Thursday 31 March 2011

عقبال حقيقة موضوع كاميليا لما تظهر


عقبال الباقي كله

بيان ائتلاف شباب ثورة الغضب



وبالمناسبة هم كذبوا في كل حتة.. ومالهمش ذنب في اللي اتنشر، وكلموا كل الناس اللي ما سمعهومش في التلفزيون عشان ينشروا في كل حتة
وبرضه اتشتموا
الناس خلاص، بقوا مظبوطين على محطة الشتيمة وخلاص

خبز، حرية، عدالة اجتماعية

والسبب الحقيقي اللي ممكن يقودنا لديكتاتورية هو ان اغلبية الطبقة المتوسطة عايزة تاكل حق الفقرا وتعيشهم تحت رحمتها يشحتوا وحسبي الله ونعم الوكيل
انا مش لاقية مرشح رئاسة مبدئيا... وحاشوف مرشح مجلس الشعب اذا اولويته العدالة الاجتماعية حانتخبه، غير كده مش حانتخب مخلوق
كنت باتكلم عن هشام بسطويسي بس قال عن مجانية التعليم نفس اللي قاله البرادعي
اولا.. ماحدش يمد ايده على مجانية التعليم.. خالص، مافيش حاجة اسمها ادعم التعليم الفني واخلي التعليم الجامعي بفلوس عشان اصرف على التعليم الفني.. ايه ده ايه ده ايه ده؟
ندعم التعليم الفني، ونصرف على التعليم الجامعي، ونحسن المدارس الحكومية، ونرفع مستواها لحد ما تبقى احسن من المدارس الخاصة بل والمدارس الانترناشونال وده مش مستحيل ابدا، ده يتعمل في خمس سنين
ده المفروض يبقى الخطة العاجلة اللي تتعمل للتعليم، ويبقى التعليم عندنا زي انجلترا وفرنسا والسويد، واتضح اننا عندنا فلوس اكتر منهم هم التلاتة جمعاء
انا اصلا متغاظة من وجود المدارس الانترناشونال
ومش طالبة حد يليغها، ابسلوتلي، دي تفضل موجودة ويتبهدلوا ضرايب عشان نعرف نصرف على التعليم
انا اللي عايزاه، وده ينفع يتعمل في ظرف خمس سنين، ان المدرسة الحكومة تبقى هي المميزة، ولما حد يتحرم من المدرسة الحكومة يبقى متضايق، او مكسوف يقول انه خريج مدرسة خاصة، لأن ده معناه ان مستواه في التعليم قليل قوي قوي قوي وفشل في التعليم الحكومي لحد ما اهله طلعوه وودوه بقى مدرسة بفلوس عشان ياخد شهادة وخلاص
الوضع كده في انجلترا فعلا، وفي فرنسا، وفي السويد، واللي بيدخل مدرسة اهلية بيذوب خجلا، ولما فرنسا منعت المحجبات من دخول المدارس الحكومية المسلمين عملوا مظاهرات وقالوا ليه نضطر ندخل مدرسة اهلية واحنا لنا حق نتعلم كويس
بس الطبقة المتوسطة مش عايزين كده
طبعا الاغنيا مش عايزين ضريبة تصاعدية لأنهم عايزين يسرقوا وما يدفعوش مفهوم ده، وبيتحججوا بإن ده حيطفش الاستثمار، البلد اللي اقتصادها يعتمد على الاستثمار لدرجة انها تعمل استربتيز للمستثمرين يبقى ما عندهاش اقتصاد.. وما عندهاش شرف، وما عندهاش كرامة، وتبقى ماشية مع المستثمرين في الحرام، والمستثمرين قايلين لها: احنا مش بتوع جواز عايزة تعيشي معانا على كده اهلا وسهلا مش عايزة بالسلامة، وهي راضية
والمستثمر اللي مش عايز يدفع ضريبة عادلة يبقى عايز يسرق مش عايز يستثمر، احنا عايزين نجتذب الحرامية ليه؟ وعايزين نعيش مصر في الحرام ليه وهي مزة والف من يتمناها ويجيب لها مهر وشبكة وشقة مفروشة من مجاميعه؟ طب نظيف كان بيقول كده عشان نظيف ووزراته واللي معينه واللي مشغله واللي مصاحبه عاملين برتيتة حرامية وعايزين يوسعوا نشاطهم، وعايزين يحطوا مصر في المطبخ ويلبسوها جلابية مقطعة، ويخلوها تطبخ وتمسح وتكنس ولما ييجي ضيوف ينادوها ترقص لهم.. احنا ليه عايزين نعمل فيها كده تاني؟ ما خلاص بقى هي مش حتعمل كده تاني، هي حترجع لبيتها واودتها وتعيش زي ما مفروض تعيش
بعض الناس اللي من الطبقة المتوسطة ومش عايزين مجانية تعليم مش عايزينها لسبب حقير جدا.. مالوش علاقة بالميزانية، وان الفلوس اللي بتتصرف على مجانية التعليم كتير وممكن تتوفر، (لأن الفلوس اللي بتتصرف على التعليم 15 في المية من الميزانية والفلوس اللي بتتصرف على الداخلية 30 في المية)، وان مافيش مجانية تعليم حقيقية والكلام ده... هي مش عايزاه عشان مش عايزة ابنها يقعد جنب ابن البواب في المدرسة
بس كده
بدليل ان اللي بيعترضوا على مجانية التعليم مش معترضين على الصحة، ان المستشفيات كلها تبقى مستوى واحد مافيش حاجة اسمها مستشفى للبشوات ومستشفى لولاد الكلب.. ببساطة لأنه مش حيقعد مع البواب في نفس الاودة، فهم ما عندهمش مانع يبقى نظام الصحة في مصر زي انجلترا وفرنسا والسويد واي دولة محترمة عندها حد ادنى من العدالة الاجتماعية، وان العلاج الكويس بيبقى في مستشفيات الحكومة، لأن كل واحد حيبقى له اودة وهو مش حيضطر يختلط بالغلابة ولا حاجة، الى جانب انهم مش وحوش يعني، هم طبقيين طبقية وسخة، بس مش قتالين قتلا، ونفسهم البواب والسمكري وساكن العشوائيات يتعالج كويس في مستشفى كويسة، وما يدفعش فلوس لأن ده حقه، بس ما نفسوش ابنه يتربى مع الغلابة.
تلاتين سنة هو قاعد يمد ايده من الشباك ويديهم صدقة.. بس ما عندوش استعداد يبقى زيهم زيه.. او بالاحرى، ما عندوش استعداد يبقى زيهم زيه، امال يفك عقده على مين؟
بس معلش، ينفع ده يتعالج.. بس ناخد بالنا من المرض ده، ونواجهه، ما جراش حاجة، ما ينفعش الواحد يفضل يتهمهم ولو اني انا متغاظة منهم وحاسة انهم ظلمة وقاسيين، بس عادي يعني، ماهو مبارك اتسبب في امراض كتير، كل الناس اخدت بالها من مرض الطائفية اللي رباه مبارك على الغالي، كل الناس اخدت بالها من تحول الدين الى عصبية وحزبية بعد افراغه من قيمه وبقى الموضوع شكله اهلي وزمالك
لكن ماحدش اخد باله من مرض الطبقية القذرة اللي اصاب كتير من الطبقة المتوسطة اللي طول النهار يقولوا احنا المتعلمين احنا اللي حننضف البلد احنا اللي حنعل نهضة، ولما البسطويسي قال ينفع نرجع الكتاب (وبالمناسبة منهج تعليمي رائع لو شلنا منه عنصر الخرزانة يعني، لأنه بينمي الذكاء بدرجة عالية) واحد قال كتاب ايه؟ عيب البسطويسي انه ما كانش عايش برة، وميزة البرادعي انه عاش برة فبقى عنده خيال! وكل اعتراضهم على نسبة 50% عمال وفلاحين ان العمال والفلاحين بصمجية وما ينفعش يحطوا لنا تشريعاتنا احنا عايزين مثقفين واساتذة جامعة!
طب دي طبقية قذرة.. مش طبقية بس، دي طبقية قذرة
والطبقية القذرة دي كانت باينة من ساعة الاستفتاء وماحدش اخد باله منها لأن صوت خناقة المسلمين والمسيحيين كان اعلى، على اي حال انا مبسوطة من خناقة المسلمين والمسيحيين لأنها مش حتتكرر بالشكل ده تاني، لأن الناس عندها رغبة حقيقية انها تحسن من نفسها في كل حاجة، وكل ما تشوف مشكلة عايزة تعالجها
وحنعالجها دي.. اقصد خناقة المسلمين والمسيحيين، السلفيين اتخضوا وحسوا انهم بقوا مكروهين والناس بتحملهم مسئولية بلاوي كتير في البلد، والحقيقة هم متحملين مسئولية حاجات كتير حصلت ايام مبارك واثارها موجودة لحد دلوقت، بس هم كمان ما ينفعش يتشيطنوا كده، لأن كل واحد فينا، سواء كفرد، او كجزء من مجموعة، عمل حاجات مضرة بالبلد لأن المناخ فاسد، واعتقد انهم حيصححوا سكتهم، ما هو مبارك مشي، وهم يقدروا يمارسوا حريتهم في العقيدة من غير ما يقرفوا غيرهم، واعتقد انهم عايزين يصلحوا صورتهم اللي اتشوهت قوي وهم فعلا ما كانوش عايزين الامور توصل لكده، هم زي البيوريتانز بتوع امريكا، عايزين يمشوا يكلموا الناس في ربنا والصلاة والدين ويبقى لهم كوميونيتي وخلاص كده، واظنهم ابتدوا يحطوا نفسهم على التراك الصحيح وابتدوا ياخدوا بالهم ان فيه اخطاء لازم تتصلح حتى لو ما صرحوش بوضوح انهم بيصلحوا اخطاء
نفس الحكاية بالنسبة للمسيحيين، هم اخدوا بالهم انهم قعدوا فترة كبيرة سلبيين، ومنعزلين، وملمومين على روحهم كده ومسلمين دماغهم للقنوات الطائفية، وعايزين بقى يبتدوا يشاركوا ويكون لهم دور، صحيح مشاركتهم لسه لها طابع طائفي، وتحركهم لسه بتوجيهات من الكنيسة، بس دي اول مرة يعتصموا مثلا خارج الكنيسة، وده تطور، حاولوا ينزلوا الاستفتاء ويراقبوا، برضه الدافع كان طائفي، بس اهي خطوة اولى، احنا كنا فين؟ ابتدوا يعترضوا على المصالحات العرفية، طبعا القنوات والمواقع المسيحية الطائفية بتاعة الحقونا المسلمين بيموتونا لسه شغالة بس ابتدوا هم يخرجوا عن اطارها ويتعاملوا على ارض الواقع، ويحاولوا يتضامنوا ويحاولوا يشاركوا وكانوا بيراقبوا في الاستفتاء على اللجان وبيحاولوا يحسنوا من نفسهم ويبقوا ايجابيين على قد مايقدروا، المنهج الطائفي القبلي مش حيخلص بين يوم وليلة، ولسه طبعا لما بيسمعوا اسم مسيحي بيسخنوا له اكتر، زي مثلا مايكل نبيل اللي املي ومنايا انه ما يتعذبش وماحدش يمسه ولا يعذبه عشان ما يعملش بطل على امنا، واصلا هو غير معبر عن المسيحيين، لا هو مسيحي، ولا مؤمن بالمسيحية، ولا هو بيعبر عن انتماءات المسيحيين، بس اسمه مايكل فسخنوا له.. لكنهم حتى لما سخنوا ابتدوا يقولوا: احنا مش موافقين على ارائه بس هو حر يعبر عن نفسه، ما قالوش النغمة بتاعة زمان: اااااه عشان مسيحي قبضوا عليه، وده برضه خطوة واسعة جدا، بس واحدة واحدة هم بيحاولوا يغيروا الطريقة اللي عاشوا بيها تلاتين سنة
الناس كلها بتحاول تحسن من نفسها، وتحاول انها تعمل حاجة كويسة، وتشوف هي غلطت في ايه طول الفترة اللي فاتت وتحاول تصلحه، واول استفتاح كان بالمجموعات اللي لها صفة دينية عشان دي اكتر المجموعات المؤثرة في المجتمع ودي حاجة حلوة، انا مبسوطة ومتفائلة
بس الطبقة المتوسطة مش واخدة بالها ان مبارك تسبب في انها طبقية حقيرة
مش قصدي اشتم، قصدي ان الطبقية دي حقيرة، يعني ايه طبقية حقيرة؟ يعني طبقية واطية، يعني قليل الاصل الواطي بس هو اللي يتكلم بطريقة: مش الجهلة والبصمجية هم اللي حيشرعوا لنا قوانينا... قليل الاصل الواطي محدث النعمة بس هو اللي مش عايز مجانية تعليم لأنه مش عايز ابنه جنب ابن الزبال في المدرسة، دي حتى مش طبقية الناس الشيك ولا طبقية الارستقراطية الانجليزية اللي ما تبانش من كتر ماهي معمولة بشياكة.. دي طبقية الناس اللي اشتروا فيلا من فلوس المخدرات وبيرموا قشر البرتقان على السجادة الشينواه ومعلقين ملابسهم الداخلية على دراع تمثال فينوس الكبير وشكله وحش قوي وجنبه فازة صيني ضخمةةةةةةةةةةةةة، ومعلقين في البيت النجفة اللي بتتعلق في الفنادق، ويتنكروا لجيرانهم القدام، وام الواد تقوله ما تلعبش مع ابن البواب عايزين نصاحب ولاد الناس الهاي لايف انت مش اقل من حد فيهم يا ولا 
يعني حتى مش عارفين يبقوا طبقيين على الاصول وبحق ربنا، بقوا طبقيين طبقية: العيش البلدي ده ما يدخلش عندنا البيت.. ما ناكلش الا فينو
وده طبعا لأننا قعدنا تحت حكم عيلة واطية تلاتين سنة فطبعت علينا كلنا، معلش تتعالج، بس تتعالج بإن الناس تاخد بالها انها بتقول كلام ما ينفعش يتقال، ما ينفعش تقول الشعب جاهل ومش حيعرف ينتخب الا اذا كنت معلق ملابسك الداخلية على دراع تمثال فينوس، ما ينفعش تقول مش عايزين مجانية تعليم لأنك مش عايز ابنك يتعلم مع ابن الفقير، ما ينفعش تقول ال50% عمال وفلاحين دول شوية بصمجية وجهلة ما يحطوش لنا التشريعات الا اذا كنت بترمي قشر البرتقان على السجادة الشينواه... بلدي قوي يا حسين
وعلى رأي علاء سيف: انت معترض على فكرة الكوتة ممكن نتفاهم ونتناقش في جدواها، لكن حتقول الفلاحين والعمال جهلة وما ينفعش يشرعوا لنا يبقى غور مش عايز اعرفك
ايه الجهل ده؟ 
مين اللي قال ان الشرط في العامل والفلاح المرشح انه يبقى مش متعلم؟
ومين اللي قال ان المشاركة في التشريعات تستوجب ان كل المشاركين فيها لازم يبقوا متعلمين ومتخصصين في القانون؟ مش فيه حاجة اسمها فئة منتفعين؟ والعمال والفلاحين من فئات المنتفعين؟ المنتفعين في كل حتة في الدنيا لهم دور في التشريع، ايه الشغل البلدي ده.. حتى مش عارف تبقى طبقي صح؟ ايه دخل العلام في وضع قوانين يشارك فيها فئة اجتماعية؟ انت ما تعرفش ان حتى الناس اللي ما عندهاش نسبة تمييز ايجابي للمنتفعين لهم نقابات وكيانات بتشارك في وضع القوانين وبتشيل نواب وتحط نواب؟ اكلمكم بقى باللغة اللي بتفهموها مدام عقدة الخواجة واكلاكم؟ ما سافرتش بلاد الخواجات وشفت الرعاة والفلاحين لما بيواجهوا مشاكل بيدخلوا المجالس التشريعية بالمعيز والخرفان بتاعتهم ويشيلوا النائب اللي خرب بيتهم هيلا بيلا - حرفيا مش مجازا - ويعزلوه؟ 
اما اللي بيقولوا: المرشحين في نسبة العمال والفلاحين لا يمثلوا العمال والفلاحين فعلا... آه.. ده على اساس ان الفئات كانوا بيمثلوا الفئات فعلا؟ يعني احمد عز كان يمثلك لكن مرشح الفلاحين هو اللي ما كانش بيمثلهم، ما المجلس كله لا يمثل الشعب على بعضه بكل فئاته، ومرشحين العمال والفلاحين ظباط شرطة، طب ما مرشحين الفئات رجال اعمال.. لو الفلاحين مش ظباط شرطة، الفئات كمان مش رجال اعمال، ومالك فرحان قوي انك متعلم كده وبتعرف لغات؟ ايه الإحداث ده؟ 
ولما ممدوح شاهين يقول: الخمسين في المية عمال وفلاحين من مكتسبات ثورة يوليو وما ينفعش نفرط فيها. ناس تقعد تشتم في ثورة يوليو؟ الله يرحمه، لولا ثورة يوليو ما كنتش انت اتعلمت ويا ريتك ما اتعلمت عشان ما تنساش اصلك.. ياي ياي ياي
يعني الجيش اللي بناء مؤسسته هرمي وهايراركي بيحترم القاعدة الشعبية وانت لأ؟ اه.. عارفين ليه؟ عشان احنا رباية شرطة مش جيش.. ظابط الجيش بيخاف على العسكري بتاعه وشفت بعيني لما عسكري واحد اتصاب 3 ظباط الجيش اتخضوا عليه ازاي وقعدوا يشتموا في الشعب كله عشان عسكري اتصاب، وركعوا على الارض عشان يداووه بايديهم، انما ظابط الشرطة بيضرب العسكري... واحنا بقالنا 30 سنة متربيين على ايد اللي بيضرب العسكري
بس احنا مش عايزين نبقى تربية ميري خالص، احنا عايزين نبقى تربية مهذبة من غير ما نضطر نجيب ميري يعرفنا الصح من الغلط ويضطر اللواء ممدوح شاهين يفهم ناس المفروض انهم مثقفين ازاي انك ما ينفعش تتجاهل اكتر من نص الشعب وتحتقرهم والراجل ضغطه يعلا ويروح المستشفى عشان المثقفين بيشتموا له في الفقرا والشعب 

مرة مش عاجبهم تصويت الشعب في الاستفتاء، ومرة مش عاجبهم مجانية التعليم وعايزين يأصولوا منها، ومرة مش عاجبهم نسبة العمال والفلاحين، مش عشان معترضين على فكرة الكوتة - وهي وجهة نظر محترمة نعرف نتناقش فيها مع الناس المعترضة على فكرة الكوتة وسوا اختلفنا او اتفقنا ممكن نفضل نحترم بعض - لكن عشان الفلاحين والعمال مش بيعرفوا انجليزي وما يصحش يشرعوا لنا
لالالالالا إحداث إحداث إحداث
أنا اقولك بقى لو عايز تبقى طبقي صح، الناس الشيك اللي بجد، الراقية اللي بجد، تعمل كده زي بيل جيتس مثلا اللي بيقعد ينشر صوره ايام ما كان فقير دقة ويقول انا ده، او زي الاميرة ديانا اللي تلبس لبس الفلاحين الانجليز وتقول احنا اصلنا ده، تقوم الناس تقول: شوف اميرة ولابسة لبس الفلاحين وفخورة بأجدادها الفلاحين... لأن عندها ثقة في نفسها، ومش محتاجة تفضل تقول انا اميرة انا اميرة ومتعلمة ومثقفة وعندي علم، الجرابيع قلالات الاصل بس هم اللي بيتكبروا على القاعدة العامة للشعب وعايزين يميزوا نفسهم عنهم، عشان هو عايز يتبرا من اصله، فبيشتم في الناس اللي بتفكره باصله، فالناس تقولك: افتكر جدك المقشف اللي لولا ثورة يوليو ما كانش عرف يدخل ابوك مدرسة ويعلمه، وبعدين ربنا كرمه واشتغل ايام الانفتاح وعرف يدخلك مدرسة لغات ويطلعك بترطن
ماهو انت اللي بتضطر الناس تقولك الكلام ده.. عشان حتى لما حبيت تمثل انك طبقي، بقيت طبقي واطي، ومش ذنبك، ذنب العيلة الواطية اللي قعدت تلاتين سنة تكرف وطيانها علينا
-----------
الخلاصة... زي ما ابونا قال على التويتر (فيه قس لطيف قوي قاعد على التويتر وجميل جدا، مش باقولكم فيه تطور على الصعيد ده حصل جامد) قال: الثورة شعارها كان "خبز حرية عدالة اجتماعية" لو نسيتوا الشعار ده يبقى ثورتكم فشلت.
والناس اللي عاملة متدينة دي، ما تعرفش ان ربنا حيخرب بيتها عشان الافترا على الفقرا والتكبر والكبر؟ 
اللي يمد ايده على مجانية التعليم ومجانية الصحة وحق السكن وحق القطاع الاكبر من الشعب في انه يمثل في البرلمان اقطعها له انا شخصيا
اللي قرفان من الشعب ومستعر من اصله، يا نحاول نصلح له مخه ونخليه ما يرميش قشر البرتقان على السجادة، بدل ما يقول الشعب محتاج توعية، ياخد باله ان هو اللي محتاج يفوق كده، يا اما نوديه الجيش في الصحرا كده لحد ما يتربى، ولما يتحط عسكري يعرف ان كلنا ولاد تسعة
انا مرشحي اللي حانتخبه للمجلس او للرئاسة - واللي لسه ما اعرفش هو مين - هو اللي حيعمل لي التعليم الحكومي احسن من التعليم الخاص، وحيعمل لي ضريبة تصاعدية، وحيعمل لي المستشفيات الحكومي بيتعالج فيها رجال الاعمال، وحيتمسك بحق اغلبية الشعب في انهم يبقوا في البرلمان، وحيعمل لي حد ادنى وحد اقصى للأجور
الا حق الغلابة.. الا حق الغلابة ده مافيهوش فصال والا اولع لكم في نفسي في الشارع، اي حاجة تانية نتفاهم فيها.. 
ادوا الغلابة التعليم والصحة والسكن والحد الادنى للاجور والتمثيل في البرلمان وخدوا بقية البلد ان شالله تعملوها قراطيس ما يهمنيش تعملوا فيها ايه
غير كده، والله لو المرشح نازل لي من السما مع اتنين ملايكة.. حارميه من الشباك
واعرفوا ان ربنا عمل ده كله في مبارك عشان ظلمه للفقرا 
واعرفوا ان ربنا حيخرب بيتنا لو تجاهلنا حق الفقرا... القضاء على الفقر الاولوية الكبرى قبل الدستور وقبل القانون وقبل حتى الحريات، وقبل اي حاجة
وانا من موئعي هذا احب احيي السلفيين والمسيحيين لروحهم الايجابية ومحاولاتهم المستميتة انهم يغيروا من نفسهم ويصححوا اخطاء الماضي 
ومن موئعي هذا باقول للطبقة المتوسطة... انت عيانة يا حبيبتي.. ربنا يشفيك، بس مافيش دكتور حيقدر يساعدك لو انت ما ساعدتيش نفسك
تعالجي نفسك ازاي؟
اقولك: بدل ما تقعد تحكم على الشعب المصري من كلام الست اللي بتساعدك ولا بتساعد مراتك في تنضيف البيت وتقول: ده شعب متخلف، خلي هدفك: يوم ما الست اللي بتساعدك في البيت تبقى لها مسمى وظيفي، ولها مرتب، مش يومية وخدي كيس الرز وكيس السكر، ويبقى لها يونيفورم، وجهة هي تابعة ليها، وابنها بيتعلم مع ابنك في المدرسة ويمكن يبقى قاعد معاه في نفس الديسك، وانت وهي بتتعالجوا في نفس المستشفى تبقى الثورة دي نجحت
غير كده... الثورة دي تبقى فشلت
ولو دخل قناة السويس بس اتخصص للتعليم والصحة حيكفي ويفيض واللي احنا عايزينه ينجز في خمس سنين بس
وربنا يشفي بتوع "الشعب المصري محتاج توعية".. اه والله، يشفيكم.. امبارح قعدت اتناقش مع ناس على التويتر خلوقي اتفلقت من العياط لمدة ساعة ونص وصحيت الصبح قعدت اعيط برضه... الشعب المصري مش محتاج توعية.. الشعب المصري محتاج حقه يرجع له
قال عايزين نوعي الشعب قال... دي امراض دي، انت اللي مش عارف تقنع الشعب بيك، والعمال والفلاحين اسيادك وتاج راسك، ولو انت مش عارف تقنع الاغلبية في الشعب بوجهة نظرك تبقى انت اللي غلط مش هو اللي مش واعي، يا غلط في افكارك يا غلط في اسلوبك يا غلط في شكلك كده على بعضك.. دور على الغلط فيك واعرف ليه غيرك بيعرف يقنع الناس وانت لأ، ليه غيرك عاجب الناس وانت لأ
ليه كل الناس اللي قابلتهم في الشارع النهاردة اللي من اول البواب وبياع السجاير والشباب اللي ماشي في الشارع، والستات الموظفات، كل اللي شافوا مكالمة اللواء ممدوح شاهين مع يسري فودة امبارح، تعاطفوا مع اللواء ممدوح شاهين ضد تلاتة مثقفين وحسوا انه معذور ومعاه حق مع انه هو اللي كان متعصب وهم اللي كانوا هاديين؟ لو تلاتة مثقفين ما عرفوش يقنعوا المشاهد العادي على اختلاف وظائفهم وخلفياتهم واللواء ممدوح شاهين عرف بعصبيته دي كلها يقنعهم، اكيد مش هو اللي غلط، اكيد هم اللي غلط.. يا اما هم اللي مش عارفين يتواصلوا، يا اما هم اللي منطقهم غلط، يا صياغتهم غلط.. يشوفوا ليه كل اللي قابلتهم النهاردة مش متعاطفين معاهم؟ وليه اللي قاعدين على التويتر والفيس بوك ما بقوش عارفين يعبروا عن مطالب الشعب بعد ما كانوا البادئين لمبادرة الثورة؟ 
كل الافكار والعقائد المحترمة بتقول ان الاجماع هو الصح.. مافيش غير الفاشية والنازية هي اللي بتقول ان المجموع جاهل وغبي والنخبة هي اللي صح
في الاسلام بارك الله في الجماعة
في المسيحية مبارك الشعب
في الديمقراطية الاغلبية هي الحاكمة

Wednesday 30 March 2011

نص الاعلان الدستوري

من موقع المصري اليوم


وحاصوت عليه هنا تاني على المدونة مادة مادة

المجلس الأعلى للقوات المسلحة


بعد الاطلاع على الإعلان الدستورى الصادر فى 13 من فبراير .


وعلى نتائج الإستفتاء على تعديل دستور جمهورية مصر العربية الذى جرى يوم 19 من مارس سنة 2011 وأعلنت نتيجة الموافقة علية فى 20 من مارس سنة 2011 .


وعلى البيان الصادر من المجلس الأعلى للقوات المسلحة فى 23 من مارس سنة 2011


قــــــــرر


( مــــــادة 1 )


جمهورية مصر العربية دولة نظامها ديمقراطى يقوم على أساس المواطنة .


والشعب المصرى جزء من الأمة العربية يعمل على تحقيق وحدتها الشاملة .
قشطة جدا
( مـــــــادة 2 )


الإسلام دين الدولة ، واللغة العربية لغتها الرسمية ، ومبادئ الشريعة الإسلامية المصدر الرئيسي للتشريع .
قشطة
( مــــــادة 3 )


السيادة للشعب وحده، وهو مصدر السلطات , ويمارس الشعب هذه السيادة ويحميها , ويصون الوحدة الوطنية .
قشطة جدا
( مــــــادة 4 )


للمواطنين حق تكوين الجمعيات وإنشاء النقابات والاتحادات والأحزاب وذلك على الوجه المبين في القانون.


ويحظر إنشاء جمعيات يكون نشاطها معاديا لنظام المجتمع أو سريا أو ذا طابع عسكرى .


ولا يجوز مباشرة أى نشاط سياسى أو قيام أحزاب سياسية على أساس دينى أو بناء على التفرقة بسبب الجنس أو الأصل .
قشطة
( مـــــــادة 5 )


يقوم الاقتصاد فى جمهورية مصر العربية على تنمية النشاط الاقتصادى والعدالة الاجتماعية وكفالة الأشكال المختلفة للملكية والحفاظ على حقوق العمال .
شغال


( مـــــــادة 6 )
للملكية العامة حرمة , وحمايتها ودعمها واجب على كل مواطن وفقا للقانون .


والملكية الخاصة مصونة , ولا يجوز فرض الحراسة عليها إلا فى الأحوال المبينة فى القانون وبحكم قضائى , ولا تنزع الملكية إلا للمنفعة العامة ومقابل تعويض وفقا للقانون. وحق الإرث فيها مكفول .
قشطة


ـ2ـ


( مــــــادة 7 )


المواطنون لدى القانون سواء ، وهم متساوون فى الحقوق والواجبات العامة ، لا تمييز بينهم فى ذلك بسبب الجنس أو الأصل أو اللغة أو الدين أو العقيدة .
قشطة جدا


( مـــــــادة 8 )


الحرية الشخصية حق طبيعى وهى مصونة لا تمس , وفيما عدا حالة التلبس لا يجوز القبض على أحد أو تفتيشه أو حبسه أو تقييد حريته بأى قيد أو منعه من التنقل إلا بأمر تستلزمه ضرورة التحقيق وصيانة أمن المجتمع , ويصدر هذا الأمر من القاضى المختص أو النيابة العامة , وذلك وفقا لأحكام القانون.


ويحدد القانون مدة الحبس الاحتياطى .
قشطة جدا


( مــــــادة 9 )


كل مواطن يقبض عليه أو يحبس أو تقيد حريته بأى قيد تجب معاملته بما يحفظ عليه كرامة الإنسان , ولا يجوز إيذاؤه بدنيا أو معنويا , كما لا يجوز حجزه أو حبسه فى غير الأماكن الخاضعة للقوانين الصادرة بتنظيم السجون .


وكل قول يثبت أنه صدر من مواطن تحت وطأة شئ مما تقدم أو التهديد بشئ منه يهدر ولا يعول عليه.
قشطة آخر حاجة


( مـــــــادة 10 )


للمساكن حرمة فلا يجوز دخولها ولا تفتيشها إلا بأمر قضائى مسبب وفقا لأحكام القانون .
قشطة آخر حاجة


( مــــــادة 11 )


لحياة المواطنين الخاصة حرمة يحميها القانون .


وللمراسلات البريدية والبرقية والمحادثات التليفونية وغيرها من وسائل الاتصال حرمة, وسريتها مكفولة , ولا تجوز مصادرتها أو الاطلاع عليها أو رقابتها إلا بأمر قضائى مسبب ولمدة محددة ووفقا لأحكام القانون.
قشطة آخر حاجة


( مــــــادة 12 )


تكفل الدولة حرية العقيدة وحرية ممارسة الشعائر الدينية .


وحرية الرأي مكفولة , ولكل إنسان التعبير عن رأيه ونشره بالقول أو الكتابة
أو التصوير أو غير ذلك من وسائل التعبير فى حدود القانون , والنقد الذاتى والنقد البناء ضمان لسلامة البناء الوطنى .
قشطة آخر جاجة


ـ3ـ


( مـــــادة 13 )


حرية الصحافة والطباعة والنشر ووسائل الإعلام مكفولة, والرقابة على الصحف محظورة, وإنذارها أو وقفها أو إلغاؤها بالطريق الإدارى محظور , ويجوز استثناء فى حالة إعلان الطوارئ أو زمن الحرب أن يفرض علي الصحف والمطبوعات ووسائل الإعلام رقابة محددة فى الأمور التى تتصل بالسلامة العامة أو أغراض الأمن القومى , وذلك كله وفقا للقانون.
قشطة


( مـــــــادة 14 )


لا يجوز أن تحظر على أى مواطن الإقامة في جهة معينة ولا أن يلزم بالإقامة فى مكان معين إلا فى الأحوال المبينة فى القانون .
قشطة
( مـــــــادة 15 )


لا يجوز إبعاد أى مواطن عن البلاد أو منعه من العودة إليها ، وتسليم اللاجئين السياسيين محظور.
قشطة جدا


( مـــــــادة 16 )


للمواطنين حق الاجتماع الخاص فى هدوء غير حاملين سلاحا ودون حاجة إلى إخطار سابق. ولا يجوز لرجال الأمن حضور اجتماعاتهم الخاصة , والاجتماعات العامة والمواكب والتجمعات مباحة فى حدود القانون .
قشطة آخر حاجة 
( مـــــادة 17)


كل اعتداء على الحرية الشخصية أو حرمة الحياة الخاصة للمواطنين وغيرها من الحقوق والحريات العامة التي يكفلها الدستور والقانون جريمة لا تسقط الدعوى الجنائية ولا المدنية الناشئة عنها بالتقادم , وتكفل الدولة تعويضا عادلا لمن وقع عليه الاعتداء .
قشطة جدااااااااااااااااااااااااااااااااااااا جيت لنا يا مبارك
( مــــــادة 18 )


إنشاء الضرائب العامة وتعديلها أو إلغاؤها لا يكون إلا بقانون . ولا يعفى أحد من أدائها إلا فى الأحوال المبينة فى القانون . ولا يجوز تكليف أحد أداء غير ذلك من الضرائب أو الرسوم إلا فى حدود القانون.
قشطة
( مـــــادة 19 )


العقوبة شخصيــــــة .


ولا جريمة ولا عقوبة إلا بناء على قانون , ولا توقع عقوبة إلا بحكم قضائى , ولا عقاب
إلا على الأفعال اللاحقة لتاريخ نفاذ القانون .
قشطة


( مــــــادة 20 )


المتهم برئ حتى تثبت إدانته فى محاكمة قانونيه تكفل له فيها ضمانات الدفاع عن نفسه , وكل متهم فى جناية يجب أن يكون له محام يدافع عنه .
قشطة
ـ4ـ


( مــــــادة 21 )


التقاضى حق مصون ومكفول للناس كافة , ولكل مواطن حق الالتجاء إلى قاضيه الطبيعى , وتكفل الدولة تقريب جهات القضاء من المتقاضين وسرعة الفصل فى القضايا .


ويحظر النص فى القوانين على تحصين أى عمل أو قرار إدارى من رقابة القضاء .
قشطة
( مـــــادة 22 )


حق الدفاع أصالة أو بالوكالة مكفول .


ويكفل القانون لغير القادرين مالياً وسائل الالتجاء إلى القضاء والدفاع عن حقوقهم .
قشطة
( مـــــادة 23 )


يبلغ كل من يقبض عليه أو يعتقل بأسباب القبض عليه أو اعتقاله فورا , ويكون لـه حق الاتصال بمن يرى إبلاغه بما وقع أو الاستعانة به على الوجه الذي ينظمه القانون , ويجب إعلانه علي وجه السرعة بالتهم الموجهة إليه , ولـه ولغيره التظلم أمام القضاء من الإجراء الذى قيد حريته الشخصية , وينظم القانون حق التظلم بما يكفل الفصل فيه خلال مدة محددة , وإلا وجب الإفراج حتما.
قشطة
( مــــــادة 24 )


تصدر الأحكام وتنفذ باسم الشعب , ويكون الامتناع عن تنفيذها أو تعطيل تنفيذها من جانب الموظفين العموميين المختصين جريمة يعاقب عليها القانون. وللمحكوم لـه فى هذه الحالة حق رفع الدعوى الجنائية مباشرة إلى المحكمة المختصة .
قشطة
(مـــــادة 25 )


رئيس الدولة هو رئيس الجمهورية ، ويسهر على تأكيد سيادة الشعب وعلى احترام الدستور وسيادة القانون وحماية الوحدة الوطنية والعدالة الاجتماعية وذلك على الوجه المبين بهذا الإعلان والقانون .


ويباشر فور توليه مهام منصبه الاختصاصات المنصوص عليها بالمادة ( 56) من هذا الإعلان عدا المبين فى البندين 1 و 2 منها .
طيب
(مـــــادة 26 )


يشترط فيمن يُنتخب رئيساً للجمهورية أن يكون مصرياً من أبوين مصريين ، وأن يكون متمتعاً بحقوقه المدنية والسياسية ، وألا يكون قد حمل أو أى من والديه جنسية دولة أخرى ، وألا يكون متزوجاً من غير مصرى، وألا تقل سنه عن أربعين سنة ميلاديـة .
قشطة




ـ5ـ


(مــــــادة 27 )


ينتخب رئيس الجمهورية عن طريق الاقتراع السرى العام المباشر .


ويلزم لقبول الترشيح لرئاسة الجمهورية أن يؤيد المتقدم للترشح ثلاثون عضواً على الأقل من الأعضاء المنتخبين لمجلسى الشعب أو الشورى، أو أن يحصل المرشح على تأييد ما لا يقل عن ثلاثين ألف مواطـن ممن لهم حق الانتخاب في خمس عشرة محافظة على الأقل، بحيث لا يقل عدد المؤيدين فى أى من تلك المحافظات عن ألف مؤيـد .


وفى جميع الأحوال لا يجوز أن يكون التأييد لأكثر من مرشح، وينظم القانون الإجراءات الخاصة بذلك كله .


ولكل حزب من الأحزاب السياسية التي حصل أعضاؤها على مقعد على الأقل بطريق الانتخاب فى أى من مجلسى الشعب والشورى فى أخر انتخابات أن يرشح أحد أعضائه لرئاسة الجمهورية .
قشطة
(مـــادة 28 )


تتولى لجنة قضائية عليا تسمى " لجنة الانتخابات الرئاسية " الإشراف على انتخابات رئيس الجمهورية بدءاً من الإعلان عن فتح باب الترشيح وحتى إعلان نتيجة الانتخاب .


وتـُشكل اللجنة من رئيس المحكمة الدستورية العليا رئيساً ، وعضوية كل من رئيس محكمة إستئناف القاهرة ، وأقدم نواب رئيس المحكمة الدستورية العليا ، وأقدم نواب رئيس محكمة النقض ، وأقدم نواب رئيس مجلس الدولـة .


وتكون قرارات اللجنة نهائية ونافذة بذاتها ، غير قابلة للطعن عليها بأى طريق وأمام أية جهة، كما لا يجوز التعرض لقراراتها بوقف التنفيذ أو الإلغاء ، كما تفصل اللجنة فى اختصاصها ، و يحدد القانون الاختصاصات الأخرى للجنـة .


وتـُشكل لجنة الانتخابات الرئاسية اللجان التى تتولى الإشراف على الاقتراع والفرز على النحو المبين فى المادة 39 .


ويُعرض مشروع القانون المنظم للانتخابات الرئاسية على المحكمة الدستورية العليا قبل إصداره لتقرير مدى مطابقته للدستـور .


وتـُصـدر المحكمة الدستورية العليا قرارها فى هذا الشأن خلال خمسة عشر يوماً من تاريخ عرض الأمر عليها، فإذا قررت المحكمة عدم دستورية نص أو أكثر وجب إعمال مقتضى قرارها عند إصدار القانون، وفى جميع الأحوال يكون قرار المحكمة ملزماً للكافة ولجميع سلطات الدولة، ويُنشـر فى الجريدة الرسمية خلال ثلاثة أيام من تاريخ صدوره .
قشطة
(مـــــادة 29 )


مدة الرئاسة أربع سنوات ميلادية تبدأ من تاريخ إعلان نتيجة الانتخاب ، ولا يجوز إعادة انتخاب رئيس الجمهورية إلا لمدة واحدة تاليـة .
قشطة
(مـــــادة 30 )


يؤدى الرئيس أمام مجلس الشعب قبل أن يباشر مهام منصبه اليمين الآتية :


" أقسم بالله العظيم أن أحافظ مخلصاً على النظام الجمهورى ، وأن أحترم الدستور والقانون ، وأن أرعى مصالح الشعب رعاية كاملة ، وأن أحافظ على استقلال الوطن وسلامة أراضيه " .
مش مهم الحلفانات دي ما بناكلش منها 
ـ6ـ


(مــــــــــادة 31 )


يعين رئيس الجمهورية ، خلال ستين يوماً على الأكثر من مباشرته مهام منصبه ، نائباً لـه
أو أكثر ويحدد اختصاصاته ، فإذا اقتضت الحال إعفاءه من منصبه وجب أن يعين غيره .


وتسرى الشروط الواجب توافرها فى رئيس الجمهورية والقواعد المنظمة لمساءلته على نواب رئيس الجمهورية .
قشطة


( مـــــادة 32 )


يُشكل مجلس الشعب من عدد من الأعضاء يحدده القانون على ألا يقل عن ثلاثمائة وخمسين عضوا، نصفهم على الأقل من العمال والفلاحين ، ويكون إنتخابهم عن طريق الانتخاب المباشر السرى العام .


ويبين القانون تعريف العامل والفلاح، ويحدد الدوائر الانتخابية التى تقسم إليها الدولة .


ويجوز لرئيس الجمهورية أن يعين فى مجلس الشعب عدداً من الأعضاء لا يزيد على عشرة .
قشطة جداااااااااااا ميت فل وسبعتاشر بالنسبة للعمال والفلاحين
تيييييييت بالنسبة لتعيين الرئيس لعشر اعضاء


( مـــــادة 33 )


يتولى مجلس الشعب فور انتخابه سلطة التشريع , ويقرر السياسة العامة للدولة , والخطة العامة للتنمية الاقتصادية والاجتماعية , والموازنة العامة للدولة , كما يمارس الرقابة على أعمال السلطة التنفيذية .
قشطة
( مـــــادة 34 )


مدة مجلس الشعب خمس سنوات ميلادية من تاريخ أول اجتماع له .
زي بعضه مؤقتا، بعد كده نعمل مدة المجلس قد مدة الرئاسة اربع سنين 
(مــــادة 35 )


يشكل مجلس الشورى من عدد من الأعضاء يحدده القانون على ألا يقل عن مائة واثنين وثلاثين عضواً ، وينتخب ثلثا أعضاء المجلس بالاقتراع المباشر السرى العام على أن يكون نصفهم على الأقل من العمال والفلاحين، ويعين رئيس الجمهورية الثلث الباقى .


ويحدد القانون الدوائر الانتخابية الخاصة بمجلس الشورى .
زي بعضه مؤقتا.. بعد كده نلغيه كله المجلس ده
(مـــــادة 36 )


مدة عضوية مجلس الشورى ست سنوات .
نتكلم بالليل نتكلم بالليل 


(مـــــادة 37 )


يتولى مجلس الشورى فور إنتخابه دراسة وإقتراح ما يراه كفيلا بالحفاظ على دعم الوحدة الوطنية والسلام الإجتماعى وحماية المقومات الأساسية للمجتمع وقيمه العليا والحقوق والحريات والواجبات العامة ويجب اخذ رأى المجلس فيما يلى :


1ـ مشروع الخطة العامة للتنمية الاجتماعية والاقتصادية.
2ـ مشروعات القوانين التي يحيلها إليه رئيس الجمهورية.
3ـ ما يحيله رئيس الجمهورية إلى المجلس من موضوعات تتصل بالسياسة العامة للدولة
أو بسياستها فى الشئون العربية أو الخارجية.


ويبلغ المجلس رأيه فى هذه الأمور إلى رئيس الجمهورية ومجلس الشعب .
قشطة


ـ7ـ


(مـــــادة 38 )


ينظم القانون حق الترشيح لمجلسى الشعب والشورى وفقا لأى نظام انتخابى يحدده . ويجوز أن يتضمن حدا أدنى لمشاركة المرأة فى المجلسين .
قشطة جدا
(مــــادة 39 )


يحدد القانون الشروط الواجب توافرها فى أعضاء مجلسى الشعب والشورى ، ويبين أحكام الانتخاب والاستفتاء .


وتتولى لجنة عليا ذات تشكيل قضائى كامل الإشراف على الانتخاب والاستفتاء ، بدءاً من القيد بجداول الانتخاب وحتى إعلان النتيجة ، وذلك كله على النحو الذى ينظمه القانون .ويجرى الاقتراع والفرز تحت إشراف أعضاء من هيئات قضائية ترشحهم مجالسها العليا ، ويصدر باختيارهم قرار من اللجنة العليا.
قشطة جدا
(مـــــادة 40 )


تختص محكمة النقض بالفصل فى صحة عضوية أعضاء مجلسى الشعب والشورى .


وتقدم الطعون إلى المحكمة خلال مدة لا تجاوز ثلاثين يوماً من تاريخ إعلان نتيجة الانتخاب ، وتفصل المحكمة فى الطعن خلال تسعين يوماً من تاريخ وروده إليها .


وتعتبر العضوية باطلة من تاريخ إبلاغ المجلسين بقرار المحكمـة
قشطة


(مــــادة 41 )


تبدأ إجراءات انتخاب مجلسى الشعب والشورى خلال ستة أشهر من تاريخ العمل بهذا الإعلان.
ويمارس مجلس الشورى اختصاصاته بأعضائه المنتخبين .


ويتولى رئيس الجمهورية، فور انتخابه، استكمال تشكيل المجلس بتعيين ثلث أعضائه ، ويكون تعيين هؤلاء لاستكمال المدة الباقيـة للمجلس على النحو المبين بالقانون .
قشطة
(مـــــادة 42 )


يقسم كل عضو من أعضاء مجلسى الشعب والشورى أمام مجلسه قبل أن يباشر عمله اليمين الآتية:


" أقسم بالله العظيم أن أحافظ مخلصاً على سلامة الوطن والنظام الجمهورى ، وأن أرعى مصالح الشعب ، وأن أحترم الدستور والقانون " .
قلنا ما بناكلش من الحلفانات


(مـــــادة 43 )


لا يجوز لكل عضو من أعضاء مجلسى الشعب والشورى أثناء مدة عضويته أن يشترى
أو يستأجر شيئا من أموال الدولة , أو أن يؤجرها أو يبيعها شيئا من أمواله أو أن يقايضها
عليه , أو أن يبرم مع الدولة عقدا بوصفه ملتزما أو موردا أو مقاولاُ.
قشطة اخر حاجة.. الله الله الله


( مــــادة 44 )


لا يجوز إسقاط عضوية أحد أعضاء مجلسى الشعب والشورى إلا إذا فقد الثقة والاعتبار , أو فقد أحد شروط العضوية أو صفة العامل أو الفلاح التي انتخب علي أساسها , أو أخل بواجبات
عضويته . ويجب أن يصدر قرار إسقاط العضوية من المجلس بأغلبية ثلثى أعضائه .
قشطة جدا


ـ 8 ـ
(مــــادة 45 )


لا يجوز فى غير حالة التلبس بالجريمة اتخاذ أية إجراءات جنائية ضد أحد أعضاء مجلسى الشعب والشورى إلا بإذن سابق من مجلسه .


وفى غير دور انعقاد المجلس يتعين أخذ إذن رئيس المجلس .


ويخطر المجلس عند أول انعقاد له بما اتخذ من إجراء .
همممممم


( مـــــادة 46 )


السلطة القضائية مستقلة ، وتتولاها المحاكم على اختلاف أنواعها ودرجاتها، وتصدر أحكامها وفق القانون .
قشطة اخر حاجة 


( مـــــادة 47 )


القضاة مستقلون، وغير قابلين للعزل وينظم القانون مساءلتهم تأديبياً، ولا سلطان عليهم
فى قضائهم لغير القانون، ولا يجوز لأية سلطة التدخل فى القضايا أو فى شئون العدالة .
قشطة اخر حاجة
( مــــادة 48 )


مجلس الدولة هيئة قضائية مستقلة ، ويختص بالفصل فى المنازعات الإدارية وفى الدعاوى التأديبية ، ويحدد القانون اختصاصاته الأخرى .
قشطة
( مـــــادة 49 )


المحكمة الدستورية العليا هيئة قضائية مستقلة قائمة بذاتها، وتختص دون غيرها بالرقابة القضائية على دستورية القوانين واللوائح، وتتولى تفسير النصوص التشريعية، وذلك كله على الوجه المبين فى القانون .


ويعين القانون الاختصاصات الأخرى للمحكمة وينظم الإجراءات التى تتبع أمامها.
قشطة


( مـــــادة 50 )
يحدد القانون الهيئات القضائية واختصاصاتها، وينظم طريقة تشكيلها ، ويبين شروط وإجراءات تعيين أعضائها ونقلهم .
قشطة جدا


( مـــــادة 51 )


ينظم القانون القضاء العسكرى ويبين اختصاصاته فى حدود المبادئ الدستورية .
قشطةةةةةةةةةةةة ها؟ ها؟ قشطة يعني


( مـــــادة 52 )


جلسات المحاكم علنية إلا إذا قررت المحكمة جعلها سرية مراعاة للنظام العام أو الآداب ,
وفى جميع الأحوال يكون النطق بالحكم فى جلسة علنية .
قشطة


( مـــــادة 53 )


القوات المسلحة ملك للشعب, مهمتها حماية البلاد وسلامة أراضيها وأمنها , ولا يجوز لأية هيئة أو جماعه إنشاء تشكيلات عسكرية أو شبه عسكرية , والدفاع عن الوطن وأرضه واجب مقدس , والتجنيد إجبارى وفقاً للقانون .
ويبين القانون شروط الخدمة والترقية فى القوات المسلحة .
قشطةةةةةةةة جدا جدا جداااااااااااااااااااااااااااااااااا، المادة دي هي اللي ظبطتنا يوم 11 فبراير


( مـــــادة 54 )


ينشأ مجلس يسمى " مجلس الدفاع الوطنى " ويتولى رئيس الجمهورية رئاسته، ويختص بالنظر فى الشئون الخاصة بوسائل تأمين البلاد وسلامتها، ويبين القانون إختصاصاته الأخرى .
تيييييييييييييييييييييت.. رئيس الجمهورية تاني؟ انا مش عايزة اشوف خلقته ده
ـ 9 ـ


( مـــــادة 55 )


الشرطة هيئة مدنية نظامية ، تؤدى واجبها فى خدمة الشعب ، وتكفل للمواطنين الطمأنينة والأمن ، وتسهر على حفظ النظام والأمن العام والآداب وفقاً للقانون .
قشطة
( مـــــادة 56 )


يتولى المجلس الأعلى للقوات المسلحة إدارة شئون البلاد، ولـه فى سبيل ذلك مباشرة السلطات الآتية :
1ـ التشريع .
2ـ إقرار السياسة العامة للدولة والموازنة العامة ومراقبة تنفيذها .
3ـ تعيين الأعضاء المعينين فى مجلس الشعب .
4ـ دعوة مجلسى الشعب والشورى لانعقاد دورته العادية وفضها والدعوة لإجتماع غير عادى وفضه .
5ـ حق إصدار القوانين أو الاعتراض عليها .
6ـ تمثيل الدولة فى الداخل والخارج، وإبرام المعاهدات والاتفاقيات الدولية ، وتعتبر جزءاً من النظام القانونى فى الدولة .
7ـ تعيين رئيس مجلس الوزراء ونوابه والوزراء ونوابهم وإعفاؤهم من مناصبهم .
8ـ تعيين الموظفين المدنيين والعسكريين والممثلين السياسيين وعزلهم على الوجه المبين فى القانون، واعتماد ممثلى الدول الأجنبية السياسيين .
9ـ العفو عن العقوبة أو تخفيفها أما العفو الشامل فلا يكون إلا بقانون .
10ـ السلطات والاختصاصات الأخرى المقررة لرئيس الجمهورية بمقتضى القوانين واللوائح .


وللمجلس أن يفوض رئيسه أو أحد أعضائه فى أى من اختصاصاته .


تيييييييييييييييييييييييييييييييييييييييييييتتتتتتتتتتتتتتتتتتتتتتتتت
تيييييييييييييييييييييييييييييييتتتتتتتتتتتتتتتتتتتتتتتتتتتتتتتتتتتتتتتتتتتتتتتتتت
تيييييييييييييييييييييييييييييييييييييييييييتتتتتتتتتتتتتتتتتتتتتتتتتتتتتتتتتتتتتتتت
ايه الصلاحيات دي كلها؟
ايه ده؟
دي كلها صلاحيات رئيس الجمهورية.. لا لا لا لا 
شيلوا 1 و3 و5 و6 و7 و8 و9.. 6 دي هي اللي عملت كامب ديفيد
ما يوقعش اتفاقيات بدون الرجوع للبرلمان، والوزارة بانتخاب مجلس الشعب مش باختياره هو
اييييييييييييييييييييييييييييييييييييييههههههههههه


( مـــــادة 57 )


يتولى مجلس الوزراء والوزراء السلطة التنفيذية كل فيما يخصه ، وللمجلس على الأخص مباشرة الاختصاصات الآتية :


1ـ الاشتراك مع المجلس الأعلى للقوات المسلحة فى وضع السياسة العامة للدولة , والإشراف على تنفيذها وفقا للقوانين والقرارات الجمهورية.
2ـ توجيه وتنسيق ومتابعة أعمال الوزارات والجهات التابعة لها والهيئات والمؤسسات العامة.
3ـ إصدار القرارات الإدارية والتنفيذية وفقا للقوانين واللوائح والقرارات ومراقبة تنفيذها.
4ـ إعداد مشروعات القوانين واللوائح والقرارات .
5ـ إعداد مشروع الموازنة العامة للدولة.
6ـ إعداد مشروع الخطة العامة للدولة.
7ـ عقد القروض ومنحها وفقا للمبادئ الدستورية.
8ـ ملاحظة تنفيذ القوانين والمحافظة على أمن الدولة وحماية حقوق المواطنين ومصالح الدولة.
طيب.. بس يعني حيعملوا ايه هم اذا كان الرئيس هو اللي معينهم؟ 
ـ10ـ


( مـــــادة 58 )


لا يجوز للوزير أثناء تولى منصبه أن يزاول مهنة حرة أو عملا تجاريا أو ماليا
أو صناعياً, أو أن يشترى أو يستأجر شيئا من أموال الدولة , أو أن يؤجرها أو يبيعها شيئا من أمواله , أو أن يقايضها عليه .
قشطة هااااااااااااااااايل
(مـــــادة 59 )


يعلن رئيس الجمهورية، بعد أخذ رأى مجلس الوزراء، حالة الطوارئ على الوجه المبين فى القانون ويجب عرض هذا الإعلان على مجلس الشعب خلال السبعة أيام التالية ليقرر ما يراه بشأنه .


فإذا تم الإعلان فى غير دور الانعقاد وجبت دعوة المجلس للانعقاد فوراً للعرض عليه وذلك بمراعاة الميعاد المنصوص عليه فى الفقرة السابقة .


وإذا كان مجلس الشعب منحلاً يعرض الأمر على المجلس الجديد فى أول اجتماع له .


ويجب موافقة أغلبية أعضاء مجلس الشعب على إعلان حالة الطوارئ .


وفى جميع الأحوال يكون إعلان حالة الطوارئ لمدة محددة لا تجاوز ستة أشهر ولا يجوز مدها إلا بعد استفتاء الشعب وموافقته على ذلك .
قشطة جدا


(مـــــادة 60 )


يجتمع الأعضاء غير المعينين لأول مجلسى شعب وشورى فى اجتماع مشترك ، بدعوة من المجلس الأعلى للقوات المسلحة ، خلال ستة أشهر من انتخابهم ، لإنتخاب جمعية تأسيسية من مائة عضو ، تتولى إعداد مشروع دستور جديد للبلاد فى موعد غايته ستة أشهر من تاريخ تشكيلها، ويُعرض المشروع ، خلال خمسة عشر يوماً من إعداده ، على الشعب لاستفتائه فى شأنه ، ويعمل بالدستور من تاريخ إعلان موافقة الشعب عليه فى الاستفتاء .
قشطة قشطة قشطة قشطة قشطة قشطة قشطة قشطة قشطة 


(مــــادة 61 )


يستمر المجلس الأعلى للقوات المسلحة فى مباشرة الاختصاصات المحددة فى هذا الإعلان وذلك لحين تولى كل من مجلسى الشعب والشورى لاختصاصاتهما , وحتى انتخاب رئيس الجمهورية ومباشرته مهام منصبه كلُ فى حينه.
قشطة
(مـــــادة 62 )


كل ما قررته القوانين واللوائح من أحكام قبل صدور هذا الإعلان الدستورى يبقى صحيحا ونافذا ، ومع ذلك يجوز إلغاؤها أو تعديلها وفقا للقواعد والإجراءات المقررة فى هذا الإعلان .
قشطة
(مـــــادة 63 )


ينشر هذا الإعلان فى الجريدة الرسمية ويعمل به من اليوم التالى لتاريخ نشره .
اتنشر


كله بالنسبة لي قشطة ما عدا الصلاحيات
ومبسوطة جدا من مادة 60 دي مادة ملزمة وبتخلي المجلس هو اللي حينتخب اللجنة التأسيسية
اهم حاجة ان دستور 71 سقط كده نظمي رسمي


البلاوي اللي ورا عمر سليمان... وكمان سيف اليزل مرشح نفسه؟

نوووووووووووووووووووووووووو غيان دو غياااااااااااااااااااان
احمد موسى كتب مقال يرشح عمر سليمان، وزي ما احنا عارفين احمد موسى من زمان كان بيقرا الغيب، لكن احنا مش حنعتبره بيقرا الغيب، حنعتبره بيقول رايه وحنقول له ما تقولش رايك تاني.. بمنتهى الديمقراطية 
مصادفة بقى ان سامح سيف اليزل عايز يرشح نفسه.. هو عموما مصدر الخبر هي اليوم السائع، وزي ما احنا عارفين، اليوم السائع بتعبر عن رأيها بالظبط زي ما احمد موسى بيعبر عن رايه لانهم الاتنين بيقروا من نفس البلورة السحرية
كلا البطة... كله الا عمر سليمان، اهي دي بقى ممكن اموت فيها موتا
اولا: مافيش حد في الدنيا يرشح واحد كان في المخابرات لرئاسة الجمانهورية... ابتا ابتا ابتاااااا، بتوع المخابرات دول بيعيشوا ويموتوا وما بنعرفش ولاءهم الحقيقي كان لمين، مافيش الا جمعة الشوان بس اللي اتأكدنا من ولائه، وده بسبب انه اتبهدل، لو كان عاش عيشة كويسة كنا فضلنا شاكين فيه، ما تقوليش رأفت الهجان، رأفت الهجان اسرائيل بتقول عليه عميل مزدوج، واحنا بنقول بطل قومي، اسرائيل بتكدب كتير، بس احنا كدابين برضه، وما بين الكدابين تضيع الحقائق، انا طبعا مش عايزة احطم لكم الخيالات اللي بناها صالح مرسي، كفاية اللي عمله فينا عمر سليمان بعد "باط هوين.. براذر موسليمهود" وخلانا نقطع كل روايات رجل المستحيل اللي قريناها، ومش باقول ان رأفت الهجان مش وطني، بس فيه احتمال تسعين في المية يبقى وطني، واحتمال عشرة في المية يبقى مش وطني، فهو مثلا ما اتبهدلش زي جمعة الشوان، هو كان مزروع في اسرائيل وقت النكسة، والنكسة حصلت بخيانة، قد تكون الخيانة مش منه، وقد يكون ما قصرش وبعت التقارير كلها وهم اللي قصروا او خانوا او اي حاجة، الخلاصة، احنا كنا زارعين جاسوس في مكان استراتيجي واتهزمنا برضه، وعمرنا ما حنعرف السبب الحقيقي لهزيمتنا، عندك مثلا اشرف مروان، اسرائيل بتقول عليه عميل مزدوج، ومبارك، اللي هو حبيب اسرائيل بالاساس، بيقول عليه بطل قومي، وما نعرفش كان يقصد أنهي قوم بالظبط، لأن فيه احتمال كبير يبقى مبارك معتبر ان اسرائيل هم قومه
احنا مالناش دعوة يا عم برمز مخابراتي يبقى رئيس جمهورية.. احنا مالنا احنا، ثم ايه دخل رئاسة الجمهورية بشغل المخابرات، رئاسة الجمهورية شغل سياسة، المخابرات شغل مخابرات، لا ينفع الرئيس يعمل شغل المخابرات، ولا ينفع المخابرات يعمل شغل الرئيس، اذا كنا مش عايزين ظابط جيش للرئاسة، مع ان ظابط الجيش ده بقى نسبة الشك في ولائه قليلة قوي خصوصا لو كان قتل واتقتل.. احنا عايزين رئيس يفهم في القانون والسياسة وحقوق الانسان ويبقى له ولاء واضح ومعروف يتحاسب عليه
وعلى رأي غادة صاحبتي: حد يجيب كبير البصاصين رئيس؟ 
ثانيا: ايه الحكاية بالظبط؟ ليه الاصرار على ان حد من المخابرات العامة يبقى رئيس.. لو كانت النية سليمة كانوا اقترحوا مخابرات عسكرية لأن دول ولاءهم للوطن ومالهمش تعاون مع اسرائيل، انما المخابرات العامة نضمنها منين وهم لهم تاريخ في التعاون مع السي اي ايه؟ 
ونقعد نخمن ليه؟
ادي ولاء عمر سليمان اهو.. للسي آي إيه
واحد ضحك على الامريكان عشان يحتلوا العراق، والاكتر من كده انه طلب من الاسرائيليين انهم يحتلوا سيناء عشان يخلصوه من التعاون اللي بين بدو سيناء وبين حماس، وكان بيتفق مع الامريكان سنة 2007 على حرب غزة سنة 2009/ 2010 ويقول لهم ما توقفوش اطلاق النار الا لما انا اقولكم عشان عندي مصادر جوة حتقول لي وقت ما حماس سلاحها يخلص حاقولكم توقفوا الضرب، وقال للامريكان انا زارع خلايا سرية جوة ايران عشان تعمل قلاقل وبلبلة وقت ما تحبوا تعملوا الانقلاب على احمدي نجاد قولوا لي عشان اديهم الاشارة، وهو اللي ضخ غاز مسمم في الانفاق ضد الفلسطينيين، وهو اللي عذب الناس اللي امريكا جابتهم من افغانستان ونزلتهم ترانزيت هنا... 
واللي مش مصدقني اهو
ايه ايه ايه يا جدعان؟ احنا ناقصين رعب؟ احمد موسى يطلع يقول انا بارشح عمر سليمان للرئاسة وسامح سيف اليزل اللي كان بيشتغل مع عمر سليمان يقول انا حاترشح للرئاسة؟ وبعدين سامح اليزل ده كان بيهرتل في الكلام ويقول: احنا زارعين جواسيس في اسرائيل لكنهم اكثر حنكة من جواسيس اسرائيل عندنا، عشان كده احنا بنقفش جواسيسهم وهم مش بيقفشوا جواسيسنا
ايه الهلاوس دي؟ ايران قبضت على عملاء للمخابرات المصرية عندها واسرائيل لأ؟ يعني انت عايز تقنعني ان احنا اشطر من اسرائيل وان ايران اشطر منا؟ امال اسرائيل نجحت النجاحات دي كلها ازاي؟ ببركة دعا الوالدين؟ وازاي المخابرات الايراني اشطر منا يعني؟ دي تبقى مصيبة.. ولو هم فالحين كده كانوا عرفوا يسيطروا على القلاقل اللي حصلت ولسه بتحصل عندهم، لا هم مش اشطر منا لا
وبعدين احنا كنا ناسيين موضوع عمر سليمان ده لحد ما هيج لنا موضوع كاميليا تاني
هو ايه اللي صحاه؟ ماحدش فتح موضوع كاميليا ده غيره، العادلي في السجن، وهو اللي برة، يبقى هو اللي عمل كده، ماهم اللي كانوا ماسكين الملف ده مع بعض، ومعاهم دراعات صفوت وسرور وعزمي
طب ايه اللي يخليك انت تضايقنا احنا دلوقت؟ احنا مش كنا سايبينك في حالك وماسكين في خناق صفوت وعزمي وسرور؟ لازم تفكرنا انك كنت العقل المدبر؟ 
افففففففف
طاااب خلاص..
دلوقت المطلب بقى من الاخوة الفلسطينيين والعراقيين انهم يرفعوا قضية على عمر سليمان
احنا هنا نرفع لهم القضية لو عايزين والف محامي سداد، عذبهم واتسبب في احتلال بلادهم وزرع جواسيس وسطهم اتسببت في الاغتيالات وخرب بيتهم.. اتفضلوا مصر انت في بيتك واحنا ضيوف، كلموا المحامين عندنا هنا، وهاتوا الشهود والمصابين، او صور القتلى، والمستندات اللي عندكم واحنا نظبطكم هنا
ووالله بقى لو فضلوا عندنا يتباطئوا زي ما بيتباطئوا في محاكمة مبارك واسرته والثلاثي المرح يبقى خير وبركة ومصلحة
ارفعوا قضية دولية واحنا معاكم.. ده مجرم حرب اساسا، وساعتها بقى يرفع معاكم افغان وباكستانيين وليبيين وسعوديين ويمنيين والكونيات كلها لها تار عند عمر سليمان وحتبقى فضيحة
اااااه.. يبقى نلايمها بقى كده، واحنا نغسل عارنا بايدنا بدل ما الفضيحة تبقى بجلاجل
والفلسطينيين بالتحديد ملزومين يساعدونا.... والا حنعذبهم، وانتوا جربتوا تعذيبنا بقى
وبعدين هي التوقيعات الالكترونية نامت ليه؟ ها؟ نامت ليه؟ لما دول بس اللي وقعوا امال مين اللي حينزل الجمعة؟ ماحدش حينزل ولا ايه؟
عموما انا حانزل، بصراحة انا مش حانزل عشان مقتنعة، انا حاقول اللي في قلبي كله، انا مش مقتنعة بنزلة الجمعة دي، بس انا متعودة ما اسيبش الناس حتى لو كنت مش مقتنعة، يوم ما انضربنا عند مجلس الوزرا ما كنتش مقتنعة بالبيات، لا انا ولا مالك مصطفى، بس احنا متعودين نمشي اخر ناس، ولو الناس قاعدة احنا بنقعد حتى لو مش مبسوطين من اللي هم بيعملوه، او انا اتعودت كده شخصيا، ولو الناس نازلة بانزل حتى لو انا مش مقتنعة، زي ما نزلت ما سبيرو في وقفة تطهير الاعلام وانا عارفة ان الوقفة دي لا حتودي ولا حتجيب لأن اصلا طول ما صفوت موجود برة الاعلام مش حينضف والحل مش في وقفة قدام ماسبيرو، بس نزلت عشان اتعودت امشي ورا الناس منين ما يروحوا حتى لو شايفاهم غلطانين.. ناسي.. حاعمل ايه طيب؟ حارميهم؟ 
بس دي اخر مرة بقى انزل وانا مش مقتنعة، واخر مرة بقى ابقى دلدولة، والله لو طلعت غلطانة بافرح، ومش حاعرف اني غلطانة الا لو الجمعة كانت بعدد كويس وفيها مطالب واضحة وفيها سيطرة على المندسين: 
- لو العدد قليل مش حانزل تاني وده يبقى اثبات ان التظاهر ما بقاش وسيلة مظبوطة، وحاكمل في شكاوى الباز افندي دي.. انا مخي بيقول لي ان التوقيعات دي صح ومظبوطة، وكل واحد ومخه بقى
- لو حد جاب سيرة المشير بأي حاجة وحشة حاخد بعضي وامشي فورا، وعادي يعني لو اتعمل فيهم حاجة مش حازعل عليهم، ولا حتى حاجيب سيرتهم.. بس.. هه، شتيمة المشير وقلة الادب عليه ده شغل مخابرات امريكاني واسرائيلي، لأن اصلا ماحدش امريكاني ولا اسرائيلي طايق المشير حاليا دلوقت.. ولا قبل كده، ولا عمرهم حبوه ابدا
مينا قال لي انهم لما اقتحموا المدرسة بالدبابة الامريكية فامريكا بقى طلعت تتكلم معانا زي ما كانت متعودة تتكلم مع المخلوع بصيغة الامر وقالت: مش مسموح لمصر تستخدم الدبابة الامريكية في اقتحام اهداف مدنية
راح الجيش المصري راكن الدبابة الامريكي وركب الدبابة الروسي، راحت روسيا باعتة جواب شكر رسمي لمصر - دي مصر طلعت مزة يا جدعااااااااااااااان والشباب عليها كده كده كده، امال المخلوع كان مفقدنا ثقتنا في نفسنا ليه؟ - فأول ما روسيا عملت كده هيلاري جات على ملا وشها تقول لهم انتوا زعلانين من دبابتنا ليه؟
وجيتس وزير الدفاع الامريكي مخنوق اخر حاجة من الجيش ومن المشير.. وانا مبسوطة ان المشير بيعمل لنا كرامة، اسواني بقى وبرج العقرب ومش بيقبل علينا اهانة، وهم مش مبسوطين ان عنده كرامة
انا كان عندي شكوك من غير مصادر ان الحملة على المشير بالتحديد وراها مخابرات امريكية واسرائيلية لأني قارية وثائق ويكيليكس وعارفة انهم بيكرهوه
وبلال فضل اكد لي كل شكوكي وقال لي ان عنده معلومات مؤكدة مافيهاش نسبة شك نص في المليون بالموضوع ده، وبلال هو الوحيد اللي مش باسأله على مصادره لأنه مش بيكدب 
المهم.. انا نازلة مغصوبة يوم الجمعة.. يبقى توقعوا مغصوبين على البلاغ انتوا كمان
وبهذه المناسبة السعيدة احب اعمل فضيحة بجلاجل لصفحة خالد سعيد، وايفينت محاكمة عزمي وسرور والشريف، وبقية المدونين في كافة انحاء البسيطة، وللجمعية الوطنية للتغيير، وللأخوان المسلمين، وللسلفيين، ولنشطاء الكنيسة، ولقناة الجزيرة، عشان مطنشين آخر حاجة على موضوع التوقيعات على البلاغ للنائب العام لأسباب مجهولة، او معلومة
البلاغ ده مش بلاغ "نوارة" والحملة دي مش حملة "نوارة" ومافيش اي مجال للنفسنة البتة، ومافيش حد في الدنيا يسيب تلاتة مجرمين برة في الشارع عشان منفسن على بني ادمة، ده يبقى انسان مريض نفسيا فعلا، طب بعض القضاة نفسنوا على لجنة تعديل الدستور، كمان الثوار عندهم نفس الامراض؟
البلاغ بتاع هشام مبارك للقانون، واللي كاتبه مالك عدلي والفكرة فكرة علاء سيف، وانا مجرد مروجة للموضوع وماليش اي افضال فيه ده اولا
ثانيا، ما بلاش جر الناعم مع الحيات والعقارب.. الواحد يجر ناعم مع حد يكون صاحبنا وحبيبنا بس هو ما بيعرفش يعبر عن مشاعره ناحيتنا كويس، اللي هو الجيش، عشان مشاكلنا مع الجيش كلها لها علاقة بترتيب الاولويات وفرق السرعات، هم اولوياتهم الامن القومي وعجلة الاقتصاد واحنا بنقولهم ينفع الواحد يعمل الاتنين مع بعض وفي نفس الوقت يحسسنا ان فيه ثورة كده بشوية محاكمات على شوية اصلاحات سياسية، امن قومي وديمقراطية في ذات نفس الوقت، لكن ليه يا اخوان ويا سلفيين ويا نشطاء الكنيسة ويا جزيرة تجروا ناعم مع الثلاثي المرح وعمر سليمان؟ ليه؟ ليه؟ انتوا مش عارفين تاريخهم الطويل في انهم يبهدلوكوا؟ مش عارفين ان دول لو شموا نفسهم حيشخرموكوا ويخلوكوا عبرة لمن يعتبر ومن لا يعتبر؟ ليه الواحد يرتكب حماقات كده، ويخبط في اللي مش مفروض يخبط فيه لأن ده اللي قادر عليه مع انكوا عارفين انه حبيب مش عدو، وتسحبوا لطيف وظريف مع اللي مفروض تخبطوا فيه بكل قوتكم لأنكم عارفين ان دول عدو مش حبيب؟ ليه كده؟ ليه الانتهازية دي؟ ليه؟ ليه؟ ليه؟ 
طب الانتهازية دي حتؤدي ان كلكم.. اسفة.. كلنا حنموت، بس انا مش هاممني اموت، انتوا اللي هاممكم تعيشوا وتحصلوا مكاسب عمركم ما حتشموها لو استمريتوا بطريقتكم دي، حنموت كلنا، حنموت
لا مش مجازا.. فعليا، دول لو شموا نفسهم حنموت كلنا، وانا ملاحظة انهم بيشموا نفسهم، وملاحظة ان عمر سليمان صاحي وبيلعب وكان بيلعب من تحت لتحت وابتدا يورينا صباعه من ورا الستارة

اديني اهو خلصت ضميري من ربنا.. انا لا باعمل صفقات، ولا باخد وعود، ولا حيبقى لي مقعد ولا منصب حتى رئيسة مراجيح مولد النبي.. ها؟ واخد لي بالك يابو الكباتن؟ بس ولا ابو كباتن واحد حيشوف وعد من الوعود دي لو شلل الاطفال والثلاثي تمكنوا من البلد

ودي صفحة الفيس بوك
ودي النمرة مالك عدلي
0101044264
ودي النمر في المحافظات


اللي بيجمع توقيعات في اسيوط


0117252779




العاشر من رمضان


01517934676






للي بيجمع توقيعات في اسوان




0122375490




للي بيجمع في دمياط يتصل برقم




0111179793




اللي بيجمع توقيعات في الاسماعيلية يتصل على




0122526411




اللي بيجمع توقيعات في طنطا يتصل على




0124544946




واللي بيجمع توقيعات في اسكندرية يتصل على




0111860593




اللي عايز يوقع في سوهاج يتصل على




0146075050




اللي بيجمع توقيعات في بورسعيد




0120522209




اللي بيجمع توقيعات في المنصورة




0101176127




اللي بيجمع توقيعات في المنوفية




0171009042




للي بيجمعوا توقيعات في الفيوم




0185020552




لارسال مجموعات التوقيعات داخل او خارج مصر عبر البريد الالكتروني




fegypt20@yahoo.com




الميل ده للي بيجمع توقيعات كتير وياخدها سكان ويبعتها بالميل، ما تبعتليش توقيعك لوحدك، لو توقيعك لوحدك يبقى حطه على التوقيع الالكتروني




وللارسال بالبريد او التسليم يدا بيد




1 ش سوق التوفيقية مركز هشام مبارك



ما تعصبونيش بقى... عمر سليمان رجع يقب براسه تاني، اهو ده اللي كان ناقص بقى