتصورى قد ايه محبى حماس خاب ظنهم فيها الله يستر على الشعب الغلبان حماس انتهت صدقيني قضت علي نفسها بغباء

اخبرنى اخوة اخرين انهم اوقفوا دعمهم لفلسطين احتجاجا على ما يحدث
ولكنى قلت لهم ان هذا خطأ فنحن نرسل للجمعيات و المرضى و المصابين و اسر الشهداءفلسطين لم و لن تكون فتح او حماس

مجموعة اخرى كانوا من اشد المؤيدين لحماس
اسمائهم على الماسنجر و على الايميل
كله حماس
الان سألتهم - قالوا خلاص - كان زمان حماس انتهت

هل يوجد حل؟انا عندى رأي .. خلاص حماس قامت بما ارادت فلتتنحى جانبا اذا تبقى لديها ذرة من خوف على مصلحة الوطن فلتتنحى حماس جانبا و لتترك ادارة امور غزة و الوطن
للمستقلين تماما
المعروف عنهم الصدق و الامانة و الشرف و عدم الانتماء لاى فصيل
ولا اجد حل سواه
الا الحل الامريكى الصهيونى العربى المشترك
فهذه فرصتك الاخيرة - فاختارى يا حماس
يا اقصى قلوبنا و عيوننا عليك
ايمان بدوى
==========
ردي على رسالة ايمان
ودي بقى آخر امل عشان العواطف يجمعوا احنا بنقول ايه
:اليكم ردي
العزيزة ايمان بدوي
كنت اتمنى ان يصل صوتك اوضح من صوتي
لانني بالفعل دماغي شايطة
وما عنديش خلق اشرح
ومع ذلك
ما يحدث من جدل على النت فيما يخص الفتنة
في فلسطين
هو تصغير لما يحدث في فلسطين نفسها
انا بس عايزة اوضح حاجة
ويا رب اعرف اوضح
السلطة الفلسطينية هي احد نتائج اتفاقية اسلو المهينة
انا شخصيا مش معترفة باتفاقية اسلو
واظن ان كل حركات المقاومة اعلنت انها غير معترفة بهذه الاتفاقية
وعليه فهي غير معترفة بنتائجها
وللا ايه
خاصة ان السلطة الفلسطينية التي تأسست بموجب هذه الاتفاقية
كان هدفها الرئيسي هو قمع الانتفاضة واعتقال عناصر المقاومة
وللا ايه
يعني
بالبلدي
السلطة الفلسطينية هي المخبر ابو جلابية وبالطوا وعصايا وجرنال مخروم
بالبلدي اكتر
اسرائيل لما لقت نفسها محتاسة مع عناصر المقاومة
رقعت بالصوت وجات امريكا لحقتها باتفاق اسلو
خدوا غزة واريحا
وحكم ذاتي
وحوشوا عننا دول
وللا ايه؟
وللا احنا بننسى؟
حركة حماس
اللي كلنا حاطين عليها امل وعشم زي ما ايمان بتقول
اسمها حركة "المقاومة" الاسلامية حماس
المقاومة
صح؟
طيب ازاي انت مقاومة وبتترشح في انتخابات مؤسسة في بنائها على اتفاقية انت مش معترف بيها
واللي اسسها العدو اللي انت بتحاربه
وازاي ما شفتش انهم سمحوا لك بالنجاح في الانتخابات عشان يبقى قدامك خيارين
اما انك تدخل في المنظومة بتاعتهم او تتصفى؟
طيب ما اخدتش بالك
ما جراش حاجة
انا برضه في حاجات كتير عملتها في حياتي وانا مش واخدة بالي
وابتديت تتحاصر عشان يضغطوا عليك ترجع في كلامك
وانت مش واخد بالك
وضهرك اتكشف واتعرف كل امكانياتك وقياداتك وعناصرك وما بقاش عندك اي حاجة سرية
مع ان السرية هي عنصر حيوي لاي حركة مقاومة
وانت مش واخد بالك
واتقبض على كل عناصر الحكومة بتاعتك
وانت مش واخد بالك
واتسلط عليك واحد صايع حقير منحط عميل اسرائيلي واوسخ من الاسرائيليين
وانت مش واخد بالك
واعتدى عليك وسفك دم عناصرك
وانت مش واخد بالك
رحت انت رادد
وانت مش واخد بالك
وفجأة لقيت نفسك من دون ارادتك ولا رغبتك ولا حتى وعيك
جزء من حرب اهلية
بتقتل زي اللي بيقتلوا
وبتسفك دم زي اللي بيسفكوا
وانت مش واخد بالك
وطبعا اعداءك مش ح يقولوا اصله اعتدي عليه
ما بيركزوش غير على انت بتعمله
وانت مش واخد بالك
وخسرت كل حاجة
وانت مش واخد بالك
لا حصلت مقاومة
ولا حصلت حكومة
وبس بقيت رافع السلاح على ناس فلسطينيين
خونة بقى وللا مش خونة
الواقع انك موفر سلاحك عن اسرائيل
ورافعه على فلسطينيين
وانت مش واخد بالك

سؤال: ح تاخد بالك امتى؟