Friday 18 February 2011

انا تاج العلاء في مفرق الشرق


ايه كمالو ده؟ ايه حلاوته دي؟ ايه الشعب الجامد ده؟ 
الشعب يريد تطهير البلاد.. لا مبارك ولا نظامه ولا حزبه ولا اعوانه
ايه يا ناس ده؟ اكلك منين يا مصري اكلك منين، وفراولتين في خدودك حلوين حلوين... بصراحة انا كنت خايفة من النهاردة
بس انتوا شعب جامد اخر حاجة، ما شاء الله لا قوة الا بالله
هاااا؟ الرسالة وصلت ولا ايه؟ ولا ديول الحزب الوطني سمعه تقييييييييييييييييييييييييييل زي رئيس العصابة بتاعهم... الشعب صاحي ومصحصح وواعي ومش عايز شفيق ولا اي حد من رموزه وعايز محاكمة مبارك
عشان انس الفقي يبقى يكابر ويطلع هو والعادلي يطولوا لسانهم علينا تاني
خطبة العلامة الشيخ القرضاوي كانت رائعة
وتجاوب الناس مع الخطبة كان مذهل 
--------------
دلوقت الرائد احمد شومان يا جماعة.. الرائد احمد شومان مسئوليتنا 
ايوة الناس كانت جاية النهاردة عشان تقول انها صاحية وشايفة ان الحال مايل ومش عاجبها الكلام، وحاضرة وجاهزة تطلع لكم باعداد غير مسبوقة
يا ريت المجلس العسكري ياخد باله من الرسالة ويعمل للناس اللي هم عايزينه عشان دي ناس صعايدة واللي عايزاه حتعمله يعني حتعمله 
لكن الرائد احمد شومان شايل تلات قضايا، قضية اهمال، وعدم اطاعة اوامر، ومحاولة قلب نظام الحكم
التهمة الاخيرة مش عاجبانا، محاولة يعني ايه؟ محاولة؟ هي فشلت؟ لا ما فشلتش، الشعب كله بيقلب نظام الحكم وقال الشعب يريد اسقاط النظام، والتهمة الموجهة لاحمد شومان اهانة لكل مصري 
لازم كلنا نخرج لاحمد شومان، مش بس عشان وقف جنبنا، بس عشان التهم الموجهة له اهانة للثورة المصرية
------------
دلوقت مصر وتونس وصلوا الدور النهائي
بس ليبيا في الدور الستاشر واليمن في الدور التمانية، والبحرين في الدور قبل النهائي
عايزين ناخد بالنا من الناس
اسمعوني بقى كويس وركزوا معايا
ثورة تونس كانت ثورة ملهمة لثورة مصر، بس كمان ثورة مصر هي دعم لثورة تونس، ونجاح ثورة مصر تثبيت لاركان ثورة تونس، بس ثورة مصر ما ينفعش يبقى ضهرها للحيط، لازم ثورات اليمن والبحرين وليبيا تنجح.. لازم ينجحوا
ولازم نقف جنبهم
لان نجاح ثوراتهم دعم لثورتنا
ملك البحرين وعلي عبد الله صالح قالوا خطاب.. فاضل لهم خطابين
اما القذافي فهو مجنون رسمي ومستعد يقتل الشعب كله ويستورد شعب تاني
مساندتهم واجب وطني عاجل
الجزائر معلش كل شوية تخرج من التصفيات بس حترجع تاني ان شاء الله، لما ليبيا والبحرين واليمن ينجحوا ان شاء الله الجزائر حتيجي... بس قولوا يا رب
------
الطلعة الجاية لازم نعمل حسابنا على الآتي:
صور احمد شومان، واعلام كل من البحرين وليبيا واليمن، والطلعة الجاية لازم تبقى قريبة، عشان هم ناويين يعملوا حكومة جديدة بس برضه برئاسة فشيق يا راجل
مش عايزينه فشيق يا راجل ده
كمان عايزين نمسك الفاسدين ملف ملف ونطالب بتقديمهم للمحاكمة
انس الفقي ده لازم يتشنير على طولة لسانه دي، ويتقدم للتحقيق
ونمسكهم بقى، سامح فهمي، نلم ملفات الفساد ونصيح له
مصيلحي.. ملفات الفساد ونصيح
الولية اللي بقت وزير عشان بتزغرد في عيد العمال... ملفات ونصيح
وهكذا لحد ما نخلص عليهم واحد واحد كل يوم نوقع لنا واحد عشان كل واحد فيهم يلم نفسه
كمان الستو هانم اللي جات هي وابنها مصر دي
هو مش جمال مبارك ده له ملف كسب غير مشروع، وكان امين لجنة السياسات
ده يتقدم فيه بلاغات للنائب العام بشكل عاجل، مدام جه مصر بقى ونورنا
فيه واحدة باعتة لي على الدايركت في التويتر تقول لي انا عندي ملف فساد
ما ينفعش كده يا جماعة، انا مش قسم
اللي معاه ملف فساد يروح بيه للنائب العام او يروح بيه لمركز حقوقي مش يبعت لي على الدايركت يقول لي انا عندي ملف فساد
مش حارد انا على الناس اللي بتعمل كده على فكرة 
يبقى احنا كده لازم لنا طلعة جاية قريبة فيها تلات محاور
روس الفساد 
احمد شومان
ثورات العالم العربي
وحنعمل ايه كالعادة؟ اييييوه.. حنقول يااااااااا رب... يا رب.. مالناش غيره، نعم المولى ونعم النصير
قشطات؟ 
-------
فيه ناس كانت معلقة يافطة عليها صورتي عبد الناصر والسادات، بعد الاستسماح احب اقول الناس اللي علقت الصور دي مش معانا خالص ولا متابعين الثورة قامت ليه؟ 
مع خالص احترامي لكل الشخصيات اللي في الدنيا، احنا مش مشينا مبارك عشان نعلق صور اي زعماء تانيين، الشعب يريد اسقاط النظام
نظام الفرعون
نظام حكم الفرد، ايا كان الفرد ده حلو ولا وحش
الفرد حلو او حش ده راجع لطبيعة شخصيتك، واحنا مش عايزين الوطن البادي ده تاني
الوطني البادي اللي هو يلبسه الفرد فياخد شكل جسمه، والله بيحكمك واحد لطيف - من وجهة نظرك - الوطن حيبقى شبهه، بيحكمك واحد رخم - برضه من وجهة نظرك - يبقى الوطن رخم
مش عايزين زعماء تاني، ولا عايزين الاب القائد تاني، لو حنعلق صورة عبد الناصر والسادات عشان لهم انجازات، يبقى مبارك ما وقعش من قعر القفة، ماهو له انجازات برضه، مش عمل المحور والكباري والقراءة للجميع والخلع؟
بس مش دي القضية، القضية ان مبارك آخر الفراعنة، دي آخر مرة حد يحكمنا وفقا لأهوائه الشخصية ووفقا لميوله وطبيعة شخصيته واحنا وحظنا يطلع ابن حلال ولا يطلع ابن حرام وبرضه ابن حلال وحرام دي نسبية
صورة مبارك اتشالت... صورة آخر الفراعين اتشالت، واتحط مكانها لفظ الجلالة
خلاص... ما عادش يتحط مكان لفظ الجلالة حد، ولو سيدنا محمد نفسه له صورة ما ينفعش تتحط مكان لفظ الجلالة
لا غالب الا الله
وتحت كلمة: الله.. الواحد، اللي كلنا مؤمنين بيه ايا كان الدين اللي مؤمنين به
وتحت الله، علم مصر... ومصر يعني الشعب.. الشعب بس، ما عادش الشعب يبقى له رمز، وما عدش الوطن يتلخص في فرد، ما فيش قيادة ولا زعامة الا بايد الشعب، وما عدناش نرفع صور زعماء ولا قادة ولا فراعين ولا نأله حد تاني
انتهى النظام ده
وانتهت الثقافة دي
وانتهى الفكر ده
حندرس ولادنا في كتب التاريخ عن عبد الناصر والسادات ومبارك ما لهم وما عليهم بوصفهم آخر الفراعين.. لكن خلاص.. ما بقيناش دولة فراعين تاني
خلاص.. هدمنا الاصنام وما عدناش نرفعها تاني
--------------
بعد كده ماحدش يشتكي في القسم ولا يرفع قضايا، انا بعد كده اي حد مضايقني حاشتكي للشعب وهو يتصرف معاه
ده طلع جامد اخر حاجة، جامد وعاقل وتقيل ومفهومية وقال على رأي المثل: غفر الله لي وارشد أبنائي فشدوا لي العلا أي شد، إنما الحق قوة من قوة الديان أمضى من كل أبيض هندي




الشعب يريد....

54 comments:

e said...

ﺍﺭﻓﻊ ﺭﺍﺳﻚ ﺍﻧﺖ ﻣﺼﺮﻱ
ﺍﺭﺑﻌﺔ ﻣﻠﻴﻮﻥ ﻳﺎ ﺧﻠﻖ
ﺍﺭﺑﻌﺔ ﻣﻠﻴﻮﻥ ﻳﺎ ﻧﺎﺱ
ﺍﺭﺑﻌﺔ ﻣﻠﻴﻮﻥ ﻳﺎﻫﻮﻭﻭﻭ
ﺧﻠﻴﻬﺎ ﺗﺎﻛﻠﻜﻮﺍ ﻳﺎ ﻭﻻﺩ ﻣﺒﺎﺭﻙ ﻫﻬﻬﻬﻊ

Mahmoud said...

إذا كنا جادين حقًا في محاربة الفساد (مالي أو سياسي أو بكافة أشكاله) فلابد من محاكمة رأس الأفعى الذي تتجمع عنده كل خيوط الفاسدين.. محاكمة الذيول ليست كافية.
لتكن محاكمة رأس الأفعى هي الهدف.

Unknown said...

http://www.facebook.com/WeHateIsrael/posts/169421419772415

- dah link legroup esmo (Karehy Israel)
Please ya nawara, report this page to FB and to the army if you have any connections there. They are either NDP or Israeli, they are giving excuses to Israel to either attack us or run and tell the world "see all arabs want to vanish israel"...the admin is anonymous, they blocked me after a debate and all my comments (debate) is deleted...plz helpppp
e2ry elcomments elly fil post dah wento tefhamo...kol dy redoud 3la kalamy...we kol my comments r deleted
hawly keda tezno2y eladmin 3ashan ye2ol hwa min we leh motakhaffy we shofy!!!
bey2ol hwa men shabab 6 April, im sure u know them...plz ask them if they allowed such a page.
from: zayatt/zayatt@google.com/zayatt@hotmail.com and i posted this on ur FB page...im not fake wallahy wala NDP...momken akon mkabarha bass ana mar3oub aslan...enty bass oulily ehda wana hazbot 3la toul...sorry lelkalam elketir

Nahla Anwer said...

هو ده الكلام... نوارة، مين اللي في إيده إن أرصدة مبارك تتجمد؟ ليه هو مستثني من القائمة هو وعيلته؟ نقول لمييييييييييين؟

Unknown said...

لو تقدرى توصلى صوتك فى موضوع شومان دا فى الجرايد والفضائيات وتعملى حمله هيبقى الموضوع فعال ان شاء الله هو انتى مش بتظهرى فى الدستور ليه؟

hassn hamdi said...

السلام عليكم:
مضبوط كده يا نوارة.. كنا النهاردة واعيين وصاحيين ومش لازم ننام تاني أبدا بعد كده.. كفايانا ستين سنة نايمين..
وبعدين، بالنسبة للباشمهندز شفيق الراجل ده كان متولي مناصب كتير في نظام المخلوع ابن ام مبارك، ومن جاور السعيد يسعد.. يعني أكيد له قضايا فساد كتير.. شطارة الاخوة العاملين في هيئة الطيران المدني ووزارته يطلعوا المستخبي ويلاحقوا شفيق ووزارته كلها بالبلاغات والقضايا.. علشان الحكومة دي تسقط لازم مظاهرات وبلاغات للنائب العام واعتصامات علشان عيشتهم تبقى سودة..
والأمر ينطبق طبعا على كل فرد في النظام البائد..وعاوزين دعوة قضائية لحل الحزب الوثني الواطي وملاحقة كل قياداته ومسئوليه بالقضايا وفين الباشمهندز فتحي شرور؟ ناسيينه ليه؟ وزكريا عزمي وعمر سليمان ومفيد شرشر وكل الوجوه البلاستيك اياها؟
وبالنسبة للرائد شومان لازم المحامين الجدعان بتوعنا يقفوا وراه واحنا من وراهم في كل حتة..
ايه رأيك تعملي صفحة على الفيس بوك باسمه ونتابع اخباره اول بأول؟
وبيقولوا الجيش عامل صفحة للتواصل مع الشباب.. خلاص آهي جت لحد عندنا كمان..
كلنا ندخل على الصفحة دي والرابط أهو:
http://www.facebook.com/ELGayesh.Elmasry
كلنا ندخل ونطالب المجلس الأعلى بإطلاق سراح الرائد أحمد شومان
زي ما قلتلك يا نوارة... ما حك جلدك مثل ظفرك... يللا بينا نهرش

Anonymous said...

والله أنتى فعلاً نوارة .. ومنورة ... وجميلة ... وجدعة ... وربنا يحميكى ... ويبارك لكى فى والداتك الرائعة صافى ناز كاظم "هانم"
كل احترامى وتحياتى ...

أنا النهاردة أطمئنيت فعلاً بعد اللى شوفته فى ميدان التحرير ان خلاص مفيش رجوع ولايهمنا من الديول فالثورة ماضية فى طريقها والله اكبر

Unknown said...

النهارده فى الشغل اتفرج على الميدان و الشيخ القرضاوى و اعيط و كل شويه حد يدخل عندى و يقولى are you ok? something happened to your family? no i a more than ok, we are all super. بحبك يا بلدى و فعلا لازم نعمل حاجه لاحمد شومان بس ينفع نبعت التماسات على موقع المجلس الاعلى?

lastcrazyboys said...

بيقــولك التوانســـة بعتــوا لمصر

عشــان عايزين يلعبــوا الماتش

ويعمــلوه على أرواح شهــداء الحريـة

المصريين قالوا لهم : استنــوا لآخــر السنــة ..يمكن نعملها دورة عربيــة
:)

3obaz said...

انا عايز بس اقول إن الفرق بينا وبين جيل ثورة يوليو إنهم كانوا بيعتبروها انجاز، يغنوا لنفسهم ويمجدوا في المشاركين فيها، ويفرحوا باللي ينافقهم... احنا مش كده، احنا شباب واعي وعارف إن الانجاز لسة جاي، مبنحبش حد ينسبلنا حاجة معملنهاش ولا نحب حد يمجد في اللي عملناه. لو فضلوا يعملولنا في اغاني وكتب وافلام بتمجد في ثورة يناير هنرجع تاني للنظام القديم (اعلاميا)... اللي مع الثورة يبقى تمام واللي ضدها يبقة خاين... وده بيدي سبب لتمورة وحبايبه انهم يتمحكوا في الثورة... احنا عايزين حاجات بتحمسنا للمستقبل وبتنبهنا للمرحلة الجاية. مش والله وعملوها الرجالة وشباب زي الورد!!

Jareer said...
This comment has been removed by the author.
AmmAr said...

بما في أنباء عن سيطرة المتظاهرين علي مطار بنغازي لقطع وصول الإمدادات الأمنية أعتقد كدة ليبيا وصلت للدور قبل النهائي

Raed Jarrar said...

وان شاء الله العراق يتحرر من اﻹحتلال والحكومة الفاسدة وينضم للشعوب العربية المحررة

ادعولنا يا أهل مصر

magdy shaheen said...

الثورة فى ليبيا تتقدم اثوار استولو على الاذاعة فى بنغازى ويذيعون منها رسلئلهم ويحاصرون السعدى القذافى فى مقر اقامتة ويعتبر انهم مسيطرون على المنطقة الشرقية بعد نزف الكثير من الدم

محمد نور الدين said...

لا يا نوارة غلط يا نوارة
الثورة التي لا تنطلق من رصيد نضالي حتما هي ثورة لقيطة. ثورة 25 يناير هي استمرار وقطيعة ،استمرار لثورة أحمد عرابي ، استمرار لثورة 19 ،هي استمرار لثورة 52 . لكن في نفس الوقت هي قطيعة، بمعنى أنها تطور الجوانب الناقصة في تلك الثورات وترتقي بها إلى الأحسن .عبد الناصر يا ست الكل هو الذي أعطى لمصر عمقها العربي، هو من أدخل مصر إلى قلوب العرب، قبل قليل وعلى قناة الجزيرة شاهد كل العرب منظرا جميلا بديعا من داخل ميدان التحرير ،علم الجزائر يرفرف جنبا إلا جنب مع علم مصر في تناغم رائع. لقد سعدت كثيرا لذلك المنظر. عبد الناصر يا النوارة الجميلة و الرائعة عاش شريفا ومات نظيفا. أبوك يا بنت الذي أعتقله عبد الناصر، ومات عبد الناصر وهو في السجن غفر له وكتب فيه أجمل شعر. لكن الخطأ الوحيد لعبد عبد الناصر ، رحمه الله ألف مرة ، جعلني أتعرف على وحدة، نصفها هابلة والنصف الآخر مجنونة . اللهم لا أسألك رد القضاء لأنه قضاء جميل و رائع

Unknown said...

سؤال مبهدلني خالص
فين احمد المسلماني

Unknown said...

انا شخصيا يا نواره عايزة بقى المطالب الفؤيه ده تخلص بقى كل المصانع و البنوك و الشركات محدش بيشتغل و عايزين دلوقتى قبل بكره ياخدوا علاوات و زيادات فى المرتب رغم انه اغلب الناس ده كانوا بيشتموا فى بتوع التحرير و بيعتبروا انهم وقفوا حالهم و الى كان واقف حالهم حظر التجول و البلطجيه الى خرجوا من السجون لكن الوضع دلوقتى انه فى انتهازيه من البعض للاسف الى بيبنى على الاراضى الزراعيه و يستغل الموقف و سواقين الميكروباص الى عاملين اضراب عشان يزودوا الاجره على الناس الغلابه و السواق الى يقول حرام و يطلع بالناس السواقين زمايله يكسروا عربيته و يحدفوها بالطوب اعتصام التحرير كويس طبعا لانه يوم الجمعه يوم اجازه و الميدان كبير و واسع و كل المطالب من اجل مصر كلها مش من اجل افراد ارجوكم يانواره لازم تاخدى بالك من النقطه ده لازم الناس تشتغل و فى نفس الوقت تطالب بالحق و العداله لكن انه الانتاج يقف و الناس تبطل شغل عشان قرشين زياده يبقى كده الثورة اجهضت بسبب الانانيه والانتهازيه

سطور said...

عزيزتي نوارة
صورة الفنانة في تدوينتك!!
يعني الغنية عجباكي، منيح
بس يا ريت تنتبهي أكتر لشكل الناس لابسين ايش بالزبط
من دون زعل
أعرف نواياكي أنها طيبة
ولكن الأهم رضى الله في كل ما تكتبيه وتضيعه داخل مدونتك
أختك في الله
مسلمة

Moataz Medhat said...

ايه رأيكم؟
إضرابات ولا بلاش إضرابات؟

أنا بقول لازم مسيرات للتأكيد على قوة و إستمرارية الثورة، و بلاش إضرابات حتى لا تتوقف البلاد.

ايه رأيكم؟

AME said...

حمد الله على السلامة. شئ مشرف أربعة مليون.
أيوه التطهير ثم التطهير ثم التطهير .. إسقاط ومحاكمة أذناب النظام.
ما تسيبوش شومان، كل يوم يقضيه في السجن في رقبتنا، إتهامه بمحاولة قلب نظام الحكم كلام فارغ. دي ثورة. واللي عمله شجع الناس وإداهم أمل. وهو في النهاية عمل اللي في نفس ظباط و جنود وطنين وشرفاء كتير. سلِّم سلاحه وقال مش لاعب، أنا مع الشعب.
ركزوا على إقالة الزبالة اللي ماسكة مؤسسات إعلام محترمة.
خلوا بالكوا إن ثوار اليمن و ليبيا وعدن والبحرين والجزاير والأردن، متنورين ومدفيين بيكوا . أوعوا يا ولاد الثورة تتسرق. جذور التاريخ بتوع الميت و لا الميتين سنة الجايين بتتعمل دلوقتي.
أن يكون العرب أو لا يكونوا بتتلعب دلوقتي.. أوعوا تبطلوا تظاهر وتوروا الدنيا كلها إنه ما حدش نام ولا نسي.
إسقاط النظام يعني إسقاط النظام.
فاضل لي أسبوعين و أفضى و أجيلكوا.
شكل الحاج معمر اللي ما حدش عارف بيضرب إيه بالضبط، حيحصل بابا حوستي السفاح. طبعا قفل لهم الإنترنيت. قٌديمة مش كده؟
أجمل حاجة إنوا بالإنترنيت و من غيرها الروح واحدة في كل حتة.
على فكرة أول ما طلع مبارك من تحت الكراسي و بقى رئيس مصر كنا بنقول عليه "حوستي".
وطبعا أكيد كثير هنا ما يفتكروش لأنهم يا إما ما كانوش إتولدوا لسه أو كانوا صغيرين جدا، النكتة الشهيرة بتاعة إسكت إنت!
-" تعرف ليه مبارك عندو زبيبة؟ أيوه.. أصله كل ما كان يقول حاجة السادات يضربوا على قورته ويقولوا إسكت إنت"!
فعلا ميزته الوجيدة وقتها كان أنوا عبد نموذجي.
الله يرحم المتنبي.

عصر الفراعنة إنتهى ن يوم 25 يناير وكان ذلك سنة 2011 ميلادية. بعد الفراعنة بتوع أمنحتب بييجي 3500 سنة. يا لهوي إحنا قُدام أوي و كنا بوطاء أوي.
بس على فكرة عصر مبارك كان حيا الله عصر المماليك.
ياا لله سلام.
برضوا خلو بالكوا من عم قرضاوي. كلاموا ممتاز دلوقتي. بس هى دولة مدنية. إرحمونا من الشيوخ و التأليه
و الفراعنة.. وصلوا على النبي. أللي عصر مباؤك بؤضوا إفترى عليه بالأخاديث المغلوطة و فقهاء الفضائيات والسلف الغير صالح.
على فكرة أنا إتأكدت إن ثورتكوا نجحت لما لقيت ثلاث أربع المنافقين غيروا النغمة.

وربنا معاكوا.

AME said...

حمد الله على السلامة. شئ مشرف أربعة مليون.
أيوه التطهير ثم التطهير ثم التطهير .. إسقاط ومحاكمة أذناب النظام.
ما تسيبوش شومان، كل يوم يقضيه في السجن في رقبتنا، إتهامه بمحاولة قلب نظام الحكم كلام فارغ. دي ثورة. واللي عمله شجع الناس وإداهم أمل. وهو في النهاية عمل اللي في نفس ظباط و جنود وطنين وشرفاء كتير. سلِّم سلاحه وقال مش لاعب، أنا مع الشعب.
ركزوا على إقالة الزبالة اللي ماسكة مؤسسات إعلام محترمة.
خلوا بالكوا إن ثوار اليمن و ليبيا وعدن والبحرين والجزاير والأردن، متنورين ومدفيين بيكوا . أوعوا يا ولاد الثورة تتسرق. جذور التاريخ بتوع الميت و لا الميتين سنة الجايين بتتعمل دلوقتي.
أن يكون العرب أو لا يكونوا بتتلعب دلوقتي.. أوعوا تبطلوا تظاهر وتوروا الدنيا كلها إنه ما حدش نام ولا نسي.
إسقاط النظام يعني إسقاط النظام.
فاضل لي أسبوعين و أفضى و أجيلكوا.
شكل الحاج معمر اللي ما حدش عارف بيضرب إيه بالضبط، حيحصل بابا حوستي السفاح. طبعا قفل لهم الإنترنيت. قٌديمة مش كده؟
أجمل حاجة إنوا بالإنترنيت و من غيرها الروح واحدة في كل حتة.
على فكرة أول ما طلع مبارك من تحت الكراسي و بقى رئيس مصر كنا بنقول عليه "حوستي".
وطبعا أكيد كثير هنا ما يفتكروش لأنهم يا إما ما كانوش إتولدوا لسه أو كانوا صغيرين جدا، النكتة الشهيرة بتاعة إسكت إنت!
-" تعرف ليه مبارك عندو زبيبة؟ أيوه.. أصله كل ما كان يقول حاجة السادات يضربوا على قورته ويقولوا إسكت إنت"!
فعلا ميزته الوجيدة وقتها كان أنوا عبد نموذجي.
الله يرحم المتنبي.

عصر الفراعنة إنتهى ن يوم 25 يناير وكان ذلك سنة 2011 ميلادية. بعد الفراعنة بتوع أمنحتب بييجي 3500 سنة. يا لهوي إحنا قُدام أوي و كنا بوطاء أوي.
بس على فكرة عصر مبارك كان حيا الله عصر المماليك.
ياا لله سلام.
برضوا خلو بالكوا من عم قرضاوي. كلاموا ممتاز دلوقتي. بس هى دولة مدنية. إرحمونا من الشيوخ و التأليه
و الفراعنة.. وصلوا على النبي. أللي عصر مباؤك بؤضوا إفترى عليه بالأخاديث المغلوطة و فقهاء الفضائيات والسلف الغير صالح.
على فكرة أنا إتأكدت إن ثورتكوا نجحت لما لقيت ثلاث أربع المنافقين غيروا النغمة.

وربنا معاكوا.

بهيج الشرير said...

والنبي ياأبلتي أنا عندي إقتراح! إيه رأييك لو نقول للواد القردافي إبن المجنونة بتاع ليبيا أن الناس عنده ناويين يخرجوا في مظاهرات مولعين في روحهم والناس عايزاه يقود المظاهرات دي

AME said...

تعليقا على كلام محمد
أنا برضه حاطة إيدي على قلبي و بأقول يا رب إسرائيل تتهد و تسيبنا في حالنا.
إنتوا متخيلين لو زخم الثورات العربية ده كله فلح، حيحصل إيه؟.. الحتمية التاريخية حتفرض نفسها. ومش على طريقة هتلر.
Never again ya shabab.
نحن أعرق و أكثر تحضرا من كل ذلك.
.

محمد صبرى said...

بيتهيألى ليبيا دلوقتى فى النهائى

ربنا ينصرهم

أبو أمك said...

دلوقتي خلاص الفساد مابقاش ليه ملفات
الفساد دلوقتي على الموضة بقى له أجندات

مصري بالغربة said...

http://www.facebook.com/ELGayesh.Elmasry

Lawyer 2012 said...

على فكرة يانوارة أنا نفذت كلامك ده من يومين وشخصياً أستغليت شعبيتي كواحد من شباب الثورة وأقترحت على العمال والموظفين في مكان عملي على حل مجلس الإدارة وهم وافقوا لتطهير المكان ...
ياجماعة أستغلوا ثورتنا الطاهرة في تطهير الوزارت والشركات من الفساد والفاسدين

ساعي الخير said...

الحمد لله رب العالمين

حياة الظل said...

لازم يكون في اعلام جديد من شباب الثورة يمثلوا مطالب الثورة ويخاطب الشعب ويكون هذا الاعلام مكان لاطلاق المبادرات لازم حتى يتفاعل الدور المدني وتكون نواه لانشاء دولة المؤسسات
الاعلام القديم كان خاص ولا حكومي اثبت بالدليل القاطع ان حرام يمثل شباب الثورة من سيد وهناء لعمرو اديب لغيرة
فقدوا جزء من مصداقيتهم ومع الوقت ممكن الشعب يبدا يثق فيهم مره ثانية وساعته يبدا هذا الاعلام يفرض افكاره على الشارع وتبدا تعب الامور مره ثانية
الحين احسن فرصة لاطلاق اعلام يمثل جيل الثورة والنهضة
صدقوني موضوع الاعلام خطير جدا ومهم جدا
واذا ناسين اتذكروا كويس
والي عاوزني اذكرة انا مستعد

labied said...

دمعت عيوني فرحا اليوم و أنا أسمع خطبة الجمعة من ميدان التحرير
مبروك عليكم يا أهل مصر، لي طلب منكم! ادعوا لنا نحن أهل العراق بالخلاص و الحاق بكم و الله مشتاقين ليكم
لبيد

دودو said...

النهارده المنظر كان يشرح القلب ويرد الروح
كنت فاكره الناس مش فاهمه
وكنت باقعد اقنع كل اللى اعرفهم
يااااناااس ياااهوو
كده لسه معملناش اى حاجه
طول ماشفشق وحكومته موجودين
وطول ماامن الدوله موجود ..و....و,,
حاجات كتير اوى
احنا معملناش حاجه الا ان مبارك راح شرم
وياخوفى يكون بيحكم من الباطن

مفيش فايده
كل يقول ادوهم فرصه يشتغلوا
!!!!
مين ده اللى يشتغل الحاجه عيشه وثامح فهمى وغيرهم
وعلى رأسهم شفيق بنبون
!!!
لغايه مافقدت الامل
انما اللى شوفته النهارده ريح قلبى وطمنى
يارب يفهموا بقى ان الناس دى مش مقبوله
وان الوجوه الكالحه اللى فى التلفزيون ووالجرايد كمان مش مقبوله


ومتفقه معاكى تماما ان توجيه تهم للبطل شومان اهانه للثوره

ربنا معانا ومع كل الشعوب الثائره

AME said...

الأخ Basel،

المسألة مش مسألة طلّ ولا ما طَلِّش. المسألة في حق المواطن العربي في أن يكون وأن يعبر عن رأيه دون خوف.
إنت ناسي إن في الضلمة كل الواطويط بتعشش. و إن أعداء الضمير الإنساني ممكن يلوكوا سيرة أي إنسان. وإن المغشوش أكثر من الأصلي، الحقيقي.
هيلاري كلنتون بتدافع عن وطنها و مصالحها. بمنطق عتيق و معفن : الغاية تبرر الوسيلة. أهلا و سهلا دي مسألتها، مشكلتها. مش مشكلتنا.
فكرك يعني إيه اللي ممكن تعمله بنت عمرها 19 سنة في وطن طالع دينه بالإستبداد من زمان أوي؟
طب ما كتير من السوء إتقال في حق ناس نقية و شريفة زي نوارة و وائل غنيم، و الدليل إنك هنا و معانا.
صحصح كده و إتأكد و سوق الدليل يا إبن أم.
والسلام أمانة لدمشق العزيزة.

Unknown said...

ياااااا سلام
احنا دلوقت اللي المفروض نقول للناس
" شكرا رسالتكم وصلت "
ايه الحلاوة دي
على راي اللي قال
احرام على بلابله الدوح .. حلال للطير من كل جنس
النهارده كان فيه مظاهرة قدام شركة المراجل البخارية اللي كانت الوحيدة من نوعهافي الشرق الاوسط و بقت خرابة في عهد حسني
و باقي المتظاهرين عارفين ان مجالس ادارات شركاتهم حرامية و لازم سيرخوا بعلوا الصوت لانهم يادوب اكتشفوا الصوت ده من شوية
الشغل بملاليم ما ينفعش
الشغل والمؤسسات ماليها السوس ماينفعش
و بعدين الناس ما قالتش ادونا الفلوس دلوقت
لو طلعوا و قالوا لهم جدول زمني لتعديل الاوضاع الناس حتشتغل
مش كل واحد يطلع يقول بلاش مظاهرات عشان عجلة الانتاج نسمعله
العجلة دي كانت دايره و بتصب في جيوب الحرامية
لازم يتعدل مسارها و عمال الشركات اللي اديهم مليانةشحم هم اللي حيعدلوها
بالنسبة للبطل احمد شومان : -
اقترح ان كل واحد فينا يدخل على صفحة المجلس الاعلى للقوات المسلحة و يطلب عدم محاكمته
http://www.facebook.com/Egyptian.Armed.Forces?ref=ts&sk=app_4949752878

AME said...

إلى الأخ لبيد من العراق،
أقل واجب إنوا عزاء الشهداء مش حيتآخد قبل ما فلول النظام ترحل، و الثورة توصل لأوائل الأهداف.
قلبي معاكوا في بغداد، تلك المدينة الطيبة، لسه السكة طويلة. بس إللي حاطط روحه على كفه و ما يهمموش يموت و مش عايز حاجة غير إنو الحق يسود هو المنتصر.

AME said...

إلى الأخ لبيد من العراق،
أقل واجب إنوا عزاء الشهداء مش حيتآخد قبل ما فلول النظام ترحل، و الثورة توصل لأوائل الأهداف.
قلبي معاكوا في بغداد، تلك المدينة الطيبة، لسه السكة طويلة. بس إللي حاطط روحه على كفه و ما يهمموش يموت و مش عايز حاجة غير إنو الحق يسود هو المنتصر.

AME said...

إلى الأخ لبيد من العراق،
أقل واجب إنوا عزاء الشهداء مش حيتآخد قبل ما فلول النظام ترحل، و الثورة توصل لأوائل الأهداف.
قلبي معاكوا في بغداد، تلك المدينة الطيبة، لسه السكة طويلة. بس إللي حاطط روحه على كفه و ما يهمموش يموت و مش عايز حاجة غير إنو الحق يسود هو المنتصر.

AME said...

إلى الأخ لبيد من العراق،
أقل واجب إنوا عزاء الشهداء مش حيتآخد قبل ما فلول النظام ترحل، و الثورة توصل لأوائل الأهداف.
قلبي معاكوا في بغداد، تلك المدينة الطيبة، لسه السكة طويلة. بس إللي حاطط روحه على كفه و ما يهمموش يموت و مش عايز حاجة غير إنو الحق يسود هو المنتصر.

محمد صبرى said...

التهم الموجهة لشومان بتكشف النويا بشكل مبين لكل أعمى

AME said...

إلى الأخ لبيد من العراق،
أقل واجب إنوا عزاء الشهداء مش حيتآخد قبل ما فلول النظام ترحل، و الثورة توصل لأوائل الأهداف.
قلبي معاكوا في بغداد، تلك المدينة الطيبة، لسه السكة طويلة. بس إللي حاطط روحه على كفه و ما يهمموش يموت و مش عايز حاجة غير إنو الحق يسود هو المنتصر.

AME said...

Mazbout, sa7, ya mohamad ya sabry.

AME said...

Nawara, it is ana tago el 3ola ( not ala3al2) fi mafraqui el sharqui.

Enta sa7 ya Mohamed ya Sabry.

Unknown said...

انا تاج العلاء في مفرق الشرق

http://www.youtube.com/watch?v=k7Nb1TgGbd8

بوبو said...

انا بقول نفضل ننزل كل جمعة لحد ما مطالبنا تتحقق.. زي ما نزلنا النهاردة وكنتي ترشي الملح مينزلش ننزل الجمعة الجاية واللي بعدها .. ومهم موضوع شومان دا.. ما هو الراجل كدة راح ف توكر عشان هو عنده حس وطني ولا ايه؟ وبعدين انا عندي سؤال محيرني.. هو العادلي بيتحاسب عن ملف الفساد المالي بس ليه؟ اومال هيتحاسب امتى على ملف الدم؟ احنا صعايدة ومننساش تارنا ابدا.. وبيتهيالي مفيش بيت فيكي يا مصر ملوش تار عند العادلي.. ولا ايه؟

Anonymous said...

By the way, the correct address to the Egyptian Armed Forces Facebook page is:

http://www.facebook.com/Egyptian.Armed.Forces

The other one listed in some of the posts here does not look official to me...

ahmedelebyary said...

Raed Jarrar
يا رب عجل الخلاص من مجموعة المنتفعين والفاسدين الذين مزقوا العراق
أتمني لكم كل الخير و التوفيق في الفترة القادمة للخروج من تلك الفترة الكابوسية
اقترب النصر بأذن الله

Unknown said...

ربنا يسلم لسانك يا نوارة مصر و يبارك فى الشباب اللى زيك
يمكن انتم لم ترثوا ميراث الخوف اللى ورثناه و علشان كده مشينا جوا الحيط
الآن الشعب عرف الطريق بعد ما كان فيه مفهوم ان البلد بلدهم يعملوا زى ماهم عاوزين
عرفنا ان البلد بلدنا احنا و المنصب علشان يخدم الشعب لو مش عارف يخدمه يمشى و يجى اللى يعرف
و احمد شومان ده مسؤلينا كلنا لازم نقف جنبه بدل ما يتكرم يتحاكم ليه
مع احترامى للجميع اعجبنى مقال لا نريد تانى احد من رموز النظام مثل الجنزورى و عمرو موسى يمكن كانوا اقل من الموجودين فسادا لكن الثورة ما قامت علشان تعطى حكم مصر لشباب فى الخامسة و السبعين استفادوا من النظام و دعموه بشكل او بآخر و كانوا ماشين معاه

assour said...

والله انتي جامدة اخر حاجة و انتي سكرة و كل ما اقرالك اضحك و افرح و احزن و اشعر بالشجن و الفخر، انا سعيدة انك اختي في الوطن و بارك الله فيكي و عليكي و اتفق معك بنسبة مائة بالمائة

Unknown said...

بيان٤من القوات المسلحة على الفيسبوك حفظ التحقيق مع أحمد شومان

محمد نور الدين said...

نعم يا ست الكل مصر تتحدث عن نفسها
لكن هذه المرة بلغة جديدة كل الجدة لم تعهدها من قبل
صدق شاعر الشعب لما قال
انا ان قدر الاله مماتى ·

لاترى الشرق يرفع الراس بعدى·

هذا قدركم يا النوارة كنتم وستظلون الرافعة لهذه الأمة
انتصرتم انتصرنا معكم، هزمتم هزمنا معكم.
هل تعلمين يا ست الكل أن ميدان التحرير أصبح مقدسا جديدا، أصبح كعبة جدية ،أصبح عرفة جديدة. نطوف حوله ونمارس كل الطقوس الثورية ونتبرك به حتى ينجب
ميادين التحرير على امتداد الأمة وسينجبها حتما لأنها علاقة شرعية وزواج شرعي، عقد قرانه وكتب كتابه وحسم أمره منذ أكثر من 14 قرنا
هذه هي مصر العظيمة التي أحببناها وعشقناها حد الثمالة
ما تخافيش ما تتخضيش الثمالة بالمعنى المجازي وليس الحرفي

KB said...

صباح الخير جميعا .. انا مبسوط جدا اني قرأت تعليقاتكم والفرحة الواضحة فيها بنزول اكتر من 3 مليون للتحرير امس ..وفعلا فيه تفاؤل واضح في كلام نوارة ومشاركاتكم ..
ودي حاجة اسعدتني ورفعت شوية من روحي المعنوية بعد ما رجعت من التحرير .. طيب علشان نبقي غطينا الموضوع صح . خلوني انا اكتب عن الناحية المتشائمة من المنظر والسلبيات اللي انا شايفها وبكده نبقي حطينا المنظر كله تحت عنينا ونعرف ناخد الخطوة اللي جاية ..
انا كنت في التحرير الصبح واول حاجة لاحظتها وعجبتني وانا علي حدود الميدان ان المحلات كانت فاتحه والكافتريات وكل شيء شغال ولا كأن فيه مظاهرة ..دي حاجة كويسة . يعني مش المظاهرات ولا الاعتصامات اللي واقفة حال البلد .. داخل الميدان شفت حاجات غريبة ..ناس حاطين ناصبات شاي وترمس فشار وجاتوه كمان ..ازاي دخلوا دول ؟؟ معني الحاجات دي موجودة ان فيه انابيب بوتجاز وادوات معدنية حاجات تدخل ضمن ما يمكن ان يستخدم لاثارة المشاكل بين الجيش والناس حسب ما نوارة قالت ..لحسن الحظ جه الجيش وخرجهم وضابط برتبة عميد اشرف علي كده ..بدات الصلاة وكان مشهد مهيب مهيب مهيب .. ميدان التحرير كان ولا الحرم .. والخطبة كانت عصماء .. ووائل غنيم حب يطلع المنصة يتكلم لكن ناس منعوه .. وللامانة مالهمش دعوه بالقرضاوي والراجل ( القرضاوي ) ما شفتش معاه حرس واللي اعرفه ان الشرطة العسكرية هي اللي وصلته للمنصة وهي اللي خرجته تاني ..والباقي كانوا شيوخ من الازهر او المشايخ ..ووائل بيه اتقمص ولف وشه في علم وخرج من الميدان هو وكام واحد .. وبعد الصلاة .بدأت الحشود توصل الميدان .. انا دخلت وخرجت اكثر من مرة لباب اللوق وعبد المنعم رياض دون تفتيش ..استغربت الموضوع ده مع تأكيد نوارة علي ان اللجان الشعبية حتزيد وتخللي بالها .. تقريبا ما كنش فيه لجان شعبية خالص ..
شوية ودخلوا تاني جماعه الشاي والترمس .. وبدأت اسمع بقي شاي التنحي .. فشار التحرير ..وترمس الشباب ..والحمد لله ما سمعتش كشري الشهداء وحمص شفيق ..ده بخلاف الاعلام والميداليات و التي شرتات وماكنش ناقص غير الشرابات والفانلات.
.. وحسيت ان المكان بقي زي معرض الكتاب .. الناس بتروح علشان اي حاجة واقل اهتمام للكتاب ..وقفت مع كذامجموعه لكن الهتافات مش زي ايام الثورة اللي كان ماسبيرو بيتهز من الهتاف جوه التحرير .. التصرفات والاخلاق ما كانتش بتاعت شباب التحرير ..كان فيه اكتر من واحد فارش العلم علي الارض وقاعد عليه وناس ماسكة كبايات شاي ساخن وسط الملايين اللي بتتحرك .. وعلب البيبسي والكولا بتترمي علي الارض .. ..
عموما .. كان فيه سلبيات كتيرة وتدخلنا اكقر من مرة لفك مشادات بسيطة بس ما كانش ليه اي داعي وعمرنا ما سمعناها قبل كده . ..المهم العدد كبير والحمد لله لان في الاخر الجيش بيبص من طيارات الهيلكوبتر والضغط الخارجي جاي من الشكل العام ..لكن احنا الناس اللي فاهمة لازم تفوق ..الشعب قوة ضاغطة وعمل اللي عليه قلتوا ينزل مليون نزل 4 مليون ..بس العيب كان في القيادة وتوحيد الصف .. كل واحد عمله مسرح وتحول الموضوع لمسرحية ..مسرح كنتاكي شغال ..ومسرح عمر مكرم شغال.. ومسرح عبد المنعم رياض شغال ..وكل واحد لوحده .. دم الشهداء راح بين الترمس والكشري والاعلام والميداليات .. 12 يافطة فقط في كل الميدان بتنادي بحق الشهداء والقصاص لهم لغاية الساعه 4 واغلبها لولد وبنت اخوهم استشهد وجايين فاكرين ان الناس كلها معاهم .. ممكن كلامي يبان متشأم ..بس احنا بنخسر الزخم ..وادينا اللي عاوز - سواء شفيق او الجيش - مفتاح انهاء الثورة يوم الجمعه ..المرة الجاية حنروح التحرير حنلاقي عربيات الترمس والحمص واللب والتي شيرتات في كل حتة وحتبقي الرحلات المدرسية علي هناك .. خاصة مع الحفلات الي اشتغلت بالليل ولا كأن فيه ناس ماتت علي ارض الميدان ده ..
مش هو ده جو الثورة اللي المفروض يكون عليه ..المطالب ما كانتش واضحة بالقوة دي وما كنش متفق عليها زي ما كنا متوقعين ..اليفط كان فيها فئوي وجماعات وعمال وكل يغني علي ليلاه .. ارجوكم لازم ننظم صفوفنا ..معني انهم ينسوا الخوف مننا اننا محتاجين تاني لشهداء جداد
الكلام بقي كتير والفعل بيقل ..لازم ننظم نفسنا ..لازم ..ممكن يكون كلامي مختلف لكن حبيت اعرض عليكم اللي انا حاسس بيه

KB said...

موضوغ حفظ التحقيق مع احمد شومان نشر دلوقت علي صعحة المجلس الاغلي للقوات المسلحة علي الفيس بوك .. النص هنا "إيمانا من المجلس الأعلى للقوات المسلحة بالأهداف النبيلة التي قامت من أجلها ثورة 25 يناير، فقد قرر المجلس حفظ التحقيق مع الرائد أحمد شومان رغم تعارض ذلك مع القوانين واللوائح المنظمة للعمل داخل هذه المؤسسة العريقة"
الحمد لله ..نركز بقي علي باقي المطالب

بنت عادية غلبوية said...

نشر المجلس الأعلى للقوات المسلحة رسالة على صفحته الرسمية على موقع التواصل الاجتماعي "فيس بوك"، أعلن فيها قراره حفظ التحقيق مع الرائد أحمد شومان

Menna Mohammad said...

عزيزتى نوارة أنا كنت من المعترضين على مظاهرة يوم الجمعة ورغم ذلك ذهبت الى التحرير وصليت ورا الشيخ القرضاوى حفضه الله وحسيت بأهمية التواجد فعلاً .. أنا اعتذر لك على المعارضة وأرفع لك القبعة والى الأمام ونحن وراءكم

ضحية ارهاب said...

السلام عليكم ورحمة الله وبركاته!
أنا حنان من الجزائر من أشد المحبين لمصر ولشعبها العظيم!
كما أنني أحترم شخصكم الكريم كثيرا،أخت نوارة ،وأنا من أشدالمعجبين بك وبوالديك الرائعين قبلك!
ألف مبروك للثورة المصرية ولما حققته من انجازات ويا رب المزيد!
رحم الله الشهداء وألهم ذويهم الصبر والسلوان!
اسمحيلي أبدي اعتراضي على تشجيعك لقيام ثورة في الجزائر!
أنا من عامة الشعب وليست لي أية مصلحة من ذلك سوى الخوف على بلدي وأن ينزلق في غياهب مظلمة .
لعله لم يتناهى إلى علمك أن الثورة في الجزائر قامت عام 1988.
وتمت اصلاحات سياسية متمثلة في تعدد الأحزاب .ولكن البلد دخل بعدها في حقبة مظلمة من الارهاب دامت أكثر من 10 سنوات.و بمجيء الرئيس بوتفليقة الذي سن قانون الوئام المدني -الذي اعتبر الارهابي التائب وضحيته سواءوتم العفو عن التائبين...الوضع في بلدي لا يتطلب ثورة شعبية وانما يتطلب اصلاحا وهذا حاصل بشكل حثيث - حتى قبل قيام ثورة تونس - وإن كانت الاصلاحات لا ترقى إلى مستوى تطلعات الشعب بعد فإن أملنا أن تأتي الأيام المقبلة بما هو أفضل !