Friday 7 September 2007

ظهور أسامة بن لادن هأو أو أو


أمريكا مطلعة لنا شريط لاسامة بن لادن
شعره اسود
ودقنه سودا كحل
ومناخيره كبرانه قوي عن أصلها
الظاهر حد عضه فيها
يعني لما ربنا بيغضب على إنسان بيسلط عليه مخه
أسامة بن لادن من تلات سنين ظهر في الجزيرة شكله
كده
النهاردة وبعد تلات سنين أمريكا بتقول أنها عندها نسخة من شريط
بن لادن وأنها فحصته وطلع
authentic
أصلي أصلي
مش عارفة عرفوا انه اصلي ازاي؟ احنا عايزين نبعت لهم
جميل سعيد عشان يشخرم لهم الخبراء بتوعهم
ومش بس كده دي بتقول ان الشريط ده حديث
ده
بشكله ده

حديث

حديث العمر يحدث عمره ويزهزه عصره وينصره على مين يعاديه

هاي هئ

ياخوانا احنا داقين عصافير

العيب مش عليهم

العيب علينا اللي عمالين نستغبى نستغبى نستغبى

لحد ما الامريكان حسوا انهم بيتعاملوا مع مجموعة من المعاقين ذهنيا

سيبك من شعره الاسود ودقنه السودا

لا مناخيره هي مناخيره ولا عينيه هي عينيه ولا حواجبه هي حواجبه

ولا هو هو خالص يا ناس

يعني دول لما بيعملوا اختبار ذكاء فيه جزئية اسمها

اختبار بصري

بتاع الملاحظة

ده اي واحد نسبة ذكاءه تمانين يلاحظ ان ده مش هو ده

السؤال بقى الغبي اللي بيطرح نفسه

ليه دلوقت مطلعين لنا الفيديو الغبي ده؟

بالمناسبة فيه شوية اغبيا مصدقين ان ده بن لادن وان الشريط اصلي وانه حديث

ومسميين نفسهم محللين سياسيين

وطالعين يحللوا بول على الفضائيات

السؤال

ليييييييييه امريكا مطلعة شريط الكارتون ده؟

=====
بالنوسبة للأخوة اللي مش مصدقين ان امريكا متخلفة الى هذه الدرجة
وانها تقدر تطلع لنا واحد شعره ابيض ودقنه بيضا وشبه بن لادن
واكبر دليل على ان ده بن لادن انه ما يشبهوش خالص يعني
طيب النهاردة جورج بوش في اول تعليق ليه في اجتماع
APEC
قال عدة اشياء مهمة موت موت موت
اولا قال انا سعيد بوجودي في مؤتمر
OPEC
راحت الناس ضاحكة
راح قال قصدي
APEC
وبعدين قال انا باشكر القوات النمساوية
Austrian
وهو يقصد يشكر القوات الاسترالية
Australian
وبرضه راحت الناس ضاحكة بس هو ما فهمش بيضحكوا على ايه
وكمل كلامه عاتشي
وبعدين وهو نازل من المنصة
المفروض ينزل من السلم عاتشي زي اي انسان
فضل ماشي على المسرح الى الاتجاه اليمين
لحد ما الرئيس الاسترالي بس بس له وشاور له ينزل منين
قبل ما ينزل قال: شريط بن لادن اكبر دليل على اننا لازم نفضل في العراق
عشان بس اللي بيقولوا لي انسحب
اهو بن لادن طلع شريط
الحمد لله ما غلطش وقال: يا سلام انتوا عايزيني اقول لكوا ان انا اللي قلت
للاف بي اي انها تعمل شريط تطلع فيه بن لادن بيتكلم
لاااااااا ده بعدكوا
بس الحقيقة ان الاستخبارات الامريكية امبارح قالت حاجة شبه كده
قالت: اه اه ما احنا عندنا نسخة من شريط بن لادن
طبعا مش هي الاصل الاصل عند بن لادن بس احنا عندنا نسخة وفحصناها
وطلعت اصلية
ممكن بقى الوهم اللي عندنا واللي مستمدينه اساسا من
mission impossible
بان الامريكان دول اذكى ناس واصيع ناس وما تفوتش عليهم النملة
ممكن الوهم ده يفضل موجود يعني بس نحط معاه احتمال تاني ولو تلاتة في المية
انه مجرد وهم؟
يعني ما يضرش ان دي تبقى الخطة
b
في طريقة تفكيرنا
مش كويس انك تستهين بذكاء غيرك طبعا
لان ده في حد ذاته غباء انا ما عنديش اعتراض على ده
وانا ما قلتش اننا اغبيا ولا ان اللي بيختلف معايا يبقى غبي بالمعنى اللي فهمه الاخوة
انا قلت اننا بنستغبى
والاستغباء ده فطرة في الانسان لما بيبقى خايف
مش معنى كده ان ال
iq
بتاعه منخفض
ابدا
بس الانسان لما بيبقى خايف بيستغبى مهما كان ذكي
بيحل عليه الغباء مع سرق الارصاد والتمصر
والانسان لما بيبقى خايف من قوة شايفها اقوى حاجة في الدنيا
بيتهياله انها مش ممكن تغلط خصوصا لما تبقى غلطة هابلة
وانا باعترف اني اول ما شفت الفيديو ولقيت واحد تاني غير بن لادن
قلت: يااااااااا لا لا مش معقول امريكا تغلط غلطة زي دي
بس امريكا الفزيييعة دي
انتخبت واحد ما بيعرفش ينزل من المنصة مرتين
مرتين
انت
انت ترضاها على نفسك ان رئيسك يبقى مضحكة الخلق كده؟
يمكن عشان هم كمان خايفين فبيعملوا حاجات غبية
واحنا عشان خايفين بنصدق غباواتهم وبنستغبى زيهم
وباكرر ده مالوش علاقة بانك جايب مجموع في الثانوية العامية
وللا انك شاطر في شغلك
ده له علاقة باننا كلنا خايفين وخايفين من بعض
مين المسئول عن حالة الرعب المنتشرة في العالم
هس بس
اياك تقول بن لادن هو السبب
والا تبقى غبي بقى بجد وازعل وللا اتفلق حتى

19 comments:

Anonymous said...

بصراحه لمه شيخ المجاهدين قاعد غزوة نيورك ومنهتن محطم شر البيت الابيض وقاهر اليهود والصلبين
يظهر على شريط فيديو جديد او يطلع بيان جديد او يظهر على العموم هو او الظوهرى بصراحه
انا بخافففففففففف
بحس انى فى بلد عربى او مسلم تنيه امريكه هتضربها طلع عمل الشويه بتوعه افغانستان راحت شويه يعمل بيان على طول العراق شويه الظوهرى يحصل تفجرات لندن واسبانا
يـــــــــــــــــــــــــــا خوفى
يعنى لمه العراق اضربت حصل فى لندن ومدريد مظاهرة المليون علشانا علشان العراق وحصلتش المظهرات دة عندنا نقوم نرد برساله شكر بتفجير المترو فى لندن ومدريد دة عقل
من زمان بصراحه جماعه الجهاد عندة مشكله تورثه بعدة تنظيم القاعدة هو انه ليس عنده عمل سياسى او لجنه سياسيه ولكن كل حاجه عندها جناح عسكرى وضرب وتفجير وبس معنى الرسول حارب وفاوض وعهد كمان
يا اخوة فى تنظيم الجهاد بصراحه رجاء صغير عقل شويه انا لا ادعو الى تعطيل فريدة الجهاد ولكن فقط تذكرة فتح مكه وصلح الحديبيه وكيف حارب وفاوض الرسول هذة هى السياسه
اسف على التطويل
احمد الجيزاوى

Anonymous said...

اية الملاحظات الجبارة دى الله ينور

Anonymous said...

مم.. اكيد للعرب فى الاصل
خصوصا وانه مواضيع زى دى لما تتقال فى امريكا مثلا.. الامريكى العادى مايهتمش يعرف تفاصيل ولا يدقق فى المواضيع.. له اللى تقال ودمتم

Anonymous said...

بجد البوست دا
روعة ويدل على جمال الكاتب بتاعه

Anonymous said...

يعني قصدك ايه يا ست نوارة و مالهم المعاقين ذهنيا هوا احنا نطول يا شيخة يا ريت
و لا على رأى أطاطا أبوك فضل يستغبى يستغبى لحد ما قلب حمار مع اني برضه بحب الحمار جدا و باحترمه يبقى احنا محصلناش معاقين ذنيا تلك الفئة المحترمة و لا كمان حمير يبقى ايه بقى ايه ايه .
وعلى فكرة احنا بنشكر الإنسان البنييآدم بتاع تحليل البول والبنييآدم محلل البراز كيمان اللي قال ان ده الحاج بيل لاضن لأن في صبغات شعر جيده جدا و سهلة الإستعمال و متوفرة في الكهوف في أفغانستان.. ممكن أسأل استاذ أحمد الجيزاوي مين فريدة الجهاد دي؟

Anonymous said...

هشه هشه ما يجيش غير على عينه و ينشه اهو ده بقى حال العرب اتنشوا حجر فى عنيهم فجالهم حول

Anonymous said...

الأستاذه نواره... خاصه لكي ولكل الشرفاء... للمشاركه في مدونة يلا نفضحهم علي الرابط :
http://yallanefdahom.blogspot

Anonymous said...

الاخت الفاضله نوارة
شكرا لتحليلك السياسى و دقه ملاحظاتك
بس اولا و اخيرا ارجو منك عدم الاستخفاف بعقول الناس فى حديثك معهم و بلاش اطلاق الالفاظ الغير مناسبه زى لفظ الاغبياء الذى تقوليه
و الدليل ع ان التسجيل الصوتى ده حديث لو انتى تابعتى التسجيل كله كنتى سمعتى اسامه بن لادن و هو بيقول تاريخ القاء القنيله ع هيروشيما و قال انها من ايام فى الذكرى 62 يعنى الشريط ده ع اقل تقدير كان فى اول شهر 8
ثانيا موضوع الذقن غلبا هى صورة لانى تابعت التسجيل و شفت حركه بطيئه جدا مما يدل ع انها تكون اقرب للصورة مش للفيديو و ده يمكن لان بن لادن تعبان و مش عاوز يظهر بتعبه
ثالثا بالعقل كده هى امريكا هتطلع شريط زى ده يعنى ( اقصد انها هلفقاه شريط زى ده )
ليه مش بنعترف بالواقع
ارجو قبل الاستخاف ان تراعى الدقه
و شكرا
محمد مارو

Anonymous said...

السلام عليكم

ازيك يا نواره اسف في التأخر علي الرد بس بسافر علشان اتابع الموضوع لان في محاولات من الحزب الوطني كالعاده للتعويض او (trs) والطرمخه علي الموضوع فيا ريت تضيفيني علي الميل اديكي شويه تفاصيل جديده انا مش قادر انشرها عندي في الوقت الحالي وكمان علشان ننسق مع بعض لاننا لازم نعمل حاجه

Mo3taz9210@yahoo.com

وده رابط الفيديوهات الي طلبتيهم تحت امرك

http://www.youtube.com/watch?v=QaQdCYLgJ5w


http://www.youtube.com/watch?v=xiXcM6RX58Q

Anonymous said...

للاخ اللي بيحب مصر قوي وايون ( قوي ) مش اوي يا عم ارحمونا بقا والمصحف كل حته في جتتنا ورمت بعدين يا عم انت الموضوع اساسا ماله ومال جماعة الجهاد والا التكفير والجزره والا القاعده والا الواقفه دي بتقولك لماذا اخرجت لنا أمريكا شريط الكارتون هذا في هذا الوقت تحديدا ؟ مش تقولي انك مش ضد ( فريدة ) الجهاد فريدة مين يا عمونا بصراحه انا كنت هعلق علي نواره وبعدين لقيت سيادتك في وشي بتعليقك العبئري دا فاتسدت نفسي نيجي وقت تاني ما يكونش وقت غدا ولا فريده موجودين

Anonymous said...

مش بيستغبونا احنا بس
دول بيستغبوا شعبهم كمان عاوزين يقولوا لهم شايفين أحنا عارفين كل حاجة ونقدر نعرف دبة النملة اللى ماشية فى حجرها الساعه اتناشر وتلت بعد نصف الليل ومين اللى كان ماشى جنبها صرصار وعدد شعر شنبة كام كمان

بلا وكسة

تحياتى

Anonymous said...

الاستاذه نواره


مش عارف ليه بتغلطي في الناس بسبب و بدون

كلامك اهو
بالمناسبة فيه شوية اغبيا مصدقين ان ده بن لادن وان الشريط اصلي وانه حديث


انا بقي من الأغبيا اللي مصدقين ان ده بن لادن

يعني هي امريكا اللي زورت الشريط ماكنتش تعرف تحط له شعر و دقن بيضا؟


ممكن جدا و من حقك تشككي في الشريط

بس بلاش تشتمي اللي مش مشاركك في ارائك



و شكرا

تحياتي

: )

Anonymous said...

صباح الخير

والله شفت الشريط مبارح في العربية وفكرت في نفس الكلام ، مش هو نفس الراجل

طيب .. ليه مانتفق على كتابة تقرير لجهة إعلامية من خلال النت نقول فيها أن الناس لا تصدق هبلهم ؟؟

Anonymous said...

يا دهوتي ياما

يا دهوتي ياما
ياخوانا اللي طالع ده مافيهوش ملمح واحد من ملامح بن لادن

يعني حتى لو بن لادن ح يحط صورة
ح يحط على الاقل واحد شبهه اذا ما كانش ح يحط صورته هو
وبعدين ما ستميت مرة قبل كده طلع بصوت من غير فيديو

يا اخونا بس صلوا ع النبي
ايه دخل الشعر الاسود والدقن السودا

ما تبصوا على ملامحه نفسها
مش هو

يعني شنبه مثلا
هو قاصص اطراف شنبه يعني شنبه مش موصول بلحيته

واسامه بن لادن عمره في اي مرحلة من مراحل عمره ما عمل شنبه كده

جه غير طبعا مناخيره اللي باين جدا انها متركبة والماكيير كمان حمار

اسامة بن لادن حواجبه مستقيمة وطويلة
ده حواجبه مدوره

اسامة بن لادن عينيه واسعة

ده عينيه مفوسة لجوا وضيقة

بس ناموا كويس واصحوا اشربوا فنحان قهوة وركزوا كدده قبل ما تقولوا هو


deja vu

انا موافقة على فكرة ومستعدة شوفي لنا كام صحفي مش ندل وانا معاكي

Anonymous said...

عدنا
اهو هندخل في حوار جديد وهينطولنا شوية الغير معرفين ويقولوا وماله لما بن لادن يعمل نيو لوك والتاني يقولك وهو بيضحك علي نفسه ولسه عايش وهم انهم بس اللي بيفهموا في بلاد العم سام واحنا ولاد ستين في سبعين ويقولك يعني دي هتفوت عليهم
ايوه يا سيدي هتفوت عليهم ومش بعيد دا يكون عيل من مواليد سنة 2000 اللي عمل الشريط واداه للمس بتاعته في الكلاس هدية بمناسبة عيد فض بكارتها الخمسين ماهو في الاساس الشريط هيتعرض علي محترم زي حضرتك وهيصدق يبقا يتعبوا نفسهم ليه ويعملوا لنا حاجه تملي العين
اللي ما تعرفهوش يا سيادة المحترم يا اللي ما عرفتش تجاوب علي السؤال وقعدت تعمل فيها ألمعي عصرك ان حاليا في بلاد العم سام ما بين ناس زي حالاتنا كده مش وراهم غير الكلام وبس ايميلات منتشره عن حفلة عملها روبين ويليامز بينادي فيها بالاعتذار للعالم اللي رحنا غزناهم وان امريكا تشوف مصالحها بقا وكفايه سرمحة وبلطجة كدابه وكفايه خراب لحد كده
يبقا قابل بقا اليومين الجايين شوية حركات امريكاني علي شوية افلامانات تخلي الناس اللي بتقول كده تتهد وتركح يارب بعد دا كله تصدق انهم ساعات كتير زي حضرتك مش بيفهموا وبيغلطوا ومش بينزلهم وحي من السما يقولهم ويخطط لهم

Anonymous said...

يبدو إن شيخ المجاهدين و زعيم المناضلين عمل زيارة سرية خاطفة لأحد المراكز في باريس والمتخصصة فى إعادة الصبا والجمال واستعادة الشباب علشان كدة ظهرلنا بالصورة دي واعتقد دلوقتى مايبقاش اسامة بن لادن لكن يبقى سمسم بن لادن لأنه رجع اتسخط .
أعتقد سواء كان هوه أم مش هوه أمريكا مش هاتغلب انها كل شوية تطلعلنا بعبع من عينتة فى المنطقه علشان يفضل مبرر ليها كاتمه بيه على انفاس المسلمين ومضطهداهم الى الابد

Anonymous said...

يا جماعه كل واحد حر

يصدق اللي عاوزه

هوا بن لادن و لا مش هوا

كل واحد ليه حكمه و قناعته

و كل واحد حر يقول رأيه

و بدون غلط في التاني

Anonymous said...

يادي عقده امريكا

امريكا عملت و امريكا باطخت

مش هي دي امريكا اللي بتبعت

القمح لمصر من عشرين سنه فاتت

لحد النهارده

انا عاوز اعرف بقي

احنا ايه انجازاتنا

في العشر قرون اللي فاتوا

و احنا ليه مانبقاش

احسن و اقوي و اجدع من امريكا

ناقصنا ايه يعني

كل حاجه نلومها علي غيرنا

ايوه رئيس امريكا مضحكه

و هم اول ناس بيفطسوا علي روحهم

من الضحك لما بيتكلوموا عليه

بس علي الاقل فاضل له كام شهر

و يغور مطرح ما جه

مش قاعد في الفترة الرئاسيه السادسه

و المحروس ابنه نمره 2 في الحزب الحاكم

قاعد مستني دوره

عمر ماحال العرب و المسلمين ماحينصلح

الا لو بصوا لنفسهم الاول

و بطلوا عياط و صويت

و ابتدوا يصلحوا البيت من جوه

بدل ماهما قاعدين يلوموا بيوت الجيران

هي الدنيا كده

اللي ليه ظهر مابينضربش علي بطنه

و اللي مالوش

اهو بيعقد يصوّت في المدونات

و عوضنا عليك يارب

في الشتيمتين اللي حاخدهم من نواره

بسبب التعليق ده




تحياتي

: )

Anonymous said...

i no longer believe that any tape from alqa3eda is from alqa3eda...

hell, i even have doubts that there is such thing as alqa3eda.

there might be a man called bin laden in reality ; but view all the tapes of osama and u ll see that there is more than two versions of him in the collection that the cia claim to be authentic...

http://images.google.ie/images?hl=en&client=firefox-a&rls=org.mozilla:en-US:official&hs=Y7I&resnum=0&q=fake%20fake%20bin%20laden&ie=UTF-8&oe=UTF-8&um=1&sa=N&tab=wi