اختلاق الفوضى المفاجئة الذي لا يحله الا اقالة حكومة شفيق وحل امن الدولة الفوري

تحديث:
الضابط اللي قتل سواق الميكروباص ما ماتش، هو في المستشفى بس، واتقبض عليه، بس على فكرة يا وجدي.. حتمشي برضه


- مبارك قال: عليكم ان تختاروا بيني وبين الفوضى

- واحنا قلنا خلوا بالكم فيه ثورة مضادة

- الجيش قال مافيش ثورة مضادة بس طولوا بالكم

- تلات حوادث طائفية في يوم واحد

- اختلاق فوضى واختلاق ازمة في مسألة الدير

- محمود وجدي يبرئ ساحة الشرطة تماما من اي مسئولية فيما يخص موقعة الجمل

- امناء شرطة بيحرقوا مبنى تابع لوزارة الداخلية، مش فاكرة كان ايه

- ضابط شرطة يقتل سائق ميكروباص فالناس تتلم عليه وتقتله

الحل الوحيد ان المجلس الاعلى للقوات المسلحة يقيل حكومة شفيق، بما فيهم يحيى الجمل - او خصوصا يحيى الجمل - اللي المخلوع عينه في لجنة التعديلات الدستورية، ثم قبل انه يبقى نائب شفيق... روح بقى يا عم جون

لو ما كانش ظباط الداخلية فتحوا السجون - الظباط اللي برأهم محمود وجدي - ما كانش الدير اضطر يبني سور على ارض مخالفة لانه في وادي النطرون وجنبه سجن، ولو كان محمود وجدي قال كل ظابط فتح سجن للمعتقلين حيتحاسب ويتقدم للتحقيق بدل ما يبرأهم، ما كانش الدير وقف قدام الجيش وهو جاي يهد السور المخالف، لان كانوا حيبقوا مطمئنين

لو كان أمن الدولة اتحل، او تم دمجه في الجيش، ما كانش راح عمل في نفس اليوم تلات حوادث طائفية

لو ما كانش محمود وجدي برأ الشرطة من كل جرائمها ما كانتش الناس مسكت الظابط اللي قتل سائق الميكروباص وقتلته بايديها لانها عندها احساس ان حقها حيضيع

واساسا لو شفيق عمل لجنة عاجلة لتنقية جهاز الشرطة ما كانش ظابط قتل سائق ميكروباص في الشارع

ولو من الاصل اتسمع كلامنا وحكومة شفيق كلها اتحلت وجابوا حكومة كفاءات مالهاش علاقة بالنظام القديم

ولو من الاصل اتسمع كلامنا وتم الغاء العمل بالدستور القديم والتعديلات اللي اتعملت دي بقت دستور مؤقت

لو الحاجتين دول بس اتعملوا ما كانش اذناب النظام حيبقى عندهم الامل ده في الرجوع، ومن ثم كانوا حيحاولوا يتعايشوا مع الوضع الجديد ويلبسوا توب الثورة بدل ما يفضلوا يحاولوا يهدوا فيها لان لسه فيه ثغرة قانونية مدياهم امل انهم يرجعوا

انا مقدرة رد المجلس العسكري على الكلام ده:

1- مش عايزين نقيل حكومة شفيق دلوقت لان دول عارفين تفاصيل الوزارات ومع مراقبتهم حيبقوا اقدر على تسيير الاعمال

2- لو عملنا دستور مؤقت حيبقى فيه فراغ دستوري وحيضطر المجلس العسكري يطلع قرارات وكده حيبقى حكم عسكري واحنا مش عايزين حكم عسكري

ده كلام رائع... بس ده يتقال في مجتمع انبياء، مش مجتمع الفساد فيه متجذر بالطريقة دي

لان الحكومة دي عشان هي عارفة تفاصيل الادارات حتستغلها لصالح النظام البائد اللي هي على ولاء له

واذا كان المجلس العسكري مش عايز شبهة حكم عسكري، ادي اذناب النظام بيخلقوا فوضى عشان يجبروا المجلس العسكري انه يعمل حكم عسكري

اما عن حل امن الدولة، الجيش مش عايز يخلق منهم مافيا - على حسب كلامه - دي ناس مسلحة، ولها رجالة، وهم مش عايزين يحلوهم والا حيبقوا مافيا

كلام جميل.... بس هم مافيا بالفعل

وقلنا يتم دمجهم في الجيش والجيش اولى بميزانيتهم المهولة واللي مش بتتصرف على حاجة غير على الخراب

الجيش قال: لا... احنا بقى لو فتحنا الفاتوحة دي حيبقى حكم عسكري بجد.. ندمج كل مؤسسة فاسدة بقى معانا؟

لا.. ماحدش قال ندمج كل مؤسسة فاسدة.. امن الدولة بس.. امن الدولة بس

الجيش له اراضي، وله مشاريع، يشتغلوا فيها، ومن غير ذل ولا حاجة، اللي كان ظابط يشتغل شغلانة في المشاريع دي ما يوازي مقام الظابط واللي كان عسكري يشتغل مزارع ولا بنا ولا اي حاجة تنفع البشرية بدل ماهم عايشين يرازوا في مخاليق ربنا كده

الكلام ده قلناه قبل ما تحصل الكوارث دي وماحدش سمعنا

طيب... الشعب يريد حل امن الدولة

الشعب يريد اقالة حكومة شفيق ومحاسبتهم

الشعب يريد دستور مؤقت

والكلمة كلمة الشعب والشورة شورة الشعب... مش ممكن المناهدة دي في كل نقطة نطالب بيها

وائل خليل قال اللي بيطالب باننا نخلص الثورة عامل زي اللي واقف على باب اودة العمليات يقول للدكتور اللي بيشيل ورم: يالا خلصنا بقى يا دكتور، المهم يخلص مش المهم يشيل الورم؟

ماهو حيروح لوحده، لا مش حيروح لوحده، ما انت شلت نص الورم كفاية كده

هو ايه اللي كفاية؟ احنا بنفاصل في تلاتة كيلو اوطة؟