محكمة النقض تؤيد الحكم على اسلام نبيه

الاستاذ ناصر امين كلمني دلوقت حالا وقال لي ان محكمة النقض ايدت الحكم على اسلام من اول جلسة

رفض طلب دفاع اسلام نبيه بوقف الحكم

الاستاذ ناصر أمين لسة مكلمني حالا وقال لي ان المحكمة رفضت الشق المستعجل في طلب الدفاع وهو الافراج عن اسلام نبيه بضمان محل اقامته ولسة بقى ح ينظروا في نقض الحكم المهم ان طلب وقف سريان الحكم اترفض
عقبال ما النقض كمان يترفض
ايوة يا واد وعرفت تنقي ايوة يا واد خدت السنيورة

تفاصيل عن جلسة النقض في قضية إسلام نبيه

كنت بالبس ونازلة وبعدين حصل ظرف ما قدرتش انزل واتصلت بالاستاذ ناصر امين قال لي انه بعت اتنين محامين يتابعوا الموضوع وبيقول لي ان اللي حضر جميل سعيد ونبيه عبد السلام والد اسلام وان جميل سعيد طلب اولا طلب مستعجل بوقف العقوبة لحين الفصل في النقض وذلك لان اسلام نبيه رب اسرة!!!!!!! اه وربنا...ولان محل اقامته معروف...تبقى داهية لو الطلب ده اتقبل والواد هج برة البلد
المهم الطلب التاني نقض في الحكم نفسه لسببين اولا، زي ما بيقول جميل سعيد، ان الخبير غير مؤهل، وثانيا لان المحكمة رفضت سماع شهادة الشاهد ناصر امين!!!!فاكرين لما قلت لكوا ان جميل سعيد طلب تحويل ناصر امين من محامي الى شاهد وبعد شوية ح يطالب بانه يسيب المحاماة ونفتح له محل حلواني؟ اهو زعلان عشان المحكمة رفضت الطلب ده ومستند على النقض في الموضوع ده
ان شاء الله في خلال ربع ساعة ح نعرف حكم المحكمة
ادعوا معايا ان طلب وقف العقوبة يرفض وكمان النقض يرفض اللهم آمين

عاجل عاجل عاااااجل: النقض في قضية عماد الكبير

يوم 2 مارس النظر في النقض في قضية تعذيب المواطن عماد الكبير لازم يبقى في حضور مكثف الله يخليكوا
مش عايزينهم يرموا لنا حتة عضمة ولما نلتفت ياخدوها مننا
للي ناسي قضية عماد الكبير الفيديو اهو
http://www.youtube.com/watch?v=4iez20eP-ic

وده تفريغ الشريط للي قلبهم ضعيف
تاااااااني
تاني وتالت لحد ما الموضوع ده يتقفل
عماد: الله يكرمك يا باشايا باشا معلشيا باشا معلش

اسلام: ياللا يا بن المتناكة

ياللا يا كس امك

عماد: يا باشا انا اسف

:يا باشا انا اسفآآآآآآآآآه آآآآآآآآآآآآآآآه

رضا فتحي: ياللا ياد يا بن المتناكة

اسلام: حلوة يا خول حلوة يا خول

حلوة ها حلوة ياه

ايه رأيك فيها يا بن المتناكة

ايه رايك يا خول يا عرص يا عرص بكرة في الموقف زمايلك كلهم ح يشوفوا الكلام ده يا عرص

عماد: آآآآآآآآآآآه يا باشااااااا

رضا فتحي: قول بولاق مافيهاش راجل يا بن المتناكة

قول انا خول

======
قال نقض قال

لا معقب لحكم الله

قضت محكمة جنايات الجيزة بحبس كل من نقيب الشرطة إسلام نبيه معاون مباحث قسم بولاق الدكرور وأمين الشرطة رضا فتحي السيد 3 سنوات مع الشغل والنفاذ، في قضية التعذيب الشهيرة للمواطن عماد الكبير. وأوردت المحكمة في حيثياتها أن هذه الجريمة هي وصمة عار في جبين المتهمين وحدهما دون جهاز الشرطة الذي يحظى باحترام الجميع، وأنها – أي المحكمة – قد أصدرت هذا الحكم المخفف ضد كل من الضابط وأمين الشرطة نظرا لصغر سنيهما وقلة خبرتيهما. ولله الحمد من قبل ومن بعد ولا معقب لحكم الله ولا معلق على أحكام القضاء. ونحن نرضى بهذا الحكم لأنه أدان ضابط شرطة عذب مواطنا مسكينا، ونحن نرضى بهذا الحكم لأنه رأى أن القبض على مواطن بدون وجه حق وتعذيبه وهتك عرضه وتصويره وفضحه من قبل رجال الشرطة يرقى إلى جناية تقتضي الحبس مع الشغل والنفاذ ولم نطمع في السجن.
حتى وإن صدر الحكم مخففا لـ"صغر" سن نقيب شرطة يبلغ من العمر 27 عاما متزوج ويعول، حتى وإن ارتأت المحكمة المساواة بين أمين الشرطة الذي صور الـ"كليب" وبين الضابط الذي قام بنفسه بهتك العرض والتعذيب وهو الذي أصدر الأمر بالتصوير.
ونحن نرضى بالحكم بالرغم من أن التوربيني، ضحيتنا جميعا الذي لا نملك أن نغسل أيدينا من دمه وقد ألقيناه في الطرقات يحيا وسط المزابل ولم يحظ منا برحمة ولا شفقة بل نال كل انتهاك وإهانة واغتصاب حتى توحش وأصابه السعار إلى جانب انخفاض مستوى ذكائه الذي يصل إلى تصنيفه من ذوي الاحتياجات الخاصة، هذا التوربيني يصغر، في العمر، عن إسلام نبيه، ويقل عنه في فرص عدم الانحراف بمراحل ووديان ودهور، ومع ذلك لم تر المحكمة الموقرة التي حكمت على التوربيني بالإعدام بسرعة فائقة، ضرورة استخدام المادة 17 من قانون العقوبات والتي تنص على تخفيف الحكم على المتهم في حالات خاصة تحيط بالجريمة، ولله العلم الكامل بالحالة الخاصة التي وجدتها المحكمة في جريمة إسلام نبيه ولم تجدها في جريمة التوربيني؟ ونحن نرضى ونرضى ونرضى. ولا نشكر لأن الشكر ممنوع، ولا نعاتب لأن العتب ممنوع، ولا نسأل عن الأسباب لأن السؤال ممنوع.
ولكن لوحظ في الفترة الأخيرة – من خلال تصريحات بعض المسئولين في الداخلية – أن السادة أعضاء الشرطة يعتقدون باضطهاد الشعب لهم، وحين يسأل السائل: كيف لمن لا يملك سلطة ولا قدرة ولا حول ولا قوة أن يضطهد من له كل ما قد سلف؟ يسهب السادة أعضاء جهاز الشرطة – الذي ندفع ميزانيته من ضرائبنا – من أصغر ضابط إلى أكابر اللواءات مؤكدين أننا أصبحنا نتطاول عليهم، بل إن أحد اللواءات قال بالنص: المواطن اتجرأ على الضابط بقى لما الضابط يشتمه المواطن يشتمه، لما الضابط يضربه المواطن يضربه! ونحن إذ ننفي عنا أي شبهة اضطهاد أو عنصرية تجاه جهاز الشرطة المسكين، نعزو عدم قدرتنا على تلقي السباب والضرب بصدر رحب إلى أن السباب يجرح النفس البشرية رغما عنا وأن الضرب يوجع الجسد البشري المتمرد والذي يرفض، بالسليقة، أن يستسلم لـ"خازوق" الباشا معاندا رغبة المواطنين الصادقة في عدم جرح مشاعر شرطيينا أو إفساد أيامهم عليهم بالصراخ: آآآآآآه أنا أسف يا باشا..يا باشا معلش. وهي طبيعة بشرية، وصدق أو لا تصدق سيدي الشرطي، لواء كنت أم أمينا: الشعب كله بشر! حتى سائقي الميكروباصات والتوك توك.

حكاية الظابط الحمار اللي اتصل في العاشرة مساء

وخسر إسلام نبيه القضية تاني بعد ما خسرها أولاني

بقى برنامج العاشرة مساء كان طوال القضية

بيبث تقارير بالغة الحيادية عن محاكمات اسلاك

ومرة اتكلمت انا ومنى بخصوص القضية والحقيقة

قالت لي كلام ضايقني انا شخصيا لاني معتبرة نفسي طرف في القضية

كلام من قبيل انا ما اقدرش اتعاطف مع عماد وانا مش عارفة

الملابسات وهو اشمعنى الظابط ده اللي مقبوض عليه

وبيتبهدل كده ما يمكن مظلوم واحنا لسة مش متأكدين

يعني كلام غاظني الحقيقة بس هي قالت لي انا ما اقدرش

يبقى عندي اي قناعات غير كده انا حريصة على الموضوعية

لحد ما اتحكم في القضية واستضافت كل من الاستاذ ناصر امين

وجميل باشا سعيد وعماد الكبير اللي كان مفروض يبقى

موجود من اول الحلقة بس اختفى وقعدوا يدوروا عليه لحد ما لقوه

وبعدين لما سألوه انت اختفيت ليه قالهم: اصل كنت خايف شوية كده

الاستاذ ناصر امين الحقيقة كان رااااااااائع اكثر من راااااائع

واتكلم بقى بمنطق مختلف تماما عن المرافعات

يعني في المرافعات هو لازم يبقى منحاز لعماد

لكن في الاعلام بيتكلم بشكل تقريري وموضوعي وبيقول احنا مافيش

بينا وبين اي انسان اي عداوة كل ما نأمله ان يعاد صياغة علاقة

المواطن بالشرطة بحيث يبقى الاحترام متبادل

وقضاء مصر عادل ونزيه

قبل ما الاستاذ ناصر يتكلم منى قالت منطوق الحكم

وقالت ان القاضي قال انه حكم بحكم مخفف على اسلام ورضا

نظرا لحداثة سنيهما وقلة خبرتيهما استنادا للمادة 17 مش 107 زي ما انا كتبت قبل كده

ياختشي انجغه انجغه انجغه

ماما زمانها جاية جاية بعد شوية جايبة خوازيق وحاجات

شحط عنده 27 سنة نقيب والمحكمة شايفاه نغه

طيب

لا تعقيب على احكام القضاء ولا معقب لحكم الله

كمان منى سألت ناصر امين سؤال قد يعتبره البعض استفزازي

قالت له وش كده مافيه ناس بتقول عماد ده سوابق وبلطجي وانت بتدافع عن ايه

ما الاتنين بلطجية فناصر امين قال هذا الحكم انتصار للقيمة الانسانية

رغم اعتراضي على تصنيف عماد بلطجي بس يا رب يكون سفاح حتى

القيمة الانسانية فوق كل حاجة واي حاجة

- ملحوظة الكاميرا جات على وش الاستاذ جميل وهو يبدي اندهاشه من الكلام ده -

وقال ان الاعلان العالمي لحقوق الانسان واللي شارك فيه قانونيين مصريين

بينص على بنود ويضع حالات طوارئ قد يسمح فيها بتجاوز هذه البنود

منها حتى حرية التعبير والرأي ما عدا حاجتين وهما سلامة النفس وسلامة البدن

وان حتى لو البلد تحت الاحتلال لا يجوز المساس بالحاجتين دول

واتكلم جميل سعيد وقال ان القضية في النقض

واتكلم بقى عماد وسألته منى عن موقفه مثلا من جميل سعيد

فقال لها: واحد واخد عرقه من قضية يبقى لازم يشتغل فيها كويس

:))

والتزم ناصر امين الحيادية وسرد الوقائع بشكل موضوعي

واتصل الناس ومن ضمن اللي اتصلوا واحد بيتخانق مع جميل سعيد ويقول له

يعني انت بتدافع عن ممدوح اسماعيل بتاع العبارة وبتدافع في كل قضايا الفساد

فتدخلت منى على طول وقالت له دي مهنته وكل متهم من حقه ان يكون له محامي

يدافع عنه وما تقدرش تهاجم انسان عشان بيعمل شغله كويس

والكلام ماشي جميل وزي الفل والقعدة هادية وفيه موضوعية شديدة في الحلقة

الى درجة غاظتني وحرقت دمي

لحد ما ربنا بعت لنا من السما ظابط حمار عشان ينصف المظلوم اللي اسمه عماد

ايه بقى؟ بقى طول الحلقة منى وناصر وحتى عماد عمالين يشكروا في

ظباط الشرطة الشرفاء ويقولوا ان الحلات الشاذة دي حتى وان كانت ظاهرة

فجهاز الشرطة مش كله ناس وحشة ده فيه ناس فلة وقلة واللية والعين الجوانية

ده حتى حرس الوزير قمر قمر وملائكة رحمة

واتصلت واحدة اسمها ام عبد الله قالت: لازم يبقى فيه الية للتعامل مع البلطجة

!!!!!!!!!!!!!

حاجة يعني متوازنة بطريقة تغيظ

وفجأة تاتاتااااااااااا منى بتقول: اتصال من ظابط شرطة رفض ذكر اسمه

طيب نتأكد منين انك ظابط شرطة يافندم؟

دي منى اللي بتسأل

ولم يلبث ان تحدث ظابط الشرطة بما يؤكد انه ظابط من ضهر ظابط

صوته واضح طبعا انه حديث السن ونغة زي اسلام

والحياة بالنسبة له يا اما ظباط شرطة يا اما مجرمين ومافيش في النص

بني ادمين عاديين غير طبعا امه واخته وجوز خالته

واسم الله عليه حديث السن رفض يذكر اسمه عشان الداخلية بتحرج عليهم يتكلموا في الاعلام

من غير تصريح والله لهم حق ماهم عارفين المتخلفين اللي هم بيطلقوهم علينا

اولا قال ان جميل سعيد ما اتكلمش وما دافعش

جميل سعيد نفسه قال له يابني ادافع عن ايه لا تعقيب على حكم القضاء

ناصر وعماد بيتكلموا عشان بيحكوا وقائع انا ما عشتهاش

وبعدين قعد يقول كل كلام الظباط اللي هو من قبيل

ان الشعب بيكرهنا وكل الناس بتكرهنا مش عشان احنا وحشين

بس عشان هم اللي مش عايزين يلتزموا بالقانون واي حد بيواجه السلطة التنفيذية

بيكرهها كلهم بيكرهونا كلهم عدوينا نافع هو اللي بيحبنا نافع هو خطيبنا

وكلهم بيقطعوا نفسهم ويشرحوا نفسهم وتفتكروا لما اقابل مجرم

- مع ملحوظة انه تبين من كلامه انه بيعتبر ان كل شعب مجرمين -

وقعد يا قلب امه على الشيزلونج وبك كل عقده بداية من احساسه بالدونية

- واللي بيخليهم يطلعوا ميتين ابونا-

مرورا باحساسه بان كل الشعب متهم حتى تثبت براءته اللي هي مش اكيدة برضه

وان الناس كلها بتكره الشرطة وانهم بيكرهوا الشرطة عشان هم مجرمين

كل الناس يعني

وان من الطبيعي ان الشرطة تتعامل مع المجرمين بالطريقة دي امال تعمل معاهم ايه

وان الناس عايزة تسيب وتصيع: واحكي لحضرتك واقعة ويا ريت نعممها!!انا كنت واقف في كمين

ولقيت عيل عنده اربعتاشر سنة سايق ميكروباص فاتخذت ضده الاجراءات اللازمة

- وما قالش طبعا ايه الاجراءات -

فجات لي امه بتقول لي ده بيصرف على يتامى قلت لها ما ينفعش وهي ماشية

قالت حسبنا الله ونعم الوكيل

تمت

واستدل بالقصة دي ان الناس مش عايزة تمتثل للقانون عشان الست قالت

حسبنا الله ونعم الوكيل وجرحت مشاعره

ثم اسهب في ان الناس بتطاول على الشرطة وتبين ان تصوره عن

عدم التطاول ان المواطن ينضرب ويسكت والا يبقى بيتبجح وبيتطاول

والله يابني يا ح ظابط الغبي كتر خيرك وخير مكالمتك اللي بردت ناري

لقد نزل علينا الخبر كالصاعقة قعدت منى تقول له

يعني هتك العرض مش جريمة؟ يعني التعدي على المواطن مش جريمة

وهو يا قلب امه نازل هبل وغباء

طبعا عماد سخن خصوصا بعد تعقيب جميل سعيد على كلام الظابط

طبعا جميل سعيد مش غبي خالص بس حاول يداري غباء ح الظابط

فقعد يقول: اولادنا الظباط واحنا وصلناهم للاحساس بالدونية

وبرضه الشاب اليافع الجميل اللي متربي مع ولادي

عماد كان في الاول هادي بس طبعا الكلام ده سخنه

ختم بجملة بلييييييييييييييييغه

بليييييييييييييييغه

بليييييييييييييييغه وبسيطة: انا سواق ميكروباظ شقيان اتبهدل كده ليه

المدارس اللي كان اسلام مع ولادك فيها علمته يعمل في الناس كده؟

لو ابنك اللي اتعمل فيه كده كان ح يبقى ده كلامك؟ وللا عشان هو ابن باشا

واحنا ولود وسـ...ولود سواقين ميكروباظ

المحكمة نفسها حكمت عليه ولو ما كانش ظابط كان اخد مؤبد وللا اعدام

وبعدين تاخدني الجيش وعايزني ادافع عن البلد؟

خلص كلام عماد

ردوا يا متعلمين يا بتوع المدارس

حبسنا الحكومة وبقينا قرايب

زي ما مننا بيتسجنوا منهم بيتسجنوا

بس فيه حد احسن من حد

حد بيتسجن عشان بيحب البلد دي

وحد بيتسجن عشان ابن عاق ليها

لاول مرة في تاريخ الشرطة ظابط شرطة يتسجن بجناية

تلات سنين بتهمة تعذيب مواطن غلبان

اسلام نبيه ورضا فتحي اخدوا تلات سنين سجن وفقا للمادة

107

والزامهم بالتعويض والزامهم بمصاريف القضية

وده معناه ان اسلام ورضا طلعوا من الشرطة

مبروك يا بلدي

ووحياة عيونك الحلوة اللي جابت لحمها من العياط

لنجيب لك كل اللي بكوكي تحت رجليكي ونوريكي دموعك غالية علينا قد ايه

الحضور الاعلامي كان مكثف جدا

اما المدونين فمتقدرش تقول مين حضر

تقدر تقول مين ما حضرش

تلاتة

مينا لانه كان خايف

محمد الشرقاوي بيقول انه اتعطل في المرور بس انا

عارفة انه كان خايف يسمع كلمة براءة زي مينا

ووائل عباس لانه مسافر

طبعا العيال جم من الساعة تسعة الصبح لاني كنت عاملة الدعوة

الساعة تسعة على اساس انهم يصحوا تسعة وتجربتي

بتقول ان فيه ناس لما اقول لهم تسعة ح يجوا حداشر

بس البنات الامامير الملتزمات جم تسعة وقعدوا من تسعة لحداشر يدعوا عليا

الجلسة اتأخرت عن حداشر لان عربية الترحيلات اللي جايبة اسلام

اتأخرت احمد الجيزاوي قعد يقر وينبر ويسودها في وشي:

طبعا الحكم ح يبقى لصالح اسلام طيب لو ده حصل عايزين نحضر هتاف

- لا ان شاء الله مش ح يبقى لصالحه

- يابنتي ح يبقى لصالحه ده ابن مدير امن والواد

عماد طلعوه سوابق والقاضي ح يصعب عليه اسلام

عشان التأجيل الكتير اكيد اقصى حاجة ح ياخد ايقاف تنفيذ

- امشي من وشي يا احمد

- طيب ح نهتف نقول ايه

- امشي من وشي يا احمد انا مش باعرف اهتف

- ممكن نقول حسبنا الله ونعم الوكيل

- امشي من وشي يا احمد يا جدعان حد يشيله ده

الشرطة كانت حايسة في توضيب القاعة وقعدت تكركب في الصحفيين

بثينة كامل جات وجايبة معاها مصورين

وادي تحضيرات القاعة

هنا

كان زارر عليا العياط وعمالة امسك نفسي وحاسة ان كلي بيترعش

والد اسلام دخل وكان بيقرا قرآن بس انا ما صورتوش

لان انسانيا دي حاجة مش محترمة مني لو عملت كده

وارجو ان ماحدش من اللي بيعلقوا يغلط في والد اسلام لان ده ابوه

وخلاص اسلام اخد جزاءه ومش مطلوب ولا مفترض من والده

انه ما يقفش جنب ابنه حتى لو ابنه اسلام نبيه

وبعدين دخل الاستاذ جميل سعيد وسلم عليا وقال لي مافيش شتيمة تاني بقى

عيب...حمد الله على سلامة بابا

والله صعب عليا

:)

وبعدين دخل الأستاذ ناصر امين وعماد

وضبونا وسنجفونا عشان المحكمة تعقد وكانت مهمة صعبة

لان الاعلاميين لو كانت المحكمة بتوزع فراخ ببلاش من غير انفلونزا

ما كانوش ح يبقوا بالعدد ده

وبعدين جه اسلام لابس احمر واسد قال لي هو لابس اعدام ليه؟

وهنا كمان

وبعدين....محكمةااااااااا

وادي الحكم

الصوت مش واضح قوي لاننا كنا بعيد

طبعا انا قعدت اعيط وازغرد وانا مش باعرف ازغرد

طلعت صويت وتامر حنتكلم افتكر اني وقعت او حد ضربني

جاني لقاني قصدي ازغرد وانا وبثينة عمالين نقول يحيا العدل

اما مريم من ابناء مصر قعدت تسقف وتصوت كأنها في حفلة عمرو دياب

فيه واحدة صوتت الظاهر حد داس عليها من الصحفيين

ح تسمعوا صوتها في الاخر دي مش انا

انا ومريم اللي صويتنا في الاول بس والله كان قصدي ازغرد

الاعمال بالنيات بقى

عماد بقى فهو اللي بكاني وفرحته يا حبيبي

قعد يقول الحمد لله الحمد لله الله أكبر الله أكبر الناس عرفت اني ليا حق

!!!!!!!!!!!

اهو في الفيديو ده

وهنا كمان عماد بيتكلم مع الصحافة وبيعبر عن فرحته

واحدة بقى في وسط كل ده شايلة عيل وغلبانة

قالت لي انت كنت بتعيطي ليه

قلت لها عشان فرحانة ان اسلام اخد تلات سنين

قالت لي: طب مش حرام عليكي؟ والبنات دولم بتوع الجامعة

- قصدها على المدونات -

كانوا بيزغردوا؟ وللا هو عشان سواق ميكروباظ غلبان؟

يعني سواق الميكروباظ ده لو كان اخوكي كنت ترضي يتهان كده

وبهدلة كرامة وفي الاخر اللي عمل فيه كده ياخد تلات سنين بس؟

قعدت احاول اقنعها اننا كنا خايفين يطلع براءة

بس هي ما اقتنعتش: كل البهدلة دي وتلات سنين بس؟

بس عماد كان راضي وقال الحمد لله انهم عرفوا ان ليا حق

والاستاذ ناصر امين شايف ان ده الاول من نوعه

وكان الاستاذ جميل سعيد قال ان القاضي تعامل مع اسلام

على انه جنحة مش جناية

بس ناصر امين بيقول انه اداله الحد الادنى في الحكم في الجنايات

هنا

جميل سعيد طبعا كان متضايق

هنا

القضية خلصت بسابقة جديدة وخطوة ايجابية

عقبالك يا قنديل انت وابو المكاره وابو سحلة

===

ملحوظة: انا باشكر الاستاذ ناصر امين على مجاملته للمدونين

والحقيقة انا مش ح اشكره ولا ح اشكر المدونين ولا الصحفيين

على اننا عملنا واجبنا واقل من واجبنا ومافيش اي حد يستاهل

الشكر خااااااالص لحد ما نوصل للي احنا عايزينه الا وهو

ان الانسان المصري انسان وله كرامة ومن حقه لما يدخل القسم

بشرفه وكرامته يخرج بيهم زي ما هم من غير مساس

وان الظابط المصري يفهم انه مصري وانه بيخدمنا احنا اللي بندفع

له مرتبه من ضرايبنا وانه انسان مش كلب مسعور يطلقه علينا

اعداءنا واعداءه وانه منا واحنا منه

لحد ما ده يحصل مش من حقنا نفرح ولا من حقنا ننام

الاثنين 5/11 جلسة النطق بالحكم في قضية إسلام نبيه

ما تنسوش يوم الاتنين الجاي ان شاء الله

جلسة النطق بالحكم "على" اسلام نبيه قولوا ان شالله

للتذكرة

http://www.youtube.com/watch?v=4iez20eP-ic

عماد: الله يكرمك يا باشايا باشا معلشيا باشا معلش

اسلام: ياللا يا بن المتناكة

ياللا يا كس امك

عماد: يا باشا انا اسف

:يا باشا انا اسفآآآآآآآآآه آآآآآآآآآآآآآآآه

رضا فتحي: ياللا ياد يا بن المتناكة

اسلام: حلوة يا خول حلوة يا خول

حلوة ها حلوة ياه

ايه رأيك فيها يا بن المتناكة

ايه رايك يا خول يا عرص يا عرص بكرة في الموقف زمايلك كلهم ح يشوفوا الكلام ده يا عرص

عماد: آآآآآآآآآآآه يا باشااااااا

رضا فتحي: قول بولاق مافيهاش راجل يا بن المتناكة

قول انا خول

==

مش عارفة ليه المرة دي وانا باكتب تفريغ الشريط قلبي اتعصر

===

آه ملحوظة لرواد المدونة الجداد

انا متعودة لما احط فيديو تعذيب عماد

افرغ الشريط ودي فكرة مينا مراقب مصري

عشان الناس اللي مشاعرها رقيقة ومش بتتفرج على الفيديو

اللي في الفيديو ده انسان واتعمل فيه كده

مشاعره واحاسيسه زيي وزيك بالظبط ما يفرقش عننا حاجة

هو مش معمول من حديد واحنا مش معمولين من بسكوت

اتفرج على الشريط عشان تحس باحساسه

واذا مش ح تتفرج يبقى ح تعرف غصب عنك اتعمل فيه ايه

خلصت المرافعات في محاكمة اسلام نبيه وبقى حاجة واحدة

اللي هي

مرافعتنا احنا
يا حضارت الكضات يا حضرات المشتشارين
ميت مسا عليكوا
وعلى الصحبة الحلوة دي
بقى احنا يا حضرات الكضات مالناش في الأنون
يعني ما دخلناش مردسة الافوكاتية ولا ذاكرنا: المادة راحت
المادة جات المادة عملت خراج
بس احنا نعرف في حاجات تانية الدنيا والغلب والشقا هم اللي علموهالنا
نعرف في الانسانية والرجولية والمجدعة
بقى يا حضرات المشتشارين اللي حصل ده ما يرضيش ربنا ابدا
وسعادة البشوات الكبار قالوا كلام وعادوا كلام
وباقي لنا كلمتين
يا سعادة الباشا دفاع اسلام باشا بيقول ان عماد كداب
وانه عرى نفسه وفضح نفسه وموت ابوه عشان قرشين
وبيقولوا انها حاجة ماهياش غريبة عليه اكمنه بيشتغل في الصنف
مش هو بس
هو وابوه وامه وعمه ومرات عمه وجده من سنة خمسة وخمسين
طيب يا سعادة الباشا
لمن عماد شغال في الصنف كابر عن كابر
وحرامي وبلطجي كابر عن كابر
امال البعيد عامل زي الخلة اللي عليها زتونة وهفتان ومألحف
وواكلاه الانيميا ليه؟
بقى كل التجارة في الصنف دي مش مخلياه عارف يشتري له
ربع كباب وكفتة يتقوت بيهم؟
ولمن هو بيتاجر في الصنف كابر عن كابر
ليه ملزوم يشتغل على عربية ميكروباظ ماهياش ملكه
وشغال عليها بالاجرة؟ يعني تجارة الصنف ما تغنيهوش
عن شغلانة اللف كعب داير
بلاش
تجارة الصنف ما تجيبلوش عربية ميكروباظ بالقسط حتى؟
ولمن هو شغال في الصنف كابر عن كابر
وكمان بلطجي وبياخد اتاوات من الناس
ايه اللي يخليه يفضح نفسه ويجرسها وابوه يموت بحسرته
لجل ما ياخد قرشين
يعني همن بتوع حروق اللسان دولم ح يدوله كام؟
وتسوى كام ان بيني ادم بارادته يعري نفسه
ويهتك عرضه ويفضح نفسه على النت وكل العالم يتفرجوا عليه؟
ولمن هو هبر الهبرة الكبيرة اياها بعد ما اخد الرشوة من حروق اللسان
لسة بيشتغل على عربية اجري ليه؟
واشمعنى نقى اسلام باشا من دون كل الناس؟
اه
عشان بناتهم تار مش كده؟ اكمن اسلام باشا بيضرب بيد من حديد
على ايدي تجار الصنف
طيب
يعني ما تآخذنيش يا باشا
عندنا احنا ولاد البلد
لما الشيطان يتملك من حد ويحب ينرمي بلاه على عدو
يبطح نفسه عليه
يفتح دماغه عليه
يسرقه سنسلة دهب عيار واحد وعشرين
يرمي له حتة من الصنف
يأجر عليه مزة تطلقه من مراته
انما ما تآخذنيش يا باشا
فينا واطيين اه
فينا اشرار اه
لكن ان واحد يقلع بنطلونه ويفضح نفسه
ويفرج عليه امة لا اله الا الله وامه لا اله خالص كمان؟
دي تبقى وسعت قوي
لا حصلت ولا ح تحصل يا باشا
وبعدين ماهو يا باشا الصوت صوت اسلام باشا
وهي دي لامؤاخذة محتاجة خبير بالدبلون
وللا بالضاكطوراه حتى؟
سعادتك انا واحدة من الناس شفت فيديو عماد ده
يجي عشرميت مرة
وحضرت محاكمات الباشا كلها ما عدا واحدة بس
والحقيقة صوت الباشا بيرن في ودني
سوا لما كان بيقول في المحكمة بصوته العريض: اااففففففنددددمممممم
او وهو بيقول في الشريط: ياااااا عععععععرررررص
والصوت هو هو يا باشا وكلك مفهومية
وبعدين يا باشا ده انت عملت حاجة تشكر عليها
ونشيلك على راسنا من فوق
لوننا خدنا على خاطرنا ساعتها
لكن عرفنا دلوقت انها كانت في الصالح
انت يا باشا سجنت عماد تلات شهور وفي اول القضية
وفي اول جلسة
معناتو ايه الكلام ده؟
معناتو ان لو عماد بيرمي بلاه ع الباشا كان قال في ساعتها
عنننندك.....جاي يا باشا احنا ما اتفقناش على سجن
انا ح اقر واعترف
صح؟
لكن عماد خرج وهو لسة مصمصم يكمل القضية وياخد حقه
يا باشا ايه اللي يخلي بيني ادم في الدنيا بعد الفضيحة والموت وخراب
الديار يستحمل كمان السجن ولسة مصمصم على القضية الا اذا كان
ده حقه ومستحقه وقلبه محروق عليه وناره مش ح تنطفي
الا لما يشفي غليله
مش كده يا باشا؟
وبعدين خليني معاك للاخر يا باشا
عماد وحش
عماد بطلجي
عماد بيتاجر في الصنف
ان شا الله حتى عماد اغتصب عيل صغير
طيب يا باشا عماد ده سواق ميكروباظ
مش متعلم ولا متنور ولا متسأف زي اسلام باشا
مش متربي على العز واكل الوز ولهط البغاشة يا باشا
مالوش اب حنين يعلمه الصح من الغلط
مش انتوا بتقولوا ابوه تاجر مخضروات؟
طيب
يعني ابوه مش باشا ولا هو باشا
زي اسلام باشا اللي هو باشا من ضهر باشا
متعلم ومتنور
وصرفنا عليه دم قلبنا من ضرايبنا عشان
يتعلم ويخرج لنا ظابط قد الدنيا يحمينا ويراعينا
يقوم يتصرف زي المجرمين
طيب اذا كان عماد مجرم فمعاه عذره
لكن اسلام باشا اللي رد على الاجرام باجرام
وهو راضع العز
ايه عذره؟
عماد واد زينا كده جاهل بالانون وعشان كده
ممكن ياخد حقه بدراعه
ده اذا فرضنا ان الغلبان ده ابو دراع زي سلك الكهربا
يعرف ياخد بيه حق وللا باطل
لكن سي اسلام باشا افندي عارف الانون ومذاكره وحافظه
بيعمل زي المجرمين ليه؟
طيب البشوات اللي بيدافعوا عن الباشا
بيقولوا ان عماد كتف واحد وضربه
اخص عليه عماد
بس عماد واد جاهل وتربية بولاق
لكن الباشا الظابط اللي دفعنا فيه دم قلبنا
قبل ما يتخرج وبعد ما اتخرج مرتبات وشقق وعربيات وبدل
وكله من شقانا وعرقنا
بيعمل ليه زي عماد المجرم؟
تاني يا باشا ح تقول لي بيتبلى عليه؟
يوه؟ ولمن هو واصل وقادر وفاجر كده
ما رماهوش بمية نار وخلص ليه؟
ما سلطش عليه بلطجية ياخدوه القطامية ويقلعوه ملط
ويعملوا فيه الفعل الفاحش ليه
ويبقى اكبر باشا يقابلني ع الناصية لو اللي عملوا فيه كده اتقفشوا
كانوا اللي بلطجوا على الصحفيين اتقفشوا
بقى حد ينتقم من حد يقوم يغتصب نفسه ويهتك عرض نفسه
ويموت ابوه بحسرته؟
وعليه من ده كله بايه؟ يا باشا لو اخد مليار دولار برضه
ح يطلع في البيعة دي خسران
لسبب بسيط
ان عماد العين عليه وح تفضل عليه طول عمره
يعني مش ح يقدر ولا يوم واحد يطلع الفلوس اللي قبضها
عشان يفبرك القضية من تحت البلاطة ويستمتع بيها
يعني قبضها للورثة
ده اذا كان قبض حاجة
اما انه بيزيح اسلام عشان يتاجر في الصنف براحته
يا سلام
ما فيه ستميت طريقة يزيحه بيها
كفاية بس يهدده بمطوة ده لامؤاخذة البشوات الظباط اول ما بيشموا ريحة
تهديد بيقولوا يا فكيك
ولمن هو واصل وقادر وفاجر كده
ما ظبطش واحد من الكبار ونقلوه ليه
بلاش ما ظبطش حتى امين شرطة اسم الله ورمى له حتة حشيش في مكتبه ليه
يا باشا قولوا كلام يعقل
الا احنا ما عندناش ايتها احتراض على ان البشوات الظباط دولم ولاد مصر
الحقيقة هم اللي عندهم احتراض اننا ولاد مصر
شايفينا ولاد كلب
وهم ولا الملايكة
احنا نستاهل نتمرمط ونتبهدل ونتفضح ونتعذب
وهم يستاهلوا يتشالوا على الاعناق
ونلف وراهم ونقول: نحن غرابة عت عت
ولاد مصر
صحيح
هم عارفين انهم ولاد مصر؟
عارفين ان مصر هي اللي بتدفع فيهم فلوس
عارفين ان مصر دي هي سواق التوك توك والميكروباظ
والتاكسي والفلاح والموظف والناس اللي بتجري على لقمة عيشها
وتدفع ضرايب اكتر من رجال الاعمال اللي بيدفعوا في السنة
ضرايب خمسة جنيه؟
الحقيقة يا باشا
طول عمر فيه فرق ما بين البشوات اللي بيتعاملوا مع بتوعت السياسية
والظباط اللي بيتعاملوا مع الغلابة امثالنا
ايام عبد الناصر البشوات بتوعت السياسة كانوا بينفخو الفئة المندسة
بس الشهادة لله كان الامن والامان في الشارع مع زعقة الشاويش
هااااااااااااااااا مين هناك
وايام السادات كان البشوات ما وراهمش حاجة غير يحطوا اي حد
من بتوعت السياسة وللا مش بتوعت السياسة في السجن
كان السجن فاتح بقه عمال على بطال
بس الشهادة لله
ما كانش فيهم صخص يمد ايده على ايتها نفر
وكان سوا اللي بيعذب ايام عبد الناصر واللي عمال يحط الكلبشات
في ايدين اللي رايح واللي جاي ايام السادات
كانوا كلهم عبد المأمور
انما يا باشا ايه اللي حصل لولاد مصر دولم
ليه حاسين ان فيه ما بينهم وما بينا عداوة صخصية
احنا لامؤاخذة ما بنكرهش حد
وصحيح دي ساحة الرحمة قبل ساحة العدالة
عشان كده
ارحمونا
وارحموا عماد
وارحموا كل غلبان
ووقعوا اقصى العقوبة على اسلام باشا
ومهما قعد في سجن الشرطة معزز مكرم
برضه مش ح يكافئ اللي عمله في الغلبان ده
وقبل ما تبصوا بعين الرحمة للشاب النقيب
بصوا بعين انسانية لانسان عنده عشرين سنة
ابتدا حياته بحادثة زي دي
وح يعيش عمره كله يتعالج منها
وح يعيش عمره كله يتشاور عليه ويقولوا
ده اللي الظابط هتك عرضه
فكك يا باشا من اللي اخد براءة عشان قتل واحد
كتر خيره
صحيح عذبه
بس اهو مات وارتاح
مش ح يعيش عمره كله في سجن التجربة اللي مر بيها
اما بالنوسبة لخبير الاصوات الكهربائي
يادي الخيبة يا ولاااااد
بقى تجيبه الراجل من فرشته وتقولوا له اشهد
وبعد ما يشهد تقولوا له يا كهربائي؟
لهو ضحك عليكوا وقالوا لكوا انا دكتور فمتو ثانية
وطلع كهربائي؟
خلاص يا باشا
اسمع التسجيل بنفسك
واسمع اسلام بنفسك
وقول لنا صوته ده وللا مش صوته
اما بالنوسبة برضه لموضوع ممكن يمثلوا الصورة
ويركبوا عليها صوت
طيب يعني ده اعتراف ضمني ان ده صوت اسلام
وهم مركبينه على الصورة
طيب يا باشا سؤال بس
هو اسلام باشا كان بيشتم مين كده وبالالفاظ دي؟
ومين ده اللي زمايله في الموقف ح يشوفوا الكلام ده
وكلام ايه اللي ح يشوفوه؟
واذا كان فيه حد قلد صوته زي ما فيه واحد قلد صوت
رشدي اباظة
يعني هو اسلام باشا عبد الحليم حافظ؟
ولو عبد الحليم حافظ برضه بيبان الفرق في الصوت
احنا كمان بنطلب الرحمة
بنطلب الرحمة بينا
وحتى باسلام باشا
ماهو اسلام في لحظة ما عمل كده في الغلبان ده
كان ناسي ربه
دلوقت بيقرا قرآن
طيب كويس انه افتكر ربنا
يا ترى كان ربنا في دماغه وقلبه ساعة
ما كان بيحط العصايا في مؤخرة عماد؟
متهيالي اسلام باشا محتاج يحس انه انسان
مش اله
ومحتاج يحس اننا انسان مش خنازير
ومحتاج يحس ان الناس سواسية كاسنان المشط
متهيالي الحكم باقصى العقوبة على اسلام
ح يبقى في مصلحته قوي
ويمكن يبقى السجن ده فرصه انه يراجع حساباته
مع ربنا ويخرج انسان تاني
ولكم في القصاص حياة يا اولي الالباب

من محاكمة اسلاك: عايزين نعمل حملة لمساندة الوقاحة

http://www.youtube.com/watch?v=0UmPMOCdC98

اولا مبروك ابراهيم عيسى اخد اخلاء سبيل
ووالنبي والنبي ومن نبى النبي نبي
اللي بيشتموه يستنوا عليه شوية لما شم نفسه من الخضة
اسمع يا زميل علك تستفيد
بقى انا مش ح امثل يعني
انا طالعان تلاتيني النهاردة
والنبي ما عارفة ابتدي منين
رحت عاتشي يعني عاتشي
لقيت الشباب اللي دلوقت ناسياهم كلهم
من كتر ما انا مخبوطة على دماغي
مش فاكرة غير احمد عبد الفتاح
دخل اسلام صورناه قعد على جنب وقعدوا
المحامين بتوعه يكلموه ويحايلوه ويهشتكوه
وابتدت الجلسة
القاضي سأل الادعاء عندك حاجة جديدة قالوا لا
وبعدين ابتدت مرافعة جميل سعيد
حلو؟
حلو
طبعا ما اقول لكش يا مواطن يا جاهل
لغة عربية ايه واداء ايه وحماسة ايه ومنطق ايه
وترتيب افكار ايه
وحاجة الكل قاعد منبهر حتى ناصر امين
اللي حياه بعد المرافعة
وحاجة يعني ربنا يستر
وعلى رأي مينا قال لي: مش زمان كانوا
بيقولوا يقتل القتيل ويوكل الهلباوي
دلوقت يقتل القتيل ويوكل جميل سعيد
وهنداوي قال: ده لو حاول يقنعني اني
ما اتولدتش ح اقتنع
عادي يعني عموما انا طول عمري
باعتبر المنطق مش دليل ابدا
على الحق
الحق حاجة والمنطق حاجة تانية خالص
والدنيا علمتني ان اللي بيبقى معاه الحق قوي
مش بيبقى عنده منطق
حلو؟
حلو
اتكلم في الاول عن خبير الاصوات وخلاه
مش خبير ومش اصوات
وبعدين اتكلم عن عماد الكبير
وخلاه مش عماد ومش كبير
واتكلم عن الفيديو بتاع التعذيب
وخلاه مش فيديو ومش بتاع ومش التعذيب
واتكلم عن النيابة وبقت هي راخرة مش نيابة
واتكلم عن مؤامرة الاساءة لسمعة مصر والصحافة الصفراء
حلو؟
لا مش حلو
بقى انا ومينا وتامر ح نتكلم واحمد عبد الفتاح وطقم الصحفيين
والمدونين كنا قاعدين في وش جميل سعيد على الارض
قال الصحافة الصفراء وراح مشاور علينا
يا سيدي غلطة اشارة ما جراش حاجة
ولو ان جميل سعيد كل اشارة بصباعه مش بايده بس
بيبقى دارسها كويس قوي ولها معنى معين
وبعدين فجأة قال: سيدي الرئيس
هناك فارق بين حرية الصحافة
وحرية الوقاحة
وراح باصص لي ومميل عليا وبصوته الجهوري قال: سامعة يا نوارة؟
اه وربنا موجود في الفيديو ده
وبعدين اختتم كلمته بانه كان خايف على مصطفى بكري لبعدين يموت
لانه شافه في تسعين دقيقة وهو دمه محروق من واحد كويتي
كاتب بيقول لا تعايرني ولا اعايرك واذا كان المصريين بينضربوا
بالجزم في بلدهم ببلاش فاهم بينضربوا بالجزم في الكويت بفلوس
ولما قطر بيتقلب بيصرفوا لاهل القتيل خمسة الاف جنيه يعني تمن
غسالة في الكويت
قبل ما تقول والله عداه العيب احنا اللي عملنا في نفسنا كده
الاستاذ جميل بيقول اننا احنا السبب في هذه المقال: شفتوا مصر حصل فيها ايه؟
وبعدين التمس الرحمة والرأفة لاسلام
!!!!!
اممممممم انا اعرف حديث عن الرسول بيقول: من لا يرحم لا يرحم
الياء الاولى عليها فتحة والياء التانية عليها ضمة
===
انا مش ح امثل واقول اني لما وجهت الي الاهانة امام المحكمة
ما اتلهتش وكنت بت بسبع رجالة وبتاع
لا بصراحة اتلهيت وما عرفتش اركز في باقي المحاكمة
مع ان اللي اترافع بعد كده كان الاستاذ عصام جمعة عن رضا فتحي
والحقيقة انا باحترم مرافعات الراجل ده جدا لانه مش بيوجه اهانة لحد
والحقيقة ان الاستاذ جميل ما وجهش في مرافعته دي بالذات اي اهانات
لاي حد غير ليا انا بالاسم
ملحوظة: قبل المحاكمة الاستاذ جميل نادى عليا وسلم عليا
وبعدين قال لي مبروك لبابا
في المحاكمة قرا اية الشعراء وانهم يتبعهم الغاوون وكده
طبعا يجي واحد مينا يقول لي بلاش هس هس
ده كان بيعلق على استشهاد النيابة ببيت شعر
اقول له طيب الاستاذ جميل حط جملة اعتراضية
مالهاش اي علاقة باللي قبلها ولا لها اي صلة
باللي بعدها: يجي واحد يقول لي ابويا كذا وكذا
اقول له خسئت انت وابيك
وعلى اي حال ح نروح بعيد ليه
بعد المحاكمة ولما رفعت الجلسة قلت له: حضرتك يا استاذ جميل
بتهددني بالاسم
قال لي مش باهدد
فمينا قال له برزالته المعهودة: لا هددتها وقلت حرية الوقاحة سامعة يا نوارة
برضه مش ح امثل واقول ان العيال هم راخرين ما اتخضوش
الحقيقة هم بهتوا شوية
وقعدوا يهوبصوا: هاها..هي هي...هو هو...
بس كان باين عليهم الذهول
اسد قال لي: احنا عايزين نتجمع كوقحين ونقف وقفة مساندة
قدام نقابة الوقحين في مساندة للوقاحة
واخرج يا خويا
الاقي الاستاذ جميل بيقول لي انت زي بنتي
!!!!!
هي تمشي
ما هو الابهات بيهزأوا عيالهم قدام الناس عاتشي
والاقيه بيناديني وبيقول لي شوية كلام كده مش فاكرة منه
غير انه بيقول لي انت بتشتميني بس انا معجب بيكي
وتعالي كلمي اللواء نبيه عبد السلام
ولقيت اللواء نبيه عبد السلام بيقول لي الاتي: انا ناصري
وانا عمري ما كلمت عسكري وانا قاعد
وانا عندي عسكري ربى عياله كويس وعلمهم
بانحني له احتراما
وفجأة ياخويا بقيت انا اللي طبقية متعفنة
جالي تليفون من بثينة كامل بتديني تطمينات
على ابراهيم
المهم رجعت لقيته دخل الاودة
رحت داخلة له وقلت له يا سعادة اللواء
انا كان اعتراضي على استخدام اللهجة الطبقية
في الاشارة لخبير الاصوات وسواق الميكروباص
قال لي: لا ما هو ده غلط طبعا
جميل سعيد قال لي: ايه رايك لما قلت ح اشرب حشيش
اظن حاجة زي دي تعجب باباكي قوي
!!!!!!!!!!!
فاللواء نبيه عبد السلام قال له انا باحب باباها
وانا شاعر
قلت له ليه ما الاستاذ جميل شتم الشعرا
قال لي ده قرآن بقى
الحقيقة انه لما قال: والشعراء يتبعهم الغاوون
الم تر انهم في كل واد يهيمون وانهم يقولون مالا يفعلون
وبعدين راح مشاور على اسلام وقال: الا الذين امنوا
وعملوا الصالحات وانتصروا من بعد ما ظلموا
وبعدين راح باصص للاستاذ ناصر امين وقال: وسيعلم
اللذين ظلموا اي منقلب ينقلبون
المهم اني لما قلت له:حضرتك شتمت الشعرا
وقال لي ده قرآن
قلت له: وانا وصلتني رسالة اللي يقول لي ابويا
اقول له خسئت انت وابيك..انا ذكية يا استاذ جميل
فابتسم ابتسامة رضا ان رسالته وصلت
وبعدين قال لي انا معجب بيكي
فقلت له معجب بيا وللا عايز تسجني
فسكت
==
طبعا مينا قال له: وتفتكر الحكم بالسجن ح يبقى كام سنة
قال له: لا ما حدش يعرف اذا كان ح يبقى فيه سجن وللا لا
قال له انا مش باقول على اسلام انا باقول على نوارة
ناوي تسجنها كام سنة
فقال له: مين اللي يقدر يسجن نوارة
فمينا برضه برزالته المعهودة قال له: مين اللي يقدر ساعة يحبس نوارة
هاهاهاها
الحقيقة لولا سندة مينا ليا كان زماني بالق في الجزمة
لاني وبامانة شديدة بهت
خصوصا لما جيمي قعد يزعق لي ويقول لي اوعي تتحبسي
كده يعني هم حاطينك في دماغهم وعايزين يحبسوكي
طيب اوعى اتحبس ازاي يعني؟
بس الحقيقة مينا واد مجدع صح
الحقيقة هو والعيال كانوا سندة لان جميل سعيد
كل شوية يسحبني ويديني في جنابي وهو مبتسم
وانا صحيح بطحجية كده ع النت
لكن لما حد بيفاجئني باتنح
وبعدين جات صحفية قالت لي: مدام ليكي دلة على جميل سعيد كده
قولي له يخلينا نصور اسلام وهو ماسك المصحف اصله ماسك المصحف جوة
!!!!!
يعني الطم يقولوا الولية اتجننت؟ هو عشان بيهزأني وهو مبتسم
يبقى ليا دلة عليه
المهم دخلت جري اصور اسلام وهو ماسك المصحف بس لما شافني
خبى المصحف مش عارفة ليه
وانا خارجة من القاعة الاستاذ جميل سعيد برضه قال لي: كنتي
بتعملي ايه يا نوارة جوة؟
قلت له كنت عايزة اصور اسلام وهو ماسك المصحف
بس هو خباه الظاهر خايف يتمسك اخوان
قال لي: وانت بقى بتشتميني ليه؟
قلت له مش باشتمك
قال لي لا حاطاني في دماغك
قلت له عشان خايفة منك
ليه؟
قلت له عشان زي ما جمعت معلومات ضايقتك
جمعت معلومات انك اهم محامي في الشرق الاوسط
وده معناه انك ممكن تجيب براءة لاسلام
قال لي وافرضي
قلت له لا ده يبقى ظلم
قال لي ظلم ليه ان الحكم الا لله انت ح تعقبي على حكم الله
قلت له ما انا اقدر اقتل ده وشاورت على جيمي
واقول ده عمره
قال لي لا القتل فعل ارادي لكن الحكم لله
هو انا ح اسلك مع جميل سعيد
ده جاب براءة لعبد الرحمن حافظ يا مؤمن
ها
ح نعمل الوقفة الاحتجاجية لمساندة الوقاحة امتى؟

فيديوهات محاكمة اسلاك نبيه

اسكتوا اسكتوا اسكتوا
اما النهاردة حصلت حتة حاجة
لا حتت حاجات
ح ابقى ح احكي لكوا بعدين
اتسلوا في الفيديوهات
وامانة امانة امانة تسئلوا عنها يوم القيامة
تتفرجوا على مرافعة الاستاذ جميل سعيد عشان هو قال لي كلمتين
اتشهرت يا عيال واسمي اتقال في مرافعة
لولولولولولوليييييييي
خدوا الفيديوهات
كل الفيديوهات على اللنك ده

http://www.youtube.com/nawaranegm

بس امانة امانة امانة
زي ما انتوا راسيين ها

لما اروح ح نرغي بقى
الجلسة اتحجزت للحكم يوم
5 نوفمبر

هدية من الجيزاوي: اسمعوا ضباط الشوربة بيتكلموا ازاي

اصل احمد الجيزاوي محامي

وجه جلسة اسلاك بالصدفة عشان كان عنده قضية بيترافع فيها

قعد جنب القفص كاي محامي محترم

جنب القفص بقى فيه بعض الاخوة الضباط اللي جايين تطوع

يحرسوا صديقهم وزميلهم من عيون المصورين

والحساد طبعا عشان انا ملاحظة ان معظم المدونات النسائية

بتقول على اسلاك انه وسيم

والنبي ما عارفة انا اللي مش بافهم في الرجالة

وللا ده من كتر كرهي ليه شايفاه زي القرد ولا وسيم ولا حاجة

المهم قوووووووم هذوه الصخص اللئيم المدعو المتر احمد الجيزاوي

ضرب صحوبية مع الزملاء الاعزاء وفتح الموبايل وسمعنا احلى كلام

اسمع بنفسك كلام الضباط وهم بيقولوا احنا بنعمل كده مع العيال الشمامين والصيع

على اساس انهم يستاهلوا طبعا والقانون بينص على ان الشمام والصايع

يتحط عصا في مؤخرته

اكيد

هو ده المنطق وللا مش هو ده المنطق يا متعلمين يا بتوع المدارس

جه احمد وقال لي انا عارف ان انت ووائل عباس اللي ماسكين قضية اسلاك

وح اديكوا التسجيل ده عشان تنشروه عندكوا

بس انا ووائل الشهادة لله مافيناش خصلة اننا نضرب على مجهود غيرنا

واهو برضه لما نروح في داهية كلنا ناخد ثواب الجماعة

ده لينك الفيديو

وده الفيديو

وقائع محاكمة اسلاك

اسلام كان خااااااااااااااسس خالص واعصابه كانت بايظة

الجلسة اتأجلت لبعد بكرة ان شاء الله

5/9

انا دخلت والنيابة بتترافع وسجلت اللي لحقته من مرافعة النيابة

النيابة كانت بتفند ادعاءات الدفاع

ومنها كلام جميل سعيد ان اللي في الشريط ده مش هتك عرض

ده تحضير

وتسائلت النيابة: هل من اجراءات الافراج عن المحتجز وضع عصا في دبره؟

ودي مرافعة النيابة

هنا

وهنا

وبعدين ترافع الاستاذ ناصر امين ورد على كل الشتايم اللي شتمها له الدفاع

والحقيقة الدفاع كان بيشتم الاستاذ ناصر وكل منظمات المجتمع المدني وقال الاستاذ ناصر

ان مصر نفسها عضوة في المجلس العالمي لحقوق الانسان

وان حقوق الانسان دي مش شتيمة يعني ولا سب دين

ومرافعته

هنا

وهنا

وهنا

وبعدين اترافع الاستاذ حمدي وقال

طيب الاستاذ ناصر اتكلم عن براءة مراكز حقوق الانسان

من الاساءة لسمعة مصر

طيب يعني احنا بقى مالنا ومال الكلام ده كله

ايه اللي دخل التآمر على سمعة مصر ودخلنا الدفاع في متاهات

دي قضية فردية واحد اساء استغلال سلطته وزي ما النيابة قالت

اصحاب السلطة هم خدامين الشعب مش شغلتهم يذلوا الشعب

ومرافعة الاستاذ حمدي

هنا

وهنا

وبعدين تقدم مندوب عن جميل سعيد بيطلب تأجيل القضية

بقية فريق الدفاع عن اسلاك قالوا للقاضي مافيش داعي للتأجيل يعني

ما كلنا موجودين وجميل سعيد مش ح يزود ولا ح ينقص

القاضي قال لهم يعني عايزين تأجلوا وللا لا

الجنزوري قال يعني اجماع من فريق الدفاع عن اسلام بعدم تأجيل القضية وحجزها للحكم

الكلام ده هنا

وبعدين انور عبد الله اترافع واكل دماغنا الصراحة

واللي يقوله يعيده واللي يعيده يزيده: وخبير الاصوات الكهربائي بتاع الدبلوم

واسلام بمكانته الاجتماعية محبوس بينما عماد سواق الميكروباص قاعد برة بيشرب شاي وقهوة

مرافعاته هنا بقى عشان انا اتخنقت من كلامه

والكهربائي اخد كورس ودان والشاي والقهوة اللي سممهم لعماد

يعني هو اسلام في مستشفى الشرطة ما بيشربش نسكافيه كمان؟

مرافعاته على اربع لينكات من كتر رغيه

هنا

وهنا

وهنا

وهنا

وبعدين تقدم الاستاذ عادل ما اعرفش اسمه التاني

وقعد يقول انه هو في حقوق الانسان بس هو مش زيهم

هو حلو

وهم وحشين

وهو عارف خباياهم

وصحيح ان ناصر امين مش موقع على بيان منظمات حقوق الانسان

اللي بتطالب بان مصر ما تبقاش في المجلس العالمي لحقوق الانسان

بس دي مؤامرة

هم مقسيمن ادوارهم

هو يظبط لهم القضايا وهم يكتبوا البيانات

اه وربنا

الاستاذ ناصر امين كان ح يضحك بصوت عالي ومسك نفسه

المؤامرة الكبرى

هنا

وهنا

وهنا

وبعدين الجلسة اتأجلت لبعد بكرة

لسة فيه شوية فيديوهات

بس بصوا اسلام عامل ازاي

هنا

محاكمة اسلام نبيه يوم الاحد القادم

http://www.youtube.com/watch?v=4iez20eP-ic

يوم الاحد 2 سبتمبر استكمال محاكمة اسلاك نبيه

وان شاء الله متوقع تبقى حكم

للتذكير ده تفريغ الشريط

عماد: الله يكرمك يا باشا
يا باشا معلش
يا باشا معلش
اسلام: ياللا يا بن المتناكة
ياللا يا كس امك
يا باشا انا اسف عماد:
يا باشا انا اسف
آآآآآآآآآه
آآآآآآآآآآآآآآآه
رضا فتحي: ياللا ياد يا بن المتناكة
اسلام: حلوة يا خول حلوة يا خول
حلوة
ها
حلوة ياه
ايه رأيك فيها يا بن المتناكة
ايه رايك يا خول يا عرص
يا عرص
بكرة في الموقف زمايلك كلهم ح يشوفوا الكلام ده يا عرص
عماد: آآآآآآآآآآآه يا باشااااااا
رضا فتحي: قول بولاق مافيهاش راجل يا بن المتناكة
قول انا خول

التفريغ ده للناس اللي مشاعرها رقيقة ومش عايزة تشوف الفيديو
==

ما حدش يجي يقول لي بتكتبي كلام قبيح على مدونتك

الكلام ده مرخص من الحكومة نفسها

من بق الباشا عدل

وناقل الباشا ليس بباشا

وقائع محاكمة إسلام نبيه

النهاردة كان زملاته في البوليس كتير قوي
زي ما المدونين كانوا عددهم لا بأس به برضه
حضرت مريم وسكوت ح نصوت ومينا ووائل عباس واسد
واحمد عبد الفتاح اللي عمل فينا مغرز وخضنا
لقيت مينا بيكلمني وبيقول لي احمد عبد الفتاح اتصل
وبيقول انه راح بدري وان الحضور الامني مكثف ومشددين الحراسة
ومانعين الدخول والظاهر الجلسة ح تبقى سرية وح تتعمل بدري
وحسسني ان فيه مفاعل نووي ح ينفجر في القاعة
وبعدين لقيت مريم بتصوصو في التليفون: انا جيت انا وسكوت ح نصوت
وقاعدي مستنينكوا جوه
وكمان جه المدون بولوتيكا ولوبي بتاعة
sinfulangel

مينا اعمل اضغط هنا

طيب اضغط عشان تشوف الفيديو

وبعدين فيه محامي من بتوع اسلام

ناسية اسمه بس موجود في الفيديو

وجه جديد بس اترافع وقال نفس الكلام اللي قاله جميل سعيد

قبل كده بخصوص ان حقوق الانسان دول ناس بطالة

ومشيهم بطال وامريكا مأشفرة عليهم اليومين دولم

وعشان كده هم فبركوا الفيديو عشان يشوهوا سمعة مصر

وجاب ملف فيه اخبار من الجرايد بتقول ان بتوع حقوق الانسان

زعلانين ان مصر دخلت لجنة حقوق الانسان

- طيب هو مين فرحان؟ -

المرافعة كاملة على اللينك ده

وده

وبعدين الاستاذ جميل سعيد قال انه مش بيتفرج ع الفضائيات

وانه بالصدفة المحضة البحتة الفحتة المحتة الكحتة

شاف في القاهرة اليوم برنامج بتاع عمرو اديب بيقول فيه

ان عماد بلطجي وانه ضرب اسرتين لوحده

رجاء مراجعة صورة عماد ووزنه
والمرافعة بتاعة الاستاذ جميل

على اللنك ده

وده

وبعدين ابتدى الاستاذ عصام جمعة يترافع عن رضا فتحي

امين الشرطة

الحقيقة وبالرغم من اعترافي بمنتهى الارتياح اني منحازة لعماد الكبير

وانني اتمنى ان تأخذ العدالة مجراها ويتحبس كل من اسلام نبيه ورضا فتحي

عدد لا بأس به من السنوات

الا انني يجب ان اشيد بمرافعة الاستاذ عصام جمعة

انا كمان رحت حييته

بالرغم من انها مرافعة قوية وخطرة على موقفنا

احنا وعماد يعني فيما يخص امين الشرطة يعني لانه

ما يخصوش يدافع عن اسلام

الا انها مرافعة قانونية لا فيها تجريح في سواق الميكروباص ولا الدبلون

ولا اي اهانة لا لمنظمات حقوق الانسان ولا لشخص عماد ولا لخبير الاصوات

ولا للفضائيات ولا للصحافة ولا قال كلمة واحدة فيها جرح او تحقير لانسان

وكل كلامه عن ثغرات في التحقيق وفي الاقوال

يعني بيعمل شغله صح

بيتكلم قانون وبس

وعشان كده رحت حييته بعد الجلسة

ومرافعته هنا
وهنا

وهنا

وهنا كمان
ودي كمان

طولوا بالكوا
عشان خاطري

والله مرافعة تستاهل تشوفوها

قربنا نخلص

الفيديو القبل الاخير

وده الاخير

وبعدين الدفاع تقدم ولكن النيابة سبقت وطلبت التأجيل

عشان تطلع على المستندات اللي قدمها دفاع اسلام

وهي ملف اخبار حقوق الانسان

ومحضر ضد عماد

مش عارفة ليه الدفاع اتضايق وكأنهم واثقين مثلا

انه ح يطلع على طول او ح ياخد براءة

وجميل سعيد قال ان اسلاك في الاحتجاز الى مدة ما يقرب

من العقوبة

والمحامي التاني واحد صاحبي انت ما تعرفوش قال خلاص

نسحب الملفات تاني لو دي ح تعطل الحكم

يا سلام

للدرجة واثقين ان الحكم في صالحهم في صالحهم

حتى من غير ملفات ولا محاضر ضد عماد؟

منين الثقة دي؟

الفيديو اهو

====

هوامش: قبل عماد تلات قضايا واحدة سرقة بالاكراه

وصاحبها معترف واضح جدا انه معترف بالاكراه هو كمان

لان نفس المجني عليه قال انه اتنشل مش انه اتسرق بالاكراه

واتنين قضايا حيازة مخدرات واحدة حشيش والتانية بانجو

وقضية الحشيش بالذات محرر المحضر قال انه فتح السيجارة

ولقاها فيها حشيش قام لفها تاني زي الشاطر وسلمها للنيابة

شرطا ان محرر المحضر كاتب انه ظبط المتهم وهو بيشرب السيجارة

يعني هو اخد السيجارة المشروبة فتحها وشاف اللي فيها ولفها تاني

طبعا دي ناس كلها معترفة

زي ما انتوا فاهمين

الاعتراف نص الجدعنة

====

الاستاذ جميل سعيد قال ان لما مدير المباحث نزل

وعرف ان عماد ضرب اسرتين

ارتعد

يامي يامي

وخاف

امسي يا عفريت امسي يا عفريت

اسم الله عليه من الخضة

====

في الاخر الاستاذ ناصر امين

مسك عماد

الشرير

البلطجي

الرجل الاخضر

ابو رجل مسلوخة

وقال له: يا عماد ارجوك امشي من وشهم

هم عايزين يئذوك ويطلعوك انسان وحش

والتاني عمال يبص له بمنتهى الطفولة والذهول

اهو

شوفوا فيديو الرجل الاخضر

====

نسيت حاجة مهمة قوي

جميل سعيد وهو بيتكلم عن حروق اللسان

وبيقول انهم ناس واطية ودون وبطالين

لقيته بيقول وانا باتصفح النت عشان اشوف ايه حقوق الانسان

لقيت موقع لحقوق الانسان بتاع وائل عباس

وهو بيطالب الامم المتحدة بالتدخل في شئون مصر

واعادة التحقيق في مقتل السادات

وده معناه انه غير معترف بالسلطات المصرية

وبيطالب بالتدخل الاجنبي

انا سمعت كده وداني سخنت وما حسيتش غير وعمالة اعيط

واسب والعن: الله يخرب بيته السادات ده يا وائل اللي ح يوديك

في داهية ويودينا معاك

وقعدت اعيط بقية المرافعة

بعد ما خلصت: قلت له وائل عباس مالوش دعوة بحقوق الانسان

حضرتك مالك وماله

قال لي: اصل انا مش خبير في الحاجات دي

========

يييييييييييي سقط سهوا تاني

دماغ ماك جه بعد المحاكمة

والجلسة اتأجلت ليوم 2 سبتمبر وبقيت فرحانة

وح ارقص وتقريبا زغردت بس بصوت واطي

حملة افترائية استباقية على عماد الكبير

اتصل بيا دلوقت حالا الاستاذ ناصر امين محامي عماد الكبير
وقال لي ان امبارح قام بعض البلطجية باختلاق عركة
وحصلت خناقة وكسروا ميكروباصات في بولاق
وعماد ما كانش طرف في الموضوع خالص
ولكن رئيس المباحث نزل واول ما نزل قال: هاتوا لي عماد
فعماد اتصل بالاستاذ ناصر فالاستاذ قال له ما يروحش ولو القسم
عايزه يبعت له بشكل رسمي
فالمأمور قال: خلاص خلاص
!!!!!!!!!
وبعدين الشهود والمضروبين قالوا ان عماد مالوش دخل بالموضوع
وانه ما كانش طرف في الخناقة
لكن ظهر بعض الناس اللي افتعلوا الخناقة وقالوا ان عماد كان طرف فيها
والغريبة بقى
ان القاهرة اليوم نزلت على طول القسم
وسجلت مع الناس دي اللي اتكلموا عن عماد وقالوا انه ضربهم
المفروض ان عماد بكرة ح ياخد الشهود اللي شهدوا ان عماد
ما لوش دخل في الخناقة ويروح النيابة
===
وده اسمه ايه ده بقى؟
قبل الجلسة الاخيرة بخمس ايام يتم التآمر بالشكل ده
عشان عماد ما ياخدش حقه
ويتعمل عليه كمان حملة اعلامية
احنا كنا فاكرين ان القاهرة اليوم محايدة
ما كناش نعرف انها قناة فضائية فرع وزارة الداخلية
==

http://www.youtube.com/watch?v=4iez20eP-ic

اخدت فكرة تفريغ الشريط من

:مراقب مصري
عماد: الله يكرمك يا باشا
يا باشا معلش
يا باشا معلش
اسلام: ياللا يا بن المتناكة
ياللا يا كس امك
يا باشا انا اسف عماد:
يا باشا انا اسف
آآآآآآآآآه
آآآآآآآآآآآآآآآه
رضا فتحي: ياللا ياد يا بن المتناكة
اسلام: حلوة يا خول حلوة يا خول
حلوة
ها
حلوة ياه
ايه رأيك فيها يا بن المتناكة
ايه رايك يا خول يا عرص
يا عرص
بكرة في الموقف زمايلك كلهم ح يشوفوا الكلام ده يا عرص
عماد: آآآآآآآآآآآه يا باشااااااا
رضا فتحي: قول بولاق مافيهاش راجل يا بن المتناكة
قول انا خول

التفريغ ده للناس اللي مشاعرها رقيقة ومش عايزة تشوف الفيديو
===
بقي سؤال: بفرض ان عماد اتخانق وللا ضرب وللا انضرب
وده ما حصلش
لكن بفرض ان فيه ناس استفزوك انت في الشارع
ودفعوك لخناقة
هل ده يبرر ان اسلام يدخل في مؤخرته عصايا
من سنتين؟
افهم من كده ان اسلاك ده مكشوف عنه الحجاب
وعارف ان بعد سنتين عماد ح يتخانق
فقال يسبق ويعذبه
وهل البني ادم لما يتخانق
وللا حتى يبقى بلطجي وابن ستين في سبعين
هل التعامل القانوني معاه انه يتعذب؟ ويهتك عرضه؟
اذا دي المعاملة القانونية يفهمونا
عشان نهاجر
==

الاستاذ ناصر اتصلت بيه قال لي ان عماد

راح النهاردة النيابة ومعاه الشهود والناس اللي انضربت

واللي شهدوا ان عماد ما كانش موجود في اثناء الخناقة اساسا

وكان قاعد ع القهوة

ملحوظة تانية اللي نزل مش مأمور القسم

ولكن رئيس المباحث

وهو اللي دور على عماد وراح له ع القهوة

يقول له اركب معايا البوكس

ربنا يستر انا مش عارفة الناس دي مش خايفة من ربنا وللا ايه؟

عم سعيد الكونستابل

عم سعيد كونستابل طيب محترم

طموح عصامي

فضل يكافح لحد ما اترقى من تحت السلاح

وبقى ظابط

مراته الست نفيسة

صحيح ست غلبانة وأمية ما تعرفش تقرا ولا تكتب

بس كانت برضه ست عصامية

وواعية

عرفت قيمة العلم اللي هي اتحرمت منه

وعلمت عيالها

وكتر خير مجانية التعليم

واحد منهم طلع ظابط بوليس

وواحد فيهم كان نابغة

طلع بعثة على حساب الدولة

في الستينيات

واتعلم وبقى محامي وبعدين بقى قاضي

ودلوقت بقى واحد من اكبر محامين الشرق الاوسط

يا زين ما ربيت يا عم سعيد انت والست نفيسة

تعبتوا وشقيتوا على عيالكوا برغم فقركوا وغلبكوا

وعرفتوا تطلعوهم احسن منكوا

احسن منكوا؟

مش عارفة

بس على الاقل متعلمين اكتر منكوا

وظروفهم المادية احسن منكوا بكتير

بس كنت ح تعمل ايه يا عم سعيد لو سمعت ابنك وهو واقف في المحكمة

يشتم في الغلابة اللي انت منهم

وكنتي ح تعملي ايه يا ست نفيسة لو سمعتي ابنك وهو بيتريق ع الدبلون

كنتي ح تقولي له: ماله يابني الدبلون ما انا ما باعرفش اقرا ولا اكتب وعلمتك وربيتك

ولولايا ما كنتش بقيت محامي كبير ملو هدومك؟

====

عشان ما حدش يسألني جبتي المعلومات دي منين

الله يرحمك يا عم سعيد يا كونستابل يا عصامي

لو كنت عايش كنت فكرتك بالمأمور شوقي مقلد

اللي أجر لك الدور الاولاني في بيته

ايام ما اتنقلت لشبين الكوم

كان جميل واخوه لسة عيال

وما كنتش تعرف لا انت ولا الست نفيسة

ان فيهم واحد ح يكبر بشقاكوا

ويشتم الناس اللي انتوا منهم وهم منكوا