Monday 14 February 2011

بالنوسبة لـ"القيادات" بتاعة الثورة!

وبعدين بقى؟ 
ايه موضوع قيادات ده؟ 
بقى هالله هالله عالجد والجد هالله هالله عليه.... الشعوب زي الافراد، وبتمر بمراحل، لما واحد يبلغ من العمر اربعين سنة وانت مصمم تلبسه بامبرز وتحضر له الرضعة يبقى انت بتستهبل كده 
الثورة دي ثورة شعبية بكل المقاييس، وماحدش يقول اللي حركها الفيس بوك، عشان الفيس بوك كل يوم فيه دعوة لتظاهر وكلها فاشلة
الناس نزلت تبقى الناس نزلت، وماحدش له فضل... الفضل لله وحده.. بس فقط لا غير
الشعب قائد نفسه، ومواقفه واضحة، وخطواته ثابتة، وبعد ما عمل ثورة عامة يشيل فيها رأس النظام، بيعمل دلوقت ثورة تطهيرية في النقابات ومؤسسات الدولة عشان يطهر الوطن من جيوب النظام، والناس دي لو قارية كل الكتب اللي في الدنيا وكل النظريات اللي في الدنيا ما كانتش طبقتها بالعمق والوعي ده
اي ادعاء ان التحرك ده له قيادات يبقى محاولة لالحاق انتكاسة بالثورة، وحتبقى محاولة فاشلة لان مافيش حد في الدنيا بيعرف يهزم شعب
فيه مجموعات اتشكلت من رحم الثورة ودي مش قيادات الثورة، فيه ناس طلعت اتكلمت وقالت رأيها، او تطوعت انها تكون مراسلة لقناة الجزيرة - زيي - لما قطعوا القناة، انا ما كنتش باقود الثورة ولا كنت باقول رأيي، كنت بانزل اللي باشوفه بانقله، كده بقيت قيادة؟ على كده يبقى مدير القناة قائد للعالم كله عشان بينقل اخباره
فيه حاجة اتعملت اسمها حركة شباب 25 يناير، دول مش قيادات، دول ناس اتلموا على بعض وقالوا كلمتين، ودي حاجة من حقهم، والناس ما ادعوش انهم قيادات، ولو اني كنت احب انهم ما يستخدموش اسم شباب 25 يناير، لان ده يشمل ملايين وهم خمسة ستة باين
فيه ائتلاف شباب ثورة الغضب، اللي فيها اربعتاشر واحد منهم شادي الغزالي ومصطفى.. مش عارفة اسمه مصطفى ايه بس بيتكلم كويس، وخالد عبد الحميد.. انا عاجبني الائتلاف ده، انا مش فيه، ومش مفوضاه، بس لحد دلوقت هم مواقفهم محترمة جدا، وحاسمة جدا، وواضحة جدا، ومتفقة مع رأي الشارع، ولحد دلوقت انا، انا نوارة كفرد يعني، متفقة مع مواقفهم، والظاهر ان فيه ناس كتير متفقة معاهم، ويبدو ان الية العمل بتاعتهم انها برضه واخدة منهج المراسل، يعني بيشوفوا الناس في الشارع بيقولوا ايه وبينقلوا اللي الناس بتقوله
واي ائتلاف، واي حد يتكلم، وحتى وائل غنيم اللي اطلق الدعوة، مافيش قيادات، ومافيش محركين، ومافيش حد من كل المذكورين ادعى انه قيادة
عيب قوي لما شعب يوصل للنضج ده وتصمم انك تهطله وتطلع له قيادات بالعافية، اذا كان ولا واحد من اللي اتقال عليهم قيادات بيدعي لنفسه القيادة، مش تواضع، بس عشان كل واحد عارف انه مش قيادة، طب خلي اي حد من اللي بيقولوا عليهم قيادة - وهم الشهادة لله كلهم نفوا انهم قيادات - يقول حاجة مخالفة لرأي الشارع ونشوف مين حيسمع كلامهم
اذا كان الناس اللي بتدور على قيادة للثورة مخها مش عارف يواكب النضج الشعبي، يبقى ينتحوا جانبا ويتعلموا من حركة الشعب
اللجان اللي بتتشكل لا تمثل الا نفسها، ولما بتعمل حاجة كويسة الشارع بيقول برافو، ولما بتعمل حاجة وحشة بيتزفوا ويتفضحوا فضيحة المطاهر وهم اللي بيخسروا، ماحدش بيأثر على الشارع ولا على الحركة الشعبية، الشارع هو اللي بيأثر على الناس، شارع وقع نظام، حتيجي كام لجنة وكام فرد قالوا بقين حيسوقوه؟ ما كل واحد في الاعلام بتاع "القيادات" ده يحترم نفسه ويعرف هو بيكلم مين والشعب اللي بيتعامل معاه ده نوعيته ايه؟ 
ثم اي حد حيحاول يبقى قيادة او يلبس دور القيادة او يتلبس دور القيادة يبقى بياخد اعدام والناس حتدوسه برجليها
الناس اللي حافظة مش فاهمة ومتقولبة على شكل معين... اقفوا تعظيم سلام وربعوا ايديكم واتعلموا من الشعب

15 comments:

KB said...

تمام التمام ..الكلام ده جوانا كلنا ومش عاوزين نتكلم علشان شق الصف ..
بس فهمونا موضوع مجلس امناء الثورة ده ؟؟ مين عينوا وكانوا مجتمعين مع المجلس الاعلي للقوات المسلحة ليه ؟؟ وبيان ايه اللي حيعلنوه يوم الجمعه واحنا ما نعرفش عنه حاجة ؟؟؟؟؟؟؟؟؟؟؟؟ ما ينفعش كده يقولوا زي الناس كلها ما بتقول انهم بيمثلوا نفسهم مش الثورة كلها

مش فاهمه said...

معاكى فى اللى بتقوليه بس انا قلقانه من اللى قولت لك عليه السلفيين كانوا ابتدوا يشغلوا عقلهم و يعرفوا انهم مصريين قلقانه من المظاهرة اللى شوفتها دى بتاعة الشعب يريد حكم الشريعه دى

asmaa salem said...

هوه الاعلام ليه مش مقتنع بفطرة الشعب اقصد ان الشعب بكل التامر والفساد عشان فتعليمه الصح وابداع في تعليمه الغباء والفوضى هوه انتوا عشا فشلتوا في فرض ارادتكم والتحكم في مصيركم وكنتم تابع لنظام فاسد ويوم ماتفكروا تعترضوا بتاخدوا على قفاكم جايين دلوقتي حاسين انكم زي العريانين عايز يدورلوا على قائد بسرعه يتبعه ويتلف وراه ويستنى اوامره زي اللتحكم عليه بالمؤبد وخرج مقدرش يعيش بره السجن من هنا ورايح القائد هوه الشعب مش القوات المسلحه ولا الحومه بتاعة دلوقت والحكومه القادمه ان شاء الله حكومه برلمانيه يعني يتنفذ ارادة القائد الاعلى وهوه الشعب برده والشعب الفالتحرير ده لسه هيزيد عن كده كمان واذا كان لسه في القرى والنجوع في ناس فاضلها شوية حاجات مش فاهماها عن الديمقراطيه والعصر الجديد ومتطلباته منهم هننزل ونفهمهم خلاص القشره اتكسرت وبانت الالماظه ونورها منور مصر كلها

Nahla Anwer said...

معاكي جداً... مش غايظني حاجة أكتر من إن أصلاً محدش قال أنا قائد، والناس مصممة لأ يا حبيبي إنت قائد... يا أنكل والله أبداً... فيقوم الإخوة أصحاب مرض ستوكهولم اللي يا حرام مش قادرين على بعد مبارك يمسكوا في اللي اتقال عليه قائد ويقولوله إنت فاكر نفسك قائد؟ يقول أنا مش قائد، يقولوا مانت متنفعش قائد... يا عم مش قائد أنا والله... أيوة طبعاً مش قائد، عشان إنت أمريكاني وماسوني وأجندات زرقا.....
بس أنا مبسوكة إن لحد دلوقتي كل ما حد يطلع، بيقول أنا لا أعبر إلا عن نفسي... وفعلاً الكلام لحد دلوقتي كويس... أما نشوف.

نوارة، إنتِ قولتي إن الشهدا وحقوقهم بقت قضيتك الشخصية... عايزة أعرف لو فيه حاجة ممكن أي حد عادي يعملها.. أنا مش قادرة أحس بفرحة كاملة لحد دلوقتي عشان حاسة إن حقهم لسة مرجعش، وأنا بصراحة عايزة أفرح

Unknown said...

أولا مين قال ان هذه المجموعة عقليتها تفهم كلمة: شعب؟
هذه لغة مختلفة عن اللغة التي يفهمونها
لذلك هم لا "يفهمون" - زي بن علي تماما - معنى ثورة شعبية
السبب الآخر ﻷسلوبهم إنهم ممكن يكونوا عايزين - برضه بالمنطق الأمني والعسكري الفاشل سياسيا - أن "يسيطروا" على المكان - أقصد مصر - و"يطوقوا" المجموعات، فبيحاولوا يوحوا الينا بأفكار لعلها تنجع ونقتنع بها، ونقتنع ان لينا "مجلس قيادة ثورة" على غرار المجلس الانقلابي الفاشل ايام عبد الناصر
وللأسف غباؤهم وضعف تعليمهم السياسي والحضاري يجعلهم منغلقين على ذواتهم ولا يفهمون، وربما لن يفهموا الا متأخرا جدا تكون البلد ولعت فعلا. وصحيح لهم حق يكونوا منغلقين، فمن امتى شفيق أو قيادات الجيش بتنزل وتقعد مع الناس وتسمع وتفهم وتتحاور؟ كل ده متوقع..يارب بس ما يمشيش كده لغاية الاخر تبقى كارثة

FiTravel said...

بصوا بقى علشان اجيب من الاخر .... انا بقالى 27 سنة - عمرى كله يعنى - مبتكلمش فى اى حاجه علشان مكنتش شايف ان في كلام او حتى افعال بتغير حاجه . انما من بعد اللى حصل هجيب من الاخر بالنسبة ليا شخصيا محدش يتكلم باسمى الا اثنين ( انا بنفسي - او حد انتخبه ) غير كده حاولوا تفهموا اننا معدش ينفع معانا ولا وصاية ولا ولاية من اى حد .... وخلصت .

Early bird said...

انا اللى عاجبنى ان الناس دى كلها مجتمعه على مطلب واحد هو الغاء قانون الطوارى وخروج المعتقليين وووجود حكومه انتقاليه خاليه من الوجوه القديمه وكلها من المتخصصين غير المعارضين

اتمنى ان حتى لو فيه خلاف لا يظهر على السطح جتى لا ياتى من يقول كما قال التتار فى فيلم واسلاماه :اكلم مين لما احب اكلم شعب مصر

Early bird said...

انا اللى عاجبنى ان الناس دى كلها مجتمعه على مطلب واحد هو الغاء قانون الطوارى وخروج المعتقليين وووجود حكومه انتقاليه خاليه من الوجوه القديمه وكلها من المتخصصين غير المعارضين

اتمنى ان حتى لو فيه خلاف لا يظهر على السطح جتى لا ياتى من يقول كما قال التتار فى فيلم واسلاماه :اكلم مين لما احب اكلم شعب مصر

ربنا يوفقنا الى ما فيه الخير

يقول أنى امرأة said...

اة انا كنت عايزة ابعتلك بردو افهم موضوع امناء الثورة ؟ بصى انا عاجبنى جداااااااااااا الحلقه الاولى بتاعت صالون ابراهيم عيسى و الكلام كان رائع احسن شباب اتكلمو لغايه دلوقتى الصراحه بس احنا عايزين نفهم بردو ... يعنى الى عايز يقول رائيه يروح لمين عايزة اقلك ان فيه دعوات لاجتماعات بكرة فى الساقيه و الاربع فى نادى المعادى و لما سالت مين الى عامل الدعوة دى قالولى كل مجموعه من الشعب مجتمعه عشان يشوفو هيعملو ايه و يقولو رائيهم طب تمام يا شعب هتعملو ايه بعد ما تجمعو الافكار محدش عارف و محدش رد ... عايزين مكان موقع على النت اى بتنجان تتواصل فيه

ahmad said...

اولا يسم بقك يا نوارة
ثانيا الناس دي مش فاهمة
ان الشعب هو الباقي حي
هو اللي رايح هو اللي جاي
ويعني ايه كل شوية ثورة شباب 25 يناير
الشباب نزلوا وقالو يا اهلينا انضموا لينا
والله ولله الحمد والمنة
ان الشعب قام وهب ووقف وناضل وضرب واضرب
واتحمل وتعاون وتلاحم ونسي الطبقية وصمم على العدالة الاجتماعية
يبقى يا سيادة المشير والمجلس الاعلى ارجوكم حافظوا على هذه المكتسبات ولا تفرغوا الثورة من اهم انجازاتها
انها ثورة شعبية بكل المقاييس
وخلي العالم كله يتعلم مننا
ويتعلم فن القيادجة على ايديكم
كيفية استلام زماما الامور في اوقات الحسم وتحت الضغط

somuch123 said...

هل ياترى حضرتك تعرفى مجلس قيادة الثورة ده؟
http://www.youtube.com/watch?v=VVA9RLG4iBg&feature=player_embedded
بصراحة مجلس مشرف جدا
فى عز ما الناس كانت قاعده فى الشارع فى البرد مجلس قيادة الثورة بياكل شاورما من أبو عمار
http://www.youtube.com/watch?v=HaHGWCabs6A

Lammers said...

الله يكرمك يا نوارة

هو ده اللي عايزين نقوله لو سمحتي لو سمحتي مالناش حد غيرك انتي و الشباب المحترم اللي زيك يوصل كلامنا

اللي اسمه وائل غنيم و اللي معاه هايضيعونا بيتكلموا باسمنا في كل مجال هايضيعوا الثورة بجد

كل الشكر على دعوته الاولية بس يقف لحد هنا بقى

ارجوكي ارجوكي ارجوكي اللي بيعمله ده اكبر غلط بيتكلم بسامنا ليه و بيظهر مع وسائل الاعلام الاجنبية تحديدا ليه

و هو ده بكائه على شهداء الثورة

http://www.youtube.com/watch?v=VVA9RLG4iBg

بيظهر اعلاميا بوش و من ورا كاميرات الموبايلات بالوش الحقيقي

ارجوكي يا نوارة استحلفك بالله انتي و الاشراف اللي زيك

الشخص ده عجبه التسليط الاعلامي اللي عليه هو و اللي بيغنوا و يرقصوا معاه الله وحده اعلم اشمعنى هو تحديدا اللي حصل معاه كل ده و الحقيقة هاتبان اكيد

في ناس تانية ادعت ان كان في قيادات للثورة فعلا و انهم كانوا موجودين مع الشباب في ميدان التحرير و هم اللي بيوجهوهم و ده كلام خالد يوسف مع يسري فودة

قاله في قيادات و في تنظيمات

هايودونا في داهية الثورة شعبية مصرية خالصة لا هي وائل غنيم تحديدا و لا هي غيره

Unknown said...

نوارة ...كل تحية و تقدير لك و لكل اللى زيك و لشعب مصر العظيم و انتم علمتونا ان الوطنية فعل و انا و اللى فى سنى مشينا معاكم و مع الحق , علشان نشوف مصر اللى كلنا بحلم بيها
بس لى تعليق
انا افهم ان المقصود بالقيادة ممثلين و ليست وصاية يمكن يكون اسهل للجيش يجتمع مع 14-20 فرد من انه يجتمع مع 80 مليون و زى ماقلت الناس دى تكون مراسلين لرأى الشارع و الشعب و تستفيد من توجيه الخبرات الوطنية الشريفة
كويس اننا نفهم انهم بيحولوا يشخصنوا الثورة وبالتالى يسهل التعامل معاهم او حتى تغير مطالبهم
لكن لو الممثلين ناس واعية وفاهمة محترمة وشرفاء و و قريبة من الناس يبقى مفيش خوف منهم او عليهم
( يا ابت استأجره ان خير من استأجرت القوى الامين) ربنا يتم فضله علينا

Abu Marwa said...

مجرد سؤال - لماذا صورة ابراهيم عيسى ؟

الوافي said...

ارجوا منكم الوقوف بجنب الانتفاضة الليبية لكي تستكمل نموها وتتحول الى ثورة ... ثورة تكمل المحور الحر ... تونس وليبيا ومصر