Thursday 29 November 2012

الاخوان والسلفيين بيستعدوا لحرب اهلية

وما عندهمش اي مانع انهم يعملوا حرب اهلية، بالعكس ده جزء من خطتهم للسيطرة على مقاليد الحكم لاسباب عديدة، أولا: الناس دي ما عندهاش مفهوم الوطن اللي عندنا، هم عندهم الدنيا فسطاطين، فسطاط كفر وفسطاط ايمان، مافيش حاجة اسمها وطن، فعادي جدا ان ضميرهم يرتاح للحرب الاهلية من غير ما يرمشوا ولا يحسوا باي حرج ولا تأنيب ضمير، ده اذا كان عندهم ضمير اصلا. ثانيا: الناس دي عايشة في كتب التاريخ، وما عندهاش تصور الدولة في دماغها، دول بيتكلموا بديوان المظالم، وناقص يسموا وزير الداخلية كبير البصاصين، شكل الدولة الحديثة مش متبلور في دماغهم. ثالثا: الناس دول ولاءاتهم ايديولوجية، واظن خير دليل على ده موضوع الاندونيسي المسلم اللي يحكم مصر احسن من المسيحي المصري، وطظ في مصر، وكل الهراء اللي بيقولوه عادة. رابعا: بصوا على تواجد التيار الاسلامي في اي مكان الدولة تبقى فيه في حالة سيولة، زي افغانستان او العراق او حتى سوريا... اول حاجة تيجي على بالهم يشيلوا سلاح على اعداء الله اللي هم الشعب العادي ده
فهم الناس دول مش مصريين، حتى دمهم تقيل، هو فيه مصري دمه تقيل؟ طب دمك تقيل ليه يابني؟ انت ابن حرام؟ 
طيب.. هم دلوقت جات لهم صرعة احكام الهيمنة على مصر وفيها لاخفيها، وعاملين الاعلان الديكتاتوري ده، وطبخوا الدستور وخلصوه، وناويين ينزلوا لنا يوم السبت الجاي عشان يبتدوا الحرب الاهلية اللي هي في خطتهم، وبالمناسبة مش اول مرة يشيروا الى الحرب الاهلية، ايام محمد محمود بعتوا لنا رسالة اننا لو اصرينا على مجلس رئاسي مدني فهم مستعدين للحرب الاهلية
احنا حنعمل ايه؟
كان فيه عدة اقتراحات من الناس اللي عايزة تحقن الدماء بان الحركات السياسية تعلن نزولها يوم الجمعة ثم انسحابها من الميدان قبل ما هم ييجوا لتجنب الصدام وقالوا لنا: ام الطفل هي اللي ما ترضاش ابنها يتقسم نصين بالسكين
طيب.. الكلام ده نظريا جميل وما عنديش مانع منه بس هو مش عملي للاسباب الاتية:
اولا: اللي في الميدان دول مش خرفان، دول كل واحد فيهم رئيس جمهورية نفسه، يعني الحركات السياسية تعلن زي ما تعلن براحتها، تشوف مين حيمشي وراها، ماحدش بيسمع كلام حد في الميدان ما انتوا عارفين، والناس حتفضل في الميدان، واعلان القوى السياسية الانسحاب من الميدان حقنا للدماء مش حيعمل اكتر من اراقة بحور من الدماء مالهاش دية ومالهاش اي غطاء سياسي، الناس دي حتقعد وحتتعجن جوة الميدان وحيموتوا بلاش.. يبقى القوى السياسية دي ما عملتش حاجة غير انها بررت قتلهم لو انسحبت
ثانيا: اللي حيفضلوا في الميدان عندهم حق، لانهم لو روحوا حيتاخدوا من البيوت.. التيار الاسلامي في حالة هياج وانزعاج واحساس بإن الارض بتميد بيه، وهم ما صدقوا مسكوا في السلطة كلب ولقى عضمة، ولو المعتصمين سابوا الميدان ومشيوا مافيش واحد فيهم حيبات في بيته ليلتها.. والاخوان والسلفيين مستعدين يقبضوا على خمسين الف في ليلة واحدة ولا يهمهم، اذا كانوا ما عندهمش مانع من حرب اهلية، حيخافوا يقبضوا على الشعب كله؟ فإذا المرواح فيه خطورة كبيرة على المعتصمين، ووجودهم في الميدان اكثر امنا ليهم، ومافيش وسيلة لزيادة تأمينهم جوة الميدان غير ان عدد المعتصمين يزيد بحيث ان اللي جايين يجروا شكل ويعملوا حرب اهلية ما يعرفوش يخشوا الميدان
دلوقت احنا قدامنا كام حاجة لازم تتعمل عشان نأمن نفسنا، ونأمن البلد
السلفيين ناويين ييجوا يعملوا مدبحة في الميدان، وقالوا كده علنا، شيخ سلفي قال سنلقي في قلوبهم الرعب.. واصلا مجرد توجههم للميدان يوم السبت وهم عارفين ان فيه ناس معتصمة ده لوحده جر شكل وتفجير لحرب اهلية
طبعا اللي في الميدان رجالة ومش حيسيبوه وهم قد المواجهات، بس الخوف من تفاقهم المواجهات حاجة اساسية، ان الدم لو زاد قوي في الميدان ده حيخلي الجيش ينزل ويعلن حظر تجول ويفضي الميدان من كل الناس وياخد السلطة الى الابد وسط ترحيب عارم من حزب الكنبة اللي نزل اول مرة الميدان والفلول طبعا، ويمكن بعض الثوار يغريهم نزول الجيش لانه اول ما ينزل حينكل بالاسلاميين، الجيش خلاص عرف اننا طاهرين ومتوضيين ومالناش اطماع في السلطة، احنا شوية عيال بتنزل تشمشم على الموت وتشوفه هو فين وتجري عليه.. اللي طمعان في السلطة فعلا هم الاسلاميين، ولو الاسلاميين حيقودوا البلد لحرب اهلية الجيش مش حيسمح لهم يعملوا ده وحيقمعهم قمع التنين، وبسبب الغل اللي مالي قلوبنا كلنا من الخونة دول ممكن بعض ناس من الثوار يقولوا ايوه هم حياقهم الجيش مالهمش غيره يعلقهم على المشانق اللي يستاهلوها.. وبالطريقة دي الجيش بلع البلد وبقت الجزائر.. وسوف نندم حين لا ينفع الندم
الاسلاميين عارفين كده؟ 
طبعا لا.. دول بهايم دول هم دول بيفهموا؟ واللي فيهم بيفهم، بيشتغل مع امن الدولة، زي كتير من رموز السلفيين
طيب احنا في ايدنا ايه نعمله؟
اللي في ايدنا نعمله اننا ما نروحش خالص... ننزل بكثافة كبيرة يوم الجمعة، ونحشد للنزول، بحيث الميدان يبقى مافيهوش موطئ قدم، واللي موجود ما يروحش، يبات في الميدان ليوم السبت، بحيث الميدان يبقى مليان بطريقة ما تمكنهمش من الدخول للصدام اللي هم جايين عشانه
دي اول حاجة
تاني حاجة: المعركة الدايرة في سيمون بوليفار دي لازم تتوقف فورا.. الداخلية طبعا مش عايزة توقفها، ويبدو ان الداخلية عندها معلومات ان السلفيين نازلين يعملوها مدبحة وعشان كده بتنهك الثوار وبتفتح ثغرة في ضهرهم، بحيث السلفيين يبقوا من امامهم والداخلية من ضهرهم وتسيل بحور دم.. يبقى مدام الداخلية مش عايزة توقف ضرب، احنا نبني متاريس عند شارع سيمون بوليفار بحيث نسد الجبهة دي خالص ونرتاح اليومين دول عشان نقدر نواصل جمعة وسبت
تالت حاجة: نحط متاريس كبيرة على كل المداخل 
رابع حاجة: نقدم بلاغ في مرسي وجماعته، وحزب النور اللي بيحشد ليوم السبت ونتهمهم بمحاولة اشعال حرب اهلية، حتقولوا لي نقدم بلاغ عند النائب العام بتاع مرسي؟ ايوه.. هو حياخد البلاغ يحطه في الدرج، بس ان شاء الله لما يمشي هو والجماعة، وبالمناسبة هم حيمشوا اسرع مما تتخيلوا ان شاء الله، ومرسي ده نهايته قربت قوي.. خلي خيرت الشاطر اللي هو ماشي دلدول وراه ينفعه، يبقى يتحقق معاهم كلهم لان البلاغ حيبقى موجود وحنبقى مقدمينه قبل ما تحصل اي حاجة.. وفي البلاغ ده نحمل مرسي ونادر بكار مسئولية اي خسائر في الارواح تنتج عن مواجهات بين المتظاهرين
خامس حاجة: من دلوقت نطهر الميدان من عناصر الاخوان اللي مندسة في وسط الميدان، انا مستغربة جدا منكوا انهم لما بييجوا ويقعدوا يفتحوا مناقشات بتقعدوا تتناقشوا معاهم.. انتوا لسه عشمانين فيهم يفهموا حاجة؟ دول خرفاااااااااااااان.. خرفان وخونة للبلد، وما يعرفوش ربنا.. ما يعرفوهوش خالص، ولا سمعوا عنه، يعرفوا المرشد بس، هو ده ربهم.. اي اخواني يتقفش مدسوس وبيفتح نقاش يعمل فتنة يترن علقة وينطرد برة الميدان
سادس حاجة: اللي يمسك البوابات ناس معروفة ويبقى تحت ايدهم ناس عارفينهم.. مش اي حد يتطوع يأمن البوابات
سابع حاجة: الدخول والخروج لحد يوم الجمعة، بداية من ليلة السبت مافيش دخول ولا خروج
واخيرا... احنا لو خرجنا من الميدان ده مش حنرجعه تاني.. نتقابل على المشنقة بقى
احنا شغلتنا نحمي بلدنا.. ده اختيارنا في الحياة ولازم نلتزم بيه، وهي غلبانة ومالهاش حد غيرنا 

Tuesday 20 November 2012

قائمة احتياجات مستشفى دار الشفاء في غزة

أنا رجعت من غزة عندي دور برد جامد قوي.. بس نزلت شوية محمد محمود امبارح، وباحاول اخد ادوية عشان اتحسن وننزل هناك تاني
قبل ما احكي عن اللي حصل وقبل ما اعلق على اللي بيحصل لازم اكتب لكم قائمة احتياجات مستشفى دار الشفاء لانها كتير، كمان انا مش راضية عن نفسي برغم ترحاب الناس هناك، ده من كرمهم وحسن ضيافتهم مع نكبتهم، بس انا مش راضية عن نفسي، هم مش قرود في جبلاية وانا رايحة اتفرج عليهم وهم بيعملوا ميتين.. احنا لازم نمرر سلاح للناس دي والا نبقى بلد وسخة بكل معاني الكلمة

دلوقت خدوا قائمة الاحتياجات:

- عدد 2 أجهزة مينتور philips
- عدد 1 جهاز Fibro optic bronchoscopy
- عدد 6 أجهزة تنفس صناعي عناية مركزة Dragar sabina 
- عدد 10 جهاز تنظيم محلول (سيرينج) Syringe pump
- عدد 10 جهاز محلول Infusion pump
- عدد 8 أسررة عناية مركزة جديدة بدل القديمة
- عدد 50 Arterial line set مستهلك + Cable for Philips monitor 5
- عدد 5 Arterial line pressure cuff مستهلك
- عدد 100 arterial line catheter 
- عدد 100 pediatric corrigulated tube
- عدد 50 PICC peripheral inserted catheter
- عدد 6 Air mattress
- عدد 10 swangan catheter (complete set)
- عدد 20 dextran 50
- dilatational percuteneous toacheostomy kits
- arterial canullae
- toxogoanin
- meropenem 
- electrolytes and blood gases machines
مطلوب ايضا
أطباء للقسم يتناسب مع العمل والطوارئ
تكملة أثاث القسم
أدوية غير موجودة مثل
obdixime Toxoginin and albumin
هم كمان محتاجين أجهزة للتبرع بالصفائح لانهم بيفصلوا الصفايح بشكل بدائي جدا بعد ما تتبرع بالدم
رجاء النشر على أوسع نطاق
ملحوظة:
في اخر اربع حاجات في الليستة الدكتور كان كاتبهم بايده وخط ايده مش واضح قوي فلو دكتور شاف اني غلطت في حاجة ياريت يكتب لي تعليق وانا اصلحها

Saturday 27 October 2012

قل لا لدستور ام ترتر

انا مش فاهمة الناس اللي قررت تقاطع ده بناء على ايه؟ كده احنا حنلبس في دستور ام ترتر
فيه ناس بتقول لان اللجنة اصلا باطلة
بس لو اللجنة اصلا باطلة المقاطعة حتعمل ايه؟ وفيه ناس مش عايزة تصوت بلا عشان السلفيين حيصوتوا بلا ومش عايزين يخشوا في القرف بتاع المنافسة بين الاخوان والسلفيين: لو قلت لا حتخش الجنة.. لا وربنا ده لو قلت نعم حتخش الجنة
على فكرة انا شايفة ان دي حاجة كويسة وفي صالح ان الناس تبتدي تفكر بقى وتاخد بالها ان الجنة والنار عاملينها على هواهم ومصالحهم ولما مصالحهم اتعارضت كل واحد عمل لنفسه جنة ونار بتوعه زي يوم جمعة قندهار لما كل واحد فيهم عمل جماعة لوحده
السلفيين حيقولوا لا على الدستور عشان مش فاشيست بالقدر اللي هم عايزينه
بس ده مش معناه اننا نقاطع.. احنا مش لازم نلبس في الدستور ده ابدا.. الدستور ده عيب وحرام ويتهز له سبع سموات
وانا ناوية ان شاء الله استلمهم عشان يبطلوا يربونا
جماعة الاخوان المسلمين كل يوم بتثبت انها جماعة اسسها مدرس ابتدائي.. كل الدستور عبارة عن تربية وتنشئة وتقاليد مصرية اصيلة.. ايه يا خالتي؟ ناقص يحطوا مادة في الدستور: الست ما تسيبش بيت جوزها.. متخانق مع مراتك انت تنزل تشوف لك حتة تبات فيها لكن هي ما تخرجش برة بيتها..
- يحظر الدستور ان يلعب الطفل في مراخيره حظرا تاما
والبيان الختامي للدستور:

الجماعة جاية تربينا انتوا فاهمين غلط.. مافيش حد بيربي شعب.. خصوصا الشعب المصري، ده احنا نربي اللي جابوكوا ونتوبكوا

Monday 22 October 2012

مامة محمد وديع تدخل يومها العشرين في الاضراب/ ياسر رزق

دلوقت مامة محمد وديع مضربة عن الطعام قدام ديوان عام المحافظة بقالها عشرين يوم، ومعاها ناس متضامنين منهم اتنين راحوا المستشفى، والله العظيم لولا عندي ظرف صحي ما يسمحليش ابدا اني اضرب عن الطعام والله كنت رحت اضربت معاهم
اشمعنى محمد مش بيخرج يعني؟
ده الخبر ودول اسامي الناس المضربة.. احنا عايزين نروح لهم كل يوم حتى نشوفهم احوالهم ايه ونتابعهم، ولو ينفع اللي صحته تستحمل يضرب معاهم يزود عدد المضربين.. الست كده مش حينفع تكمل هي مش صغيرة عشان تقعد ده كله مضربة
-------
دلوقت ايه الطراش اللي ياسر رزق كاتبه ده؟ وما ادراك اذا غضب الجيش.. خاف يا عيد.. يامي يامي يامي
ومرسي بيقول انا بحبهم وهم بيحبوني وعلى اتصال دائم
وطبعا زي ما احنا عارفين الاخوان احرص ناس على المتاجرة بدم الشهدا، ما افتكروش دم الشهدا الا لما حبوا يقيلوا النائب العام عشان بينهم وبينه مشاكل... فين دم الشهيد مع طنطاوي وعنان السفاحين؟
قال وما ادراك اذا غضب الجيش.. على نفسه يا حاج.. على نفسه يا بابا ابو مدرعة مرتبكة.. ينزل لنا تاني ونوريه مقامه؟ ما يعمل سبع في سينا اللي عمال ياكل فيها على قفاه شوية من الارهابيين وشوية من اسرائيل
اعمل راجل ع الصينية وعالحدود اعمل ولية

Sunday 21 October 2012

حسبي الله ونعم الوكيل فيك يا شعب

الا كل ما امشي في حتة ياخويا الناس توقفني وتقولي: والاخوان بقى حيقعدوا على كده؟ طب وانت عاجبك اللي بيحصل؟ خلاص؟ سلمتوا البلد للاخوان وارتاحتوا؟
تقولش ياخويا انا اللي انتخبت الاخوان؟ المصيبة لما تاخد وتدي معاهم في الكلام شوية تكتشف انهم انتخبوا الاخوان في البرلمان.. 
طب بيسألوني انا الاخوان حيقعدوا ولا يمشوا ليه؟ يشهد ربنا عمري ما خطت يميني.. يميني ايه؟ انا باكتب بالشمال، عمري ما خطت شمالي علامة صح قدام اخواني لا في برلمان ولا شورى ولا رئاسة ولما وصلتوا الاعادة بين الفلول والاخوان يا شعب قاطعت.. حيقعدوا لو انتوا عايزينهم يقعدوا، وحيمشوا لو انتوا عايزينهم يمشوا انتوا بتزعقوا لنا احنا ليه؟
احنا ما سلمناش البلد للاخوان... نعلن نحن المجموعة اللي قلتوا عليها خربت البلد اننا نزلنا نتبهدل عشان نسلمكوا انتوا صندوق الانتخابات تختاروا اللي انتوا عايزينه، سميتونا بلطجية، وقلتوا لنا خربتوا البلد، وانتخبتوا الاخوان، وشتمتونا عشان بتقولوا علينا:"خرجتوا الاخوان من السجن".. متشكرين يا ولاد الاصول
ده انتوا شعب لاسع فعلا
المجموعة اللي خربت البلد اللي فضلتوا طول سنتين تقولوا: مش هم دول الشباب الطاهر اللي نزلوا يوم 25.. مع ان الشباب الطاهر اللي نزلوا يوم 25 واللي ما كانوش اخوان ولا منتمين لاي تيارات سياسية.. هم هم نفسهم الشباب النجس اللي نزل في كل المواجهات واللي دلوقت نكش شعره وكشف راسه ودعا عليكوا
عارفين الشوية اللي نزلت يوم 25.. اللي هم بتوع خمسين الف دول؟ هم دول اللي بينزلوا كل ما يحصل دب

Saturday 20 October 2012

الى الحقوقيين والمحامين واخوة المرمطة والاعتصامات.. رجاء اتخاذ الاجراء اللازم

انا مش عارفة ايه حكايتهم دول غير لما قريت الخبر في اليوم السابع
دول خمس عمال تم نقلهم في السكة الحديد لانهم شاركوا في اضراب ولما الادارة طلبت خمسة يتكلموا باسم المضربين اختاروا الخمسة دول فالشرطة كتبت اساميهم وبعدين تم نقلهم
دي اسماء العمال اللي تم نقلهم:
علاء نظير عبد الرحمن، وعلى أبو شباك محمد أحمد، وعبد الرحمن مصطفى، ومحمود جمال حسن، وأسامة محمد أحمد.
عايزين نعرف مين بيتصل بيهم، ولو مافيش حد بيتصل بيهم يتصل
ونتضامن معاهم عشان ياخدوا حقوقهم ويرجعوا اماكنهم تاني
من غير كلام كتير يعني كل واحد فينا عارف حيعمل ايه..
وشكرا

الرئيس المؤمن حيكفر الشعب

يا اخ يا رئيس يا مؤمن.. لو حتخرج تصلي كده يبقى صلي في بيتكوا وثوابك حيبقى اكبر ان شاء الله وفي رقبتي انا شخصيا.. يوم القيامة حاقول انا اللي شورت عليه الشورة دي.. فليسعك بيتك مدام كل ما حتخرج حتعمل لنا دبكة وعطلة وترهبنا بالامن المركزي كأنك نازل تحرر فلسطين واحنا الاسرائيليين 
صلي في البيت صلي في البيت صلي في البيت وفي رقبتي انا قدام ربنا
ولا حتى ما تصليش خالص
حتعمل ايه بالصلاة لما اسعاف تتعطل ويموت فيها مريض زي ما حصل ما مبارك قبل كده؟ 
حتعمل ايه بالصلاة لما تلقي الرعب في قلوب المصلين بجيش الامن المركزي اللي انت نازل بيه ده؟ انت ما تعرفش ان شكلهم لوحده ممكن يروع الناس ومن روع مؤمنا روعه الله يوم القيامة؟
حتعمل ايه بالصلاة لما انت تنزل تصلي بالهلولة دي وعشان حضرتك بتصلي واحد تاني مواطن مسكين، مالوش الا ربنا فعلا، لا له جماعة ولا رئاسة ولا امن مركزي، ونازل يصلي عشان عايز يقابل ربنا فعلا مش عايز يستعرض قدامنا انه بيصلي، تروح عليه الصلاة في الجامع ويضطر يصليها في بيتهم ولا في الطريق ولا ما يعرفش يروح ولا يرجع وتروح عليه خالص؟
يا عم اعمل جامع في جنينة القصر الجمهوري وخد الحرس يصلوا معاك على الضيق كده بدل البوليكة اللي بتعملها على كل فرض، ولما تبقى تسافر المحافظات زي كده ابقى صلي في استراحة الرئاسة وجماعة انشالله بمراتك وعيالك الاتنين اللي بيتخانقوا مع ظباط الشرطة ويضربوهم عشان بيسألوهم عن البطاقة، حتخلونا نتعاطف مع الشرطة كمان؟ هو ايه ياختي ده؟ احنا عمرنا ما مر علينا رئيس كل ما يتوضى يبقى خبر عاجل كل ما يصلي يبقى مانشيت... شكرا عرفنا انك مؤمن.. ما تبسطهاش اكتر من كده
مبارك كانت كل الناس بتدعي عليه.. بس اكتر دعوات كان بياخدها بسبب التشريفات ولما واحد مات في الاسعاف بسببه سواق تاكسي قالي: الراجل ده مش حيكمل السنة دي.. ربنا ما يرضاش بكده.. وفعلا.. صدق سواق التاكسي
يا حاج مرسي: وسكنتم في مساكن الذين ظلموا أنفسهم وتبين لكم كيف فعلنا بهم وضربنا لكم الأمثال، وقد مكروا مكرهم، وعند الله مكرهم، وإن كان مكرهم لتزول منه الجبال
الله الله الله.. حلوووووووووووووةةةة.. حلوة قوي، بتخش في النخاشيش بتاعة الجلد كده.. هو فيه نخاشيش في الجلد؟ ما اعرفش.. بس هي بتخش وتتشرب كده كأنك داهن فيكس او ابو فاس.. بتعمل حاجات الاية دي
فأنت يا حاج مرسي مكرك انت والجماعة مكر خايب ونايب وفاشل مش زي مكر مبارك، يعني لا تزول منه الجبال ولا حتى الناموسة.. خليك ماشي بستر الله بلاش تتغر
اتق ربنا أمرسي.. اتق ربنا.. انت خارج تصلي ولا ترازي الناس وتخليهم يدعوا عليك.. ما هو الناس يا اما حيدعوا عليك يا اما حيكفروا
انا لحد دلوقت اعرف 5 بنات قلعوا الحجاب بس بسبب الاخوان والسلفيين.. حتقابلوا ربنا بالناس دي ازاي؟ والبنات مش عايزين يتحنتفوا ولا حاجة، ده واحدة منهم تقريبا ما بتتسرحش ولامة شعرها كحكة.. بس مش عايزة تبقى شبهكوا في حاجة
ما هو يا تحلوا عن الاسلام يا تحلوا عنا... ويا ريت تحلوا عن الاتنين نبقى شاكرين جدا

ملخص امبارح/ بالنوسبة لسوريا

اليوم امبارح كان يوم كويس، طبعا ما قعدتش كتير عشان مافيش دب، الامور كانت مستقرة، الاعداد كانت كويسة قوي بما يوصل رسالة للاخوان انهم مش مسيطرين على البلد ولا حاجة، ولو ان حصل حاجات كتير والله العظيم طول السنتين اللي فاتوا يقولوا ان الاخوان مش مسيطرين على البلد، يرتبكوا شوية لما يتفاجئوا بالحقيقة، وبعدين يرجعوا تاني ينسوا نفسهم نقوم نرجع نلبهم وهكذا
العدد كان حيبقى اكبر لو كان فيه دب 
D:
تداعيات اليوم حتبقى ايه مش عارفة لسه، بس عموما الاخوان قعدوا يوزعوا بطاطين ووجبات ولحمة في المحافظات والاحياء الشعبية.. مش فاهمة ده ايه علاقته بالموضوع.. يمكن بيعملوا زي الست لما تبقى متغاظة تقوم على البيت تغسل الحيطان وتنكت الشقة؟ 
سيبكوا مش ده المهم
المهم دلوقت اني باقرا تقرير، هو مش جديد، من شهر اغسطس، وارجو منكوا ان يكون عندكوا الصبر تقعدوا تقروه
هو هنا
عن اللي بيحصل في سوريا
انا عرفت موضوع البنات السوريات اللي بيتقال عليهم انهم بيتباعوا والكلام ده
دلوقت اللي بيحصل ان كل الاطراف بتلعب في سوريا، غير ان الوضع كده مش حيلخص ابدا، التقرير بيقول ان النظام السوري تحول الى قلب صلب وميليشيا... وبناء عليه، مافيش مليشيا بتقع، يعني حيفضل كده الوضع ان الناس بتموت في بعض
كمان المعارضة السورية منقسمة، فيه اللي اصلا ضد التسليح وان كان شايف ان اللي اتسلحوا كانوا مضطرين، وفيه من جوه المسلحين منقسمين على بعض، وبيساعد على الانقسام ده الاطراف اللي بتلعب من الخارج خصوصا دول الخليج، ولو تشوف فتاوى مشايخ الخليج تعرف ان استمرار الوضع على ما هو عليه في مصلحتهم، بيقعدوا يقولوا للمقاتلين في سوريا مش اي حد يشيل سلاح ضد بشار يبقى معاكوا، ولازم يكون لوجه الله ولنصرة اهل السنة وكلام كده، فهم بيتعمدوا انهم يفرقوا الصف زيادة ماهو متفرق، وخناقة علماني واسلامي ابتدت بدري قوي في سوريا غير ان اصلا فيه خناقة مسلم ومسيحي وسني وشيعي 
فالوضع كالتالي: اولا النظام السوري تحول الى ميليشيا باليات دولة وهي اليات اقوى من اليات الثوار الفردية، ثانيا النظام السوري متماسك لانه بيدافع عن بقائه، بينما المعارضة مشتتة، بيتخانقوا على حاجات مش وقتها خالص زي الايديولوجية ونظم الحكم، وامكانياتهم اقل من النظام السوري... لكن ده مش معناه ان بشار حيعرف يقضي عليهم وترجع الامور كما كانت
ولا هم بصراحة كده حيعرفوا يقضوا على بشار
الموضوع كده ان كل واحد صباعه تحت ضرس التاني، وممكن يفضلوا يموتوا في بعض كده الى الابد لحد ما تحصل حاجة من برة توقفهم.. القيامة تقوم بقى، المسيح ينزل، اي حاجة.. الحرب الدائرة دي، ووفقا للتقرير القائم مش حتنتهي
لو المشكلة مع بشار يبقى ممكن تنتهي، لكن المشكلة ان بشار ده عامل زي ما يكون ابليس متجسد فعلا
عارفين ابليس لما خرج من الجنة فقرر يورط البني ادمين معاه بمنطق: لا انا مش داخل النار لوحدي على فكرة.. اهو بشار كده لانه ورط معاه طوائف من المجتمع سواء علويين او شيعة او مسيحيين او دروز واجبرهم على ممارسات تخلي يبقى فيه تار عليهم، والعكس صحيح، المعارضة جزء كبير منها، مش كلها، وباكرر مش كلها، طائفي جدا، ومن اول لحظة، من قبل ما يبتدوا يشيلوا سلاح، وهم بيتكلموا عن السنة والشيعة والكلام ده.. انا متفهمة المشاعر الطائفية المتبادلة في سوريا، من ناحية السنة هم مشحونين انهم يبقوا هم الاغلبية والاقلية هي اللي بتحكمهم وكمان بتذلهم، والعلويين زمان كانوا درجة عاشرة فالسنة حاسين ان خدامة بكيزة بتتحكم فيهم وان هم بكيزة وازاي يعني دول يتحكموا فينا ويموتونا كمان، من ناحية العلويين، هم لهم تاريخ طويل في الاضطاد والسنة بهدلوهم صراحة زمان، فجواهم احساس ان: انتوا ما ينفعش تتحكموا على حد تاني انتوا لما بتقدروا ما بتعفوش.. بس التفهم الانساني لمشاعر الاطراف حاجة والتعامل مع النتائج المتسببة فيها المشاعر دي حاجة تانية، ينفع تنجح تسقط فرد، نظام، حزب، لكن ما ينفعش تعادي طائفة وتنجح ابدا.. العلويين لهم تاريخ طويل من الاضطهاد في بلاد الشام، وكما يقول الشاعر في قصيدة بنت كرم: يا وليهم من شر مظلوم حكم.. مافيش حد بيتعرض لاضطهاد لفترات طويلة ولما يتمكن يرحم ابدا.. كل اللي اتعمل فيه بيعمله في الناس، وعليه، فالطائفة العلوية مش ممكن تحت اي بند من البنود انها ترجع لكابوس الاضطهاد السابق المحمل كمان بالتار اللي جد عليها دلوقت.. دلوقت كل طرف في المجتمع بقى عليه تار، وبناء عليه مش ممكن يسيب السلاح من ايده ابدا
مين المسئول عن ده كله، بشار طبعا، امال امي، شيطان شيطان يعني، ومن اول لحظة وهو حاسبها انه "انا مش حاقع لوحدي" وعشان كده ورط مثلا الدروز والمسيحيين في الموضوع، الاكتر من كده انه ورط سنة ما كانوش ناويين يتورطوا، يعني فيه ناس من الطائفة السنية ما كانش ليها في الطور ولا الطحين وما كانتش ناوية تضم على الثوار بس لما الجيش بتاعه ارتكب جرائم طائفية بحق اهلهم وذويهم بقى كل اللي له اب ولا ابن ولا اخ اتقتل على ايد جيش بشار عشان سني يشيل سلاح عشان ينتقم للي له
فيه حاجة كمان مهمة جدا 
الموضوع مش كله طائفي، فيه ناس فعلا خايفة من فكرة ان امريكا واسرائيل والسعودية بيدعموا الثورة السورية وشايفين انها مش ثورة وطنية وبتهدد المقاومة، وناس كويسة 
يعني مثلا انا ليا صديقتين من سوريا، والاتنين انا عارفاهم كويس قوي، ولا فيهم واحدة عميلة، ولا خاينة، ولا فاشيست، ولا جاهلة، ولا بتدي ودنها للاعلام ولا اي حاجة من دي
واحدة شيعية اثنى عشرية، والتانية سنية
السنية بتحب بشار ومساندة له، مع انها سنة متدينة ويمكن حد يقول عليها متشددة، لانها مثلا ما بترضاش تصلي جماعة ورا امام مش سني، بس هي شايفة ان بشار بيواجه مؤامرة امريكية اسرائيلية عشان هو من حزب الممانعة، ولما تطول معاها في المناقشة تقولك اديني تفسير واحد يخلي السعودية تدعم "المتمردين" في سوريا.. مسمياهم المتمردين، ووجهة نظرها ان السعودية ضد كلمة ثورة من باب وتلت.. ايه اللي يخليها تدعم المعارضة السورية ومعروف ان السعودية مخلب امريكا واسرائيل في العالم الاسلامي
الشيعية مع الثورة جدا ومساندة لها ومنهارة وزعلانة قوي من حسن نصر الله وقعدت تقولي اخر حاجة كنت اتوقعها ان السيد حسن اللي كنت باحبه وباحترمه يقف جنب سفاح بيقتل الناس ويقول اصله ساعدني.. احنا اللي ساعدناه، احنا اللي استقبلنا اللاجئين اللبنانيين واحنا اللي اتبرعنا للمقاومة واحنا اللي لولا موقفنا الداعم له كان بشار شاف له سكة مع امريكا واسرائيل.. هو بشار ايه اللي بيخليه يدعم المقاومة الا عشان يكتسب شرعية وسط الشارع؟ المفروض كان يثق فينا اكتر من كده
المفارقة بقى ان السنية ممكن جدا ميليشيات بشار تقتلها على الهوية.. والشيعية ممكن جدا بعض من ميليشيات المعارضة تقتلها على الهوية.. لان الوضع اتحول لطائفي فظيع
الخلاصة من اللت ده كله
احنا كمصر يعني ايه موقفنا غير ان رجالتنا بيريلوا على السوريات وما صدقوا يجولنا لاجئات عشان يتجوزوهم على مراتاتهم؟ 
اهم حاجة دلوقت ان القتل يتوقف.. والقتل مش حيتوقف طول ما كل الاطراف دلوقت مش حاسة بالامان وحاسة ان الطرف التاني لو هي سابت السلاح حينتقم منها على اللي عملته.. ويفضل كل طرف فيهم عامل زي ماكبث كده كل ما يحاول يهرب من جريمته اللي فاتت يرتكب جريمة جديدة
في المعارضة السورية جزء مدني مهتم بتحقيق اهداف الثورة فعلا ما اتحولش اهتمام للانتقام لاهله وذويه
المفروض مصر بدل ما تقعد تبعت في جوابات لبيريز وتعدي سفن القتل من قناة السويس تعمل وساطة بمساندة الجزء المدني ده المعارض في سوريا باي وسيلة كانت عشان توقف القتل من الجانبين.. انشالله تروح قوات عربية لحفظ السلام وبعدين يدوا ضمانات للطوائف على بعضها بحيث ماحدش فيهم ينتقم من التاني ويبقى الوضع لا غالب ولا مغلوب زي لبنان كده
واظن ان الطوائف العلوية والدرزية والمسيحية لو لقوا ضمانات كويسة ما يتقتلوش ولا يرجعوا لايام الاضطهاد القديمة حيبيعوا بشار، ولو بشار مش متأكد من انهم مستعدين يبيعوه ما كانش اجبر عناصر منهم انها ترتكب جرائم وهي بتعلن عن انتمائها الطائفي عشان تتسجل على طايفتهم ويبقوا في مرمى الانتقام
انا مش فاهمة مصر ليه ما تعملش اجتماع لكل القوى المتصارعة في سوريا هنا في القاهرة وتحل المشكلة دي؟ يعني احنا مبسوطين باستمرار القتل ده؟ طب احنا مستفيدين ايه؟ بالعكس، المصريين، دونا عن كل الشعوب اللي في العالم، متضررين جدا من اللي بيحصل في سوريا وحنتضرر اكتر لو لا قدر الله الوضع تفاقم كمان عن كده ووصل لابعاد مش عايزة اقولها من كتر ما هي كابوسية
الخليج مستفيدين امريكا مستفيدة ايران مستفيدة وكله اكل عيشهم.. احنا بالنسبة لنا ده خراب بيتنا ان الوضع في سوريا يستمر كده
هم عداهم العيب انهم بيسعوا على مصلحتهم حتى لو على دم السوريين.. احنا فين مش بندور على مصلحتنا ليه؟ 

Friday 19 October 2012

احبك.. مواه.. اعبدك.. مواه.. اموت في هواك

قالك ده جواب بروتوكولي عادي...
هو من البروتوكول انكوا تخدشوا حياءنا كده..
السيد بيريز وصديقه الوفي
Have a room


وقال على رأي المثل: عالقدس.. رايحين.. نبوس الاسرائيليين
واذكر فيما اذكر ايام الحرب على غزة، الاخوان اعلنوا عن وقفة احتجازية في مسجد الفتح، قمنا رحنا احنا طبعا عشان نوحد الصف وكدهون يعني، انتوا عارفين يعني، الناس الكفار دول بتوع الاشتراكيين الثوريين وستة ابريل والاناركيين بتوع بي فور بانديتا، ومن سماحة الاسلام ان الاخوان رضيوا يدخلوا ناس كفار زينا كده الجامع
وطبعا كلنا عارفين ان مبارك كان قافل المعبر.. فهتفنا: يسقط يسقط حسني مبارك.. راح الاخوان مغطيين على هتافنا وقالوا: عالقدس رايحين شهداء بالملايين.. قمنا قلنا يمكن ما يقصدوش.. او ما سمعوناش.. علي صوتك شوية... احم احم: يسقط يسقط حسـ.... يروحوا ناطين في زورنا عالقدس رايحين شهداء بالملايين
قام مسكوا البلد بقى.. بعد الثورة.. قام بعتوا الجواب الغورامي ده دون اي مراعاة لان فيه اطفال بيتفرجوا على الجرايد وبنات لسه ما اتجوزتش وممكن عينيهم تتفتح لما يشوفوا الخطاب ده 
ييجي واحد يقولي: امال فين خيبر خيبر يا يهود.. اقوله: طب وهو بيريز ماله ومال خيبر؟ انت دايما ظالم كده؟ اثثثثثبتتتتت ان بيريز من يهود خيبر.. ايه دليلك؟ ممكن لنك؟ شوية رتيبة وانصاف رشدي
وزي ما داليا بتحب ماركس ونادر بيحب جيفارا، مرسي بيحب بيريز والمرشد بيحب شارون

Thursday 18 October 2012

الفلول حيبرشطوا علينا بكرة

الاسبوع اللي فات الاخوان برشطوا علينا وضربونا
الاسبوع ده الفلول حيبرشطوا علينا... بس دول غالبا احنا اللي حنضربهم... انا طيبة وقلبي ابيض عشان كده باقول لتوفيق عكاشة ومرتضى منصور وغيرهم من الفلول بلاش تنزلوا.. انا ما اضمنش العيال يبقوا مرقدين لكوا ومستنينكوا يطلعوا عليكوا غلب السنتين اللي فاتوا وترجعوا تقولوا دول بلطجية... اديني حذرت اهو... دي ناس خلقها في مناخيرها وقرفانة في عيشتها ودافنة صحابها وممكن تشوف وشوشكوا العكرة اللي اتسببت في كل اللي احنا فيه ما تحسش بنفسها..
انج سعد.. فقد هلك سعيد.. اذا كانوا من كتر الغل جروا الاخوان من الميدان وهم كان عددهم اقل واتاخدوا على خوانة ومش هم اللي باديين الضرب ولا كانوا حاطينه في بالهم.. انتوا حتاخدوا في ايدهم سبع دقايق بالظبط.. احترموا نفسكوا كده وخليكوا في نفسكوا تابعوا من التلفزيون باحترامكوا... بلاش يام بدوي
والله العظيم دي نصيحة مخلصة مش عشانكوا، بس عشان ماليش مزاج اليوم بتاع بكرة يبوظ راخر زي المرة اللي فاتت، لازمتها ايه المرازية دي انتوا تنزلوا ودماغتكوا تتفتح واحنا نتشتم وتبقى هيصة وبوليكة... ما تخليكوا في حالكوا
هو ايه البخت المايل ده... يا اما الاخوان يقولوا لنا انا جاي معاكوا كده يا اما الفلول يقولوا انا جاي معاكوا كده؟ ما تبصوا في ورقتكوا بقى ما ذاكرتوش ثورة طول السنتين اللي فاتوا وجايين تغشوا منا؟

Wednesday 17 October 2012

عبد الله بدر لازم يترفد من الازهر

انا عايزة افهم هو الازهر بقى فاتحها ايه بالظبط عشان واحد زي عبد الله بدر ده يشتغل فيه ويدرس فيه للعيال كمان؟
انا لسه جايبة جرنال التحرير وكنت باتصفحه لقيت خبر لتغطية القضية اللي الهام شاهين رافعاها عليه وكاتبين انه هو انصاره دايرين بصور الست على باب المحكمة يوزعوها، وكاتبين خبر ناشرين فيه صورة لفتاة بورنو رومانية ونفس الصورة معمولة فوتوشوب لالهام شاهين وكاتبين ان عبد الله بدر واخد الصورة بتاعة فتاة البورنو الرومانية وحاطط عليها وش الهام شاهين وعمال يوزعها على الناس على باب المحكمة
ايه الانسان المريض ده؟ واضح ان عنده مشكلة حقيقية محتاجة علاج، بيتفرج على مواقع بورنو وكمان بيعمل صورها فوتوشوب وواضح ان عنده هوس قديم بالهام شاهين وبيحبها... طب هي ذنبها ايه؟
انا قرفت جدا.. ايه ده؟ اييييه ده؟ ايه القرف ده؟ وهو والناس اللي معاه قاعدين يوزعوا الصورة دي ويهتفوا اسلامية اسلامية
هو الازهر فتحها ماخور امتى معلش يعني؟ هي دي مؤسسة بتحترم دين ربنا وبتحترم نفسها ولا ايه؟ واحد زي ده يفضل يشتغل عندهم ازاي؟ والله العظيم دي لو شركة سياحة وكان بيشتغل فيها واحد زي ده وعمل الامراض دي كان زمانها رفدته
والست دي مالهاش نصير يعني؟ يعني دمها حلال كده؟ حرام يا ناس.. انتوا ما عندكوش ولايا؟ ما عندكوش رجولة؟ البلد دي فيها رجالة ولا كاوركات، ولا هي عشان فلول؟ 
هي فلول ومن بتوع ابناء مبارك والمجلس العسكري، بس انا والله العظيم لما قريت الخبر ده وشوفت اللي هو عامله قعدت ادعي لها من قلبي ربنا ينصفها.. ربنا ينصفها 
ايه الكائن ده؟ ما تشوفوا له مصحة يتعالج فيها
هي البلد دي مافيهاش رجالة تحط الاشكال المريضة دي عند حدها؟ انت تقبل ان انسانة يتعمل لها صور فوتوشوب بالطريقة دي وتتوزع قدام المحاكم على الناس بكرة الست الوالدة يتعمل لها فوتوشوب وتتوزع صورتها.. اللي يرضاها يشوفها
يا رب ينصرك يا الهام شاهين.. ربنا ينصرك
آخر حاجة كنت اتوقعها في حياتي اني ادعي لالهام شاهين، ومن قلبي... 
قال ايه الهام شاهين فلول.. وعبد الله بدر ده بقى ثوري؟ تصدقوا بايه؟ تغور الثورة وملعون ابوها الف مرة لو عبد الله بدر يبقى ممثلها

Monday 15 October 2012

ايه الاخلاق دي امرسي اساحبي؟

اعتصام المعاقين تم فضه بالقوة
معاقين.. هم دول حيجروا ازاي لما الامن يضرب؟
المعاقين بيقولوا انهم بقوا يشيلوهم ويرموهم كأنهم شنط
مين اللي عمل كده؟ مين اللي ضميره سمح له يدي الامر، ومين اللي ضميره سمح له ينزل بالقوة؟ ومين العسكري اللي ضميره سمح له ينفذ؟ ماحدش بقى يقول لي العسكري غلبان وجاهل.. العسكري مهما كان معتوه رسمي يفهم ان دول معاقين 
المفاجأة بقى ان ده امن الرئيس المؤمن محمد مرسي.. الظاهر كان عايز ينزل يصلي ودول واقفين في خلقته
بس بقى مين المعتوه التاني اللي شار على الشعب المصري انهم لما ينتخبوا الاخوان حيتقوا الله فيهم عشان هم بتوع ربنا؟ هاه؟ هاه؟ هاه؟ ولا كافر عابد صنم عجوة يرضى يعمل كده في المعاقين

لولا عيب الندم على الخير كنت اتندمت على وقفتي جنبكوا يا حازمون

تحديث:
يعني طلع معايا حق اهو والجبهة السلفية ما بتضعش في ودن اخوها متشكرين
متشكرين يا رجالة، يا محترمين، يا حقانيين، يا جدعان، يا اللي عندكوا اخلاق، اللي عندكوا عدل وانصاف.. ياللي بتخافوا من ربنا وبتشهدوا بالحق ولو على أنفسكم أو الاقربين
اخصصصصصصصصصصصصصصصصصصصصصصصص.. وانا اللي كنت فاكرة الدم حيعلمكوا.. طول عمري هابلة
-----------
الا احنا انضربنا في يوم 12 اكتوبر بالطوب والبراشوتات والخرطوش من الاخوان اللي باعوا حازمون وساعة ما كانوا بينضربوا في العباسية طلعوا الاخوان يقولوا ماحدش يعرف مين دول ولا حتى الشيخ حازم يعرفهم وما شوفناش حازمون قالوا لنا حتى حمد الله على سلامتكوا ياللي نزلتوا تنضربوا معانا وقت ما مشايخنا باعونا
قمت سائلة عليهم على التويتر
لقيت اللي بيقول لي اصل احنا مش شايفين سبب للنزول وراضيين عن التأسيسية، وواحد بيقول لي اصل الضرب كان متبادل ودي فتنة وقلنا نتجنبها
!!!!!!!!!!!!!!!!!!!!!!!!!!!!!!!!!!!
فيه مثل مصري بيقول: الكلب ما يعضش في ودن اخوه
ولولا ان الخير بيتعمل لله وما ينفعش الواحد يندم عليه كنت ندمت على وقفتي جنبكوا.. يا رجالة، يا محترمين، يا جدعان... ياللي واحدة ست نزلت تنضرب معاكوا من البلطجية والجيش وما قالتش ان الضرب متبادل بينكوا وبين اهالي العباسية زي ما الناس كانت بتقول عليكوا، وما قالتش ان معاكوا سلاح وانكوا ضربتوا الجيش زي ما الناس بتقول عليكوا، وما قالتش مين دول احنا ما نعرفهمش، وما قالتش دي فتنة بين السلفيين واهالي العباسية والسلفيين والجيش ويجب تجنبها... اللي قال كل اللي فات ده كان الاخوان بالمناسبة
انا واحدة ست.. نزلت
وكنتوا محتاجيني ومحتاجين اللي زيي من ستة ابريل ومن الاولتراس ومن الحركات المدنية، اللي كانت واقفة في محمد محمود واتباعت من الاخوان، ووقفت معاكوا وهي مش مقتنعة اصلا بمطالبكوا، احنا وانتوا عارفين ان حازم امه امريكية، وماحدش من القوى المدنية اللي نزلوا لكوا في العباسية كانوا مقتنعين بمطالبكوا، بس كنا نازلين نحميكوا
عشان ماحدش يقول دول السلفيين الارهابيين ويستفرد بيكوا ويخلص عليكوا
وعشان ندافع عن حقكوا في التظاهر والاعتصام في اي مكان وباي مطلب لان ده حقكوا
ومات ناس من الاولتراس ومن ستة ابريل وانا اتصابت في رجلي واحنا بندافع عن حقكوا في الاعتصام، وبنحميكوا من ان حد يستفرد بيكوا ويقول دول السلفيين الارهابيين
طب الناس اللي بلطجية ولا اهالي دول لما جم يضربوكوا ضربتوهم، وفيه منهم ناس ماتت... لان الطبيعي ان لما حد يبتدي الاعتداء عليك بترد عليه ويبقى اللوم على اللي اعتدى عليك.. ما قلتش ليه ان الضرب متبادل ودي فتنة ونتجنبها؟
عشان انا ارجل منكوا
هو ايه وجه اللبس في اللي حصل يوم 12 اكتوبر؟
ناس قالت انها نازلة يوم 12 اكتوبر لكشف حساب قام الاخوان قرروا ينزلوا يبوظوها لهم وراحوا هدوا لهم المنصة عشان بيهتفوا ضد مرسي ودي بداية العدوان على المتظاهرين
طبيعي يبقى الضرب متبادل، امال يعني حيضربونا ونسكت لهم؟ وانتوا لما بتوع العباسية ضربوكوا ما سكتوش ليه؟ 
الناس اللي انضربت يوم 12 اكتوبر في الميدان دي هي اللي نزلت عملت لكوا غطاء مدني عشان ماحدش يتهمكوا بالارهاب ويستحل دمكوا.. والاخوان هم اللي اعتدوا عليهم ومافيش لبس في اللي حصل
كل الحكاية انكوا مش رجالة كفاية عشان حتى تقولوا لنا: حمد الله على سلامتكوا تتقطع الايد اللي تتمد عليكوا
يالا حنقول ايه... ربنا يسلطهم عليكوا ان شاء الله، هم دول بيبقوا على حد؟ بكرة يشأمظوكوا
وابقوا تفوا في وشي لو نزلت احميكوا تاني

Saturday 13 October 2012

ريبورت سخام لجان الاخوان

هم الاخوان دلوقت بيقولوا ان منصتهم اللي اتهدت وان اللي هد المنصة رجالة حمدين والبرادعي مع ان غزلان بيقول ان الاخوان ساعتها ما كانوش في الميدان واللي هد المنصة اللقيطة دي هم محبين مرسي
طيب، دلوقت حاليا لجان الاخوان الالكترونية في حالة هياج كامل وفاقدين السيطرة على نفسهم لانهم اتعروا واتكشفوا وارتكبوا حماقات وغباوات
انا اقولكوا هم كان في بالهم ايه
هم كان في بالهم ان عدد اللي مش مؤيدين لمرسي حيبقى قليل، حياكلوا علقة معتبرة، حيحرموا ينزلوا وحيبقوا عبرة لغيرهم، ما توقعوش ان لما يضربوا الناس قوم بقية الناس تنزل لهم.. ليه؟ لانهم يحملوا نفس غباوة مبارك
من هنا جه تضارب الاقوال بتاع: الاخوان مش في الميدان دول الشعب الجميل، الجماهير الغفيرة المطحونة، وشوش ولاد بلدنا الطيبين اللي بيحبوا مرسي (يععععع... البق الاخراني ده قلب لي معدتي) والاخوان مش في الميدان، ده الشعب
كان الخطة ان مجموعة تقول على نفسها مش اخوان تضرب المجموعة الصغيرة اللي نزلت الخميس والجمعة الصبح، ما حسبوش ان الناس حتكتر لما يلاقوا غيرهم بينضرب، تقديرهم لقوتهم ولقوة غيرهم خانهم المرة دي
فراحوا مغيرين اقوالهم في نص المعركة وقالوا: احنا موجودين بس الطرف التالت هو اللي بيضرب المتظاهرين
على اخر اليوم لما العيال جروهم زي المعيز قرروا يغيروا اقوالهم ويقولوا ان المتظاهرين هم اللي ضربوهم من غير ايتها سبب كده بسبب الحقد على الاسلام
فبقى رواية الاخوان كالتالي: الاخوان مش موجودين في الميدان واللي كسر المنصة دول الشعب اللي بيحب مرسي ولازم تعترفوا بان الشعب بيحب مرسي، والطرف التالت هو اللي بيضرب المتظاهرين، وعلى العموم اهم الاخوان انسحبوا من الميدان، اللي هم مش موجودين فيه، حقنا للدماء، ولو كانوا عايزين يولعوها كانوا فضلوا لكنهم حريصين على الوطن، وعلى فكرة بقى المتظاهرين اللي كانوا بينضربوا ما انضربوش دول ضربوا الاخوان....
اظن الكلام منطقي
والكلام المنطقي ده اللجان الالكترونية الاخوانية سارحة على النت تقوله
اللي يغيظ بقى ان الناس بتتناقش معاهم.. ممكن اعرف بتتناقشوا في ايه ومع مين؟
اي لجنة اخوان ريبورت سخام من سكات وبلاش انهاك للطاقة.. للاسف احنا ابتدينا المعركة مع الاخوان، وابتديناها بدري، انا ما كنتش حاسبة حساب اننا حنخش معاهم في معركة شبه اللي كانت مع المجلس العسكري بدري كده.. صحيح اننا دخلنا مع المجلس في معركة من يوم 9 مارس، بس المجلس دول عساكر ما يفهموش الا القوة، انا كنت فاكرة ان الاخوان اذكى من انهم يشعلوا صراع بالقوة والدراع بدري كده، وكنت فاكرة انهم مدنيين
عموما خلاص، نرتب نفسنا بقى وننظم نفسنا، ومافيش داعي لاهدار الطاقة في مناقشة الاخوان ولجانهم
انت بتتكلم مع الاخواني بهدف ايه؟
بهدف تحبط منطقه، طب هو مالوش منطق وباين وقال على رأي المثل: كدب مساوي ولا صدق منعكش.. ده بقى كدب منعكش
ولا بهدف انك تقنعه؟
ده خروووووووووووووف ده.. ما ينفعش يقتنع بحاجة
الاخواني اللي ما سابش الاخوان ايام محمد محمود ما يستاهلش الصباح ترميه عليه، ده مش بني ادم اساسا، ولا يستاهل يتف عليه حتى
ثم ده ما بيقتنعش بحاجة ده.. ده خروف
ده واحد لو المرشد بتاعه قرر يقول على البرادعي وحمدين انهم من اولياء الله الصالحين حيروح لحد بيوتهم ويقلع الجزمة ويلف حواليه ويبوس حديد الباب 
ده واحد المرشد بتاعه بيقول له اركب الاتوبيس يا مقطف يركبه،انزل من الاتوبيس ينزل، اضرب يضرب، اسحب يسحب، اعمل عجين الفلاحة.. يعجن، نوم العازب.. ينام، الليل الليل اللي يا ميمون... يتنطط
لو لجان امن دولة ولا تحريات عسكرية اقول لك ناقشهم عشان تبين الثغرات اللي في منطقهم
لو سلفيين اقول لك ناقشهم عشان دول صوتهم فعلا من دماغهم وبيقدسوا الشيوخ صحيح ويمشوا وراهم عمياني بس من باب المحبة مش التنظيم، ممكن لو اقتنع يقلب على الشيخ اللي يخلا بيه ولا يحس انه كان بيخدعه.. لكن الاخوان كده انت بتنطح في حيط
مالهمش حل غير ريبورت سخاااااام... ولك الاجر والثواب عند الله
اقولكوا سر.. انا متضايقة اننا ابتدينا المعركة مع الاخوان.. ماليش مزاج احارب اليومين دول.. بس ادي الله وادي حكمته حنعمل ايه؟ ناس بتضربنا حنجري يعني من قدامهم؟

Friday 12 October 2012

انا مش اخوان على فكرة... انا مقطف بودان

تحديث:
صفوت حجازي نفى الكلام اللي نسب له بانه بيقول حرب اهلية ومرسي خليفة المسلمين والكلام ده 
هذا وقد انسحبت المقاطف الى الاتوبيسات فور صدور الامر
احنا كنا وصلنا لحد فين في البوست اللي فات؟ لحد ما دخلنا الميدان وكل ما نهتف ضدهم يحدفونا بالطوب وبعدين يخشوا وسطنا ويقولوا مش احنا اللي بنضربكوا ده الفلول.. واحنا شايفينهم وهم بيضربونا
المهم الامور هديت شوية بعدين لقينا شوية لغط عند باب اللوق رحنا عند باب اللوق كان فيه ناس رافعة صورة لمرسي نص مرسي ونص مبارك وبيهتفوا ضد المرشد والاخوان ومرسي بعدين فجأة اتحدف علينا طوب من ناحية الصينية، وابتدينا نسمع صوت فرقعة خرطوش ورموا علينا براشوت، انا شوفته فضلنا نحدفهم بالطوب ويحدفونا بالطوب لحد ما فجأة جالهم امر بالانسحاب راحوا جاريين قام العيال جريوا وراهم بالطوب وقعدوا يزفوهم ويقولوا لهم مع السلامة يا ولاد الوسخة.. 
بعدين فضلنا ماشيين ناحية عبد المنعم رياض كل ما نلاقي اتنين اخوان ماشيين من الفلول اللي ما كانتش لسه جريت نعلي صوتنا ونقول الاخوان خرفان، "يا ترى لما واحد معتبر نفسه راجل المرشد يقول له اركب الاتوبيس يركبه انزل من الاتوبيس ينزل منه ده مراته بتبص له ازاي؟ اكيد بتطرقع له بالشبشب على قفاه كل يوم" وهم اول ما يسمعوا كده يمشوا بعيد ويمدوا وبعدين يجروا
D:
بعدين لقينا دخان طالع من ناحية المتحف مشينا ناحية الدخان لقينا اتوبيسين من بتوع تحميل المقاطف والعين والدخان طالع منهم كثيف قوي وصوت البنزين بيفرقع والهوا سايق الدخان ناحية المتحف، فما تعرفش مين الاهبل ابن الاهبل اللي كان بيبص من البلكون وافتكر ان المتحف هو اللي بيتحرق وانتشر الخبر كالنار في الهشيم، والمتحف ما اتحرقش ولا جه ناحيته نار خالص ده حتى الاتوبيسات كانت بعيدة عنه وكان الخطر على كوبري اكتوبر مش على المتحف.. فضلت على التويتر اطلب من الناس طفايات حريق عشان مافيش اتوبيس بيبطل الولعة لوحده طالما فيه بنزين
بعدين رحت اكل ولسة مخلصة اكل اهو وشوفت واحد على التويتر كاتب بيقول ان صفوت حجازي قال على الجزيرة مباشر مصر: سنحولها الى حرب اهلية فهم يحاربون الله ورسالة الحق ومرسي خليفة المسلمين
انا ما شوفتش الكلام ده... لو حد عنده الفيديو لو سمحتوا اشوف واسمع بنفسي عشان بجد مش مصدقة
انا خلصت اكل حارجع تاني اهو.. وحابقى اكتب بوست كمان شوية بالتطورات اللي حصلت

يا اخواني يا جبان مش ناسيين عمر سليمان

التليفون بتاعي قاطع شحن مش عارفة اكتب وسط الضرب بس ستر ربنا جبت اللاب توب واليو اس بي بتاعي وقاعدة على الرصيف باكتب دلوقت
شهادتي:
- اتوبيسات نقل المقاطف كتير قوي المرة دي اكتر من كل مرة وكلها راكنة عند عبد المنعم رياض او انا ما شفتش الا دول بس كانوا كتير
- لفيت من عند طلعت حرب لقيت عيال معدومين العافية وبيقولوا الاخوان بيضربونا، ناس راسها مفتوحة، ناس عينها مفتوحة ضرب بالهبل
- قابلت رشا عزب وانا في طلعت حرب حيث كانت معركة هناك بالطوب وقلت لرشا مين دول اللي بيضربوا على العيال قالت لي اخوان وقيادات ببدل كمان 
تقدمت فعلا كان الاخوان هم اللي بيضربوا بالطوب وزارعين وسطنا احنا ناس اخوان تانيين بيقولوا لنا اللي بيضربوكوا مش اخوان دول ثوار... انا مش اخوان على فكرة بس انا عايز نتوحد.. وشكله اخوان خالص.. عارفين انتوا الشكل الصدغ ده ابو دقن خفيفة وابتسامة مستفزة واخنف ومنحنح... كلهم نفس السحنة دي
- فضلت المعركة على كده في طلعت حرب لحد ما تقدمنا وفيه شيخ ازهري مصاب في راسه ورفع الجزم للاخوان
- دلوقت احنا في الميدان، لما دخلنا من طلعت حرب اللي في محمد محمود ضموا علينا وفضلنا نهتف:
بيع بيع بيع الثورة يا بديع
كنتوا فين يا اخوان لما انضربنا في الميدان
يا اخواني يا جبان مش ناسيين عمر سليمان
الشعب يريد اسقاط النظام
او او اوا اوا او او ** ام محمد مرسي بتاعكوا
يسقط يسقط حكم المرشد
اشهد يا محمد محمود اللي ماتوا دول اسود
اللي ماتوا دول جدعان والاخوان هم الخرفان
يتخلل هذه الهتافات ضرب طوب من الاخوان.. كل ما الهتاف يسخن وسط الميدان نلاقيهم طلعوا علينا من باب اللوق وطلعت حرب والصينية وفضلوا يحدفوا علينا بالطوب
الاصابات كتير... كلها في الراس والعين
محتاجين دكاترة واسعافات
ملحوظة: ماحدش يقول لنا بنضرب "بعض" 
احنا مش "بعض"
الاخوان سلطة ودول متظاهرين بيهتفوا والاخوان بيعتدوا عليهم بالطوب كل ما يهتفوا ضد المرشد ومرسي
ملحوظة تانية: اي اخواني حيدخل هنا حاطلع ميتين امه لو راجل ينزل لي هنا في الميدان يوريني نفسه بدل ما يسرح على النت زي النسوان اللي اجرتها خمسة جنيه وطبق بامية ارديحي

استهدوا بالله... وكله ينزل ماحدش يقعد في البيت

انا لسه صاحية ولاقية على التويتر ناس بتقول ان الاخوان بيضربوا الناس... والاخوان طبعا بيقولوا لا ما بنضربهمش هم اللي بيشتمونا
اولا انا حانزل اشوف بنفسي اهو عشان ممكن تكون فيه ناس بتسخن
ثانيا: هي مش بلطجة على فكرة.. مافيش حاجة اسمها الاخوان يكسروا منصة عشان كانت بتشتم المرشد
الناس احرار يشتموا المرشد زي ما هم عايزين، هو المرشد ده مصاب ثورة ولا مسجون؟ ده سلطة، واللي عايز يشتم السلطة هو حر
اذا الاخوان نازلين يأييدوا قرار الرئيس باقالة النائب العام اللي قرر يبلطج ويقول طب والله ما انا ماشي ده من حقهم
ما حدش من حقه يطردهم من الميدان.. لكن هم ما يخشوش على الناس زي أبناء الحاج إبو وامبارح قلعوا الاحزمة وجريوا ورا الناس والنهاردة بيكسروا للناس المنصات عشان بيشتموهم
ماهم لازم يتشتموا؟ مش هم اللي قعدوا يسعوا ورا السلطة؟ اللي بيبقى في السلطة بيتشتم.. ويتشتم وما يضربش الناس ايه البلطجة دي؟ 
كل الناس اللي في التحرير، سوا الاخوان ولا اللي بيشتم الاخوان، ضد النائب العام، ومش عايزينه يقعد، عايزينه يروح الفاتيكان، يروح جزر القمر، يروح هضبة التبت.. يروح في اي داهية بس يمشي
وماحدش واخد صف النائب العام ده خالص.. 
فمبدئيا دي نقطة مشتركة بين كل الناس
الناس اللي مش اخوان مش عايزين ينزلوا التحرير من غير ما يوضحوا موقفهم انهم ضد النائب العام وفي نفس الوقت هم مش مع الاخوان، عشان عمايلهم السودا، عشان فيه من اللي واقف اللي له عين طارت في محمد محمود واللي له صاحب مات في مجلس الوزرا واللي طلع ميتين اهله في شارع منصور، فمش طايقين الاخوان.. وبيشتموهم، وهم احرار، مافيش حاجة اسمها يقعلوا الحزام ويجروا ورا النار
يستهدوا بالله كده وينزلوا يثوروا حتى العصر تأييدا للرئيس وما حدش معترض على قرار الرئيس ويمشوا من غير ما يضربوا حد
ولا ينزل لهم الاولتراس بقى ويورونا بقى هم رجالة ازاي؟ ماهو الاولتراس لو كبرت في دماغهم وحسوا ان الاخوان بيتغابوا على الناس ما حدش حيعرف يحوشهم، ودول ما بيحبوش الحال المايل ولما بيسخنوا بياكلوا اي حد في وشهم
اديني حذرت اهو
ويالا توكلوا على الله ننزل كلنا التحرير

موقعة الجزمة

تحديث: نسيت اهم حاجة...
محمد اتصل بطارق مراد على رقم 01289802783
------------
مش انا ضربت طارق مراد بالجزمة؟
رحت برنامج لطوني خليفة، المفروض ان البرنامج بيستضيف ضيف بيخليه يتكلم وضيف تاني بيبقى ورا ازاز مموه بيكتب ملاحظاته ولما بيعترض بيضرب زرار بيقلب نور احمر بعدها بيترفع الستار بيبين الضيف التاني اللي بيبتدي يقول ملاحظاته.. المفروض ان انا الضيف  التاني اللي ورا الستارة، والضيف اللي بيخش يطرش في الاول بيبقى طارق مراد
طبعا قال الطراش المعتاد بتاعه: الشعب المصري في ضلال، ودي مش ثورة دي نكسة، والرئيس مبارك له الفضل في الثورة العظيمة اللي هي نكسة وصفوت الشريف هو بتاع الاعلام الحر واللي قوم الثورة، اللي كانت نكسة من شوية، والبرادعي والاخوان وستة ابريل كلهم عملاء لامريكا واسرائيل، وانا نفسي ابوس رجل مبارك، وكل اللي قاموا بالثورة ارجوزات ومأجورين وحماس وحزب الله هم اللي قتلوا المتظاهرين
فطبعا ايدي ما اتشالتش من على الزرار الاحمر... بعدين اترفعت الستار وده اول ما شافني هاتك يا شتيمة فيا وفي ابويا ويقول لي الفلوس والتمويل والعربيات والهدوم
انا يتقال لي الهدوم؟ طب ممكن مش عارف ان اللانوس بالقسط.. لكن الهدوم؟ انا الهدوم؟ ده انا مرة على التويتر باقول للعيال ده انا حاطلع في التلفزيون واتكلم عن الاضراب وبتاع وحاجة اخر وطنية لقيت واحدة ما اعرفهاش بتقولي: وانت يا نوارة ناوية في المرة دي ترحمينا من الطرحة البيج ولا انت من النوع اللي بيصعب عليه العشرة؟ والبنات المنفسنة على التويتر والفيك بوص طول الوقت بيتريقوا على لبسي، حتى لما حكيت لامي وقلت لها وقال لي الهدوم راحت ضاحكة... امي اللي خلفتني.. مالها هدومي؟ مش حاجة ساترة الانسان مننا وخلاص؟ هو انا فاضية اتحنتف؟
:D
المهم قعدت اتريق عليه شوية وهو كان قال اللي حيقول المخلوع مش حيحصل كويس وانا فضلت اقول له المخلوع، المهم ابتديت اتكلم عن انجازات مبارك الوسخة طول التلاتين سنة بالارقام وقلت انا لو مفروض اعتذر يبقى اعتذر للشعب المصري وللاستاذ اللي قاعد قدامي ده لاننا اتأخرنا في الثورة لحد ما مبارك افسد الانسان وخلا بعض البني ادمين يتحولوا لكائنات مريضة وعبدة كده زي الاستاذ اللي قاعد قدامي.. وانا باتكلم طبعا ده مش بيسكت وعمال يقل ادبه ويتطاول لحد ما قال لي وهو بيبتسم ويغمز بعينه: نوارة تعالي لي وانا اظبطك!
والله يا مؤمن انا مش عارفة امتى قلعت الجزمة وامتى حدفتها.. كل اللي فاكراه ان جزمتي لبست في وشه قبل ما طوني خليفة يكمل جملته اللي كان بيقول فيها: ما يصير ها الكلا...
الكلام يعني
وزوري بقى اتفتح: هي مين دي اللي تظبطها يا اللي امك حيرانة جابتك منين يا وسخ يا ابن الوسخة
وطوني مكتفني عشان ما اضربوش تاني والبأف واقف زي الفار وبيقول لي: انا اقصد اظبطك سياسيا.. انت اللي نيتك وحشة.. 
فلت من طوني وجريت عليه اضربه تاني باللكميات بس هو جري الجبان، وطوني رجع كتفني مع ناس تانية..
راح الاخ طارق ده واخد الجزمة بتاعتي وقال: انا واخدها حرز
:D
راحوا فريق البرنامج واخدين الشنطة بتاعته رهينة وجريوا وراه عشان يجيبوا لي الجزمة، وقالوا له هات الجزمة واحنا نديك الشنطة
طوني خليفة اعتذر لي عن سفالة هذا الشخص وقال لي: صار لي عشرين سنة بها المهنة ما شفت عمري ها الشي ولا حصل معي موقف متل هيك
وانا خارجة فجأة لقيت كل اللي في الاستوديو بيصقفوا لي ... الراجل ده محبوب قوي
:D
المهم مشيت، محمد اتصل بيا يشوفني خلصت، لجل غباوتي حكيت له، على ما رجعت له لقيته بيغلي وجاب نمرة البأف ده ما اعرفش منين واتصل بيه: انت طارق مراد؟ انا جوز الست اللي انت تطاولت عليها.. قد الكلام اللي انت قلته ده تنزل تقابلني؟ 
يقوم طارق يقوله: ايه؟ نعم؟ انا مش سامع
محمد مش يسكت بقى لا مصمم: باقولك انا جوز نوارة نجم اللي انت تطاولت عليها يا .... قد كلامك اللي قلته تنزل قدامي توريني بتظبط ازاي ولا حتعمل ... ؟ 
راح طارق قاله له: تصدق ان سافل وقليل الادب
محمد قاله: يعني حتنزل تقابلني من الاخر ولا حترغي كتير؟ حدد المكان والزمان.. قام طارق قاله: طب انا بقى مش حارد عليك.. وراح قافل السكة
:D
بعدين راح كلم عبير معدة البرنامج وقالها انت ازاي تدي نمرتي لجوز نوارة؟ قالت له ما ادتش نمرتك لحد، قعد يا عيني يشتمها وهي مالهاش ذنب، قالت له انا مش حارد عليك لاني مقدرة حالة الراجل لما واحدة ست تضربه بالجزمة بتبقى صعبة عليه.. فقعد يشتمها تاني وقال لها انا طارق نور صاحبي وحاكلمه واخرب بيتك.. قالت له الارزاق على الله انا صحفية وعضوة نقابة وكرامتي فوق كل حاجة مش من حقك تكلمني وتهيني وكمان تهددني
قعد يشتمها برضه
هو طبيعي الكائن ده؟
المهم انه مش عايز الحلقة تتذاع وبيقولها اجي بكرة نكمل الحلقة من غيرها
هم بيستضيفوه ليه بقى؟
اه.. الوطن نزلت الخبر.. للدرجة دي الراجل ده محبوب؟

Thursday 11 October 2012

صورة


الصورة دي لنا يوم 25 يناير 2011 الساعة سبعة مساء... يوم ما الاخوان قالوا مش نازلين واللي حينزل حيبقى بيعبر عن نفسه بصفته الشخصية مش بصفة الجماعة... فاكرين؟

كنا فرحانين يوميها... ما عادش فيه مكان للفرح، بس احنا مكملين

احنا بتوع الاجمل، وطريقه الصعب، والضرب ببوز الجزمة، وبسن الكعب، والموت في الحرب

يا عم الظابط احبسني... رأينا خلف خلاف، سففني الحنظل واتعسني، رأينا خلف خلاف
احنا مش مهتمين بمحاكمكوا.. احنا قاعدين في مكانا

نتقابل بكرة.... ما خدمك، الا من سجنك

انا نازلة بكرة ان شاء الله.. 12 اكتوبر

:'(
لازم انزل بكرة... 
كل بتوع معركة الجمل خدوا براءة... شوتوفوب دي ولا ايه؟ الثورة طلعت شوتوفوب؟
مامة محمد وديع عاملة اضراب عن الطعام
وانا حاحكي لكوا بقى حكاية وديع دي
انتوا عارفين طبعا انا كنت شاكة في بتوع 8 ابريل الاول، بعدين اعتذرت لهم، وبعدين اغلبهم خرج الحمد لله، الا محمد وديع عشان هو اجرأهم
الاول دخل محمد وديع باكاونت على التويتر وبصراحة كلنا كلنا كلنا شكينا فيه، مش انا بس، ظابط وفي السجن الحربي ومعاه اكاونت تويتر وداخل باسمه عادي... يبقى حاجة من الاتنين، يا مشكوك فيه، يا اما مجنون
طلع مجنون
:D
مجنون بالحرية
دخلت عليه انا بدراعي كده على التايم لاين وقلت له انت ايه بقى اللي انت عامله ده؟ ويعني ايه عندك اكاونت وماحدش بيعمل لك حاجة وبتتكلم عن طنطاوي انت ايه حكايتك بالظبط؟ وانت بقى مش خايف تتشمط ولا يعملوا فيك حاجة عشان الاكاونت ده؟
فقال لي: ما يعملوا فيا حاجة... ايه المشكلة؟ المهم الناس تبقى عرفت الحقيقة لما ييجوا يعملوا فيا حاجة
فقلت له يا سلااااام.. عادي كده يعني مش خايف؟ انت مجنون ولا ايه؟
فقال لي: انا بجد مش فاهم ازاي نوارة بتقول لي كده؟ انت فاكراني ايه عشان تبقى انت واحدة ست ومدنية ومش بتخافي تنزلي تواجهي الموت ومستكترة عليا وانا راجل وشغلتي احمي البلد اني ما اخافش من الموت ولا الاذية، انا كنت متوقع ان انت بالذات حتبقي فاهمة موقفي ومشاعري بدل ما تقولي عليا مجنون، وليه مش بتقولي على نفسك مجنونة؟
المهم يعني ما اتاكلتش بالكلمتين دول برضه... انا اصلي رخمة
قلت له طب تعالى لي على الدايركت، ورحت الدايركت وفضلت اعصر فيه عشان اجيب اخره
الجدع ده شجاع قوي
شجاع شجاعة نادرة.. الاستبياع على العمر مش اقصى درجات الشجاعة.. ناس كتير مستبيعة على عمرها، مش احنا بس، اقصد بتوع الضرب ببوز الجزمة وسن الكعب، بس كمان ناس كتير تانية مستبيعة على عمرها، اولهم الناس اللي بتعدي الشارع، والناس اللي شعارها في الحياة: اما اللحاق بالاتوبيس أو أموت دون ذلك... والناس اللي واهبة حياتها لعربيات البيجو اللي بتسافر كل يوم ومسمينها النعوش الطائرة
الاستبياع على الموت مش ميزان الشجاعة
ميزان الشجاعة الحقيقي انك تستبيع على حريتك، وتعرض نفسك انك ممكن تتعذب، ممكن حد من اهلك او حد عزيز عليك يتبهدل معاك، ممكن يتخرب بيتك في شغلك
المصريين بالذات مستعدين يموتوا بس مش مستعدين يترفدوا من الشغل، يعني ايام محمد محمود الناس كانت بتروح الشغل الصبح تمضي وتيجي بعد الضهر تقف قدام الرصاص الحي، على اساس ان الموت مش قصة، بس قطع العيش قصة كبيرة، لو مت وانا على قوة العمل اللي من بعدي حيلاقوا معاش، لو عشت يبقى ما اعيش اشحت، ويبقى عندي شغل يحفظ كرامتي.. لكن لو اترفدت حاعمل ايه؟
عشان كده باعتبر ان اللي ضحى بشغله اشجع من اللي مستعدين يضحوا بحياتهم.. وفيه ناس كتير ضحت بشغلها
واللي يضحي بحريته اشجع من اللي ضحى بشغله، واللي يضحي باهله او اي حد عزيز عليه اشجع واحد في الدنيا... 
همممممم... مدد يا سيدنا الحسين، اهو سيدنا الحسين اخد معاه كل مظاهر الشجاعة، فهو اخد ماله اللي ممكن يفضل لولاده من بعده، واخد نفسه، واخد ولاده، واخد زوجاته واخواته، بنات وولاد، وراح واجه بيهم، فهو كده سيدنا الامام الحسين لم كل طبقات الشجاعة والمروءة في طلعة واحدة: نفسه وماله وأولاده واهله وحريمه وحريته، وعرض كل دول مش بس للقتل، اللي هو اسهل حاجة، لان البهدلة اصعب كتير من الموت، فهو عرض نفسه واهله وماله وولاده للبهدلة قبل الموت
احنا ايه اللي جابنا هنا؟
اه... 
محمد وديع
حبيبي يا سيدنا الحسين.. يا حبيب القلب والعين... مدد
المهم
الثورة دي فيها ناس كتير استعارت من سيدنا الحسين بالذات حاجات كتير، زي انهم يوم 28 ينزلوا بنسوانهم وعيالهم، زي ان فيه ناس استحملت الاذية المعنوية وتشويه السمعة والخوض في الاعراض اللي اتعرضت لها السيدة سكينة بنت الامام الحسين اكتر واحدة، زي محمد وديع... اللي عرض نفسه انه يتعذب ويتحبس حبس انفرادي ويعرض اهله والناس العزيزة عليه للمضايقات والتهديدات عشان قرر يواجه بانه يعمل اكاونت على التويتر باسمه ويفضح فيه المجلس العسكري بالوثائق والمعلومات.. كان يقدر يعمل اكاونت باسم مزيف، وانا قلت له كده، فهو قال لي اعمل اكاونت باسم مزيف ليه هو انا جبان؟
وبالمناسبة من كلامي الكتير على التويتر مع محمد وديع هو عنده هسهس من الجبناء، وزي ما يكون مثلا حاسس ان الثورة دي ما كانش ينفع ابدا ناس مدنيين ينزلوا يموتوا واحنا اللي حالفين يمين نحمي الوطن نفضل عايشين، المفروض كنا احنا نموت وهم يفضلوا عايشين، والاحساس ده مسيطر عليه وعلى كل تصرفاته، عشان كده تصرفاته كان فيها شجاعة وصلتنا اننا يا اما نشك في نواياه يا نشك في قواه العقلية، بس هو قواه العقلية سليمة، ونواياه سليمة، هو بس حاسس انه اذا كان فيه مدني ضحى بحياته فانا واجبي اني اضحي بكل ما املك بحياتي وحياة كل ما يخصني لان ده واجب عليا وكان واجب عليا اوفر حياة الناس اللي ماتت دي... انا حالف يمين
قال لي كده.. انا حالف يمين
حبيبي يا سيدنا الحسين
:)
هو انا كنت اعتذرت لظباط تمانية ابريل ومحمد وديع قبل كده صح؟ باقول اعتذر لهم تاني.. وكل شوية حاعتذر لهم ولو ان الاعتذار ما يجيبش فايدة
انا نازلة بكرة ان شاء الله.. عشان وديع، وعشان الدستور، وعشان القتلة اللي طلعهم القضاء الشامخ براءة
النكتة بقى في موضوع براءة جميع المتهمين في موقعة الجمل دي ان الاخوان مش حيقدروا يقولوا لنا احنا حمينا الميدان تاني هههههههههههههههههههههههه ده موقعة الجمل بالنسبة لهم عاملة زي الطلعة الجوية بالنسبة لمبارك، كل ده عشان حدفوا طوب زيهم زي الناس... اهي طلعت فوتوشوب اهي مبسوطين؟
انا مبسوطة منكوا قوي... من ساعة ما الاخوان مسكوا البلد والنحس عمال يرف عليها.. 
شرارة شرارة شرارة شرارة شرارة شرارة شرارة شرارة 

Wednesday 10 October 2012

انا مش مسامحة

قالك العفو عن مساجين الثورة والبلطجية لا
البلطجية دول اللي شكلهم فقير واتاخدوا ظلم وعدوان واتحبسوا في قضايا ملفقة ولا حتى مش ملفقة يتعرضوا على محاكم عسكرية ليه؟
وابطال موقعة الجمل اخدوا براءة كلهم
يبقى احنا اللي كنا بنموت نفسنا
احنا اللي ضربنا نفسنا في الجمل وتسعة مارس وتمانية ابريل وخمستاشر مايو وتمانية وعشرين يونيو وواحد اغسطس وتسعة تسعة وماسبيرو ومحمد محمود ومجلس الوزرا وشارع منصور
حسبي الله ونعم الوكيل
احنا لازم نكتب شهاداتنا على الاحداث دي.. 
ونكتبها ونطبعها عشان ممكن يشيلوها لنا من على النت

Tuesday 9 October 2012

الاخوان بييجوا عندي المدونة ليه؟ انا سبت التويتر بسببهم

وواحد كتب على التويتر ان اختفائي من التويتر سببه ان الاخوان ادوني رشوة او هددوني
الحقيقة انا مش عايزة اقعد على الصنيطر لانه مليان لجان الكترونية والكلام معاهم غير مجد
المفروض التويتر ده بنستخدمه للحشد او للتغطية واحيانا في ايام الوكسة اللي شبه ايامنا بنحط همنا على هم بعض ونقعد نولول.. بس لجان الاخوان الالكترونية كتير قوي.. ودمهم تقيل، زمان كان فيه لجان امن الدولة ولجان الجيش وكان فيه اولتراس حسان بتوع حسان ده سيدك يا كلبة يا شيعية يا بنت الحشاش.. بس كله كوم ولجان الاخوان الالكترونية كوم تاني، اولا من سمات البني ادم الغبي انه يمسك في حاجة ويفضل يقر فيها وما ينقلش، زي داستين هوفمان في فيلم رجل المطر كده لما كان بيزن في حاجة واحدة، لجان الاخوان بيمسكوا في جملة واحدة ويفضلوا يكرروها، ثانيا دمهم تقيل قوي.. انا عمري ما شوفت تقل دم كده، مافيش عندنا في مصر حد دمه تقيل كده ابدا، ولا حتى سمير صبري، دي جينات ايه دي؟ مش بتاعتنا دي، دي جينات احد الغزاة اللي جم مصر وما اندمجوش... مين اللي عامل كده؟ الهكسوس دول ولا ايه؟ ثالثا ايه العائد من الهري مع لجان الاخوان الالكترونية؟ الواحد كان بيهري مع لجان امن الدولة عشان يكشفهم، بيهري مع لجان الجيش عشان يحبط منطقهم، بيهري مع لجان السلفية عشان يبين عبطهم ويضحك الناس عليهم، انما لجان الاخوان اولا مكشوفين من اول كلمتين خصوصا لما يقولوا: انا مش اخوان على فكرة، ما عندهمش منطق عشان يحبط، الناس بتضحك عليهم من غير ما الواحد يعمل عليهم حفلة زي ما بيعمل على السلفيين... طب ايه لازمتها؟ 
فقلت ارجع للمدونة على اساس انها القاعدة الاساسية.. رايحين يعملوا اكاونتات جوجل وييجوا هنا ليه؟
هش يا لجان الاخوان.. مش عايزاكوا انا
بعدين انا طول عمري بكتب بوستات قد اللحاف عشان ماحدش يقرا الا اللي مهتم، انتوا قاعدين تقروا ده كله لواحدة مش طايقينها؟ طب وربنا لاعذبكوا ومن هنا ورايح كل بوست حيبقى مجلدات.. انا حاتوبكوا
وبمناسبة الاخوان اللي دفعوا لي الرشوة، احنا اجرنا شقة، بس على البلاط، مش ممكن كل الفولورز دول يعني لو نقطوني كل واحد بجنيه حافرش الشقة والشقق اللي في المنطقة كلها.. ولا انتوا فولورز على الفاضي؟ 

Monday 8 October 2012

شوفتوا خطبة الريس؟ هههههههههههههههههههههههههه

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ايه يا ريس ده؟ ينفع كده يعني؟
مبدئيا، وعشان أكون منصفة، انا نمت في نص الخطاب.. وإنني لأحيي وأحترم وأقدر وأبجل كل إنسان تابع الخطاب لآخره وقاوم الرغبة العارمة في النوم
السيد الرئيس الدكتور المهندس يا بغل هو علاج ناجع للأرق.. تخيل لما أنا أنام.. أنا لا أنام يابني.. لا أنام فعلا على رأي الست فاتن لامؤاغزة حمامة.. لكن خطبة الريس نيمتني ننة هوووو
يوسف الحسيني زعلان من الريس عشان بيتريق على اللي ما بيصلوش الفجر، وبيقول يعني ماحدش يقدر يعترض على مرسي غير اللي بيصلي؟ يعني المسيحيين ما ينفعش يعترضوا على الرئيس؟ يعني اللي ما بيصليش ما ينفعش يعترض على الرئيس؟ 
أولا أنا مستغربة إن واحد بذكاء يوسف الحسيني يسأل عن المسيحيين في أي حاجة تخص مرسي... 
مرسي ما يعرفش إن فيه مسيحيين في مصر.. من أول لحظة في الخطبة: بسم الله، والصلاة والسلام على رسول الله، لآخر لحظة في الخطبة بتاعة دعاء ختم القرآن اللي هو عمله ده والجماهير بتقول وراه آمين
ثانيا: بالنسبة للمسلم اللي مابيصليش وبيعترض على مرسي، حنقول له كلمة واحدة نقتبسها من محمد حسين يعقوب: ما بتصليش لييييييييييييييييييييييييييييييييييييييه؟
ثالثا: ايه بقى موضوع الصلاة اللي عاملينه قصة ده محسسني إن اللي بيصلي ده عمل إنجاز... أنا شخصيا ما أعرفش إلا ناس قليلة قوي ما بتصليش، وأغلبية الناس بتصلي، وعادي يعني ينفع الواحد يصلي ويبقى ابن وسخة وظالم وكداب وما بيتقيش ربنا في الناس ولا في نفسه ولا حتى في ضناه... متهيألي يا ريس إنت مثلا ما تعرفش غير النوع ده من الناس.. زمايلك في الجماعة
رابعا: ماشي قشطة.. مش أنت مش حتسمع حد ما بيصليش، وأي حد عايز يعترض عليك لازم يصلي؟
طيب أنا باصلي يا ريس، من وأنا صغيرة خالص، من سن 12 سنة وأنا ملتزمة الحمد لله بالصلاة ولو حصل ايه لازم ما افوتش الصلاة ابدا وخلاص اتعودت ان اول ما الادان يدن ابقى زي اللي اتلدع ولازم اقوم اصلي، بعدين لما وصلت تانية جامعة عرفت اني كان مفروض اصلي من سن 10 سنين، فقعدت سنتين اصلي الفرض فرضين عشان اعوض السنتين اللي عليا، وايام الثورة اتعلمت حاجة اني اجمع مع دخول الوقت، يدن الظهر اصلي ظهر وعصر جمع، لو فضلت عايشة لحد ادان العصر اصلي عصر تاني، يدن المغرب اصلي مغرب وعشا لو فضلت عايشة للعشا اصلي عشا تاني.. عشان دخول الوقت.. عارفه بقى ولا مش عارفه انت، وكمان عشان يوم 2 فبراير ماما كلمتني وانا في الميدان وقالت لي الراجل التخين اتصل بالجزيرة وقال ان اسرائيل حتضربكوا بالطيران صليتي العصر؟ فقلت لها: صليت.. بس حتى لو ما صلتش يا ماما واستشهدت اكيد يعني ربنا حيسامحني في فرض.. قالت لي: وليه نجازف؟ انت حاسباها كده، افرضي رحتي لقيتيه هو مش حاسبها كده، ترجعي تاني تصلحي الموقف ازاي؟
:D
وعاملة عمرتين
مبسوط مني يا ريس؟ باصلي واصوم اهو...
مبسوط؟ 
اه.. اكيد انت ودلاديلك مبسوطين، بس الله اعلم ربنا مبسوط مني ولا لا بعد ما قعدت استعرض عباداتي وما رضتيش استعرض ذنوبي اللي ربنا عارفها وساترها عن الناس، ولو اي انسان، واولهم الرئيس، فكر انه زي ما بيستعرض نفسه وهو بيصلي وبيعمل عمرة كمان حق ربنا يستعرض ذنوبه المخزية قدام البشر حيفكر الف مرة قبل ما يستعرض صلاته، الناس شايفة اللي بيصلي بيصلي، بس ربنا وحده اللي شايفه رغم انه بيصلي بيعمل ايه، اشمعنى ربنا يستر ذنوبك قصاد الناس وانت ما ترضاش تستر طاعاتك اللي له؟ اشمعنى هو مش بيعايرك بالذنب وانت بتعايره بالصلاة؟ انا قلت اني باصلي عشان اكبس مرسي وجماعته اللي فاكرين ان ماحدش في الدنيا بيصلي غيرهم، لكن انا خاطية ومذنبة ذنوب وخطايا لو امي عرفتها حتقرف تبص في وشي، وربنا عارفها وسترني فيها ومش بيقرف يسمع مني لما باكلمه على كل اللي هو عارفه عني ويقدر يمنعني اصلي.. الصلاة اللي انتوا عمالين تتباهوا بيها على الخلق دي لو ربنا مش عايزكوا تصلوا يحرمكوا منها في لمح البصر لا فضل منكوا انكوا بتصلوا ولا عيب في اللي مش بيصلي، انتوا مش ربنا عشان تحكموا عليه، يمكن يكون احسن من كل اللي بيصلوا في الدنيا.. المفروض ان الواحد بيصلي ويصوم ويعمل عمرة لربنا مش للرئيس، ومش مفروض لما حد يسألك انت بتصلي ولا لا ترد عليه.. عشان لا هو ربنا ولا انت بتصلي له
بس انتوا واخدين على النفاق، واصلا لو كنتوا بتصلوا عشان ترضوا ربنا كان بان عليكوا، كنتوا بطلتوا كدب ونفاق وغش وخداع وفجر في الخصومة.. الصلاة حق ربنا وبالاساس هي تعود، انا عشان ماما عودتني من وانا صغيرة باواظب فيه ناس اهلها ماعودوهاش، بس مش معنى كده ان اهلها ما ربوهاش، يمكن ربوها احسن ما انا اتربيت، الصلاة حق ربنا، والحق والعدل والشهامة والكرم حق العباد، ربنا بيسامح في حقه ما يسامحش في حق العباد، تصلي لله وتكدب على الناس؟ ربنا ممكن يسامحك تفوت فريضة ولا عشرة ولا الف، لكن مش حيسامحك انك خدعت ناس وثقت فيك الا الناس دي هي تسامحك، وانا شخصيا مش مسامحاكوا.. مش مسامحاكوا في اي حاجة يا اخوان... من اول القعدة مع عمر سليمان، مرورا بسلسلة الكدب والخداع، وما خفي كان اعظم، كفاية اللي عملتوه ايام ماسبيرو ومحمد محمود ومجلس الوزرا.. ربنا يبقى يوريكوا النار اللي شوفناها 
وانا كمان باصلي.. ايه رأيكوا؟ وبادعي عليكوا في الصلاة كمان بالمناسبة.. وحسبي الله ونعم الوكيل فيكوا واحد واحد، باقول على الاخوان.. كلهم.. اي اخواني ما سابش الاخوان ايام محمد محمود ما يستاهلش غير ان الواحد يقول عليه حسبي الله ونعم الوكيل فيه ربنا يوريه اللي احنا شوفناه اياميها
وحيث بقى اني باصلي، يعني معايا كارنيه الاعتراض على الرئيس... تعالى لي بقى من خلال الشنطة...
انت ايه يا راجل انت اللي انت عملته ده؟ هاه؟ هاه؟ هاه؟ 
مرور ايه اللي انت نظمته وامن ايه اللي انت استعادته وبنزين ايه اللي وفرته وانبابيب ايه والواد اللي على العجلة وبيلف في الشارع والهذيان اللي انت فيه ده؟ ايه يا عم الحاج ده انت قاعد ع الترعة هناك في بلدكوا؟ 
بص بص بص بص يا حاج... الورق اللي انت ماسكه وقعدت تقراه لحد ما نيمتنا ده تبرمه وتحطه فييييي... عينك.. آه
انا بكلمك هنا بوصفي مواطنة باواجه ايه في حياتي
اولا: المرور 
عجينة طراش.. الموضوع مش حكاية ان الدنيا زحمة
عربيات الامن المركزي منتشرة في كل مكان صحرا ان كان او بستان، وهي عربيات ضخمة الجثة مشرئبة الفلنكات شلولخ، كمان بتقف بالعرض عشان تورينا نفسها... فيستحيل باي حال من الاحوال ان صلاح سالم يمشي او كوبري اكتوبر يمشي.. الطريقين دول في حالة توقف دائم... عقبالك
ثانيا: الامن والامان
ادعي عليك بايه وانت فيك كل العبر؟ الشرطة من ساعة ما نزلت بتفضل تقبض على الناس ويموتوا في ايدها، الناس بتموت في الاقسام وبتموت وهي بيتقبض عليها واللي ما بيرضاش يموت من التعذيب بعد شوية بينتحر زي الواد بتاع مرسى مطروح... هو ده الامن والامان؟ 
طب بالنسبة للكنيسة اللي اتهدت والامن ما اتدخلش 
اه.. دول مسيحيين صحيح، والريس ما يعرفش ان فيه مسيحيين في البلد... طب ندي له خبر بالموضوع، على فكرة هو مش جاهل ولا حاجة، هو عارف ان في مسيحيين في البلد، وحتى بيحبهم لانهم مسلمين وموحدين بالله زينا، بامارة مرة قال انه بيطمنا على وفاء والمسيحيين والقمامة
بس هو حد يفهمه ان المسيحيين مش مسلمين، احسن واضح انه فاكرهم مسلمين بس هم اللي مسيحيين كده يعني خلقة ربنا.. حنعايب على خلقة ربنا؟
رابعا: الكمامة
قمامة ايه اللي اتلمت؟ انت تدعونا ننزل من بيوتنا نلم الزبالة وتقول القمامة اتلمت؟ 
احنا نلم الزبالة احنا؟ امال بندفع ضرايب ليه؟ وطبعا ما نزلناش نلم الزبالة، ما تنزل بتوع الاخوان يلموا؟ هو نزلهم فعلا.. وما عرفوش يلموا الزبالة، فضلت الزبالة زي ما هي
يعني حتى لم الزبالة مش عارفين يعملوه؟ 
خامسا: البنزين
انا كمواطنة عندي عربية لانوس عليها اقساط لمدة سبع سنين لسه ما خلصتش مافيش مرة رحت امون الا الاقي بنزين خمسة وتسعين.. طب اسرق يعني؟ اسرق؟ انا عايزة بنزين تسعين، واحد زميلي في الشغل قال لي خلي الميكانيكي يركب لك فلتر وابقى فولي تمانين.. طب هو للدرجة دي البنزين تسعين ازمة يعني؟ 
طب انت بقيت تعمل زي احمد نظيف ومبارك.. يمسك لنا ورقة فيها ارقام ويقراها لنا ويحسسنا ان احنا اللي عندنا المشكلة اللي مش شايفين كميات الانجازات المهولة بنسبة خمسة وسبعين ستين خمسة وتمانين في المية
الا صحيح يا ريس ايه خمسة وسبعين ستين خمسة وتمانين في المية دي؟ هاه؟ فكرتني باللمبي لما قال ست تسع سبع سنين كده
سادسا:
ايه الرغي ده كله ده؟ هو كل واحد مراته مش بترضى تسمعه في البيت يمسك ودانا احنا؟ اتجوز عليها واحدة تسمعك.. انما احنا ذنبنا ايه نسمع ده كله؟ 
طيب.. رغم اني مش طايقاك ولا طايقة عيالك ولا طايقة جماعتك انا حانصحك نصائح لوجه الله عايز تسمعها اسمعها مش عايز تسمعها يا ريت عشان تخرب على دماغك ونخلص منك بسرعة:
اولا: ما ينفعش تتكلم كتير كده.. ده بجد، ما قل ودل، الناس مش فاضية لك، عايز تتكلم كتير وتنفس عن نفسك اكتب مقالات وانشرها.. بجد والله، انت لازم تبقى عارف انت ايه وبتعرف تعمل ايه وما بتعرفش تعمل ايه والناس تستحمل منك ايه وما تستحملش منك ايه
يا ريس انت مش خفيف الظل، ودي حاجة ما تعيبكش لو كنت عارف بيها، فيه ناس دمها خفيف خلقة ربنا كده.. طب حاقولك حاجة، فيه حد في الدنيا دي بيكره السادات قدي؟ ما اظنش ولا حتى اللي قتلوه بيكرهوه قدي.. بس السادات كان دمه خفيف، عبد الناصر كان دمه خفيف، مبارك عشان كان غليظ ودمه مش خفيف كان مستشاريه بينصحوه ما يطولش في الكلام
اهم حاجة في اي عمل له صلة بالجماهير هي خفة الظل، وخفة الظل دي مالهاش علاقة بالنكت، ماحدش قالك اطلع قول مونولوجات.. بس فيه ناس دمها خفيف كده خلقة ربنا حتى من غير ما تظهر، بتبقى خفيفة على القلب، زي مثلا سامية جاهين، هي مش مهرجة وما بتقولش قفشات، بس دمها خفيف كده خلقة ربنا، وهي ساكتة وهي بتتكلم عمرك ما تزهق منها... ده بيبقى حضور من عند ربنا
فحضرتك يا ريس دمك لامؤاخذة مش خفيف، ودي طبعا سمة في كل الاخوان المسلمين مش عارفة ليه، ما عدا البلتاجي، هو الوحيد اللي دمه مش تقيل في وسط الاخوان كلهم، بس انا مش عارفة هم الاخوان دمهم تقيل ليه؟ هل طبيعة الجماعة بتستقطب اللي دمهم تقيل، ولا هم بيبقى دمهم عادي ولما يخشوا الجماعة دمهم بيتقل.. بس انا بالاحظ ان كل اللي دمهم خفيف وكانوا في الجماعة سابوها، زي مختار نوح، واحمد سمير، وابراهيم الهضيبي، هم سابوها لاسباب انسانية واخلاقية بحتة.. بس القاسم المشترك ان كلهم دمهم خفيف جدا حتى من غير ما يهزروا.. 
هو انا كنت باقول كده ليه؟ اه.. ما ترغيش يا ريس.. دمك مش خفيف يا حبيبي، واللي دمه مش خفيف يتكلم سادة على رأي امي.. اتكلم سادة و
to the point
انت حديثك مش ممتع
ثانيا:
عارف مشلكتك ايه ريس؟ ومشكلة الجماعة كلها معاك.. مش انك حددت ميت يوم عشان تحل خمس مشاكل هابلة.. انك ما عندكش مشروع وطني حقيقي، ما عندكش خطة، ما عندكش رؤية، زي ما حسن مالك قال: سياسات مبارك لم يكن عليها غبار سوى الفساد
لا يا عم انت وهو.. سياسات مبارك عليها غبار الدنيا والاخرة، ولو ما كانش عليها غبار ما كانش اول ما ننفض شوية من الغبار ده تطلعوا لنا انتوا... انتوا اكبر دليل على الغبار اللي على سياسات مبارك
انتوا مجموعة منظمة، مبنية على السمع والطاعة، خبرة في الانتخابات، قدرة واسعة على الحشد، تقل دم منقطع الجماهير، روية فكرية صفر، رؤية تنموية صفر، مشروع صفر، خطة صفر، ادب يوك، اخلاق يوك، كدب كتير كتير أمان يا ربي أمان
بص انا عشان اشتغلت في العشوائيات عارفة كويس الاخوان بيشتغلوا ازاي وخطتهم ايه: وجبات، بطاطين، ابتسامات، طبطبات، ربنا يعزك يا رب، ربنا يكرمك، جزاكم الله خيرا يا توتة، الطرحة دي هدية مني عشان لما تحبي تتحجبي، احنا رايحين المسجد ما تيجي معانا، ده شريط عمر خالد....
وكوبونات بقى... واقفين في العشوائيات بكوبونات
فوق ده كله غرور وكبر ورفض لاي انتقاد او توجيه... تقولهم ما ينفعش تتعامل مع العشوائيات على انهم جواميس تأكلهم وتشربهم وتديهم كسوة الشتا والصيف وتتشرط عليهم ما تديهمش فلوس الا لما يبطلوا سجاير وبانجو وتسحبهم من ودانهم على الجامع وخلاص كده
دي مش خطة تنمية دي
لما تقولهم كده يشتموك ويتكبروا عليك ويتعالوا ويتبعوا صدقاتهم بالمن والاذى: الاخوان هم الوحيدين اللي بيسألوا في الفقرا وبيحسنوا اليهم
ما هي المشكلة انكوا بتحسنوا اليهم.. حط نفسك مكانهم، لو انت مكانهم تحب حد يحسن اليك؟ هو عايز يبقى بني ادم.. هو لازم يبقى بني ادم
وزي ما الاخوان كنت باشوفهم ازاي بيقعدوا يشتموا في سكان العشوائيات ويقولوا انهم هم اللي مش عايزين يشتغلوا ولا يبطلوا بانجو دلوقت الاخوان بيشتموا في الشعب ويقولوا الشعب هو اللي ما ساعدش الرئيس
نساعده نعمل له ايه؟ نغير له البامبرز؟
عمركوا ابدا يا اخوان.. ابدا ابدا ابدا ابدا ابدا.. ما كان عندكوا اي نقد ذاتي، ولا اي محاولة تعرفوا فيها انتوا غلطوا في ايه؟ لازم اي فشل يحصل يبقى الاخرين هم المتسببين فيه، من ايام العشوائيات وتعبية الفاصوليا والعسل الاسود في شنط رمضان وانتوا كده
الراجل في العشوائيات ضحك عليكوا وفهمكوا انه بطل يوزع بانجو وهو لسه بيوزع ومش عايز يشتغل معاكوا يبقى اكيد هو اللي غلطان وحاله عوج ومش عايز يتعدل وجات له فرصة ينصلح حاله لكن هو اللي غاوي نجاسة
عمركوا ما فكرتوا انه بيوزع بانجو عشان حاسس ان المعلم منه وعليه حتى لو كان بيتحكم فيه ويذله ويضربه وحاسس انكوا اغراب وجايين تتكبروا عليه وتحسسوه انه نجس وانتوا بتنضفوه وهو مش عايز يحس الاحساس ده
وفين الخطة في تنمية العشوائيات اللي عملتوها؟
ثم ان الشعب المصري مش سكان العشوائيات اللي بتشخطوا فيهم وانتوا بتوزعوا عليهم الشنط لما يتعوجوا عليكوا ويعوزوا شنطتين بدل شنطة واحدة
احنا مش عبيد احسناتكم وانتوا مش بتصرفوا علينا من صدقاتكم، انتوا دلوقت الدولة بتاخدوا من فلوسنا وضرايبنا والمفروض مؤتمنين عليها تراعوا ربنا فيها.. احنا مش خدامين ابوكوا
بس انتوا مش بس ما عندكوش خطة، ما عندكوش رغبة في الاعتراف بنقط ضعفكوا
العلاج ايه؟
مالكوش علاج الا اولا تعترفوا انكوا عندكوا مشاكل حقيقية، وان اللي بيشتمكوا مش بيحقد على الاسلام ولا حاجة، وانتوا مش الاسلام ولا حاجة، وانتوا محتاجين ناس بتفهم، ما يكونوش منكوا لان ما عندكوش حد بيفهم، ومافيش اي انسان بيفهم ينضم لجماعة سمع وطاعة ابدا، تجيبوا ناس بتفهم تحط لكوا خطة تنمية خاصة بمصر
لا تستورد التجربة التركية، ولا التايلاندية، ولا الصينية، ولا الماليزية ولا البوركينافاساوية
احنا مصر.. لنا طبيعة وموقع وثقافات متعددة وموارد خاصة بنا... لازم مجموعة تكون بتفهم، وعندها قدرة على الابتكار، وتعرف مصر كويس قوي تحط خطة تنموية تبقى هي المشروع القومي لمصر، وتبتدي حاجة حاجة
وليكن المشروع القومي الاول لمصر مثلا تحويل الطاقة الى الطاقة الشمسية... مثلا، تبقى دي اول خطوة، ويبقى كل الناس بتشارك في المشروع ده عشان يحسوا ان لهم فايدة، وتتعرض تفاصيل المشروع على الناس في الصحف، وفي التلفزيون، بشكل مبسط، وكل واحد يبقى عارف يقدر يعمل ايه
اعملوا المشروع الاهم واللي كل الناس حتشارككوا فيه خصوصا اليساريين: اعادة هيكلة الداخلية... بدل ما تنزلوا لنا الداخلية تضربنا تاني
انتوا مش حتعرفوا تعملوا نهضة... خالص، انتوا مش مؤهلين لكده
بس انتوا تقدروا تعملوا بنية تحتية، حتبتدوها من الصفر، بس الناس حتبقى معاكوا... بدل ما ماشيين تتخانقوا مع دبان وشكوا وتتكبروا على خلق الله كده
كمان لازم تصارحوا الناس.. ما تقولوا احنا اسفين احنا ما كناش نعرف ان الامور معكوكة كده واحنا محتاجين كل قوى الشعب تتضافر معانا، ومن غير اقصاء لاي حد، وما يطلعش عصام العريان يقول لما ناخد الاغلبية في البرلمان حنشكل الحكومة كلها اخوان
جاتكوا خيبة... يا ريت.. هو فيه في الدنيا اخيب منكوا؟ انتوا فعلا محتاجين مساعدة
ولما انتوا محتاجين مساعدة مافيش داعي لقلة الادب والتكبر وطولة اللسان والاقصاء
او اقولكوا.. ما تسمعوش الكلام
يا رب ما تسمعوش الكلام عشان تخرب على دماغكوا ونخلص منكوا في كام شهر بدل ما تقعدوا على قلبنا اربع سنين