Wednesday, 16 February 2011

جمعة الاستمرار والانتصار في ميدان التحرير



الدعوة هنا للاستمرار والانتصار
احنا نازلين عشان نقول ان الثورة ما خلصتش لحد ما نحقق كل المطالب، وعشان نحتفل كمان
سمعت عن موضوع جمعة العرفان دي
عرفان وتوديع لمبارك، عشان يقولوا له شكرا
انا كمان عايزة اشكر مبارك
شكرا يا مبارك على انك خدمت البلد تلاتين سنة
شكرا لأنك دمرت الصناعة المصرية وفككت القطاع العام وبعته للمستثمرين وخربت بيوت العمال 
شكرا انك حولت المواطن المصري من مزارع وصانع لسواق توك توك
شكرا على تجريف الاراضي 
شكرا على ان السفارة المصري في اي حتة في العالم هي بالنسبة لاي مصري مهاجر او مقيم في الخارج بوابة جهنم لحد ما بقى كل الناس تستهين بينا وتسترخصنا
شكرا على انك كسرت نفس الصعايدة وقعدت عشر سنين تطحن في كرامتهم لما خليتهم مش حاسين ان البلد بلدهم وبقوا حاسين ان اهالي بحري دول قوات احتلال
شكرا على انك حاربت الارهاب.. امال، انا فاكرة كويس قوي حربك على الارهاب، لما كنت بتقتل شباب زي الورد في الشارع وياخدوا بصمات الجثث ويبتدوا التحقيق..... مع الجثث
شكرا على انك عشان تحارب الارهاب خلقت تجار مخدرات وبلطجية في الصعيد كانوا بيكسروا نفس الناس وينيموهم من المغرب
شكرا انك عشان تقسم الصعيد على نفسه خلقت فتنة طائفية وكرهت المسلمين والمسيحيين في بعض
(في بداية الحرب على الارهاب في الصعيد، الجماعات الاسلامية كانوا بيروحوا يستخبوا في بيوت المسيحيين عشان بيتناصحوا يعني على الامن، والمسيحيين زي اي صعايدة، اللي يستغيث بيهم لازم ينجدوه، فلما عرف عمل كام حاجة تقوم المسيحيين على المسلمين وتخوفهم، ومن ضمنها مثلا ان المسئول عن مذبحة الكشح ما يتحاسبش، والله اعلم بقى مين اللي عملها، اكيد هم مدام هم اللي فجروا القديسين، ومدام اللي عملها ما اتمسكش، واجبر بعض المسيحيين انهم يشتغلوا مع الامن، وخلا الامن يسرب خبر ان مسيحيين بيشتغلوا مع الامن للمسلمين وشعللها وخلاهم مش طايقين بعض، مع انه كان داخل عليهم وهم سمنة على عسل حتى مع وجود الجماعات الاسلامية)
شكرا انك بعد ما كسرت نفس الصعيد عشان تخلص على الجماعات الاسلامية قلت ان الايد البطالة نجسة ودرت على بقية مصر تكسر نفسها
شكرا على انك قعدت قوات الامن في الصعيد كل السنين دي وما فكرتش ولا ثانية ان الصعايدة لابسين الجلاليب على اللحم وانهم بياكلوا طاقة واحدة في اليوم وان فيه ايام بتعدي عليهم من غير اكل.. ما كانش يهمك، كان يهمك تكسر نفسهم وتهينهم وتخليهم يا اما يشتغلوا مع الامن يا اما يبقوا تحت رحمة تجار المخدرات والبلطجية
شكرا انك عممت التعذيب في كل قسم وفي كل مديرية امن لحد ما ظابط الشرطة المصري اقتنع تماما ان شغلته الاساسية انه يعذب الناس 
شكرا على سكان العشوائيات اللي بياكلوا من الزبالة وفضلت تكبر وتوسع فيهم واي حد يحاول يساعدهم تطفشه لانك محتاجهم في الانتخابات تشتري اصواتهم بوجبة وبطانية وشيرز 
شكرا على جوع الناس وانت عمال تكوم في سبعين مليار دولار
شكرا على انك اشتغلت خدام للامريكا وقضيت تلاتين سنة تخدم المصالح الامريكية زي ما هيلاري بتقول وتذلنا احنا
شكرا على انك فضحتنا وخليت اللي يسوى واللي ما يسواش يقول لنا يا عملاء امريكا يا عملاء اسرائيل
شكرا على اننا بنشحت القمح
شكرا على تقسيم السودان
شكرا على فضيحتنا ايام حرب غزة وبقى العالم كله بيعمل مظاهرات قدام سفارتنا زي ما بيعملوا مظاهرات قدام سفارات اسرائيل وبقت راسنا احنا البلد اللي عمرها سبعتلاف سنة واتبنت على اكتاف الفلاحين والبنائين تتساوى براس خرية عمرها ستين سنة اللي اسسها مجموعة عصابات وخارجين عن القانون
شكرا على اننا ذالين نفسنا ومصالحين اسرائيل وانت بتبعت عيالنا يموتوا في كل حتة، وتبعت عيالنا يموتوا في حرب العراق وايران وخناقة مالناش لا في تورها ولا طحينها وبعدين ترجع تبعتهم تاني يموتوا لما صدام احتل الكويت.. يوه، ينيلك يا راجل، مش انت اللي قعدت تدعم في صدام طول السنين دي؟ وتبعت العيال لافغانستان عشان تخلص منهم ولما يرجعوا تحكم عليهم بالاعدام، وتبعت بنفسك العيال للبوسنة ولما يرجعوا تعدمهم برضه، انت ما عندكش غيرنا تبعته يموت؟ واللي يرجع ما يموتش تموته بنفسك؟
ولما ما لقتش حتة تموتنا تاني فيها بقيت تبعتنا في عبارات .. اه، عبارة من اللي بيغرقوا دول
شكرا على ان اول تصريح لك عن العبارة اتريقت عليها
شكرا على انك سبت الف مصري يموتوا ما بعتش لهم توك توك وانت بتبعت طيارة انقاذ لحرائق اسرائيل
وتركب ابنك علينا ويدلدل رجليه ويجيب صحابه يتسلوا علينا ويقلبونا في الفلوس
وتعمل لنا فتنة طائفية وكل ما تحتاس تدبح لك جوز عتاقي مسيحيين وتلبس المسلمين والمسيحيين في بعض عشان تخلص منا كأن وجودنا في الحياة هو مشكلتك الوحيدة 
وتموت لنا الناس وهم خارجين في عيدهم وتدخل اللي قتلهم مجلس الشعب 
وتموت لنا الناس في ليلة راس السنة وتلبسها لبريء يموت من التعذيب 
وتدي امر بنفسك لقوات الامن انهم يفتحوا علينا الرصاص الحي
شكرا شكرا شكرا ... مش عارفة اودي العرفان والوفاء فين ولا فين
شكرا على فتح الرصاص الحي على عمال المحلة عشان عايزين عيش حاف يأكلوا بيه ولادهم وتعمل لنا علاوة الصبح وتضاعف سعر البنزين بعد الضهر
شكرا على الشاب اللي مات جنبي على كوبري قصر النيل ومنظر الدم على جسمه ووشه مش عايز يفارق عينيا 
شكرا على انك تدي القوات المسلحة امر انهم يضربوا علينا رصاص حي ولولا انهم بني ادمين ومصريين كان زمانها بقت مدبحة وكان زمان البلد راحت في داهية ومش بعيد كان جالنا احتلال عشان انت ماسك في الكرسي ومش بعيد كان الجيش ضرب في بعضه... وانت يهمك ايه؟ 
ما نولع احنا وجيشنا وناسنا واهلنا وبلدنا المهم انت وفلوسنا اللي هربتها واللي طول فترة الثورة كنت بتعمل اتصالاتك عشان تأمنها
شكرا على انك كنت بتسيبنا مذلولين مستنيين خطابك وانت قاعد على التليفون مع بن اليعازر تشكي له همك 
شكرا 
شكرا
شكرا ايها الرئيس المخلوع محمد حسني مبارك
السادة اللي عاملين الايفينت ده على الفيس بوك.. اقولكم ايه؟ اقولكم ربنا يحرق قلوبكم زي ما اهالي الشهدا اتحرقت قلوبهم عشان تحسوا بغيركم؟
صورة مبارك اتشالت، واتحط مكانها لوحة عليها لفظ الجلالة
ومش حينفع لفظ الجلالة يتشال عشان يتحط مكانه اي حد تاني
لا غالب الا الله
اما العبيد.. فخليهم في اغلالهم


68 comments:

dr.lecter said...

هننزل

magedans said...

حسبي الله و نعمي الوكيل, يا رب ارحم الشهدا و اقوي المصرين و بارك في شبابها

TAMTAM said...

الله عليكي يا نوارة

AME said...

Allah yenwar 3aleeky ya Nawara wa 3la kol el shabab el ward elly zayek. Ra7ema allaho shohda2 althowara.

AME said...

Allah yenwar 3aleeki ya nawara.

aly said...

موضوع التعاطف مع مبارك
وموضوع فتح صفحة جديدة مع الشرطة بدون أي محاكمات للي غلط واهمل منهم
وموضوع استمرار زكريا وعمر وغيرهم في شغلهم لسة
وموضوع التحذير ان بتوع غزة اليومين دول بيحاولوا يحتلوا سينا والسبب شباب 25 ابريل المنشور في الاخبار يوم الثلاثاء
وطبعا كلها تحت زعم مصر أولا

شامم ريحة ثورة مضادة من النظام القديم

ربنا يستر

متغربه said...

يااااااااااه دا انت قلبك ابيض قوى هو ده بس اللي انت فاكراهوله ليه ما شكرتيهوش علي الغلابة اللي بيبيعوا كلاويهم و حتت من اكبادهم علشان ياكلوا عيالهم و نسيتى ليه الناس اللي جوعهم لدرجة انهم كانوا بيموتوا في طوابير العيش و ليه ما شكرتيهوش على تطفيشه للمصريين برة بلالدهم يا نواره احنا في السعوديه مش عارفين حتي نرفع العلم و لما العيال شالوه الشرطة اخدته منهم و الله
اننا في نص سنه دراسيه كنا رجعنا

متغربه said...

و كنت عاوزة اقولك ان هاني باشا شاكلر عامل اغنية و حاطط صورة حسن نصر الله و خامنى في خانه الاعداء هما مش ناويين يتوبوا في ام التليفزيون ده ولا ايه

hussein014 said...

يسلم لسانك يا نوارة
من الامراض اللي محتاجين نتعالج منها النسيان والتسامح العبيط اللي في غير محله
واللي هيقول ان مش هو المسئول عن ده انما الحكومة والمسئولين اقول يبقى هو رئيس فاشل ومش عارف يحكم العظيمة مصر وكان لازم يغور من زمان

Sharm said...

كفاية مظاهرات بقى يا نوارة
تعبت
:((((((
ده انا بكتب الكومنت و انا باخد دوا و بدهن كريم على كتفي !! كل ما اطلع مظاهرة العساكر يضربوني على نفس الكتف و في نفس الحتة
ورمت يا نااااات
من يوم 25 و مش عايز يخف
لما نشوف المظاهرة دي كمان
خليني وراكي لغاية ما تموتيني

hussein014 said...

انما ايه هي بقية المطالب
قانون الطوارئ فيه وعد منهم وهم صادقين انه يتلغي قبل بداية الانتخابات ودي رؤيتهم
معتقلي الثورة بدأ الأفراج عنهم بالفعل وكله ساعات ويتم الافراج عنهم جميعا مع وعد بالبحث عن المفقودين
بقية المعتقلين هم محتاجين بس يراجعوا ملفاتهم ويشوفوا كل معتقل ظروفه كانت ايه واعتقد ان اغلبهم هيتم الافرج عنهم قبل اسابيع بإذن الله
محاكمة القتلة والمجرمين شغالة وربنا يسهل
محاسبة الفاسدين اللي وقع بيحيب الباقي واديهم بيقعوا زي الدبان واللي عنده ملف او مستند بيتقدم وربنا يسهل
دي الطلبات اللي ممكن تكون في طور التنفيذ
ده طبعا غير اللي اتحقق وغير اللي جاي وقته
اما اللي غايظني فعلا هو الحرامية الكبار اوووووووووي زي فتحي سرور وصفوت غير الشريف وزكريا عزمي وبقية الناس اللي زي دول مش عارف مصيرهم ايه

maha said...

شكرا ليكي يا نوارة
انتي قلتي كل اللي كان نفسي اقوله للعالم المغيبة دي دول اكيد كانوا نايمين زي اهل الكهف بقالهم 30 سنة و صحيوا فجاة
او كانوا في جزر الموز ولسة جايين
انا بس عاوزة اضيف على تشكراتك
شكرا على الاطفال المصابين بالسرطان
شكرا على مرضى الفشل الكلوي و التليف الكبدي
شكرا على شهداء غزة اللي حاصرتهم و منعت عنهم الغذاء و الدواء
شكرا على نصف مليون طفل عراقي شاركت في قتله
شكرا على الموتى تحت صخور الدويقة
شكرا على حرقى قصور الثقافة
و القطارات
القائمة تطول
و شكرا شكرا شكرا
و اسأل الله ان يحشر الذين يعتذرون لحسني مبارك معه
و شكرا

سامية جاهين said...

وسبحان الله يا شيخة بتوع تأييد مبارك دول مش "بيعطلوا البلد". لكن احنا اللي نازلين نكرّم شهداءنا، احنا اللي خربناها!

hussein014 said...

نسيت حاجة بالنسبة لتشكيل الحكومة فيه تسريبات كتير ومصادر عن انها مع بداية الاسبوع الجاي وهم عملوا اجتماعات مع شخصيات كتير وبياخدوا وقتهم قبل اتخاذ القرار علشان يكون موفق زي قرار لجنة تعديل الدستور


بشكرك تاني يا نوارة على انك تحملتي انك تسردي جرائم مبارك ونظامه لانه عبء نفسي كبير بس كان لازم الكلام ده يتقال
وضفيه على كده تدمير التعليم اللي واضح انه كان فيه تار شخصي بينه وبين التعليم
وهتلاقي تعليقات كتير بتكمل بقية الجرائم

hend said...

بلاش الدعا ده بلاش ارجوكم مهما كان شوف الفتوى دى وهبعتلك كمان اللينك بتاعها ان مكنش علشان الناس فيبقى علشانك ادعيلهم بالهداية
فإن الدعاء على المسلم المعين الواقع في المعصية لا يجوز، لنهيه صلى الله عليه وسلم عن الدعاء على الرجل الذ...ي شرب الخمر، كما في حديث البخاري.

وأما الدعاء عليه بسبب ظلمه وإيذائه لك، فهو جائز ويستجاب لك، ولو لم تكن ملتزما كما يدل له حديث الصحيحين: واتق دعوة المظلوم، فإنه ليس بينها وبين الله حجاب.
وقد ثبت في الصحيح أن سعد بن أبي وقاص دعا على من ظلمه وأن سعيد بن زيد دعا على امرأة ظلمته فاستجيب لهما.

ولكن ترك الدعاء على الظالم أفضل ، كما يدل لذلك قول الله تعالى: [وَلَئِنْ صَبَرْتُمْ لَهُوَ خَيْرٌ لِلصَّابِرِينَ] (النحل: 126)، وقوله تعالى: [وَلَمَنْ صَبَرَ وَغَفَرَ إِنَّ ذَلِكَ لَمِنْ عَزْمِ الْأُمُورِ] (الشورى:43).

وأما من لا يستجيب للنصائح، فالذي ينبغي هو الدعاء له بالهداية والإنابة إلى الله ، وليس الدعاء عليه، ففي صحيح مسلم وغيره عن أبي هريرة رضي الله عنه قال: كنت أدعو أمي إلى الإسلام وهي مشركة فدعوتها يوما فأسمعتني في رسول الله صلى الله عليه وسلم ما أكره، فأتيت رسول الله صلى الله عليه وسلم وأنا أبكي، قلت يا رسول الله: إني كنت أدعو أمي إلى الإسلام فتأبى عليّ فدعوتها اليوم فأسمعتني فيك ما أكره، فادع الله أن يهدي أم أبي هريرة، فقال رسول الله صلى الله عليه وسلم: اللهم اهد أم أبي هريرة، فخرجت مستبشرا بدعوة نبي الله صلى الله عليه وسلم، فما جئت فصرت إلى الباب فإذا هو مجاف فسمعَتْ أمي خشف قدمَيَّ فقالت: مكانك يا أبا هريرة، وسمعْتُ خضخضة الماء، قال: فاغتسلَتْ ولبست درعها وعجلت عن خمارها ففتحت الباب ثم قالت: يا أبا هريرة: أشهد أن لا إله إلا الله وأشهد أن محمدا عبده ورسوله، قال: فرجعت إلى رسول الله صلى الله عليه وسلم فأتيته وأنا أبكي من شدة الفرح، قال: قلت يا رسول الله: أبشر قد استجاب الله دعوتك وهدى أم أبي هريرة، فحمد الله وأثنى عليه، وقال خيرا... إلى آخر الحديث

http://www.islamweb.net/ver2/Fatwa/ShowFatwa.php?lang=A&Id=46898&Option=FatwaId

وشوف ده كمان

http://www.islamweb.net/ver2/Fatwa/ShowFatwa.php?lang=A&Id=7618&Option=FatwaId

weghatnazar1 said...

ردا علي مظاهرات رد الجميل من ميدان مصطفي محمود
وجروب انا اسف يا ريس علي الفيس بووك .. اسف
علي ايه ؟؟مش عارف
http://weghatnazar1.wordpress.com/

Possy said...

فيه فكره جميله اوي سمعتها علي كذا قناه تجيب حق الناس اللي معتصمه و مضربه عن العمل دي و في نفس الوقت تخلي الناس تشتغل و عجلة الانتاج تتقدم و البلد ماتوقفش....هيه ببساطه انشاءديوان المظالم بحيث ان اي جهه شايفه انها عندها مطالب فئويه يختاروا ٣ او ٤ منهم يمثلوهم في الديوان ده و اللي حيكون فيه ناس موثوق فيها تجيب حقهم و توصل صوتهم و بقية الناس تشتغل بدل الفوضي اللي مضيعه فرحة جلاء الرئيس :)
يا ريت اي حد يتبني توصيل الفكره دي للمعنيين و بلاش احتفال دلوقتي و مظاهرات لان واضح ان انشغالنا بالتظاهر مخلينا مش شايفين مدينه زي العريش
اللي فيها ملثمين(ربنا يستر مايكونوش اللي في بالي
وعمالين يحتلوا شقق الناس في الهوجه اللي احنا فينا و الموضوع اتكرر في هرم سيتي بالبلطجيه اللي ربنا حينتقم منهم ان شاء الله فايه رايوكوا ان يوم الجمعه ده يكون مصالحه مع الظباط الشرفاء بمسيره معاهم او اي حاجه انتوا تشوفوها بحيث نمهد لهم الرجوع للشارع بقي
يا ريت يا حماعه تفكروا في الحاجات دي عشان تبقوا بتبنوا بجد و مش بس مركزين علي المظاهرات

مايهمش said...

نوارة
......

ماردتيش على بقية كلامى فى البوست اللى فات
بالنسبة للبوست ده..مجرد رأى للنقاش.. مش شايفة ان المظاهرات والاحتجاجات الفئوية المفروض تهدا شهرين مثلا عشان الناس تركز فى شغلها والبلد تهدا شوية؟
بالنسبة لمسيرة مبارك فهى مالهاش لزمة فعلا
لكن أنا عايز أعرف رأيك فى حاجة : لو أعلنوا خبر وفاة مبارك كما هو متوقع فى أى لحظة... هل ستنعيه ؟ وهل ستسيرين أو تشجعين الأخرين على السير فى جنازته؟

hussin said...

استغفر الله العظيم
تصدقى ؟انا عمرى 42 سنه عشت مع مبارك 30 سنه بقالى 20 يوم افتكر اى حسنه علشان ادعيلو بها والله ما انا لاقى قلت ادعى عليه وامرى لله

السلام عليكم said...

المفروض الجروب يبقى اسمه انا اسف يا ريس على انى سبتك تبهدل فيا لغايه دلوقت

موضوع سرطان الاطفال ده هو اللى مجننى و
ربنا بعافينا ويعافى كل الناس مريض السرطان بياخد مورفييين احيانا من الالم طيب يبقى الطفل ده بيتالم قد ايه يارب زى ماخلصتنا من مبارك خلصنا من المرض ده وكل ده من المبيدات المسرطنه وغالبا من دفن النفايات النوويه_وده رأىشخصى لا املك عليه دليل _ لان انتشار المرض ده عندنا بقى اعلى من الدول اللى فيها تسريبات نوويه

ربنا ينتقم منك يا مبارك

shady alaa said...

يسلم فمك

السلام عليكم said...

المفروض الجروب يبقى اسمه انا اسف يا ريس على انى سبتك تبهدل فيا لغايه دلوقت

موضوع سرطان الاطفال ده هو اللى مجننى و
ربنا بعافينا ويعافى كل الناس مريض السرطان بياخد مورفييين احيانا من الالم طيب يبقى الطفل ده بيتالم قد ايه يارب زى ماخلصتنا من مبارك خلصنا من المرض ده وكل ده من المبيدات المسرطنه وغالبا من دفن النفايات النوويه_وده رأىشخصى لا املك عليه دليل _ لان انتشار المرض ده عندنا بقى اعلى من الدول اللى فيها تسريبات نوويه
ربنا ينتقم منك يا مباركانت واعوانك وكل بقايا نظامك

رغدة زويل said...

ربنا يجعل تعبك ومجهودك دا فى ميزان حسناتك ويحفظك ويحافظ عليكى انتى وكل الابطال الثوار انا بس عاوزة اقولك ما تنسيش الطيارة الى كانت عليها خيرة قادة الجيش وكانو فى تدريب عسكرى فى امريكا والطياره وقعت بيهم فى ظروف غامضه حسبنا الله هو نعم الوكيل فى حسنى مبارك الخاين الصهيونى

semsema_asma said...

لا بجد فى شكر لازم اقوله للريس
شكرا لانك جمعتنا فى ميدان التحرير اسبوعين من اجمل اجمل اجمل ايام حياتنا
ووحدت هدفنا وعلمتنا التحدى بعندك

dina_dodo said...

يااااه والله لسه ما اخد حقه فعلا انا كمان يا نوراه محتاجه اشكره
انت الى فى عهدك مصر اكبر دوله فى سرطان الاطفال
انت الى فى عهدك الى بيتاجروا بالمخدرات بياخدوا براءه واصحا الفكر يدخلوا السجون
...انت الى فى عهدك الرشوه والفساد والمحسوبيه
انت الى فى عهدك المصرين كان فاضل يدفعوا ضرايب على الميه والهو
انت الى فى عهدك اصحاب اكياس الدم الفاسد بياخدوا براءه
انت الى فى عهدك لما الناس بتقولك كفايه احنا تعبنا شباب زى الورد يموتوا ودمهم يداس عليه بالجزم
انت الى فى عهدك المصرى المظلوم يخاف يدخل اسم يعمل محضر
انت الى فى عهدك امين الشرطه ممكن يمسك دكتور او استاذ فى الجامعه يمسح بكرامته الارض
... وكده كفايه واكيد انتوا عارفين الباقى

PalGate said...

شكراً لكم لانكم مصريين
شكراً لكم لانكم جزء من امتي
شكراً لكم لانكم انتم انتم
لم اتمنى بحياتي ان انتمي لغير بلدي إلا الان
اتمنى لو اني بينكم
لكن عزائي لنفسي ان الفرح الذي يعصف بقلبي ليس بأقل من الفرح اللذي بداخلكم
اتمنى يا ابناتء النيل ان تتذكرو يوما ما
أن ابواب الاقصى ليست بالقدس
ابواب الاقصى تفتح من قاهرة المعز
ادامكم الله ووفقكم واظهركم على من عاداكم
انا هنزل معاكم اكيد بس على شاشة الجزيره
واكيد اكيد اكيد روحي وقلبي وانتباهي وتفكيري معاكم
واعتذر عن التقصير
ودمتم

آخر أيام الخريف said...

بصى نوارة انا طبعا متفقة معاكى فى كل حرف و كل كلمة ربنا ينتقم منه و يصبر أهالى الشهداء اللى دمهم على ايده طول ال 30 سنة اللى مسك فيهم الحكم , بس كمان لازم اعترف ان لفتة وداعه -بلاش شكرا عشان شكرا دى فعلا مستفزة- دى انفراد من انفرادات ثورة اللوتس ... مفيش حد تانى خلع رئيسه وراح ودعه بعد كده وقالله هارد لاك ..انت ما صنتش الأمانة ووريتنا الويل و جبتنا ورا بس احنا برضه اكرم و اشرف منك لما شلناك ودعناك و لما هناحسبك هنحاسبك بالعدل لا هنعذبك و للا هنجبرك تمضى تحت الاكراه ولا اهلك هيبقوا بيدوروا عليك مش عارفين انت فين .

انا مش رايحة بس ليا اصحاب كتير نزلوا المظاهرات و نازلين دى برضه عشان الأسباب دى بالظبط ..لفتة متحضرة قدام العالم ليس الا بعد كده تعالى يا باشا من أين لك هذا و ذاك و كيت و جرائم الحرب اللى ارتكبتها ضد شعبك الأعزل

mamado said...

شكرا يا نواره انك لسه بتحاولي تفوقي الناس ومياستيش من الناس اللربنا عميهم عن الحق شاء الله هنزل

Boss said...

السلام عليكم
ازيك ياست الكل
انا متابعك من زمان وشايف ان لكي دور مهم في انجاح الثورة
ندائك للناس بالنزول عبر قناة الجزيرة بعد موقعة الجمل جعلنى افكر جديا بالسفر للقاهرة (مقيم بالاقصر)وللاسف كانت المواصلات متوقفة مع وجود كمائن للجيش في الطريق البرى
فشكرا لك وجزالك الله خيرا
اما بالنسبة لموضوع الصعيد وبحري فان معظم تعامل اهل الصعيد مع اشخاص من بحري يكون اما مع المحافظين(صباح التكبر)
او ضباط الشرطة وطبعا معروف ان ضباط الشرطة المغضوب عليهم يتم نقلهم للصعيد(علي اساس اننا حثالة المجتمع وطفلة الحشرة) وطبعا سعادة البية بيكون قرفان من الغربة(علي اساس انة في ليبيا مثلا) وبيطلع قرفة علينا
المهم الحمد لله احنا عندينا من الوعي القدر الكافي لفهم ان الموضوع مش قبلي وبحري وعارفين ان الظباط دول ساديين وواطيين طبع فيهم
بالمناسبة شوفتي الفيديو دة
http://www.youtube.com/watch?v=IVi3-NOP7FU
شكرا مرة تاني وان شاء الله هانزل

raskebera said...

حضرتك غلطانة
لازم نخرج عرفانا بجميل ماما سوزان
انتي ناسية ان لولا ضغطها ما كانش اتعمل قانون الخلع

hassna said...

انا اول مرة اكتب هنا يا نوارة مصر ونوارة الثورة لكن انا متابعة لمدونتك من فترة طويلة
بس النهاردة مقدرتش اقرأ الموضوع ده من غير ماكتب تعليق لان كلامك قطع قلبي ولو اننا محتاجين كتاب كامل عن انجازات المخلوع افندي المقرفة وانا بجد متعجبة من الناس اللي بتدعي لوقفة رد جميل لهذا الملعون بدلا من ان يدعو لوقفة رد جميل لارواح شهدائنا الطاهرة

el.kebeer said...

اول مرة اكتبلك
تعملى اية لو العدلى المش حبيب طلع مخططش للضرب فى المليان ودى كانت من ناس بنفسهم قررو يدافعو عن روحهم.

احمد عز لو طلع قال انا كنت بنفز توجيهات وانا ماليش يد فى الخراب واثبت دا.

الريس كان مغيب جزءيا ودا ممكن محدش يقول ازاى لانة اقنعوة ان الثورة تنظيم خارجى من برا البلد.
وانهم الاف قليلة

انا مش مع كل الى فوق انا بنور ضوء على اننا منبقاش زيهم الى احنا بنثور عليهم .

منخليش الغل و الحقد و التشفى و القوة اننا نقول دلوقتى

كلنا كنا عارفين وكلنا كنا بنتكلم بس بصوت واطى


دلوقتى علشان عارفين ان محدش هيعمل حاجة ولا حد يقدر يرد علينا كلنا بقينا ثوار و بنشتم

انا ياكد انا مش مع النظام يا جماعة الخير . بس مش عاجبنى ان الناس عمالة تتطلع الكبت زىالغسيل الوسخ

هنا و دلوقتى بيبان المعدن الاصيل

واخيرا انا قلت النظام كان علية 40 % افساد و الشعب حب دا ب 60 %

لو احنا متحضرين فعلان وبنكنس الشوارع مكناش وسخناها من الاساس لو مش عاجبنا المرور و الزحمة دى سلوكيات

انا حاسس ان واحد هيطلعو بيان الصبح

الى شارك فى الثورة هيدخل الجنة
وهما من الملائكة الطاهرون

متشائم لانى فعلان احنا لسة مش معاد الديمقراطية بدون كذب

لان بعضهم فهم الثورة من منطلق فئة فقط

وكان ماسك العلم

yasser said...

انا معاكي في كل اللي قولتيه عن مبارك يا نوارة، بس مفيش داعي للغل ده لما دعيتي على صحاب الدعوة لجمعة العرفان ان ربنا يحرق قلوبهم احنا لسه بنقول إيييييييه؟ نحترمو وجهات نظر بعض واختلافنا عن بعض في الراي والأهم من كده اننا محتاجين اننا نكون اخيييييرا صف واحد وايد واحدة مش نقعدو كل شوية نصنفو نفسنا بتصنيفات واسماء خايبة ايا كانت. الخلاصة ندعو على مبارك آه وألف أه لأنه كان فعلا ظالم لكن ندعو على بعض لأ وألف لأ على الاقل عشان ده مش وقته خاااااالص.
وعلى فكرة انا كمان استشهد جنبي المرحوم عبد الستار عبد السميع عبد الستار بطلقة حية في دماغه من ورا طلعت من وشه وفضلت شايله على كتفي انا واتنين شباب تانيين لحد ما دخلناه مستشفى حساب -مع تشديد السين- في محرم بك. فالمهم يعني متعمليش فيها فلوطة اوي عشان شوفتيلك واحد مقتول كلنا مرينا للاسف بنفس التجربة واشد لأني من مصابين الاحداث دي كمان وشفت فيها بدل الشهيد والمصاب والله شوفت كتييييييير وبمناسبة الشهدا ياريت توصلي اسم الراجل ده لو عرفتي لاني مقريتش اسمه فأي قائمة من قوائم الشهداء وعلى فكرة احنا من اسكندرية. وشكرا...

weghatnazar1 said...

الجماعه اللي رايحين يودعوا مبارك ..معلومة تهمكم ..
احمد نظيف ساكن في 3 فيلات في مجمع النخيل الفاخر .. وفاتورة الكهرباء للثلاث فيلات مغ بغض لا تزيد عن 5 جنيه ..حسب مقال الدستور
http://dostor.org/society-and-people/variety/11/february/12/36191

ما تنسوش تشكروه علي دي كمان

soma said...

نواره,,الناس دي شكلها بتتعاطف مع الجلاد اكتر من تعاطفها مع الضحيه..اناهاتجنن يعني كل اللي حصل الفتره اللي فاتت دي عدي عليهم كده وان اهم حاجه دلوقتي نقدم اعتذار لسيادته اننا طلعنا عيال وماسيبناهوش 30سنه كمان يبهدل فينا وفي كرامتنا,,ربنا يتولانا برحمته

المهندس said...

الاخت العزيزة نوارة
اولا اشكرك جزيل الشكر علي ما عددتيه من جرائم النظام السافل ... ولكنه يظل قطرة من بحر جرائمه ضد المصرييين .
ثانيا : ابوس ايديكي .. لازم تكسفي من ظهورك علي شاشات التلفزيون ... انت ... ووالدك الشاعر العظيم " الفاجومي " .. والدكتور " صافيناز كاظم " ... ابراهيم عيسي ... احمد خالد توفيق ... نوارة ...هناك مبادئ ثورة مضادة ... والاصفراوي السماوي .. اللي قاعد في شرم الشيخ ..هو وولده .. مش هيسيبونا في حالنا بسهوله ... رجااااااء التحذير ثالثا : هناك دعوة بدات تظهر اننا نسامح الشرطة ..وخلاص نسيبهم ينزلوا الشارع ... وده رغم انه خطأ في خطأ ... الا انه سيترتب عليه خطأ تكتيكي اخر ... وهو السماح لقوات الاحتلال الخاصة بالنظام السابق بالرجوع والانتشار علي الارض ... وانتي عارفة ان عددهم يفوق تعداد الجيش بمرات ... لذا لابد من مجابهة تلك الدعوي .. اذا ارادوا النزول ..فلينزلو بعد تحقيق مطلبين اساسيين ... حل جهاز امن الدولة ... تفكيك الامن المركزي .. اللي عاوزه الجيش ياخده منهم ... والباقي يرجع كأعفاء من التجنيد
نوارة هذا الكلام ليس كلام في الهواء ... ارجو ان يؤخذ الموضوع بحذر ... هناك جماعات تتحرك في الخفاء ... وانت عارفاه ...سماااااوي ومش سهل
والسلام عليكم

حسن على said...

الشهداء دول هم الابطال الحقيقين للثورة,وارجو الا ينساهم التاريخ ,وادعوا الفنانين التشكيلين البدء فى تصميم نصب تذكارى مع شرط ان يحمل اسماؤهم جميعا. البطل الحقيقى فى اغلب ومعظم الاحوال هو من احاد الناس لا يرتدى النياشين والانواط,يرتدى قميص وبنطلون,ولا يلفت نظرك بشىء متفرد, لكن ساعة الجد تكتشف حقيقتهم ...................ومن المخزى ان ينساهم التاريخ المصرى

المهندس said...

احنا مش اسفين ياريس ... الله ربنا يولع فيك انت وكل المنافقين اللي بيحبوك
http://www.facebook.com/MESH.ASFEEN?sk=wall

e said...

ﺑﺼﺮﺍﺣﺔ ﺑﻘﻲ ﻣﻔﺮﻭﺽ ﻧﺪﻋﻠﻲ ﻋﻠﻲ ﺍﻟﺮﺍﺟﻞ ﺍﻟﻠﻲ ﺭﺹ ﺍﻟﻜﺮﺍﺳﻲ ﻋﻠﻲ ﺍﻟﻤﻨﺼﺔ ﻳﻌﻨﻲ ﻟﻮ ﻛﺎﻥ ﺑﺲ ﺯﻧﻖ ﻛﺮﺳﻲ ﺣﺴﻨﻲ ﺷﻮﻳﺔ ﺟﻨﺐ ﻛﺮﺳﻲ ﺍﻟﻤﺠﺤﻮﻡ ﺍﻟﺴﺎﺩﺍﺕ ﻛﻨﺎ ﺍﺭﺗﺤﻨﺎ ﺍﻟﺘﻼﺗﻴﻦ ﺳﻨﺔ ﻟﻮ ﻣﺒﺘﻌﺮﻓﻮﺵ ﺗﺮﻭﺻﻮﺍ ﺑﺘﺮﻭﺻﻮﺍ ﻟﻴﻴﻴﻴﺔ

أخيرا مصرية وأفتخر said...

أنا مش عارفه اذاي نرحمة وهو ما رحمناش ولا رحم اولادنا ياترى حس باللي رقوا في البحر في عبارة السلام وهم لامين شقا سنين غربة في ذل وهوان وسيطرة كفيل مابيفهمش الالف من كوز الذرة وبدل مايروح لاهله بفرحة يروح جثه اذا لقوة يعني ....نفسي اعرف اذاي بينام ....ربنا سبحانة تعالى قادر على كل شئ ذي ما ابتلى المصريين بمبيدات تسبب السرطان ابتلاه به وهو بياكل كفيار اللهم لا شماتة ربنا يرحمنا...

أيمن البرى said...

يسلم لسانك و ربنا يبارك لك و يبارك فيك
بس كأنك جبت شريط المآسى كله بيمر قدام عنينا
ده شعب اصيل انه لسه حتى الآن لم يرسله للمقصلة زى الثورة الفرنسية
يارب سلم مصر و شعبها و كل الامة

rahrom said...

يانوارة مش هانقول غير حسبنا الله ونعم الوكيل لو قعدنا نعد بلاويه مش هنخلص بس بلاوى التانين شرور وصفوت وعزمى وسليمان راحت فين ليه مابنجيش ناحيتهم وهما فى انهى مصيبه دلوقتى الكل ساكت عنهم ليه وكمان انا باقترح حملة للحفاظ على اخلاقنا اللى الثورة عدلتها فيه ناس دلوقتى مثلا مش بيحافظوا على قوانين المرور فى الشارع وكده يعنى تحدى لشرطة المرور وبغض النظر عن همج الشرطة احنا لازم نبقى كويسين علشان نفسنا وبلدنا يعنى حملة لتحويل مصر لدولة متحضرة من الطراز الاول فى خلال مدة زمنية وجيزة
العمر قصير وعايزين ولادنا يتربوا صح طلب تانى ممكن اتواصل معاكى شخصيا على الايميل انا بحبك فى الله قوى وربنا يحفظك بحفظه

Bella said...

قلتي اللى نفسي اقوله

بس نسيتي تشكريه على دوره الممتاز وطلعاته الجوية المتتالية لتدمير التعليم وأخرها وزير التعليم العالي هاني هلال اللى حلف يخلي دكاترة الجامعة يمسكوا جردل ومقشة من كتر تقدير رئيسه للعلم ورجاله وشكرا على انه جاب للتعليم الوزير ابن زكي بدر صاحب بلطجية انتخابات اتحادات الطلبة ايام ماكان وكيل جامعة عين شمس ... وشكرا لانه اقترض من البنك الدولي لتحسين مستوى التعليم فعمل لجان للاشراف على الجودة كل همها تستيف ورق وصرف فلوس وكل ده ديون على قلبنا ح نفضل ندفعها والاجيال الجاية ح تدعي علينا ... وشكرا لانه خصخص التعليم وكان على وشك يحول الجامعات كلها لاكشاك سجاير تبحث عن راعي رسمي يدفع مرتبات اعضاء هيئات التدريس و طبعا الراعي الرسمي يقول اتعلموا كذا نتعلم كذا وبفلوسي ياكلاب

شكرا ياريس على تحويل الجامعات لمقار مباحث امن الدول يقوم فيها رجالك بالتضييق على الطلبة المغتربين وتحويلهم بالعافية لجواسيس على زملائهم واساتذتهم والا لن يسكنوا في المدن الجامعية واللى يرفض يترمي في السجن ويتبهدل هو واللى خلفوه

وكفاية شكر احسن جنابي ح تفرقع من كتر الشكر والعرفان لجمايلك اللى مغرقانا

assour said...

ينصر دينك يا استاذ خليفة

Kamba said...

Nawara, Thank you.

الخوجة said...

ينصر دينك يابنت أبويا نجم أحنا بنقول كدة للناس الكبيرة زى الوالد اللى فاهمة متعودين نقول أبويا الحاج
عشرة على عشرة وبالخليجى صح لسانك معناها عقلك كبير وأحنا ورائك لحد ماتموتينا
جمعة الانتصار والاستمرار - FRIDAY OF VICTORY AND CONTINUITY وياريت تشوفوا قناة التحرير اقول البروموا بتاعها ولو انك يانوارة مقلتيش لينا تليفونها وترددها اعملوا ابديت للقنوات وهنا فيديوهات لنوارة

السلام عليكم said...

للجماعه اللى بيقولوا شكر مبارك دى وجهه نظر وان الثوره دكتاتوريه انها بتحجر على رايهم وانهم شافين مبارك مش مسؤل عن الخراب اللى حاق بمصر 30 سنه فى كل المجالات صحه وتعليم وزراعه وصناعه وبيع البلدوتهريب اثار وبيع الغاز لاسرائيل ارخص ما بيبعوا هنا وتكميم الافواه واى حد يعتقل ميبنلوش طريق جره وتلفيق التهم والمحاكمات العسكريه لافراد مدنبيين وبقول ده سلوك افراد وان هو كويس وان احنا اللى مش عارفيين نتحكم واننا بنرمى الزباله فى الشارع

طيب ما حكومتك اللى لغت الزبال اللى بيجمع الزباله من البيوت وخلت فى شركات تلمها من مواقع محدد فى الشارع والشركات دى اتملعنت وبتلم الزباله يوم اه ويوم لا المفروض الناس تعمل ايه تحتفظ بزبالتها فى البيوت مع ان الحكومه اجبرتها انها تدفع حق لم الزباله مقدما على فاتوره النوروهى اللى قايلها حطوها فى الشارع واحنا حنلمها من الشارع

انت عملت كده زى نظيف اللى قالولوا على قطر الصعيد اللى اتحرق قالهم اصل الناس همج ومبتعرفش تركب قطرات

السلام عليكم said...

للجماعه اللى بيقولوا شكر مبارك دى وجهه نظر وان الثوره دكتاتوريه انها بتحجر على رايهم وانهم شافين مبارك مش مسؤل عن الخراب اللى حاق بمصر 30 سنه وكمان عايز يجيب ابنه يكمل مسيره الخراب اللىفى كل المجالات صحه وتعليم وزراعه وصناعه وبيع البلدوتهريب اثار وبيع الغاز لاسرائيل ارخص ما بيبعوا هنا وتكميم الافواه واى حد يعتقل ميبنلوش طريق جره وتلفيق التهم والمحاكمات العسكريه لافراد مدنبيين وبقول ده سلوك افراد وان هو كويس وان احنا اللى مش عارفيين نتحكم واننا بنرمى الزباله فى الشارع

طيب ما حكومتك اللى لغت الزبال اللى بيجمع الزباله من البيوت وخلت فى شركات تلمها من مواقع محدد فى الشارع والشركات دى اتملعنت وبتلم الزباله يوم اه ويوم لا المفروض الناس تعمل ايه تحتفظ بزبالتها فى البيوت مع ان الحكومه اجبرتها انها تدفع حق لم الزباله مقدما على فاتوره النوروهى اللى قايلها حطوها فى الشارع واحنا حنلمها من الشارع

انت عملت كده زى نظيف اللى قالولوا على قطر الصعيد اللى اتحرق قالهم اصل الناس همج ومبتعرفش تركب قطرات

احلام جوليا said...

بجد يسلم لسانك يارب يسلم لسانك مش عارفة اقول ايه حسه قلتي الي في قلبي كله هنا في الخليج بيقولوا لنا انتم ليه فرحانين كده فين الوفاء يجوا يسمعوا كلامك وهم يعرفوا قد ايه احنا وفينا وصبرنا واخلصنا لكلب يستحق الاعدام اتصرع علينا كلنا يجوا يشوف وجيعتنا الي مش حسين بينا وعملين يقولوا قولوا ربنا يسامحه متشمتوش فيه نقول ايه بس ماهو ما يحس بالنار الا الي طاويها ربنا يشفيه يارب علشان يتحاسب ويتحاكم ويارب يعيش لما يعدي المية علشان يتعذب ويتحاكم ويشوف الذل الي وراه لنا يارب يكون مصيره سجن معفن من السجون الي عملها يارب يكون بيقرا كلامنا عليه وبيشوف فرحتنا برحيله يارب يعيش لما يشوف ولاده بيموتوا قدام عينه من المرمطة زي ما مرمطنا سنين يارب يارب حقنا يارب في الدنيا قبل الاخرة يارب

Ramagrune said...

نوارة فى حاجة انا مش فاهمها الحكومة طلبت من امريكا و اوروبا تجميد حسابات ناس من النظام الفاسد لكنهم ماطلبوش تجميد حاسبات مبارك و عيلته
حد يقول لى ليه مستنيين ايه حد يفهمنى

Z said...

شياب الثورة عمل رقم ساخن لتلقى المكالمات الخاصة بالمتوفين والمختفين والمعتقلين والمحتاجين إلى مساعادات وكل ما هو من هذا القبيل فى فترة ما بعد الثورة ويتلقون الاتصالات على مدار الـ24 ساعة والرقم هو 1492
كما أن نقابة المحامين تتلقى كذلك طلبات المساعدة لمساعدة أصحاب الحقوق فى معرفة واستعادة حقوقهم
فبرجاء نشر ذلك

cheb_nader said...

هوه ده الكلام
قال وفاء قال
ده المفروض يتعدم

fatma elshaheer said...

ارجوكم الواحد خايف واضح امهم بيلتفوا علي الثورة احمد عز في العربية
شفيق وسليمان وعزمي في القصر
فين الشريف ومبارك واهله
الواحد خايف وفين المحاكمات للمسئولين والفساد والشرطة
انا خايفة يكونوا بيدبروا حاجة

fatma elshaheer said...

لابد م محاكمة مبارك واهله وكل الفاسدين ولماذا لايتم التاميم ليه القضايا

Nahla Anwer said...

الظاهر إن لسة فيه في الشعب المصري من يعاني من حالة حادة من متلازمة ستوكهولم

e said...

ﻭﺍﻟﻨﺒﻲ ﻳﺎ ﻧﻬﻠﺔ ﺑﻼﺵ ﺑﻀﺎﻥ ﺳﺘﻮﻛﻬﻮﻟﻡ ﺍﻳﻪ ﻭﺑﺘﺎﻉ ﺍﻳﻪ ﺍﻟﻠﻲ ﺑﻴﻌﻤﻠﻮﻩ ﺍﻟﻨﺎﺱ ﺩﻭﻝ ﺍﺳﻤﻪ ﺑﺎﻟﻌﺮﺑﻲ ﻋﻠﻮﺋﻴﻪ ﻧﺎﺷﻔﻪ

هراء لا داعى له ..... said...

هؤلاء الحمقى طالما بيحبوا الخائن قوى كدا يبقى نولع فيهم و ندفنهم معاه

علشان نستريح من عقولهم الطينية

لإن إللى يتعاطف مع خائن و عميل و ظالم و فاسد و حرامى

يبقى فيه منه

هراء لا داعى له ..... said...

هؤلاء الحمقى طالما بيحبوا الخائن قوى كدا يبقى نولع فيهم و ندفنهم معاه

علشان نستريح من عقولهم الطينية

لإن إللى يتعاطف مع خائن و عميل و ظالم و فاسد و حرامى

يبقى فيه منه

Mohammed said...

انا اللى عاوزة اقولك شكرا على مقالك انتى قولتى كل اللى جوايا وهدعى ربنا يسترها ويوفقكم يوم الجمعة انا عايشة بره مصر بس هكون معاكم بالدعاء ان شاء الله

sherif72003 said...

الموت بشرف خير من حياة مذلة

touch said...

وأخرت الكلام والشعر والخطابه والمظاهرات أمتى هتشتغلوا ولا عجباكوا حاله البلد الثوره نجحت حافظوا عليها بأعاده البناء بالعمل مش بالتهيس

طائر said...

ربنا معاكي ياقلب الاسد زي ما دكتور احمد خالد توفيق سماكي
بس بعد اذن حضرتك بلاش تدعي على حد انه يتحرق قلبه
ربنا يصبر اهالي الشهدا
ويهدي الناس جميعا

A.Radi said...

اسف!!!!!فعلا انا اسف اني سبته يحكمني تلاتيييييييين سنة !اسف اني هرمت ( علي راي اخونا التونسي ) انتظارا ليوم كنسه! انا مش عارف عشت السنين دي كلها ازاي؟ ادخل الجامعة و اتخرج و اروح الجيش واتجوز واخلف و ابني يتخرج و هو كاتم علي نفسنا!!نوارة هي زغرودك في الجزيرة كانت بجد ؟ واناو محمد صاحبي كنا بنبكي بجد لما سمعنا خبره و احنا قدام قصر العروبة ؟ هو مشي بجد و لا حاصحي بعد شوية الاقيه بيطلع لي لا مؤاخذة........ لسانه؟؟!!

farida said...

شكرا ليك انت يا أجمل مصرية في الدنيا
طول السنين اللي فاتت بقرا لك يا نوارة و بحترمك
بس بجد يسلم فمك و قلمك و فكرك

بعد إذنك هنشر رابط البوست ده بالذات في المدنة عندي تحت قسم بوست عاجبني

بجد فشيتي غلي
ده انا مرارتي اتفقعت من يا شيخة من بتوع شكر مبارك دول

و عاوزة اقول كلام ما يصحش اقوله
بس بجد
تسلمي

basel said...

نوارة يا جدعة
يا بنت عمي الفاوجومي
انا باسل من سورية
الاقليم الشمالي للجمهورية العربية المتحدة
أرجو منك ان تعيدي النظر في وضع رابط لطل الملوحي
كنت اود قول ذلك لك قبل الآن وليس بسبب كشف الشلطات السورية المرة تلو المرة عن ارتباط هذه البنت بالمخابرات الامريكية
في سورية قمع طبعاً ولكن ليس لمن يتحدث عن فلسطين
أرجو منك غعادة النظر و انت حرة كريمة و أثق في صوابية موقفك
ولا تلتفتي إلا تخرصات من يسمون " معارضة سورية " فهم مخترقون من امريكا وطروحاتهم برغم أنينهم من القمع و عذابهم مثلنا هي طروحات الغزو الامريكي المحاصصة الطائفية والاقتداء بالمعتلين العرب مبارك وعبد الله واضرابهم من اعداء المقاومة والليرالية العمياء والصلح مع إسرائيل ليس كل من عارض النظام السوري القمعي هو إنسان شريف أقول هذا وانا ضد محاكم الاستثنائيةقصة طل الملوحي فيها الكثير من الشبهات أرجو ان يكون من تتضامنين معهم من الاحرار الحقيقيين و أرجو أن تكون مدونتك الرائعة ملهماً لرفاقك في سورية
صرخة مجلجلة في حب الوطن والاسنان والحرية والعدالة

basel said...

اعتذر عن النص السابق الذي كتب على عجل شديد ولم انقح الاخطاء اللغوية فيه ونسيت بعض النقاط المهمة
نوارة يا جدعة
يا بنت عمي الفاجومي
انا باسل من سورية
الاقليم الشمالي للجمهورية العربية المتحدة
أرجو منك ان تعيدي النظر في وضع رابط لطل الملوحي
كنت اود قول ذلك لك قبل الآن وليس بسبب كشف السلطات السورية المرة تلو المرة عن ارتباط هذه البنت بالمخابرات الأمريكية ، وأمس خرجت كلينتون لتتحدث عنها يكاد المريب يقول خذوني !!
في سورية قمع طبعاً ولكن ليس لمن يتحدث عن فلسطين
أرجو منك إعادة النظر و انت حرة كريمة و أثق في صوابية موقفك ولا أريدك ان تثقي بكلامي بل ان تبحثي وحسب وقتك على جوجول في القضية وقارني بين ما يقوله الطرفان البارحة عقدت الناطقة باسم الخارجية السورية بشرى كنفاني مؤتمر صحفي وادعت تجنيد البنت من قبل ضابط نمساوي في قوات الامم المتحدة في الجولان وهو الذي ربطها بالسفارة الامريكية في القاهرة بعد تصويرها خلال علاقة بوضع .... .
ولا تلتفتي إلى تخرصات من يسمون " معارضة سورية " فهم مخترقون من امريكا وطروحاتهم برغم أنينهم من القمع و عذابهم مثلنا هي طروحات الغزو الامريكي المحاصصة الطائفية والاقتداء بالمعتلين العرب مبارك وعبد الله واضرابهم من اعداء المقاومة والليبرالية العمياء والصلح مع إسرائيل ليس كل من عارض النظام السوري القمعي هو إنسان شريف، أقول هذا وانا ضد المحاكم الاستثنائية ،قصة طل الملوحي فيها الكثير من الشبهات أرجو ان يكون من تتضامنين معهم من الاحرار الحقيقيين و أرجو أن تكون مدونتك الرائعة ملهماً لرفاقك في سورية
صرخة مجلجلة في حب الوطن والانسان والحرية والعدالة

basel said...

مبارك في خطابه الثقيل بدأ يفهم لكن فهمه خفيف
باسل ديوب – كاتب من سورية
http://www.saotaliassar.org/Frei%20Kitabat/NationalBeweg/BaselDieub01.htm

amrou_samir said...

تحياتى لكل الشباب المخلص لمصر وللاخت نوارة وربنا يكتر من امثالكم بس لو ممكن نقلل الضغط على الجيش ونرجع كلنا لشغلنا ونقول قد مابنحب مصر قد ما هنشتغل علشان مصر تبقى اجمل ولنظف بلد فى العالم ونحط امامنا الهدف دة عاوزين مصر بدون تلوث لا رشاوى ولا فساد ولا محسوبية ولا تلوث هواء ولا تلوث مياة عاوزين نشتغل على الهدف دة