ورانا شغل

ورانا شغل كتير قوي

اولا كل المعتقلين السياسيين لازم يخرجوا، وطبعا قانون الطوارئ يتلغي فورا زي ما الشباب طلعوا بيان في ميدان التحرير

انا مش عارفة مين المجموعة اللي طلعت البيان لان ميدان التحرير مليان مجموعات، بس انا مبسوطة من بيانهم عموما، وعلى اي حال مش مهم مين المجموعات ولا الافراد، المهم ان الناس توافق وده بيبان في سلوك الناس، وانا عن نفسي موافقة

وبعدين عايزين نعمل دستور ما يخرش المية، ما يبقاش فيه صلاحيات لفرد ابدا، دستور ديمقراطي على حق يعمله القانونيين بتاعنا، مش حنستورد دستور من حد احنا عندنا ناس جامدة كيك لعلمكوا يعني، ورئيس الوزرا يبقى بالانتخاب والمحافظين كمان، ما عادش بقى حد يعين ابن اخته تاني بعد كده ويبقى فيه آلية رقابة ومحاسبة، والدستور يضمن لنا تقسيم السلطات بحيث كل واحد فيهم يبقى صباعه في بق التاني عشان ما حدش فيهم يستفرد بينا، والسلطة للشعب

وبعدين عايزين محاسبات مالية وقوانين عدالة اجتماعية عشان ما حدش يوزع وجبات وعشرين جنيه مقابل اصوات الناخبين

وبعدين عايزين نلغي وزارة الاعلام اساسا

وعايزين اطلاق حرية تكوين الاحزاب، ما عادش بقى الحزب تحت التأسيس لمدة خمسة وتلاتين سنة والجماعة المحصورة والكلام ده تاني نسمعه

وعايزين اطلاق حرية الصحافة

وعايزين نرجع فلوسنا، الشلة اللي فاتت سرقت 132 مليار دولار من مصر، لو رجعنا نصهم وصرفناهم على الصعيد والعشوائيات حنبقى سويسرا يا جدع

عايزين فلوسنا عايزين فلوسنا عايزين فلوسنا

عايزين فلوسنا عشان عايزين نعمل مشروع الري بالتنقيط عشان نزرع الصحرا ونكتفي ذاتيا من القمح ونوفر مية ونعمل فرص عمل للفلاحين اللي تحولوا لسواقين توك توك بسبب انحسار الاراضي الزراعية

ويتعمل بقى قوانين عمل تانية خااااااااالص غير دي، حاجة تضمن حقوق العمال، مش الانسان ينام عامل يصحى مفصول ونايم في الشارع، منظر العمال قدام مجلس الشعب ده انا مش عايزة اشوفه تاني، ومصانعنا بقى ترجع لنا

وبعد كده احنا عايزين نتخلص من المعونة الامريكية تماما، واحدة واحدة كده نسلت نفسنا منها لانها خربت بيتنا وبيعتنا اللي ورانا واللي قدامنا، ونتخلص من المعونة الاوروبية كمان، يعني يبقى لنا 132 دولار متهربين ونشحت؟ نرجع فلوسنا بس ونظبط حالنا وكلها خمس ست سنين واحنا اللي ندي اوروبا وامريكا معونة، مش عايزين معونات تاني، عشان بيفرضوا علينا شروطهم الاقتصادية وبياخدوا حقهم بالفلوس دي من اراضينا وصناعتنا وبيفسدوا مسئولينا عشان بيقدموا لهم رشاوى عشان يمكنوهم انهم يسرقونا، واحدة واحدة من غير خناق كده نتخلص من المعونات الاجنبية خالص سواء للدولة او المؤسسات الاهلية، وبدل ما المؤسسات الاهلية تمشي تشحت من برة يتفتح لها مجال جمع التبرعات عشان يعرفوا يخدموا بلدهم بفلوس ولاد بلادهم

ودي المساعدة اللي الاستاذ اوباما عرضها علينا امبارح، انه يدينا فرصة نرجع فلوسنا ونصرف على نفسنا، واحنا متشكرين له قوي

متشكرين على تهنئته لينا بثورتنا

ومتشكرين والله على انه اكتشف اننا مش ارهابيين ولا متطرفين واننا زينا زي غاندي ومارتن لوثر كينج ده ايه الرتبة الجامدة دي؟ بيساوي شعب بافراد؟ ايا كانوا الافراد دول ومهما كانت عظمتهم، هم افراد، واحنا شعب، ومالناش قيادات، نتساوى بيهم ازاي يعني؟ 

ومتشكرين على انه اكتشف اننا سلميين وان المسلمين والمسيحيين مش بيقتلوا بعض ولا حاجة

ومتشكرين على انه قال لنا: والله طلعتوا ناس محترمة اهو.. امال بيقولوا عليكوا كده ليه؟

ومتشكرين على ان 400 شهيد - اللي كل الناس مصممة انهم 300 وهم 400 - ماتوا بسلاح جاي من بلده بموجب معونته

ومتشكرين على الغاز المسيل للدموع اللي شميناه ميد إن يو اس ايه

ومتشكرين على الرصاص المطاطي اللي هو كمان ميد ان يو اس ايه

ومتشكرين على اعترافه باننا بني ادمين ومن حقنا الحرية والعدالة

ومتشكرين على انه ما عرفش اننا بني ادمين زينا زيه الا لما اضطرينا نطلع بالملايين ويموت منا مئات الشهدا

ومتشكرين على انه تاني رجع يقول لنا: حنساعدكم من غير ما تطلبوا... شكرا شكرا على الرخامة يعني، تاني؟ تاني حتساعدنا من غير ما نطلب؟ مش كفاية كل المساعدات اللي بقالها تلاتين سنة؟ طب ممكن تساعدنا بناء على طلبنا بدل ما تطوع؟ احنا طالبين مساعدة فعلا: سيبنا في حالنا، يا سيدي احنا لا عايزين نتخانق معاك، ولا عايزين مساعدة منك، يا نحلة لا تقرصيني ولا عايز عسل منك

ولو سمحت ما بنحبش حد يطبطب على راسنا زي الكلب اللولو.. اصل حضرتك بتبوظ التسريحة كده واحنا لسه مشاشورين شعرنا

احنا عايزين نستقل بقى، نستقل بكل حاجة، نتملك مواردنا عشان نأكل ناسنا، ونستقل بقرارتنا، وسياساتنا، مش خلاص؟ مش العالم كله اطمن علينا اننا ناس كبار وعاقلين وشاطرين ومش ارهابيين، والسلفيين والمسيحيين قعدوا في ميدان التحرير يحبوا في بعض حب مبالغ فيه ونازلين بوس في بعض؟ سيبونا في حالنا بقى، المساعدة الوحيدة انهم يسيبونا نقف على رجلينا ونبني نفسنا لوحدنا ومش ناقصنا حاجة، لا ناقصنا علم، ولا خبرة، ولا فلوس، ولا موارد، ولا اخلاق، ولا ارادة، ولا فهم، ولا اي حاجة الحمد لله، وربنا معانا احسن من الكل، وطول عمرنا من سبعتلاف سنة ولحد دلوقت ربنا هو اللي بياخد باله منه وبيراعينا، مش محتاجين رعاية من حد، وربنا هو اللي عمل مصر دي، هو اللي رسم حدودها، لا قسمها احتلال، ولا وحدها سفاح، ولا اسسها عصابات ولا هاربين من احكام في بلادهم الاصلية، لو سمح اوباما يسيب بلدنا للي عملها هو اولى بيها

احنا ناس ميت فل وسبعتاشر ومش محتاجين اي مساعدات من حد ومش محتاجين حد يعلمنا ولا يفهمنا

قال حيساعدنا من غير ما نطلب قال، ايوة يعني ايه اللي حيلتك يا اوباما تساعدنا بيه انت؟ من ساعة ما ربنا حدفكوا علينا والمصايب نازلة ترف على راسنا، احنا نساعدك ونساعد اللي يتشدد لك، قول لنا انت ناقصك ايه واحنا نساعدك فيه

مش محتاجين بقى نتكلم عن استقلال القضاء واستقلال السلطات التشريعية

ومش عايزة اسمع حاجة اسمها الحزب الوطني تاني

اه صحيح، العادلي ماسكينه دلوقت وبيقرروه وقال ان فيه في مقرات الحزب الوطني اودة اسمها غرفة جهنم وجمال وابوه عارفين بيها وفيها مستندات مصورة وموثقة على كل المصايب

ماحدش يفرط فيه العادلي ده يا جماعة، بالراحة عليه، ماحدش يضربه، عرفوه غلطه بس لحد ما نعرف بس مين اللي اداله اوامر يفجر لنا كنيسة القديسين وليه؟ الراجل ده كنز معلومات وخلوا بالكم منه لبعدين ينتحروه

وانس الفقي اتشيع هيييع هيييع هيييع

بس يرجع الفلوس، ده سرقنا كتير قوي، يرجع اللي عليه

احنا مش عايزين ننتقم من حد، يعني مش حنمسك العساكر والبلطجية والناس اللي اخدت عشرين جنيه عشان تتصل وتقول كنتاكي وبابا مبارك ونسيب الناس اللي هلبت مليارات، احنا عايزين فلوسنا بس

والنبي يا شباب، امانة فلوسنا ترجع احسن انا محروقة على الفلوس قوي، ماحبش حد يسرقني انا

كل ده واكتر منه ورانا نعمله، ولازم نعمله كله، كله

حقنا نعمله كله، عشان كل حق حناخده، كل طوبة بنبني بيها بلدنا، كل سنبلة قمح حنزرعها، كل مسمار في صندوق انتخابي نضيف، شارب دم خيرة شبابنا، اغلى دم، بحق الدم ده ما نفرط في اي حق من حقوقنا ولا نهمل اي حاجة في بلدنا.. حررناها بالغالي، حررناها بحبة قلوبنا

------------

ويالا يا جزائر.. مستنينك شدي حيلك يا جزائر

وشدي حيلك يا يمن

وشدي حيلك يا اردن

وشدي حيلك يا كل الدول العربية.. بس ليبيا تستنى شوية عشان عايزين القذافي نلعب بيه

وتحيا تونس :)