Sunday 30 September 2007

خطبا في جوامع وجبنة وزتون

فيه واحد غلس وابن ستين في سبعين وباكرهه زي ما باكره بوش
بس كاتب على مدونته موضوع له حق فيه اللي هو موضوع الخطبا اللي في الجامع
سيبنا من خطب الجمعة اللي كل الناس بتسمعها في البيت واللي فيها واحد بيتكلم عادة
يا اما عن حاجات كل الناس عارفاها خاصة قصة سيدنا يوسف
وبالذات مقطع هيت لك لحد ما يبوظ اعصاب المصلين
يا اما بيشتم المسيحيين
من اول يوم ابتدى فيه الشهر المبارك وصلاة التراويح بتتذاع في مكبر الصوت من الجامع
اللي في الميدان وبيوصلنا لحد بيتنا
لدرجة ان الناس اللي في زاوية الصلاة اللي جنب بيتنا بيسمعوا صلاة المسجد اللي في الميدان
ولدرجة ان امي بتستنى الراجل لما يخلص عشان تعرف تركز في الصلاة
ممكن افهم ايه ده؟ وماله ده ومال رمضان؟
مش ح اقول لك افرض فيه واحد نايم ولا طالب بيذاكر ولا راجل كبير عيان
ولا واحد في الحمام بيعمل زي الناس على صوت آيات الذكر الحكيم ولا واحد قرر يصلي في بيتهم وعايز يركز
ولا واحد مسيحي مش عايز يسمع قرآن
افرض يا سيدي واحد مسلم وعايز يتفرج على الماتش ومش ح يقوم يصلي
يتجبر انه يسمع صلاتك وهو مش بيصلي وراك ليه
دلوقت الميكرفون ده عملوه عشان لما يبقى عدد المصلين كتير ومش سامعينك يبقى جوة الجامع
ويسمعوك
لكن اللي برة الجامع يسمعوك ليييييييييييييييييه
لييييييييييييييييييييه
لييييييييييييييييييييييييييييييييييه
ولو واحد مش بيصلي وعايز ينام وتعبان ممكن تخليه يشتمك
مش كفاية اللي بيتعمل في صلاة الجمعة؟
مش كفاية انهم بينقوا اوحش صوت على البسيطة عشان يخلوه يأذن؟
لما الأذان شرع كان فيه أبو بكر ثاني اثنين إذ هما في الغار
وكان فيه عمر الفاروق
وكان فيه علي باب مدينة العلم
وكان فيه عثمان ذي النورين
والرسول اختار بلال عشان جمال صوته
بتنقوا ناس صوتها وحش ليه؟
خطبة الجمعة شرعت عشان تناقش احوال المسلمين والمستجدات اللي حصلت في الاسبوع
يعني صلاة الجمعة دي المفروض انها مؤتمر للامة الاسلامية
يناقش احوالهم اسبوع باسبوع
والرسول صلى الله عليه وسلم لو كان موجود دلوقت كان اتكلم عن اللي بيحصل دلوقت
او حتى عن القصص والعبر اللي ممكن يستفاد بيها في الاحداث اللي حاصلة دلوقت
لكن ليه زليخة امرأة العزيز بقت هي الشخصية المحورية وهي اللي بتقوم بكل
ادوار البطولة في خطب الجمعة على اختلاف المناطق والاماكن السكنية
مرة واحدة صاحبتي مؤدبة شوية جات قالت لي: هو ايه سند امام الجمعة اللي قال لنا في الخطبة
ان زليخة كانت لابسة قميص نوم شفاف وشعرها الاسود الطويل يصل الى الارض
ومستلقية على الاريكة وبتقول ليوسف هيت لك؟
لامؤاخذة للشباب الصايمين والله ما قصدي افطركوا
بس ائمة الجمعة سايبين المسلمين بيتعمل لهم تطهير عرقي
في العراق وفلسطين وافغانستان
والعمال بيعتصموا
والناس بتتعذب
ومستوى الجوع وصل الى تلتين السكان في مصر
وماسكين في قميص النوم الشفاف اللي كانت لابساه زليخة
بس الشهادة لله الراجل ما قالش هل هو فاليزير وللا ايجي فرانس
يا سيدي خايف انك بعد ما تخلص الخطبة تلاقي عربية امن الدولة مستنياك
افتكر ان افضل الجهاد كلمة حق عند سلطان جائر
بلاش
خليك كيس فطن
واذكر الاحاديث والايات اللي توصل فكرتك من غير ما تصرح والناس مش غبية
بلاش ده كله
امسك الجرايد واقرا الشبهات اللي بيثيرها بعض الناس ورد عليهم
اعمل اي حاجة تحسسنا انك هنا مش مع زليخة وقميص نومها الشفاف
وبعدين يا عمي اللي عايز يسمعك ويسمع حواديت قبل النوم اللي انت بتقولها للمصلين
ح يجيلك الجامع
هو ح يجيلك
الناس اللي في الشارع واللي في بيوتها تسمع ليه اللي انت بتقوله
لييييييييييييييييه
لييييييييييييييييييييييييييييييييييييه
ده انتوا ولا السادات اللي كان بيذيع كلمته في القناتين وكل محطات الراديو وتاني يوم ينشروها كاملة
في كل الجرايد

Saturday 29 September 2007

عاجل: خبر حلوووو عن عماااال المحلةةةةةةة

بقى ساهر جاد ما يبعتليش ع الميل غير فلان اتقبض عليه
فلان اتشنير فلان طسته عربية فلان الغولة اكلت دراعه
اول مرة يبعت لي خبر حلوووووووووووووووووووو
احلى خبر ممكن تسمعه في حياتك
ويغفر له سلسلة الاخبار المهببة اللي كان بيبعتها لي
بصوا باعت لي ايه:
اذا الشعب يوما اراد الحياة.. فلابد ان يستجيب القدر
وانتصر عمال المحلة
راجع من المحلة الان (4 صباح يوم السبت) من عند احسن ناس ممكن تقابلهم فى زماننا الاغبر ..راجع من المحلة
· التفصيلات كتيرة.. و البطولات رائعة .. و الدروس متاحة بس اللى يفهم.
· انتصرت ارادة العمال ورضخت حكومة راس المال .. حضر وفد حكومى برئاسة حسين مجاور و الجيلانى واتفقوا على تنفيذ مطالب العمال .. تم التفاق على :
· صرف 70 يوم ارباح فورية
· زيادة الحافز إلى 30%
· اعادة هيكلة مجلس الادارة و اللجنة النقابية
· تحسين المرافق الخدمية للعمال
· بالنسبة لبدل الوجبة وطبيعة العمل سوف تحسم فى خلال 48 ساعة وسوف يصدر بذلك منشور رسمى لينهى بعدها العمال اضرابهم منتصرين ويكسب الرهان علىالنضال كطريق وحيد لانتزاع الحقوق من النظم الفاسدة الديكتاتورية

عاش كفاح عمال المحلة .. عاش كفاح المصريين

http://harakamasria.org/

بيان عمال المحلة/ مذكرات مالكوم اكس بالعربي/ خبر هام وعاجل

آه كل ده في بوست واحد عشان الناس اللي نازلة نبر عليا
وعمالين يقولوا انت طول النهار تكتبي
========
اولا
وصلني بالميل بيان عمال المحلة
ح تلاقوه على اللنك ده
========
لولولولولولولولولييييييييي
marvel
الله يكرمه ويسعده ويهنيه وينوله اللي في باله
ويجعل في وشه جوهرة وفي حنكه سكرة ويحبب فيه العبد والرب والحصا في الارض يا قادر يا كريم
ولا يرقد له جته ويكفيه شر حاكم ظالم ما ينضامش ابدا
جاب اللنك بتاع مذكرات مالكوم اكس اللي ملاها بنفسه وراجعها بنفسه
لا وايه
مترجمة للعربي
سايقة عليكوا حبيبكوا النبي
وموسى نبي عيسى نبي محمد نبي وكل من له نبي يصلي عليه
لتقروها كلمة كلمة
واللي ما يحبش مالكوم اكس بعد ما يقراها ما يضربش نار عندي هنا تاني
انا مخصماه خلاص
ويجعلها بيضا ع الكريم سودا ع اللئيم بمبى ع اللي ما يساعد الحريم
=========
ثالثا
هاهاهاهاهاها
في ظابط شرطة اشتغل صحفي وكتب الخبر ده
ح يبسطكوا قوي

Friday 28 September 2007

أحمدي نجاد في القلل المنتحرة

والله ما كنت ناوية اتكلم في الموضوع ده ابدا
لاسباب عديدة اهمها اننا موحولين في ستميت حاجة
هنا في مصر
بس الموضوع ده اثير كذا مرة
والحقيقة مش حاجة لطيفة ابدا انه يتقال عننا حقراء وش كده في جامعة امريكية
آه
ماهو لما يبقى رئيس دولة اسلامية يروح بدعوة من القلل المنتحرة امريكا
ويتقال له في امريكا يا حقير
يبقى ده معناه ان الشتيمة دي لينا كلنا مش بس للايرانيين ولا لسيادة الرئيس
واظن ان رئيس الجامعة اليهودي الصهيوني لي بولينجز كان عارف بالظبط هو بيعمل ايه
ايه بقى
بقى اللي حصل لنجاد ده حاجة وسخة قوي وواطية قوي
اوطى من فؤاد الهاشم كمان
لانهم هم اللي داعينه ولما انا ادعوك عشان اشتمك يبقى انا اكيد انسانة
واطية ودون ورمة وحقيرة وباجري ورا عربيات الرش حافية
يعني انا متأكده ان بولينجز ده لما كان عيل كان بربوره نازل على بقه
ومؤخرته عريانه ويمكن كمان مش لابس لا بنطلون ولا كلوت
وتلاقيه من حواري بروكلين
والا ابسط قواعد الاتيكيت انه لما يدعو انسان وعايز يعترض عليه
يعرف يعترض من غير قله ادب لكن هو جايبه يشتمه مش يعترض عليه
وما كانش ناقص غير بعد ما يكمل كلمته يزغرد ويصقف بالقبقاب بتاعه
ونفسي اعرف لو بوش جه مصر ورئيس جامعة القاهرة قال له
يا مجنون يا خلل يا ارهابي يا دموي يا عنصري ياللي قتلت سبعة مليون
بني ادم عشان مصالحك الاقتصادية وعامل لي فيها الاسكندر وانت رعديد
وسكير سابق وبنتك سكيرة حالية ولما البيت الابيض انضرب ما رجعتش غير لما
امك - يا روح امك - كلمتك وقالت لك ارجع عشان تنام بدري وتصحى بدري
وحتى لما شنيت حرب على الناس الغلابة من غير اي سبب وقتلت المدنين والاطفال
عملت جيش تسعين في المية منه من سود امريكا عشان تخلص مننا احنا الاتنين
يا عنصري يا متخلف يا بتاع ربنا بيكلمني وانت تلاقيك مخاوي عفريت بشخة عنده تلات
سنين وما قلتلناش ربنا بيكلمك ازاي وامتى وعلى اي نمرة وهل بيفتح عليك وبيخلص لك الكارت
وللا بتبعت له كلمني شكرا وللا بتديله ميسد كول ابن الهابلة يا احقر من خطا على الارض
ياللي اتسبب في كارثة تسونامي والاحتباس الحراري والكوارث الطبيعية من
الشقلبظات اللي عملتها في افغانستان وهديت الجبال ولوثت البيئة لدرجة ان اسرائيل
باينة جنبك ملاك ينقصه الجناحين
وبدل ما تنشر غسيلك عندنا يا روح امك روح شوف الامريكيين الاصليين اللي انت
حاجزهم في اماكن لوحدهم وعازلهم كأنهم حيوانات
ويكفيك فخرا إنك عممت التعذيب في كل أنحاء العالم واديته شرعية
وبعد ما كانت حتى الحكومات الديكتاتورية بتتدارى وهي بتعذب بقت تبجح
وتقول اذا امريكا بتعذب يبقى انا ليه ما اعذبش
ومعتوه وفاكر انك ح تنزل المسيح لما تطهر الشرق الاوسط
من "الانجاس" يا اما بقتلهم يا اما بتحويلهم الى المسيحية الصهيونية
عشان
we have the only truth
زي ما سبق وقلت
لو رئيس جامعة القاهرة قال كده لبوش
رد الفعل ح يبقى ازاي
ماليش دعوة برد فعل امريكا ولا بوش نفسه اللي ح يقلع الجزمة
وينسلها على راس رئيس جامعة القاهرة
ولا ليا دعوة بالحكومة المصرية اللي ح ترفد رئيس جامعة القاهرة
ومش بعيد تلبسه تهمة سلاح وحيازة مخدرات وقضية اخوان وتنظيم شيوعي مع بعض
انا باسألك انت يا عم انت
او الناس المتحدثين باسم العرب والمسلمين اللي طول النهار عمالين يلحسوا
مؤخرة الامريكان ويقولوا احنا بنحب الشعب الامريكي والشعب الامريكي حاجة والحكومة
حاجة تانية
واحنا عايزين نفتح قناة حوار
للاسف احنا كلنا تحولنا إلى
house negors
بمعنى ايه؟ يعني فعليا انت دلوقت نفسك جورج بوش يجي ورئيس جامعة القاهرة
يقول له نفس الكلام ده
بس لو جه فعلا ورئيس جامعة القاهرة قال كده انت اول واحد ح تقول
ايه قلة الادب دي ايه الغباء ده احنا عايزين نفتح قناة حوار
احنا مش عارفين نعرض قضيتنا
هم العرب كده ظاهرة صوتية
هو الراجل ده بيجرنا لمواجهات احنا مش قدها وبيحرجنا
وبيتصرف تصرفات عنترية
واكيد رئيس جامعة القاهرة ح تطلعه غلطان من ساسه لراسه
ودلوقت كل الناس شايفة ان نجاد غلطان انه سكت
انا شايفاه غلطان انه سكت بس لاسباب تانية
اسباب موجودة في الفيديو
لكن ناس كتير شايفة ان نجاد غلطان لمجرد انه مننا
لو كان انسحب كانوا قالوا اتهزم
لو كان شتم
(وهو الحل اللي انا اقترحه)
كان بقى شرشوح وما كانش مفروض يرد
نجاد سكت وما ردش لانه تخلق باخلاق الاسلام
"وإذا خاطبهم الجاهلون سلاما"
واقتدى بالرسول لما كان كفار مكة بيقولوا له يا مذمم
ويشتموه ويحطوا على ضهره قاذورات وقدام بيته
وهو ما يردش
طيب بس في اطار مجتمع مكة والمجتمع العربي
دي لغة مفهومة
احنا عندنا الثقافة بتاعة لما اشتمك وما تردش شكلي انا اللي يبقى وحش
وانا اتكسف من نفسي
حتى لو مش عند السفاء فهي كانت عند اسياد قريش
حتى اسياد قريش اللي في قعر النار بيفهموا النوع ده من الاخلاقيات ويقدروه
لكن اللغة دي مش مفهومة عند الامريكان ومش موجودة في ذهنيتهم
انت ما بتردش يبقى انت ما عندكش دفاع
يبقى انت ضعيف ومافيش مكان في عالمنا للضعفاء
لان حتى الطبيعة بتنتخب الاقوى وتبقيه وانا من حقي افعصك
لاني اقوى منك
مسألة اختلاف الذهنيات اللي كنت باتكلم مع مالك فيها
يعني ما ينفعش ابقى باتكلم صيني وانت بتكلمني عربي وتلومني اني مش فاهماك
وزي ما مالكوم اكس
تاني
:)
قال: هم بيتكلموا معانا منذ مئات السنين باللغة اللي بيفهموها ليه مصممين نكلمهم بلغة مش بيفهموها ونرجع نزعل
لغه اذا خاطبهم الجاهلون قالوا سلاما مش موجودة في ذهنيتهم خالص
فيه ناس بتقول ما كانش يروح خالص
وايه القلل المنتحرة دي هي دي محكمة؟ دي امريكا
اه، لو ح يروح عشان يعرض قضيته يبقى ما كانش يروح خالص
ولا يقبل دعوة الامم المنتحرة ولا يقبل دعوة الجامعة
بس لو ح يروح عشان يشتمهم ويقلع لهم الجزمة زي خروشوف
يبقى يروح
ويقلع لهم الجزمة ويرفعها في الجامعة وفي الامم المتحدة
وهو ده كان التصرف الصح الوحيد
وانا شخصيا لو مكانه
- وانا عمري ما ح ابقى مكانه -
كنت مش بس قلعت الجزمة كنت قلت له الآتي:
Talk to a whore and she will throw her garbage upon u.
Don’t screw the idiot and don’t let the idiot screw u.
دي ترجمة الامثال عشان احنا في رمضان يعني
وكنت سبيت له ميت دين وميت ميتين وكنت قلت له كل وصلة الردح اللي فوق
اللي كان مفروض رئيس جامعة القاهرة يقولها لجورج بوش
بس طبعا لو كان عمل كده كان
زنوج البيوت: the house negros
قالوا عليه متخلف وارهابي وضد الحوار ووأحمق وبيجر المنطقة لحرب احنا مش قدها وووو
الحمد لله ان جيفارا ما كانش عربي ولا مسلم
كنا وكسناه ووخيبناه وشتمناه وشجبناه وعملناه فرجة خلقه
زي ما احنا واكسين نجاد ونصر الله واي حد بيحبنا
بلاش
مش مالكوم اكس امريكاني؟ لمجرد انه مسلم ما اخدش الدعاية اللي اخدها جيفارا مثلا
مع انه، وبموضوعية شديدة، جيفارا ما يجيش في ضفره حاجة
وانا قريت مذكرات الاتنين ومافيش نسبة بقى
لمجرد ان جيفارا مش مسلم ومالكوم اكس مسلم ولولا انه امريكاني ما كانش حد سمع عنه اساسا
وده مالوش علاقة بالمؤامرة على الاسلام وحياة النبي بقى
ده له علاقة بينا احنا: احنا تلقفنا الدعاية لجيفارا بالترحيب الشديد لان الباشا خواجة
وتلقفنا الدعاية لمارتن لوثر كينج بالترحيب لان الباشا خواجة
ولو كان الامريكان السود خبوا عننا ان مالكوم اكس مسلم كان زمان صوره
على العربيات زي جيفارا بس بخيبتهم قالوا لنا انه مسلم يعني تبعنا
يعني ندوسه بجزمنا
عقدة احتقار الذات اللي مش عارفين نخلص منها ابدا
بس نجاد برضه كان لازم يقلع الجزمة ويرفعها في وش الامم المتحدة ورئيس الجامعة
ويسب لهم الدين

سودا لحد ما الصحفيين ياخدوا براءة والعمال يبطلوا ياخدوا على دماغهم

استجابة لدعوة صاحبة مدونة كلام
اللي أعلن الحداد على الصحافة الحرة
سودتها
وانا بدوري بادعو المدونين يسودوها لحد ما ربنا
يبيضها

Thursday 27 September 2007

آه عاجل آه: الافراج عن الخمسة اللي اتقبض عليهم من طلعت حرب

وكان منهم الصحفي اللبناني جانو شربل
الحمد لله لسة احمد حلمي مكلمني وقايل لي الخمسة خرجوا
والناس في نقابة الصحفيين مش مسموح لها تخرج
مسموح لها تخش بس
لان دخول النقابة مش زي خروجه
====
تحديث
ابتدى الامن يخرج الناس ويجري وراهم بلطجية يضربوهم
جيمي جري منهم في الشوارع الجانبية
وفيه واحد انضرب وهو خارج
No matter how much respect, no matter how much recognition whites show toward, as far I m concern, as long as that same respect and recognition is not shown toward every one of our people in this country, it is not shown for me.
Malcolm X

اشتباك ما بين طلبة جامعة الفيوم والامن بسبب قتيل الفيوم

لا ولا عاجل ولا حاجة
انا زهقت من عاجل دي
طلبة جامعة الفيوم صعايدة صح
ضربوا الامن حتة علقة
ومندوب مصريين ضد التعذيب رايح دلوقت يشوف الحكاية
الخبر عنده اهو

عاجل: الأمن يحاصر ميدان طلعت حرب ونقابة الصحفيين

جاني تليفون من الاستاذ احمد حلمي والاستاذة جيهان شعبان
بيقولوا لي ان ميدان طلعت حرب ونقابة الصحفيين
تمت محاصرتهم وتحولوا الى ثكنة عسكرية
ومحمد الشرقاوي بيقول لي ان وسط البلد كلها ملغمة امن
لمنع الوقفة الاحتجاجية المزمعة لمساندة الصحفيين المحكوم عليهم بالحبس
ولمساندة عمال غزل المحلة
وهناك اخبار غير مؤكدة عن اعتقال خمسة اعضاء بحزب الغد
===
ذهب المتظاهرون الى نقابة الصحفيين
عدد المتظاهرين حوالي 200 وطبعا النقابة محاصرها الامن
بيسمحوا لناس تدخل بس اللي بيدخل مش بيطلع
الهتافات كلها للتضامن مع عمال المحلة والصحفيين المحكوم عليهم بالحبس
===
تحديث:
اتصل بيا الاستاذ احمد حلمي وبيقول لي: الامن عامل مظاهرة حلوة قوي في ميدان طلعت حرب
ما شاء الله موقف شباب زي الورد كلهم فرق كاراتيه
وعامل كماين في الشوارع الجانبية
وجميلة اسماعيل واقفة من بلكونة حزب الغد بتتكلم في الميكروفون
===
في ميدان طلعت حرب اتقبض على صحفي لبناني اسمه جان شربل
واربعة نشطاء مصريين

تقرير مفصل عن قتبل الفيوم

والله صاحب التقرير اتبهدل في الفيوم
في الحر والصيام
على فكرة الحكومة صحيح فاطرة بس لازم تراعي
اننا صايمين
ذنبوا ايه الشاب ده يطلع عينه تلات ايام ورا بعض
ما يستنوا يموتوا الناس بعد العيد
التقرير اهو

التقرير ال..ما تعدش لمصريين ضد التعذيب

انا قلت دي حكومة فاطرة
فاطرة بدليل ان فيها حيل
رمضان السنة دي حر وصعب
فيهم حيل ازاي يعملوا ده كله الا اذا كانوا فاطرين
ما كانش مفروض تقتل وتعذب كل الناس دي في رمضان
احنا هلكنا
عشان احنا صايمين
وللا بقى الحكومة تدور لنا على المفتي اللي افتى لها بوجوب الصيام
عشان يفتي لنا احنا كمان
الشباب كتبوا التقرير ده
اقروه
لا بجد اقروه
انا قلبي ح ينط من مكانه خلاص بقى
يا ترى ايه التخريجة اللي لقاها الشخص اللي افتى للحكومة بالفطار؟
هل قالهم انتوا رايحين النار رايحين مافيش داعي تتعبوا نفسكوا؟

جمعية المساعدة القانونية تقول لبوش: حوش الخشبة اللي في عينك

البيان ده وصلني بالميل
البيت الابيض قال كان اعترض على قفل جمعية المساعدة القانونية
: وده رد جمعية المساعدة القانونية
"قبل ان ترفع القشة من عين اخيك . . . ارفع الخشبة من عينك"
اعضاء جمعية المساعدة القانونية لحقوق الانسان يبدون تحفظهم على
موقف البيت الابيض من قرار الحكومة المصرية بحل جمعيتهم

استقبل اعضاء جمعية المساعدة القانونية لحقوق الانسان منذ الاعلان عن نية الحكومة المصرية استصدار قرارا بحل جمعيتهم وتصفية ممتلكاتها ، العديد من اشكال التاييد والدعم ، وقد تنوعت اشكال التأييد تلك من رسائل المواطنين عبر البريد الالكترونى للجمعية ، والبيانات التى اصدرتها المنظمات المصرية – فرادى وجماعات – والمتابعة الصحفية المستمرة لتطورات الاحداث ، البيانات الصحفية التى اصدرتها المنظمات الدولية التى تتمتع بدرجة معقولة من السمعة والمصداقية مثل منظمة العفو الدولية ومنظمة مراقبة حقوق الانسانHuman rights watch والمنظمة العالمية لمناهضة التعذيب OMCT والمنظمة الدولية للدفاع عن نشطاء حقوق الانسان Frontline defenders ،
والتقارير التى اصدرتها وكالات الانباء والمحطات الفضائية والصحف العالمية ، وقد رحب اعضاء الجمعية بكافة صور التاييد والتضامن التى تلقتها من الاشخاص والمؤسسات الصحفية محليا وعالميا وكذا المواقف التى اعلنتها المنظمات الحقوقية على مستوى العالم خاصة الحملة الدولية التى دشنتها منظمة العفو الدولية لارسال مناشدات من اعضاء المنظمة فى جميع دول العالم للمسؤلين فى مصر لوقف تنفيذ قرار حل جمعية المساعدة القانونية لحقوق الانسان .....
وقد خففت ردود الفعل المؤيدة تلك من وطأة صدور قرار الحل كما كانت عزاء لنا ونوعا من رد الاعتبار فى مواجهة هذه الهجمة الحكومية/الامنية خاصة وان البعض قد امتدح الدور الذى لعبته الجمعية الفقيرة ماليا والقوية بمواقفها كما اثنى البعض على جهودها الرائدة فى مجال الدفاع عن ضحايا انتهاكات حقوق الانسان ، كما كان للموقف التضامنى الرائع الذى قامت به المنظمات الحقوقية فى مصر – ومازالت – حافزا اضافيا لاعضاء الجمعية لمواصلة جهودهم وعدم الرضوخ للقيود التى تفرضها الحكومة المصرية عليهم .....
ولا يمنعنا الترحيب بكافة صور التضامن والتأييد التى تلقيناها محليا ودوليا من الاعلان عن تحفظنا على ما اعلنته المتحدثة باسم البيت الأبيض دانا بيرانو من ان (الإدارة الأميركية قلقة جدا من القرار الأخير للحكومة المصرية الذي وافقت بموجبه على إقفال جمعية المساعدة القانونية لحقوق الإنسان ) ويأتى موقفنا هذا اتساقا مع موقفنا المبدئى والمعلن من عدم قبول التعاون او التنسيق مع الجهات الحكومية ، وكذا المواقف الانتهازية التى طالما اتخدتها الادارة الامريكية من قضايا الديمقراطية والامن والسلم العالميين وحقوق الانسان ، كذلك السجل الحافل لتلك الادارة فى انتهاك حق الشعوب فى الاستقلال والتحرر وتقرير المصير ، وليس بعيدا ما تقوم به تلك الادارة من انتهاكات وخروقات فاضحة للقانون الانسانى الدولى ولميثاق الامم المتحدة وعدم احترام الشرعة الدولية لحقوق الانسان فى بلدان الشرق الاوسط .....
ويؤكد اعضاء الجمعية على ان موقف الادارة الامريكية من قرار الحكومة المصرية –الصديق الحليف- يأتى فاقدا للمصداقية خاصة اذا ما اشرنا الى رعاية الادارة الامريكية نفسها لانظمة الحكم التى يحفل سجلها بانتهاكات حقوق الانسان فى جميع اركان المعمورة ، ويدعو اعضاء الجمعية الادراة الامريكية الى اعادة الاعتبار لمواقفها من تلك الدول لكى يأتى متسقا مع مبادئ وقيم حقوق الانسان واعلاءً للقيم الانسانية النبيلة وبعيدا عن المصالح السياسية الضيقة ومواقفها الانتهازية .....
اعضاء جمعية المساعدة القانونية لحقوق الانسان "الجارى تصفيتها"
القاهرة فى 27 سبتمبر
2007
====
جمعية زي دي ودي مبدائها ومواقفها
لو لا قدر الله اتقفلت واحنا سكتنا
يبقى ننتظر ان الجمعيات المحترمة تتقفل واحدة ورا التانية
ومش ح يقعد على مداودنا غير جمعيات الاوزو وسب الدين كاصطباحة
يجب على الجميع مساندة هذه الجمعية حماية لمجتمعنا
وحماية لانفسنا من اللصوص والنصابين
يعني مش لصوص في الحكومة ولصوص في الجمعيات
ولما ربنا يكتب لنا كام جمعية محترمة يقفلوهم
اديني قلت اهو المساعدة القانونية لو اتقفلت
مش ح تبقى اخر الجمعيات المحترمة اللي ح تتقفل
ونتشرد احنا بقى

معلش استحملوني والنبي

هو انا اكلت دماغكوا قوي بمالكوم اكس؟
والله دي مش غلطتي دي غلطة مالك مصطفى اللي وعد الناس
بانه ح يترجم مذكراته وطنش
انا مش باحب الترجمة وماليش خلق عليها والا كنت ترجمتها
مش مهم
المهم ان الراجل ده اهم راجل دلوقت في الدنيا
على الاقل في حياتي انا
زي ما بيقولوا بتوع الفصحى
ما أشبه الليلة بالبارحة
وما احوجنا اننا نسمع كل كلمة كان بيقولها ونتشبث بيها
الراجل ده كان مؤمن بكل كلمة بيقولها
وهو بيتكلم تحس ان الكلام طالع من معاميعه وبيبخ نار من كتر ماهو حاسس بيه
يعني مافيش دليل اكتر من انه اتقتل والجرايد طلعت تاني يوم كاتبة
malcolm x dying broke
مات مفلسا
رحمه الله وتقبله في اعلى منازل الشهداء
انا حاطة الفيديو ده
عموما هو لغته الانجليزية بسيطة قوي
واللي ما بيعرفش انجليزي مش مهم يفهم
مش قصدي حاجة وحشة
قصدي الحاجة اللي كان يقصدها مالكوم اكس لما قال
الاسود الذي لم يلوث بالتعليم الابيض اكثر نفعا وذكاء وصدقا
ممن تلوثت عقولهم بالتعليم الابيض الامريكي لانهم لم يتعلموا شيئا
وانما تمت غسل ادمغتهم
يعني اللي ما بيعرفش انجليزي مش ملوث وما عندوش شبهة تلوث
عشان كده الفيديو ده مخصوص للي بيعرفوا انجليزي
لا
ده مخصوص للاخوة المنظرين و"المتحضرين" و
"المثقفين"
واللي صدعوا دماغنا بـ"ثقافتهم" المستعارة ونظريات غسل الادمغة
وكراهية الذات اللي اكلتهم
وفاكرين نفسهم بيفهموا
واي فلاح امي مخه انضف منهم
الفيديو ده كمان
للناس اللي قلبها محروق ومن كتر حرقة القلب مش عارفة تتكلم
مش عارفة تقول ايه اللي جواها ولا قادرة تقول واللي في ضميرها تطلعه
مالكوم اكس عرف يصيغ الام الانسانية بحب وصدق وعدالة وايمان
لسبب
ح تعرفه لما تقرا قصة حياته
وما اعتقدش ان فيه انسان اتألم بالشكل ده
ولا خذل بالشكل ده
ولا اتبهدل بالشكل ده
اظن
في الظروف السيئة قوي اللي احنا فيها
انا مش باضيع وقت ولا جهد حد
لما اخليه يشوف الفيديو ده ويفكر فيه ويشوفه
مرة واتنين وتلاتة
ويفكر في كل كلمة
موت مالكوم اكس كان مكسب كبير له
وخسارة كبيرة لينا
عشان كده عمل حسابه وكتب كل حاجة
اسيبكوا مع الفيديو
ملحوظة ماحدش يشوف الفيديو ويقول مشاكل السود اتحلت
وده كلام قديم
لان كل اللي حصل مع السود هو اصدار مزيد من القوانين
اللي غير قابلة للتنفيذ زي ما مالكوم اكس بيقول في الفيديو
ثانيا
انا عمري في حياتي ما توحدت مع حد قد ما توحدت مع مالكوم اكس
وعمري ما حسيت بانسان بيتكلم عن الام في اقصى الارض وهي تمسني بهذا القرب
والاه بتاعته توجعني شخصيا بالطريقة دي
في ظل الحكومة الفاطرة دي بدليل ان فيها حيل
وفي ظل الميتين اللي تحت
والصحفيين اللي فوق
ونجاد اللي اتشتم من ال...اللي تدهيه واللي فيها جابته فيه
والناس اللي من اهلي وناسي ومطلعين عيني
مافيش لحظة بتعدي عليا مش بافكر في مالكوم اكس
وبافكر اني اقرا مذكراته تاني

Wednesday 26 September 2007

عاجل: احتجاز جميلة وبثينة وامير امام قسم المحلة

في أثناء توجههم لتقديم وجبة الإفطار لعمال المحلة المعتصمين
قامت قوات الأمن باحتجاز كل من السيدة جميلة إسماعيل والأستاذة بثينة كامل
والأستاذ أمير سالم المحامي بالنقض، على مدخل طريق المحلة
حيث اعترض الأستاذ أمير سالم على هذا الاحتجاز بشكل قانوني وقامت السيدة
جميلة بتصوير ما حدث بكاميرا هاتفها المحمول
وبعد إطلاق سراح كل من السيدة جميلة والسيدة بثينة والأستاذ أمير
قامت قوات أمن المحلة بحصار السيارة التي تقلهم خلف مصنع المحلة إذ أبلغهم ضابط الأمن
أن هناك بلاغ ضد السيدة جميلة إسماعيل بأنها قامت بالاعتداء على ضباط الأمن عند مدخل
طريق المحلة!!!!!!!!!!!!!!!!!!!
دي ح تضرب ظابط
الآن تحاصر قوات الأمن السيارة التي تقل الثلاثة متطوعين لإطعام عمال صائمين
أمام قسم شرطة المحلة اتنين
وقد أبلغتني الأستاذة بثينة كامل
أنها لاحظت أن فريقا من قوات الأمن التي كانت تحاصرهم
قد انسحبت لمكان مجهول
ثم سمعت بعد ذلك أخبار عن اقتحام قوات الأمن لمصنع غزل المحلة
يعني لا فطروا ولا اعتصموا
ومحاصرين سيدتين ومحامي في سيارتهم بقوات أمنوكأن جميلة وبثينة وأمير دول جولدا مائير وكوندوليزا ورامسفيلد
====
تحديث: اتصلت بيا حالا الأستاذة بثينة كامل
وأبلغتني أنهم أطلقوا سراحهم وسمحوا لهم بالعودة إلى القاهرة
ورفضوا تماما أن يسمحوا لهم بالدخول للعمال
فاضطروا إلى ترك الطعام الذي أحضروه للعمال على أمل أن يصل
لهم
على الله ما حدش ياكله في السكة
وقالت لي إن الأمن لم يقتحم المصنع ولكن
قفل على العمال من برة زي الفراخ وحاصر المصنع
عشان ماحدش يتمكن من الوصول لهم ولا هم يتمكنوا من الوصول لحد
مش عارفة ليه حاسة ان صواني البسبوسة اللي سابتها بثينة
ح توصل لهم عسل متلحس في صاج

I'm a field negro

We stil have house negros
Very elegant house negros

I’m for the truth, no matter who tells it. I’m for justice, no matter who it is for or against. I’m a human being first and foremost, and as such I’m for whoever and whatever benefits humanity as a whole.

Malcolm x

(Malik Shabaaz: The field Negro)

أبحث عن الحقيقة، بصرف النظر عن قائلها. أبحث عن العدالة، بصرف النظر عمن تكون لصالحه أو من تكون ضده.

أنا إنسان أولا وأخيرا، أساند كل شخص وكل شيء يعمل لنفع الإنسانية كافة

مالكوم إكس

(مالك شاباز: زنجي المزارع)

مؤتمر صحفي لضحية الفيوم غدا بنقابة المحامي

تعقد حركة مصريون ضد التعذيب
غدا
الخميس 27 سبتمبر
الساعة الواحدة ظهرا
بنقابة المحامين
مؤتمر صحفي
يحضره عائلة ومحامون
ضحية تعذيب الفيوم

ما يقعد ع المداود إلا شر البقر


لو عندنا من ده

وللا حتى عندنا نصه
وللا ربعه
وللا تمنه
وللا حتى دراع منه
لو فيه في الدنيا دلوقت واحد زييه
ما كانش الحال بقى الحال
ولو عاش كانوا قالوا عليه كلام من اللي هو بتاع ارهابي وكبابي
بس هو مات
استشهد وهو عنده تسعة وتلاتين سنة
مات وارتاح
وسابنا لمصيرنا
ماهي الناس دي مش بتبقى ولاد دنيا

تحويل قضية ابراهيم عيسى الى امن دولة طوارئ

ياخبر اسود ومنيل
يا خبر اسود ومنيل
يا خبر اسود ومنيل
اعمل ايه يا ربي
امن دولة طوارئ؟ امن دولة طوارئ؟
يعني مافيش استتئناف والحكم بتصديق من رئيس الجمهورية؟
ليه كده؟ وليه بينكلوا بيه كده؟
احنا ح نعمل ايه
ح نعمل ايه؟
انا دماغي اتشلت خالص
احنا ح نسكت؟
احنا ح نسكت؟
ح نسكت؟
ح نعمل ايه؟
ح تعملوا ايه؟

Tuesday 25 September 2007

تطورات قضية الفيوم

وصلتي الرسالة التالية
: من مندوب مصريين ضد التعذيب في الفيوم
بزيارة عاجله في محاولة للوقوف علي الحقيقه وبات من الصعب الوصول لأهل القتيل لحالة التربص الامني والتحفز بعد ما اثير عن استعدادهم لتحويل الموضوع برمته للثأر من القتله ،بندر الفيوم يعج بالشائعات عن قبول اهل القتيل المساومه وهو ما تروجه اجهزة الامن والمخبرين وهو منافي> للحقيقه حتي هذه اللحظة فاهل القتيل لايزالون علي اصرارهم بضرورة محاكمة القتله محاكمة عاجله وترضيهم والا فأن الوضع سيبقا علي ما هو عليه من رفضهم لاستلام جثته والدخول في دائرة الثأر ما اتمناه حاليا هو حالة استنفار في شوارع بندر الفيوم فهم فقط القادرين علي تحريك الامر والوقوف لجانب اهل الضحية وتشجيعهم علي الثبات علي موقفهم حتي وان تخلي محاميهم عنهم فمن المفروض اننا كلنا بجوارهم لأنه بات من الصعب الوصول المباشر لأيا من أفراد القتيل لأن الساعات القادمه ستكون حاسمه في القضيه خاصة بعد الهمه الواضحه من الشخصيات الحزبيه والشرطه في محاولة للتعتيم علي الموضوع

حبس رئيس تحرير الوفد واتنين صحفيين

واحدة واحدة ياعم المجري
مش عارفين ناخد نفسنا
اصدرت محكمة الجنح حكما بحبس انور الهواري رئيس تحرير الوفد
واتنين محررين زملاء وهما امير سالم ومحمد غلاب
بس ده امير سالم تاني غير بتاع المجتمع المدني
وبكرة فيه قضيتنين تعذيب واحدة في كفر الشيخ
والتانية في الخانكة اللي شكلنا كده كلنا ح نروحها
ده غير الفيوم والشرقية والمنصورة العامرة
ما تصلوا ع النبي كده فيه ايه
ده احنا في ايام مفترجة يعني
اول الشهر حبس اربع صحفيين
يتخللها قتل عدد من المواطنين في عدة محافظات
ونص الشهر حبس تلات صحفيين
اه صحيح
ده الدكتور محمد سيد سعيد رئيس تحرير البديل متقدم ضده بلاغ
يا اخوانا ما قلنا شوية سم فيران وارموهم في النيل وخلصونا
او غرقوا البلد جاز وطيروا بطيارة ومن فوق ارموا عقب سيجارة مولع
او صعايدة وبالشوم في الازاز
افصلوا بقى ده التلاجة بتفصل
بمناسبة الفصل
عمال المحلة معتصمين تاني
على رأي عمر طاهر
شكلها باظت

Monday 24 September 2007

عاجل تاني: التقرير الثالث لمصريين ضد التعذيب

بخصوص بقى المنصورة
المواطن اللي كان في المستشفى والشباب ما عرفوش يقابلوه
وكنت قلت لكوا ان التقرير بيتم اعداده
التقرير اهو
ده تقرير معتز عادل
وده تقرير احمد الجيزاوي
كفاية
ما تبسطهاش اكتر من كده

عاجل من الفيوم بخصوص القتيل واهله

أبلغنا مندوب مصريون ضد التعذيب بالفيوم أن الأمن يحاصر منزل الشهيد
محمد جمعة حسن وأن أهل الفقيد يصرون على عدم تسلم جثته ويؤكدون أنهم
إن لم يجدوا المساندة اللازمة للحصول على حقهم قانونيا سيعتبرون القضية
قضية ثأر بينهم وبين من قتلهم ابنهم
كما أكد المندوب أن ما قيل عنه أنه تقرير للطب الشرعي هو ليس إلا تقرير أولي
وأن إصرار الأهل على عدم تسلم جثة الفقيد ربما يؤدي إلى إحالة الأمر إلى النيابة
ومن ثم إلى الطب الشرعي حيث يتم تشريح الجثة
وينفي المندوب كل ما أشيع حول قبول أهل المرحوم محمد جمعة حسن لصفقة
كان قد عرضها عليهم القيادي بالحزب الوطني والعضو السابق بمجلس الشعب
محمد هاشم، ويؤكد أن ثمة ضغوطات أمنية تمارس على أهل الفقيد ليقبلوا بتلك الصفقة
====
حاجة تانية بقى
فيه تحية واجبة للدكتور علاء الأسواني
اللي سمعته النهاردة في اذاعة نجوم اف ام في برنامج قضية حياتي مع الاذاعي عمر بطيشة
وهو بيسأله ايه قضية حياتك
فأجابه الدكتور علاء...في اذاعة نجووووووم اف ام...ان قضيته هي حقوق الانسان
والمجابهة التعذيب
وقال الدكتور علاء ان خصمه في هذه القضية هو السيد وزير الداخلية
وقال ان القاضي اللي هو عايزه يفصل في القضية هو زكريا عبد العزيز رئيس نادي القضاة
وقال ان المحامين اللي ح يستعين بيهم هم عبد السناوي وعبد الحليم قنديل وابراهيم عيسى
وقال ان في الاسبوعين اللي فاتوا حصلت اكتر من حالة وفاة بسبب التعذيب
وقال ان امله الا يستغل اي شخص سلطته
وقال ان دورة حقوق الانسان اللي عملتها الوزارة للضباط هي حالة من العبثية
لان اللي بيعذب مش بيعذب عشان جاهل بحقوق الانسان
ولكنه بيعذب عشان عارف انه مش ح يتعاقب ولا ح يتحاكم
بقيت قاعدة على الفطار عمالة اصفق زي المجنونة
ينصر دينك يا دكتور علاء الاسواني
وفي نجوم اف ام كمان؟
ده ينصر دين وينصر دينك وينصر دينك من هنا ليوم القيامة
يجي واحد رزل يقول لي: انت لسة صاحية ما طول عمر علاء الاسواني بيكتب عن التعذيب
اقول له: بس مش في نجوم اف ام بتاعة: انت مش بتقرا كرآن ليه؟ اذا كان الفلاح بيعرف يتكلم في الموبايل
يبقى انت اكيد تعرف تقرا كرآن
======
تحديث عاجل
عاجل موافقة نيابة الفيوم باستدعاء كبير الاطباء الشرعيين بناء علي الطلبالمقدم من محامي القتيل

Sunday 23 September 2007

تقارير التعذيب نازلة ترف..كفاية ما تبسطهاش أكتر من كده

أولا بخصوص حادثة الفيوم
منعم كتب تقرير كامل عن الحالة على اللنك ده
وده يبقى التقرير التاني لمصريين ضد التعذيب
أما بخصوص المريض اللي مرمي في مستشفى المنصورة
معتز عادل وأحمد الجيزاوي لحقوا يقابلوه قبل ما يموت
التقرير بيتكتب وان شاء الله ينزل
لسة بقى فيه تقرير في الشرقية
اه
الاخوة المتطوعين
عايزين ناس دائمين في الدقهلية
وعندنا ابو الرجال معتز عادل
وعايزين كمان في الشرقية
واحد يبقى ابو رجال كده زي ميزو
احنا محتاجين ناس في المحافظات عشان لو احتجنا حاجة عاجلة زي
حادثة الفيوم يبقى معانا ع الخط
او لو حد من الشباب نازل يبقى يستناه
افتح التسميات ح تلاقي تليفوناتنا وميلاتنا
ده بالنوسبة للي في المحافظات واللي احنا محتاجينهم اكتر من اللي في القاهرة
اما بالنوسبة للتقارير
فاحنا مستنيين واحد وفيه واحد تالت
قصدي رابع جاي في السكة
يا ح ظابط
كفاية ما تبسطهاش اكتر من كده

Saturday 22 September 2007

بس بقى

نورا يونس ومنعم راحوا الفيوم النهاردة
تقرير الطب الشرعي بيقول ان مافيش اي كدمات خارجية
واحد قعد مايقرب من شهر في المستشفى بعد ما خرج من القسم
ح يفضل فيه كدمات ازاي؟ هو مات بنزيف داخلي على اثر ارتجاج في المخ
مش فيه حاجة في الدنيا يا ناس اسمها تشريح؟
الاستاذ طاهر ابو النصر المحامي قال لي ان الاهل كانوا ساكتين طول الشهر اللي كان
فيه محمد في المستشفى عشان القسم هو اللي كان بيصرف على علاجه
يا سلااااام ده ايه الانسانية دي كلها
ودلوقت بيتم الضغط عليهم من قبل محمد هاشم عضو سابق في مجلس الشعب
وقيادي في الحزب الوطني عشان يتنازلوا عن القضية وبيقولوا لهم مافيش دليل
وخسرانين خسرانين
بس بقى
بس بقى

بسسسسسس بقىىىىىىىىىى
انتوا ايييييييييه


قتيل في قسم الفيوم: يوقع محفظته مطرح ماهو عايز

داخلين اجتماع اللجنة في امان الله لا بينا ولا علينا
وفجأة جه لمنعم تليفون مسك ورقة وقعد يكتب
وبعدين ابلغنا انه الشهيد
محمد جمعة حسن من الفيوم
مات في قسم شرطة الفيوم ضربا بالاحذية
اللي حصل ان كان فيه خناقة واتاخد هو فيها وللا كان فيها مش عارفة
جه البوليس وعملوا بنصيحة عادل امام: احنا نروح القسم بقى
راحوا القسم والمواطن محمد جمعة حسن فضل يتضرب هناك
بالجزم على راسه لحد ما جاله ارتجاج في المخ ونزيف داخلي
خرج من القسم ودخل المستشفى ومات في يوم
20/9
اهله كانوا رافضين يستلموا جثته وبعدين جه تليفون لمنعم
بيقولوا له الجنازة طالعة بكرة الساعة حداشر
===
ايه بقى؟ نعم؟ في ايه؟
يعني ده كأنهم بيقولوا لنا مطرح ما تحطوا راسكوا حطوا رجليكوا
اعملوا رابطة ضد التعذيب واشتكوا للنائب العام وولعوا في نفسكوا بجاز وسخ
ده شعبنا واحنا احرار فيه
وظابط البوليس
يعذب المواطن زي ماهو عايز
يموت المواطن زي ماهو عايز
يوقع محفظته مطرح ماهو عايز
وقال ايه ناسبنا الحكومة
طيب والنبي يا اخ حسب الله جوزي
بلغ الست ريا انهم لو عايزين يخلصوا على الشعب المصري
ياريت يحطوا لنا سم سريع المفعول في النيل ونموت على طول ونرتاح
مافيش داعي للقتل صبرا ده
مش برضه ح امباشي يا عب عال؟

Friday 21 September 2007

اليوم الاجتماع الثاني للجنة الدعم الاجتماعي لضحايا التعذيب

الليلة دي الساعة تسعة مساء في مركز الدراسات الاشتراكية
7 ش مراد
الجيزة
عشان الناس ما تتهوش بس
عارفين جاد بتاع الجيزة؟
اوصل عنده وعدي الشارع العمارة اللي قدامه على طول نمرة 7
===
الاقتراحات اللي انا شايفاها بالنوسبة للجنة
دي اقتراحات صخصية
اننا نمسك مكان مكان ونركز عليه
يعني
فيه مجموعة من المختلين عقليا في المنصورة عمالين يموتوا في الناس
اول حاجة
وده اللي عمله مركز النديم ومندوبي اللجنة
انهم يقابلوا الاسر ومن ضمن الحاجات يشوفوا حالتهم الاقتصادية والاجتماعية
طبعا انا برضه تركيزي على ان الناس دي مش ح تلاقي تشتغل ولا تاكل عيش
المفروض نشوف كل اسرة تقدر تعمل ايه او تشتغل ايه ونساعدهم
لو ينفع حد عايز كشك حد عايز مكنة خياطة مثلا حد يقدر يشتغل في ورشة
لازم نساعده ونسأله هو يقدر يعمل ايه
ووالنبي بقى انا دماغي اتاكلت من ام الوقفات الاحتجاجية اللي لا بتودي ولا بتجيب
اللي حاصل ان القضايا بتاعة المنصورة وقفت
لازم نحركها
وممكن نقدم بلاغ للنائب العام باسماء كل المتضررين من التعذيب لو ينفع قانونا
اننا نقدم باسمائنا كمدعين بالحق المدني بلاغات ضد ظباط وامناء المنصورة
اللي نازلين في الناس هرك وقتل ولا حد سائل فيهم
ونقدم بلاغات طبعا في الناس اللي وقفت القضايا
ونجمع مثلا اكبر عدد من الناس يعملوا توكيلات للمحامين اللي ح يتولوا القضية
يعني نعمل قضية حسبة على التعذيب
:)
لو ينفع قانونا طبعا عايزين نسأل في الموضوع ده
واظن ان ده من حقنا قانونا لما يبقى جهة حكومية سيئة السمعة واساءت لكثير من
المواطنين من حقنا كمواطنين ندعي بالحق المدني عليها
ام محمد ممدوح
بتاكل منين؟
الاسر دي كلها بتاكل منين
بيشتغلوا ايه
لازم نعرف من المندوبين هناك ونقدر على اساس كده نحدد
نقدر نجيب لهم ايه يشتغلوا فيه
نقدر من خلال المحافظة او وزارة التضامن اننا نوفر لهم مشاريع صغيرة
يشتغلوا
طبعا ح يمطوحونا بس احنا بقى نعمل فضيحة ونهلل لحد ما يجيبوا لهم حاجة
يعرفوا ياكلوا منها عيش
اذا كان ينفع نجيب من الحكومة دعم او شغل للناس دي يبقى اولى
من اننا نعمل صندوق لان ده حقنا وحقهم واحنا بالفعل بندفع ضرايب
مش عشان يتوفر فرص عمل لصحابهم واللي عندهم واسطة بس

Thursday 20 September 2007

القائمة السوداء: شرطة المنصورة

كنا اتفقنا نعمل قائمة سوداء باسم ضباط التعذيب
وزي ما قلت المرة اللي فاتت قسم المنصورة ده بالذات محتاج
علاج نفسي
يا سلام بقى لو يعالجوهم بالكهربا اللي هم مستلمين بيها المواطنين
عموما معتز عادل تمكن من الحصول على بعض اسماء
قسم خانكة المنصورة
قصدي شرطة المنصورة
اللي عذبوا المواطنين
اول اسم واحد سماه معتز عادل
القائد الأعلى لقوات التعذيب وهو
محمد قنديل
ودي بقية الاسماء
محمود أبو المكارم ضابط
(قام بتعذيب وهتك عرض أحد المواطنين)
السيد عبد النبي امين شوربة
(قام باحتجاز احد المواطنين دون وجه حق)
وسرق منه 120 جنيه
أيمن سعفان نائب المأمور
(هدد المواطن الذي تم تعذيبه بتلفيق تهمة مخدرات إن لم يتنازل عن القضية)
محمد فرج امين شوربة
شارك في احتجاز وتعذيب نفس المواطن
تفاصيل الحكاية كلها عند
بس الواد معتز ده طلع واد عترة ربنا يحميه

Wednesday 19 September 2007

مصريون ضد التعذيب: التقرير الأول للجنة الدعم الاجتماعي

احنا كنا طلبنا من مركز النديم إنه لما يروح أي حالة يتصل بينا
وبالفعل قام مركز النديم بإخطارنا إنه رايح المنصورة
عشان يعاين حالات كتير تعرضت للتعذيب
ملحوظة: أنا أطالب بإحالة مركز المنصورة كله لمستشفى الأمراض العقلية
لية
المهم بالفعل قام المحامي أحمد الجيزاوي من اللجنة بالسفر مع المركز
واستقبلهم هناك مننا معتز عادل
وكتب التقرير ده
التقرير ده عن قرية "المعذبون في الأرض" زي ما سماها معتز
أرجو من الجميع قراءة التقرير
وسوف يتم دراسته والتباحث بشأنه قريبا إن شاء الله
واجتماع اللجنة الجاي ح يبقى الجمعة دي في مركز الدراسات الاشتراكية
الساعة تسعة

إيه يا عم الأمور

حيران فيا ليه يا ح الظابط؟ مالك؟
بدل ما كل شوية تبعت لي ناس
مرة تبعت لي واحد ضخم الجثة مشرئب الفلنكات شلولخ
وعينيه ملونة ويقول لي انا شيعي زيك
واظن هو قال لك اني قلت له: انا مش شيعية خالص
ده انا سنة على ابوه
قال لي: يعني ايه
قلت له يعني باحب عمرو بن العاص
طبعا واحد ضخم الجثة مشرئب الفلنكات شلولخ
وعينيه خضرا وجايب خمسين في المية
ايش عرفه هو برأي الشيعة في عمرو بن العاص؟
اتلخبط وبص لي بصة غبية
وبعدين تبعت لي واحد شلولخ تاني يقول لي انا سعيد
بانك في اليسار معانا
اقول له انا مش في اليسار
يقول لي وش كده: امال اخوان؟
قلت له ولا اخوان
يقوم يقول لي وش كده: امال تصنيفك ايه؟
وتبعت لي واحد شلولخ تالت يقنعني بان التعذيب حلو
جميل
واني مش مفروض اتضايق منه لان نفس اللي بيتعذبوا مبسوطين من التعذيب
ده غير الشلولخ الاصلي اللي زاقينه عليا كل شوية يتصل بيا
الا هو راح فين صحيح؟ اختفى كده وبقى واحد تاني كل شوية يتصل بيا
ويسألني اسئلة وش برضه
مالك يا عم الامور
بتبعت لي شلولخات ليه وتاعب نفسك؟
ما تبص فوق
ايوة فوق اليافطة اللي فوق دي
مكتوب ايه؟
جبهة التهييس الشعبية
هي دي تصنيفي يا ح الظابط
خلاص؟
انت مش مصدق ليه؟
عجبتني ابتكارة وائل عباس لما اتسأل هو راخر على تصنيفه
وقال: احنا جيل ما بعد الأيدلوجية
هئ هئ هئ
ملعوبة يا وائل
حلوة دي يا ح الظابط؟ حلوة ما بعد الأيدلوجية دي؟
وللا ح تعملوا لنا تنظيم التهييس الشعبي لقلب نظام سيكام؟
ارحموني بقى
وبطلوا تبعتولي شلولخات عينيهم خضرا
الا هم ليه معظمهم عينيهم خضرا؟
انا باقول معظمهم اهو عشان اللي مستلمني اليومين دول فلت من العينين الخضرا
بس شلولخ برضه
كلهم الحقيقة ناجحين هيئة ماحدش فيهم داخل بواسطة
ما تكلفوش بقى نفسكوا عشان انا دماغي بتوجعني
وللا بتحللوا المرتب وللا ايه؟
آه ملحوظة: بلاش برضه الجنود المجندين ماركة صحفيين والنبي
عشان رغايين وبياكلوا دماغي
نقوا لكوا حاجة كده تبقى دكتور مهندس
او ميكانيكي
اهو يصلح لي العربية وانا ارد على اسئلته

Tuesday 18 September 2007

ندوة عن كتاب الناس والحرب

تعقد مكتبة القاهرة بالزمالك ندوة عن كتاب الناس والحرب
للعقيد أسامة علي الصادق يوم الخميس القادم
20/9/2007
في تمام الساعة الثامنة والنصف مساء
وسوف يتحدث العقيد أسامة علي الصادق عن أسباب
تدوينه لمشاركته في الحروب الثلاثة
1967
الاستنزاف
1973
وظروف تدوين الكتاب
وسيفتح المجال للمناقشة ونرجو من الجميع الحضور

Monday 17 September 2007

يوسف البدري وعادل فوزي دخلوا لبعض قضايا

كويس والله اهي حاجة الشباب يقضي فيها وقته
بدل الاتجاه لتعاطي المخدرات وصحبة اصدقاء السوء
اقصد رفع القضايا
بدل ما انت قاعد كده في الفراغ
اشتري كل الجرايد وافتح النت واقعد دور على اي حد
وارفع عليه قضية
اهو تسلي نفسك وتنفع المحامين وتشغل المحاكم وبكده الاقتصاد يزدهر
بقى يوسف البدري رفع قضية على الشبكة العربية لحقوق الانسان
عشان الشبكة العربية لحقوق الانسان طلعت بيان لمساندة احمد عبد المعطي حجازي
وبصرف النظر عن رأيي في عبد المعطي حجازي
بس الحقيقة انا موكعي هزا احب ان اعبر عن خالص انبعاجي وانبهاري
بقدرة الاستاذ البدري على التدوير في الجرايد وقراءة كل الحاجات اللي بتضايقه
ورفع قضايا عشان هو اتضايق من اللي مكتوب
مع ان الحل سهل قوي
يعني انا مثلا اللي بيضايقني مش باقراه وخلاص
جه بقى الصحفي عادل فوزي رفع قضية على يوسف البدري عشان بيشوه سمعة الاسلام
الخبر ده بعتتهولي صاحبة مدونة واحدة مصرية على الميل
وعليه فممكن يوسف البدري يرفع عليه قضية انه اتهمه "بالباطل" بتشويه سمعة الاسلام
وعادل فوزي يرفع عليه قضية ان اتهمه بانه بيتهمه بالباطل وشكك في ذمته بينما هو اللي ذمته استك
فيوسف البدري يرفع عليه قضية انه رافع عليه قضية انه ذمته استك بينما هو اللي ما عندوش ذمة
يقوم عادل فوزي يرفع عليه قضية يقول له انا معنديش ذمة يا راجل يا ناقص
طيب ممكن بقى يعني الخناق يبقى خارج ساحات المحاكم؟
يعني ممكن الاستاذ يوسف البدري يكتب مقال يقول فيه على اللي رأيه فيه انه ناقص
انه ناقص
واللي رأيه فيه انه حمار وما بيفهمش يبقى حمار وما بيفهمش
وحتى اللي رأيه فيه انه كافر يكتب له ويقول له انت كافر
في اي جرنال
ان شالله على الحيطان زي اديب الشباب محمود عبد الرازق عفيفي
بتاع كتاب الالوهية والجنس
والبيان اللي مش عاجبه من الشبكة العربية لحقوق الانسان
يقدر يطلع قدامه سبعة وخمسين بيان يسب لهم فيه كل اللي نفسه فيه
وفيه حل اخر
بدل المرواح للمحاكم
ممكن ندعم حملة نعلم الناس التطريز والتريكو والكورشيه وبيانو وكمانجة
عشان يبقى عندهم هوايات تانية غير انهم يرفعوا على بعض قضايا
ويبلغوا عن بعض من غير مناسبة
او بقى ندور على واحد فاضي يقعد يرفع قضايا على يوسف البدري
ورا بعض ورا بعض ونشوف بقى مين اللي قضاياه ح تعلى ع التاني
فرااااااااااااااااااغ
والفراغ هو سبب انحراف الشباب
اي والله