ملخص المقابلة مع المستشار هشام البسطويسي/ وزير الداخلية لازم يرحل

تحديث:
انا كاتبة في البوست: ده اللي حنقوله بكرة
بكرة ايه؟ قصدي الجمعة، مافيش بكرة حاجة.. بس الايام عندي دخلت على بعضها
-------------
في صدفة احسن من الف ميعاد حضرت شبه ندوة للمستشار هشام البسطويسي، الغريب اني يوميها الصبح كنت باقول، يا رب هشام البسطويسي يبقى الريس، وبعدين رحت التحرير، قابلت فاطمة ومالك، رحنا قهوة نتفرج على القذافي، مالك جاله تليفون قالوا له ده المستشار هشام البسطويسي قاعد في بينوس واحنا رايحين له، قمنا رحنا له

المهم

اهم النقاط اللي قالها سيادة المستشار كام حاجة:

1- الاطراف الموجودة في البلد ثلاثة: الثورة، الثورة المضادة المتمثلة في اتباع مبارك، ومبارك، وجمال مبارك، وامريكا واسرائيل، والطرف التالت هو الجيش

بالنسبة للثورة، انتصارها الحقيقي في وحدة الصف، وخلاصة كلامه عن كيفية توحيد الصف، اننا نخفض جناحنا لبعض، ما حدش يتربس على التاني (اه... يعني لما نقول مثلا نغير المكان عشان فيه ناس مش عايزة تروح التحرير يبقى نغيره، ما نتربسش، لما حد يتربس مايجيش حد تاني يطلع بيان مضاد ويقول احنا مش رايحين التحرير، دي هيافة من الطرفين، والطرفين كويسين، دول الناس اللي سبقوا ونزلوا يوم 25 او الناس اللي استجابوا في ساعة العسرة ونزلوا يوم 28 البشع، يبقى ليه كل انسان يحط راسه براس زميله؟ واحد قالك مش رايح التحرير، يا سيدي غير له المكان ما جراش حاجة، التاني قالك لا والله ما مغير المكان الاولاني ما يطلعش بيان كأن حربك مع زميلك مش مع النظام، نتواد يا شباب، نتواد، اخوك وكان حيموت معاك، وواكلين مع بعض عيش وملح في ميدان التحرير، وما نخليش حد يدخل بينا، كل واحد فينا يتنازل للتاني، والطرف اللي يتنازل لاخوه هو الطرف الاحسن، والاحرص على الثورة، والاعقل، والاصدق، نتنافس في الحفاظ على ثورتنا مش نتنافس مين اللي كلمته تمشي، ولو طلبوا منك مقابلة ما تنساش اخوك، ولو اخوك راح يعمل مقابلة ونسيك ادعي له يفتكر كل المطالب اللي انت عايزها، انت رايح تتصور؟ أم الطفل هي اللي ما ترضاش ابنها يتشق نصين بالسكينة، اللي بين قوسين ده كلامي، عملا بنصيحة المستشار هشام البسطويسي اللي قال لازم يبقى فيه نقد ذاتي من غير جلد ذات، احنا عملنا انجاز ومافيش داعي نجلد ذاتنا، وعايزين نحسن اداءنا ومحتاجين ننقد ذاتنا، وانا شخصيا، وبصدق وامانة، شايفة كل الاطراف مخلصة، وكل الاطراف لها وجهة نظر، بس لو كل طرف تنازل للتاني النتيجة حتبقى احسن، احنا عايزين نسترجع روح الحب اللزج اللي كانت موجودة في ميدان التحرير، عشان ثبت اننا ناس كويسين وجدعان، وادعي على الثائر واكره اللي يقول امين، ويرجع بينا المودة والتراحم تاني اللي كانت موجودة في خضم المعارك لان المعركة ما خلصتش، وما نفرجش علينا الناس، احنا قدام الناس لحمة واحدة، مهما نتناقش، وعلى رأي فاطمة عابد، حتى لو اختلفنا لازم نخلي اللي بيشوفنا واحنا بنختلف يقول: شوف الشباب المحترم لما يختلف بيبقى عامل ازاي؟). 

وقال المستشار ان وحدة الصف بين الناس، لازم تبقى مصحوبة بالتقارب مع مزاج الشارع من غير ما يبقى فيه تفريط (كلامي: اصل فيه قطاع في الشارع يعني مش مفروض تلتفت له خالص، اللي قعد طول الثورة ياكل ويشرب زي الجاموسة واحنا عمالين نموت ويقول لنا خشوا البيوت، ودلوقت كل ما يشوف وشنا يقول لنا انتوا عايزين ايه بقى؟ ما خلاص، ده مش مهم خالص، المهم هم الناس اللي متعاطفة مع الثورة وكانت بتبعت اكل او تشاور لنا من البلكونة، دول لازم نحتفظ بيهم) 

وقال برضه اننا لازم نتجاوز عن بعض، وما نشدش السلخ على بعض، وقعد كتير يقول في فكرة التراحم المتبادل دي، وقال نصا: مافيش داعي نلجأ للتخوين، اللي يغلط نصوبه وما نخونوش، ولو رجع نرحب بيه. 

بالنسبة للثورة المضادة:

بيشتغلوا على قدم وساق، وبيعملوا على عدة محاور، هم هدفهم واضح، عايزين يرجعوا النظام، فيه عدة احتمالات لانهم يرجعوا النظام، انهم مثلا يعيدوا انتاج النظام بوجوه اخرى زي عمرو موسى او عمر سليمان، وقال ان فيه رغبة انهم يرجعوا عمر سليمان في الصورة تاني لان امريكا واسرائيل بيحبوه قوي، كمان مراكز القوى ورجال الاعمال مهتمين باعادة انتاج النظام، وبيقول ان مبارك مش صحيح انه مهمش، بدليل وجود ممدوح مرعي وده مالوش صاحب غير مبارك، وما حدش حيخليه غير مبارك

بيعملوا ايه عشان يحققوا الهدف ده؟

بيحاولوا يشقوا صف الثورة، دي احسن وسيلة لهم عشان يرجعوا تاني، وكل القضايا اللي ضدهم تتحفظ، الوسيلة اللي يرجعوا بيها، اننا ننقسم وقال باللفظ: يعني ناس تقول نازلين التلات وناس تقول مش نازلين، يقوم يبقى عددنا قليل، لو اتكررت الحكاية دي حيحصل شق للصفوف ونرجع تاني للميتين واحد وساعتها ممكن ينزل هو مظاهرة مليونية في مقابل الميتين واحد ويقولوا له ارجع ويرجع بناء على طلب الجماهير. الجملة الاخيرة هي نص كلامه. وهم بيراهنوا على ان الناس تتعب بعد شوية وتزهق، وهو شايف انه عشان كده مش لازم نستنزف نفسنا وفي نفس الوقت مش لازم ننام، وهو من وجهة نظره ان النزول يوم الجمعة كويس، وبيضغط، وفي نفس الوقت ما يخسركش الشارع، وما يستنزفش قوتك، وقال ان النزول يوم الثلاثاء كان غلط، بس ما جراش حاجة، نصحح نفسنا، وقال ان اذناب النظام بيحاولوا كمان يشتتوا اهدافنا بانهم يخلونا نهتم بالحاجات الصغيرة وهم عندهم هدف واحد اعادة انتاج النظام. 

(كلامي: امن الدولة جمع نفسه ورجع يشتغل تاني وفي يوم واحد قسيس اتقتل وناس طلعت تتظاهر، والفين واحد اتظاهروا عشان يهدوا كنيسة، وبيوت بهائيين اتحرقت، وسبحان الله... كلها مصادفات يا اخي، طيب ايه الرد اللي مفروض نعمله؟ الرد الوحيد على اي حوادث طائفية، مظاهرات برضه، بس لحل امن الدولة، اي حد يتظاهر تظاهرات طائفية، نعرف على طول انه من بلطجية الحزب الوطني زي بتوع معركة الجمل، ويتعمل معاهم اللي اتعمل مع بتوع معركة الجمل، وعلى فكرة بلطجي امن الدولة حمار، لان احنا كنا في ميدان التحرير اي حد بيصاب بيلاقي اللي يدافع عنه ويعالجه، انما بلطجية الحزب الوطني اللي كانوا بيهجموا علينا كانوا بيتعوروا ويتسابوا في الشارع ماحدش بيلحقهم، ما تساويش يعني الميتين جنيه اللي اخدتهم يا حمار، يبقى اي مجابهة لاي حادث طائفي او مظاهرة طائفية، هي المطالبة بحل امن الدولة فورا، او دمجه في الجيش بقى، ياخدوهم يربوهم ويخلوهم يقطعوا حجر في الجبل وياخدوا ميزانيتهم يصرفوها في حاجة مفيدة، وتبقى المظاهرة قدام مديرية الامن، سلمية برضه).

يبقى مافيش حل لمواجهة الثورة المضادة غير اننا نوحد الصف ونتجاوز اي نقاط خلافية، زي مثلا ما المستشار تجاوز نقطة المادة الرابعة في مشروع الدستور بتاعه لما الاخوان اعترضوا، وقال شيلوا المادة دي خالص مدام حتخلق خلاف، والحل التاني اننا نطارد اذناب النظام ونجتثهم من جذورهم وعلى رأسهم امن الدولة، (كلامي: اظن انتوا شفتوا محمود وجدي بيقول ان الشرطة ما عملتش حاجة وان كان فيه مندسين مسلحين بين المتظاهرين.... لا ده يمشي، ده يمشي، ده يمشي فورا فورا فورا، وجهاز امن الدولة يتحل او يدمج في الجيش، والجيش اولى بالميزانية المهولة اللي بتتصرف على امن الدولة، واننا نوحد هدفنا). 

الجيش:

المستشار هشام البسطويسي بيقول ان الجيش متعاطف معانا، وعايز يعمل لنا اللي احنا عايزينه، بس زي ما هو بيحاول يتفهمنا، احنا كمان لازم نحاول نتفهم طبيعة المؤسسة العسكرية، هو فيه ناس بتحاول تمارس عليه ضغوط، من اطراف الثورة المضادة، من امريكا واسرائيل واذناب مبارك ورجال الاعمال الخ، واحنا بدورنا علينا اننا نساند الجيش باننا ما نشككش فيه وفي نفس الوقت نلح بمطالبنا بالاسلوب اللي يتناسب مع المؤسسة العسكرية، والمستشار قال اننا لازم نفهم ان دي مؤسسة عسكرية، يعني فيه اسلوب لمخاطبتها، وفيه اسلوب للتعامل معاها، ومش لازم نستعديها علينا، لازم نستمر زي ما كنا بنكسبها لصفنا لانها اصلا متعاطفة معانا (كلامي: سامعين ياللي عمالين تتعوجوا على الجيش؟ مش انا لوحدي اللي باقول كده، اهو المستشار هشام البسطويسي قال لكم وبلال فضل بعد ما اجتمع معاهم قال لي انا عمري ما شفت جيش في الدنيا كده دول ناس حريصة على الدولة المدنية اكتر منا، ماحدش عاد يتعوج على الجيش تاني، وماحدش عاد يتعوج على المشير طنطاوي تاني، ايه بقى حكاية كان مش بيصطدم مع مبارك دي؟ الحمد لله، مش فيه حاجة اسمها رجل مؤمن من آل فرعون يكتم ايمانه؟ مش ساعة الجد نفعنا؟ لو كان راجل صدامي كان اتشال واتحط مكانه واحد زي عمر سليمان، وتقولوا سامي عنان كان في امريكا؟ الحمد لله ان سامي عنان هو اللي بيعمل المقابلات الدورية لامريكا، مش احسن ما هو يرفض ويقوم بالمقابلات دي واحد الله اعلم بيه يبيعنا ويتفق معاهم علينا؟ تعامل الجيش المصري مع امريكا مش الجيش هو اللي عمله، السادات هو اللي فرضه على الجيش، اقروا وثائق ويكيليكس عشان تعرفوا ان الجيش المصري بيعمل البدع عشان يحافظ على وطنيته وفي نفس الوقت يلتزم بالالتزامات اللي فرضها عليه السادات، وايوة فيه اجنحة كتير في الجيش مش حابة فكرة ان مبارك يتبهدل من واقع انه كان القائد الاعلى للقوات المسلحة، بس احنا اللي عايزينه يتبهدل، يبقى احنا اللي نعمل الحكاية دي بمطالبتنا والحاحنا ونرفع عنهم الحرج، وانا لو عايزة اقابل الجيش اقدر اقابله، بس انا مش عايزة اقابل الجيش عشان افضل احبه حب عذري وكلامي ما يبقاش مجروح، اتعدلوا، باكرر تاني، اتعدلوا، انا شخصيا باحب الجيش من قبل الحكاية دي لاني قريت وثائق ويكيليكس وشفت قد ايه الجيش بيقاوم بقاله تلاتين سنة من ساعة توقيع اتفاقية كامب ديفيد عشان يفضل جيش مصر مش جيش النظام، وما يتمسخش زي ما كل مؤسسات النظام اتمسخت وبقت العوبة في ايد امريكا واسرائيل، وكمان عشان سيدنا محمد قال عليهم احسن ناس، يعني حاصدقكم واكدب سيدنا محمد؟ بس حتى من غير كده، الجيش واخد موقف لحد دلوقت رائع مع الوضع في الاعتبار ان الموضوع مش احنا وهم وخلاص، فيه جهات كتير بتحاول تمارس عليه ضغط، ومع ذلك هو بيرجح كفتنا على اي كفة ومنحاز لينا، يبقى نحترم نفسنا بقى واحنا بنتعامل مع الناس، زي ما هم بيحترمونا) 

نعمل ايه احنا عشان نساند الجيش؟ رأي المستشار اننا نضغط بالاسلوب اللي يتناسب مع طبيعة المؤسسة العسكرية في مطالبنا، يقوم ينزل على طلباتنا لانه اصلا كل ما بنطلب منه حاجة بيعملها لنا، بس احنا نوحد هدفنا ونطلب بالاسلوب الصح. يعني مثلا ننزل الجمعة الجاية (كلامي: وزي ما احنا عارفين، لما ننزل الجمعة الجاية شغلتنا نأمن الجيش قبل ما نأمن نفسنا لأن اجهزة النظام القديم نشطت وابتدت تشعر بالخطر، انا وانت نموت ومافيش عسكري في الجيش يتخدش)، بلال بيقترح اننا نقول: احنا مطالبنا كانت كذا وكذا، اتحقق منها كذا وكذا، واحنا بنشكر الجيش على تحقيقها وعلى مساندته لينا وموقفه الوطني، بس لسه عندنا مطالب كذا وكذا، وتبقى مطالب واضحة كده، مش نهوبص ونتوههم معانا، هم عليهم من ده بايه؟ 

طيب

واحد حيقول نشيل شفيق عشان ده بتاع مبارك، وهو له حق

واحد حيقول نشيل محمود وجدي، وانا شخصيا نفسي يبات ليلة في القسم عشان يبقى يرجع يقول الشرطة بريئة تاني، ولنا حق

وواحد حيقول نشيل ابو الغيط ده ساب المصريين يتبهدلوا في ليبيا، وله حق

وواحد حيقول: فين صفوت الشريف وزكريا عزمي وعمر سليمان؟ دول كلهم متورطين في قضايا قد كده، وله حق وانا شخصيا باقولكم عمر سليمان متورط في جرائم ضد الانسانية، وطلب من اسرائيل انها تدخل سيناء عشان تطارد المتعاونين مع حماس، يعني خيانة عظمى

وواحد حيقول: انا حاسس ان مبارك بيحكم مصر من شرم الشيخ، وله حق يخاف

وواحد حيشكك في الجيش وده حنجز له لسانه من لغاليغه ونعين عليه لجان شعبية مخابرات عشان نكتشف انه من فلول الحزب الوطني.. احسن جيوش في الامم جيوشنا

احنا في مصر هنا مالناش بعد ربنا غير وحدتنا وجيشنا وقضائنا واي حد يعمل فورتينا في اللحمة دي يبقى عدونا

كلللللللللللل ده لخصه المستشار هشام البسطويسي في مطلب واحد يأمنا كلنا من كل المخاوف دي: الالحاح على المجلس العسكري بانه يعلن موت الدستور القديم وان التعديلات الدستورية اللي بتقوم بيها اللجنة واللي وصلت لاربعتاشر مادة دي مش تعديلات ده دستور مؤقت

باعلان المجلس العسكري ان التعديلات هي دستور مؤقت وان الدستور القديم تم الغاؤه ده يضمن لنا ان مبارك ونظامه انتهوا الى غير رجعة، ويضمن لنا ان مافيش حصانة لاي حد من اذناب النظام، ويشيل الشرعية عن شفيق وتوابعه، بل ويضمن لنا ان لو حصلت انتخابات مبكرة ونجح فيها بعض اذناب الحزب الوطني نظرا لانهم هم اللي بيوزعوا وجبات على العشوائيات دي تبقى حكومة مؤقتة 

لان ممكن لو تعاملنا مع التعديلات على انها تعديلات واعدنا العمل بالدستور القديم تيجي حكومة تقول ماهو دستور اهو نبقى نعدل بعدين على مهلنا بقى، سنة اتنين عشرة الف.. كل سنة وانتوا طيبين

المستشار مش عاجبه الاعتصامات الفئوية وشايف انها تتحل بان الدستور برضه يبقى مؤقت توطئة لدستور يضمن العدالة الاجتماعية

بس مالك رد وقال ان ممكن تتحل مشكلة العمال مؤقتا بان الحد الادنى يبقى ستميت جنيه لحين حل كل المشاكل

اهم حاجة من وجهة نظر المستشار البسطويسي ان الدستور القديم يتلغي

ساعتها بقى مبارك يقعد في شرم الشيخ، يقعد في المنصورة، يقعد في الترعة البولاقية، ما تفرقش كتير، لكن طول ما الدستور اللي فات ما ماتش يبقى فيه خطورة من قعدته معانا 

ليه؟

اولا: لاننا لسه بنصرف عليه كأننا مطلقينه وبندي له نفقة

ثانيا: لان ده معناه انه مش خايف مننا

ثالثا: معلش مع احترامي لكل الناس اللي بتقول مش معقول يرجع، خش جوة مخه واقنعه بحاجة زي دي، ولو احنا ضعفنا، له الف واحد مستفيد منه يقول له برقبتي يا ريس... كفاية ان شفيق بيقول عليه الرئيس مبارك

ده رأي المستشار البسطويسي، وهو بيقول ان لجنة تعديل الدستور تقدر هي نفسها تعلن موت الدستور اللي فات وتقول ان التعديلات دي بمثابة دستور مؤقت

وفي كل الاحوال، هو شايف اننا نوحد مطلبنا على المطلب ده، كويس ورخيص وابن ناس

وده اللي نقوله بكرة ان شاء الله...

اللي شايفاه ان كلام البسطويسي متوازن، هو مش حاطط في بطنه بطيخة صيفي زي ابراهيم عيسى وبلال، وهم لهم وجهة نظر ان فعلا الجيش اهل للثقة، وفي نفس الوقت مش عايز يخلق لنا بلبلة زي هيكل، وبرضه له وجهة نظر ان مبارك واذنابه مش حيسكتوا، البسطويسي شايف ان فيه شوية مشاكل، ولها حلول بسيطة، بس لو سكتنا عنها حتتفاقم وتبقى خطر علينا وعلى الجيش، ولو حليناها نقدر نحلها بشكل بسيط ونريح دماغنا

الا هل بلغت؟ اللهم فاشهد

انتهت خلاصة القعدة مع المستشار البسطويسي

ملحوظة: عايزة اوضح لكم ان الجيش مش عايز النظام القديم يرجع، لان النظام القديم عايز لو - لا قدر الله - رجع ينتقم من الجيش زي ما عايز ينتقم منا بالظبط، فيا ريت نساعد بعضينا يعني، عشان احنا في مركب واحدة

------------------------

بالنسبة لليبيا:

ليبيا مهمة قوي يا شباب... مهمة قوي قوي قوي

طبعا البحرين واليمن مهمين جدا، بس اولا الاوضاع عندهم بقت اهدأ، والوضع اكثر مأساوية في ليبيا، بس كمان احنا والتوانسة لو ربنا كرمنا والليبيين عرفوا يتخلصوا من القذافي بدون اي تدخل اجنبي يبقى زاعق لنا نبي، ويبقى بتاع خمسين في المائة من هموم المصريين والتونسيين انزاحت. لان نظام القذافي على صلة وثيقة جدا - استخباراتيا وبلطجيا - مع نظام بن علي ومبارك، والقذافي فعلا مقتنع انه يقدر يرجع اصحابه - الى جانب العاهل السعودي طبعا - بس زي ما انتوا شايفين كلهم مجانين وعندهم رفض للواقع، وحتى لو ما عرفوش يرجعوا بعض، ممكن يخربوها على دماغنا، ولو نظام القذافي وقع بسواعد عربية دون تدخل اجنبي، فعلا فعلا، حنبقى احنا التلاتة سكر نباتة فعلا، ربنا حيكرمنا اخر كرم ان شاء الله

اخطر حاجتين ممكن تحصل في ليبيا:

1- ان القذافي ما يقعش

2- انه يقع بتدخل اجنبي

خصوصا احنا، حنتعمل ساندوتش... لو لا قدر الله حصل تدخل اجنبي في ليبيا، مش عارفة اقولكم احنا ممكن يحصل لنا ايه؟ واحنا وضعنا حيبقى أسوأ من تونس كمان

يبقى احنا نبذل كل الجهد، وكل اللي نقدر عليه عشان نساعد الثورة الليبية انها تنجح بنفسها بدون تدخل اجنبي

مافيش حاجة واضحة في دماغي دلوقت

بس مثلا التونسيين عملوا حاجة ذكية قوي، تجمهروا باعداد كبيرة قوي قدام سفارة ليبيا لحد ما البعثة الليبية في تونس انضمت للثورة، وده طبعا بيضعف نظام القذافي، لانه خسر جواسيس له في تونس

يبقى ده نقدر نعمله هنا نحاول نضغط على البعثة الليبية في مصر لحد ما تنضم للثورة وبالشكل ده نظام القذافي يخسر جناح من اجنحته

بالنسبة للناس اللي بتقول لما نحل مشاكلنا نبقى نحل مشكلة ليبيا

والله مش عارفة اقول ايه، انا باتعاطف مع اللي فيه نقطة مش بيفهم فيها كويس، لكن مش باتعاطف مع اللي ما عندوش احساس

يعني اللي بيقول كده ممكن يبقى ما بيفهمش في السياسة، ومش فاهم ان سقوط نظام القذافي حينقل الثورتين المصرية والتونسية نقلة نوعية ويأمنا تأمين كبير، ويضمن ان ضغوط كتير من اتجاهات مختلفة تتخفف من على الجيش، لان نظام القذافي بيدعم بالمال والسلاح والبلطجية فلول النظامين البائدين، وان انهيار استخبارات القذافي حيؤدي بشكل فوري لانهيار كبير في استخبارات النظامين البائدين

عادي، ممكن تبقى مش عارف الحكاية دي، مش فاهمها كويس، مش كل الناس بتفهم في الحاجات دي، انت اكيد بتفهم في حاجات تانية، والحاجة دي انت مش فاهمها، عادي، ماهو انا مش بافهم في الكيميا الحيوية، واكيد الكيميا الحيوية اصعب من اللي باقوله ده، يبقى انا فهمت السهل وانت فاهم الصعب.... مثلا

بس مش ممكن تبقى البعيد ما بتحسش ولا عندك دم، اطفال متفحمة... اطفال متفحمة يابني ادم... انت ايه؟ انتتتتتت ايييييه؟ المفهومية بانورامية في الانسان، وكل واحد بيشوف الزاوية بتاعته، لكن الاحساس نعمة.. الاحساس ده بقى الحاجة اللي مفروض كل الناس تتمتع بيها

ايه يا اخي؟ ايه؟ دول لو قطط وكلاب يا اخي المفروض تحس على دمك شوية

انت مش خايف من ربنا؟ انت مش عارف ان مبارك وبن علي زي القذافي بالضبط ونسخة طبق الاصل منه؟ 

مش عارف ان مبارك امر الجيش بتاعنا انه يعمل فينا اللي عمله القذافي في الليبيين، وان ده سبب عزله

ونفس الحكاية بالنسبة لبن علي وده سبب عزله

وان الفرق الوحيد بين القذافي وبين مبارك وبن علي، ان مصر وتونس فيهم جيش وطني، بينما القذافي حل الجيش وجاب مرتزقة؟ ومع ذلك حتى المرتزقة فيه منهم هرب وما قدرش يكمل قتل في البني ادمين؟ 

انت ايه؟ ما بتفهمش وقلنا طيب... ما بتحسش؟ ما بتخافش من ربنا يعمل فيك اللي بيتعمل في جيرانك؟ دي كلمة تقولها؟

اعوذ بالله... اعوذ بالله، ده انت والواحد كده يخاف يقعد ياكل معاك يا اخي لتكون حاطط له سم

اللي بيقولوا الكلام ده بيفكروني بضباط امن الدولة، عشان مافيش حد لا بيفهم ولا بيحس وعامل ناصح غيرهم 

التونسيين - كالعادة - سابقين علينا بجون... زنقوا البعثة الليبية

واحنا نحاول نحصلهم

وعلى فكرة، التونسيين بيستقبلوا المصريين اللي جايين من طرابلس... ها؟ ما قالوش يعني: احنا مالنا ومال المصريين لما نشوف عيالنا الاول

اعوذ بالله.. اعوذ بالله

احنا عايزين نعمل قائمة سوداء ببتوع احنا مالنا ومال الناس دي عشان ما ناكلش معاهم، بجد يعني، ده ممكن يسمك او يفك لك الفرامل على فكرة