Wednesday, 5 September 2007

من محاكمة اسلاك: عايزين نعمل حملة لمساندة الوقاحة

http://www.youtube.com/watch?v=0UmPMOCdC98

اولا مبروك ابراهيم عيسى اخد اخلاء سبيل
ووالنبي والنبي ومن نبى النبي نبي
اللي بيشتموه يستنوا عليه شوية لما شم نفسه من الخضة
اسمع يا زميل علك تستفيد
بقى انا مش ح امثل يعني
انا طالعان تلاتيني النهاردة
والنبي ما عارفة ابتدي منين
رحت عاتشي يعني عاتشي
لقيت الشباب اللي دلوقت ناسياهم كلهم
من كتر ما انا مخبوطة على دماغي
مش فاكرة غير احمد عبد الفتاح
دخل اسلام صورناه قعد على جنب وقعدوا
المحامين بتوعه يكلموه ويحايلوه ويهشتكوه
وابتدت الجلسة
القاضي سأل الادعاء عندك حاجة جديدة قالوا لا
وبعدين ابتدت مرافعة جميل سعيد
حلو؟
حلو
طبعا ما اقول لكش يا مواطن يا جاهل
لغة عربية ايه واداء ايه وحماسة ايه ومنطق ايه
وترتيب افكار ايه
وحاجة الكل قاعد منبهر حتى ناصر امين
اللي حياه بعد المرافعة
وحاجة يعني ربنا يستر
وعلى رأي مينا قال لي: مش زمان كانوا
بيقولوا يقتل القتيل ويوكل الهلباوي
دلوقت يقتل القتيل ويوكل جميل سعيد
وهنداوي قال: ده لو حاول يقنعني اني
ما اتولدتش ح اقتنع
عادي يعني عموما انا طول عمري
باعتبر المنطق مش دليل ابدا
على الحق
الحق حاجة والمنطق حاجة تانية خالص
والدنيا علمتني ان اللي بيبقى معاه الحق قوي
مش بيبقى عنده منطق
حلو؟
حلو
اتكلم في الاول عن خبير الاصوات وخلاه
مش خبير ومش اصوات
وبعدين اتكلم عن عماد الكبير
وخلاه مش عماد ومش كبير
واتكلم عن الفيديو بتاع التعذيب
وخلاه مش فيديو ومش بتاع ومش التعذيب
واتكلم عن النيابة وبقت هي راخرة مش نيابة
واتكلم عن مؤامرة الاساءة لسمعة مصر والصحافة الصفراء
حلو؟
لا مش حلو
بقى انا ومينا وتامر ح نتكلم واحمد عبد الفتاح وطقم الصحفيين
والمدونين كنا قاعدين في وش جميل سعيد على الارض
قال الصحافة الصفراء وراح مشاور علينا
يا سيدي غلطة اشارة ما جراش حاجة
ولو ان جميل سعيد كل اشارة بصباعه مش بايده بس
بيبقى دارسها كويس قوي ولها معنى معين
وبعدين فجأة قال: سيدي الرئيس
هناك فارق بين حرية الصحافة
وحرية الوقاحة
وراح باصص لي ومميل عليا وبصوته الجهوري قال: سامعة يا نوارة؟
اه وربنا موجود في الفيديو ده
وبعدين اختتم كلمته بانه كان خايف على مصطفى بكري لبعدين يموت
لانه شافه في تسعين دقيقة وهو دمه محروق من واحد كويتي
كاتب بيقول لا تعايرني ولا اعايرك واذا كان المصريين بينضربوا
بالجزم في بلدهم ببلاش فاهم بينضربوا بالجزم في الكويت بفلوس
ولما قطر بيتقلب بيصرفوا لاهل القتيل خمسة الاف جنيه يعني تمن
غسالة في الكويت
قبل ما تقول والله عداه العيب احنا اللي عملنا في نفسنا كده
الاستاذ جميل بيقول اننا احنا السبب في هذه المقال: شفتوا مصر حصل فيها ايه؟
وبعدين التمس الرحمة والرأفة لاسلام
!!!!!
اممممممم انا اعرف حديث عن الرسول بيقول: من لا يرحم لا يرحم
الياء الاولى عليها فتحة والياء التانية عليها ضمة
===
انا مش ح امثل واقول اني لما وجهت الي الاهانة امام المحكمة
ما اتلهتش وكنت بت بسبع رجالة وبتاع
لا بصراحة اتلهيت وما عرفتش اركز في باقي المحاكمة
مع ان اللي اترافع بعد كده كان الاستاذ عصام جمعة عن رضا فتحي
والحقيقة انا باحترم مرافعات الراجل ده جدا لانه مش بيوجه اهانة لحد
والحقيقة ان الاستاذ جميل ما وجهش في مرافعته دي بالذات اي اهانات
لاي حد غير ليا انا بالاسم
ملحوظة: قبل المحاكمة الاستاذ جميل نادى عليا وسلم عليا
وبعدين قال لي مبروك لبابا
في المحاكمة قرا اية الشعراء وانهم يتبعهم الغاوون وكده
طبعا يجي واحد مينا يقول لي بلاش هس هس
ده كان بيعلق على استشهاد النيابة ببيت شعر
اقول له طيب الاستاذ جميل حط جملة اعتراضية
مالهاش اي علاقة باللي قبلها ولا لها اي صلة
باللي بعدها: يجي واحد يقول لي ابويا كذا وكذا
اقول له خسئت انت وابيك
وعلى اي حال ح نروح بعيد ليه
بعد المحاكمة ولما رفعت الجلسة قلت له: حضرتك يا استاذ جميل
بتهددني بالاسم
قال لي مش باهدد
فمينا قال له برزالته المعهودة: لا هددتها وقلت حرية الوقاحة سامعة يا نوارة
برضه مش ح امثل واقول ان العيال هم راخرين ما اتخضوش
الحقيقة هم بهتوا شوية
وقعدوا يهوبصوا: هاها..هي هي...هو هو...
بس كان باين عليهم الذهول
اسد قال لي: احنا عايزين نتجمع كوقحين ونقف وقفة مساندة
قدام نقابة الوقحين في مساندة للوقاحة
واخرج يا خويا
الاقي الاستاذ جميل بيقول لي انت زي بنتي
!!!!!
هي تمشي
ما هو الابهات بيهزأوا عيالهم قدام الناس عاتشي
والاقيه بيناديني وبيقول لي شوية كلام كده مش فاكرة منه
غير انه بيقول لي انت بتشتميني بس انا معجب بيكي
وتعالي كلمي اللواء نبيه عبد السلام
ولقيت اللواء نبيه عبد السلام بيقول لي الاتي: انا ناصري
وانا عمري ما كلمت عسكري وانا قاعد
وانا عندي عسكري ربى عياله كويس وعلمهم
بانحني له احتراما
وفجأة ياخويا بقيت انا اللي طبقية متعفنة
جالي تليفون من بثينة كامل بتديني تطمينات
على ابراهيم
المهم رجعت لقيته دخل الاودة
رحت داخلة له وقلت له يا سعادة اللواء
انا كان اعتراضي على استخدام اللهجة الطبقية
في الاشارة لخبير الاصوات وسواق الميكروباص
قال لي: لا ما هو ده غلط طبعا
جميل سعيد قال لي: ايه رايك لما قلت ح اشرب حشيش
اظن حاجة زي دي تعجب باباكي قوي
!!!!!!!!!!!
فاللواء نبيه عبد السلام قال له انا باحب باباها
وانا شاعر
قلت له ليه ما الاستاذ جميل شتم الشعرا
قال لي ده قرآن بقى
الحقيقة انه لما قال: والشعراء يتبعهم الغاوون
الم تر انهم في كل واد يهيمون وانهم يقولون مالا يفعلون
وبعدين راح مشاور على اسلام وقال: الا الذين امنوا
وعملوا الصالحات وانتصروا من بعد ما ظلموا
وبعدين راح باصص للاستاذ ناصر امين وقال: وسيعلم
اللذين ظلموا اي منقلب ينقلبون
المهم اني لما قلت له:حضرتك شتمت الشعرا
وقال لي ده قرآن
قلت له: وانا وصلتني رسالة اللي يقول لي ابويا
اقول له خسئت انت وابيك..انا ذكية يا استاذ جميل
فابتسم ابتسامة رضا ان رسالته وصلت
وبعدين قال لي انا معجب بيكي
فقلت له معجب بيا وللا عايز تسجني
فسكت
==
طبعا مينا قال له: وتفتكر الحكم بالسجن ح يبقى كام سنة
قال له: لا ما حدش يعرف اذا كان ح يبقى فيه سجن وللا لا
قال له انا مش باقول على اسلام انا باقول على نوارة
ناوي تسجنها كام سنة
فقال له: مين اللي يقدر يسجن نوارة
فمينا برضه برزالته المعهودة قال له: مين اللي يقدر ساعة يحبس نوارة
هاهاهاها
الحقيقة لولا سندة مينا ليا كان زماني بالق في الجزمة
لاني وبامانة شديدة بهت
خصوصا لما جيمي قعد يزعق لي ويقول لي اوعي تتحبسي
كده يعني هم حاطينك في دماغهم وعايزين يحبسوكي
طيب اوعى اتحبس ازاي يعني؟
بس الحقيقة مينا واد مجدع صح
الحقيقة هو والعيال كانوا سندة لان جميل سعيد
كل شوية يسحبني ويديني في جنابي وهو مبتسم
وانا صحيح بطحجية كده ع النت
لكن لما حد بيفاجئني باتنح
وبعدين جات صحفية قالت لي: مدام ليكي دلة على جميل سعيد كده
قولي له يخلينا نصور اسلام وهو ماسك المصحف اصله ماسك المصحف جوة
!!!!!
يعني الطم يقولوا الولية اتجننت؟ هو عشان بيهزأني وهو مبتسم
يبقى ليا دلة عليه
المهم دخلت جري اصور اسلام وهو ماسك المصحف بس لما شافني
خبى المصحف مش عارفة ليه
وانا خارجة من القاعة الاستاذ جميل سعيد برضه قال لي: كنتي
بتعملي ايه يا نوارة جوة؟
قلت له كنت عايزة اصور اسلام وهو ماسك المصحف
بس هو خباه الظاهر خايف يتمسك اخوان
قال لي: وانت بقى بتشتميني ليه؟
قلت له مش باشتمك
قال لي لا حاطاني في دماغك
قلت له عشان خايفة منك
ليه؟
قلت له عشان زي ما جمعت معلومات ضايقتك
جمعت معلومات انك اهم محامي في الشرق الاوسط
وده معناه انك ممكن تجيب براءة لاسلام
قال لي وافرضي
قلت له لا ده يبقى ظلم
قال لي ظلم ليه ان الحكم الا لله انت ح تعقبي على حكم الله
قلت له ما انا اقدر اقتل ده وشاورت على جيمي
واقول ده عمره
قال لي لا القتل فعل ارادي لكن الحكم لله
هو انا ح اسلك مع جميل سعيد
ده جاب براءة لعبد الرحمن حافظ يا مؤمن
ها
ح نعمل الوقفة الاحتجاجية لمساندة الوقاحة امتى؟


19 comments:

Monzer said...

أتنا لم مشيت مشيت على عينىبصراحة
كنت عاوز أعرف، هاتقوليله ايه

بس الغريب ، انه ساب كل الصحافة وكل الناس وكل الدنيا ومسك فيكى انتى

أنا لما حضرت النهاردة خفت جدا ع القضية، خصوصا بعد ما سمعت مرافعة جميل سعيد

ربنا يستر، مش عارف ازاي بيجدوا مبررات للباطل، ده ولا تلبيس إبليس

كلاكيت تانى وتانى said...

الوقاحة مش محتاجة لحملة يانوارة دى محتاجة ثورة
الوقاحة فن لا يجيدة سوى الفاسدون وأصحاب الذمم اليوك والغير
وهى طريقة التعبير لكل من أصر ع أعلان الباطل حقا
وهى السبيل الوحيد لدى الضعفاء بنفوسهم المريضة وقوة حججهم الواهية للتعبير عن أنفسهم
للوقاحة ناسها وصدقوا حين قاللوا
الحل اية فالندل؟؟؟؟؟؟؟؟؟
قالوا اجتنابة
والوقح ندل يجب اجتنابة
شكرا لك ع المتابعة اليومية

احمد الجيزاوى said...

بصى جميل دة معروف انه محامى فساد وقضايه الفساد
بس محيرنى شى واحد
انه اتعابه كبيرة جدا يعنى من ميت الف الى ربع مليون
والسوال اسلام جاب الفلوس مين لممه مرتبه ميتجوز الف جنيه لا لة كان فى جيش وراة من واحد بس
وعموما رغم انى لو عملنا موضوع القضيه التى قلتلك عليه المحامى المحترم دة هجبلى وجبلك معايه اعدام بس فكرى وكلمى استاذ ناصر كدة
احمد الجيزاوى

وائل عباس said...

فيه فرق بين المحاماة والتعريص !!!
سامع يا جميل يا سعيد !!!

mariam said...

انا بس عايزه افهم حاجه
هو المفروض ايه اللى هيحصل بعد اخلاء سبيل ابراهيم عيسى
يعنى هيكون فى تحقيقات تانى؟
و لا الموضوع خلص الحمد لله

بالنسبه لأسلام نبيه
انا منتظره الحكم و مرعوبه ياخد براءه
نفسى احس ان فى حد ممكن ياخد حقه فى البلد دى
و بعدين مين ده اللى يقدر يحبسك
ده انتى الزعيمه و اللى يقرب منك هيشوف

جبهة التهييس الشعبية said...

منذر
هو انت مشيت؟ اخص ع الرجالة
تبيعني كده على طول

كلاكيت تاني وتاني
هو انا مش فاهمة اتواقحت في ايه؟ عشان اعترضت ان عماد وخبير الاصوات يتشتم؟

بحبك يا مصر

يا لااااااااااااهووووووويييييييييييييي

لا انت شكلك مش متابع التغطيات بقى

بص يا سيدي

اللي بيدفع اتعاب طاقم المحامين دول كلهم واللي فيهم واحد بياخد في اقل قضية مليون جنيه سعادتك مش ربع مليون

ربع مليون دول يديهم للسواق بتاعه

اللي بيدفع الفلوس دي كلها

اناوانت ووائل عباس اللي ح اتشنير انا وهو جماعة ان شاء الله

لان الداخلية هي اللي بتدفع الاتعاب

وائل

اه سامع
ده بيقرا كل حاجة لم نفسك بقى
:)

مريم
وانا كمان والله يا مريم
انت عارفة لو الداخلية ذكية تبيع الواد ده عشان على الاقل تمتص غضبنا وتلايم الموضوع بس مش فاهمة انا العند راكبهم ومصممين يكسروا مناخيرنا ليه

على رأي الكاتب الكويتي لما تبقوا تعاملوا المصريين في بلدهم عدل نبقى نعاملهم احنا عدل

meto33 said...

ألف شكر عالمجهود والتغطية المتميزة اللى متعودينها منك دايما وخصوصا الفيديوهات.
أما بخصوص الوقاحه بمفهوم عم جيمي فياريت البلد كلها تبقى بهذا النوع من الوقاحة واللى معناها الحقيقي الصراحة كان اتصلح حالنا بكتير.
يارب الحكم يكون متناسب مع حجم الجريمة لأنى بعتبرها ارتكبت في شخص كل مصرى مش فى شخص عماد الكبير فقط

meto33 said...

على فكرة نسيت أسألك ليه ماتحطيش عناوين التحديثات بتاعتك علىtwitter زي وائل عباس علشان نعرف الجديد أول باول

مصري said...

واضح يا نوارة إنك خوفتي جميل سعيد, عشان كدة حطك فيدماغة واضح انك قولتي حاجة هزته و عشان كدة عايز يبان متماسك و عشان كدة بيحاول إنه يبدأ بتهديدك (تبع مبدأ خدوهم بالصوت ليغلبوكو) و عشان يصرف نظر القاضي عن القضية الأساسية(تعذيب عماد الكبير) و يقعد يشتت المحمة لضايا فرعية و هو ده بالضبط اللي بيعملة بيهاجم الصحافة . المدونين , منظمات حقوق الإنسان و عشان كدة بيحاول يلمح تلميحات على والدك الشاعر العظيم
, خلى بالك إن النوع ده من البشر عمره ما يلجأ للمواجهة المباشرة زي الأفاعي بالضبط, حركاته دايما زاحفة حول خصمة بيلف و يدور , لغاية ما يهجم مرة واحدة , بأي حركة خسيسة, الشخص ده لازم تفضلي تهاجميه على طول, خليه دايما في موقف دفاعي , ماتديهوش فرصة انه يفكر و يدافع عن نفسه . خصوصا في اللحظات اللي يحاول بيها انه يبان غلبان و طيب ده مجرد حيلةعشان يحضر ضربة , يضربك بيها تتحت الحزام, عشان كدة ما ينفع نتعامل بمنطق مع ناس زي دي لأن المنطق بالنسبالهم عبارة عن ورق كلينكس بيمسحو بيه....الحل لمواجهة الناس دي هي الهجوم العليهم و فضحهم بشكل مستمر و ضربهم بالجزمة لو لزم الأمر زي أي سحلة أو, ثعبان نشوفة في الشارع بس لما نضربه لازم نتاكد ان احنا ضربباه فوق دماغه و مش حتقومل قومة تاني عشان ماتنلدعش منه تاني

TAFAHA said...

بت يا نوارة انت بت زي الفل وسيبك لو حد شتمك قوليلو الشتيمة لفت وتلزق في فتحة شرج صاحبها :)
اه كمان

انت بتشربي سجاير ايه عشان نشوف مقياس الصحة العامية سلام
يا سكر ومستنين بقيا التغطيات

الدرويش المرووش said...

ألف مبروك على الدعايه المجانيه
عقبال يا رب ما صورتك تنزل على علب سمنة الهانم أم طاقيه حمرا

الفيديو مرعب و خلانى إتأكدت إنى كنت فاهمك غلط
و إنك فعلا من المغضوب عليهم
أو على الأقل من الضالين
بس كنت بتضحكى عليا طول الفتره اللى فاتت

على كل حال أنا هأعمل بأصلى و هأسألك السؤال الحيوى الإستراتيجى اللى كل الناس اللى عاملين صحابك ما سألوهوش

يا ترى بتحبيها الرشيدى الميزان ولا النخلتين
بلاش (عرف) الجامع لا نتاخد إخوان

shahy said...

ماشية معاكي ياست نوارة
اسمك اتقال في المحكمة

بس هو انا كنت عاوزة اسأل سؤال
هو اية علاقة الصحافة الصفراء بواحد عزب انسان يعني هي الصحافة اللي خلتة يعمل كدة والا اية الموضوع

ومعلش يعني هو اسلاك دة كان ماسك المصحف لية؟
علشان يصعب على الناس والا افتكر ان في ربنا ولما ربنا يشوفة ماسك المصحف يبقى يخرج براءة على طول

طيب يارب يارب يارب تنصر المظلوم وتسجن اسلام نبية

Desert cat said...

طيب لو اللى بتعمليه ده وقاحه
يارتنا نيجى نص وقاحتك

Ahmed Adnan said...

بصى يا بنتى ... انتى زى الفل ... للاسف المناخ الفاسد فى مصر ماينتجش غير امثال الحلانجى ده
المحامين فى جميع انحاء العالم طبقه محترمه ومجتهده اماعندنا ففيم امثال الجحش ده
اجمدى يابت دانتى ابوكى هرم من اهرامات مصر
وانتى ان شاء الله تكونى اكبر منه كمان .. يابنتى دا انا بقرا مدونتك قبل الجرائد وانت كاتبه كبيره .. بس بلاش سجاير فى عرضك هو احنا ناقصين هم
مش عارف اقول ايه غير ربنا يحميكى وتفضلى كده على طول بنت جدعه ومجتهده .. سلامى لكل الشباب اللى معكى اللى هم مش عارفين لسه قد ايه مصر لازم تبقى فرحانه لان ليها مستقبل مشرق بكم

zsinfulangel said...

yup howa bdal 2al kalm leke kda we 7atak fe dam3'o yb2a kalmak by2sar gamed ya nawara .. b3deeen eh 2alat el zo2 de howa malo we mal papake kman ??

mohammed said...

أيه يا نوارتنا مش جميل سعيد ده الى يهزك انت أقوى من كده بكتير بس عشان الموضوع جه فجأة وعلى فكرة انتى متخيلة إن جميل سعيد ده شخصية قوية بأه وراجل يا ماما الواحد يشوفوا رجليه تخبط على باب الجيران الناس دى ما بيبانش حقيقتها غير لما تيجى تنام أنا متأكد انوا ما بيعرفش ينام زى البنى ادمين من كتر المظالم الى شايلها على كتافه اما انتى وامثالك فأنا برضه متاكد انكى بتنامى وتشخرى وعلى فكرة إحتمال الراجل اللئيم ده يكون عامل كده عشان يشغلك عن المدعو اسلاك بس ولا يهزك إن شاء الله ياخد إعدام هو وامثاله

mohammed said...

على فكرة فى حاجة تايهة عنك يا نوارة قبيح حزين الى هو الترجمة الحرفية لجميل سعيد أتشهر لا مؤاخذة على قفاك كام واحد كان يعرفه قبل ما تكتبى أسمه على مدونتك الجميلة دى هما يا دوبك الناس بتوع القانون و معارفه صح لكن دلوقتى اتشهر بسبب ان سحنته وأسمه ظهروا على مدونتك يبقى مين الأشهر والأهم بذمتك يا نوارة مصر كلها على فكرة انا برضه أد ابنك الصغير سلام يا ماما بأه

وائل عباس said...

انتي عبيطة يا نوارة
هو انتي فاكرة انا كاتب التعليق ليكي
انا كاتبه ليه هو طبعا علشان يقراه
ومعاه اصبع وسطى كمان
يحطها في
عينه طبعا

الطائر الحزين said...

جميل سعيد كدة زى مخلص امين
طيب هو جميل وسعيد من اللى بيقوله
الا ايه شعور الواحد لما بيدافع عن باطل
بيقنع نفسة الاول ان الباطل حق وبعدين يدافع عنه

ان قمة الوقاحة هو الدفاع بوقاحة عن الباطل

يبقى تغيرى الاسم وتخليه تعالوا نساند الباطل