Wednesday 31 December 2008

الظاهر الدولة الكبر كان معاها حق في موضوع القمة ده

طبعا الدولة الكبرى اللي كانت رافضة القمة هي مصر، ومعلش مش ليبيا زي ما بعض المعلقين قال، لان مع كامل احترامي للكتاب الاخضر والاخ العقيد، حماس قالت دولة عربية كبرى، وهاذوها المواصفات لا تنطبق على ليبيا
المهم
اجتمعوا، ويمكن عشان كده قبضوا على هذا الكم الهائل من المعتقلين النهاردة الصبح، وخلاص
وابوري رايح
وابوري جاي
وخلصنا، والظاهر الدولة الكبرى كانت مش عايزة وجع دماغ بقى وتنزل الناس في فنادق وتجيب لهم حراسة وتفطرهم وتغديهم على حسابها وعربيات بقى تطلع وتشريفات وزحمة وهي عارفة اخرتها ايه، وكمان هم اصلا مشغولين بيقبضوا على الناس مش طالبة بقى حبايب اخواتهم لما يتمهمزوا وييجوا يتدلعوا عشان يطلعوا بيان
قال لك ح يطلعوا بيان
!!!!!!!!!
طب ما كان واحد فيهم يكتب البيان ويبعتوه لبعض بالميل وكل واحد يبعت مسج على الموبايل: موافق/غير موافق
وخلاص
او يعملوا مدونة للجامعة العربية، وكل زعيم ووزير خارجية في اي دولة عربية يبقى ادمن، تبقى مدونة مشتركة يعني، او يشتركوا مع بعض في مجموعة على الفيس بوك، ولا الطيران والمرواح والمجي والمشورة هم يعني مش جايين فيينا، دول جايين القاهرة، مش فسحة يعني، او يعملوا مقر الجامعة العربية في نيويورك
او تل ابيب
الا الراجل بتاع قطر ده مجنون؟ راجع من منتجع اسرائيلي يتكلم عن العدوان الاسرائيلي وحسين عبد الغني مصنفه من الصقور، واحنا الحمائم
طب ازاي الاخ صقر قريش اكتر واحد بيتعامل مع اسرائيل واكتر واحد بيطلع بيانات شجب ضدها بلهجة شديدة العنف؟ ماحدش يقول لي مؤامرة ومخطط، معلش المؤامرة دي بتبقى في السر، لكن الراجل عيني عينك بيتعاون مع اسرائيل وعيني عينك واقف في الجامعة العربية في صف الصقور! هو احنا عندنا صقور؟ شالله اطفحهم عمري في حياتي ما شفتهم
اما بخصوص الحمائم اللي هنا، فاذا كانوا يقصدوا الحمامات يعني، فنقدر نقول لهم ان الشعب المصري ما عندوش ثقافة دخول الحمامات زي ما السيد المحافظ قال، اذا كانوا يقصدوا ان حمائم جمع، اعزكم الله، حمامة، فارجو من التلفزيون المصري عرض مشهد هام جدا من فيلم بطولة سيدة الشاشة العربية فاتن لا مؤاخذة حمامة الا وهو فيلم الخيط الرفيع، وهي بتقطع هدوم محمود يس وبتقول: ابن الككككككككككلللللللللللللللللللللببببببببببببببببببببببببب
وبمناسبة ابن الكلب
ههههههههههههه احنا ح نضحك ضووووووووووحك على الناس اللي كانت فرحانة باوباما، الراجل على فكرة يا قلب امه ح يتشنبر ويتخوزق لحد ما الخازوق يطلع من سقف راسه ويخبط في سقف الاودة

5 comments:

Tarkieb said...

والله يا اختي الجزيرة المرة دي مش ممكن ولا كأنها قناة فضائية عدائية .. الهبل مش عارفين ان اللي بيجي على الولايا ما بيكسبشي .. الحمد لله ان البي بي سي طلعت السنة دي دا أنا كنت اتشليت.. والنعمة المذيع المعفن فيها كان عمال يستدرج ليفني ويحط على لسانها انها اخدت موافقة مصر.. اول مرة اعرف ان مصر دي حاجة كبيرة وما كنتش اعرف.وانها فعلا حاجة عظيمة موجودة وسط اقزام معاهم فلوس . مصر بتعمل في صمت والتانينن بينفجروا من جيب غيرهم وعلى قفانا ..ولو بعتوا كيلو كباب وكفتة هناك بيطلع خبر عاجل .. قناة الجزيرة جايبة عبد الباري عطوان المعفن اللي فاتح جريدته بفلوس اسرائيل و مسمي الارهابي بن لادن شيخ كالعادة يشتم في مصر ..جايبة الجمهور بتاع حيلهم بينهم يقولو افتح يا سمسم افتحو البوابة الناس سابت خلاص كل حاجة في الدنيا ومسكت في ام البوابة... لدرجة اني خايف الناس النهاردة تهني بعض وتقول كل بوابة وانت طيب..

Tarkieb said...

انا رأي انهم يروحوا للمعبر ويقولو افتحولي الباب دة ويارب ما تكون الجاموسة والدة ويدخلوا
بلا خيبة

أكون أو لا أكون said...

نواره إنتي من اللي بيتفرجوا على فلم القمه؟! ياأختي ده فلم إتعمل علشان يحرفوا الشعوب العربيه ويفسدوا أخلاقها...
إوعك ده فلم يعمل تخلف عقلي... وهستيريا... وإنفصام بالشخصيه .

رامز عباس said...

تغطيات المحله باسلوبي


واللي يحب يشوف

احمد العربي said...

شركة بريطانية تقطع علاقاتها التجارية مع شركة اسرائيلية
والله العظيم أشرف من بعض صقوووووور العرب

تحياتي

الرابط
http://jta.org/news/article/2008/12/31/1001934/british-firm-severs-ties-with-israeli-counterpart