Saturday 29 December 2007

لولولولولييييي المحكمة قالت له: لا والنبي يا عبدووووووووو

بيني وبينك كلام....ايه وصله لامك يا عبده
لا والنبي يا عبده
الففففففففف مبروك ده بيان الشكبة العربية لمعلومات حقوق الانسان فيه تفاصيل رفض القضاء المصري لدعوى القاضي عبد الفتاح مراد اللي كان طالب حجب 51 موقع كانوا قابلين للزيادة. مينا كان كلمني الساعة واحدة الضهر وقال لي ان عبده خسر القضية وقال لي استنى ما اكتبش الخبر دلوقت لحد ما الشبكة تنزل بيان....والله انا مش متعودة اعمل كده بس لولا مينا ما كنتش سمعت كلام حد ابدا في تأخير خبر زي ده.
آه
نسيت اوجه نداء لكل انسان يعمل عقله بعقل عيال من دور ولاده واحفاده كمان بان تذكر المثل المصري الشهير
اللي يمشي ورا العيال ما يخلاش من الـ.....تقريص

ومين اللي قال بقى ان القاعدة هي اللي قتلت بوتو


انا بصراحة لا السياسية المزة ولا الحاج برويز بفرق توفيق الدقن بتاعه ده يفرقوا معايا بتلاتة نكلة بس المنطقي ان القاعدة تقتل برويز ويغور غير مأسوف عليه، ده ماحدش ح يزعل عليه ولا مراته حتى، لكن انا اول ما سمعت ان الاخت بي نظير بوتو اتقتلت اول حد جه في بالي البرواز الجبس نفسه اكمنهم كانوا ضراير، حتى شفت في البي بي سي حوار مع برواز وهو عمال يقول لهم ما معناه انا والله باحبكوا اكتر من بلوتو يقولوا له لا بلوتو احسن منك احنا بنحبها اكتر بلوتو حلوة انت بقيت وحش خلاص، وبقالنا ياما ع الحوار ده، هم يقولوا له القديمة تحلا ولو كانت وحلة وبلوتو دي بتاعتنا من زمان وبنحبها وبتحبنا ومش ممكن عزول يدخل بينا، وهو يقول لهم وربنا لتندموا وتعرفوا مين اللي بيحبكوا ويخدمكوا بعنيه، والله حتى في البي بي سي لما طلع قعد يعدد الخدمات اللي علمها لامريكا ويقول انا مندهش جدا من التحول ده دلوقت انا بقيت وحش وبوتو هي اللي حلوة؟ الحقيقة الحوار كان شيق جدا....بجد حسسني ان واحدة بتتكلم عن ضرتها، وعمال يقول ادوني فرصة اثبت لكوا فيها ولائي ده انا اعجبكوا قوي، وخراب البيوت مش بالساهل طب والعيال اللي ح يتشردوا ح اعمل فيهم ايه؟ والولية قاعدة تكيد فيه وتقول له بيحبوني انا مش بيحبوك انت.

ثم برواز ده كابس على نفس باكستان وعمل بلاوي سودا مهببة على دماغه وفرقة شعره والمفروض ان هو يبقى هدف القاعدة مش بلوتو ومع ذلك ما عرفوش يقتلوه مع انهم بيحاولوا يقتلوه كل يوم وابن المتضايقة بسبع ترواح لا عارفين يموتوه وهو على الارض ولا وهو طاير.

وقال برواز بيقول انه رصد مكالمة تليفونية بين اتنين من القاعدة واحد بيقول للتاني الاخوة نفذوا العملية وقتلوها؟ قال له ايوة وكله تمام ولله الحمد والمنة.

ههههههههههههههههههههههههههههههههه

اما هندي صحيح....بقى بتوع القاعدة ح يتصلوا ببعض في التليفون عشان يقولوا هو صفر؟ لسة ما صفرش.. خايف ما نسمعش...لا ح نسمع....يا رب سلم هي القدر بتتكلم؟ هي باكستان مافيهاش خط اليوم الواحد زينا؟ مافيهاش انترنت مشفرة؟ مافيهاش نفس الوسيلة السرية اللي اتفقوا بيها على قتل الولية يستخدموها وهم بيطمنوا على اتمام العملية؟

يعني ماعرفش يرصد مكالماتهم وهم بيتفقوا على قتلها ليه مدام يعني هم على موبايلات وميسدات وميسجات مع بعض؟

هلبت ما امريكا قالت له الغيرة ما توصلش للدرجة دي يا بروي عموما ما تزعلش خلاص امشي يا قاعدة وحشة يا قاعدة

الحاجة الوحيدة اللي مزعلاني ان الانسة بوتو ماتت قبل ما اسألها: ألا ايه الدروس المستفادة من الأشارب اللي مطرطر كل شعرك ده يا أوختشي؟

بقى بالذمة ده مش ظابط

يعني ده لو مش ظابط يبقى ياخد جائزة اوسكار احسن ممثل
http://www.youtube.com/watch?v=MCexzJIJUuo

على اي حال ده لو ظابط يبقى عرفناها دي
ده لو مش ظابط يبقى مجرم
دي لو تمثيلية يبقى كل اللي فيها مجرمين لترويج مواد تخل بالاداب
سواء البنت دي اداب وللا البنت دي بتمثل واللي فيها عاملينها لعبة
اللي في الفيديو ده لازم يتسجن ايا كان بقى صفته
ولو البنت بتمثل علينا يبقى هي كمان تتسجن

Friday 28 December 2007

مراقب الدودة

اول ما قالوا يا قناة معلومات اشتغلت فيها وكان اللي بيرأسها حسن حامد، كان واحد بيفهم اعلام صح وبيساعدنا اننا نحب الشغل ونشتغل، كان بيبقى قاعد على الجهاز اللي جنبي وانا قاعدة اشتغل واغني ولما ابص له اقول له: معلش يا استاذ حسن انا ما اقدرش اشتغل من غير ما اغني..يضحك ويقول لي: غني زي ما انتي عايزة المهم تشتغلي...مشي الاستاذ حسن وبلاد شالتنا وبلاد حطتنا وعملوا لنا نظم جديدة واحدة واحدة اتحولنا من محررين اخبار لموظفين ودلوقت بيقعدوا لنا ميقاتي على الامضا يبص للساعة ويبص على الامضا ويفضل طول الشيفت قاعد يتفرج علينا ويكتب فينا تقارير زي توفيق الدقن في فيلم ابن حميدو آه.
تقول مين بقى اللي بيقعد القعدة دي؟ مديرين ادارات...اي والله، راجل مدير ادارة محترم في مكان اعلامي محترم في هذا الجهاز العظيم على راي خليفة خلف خلف الله خلف خلاف المحامي قاعد زي ناظر الزراعة يراقب الانفار وكل مرة يدخلوا فيها ابقى حاسة انهم راكنين الحمارة برة ومش ناقصهم غير منديل محلاوي تحت طربوش احمر فلطح.....طبعا المديرين دولم كانوا في يوم من الايام زمايلنا ماهو انا من ايام سيدنا خشبة وانا في القناة دي، فيه منهم ناس عاقلة وحاسة ان دي مش شغلانة يشتغلها اعلامي صحيح قاعد على الامضا مراقب دودة زي ما كلنا مسمينهم لكن ادي الله وادي حكمته ساعات يبقى قاعد كده مضطر ساعات يطلع كتاب وللا حاجة مفيدة يعملها بدل ماهو قاعد كده، مافيش الا واحد بقى ده نيموذج للانسان الانوي الوظيفي، بيتكلم زي محمد صبحي لما كان بيعمل دور آدم في مسرحية الهمجي...لما كان جوز حورية. الله يرحم بقى قبل ما يبقى مدير كان بيجي القناة يقعد ساعة بالظبط ويمكن اقل ويبقى لابس شبشب مش عارفة ليه وبعدين ينزل يعمل شغل في اي حتة تانية. بس الحقيقة هو مبسوط قوي بشغلة مراقب الدودة دي، وطفش كام واحد من القناة، لدرجة ان كان عندنا واحد في القناة بيشتغل في الجمهورية بقى يبعت جوابات من مجهول لجريدة الجمهورية عشان يقطع عيشه من هناك وفي الاخر دخل لمديرة من المديرات اللي جم قبل المديرة الحالية وقال لها انه بيشتغل في الجمهورية وقومها عليه لحد ما مشاه من التلفزيون كله، وفيه واحد تاني زميلنا مشي من البلد كلها بسببه، وفيه واحد تالت اتنقل بسببه، وواحده زميلتنا راحت الصين بسببه، وهو الحقيقة بينبسط قوي لما يئذي الناس ويطفشوا من الكون بسببه، بس انا حاسة ان لسة هدفه ما اتحققش، متهيألي حلمه الكبير ان حد مننا ينتحر بسببه، دلوقت هو مش وراه غيري انا وكام بنت كده صغيرين.
وبما اننا شغلتنا صحفيين يعني شغلتنا نكتب اخبار، وبما انه هو قاعد مش بيعمل حاجة غير بيراقب الدودة والانفار ونفسه بقى يكتب اخبار يبدو انه وجد فيا مادة خصبة لكتابة الاخبار، من ساعة ما مسك مراقب دودة وهو ماوراهوش حاجة غير يكتب فيا عرايض زي توفيق الدقن، لدرجة ان نفس رئيسة القناة ابتدت تتخنق منه خصوصا وهو كل عرايضه: وكانت تضحك بصوت عال....وكانت تغني....وكانت بتهرش في راسها...وهكذا، غير الزملا بقى اللي قاعد لهم: ده طقطق صوابعه، ده لعب في مناخيره، ده دعك عينه، ده اتمطع.
طب ايه؟ يعني هم مش مفروض يشغلونا وللا ايه؟ القناة اول ما اشتغلنا فيها كانت مواكبة لاحدث تطورات الاعلام، بس دلوقت كل الناس بتطور التليتكست في كل انحاء العالم الا احنا، والاجهزة قدمت والكراسي قدمت وآليات الشغل قدمت واحنا قاعدين. اكتر ناس بتشتغل عندنا السعاة رايحين جايين يجيبوا شاي وقهوة، والاخ مراقب الدودة ده قاعد يكتب في شكاوى يسلي نفسه، واحنا بنقدم اقتراحات للتطوير والاقتراحات بتروح لرئيس القناة ورئيس القناة بتطلعها للي فوقيها واللي فوقيها بيطلعها للي فوقيه واللي فوقيه بيطلعها للي فوقيه..يعني افهم بس احنا مستنيين الاقتراحات دي توصل لربنا مثلا؟ طيب ما يقولوا كنا دعينا ربنا في الصلاة وخلصنا ده قريب يعني مش محتاج كل السلالم دي.
الغريب بقى ان كل القناة مسمية الاخ آدم الهمجي: مراقب الدودة.....مافيش مخلوق ما بيقولش عليه الكلمة دي حتى اللي بينافقوه ويقعدوا يقولوا له: والله بحبك وهم والله العظيم كدابين وبيلعنوا سنسفيله على السبحة، والغريب ان الكل بيكره هذا الكائن من اول رئيسة القناة لحد السعاة، والغريب انه بيقول لي انا بانام "مورتاح" اه والله بيقول "مورتاح" والغريب ان مافيش مدير مكروه غيره لان كلهم حاسين ان الشغلانة المطلوبة منهم مهينة لهم قبل ما تبقى مهينة لينا احنا الفصل اللي موقفين عليه واحد يكتب اسامي اللي بيتكلموا. طيب بينمام مورتاح ازاي وهو عارف ان كل البشرية بتكرهه...نفر نفر، وان كل المديرين التانيين عادي يعني فيهم ناس محبوبة من الكل فيهم ناس شوية بيكرههوهم شوية بيحبوهم فيهم ناس في حالها لا حد بيكرهها ولا بيحبها فيهم ناس مختلفة مع فلان ومتصاحبة على علان انما هذوها الصخص بالذات عليه اجماع زي الاجماع اللي على صدام اللي اخد مية في المية، مافيش مخلوق بيحبه واشك ان مراته وعياله يكونوا بيحبوه ده الله يكون في عونهم والله. وهذا الاخ المورتاح واشباهه لما بيبقى فيه شغل صح ما بيبقاش فيه مجال لظهور امثالهم على السطح ولكن لما يتحول الناس الى موظفين وبدل ما نبقى صحفيين نبقى قاعدين نبص في الصقف وهو قاعد باشكاتب الشكاوى دي تبقى عيشة؟
احنا عملنا اللي علينا واشتكينا وقلنا وقدمنا اقتراحات للتطوير، بس طب وبعدين ما احنا لازم بتوع الادارات يساعدونا ويتكلموا مش عارفة بيخافوا ليه؟ المديرين بطبعهم خوافين ما اعرفش ليه؟ مع ان المفروض ان المدير بقى يبقى مدير مش قاعد خايف من اللي فوقه طول الوقت كده....مرة الاستاذ مورتاح قال لي انه قدم اقتراحات للتطوير واذ بي افوجأ انه مقدم اقتراحات ما ينفعش تتنفذ غير في القسم ولو دريت بيها حروق اللسان ح يرفعوا قضية ويطالبوا باعدامه.
الا هو ما دخلش كلية الشرطة ليه؟ دي حتى كلية مفيدة قوي للناس اللي بتحب تئذي الناس لوجه الله تعالى

Thursday 27 December 2007

عاجل: أنا متضامنة مع وائل عباس

أولا الأستاذ محسن بهنسي راح اتقدم ببلاغ للنائب العام عن الكليب اللي وصل لوائل عبر الايميل اللي فيه ضابط شرطة بيطلب من بنت انها تقلع وسيتم استدعاءه امام النيابة العامة هو ووائل كشهود يوم الاثنين القادم الساعة عشرة الصبح نيابة وسط اللي في باب الخلق جنب مدرية امن القاهرة.
ثانيا ايه فيه ايه يعني؟ الناس عمالة تقول ده فخ واتعمل لوائل عشان يشنيروه...طيب ايه ح نسكت وللا ايه؟
وانا متضامنة مع وائل ورايحة ان شاء الله يوم الاثنين الجاي احضر معاه
يعني هو غلطان ان لما بيجيله بالميل فيديو تعذيب بينزله؟ هو وائل او اي مدون شغلته التحقيق وللا دي شغله الحكومة؟
انا لو جالي فيديو تعذيب بالموبايل وللا على الميل ح انشره من غير ما اعرف صاحبه ومن غير ما اعرف اذا كان صحيح وللا متفبرك المفروض ان الجهات المختصة هي اللي تحقق واحنا واجبنا نبلغ ان فيه فيديو بالشكل ده وعلى المحامين التقدم بالابلاغ وعلى جهات التحقيق انها تحقق...ايه الجريمة في ان واحد ينشر فيديو جاله بالميل؟ ماكل قضايا التعذيب ابتدت كده
وايه وش الندالة ده ولا كأن فيه واحد مننا ح يروح في داهية ولا حاجة؟ ما كلنا معرضين لده هو مين فينا ما نشرش فيديوهات تعذيب؟ ومين فينا مش معرض انه يتهم بانه بيفبرك؟
لو الفيديو اللي وصل لوائل عباس ده صحيح يبقى فيه قضية ويبقى وائل مش عليه حاجة
ولو الفيديو متفبرك يبقى اللي فبرك الفيديو هو اللي يتحاسب ووائل مالوش ذنب لان مش شغلته ولا شغلة اي حد فينا انه يعمل مخبر ويلبس جلابيه فوقيها بالطو ويمسك عصايا وجرنال مخروم عشان يتأكد من صحة الفيديو
بس شغلتنا لما واحد فينا يتعمل فيه مغرز زي ده عشان كل جريمته انه فضح قضايا تعذيب يبقى نقف جنبه ونتضامن معاه

ايها المصريون ركبوا القرون

اعزائي التمانين مليون أنتنّة نرحب بكم في برنامجنا الجديد ساركوزي جانا وفرحنا به، ونحب أن نذكر أن الأخ ساركوزي هو ذات نفس الصخص اللي قال للفرنسيين لما تحبوا تستقبلوا مهاجرين ابقوا استنضفوا يعني مش معقولة ابدا كل شوية يهجم علينا الشيالين والصنايعية من بلاد العرب احنا بنفضل هجرة العقول
على اساس انه عنده عقول والله اصحاب العقول في راحة
طيب شوفوا كده
http://www.youtube.com/watch?v=_geDnpy65Uw


ايه يا عم ساركوزي الحلاوة دي ده انت طلعت ابن حظ اهو على الله يكونوا الصعايدة الشنبات باسطينك هناك وقايمين معاك بواجب البانجو على اكمل ما يكون....الا صحيح هو الاسطى اللي ساحب المزة معاه ونايم معاها في نفس السويت على مرآى ومسمع من تمانين مليون إريال..إريال ينطح إريال، مش هو قاعد في الصعيد برضه؟ وللا الصعايدة في لقصر بلدنا بلد ديشات بقوا الا فرانكا؟
عموما برضه لما يجي ويجيب معاه المزة ينفي عن نفسه التهمة دي
http://www.youtube.com/watch?v=8MvDyYVn2ok


ربنا يستر على رجالتنا بقى
حبيب قلبي بيجري كل يوم الصبح وبيفضوا له المكان كله عندنا في مصر ويعملوا احتياطات امنية مكلفة عشان يعرف يجري....ما تتهد يا عم وبلاش تهلك صحتك في الجري ده انت جايب معاك صاروخ ارض جو عابر للقارات....وللا انت عايز واحد من الصعايدة يلطشها منك وانت بتلف التراك زي الاهبل؟ ماهو ما ينفعش مع الاخت دي كده..الصبح بتجري وبالليل سكران طيب انت جايبها تآنسك وللا ايه؟ ما كنت تخلي ام العيال بقى اذا كانت الحكاية انس وقعدة حظ وخلاص...آه ده نسيت ان ام العيال هي راخرة شافت لها شوفة تانية....طب ايه؟ ناوي تطير دي هي كمان؟ وللا جايبها في مصر عند الفراعنة عشان يعني يساعدوك مثلا؟ عموما الناس لبعضيها والمصريين شعب جدع ويخدموك في الموضوع ده بعنيهم
خصوصا اذا لم يقتصر الامر على البص من خرم الباب؟ اذا كان كده يبقى الفلوس اللي اترمت على الارض جايبة تمنها على الاقل الشباب ينباسطوا ويهيصوا الباشا جاي يجري
اجريييييييييييييييي
http://www.youtube.com/watch?v=aag4LLGXECs


بس فيه حاجة غريبة بقى.....الحكومة المصرية قررت ان وزير الثقافة فاروق حسني هو اللي ح يرافق نيكولا ساركوزي في رحلته غير الرسمية دي....ساركوزي بيجري وكارلا مع الحرس الفرعوني ووزير الثقافة مرافقه...قصدي مرافق يعني في الرحلة....ايه؟

طيب فلوس الحرس والتشريفة بتاعة ح الوزير وكدهوت يعني على حساب مين؟ اكيد على حساب صديقه رجل الاعمال اللي عزمه على الرحلة، الا مين صديقه ده راخر؟ بس هو ان شاء الله على حسابه مش كده...وللا على حساب فلوس الدعم اللي شالوها من العيش عشان يصرفوها على الاهبل ده وعشيقته؟ وقال على رأي المثل الفرنسي الشهير: كارلا بتاعتك كارلا بتاعته كارلا دي ليكوا كلكوا....مدام الانسة بيتصرف عليها من فلوسنا بسكوا عليها يا شباب
خدوا حقكوا ناشف

عاجل: خبر إنفاق وزارة السياحة على رحلة ساركوزي غير مؤكد

لا في الواشنطن بوست ولا في رويترز ولا في المصري اليوم ولا في الوفد ولا في اي حتة
ما اعرفش المصريون دي جابت الكلام ده منين؟ بس حرقة دم على الفاضي انا لما شفت الخبر دخت بعد كده لو سمحتوا ماحدش يجيب لي اخبار من المصريون دي لحد ما يتأكد من الاخبار انا اعصابي مش لاقياها في الشارع خلتوني دمي يتحرق واشتم كل اللي رايح واللي جاي
زي الاهبل اللي واقف على ناصية الشارع يتف
مش اي موقع فاتح في بير السلم تجيبوا منه اخبار
كل اللي قريته في جريدة الشرق الأوسط ان الاعلام الفرنسي بيشن هجوم على ساركوزي عشان واخد صاحبته وبيتفسح على حساب رجل اعمال صاحبه وواحدة صحفية راحت مع جوزها في نفس الرحلة قوم نقابة الصحفيين الفرنسية مسحت بكرامتها البلاط وطلعت بيان لادانتها
يعني فعلا مافيش قرني غيرنا
وبناء عليه انا باقترح ايس كاب يكون طالع لها انتنة عشان الارسال

ساركوزي نازل مع عشيقته في سويت واحد يا عم قرني

امال فين السؤال السرمدي: هي المدام تقرب لك ايه
- مراتي
- طب القسيمة لو سمحت
ده انا ايام ما كنت متجوزة كنت شايلة القسيمة في شنطتي من كتر ما كنا بنتسئل السؤال ده مع اني والله العظيم تلاتة شكلي محترم ناهيك على ان الحب ماكانش مقطع بعضه ولا حاجة ده احنا كنا بنبقى متخانقين على طول وانا عنيا وارمة من العياط على طول وشكلنا من بعيد كأننا متجوزين بقالنا خمسين سنة ومع ذلك مافيش حتة كنا نمشي فيها ولا ندخلها الا يطلع لنا كائن هلامي من تحت الارض
- هي المدام تبقى لك ايه؟
- مراتي
- طب القسيمة لو سمحت
والاخ ساركوزي معاه بقى قسيمة وللا ورقة عرفي وللا دافع خمسين بجرة في السنيورة وللا ايه بالظبط؟ طيب هو جاي مش بصفة رسمية احنا نستقبله ليه ما تستقبله السفارة ماهو جاي بوصفه مواطن فرنسي نازل يقضي يومين مع عشيقته يا عم قرني انت وهو....احنا دورنا ايه بالظبط؟ موصل جيد للحرارة؟
مش فيه ام قانون في ام البلد دي بيمنع ان اتنين مش معاهم اثبات انهم متجوزين ينزلوا في اودة واحدة؟
يعني ايه نازل قدام العالم كله مع عشيقته عندنا في سويت واحد؟ وبعدين نرجع نزعل من جاد شويري انه عامل اغنية اسمها مصرية ومطلع المصريات استغفر الله العظيم؟ طيب كتر خيره مش احسن ما يطلعنا قوادين؟ وللا احنا بقى كبرنا وعجزنا وبقى ينطبق علينا مثل
الـ......لما تتوب تـ...تـ....تقرص مشيها تقرص
يعني سي نيكولاي ساركوزي مالقاش حتة تئنيه هو والشر.....يفة بتاعته غير مصر؟ ما حدش رضي يشتغل كتاليست غيرنا؟
ويا ترى طالع لنا سمسرة حلوة في الشغلانة دي وللا عاملينها محبة؟ يعني ح يدفع فلوس كويسة مقابل ان السكك ح تتقفل والاماكن السياحية ح يخلوها ويأمنوها عشانه هو والوزة اللي معاه؟ وللا ده مجرد تعاطف ببلاش مع جوز الكناريا اللي جايين يستقرنونا بمزاجنا واحنا واقفين على الباب نحرسهم ونشنف اذانا بالاصوات وللا نبص من خرم الباب وللا ايه بالظبط الحكاية ايه الخرا ده بجد؟
طيب على الاقل مراعاة لمشاعر التمانين مليون جاموسة اللي في ام البلد دي نزلوا كل واحد فيهم في سويت لوحده قدامنا كده واحنا مش ح نيجي نفتش عليهم بالليل ونطمن ان كل واحد فيهم نايم لوحده يعني كأننا مش واخدين بالنا ان فيه سويت منهم فاضي انما التقريص عيني عينك كده؟
طيب ما بالمرة الست كوندوليزا هي وصاحبتها يجوا يقضوا شهر العسل عندنا
وللا دول بقى ح تطلبوا منهم قسيمة؟
السؤال يعني اشمعنى المصريين بيطلب منهم قسيمة؟
طيب لو ساركوزي حب يجدد وزهق مثلا من السنيورة اللي معاه وحب يجرب الفول والطعمية ياترى الشندوشت ح يطلع له السويت؟ وللا ح تحجزوا له اودة صغيرة على قد الليلة؟ وياترى ح يضطر يقدم قسيمة؟ وللا عشان الفول والطعمية معاهم نبيت معتق يبقى معفي من الورق الرسمي؟
مرة واحد زميلي قال لي انه راح مع واحد صاحبه امريكاني في مطعم في رمضان وكان بعد الفطار فصاحبه الامريكاني طلب بيرة فزميلي قال له وانا كمان عايز بيرة الجرسون قال له لا انت مصري....هو امريكاني يشرب بيرة في رمضان لكن انت مصري البيرة ممنوعة عليك في رمضان!!!!!!!!
قال له طيب انا بقى مسيحي - هو مش مسيحي ولا حاجة بالمناسبة - قال له حتى لو مسيحي مش انت مصري؟ يبقى ما تشربش بيرة في رمضان
والله انا يعجبني التربية المحترمة دي...احنا مالناش دعوة بولاد الناس المهم ولادنا يبقوا متربيين ومحترمين
احنا ناس صعايدة نفهم في الاصول بلا مسخرة وقلة ادب

مش انا شفت فيلم الجزيرة

أأأأأأأأأأأأأأأأأأأأأأأأأأأأأأأأأأأأأأأأأأأ..............................أأأأأأأأأأأأأأأأأأأأأأأأأأأأأأأ..................أأأأأأأأأأأأأأأأأأأأأأأأأأأأأأأ......................أنا
انا
انا
انا مش عارفة اقول ايه
مش عارفة اقول ايه
انا ان شاء الله لازم الحق بسرعة اشوفه تاني عشان الحق اشوفه تالت بسرعة عشان يبقى عدي وقت اشوفه رابع عشان يبقى فيه فرصة اشوفه خامس وافضل بقى اشوفه
يعني هي دي خطتي المستقبلية لحياتي اني افضل اشوف فيلم الجزيرة طول عمري لحد ما اموت
السؤال اللي بيطرح نفسه بقوة
لما هم بيعرفوا يخرجوا كده ويكتبوا سيناريوهات كده ويمثلوا كده امال كانوا بيضايقونا ليه؟
كانوا بيضايقونا ليه؟ ليه كده ما عندهمش اخوات جمهور؟
انا عمري ما شفت احمد السقا كده...ربك والحق انا كنت بقى رايحة وانا على بالي احمد السقا بقى اللي عامل برم ويقعد بقى يخنقنا بالاستعراضات بتاعته بس انا عمري ما شفت كده بجد
وايه ده؟
ايه ده؟
ايه الاخراج ده؟
ايه ده؟
ايه؟ ومين اللي كاتب السيناريو ده؟
ايه السيناريو ده؟ ايه السيناريو ده؟
وايه خالد الصاوي ده؟ ايه ده؟
وايه هند صبري دي؟
وايه احمد السقا يخرب عقله جاب الكلام ده منين؟ جابه منين؟
طيب ليه بقى كانوا بيعملوا اللي بيعملوه في الاول وبعدين يفاجئونا بفيلم زي ده يعمل لنا صدمة حضارية؟
حرام ده بقى وللا حلال؟
يعني ينفع كده يعني؟
المهم انا بقى ان شاء الله ح اصحى الصبح اشوفه تاني ويمكن ادخل الحفلة اللي بعدها وبعدين اروح الاجتماع الموسع لمصريين ضد التعذيب الساعة 5 في نقابة المحامين
ياااااااااااا ده انا كده مش ح الحق ادخل حفلتين ورا بعض
ح اضطر ادخل بتاعة عشرة وبعدين اروح وبعدين اروح الاجتماع وبعد الاجتماع بقى ابقى ادخله تالت عشان مافيش وقت عايزة ادخله كتير لحد ما افطس وما حدش ضامن عمره بقى
المشكلة اني دلوقت ماعنديش الشجاعة اني ادخل اي فيلم تاني احسن اوسخ عيني ومخي بعد ما نضفوا
زي اللي اكل شيكولاتة وخايف ياكل اي حاجة تانية احسن يبوظ الطعم
انا بقى مش ح اشوف حاجة تانية احسن شوية الهوا النضيف اللي شميته يتبخر
بس بقى اللي عايز يعرف يعني ايه سيما يروح الجزيرة
بس انا متغاظة منهم قوي....يعني انا قاعدة العمر ده كله مستنية وما يعملوش فيلم زي ده غير لما انا قربت اموت؟
عموما الحمد لله اني لحقته والقطر بيتحرك
بس بجد فعلا يعني ايه الفيلم ده؟
ايه ده؟
طيب اللي ما راحش يروح ويقول لي ايه الفيلم ده؟ ازاي يعني؟

Tuesday 25 December 2007

ضابط مرور يعتدي على مواطن حتى القتل

الخبر ده وصلني من أحمد عبد الفتاح
كتب سيد اسماعيل واحمد عبد الفتاح
في حلقة جديدة من حلقات مسلسل قتل ضباط الشرطة للمواطنين اعتدى فجر اليوم ضابط مرور بمدينة الصالحية التابعة لمركز فاقوس محافظة الشرقية على المواطن علاء صبري عز الرجال 35 عاما الذي يعمل سائقا لعربة نقل ضربا ادي الي اصابته باصابات خطيرة وهو ما استدعي نقله الي مستشفي الصالحية العام التي عجزت عن تقديم الاسعافات له ، وتم نقله الي مستشفي فاقوس العام حيث رأي الاطباء الأفضل نقله الي مستشفي جامعه الزقازيق حيث لفظ انفاسه الاخيرة في الطريق، وتم اعادة جثمانه الي مستشفي فاقوس حيث قامت مجموعات كبيرة من قوات الشرطة بحصار المستشفي ومنع الاقتراب منها حتي الان .
وحول اصابات الضحية يقول التقرير المبدءي الذي حرره طبيب مستشفي فاقوس العام ان المصاب يوجد به شق في اعلي الجبهة ونزيف حاد بالانف وارتجاج في قاع المخ وان هذه الاصابات ناتجة عن اصابته بضربة حجر في الرأس .

اليوم النطق بالحكم النهائي في قضية البهائيين

النهاردة النطق بالحكم النهائي في قضية البهائيين في مجلس الدولة، وربنا يجيب العواقب سليمة، انا ما قدرتش اروح عشان ظروف عوائلية بس بعت للمدونين عشان يروحوا دلوقت لان النطق بالحكم الساعة اتنين وفيه واحد هناك معايا على التليفون وسنوافيكم بالاخبار ان شاء الله.
====
تحديث: تم تأجيل الحكم في قضية البهائية ليوم 22/1/2008
احمد الجيزاوي هو اللي بعت لي رسالة بكده
النهاردة كمان فيه قضية الانبا ميكي ماوس

Sunday 23 December 2007

هي فوضى....هي صورة؟ هي إعععععععع

أولا انا مش عارفة هو لسة فيه حد نخبوي لحد النهاردة؟ ثانيا انا ما اقدرش استحمل التفسير الطبقي لكل حاجة كده، ثالثا ام الطبقة المتوسطة والنخبة المصرية اللي هي اوسخ نخبة على وجه البسيطة، رابعا ام التنظير بقى واللت والعجن في نفس الفكرة، خامسا ام الرمزية المباشرة اللي بتبتدي من اول اسماء الابطال ورسم الصخصيات لحد صورة عبد الناصر اللي محطوطة وش كده، سادسا اللي عايز يكتب مقالة مافيش داعي يأيفها ويعملها سيناريو ويعذبنا احنا بيها، سابعا هي افكار ياسين ولدي دي مش كانت ماتت واندفنت من زمان؟ مين اللي بعثها من الموات ونفض من عليها التراب وبلانا بيها تاني؟
تبدأ احداث الفيلم من "نور" المدرسة اللي هي المقصود بيها مستقبل مصر عشان اسمها نور وامها اسمها بهية اللي هي مصر يعني وحاتم امين الشوربة اسم الله اللي بيحبها وهي مش بتحبه، وهو طبعا رمز للفساد، والفساد ده في تحليل الفيلم وليد الفقر واليتم والغلب وطبعا لانه اتربى فقير ويتيم فهو بالتأكيد ح يطلع شرير وسادي وفاسد ومرتشي وكمان قبيح واصلع، ولان الفيلم رمزي من بتوع يوسف وهبل فنور الجميلة بتكرهه لانه قبيح قبح الفساد، وبتحب وكيل النيابة الشريف، رمز القانون، وبالمناسبة اسمه شريف وامه رمز للعلم والثقافة وتعليم الاجيال لانها ناظرة مدرسة صاحبة مبدأ وجوزها الميت المناضل السياسي، واسمه حافظ طبعا، لا وامين الشوربة حاتم! وبقى رأس الفساد هو امين الشوربة يعني المأمور والظابط دولم مجرد متسترين على فساده لكن هو اللي بيحركهم وبيستغفلهم كمان، واسهابا في الرمزية فقد ذهب حاتم الى المسجد عشان يعملوا له عمل عشان نور تحبه بس قالوا له طلبك مش عندنا قوم اذكر الله ودخلوه في الدروشة وخلوه يفقر في حلقة ذكر قام راح الكنيسة قالوا له طلبك مش عندنا قام قال لهم طيب مافيش احتفالات ولا اعياد فيه قانون طوارئ وقرر يضطهد الاقباط عشان ما عرفوش يخلوا "نور" تحبه وبعدين لما فشلت السلطة في انها تاخد شرعيتها من خلال الانتخاب والقانون اغتصبت البلد، قصدي لما فشل حاتم في انه يخلي نور تحبه واتخطبت لشريف، رمز القانون والشرعية، قام اغتصبها، والقانون طبعا ابن النضال والعلم واللي معلقين في بيتهم صورة عبد الناصر والنضال والقانون والعلم ما بيخرجوش غير من الطبقة المتوسطة اللي بتسوق الغوغاء والدهماء للثورة على الفساد اللي هم كانوا خاضعين له بارادتهم، طبعا لان الغوغاء يساقوا ولا يسوقوا، وقيادة هؤلاء الغوغاء لا تليق بواحد منهم، جربوع، لازم يبقى حد من النخبة اللي هو شريف.
في فيلم خيانة مشروعة عمل علاقة طبقة رجال الاعمال، او الرأسمالية المتعفنة، مع الطبقة الفقيرة، واللي هي عادة خالد يوسف بيحتقرها قوي وبيكرهها كمان، علاقة غير شرعية ادت الى دمارهم هم الاتنين.
لكن في هي فوضى عمل ان الطبقة المتوسطة حاولت تتصل بالرأسمالية المتعفنة ولكنها ما قدرتش تواصل بسبب اخلاقية الطبقة المتوسطة التي لا تتحمل فساد الرأسمالية، شريف وكيل النيابة، قبل ما يخطب نور، مستقبل مصر، كان خاطب سيلفيا بنت رجل الاعمال المشهور، لكنه كرهها واحتقرها لما شاف فسادها الاخلاقي ولما سقطت نفسها.
ويلخص خالد يوسف مشكلة النخبة في انها مش عارفة تخرج من ماضيها لما طلع ان الست الناظرة بتتعامل مع شريف على انه حافظ ابوه المناضل وهو قال لامه انا مش حافظ انا شريف حاولي تحبيني زي ما انا، ولما عرفت تحبه زي ماهو عرف يقود الثورة.
اععععععععععععععععععععععععع
اااااااخخخخخخخخخخخخخخخخخخخ
يااااااااااااااااااااااااااااااااااعععععععععععععععععععععععععع
حد يعمل فيلم كده؟ انا ما فهمتش الرمزية دي عشان انا نبيهة حاشا وكلا عمري ما قلت على نفسي نبيهة شرف لا ادعيه وتهمة انفيها بكل قوتي، بس المباشرة دي جنون جنوووووووووووووون.
انا ناسية والله اسم الست الناظرة، لو افتكرت اسمها اكيد ح تضيف لام الرمزية بتاعة يوسف وهبي.
طيب ليه عمالة اتكلم عن خالد يوسف؟ عشان بجد الفيلم اخراج خالد يوسف، انا ماشفتش بصمة يوسف شاهين غير طبعا في مشاهد النسوان اللي بتجري ورا الرجالة، والستات اللي بتروح تلقح جتتها على الرجالة اللي بتحبهم وبتقول لهم انا بحبك حبني بقى فيقوم يحبها على طول وتروح تقول له انا عايزة احضنك مستني ايه هات بوسة وكده يعني
ممكن اعرف هو الاستاذ يوسف شاهين بيجيب البنات دول منين؟ ومين بقى قال ان الستات بتلقح جتتها على الرجالة وبتجري وراهم كده؟ ماهو مش كل ما الانسان يعمل حاجة يسحبها على كل الناس يعني وللا ايه؟
ومين اللي قال ان الفساد نتاج الفقر وان كل الفقرا يا اما ولاد وسخة فاسدين يا اما ولاد وسخة منسحقين ومستنيين بقى ام النخبة الوسخة بتاعتنا لما تنقذنا وكل مشكلة النخبة انها عايشة في الماضي ومش عارفة تجدد خطابها؟ لا مش صحيح بقى النخبة فاسدة حتى نخاع والاخوة المناضلين فاسدين حتى النخاع وياما سمعنا عن مناضلين عظماء شرشحوا بنات وخلوهم بقوا استغفر الله العظيم ولما تقول له ليه يابني تعمل في البنية كده؟ يرد بكل برود: عادي باديها تجربة هي كده احسن....وكده احسن دي يعني تحولت الى امرأة تحت العامود. وحنفي ابو دقة وغير ابو دقة وغيره وغيره. وكفاية ان كل طرف فيهم بيشتم التاني ويفرح فيه لما تحصل له مصيبة، وكفاية انهم بيحرضوا على بعض امنيا، وكفاية ان كل واحد فيهم عمال يقول على التاني افاق وكلهم افاقين، وكفاية انهم واقعا وحقيقة بيكرهوا الناس اللي هم بيدعوا انهم بيدافعوا عنهم، وكفاية انهم منفصلين عنهم وعايشين في برج عاجي، وكفاية ان شوية منهم حولوا الشعب الى شحاتين والنص التاني مش بيفوق من الخمرا وشوية منهم مادين ايدهم للعال والدون يشحتوا منهم، وكفاية انهم بيشتموا في البترو دولار وماليين كروشهم منه، وكفاية انهم بيتاجروا بآلام الناس وفقرهم عشان يحققوا امجاد شخصية ومكاسب سياسية، وكفاية خطابهم الفوقي المتعالي - زي الفيلم ده مثلا - وكفاية ادعاءاتهم وزيفهم.
ها نقول كمان وللا كفاية كده؟
بقى هي دي النخبة اللي عليها الامل؟
لا هي شريف....ولا عمرها كانت شريف، ابدا، ابدا، ابدا....من ايام ترابيزة القمار بتاعة المرحوم سعد زغلول
وطول عمرها شبشب في رجل الرأسمالية وحاقدة على الرأسماليين وعايزة تحل محلهم وتكسب من وراهم
ولا مأمور القسم والظابط هبل ولا سذج ولا بينضحك عليهم ولا كل جريمتهم انهم عاجزين قدام الفساد
لانهم هم الفساد
ولا اليتيم والجعان وسيلته الوحيدة للتنفيس عن نفسه انه يعذب غيره
ولا الفقير الشبعة بعد جوعة هو المخطط الأساسي للفساد
ولا الستات بتجري ورا الرجالة وتلقح جتتهم عليهم
ولا فيه واحدة بتقول لواحد هات بوسة وحضن
وارحمونا بقى وبطلوا تتسلوا على مواجعنا وتنظروا على جراحنا

Saturday 22 December 2007

يا سينماتك يا مصر الجديدة

أنا عمري في حياتي ما رحت السينما في عيد: حفاظا على كرامتي وشرفي وهدومي ومن قبل ما اعرف احداث التحرش كنت مش باروح حفاظا على رئتي لان بيجيلي فوبيا الاماكن المغلقة والمزدحمة وحفاظا على مناخيري برضه ومافيش داعي افسر...المهم مالك وجيمي نشروا صور لسينمات وسط البلد زي ما انتوا شايفين كده

سبت تعليق لمالك اقول لك اني عايزة اروح السينما في مصر الجديدة ينفع وللا بلاش...تقريبا كان ح يشتمني بس تمالك اعصابه وقال لي باقول لك وسط البلد تقولي لي مصر الجديدة؟ المهم رحت سينما فندق السلام والدنيا كانت نسبيا زحمة بس من برة شكلها كده
مش عشان مافيش زحمة لا سمح الله...بالعكس بس السينما كومبليه كل الحفلات...بس فيه طابور ولما تقول لواحد لوسمحت انت اخترقت الطابور وشه يحمر ويرجع ورا او وواحد تاني قال: انا اسف يا فندم بس فعلا ده دوري وانا كنت واقف ورا الاستاذ ورحت اسأل اللي معايا على حاجة وعموما اتفضلي حضرتك...
- لا خلاص...اتفضل
- والله بجد اتفضلي حضرتك...
طبعا مواعيد السينمات في مصر الجديدة زي مواعيدها في شبرا يعني بيتأخروا عادي وعشان كده الناس اتكدست قدام الباب بتاع الصالات
كده
ومع ان الناس كانت متكومة قدام الباب لانهم خايفين يتأخروا خصوصا ان الشباب اللي واقفين على الباب قعدوا نص ساعة يقولوا ان فاضل خمس دقايق ويدخلوا الا ان اول ما فتحوا الباب عشان الحفلة اللي قبلنا تخرج الناس تلقائيا تنحت جانبا عشان تدي فرصة للي خارج ووقفوا صفين على الجنب يعني مافيش حد لبس في وش حد اللي جوة خرجوا بمنتهى الادب وهم مبتسمين للي مستنينهم برة واللي مستنينهم برة واقفين على جنب بمنتهى الادب وبيبتسموا للي خارجين وبيسألوهم عن رأيهم في الفيلم كده

وده بقى مش عايزة اقول ان مافيش تحرش، لان الفكرة اصلا ما كانتش مطروحة مع ان كان فيه شباب وبيشتموا بالفاظ من اللي هي بس مع بعض وبصوت واطي..ماحدش سمعهم غيري لاني بصراحة كنت باتصنت على الناس، مش بس كده: لو طفل عنده عشر سنين خبط فيكي يا انسة او يا مدام يقول لك بمنتهى المنتهى: انا اسف قوي...
يعني يا اختشي عشان تحافظي على كرامتك وشرفك وهدومك عليكي ومناخيرك طبعا وجهازك التنفسي لازم يبقى معاكي عشرين جنيه تمن التذكرة بتاعة سينما مصر الجديدة.
لكن ده معناتو ايه الحديت ده....
والله اللي انا شايفاه ان الحديت ده معناتو ان المصريين هم المصريين، بل البني ادمين هم البني ادمين، لما يعيشوا عيشة بني ادمين، يعني يلاقوا ياكلوا ويشتغلوا ويتفسحوا ويعيشوا زي الانسان ما مفروض يعيش، بيبقوا مؤدبين ومحترمين ومنظمين حتى لو ادارة المكان اللي هم فيه مش منظمة قوي، ولما بيتعاملوا زي الحيوانات ويعيشوا عيشة حيوانات لازم ح يتصرفوا زي الهمج
يعني مش صحيح ان المصريين شعب قذر بالسليقة ولا منحط خلقة ربنا، يعني اللي في مصر الجديدة دول مش مصريين؟ وماهماش مليونرات ولا حاجة ناس مستورة عايشة زي ما اي بني ادم المفروض يعيش، انا اخترت مصر الجديدة مش بس عشان استقرب، بس عشان كمان الناس اللي في مصر الجديدة دول مش اثرياء ولا معاهم ملايين وكمان عشان مصر الجديدة بتمثل المصريين بس يعني مش زي مدينة نصر والمهندسين اللي بيبقى عندهم عرب كتير.
وده مالوش علاقة بالتحليل الطبقي النخبوي اللي الاستاذ خالد يوسف هرا امنا بيه في فيلم خيانة مشروعة، ثم اخيرا في فيلم هي فوضى اللي رحت حضرته في السينما اياها ومن كتر ما هو وحش شفت بعده جوبا وحسيت ان فيلم جوبا ده حلو ماله يعني...فيلم بني ادم خلقة ربنا
مش بس كده ده انا لما رجعت شفت في التلفزيون فيلم الغواص وحسيت انه حلو كمان ومش بعيد اعيد نظر في فيلم بحبك وانا كمان واشوف انه حلو....من كتر ما فيلم هي فوضى خرا افلام الدنيا كلها احلوت في عنيا.
ح نتكلم عن الفيلم بعدين بس بالنوسبة للطبقية والنخبوية اللي واكلة افلام خالد يوسف فاحب اوضح حاجة
نفس هم ذات الناس المؤدبة اللي شفتهم في سينما مصر الجديدة - والحقيقة كانوا ناس مؤدبين ادب جماعي مذهل - نفس هم ذاتهم لو عاشوا نفس عيشة العيال المتحرشة ح يتصرفوا زيهم
مش بس لو اتربوا زيهم
لا
لو واحد فيهم وهو كبير كده ومتربي على الشبع والتعليم والاخلاق الحميدة لو فجأة لا قدر الله جار عليه الزمن واضطر يعيش عيشة الكلاب اللي الفقرا عايشينها ح يتصرف زي الكلاب عادي امال يتصرف ازاي يعني؟
ومعلش الكلام ده انا باقوله عن تجربة والحمد لله ان ربنا اداني فرصة اني في فترة صغيرة قوي قوي قوي من حياتي - يعني كام شهر يتعدوا على الصوابع - وكنت شحطة وكبيرة ومتعلمة تعليم كويس وامي تعبت في تربيتي لكن ربنا ابتلاني في فترة من حياتي بالجوع والعيشة الضنك وعشرة الخنازير الآدمية واوعى وشك بقى.....اتعلمت في سبع شهور اللي ما اتعلمتوش في حياتي كلها
وما اقدرش اقول اني كنت مضطرة اتصرف زيهم...بس اصلا ما كانش في مجال اني اتصرف بما اتعودت واتربيت عليه طول حياتي: ح اجيب مية منين للتنضيف والمية بتتقطع طول الوقت؟ ح اجيب سم فيران لمستودع الفيران ده كله بكام وانا مش معايا فلوس؟ صحيح كنت باوفر من فلوس اكلي عشان اجيب ديتول ومطهرات وكنت باقعد بالايام جعانة بس فلوس الاكل ح تجيب مطهرات بكام يعني؟ هو انا كان معايا آكل اصلا؟ ولما احب ابقى مؤدبة وما اشتمش وانا عايشة مع خنازير ادمية زي ما قلت طيب ح اعمل ايه في شتايمهم؟ طيب لو ما ردتش عليهم كانوا بيفتكروني باحتقرهم وبيشتموا اكتر ويستخدموا العنف المسلح...ولما كنت باقول: لو سمحتوا مافيش داعي للشتيمة كانوا بيفتكروني باتريق عليهم عشان باقول لو سمحت! ماهو لازم مضطر تقول: يا ابن الوسخة يا كذا يا كذا يا ابن الكذا اخرس بقى....مافيش لغة تانية بتتفهم، ماهو انا حصيلة الشتايم بتاعتي الحمد لله كنت اخدتها في الكورس ده برضه، ونقدر نقول ان ده كورس مخفف لان كان فيه حنفية مية، بتتقطع احيان وبتنزل مية احيانا، وكان عندي شغل، صحيح فلوسي كانت بتتقلب اول باول كأني نايمة في محطة مصر، لكن كنت باقدر اخبي عشرين جنيه على جنب، وكان عندي كهربا، صحيح ملمسة وبتتقطع بس اهي بتنور، واخيرا ده كورس عمره سبع شهور بس، يعني ربنا اداني دواقة صغيرة من احوال ناس اوحش من كده بكتيييييييييييييير وفوق الوصف والتخيل عشان يعرفني ان مافيش حد متربي ومافيش حد مش متربي، فيه حد عايش انسان وعشان كده بيتصرف زي الانسان، وفيه حد فرض عليه يعيش زي الحيوان وعشان كده بيتصرف زي الحيوان، الموضوع لا له علاقة بالتعليم ولا التربية ولا الاخلاق، على فكرة بقى ولا حتى الدين، الانسان كرامة ولما كرامة الانسان تنتهك يبقى انت ح تكلمه عن الدين ازاي؟
يعني ارجو من السادة المؤدبين بتوع مصر الجديدة - مع احترامي الشديد لهم وتقديري البالغ لحضرتك اللي ما بين كل حضرتك وحضرتك - انهم ما يحكموش على الشعب المصري بانه: قليل الادب وقذر وحقير وووووو وكل كلامهم الخرا الحقير فعلا ده
عشان سعادتك يا حضرة المؤدب - ويا حضرة خالد يوسف الله يكرمك يا باش مهندس - بنفسك وبشهادتك وتربيتك لو عشت عيشتهم ح تتصرف زيهم مش عشان انت مش متربي بس عشان مافيش فرصة لانك تتصرف اي تصرف تاني...يعني زي ما ارميك في البحر واقول لك اوعى تعوم العوم عيب امشي على رجليك!
ايه اللي حصل في هي فوضى؟ ح نبقى نتكلم في الحلقة القادمة

Friday 21 December 2007

,وقع على رسالة إلى النيابة العامة

رسالة إلى النيابة العامة من تجمع "مصريون ضد التعذيب"
لن نتنازل.. لن نتصالح
افتحوا الملفات.. حاكموا جلادي التعذيب
إننا نحن المصريين والمصريات وقد هالنا تفشي ظاهرة التعذيب في أقسام الشرطة ومقار أمن الدولة وكافة مكاتب الأمن بجميع أشكالها ونحن نشهد ارتفاع أعداد ضحايا التعذيب الذين تزهق أرواحهم وتمتهن كرامتهم على يد رجال الداخلية المصرية بسبب انتهاجها التعذيب سياسة ومنهج في التعامل مع المواطنين.. ولأن التعذيب هو وبحق جريمة ضد الإنسانية تسعى إلى أن تقتل الإنسان بداخل الضحية.. وأن تزرع الخوف والانكسار في قلوب الضحايا وأهالهم وأصدقاءهم وجيرانهم.. ولأنه جريمة لا تسقط بالتقادم.. ولأننا نؤمن بأن ملاحقة جلادي التعذيب هو حق لكل أفراد المجتمع وليس للضحية فقط.. فإننا نعلن أننا جميعا أصحاب ذلك الحق وأننا سوف نمارسه وسوف نسعى بكل السبل السلمية إلى ملاحقة الجلادين ومثولهم أمام العدالة
وحيث أن النيابة العامة هي بحكم القانون المسئولة عن الحفاظ على حق المجتمع وكرامته المتمثلة في حق وكرامة مواطنيه.. فإننا نطالبها بأن تلتزم بدورها كممثل لهذا المجتمع ومدافعا عن حقوقه.. وأن تفتح ملفات التعذيب المغلقة وأن تحقق فيما نسب إلى الجلادين من جرائم وأن تسعى إلى تطبيق العدالة وملاحقة الجناة، وإحالتهم إلى المحاكمة..
للتوقيع على العريضة.. ارسل رد على هذه الرسالة.. يحتوي: الاسم والصفة.. وإن أمكن البريد الاليكتروني ورقم التليفون
----

ممكن توقعوا هنا في التعليقات وابعتها انا لجيهان
وممكن تبعتوا توقيعاتكوا على الميل بالتفاصيل
gehan.shaaban@gmail.com

Thursday 20 December 2007

بقية احداث إسنا

وده إيه ده كمان لا والمصري اليوم مخططة تحت النقطة الهامة في الخبر ومكبراها
معناتو ايه بقى الكلام الماصخ ده؟ هو فيه ايه يعني ايه اللي بيحصل
ومش عايزة تخمينات والنبي عشان احنا زهقنا من التخمينات انا نفسي مش عارفة ايه الحكاية
ما طول عمرنا عايشين يعني ومش من المعتاد ان المسيحيين بيكرهوا المسلمين والمسلمين بيكرهوا المسيحيين زي ما مينا امبارح كان بيقول لي
الكلام ده مش صحيح مش طول عمرنا بنكره بعض وما ينفعش نسحب اللي بنشوفه دلوقت نسحبه على اللي فات ونقول طول عمرنا كده
لا مش طول عمرنا لما واحد مسلم يتخانق مع واحد مسيحي تقوم الكنيسة تنضرب والمسيحيين يترنوا علقة وتتحرق محالهم
والنبي اللي بيلعب في البلد دي يسيبها في حالها الضرب في الميت حرام
ده بالنوسبة للسطر اللي المصري اليوم مخططة تحته....ابعدوا عنا بقى الله لا يسيئكوا
اما بالنوسبة للانبا بيمن
حضرته بيقول الاشتباكات اللي حصلت بين المسلمين والمسيحيين!!!!! هو فيه اشتباكات؟
هي فين الاشتباكات يا سيد؟ فين الاشتباكات؟ في الاشتباكات؟
انا اللي فهمته من الاحداث ان فيه ناس ضربت وناس انضربت
دي حاجة تانية غير اشتباكات، الاشتباكات بيبقى الطرفين بيضربوا بعض لكن اللي حصل ان فيه طرف ضرب وطرف انضرب وطرف تالت مشكوك فيه من الطرفين الاولانيين وبيعملوا تصرفات مريبة وبيتردد ان معاه سلاح
معناتو ايه الكلام ده
ومين الخسران في ده كله؟
ثم برضه مع احترامي للانبا بيمن اللي ادان تصرف واحد قال لواحدة شيلي النقاب وقال دي مش من اخلاق المسيحية
طيب على فكرة كتير قوي بيقولوا للمنقبات شيلوا النقاب عشان نعرف انتوا مين وهو كان شاكك انها حرامية
غلطان وللا مش غلطان ده تصرف عادة بتكون نتيجته الطبيعية والمنطقية ان المحال تتحرق والكنيسة تتضرب وتتكسر؟
ماهو ما ينفعش التلييس كده ياخوانا
اذا كان فيه فئة مسلحة صحيح واهل المدينة ابلغوا عنها يبقى لازم نتكلم بوضوح
الكنيسة تم الاعتداء عليها والمسيحين انضربوا ما اشتبكوش
مين اللي عمل كده ومين اللي ورا ده لازم نشوف ونبحث كويس
لكن نظام لو اتخانقتوا ح اذنبكوا انتوا الاتنين بيدي فرصة لايدي خفية تتلاعب في الشئون الداخلية

هدية العيد

الفيديو من عند وائل عباس
هدية العيد
http://www.youtube.com/watch?v=Qe0f4gyfjBE


Wednesday 19 December 2007

عارفين ليه ما قلتش كل سنة وانتوا طيبين؟

عشان ده
وبرضه لسة ما قلتش ادبي ولا ردحت عشان ده
انا مؤدبة اهو...لسة مؤدبة لحد دلوقت اما نشوف ايه اللي ح يحصل
بس عندي سؤال لو تسمحوا....لو الاعتداءات دي كانت على السفارة الامريكاني مثلا
كان التحرك ح يبقى بالبطئ ده؟
ح نقول معلش ناس بتعيد وح نشوف ونستنى ح يعملوا ايه في الجناة الحقيقيين
لكن قسما عظما لو تم اجبار الضحايا واهاليهم على التنازل عن المحاضر لاطلع ميتين ابو التخين ولا ح يهمني بقى
لا مركز ولا منصب لا سياسي ولا امني ولا حتى ديني
سامعيني بقى ولا حتى ديني

Tuesday 18 December 2007

للأخوة اللي قطعوا وشي عشان العلم لا يكيل بالبتنجان

وقلت ان مش صحيح ان العلم موضوعي ولا حاجة ومافيش حاجة اصلا اسمها موضوعية من الاساس وكل عالم بيعمل بحث وبيدعي فيه انه بيتحرى الموضوعية وبيرمي وراه كل خلفيته الثقافية والفكرية والدينية والاجتماعية كداب وان كل ده بيأثر عليه وهو بيعمل البحث بتاعه سواء كان واعي او غير واعي، والعلم بيغلط زي اي حاجة تانية بتغلط، مش لان الانسان غلاط ولا لان التجربة ممكن يكون ناقصها حاجة بس، ولكن لان معرفة العالم ده جه منين ومجتمعه هو ايه وايه المفاهيم اللي بتحكمه مهمة ولازم توضع في الحسبان لان التجربة بتطلع نتيجة لكن كيفية قراءة النتيجة بتعتمد على ذاتية العالم اللي بتتحكم فيها مفاهيم واهواء كتيرة. والعلم لا يكيل بالبتنجان وبكرة كل ده يترمي في الزبالة ويجي غيره زي ما اللي قبله اترمى في الزبالة وجه غيره، ومش بيجي غيره عشان العلماء بقوا اشطر، بس عشان مافهيمهم اتغيرت وطريقة قراءتهم للنتائج هي اللي اتغيرت. وعشان كده انا ضد فكرة الاعجاز العلمي للقرآن مش من نفس منظور الناس اللي بتعلي العلم على القرآن لا سمح الله، وخلينا نجيب من الآخر يعني العالم اللي بتقول لا القرآن ده كتاب موعظة انما العلم حاجة تانية هم أساسا شايفين ان القرآن ده تخريف والعلم هو اللي مصدر ثقة عشان ده بقى اللي مبني على حقائق وتجارب واستقراء للنتائج والكلام الخرا ده، والتانيين اللي عايزين يحشروا العلم في القرآن الحقيقة انهم مهزومين هزيمة نفسية قدام هيمنة العلم، اللي هو مجال انساني زي اي مجال، وانا شخصيا شايفاه زيه زي النجارة والحدادة والطبيخ، وسيلة انسانية الواحد ما يستغناش عنها لكن ماهواش مقدس زي ما انا شايفة ان كل الناس مقدساه كده.
طيب انا مش ح اكلم بتوع الاعجاز العلمي في القرآن عشان هم غلابة اصلا وصعبانين عليا، انا باكلم الاخوة اللي عاملين ان العلم ده هو الوسيلة الوحيدة لمعرفة الحقائق واي حاجة غير مبنية على اساس منهج علمي تبقى في الهجايص وتحتمل التأويل والعلم هو الفيصل في كل حاجة لان العلم موضوعي ولا يخضع للمصالح ولا الاهواء و"انا اصلي بافكر بامنهج علمي انما انت بتفكري بمنهج عاطفي"
طيب اسمع انت عشان بتحب الكلام ده....
ده
http://www.livescience.com/health/060908_brainy_men.html
بحث بيقول ان الرجالة اذكى من الستات واتبعوا في البحث المنهج العلمي اللي اكلتوا دماغنا بيه..اخدوا عينة من كل الاعمار وعملوا لهم اختبار آي كيو اللي هو اختبار ذكاء وقالوا ان النتيجة طلعت ان الرجالة اذكى من الستات.
(ماشي يا بتوع الاعلان العالمي لحروق اللسان؟)
طيب بلاش ده...ايه رأي حضرتك انك في نظر العلم غبي
اهو بحث علمي
http://news.independent.co.uk/sci_tech/article3067222.ece
اتبع نفس المنهج العلمي من اخذ عينة عشوائية من كل الاعمار وعمل تجربة بانه اجرى لهم اختبار ذكاء وفحص للحامض النووي بتاعهم ومن استقراء النتائج ثبت ان البيض اذكى ناس في الدنيا وكل الملونين: اماثلك وامثالي اغبى ناس في الدنيا، خاصة الافارقة، يعني لابسانا لابسانا.
وبعيدا عن اني ست وافريقية وملونة (او بنية زي ما بيسمونا) مش ممكن اصدق ابدا، مهما كان شكي في قدراتي العقلية (واللي بالمناسبة شك كبير قوي)، ان جورج بوش، عشان ابيض وراجل، ممكن يبقى اذكى مني والا انتحر احسن.
بذمة النبي، اي نبي، موسى نبي عيسى نبي محمد نبي، بذمتهم جميعا ده كلام يدخل عقل عيل صغير بيريل على البافتة؟
هل حد في الدنيا يقدر يقول العلم لا يكيل بالبتنجان والعلم منزه عن الاهواء الشخصية وعن الذاتية والعالم في اقصى الصين بيبحث بنفس الموضوعية اللي بيبحث بيها العالم في امريكا الشمالية واللي بيجمعهم الموضوعية والتحرر الفكري من اي موروث ثقافي وفكري؟
اللي ح يقول كده ح ادب صوابعي الاتنين في عينيه
زي ما طبيخ الهنود مليان شطة وطبيخ المصريين مليان توم - وحش قوي التوم بالليل - وطبيخ الخواجات مسلوق
كذلك العلم
مششششش ممكن باي حال من الاحوال اصدق ان عالم اوروبي ابيض ملحد ح يطلع نفس النتيجة اللي ح يوصلها عالم اوروبي ابيض مسيحي وعالم تاني اوروبي ابيض يهودي وعالم تالت عربي ملون مسلم وعالم رابع عربي ملون مسيحي لما يحلفوا لي على المية تجمد
والله لو حلفتولي على كل المصاحف والتوراهات والاناجيل اللي انطبعت من اول اختراع الطابعة لحد النهاردة لا يمكن اصدق الكلام ده
ولا يمكن اصدق ان النتائج العلمية مصدر ثقة من غير ما ابحث في اصل العالم اللي انتج النظرية العلمية
بقى اساسا فكرة اختبار الذكاء دي ما تدخلش دماغي اصلا
مين اللي حط الاختبارات دي؟ وعلى اي اساس اتحطت؟ ومين اللي قال ان دي طريقة سليمة لقياس مستوى الذكاء؟ هو يعني ايه ذكاء اصلا؟ هو مين من الاصل اللي له الحق انه يحكم على بني ادم انه ذكي وللا غبي؟
انا شخصيا شايفة ان الذكاء والغباء مسألة ارادية بحتة الانسان هو اللي بيقرر ببعض السلوكيات انه يتصرف بغباء او ما يفهمش او يتصرف بغباء وممن نفس البني ادم الذكي مرة واحدة يقلب غبي لو سلوكه اتغير والعكس صحيح
من تجربتي الشخصية بالاقي ان الانسان لما بيستذكى روحه زيادة لدرجة انه يشوف كل الناس اغبيا او يستغبى روحه زيادة لدرجة معوقة بتكون النتيجة واحدة انه بيأتي بتصرفات واقوال غبية يا اما بسبب الاهمال والاستعلاء الناتج عن الثقة الزايدة او التعويق والارتباك الناتج عن عدم الثقة الزايدة.
وده رأيي مش مبني على أبحاث علمية وسخة...ورايي ده بيعبر عني ومش بافرضه على غيري وادي نفسي حق اني احكم على جنس كامل او نوع كامل انه غبي او ذكي
طيب احنا في مصر عندنا هنا - بسبب موروث اجتماعي - عقدة اسمها عقدة مجموع طيب دي حاجة فاهمينها وعارفين نحلها وبتكون نتيجتها ان من كتر ما اللي بيجيب مجموع كبير بيتهياله انه اذكي مخلوق على الارض وقبل ما يتكلم معاك يسألك انت جبت مجموع كام في الثانوية العامة بتكون النتيجة انه بيبقى اغبى واحد في الدنيا وبيتصرف تصرفات غبية لانه حاسس ان كل اللي حواليه اغبيا وهو بقى اللي جايب مجموع زي قصة السلحفاة والارنب ( ملحوظة: انا جايبة مجموع كبير في الثانوية العامة عشان ماحدش يفتكر اني باطلع عقدي بس على الناس ومن غير مذاكرة والله ووالله كمان مرة طول عمري باتصرف بغباء ووقعت نفسي وقعات غبية باضرب نفسي بالجزمة عليها لحد دلوقت) ومن خلال هذه التجربة الحية في حياتي عرفت ان مافيش معيار واحد للذكاء ومافيش حد يقدر يحكم على غيره هو غبي وللا ذكي.
باي حق بقى سي واتسون وللا الراجل التاني ده بقى مسك اختبار ذكاء معين حاطه ناس بني ادمين زينا زيهم وحكم على الستات والملونين انهم اغبيا وان اذكى ناس في الدنيا هو الذكر الابيض
- الذكر الابيض دي عاملة زي دكر البط -
وايش عرفنا ان الابحاث دي مش مدفوعة دفعا عشان تخلي العالم اكثر ذكورية وتخدم المصالح الامبريالية؟ زي ما ايش عرفنا ان الابحاث الطبية مش معمولة مخصوص عشان تخدم مصالح شركات الادوية العالمية؟ وايش عرفنا ان الكمبيوتر ده ما اخترعهوش عشان القوى الامبريالية تحكم سيطرتها على العالم وتتبع الناس نفر نفر؟
وايش عرفنا ان الابحاث الجيولجية ما اتعملتش بطريقة تطلع نتيجة تخدم فكر معين؟

المفروض او اللي بيتقال ان الابحاث العلمية اصلا بتبقى مبنية على الشك ثم التجربة ثم استقراء النتاج ثم وضع كذا افتراض لتفسير النتائج دي والبدء في استبعاد النتيجة الاقل احتمالا ثم الاكثر فالاكثر لحد ما يوصل لنتيجة هي الاقرب احتمالا انها تكون التفسير الصحيح صح؟
ايش عرفك؟ عرفت منين يعني نطيت في مخ العلماء وعرفت شاكين وللا فيه حاجة في دماغهم معينة عايزين يثبتوها وبيتلاعبوا بالابحاث العلمية زي ما الانسان يقدر يتلاعب باي حاجة؟
طيب ما الانسان بيتلاعب بالقانون المحلي والدولي
وبيتلاعب بالدين
وبيتلاعب حتى بالكتب المقدسة اللي نازلة من عند ربنا ويأولها على هواه
يبقى ايش عرفك انه ما بيعملش كده في العلم
ايش عرفك انه ما عملش حاجة دقيقة جدا في اثناء التجربة عشان يطلع النتيجة اللي هو عايزها او اللي مدفوع انه يعوزها؟
ايش عرفك انه ما استبعدش القراءة الاصح للنتيجة وفضل عليها قراءة تانية تخدم مصالح معينة؟
طيب فيه بحث تاني بيقول ان الستات اذكى من الرجالة...مين قال لك ان اللي عملوا البحث ده مش مدفوع لهم فلوس من المنظمات النسائية العالمية عشان يطلع النتيجة دي؟ بلاش يبقى مدفوع له....متعاطف مع الظلم اللي واقع على الستات وعايز يثبت انهم اذكى
فيه باحث تاني اهو
http://gladwell.typepad.com/gladwellcom/2007/12/race-and-iq.html
بيقول ان الاعراق مالهاش دخل بمستوى الذكاء وان الذكاء له علاقة بالظروف الاجتماعية والبيئة وبيزيد ويقل على حسب المتغيرات
وحاطط لينك في الاخر لبحث علمي برضه اتبع نفس الاسلوب اللي اتبعه الباحث العنصري عشان يثبت ان الفقرا مثلا بسبب سوء التغذية والضغط النفسي وسوء احوال المعيشة وقلة التعليم بيبقوا مستوى ذكاءهم اقل بصرف النظر عن العنصر
ومين قال له كده بقى؟ انا كل الفقرا اللي شفتهم في حياتي يودوك البحر ويرجعوك عطشان
ايه سر الابحاث دي؟ وليه طرح السؤال ده بتاع مين اذكى من مين؟
عشان هم فعلا عبدة العلم، هم لما بيتكلموا عن الذكاء بيتكلموا عن الذكاء الاكاديمي
عمرك حليت اختبار ذكاء؟ كل اختبارات الذكاء بتنصب على حل مسائل رياضية وهندسية وقدرات لغوية واستنتاجات منطقية وقوة ملاحظة
طيب فيه واحد يبقى نبيه وشاطر ولهلوبة وما دخلش مدارس ولو اديته مسألة من المسائل دي مش ح يعرف يحلها
كده بقى غبي؟ طيب هو ممكن يديلك مشكلة من المشاكل الحدادة مثلا اللي هو بيعرف يحلها عشان دي شغلته وانت تحتاس فيها وانت باشمهندز قد الدنيا
يبقى مين فيكوا اللي غبي؟
فيه حاجة تانية الاخ واتسون العنصري ما اخدش باله منها
اختلاف مناهج التعليم في دول العالم: مش كل الناس بتتعلم بنفس المنهج ولا كل المدارس بتدرس نفس المواد بنفس الطريقة
لما تدي لواحد نرويجي عنده اربعتاشر سنة مسألة حسابية اخدها في المدرسة ح يعرف يحلها
لما يجي واحد مثلا من الصين وعنده اربعتاشر سنة وتديله نفس المسألة مش ح يعرف يحلها بس يعرف يحل غيرها وغيرها دي الواد النرويجي ما يعرفش يحلها صح؟
لما تجيب مواطن مكسيكي عايش وسط صالات القمار وقرفان في حياته وعيشته كلها وتعمل له اختبار ونفس الاختبار تطبقه على واحد امريكي ابيض عايش في طبقة متوسطة وتخرج بنتيجة ان الامريكي الابيض اذكى يبقى انت اللي غبي مش المكسيكي
ايه سر كل ده وليه ابحاث في مدى ذكاء الستات والرجالة والاعراق والاجناس
واتسن جابها من الاخر قال: بنطالب لهم بحقوق متساوية بينما الحقيقة انهم مش زينا هم اقل.
وفكرة هم اقل يبقى يستاهلوا حقوق اقل دي يمكن احنا ما نفهمهاش لكن هي مفهومة قوي في التراث الغربي من اول اليوتوبيا بتاعة افلاطون مرورا بيوتوبيا مور وفلسفة نيتشه ونظرية داروين اللي بيصبوا كلهم في مدام انت اقل محتاج فرص كتيرة ليه؟ ما انت غبي اصلا مش ح تعرف تستغل الفرص دي؟ انا اولى منك عشان انا اذكى وح اعرف استغل الفرص احسن وانت تسمع كلامي وتمشي ورايا عشان انت غبي وح تضر بمصلحتك لكن انا اذكى وعارف فين مصلحتك....مش هو الفكر الامبريالي من الاساس مبني على كده؟
the white man's burden
عبء الرجل الابيض القوي الذكي النبيه الانسان الطيب بالفطرة انه يقود الاجناس الاقل نحو سعادتها وهنائها وتحضرها
وييجي واحد يقول لي الشعب حاجة والحكومة حاجة تانية؟ طيب هم العلماء اللي بيطلعوا النتائج دي من الشعب وللا من عند امي؟ حتى لو مدفوعين...مش هم اللي بيشكلوا وجدان ومفاهيم شعوب بتقدس العلم كأنه ربنا وفوق ربنا كمان؟
معنى كلامي اننا نسيب العلم وندروش؟
انا ما قلتش كده...لما اقول نسيب العلم زي ما اقول نسيب الطبيخ وناكل الاكل ني
بس زي ما كل الناس بتطبخ طبيخها في بيتها
احنا كمان من حقنا نعمل ابحاثنا العلمية في بيتنا من بيئتنا ومن تربتنا ومن خلفيتنا ومش ممكن كل ما يشخوا في ودانا نصدقهم
طيب على الاقل الناس اللي مغرمة بالعلم دي ما يفكروا بمنهج علمي شوية....ما تحاول تشك شوية يا عمي مش كل ما تسمع عن نظرية علمية تتكلم عنها على اساس ان خلاص مافيش بعدها كلام زي واحد صاحبي انت ما تعرفوش بيقول لي: انت بتتناقشي في ايه - مع العلم اني ما اتناقشتش ولا حاجة ده هو طلع في وشي كده من غير سبب - العلم خلاص اثبت نظرية النشوء والتطور كل الابحاث والحفريات وتحاليل الحامض النووي بتقول كده...خلاص العلم حسم الموضوع
والله لا كنت فتحت بقي في موضوع النشوء والتطور دي قبل كده ولا فتحته بعد كده وانا شخصيا ما عنديش مانع تطلع صح او غلط
انا عندي مانع انك تتكلم عن العلم بوصفه القول الفصل وانه ما بيغلطش ده بيتطور يعني ازاي بتحب العلم وانت مش بتفكر باسلوب علمي
مش كل بحث يطلع نصدقه كده على طول...ما هو مش كل خبر بتقرا بتصدقه، مش كل حاجة تسمعها تصدقها، انت اللي بتقرر تصدق ايه وما تصدقش ايه. اشمعنى الابحاث العلمية بتصدقها غميضي كده على طول؟ مش العلم مبني على اساس الشك؟ ما تبقى عالم كده وتشك اذن انت دبوس
والتصديق برضه مالوش علاقة بالاسباب الموضوعية والدلائل المنطقية، ده له علاقة برغبتك الشخصية، سواء كنت عارف وللا مش عارف، انت بتنقي انت عايز تصدق ايه لان المنطق برضه وسيلة، وعلى رأي السفوسطائيين انا اقدر اطرح وجهة نظر وادلل عليها بالمنطق لحد ما تقتنع بيها وتبصم بالعشرة انها صحيحة وبعدها اقول وجهة النظر اللي عكسها على طول وادلل عليها بالمنطق والحجة لحد ما ترمي نفسك من الشباك وتبقى مش عارف الصح فين والغلط فين
حتى في العلم الابحاث بتناقض بعضها وكلها معتمدة على الشك والتجربة والاستقراء
واستفت قلبك دي مش في الدين بس دي في كل حاجة في الدنيا دماغك هي ريسك
وانا بقى ماديش عقلي لغيري ابدااااااااااااااااااااااااااا
ولا لاينشتاين نفسه

مقتل طالب مثالي على يد إنجليز بيض


ده احمد حسن..الطالب المثالي والابن النموذجي في مدرسة هيكموندويك في بريطانيا
الطالب ده اتقتل من غير اسباب واضحة وهو واقف في محطة القطر من مجموعة شباب بيض بيقولوا عليهم سكرانين
الشرطة جريت وراهم وما عرفتش تقبض غير على واحد بس من المشتبه فيهم
واحد من المدرسين بتوعه في المدرسة بيقول: لو دنيا كلها ناس زي احمد حسن كان العالم بقى مكان افضل بكتير
كان متفوق في الاقتصاد والقانون والهندسة والرياضيات عنده 17 سنة وكان بيدرس السنة دي عشان السنة الجاية يدخل كلية القانون
كان واقف مستني صحابه على محطة القطر عشان يحتفلوا مع بعض بعيد الاضحى
فيه ناس كتير بترجح انها جريمة عنصرية ومن ضمنهم التايمز نفسه
اهل الشهيد حالتهم النفسية محطمة تماما...بس انا مش فاهمة حاجة واحدة بس: مش المفروض ان القطارات دي بعد احداث الارهاب بقت مؤمنة على اعلى مستوى واتملت عناصر شرطة عشان تحمي المواطنين؟ امال ازاي يعني الشرطة ما عرفتش تجري ورا خمس عيال سكرانين؟ وحتى اللي قبضت عليه قالت مشتبه فيه...يعني مش متأكدين انه واحد من العيال القتلة!!!!!!! امال يعني كل اللي بيروح لندن دلوقت بيقول لي دي محطات القطارات بقت ثكنات عسكرية عشان احداث الارهاب الاخير...يعني العيال لو جريت من الشمال المفروض انهم يلاقوا قوات امن مستنياهم من اليمين..وللا القوات دي بس موجودة عشان تشتبه في الملونين وتقبض عليهم بالنوايا؟

Monday 17 December 2007

عاجل إلى مصريين ضد التعذيب

الرسالة دي وصلتني من وائل عباس بيهيب بمصريين ضد التعذيب أن تتخذ اللازم
اليكم الرسالة:

بلاغ إلى وزير الداخلية
من للضعفاء يا عادلى؟
تحقيق/ ميادة مدحت
mmedhat24@hotmail. com

سيدى الوزير إن البلاغ الماثل بين أيديكم هو أكبر من مجرد قضية تعذيب، إنها قضية مجتمع غابت عنه قيم العدالة الاجتماعية وانتهكت فيه حقوق الإنسان.. إنها قضية رانيا العبد الممرضة البسيطة التى كانت تعمل عند أحد الأطباء يوميا من التاسعة صباحا حتى منتصف الليل ثم تستقل القطار من كفر الشيخ الى قريتها " سيدى غازى" لتصل منزلها فى الواحدة صباحا، كل هذا الشقاء فى مقابل 150 جنيه شهريا.. ولا عجب إن استعبد ذلك الطبيب تلك الفتاة وتعامل معها كجارية مكلفة بخدمته وتلبية أوامره مهما كانت تلك الأوامر مهينة لآدميتها وكرامتها. وعندما ثارت رانيا لحريتها وأمهلته شهرا لإيجاد ممرضة غيرها طبقوا عليها قانون العبد الآبق.. وأخذها الباشا الضابط ابن الدكتور "سيد الوسية" إلى قسم كفر الشيخ علقوها كالشاه وصعقوها بالكهرباء وأهانوها بالأب و الأم. وقد التقيتها لتقص على المأساة:
· ............ ......... ......... ......... ......... ......... ......... ......... ........؟ - اسمى رانيا أسامة العبد من سيدى غازى كنت أعمل ممرضة فى عيادة الدكتور / محمد الأشرف وهو طبيب أسنان فى كفر الشيخ كما أنه بلدياتى ومن العائلة.. إلى أن تركت العمل فى 2003.
· ما الذى دفعك لترك العمل لدى الدكتور/ محمد الأشرف؟
- كنت أعود متأخرة كل ليلة ونحن بلد أرياف مما كان يعرضنى لمواقف سخيفة، كما أن العمل كان شاقا للغاية ونصف المرتب كان يضيع فى المواصلات كما أن الدكتور .. تتردد قليلا وتدمع عيناها ..
· هل تركت العمل بشكل مفاجئ ؟
- بالعكس لقد أبلغت الدكتور محمد قبل أن اترك العمل بشهر واستمررت حتى يجد ممرضة غيرى لكنه أخبرنى انه لا يريد سواى وفى آخر يوم من شهر 7 حدث ما حدث.
· ما الذى حدث يا رانيا ؟
- فى حوالى الساعة الثانية ظهرا يوم 30/7/2007 فوجئت بثلاثة ضباط واحد منهم هو احمد الأشرف ابن الدكتور/ محمد وقبضوا عليا واقتادونى إلى سيارة الشرطة تحت وابل من السباب البذيء والضرب وعندما سألتهم أنا عملت إيه أجابنى الضابط أحمد الأشرف أنى سرقت 8 آلاف من عيادة الدكتور
· هل كان الدكتور/ محمد يحتفظ بنقود فى عيادته؟
- لا .. العيادة كانت فى نفس العمارة التى بها شقته وفى نهاية كل يوم كان الدكتور يعطينى الحصيلة لأسلمها للمدام فوق وآخذ منها المفتاح فأعطيه للدكتور ليغلق العيادة وانصرف.
· إذن لم يكن معك مفتاح العيادة؟
- لا
· إلى أين أخذك الضباط؟
- أخذونى إلى البندر – قسم كفر الشيخ- واستجوبونى هناك
· يعنى فتحوا محضر؟
- لا.. لم يكن هناك دفتر ولا كتابة كان استجواب وبس وكانوا يريدون منى الاعتراف بسرقة 8 آلاف جنيه وعندما رفضت قالوا طب اعترفى أن واحد من أخواتك أخذهم وعندما بكيت وقلت أن هذا ظلم اصطحبونى إلى غرفة جانبية وانهالوا على ضربا وركلا و.. تصمت ثم تجهش بالبكاء
· فى اليوم الثانى اصطحبونى إلى غرفة تحت وهناك ربطونى فى كرسيين خشب وضربونى بعصا غليظة وبأيديهم وأرجلهم فى كل مكان فى جسمى حتى تورم جسدى كله ثم دخل أحمد الأشرف بجهاز أسود شبه الراديو به سلكان وصل واحد بأذني اليمنى والآخر باليسرى وقال لى اعترفى أن أخوك سرق وأنا أرحمك وعندما رفضت سرى التيار الكهربى فى جسدى وأفاقونى ليواصلوا التعذيب بالكهرباء لأكثر من ساعتين واستمر هذا العذاب لمدة يومين كاملين حتى اعترفت وبعدها فتحوا محضر وأخذوا أقوالى.
· عنى تسجيل أقوالك كان بعد التعذيب؟
- آه
· أين كان أهلك طيلة اليومين وكيف عرفوا بما حدث؟
- بعد أن انتهت وصلة التعذيب الأولى أخرجونى إلى غرفة جانبية مع مخبر وفى الطريق قابلت أحد بلدياتنا وهو الذى أخبر أهلى فجاءوا إلى القسم ورفض الضباط أن يدخلوهم أو حتى أن يدخلوا لى طعام.. حتى أن أحد المتواجدين بالقسم لقضاء مصلحة له صعب عليه حالى وحاول أن يدخل لى طعام ولكن المخبرين منعوه وقالوا:- لا دى متوصى عليها !
· متى ذهبتى الى النيابة؟
- فى اليوم الثالث رحت النيابة ووكيل النيابة شاف آثار التعذيب على وجهي وجسدى ولسانى كان متورما لدرجة أنني تكلمت معه بصعوبة شديدة و آلام فى فمى ولسانى وفكى وكان جسدى متورما وأزرق اللون. وقد فتح وكيل النيابة محضر آخر بواقعة التعذيب وعملها جناية تعذيب وأخلى سبيلى.
· إذن ذهبتى إلى منزلك فى اليوم الثالث بعد إخلاء سبيلك ؟
- لا
· ............ ......... ......... ......... ......... ......... .؟
- أخذنى الضباط مرة أخرى إلى البندر وبدأت وصلة تعذيب وتهديد جديدة حتى لا أغير أقوالى ثم تركونى وجاء آهلى وأخذوني إلى البلد وفى المساء رحت فى غيبوبة فاصطحبونى الى المستشفى وهناك حولونى إلى الطبيب الشرعى.
· أين تعملين الآن يا رانيا؟
- أنا لا اعمل من يوم الواقعة وكان لى أخت تعمل فى محل للأدوات الكهربية تركت عملها خوفا من أن يحدث لها ما حدث لى.. فإذا كان قريبنا عمل كده أمال الغريب هيعمل ايه؟
· رانيا هل هناك ضغوط عليك للتنازل عن القضية؟
- نعم الضباط الثلاثة حاولوا كتير مع أعمامى وأخوالى بالتهديد وبالفلوس
· كم كان أجرك يا رانيا؟
- 150 جنيه
· وما عدد ساعات العمل كل يوم؟
- كنت اعمل من الصباح إلى الثانية عشر منتصف الليل
· هل كان الضباط يعذبونك بأنفسهم أم اقتصر دورهم على إعطاء الأوامر؟
- لا كانوا يعذبونى بأيديهم
· هل انسحب أحدهم أثناء التعذيب .. هل اهتز أحدهم لصرخاتك وتوسلاتك؟
- بالعكس كانوا يضحكون كلما صرخت وكنت أشعر أنهم وحوش
· هل تعرفين أسماءهم؟
- طبعا.. محفورة فى ذاكرتى الملازم أول وقتها أحمد الأشرف ونقيب هيثم عبد العليم عكاشة ونقيب محمد هاشم
· رانيا.. عندما تشاهدين الآن رجل شرطة فى الشارع ما الذى تشعرين به؟
- أشعر بالرعب!!!!!!
إلى هنا انتهى حوارى مع رانيا العبد واسمح لى يا وزير العسس أن أضع خطا أحمر تحت كلمتها الأخيرة .. لقد صار رجالك يا وزير الأمن رموزا للرعب والفساد لقد صار حاميها حراميها ومعذبها وصاعقها بالكهرباء.
من للضعفاء يا وزير الداخلية؟ من للشرفاء يا عادلى؟ ومن هؤلاء الضباط حتى يعيثون فى الأرض فسادا بلا حساب ولا عقاب ؟ هل هم مراكز قوى فى الداخلية لكى يجاملهم المحامى العام بكفر الشيخ ويعدل تكييف القضية التى وصفها الرجل النزيه هشام العوجى وكيل نيابة كفر الشيخ الجزئية كجناية تعذيب طبقا للمادة 126 فقرة 1 من قانون العقوبات إلى جنحة استعمال قسوة يكتفى فيها بالجزاء الإداري والمحاكمة التأديبية؟ أين كان ضميرك أيها المحامى العام؟
ما سلطة هؤلاء الضباط على المحامى العام؟ وهل مارس زوج شقيقة المتهم الأول -وهو ضابط بأمن الدولة- ضغوطا على المحامى العام؟
إنني لا اتهم المحامى العام جزافا ولكنى أعرض رأى المكتب الفنى للنائب العام الذى أكد رأيه أن ما فعله المحامى العام إن هو إلا مجاملة مكشوفة للضباط، وهو أيضا رأى المستشار / مدحت العديسى رئيس محكمة بندر كفر الشيخ الذى حكم بعد اختصاص محكمة الجنح بنظر الواقعة ، باعتبارها جناية تعذيب طبقا للمادة 126 عقوبات.. هؤلاء الضباط أولاد مين فى مصر يا وزير الداخلية حتى يظلون من 2003 إلى الآن فى مواقعهم لم يمسسهم سوء حتى قرار إيقافهم 6 أشهر لم ينفذ منه يوم واحد.
للعلم .. رانيا ليست باحثة عن الشهرة أو عن تعويض حتى أنها كانت ترفض أن انشر اسمها أو صورتها ولولا الأستاذ أحمد عاشور نائب رئيس حزب الغد سابقا ومحامى الضحية لما كنت قد تمكنت من إجراء هذا التحقيق وقد أمدني الأستاذ أحمد مشكورا بكل مستندات القضية التى تسندنى فى مواجهة مافيا ضباط التعذيب..
سيدى الوزير تحت يدى تقرير الطبيب الشرعى الذى أكد رواية رانيا وتعرضها للضرب بالأيدي والعصى وكهربتها وتعليقها من اليدين والقدمين .. يا الله كيف تحملت المسكينة كل هذا العذاب ؟ إن رانيا لا تنام ولا تبتسم منذ 30/7/2003 تسيل دموعها فى صمت وتتوجه بدعائها إلى الله أن يقيض لها قاضيا يقض بالحق ليشف صدور قوم مؤمنين.
يا رانيا لا تخافى ولا تحزنى فإذا كانت الداخلية تحمى رجالها وان طغوا وبغوا فى الأرض الفساد فإن الآلاف معك وحولك يؤمنون بقضيتك ويألمون لألمك.. وان كان الجناة يحتمون بحبيب العادلى .. فكلنا حماة لمصر ولكرامة الإنسان المصرى ولو بأرواحنا .. ولقاؤنا فى 30/12/2007 وان غدا لناظره قريب.

تقبل تحياتى
ودمت مدفعا منطلقا فى صدور الاغبياء الذين استبدوا بمصر


ميادة مدحت
مذكرات مواطنة مصرية

مصريون ضد الفساد: يوسف باشا بطرس..تاااااانييييييي


يعني وقفت الناس في الشارع عشرة ايام وما حلتهاش غير لما رئيس الجمهورية قالك لم الموضوع وفوق البيعة باعت لهم رسالة تمن عليهم وتقول لهم: نحن أكرم مما تتخيلون!!!!!!!!! طيب يا عم أكرم الله يكرمك بس الفلوس دي مش بتاعتك...مش بتاعتك....مش بتاعتك...ما بتصرفش حاجة من جيبك عشان تقول للناس نحن اكرم مما تتخيلون...لا انت ولا حتى رئيس الجمهورية بيصرف للناس حاجة من جيبه دي فلوسنا حضرتك...خلاص؟
وبعدين تندار على بتوع المعاشات وعايز تقللها شوية وتلغي شوية وترمي الناس اللي خدمت بلدها سنين وسنين في الزبالة عشان سنهم عدى الستين...والله؟ يعني كل اللي يعدي الستين يترمي في الزبالة؟ بجد يعني؟ بجد؟ كلهم كلهم؟ يعععععععني كلهم؟ مهما كانت وظيفتهم ومكانتهم؟ وللا هم ناس وناس؟ وللا هم بس اللي خدموا ام البلد اللي مالهاش حبيب دي لازم تدفعهم التمن غالي واللي يمص دمها يتكافئ؟
ايه يا عم الكوتكوت فيه ايه؟ هي حكومتكوا دي ما بتشبعش ابدا؟ تحبوا دراعنا تاكلوه؟

الأستاذة القمر بثينة كامل عاملة حاجة اسمها مصريون ضد الفساد...بعتت لي سي دي عليه ناس كتير ضد الفساد، صحيح اللي كسبت الجائزة كانت المهندسة اللي رفضت 2 مليون جنيه، بس هي باعتة لي كل الافلام اللي عملتها مع المصريين اللي ضد الفساد واللي واقفين يطالبوا بحقهم ومن ضمنهم بتوع المعاشات. عاملين لجنة الدفاع عن المعاشات وحماية الحقوق التأمينية. وانا حملت الفيلم هنا.
هم تلاعبوا في الارقام وضموا التأمينات لوزارة المالية...طيب ازاي؟ ازاي التأمينات تنضم للمالية؟ والسكان انضمت للصحة والزبالة اضيفت على الكهربا وبعدين اكيد ح يضيفوا البترول على الداخلية والخارجية على الصناعة والتجارة والملوخية على الكنافة والتيتة في الننة والننة في التيتة وبابا اوبح
مش فاهمة ازاي يقللوا المعاشات ويضموها على المالية ويلغوا نظام التكافل...ده اللي بتشتغل خدامة في بيت مش بيهون على صحاب البيت يرموها لما تعجز وتكبر...ده لو كلب حراسة وكبر مش ح يهون عليك يا اخي
يا اخي
يا اخي
يا اخي
يا اخييييييييييي بقىىىىىىىىىى حرام عليك
رايح للبنك الدولي تاخد منه موافقة لتقليص المعاشات؟
طيب وانت لما تبقى على المعاش ح تعمل ايه؟ وللا الوزراء والرؤساء زي صباح ونبيلة عبيد كده بيحافظوا على شبابهم الدائم؟



Saturday 15 December 2007

بيان محمد حسين فضل الله بشأن أنواع العنف ضد المرأة



بقى أنا لما سمعت فتوى السيد محمد حسين فضل الله عن ان الست لو جوزها ضربها تضربه، قلت: طب ما آه...أمال إيه؟ أمال لأ؟ أمال طبعا. بس إذ بي أوفوجأ يا مواطن إن الناس بتقول: إيه ده إزاي بقى؟ بقى الست تضرب الراجل؟ تقول لهم: ماهو بيضربها...يقول لك: معلش...
معلش؟
معلش؟
معلش؟
والأغرب يا سيد إن بعض من علماء مصريين قالوا نفس الكلام...تقولهم ما هو بيضربها يقولوا لك: معلش
معلش؟
ماهو يا إما اللي بيقول معلش ده بيضرب مراته، وماعندوش بنات يتوجع عليهم...يا اما لو ست يبقى بتحب تنضرب ودي حلها في عيادة نفسية ما تفكش عقدها علينا
أنا أرفقت بيان محمد حسين فضل الله وأرجو من الجميع إنه يقراه كلمة كلمة:
اليي بالأخضر تعليقي
بيان شرعي بمناسبة اليوم العالمي لمناهضة العنف ضد المرأة، 27-11-2007م/ 17-11-1428هـ

في بيان شرعيّ دعا فيه للتصدّي لكل أنواع العنف الذي يستهدف المرأة
فضل الله: يجوز للمرأة الدفاع عن نفسها ضدّ عنف الرجل

أصدر سماحة العلامة المرجع، السيد محمد حسين فضل الله، بياناً شرعياً لمناسبة اليوم العالمي لمناهضة العنف ضد المرأة، جاء فيه:

بالرغم من كلّ التقدّم حيال النظرة الإنسانيّة للمرأة، والتكريم الذي حظيت به قياساً بما كانت عليه في أغلب المجتمعات الشرقيّة والغربيّة، وبالرغم من صعود المرأة في السلّم الاجتماعي والسياسي، حتّى تبوّأت أعلى المناصب، الحكوميّة وغيرها، وانخرطت في حركات النضال إلى جانب الرجل، وتفوّقت عليه أحياناً؛ إلا أنّ المرأة لا تزال تعاني من العنف الممارس ضدّها، والذي يأخذ أشكالاً متعدّدة، ولا يقتصر على دائرة دون أخرى، كما لا يأخذ هويّة شرقيّة بل نجده شاملاً في مستوى العالم، وإن كان قد يختلف شكل العنف وحجمه بين مكانٍ وآخر.

فلا تزال المرأة، سواء كانت أختاً أو بنتاً أو زوجة، عُرضةً لتسلّط الرجل عليها، سواء كان أخاً أو أباً أو زوجاً، ويأخذ العنف في ذلك أشكالاً متعدّدة.

فمن العنف الجسدي الذي تتعرّض فيه المرأة للضرب، وهذا ما يمثّل الرجل فيه أحطّ حالات الإنسانيّة؛ لأنّه يدلّ على فقدان الرجل للمنطق الذي يُمكن أن يفرضه على الآخر من موقع الالتزام والاقتناع؛ كما أنّه لا يدلّ على قوّة الرجل، بل على ضعفه؛ لأنّه «إنّما يحتاج إلى الظُلم الضعيف». حتّى يصل العنف ـ في هذا المجال ـ إلى أقصى مستوياته وأقساها عندما تتعرّض المرأة للاغتصاب الذي قد ينتهي بموتها.

إلى العنف الاجتماعي ضمن ما يُطلق عليه «جرائم الشرف»، الذي يكتفي فيه المجتمع القبلي أو العائليّ أو ما إلى ذلك، بالشبهة ليحكم على المرأة بالنفي أو بالإعدام، فضلاً عن أنّ المجتمع لا يملك حقّ تنفيذ الأحكام إلا من خلال القضاء وآليّاته المبيّنة من خلال الشرع الحنيف. أو العنف الاجتماعي الذي يفرض على المرأة الزواج من شخصٍ لا ترغب فيه، من خلال الذهنيّة العائليّة أو القبليّة أو غيرهما.

إلى العُنف النفسي الذي يهدّد فيه الزوج زوجته بالطلاق أو بغيره، أو عندما يتركها في زواجها كالمعلّقة، فلا تُعامل كزوجة، أو الذي يستخدم فيه الطلاق كعنصر ابتزازٍ لها في أكثر من جانبٍ، فتفقد بالتالي الاستقرار في زواجها، ممّا ينعكس ضرراً على نفسيّتها وتوازنها.

إلى العنف المعيشي الذي يمتنع فيه الزوج أو الأب من تحمّل مسؤوليّاته المادّية تجاه الزوجة والأسرة، فيحرم المرأة من حقوقها في العيش الكريم، أو عندما يضغط عليها لتتنازل عن مهرها الذي يمثّل ـ في المفهوم الإسلامي ـ هديّة رمزيّة عن المودّة والمحبّة الإنسانيّة، بعيداً عن الجانب التجاري. (الله هي الحكاية دي بتحصل في كل حتة وللا ايه؟)

إلى «العنف التربويّ» الذي تُمنع معه المرأة من حقّها في التعليم والترقّي في ميدان التخصّص العلمي، بما يرفع من مستواها الفكري والثقافي ويفتح لها آفاق التطوّر والتطوير في ميادين الحياة؛ فتبقى في دوّامة الجهل والتخلّف؛ ثمّ تحمّل مسؤوليّة الأخطاء التي تقع فيها نتيجة قلّة الخبرة والتجربة التي فرضها عليها العنف. (باقول الحكاية دي بتحصل في كل حتة وللا ايه؟

إلى العنف العملي الذي يُميّز بين أجر المرأة وأجر الرجل من دون حقّ، مع أنّ التساوي في العمل يقتضي التساوي في ما يترتّب عليه، علماً أنّ المجتمع بأسره قد يمارس هذا النوع من العنف عندما يسنّ قوانين العمل التي لا تراعي للمرأة أعباء الأمومة أو الحضانة أو ما إلى ذلك ممّا يختصّ بالمرأة، إضافةً إلى استغلال المدراء وأرباب العمل للموظّفات من خلال الضغط عليهنّ في أكثر من مجال.

إنّنا أمام ذلك، نؤكّد على جملة من الأمور:

أوّلاً: يشكّل الرفق منهجاً مركزيّاً في الإسلام، يكتسب الأولويّة على العنف الذي لا ينبغي أن يتحرّك إلا في حالاتٍ استثنائيّةٍ قد تقتضيها ضرورة التربية أو ردّ العدوان. قد جاء عن النبيّ محمّد(ص): «إنّ الرفق لم يوضع على شيء إلا زانه، ولا نزع من شيء إلا شانه»؛ وهذا المنهج عامٌّ لكلّ العلاقات الإنسانيّة، من دون فرقٍ بين رجلٍ وامرأة، أو صغيرٍ أو كبير.

ثانياً: إنّ قوامة الرجل على المرأة لا تعني سيادة الرجل عليها، بل تعني تحميل الرجل مسؤوليّة إدارة الأسرة التي لا بدّ أن لا يستبدّ بها، بل أن يتشارك مع الزوجة في كلّ الأمور المشتركة بينهما كزوجين.

ثالثاً: إنّ إقبال المرأة على العمل المنزلي والاضطلاع بأعبائه من خلال إنسانيّتها وعاطفتها وتضحيتها، في الوقت الذي لم يكلّفها الإسلام أيّاً من ذلك، حتّى فيما يختصّ بالحضانة وشؤونها، واحترم عملها حتّى افترض له أجراً مادّياً، لا بدّ أن يدفع الرجل إلى تقدير التضحية التي تبذلها المرأة في رعايته ورعاية الأسرة؛ فلا يدفعه ذلك إلى التعسّف والعنف في إدارة علاقته بها.

(سامعين يا بني ادمين ربنا ما كلفناش بشقى البيت والحضانة والا ما كانش فرض لنا عليه فلوس...هاتوا الفلوس اللي عليكوا)

رابعاً: لقد وضع الإسلام للعلاقة بين الرجل والمرأة في الحياة الزوجيّة والأسرة عموماً قاعدةً ثابتة، وهي قاعدة «المعروف»، فقال الله تعالى في القرآن الكريم: {وَعَاشِرُوهُنَّ بِالْمَعْرُوفِ}، وقال تعالى: {فإمساكٌ بمعروفٍ أو تسريح بإحسان}، حيث يُمكن أن تشكّل قاعدةً شرعيّةً يُمكن أن تنفتح على أكثر من حُكمٍ شرعيّ يُنهي الزواج إذا تحوّل ضدّ «المعروف».

خامساً: اعتبر الإسلام أنّ المرأة ـ في إطار الزواج ـ كائنٌ حقوقيّ مستقلّ عن الرجل من الناحية المادّية؛ فليس للرجل أن يستولي على أموالها الخاصّة، أو أن يتدخّل في تجارتها أو مصالحها التي لا تتعلّق به كزوج، أو لا تتعلّق بالأسرة التي يتحمّل مسؤوليّة إدارتها.

سادساً: إنّ الإسلام لم يبح للرجل أن يمارس أيّ عنفًٍ على المرأة، سواء في حقوقها الشرعية التي ينشأ الالتزام بها من خلال عقد الزواج، أو في إخراجها من المنزل، وحتّى في مثل السبّ والشتم والكلام القاسي السيّئ، ويمثّل ذلك خطيئةً يُحاسب الله عليها، ويُعاقب عليها القانون الإسلامي.(ايوة وده مش كلام الشيعة بس الامام احمد بن حنبل في كتاب فقه الائمة الاربعة قال اللي يضرب مراته لازم تجيب له ابوها واخوها يضربوه اذا القاضي ما حكملهاش بان حد يضربهولها بينما الائمة التلاتة التانيين قالوالتكليف بضرب الزوج كقصاص منه في ضرب الزوجة يكون من اختصاص القاضي بس حفاظا على اواصر النسب! طيب واذا هو ما حافظش على اواصر النسب وضرب بنتهم؟)

سابعاً: أمّا إذا مارس الرجل العنف الجسديّ ضدّ المرأة، ولم تستطع الدفاع عن نفسها إلا بأن تبادل عنفه بعنف مثله، فيجوز لها ذلك من باب الدفاع عن النفس. كما أنّه إذا مارس الرجل العنف الحقوقي ضدّها، بأن منعها بعض حقوقها الزوجيّة، كالنفقة أو الجنس، فلها أن تمنعه تلقائيّاً من الحقوق التي التزمت بها من خلال العقد.

ثامناً: يؤكّد الإسلام أنّه لا ولاية لأحد على المرأة إذا كانت بالغةً رشيدةً مستقلّة في إدارة شؤون نفسها، فليس لأحد أن يفرض عليها زوجاً لا تريده، والعقد من دون رضاها باطلٌ لا أثر له.

تاسعاً: في ظلّ اهتمامنا بالمحافظة على الأسرة، فإنّه ينبغي للتشريعات التي تنظّم عمل المرأة أن تلحظ المواءمة بين عملها، عندما تختاره، وبين أعبائها المتعلّقة بالأسرة، وإنّ أيّ إخلال بهذا الأمر قد يؤدّي إلى تفكّك الأسرة، ما يعني أن المجتمع يُمارس عنفاً مضاعفاً تجاه تركيبته الاجتماعية ونسقه القيمي.

عاشراً: لقد أكّد الإسلام على موقع المرأة إلى جانب الرجل في الإنسانيّة والعقل والمسؤوليّة ونتائجها، وأسّس الحياة الزوجيّة على أساسٍ من المودّة والرحمة، ممّا يمنح الأسرة بُعداً إنسانيّاً يتفاعل فيه أفرادها بعيداً عن المفردات الحقوقيّة القانونيّة التي تعيش الجمود والجفاف الروحي والعاطفي؛ وهذا ما يمنح الغنى الروحي والتوازن النفسي والرقيّ الثقافي والفكري للإنسان كلّه، رجلاً كان أو امرأة، فرداً كان أو مجتمعاً.

مكتب سماحة آية الله العظمى السيد محمد حسين فضل الله

التاريخ: 17 ذو القعدة 1428هـ الموافق: 27 / 11 / 2007م

=====
خلص البيان
ينصر دينك يا شيخ ايوة كده اخيرا حد نطق
واللي يتمهمز بقى وما يعجبوش الكلام ده...على الله بقى بنته تنضرب من جوزها ونشوف ح يعمل ايه ساعتها