Thursday 24 March 2011

ما قلنا طول ما التلاتة برة فيه خطر

تحديث:
اللي خارج مصر يجمع توقيعات ويعمل لها سكان على الكمبيوتر ويبعتها على الميل ده
fegypt20@yahoo.com
صحيح القاضي اجل النظر في القضية ليوم 14 ابريل يعني بعد مرور 60 يوم على خلع المخلوع
انا مش عايزة ابالغ في احساسكم بالخطر صحيح، لكن كمان مش عايزاكم تناموا وتطمنوا، خصوصا ان الشهادة لله مواقف الناس بقت مايعة من غير سبب واضح
يا جدعان الثلاثي عزمي وسرور والشريف طول ما هم برة احنا مش في امان، وبيجتمعوا مع سوزان مبارك وامبارح جمال مبارك ظهر في نادي رجال الاعمال
انتوا ليه ما بتتحركوش بما يكفي؟ وليه دماغكم مظبوطة على التحرير والخناق في معارك مالهاش لازمة زي الخناقة بين انصار نعم وانصار لا وانتوا كلكم جزء من الثورة، واللي طالعة تقول "مأزق التصويت بنعم" وهي اساسا مين اللي جايبها غير الهانم؟ انتوا كل اللي يطبل لكم ترقصوا له؟ وتتخانقوا مع جهات مش هي الخطر الحقيقي، وتتخانقوا مع بعض
لو سمحتوا
لو سمحتوا
لو سمحتوا ركزوا
طول ما الثلاثي عايش ليوم التلات ولا الاربع احنا في خطر
وطول ما عناصر امن الدولة اللي لسه على ولاء لهم وحاسة بيأس وعايزة تسترجع سلطاتها ومش قادرة تصدق ان زمنها راح مش متحفظ عليها ومافيش اشراف قضائي ولا حقوقي عليهم احنا في خطر
هشام البسطويسي لو تفتكروا من اكتر من شهر قال: الثورة المضادة اللي هي بتعمله انها بتفرق الثوار
الاول تبتدي تفرقهم على مواعيد المظاهرات بحيث تكره الناس في الاعتصامات والمظاهرات يبقى شكل المظاهرات هزيل، ثم تفرقهم على المواقف السياسية وتبتدي تستقطب بعضهم، وبعدين تبتدي تحرك ناس انصار مبارك عشان يرجعوه وتعمل له مظاهرات عشان يرجع
البسطويسي قال كده من شهر، واللي بيقوله بيتحقق اهو
لو سمحتوا يا جماعة.. ما تخلونيش افسر اكتر من كده
البيان ده لو اتجمع عليه ميت الف توقيع على الاقل اللي احنا عايزينه حيتعمل... بس كده، ولو ما خلصناش من التلاتة دول ومن عناصر امن الدولة السابق احنا في خطر لانهم بيجتمعوا كل يوم، كل يوم
احنا محتاجين نجمع توقيعات من كل المحافظات
اللي بيجمع في دمياط يتصل برقم
0111179793
اللي بيجمع توقيعات في الاسماعيلية يتصل على
0122526411
اللي بيجمع توقيعات في طنطا يتصل على
0124544946
واللي بيجمع توقيعات في اسكندرية يتصل على
0111860593
اللي عايز يوقع في سوهاج يتصل على
0146075050 
ودي نمرة مالك عادلي
0101044264
وده عنوان مركز هشام مبارك 
1 ش سوق التوفيقية 
وده النموذج اللي تطبعوه عشان تجمعوا عليه توقيعات من الشارع
ومش حاقول لكم اكتر من ان انقاذ الثورة، ودم المهددين بالاغتيال زي علاء الاسواني والبرادعي وجورج اسحاق، في رقبة 100,000 موقع، لو ما وقعش على الاقل دول يبقى الذنب في رقبة المصريين كلهم
ومحتاجين الرقم القومي او رقم الباسبور عشان ده حيتقدم بلاغ قانوني للنائب العام، ويا سيدي اللي خايف على اطيانه وعزبه نبيعها له ما يوقعش لانه اساسا مش متضرر لا من امن الدولة ولا من التلاتة دول... واللي فهمك ان بالرقم القومي حد يقدر يبيعيك ولا يطلقك من مراتك يبقى ما اخدش الابتدائية
وايوة النظام السابق عايز يرجع، وعايز يجيب فترة انتقالية عمرو موسى او احمد شفيق وبعدين يجيبوا جمال مبارك، وبعد ما يجيبوا جمال مبارك حيعملوا قضايا خيانة عظمى فعلا لكل الوجوه البارزة في الثورة، وانا منهم، ومش خايفة الحمد لله، مش خايفة لسبب، ان عقوبة الخيانة العظمى اعدام، يعني الشهادة اللي بقالي عشرين سنة باطلبها من ربنا، ربنا حينولها لي، بس حاموت وانا مش مسامحاكوا، اه والله، حابقى مقبلة على الشهادة وانا سعيدة، وحاروح لربنا وانا مش مسامحاكموا وحاشتكيكوا لربنا عشان ضيعتوا الفرصة الوحيدة والاخيرة لمصر
اعيد تاني؟
انا بأكد لكم ان البيان ده لو اتوقع بميت الف على الاقل حيتعمل اللي احنا عايزينه، وكل ما زاد العدد كل ما سرعة الاجابة للي في البيان ودقة التنفيذ زادت
وانا مش فاهمة الجمعية الوطنية للتغيير، والاخوان المسلمين، وائتلاف شباب ثورة الغضب، والتيارات السياسية اللي شرشحت لبعض في الاستفتاء مش بيشاركوا في تبني البيان ده ليه؟ مش فاهمة الكنيسة اللي بتحشد عشان اعتصام وشافت الامرين من فتحي سرور وصفوت الشريف اللي كانوا ما وراهمش غير مرازية المسيحيين وتمرير احكام ضدهم في القضاء وتسليط اعمال عنف عليهم ما بيمضوش ليه؟ مش فاهمة السلفيين اللي حشدوا عشان المادة التانية اللي مالهاش اي علاقة بالتعديلات  واللي كانوا بيتاخدوا في امن الدولة يتعذبوا لحد ما يتجننوا او يتجندوا او يموتوا ما بيمضوش ليه؟ هم مش عارفين ان واحد واحد فيهم معرض للمحاكمة بتهمة الخيانة العظمى، واكيد مش كلهم عايزين يموتوا شهدا يعني، فيه منهم شوية عايزين يعيشوا ويستمتعوا بالحياة والمناصب اللي مش حيشموها طول ما التلاتة دول برة، وطول ما بتوع امن الدولة مطلوقين
والاهم من كده
فين الشعب المصري يحمي ثورته؟ انا بيدخل لي في اليوم على المدونة دي 20,000 بني ادم، فوق انهم ما وقعوش، مش عارف تاخد توقيعات عشر بني ادمين جنبك؟ صحابك وقرايبك وجيرانك؟ 
انا خلصت ضميري من ربنا، وقلت لكم كل اللي اعرفه، وده مش معناه اننا نرتبك ده معناه اننا نتماسك ونرجع ايد واحدة تاني زي روح التحرير ونبطل خناقات جانبية
احنا الخطوات بتاعتنا لازم تتركز في
1- الخلاص من التلاتة دول وقيادات امن الدولة المطلوقة
2- ابراز حقيقة احمد شفيق وعمرو موسى للناس
3- السعي لبرلمان ائتلافي يعبر بجد عن التحرير ودعم مرشح رئاسي توافقي
واذا ما كانش القوى السياسية تتصالح وتعمل ده، واذا ما كانش الشعب يحمي ثورته، يبقى حسبي الله ونعم الوكيل فيكم وانا برأت ذمتي امام الله وعملت الواجب اللي عليا وسلمت نفسي لله، ووجهت وجهي اليه، وضهري ليكم
وضهري ليكم
وملحوظة تانية: البيان ده كاتبه مالك عدلي، ومتبنيه مركز هشام مبارك، انا مجرد مروجة، وعندي شوية معلومات تعرفني قد ايه البيان ده مهم، وقد ايه التوقيعات مجدية جدا كأنهما مظاهرة مليونية في التحرير، بالعربي: الناس اللي بيكرهوني او مغلولين مني او حاقنين مني، وبالمناسبة هم كمان متحضر لهم قضايا تخابر، البيان ده لا يعبر عني، مافيش داعي تضيعوا على مصر كلها فرصة انقاذ الثورة عشان حزازات شخصية، وكمان صاحب فكرة جمع التوقيعات علاء سيف، بس علاء سيف اللي برضه حاقنين منه مش لازم يتجاهلوا الموضوع عشان ده فكرته، هو كان قصده يخدم يعني
وتاني واخيرا
انا حسبي الله ونعم الوكيل

59 comments:

abooood said...

يانوارة انا ABODFOLYالي معاكي ع التويتر
باريت تبعتيلي رقمك عشان اعمل اتصال بيكي بعدد التوقيعات الي وقعناها في اسيوط وريقة التسليم التنسيق بينا في المسئلة دي

Unknown said...

اتصل بمالك عدلي
نمرته موجودة

Unknown said...

عندك حق فى كل كلمه قلتيها ... ربنا يستر على اللى بيحصل فى البلد اليومين دول والواحد حاسس انه بيتختم على قفاه والناس مش فاهم ساكته ليه

abooood said...

اتصلت بيه امبارح ماردش عليا اظاهر مفكرني فلول عموما الجمعية الوطنية في اسيوط ابتدت تشتغل من امبارح وهانبتدي ننزل حملة زي طرق الابواب كدا وباذن الله هابلغك بالجديد ع الطويطر

leo said...

طيب واللي في الامارات يبعت الامضاءات علي ايه؟؟؟

Rowaa said...

جزاكى الله خير يانوارة،
طيب اللى خارج مصر يعمل ايه.
هل بمجرد ما نملأ البيان ونضغط على " شارك" ونرى رسالة بتقول شكرا يبقى خلاص صوتنا وصل والا فيه خطوات اخرى؟
من فضلك فهمينى لانى مش عارفة
رواء

Unknown said...

ايوة.. هو بس كده

Free Crack Files Download said...

المنيا لا توجد فيهل مقرات ولا اية
مصر

mimi said...

أنا خايفة أوي الثورة تضيع
أنا بحاول أجمع توقيعات علي أد ما أقدر
ربنا يسهل

بساطه said...

ايواااه اسم الله عليكي اظاهر بقى ان الشعب كله معاه ابتدائيه الكل تقوليله رقم البطاقه يتلعثم ويكش والاسد يقلب فرخه .. ويقولك طيب اديني اللنك وانا ادخل امضي بنفسي وانا عارف ومتاكد انه لا هيمضي ولا هينيل ..والتاني يقولى اصل انا منصبي حساس .. والتانيه اصل جوزي مارضيش ودكاترة جامعه تقولك هانشوف لما الواحد طء من الغيظ .. فهموا الناس ان محدش هيعمل حاجه برقم البطاقه

Unknown said...

فين أرقام المنصورة؟

Hossam said...

Why you don't call personally the admins of the big groups of facebook and ask them why they don't put this bayan on the wall, you have to insist to get a clear answer from them. wala homma kaman etzabbato?

محمد نبيل said...

عائلة مبارك لازالت تطمح للعودة للحكم ولم تيأس فهاهم مأجورى مبارك وبعد أن منعت التعديلات الدستورية جمال مبارك من الترشح للرئاسة غيروا هتافهم المعهود الى "يا علاء قول لأبوك شعب مصر بيحبوك" وهذا ليس صدفة ولكن هذه هى التعليمات التى تلقوها.

http://gate.ahram.org.eg/News/52904.aspx

كم طالبنا بالتحفظ على عائلة مبارك ومحاكمتهم على جميع الجرائم التى ارتكبوها فى حق الشعب المصرى بدون استجابة. المجلس الأعلى للقوات المسلحة يتحمل مسئولية ترك هذه العائلة تخطط ضد مصلحة مصر وشعبها.

Unknown said...

ياريت تزودي إقتراح النشر عبر الفيس بوك وتويتر والإيميل
معلهش الناسدماغهل مش شغالة قوي
شخصيا لسه مفكرة فيها دلوقتي

محمد طنطاوي said...

يعنى انتى لو رحتى يا نواره كل يوم ساعة كده لحد الجامعة هتلميلك كام ألف كده أحسن من الـ 20 ألف اللى بيدخلوا المدونة وبعدين ننوع يعنى النهاردة فى جامعة القاهرة بكرة فى جاعة عين شمس وهكذا دى حاجة مهمة نركز عليها ونخلى بالنه منها .
الحاجة التالتة المساجد والمساجد منطقة تجمعات مهمة بعد الصلاة نحاول ندى الناس فكرة عن التوقيعات وياريت منقلهمش عايزين نحل جهاز أمن الدولة أو أمن الوطن دا ولا معرفش إيه علشان دا بيدخلنا فى حوار ملوش لازمة وفى الآخر بيسبناويمش احنا نقول إننا بنطالب بمراقبة قضائية على جهاز أمن أى حاجه وخلاص ، لأن الكلمة دى مقبوله عند الناس ، وعايزين توقيعاتكم على كده .

مواطن مفروس said...

انا رقم 8134
ووالدتي رقم 9423
وزوجتى رقم 9451
حاجة تاني منى وربنا يستر احسن انا حاسس انهم هايلمونا كلنا هيلا بيلا بالموضوع ده

الفقيرة إلى الله أم البنات said...

تم يا نوارة وياريت نخلص من الحثاله دول بقى

ola said...

يا جماعة أرجوكم ركزوا شوية في موضوع الإنتخابات اللي جاية ، أهم حاجة نعرف نجيب ناس كويسة و المجلس العسكري يمشي بالسلامة و بعدين الحاجات دي هتبقى أسهل مع حكومة و رئيس منتخب ، إنتوا سايبين الساحة للسلفيين و مركزين في حاجات فرعية

حلم بيعافر said...

التوقيعات الالكتروونية شغالة الله ينور

Ghadobees said...

I signed in the link.... Do u still need a hard copy to be delivered?

مش فاهمه said...

ياستى وقعنا بس اسمحى لى و من غير زعل البسطويسى اللى بتستشهدى بكلامه دلوقتى قال بلاش فرقه و انتى من اواائل اللى نادوا بترك التحرير و المرة التانيه لما قولتى نعم و وراكى ناس كتير اتأثرت بيكى بس انتى بتحسبنى على اللى مش حايوقع انا باحسبن بقه على كل اللى قال نعم و على كل اللى نادى بترك ميدان التحرير قبل ما نخلص من بقايا النظام و باحسبن على كل اللى بيحب الجيش حب اعمى .....ازيك بقه

محمد نور الدين said...

ست الكل مساء الخير
وايوة النظام السابق عايز يرجع، وعايز يجيب فترة انتقالية عمرو موسى او احمد شفيق وبعدين يجيبوا جمال مبارك، وبعد ما يجيبوا جمال مبارك حيعملوا قضايا خيانة عظمى فعلا لكل الوجوه البارزة في الثورة، وانا منهم
هذه الكلام يتحقق في حالة واحدة عندما يرحل الشعب المصري من مصر
وتأكدي ست الكل لما يتوزع الشعب المصري على المعمورة أنت رايحة تكوني ضيفتنا وأكثر من ضيفة ونحطوك
في رموش عيبونا.
يا نوارة :و الله العظيم و الله العظيم و الله العظيم ،هذا الكلام يعد اكبر إهانة للشعب المصري
والله العظيم و الله العظيم و الله العظيم هذا الكلام يعد اكبر إهانة لثورة مصر التي هزت العالم بثورتها العظيمة، مصر التي أعادت للأمة العربية أمجادها وعزتها ، مصر التي خطت بالدم و البارود تاريخها الجديد
عزيزتي نوارة أنت بذلت جهودا مضنية وكبيرة أثناء الثورة أنت في أمس الحاجة إلى راحة

mutargim said...

http://al-agenda.blogspot.com/2011/03/blog-post_24.html

الأستاذة نوارة فقدت صوابها حزنا مما فعله الجندي ذو القبعة الحمراء بالبنت ذات الاشرب الأحمر ،

hardway said...

البيان ده لا يعبر عني............
يا أرق نــــوارة..في حملة البسطويسي
معقولة ..خايفة كده .ومش عايزة البيان يلزق فيكي..معقول والقضاء كله معاكي
لا تخافي و لا ترتعبي...أصل البيان شوية كلام موجود في كككككككككككككل الصحف والجرائد وفي الاعلام الاذاعي والمرئي والشبكة العنكبوتية...وفي المقاهي والمسارح و الشوارع في مصر والعالم كله
مش جديد...و لا أبتكار..و لا أختراع....

ومش خايفة الحمد لله، مش خايفة لسبب، ان عقوبة الخيانة العظمى اعدام
اعدام ..ايه...وخيانة عظمي...ايه
انت عايشة دور الاسلامبولي..ولا ايه
اكتبي...وارسلي...وقولي...واجتمعي.....و أعتصمي.....ولا.. ولا في حاجة
الخطة ماشية تمام..التمام الخطوات تنفذ علي الارض تمام ........وبأيدينا كلنا
تونس..مصر..تسقط ليبيا
اليمن.. البحرين ..تسقط سوريا
دول الخليج في اليد....
سلام يا ست أيران ..خلي النووي ينفعك
يا ست الكل تركيا ..ما دوريش علي دور
كـــلـــــــــــــه في السلة
عندنا.....هذه المنطقة هي حاضرنا و مستقبلنا ومستقبل أولادنا و حضارتنا
طول ما الذهب الاسود (ابن الكلب ) ده في ارضنا نحن مستهدفين للغرب....وكمان بعد فشل الطاقة النووية في اليابان
ولذا
لاتخافي ولاترتعبي ...اعملي كما يتراءي لكي بسطويسي....ايمن ..برادعي ..حمدين..عكاشة.مشعل.موسي.بلال فضل.ابراهيم عيسي..مالك عدلي....علاء سيف ..الاسواني
كـــــــلـه..ماشي..ماشي.. ماشي
مع صاحب الممشي
قـــــــــولي يـــــــــــارب

hardway said...

البيان ده لا يعبر عني............
يا أرق نــــوارة..في حملة البسطويسي
معقولة ..خايفة كده .ومش عايزة البيان يلزق فيكي..معقول والقضاء كله معاكي
لا تخافي و لا ترتعبي...أصل البيان شوية كلام موجود في كككككككككككككل الصحف والجرائد وفي الاعلام الاذاعي والمرئي والشبكة العنكبوتية...وفي المقاهي والمسارح و الشوارع في مصر والعالم كله
مش جديد...و لا أبتكار..و لا أختراع....

ومش خايفة الحمد لله، مش خايفة لسبب، ان عقوبة الخيانة العظمى اعدام
اعدام ..ايه...وخيانة عظمي...ايه
انت عايشة دور الاسلامبولي..ولا ايه
اكتبي...وارسلي...وقولي...واجتمعي.....و أعتصمي.....ولا.. ولا في حاجة
الخطة ماشية تمام..التمام الخطوات تنفذ علي الارض تمام ........وبأيدينا كلنا
تونس..مصر..تسقط ليبيا
اليمن.. البحرين ..تسقط سوريا
دول الخليج في اليد....
سلام يا ست أيران ..خلي النووي ينفعك
يا ست الكل تركيا ..ما دوريش علي دور
كـــلـــــــــــــه في السلة
عندنا.....هذه المنطقة هي حاضرنا و مستقبلنا ومستقبل أولادنا و حضارتنا
طول ما الذهب الاسود (ابن الكلب ) ده في ارضنا نحن مستهدفين للغرب....وكمان بعد فشل الطاقة النووية في اليابان
ولذا
لاتخافي ولاترتعبي ...اعملي كما يتراءي لكي بسطويسي....ايمن ..برادعي ..حمدين..عكاشة.مشعل.موسي.بلال فضل.ابراهيم عيسي..مالك عدلي....علاء سيف ..الاسواني
كـــــــلـه..ماشي..ماشي.. ماشي
مع صاحب الممشي
قـــــــــولي يـــــــــــارب

Hady said...

الاخت العزيزة نوارة حماكي الله و نصرنا جميعا... و بعد عندي كده فكرة برضه ممكن تساعد في نشر البيان حاولي و انتي صحفية طبعا و ممكن تعرفي انك تعملي دعاية للبيان بصورة مباشرة او غير مباشرة عبر احد القنوات التلفزيونية المحبوبة او اكتر من واحدة... العدد بينمو ببطء شديد مش عاجبني كنت فاكر انه هيبقى اسرع من كده المهم ما تنسوش الحزب الوطني و اعادة هيكلة الشرطة بالمعنى الصحيح للكلمة و كنت ارسلت مقترحات قبل كده بالخصوص ده و ممكن اخذها كأساس مبدئي.. و المهم كله في وقته في ناس كتيرة جدا مش متخيلة ان المخلوع ممكن يتحاكم ودي اراء ناس كتيرة هو عياله و اسرته فلازم نفضالهم برضه... يارب بعد كده اننا نلتفت لماف الشرطة اللي اتقدم في الملف ده يعتبر ولا حاجة لا ترقى الا لمستوى الاجتهادات الشخصية من بعض افراد الداخلية و مش منظم و من الاسس و مش مثبت بالقوانين و ان اي اصلاحات في الداخلية لازم تمنهج و يشرف عليها قانونيون متخصصين لدرجة الصلة المعروفة انهم هم القائمين على القانون و اداة تفعيله... يارب الناس تصحصح تاني و البرود يروح لأن حاسس اننا بنبرد تاني و الا مبالاة راجعة و الاتكالية و السلبية كدة بيشوروا نفسهم في قلوب ناس كتيرة

ansaretawra said...

assalamo 3alaykom 3ala fikra ana mini el maghrib wi 3riftik min ayam tawra 3la el jazeera wi habitik fi allah ana ba 3ich fi italia wi oum li walad wi bint wi bad3ilkom lil nahar wi matkhafouch into ha tintisro fi el akhir mayhimikch illakhbata illi hasla dilw2t kolli 3okoul itfatahit ba3di tawarat bassi ouli ya rab wi il ghomma hatzoul اللهم أتهم من حيث لم يحتسبوا واقذف في قلوبهم الرعب يخربون بيوتهم بأيديهم وأيدي المؤمنين فاعتبروا يأولي الأبصار صدق الله العظيم

misha و lado said...

sign all
sign

المهدى said...

مش بس التلاتة يا نوارة ولا حتى المخلوع والمخلوعة بذات نفسهم الموضوع أكبر ولجنة تقصى الحقائق تتحدث عن قناصة يستخدموا سلاح بالليزر غير متوافر لدى الداخلية يعنى أمريكان والسيارات القاتلة الخارجة من السفارة الأمريكية والتى أستقر 3 منها أمام وزارة الداخلية وكلام أفى رختر عن وحدات الإنذار المبكر فى جاردن سيتى ومصر الجديدة وسيناء كل دول لكشة واحدة الموضوع أكبر بكتير

Mahmoud said...

يا نوارة الورقة مزحومة جدًا وشكلها يخض واللي بيبص فيها بيتلبش
عايزة صيغة مختصرة الناس يكفيها أساسًا إنك تقولي لها أسماء التلاتة وخلاص وهم هايمضوا وهم مغمضين
وحتى اللي بيصر يقرا بتاخد منه وقت ويقعد يناقش
هي مش مفروض تفتح مكلمة يعني مفروض تختصر

المهدى said...

خدى كمان لكشة تانية ملف الفتنة الطائفية وعلاقات السلفيين بأمن الدولة اللى كان أذكى ما فينا فاكرها أخر المطاف طلع برضه أفى ريختر ليتحدث عن دور للموساد منذ 79 لإنجاز هذا الهدف
لكشة تالتة حسين سالم صديق مبارك ماشى رجل أعمال ماشى لكن برضه فيها غاز وفيها إسرائيل
يعنى كل من رجال الأعمال والسياسة وكبار الموظفين وأمن الدولة والمخلوع والمخلوعة والوريث كل دول واللى إحنا لحد دلوقت بنلهث خلف محاكمتهم ومش طايلنهم كل دول بس أول الخيط البكرة الأم بقى هناك فى واشنطن وتل أبيب
التركيبة دى اللى صنعتها أمريكا منذ عام 74 ورعت أن تشمل كل العناصر التى تضمن بها ولاء سياسة مصر ( القائد الأعلى للقوات العربية المشتركة ) للإستراتيجية الأمريكية العليا
هوة ده سبب ما عانيناه ونعانيه وهوة ده الصندوق الأسود اللى هيكل طالب بضرورة فتحه

M. Faramawy said...

ممكن يا نوارة نجمع توقيعات على النت و نكتفي بيها

المهدى said...

بصراحة كدة كلنا هواة وبنجتهد ( المخلصين منا فقط وهما قليل إذا إستبعدنا الطامعين فى كراسى البرلمان أو الخائفين من التيار الإسلامى أو المتهافتين على الجانبين ) من أول المشير لحد العبد لله كبيرنا درس أو درس ثورة ولكن لا أحد يدعى أنه شاهد عن قرب عملية فك وتركيب دولة
الوحيد الذى قام بهذا العمل وأكثر من مرة هو هيكل 52 و54 بالمتابعة 62 بالقرب من السلطة ثم شارك فى 67 وعمل بنفسه فى 70 وعزف منفردا فى 71
يعنى فك وركب 6 مرات بينما الجميع قرأ أو سمع ومع ذلك المجلس العسكرى مقموص منه بينما يستمع للجميع لينقلوا له مخاوف معظمها حقيقى ( مثل ما نقول ) وبعضها خيال مغرض ( مثل هراء الفراغ الإدارى وعدم الإستقرار ) بينما لا يجد مشروع واحد متكامل فيعرض عن الجميع
معقول المجلس يستمع لحمدى رزق وممتاز القط ويتقمص من هيكل
قبل ما أتهم بأننى من دراويش هيكل أذكرك بأن خاتمى والسيد حسن يطلبون سماع الرجل يبقى معقول المجلس الأعلى يتقمص منه ويسمع القط

الشبكة المستقلة said...

اللي خايفين من إنهم يحطوا أسماءهم و أرقام البطائق فيا جماعة ملفات امن الدولة كان فيها قصة حياة شعب مصر و الشعوب اللي حولينا كمان و كلنا أتفضحنا و الحمد لله ,فانتم خيفين على اية؟؟؟
(أمانة لو حد لقى الملف بتاعي فانا محتاجة و بجد لاني ضايع مني كتير من أرقام تليفونات صحابي و أكيد موجودة فيه)
موضوع الاسماء و رقم البطاقة بيخوف ناس كتير فيا ريت تحطي مجموعة من التطمينات بسرية الاسماء و ارقام البطاقات
انا من برة مصر و ما اعرفش ممكن أساعد أذاي بس كل اللي أعرفة شوية آي تي و شوية أدارة فلو محتاجة مساعدة فانا في الخدمة(طبعاً أنا وقعت على الطلب و كنت خايف بس و أنا لا أثق في مخلوق و لكني أثق فيكي يا نواره و يا ريت يكون فعلاً يكون مفيش خوف تاني و مفيش ظلم تاني)
ربنا يوفقك و يوفق كل اللي بيعمل خير بدون انتظار أجر و يكون في ميزان حسناتك

Unknown said...

يا نوارة بم ان الكلام ده وصلك اذا الجيش عنده علم باللى يحصل ده يبقى الجيش ما ياخدش موقف ماهو بصراحة الدنيا كده مش طبيعية واحنا خلاص مخنا هيشت ونفسنا نستريح بقى وعمرنا ما هنستريح طول ما التعابين دول موجودين على فكرة الناس خايفة من حكاية التوقيعات دى كل ما احطها عندى على الفيس محدش يعبرنى انا رأى يتعملها حملة على الفيس منك ومن ناس موثوق فيها عشان الناس تبطل خوف وعلى فكرة الخبر ده لسة نازل
رصد | صحافة | عاجل|الكسب غير المشروع يتحفظ على أموال سرور والشريف وعزمي خلال ساعات تفتكرى دى البداية ؟؟؟

علا حسين said...

أنا عماله اتصل بالناس عشان يوقعوا على النت وربنا يستر بس أنا والله متفائله أنا طبعا نفسى أنزل والم توقيعات بس للاسف الواحد فاق على كبر مينفعش انزل واسيب العيال

Unknown said...

تصميم الفورم اللي عالنت عجيب المفروض الناس تقرا الاول وبعدين تمضي دي حاجه وبعدين لازم نجند امكاناتنا فالجروبس اللي اعدادها كبيره

Loai said...

طب ماتجربى تتواصلى مع جروب وحملة البرادعى

سنابل said...

امبارح العدد كان بيتحرك ببطئ انما النهاردة عدد الموقعين بيزيد كل شوية
الله المستعان

Yasser Berber said...

نوارة انا اضفت رأيك في هشام البسطاويسي على الصفحة بتاعته على ويكبدياhttp://ar.wikipedia.org/wiki/%D9%87%D8%B4%D8%A7%D9%85_%D8%A7%D9%84%D8%A8%D8%B3%D8%B7%D9%88%D9%8A%D8%B3%D9%8A

ِAmira hassan said...

نوارة انا وقعت و عشرة معايا هتا ستي الي عندها 78 سنة و هحاول اخلي الي معايا في الشغل يوقعوا بس للاسف لسه في ناس مرعوبة و عايشة في عصر مبارك

hayat ank said...

انا مش معاكى يا نواره المشكله مش فى دول المشكله ان جهات التحقيق والمسائله هى الى عايزه تتشال مش دول لوجيبنا جهات حقيقيه للتحقيق الدنيا ها تبقى اسرع واحسن غلبت اقول يا خلق هوووووووووووووووو مش نافع لابد من تطهير القضاء والشرطه والاعلام مش نافع النائب العام الى كان مع النظام السابق بشكل او باخر هو اللى يحاسبه والراجل بتاع المركزى للمحاسبات نفس الحكايه طبق الاصل الراجل جمال امين قال كده ليه الناس ودن من طين وودن من عجين هيكل قال نفس الحكايه بشكل تانى عن لجنه حمايه الدوله والدستور الا انتوا شايفينالنتائج طب اهو ابو العنين بيضبط اموره وكل النظام دلوقتى بيضبط ورقه وهاتطلع القضايا كلها فشنك وبتوع الثوره المضاده شغالين الله ينور وجمال بقى موجود على الساحه وشفشق الى طلعناه بالعافيه بيعد نفسه وقاعد فى نادى ابصر ايه يوم الجمعه وبيعد نفسه للرئاسه والناس بتقتنع والبرادعى يا ولداه بهدلوه واحمد زويل استبعدوهمش ناقص انه المخلوع يطل علينا بعد كدده والناس تقول طب شوفتوا ما فيش غيره

Anonymous said...

من يجيب على هذا السؤال:من المسؤل,عن تأخير تحقيق أهداف الثورة ؟؟..,تأخير النظر فى الإتهامات لمبارك ورؤوس الفساد,عدم حل حزب الفساد,تأخير تغيير المحافظين,تأخير تغيير الإعلاميين,من الإعلام المرئى والمقروء,الذين تسببوا بتحريضاتهم,فى قتل الثوار,تأخير تغيير حكومة شفيق,ثم الإحتفاظ,فى حكومة شرف,بأغلبية من وزراء حزب الفساد,تأخير حل أمن الدولة,تأخير تمكين المغتربين,حوالى عشر ملايين,من التصويت..,من الذى يضع,دائما,قدمه,على فرامل قطار الثورة المصرية,ليبطأه,فى الوصول لمحطاته ؟؟! د. شريف عبد الحكم-باريس

أرنوب said...

لازم الناس تفهم ضرورة وجود الرقم القومي بجوار التوقيع عشان ده إثبات إن الشخص الموقع شخص حقيقي وموجود فعلاً مش إسم خيالي ملفق

HOKSHEA SAYS said...

والله يا نوارة النا فيها حبة مبالاة شديدة ...يعنى انا مثلا قلت الحقوا يا جماعة الثورة بضيع مننا ....الناس بتقم التورتة اللى مش فى ايدينا اصلا ...الثورة بضيع والله بضيع كل يوم زيادة الناسس ولا الحكومة ولا الجيش ولا حتى ظباط امن الدولة ولا حتى الاعلام الموجه لغاية دلوقتى حاسس بقوة ثورتنا فى الوقت الحالى ....اولاانتى معندكيش الية لضغط غير المظاهرات اللى بيستغلها بعض النا ذو النوايا الحسنة والسيئة بالبلد واتهام اللى بيقوم بيها بانهم خربنها
الشعب يريد احياء الثورة شعار اتمنى تنفيذه قريبا

OberonSky said...

سلام للجدعان شباب و بنات .. إيه رأيكم بكرة في مليونية ماسبيرو تلم فيها كل التوقيعات ... جهزو أوراق كتيرة للأسماء و الأرقام القومية .. أنا متوقع بكرة هيكون فيه 100,000 على الأقل .. يا رب

علان العلانى said...

الشعب أسقط النظام وأصبح هو مصدر السلطات على الحقيقة ولكن لان السلطة فى النهاية لابد وان يكون لها شكل أجرائي قام بتوكيل الجيش كمراقب ومنفذ لإرادة الشعب في تلك المسافة بين إرادة الشعب والدور الذي حدده للجيش هناك ثغرة لابد من الانتباه لها و لابد من تقنينها ،لاتوجد خارطة طريق للثورة أو سقف زمني ولا ينبغي يبدو إن الأجندة الإقليمية لها ظلال مباشرة على ما يجرى أو أن المؤسسة العسكرية تخشى إجراءات التطهير لأسباب تخصها أو تنالها وعلى أية حال هناك اختبار لكسر العظم سننتصر فيه إرادة الشعب

amer said...

تم التوقيع بحمد الله و أرساله و كذلك توزيعه علي جميع المعارف ، و ليكن معلوم للجميع بأن رقاب كل المصريين الشرفاء فداء لهذا البلد و ثورته و لن يخيفنا مثل تلك الخفافيش التي حان وقت القضاء عليها بغرض تطهير البلد من نجاستهم و ليس من باب الخوف منهم

Unknown said...

طب هنتواصل معاكي ازاي يا نوارة

Bassem Zakaria El-Samragy said...

(دي رسالة ليكي ماتنشريهاش)

انطلاقا من إيماني بإن الشرعية الثورية في الشارع مش في النخبة فأنا كتبت حاجة كده في شكل سؤال وجواب بهدف التوعية السياسية لرجل الشارع هنا
http://tafkeergy.blogspot.com/2011/03/blog-post_25.html

ياريت تضيفي ملاحظاتك عليها لأننا عايزين نشتغل بيها عندنا في المطرية وفي ناس هتبتدي تشتغل عليها في شبرا تقريبا بكرة

أنا إيميلي هو
bassem.z.elsamragy@gmail.com

شكرا

Unknown said...

كلنا متفائلين باذان الله ان مصر بكره احسن وبعده احسن و لكن التفائل بدون عمل و مواصلة اتمام ما بداناه فى يوم 25 يناير و هو التخلص من كل ما هو فاسد فى مصر و تطهير البلد من كل عملاء النظام الفاسد فهم مثل الفيروس ان لم تقتلوه تماما وتتاكد من التخلص منه فهو يعود مرة اخرة فى صورة اقوى من السابقة . فارجوكم مواصلة المطالب بالتخلص من كل بقية هذا النظام الفاسد . لابد من تطهير الارض تماما حتى نتمكن اذا زراعنا هذا الارض ان نحسد محصولنا وافرة . لابد من التطهير . هؤلاء لابد ان يحاكموا و ان يدفعوا ثمن ما افسدوه فى مصرنا الحبيبة .هناك بعض الشواهد التى تاكد انه ما يازال هناك رموز للفساد ما زالت تعمل من اجل العودة الى الساحة السباسية مرة اخرة . و على سبيل المثال مجموعة ظباط الشرطة التى خرجت فى السويس تهدد بااستقلة من منصبة اذا تمات محاكمة مدير امن السويس و كذلك هؤلاء الذين يظهرونا امام المحاكم التى تنظر بها قضايا الفساد. كما حدث فى محكمة عبدين الذين خرجوا يندونا بعدم محاكمة مبارك . و كلنا على علم بما يقوم به كل من سوزان و جمال و صفوت وزكريا و فتحى سرور و بعض قيادات الحزب الفاسد . ارجوكم لا يجب ان نعطى للهؤلاء الفاسدين اى فرصة لكى يقوموا بهذة الالعيب الوسخة بتعتهم. ارجوكم لازم كلنا نقوم بالتوقيع على طالب محاكمة كل من زكريا عزمى و صفوت الحرامى و فتحى سرور وهؤلاء يعدوا من اكبر رموزا الفساد فى مصر كلها . لازم نطهر بلدنا من كل هؤلاء الفاسدين. لازم نشرح للناس خطر هؤلاء على الثورة اذا لم يتم محاكمتهم. لازم الناس كلها تقوم بالتوقيع على هذا الاستمارة حتى يرى المجلس العسكرى و مجالس الوزراء منا الجدية و الاصرار فى هذا الطالب.المهمة يا شباب لسه مانتهتش .لسه امامنا حاجات كتير لسه ماحققنهش . السنة دة هى اهم سنة فى حياتنا لازم نكمل اللى بدناه .وباذان الله ربنا طول ما احنا بنبذل اقصى ما فى وسعنا ربنا هينصرنا. وكما قال الله سبحانه وتعالى . لا يكلف الله نفس لا وسعها .) لازم ربنا يشوف مننا ان احنا سوف نبذل كل شئ فى وسعنا . انصر الله ينصركم ؟ وهو ان نقوم على كل ما هو فاسد فى بلدنا الغالية.عنداذا سوف ينصرنا الله و لان الله يحب اذا عمل احدكم عمل ان يتقنه . استحالفكم بالله العلى العظيم ان لا نتوقف لا بعد ان يتم التخلص من كل هؤلاء الفاسدين و محاكمة كل من قتل و عذاب و اهانه ابناء مصر . حتى يكونوا عبرة لكل من تسول له نفسه ان يفكر فى التجراء على مصر و ابناءها . اللهم احمى شباب مصر ورجالها و كل شعبها الاحرار الشرفاء و انصر نا على الفاسدين . اللهم احمى مصر .تحيى مصر تحيى مصر تحيى مصر

M.MNS said...

نوارة انا mohmmedmns عندك على تويتر وانا من اسكندرية ولحد دلواقتى معايا حوالى 500 توقيع وعلى يوم السبت ان شاء الله متوقع يعدوا الالف وانا مستنى اكملهم ويوم السبت ان شاء الله هتصل بالرقم اللى انتى حطاه لاسكندرية اسلمهملوا
وان شاء الله كل دا يجى بفائدة

برنس سمير said...

معاكى يا نوارة دول الثلاثه مش المفروض يتحبسو لا المفروض يتعدمو علنى على بركه الله

برنس سمير said...

معاكى بكل قوة الشياطين الثلاثه مش المفروض يسجنو لا لازم يعدمو وفى ميدان عام عشان يبقو عبرة

Unknown said...

نوارة انا مش فاهمة معلش..انا برة مصر..ممكن اوقع على اللينك بتاع حقوق الانسان ده؟تبعكوا ده؟انا مش عايزة اوقع على حاجة و معرفش هيروح لمين لو معاكوا انتوا تمام انا بثق فيكي...بس هو اسمي و رقم البطاقة بس ع النت و خلاص؟ اللhttp://dl.dropbox.com/u/3698770/signs.html ينك ده؟

Unknown said...

http://dl.dropbox.com/u/3698770/signs.html
نوارة هو اللينك ده اللي اكتب اسمي و رقمي القومي فيه؟ده بتاع حقوق الانسان ؟ عشان انا بره مصر...انا بس مستنية تأكديلي انه تبعكوا...و هحاول اجمعلك توقيعات....هحاول بس موعدكيش بعدد انا معرفش كتير

FATMA said...

التوعية السياسية للناس يا نوارة وطرق البيوت مش كفاية هو حاجة حلوة لكن مع وجه لوجه لان الناس كتر خيرهم عليهم زن كتير
ومتي حتشتغل قناة التحرير

bokha said...

انا همسك حملة تجميع التوقيعات في المحله و هنبدء نشتغل فيه من السبت ان شاء الله في المحله و جامعة طنطا و جامعة المنصوره ممكن ينفع نعمل استماره و الضهر كذا مكان للتوقيع من كذا فرض بحيث نسهل تداوله في المدرجات في الجامعه و كده

عبداالله said...

الثورة مستمرة
لنكمل البقية
http://www.facebook.com/facemasir
http://www.facebook.com/media.e.r.u