بالنوسبة لـ"القيادات" بتاعة الثورة!

وبعدين بقى؟ 

ايه موضوع قيادات ده؟ 

بقى هالله هالله عالجد والجد هالله هالله عليه.... الشعوب زي الافراد، وبتمر بمراحل، لما واحد يبلغ من العمر اربعين سنة وانت مصمم تلبسه بامبرز وتحضر له الرضعة يبقى انت بتستهبل كده 

الثورة دي ثورة شعبية بكل المقاييس، وماحدش يقول اللي حركها الفيس بوك، عشان الفيس بوك كل يوم فيه دعوة لتظاهر وكلها فاشلة

الناس نزلت تبقى الناس نزلت، وماحدش له فضل... الفضل لله وحده.. بس فقط لا غير

الشعب قائد نفسه، ومواقفه واضحة، وخطواته ثابتة، وبعد ما عمل ثورة عامة يشيل فيها رأس النظام، بيعمل دلوقت ثورة تطهيرية في النقابات ومؤسسات الدولة عشان يطهر الوطن من جيوب النظام، والناس دي لو قارية كل الكتب اللي في الدنيا وكل النظريات اللي في الدنيا ما كانتش طبقتها بالعمق والوعي ده

اي ادعاء ان التحرك ده له قيادات يبقى محاولة لالحاق انتكاسة بالثورة، وحتبقى محاولة فاشلة لان مافيش حد في الدنيا بيعرف يهزم شعب

فيه مجموعات اتشكلت من رحم الثورة ودي مش قيادات الثورة، فيه ناس طلعت اتكلمت وقالت رأيها، او تطوعت انها تكون مراسلة لقناة الجزيرة - زيي - لما قطعوا القناة، انا ما كنتش باقود الثورة ولا كنت باقول رأيي، كنت بانزل اللي باشوفه بانقله، كده بقيت قيادة؟ على كده يبقى مدير القناة قائد للعالم كله عشان بينقل اخباره

فيه حاجة اتعملت اسمها حركة شباب 25 يناير، دول مش قيادات، دول ناس اتلموا على بعض وقالوا كلمتين، ودي حاجة من حقهم، والناس ما ادعوش انهم قيادات، ولو اني كنت احب انهم ما يستخدموش اسم شباب 25 يناير، لان ده يشمل ملايين وهم خمسة ستة باين

فيه ائتلاف شباب ثورة الغضب، اللي فيها اربعتاشر واحد منهم شادي الغزالي ومصطفى.. مش عارفة اسمه مصطفى ايه بس بيتكلم كويس، وخالد عبد الحميد.. انا عاجبني الائتلاف ده، انا مش فيه، ومش مفوضاه، بس لحد دلوقت هم مواقفهم محترمة جدا، وحاسمة جدا، وواضحة جدا، ومتفقة مع رأي الشارع، ولحد دلوقت انا، انا نوارة كفرد يعني، متفقة مع مواقفهم، والظاهر ان فيه ناس كتير متفقة معاهم، ويبدو ان الية العمل بتاعتهم انها برضه واخدة منهج المراسل، يعني بيشوفوا الناس في الشارع بيقولوا ايه وبينقلوا اللي الناس بتقوله

واي ائتلاف، واي حد يتكلم، وحتى وائل غنيم اللي اطلق الدعوة، مافيش قيادات، ومافيش محركين، ومافيش حد من كل المذكورين ادعى انه قيادة

عيب قوي لما شعب يوصل للنضج ده وتصمم انك تهطله وتطلع له قيادات بالعافية، اذا كان ولا واحد من اللي اتقال عليهم قيادات بيدعي لنفسه القيادة، مش تواضع، بس عشان كل واحد عارف انه مش قيادة، طب خلي اي حد من اللي بيقولوا عليهم قيادة - وهم الشهادة لله كلهم نفوا انهم قيادات - يقول حاجة مخالفة لرأي الشارع ونشوف مين حيسمع كلامهم

اذا كان الناس اللي بتدور على قيادة للثورة مخها مش عارف يواكب النضج الشعبي، يبقى ينتحوا جانبا ويتعلموا من حركة الشعب

اللجان اللي بتتشكل لا تمثل الا نفسها، ولما بتعمل حاجة كويسة الشارع بيقول برافو، ولما بتعمل حاجة وحشة بيتزفوا ويتفضحوا فضيحة المطاهر وهم اللي بيخسروا، ماحدش بيأثر على الشارع ولا على الحركة الشعبية، الشارع هو اللي بيأثر على الناس، شارع وقع نظام، حتيجي كام لجنة وكام فرد قالوا بقين حيسوقوه؟ ما كل واحد في الاعلام بتاع "القيادات" ده يحترم نفسه ويعرف هو بيكلم مين والشعب اللي بيتعامل معاه ده نوعيته ايه؟ 

ثم اي حد حيحاول يبقى قيادة او يلبس دور القيادة او يتلبس دور القيادة يبقى بياخد اعدام والناس حتدوسه برجليها

الناس اللي حافظة مش فاهمة ومتقولبة على شكل معين... اقفوا تعظيم سلام وربعوا ايديكم واتعلموا من الشعب