سبت تعليق لمالك اقول لك اني عايزة اروح السينما في مصر الجديدة ينفع وللا بلاش...تقريبا كان ح يشتمني بس تمالك اعصابه وقال لي باقول لك وسط البلد تقولي لي مصر الجديدة؟ المهم رحت سينما فندق السلام والدنيا كانت نسبيا زحمة بس من برة شكلها كده
مش عشان مافيش زحمة لا سمح الله...بالعكس بس السينما كومبليه كل الحفلات...بس فيه طابور ولما تقول لواحد لوسمحت انت اخترقت الطابور وشه يحمر ويرجع ورا او وواحد تاني قال: انا اسف يا فندم بس فعلا ده دوري وانا كنت واقف ورا الاستاذ ورحت اسأل اللي معايا على حاجة وعموما اتفضلي حضرتك...- لا خلاص...اتفضل
- والله بجد اتفضلي حضرتك...
طبعا مواعيد السينمات في مصر الجديدة زي مواعيدها في شبرا يعني بيتأخروا عادي وعشان كده الناس اتكدست قدام الباب بتاع الصالات
كده
ومع ان الناس كانت متكومة قدام الباب لانهم خايفين يتأخروا خصوصا ان الشباب اللي واقفين على الباب قعدوا نص ساعة يقولوا ان فاضل خمس دقايق ويدخلوا الا ان اول ما فتحوا الباب عشان الحفلة اللي قبلنا تخرج الناس تلقائيا تنحت جانبا عشان تدي فرصة للي خارج ووقفوا صفين على الجنب يعني مافيش حد لبس في وش حد اللي جوة خرجوا بمنتهى الادب وهم مبتسمين للي مستنينهم برة واللي مستنينهم برة واقفين على جنب بمنتهى الادب وبيبتسموا للي خارجين وبيسألوهم عن رأيهم في الفيلم كده
وده بقى مش عايزة اقول ان مافيش تحرش، لان الفكرة اصلا ما كانتش مطروحة مع ان كان فيه شباب وبيشتموا بالفاظ من اللي هي بس مع بعض وبصوت واطي..ماحدش سمعهم غيري لاني بصراحة كنت باتصنت على الناس، مش بس كده: لو طفل عنده عشر سنين خبط فيكي يا انسة او يا مدام يقول لك بمنتهى المنتهى: انا اسف قوي...
يعني يا اختشي عشان تحافظي على كرامتك وشرفك وهدومك عليكي ومناخيرك طبعا وجهازك التنفسي لازم يبقى معاكي عشرين جنيه تمن التذكرة بتاعة سينما مصر الجديدة.
لكن ده معناتو ايه الحديت ده....
والله اللي انا شايفاه ان الحديت ده معناتو ان المصريين هم المصريين، بل البني ادمين هم البني ادمين، لما يعيشوا عيشة بني ادمين، يعني يلاقوا ياكلوا ويشتغلوا ويتفسحوا ويعيشوا زي الانسان ما مفروض يعيش، بيبقوا مؤدبين ومحترمين ومنظمين حتى لو ادارة المكان اللي هم فيه مش منظمة قوي، ولما بيتعاملوا زي الحيوانات ويعيشوا عيشة حيوانات لازم ح يتصرفوا زي الهمج
يعني مش صحيح ان المصريين شعب قذر بالسليقة ولا منحط خلقة ربنا، يعني اللي في مصر الجديدة دول مش مصريين؟ وماهماش مليونرات ولا حاجة ناس مستورة عايشة زي ما اي بني ادم المفروض يعيش، انا اخترت مصر الجديدة مش بس عشان استقرب، بس عشان كمان الناس اللي في مصر الجديدة دول مش اثرياء ولا معاهم ملايين وكمان عشان مصر الجديدة بتمثل المصريين بس يعني مش زي مدينة نصر والمهندسين اللي بيبقى عندهم عرب كتير.
وده مالوش علاقة بالتحليل الطبقي النخبوي اللي الاستاذ خالد يوسف هرا امنا بيه في فيلم خيانة مشروعة، ثم اخيرا في فيلم هي فوضى اللي رحت حضرته في السينما اياها ومن كتر ما هو وحش شفت بعده جوبا وحسيت ان فيلم جوبا ده حلو ماله يعني...فيلم بني ادم خلقة ربنا
مش بس كده ده انا لما رجعت شفت في التلفزيون فيلم الغواص وحسيت انه حلو كمان ومش بعيد اعيد نظر في فيلم بحبك وانا كمان واشوف انه حلو....من كتر ما فيلم هي فوضى خرا افلام الدنيا كلها احلوت في عنيا.
ح نتكلم عن الفيلم بعدين بس بالنوسبة للطبقية والنخبوية اللي واكلة افلام خالد يوسف فاحب اوضح حاجة
نفس هم ذات الناس المؤدبة اللي شفتهم في سينما مصر الجديدة - والحقيقة كانوا ناس مؤدبين ادب جماعي مذهل - نفس هم ذاتهم لو عاشوا نفس عيشة العيال المتحرشة ح يتصرفوا زيهم
مش بس لو اتربوا زيهم
لا
لو واحد فيهم وهو كبير كده ومتربي على الشبع والتعليم والاخلاق الحميدة لو فجأة لا قدر الله جار عليه الزمن واضطر يعيش عيشة الكلاب اللي الفقرا عايشينها ح يتصرف زي الكلاب عادي امال يتصرف ازاي يعني؟
ومعلش الكلام ده انا باقوله عن تجربة والحمد لله ان ربنا اداني فرصة اني في فترة صغيرة قوي قوي قوي من حياتي - يعني كام شهر يتعدوا على الصوابع - وكنت شحطة وكبيرة ومتعلمة تعليم كويس وامي تعبت في تربيتي لكن ربنا ابتلاني في فترة من حياتي بالجوع والعيشة الضنك وعشرة الخنازير الآدمية واوعى وشك بقى.....اتعلمت في سبع شهور اللي ما اتعلمتوش في حياتي كلها
وما اقدرش اقول اني كنت مضطرة اتصرف زيهم...بس اصلا ما كانش في مجال اني اتصرف بما اتعودت واتربيت عليه طول حياتي: ح اجيب مية منين للتنضيف والمية بتتقطع طول الوقت؟ ح اجيب سم فيران لمستودع الفيران ده كله بكام وانا مش معايا فلوس؟ صحيح كنت باوفر من فلوس اكلي عشان اجيب ديتول ومطهرات وكنت باقعد بالايام جعانة بس فلوس الاكل ح تجيب مطهرات بكام يعني؟ هو انا كان معايا آكل اصلا؟ ولما احب ابقى مؤدبة وما اشتمش وانا عايشة مع خنازير ادمية زي ما قلت طيب ح اعمل ايه في شتايمهم؟ طيب لو ما ردتش عليهم كانوا بيفتكروني باحتقرهم وبيشتموا اكتر ويستخدموا العنف المسلح...ولما كنت باقول: لو سمحتوا مافيش داعي للشتيمة كانوا بيفتكروني باتريق عليهم عشان باقول لو سمحت! ماهو لازم مضطر تقول: يا ابن الوسخة يا كذا يا كذا يا ابن الكذا اخرس بقى....مافيش لغة تانية بتتفهم، ماهو انا حصيلة الشتايم بتاعتي الحمد لله كنت اخدتها في الكورس ده برضه، ونقدر نقول ان ده كورس مخفف لان كان فيه حنفية مية، بتتقطع احيان وبتنزل مية احيانا، وكان عندي شغل، صحيح فلوسي كانت بتتقلب اول باول كأني نايمة في محطة مصر، لكن كنت باقدر اخبي عشرين جنيه على جنب، وكان عندي كهربا، صحيح ملمسة وبتتقطع بس اهي بتنور، واخيرا ده كورس عمره سبع شهور بس، يعني ربنا اداني دواقة صغيرة من احوال ناس اوحش من كده بكتيييييييييييييير وفوق الوصف والتخيل عشان يعرفني ان مافيش حد متربي ومافيش حد مش متربي، فيه حد عايش انسان وعشان كده بيتصرف زي الانسان، وفيه حد فرض عليه يعيش زي الحيوان وعشان كده بيتصرف زي الحيوان، الموضوع لا له علاقة بالتعليم ولا التربية ولا الاخلاق، على فكرة بقى ولا حتى الدين، الانسان كرامة ولما كرامة الانسان تنتهك يبقى انت ح تكلمه عن الدين ازاي؟
يعني ارجو من السادة المؤدبين بتوع مصر الجديدة - مع احترامي الشديد لهم وتقديري البالغ لحضرتك اللي ما بين كل حضرتك وحضرتك - انهم ما يحكموش على الشعب المصري بانه: قليل الادب وقذر وحقير وووووو وكل كلامهم الخرا الحقير فعلا ده
عشان سعادتك يا حضرة المؤدب - ويا حضرة خالد يوسف الله يكرمك يا باش مهندس - بنفسك وبشهادتك وتربيتك لو عشت عيشتهم ح تتصرف زيهم مش عشان انت مش متربي بس عشان مافيش فرصة لانك تتصرف اي تصرف تاني...يعني زي ما ارميك في البحر واقول لك اوعى تعوم العوم عيب امشي على رجليك!
ايه اللي حصل في هي فوضى؟ ح نبقى نتكلم في الحلقة القادمة
No comments:
Post a Comment