الصحفيون تنضم الى الثورة بصفتها النقابية

وائل غنيم الآن في التحرير. حمد الله ع السلامة

======

وصلت على احمد محمود الصحفي الشهيد وعملت له جنازة رمزية في ميدان التحرير، والصحفيين هناك اعلنوا عدم شرعية مكرم محمد احمد دلوقت، بسبب عدم تحركه لاستشهاد احمد محمود، وحيتخذوا الاجراءات القانونية لنزع الشرعية عنه

مش لازم بقية النقابات يموت لها حد وهو بيعمل شغله

انا باطالب كل النقابات والنقابات العمالية واتحادات الطلبة بالانضمام الى الثورة بصفتهم النقابية ونزع الشرعية عن النقباء والمجالس التابعة لنظام مبارك

الثورة حتنجح ان شاء الله، بدليل العلاوة الخمستاشر في المية، ولسه، احنا صامدين، والراجل ده ماشي هو ونظامه ان شاء الله، واللي ساند النظام الثورة حيتحاسب، واللي استندل مع الثورة يبقى غايب، والغايب مالوش نايب، دي نصيحة لوجه الله يعني، عشان دي ثورة فيها تضحيات كتير وشهداء كتير وناس قلبها واجعها كتير واي حد بعد نجاح الثورة حيحاول ينتفع وهو ما شاركش الناس حتاكله بسنانها، اذا كانوا مش طايقين القوى السياسية عشان جم متأخر.. اديني باقول لكم اهو، عقلكم في راسكم تعرفوا خلاصكم، الثورة منصورة ان شاء الله بيكم او من غيركم

اعملوها بجميلة وخليها بيكم، زي ما الفنانين عملوا