Thursday, 6 September 2007

خلصت المرافعات في محاكمة اسلام نبيه وبقى حاجة واحدة

اللي هي
مرافعتنا احنا
يا حضارت الكضات يا حضرات المشتشارين
ميت مسا عليكوا
وعلى الصحبة الحلوة دي
بقى احنا يا حضرات الكضات مالناش في الأنون
يعني ما دخلناش مردسة الافوكاتية ولا ذاكرنا: المادة راحت
المادة جات المادة عملت خراج
بس احنا نعرف في حاجات تانية الدنيا والغلب والشقا هم اللي علموهالنا
نعرف في الانسانية والرجولية والمجدعة
بقى يا حضرات المشتشارين اللي حصل ده ما يرضيش ربنا ابدا
وسعادة البشوات الكبار قالوا كلام وعادوا كلام
وباقي لنا كلمتين
يا سعادة الباشا دفاع اسلام باشا بيقول ان عماد كداب
وانه عرى نفسه وفضح نفسه وموت ابوه عشان قرشين
وبيقولوا انها حاجة ماهياش غريبة عليه اكمنه بيشتغل في الصنف
مش هو بس
هو وابوه وامه وعمه ومرات عمه وجده من سنة خمسة وخمسين
طيب يا سعادة الباشا
لمن عماد شغال في الصنف كابر عن كابر
وحرامي وبلطجي كابر عن كابر
امال البعيد عامل زي الخلة اللي عليها زتونة وهفتان ومألحف
وواكلاه الانيميا ليه؟
بقى كل التجارة في الصنف دي مش مخلياه عارف يشتري له
ربع كباب وكفتة يتقوت بيهم؟
ولمن هو بيتاجر في الصنف كابر عن كابر
ليه ملزوم يشتغل على عربية ميكروباظ ماهياش ملكه
وشغال عليها بالاجرة؟ يعني تجارة الصنف ما تغنيهوش
عن شغلانة اللف كعب داير
بلاش
تجارة الصنف ما تجيبلوش عربية ميكروباظ بالقسط حتى؟
ولمن هو شغال في الصنف كابر عن كابر
وكمان بلطجي وبياخد اتاوات من الناس
ايه اللي يخليه يفضح نفسه ويجرسها وابوه يموت بحسرته
لجل ما ياخد قرشين
يعني همن بتوع حروق اللسان دولم ح يدوله كام؟
وتسوى كام ان بيني ادم بارادته يعري نفسه
ويهتك عرضه ويفضح نفسه على النت وكل العالم يتفرجوا عليه؟
ولمن هو هبر الهبرة الكبيرة اياها بعد ما اخد الرشوة من حروق اللسان
لسة بيشتغل على عربية اجري ليه؟
واشمعنى نقى اسلام باشا من دون كل الناس؟
اه
عشان بناتهم تار مش كده؟ اكمن اسلام باشا بيضرب بيد من حديد
على ايدي تجار الصنف
طيب
يعني ما تآخذنيش يا باشا
عندنا احنا ولاد البلد
لما الشيطان يتملك من حد ويحب ينرمي بلاه على عدو
يبطح نفسه عليه
يفتح دماغه عليه
يسرقه سنسلة دهب عيار واحد وعشرين
يرمي له حتة من الصنف
يأجر عليه مزة تطلقه من مراته
انما ما تآخذنيش يا باشا
فينا واطيين اه
فينا اشرار اه
لكن ان واحد يقلع بنطلونه ويفضح نفسه
ويفرج عليه امة لا اله الا الله وامه لا اله خالص كمان؟
دي تبقى وسعت قوي
لا حصلت ولا ح تحصل يا باشا
وبعدين ماهو يا باشا الصوت صوت اسلام باشا
وهي دي لامؤاخذة محتاجة خبير بالدبلون
وللا بالضاكطوراه حتى؟
سعادتك انا واحدة من الناس شفت فيديو عماد ده
يجي عشرميت مرة
وحضرت محاكمات الباشا كلها ما عدا واحدة بس
والحقيقة صوت الباشا بيرن في ودني
سوا لما كان بيقول في المحكمة بصوته العريض: اااففففففنددددمممممم
او وهو بيقول في الشريط: ياااااا عععععععرررررص
والصوت هو هو يا باشا وكلك مفهومية
وبعدين يا باشا ده انت عملت حاجة تشكر عليها
ونشيلك على راسنا من فوق
لوننا خدنا على خاطرنا ساعتها
لكن عرفنا دلوقت انها كانت في الصالح
انت يا باشا سجنت عماد تلات شهور وفي اول القضية
وفي اول جلسة
معناتو ايه الكلام ده؟
معناتو ان لو عماد بيرمي بلاه ع الباشا كان قال في ساعتها
عنننندك.....جاي يا باشا احنا ما اتفقناش على سجن
انا ح اقر واعترف
صح؟
لكن عماد خرج وهو لسة مصمصم يكمل القضية وياخد حقه
يا باشا ايه اللي يخلي بيني ادم في الدنيا بعد الفضيحة والموت وخراب
الديار يستحمل كمان السجن ولسة مصمصم على القضية الا اذا كان
ده حقه ومستحقه وقلبه محروق عليه وناره مش ح تنطفي
الا لما يشفي غليله
مش كده يا باشا؟
وبعدين خليني معاك للاخر يا باشا
عماد وحش
عماد بطلجي
عماد بيتاجر في الصنف
ان شا الله حتى عماد اغتصب عيل صغير
طيب يا باشا عماد ده سواق ميكروباظ
مش متعلم ولا متنور ولا متسأف زي اسلام باشا
مش متربي على العز واكل الوز ولهط البغاشة يا باشا
مالوش اب حنين يعلمه الصح من الغلط
مش انتوا بتقولوا ابوه تاجر مخضروات؟
طيب
يعني ابوه مش باشا ولا هو باشا
زي اسلام باشا اللي هو باشا من ضهر باشا
متعلم ومتنور
وصرفنا عليه دم قلبنا من ضرايبنا عشان
يتعلم ويخرج لنا ظابط قد الدنيا يحمينا ويراعينا
يقوم يتصرف زي المجرمين
طيب اذا كان عماد مجرم فمعاه عذره
لكن اسلام باشا اللي رد على الاجرام باجرام
وهو راضع العز
ايه عذره؟
عماد واد زينا كده جاهل بالانون وعشان كده
ممكن ياخد حقه بدراعه
ده اذا فرضنا ان الغلبان ده ابو دراع زي سلك الكهربا
يعرف ياخد بيه حق وللا باطل
لكن سي اسلام باشا افندي عارف الانون ومذاكره وحافظه
بيعمل زي المجرمين ليه؟
طيب البشوات اللي بيدافعوا عن الباشا
بيقولوا ان عماد كتف واحد وضربه
اخص عليه عماد
بس عماد واد جاهل وتربية بولاق
لكن الباشا الظابط اللي دفعنا فيه دم قلبنا
قبل ما يتخرج وبعد ما اتخرج مرتبات وشقق وعربيات وبدل
وكله من شقانا وعرقنا
بيعمل ليه زي عماد المجرم؟
تاني يا باشا ح تقول لي بيتبلى عليه؟
يوه؟ ولمن هو واصل وقادر وفاجر كده
ما رماهوش بمية نار وخلص ليه؟
ما سلطش عليه بلطجية ياخدوه القطامية ويقلعوه ملط
ويعملوا فيه الفعل الفاحش ليه
ويبقى اكبر باشا يقابلني ع الناصية لو اللي عملوا فيه كده اتقفشوا
كانوا اللي بلطجوا على الصحفيين اتقفشوا
بقى حد ينتقم من حد يقوم يغتصب نفسه ويهتك عرض نفسه
ويموت ابوه بحسرته؟
وعليه من ده كله بايه؟ يا باشا لو اخد مليار دولار برضه
ح يطلع في البيعة دي خسران
لسبب بسيط
ان عماد العين عليه وح تفضل عليه طول عمره
يعني مش ح يقدر ولا يوم واحد يطلع الفلوس اللي قبضها
عشان يفبرك القضية من تحت البلاطة ويستمتع بيها
يعني قبضها للورثة
ده اذا كان قبض حاجة
اما انه بيزيح اسلام عشان يتاجر في الصنف براحته
يا سلام
ما فيه ستميت طريقة يزيحه بيها
كفاية بس يهدده بمطوة ده لامؤاخذة البشوات الظباط اول ما بيشموا ريحة
تهديد بيقولوا يا فكيك
ولمن هو واصل وقادر وفاجر كده
ما ظبطش واحد من الكبار ونقلوه ليه
بلاش ما ظبطش حتى امين شرطة اسم الله ورمى له حتة حشيش في مكتبه ليه
يا باشا قولوا كلام يعقل
الا احنا ما عندناش ايتها احتراض على ان البشوات الظباط دولم ولاد مصر
الحقيقة هم اللي عندهم احتراض اننا ولاد مصر
شايفينا ولاد كلب
وهم ولا الملايكة
احنا نستاهل نتمرمط ونتبهدل ونتفضح ونتعذب
وهم يستاهلوا يتشالوا على الاعناق
ونلف وراهم ونقول: نحن غرابة عت عت
ولاد مصر
صحيح
هم عارفين انهم ولاد مصر؟
عارفين ان مصر هي اللي بتدفع فيهم فلوس
عارفين ان مصر دي هي سواق التوك توك والميكروباظ
والتاكسي والفلاح والموظف والناس اللي بتجري على لقمة عيشها
وتدفع ضرايب اكتر من رجال الاعمال اللي بيدفعوا في السنة
ضرايب خمسة جنيه؟
الحقيقة يا باشا
طول عمر فيه فرق ما بين البشوات اللي بيتعاملوا مع بتوعت السياسية
والظباط اللي بيتعاملوا مع الغلابة امثالنا
ايام عبد الناصر البشوات بتوعت السياسة كانوا بينفخو الفئة المندسة
بس الشهادة لله كان الامن والامان في الشارع مع زعقة الشاويش
هااااااااااااااااا مين هناك
وايام السادات كان البشوات ما وراهمش حاجة غير يحطوا اي حد
من بتوعت السياسة وللا مش بتوعت السياسة في السجن
كان السجن فاتح بقه عمال على بطال
بس الشهادة لله
ما كانش فيهم صخص يمد ايده على ايتها نفر
وكان سوا اللي بيعذب ايام عبد الناصر واللي عمال يحط الكلبشات
في ايدين اللي رايح واللي جاي ايام السادات
كانوا كلهم عبد المأمور
انما يا باشا ايه اللي حصل لولاد مصر دولم
ليه حاسين ان فيه ما بينهم وما بينا عداوة صخصية
احنا لامؤاخذة ما بنكرهش حد
وصحيح دي ساحة الرحمة قبل ساحة العدالة
عشان كده
ارحمونا
وارحموا عماد
وارحموا كل غلبان
ووقعوا اقصى العقوبة على اسلام باشا
ومهما قعد في سجن الشرطة معزز مكرم
برضه مش ح يكافئ اللي عمله في الغلبان ده
وقبل ما تبصوا بعين الرحمة للشاب النقيب
بصوا بعين انسانية لانسان عنده عشرين سنة
ابتدا حياته بحادثة زي دي
وح يعيش عمره كله يتعالج منها
وح يعيش عمره كله يتشاور عليه ويقولوا
ده اللي الظابط هتك عرضه
فكك يا باشا من اللي اخد براءة عشان قتل واحد
كتر خيره
صحيح عذبه
بس اهو مات وارتاح
مش ح يعيش عمره كله في سجن التجربة اللي مر بيها
اما بالنوسبة لخبير الاصوات الكهربائي
يادي الخيبة يا ولاااااد
بقى تجيبه الراجل من فرشته وتقولوا له اشهد
وبعد ما يشهد تقولوا له يا كهربائي؟
لهو ضحك عليكوا وقالوا لكوا انا دكتور فمتو ثانية
وطلع كهربائي؟
خلاص يا باشا
اسمع التسجيل بنفسك
واسمع اسلام بنفسك
وقول لنا صوته ده وللا مش صوته
اما بالنوسبة برضه لموضوع ممكن يمثلوا الصورة
ويركبوا عليها صوت
طيب يعني ده اعتراف ضمني ان ده صوت اسلام
وهم مركبينه على الصورة
طيب يا باشا سؤال بس
هو اسلام باشا كان بيشتم مين كده وبالالفاظ دي؟
ومين ده اللي زمايله في الموقف ح يشوفوا الكلام ده
وكلام ايه اللي ح يشوفوه؟
واذا كان فيه حد قلد صوته زي ما فيه واحد قلد صوت
رشدي اباظة
يعني هو اسلام باشا عبد الحليم حافظ؟
ولو عبد الحليم حافظ برضه بيبان الفرق في الصوت
احنا كمان بنطلب الرحمة
بنطلب الرحمة بينا
وحتى باسلام باشا
ماهو اسلام في لحظة ما عمل كده في الغلبان ده
كان ناسي ربه
دلوقت بيقرا قرآن
طيب كويس انه افتكر ربنا
يا ترى كان ربنا في دماغه وقلبه ساعة
ما كان بيحط العصايا في مؤخرة عماد؟
متهيالي اسلام باشا محتاج يحس انه انسان
مش اله
ومحتاج يحس اننا انسان مش خنازير
ومحتاج يحس ان الناس سواسية كاسنان المشط
متهيالي الحكم باقصى العقوبة على اسلام
ح يبقى في مصلحته قوي
ويمكن يبقى السجن ده فرصه انه يراجع حساباته
مع ربنا ويخرج انسان تاني
ولكم في القصاص حياة يا اولي الالباب

7 comments:

mohammed said...

حكمت المحكمة حضوريا على المتهم الحيوان ابن الحيوان الى هو لا يمت للإسلام بصلة ولا هو نبيه بالمرة بالإعدام ضربا بالجزم و القباقيب
يحيا العدل يحيا العدل.......
خير اللهم اجعله خير انا فين ده كان حلم ولا أيه
يا رب يتحقق وأشوفه بيتحقق فى كل حيوانات مصر وكلابها وضبعاها وأشباه الرجال فيها قولوا أمين

واحد مش فاهم حاجة said...

خلينا احنا نحكم احكام صحيح عادلة
لكن وهمية
نسجن الحرامية
فى خيالنا

لكن فى الحقيقة
هما اللى ساجننا

لحد مايحكم الخالق فى قضيتنا


يارب

meto33 said...

ياريت القضاء بياخد بالكلام ده وبالبديهيات والمنطق المجرد اللى انتى فارضاه لكن للأسف القوانين الوضعية المتحجرة واللى مليانة ثغرات ممكن تلبس الباطل طاقية الحق وتعطل العدالة بل وتنتزعها من أصحابها الحقيقيين زي ما بنسمع عن ناس كتير بتاخد براءة مع إن لا يختلف اتنين في الشارع من انهم مذنبين والامثلة كتيرة واللائحة تطول ....

الطائر الحزين said...

صحف الغد
استقالة وزير الداخلية تضامنا مع عماد الكبير
واعتصام الضباط الشرفاء تضامنا مع عماد الكبير

Anonymous said...

السلام عليكم

كلامك مدرسة و الله ... تسلم ايدك يا ست نوارة

د. أحمد جلال

مهندس مصري said...

يارب ياخد أقصى عقوبة و يبقى عبرة و يمكن فعلاً بعد السجن يتوب الى الله و ربنا يهديه و يصلح حاله
بس يتسجن في سجن عادي مع الجنائيين مش في سجن 5 نجوم

zsinfulangel said...

nawara t7'yle lw kalmak da wasal lel 2ade , tftkre 7y3ml far2 ??