Sunday 27 February 2011

ايه ده بقى؟

تحديث:
وبعدين بقى في اليوم المدوحس اللي مش عايز يعدي ده
اتفضلوا
الفيديو ده لازم يروح للمشير نفسه




ما اعرفش ازاي ممكن يوصل للمشير، بس اي حد له اتصال بالجيش لازم يوصل الفيديو ده للمشير، حتى لو دول بلطجية، حتى لو دول قتالين قتلا.. الجيش المصري بيعامل الناس كده من امتى؟ ده الجيش المصري ما عذبش الاسرى الاسرائيليين وعاملهم احسن معاملة في تلاتة وسبعين.. دول ما يشبهوش الاسرى الاسرائيليين؟
تحديث:
وده من بورسعيد
-----------
وكما تساءل علاء سيف: وايه اللي يخلي ضابط جيش يتدرب على التعذيب اساسا؟ ضابط الجيش بياخد تدريب على القتال مش على التعذيب.. او هكذا المفروض
وانا بقى باتساءل: وايه اللي يخلي ضابط جيش يقول يعيش حسني مبارك اساسا؟ ولما ضابط جيش يقول علينا بناخد خمسين يورو يبقى المخابرات بتعمل ايه؟ مش ممكن يعني ضباط الجيش بيستقوا معلوماتهم من تامر امين وسيد علي وهناء السمري كمان قبل ما يغيروا رأيهم، يعني دول من ساعة ما مبارك اتخلع ما شافوش تلفزيون؟ ولا دي المخابرات بتتفرج على التلفزيون وتبعت لهم اس ام اس؟ 
فيه ناس ابتدت تقول ان كان فيه ضباط شرطة لابسين جيش ضمن المجموعات، بس طب يعني الجيش ليه يلبس الشرطة لبسه يعني؟ وقلنا الجيش ما يقعدش مع الشرطة تاني، ولا يتفرج على التلفزيون كمان
وبعد ما نحل امن الدولة عايزين نعمل اختبار ذكاء للمخابرات واي حد الاي كيو بتاعه اقل من 130 يترفد، بلاش 130 عشان ده ذكي، اي حد الاي كيو بتاعه اقل من 110 يترفد من المخابرات، ويشتغل في الشرطة، يدوب كده كويس
دول حطموا لي كل تصوراتي اللي بناها لي صالح مرسي ونبيل فاروق عن رجل المخابرات خالص.. لما رئيس المخابرات السابق بيقول براذر موسليمهود ورئيس المخابرات الحالي كان بيقول سمك القرش ده مخطط اسرائيلي وكل بتوع سيناء جواسيس ويقول للقوافل الاجنبية بلاش تدخلوا المساعدات دي لغزة ما تجيبوها ده احنا عندنا فقرا كتير.. وبعدين يطلع ان اجندات وكنتاكي وخمسين يورو دي مش مجرد دعاية ضد الثوار دي معلومات بيمدوا بيها بعض عناصر الجيش... يبقى انا اروح اشتغل في السي اي ايه بقى.. سي اي ايه ايه؟ ده انا اروح اشتغل في ناسا
احنا عايزين تحقيق في الوقائع المذكورة في البوست ده
صاحب البوست حاطط اسمه وصورته، يعني ما عندوش حاجة يخاف منها، اللي ضربه هو اللي ما نعرفش اسمه ولا شكله، عشان هو جبان، ايا كان، جبان
احنا لما نعوز نشتكي من حاجة زي دي نروح نشتكي لمين؟ 
قطع ايد اللي يضرب مصري... انشالله يكون مين

94 comments:

FATMA said...

وبعدين يا نوارة
شوفي ذ/بلال فضل ولا علاء الاسواني ولا ابراهيم عيسي
ولا القوات المسلحة
عايزين نعرف ايه ده

حسين محمد said...

عاوز اقولك على حاجة شفتها بنفسي يا نوارة
فيه مجندين في الجيش من اصحابي ايام الثورة كانوا مسئولين عن جمع معلومات عن المتظاهرين كتحريات ولما سألت صاحبي وانت كانت اقوالك ايه قال قلتهم اللي شوفته اللي هو
شفت 4 عربيات نقل محملة كنتاكي ودافع فلوسها واحد اجنبي وكمان ان المتظاهرين ثلاثة ارباعهم اجانب حوالي تلاتين في المية كده
من غير ما تضحكي من الدقة العجيبة دي
الجيش ميزته انه من الشعب مش كيان متجانس زي الشرطة بمعنى ان كتير من اللي فيه وموجودين في الشارع هم قاعدين فيه من ستة لتلاتة وماشيين ومش كل افكارهم او تعاملهم الجيش مسئول عنها لانه ممكن يسئل عن افكار خريجي الكلية الحربية مش المجندين ومش كل خريجي الكلية الحربية بيفهموا يعني
هتلاقي في الجيش كل اللي ممكن تلاقيه برة يعني ممكن تلاقي واحد خريج جامعة وفي الجيش ومقتنع ان كده الجيش احتل مصر
دي مش نكتة ده رأي واحد اعرفه خريج كلية قمة لما سألني هو كده مبارك طردوه واحتلوا مصر ومين كده اللي هيحررها بقى
الخلاصة موقف القيادات سواء العليا والمتوسطة هو المهم لان الجيش عنده الطاعة عمياء وغالبا رأي الأفراد غير مؤثر الا بقدر بسيط يمكن معالجته زي ما حصل في التحرير اول امبارح
كمان مخابرتنا لازم نديها حقها على عكس الجيش ان ظباط المخابرات فاهمين كويس جدا ولكن القيادات مشكلتها ان رأيها متعلق بالسياسة اكتر من الحقيقة او القناعة

OberonSky said...

لا حول ولا قوة إلا بالله ...



أكبر مشكلة دلوقتي إن عدد الناس قليل في التحرير ... فاكرة فيه واحد كتب كومنت هنا إن واحد من الجيش زعقله و قاله انتو مش رجالة ليه سيبتو التحرير ... كان لازم تفضلوا ....



ماهو مش معقول بعد كل إلي حصل دة لسة في ناس هبلة مصدقة حكاية ال-50 يورو زي ماحصل مع محمد موسى ... و كمان مبارك مشي و قليل إلي زعلانين عليه .. ازاي تلاقي ظباط جيش يقولوا دة >>



“بتاخد 50 يورو يا روح أمك علشان تشتم في الرئيس مبارك” و يأمرهم يقولو “يعيش حسني مبارك” و إللي مايقولش يضربوه من الأول


و بعدين ليه إنفصام الشخصية في الجيش ده ... واحد يضرب و واحد يهدي و واحد يعالجه ...



الموضوع فيه إن كبيره ... مش عارف يمكن فيه رسالة كان الجيش بيبعتها للمتظاهرين .. أكنه بيفتعل الموضوع داه علشعان الناس تهيج و تطلع بأعداد أكتر و تبقى فعلاً مليونية تاني و إعتصام .. أكن الجيش حس إن الموضوع بينام و فعلاً هيتضر يخلي و ترجع الشرطة و أمن الدولة فكان عايز يشعلل الموضوع ... فيضرب شوية شباب شكلهم كدة جامدين و يقول 50 يورو و قول يعيش حسني ... علشان الموضوع يسخن تاني ... والله أنا مش عرف بس نفسي ألاقي الكومنت إلي هنا عل صفحة بتاعتك و قال كلام شبة ده ...

Mo Sherif said...

أولا : بعد قراءتي للقصة أقول إن دول جيش

ثانيا : دي أوامر و مش تصرفات فردية

ثالثا : هل توجد قسوة في الجيش مثل الشرطة ؟ الأجابة نعم و أكثر كمان و لكن ما يميز الجيش هو السيستيم الجيد و ان ضابط الجيش ليس له قيمة خارج اسوار وحدته أو خارج مكان خدمته أما ضابط البوليس كان بيرمي جتته على اي حد و له سلطة في اي مكان

رابعا : كفاية بقى دلع على الجيش لأن لو قلب عليكوا ووراكوا الوش التاني هيبهديلكوا و مش هتخدوا منه لا حق و لا باطل

خامسا : أنتي مرحتيش جيش قبل كده و لا ايه ؟؟

kiki said...

علي بالك القول المأثور الفرح هو الرقاصة و الرقاصة هي الفرح؟ مبارك اولا وأخيرا جزء من المؤسسة العسكرية يعني بالتالي في بعض العناصر التي تكن له الولاء الاعمي و الاطرش و فاقد الاحساس كمان.
سمعتي عن الحملة الشعبية للتصدي للعصيان المدني علي الفيسبوك؟ دول بتوع آسف يا ريس و اللي بيشنعوا علي البرادعي و وائل غنيم خشي علي الجروب بتاعهم لو عايزة دمك يتحرق و خلي كباية الكركديه جنبك عشان الضغط. دول بقي يا ستي زعيم العصابة بتاعهم المدعو عمرو عمار بيقدم نفسه علي انه مهندس لكن قدملي نفسه علي انه عميد متقاعد من الجيش و ان المؤسسة العسكرية لا تمس.
ماشي حلو تخدير الأعصاب و البيانات اللي نازلة ترف... جميل جدا التجربة اثبتت كلام تاني خالص و اعادة بناء الثقة حتعوز من جيشنا حبيبنا علي قولك مجهود جبار... لأ مش مسامحين يا نوارة... و نبقي بنفرط في حق اجيال مش بس الناس اللي اتضربت يوم السبت الفجر. المؤسسة العسكرية مسيطرة علي زمام الأمور.. و كان مجرد تسلم مقاليد الامور من الملك و الانجليز...غير كده ما كانش فيه اي فكر جديد غير التعنت و التسلط... و النتيجة المزة اللي كان عاوز ييجي بعد باباه..
ماشي نثق فيهم لانهم قوتنا و عزنا و كل حاجة... جميل... طول ما هما كويسين معانا... ساقوا العوج يبقي فيه كلام تاني
طبعا شفتي الخبر ده
http://dostor.org/politics/egypt/11/february/27/37126
لازم نعمل زيهم... نروح نجيب الديب من ديله و نعلقهم في ميدان التحرير... حتي المساجين في طره لازم يحطوا العادلي و عز يا وز في مكانهم.

Omar said...

اقرأوا المقال ده كمان علشان أعصابكم تشيط http://www.akhbarak.net/article/2356913

OberonSky said...

نوارة .. واحد صاحبي قلي عن الفيديو داه .... دول مش متظاهرين .... دول ناس هجمت على المحافظة و هجموا على شقق و احتلوها..... سكان عشوائيات اسمها زرزارة.... و للاسف هم اتظلموا في عصر مبارك بس ماستنوش و راحوا يهجموا على الممتلكات و قاوموا الجيش لما راح يمشيهم من المساكن اللي خدوها .. طبعاً معاملتهم مكنتش إنسانية لكن مش عارف أقول إيه

Anonymous said...

بصى يااستاذة نوارة هى دى طريقة ممكن توصلى بيها الفيديو ده للجيش بس طريقة زبالة شوية :))))
هتدخلى هنا
http://www.facebook.com/Egyptian.Armed.Forces?sk=app_7146470109
وتبعتى الفيديو :)

احمد سعيد said...

صحيح من امتى الجيش بيتعامل كدا ؟؟

دا عمر الشرطه العسكريه ما اتعاملت مع الناس كدا ابدااااااااااا

لا لا لا

لازم الموضوع دة يوصل للمشير

اكيد امن الدوله هو اللى مسخن الشرطه العسكريه

او ممكن يكونوا امن دوله ولابسين جيش

:D

Unknown said...

ايه رايك ان المشير نفسه عارف و بلاش تحوير.....لازم نسترجل حتي لو ضد الجيش ما دام هي بقت كده

Anonymous said...

أعتقد يا جماعة فيه شرطة ترتدي ذي الجيش. الجيش اللي كان بيروح في المناطق العشوائية علشان يأمنها من الهاربين أعتقد أنهم شرطة للكثير من الأسباب, الملابس الجديدة للأفراد الأسلحة الجديدة والغير مستعمله في الجيش أصلا , كل من دخل الجيش يعرف البنادق المستعمله جيدا وكمان سهولة اطلاقهم للنيران عشوائيا ومن أجل الترهيب الجيش مش كده خالص دول بيتسألوا علي كل طلقة في الذخيرة راحت فين. سلوك الأفراد نفسه مش هو ده سلوك الجنود المنتسبين للجيش ده سلوك ناس محترفة ومتدربين كويس على الارهاب وقلة الأدب

-_- said...

دول يستاهلوا اكتر من كده
برافوا برافو برافو يا جيش

بصي يا نوارة انا قاعد دلوقتي في بورسعيد

و اللي برة بورسعيد ميعرفش ايه اللي حصل في بورسعيد في الايام اللي فاتت

العيال البلطجية بتوع زرزارة ليهم حكاية كبيرة و طويلة ممكن تقروها من اي مصدر على النت و هما مش بورسعيدية و استلموا شقق اكتر من مرة و بباعوها و يرجعوا للعشش تاني


شغلهم كله في المخدرات و التهريب و الدعارة و اي حد بورسعيدي يقولك كده

خطفوا المعدية بالركاب عشان يستلموا شقق تاني و حرقوا المحافظة و مديرية الامن و المحكمة

قفلوا الشوارع و عملوا اتاوات على الناس

و جم في سوق السمك و قتلوا 6 ابرياء ده غير انهم خطفوا بنات بيساوموا بيهم الجيش منهم بنت في شارعنا كانت راجعة من الدرس

و دخلوا في حرب بالاسلحة مع الجيش في بورفؤاد و الجيش موت منهم اتنين و هما موتوا عسكري في الجيش و مسمعهناش عنه حاجة

و احكيك بقى اللي انا شفته بعيني .. انا دكتور في مستشفى الزهور العام و لقينا عيال زرزارة دخلوا علينا و كسروا الاجهزة و هددوا المرضى و في واحد في العناية جتله سكتة قلبية و مات من الخوف و واحد صحبي دكتور في الاستقبال عجنوه و مخلوش حتة سليمة فيه

و كل ده بعد التنحي على فكرة
احنا شفنا ايام سودة و عشان كده الجيش طلع بيان فيه بورسعيد يا جماعة

و بجد متظلموش الجيش , اسألوا اي حد في بورسعيد او حتى اطلعوا على منتدى بورسعيد اون لاين و شوفوا كمية الجرايم و المجازر اللي حصلت لنا بسبب العيال دول

و الحمد لله ان الجيش مسك ناس كتير منهم و اتمنى ياخدوا اعدام على الارواح اللي قتلوها

ارجوا يا نوارة انك تنشري الحقيقة و مش الحقيقة اللي بقولها بس و لكن انتم دوروا بنفسكم و هتلاقوا انهم يستحقوا اكتر من كده

مواطن مصري said...

الفيديو دة الي على الأرض البلطجية

الي تم القبض عليهم و تسليمهم للجيش

و الي أتعدو على اراضي الدولة

مواطن مصري said...

نوارةش يلي الفيديو عشان الي في الفيديو بلطجية و ناس اتسلمت للجيش

ahm_say511 said...

هو إحنا بنضحك على نفسنا طب ما طبعاً ألجيش هو يد لمبارك وبعدين هو إنتم صدقتم إن ألمجلس ألعسكرى فعلاً اجتمع لوحدوا أوغصبن عن مبارك إزاى ا جدعان أللى دخل ألجيش يعرف إن الجيش ما يقدرشى يعمل حاجة مهما كانت رتبتوا إلا بموافقة كبيروا وكبير ألجيش طنطاوى وده بقى اكبر مساعد لمبارك وألمجلس أجتمع لأن مبارك أؤمروا بكدة لأنوا ما كانشى عندوا حل تانى غير إن جما زى ما وعدوا بتصية ألثورة فا بلاش نضحك على نفسنا ومطلوب حلول سريعة ودستور وأنتخابات ورئيس مدنى علشان يعرف يظبط ألناس دية ويارب يكون عمرو موسى نفسى حد من ألخارجية

Ahmed A. Rahman said...

يا جماعه أنا عاوز أقول حاجه بعد إذنكم

العيال دي باين قوي إنهم بلطجيه.

أنا مش بأقول إن دي مسموح بيها لمعاملة أي مصري.. لكن لعلها ما يصلح الآن.

ولو عايزين تعرفوا القسوه الظلم الحقيقي كنت تشوفوا نفس العيال دي كانت بتتعامل إزاي في أقسام الشرطة زمان
صدقوني العيال دي ما يتفعش معاها غير كده... أنا شفتهم مره قبل كده

wahibium said...

@Nawara

Many of us told you and you refuse to listen.
Read Ahmed Saed's post

http://ahmedsaed.blogspot.com/2011/02/blog-post_27.html

And please put emotions aside; better to readjust than insisting on being wrong.
I am sure you are contributing more than any of us here, and that's why i care alot for you specifically to reassess the whole situation.

PS: you owe Ahmed an apology

احمد سعيد said...

ابعتهولى بولوتوس
ههههههههههههه

Unknown said...

الباشا يا نوارة جايلة اوامر انه يصور قايلين كده في الاخر

Moataz Medhat said...

بالنسبة لفيديو بورسعيد:

أي واحد دخل جيش بيتعرض لأضعاف ده، ده احنا كنا بنقلع السترة و نزحف في الشتا!! و في المطر،و بنقف بالساعات في الشمس.و مبنامش بالأيام.

اللي في الفيديو قاعدين،حتى موقفوش،يعني بالنسبة للجيش كده بيعاملهم معاملة مش قاسية!

و الفيديو فيه تهديد و شتيمة، مفهوش تعذيب ولا ضرب ولا صعق.
و احنا منعرفش عملوا ايه،هتقولي حتى المجرمين لهم حقوق، كويس، الجيش هيحتجزهم فين؟ يوديهم فين عشان يتوقفوا في ظروف مناسبة؟

ما كان في الإمكان أبدع مما كان.

أما بالنسبة لأحداث التحرير، فدي مصيبة،انت قلت كويس انهم اعتذروا، أنا موافقك انهم لازم يتحاسبوا. لكن اللي أنا قلقان منه هو تأثر القيادات الصغيرة بالدعاية الهابلة.

Unknown said...

نوارة الجيش عمره مكان منظمة حقوق انسان ولا ملاك برئ. بس طول عمره هو اقوى مؤسسة فى مصر و مكانة مش بين المدنيين ولا مطاردة المجرمين. عشان كدة بلاش نضغط عليه انو يغير اسلوبة عشان مش وقتة, بس لازم نضغط عليه انو يسلم السلطة. ارجوكى شيلى الفيديو ده

الجبرتوته said...

عندي ملاحظه علي الفيديو ده مش ملاحظين ان اللي بيصور بيصور عادي ولا كأنه بيصور فيلم سينمائي والناس اللي المفروض انهم بيرتكبوا جريمه ضد الشعب سايبينه يصور عادي يعني علي الاقل كان هيصور وهو مستخبي وايده تبقي مهزوزه زي كل المخالفات اللي شفناها قبل كدا علي النت وكأن ده هو المقصود تصوير الجيش في مشهد زي ده وهنا السؤال ده ليه ولمصلحة مين؟
ومين دول اساسا؟؟؟؟؟؟؟؟؟؟؟

aly said...

من غير عصبية ومن غير مانعمل نفسنا مصدومين
أولا الجيش جزء من دولة الطغيان وأكيد له نفس الثقافة
ثانيا أي حد دخل الجيش ومالوش واسطة لاسيما عساكر اللي مش مؤهلات اللي جيشهم 3 سنين ده الطبيعي في تعاملهم في الجيش وأي عسكري احتك بالشرطة العسكرية أو اتعرض في جيشه لتحقيق في المخابرات الحربية عارف ان ده التعامل الطبيعي اللي الجيش المحترم بتاعنا مايعرفش غيره

طيب ايه الحكاية
ببساطة الفرق في حاجتين
الجيش مش مؤسسة مبنية على التعذيب بشكل منهجي زي الشرطة لكن فقط في مؤسساتها العقابية زي الشرطة العسكرية والمخابرات والسجون العسكرية
الجيش بيعامل عساكر الدرجة الثالثة فقط ريقة المهينة في المعتاد لقناعته انهم مايجوش الا كدة
مالناش حد تاني نشتكي له لان بعد الجيش ضهرنا للحيط
احنا قنعنا من الجيش بالوش الحلو اللي وراه لينا في الظاهر و90% مننا عارفين الوش التاني وكان كلنا أمل أنه يرجع لثكناته بعد شهور من غير مايورينا احنا الوش الوحش
كلنا أمل أن اخر ثورتنا وصبرنا خير وان تغييرات الثورة بعد ماتعصف بالحياة المدينة تعصف بالجيش وتغيره لانهم في الاخر نتاج طبيعي لمجتمعنا اللي جه عليه فترة اعتبر التعذيب طبيعي وعادي اذا كنت متهم

ماكنتش اتمنى نكون في الموقف الاخلاقي ده لان خياراتنا صعبة ومحدودة
افرجها من عندك يارب

Unknown said...

بغض النظر أهؤلاء يلطجية ام شباب متظاهر فما حدث من تعذيب بالكهرباء وتعرية الاجساد لا يليق بأسير بفرض أنهم أعداء تم أسرهم
القانون شيء والرحمة شيء آخر

الجبرتوته said...

ده اول تعليق لي هنا مع اني بتابع من زمان بس الفيديو اسفزني و
عندي ملاحظه علي الفيديو ده مش ملاحظين ان اللي بيصور بيصور عادي ولا كأنه بيصور فيلم سينمائي والناس اللي المفروض انهم بيرتكبوا جريمه ضد الشعب سايبينه يصور عادي يعني علي الاقل كان هيصور وهو مستخبي وايده تبقي مهزوزه زي كل المخالفات اللي شفناها قبل كدا علي النت وكأن ده هو المقصود تصوير الجيش في مشهد زي ده وهنا السؤال ده ليه ولمصلحة مين؟
ومين دول اساسا؟؟؟؟؟؟؟؟؟؟؟

رسامة said...

مش فاهمة يا نوراة بصراحة استغرابك من الجيش،،، و مش فاهمة برضه ليه نظرتك الوردية المسبقة عنهم ثم صدمتك حاليا
عمرك ما شفتي ضابط جيش ،، او مجند بيحيكيلك بيتعاملوا جوه الجيش ازاي؟ و اقل شتيمة بالأب و الام و الاذلال المهين في التعامل؟ ناهيكي عن لسانهم و معاملتهم الفظة
أما عن استقبال الثوار لهم بالورود و المعاملة الظاهرية و التي تبدو حسنة ، فهي كما يتضح يوما بعد يوم جزء من الخطة المدروسة على يد قائدهم طنطاوي
انا اثق في قول الرائد أحمد شومان تماما ... يجب ان يرحل طنطاوي مع النظام و كل القيادات الفاسدين فقد أفسدو الجيش و أضعفوه
و هم حامين بعضهم بعضا و شفيق و حكومته،
و أقنعتهم بدأت في السقوط يوما بعد يوم

Maha

رسامة said...
This comment has been removed by the author.
Anonymous said...

شوفي يا نوارة
أقرأي التعليقات اللي على الفيديو

ثانيا التعليق التالي أنا أؤيده و بشدة
:
بصراحة أنا مش شايف تعذيب ..

شايف شتيمة و تهديد فقط. ده مش دفاع،لكن ده غير عنوان الفيديو.

اللي شايف ربط الأيدي و القعاد على الأرض تعذيب، يبقا مدخلش جيش و مش عارف الجيش بيتعامل ازاي على سبيل "التكدير" و هو العقاب الروتيني للجنود.

الخلاصة:ممكن يكونوا مجرمين، و في كل الأحوال،دي معاملة غير قاسية بالنسبة للجيش،حياتهم غير المدنيين.

Unknown said...

بلاش احمد سعيد ده والنبي، عنده ثأر شخصي مع الجيش ومش بيفكر في اي حاجة غير ثأره الشخصي

elzahraamegahed said...

على فكره بأهه احنا مالناش الا طلب واحد مجلس رئاسى

elzahraamegahed said...

الدراسه بالجامعات ما فتحتش لسه ، يعنى المفروض كل الطلبه يبقوا فى التحرير ، وفين 8 مليون عاطل ما بيروحوش ليه، اخد اول طياره من فرنسا واروح اعتصم، حاجه تحرق الدم ، طب الشباب دمهم مش واكلهم من اللى التوانسه عملوه دول عددهم 17 مليون واعتصم منهم اليومين الىى فاتوا فى الشارع خمسين ألف وما قاموش إلا لما الغنوشى مشى واحنا تمانين مليوم يعتصم منهم 1500 ليه يعنى؟؟، خلاص طالما الى فى اقاهره دمهم برد كده ابعتوا هاتوا من المحافظات.
وياريت تقروا البوست ده عشان تحسوا ايه اللى بيحصل فى مصر
http://mosessaur.wordpress.com/2011/02/27/%D8%A7%D9%84%D8%AC%D9%8A%D8%B4-%D9%88-%D8%A7%D9%84%D8%B4%D8%B9%D8%A8-%D9%8A%D8%AF-%D9%88%D8%A7%D8%AD%D8%AF%D8%A9-%D9%88-%D9%84%D9%83%D9%86-%D8%B9%D9%82%D9%84-%D9%88-%D9%81%D9%83%D8%B1-%D9%85%D8%AE/

aly said...

قال لازم يوصل للمشير قال
ده انتي طيبة طيابة

حسين محمد said...

مبدئيا انا مش بدافع عن الجيش بالعكس انا شايف انه يتمنى لو يقدر يحكم ومصر وكلامه عن سرعة تسليم البلد لسلطة مدنية منتخبة غالبا لانه عارف ان البلد في حالة من الحراك والوعي ومش مخدرة بمعنى ان الظروف لا تسمح له بذلك لذا فهو صادق فعلا في رغبته في ان ينفذ اغلب مطالب الثورة
الحاجة المهمة انه الاسلوب اللي طبعا فيه همجية كبيرة كده اوقات بيكون مطلوب لتخويف الباقيين
البلطجية الايام دي شايفين نفسهم اوي وفيه محافظات كتير بياخدوا فيها اتاوة وبيفتروا على الجميع تقريبا
ومسألة ان الجيش مش متدرب على التعذيب ده ممكن تقوليه لانك ما دخلتيش الجيش وسألي كتير من اللي دخله خاصة من غير حملة المؤهلات وانتي تعرفي ان فيه جوة ضرب بالجنازير واهانة وتكدير بلا حدود
اللي يقلق فعلا لو اللي حصل في التحرير تكرر تاني لان افراد الجيش صعب ان اعصابهم تفلت لانهم مدربين على قوة التحمل وكمان لو هم سهل استفزازهم كان ده حصل يوم الاربعاء الشهير مع العلم انه فيه ناس منهم في اليوم ده اوشكت على الانهيار العصبي فعلا لكن دي كانت حالات فردية بسيطة
انا بحاول قدر الامكان اصدق ان اللي حصل في التحرير ما كنش مقصود بالشكل اللي ظهر بيه واللي هيأكد تكراره من عدمه
من الآخر طبيعي ان الجيش يعمل كده مع البلطجية وان كنت انا شخصيا مش بحب كده ولا افضله لكن في النهاية يحسب ليهم ان بيقدروا يحددوا تصرفاتهم حسب اللي بيتعاملوا معاه مش زي بهايم الاخلية كله واحد عندهم

Omar said...

أحسن خبر قرأته اليوم وبداية النهايه ولن يستطيع الجيش أن يتواطئ أكثر من ذلك مع حسنى وعصابته قصدى مراته وأولاده لابد أن نتمسك بهذا البلاغ مصطفى بكرى قدمها لنا على طبق من ذهب أقرأوا بنفسكم http://www.akhbarak.net/article/2357010

احمد سعيد said...

ايوة كلامى غير منطقى بالمرة وبروج للفتنه لاسباب شخصيه
:)

احمد سعيد said...

على فكرة انا غيرت اسمى , بدل واحد مجنون خليته مروج للفتنه لاسباب شخصيه

احمد سعيد said...

ياستى انا ابن ستين كلب
سيبك منى خالص
اعتبرينى مش موجود
اعتبرى كلامى دة موجود على ورقه ملزوقه على الحيط

ردى عليه

فنديه يانوارة

elzahraamegahed said...

اه على فكره الفيديو ده عادى ما يبقاش قلبك رهيف أوى كده يا نواره،خلينا فى المصيبة السودة لضباط الجيش الى بيضربوا الثوار ويقولوا لهم قولوا يعيش حسنى مبارك، ده أنا فعلا بفكر اركب أول طياره لمصر وانزل أولع ف نفسى يمكن الناس تحس وينزلوا يعتصموا ، يالهوى أروح عند السفاره واولع فى نفسى.
ضابط جيش محرووووووووق ان الناس بتشتم فى حسنى، ومتخيل انه مفيش سبب يخلى الناس تعمل كده الا انهم بياخدوا فلوس، ليييييه ؟ دول صنفهم ايه الضباط دول ، وانا اللى متخيله ان كل اللى بيطلعوا مسيرات التأييد دول أكيد مأجورين،
تعرفى أنا أبويا لواء شرطه بالمعاش وعمرى فى حياتى ما عدى علينا يوم فى بيتنا الا لما ما اشوفه بيدعى على حسنى مبارك مش بيشتمه بس، بالرغم ان احنا متمتعيين بنوادى واراضى وشقق ومصايف ومستشفيات الشرطه ده غير البوكس وعسكرى المراسله وميه ميه،

لكن الضباط دول فعلا محتاجين اختبار الاى كيو
لااااااااااااازم

Unknown said...

لا تعليق.... أنا مصدومة

يوميات البورصة المصرية said...

عشان بس الناس اللي بتكسكس للجيش وشغالين حب وغرام تعرف وتفهم ان الجيش ان لم يكن يطمع في السلطة فهو يطمع في ما هو اكبر وهو تسليط من يشاء وبكرة تشوفوا..

حسين محمد said...

ان شاء الله ثورتنا تنجح وبعد كده يا القيادات تصلح الجيش
او ياجي الوقت اللي وعينا فيه يزيد لدرجة القيام بثورة ضد الجيش لاصلاحه لكن اننا حتى نحلم بكده دلوقت يبقى حلم غير واقعي
فيه جملو قلتها قبل كده وبحب اكررها كتير وهي
الوقوف كثيرا امام الابواب المغلقةالتي لا نمتلك مفاتيحها يغلق الابواب المفتوحة ويجعل المفاتيح التي نمتلكها للابواب الاخرى بلا جدوى

يقول أنى امرأة said...

نوارة بعيد عن الموضوع معلش .. هو بلال فضل مطلعش هوا ليه النهاردة ؟؟؟ هى قناة دريم هتعق الاول برنامج واحد من الناس و دلوقتى بلال فضل

Nemo said...

انت فاكرة ان المشير مش عارف وموافق باللى بيحصل

حياة الظل said...

ولا المشير والثورة والشعب تفوووووووووووو على هالجيش ولا كان المرينز في سجن ابو غريب
يا خسارة دم الشهداء
ما هو بالعقل الجيش نفسة هذا هو الي طلعلنا السدات صاحب كامبديفد وهو الي طلعلنا الغبي حسني مبارك
يا عمي غوروا نكدتوا على الواحد تفووووووووووووووووووووووووووووووووووووووووووووووووووووووووووووووووووووووووووو

Unknown said...

الناس اللي بتقول دول بلطجية ومجرمين... ماشي معاكو، بني آدمين ولا مش بني آدمين؟ اللي بيقول مفيش تعذيب، أمال الكهرباء دي إيه؟
ممكن يكونوا أزبل ناس خلقها ربنا، بس هما ناس... كائن حي، يحاكم، لا يعذب

Hashim Moray said...

نواره انا ضد التعذيب
بس انتي ما تتخيليش البلطجية دول عملين ايه عندنا في بورسعيد
ما فيش حد فينا الا ما اتعرض لضرب نار منهم او اي عمل من اعمال البلطجه في الايام اللي فاتت
لدرجة انهم خطفوا بنات و خطفوا معديه بالناس اللي فيها
و بصراحه هم خطر جدا علي المناطق اللي حواليهم لانهم بيشتغلوا في كل الموبقات
بس يا ريت ان يبقي في حل
زي اعادة تاهيل او رعاية اجتماعية او اي حاجه نساعدهم انهم يبقوا ناس نافعه في المجتمع وعلي الرغم من اني واحد من الي مضرورين منهم الا ان في فوسطهم ناس غلابه وارامل مالهمش اي حاجه تساعدهم
وللاسف ان الاطفال هناك بيتعرضوا
لانتهاكات من كل نوع
يارب بكره نشوف مصر احلي ونتخلص من ظاهرة البلطجه اللي بقت ماليه مصر كلها

elzahraamegahed said...

الفيديو ده يدخلنا فى حوارات جانبيه وبلطجيه وترويع امن مواطنين ، والصرامه وعبره لغيرهم وكده،
نركز عشان ما نتهوش فى المصيبه السوده بتاع يعيش مبارك دى، وحكاية الجراجات دى وقبل كده امنستى قالت انه خدوا متظاهرين فى المتحف وضبطوهم ودى منظمه كبيره وعندها مستنداتها

fathy said...

انا باقول عليكى جادعة يا نوارة ..عايزة ترسلى الفيديو للمشير .. بطلى سذاجة ..دى اوامر عليا
هما جابوا العصيان الكهربائية منين ..ارسليها الى مبارك و قولى لة كلة تمام ياريس طلباتك اوامر و تم التنفيذ

fathy said...

انا باقول عليكى جادعة يا نوارة ..عايزة ترسلى الفيديو للمشير .. بطلى سذاجة ..دى اوامر عليا
هما جابوا العصيان الكهربائية منين ..ارسليها الى مبارك و قولى لة كلة تمام ياريس طلباتك اوامر و تم التنفيذ

Unknown said...

nawara ana ba7eb ketabatek gedan bas elly entee shayfah dah fee mo3askar shortah 3askareyah we wade7 en el 3eyal dee ma2bood 3alehom shaklohom kedah men el baltageyah elly kano mebahdeleen elnas ayam el thawrah.....besara7ah kedah yestahlo elly yet3emel fehom... we ana law kont mesekt wa7ed fehom wallahi kont 2ata3t edoh

Unknown said...

سلامو عليكم يا نوارة الانتصار، مع عظيم الاحترام لشخصك الرائع، اسمحى لى أن أختلف معاكى فى نشر هذا الفيديو بنية نقد الجيش، و عاوز أفكرك بكلامك ان احنا ما نسمحش بأى شىء يدق اسفين بيننا و بين الجيش، اذا كان دول بلطجية يبقى ده أقل واجب، و اللى أنا خايف منه دلوقتى ان عقلية الغوغاء هى اللى تسود، لان أجمل حاجة فى الثورة انها ثورة مثقفين ، و تصرفات الثوار كلها نصرفات راقية، و لو لُطخت بتصرفات الغوغاء حيبقى عليه العوض، و ما تنسيش اننا
walking on egg shells.
أرجوكى تهّدى اللهجة مع الجيش شوية.

OberonSky said...

نوارة .. أنا في رأيي تشيلي الفيديو بتاع البلطجية بتوع بورسعيد .. لزم نختار معاركنا .. أنا ضد إلي في الفيديو بس دة مش وقت تغيير ثقافة بحالها في الوقت الصعب دة .. معظم المصريين شايفين إن تعذيب و ضرب البلطجية كويس ..



احنا لازم الأول نخلص من شفيق و نكمل الثورة و بعدين براحتنا نقدر نغير الحاجات ده .. بس دلوقتي منقدرش نفتح جبهات كتير .. اللى إذا انك شايفة دة ممكن يكتر الضغط على الجيش .. لكن الخوف إنه يدي نتيجة عكسية

مش فاهمه said...

اقرى كويس الله يحليكى
فين يا نوارة الأعلام فين ابراهيم عيسى و بلال فضل و علاء الأسوانى الناس دى فين فيه ناس كتير مش بتدخل النت عايزين يطمنوا فيه ايه بيقولوا الناس دى اتخلت عننا و سابتنا كده ليه
فيه ايه يا نوارة بجد حاتسيبونا لمنى الشاذلى و عمرو اديب ولا أيه
موضوع تانى مهم فين الشرطه عيالنا نزلت المدارس و مافيش امن الشرطه سابتنا و بتادبنا بيشتغلوا 8 ساعات بس حضرتك و بنص طاقتهم لأ بجد الناس حاتموت على عيالها ليه بيتعمل فينا كده لازم حاجه سريعه اتفقوا على مفاوض عايزين نخلص

zara shaishaa said...

Is this the practice of the honorable army, it does not differ from the police practice why all this humiliation even if they were drug dealers where is the human dignity, they could not be human who is insulting and hurting and humiliating another human been like this how could he go to sleep how he could enjoy anything in life while he is making another human life that miserable. If the shafik gov does not resign, immediately and the moshair does not investigate that and punish who ever is responsible for that and publicly for everyone to see another million have to come out and scream do not waste the blood and sacrifice with souls and blood in vain it wan not done, definitely, for that.

غريب said...

لعنة الله على الظالمين
لا جيش ولا أمن
كلهم كلاااااااب
الجيش اللي حبه الشعب مات زمان
جيل وراح
اما الجيل المهجن من القوات الملوثة
فهو جيل ربي على قمع الشعب فقط
فلا دفاع عن وطن ولا حماية مواطن
الحذر كل الحذر
فجيوش امتنا صنيعة الطغاة
هي شبيهة بمن اعادوا تأسيسها
وفق وصالحهم

Unknown said...

يا جماعه كفايه بأه انتم كده بتعقدوا الامور وحتوقعوا الناس فى الجيش
أنا من بورسعيد وكل اللى فى بورسعيد عارفين العيال دى عملت ايه
العيال دى من زرزاره ودول اللى نزل فيديو من كام يوم ليهم موقفين المعديات ومانعين حركة الناس بين بورسعيد وبورفؤاد لحد ما اللجان الشعبيه فى بورفؤاد طردتهم بعد معركه شديده والجيش كان صابر عليهم لحد ما راحوا هاجموا رجال الجيش فى شارع طرح البحر وضربوا عساكر منهم والجيش حاصرهم وقبض على العيال دى وكلهم بلا استثناء مبرشمين وضاربين وبايعين نفسهم وده باين من مناظرهم. الجيش صبر عليهم كتير بس عند نقطه معينه كان لازم يوقفهم عند حدهم ويربيهم ويجعلهم عبره. بورسعيد فى الايام اللى فاتت كانت عايشه فى رعب بسبب العيال دى وفى اشاعات ان فى عضو فى الحزب الوطنى بيدفعلهم علشان يعملوا كده
من فضلكم سيبوا الجيش يرجع الامان للبلد وبرضه اللى بيعمله رجالة الجيش ده ميجيش حاجه جنب الخوازيق اللى كان بيركبها بتوع الشرطه مع ناس شرفاء
ارجوكم ارجوكم متعملوش فتنه بين الشعب والجيش

Unknown said...

يا جماعه كفايه بأه انتم كده بتعقدوا الامور وحتوقعوا الناس فى الجيش
أنا من بورسعيد وكل اللى فى بورسعيد عارفين العيال دى عملت ايه
العيال دى من زرزاره ودول اللى نزل فيديو من كام يوم ليهم موقفين المعديات ومانعين حركة الناس بين بورسعيد وبورفؤاد لحد ما اللجان الشعبيه فى بورفؤاد طردتهم بعد معركه شديده والجيش كان صابر عليهم لحد ما راحوا هاجموا رجال الجيش فى شارع طرح البحر وضربوا عساكر منهم والجيش حاصرهم وقبض على العيال دى وكلهم بلا استثناء مبرشمين وضاربين وبايعين نفسهم وده باين من مناظرهم. الجيش صبر عليهم كتير بس عند نقطه معينه كان لازم يوقفهم عند حدهم ويربيهم ويجعلهم عبره. بورسعيد فى الايام اللى فاتت كانت عايشه فى رعب بسبب العيال دى وفى اشاعات ان فى عضو فى الحزب الوطنى بيدفعلهم علشان يعملوا كده
من فضلكم سيبوا الجيش يرجع الامان للبلد وبرضه اللى بيعمله رجالة الجيش ده ميجيش حاجه جنب الخوازيق اللى كان بيركبها بتوع الشرطه مع ناس شرفاء
ارجوكم ارجوكم متعملوش فتنه بين الشعب والجيش

Early bird said...

الفديوهات كترت اليوميين دول وكلها بتصور انتهاكات خطيره والناس فيها واقفه تتصور يعنى فديو على المشاع

زى يتاع مدير امن دمنهور ده كان غريب قوىالناس بتوع الشرطه دى واضح انها عايشه فى الغيبوبه


المهم هل فعلا فيه ايد خفيه عايزنا نتقلب على الجيش والا احنا اللى اعصابنا بايظه علشان البطء فى محاسبه المسؤوليين الكبار ووجود حكومه تهريب الاموال وحرق الاوراق بتاعه احمد شفيق


البوست اللى فيه المعتصكم اللى انضرب كان فيه ناس بتقوله قول عاش مبارك

مبارك اصلا ايه اللى جاب سيرته دلوقت هو مش كان ماضى وراح ننساه ونرتاح والا ده برضه لزياده البلبله

احنا بنقول سلميه ومش عارفه انتى مستنيه ايه من الجيش بعد ما شافوا الناس بتندبح يوم الأربعاء 2 فبراير ويقولك انا على الحياد

زى ما انتى قولتى بالضبط دى ثوره شعب والمفروض الشعب ما يضايقش الحكم الدولى اللى جايبه يحكم على المباراه وعلى فكره دى مش تريقه بعد حكم 30 سنه تحت المخسوف مبارك التركيبه النفسيه للمؤسسات ومنها الجيش بقت غريبه وده مش تشكيك فيه دى ملاحظه بس يمكن تكون فى محلها ويمكن لا

لكن متضغطيش على الجيش
التركيز دلوقتى يبقى على حكومه اللزقه اللى اسمه شفيق والحمد لله الغنوشى فى تونس طار ودى بشره خير

Boss said...

انا شايف ان الجيش اجنحة وفية مستفيدين من النظام وفية قسوة شديدة
في التعامل

بس كل دة مش مهم المهم دلوقتي حاجتين
اولا ننسي حكاية ان الجيش حبيبنا وبتاعنا لان دةهيريحنا من الصدمة والشعور بالاحباط بعد كل تصرف سيئ من الجيش
وهيخلينا برضة منسندش علي الجيش ويطلع حيطة مايلة
ثانيا ننسي حكاية ان الجيش عميل وبتاع مبارك والكلام دة
لانة ببساطة لو الكلام دة صح مفيش في ايدنا حاجة نعملها ومش في مصلحة مصر ان يحصل اي صدام مع الجيش يعني الكلام دة للاحباط فقط
انا شايف ان الطريقة المثلي هي تحييد الجيش زي زمان لان اصلا المشكلة مع شفيق مش معاة
يعني نخلي تظاهرنا وكلامنا وهتافنا كلة في المسئلة دي
لو الجيش عاملنا كويس ماشى لوعاملنا وحش برضة ماشي وبلاش نبني وجهة نظر مسبقة عن الجيش وبعد كدة نتصدم او نضيع وقتنا وحماسنا في التطاول علية

البهوات اللي بيقولوا ان دول بلطجية ومينفعش معاهم غير كدة
دي نفس نظرة الظباط في الاقسام لينا يعني هم شايفين ان انا وانت برضة بلطجية ومينفعش معانا غير كدة (وماتحولش تقنعهم بالعكس)
انا بحاول اتخيل لو انتوا بقيتوا ظباط هتعملوا اية وبحمد ربنا ان انتوا مش معاكوا سلطة

Anonymous said...

نوارة , أنت ست العاقلين , و انا نشرت هنا كومنت او اتنين و كنت شاكك بالجيش لكن مع احترامي الشديد اسمحي ليا بالملاحظات دي:

- العيال دي بلطجية 100%

- الصوت يا نوارة متركب , الصوت مش هو صوت الفيديو ودققي كويس , انا مش بدافع عن الجيش بس الفيديو مش مريح ابدا.وبعدين اللي بيتكهرب ما بيعرفش يتكلم نهائيا أثناء الكهربا.

- انا اعتقلت قبل كده يا نوارة و الأصوات دي بالضبط اصواب بتوع أمن الدولة, نفس الأسلوب ونفس الطريقة .. انما الجيش مستحيل يكون بنفس الأخلاق دي وانت اكتر واحدة عارفة, صحيح هما ممكن يكونوا قلوا ادبهم في التحرير من يومين , بس مش للمستوى ده.

وانا ما زلت عند رأيي , مش لازم نثق في الجيش , المفروض نكمل المشوار وما نقفش .. الجيش مش الجيش احنا نكمل و اللي ضدنا هيبان في الميدان , و الله أعلى وأعلم.

Omar said...

مارأيكم لو قاطع الشعب كله الاءستفتاء على التعديلات الدستوريه الجديده حتى يتم الاستجابه الكامله للشعب صاحب القرار والشرعيه والأمر والنهى فى تغيير الدستور كاملا ومغادرة شفيق لمجلس الوزراء فالحال محلك سر منذ رحيل حسنى وليس هناك انجازات ولو حتى وهميه لمطالبنا

مدونة النسر المصرى said...

شاركينا حملة كلنا ضد المجرم محمد ابراهيم قاتل ابناء الاسكندرية
المذكور مدير امن الاسكندرية برتبة قاتل مع مرتبة القرف

Early bird said...

الفديوهات كترت اليوميين دول وكلها بتصور انتهاكات خطيره والناس فيها واقفه تتصور يعنى فديو على المشاع

زى يتاع مدير امن دمنهور ده كان غريب قوىالناس بتوع الشرطه دى واضح انها عايشه فى الغيبوبه
بس الفديو بتاع الجيش ده شكل اللى فيه بلطجيه والفديو مالوش اول ولا اخر ومافيهوش الا شتيمه مقرفه

المهم هل فعلا فيه ايد خفيه عايزنا نتقلب على الجيش والجيش يجد المبرر للانقلاب علينا والا احنا اللى اعصابنا بايظه علشان البطء فى محاسبه المسؤوليين الكبار ووجود حكومه تهريب الاموال وحرق الاوراق بتاعه احمد شفيق


البوست اللى فيه المعتصم اللى انضرب كان فيه ناس بتقوله قول عاش مبارك

مبارك اصلا ايه اللى جاب سيرته دلوقت هو مش كان ماضى وراح ننساه ونرتاح والا ده برضه لزياده البلبله

احنا بنقول سلميه ومش عارفه انتى مستنيه ايه من الجيش بعد ما شافوا الناس بتندبح يوم الأربعاء 2 فبراير ويقولك انا على الحياد

زى ما انتى قولتى بالضبط دى ثوره شعب والمفروض الشعب ما يضايقش الحكم الدولى اللى جايبه يحكم المباراه وعلى فكره دى مش تريقه بعد حكم 30 سنه تحت المخسوف مبارك التركيبه النفسيه للمؤسسات ومنها الجيش بقت غريبه وده مش تشكيك دى ملاحظه ممكن تكون غلط وممكن تكون صح
زى بالضبط الداخليه وضباطها متصوريين انهم كانوا موجوديين لفض اى اعتصام مش علشان يامنوا الناس لما فشلوا فى مهمتهم انسحبوا من البلد كلها حتى المطارات والمرور

متضغطيش على الجيش ده اصلا كلامك انتى

وفيه يافطه حلوه فى الفديو هى لا تدع راسك تملائها الشائعات
التركيز دلوقتى يبقى على حكومه اللزقه اللى اسمه شفيق والحمد لله الغنوشى فى تونس طار ودى بشره خير

Ahmad said...

الحذر ثم الحذر
الثورة ستموت خلال أيام إن لم تنتفض وتعيد عنفوانها
العدو ينتصر بضعف الطرف الآخر وتشرذمه بين أهواء وتيارات وولاءات متنافرة غربا وشرقا

Lawyer 2012 said...

يانوارة شباب الإئتلاف رفضوا مقابلة الجيش رداً على ما حدث ...
ماتخافيش أحنا شباب جامدة أوي


عبد الزهراء المصري

علان العلانى said...

متابعات

الثورات الشعبية مزيج من العفوية والتنظيم، فالعفوية تعصمها من الاستئصال، والتنظيم يعينها على حسن التسديد. وتحتاج كل ثورة إلى قيادة، لكن القيادة في عصر الإنترنت قيادة انسيابية، وليست هرمية، وهذا ما يجعل استهدافها عسيرا، واستئصالها مستحيلا.. تطارد النظام المستبد فتدركه، ويطاردها فتفوته، كما قال سلمة بن الأكوع رضي الله عنه للمشركين: "والذي كرَّم وجه محمد لا يطلبني رجل منكم فيدركني ولا أطلبه فيفوتني". فهذا النوع من القيادة الانسيابية تجعل للمجتمع اليد العليا ضد السلطة التي اعتادت الهرمية القيادية.

كما تحتاج الثورة الشعبية إلى خطاب، ولا بد أن يكون خطابها هذا بسيطا، سهل الاستيعاب، وأن يكون جامعا لا مفرقا. فالثوار تجمعهم المبادئ وتفرقهم البرامج، ومن أهم شروط نجاح الثورات أن يركز الثوار على المبادئ الجامعة، ويتجنبوا الخوض في البرامج التفصيلية أثناء الثورة. فالشيطان يكمن في التفاصيل كما يقال، والاختلاف وقت مقارعة الاستبداد مُهلك للثورات.

ويحسن التأكيد هنا على أن أخطر ما في الثورات ليس البدايات، وإنما النهايات. ففي عام 1948 حاول أحرار اليمن الثورة على حكم الإمام المتحجر، وفشلت الثورة. فانقلب إمام اليمن على الثوار الأحرار تقتيلا وتنكيلا. وكتب شاعر اليمن عبد الله البردوني تعليقاً شعرياً يأخذ فيه على الأحرار اليمنيين ضعف الإرادة وسوء التخطيط، جاء فيه:

والأباة الذين بالأمس ثاروا *** أيقظوا حولنا الذئاب وناموا
حين قلنا قاموا بثورة شعب *** قعدوا قبل أن يُروا كيف قاموا
ربما أحسنوا البدايات لكن *** هل يحسُّون كيف ساء الختامُ

فمع ميلاد كل ثورة تولد ثورة مضادة، تحاول وأدها في مهدها، أو تحريفَها عن مسارها، أو السطو على ثمراتها. ويعتقد عالم الاجتماع تشارلز ميلز أن وجود الثورة المضادة هو أبلغ دليل على أن الثورة تحمل رسالة تغيير جدية.

وأحيانا تنجح الثورة في معركة الهدم، فتهدُّ النظام القائم هدًّا، لكنها تفشل في معركة البناء، ويقطف ثمارها آخرون من فلول النظام القديم، أو من المتسللين تحت غبار المعركة. وأسوأ ما يصيب الثورات أن يصادر ثمارها متسلقون في جنح الظلام، فيحيلونها نسخة منقحة من النظام الاستبدادي القديم، أو أن يتحول بعض مَن أشعلوا الثورة إلى وقود للثورة المضادة، جرَّاء أنانية سياسية مزمنة، أو لمجرد سوء التفكير والتقدير.

إن غاية الثورات الشعبية ليست استبدال حكام بآخرين، بل حكم الشعب نفسَه بنفسه، وبناء فضاء مفتوح يملك آليات التصحيح الذاتي سلميا، ويقسِّم الحرية والعدلَ بعدلٍ. فالحذرَ الحذرَ من التنافس على مغانم الثورة، أو رفع المطالب الجزئية في لحظات الحسم الكلية. فغاية الثورة تحرير الشعوب لا حكمها


http://www.aljazeera.net/NR/exeres/2A6C22EA-9A95-4E87-A3FC-DD2E76D7D0BE.htm?GoogleStatID=2

Unknown said...

يافندم
انا حاسس ان في اتجاه للتهييج عالجيش
وتهييج ضد ائتلاف شباب الثورة
وضد الأخوان

أملي متكونيش من المساهمين في الاتجاهات دية
احنا لينا مطالبنا ومالناش عداوة مع حد
لينا أملنا في بكرة
ونركز علي مطالبنا ونكسب حلفاء جدد كل يوم(وياريت يكون المجلس الأعلي
).

ارجوكى شيلى الفيديو ده

Talal Hefnawy said...

يا نوارة ديه ثقافة بلد خلاص.. احنا هنعمل جيل تاني جديد إن شاء الله.. العوض على ربنا في الجيل الموجود دلوقتي.. فكري مثلاً.. لما حرامي فراخ بيتمسك.. واللا نشال في أتوبيس واللا واحد لمس ست غلبانة في أتوبيس زحمة.. لما بيتمسك بيعملو فيهم إيه؟ احنا ثقافتنا بقيت كدة.. إتربينا على العنف. اتربينا لو إتأخرنا عن الواجب ننضرب في المدرسة و نتمد لو المدرس شايف كدة. لسة بدري قوي يا نوارة اننا نبقى أحلامنا في دولة متحضرة.. متبصيش لفوق قوي ...

Unknown said...

ياجماعة انا فية حركة مش فاهمها معنى اية انى يجى فيلم امبارح عن الجيش وقتة والنهاردة على ميلودى افلام فيلم تانى فية جيش يورينا البسالة بتاعتة؟ والصبح كانوا مشغلين زى برنامج او وثائقى عن الجيش وتدريباتة واللى بينزل من العمارة ومن الهليكوبتر واللى بيضرب من العربية وهى ماشية؟؟

فية اية؟ انا مش مستريح مش عارف لية!!

Lawyer 2012 said...

للعلم يانوارة لأبد أن نتعامل مع الجيش أننا الطرف الأقوى وليس العكس ...
نحن الثوار ولنا حقوق سننفذها شاء الجيش أما أببى ...

عبد الزهراء المصري

أحمد عتمان - Ahmed Etman said...

ايه الحيرة دي؟
بصراحة من اول يوم التنحي و انا مش مرتاح ابدا للمجلس الاعلى للقوات المسلحة ده بس بصراحة كنت شايفهم بيتصرفوا حلو قوي، قلت طيب خير، ربنا يهديهم، انما انا اللي اعرفه ان دول رجالة مبارك، و زي كل نظام البلد تعيين القيادات بيكون على اساس الولاء مش الكفاءة
و ليا اصحاب كتير في الجيش اسمع منهم من زمان حاجات كتير عن كم الفساد و الظلم اللي في الجيش، و انه فيه ضباط على قدر عالى من الظلم و القسوة و الفساد، بس اعرف برضه انه فيه كتير قوي محترمين، يمكن الاغلبية كويسة، انما الفساد و الاجرام موجود بشكل كبير برضه
دلوقتي اكيد كلنا شامين ريحة حاجة مش تمام، عايزين نعرف ايه بالضبط اللي بيحصل جوة الجيش؟
الحاجة الوحيدة الاكيدة دلوقتي ان الثقة راحت، و انها اصلا مكنش المفروض تبقى للدرجة دي، لازم مانسمحش لنفسنا ندخل في مواجهة مع الجيش بس في نفس الوقت مش لازم نسلمه رقبتنا قوي كده، و لا نديله الثقة المطلقة دي، لان واضح ان فيه حاجات بتحصل من ورا الشعب كتير و احنا مابقيناش فاهمين فيه ايه
زي ما قال ابراهيم عيسى مع عمرو الليثي، مفيش شفافية، و احنا اتعلمنا من 59 سنة خبرة ان مفيش شفافية = فيه حاجة غلط بتحصل
بس مش عارف الحقيقة المفروض نعمل ايه؟؟؟؟؟

ماجد العياطي said...

انا مستغرب من التصوير وهو ازاي يهرب التصوير ده بره

يعني هو المقصود انه يبقى بره

يعني هم بيهددوا الناس علشان ما يتجمعوش

لكن الناس برضوا هتتجمع وهتقول رايها بصراحه

ده تخويف غير مباشر من الجيش

ولا هم ناويين يتجننوا في دماغهم زي بتاع ليبيا

FAW said...

بضم صوتي لصوت المدون شارم

أنا إشتغلت 4 سنين في بورسعيد و عارف يعني إيه سكان زرزارة ولسه علي إتصال بناس في بورسعيد

الناس دي رغم إن الكليب مفيهوش أي حاجه أصلا . . تستاهل إعداااااااااااااااااام

Unknown said...

ارجوكى يا استاذة نوارة تشيلى الفيديو دة علشان الوضع مع الجيش اليومين دول مش ناقص شحن و كمان العيال دول واضح مش شكلهم انهم بلطجية و يا ستى اعتبريهم بلطجية الحزب الوطنى اللى قتلوا منا ناس فى يوم الجمل مش كنتى هتعملى فيهم اكتر من كدة
و ماكنشى مصريتهم هتشفعلهم

DIY CNC said...

دى الطريق الى بيتعامل بيه الجيش شئتم ام ام ابيتم اخبطو رسكو فى الحيط انا عندى الف تفسير منطقى للفيديو ميخليش المجلس العسكرى يعتزر تانى انتو بتسهبلو ولا ايه احنا فى حالة حرب ولناس دول مرتزقة من كفر قريش


اخت الحبيبة نوارة اسمعى الكلام ولمى الكبار مع بعض فى مكان واحد يمكن تنفع المرادى انتو بلنسبة للمجلس العسكرى حبة كلاب بتهو هو وحيلموكو فى دور نوفمبر لاكن الكبار حاجة تنية

Om Kiki said...

لو دول شوية صيع يتحاكموا ... اللي بيحصل ده لو حصل على حيوانات مفترسة في بلد حرة كان اللي عمله هيتحاسب ... ده غلط. ومن الواضح إنه مقصود يتصور بسبب صلاح باشا اللي أمر بالتصوير ... سواء جيش أو شرطة اللي عمل كده وسواء هم بلطجية او مجرمين .. مش المفروض ده يحصل .. التعذيب مش مقبول . المحاكمة العادلة هي الحل. المجرمين دول نتيجة نظام مبارك .. ولازم يتحاسبوا بالقانون.

Unknown said...

يا ريت نهدي دول بلطجيه و حراميه و يستاهلو اكتر من كده .. خلينا واقعين

علان العلانى said...

متابعات

خباز الثورة الفصيح

http://www.youtube.com/watch?v=N8VDeyr7aVs&feature=player_embedded

Unknown said...

يا جماعه اهدوا شوية ..ارجوكم ..احنا دلوقت بنتكلم علي مستقبل بلد ..ومستقبل الثورة ..وفيه مسائل كقيرة علي المحك ..وامور كقيرة جدا التسرع فيها ممكن يغير اتجاه الشارع والناس ويصعب السيطرة عليهم ..
فالمطلوب اننا نهدأ ونفكر شوية ..
انا من اشد المعارضين لاعجاب نوارة الدائم للجيش واسلوب الطبطبة الذي تتبعه من الجيش ..بس يمكن هي طلعت بتفهم اكتر مني في الموضوع ده وان لابد من حد يهدي شوية ولو بدون حق ..
افهموا طبيعه الجيش ..العقيدة الخاصة به قتالية ..والاسلوب الاداري هو السيطرة ..واللي دخل الجيش يعرف ان الامر امر ونفذ واتظلم ..ومخالفة الامر في الميدان يستدعي الاعدام فورا .. الخشونة في الجيش مطلوبة وعمر الجيش ما بيحاسب علي استخدام الخشونة الزائدة وبسمسها رجولة ..وكان حتة صف ضابط بيطلع ميتين ابونا وينيمنا في الحمامات طول الليل ..
فممكن الاوامر تكون اتفهمت غلط ..واتنفذت غلط ..معلهش .. ده مش معناه اننا نتسامح او نسيب او نطبطب زي ما نوارة بتعمل ..لكن نزعق ونشخط ونطلب حقنا ..بس زي ما اي واحد بيعمل مع ابنه او بنته ..صوتك عالي لكن قلبك ما فيهوش غضب ومفيش بينك وبينه الا الحب ..ده رأيي
الموضوع التاني ان الضباط مصرين ان كان فيه مؤامرة تانية بتحصل .. ما اعرفش ده صح ولا لا .. بس ده خللي اعصابهم مشدودة وبقالهم مدة في الشارع واحنا ما بنرحمهمش بصراحة ..فكمان دي نقطة ليهم ..برضه تسأل ايه الموضوع ؟؟ مين اللي صور الفيديوهات دي ؟؟شكله مستريح وواقف براحته وبيصور بعلم الناس ..مين ده وسمحوله بالتصوير ليه لما هما بيعملوا حاجة غلط ؟؟ مش عارف وما عنديش تفسير بس حاسس ان ممكن حد قاصد يحرج الجيش وماتنسوش فيه امن دولة بيلعب في سكات من تحت لتحت ..
عاوز اقول حاجة وقولولي رأيكم
احنا نقفل الموضوع ده علي كده .. وناخد منه درس في الخلفية كده ..ورصيد الجيش نقص شوية بس لسه عالي ..لكن احنا كمان بقي لينا عنده رصيد ..ولازم نوصل له كده ..ونترجم العين الحمرا في اصرارنا علي اطلاق جميع اللي اتمسكوا اليوم ده ..
نفضل علي حذر في التعامل كثورة ..
فيه حاجة مهمة جدا كنا بنعملها في الايام الاولي ..انا شايف انها كانت جايبة نتيجة كويسة جدا ..
العلاقة مع الجيش المباشرة كشعب بقي ..
ننزل لهم ونديهم الورد زي زمان ..البنات ممكن ترتب نفسها وتاخد معاها ست الحبايب وعاملين اكلة بيتي معتبرة وينزلوا الستات الكبار يوزعوها علي الجيش ..الضباط حيحسوا بالحرج من الرفض مع الستات الكبار حيبقي فيه تعاطف اكتر معاهم لان الموجودين اولادهم ..وتغطية اعلامية ظريفة تفكرهم ان احنا اخواتهم واخواتهم وابناءهم ..نوزع علهم زجاجات المياه المعدنية .. الحاجة الساقعه ..بس بتصرفات تبان وتتوضح انها فردية مش منظمة علشان ما حدش فيهم يفهمها غلط ..
نبني لنا رصيد مع القيادادت الميدانية تنفعنا لو الاوامر جت انها تتفهم دايما في صالحنا ..كمان مش معقولة بقي بلطجية حينزلوا ومعاهم ستات ورجالة كبار يوزعوا اكل وورد علي الجيش ..

Rasha said...

The people and the army are not one hand anymore, the army is betraying us, take care, either they are with us , and do whatever we ask for or they are against us, do not be fooled by their nice take and apology, they are helping the old regime to get control again, to be able to kill our revolution. WAKE UP PEOPLE.

Rasha said...

الجيش باع الشعب

إيمان هلال said...

بصى يا نونو هما عندهم على الفيس صفحه ممكن تبعتى عليها على رابط اسمه الاستغاثات والمناشدات الخاصة بالمصريين فى ليبيا واحنا بعتنا عليها المره اللى فاتت لما ضربوا الناس فى التحرير وقرفناهم وفى الاخر طلعوا لنا بيان ، هنقرفهم المره دى كمان ،
http://www.facebook.com/Egyptian.Armed.Forces#!/Egyptian.Armed.Forces?sk=app_7146470109

utopia said...

بدأت الثورة في سلطنة عمان و الحصيلة شهيدين و حرائق لمراكز للشرطة وتم استخدام الغاز المسيل للدموع لتفريق المتظاهرين

واثقة بربها said...

مافيش حاجه فى الفيديو تبين انه من بورسعيد و محدش سمع عن حاجه حصلت لحد غير البلطجية هما للى بيتمسكوا ..الوضع الامنى فى بورسعيد مش كويس و البلطجية كثير و الجيش بدأ ينزل فى كل مكان عشان يأمن البلد و يحمى المصالح الحكومية و الاحياء لان فى جزء كبير من مبانى المحافظة اتحرق و البلطجية كانت بتهدد الموظفين و بتعمل لهم رعب و فى مصالح وقفت لاكثر من 3 ايام بسبب البلطجة و الجيش كان لازم يخد موقف و حظر التجول من الساعة 10 مساءا..ده غير ان الناس بقت تخاف تمشى فى الشوارع من كثر اشاعات السرقة و الاغتصاب و الخطف ..مش عارفه مصدر الفيديو منين عايزين تاكيد لان كل كلمة بتتقال ليها معنى

إيمان هلال said...

احنا عايزين نطلع بيان بنفس الصيغه ونبعته كلنا ، يعنى علشان يكون اجماع وتكون الصيغة مكتوبة بطريقة كويسة ، انتى او اى حد بيعرف يصيغ البيانات دى ، انا بعت لهم مره بس ممكن ابعت تانى وتالت ورابع

Unknown said...

بلاش احمد سعيد انا اصلا مدخلتش الجيش قبل كده بس الفيديو ده معناه ايه ولا ده واحد لابس لوا هوه كمان
http://islam-nogodbutallah.blogspot.com/2011/02/blog-post_26.html

tahrir said...

يا جماعة احسن طريقة نمنع بيها اللي بيتلككوا بالبلطجية اللي بيبقوا في المظاهرات اننا نغير طريقة الثورة و دي دعوة لبداية اضراب عن الطعام ابتداء من يوم الثلاثاء
و ذلك في ميدان التحرير
للتعجيل بتنفيذ مطالب الثورة
و هي
اسقاط حكومة احمد شفيق
محاكمة رموز النظام المخلوع و على رأسهم جمال مبارك و صفوت الشريف
الغاء العمل بحالة الطوارئ
حل جهاز امن الدولة
و بهذه الطريقة نمنع دخول عناصر تسئ للثورة
ينتهي اي احتكاك مع الجيش
نسرع من طريقة تنفيذ المطالب المشروعة للثورة
http://www.facebook.com/home.php#!/home.php?sk=group_182391845137256&ap=1

Unknown said...

مغلش بقى يا جماعة دا مع اللي حصل في التحرير الجمة بليل معناه إنه هي دي حقيقة الجيش واللي بيعمل كدا من الجيش مش بيعمل كدا من دماغه دي بقى هي الأوامر اللي جايلهم. كدا يبقى طنطاوي دا لااااااااااااازمممممممم يمشيييييييييييييييييي!!!!

fathy said...

1- اللى بيقولوا سيبوا شفيق يعمل و اعطوة فرصة لهم هدفان
الاول : سيبوة يكمل مهمة نهب و خراب مصر..
الثانى : سيبوة لانة يحمى السارقين و يكرم المنافقين..و هم من تلك الفئتين

2- شهد شاهد من اهلها و قال مبارك هو من رقى العمداء و اللواءات و يدينون لة بالولاء و ليس ولاءهم لمصر..

3- لمن يتعجبون من استماتة فئة فى الدفاع عن شفيق و منظومة مبارك ..
ان مبارك اعطى الوظائف العليا مزايا متعددة.. منها مرتب بمئات الالاف من الجنيهات شهريا و الحماية و عدم المساءلة القانونية لاى مخالفات او حتى جنايات ..

4- مجىء وزارة وطنية شريفة تحقق العدالة الاجتماعية و تحرمهم من مزايا مبارك ..سيتخلون عن مناصبهم المتمسكين بها الان باستماتة طوعا و يفضلون العمل الخاص عملا بمبداهم العبقرى و هو طظ فى مصر

أيـمَـن said...

همـا مـش بيعذبوهـم زى مـا بتـوع الشرطـة كانـو بيعملـو فـ الأقسـام . .
ده يـا دوب بـس رابطينهـم و مغمييـن عنيهـم و مـش عايزيـن يمعـو للـى جايبيـن أبوهـم ولا صـوت
مـا فـ داهيـة إنشالله يقتلوهـم حتى !!!!
مـش أحسـن مـا يقطعـو أيديهـم و أرجلهـم مـن خـلاف ؟ ده كـده مدلعينهـم
يـا جماعـة دول ( قتاليـن قتلـة ) زى مـا أ. نـوارة قالـت , بـس هيـه عشـان قلبهـا رهيـف شويـة مـش مستحملـة إن 1 ممكـن يكـون عمـل مصيبـة سـودة فَيعـد ع الأرض بالشكـل ده .

احلام جوليا said...

امين امين امين يا نواره امال لو شفتي بهدلة المصريين في الخارج تقولي ايه تعرفي يا نوارتنا انا نفسي انك تسافري اي دولة عربية لمده سنة واحدة بس تشتغلي في وسط المصريين متخفية مش صحفية اي وظيفة تانية وتشوفي بيعاملوا المصرييين ازاي وازاي الشرطة لو وقع تحت ايدها مصري بيحصل له ايه وبعدين بعدها بقى يا نوارتنا عاوزة اسمع رايك في العروبة والوحدة العربية وايه حكاية صحيح ان العرب والمغاربة شاريين اراضي وعقارات في مصر ده مش استثمار ده بيع الكلام ده لازم يتأمم احنا مش فلسطين يبيعونا حته حته حرام والله ده انت متقدريش تشتري شبر في اي دولة عربية وتعاملي كأجنبية طالما لاتحملي الجنسية للدولة سعودية ا و كويتية او اياكان الدولة

mimi said...

that's more than sad, it's like we'll never be respected and treated as citizens in our own countries :((

Unknown said...

الفيديو متركب صوت على الصورة
الصورة حقيقية لكن الصوت لا

ركزوا وشوفوا بنفسكم

lord2004 said...

استاذه نواره
انا من بورسعيد واحب اقولك مش كل اللى نشوفه نحكم عليه من غير ما نعرف اسبابه
بلاش نقرا القران على ان الايه بتقول لا تقربوا الصلاه
الناس اللى فى الفيديو ده بلطجيه فى بورسعيد ولو حد منكم معانا فى بورسعيد كنتم عملتم فيهم اكثر من كده من كميه البلطجه والرعب اللى عاملينه فى البلد
ف ياريت محدش يحكم من غير ما يعرف خلفية الموضوع ايه تعرفى ان بورسعيد مصنفه تانى محافظة من حيث الانفلات الامنى وانا شايف فيه اكثر من بورسعيدى رد على الفيديو وخاصة اللى قاله الدكتور وتحطيم دور العنايه المركزه بمستشفى الزهور ، ف يا ريت نسأل الناس اللى عايشة فى المكان قبل ما نحكم على حاجة
وشكرا لك
وتحياتى لكل المصريين اللى فى التحرير
ولكل مصرى شريف بيحب بلده