Saturday, 20 October 2012

الرئيس المؤمن حيكفر الشعب

يا اخ يا رئيس يا مؤمن.. لو حتخرج تصلي كده يبقى صلي في بيتكوا وثوابك حيبقى اكبر ان شاء الله وفي رقبتي انا شخصيا.. يوم القيامة حاقول انا اللي شورت عليه الشورة دي.. فليسعك بيتك مدام كل ما حتخرج حتعمل لنا دبكة وعطلة وترهبنا بالامن المركزي كأنك نازل تحرر فلسطين واحنا الاسرائيليين 
صلي في البيت صلي في البيت صلي في البيت وفي رقبتي انا قدام ربنا
ولا حتى ما تصليش خالص
حتعمل ايه بالصلاة لما اسعاف تتعطل ويموت فيها مريض زي ما حصل ما مبارك قبل كده؟ 
حتعمل ايه بالصلاة لما تلقي الرعب في قلوب المصلين بجيش الامن المركزي اللي انت نازل بيه ده؟ انت ما تعرفش ان شكلهم لوحده ممكن يروع الناس ومن روع مؤمنا روعه الله يوم القيامة؟
حتعمل ايه بالصلاة لما انت تنزل تصلي بالهلولة دي وعشان حضرتك بتصلي واحد تاني مواطن مسكين، مالوش الا ربنا فعلا، لا له جماعة ولا رئاسة ولا امن مركزي، ونازل يصلي عشان عايز يقابل ربنا فعلا مش عايز يستعرض قدامنا انه بيصلي، تروح عليه الصلاة في الجامع ويضطر يصليها في بيتهم ولا في الطريق ولا ما يعرفش يروح ولا يرجع وتروح عليه خالص؟
يا عم اعمل جامع في جنينة القصر الجمهوري وخد الحرس يصلوا معاك على الضيق كده بدل البوليكة اللي بتعملها على كل فرض، ولما تبقى تسافر المحافظات زي كده ابقى صلي في استراحة الرئاسة وجماعة انشالله بمراتك وعيالك الاتنين اللي بيتخانقوا مع ظباط الشرطة ويضربوهم عشان بيسألوهم عن البطاقة، حتخلونا نتعاطف مع الشرطة كمان؟ هو ايه ياختي ده؟ احنا عمرنا ما مر علينا رئيس كل ما يتوضى يبقى خبر عاجل كل ما يصلي يبقى مانشيت... شكرا عرفنا انك مؤمن.. ما تبسطهاش اكتر من كده
مبارك كانت كل الناس بتدعي عليه.. بس اكتر دعوات كان بياخدها بسبب التشريفات ولما واحد مات في الاسعاف بسببه سواق تاكسي قالي: الراجل ده مش حيكمل السنة دي.. ربنا ما يرضاش بكده.. وفعلا.. صدق سواق التاكسي
يا حاج مرسي: وسكنتم في مساكن الذين ظلموا أنفسهم وتبين لكم كيف فعلنا بهم وضربنا لكم الأمثال، وقد مكروا مكرهم، وعند الله مكرهم، وإن كان مكرهم لتزول منه الجبال
الله الله الله.. حلوووووووووووووةةةة.. حلوة قوي، بتخش في النخاشيش بتاعة الجلد كده.. هو فيه نخاشيش في الجلد؟ ما اعرفش.. بس هي بتخش وتتشرب كده كأنك داهن فيكس او ابو فاس.. بتعمل حاجات الاية دي
فأنت يا حاج مرسي مكرك انت والجماعة مكر خايب ونايب وفاشل مش زي مكر مبارك، يعني لا تزول منه الجبال ولا حتى الناموسة.. خليك ماشي بستر الله بلاش تتغر
اتق ربنا أمرسي.. اتق ربنا.. انت خارج تصلي ولا ترازي الناس وتخليهم يدعوا عليك.. ما هو الناس يا اما حيدعوا عليك يا اما حيكفروا
انا لحد دلوقت اعرف 5 بنات قلعوا الحجاب بس بسبب الاخوان والسلفيين.. حتقابلوا ربنا بالناس دي ازاي؟ والبنات مش عايزين يتحنتفوا ولا حاجة، ده واحدة منهم تقريبا ما بتتسرحش ولامة شعرها كحكة.. بس مش عايزة تبقى شبهكوا في حاجة
ما هو يا تحلوا عن الاسلام يا تحلوا عنا... ويا ريت تحلوا عن الاتنين نبقى شاكرين جدا

9 comments:

Marwa Mohamed said...

انتى تعرفى 3 قلعوا الحجاب .. انا أعرف واحد ألحد وخرج من الدين من تحت راس الاخوان وكلام خنازير السلفيه الوهابيه :( وبحاول معاه ربنا يهديه ويفهم ان الناس دى فى وادى والدين فى وادى تاااااانى خالص .... بالمناسبه عصام "لامؤاخذه العريان" عمل توتيه علشان يقول نويت الصيام !!! واضح ان الرياء والنطاعه بإسم الدين من أساسيات الإخوان

Testing said...

كـلام جميل ومفيش علية خلاف .. صلي بس من غير Show
ومن غير بهدلة النـاس ودي رسالة برضة علشان العيد قرب وميحصلش زي العيد الي فات الناس تصلي برة وهو جوة .. وموضوع الدرع الواقي والتحرير دة كلنا عارفين أنة كان فرحة بالفوز وسط الحشد من الجماعة والحزب مش أكتر

Testing said...

كـلام جميل ومفيش علية خلاف .. صلي بس من غير Show
ومن غير بهدلة النـاس ودي رسالة برضة علشان العيد قرب وميحصلش زي العيد الي فات الناس تصلي برة وهو جوة .. وموضوع الدرع الواقي والتحرير دة كلنا عارفين أنة كان فرحة بالفوز وسط الحشد من الجماعة والحزب مش أكتر

Testing said...

كـلام جميل ومفيش علية خلاف .. صلي بس من غير Show
ومن غير بهدلة النـاس ودي رسالة برضة علشان العيد قرب وميحصلش زي العيد الي فات الناس تصلي برة وهو جوة .. وموضوع الدرع الواقي والتحرير دة كلنا عارفين أنة كان فرحة بالفوز وسط الحشد من الجماعة والحزب مش أكتر

Mai Yousuf said...

الالحاد وصل لناس كتير، الاخوان و السلفيين خلوهم يكفروا بكل حاجة

Mahmoud Nassar said...

انت بتكلمى مين يا حاجة وبتستشهدى بآيات من القرآن؟؟؟ دى عالم باعت ربنا من زمااااااااااان.. يعنى هو مش عارف الآية دى يعنى؟ ومش بعيد كمان يكون حافظها.. بس كالحمار يحمل اسفارا.

فافى said...

نحمل الالحاد لمصر
حسبى الله ونعم الوكيل

biber boy said...

الايام كشفت وجه الاخوان القبيح

biber boy said...

الايام كشفت وحه الاخوان القبيح