Wednesday 31 December 2008

عاجل للتأثير على الرأي العام العالمي

احنا بنعمل على اليوتيوب فيديوهات عربي ليه؟ احنا محتاجين فيديوهات بالانجليزي وتكون مختصر ومؤثرة وفيها رسالة واضحة
يعني مثلا ده فيديو بيعرض وجهة النظر الاسرائيلية
بصوا كام فكرة عرضوها في دقيقة ونص؟
اولا عملوا توحد ما بين اطفال اوروبا وامريكا وما بين اطفالهم
وبعدين بينوا حماس على انهم ارهابيين
وبعدين جابوا صور (بصراحة تفطس من الضحك، قال ايه السقف مخروم، يا جمالي ياختي)
وبعدين قارنوها بحداشر سبتمبر
بصوا بقى
طيب دي صور ابلغ من اي كلام، صحيح
بس مافيش رسالة، الرسالة ان الاطفال بتموت، بس هم لسة فاكرين ان اسرائيل بتدافع عن نفسها، بس اتكت علينا شوية
لكن احنا لازم نوصل لهم رسالة ان حماس مش ارهابية، لان ده ح يقسم اللوم ما بين اسرائيل وحماس
وبعدين اللي عامل الفيديو ده مش عربي، اسم الله علينا ما بنعرفش انجليزي وللا ايه؟ بصوا الفيديوهات اللي احنا عاملينها
بالذمة ده اسمه كلام؟ ده على ما يخلص رغيه تكون الناس قالت: يارب كل الغزاوية والعرب يموتوا وللا تجيلهم قنبلة نووية تخلصنا من مللهم
طيب ازاي؟
بصوا، حماس مش بتضرب اسرائيل، حماس بتضرب المستوطنات في الاراضي المحتلة (عارفة ان فلسطين كلها بتاعتنا وان اسرائيل كلها احتلال وكيان استيطاني بس معلش خدوهم على قد عقلهم) احنا نكلمهم بقانون الامم المتحدة
يبقى لازم يفهموا ان الصواريخ دي بتنزل على الاراضي المحتلة، ووفقا لقوانين الامم المتحدة ده اسمه كفاح مشروع ضد الاحتلال
وتقدروا تجيبوا المادة دي من موقع الامم المتحدة، بالتحديد: الحقوق المدنية والسياسية
تقدروا تستعينوا بخريطة المستوطنات من الموقع ده
ولازم يفهموا ان الصواريخ دي على المستوطنات هدفها تطفيش المحتلين مش الحاق الضرر بيهم (ماشي انا عارفة انهم ما بيلحقوش الضرر بيهم من خيبتهم مش تكتيك يعني، بس خلينا نعملها بجميلة) ونجيب ادلة على الكلام ده بالصور
صورهم هم على الاقل، اي هبل
وبعدين اطفال غزة بقى، على قفا من يشيل، والدمار والموت، عادي ده منه كتير
زي ماهم بيعتمدوا على تكنيك توحيد المشاعر، يعني كأنهم بيقولوا حطوا نفسكوا مكانا، احنا لازم نعمل كده، ونحاول نقرب، يعني مثلا: جورج واشنطن لما حرق الاسطول الانجليزي في حرب الاستقلال كان ارهابي؟ (انا عارفة انها مش بلدهم ولا بلد الانجليز وانها ما كانتش حرب استقلال ولا نيلة دي حرب على فلوس بس خدوهم على عقلهم) او مثلا: مقاومة فرنسا ضد النازي بما في ذلك ضرب المطارات وخطف الجنود كانت ارهاب؟ ( هم نفسهم كانوا محتلين وكلاب بس خدوهم على قد عقلهم، هم معاتيه اصلا، اللي يأثر فيهم اسرائيل يبقى دول عندهم مخ؟)
بس اهم حاجة
1- تكثيف الرسالة
2- البعد عن الخطابة وترك الكلام للصورة
كمان ما تدخلوش عليهم بصور الدم على طول، هاتوا رجلهم بصورة تخطف العين في اول الفيديو
الاسرائيليين مش انبه مننا عشان يأثروا على الرأي العام العالمي واحنا قاعدين نعمل كده
انا والله لو باعرف اعمل فيديوهات كنت عملتها
انا نازلة الشغل دلوقت، ولما ارجع ادور على مصادر اكتر
شدوا حيلكوا
تحديث:
ما رحتش الشغل وقعدت لكوا
اهو الحقوق المدنية والسياسية بالانجليزي
http://www.hrweb.org/legal/cpr.html
ودي الترجمة بالعربي
http://www.geocities.com/dalbah4/baloch6.htm
بس احنا عايزين نوجه الرسالة بالانجليزي عشان توصل للعالم
ملحوظة:
ماحدش يقول مافيش فايدة هم مش ح يسمعوا
مش صحيح، هم دلوقت عندهم استعداد يسمعوا، بعد ما قتلوا اتنين مليون في افغانستان والعراق ابتدوا يحسوا بالذنب ومتهيالي فرصة كويسة اننا نعبر عن نفسنا وعن احساسنا بالمرارة كأقوى ما يكون
الخطاب المتراجع مالوش مجال لانهم مستعدين يسمعوا، مدام مستعدين يسمعوا يبقى نقول كل اللي في قلبنا بقى
بس التكثيف، والتركيز اهم حاجة، والتأثير، هم مش بيحبوا الرغي، مش زينا يعني
:))

اسمععععع اسسسسسسسمعععععععععع علك تستفيد

ده بخصوص مخطط شتيمة مصر
بس على الله الكلام يعدي من التلوث والرصاص ويدخل المخ في مكانه المناسب، انا على فكرة حاسة بحالة هبل جماعية ارجعها الى تلوث المية والهوا
المفروض كلنا نشرب مية من الفلتر، يعني مش بتبقى زي الفل، بس على الاقل اهي تشيل شوية من الرصاص اللي في المية وتفتح حتة كده في المخ
واحنا محتاجين انبابيب اكسوجين بقى، غير اللي بنات اسطبل عنتر بيحطوه على شعرهم، اكسوجين نضيف نشمه من آن لآخر، انشالله نص ساعة في اليوم عشان ينضف الجوف
واكلة سمك بقى عشان تنور المخ
لان احنا كده فرجنا الناس علينا فعلا على رأي رامي صبري، ده فيه ناس مقتنعة بخطبة حسني مبارك امبارح، اه والله العظيم، وناس زمايلي في الشغل كمان، يعني متعلمين ومتنورين، وفيه ناس معجبة بابو الغيظ اللي كنت فاكرة ان مافيش غير الحاجة بس هي اللي معجبة بيه على اساس انه جلبتها للدنيا يعني

اللهم قوي ايمانك يا حاااااج عبس

هيهيهيهيهييييييييييييييييييييييييييييييي
عثل عثل عثل عثل عثل
يا رب يا طفاطيفو تكون سجلتها
خلينا نضحك بدل الغم اللي الواحد عايش فيه ده

الظاهر الدولة الكبر كان معاها حق في موضوع القمة ده

طبعا الدولة الكبرى اللي كانت رافضة القمة هي مصر، ومعلش مش ليبيا زي ما بعض المعلقين قال، لان مع كامل احترامي للكتاب الاخضر والاخ العقيد، حماس قالت دولة عربية كبرى، وهاذوها المواصفات لا تنطبق على ليبيا
المهم
اجتمعوا، ويمكن عشان كده قبضوا على هذا الكم الهائل من المعتقلين النهاردة الصبح، وخلاص
وابوري رايح
وابوري جاي
وخلصنا، والظاهر الدولة الكبرى كانت مش عايزة وجع دماغ بقى وتنزل الناس في فنادق وتجيب لهم حراسة وتفطرهم وتغديهم على حسابها وعربيات بقى تطلع وتشريفات وزحمة وهي عارفة اخرتها ايه، وكمان هم اصلا مشغولين بيقبضوا على الناس مش طالبة بقى حبايب اخواتهم لما يتمهمزوا وييجوا يتدلعوا عشان يطلعوا بيان
قال لك ح يطلعوا بيان
!!!!!!!!!
طب ما كان واحد فيهم يكتب البيان ويبعتوه لبعض بالميل وكل واحد يبعت مسج على الموبايل: موافق/غير موافق
وخلاص
او يعملوا مدونة للجامعة العربية، وكل زعيم ووزير خارجية في اي دولة عربية يبقى ادمن، تبقى مدونة مشتركة يعني، او يشتركوا مع بعض في مجموعة على الفيس بوك، ولا الطيران والمرواح والمجي والمشورة هم يعني مش جايين فيينا، دول جايين القاهرة، مش فسحة يعني، او يعملوا مقر الجامعة العربية في نيويورك
او تل ابيب
الا الراجل بتاع قطر ده مجنون؟ راجع من منتجع اسرائيلي يتكلم عن العدوان الاسرائيلي وحسين عبد الغني مصنفه من الصقور، واحنا الحمائم
طب ازاي الاخ صقر قريش اكتر واحد بيتعامل مع اسرائيل واكتر واحد بيطلع بيانات شجب ضدها بلهجة شديدة العنف؟ ماحدش يقول لي مؤامرة ومخطط، معلش المؤامرة دي بتبقى في السر، لكن الراجل عيني عينك بيتعاون مع اسرائيل وعيني عينك واقف في الجامعة العربية في صف الصقور! هو احنا عندنا صقور؟ شالله اطفحهم عمري في حياتي ما شفتهم
اما بخصوص الحمائم اللي هنا، فاذا كانوا يقصدوا الحمامات يعني، فنقدر نقول لهم ان الشعب المصري ما عندوش ثقافة دخول الحمامات زي ما السيد المحافظ قال، اذا كانوا يقصدوا ان حمائم جمع، اعزكم الله، حمامة، فارجو من التلفزيون المصري عرض مشهد هام جدا من فيلم بطولة سيدة الشاشة العربية فاتن لا مؤاخذة حمامة الا وهو فيلم الخيط الرفيع، وهي بتقطع هدوم محمود يس وبتقول: ابن الككككككككككلللللللللللللللللللللببببببببببببببببببببببببب
وبمناسبة ابن الكلب
ههههههههههههه احنا ح نضحك ضووووووووووحك على الناس اللي كانت فرحانة باوباما، الراجل على فكرة يا قلب امه ح يتشنبر ويتخوزق لحد ما الخازوق يطلع من سقف راسه ويخبط في سقف الاودة

القبض على مالك مصطفى وآخرين

نورا يونس دلوقت في رفح، وكلمتها عشان اتأكد قالت لي انا وصلت لي رسالة مش متأكدة، وبعدين كلمت خالد علي وقال لي ان مالك مصطفى اتقبض عليه مع ناس تانية من الساعة اتناشر الضهر
رضوان آدم صحفى بالدستور
، مالك مصطفى مدير موقع هشام مبارك للقانون،
خالد عبد الحميد مدير موقع دعم ،
أحمد محمود،
مؤمن محمد،
، حسين طارق،
هدير المهداوي صحفية بالبديل،
حماده الكاشف صحفي بالبديل ،
أحمد محمد،
ايمان عوف صحفية،
سلمى سعيد،
طلعت فهمي مهندسين ضد الحراسة،
عمرو يوسف
عيداروس القصير
، خالد العوا،
محمود جبر المحامي بمؤسسة أولاد الأرض
، عصام شعبان مركز آفاق اشتراكية
طارق العوضي المحامي المرشح لانتخابات نقابة المحامين،
محمد عبد العزيز .
باسم فياض(لبنانى الجنسية)
خالد حسام سعد الدين(بريطانى)
منال خالد
رشا عز ب (صحفية بجريدة الفجر)
سيد الحرانى (صحفى بجريدة الفجر)
محمد رخا (طبيب)
عبد الرحمن مبارك
الفت عثمان
بليغ حمدى
سامى سلام
خميس حبشى
عبد الله السيد حامد
أحمد عبد الرؤوف حزين
عبد الله محمد أبو الحسن
محمد عبد العال
ياسر إبراهيم ليلى سليمان
هبة غريب

عاجل: الامن يحاصر طلاب معهد السينما

اتصل بيا دلوقت احمد فوزي من معهد السينما وبيقول لي ان طلاب المعهد قرروا يعملوا لجنة تضامن مع غزة متزامنة مع امتحانات نص السنة فكانت النتيجة ان الامن حاصرهم وبعد ما خلصوا الامتحان طلبوا من الدكاترة انهم يمشوهم والدكاترة فعلا طردوهم من المعهد
طبعا معهد السينما ما سبقلوش وعمل فاعليات زي دي، احمد بيقول لي انهم عملوا لجنة تضامن مع غزة ومع الناس اللي اتقبض عليهم من وسط البلد النهاردة ومنهم سلمى سعيد وسلمى شكر الله وخالد عبد الله وباسم...مش عارفة اسمه باسم ايه
احمد بيقول انه عايز اللي لهم خبرات في حملات التضامن يتصلوا بيه لان طلاب المعهد ما سبقلهمش وعملوا حاجة زي دي وهم نفسهم يشاركوا في التضامن
للاتصال:
01221591379
هم عاملين حظر على التضامن ليه؟ هم مش كانوا سامحين بيه؟ ده حتى محمد فؤاد لغى حفلة راس السنة! والتلفزيون المصري اجل اطلاق قناة كوميديا، عايزين ايه اكتر من كده بقى؟ يقطعوا نفسهم يعني؟

Tuesday 30 December 2008

فين التمثيل المشرف

مواطن مصري بيقول لي ان فيه مخطط لحشد الراي العام العربي ضد مصر! مش عارفة ده عشان مصر لا سمح الله عملت ايه يا مواطن؟ دي حتى كويسة ورخيصة وبنت ناس وبتسمع الكلام، هو عموما في مخطط لحشد الرأي العام ضد مصر، بس ياريت تشوفوا الخطاب ده عشان تعرفه مين اللي بينفذ المخطط (مع مراجعة تصريحات ابو الغيظ)


قعدنا نتريق على كلمة يكفينا التمثيل المشرف لحد ما ربنا غوره من وشنا
ادي اخرة البطر
يعني سياسة الحكومة المصرية ايام عمرو موسى ما كانتش تفرق كتير على فكرة، ما كناش بنبعت النشامى الاشاوس يحرروا فلسطين، بس الراجل كان بيعرف يقول كلمتين يبلوا الريق
ده غير ان كان فيه منطق، منطق معوج، شيطاني، اي هبل، بس فيه تسلسل منطقي للكلام في الخطب اللي بتتكتب للسادة المسئولين
انما ما ينفعش يبقى عندنا وزير خارجية يتسبب في ان سفارتنا تنضرب في كل حتة مش عشان السياسة بس عشان فتح بقه واتكلم، حد يسكته، ده حتى صحابي الخواجات بيبعتوا لي ميلات يتريقوا عليه، هو اللي جاب لنا كل الشتيمة دي من كلامه بس، وبعدين بيتعصب ويزعق، بيزعق ليه؟ فيه دبلوماسي في الدنيا يزعق؟ 
ثم مين اللي كتب خطبة الريس النهاردة؟ ممتاز القط؟ اكيد ممتاز القط طبعا
قال بيقول لك: لن نلعب دورا في تعميق الانقسام الفلسطيني وعشان كده مش ح نفتح المعبر
!!!!!!!!!!!!!!!!!!!!
حد يحاول يقسم لي الجملة دي بطريقة ما بحيث تعمل اي منطق في الموضوع، حد يفهمني معناتو ايه الحديت دهون
انا دلوقت مش باتكلم على المواقف الفعلية على الارض
انا باتكلم عن التمثيل المشرف: ان حد يقول كلام له راس ورجلين، انهم يجيبوا حد حلنجي يعرف يضحك على الناس بكلمتين او على الاقل ما يتعصبش كل ماحد يسأله سؤال
يعني ماهي المواقف مش ح تتغير، طيب طيب، بس احنا بندفع ضرايب كتير قوي للحكومة، مش عارفين يجيبوا واحد بمرتب اكبر شوية يعرف يتكلم نيابة عن الحكومة المصرية احسن من كده؟ مش عارفين يعملوا مسابقة مواهب في كتابة الخطب بحيث يجيبوا حد عنده الحد الادنى من التسلسل المنطقي في كلامه؟ ماكل حاجة في الدنيا ينفع تتبرر على فكرة، حتى ابليس عنده منطق
انما ايه الخيابة دي؟
مش عارفين يتكلموا ليه؟

عاجل: القبض على خمسين من الاخوان من دار الحكمة

اتصلت بيا دلوقت ندى القصاص وبتقول لي ان كان فيه مؤتمر النهاردة في دار الحكمة والامن منعه وقبض على خمسين من شباب الاخوان وبتقول لي انها عرفت انه الامن قرر يوقف اي حاجة بخصوص غزة! ده بعد خطاب الرئيس اللي قال فيه: سيزول الاحتلال ولكن قضية فلسطين لن تزول
طب ليه؟

Monday 29 December 2008

تعليق سريع على خطاب السيد حسن

النهاردة كان يوم طويل وانا داخلة انام عشان بكرة ان شاء الله يوم طويل برضه
بس تعليق سريع على خطاب السيد حسن اللي شفته عند طنط شاهندة:
الراجل ده ح يقضي عمره كله يقول للناس: واحد زائد واحد يساوي اتنين، والله العظيم، طب والختمة الشريفة ان واحد زائد واحد يساوي اتنين، طب وربنا كمان مرة ان واحد زائد واحد يساوي اتنين وحماس دي لو كانت شيوعية وبتقاوم كانوا ضربوها ولو كانت مسيحية بتقاوم كانوا ضربوها ومش مشكلتهم انهم مسلمين، ولا انهم امارة اسلامية، ولو الامارة الاسلامية دي من بكرة قررت تطبع مع اسرائيل بشروطها كانت بقت حلوة، والله، والعشرة دول، والنعمة الشريفة على عيني وللا اطفحها، طب عهد مين ده؟ وعهد الله وعهد الله وعهد الله انهم مشكلتهم مع المقاومة مش مع الامارة الاسلامية
طب وبعدين؟ انا لو مكانه وافضل افهم الناس بديهيات ويقاوحوني فيها ويقطعوا قلبي بالطريقة دي انا ازهق قوي
ربنا يقويه ويطول باله اكتر واكتر

Have the decency at least to be sorry


ولسة فيه ناس طالع لها دمل في.....عينها وحتى مش عارفين يقولوا احنا اسفين، احنا مالناش دعوة بالحكومة المصرية، احنا اي هباب على دماغنا
افتكرت فيلم امريكاني قديم لما اب دخل على بنته لقاها في وضع مخل بالاداب في بيته والبت بجحت قام الراجل قال لها
Have the decency at least to be sorry
احنا اتجننا وللا ايه؟ ماحدش طالب مننا غير الحد الادنى
ماحدش طالب من الحكومة المصرية غير انها تضحك علينا بكلمتين عشان ماء وجهنا
وماحدش طالب من الشعب المصري غير انه يقول: احنا متبرئين من تصرفات الحكومة المصرية ونعمل ايه بقى؟ بختنا كده، وشنا منكوا في التراب والله
بس
بس
انما نعمل زي رامسفيلد ونقول
people die?
طب وليه اللي بيشتمونا ما بيحرروش فلسطين؟
هو حد طلب من مصر انها تحرر فلسطين؟ بس على الاقل نعتذر ان اعلان الحرب ابتدا من عندنا، الحكومة لازم تعتذر او تبرر اي كلام من تبريراتها الهابلة اللي ما تدخلش على عيل، بس على الاقل يحسسونا انهم عاملين لنا سعر واعتبار، والشعب لازم يعمل دقة النقص اللي دايما يعملها مع الحكومة: احنا مالناش دعوة والله احنا مغلوبين على امرنا، احنا؟ ده احنا كان علينا نقطع لكوا اسرائيل حتت... بس نعمل ايه بقى العين بصيرة والايد قصيرة (قال يعني اللي مش قادر على حكومته ح يعرف يقطع اسرائيل حتت) ماشي ماشي شغال، ماحدش طالب مننا اكتر من كده
ده ناقص واحد يطلع لي ويقول لي الفلسطينيين باعوا ارضهم
عيييييييييييييييييييييييييييييييييب
عيييييييييييييييييييييييييييييييييييييييييييييييييييييييييييب
عيييييييييييييييييييييييييييييييييييييييييييييييييييييييييييييييييييييييييييييييييييييييييييييييييييب
ثم ايه الرعب اللي بعض الناس فيه ده؟
يامي يامي يامي....ليضربوا مصر...ح يدخلوا العريش...عايزين ياخدوا سينا
مين اللي ياخد سينا ومين اللي يضرب مصر؟
طب الحكومة بتقول البقين دول عشان تبرر قفل المعبر، كلمتين بتقولهم، مالكوا؟ ايه الارتعاد ده؟ فين ام الصعايدة في ام البلد دي؟
دلوقت حالا مات 3 اطفال في قصف اسرائيلي
زمان ايام التتار، كان كل ما التتار يدخلوا مدينة ويدبحوا اللي فيها المدينة اللي جنبها تخاف والناس تدخل في بيوتها بدل ما يبعتوا لهم مدد، يقوم التتار يخلصوا على المدينة بمنتهى السهولة وينتقلوا على المدينة اللي اهاليها مستخبيين في البيوت ويموتوهم بالظبط زي ما موتوا اللي قبليهم
انما مبدأ عيش ندل تموت مستور ده الحقيقة يعني عااااااااااااااااار عاااااااااااااااااااااااااااااار عااااااااااااااااااااااااااااااااااار
طب خلينا طب في مبدأ: لاقيني ولا تغديني
اضحكوا على نفسكوا وعلى الناس بكلمتين حلوين طيب
انا قايمة
انا اصلا كنت مقررة ابطل تدوين، انا ايه اللي رجعني تاني؟

Sunday 28 December 2008

هم مش قالوا ان حماس هي اللي مانعة عبور الفلسطينيين

التحديث الاوسخين:

السلطات المصرية منعت الطائرات الليبية من الهبوط في مطار العريش لامداد غزة بالاغاثة والقافلة الليبية ح تحاول تروح من البحر ومنعت الطائرات اللي هبطت في العريش من انها تدخل غزة او تعدي من الحدود
هنيبعل القذافي بيقول ان مصر قبل كده منعت قافلة ليبية عشان اسرائيل ما كانتش موافقة
الكلام ده صحيح؟ هنيبعل ده ...ايه ده حد يبقى اسمه هنيبعل؟... هنيبعل ده بيقول كلام صحيح؟ حد يكلمنا بقى
حد يكلمنا غير ابو الغيظ، هي حصلت هنيبعل يتف علينا كمان؟
حد يكلمنا في ام البلد دي.......... احنا بيتعمل فينا كده ليه؟ فيه حاجة؟
فيه ايه؟
هو فيه حاجة؟ هو فيه ايه؟ انا مش فاهمة حاجة
هي ليه مصر محاصرة غزة؟ وليه ابو الغيظ بيتكلم كده؟ وليه بيعمل كده؟ وليه فاضحينا كده؟ واحنا ليه مش بنتصرف احسن من كده؟ وليه ردود افعالنا بطيئة كده؟ وليه من كتر احساسنا بالذنب بدل ما نعتذر بنقل ادبنا زي الامريكان بالظبط، انتوا مش فاهمين، الامريكان عندهم فلوس، عندهم فلوووووووووووس، مضطرين يعني يوسخوا عشان يكسبوا، احنا بنوسخ محبة لوجه الله والوطن صح؟ وللا اللي بيقول كده بيكسب وللا ايه؟ انا ما بقتش فاهمة حاجة
هو فيه حاجة وللا حاجة؟ وماحدش يعمل زي ليلى صاحبتي السورية ويقول لي مصر العشة ومصر القصر
هي العشة دي لو فيها اموات كانوا قاموا



حد عنده تأكيدات للخبر الآتي: الدولة العربية اللي رفضت القمة العربية هي مصر
واحدة صاحبتي كلمتني دلوقت وقالت لي كده وقالت ان الخبر ده من الصبح، وانا قاعدة قدام التلفزيون اهو
حد يعرف الخبر ده صحيح وللا مش صحيح؟
ان شاء الله يطلع مش صحيح....صح؟
حد عنده ام كرامة في ام البلد دي؟ حد يعرف ام قيمة ام البلد اللي كانت في يوم من الايام ليها قيمة؟ حد يعرف يسكت ويبطل يقول ما قطر والسعودية والاردن والكلام المقرف ده؟ مع احترامي لكل الناس يعني
احنا بيتعمل فينا كده ليه؟
مصر هي اللي كانت رافضة القمة؟ حد يرد عليا
---


تحديث:
جالي خبر دلوقت ان فيه انباء عن اصابة جلعاد شاليط اثناء القصف الاسرائيلي
هههههههههههه
اغبيا
ملحوقة تانية:
اللي عايز يوسخ يروح يوسخ في حتة تانية انا مش ح انشر تعليقات وسخة تاني خلاص، انا لا مؤمنة بالديمقرطية
ولا مؤمنة بالحوار
ولا مؤمنة بالاختلاف
ولا مؤمنة باني افتح ودني وعينيا لماسورة مجاري لناس الله اعلم مين اللي وراهم
وعلى فكرة مؤمنة بالتخوين ونظرية المؤامرة
فيه حاجة تاني؟
ياللا من هنا ح نرش مية
اظن المدونات المفتوحة كنيف نجس معروفة كويس لكل الناس، اللي عايز يعمل زي الناس يروح عندهم ويهيص، ويستلف منهم فوطة صفرا كمان عشان يلمع ازاز العربيات في الاشارات وياخد اللي فيه النصيب وربنا يكرمه كده وينباساط
انا مش حاطة على الجنب المدونة لا ترحب بايتام الديمقراطية الامريكية؟
مش قايلة انا كده؟ وللا هي غلاسة؟
-------------
فلسطينيين متراكمين على الحدود والامن المصري منعهم واتقتل ظابط مصري وواحد فلسطيني! هو مش ابو الغيظ قال ان حماس هي اللي مانعة الفلسطينيين من عبور المعبر؟ مين اللي ادا اوامر للامن المصري انه يمنع الفلسطينيين من العبور لدرجة انه يموت مصري وفلسطيني؟ يعني وصلت ازاي لكده يعني؟ هم مش قالوا انهم فاتحين المعبر للمصابين خلاص؟ ولو حماس مانعاهم امال حاطاهم على الحدود ليه؟ وهم لو بينضربوا وبيهربوا عندنا، حتى لو مش مصابين، بنمنعهم ليه؟ وليه الموضوع يوصل لحد ما يحصل اقتتال؟ وليه فيه ناس قذرة؟ وليه فيه ناس واطية؟ وازاي لقوا لهم مخرج يستوطوا منه؟ الحقيقة الناس الحقيرة اللي بتاكل في الطبق وتتف فيه بيبهروني بوساختهم، كل ما اقول خلاص اتسددت مش ح يلاقوا حتة يستوسخوا منها، يقوموا يعملوا التقيلة على روحهم عشان يعرفوا يظروطوا نفسهم كويس
لا بجد ناس مبدعة حقيقي
حقيقي
يا رب يموتوا
يا رب يموتوا
وليه امن الجامعة رجع تاني؟ وليه النهاردة وانا خارجة لقيت ظابط بيضرب عسكري بالشلاليت والقفا والقلم؟ وليه بندفع ضرايب بعد ده كله؟ انا زعلانة على فلوسي على فكرة

اخي القاتل اختي القاتلة

تعرف اخي القاتل اختي القاتلة انك بتدفع ما يزيد عن اربعين في المية من دخلك ضرائب للحكومة المصرية ما بين مستنقعات من الاساسي وضريبة مبيعات وضريبة شمط وخلافه؟
اخي القاتل اختي القاتلة: تعرف ان الضرايب دي مش بتتلقى بيها خدمات ولا حاجة؟ اظن واضح الا اذا كنت البعيد اعمى
اخي القاتل اختي القاتلة: تعرف ان الضرايب دي بتروح للحكومة المصرية ايشي مرتبات وانتقالات وبدل واجتماعات وخلافه؟
اخي القاتل اختي القاتلة: تعرف ان الحاجة سيبني ليف مي وهو اسم مستخرج من من قاموس المورد عربي انجليزي لما جات مصر نزلت على حسابك؟ واتكلمت في قاعة مبنية ومتأسسة على حسابك؟ كل فولت في كهرباء الميكروفون اللي اعلنت منه الحرب على فلسطين انت اللي دافع تمنه؟
اخي القاتل اختي القاتلة: ياريت تفتكر ان الغاز بتاعك بيروح لاسرائيل حاجة ببلاش كده، يعني كمان بيطبخوا ويمونوا على حسابك
اخي القاتل اختي القاتلة: انا وانت وانتي ايدينا متلطخة بدم الفلسطينيين
اخي القاتل اختي القاتلة: احنا قتلناهم بدم بارد وعلى حسابنا
وانا كمواطنة بادفع ضرايب ولي الاجر والثواب عند الله، مش طالبة من الحكومة المصرية انها تجيش الجيوش لا سمح الله، ولا تاخد صف الفلسطينيين لا قدر الله
استغفر الله العظيم، انا برضه واحدة مؤمنة وموحدة بالله ومش ممكن اكفر واقول الكلام الفارغ ده
انا كل اللي طالباه من الحكومة المصرية اللي كل مليم واخدينه من ضرايبي انهم يقفوا موقف سلبي من مذبحة غزة
ما يتدخلوش لحساب اسرائيل
يقولوا مالناش دعوة
سيبكوا بقى من بالروح بالدم نفديك يا بتنجان
هو ده منظر شعب عنده دم؟ ولو البتنجان استنى دمنا عشان نفديه بيه يبقى اتركن على حيطة مايلة، وح يستنى كتير، والتور ح يحلب واحنا لسة ما ظهرلناش دم في الافق
انا باقول لكوا الكلام اللي بيأكل عيش مش فض المجالس:
احنا مش ممكن نصدق ابدا ان الحكومة المصرية تعاونت مع اسرائيل واتفقت معاها على سحق حماس لما الولية سيبني ليف مي كانت هنا، وطبعا مش ممكن ابدا تكون الحكومة المصرية خدعت حماس وقالت لها اطمني مافيش ضربة
ابدا ابدا ابدا
ولعلمكوا لما سيبني ليف مي قالت احنا سوف نمحو حماس ابو الغيظ ما سمعش، لانه كان بينادي الواد الساعي عشان يجيب له كوباية مية لانه ريقه نشف من كسر الرجول وهي سهته وقالت الكلمتين دول من وراه، ولجل البخت هو بقى تاني يوم ما قراش الجرايد عشان البت الخدامة لمعت الازاز بيها
وعشان كده احنا مش عايزين اكتر من ان الحكومة تطلع بيان وتقول ان اسرائيل خدعت مصر وقالت لها ان مافيش ضربة جوية تفتح باب الشعرية وعلى هاذوها الاساش قامت مصر بابلاغ حماس بالاخبار اللي وصلتها وان مصر نفسها انخدعت
وبعدين تستدعي السفير المصري
مش عشان اسرائيل كيان استيطاني عنصري استعماري لا سمح الله
اسرائيل دولة صديقة شقيقة رفيقة لصيقة مضيقة رشيقة رقيقة
وانما عشان اسرائيل احرجتنا، قالت لنا كلام كدب وضحكت علينا وخلت رقبتنا قد السمسمة والعالم كله نازل تف علينا واحنا مش عارفين نرد ولا حتى نبجح، تخيل يا مواطن لما المصريين اساتذة البجاحة في العالم ده اسقط في يدهم ومش عارفين يبجحوا؟
يستدعوا السفير شوية كده يعني مش على طول، كام يوم يقضي اجازة الكريشماس مع الاسرة والكراسي، برو عتب يعني عشان منظرنا قدام الناس
وقبل ما يطلعوا البيان ده يتصلوا بسيبني او يبعتوا لها رسالة على الموبايل ويرسوها على الموضوع عشان ما تطلعش تكدبهم قدام الناس وتبقى فضيحتنا فضحتين، وللا اقول لكوا، احنا ممكن مثلا نقول ان دي اسرائيلية وانها عايزة توقع ما بين مصر والعرب وكدهون، وهنا يبقى فيه مساحة للبجاحة مش بطالة، كلمتين كده بس يعني
عشان يبقى عندنا فرصة نتحجج قدام الناس
ادونا فرصة نختلق اعذار انتوا كده بتزنقونا في الحيطة وبتقطعوا اعذارنا وبتحرجونا احراج ولا ابجح منوفي ولا مرتزق فيكي يا محروسة يعرف يتصرف فيه، ده ولا حتى مأمون فندي يسلك في المزنق اللي حطتونا فيه، واحنا ناس كويسين بندفع الضرايب ومش بنسألكوا الفلوس بتروح فين
ومش بنعترض على حاجة احنا ناس زي الفل واي حكومة في الدنيا تتمنانا وكتير كانوا متكلمين علينا بس النصيب بقى
انا رايحة بكرة ان شاء الله على سلم النقابة، مش عشان اتضامن مع الفلسطينيين، يعني ناس دمها سايح اطنان وقفتي ع السلم ح تعمل لهم ايه؟ انا بس كل اللي عايزاه ان الحكومة المصرية الطيبة الرشيدة اللي انا بادفع لها ضرايب انها تغسل وشي قدام الناس، انا كده وشي مش باين من القذارة والدبان اللي عليه، اي مية تسد، انشالله بمية الترعة ام بلهارسيا،
طب مثلا، كان ماله التآمر من غير الفضايح؟ ليه كده؟ يعني ما يعملوا اللي هم عايزينه من غير ما يخلونا متففة العالم بالطريقة دي
يا عمي الخروف يندبح بعيد عني، وانا قلت ما يندبحش لا سمح الله؟
لكن ما ادفعش تمن السكينة وتجيبه يندبح على بابي وتمسك ايدي بالعافية وتحطها في الدم، انا مش عايزة خمسة وخميسة هنا على الباب، مين ح يحسدنا بلا وكسة
لكن تعملوا مني قاتلة ليه؟ انا ماليش مزاج اقتل حد وماشية جوة الحيطة اهو وباقول يا حيطة داريني
انام  وانا قاتلة 300 قابلين للزيادة ليه؟
يعني صابرين على الدنيا عشان الاخرة، كمان مافيش اخرة؟ هو احنا اجوزنا امكوا؟ احنا كده بقينا زي الامريكان، طب الامريكان عندهم فلوس، احنا عندنا ايه؟ فشل كلوي
ماهو يا تبطلوا تقتلوا الناس بفلوسنا علنا، يا تقتلوهم بس في السر، يا ما تاخدوش مننا فلوس يا توفروا لنا الكلة

وقفة احتجاجية بكرة عند ام سلم ام النقابة

اهو اي منظر:

تدعو القوى السياسية والوطنية الجماهير لحضور الوقفة الجماهيرية الساعة 12 ظهرًا يوم الإثنين 29/12/2008م أمام نقابة الصحفيين؛ لإعلان التضامن مع الشعب الفلسطيني البطل في قطاع غزة وضرورة:



1- وقف العدوان الوحشي الذي يقوم به العدو الصهيوني على القطاع.

2- فك الحصار وفتح معبر رفح.

3- طرد السفير الصهيوني من مصر وسحب سفيرنا من فلسطين المحتلة.



شارك وانشر

جتكوا فضيحة تاخدكوا ياللي فضحتونا

اي حد بيسمع السيد حسن وعنده نقطة دم دلوقت لازم ما يمنعوش انه يرمي نفسه من الشباك غير انه خايف يموت كافر
الله يفضحهم اللي فضحونا
الهي يموتوا عريانين بجرعة شم زيادة

Saturday 27 December 2008

انا لسة محرجة

تحديث: العرب اتفقوا على قمة عربية طارئة .... يوم الجمعة الجاية!!!! شوف الطوارئ يا جدع، شوف النجدة التي اشتهر بها العرب، شوف السرعة في الاغاثة

آه لسة محرجة ومكسوفة وانا بانزل البانرات دي

ومحرجة ومكسوفة وانا بابلغكوا ان بعض نواب مجلس الشعب دعوا لوقفة احتجاجية بكرة الساعة اتناشر قدام مجلس الشعب وقال ايه ح تمشي من مجلس الشعب لقصر عابدين وانا وانتوا عارفين انها ح تخلص على سلم النقابة
على اي حال اهو برضه نعمل اي منظر، يمكن، جايز

ومحرجة ومكسوفة وانا باطالب بحكومتي انها تبقى على الحياد
ايوة يا حكومتي يا مصرية
يا حكومة جمهورية مصر العربية
انا مش طالبة منكوا غير الوقوف على الحياد في الصراع العربي الاسرائيلي
اتعاملوا مع قضية فلسطين زي ما زيمبابوي بتتعامل معاها
مالناش دعوة
بس
هو ده المطلب، مش اكتر من كده، لكن ما تتدخلوش لصالح اسرائيل ارجوكوا، انا مش عارفة اعمل ايه؟ ولا اقول ايه؟ مش لدرجة التضامن مع اسرائيل ضد حماس
مش ح يعملوا لنا حاجة هم دول...يعني مش عايزين مننا حاجة
بس نحل عنهم


الكلام ده صحيح؟

لا اكيد الخبر ده متفبرك
الكلام ده صحيح؟ انا باسأل بجد مش باتخانق دلوقت
احنا محتاجين توضيح من حكومتنا دلوقت، ده حقنا، احنا اتفضحنا في كل حتة والواحد رقبته بقت قد السمسمة، ياريت حكومتنا توضح لنا الكلام ده واذا كان الخبر ده كاذب يبقى لازم يطلعوا بيان واضح بدل تصريحات ابو الغيظ اللي كل ما يتكلم يفاقم الامور ما يحلهاش
احنا عايزين تصريح من رئيس الجمهورية نفسه يوضح لنا الكلام ده معناه ايه؟ وبيعبر عن مين؟ وايه؟ وفين؟ ومين؟ وليه؟ واذا كان مش صحيح يبقى نفهم بدل ماهم ساكتين كده
بس والنبي بلاش ابو الغيظ، والنبي، والنننننننننننننننننننننننننننببببببببببببيييييييييييييي

انا محرجة اني مصرية

اول مرة احس اني محرجة اني مصرية............ مصر قتلت الناس في غزة، اسرائيل طول عمرها بتموت الناس، لكن مصر اول مرة..مش عارفة بقى اول مرة وللا حصلت قبل كده من غير ما يقولوا لنا، بس على الاقل اول مرة مصر بالبجاحة دي تستقبل ليفني وتقف جنبها وهي بتقول:سوف نمحو حماس من غزة، وبعدين لما تمشي يتصلوا بحماس ويقولوا لهم: اطمنوا مافيش عملية عسكرية عشان تساعد اسرائيل انها تاخد الناس على حين غرة....عينك عينك كده
وهم راخرين اغبيا، صدقوا ازاي؟ ماهم سامعين الست وهي بتقول سوف نمحو حماس، على اي حال هو عموما ال
DEFAULT
بتاع حماس انهم اغبيا....دي مشكلتهم الوحيدة واللي ح تجيب اجلهم ان شاء الله لو ما لحقوش نفسهم وعملوا اختبار ذكاء لقياداتهم ورفدوا اللي اقل من تلاتين
يا غلبهم يا عيني، كان لسة عندهم امل فينا
انا محرجة فعلا اني مصرية
واي كلب ح يدخل يرمي بلاه على حماس ما يجيش هنا تاني، انا اصلا مش طايقة حد كفاية اللي انا فيه في البيت وفي الغيط

Thursday 25 December 2008

وسيم مات

وسيم صلاح حسين ابن طنط شاهندة مات
اتقتل في روسيا ولقوه مرمي ومضروب على دماغه
لما والده الشهيد صلاح حسين مات ووسيم كان عنده اربع سنين، وسيم كان بيفضل واقف في البلكونة مستني باباه
وفضل مستنيه عايز يقابله لاخر لحظة
ابوه شهيد، وعمه شهيد، وخاله شهيد، وجده شهيد 
واهو راح يقابلهم، ربنا ما يوري حد اللي شاهندة فيه

Monday 15 December 2008

عبده البرماوي يكتب عن الحذاء في صناعة التاريخ

بس بقى، انا ح اقفل الراوتر تاني، ماحدش يطلعني من الاجازة بتاعتي، ده اخر بوست انشره في الاجازة، بس المقال عجبني قلت تشوفوه:
من إغتيال شجرة الدر لوداع جورج بوش:
الأحذية أيضا تصنع التاريخ
عبده البرماوي
bermawy@gmail.com
هذه قبلة الوداع لك يا كلب، هكذا هتف الإعلامى العراقى منتظر الزيدى وهو يلقى فى وجه الرئيس جورج دبليو بوش بفردتي حذائه الواحدة تلو الأخرى. ولم يدع أراد بوش تلطيف الموقف بقوله وماذا يضير أن ألقى شخص بحذائه على، ليثبت مرة أخرى جهله بالتاريخ.
انتعال الحذاء أمر عرفه الإنسان قبل أربعين ألف سنه، هذا ما أظهرته الحفريات بحسب ما ورد فى مقال نشر مؤخرا بمجلة ناشيونال جيوجرافيك ذائعة الصيت، ورغم عدم وجود أدلة تاريخية، لكننى لا أشك أنه منذ هذا التاريخ قد أدرك الإنسان أن ثمة وظيفة آخرى للحذاء مثيرة للاهتمام وهى استخدامه فى ضرب الآخرين وإهانتهم، للما له من قيمة متدنيه والتصاقه بالأرض وانغماسه فى الأوساخ. ولعل هذا السلوك الاجتماعى الرمزى العابر للثقافات والحضارات هو ما جعل النعال تجد طريقها لصفحات التاريخ.
ومنتظر الزيدى هذا الإعلامى العربى الشجاع أراد بالأمس أن يؤكد على تلك الحقيقة التاريخية التى غابت عنا طويلا، وجهلها بالطبع بوش. ففردتى حذائه الطائرتين – ليستا اعتراضا وفقط على تلك الإملاءات الأمريكية المسماة معاهدة أمينية بين الولايات المتحدة والعراق المحتل – بل أكدتا مرة أخرى على هذا الدور الكبير الذى تلعبه النعال فى صناعة التاريخ المعاصر.
لعل البعض يتذكر هذه الحكاية الطريفة التى ترجع لنصف قرن مضى، والتى وقعت فى المحفل الدبلوماسى الأبرز فى العالم وهو الجمعية العامة للأمم المتحدة فى أكتوبر 1960. فالزعيم السوفيتى نيكيتا خورتشوف رئيس مجلس السوفيت الأعلى ورأس القوة العظمى الثانية فى العالم آنذاك كان حاضرا وقيل أنه سمع ما لم يعجبه من ممثل بولندا وكذلك رئيس الجميعة العامة، فاستل الرجل الريفى حذاؤه وضرب به المنصة بغضب مهددا الجميع دافعا إياهم بسلوكه الغريب هذا للانكماش فى صمتهم. وعلى الرغم من محاولة حفيدته نينا عام 2000 أن تؤكد على أن هذه الحكاية ملفقة وأن أجهزة الدعاية الأمريكية صنعتها لتشويه صورة جدها، فلا زال هذا الحدث حاضرا فى صفحات تاريخ الحرب الباردة باعتباره إعلانا رمزيا لنجاح تجربة اطلاق صواريخ نووية وبدء العصر النووى السوفيتى وتوازن الرعب النووى. وهذا الحادث ظل طويلا مادة لتندر المتخصصين فى العلاقات الدولية خصوصا من المعسكر الرأسمالى معتبرين هذه الفعلة تدشينا لما أسموه بعصر البذاءة الدولية.
قبل هذا الحدث بسبعة قرون يقال أن ملكة مصر الشهيرة شجرة الدر قد حاولت أن تضع أحد الأمراء المماليك على العرش لكي تحتمي بهِ وتمارس السلطة من خلاله بعد تهديد الخليفة العباسى لها ورفضه لتولى إمرأة عرش البلاد، لكن محاولاتها باءت بالفشل واشتد الضغط عليها وتمرد من حولها، فآثرت الهروب والتجأت إلى البرج الأحمر في القلعة عام 1257. لكن أحد الأمراء من أتباع زوجها المعز آيبك التركمانى الذى تآمرت شجرة الدر على حياته وقتلته تمكن من ألقاء القبض عليها، وسجنها وسلم مفاتيح سجنها لضرتها أم علي زوجة الملك الأولى، فأتت ومعها جواريها وحاصرن شجرة الدر وأخذن فى ضربها بالقباقيب حتى ماتت.
وعادة ما يذكر أن مذبحة القضاء التى وقعت فى ظل حكم عبد الناصر قد تم التمهيد لها بضرب الفقيه الدستورى العظيم عبد الرزاق السنهوري باشا داخل دار القضاء بالنعل. كان أصل الخلاف هو رغبة الفقيه الدستورى الكبير الذى وضع دساتير معظم الدول العربية في أن لا تتنكب الثورة لمبادئها وتمثل ذلك في سعيه لاستقلال السلطة القضائية. فقد وقع الخلاف بين السنهوري وناصر بسبب حل مجلس الدولة وإصدار قانون جديد ينظمه بعد تنحية الكثيرين من قضاته. السنهوري الذى شغل رئيس مجلس الدولة قام بإلغاء العديد من القرارات الحكومية الصادرة من عبد الناصر نفسه. وحسم الحذاء الثورى الأزمة وأخرج السنهوري من الساحة.

وأنا شخصيا ممن يربطون بين تاريخ الفساد الكبير فى الفلبين فى ظل حكم الديكتاتور ماركوس وحكاية أحذية زوجته إيميلدا التى تجاوزت الخمسمائة من أفخر الأنواع والتى كان بعضها مرصع بالماس فى حين كان شعب الفلبين من بين الشعوب الأفقر فى العالم. وفى الأثر نجد حكاية الملك النمرود مع سيدنا إبراهيم والتى انتهت بلعنة النمرود من خلال حشرة دخلت رأسه من أنفه وإستقرت برأسه وأطارت تلك الحشرة صوابه عدة سنين وكان علاجه الوحيد هو أن يُضرب بالنعال على رأسه. ولا زلت أذكر قبل بضع سنوات زيارة وزيرالخارجية المصرى أحمد ماهر للحرم القدسى واعتراض الفلسطينين عليها من خلال إهالة نعال المصلين على رأس الوزير الذى أخذته المفاجأة وسقط مغشيا عليه.
وبكل التأكيد سيدخل الخبر الوداع النعالى أقصد الرئاسى لبوش التاريخ باعتباره أكثر الأخبار التى تداولتها صحف العالم، وتشير البيانات الأولى من موقع جوجل الإخبارى إلى أن عشرات الألاف من الصحف والمواقع الإليكترونية قد بثت الخبر فور وقوع الحدث. الطريف أن معظمها قد أكدت على أن ما حدث هو نوع من الوداع. بالفعل كانت هاتين القذيفتين الجلديتين خير وداع لأسوأ رئيس أمريكى عرفه التاريخ ذلك المسمى جورج دبليو بوش، وسيذكر باعتباره استعماريا دمويا اتسم بالجهل والعنجهية.
ولا ننسنى أن حذاء منتظر قد منح العالم مادة سخية للتندر، منها ما قاله بوش نفسه ساخرا حيث أكد أن الحذاء الملقى عليه من مقاس عشرة، بينما أعلن المدرب الأمريكى لارى روثشيلد اعجابه الشديد بتقنية الرامى وسرعته وإجادته رغم أنه لم يصب بوش فى المرتين، فالرمية الأولى انحنى بوش لتفاديها لكن الرمية الثانية تحديدا كانت متقنة لحد بعيد مما استدعى تدخل مدافع آخر هو نور المالكى رئيس الوزراء العراقى لصد الرمية عن وجه بوش. وجاءتنى فور حدوث الرميتين رسالة على بريدى الإليكترونى من صديقة أمريكية نصها لا تتخلص من حذائك القديم فنحن بحاجة إليه، توقيع اللجنة المنظمة لاحتفال وداع الرئيس المنتهية ولايته جورج دبليو بوش، وقيل لى أن ثمة اشاعة تتردد بين الصحفيين الأفغان مفادها أن قائد حرس بوش قد طلب أثناء التوجه لأفغانستان عدم عقد مؤتمرات صحفية أخرى حفاظا على حياة الرئيس، وهو الأمر الذى عارضه مستشار الرئيس الإعلامى الذى أكد أن عدم عقد المؤتمر سيثير البلبلة، وتوصلا بعد جدال طويل شهده بوش نفسه لحل وسط وهو أن يطلب من كل الإعلاميين والصحفيين ممن سيحضرون المؤتمر تسليم أحذيتهم على الباب قبل الدخول. وأطرف ما تلقيته هو رسالة على المحمول من الممثل المبدع الصديق خالد الصاوى نصها: محلات زلط تهنئ الشعب العراقى بالعيد وتعلن عن تشكيلة رائعة من الأحذية لعام 2009

Sunday 14 December 2008

بالجزمة يا ابن الجزمة

شفتوا انا حلو ازاي؟


انا لسة في اجازة وما خلصتش، بس النهاردة يوم تاريخي صنعه منتظر الزيدي
اسمه منتظر وهو منتظر، كنت فين يابني من زمان
هم ليه ما قلوش شتمه قال له ايه؟ وليه ضربوا الصحفي ومسكوه من راسه وضربوه بالشلاليت ولاد الكلب؟ اذا كان جورج بوش نفسه قعد يضحك، وليه ح يعلق ناس خنيقة على الموضوع ده ويقولوا انه تصرف مش حضاري؟ وليه فيه ناس اخنق ح تقول يا سلام، هو جاي يضربه دلوقت وهو ماشي؟ هاي مرجلة هاي؟ ما انا عارفة، عارفة ومتأكدة ان فيه ناس ربنا خلقها ودورها في الحياة انها تضايق غيرها
عشان نشتاق للجنة
ماحدش علق لسة، بس مسيرهم يعلقوا ويقولوا كده اصل انا عارفة الناس الخنيقة
وبما اني ورايا شغل وانا اصلا باشتغل بدماغي فناوية اغطس في الاجازة تاني عشان الناس الخنيقة ما ياكلوش دماغي
بس كل سنة وانتوا طيبين
ربنا يحميك يا منتظر كنا منتظرينك يا حبيبي، احلى ختام للتمن سنين العجاف
وحلوة حلوة حلوة حلوة
وجوووووووووووووووووووووووووووووووووووووووووون
هو منتظر مقبوض عليه؟ مقبوض عليه؟
مقبوض عليه؟
يعني ايه؟ واحد يضرب بلد بالقنابل العنقودية ولما المعتدى عليه يضرب اللي احتل بلده بالجزمة يقوم يتقبض عليه؟
مش كفاية انهم ضربوه؟ ربنا يقطع ايديهم ولاد الكلب



في اول تعليق له بعد الجزمة اوباما قال: احنا خارجين من العراق...خارجين هو احنا قلنا حاجة؟
:))

Friday 5 December 2008

اجازة طويييييييييييييييييييييييييييييييييلة

كل سنة وانتوا طيبين ويعود عليكوا وعلى الجميع الايام بخير وسعادة وربنا يهدي العاصي ويغفر للمذنب ويرحم الناس جميعا
انا في اجازة طويلة
مش من المدونة بس
من النت كلها
انا محتاجاها لاسباب عديدة، منها اني تحولت الى مدمنة نت ولازم اتعالج الفترة اللي جاية
منها اني ورايا شغل كتير والنت بتستهلك وقتي وزمان كنت بانجز اكتر قبل ما ادمن النت
عشان كده انا ح اقفل الراوتر اصلا ومش ح افتحه غير عشان ابعت شغلي
وده ح يبقى لمدة طويييييييييييييييييييييييييييييييييييلة على قد ما ربنا يقدرني

فيه ناس معينة نفسي اقول لهم وانتوا مالكوا

وانت مالك؟
وانتي مالك؟
وانتوا مالكوا؟
يعني اسرائيل اعترفت بالهزيمة اهو؟ امال قبلنا الذل ليه وحسسونا اننا لو استمرينا في الحرب ثانية ح نموت كلنا والقاهرة ح تحتل؟
في الكتاب بتاع جون بركنز الست اللي بتدربه قالت له مش مهم يبقى منطقك قوي، مش مهم حتى تقول كلام له معنى اصلا المهم تعرف ازاي تعمل له بروباجندا وتشوش على المختلفين معاك (تصيح يعني بالبلدي) او بقول اخر، بيدربوهم في الشركات المالتي ناشونال ازاي تبقى زي الولية سيئة السمعة في الحارة المصرية الاصيلة
طب ودي حاجة دي؟ ما احنا عندنا من زمان، عشان كده علمونا في المدرسة لما يجيلك سؤال: من اول من اخترع....تجاوب على طول الفراعنة
يبقى من اول من اخترع التصييح؟ الفراعنة
الجيش بتاعنا انتصر في تلاتة وسبعين بس اسرائيل ودلاديلها هم اللي عرفوا يسيطوا ويصيحوا، عشان العسكري بيعرف يموت، ما بيعرفش يصيح
وبالمناسبة دي احب اقول ان المنوفية كل يوم بتثبت جدارتها وكفائتها
ما بلاش انت..ح يغرقوا في المرسى زي نورماندي
هيهيهيهيهيييييييييييييي حقة لو حصلت....انشالله، ده مين الواد الصايع ده؟ انا بالاحظ على فكرة ان لبنانيين زي الاسكندرانية بالظبط، مش بس شكل البلد، وطبيعة الناس برضه، يعني ده واحد لبناني بيكره العرب والمسلمين! وعامل موقع ضدهم، ورافع قضية على اوباما عشان يشكك في احقيته بتولي الرئاسة، طيب على اساس ان اوباما ايه؟

Thursday 4 December 2008

جزم قديمة

ملحوظة: عطاء الله مهاجراني من المعارضة الايرانية ومن الد اعداء محمود احمدي نجاد
لولا ان الصفحة مش بتعمل كوبي كنت عملت للمقال كوبي وخلصتكوا من اتباع اللنك، بس اقروها هي مش كبيرة
قريتوها؟
طب محتاجة نباهة دي؟ محتاجة مخ يعني؟ مخلول مين اللي مصدق ان بيريز خايف على التسعين بالمائة من السنة من هيمنة الشيعة؟ الطم على وش مين دلوقت؟ محتاجة يعني ان حتى واحد من المعارضة الايرانية يقعد يقول لنا: واحد زائد واحد يساوي اتنين، وعلى فكرة مش ممكن ابدا واحد زائد واحد يساوي الف ربعمية خمسة وسبعين لان ده مش من طبيعة الاشياء، يعني الناس يقولوا علينا ايه؟ مجانين وللا خونة؟
مجانين وللا خونة؟ والخيانة بقت وجهة نظر واختلاف البتنجان لا يفسد للمسقعة صينية
ادعي علينا بايه؟
ثم هو واخد توكيل مصر؟
جزم قديييييييييييييمة

اموت واعرف مين اللي زقني

الا انا بقالي فترة لا بادخل على الريدر ولا بادخل على المدونات ولا باشوف خلقة حد وقاعدة يا باشتغل يا باتفرج على افلام يا باقرا كتب، واتخبطت في عقلي ودخلت الريدر النهاردة
وده يبقى اسمه ايه ده؟
والله يرحمه الحريري يعني، انا عايزة افهم هي واشنطن دي ارملته؟
وهي خريجة سادسة ابتدائي بتعرف رياضيات بالشطارة دي يا اوختشي؟
آآآآآآآآآآآه انا عرفت فرص العمل اللي بتتكلم عليها است عيشة جات منين...شوف النباهة، هم يفصلوا العمال فصل تعسفي عشان يوجدوا فرص عمل
امال يعني ح يشغلوا العواطلية ازاي؟ خلاص انتوا اشتغلتوا شوية سيبوا غيركوا بقى يجرب الشغل وبعدين يتفصل وهكذا دواليب
وآخرة المتمة تسمع ناس بتقول على اسرائيل دولة ديمقراطية
واوباما بيحدد خطر ايران في الخليج بس، ومش ح اديكوا اللنك دوروا انتوا بقى، واحد بلده محتلة العالم وبيتكلم عن الخطر التوسعي الايراني في الخليج
انا زهقت من الجنان على فكرة، كده بزيادة جنان قوي، ولما تقول لهم ده جنان يزعلوا ويقولوا لك انت اللي مجنون
اللي ينقل المخ بقى ان فيه ناس تعمل زي الراجل العجوز اللي قابله اسماعيل يس في فيلم المليونير الفقير لما دخلوه مستشفى المجانين، اللي قعد يقول له كلام حكم وفي الاخر اسماعيل يس قال له: يا عم انت بتقول كلام حلو قوي..انت مين
راح منطور واقف وقال له: انا المجريييييييييييييي تشك تشك تشك تشك توووووووووووووووووت
هو حسن نصر الله مش ناوي يتكلم بقى؟
يقول اي حاجة...اي حاجة يعبرنا ما يسيبناش في الموريستان اللي احنا فيه ده لحد ما نحس اننا احنا اللي غلط،
يتكلم
نفسي اسمع كلام عاقل، بمعنى  مقدمات منطقية لها علاقة ببعض وتوصل لنتائج منطقية لها علاقة بالمقدمات اللي قبل كده، ماحدش بيعمل المعجزة الاعجوبة دي غيره
يارب يتكلم قريب، نفسي اسمع واحد مش مجري.....نفسي
يا شباب انا كنت زمان قريت حديث للرسول صلى الله عليه وسلم مش فاكرة نصه بس فاكرة معناتو ان في آخر الزمن كل الناس دماغها ح تضرب وتخرف
"فما تكاد تجد رجلا عاقلا"
دي الجملة اللي فاكراها من الحديث
حد يعرف يجيبهولي؟ 

Wednesday 3 December 2008

عاجل: قرار بفصل كريم البحيري

والله انا ما اعرفش مادو ده اسمه ايه بس هو دخل ساب لي التعليق ده
انا نازلة دلوقت عندي مشوار وح اتصل بكريم افهم الحكاية ان شاء الله

تحليل دي ان ايه في جريمة قتل على 200 جنيه وموبايل

ماهو يا انا مجنونة يا انا مجنونة، مش معقولة كل الناس دي مجنونة وانا اللي عاقلة، اكيد الغلط فيا
النهاردة المخرج احمد عاطف قال لي قريتي تفاصيل القبض على الحداد المسلح اللي مفروض انه قتل بنت ليلى غفران؟ مافيش حبكة...مين السيناريست الفاشل اللي كتب لهم الكلام ده؟
مخرج بقى ونظرته للدنيا على انها فيلم سينما
بس ده فيلم سينما؟ ده ولا فيلم وش اجرام بتاع محمد هنيدي
حد يقنعني بملابسات الجريمة الكوميدية دي! حاولت افسر الموضوع واقول احنا دمنا خفيف وحيث كده فيبقى اكيد الجرايم اللي بنرتكبها دمها خفيف برضه
بس لقيتها مش راكبة
واحد رايح يسرق حتة مش عارفها ولا محدد هو ح يسرق ايه؟ وواخد معاه تريننج سوت عشان يبدل زي محسن السكري، وواخد سكينة! مش عارفة سكينة ليه وهو حداد؟ ما كان ياخد سنجة وللا اي حاجة ما تستلزمش مجهود كبير في القتل؟ وبعدين عنده ضائقة مالية قام المعفن سرق 200 وموبايل والشقة مليانة تحف وبعدين قتل البنات وغير هدومه وركب ميكروباظ!
طبعا واحد بيعمل جريمة قتل على 200 جنيه اكيد ح يرجع في ميكروباظ لانه مش معاه فلوس التاكسي من ستة اكتوبر لروض الفرج، مالوش واحد صاحبه عنده عربية نص نقل طيب؟ مش عارف يراقب المنطقة شوية؟ مش ممكن القاتل اللي خريج التثقيف الفكري ده
المفروض ما يتعاقبش، ده يودوه مدرسة لرعاية ذوي الاحتياجات الخاصة
الواحد يصحى من النوم كده وياخد بعضه ويتوكل على الله يقلب رزقه في اي حتة ويسرق اللي يطلع له ويقتل اللي يشوفه وهو قاصد وجه كريم، ويركب ميكروباظ ويعملوا له تحليل دي ان ايه وفي اربع ايام يكتشفوا جريمة القتل ومين القاتل من غير كاميرات ولا سحر ولا شعوذة، يعني احنا اجدع من الامارات على راي احمد
حد يديني عقله عشان انا عقلي دورت عليه الظاهر راح يشتي في المريخ
لا وبرضه كاتبين الكي وورد في كل اخبار قضايا القتل: وانهار واعترف
اعترف وفاهمينها
انهار ازاي؟ ده شغل البوليس بقى
العبث بقى ان يكون التلفيقة للواد الغلبان ده مش عشان يتستروا على ابن راجل كبير ولا حاجة
بس عشان عايزين يثبتوا انهم قبضوا على القاتل بسرعة زي الامارات وانا مش اقل من كاظم انحنى لي انحنيت له
يا اخوانا انا مش عارفة احشر في راسي القصة دي...يا تلاقوا لي طريقة احشر بيها القصة في دماغي يا توفروا لي الكلة 

انتوا بتشتغلوني وللا ايه؟

مالها المدونة؟ طفاطيفو ومواطن مصري قالوا لي المدونة بتاعتك اتسرقت
!!!!!!!!!!!!!!
مالها المدونة ماهي كويسة ده انا حتى عملت ساين اوت عشان اشوف مالها لقيتها كويسة
انا ناقصة اشتغالات حرام عليكوا انا دماغي اتنقلت اساسا مش كفاية اللي حصل للواحد امبارح، انا لحد دلوقت فاتحة بقي اهو

Tuesday 2 December 2008

مش فاهمة حاجة

انا برضه مش فاهمة شافيز بيتشتم ليه؟

هو احنا بغبغانات؟ طب امريكا بتشتمه وبتشهر بيه عشان ملودها وممشيها تكلم نفسها وحارق قلبها على شوية البترول اللي عنده، احنا بقى بنشتمه ليه مش عارفة؟ ايه بقى؟ ايه انتهاكات حقوق الانسان وبيقمع المعارضين
ما يقمعهم وللا يغورهم في داهية كل معارضينه من رجال الاعمال، اه انا بقى ديكتاتورية، انا لو وقع في ايدي رجل اعمال ح احشر في مناخيره قرن فلفل واتني قشرة برتقانة في عينه
الامام علي كان بيقول: طالبان لا يشبعان، طالب علم وطالب مال
والرأسمالي ده همه في الدنيا انه يلم فلوس ويحط ايده على اكبر قدر من الثروة، ولو قلت له تحب تحتكر ثروة العالم كلها في ايدك يقول لك يا ريت، طب بالذمة ده بني ادم؟
ثم ان معارضينه اللي عملوا عليه اعتصام في الشارع وكانوا عايزينه يمشي امريكا بنفسها فضحتهم فضيحة المطاهر يوم طلوعه ع المعاش وقالت ايوة انا اللي مسلطاهم فيه حاجة انتوا دلوقت؟ يعني خيانة عظمى
وبعدين يعني هي امريكا اللي بتحترم حقوق الانسان؟ بلااااااااااش، هو صدام لما كان حبيبهم كان بيحترم حقوق الانسان؟ هو نظام الحكم السعودي بيحترم حقوق الانسان؟ هو بس شافيز اللي تف عليه الكلب عشان حارم امريكا من بترول بلده اصلا؟ يعني يا تديني اللي في جيبك وكمان اغرقك بالديون يا ترضى اني اسلط عليك خونة يعملوا عليك انقلاب يا تبقى ابن كلب واشتمك في كل حتة والعالم مليان بغبغانات يرددوا ورايا زي صدى الصوت
وهي دي بقى حقوق الانسان وان كان عاجبك في نهارك اللي مش فايت ده

Monday 1 December 2008

يا بابي باحبك

اكيد اكيد انا مش من متابعي الاج اجك، بس امبارح شفت الحلقة اللي كان فيها احمد الفيشاوي بيعلن عن اعترافه ببنته اللي هي بنته واللي المحكمة حكمت انها بنته
الحقيقة انا كنت من الناس اللي تعايشوا مع القضية عن قرب، قبل القضية ما كنتش اعرف هند ولا والدها ووالدتها الافاضل، بس لما الموضوع اتنشر في الجرايد وكاي انسان عنده كومن سنس عرفت ان اكيد هند مرات احمد والبيبي ابنه، كانت هند لسة حامل، وكانت اياميها عبارة عن فتلة طالع لها كلكيعة، كل الحوامل يتخنوا ودي كانت عمالة تخس تخس تخس تخس تخس تخس، وجايبة كتب لتربية الاطفال وعلم نفس الطفل وعمالة تذاكر فيها كأن الولادة دي ح تبقى مناقشة الدكتوراه، واتشرفت اياميها بمعرفتها ومعرفة والدها ووالدتها، والحقيقة والدها بهرني، لاننا كنا في موقف ينفع يتقارن بيه اب زي احمد الفيشاوي واب زي ابو هند الحناوي، طبيعي ان الامهات بيحسوا بولادهم، بس نو اوفنس يا شباب والد هند الدكتور حمدي الحناوي مش موديل راجل مصري خالص
وتخيل يا مواطن، مواطنة حامل حواليها كل المصايب دي، وبرضه ربنا كرمها بشوية خنازير يتكلموا عليها احقر كلام وفي التلفزيون، يقعد لهم في عينهم وعافيتهم يا قادر يا كريم، واساسا الحامل بتبقى حساسة وعياطها سهل،
في شريعة حامورابي، اللي يزعل ست حامل ويخليها تعيط بيتقتل
ياريت التشريع ده كان موجود عشان كنت اروح اتجوز دلوقت حالا وابقى حامل وكل يوم والتاني عند القاضي باعيط: جمال مبارك زعلني، هيئة المعونة الامريكية زعلتني، احمد نظيف زعلني، عبد الله كمان زعلني
والله تسع شهور ما كانوش ح يكفو كل اللي انا عايزة اعدمهم
وعشنا كلنا تلات سنين نكد في نكد، كل ما اروح ازورها ارجع معيطة، تخيل بقى انا بارجع معيطة هي وباباها وماماتها واخوها كانوا عاملين ازاي؟ الحمد لله لينا من اول ما اتولدت كانت عبارة عن احمد الفيشاوي صغير، لدرجة اننا لما حضرنا السبوع ام زينب انبرت واخدتني على جنب وقالت لي: والنبي يا نوارة ما تعرفيش نمرة احمد الفيشاوي؟ انا اكلمه انا واقول له يا اخويا ده البت كلها انت...دي ضناك يا حبيبي...ما ترميش ضناك عشان ربنا ما يخلصوش منك ومن صحتك انت لسة شاب
:))
ام زينب بقى
وتروح الايام وتيجي الايام وهند كل حياتها لينا، وتجبرنا كلنا اننا نبجلها ونوقرها وهي حتة زئردة قد عقله الصباع ونبقى قاعدين في حضرتها كأننا قاعدين في حضرة السيد مدير الامن: ماحدش يتكلم في القضية قدامها، وماحدش يغلط في ابوها قدامها! يا هند دي عندها تلات شهور! ايوة بيدخل في العقل الباطن، وبعدين تلبسها حالة السخطة وتقعد تكلمها: مس كده يا لولي...مس هو في العقل الباطن
مرة قالت لي: اسم الدلع لولي وللا لولو؟
- اي حاجة يا هند
- اي حاجة ازاي؟ كتب علم النفس بتقول لازم يبقى اسم الدلع واحد بس
لولي حلو يا هند
اوكيه...لولييييييي
بعد كل التعب ده، والشقا، مش لازم لولي تشوفني وانا باعيط، مش لازم لولي تسمع حاجة عن القضية، مش لازم لولي حد يغلط في باباها، ده باباها ولازم تحبه عشان ما تتعقدش
يا هند انت بتكلميها كأنها عندها تلاتين سنة، هي ح تفهم كل الرغي ده كله؟
ايوة عشان تتكلم بسرعة
وفعلا اتكلمت بسرعة على فكرة، ما شاء الله، بعد ده كله، الاستاذ احمد الفيشاوي عايز يشوف بنته واكتشف انها مالهاش ذنب

طيب طيب، انا مش ح اغلط، مش ح اغلط ومش ح افتكر كل الكلام اللي سم بدني انا شخصيا وحرق دمي فمابال صاحبة الشأن
بس بصراحة هند دي فعلا بنت ناس
وبنت ناس بالقوي، ابنت ناس في الدنيا
انا لو مكانها وكلمني وقال لي اشوف بنتي كنت قلت له حااااااااااااااضر
استناني يوم خمستاشر اغسطس الساعة واحدة الضهر على كوبري قصر النيل، في نصه بالظبط، اوعى تتحرك من مكانك
وبتقول له يا بابي باحبك
طيب يا ست لولي، ربنا يخليهولك ياختي

ودي كانت نهاية فرقة عكاشة المسرحية

انا عايزة افهم ايه يسعد الامن اكتر من ان المدونين اللي كانوا في يوم من الايام بيقضوا مضاجعه يتحولوا الى خائضين في الاعراض وقاعدين زي نسوان الشلت يقولوا البتش دشي ماشية مع الواد ده وشفتها وهي بتشاور للواد من الشوباك وتشعمل نفسها رايحة الدرس عشان تزوغ وتشرب سجاير في الحديقة الدولية
هو انا مش قلت قبل كده ان خفت ما تعمل وان عملت ما تخاف؟
خلاص بقى غسالة تلاجة....عيب على الناس والله، محمد عادل ومحمد خيري في السجن وناس قاعدة في حمام التلات تطرقع اللبانة بفلوس المعونة
ودي كانت نهاية فرقة عكاشة المسرحية
على فكرة انا سبت الجايكو وشكلي ح اسيب حاجات كتير