Saturday 29 September 2012

نازلين يوم 4 أكتوبر

انا داخلة التويتر عشان اعلن عن نزولي يوم 4 أكتوبر لوقف التحرش وحماية حقوق المرأة في الدستور 
لقيت الجدعان بيقولوا لي مش لما نخلي الوزرا ما يتحرشوش.. قصدهم على ده :D للامانة الراجل ما يقصدش... زي ما مرسي ما يقصدش اللي عمله قدام الست ده الا بالمناسبة دي تاني يوم بابا قالي: شوفتي الهتاف الجديد اللي انا عملته؟ "الشعب بيفرض سلطانه ورئيسنا بيلعب في بـ***ه" :D ابويا.. اعرفكوا
 بس هم ما يقصدوش والله، وزير الاعلام ما يقصدش يعاكس البت، والبت قلبت وشها عليه حتة دين قلبة، شوية وكانت حتوديه القسم، بس هو يقصد انها حامية عليه يعني، يعني شديدة عليه.. احنا اللي مخنا وسخ ههههههههههههههههه هم ما يعرفوش الحاجات دي.. اقصد يعني مقفولين على نفسهم وفيه كلام كتير وتصرفات كتير حيعملوها بغشومية ما انا قلت لكوا العالم دي فلح وجلنفات وايامنا حتبقى سودا معاهم هي دي مشكلة الاخوان الاساسية، انهم جايين بطينهم وبيتعاملوا مع البلد كلها على انها دوار بيت ابويا العمدة، وحيعاملوا الستات نفس معاملة الحريم اللي حداهم في البلد.. انا شوفتهم في الاعتصامات بيعاملوا الستات المعتصمة ازاي.. الستات في الاعتصام هي اللي بتحضر الاعاشة وتكنس الميدان وكده!!! احنا كمعتصمين قدام عارفين ان ده ما ينفعش.. ما ينفعش الستات هي اللي تنضف الخيم وتكنس الميدان وتحضر الاعاشة والرجالة قاعدين.. ده مش البيت، امال انت جاي ليه يا عم الحاج؟ خصوصا يعني انكوا بتجروا من الضرب، فحضرتك يعني لا بتحضر اعاشة ولا بتكنس ولا بتنضف الخيمة ولا بتنضرب، امال جاي ليه؟ تقعد على البساط وتاخد ست البنات؟ بعدين احنا في اعتصامتنا الرجالة بتعمل كل حاجة والستات بتتخانق معاهم عشان تشارك باي منظر بدل ما نبقى قاعدين مالناش لازمة كده، ده غير انهم بينضربوا... فالاخوان بقى زي ما اتعاملوا مع الاعتصام على انه البيت والستات بتعمل كل حاجة، بيتعاملوا مع البلد على انها البيت والستات ما ينفعش تطلع تفتح الباب بقميص النوم واحد اخواني على التويتر كاتب لي يقولي: ازاي انتوا ضد التحرش وبتطالبوا بحرية المرأة تلبس اللي هي عايزاه؟ !!!!!!!!!!!!!!!!!!!!!!!!!!!!!!!!! يابني احنا مش مراتاتكوا والله العظيم.. لا احنا مراتاتكوا، ولا الشعب عيالكوا اللي عايز تربية ولا البلد البيت ولا الدستور هو القوانين اللي بتمشي عليها بيتك زي الساعة... دي بلد.. بلد.. وبلد متعددة الثقافات على فكرة، والثقافات المتعددة دي لازم تتعايش، ولازم تتقبل بعضها، ومش حينفع اللي كاتبينه في الدستور ده: تقاليد الاسرة المصرية الاصيلة... عشان فيه اسر مصرية قليلة الاصل مش بتبعت طبق كحك للجيران في العيد، ومش بتدخل الحريم جوه لما ييجي رجالة اغراب، ومش بتحط الغدا سخن اول ما تسمع صوت الافندي جاي من بير السلم، ومش بتضرب عيالها بالحزام، ومش بتقلع جوزها الجزمة وتحط له رجله في مية وملح... ماشي؟ احنا مش نخلص من اخلاق القرية بتاعة السادات تطلعوا لنا انتوا.. وابقوا خلوا بالكوا وانتوا بتتكلموا، بلاش الدبش ده.. وما تبقوش تهرشوا تاني :D على الاقل مش قدام الغرب... احنا ستر وغطا عليكوا، بس الاجانب صيحوا لكوا
احنا نازلين بقى يوم 4 اكتوبر عشان نفهمكوا اننا مش مراتاتكوا... مالكوش دعوة بينا، احنا مواطنين، لنا حقوق، ونلبس اللي احنا عايزينه ونعمل اللي احنا عايزينه وما ينفعش تتجاهلونا ولا تمشونا على كيفكوا... الكلام ده تعمله مع ام العيال في البيت مش معانا

Thursday 27 September 2012

المهم يا سيدي لما أنت

فقلت بقى انا عايزة احكي
اصل انا كنت كتبت على التويتر ان لازم كل واحد شارك في الثورة يكتب يومياته عشان الاخوان عندهم مشروع تزوير التاريخ ده وشرعوا فيه
هم ناويين يقولوا احنا اللي عملنا الثورة والشعب انتخبنا واحنا اختيار الشعب وكده يعني، فلازم بقى كل واحد شارك يقول البقين اللي عنده من دلوقت، عشان هو التاريخ ابتدا يتزور من دلوقت، والسلفيين هم الشريك الفضحي للأخوان، الاخوان بيطبخوا على نار اهدا شوية من غلي السلفيين، فابتدا السلفيين يقولوا ثورة اسلامية! 
بس انا مش محتاجة احكي كتير، المدونة تحكي لوحدها، يعني ممكن اللي عايز يتابع يبتدي يفتح المدونات كلها، مدونة علاء ومنال، وعلاء ومنال بقى هم اللي سنوا سنة التدوين من اجل الثورة دي.. هم ابتدوها ان فكرتهم ان الناس تفتح مدونات وترغي، يا بخت من يقدر يقول واللي في ضميره يطلعه، فهم ابتدوا يقولوا واللي في ضميرهم يطلعوه، علاء بقى يقول كلام صادم، ومنال تحكي باسلوب الناس تقعد تشتمها عليه: ازاي بنت وتتكلم كده؟ وهي تستحمل، واتقبض على علاء ايام معركة القضاة مع ناس كتير ومعاهم مالك مصطفى
التارجيت الاخير لفكرة علاء ومنال ان الناس لما تتكلم وتقول كل حاجة من غير تجميل تتجمع على بعضها وتعرف ان كل واحد مش لوحده وتتكلم مع بعض وبعدين يحصل ثورة... هم كان في دماغهم كده، وبصراحة كنا بنضحك في سرنا عليهم على موضوع ان التارجيت الاخير يحصل ثورة ده 
هو احنا كنا بنقرف نفسنا كتير، وكنا بنقف خمسين واحد على سلم النقابة نقول: ثورة ثورة حتى النصر، ثورة في كل شوارع مصر، وسلمى سعيد لازم تنضرب كل مرة... بس بعد ما نخلص الوقفة نضحك على نفسنا ونقول الناس لها حق تتريق علينا
ووائل عباس يكتب على التويتر والجايكو: انا داخل انام، لما الثورة تقوم اي حد يديلي رنة 
:D
وائل عباس كان له دور كبير الحقيقة في ان الداخلية موقعها وهيبتها تتهز
هي الناس كانت بتقعد تقول له انت ايه وانت مين وانت فين ويا سلام حتة فيديو نزلته عملت عليه كل الشغل بتاعك وكلام كده.. بس هو الموضوع مش حتة فيديو نزله... اسلوب عرضه للفيديو، والشتيمة الفشيخة جدا في الداخلية اللي كانت صادمة في الاول.. الناس بقت تقول ايه العيال اللي عمالة تشتم بالاب والام والدين والميتين وتكتب "خخخخخخخخخخخخخخخخخخخ"
بس هو كان لازم اللغة الصادمة دي تتوجه للنظام وللداخلية بالذات عشان تفقد وقارها وهيبتها.. مافيش حاجة اسمها: انتقد بادب.. انتقد بادب ده لما يكون حد ند ليا.. مش لما يكون واحد رافع عليا سلاح ولا عصاية ولا بيعذب الناس ولا بيسرقهم وعايزني اتأدب معاه؟ ماهو بيرهب الناس بالسلطة والسلاح... ازاي نشجع الناس ما تخافش من سلطته وسلاحه الا نركبه الحمارة بالمقلوب ونمسخره ونخلي اللي ما يشتري يتفرج عليه ونضحك عليه خلق الله يقوم بالطريقة دي يفقد هيبته اللي اكتسبها من السلطة وتبتدي الناس تتجرأ عليه وما تخافش منه
ومالك مصطفى، وجيمي هود، وبيسو، والشرقاوي، واسد.. عمر الهادي، ومالك عدلي... مالك عدلي كتيب جامد، واسماء علي، وفاطمة عابد، وآل غربية، وناس كتير انا غلطانة اني باقول اسامي لاني حانسى اسامي تانية، ومينا ذكري... اول مسيحي يتكلم بصراحة من غير ما يبقى قصده يخلي المسلمين مسيحيين، ولما باقول اول مسيحي اقصد اول مسيحي وطني، مش مايكل نبيل يعني ... ويقول كل حاجة، وكان كتير بيقولوا له انت بتطرش على فكرة، فيقول لهم انا باطرش الطراش الطائفي المكتوم عشان يطلع بدل ما يفضل مكتوم يعمل تسمم.. الطراش كويس
الناس دي ماحدش فيهم عاطل عن الموهبة ولا فاضي عشان يقعد يدون ويعرض موهبته ببلاش من غير مكسب.. بس هو كل واحد فيهم يستخدم موهبته، وتصدقوا بالله، كل واحد فيهم كان نفسه في ثورة
ده بالنسبة للتدوين.. 
بالنسبة للشارع في ناس كده في الشارع على طول.. راشقين في اي نصيبة، على رأسهم محمد عبد القدوس، اهو محمد عبد القدوس ده انا فاكرة كل الوقفات اللي كان بيعملها لوحده بالميكروفون بتاعه ده، ومافيش مرة الا لازم ينضرب لما يتدغدغ، وغيرهم بقى رشا عزب وندى قصاص ومحمد واكد، وطبعا حسام الحملاوي راشق في اي عمال
هو انا باقول اسماء ليه؟ انا مش قلت مش حاقول اسامي عشان ما انساش حد؟ المهم يعني انا ناسية ناس كتير قوي عشان نبقى واضحين مع بعض من دلوقت
وفيه واحدة اسمها دعاء في مركز الدراسات الاشتراكية، حاجة كده 45 كيلو وعلى طول في اعتصامات العمال، وسلمى شكر الله، الساعية خلف البهدلة اينما وجدت وهي كلها مش حمل نفخة، بيات في الشارع، ضرب، سفر صد رد في نفس اليوم وهي عندها امتحان الصبح... الخ
برضه باقول اسامي.. اصلي عايز اقول اسامي الناس اللي بحبهم كده.. ونس
المهم يعني راجع المدونة من 2006 بوست بوست وانت حتلاقي اسامي اللي ناسياهم اكتر من اللي فاكراهم، على جنب المدونة حتلاقي مدونات كتير انا مشيراها.. خش على المدونات وراجع المدونات دي بوست بوست برضه، فيه منهم بيدون من قبلي او في نفس الوقت بتاعي او بعدي بشوية صغيرين
اذا ما فادتش في اي حاجة يبقى تفيد في التأريخ
وفيه مدونات اخوان
اكتر مدونتين اخوان كنت بحبهم، مدونة احمد نصر، ومدونة انا اخوان بتاعة منعم اللي بطل يبقى اخوان من قبل الثورة، والاخوان كاتبين له تعليقات على البوستات بتاعته انه امن!
:D
طبعا مش بطل يبقى اخوان عشان مش عاجبه حالهم المايل؟ يبقى امن على طول كده، على الرغم من انه اتحبس واتضرب، وتقريبا ده الاخواني الوحيد اللي اتعذب واتضرب، امن الدولة ما كانش بيعذب الاخوان.. للامانة والتاريخ اكتر ناس كانوا بيتعذبوا هم السلفيين الجهاديين، تعذيب من ورا العقل، لا من ورا العقل فعلا، يعني فيلم جميلة ابو حريد كده.. واوسخ كمان، ويشتموا لهم في ربنا مش عارفة ليه؟ انا لما اتقبض عليا شوفتهم وهم واخدين كهربا والتانيين بيشتموا لهم في ربنا، وعلى فكرة بتبقى وحشة قوي لما تبقى متعلق وبتتعذب وحد يشتم لك في ربك.. من اسوأ الحاجات، عشان وانت بتنضرب ولا متعلق ولا كده بتتشبث بربنا وبهيبته ورهبته فلما يشتمهولك بتبقى كسرة نفسية وحشة، عشان كده ناس كتير منهم اشتغلت مع الامن وناس عملت مراجعات والاغلبية اتجننت
المهم انا باتكلم عن غيري ليه؟ انا كنت باكتب البوست ده عشان اتكلم عن نفسي.. 
بقيت بقى يعني اللي يقدرني عليه ربنا اعمله على قد مجهودي، وغيري بيعمل مجهود اكبر
انا كنت فاكرة ان فيه ثورة حتقوم؟ نووووووووووووو... انا كنت باعمل الواجب، اي وقفة اي فاعلية لازم اشارك فيها عشان ده واجبي لكن ما كانش عندي امل خالص... البتة يعني
مالك مصطفى هو اللي كان.. مش عنده امل، بيبقى عنده توقع، اصل مالك بيعرف حاجات... والله، مش بيشوف الفنجان ولا الكف ولا حاجة، بس هو يبقى قاعد كده بعدين يسرح شوية بعدين تلاقيه قال حاجة، بتحصل بعدها، وانا عشان فيه تواصل روحاني معاه يقعد مثلا معايا نص ساعة ولا حاجة بعدين ابص الاقيه قال لي حاجات، قبل ما حسين اخو ام زينب يتوفى، وهو كان عزيز عليا قوي، قال لي قبلها باسبوع: يا نوارة الاسبوع الجاي في حد عزيز عليكي حيجرا له حاجة..حاولي تتماسكي عشان في ناس حتحتاج تتقوى بيكي.. وفعلا حصل، وام زينب وبابا كانوا تعبانين قوي وفعلا كان لازم اتماسك عشان اسندهم
حقولكوا حاجة تضحك شوية، سنة 2010 مالك مصطفى قال لي: انت حتتجوزي سنة 2012... والله العظيم، حتى فاطمة عابد كانت حاضرة القعدة، قلت له لا يا عم انا مش باحب الجواز، كله شبكة ومهر وقايمة ونيش ومدهب وحاجات رخمة كده، بعدين اتجوزت مرة وطلع طبيخ وغسيل وانا مش باحب الحاجات دي، انا حاستشهد ان شاء الله مش حاعيش لسنة 2012 انا.. قال لي حتعيشي وحتتجوزي 2012
المهم بقى، مالك مصطفى مرة كنا بنتكلم على مبارك كده واحنا في كارلتون
انا باحبه قوي كارلتون ده، كنا بنروح وانا ومالك عدلي نفضل نغني وننشز بصوت عالي ونقضي تلات اربع ساعات بنغني، واسماء تستحمل ومالك مصطفى يشتمنا وفاطمة كالعادة ترفع معنوياتي بالكدب وتقول لي صوتك حلو.. اصل فاطمة دي عندها حنان فائض، ربنا خد من طولها وحط في قلبها مكانه حنان 
:D
وكان اياميها عندي نظرية ان اليساريين كلهم لازم بينشزوا، زي ما الاسلاميين كلهم لازم بيخنفوا، والليبراليين كلهم بيغنوا كلام شبه الجرايد والحان شبه اغاني عايدة الايوبي، فكانوا يقعدوا يحاولوا يثبتوا لي انهم مش بينشزوا فيغنوا محمد منير عشان ده الوحيد اللي بيعرفوا يغنوه صح، وانا اتريق عليهم.. فقام ربنا قعدهولي واتجوزت واحد كل ما يحاول يثبت لي انه مش بينشز يغني لي محمد منير ويقول لي انت مش واحدة مؤمنة؟ ربنا امرك تسمعي جوزك.... انا باسمعه عشان جدع وراجل، مش لاي اسباب تانية، زي ما بامشي كلام رشا عزب ودعاء سلطان عليا عشان ما اهزأش نفسي كده
:D
احنا كنا فين؟
اه.. كنا في كارلتون بنتكلم عن مبارك وازاي انه تنح وما بيحسش وعمره ما حيموت.. فمالك قال مش حيموت لا.. حيتخلع، باللفظ كده
الكلام ده قبل الثورة بشوية حلوين.. مش عارفة احدد سنة عشان ما ابقاش باكدب، فطبعا قعدنا نضحك وكده، فهو طنش
المهم بقى، يوم 24 يناير ده، اوعى حد يروح يعمل فيلم عن تحضير الثورة ويعمل شخصيات دمها تقيل ومهمومة بالوطن
مافيش حد مهموم بحاجة..هي الناس عايزة تبقى محترمة في نفسها بس، يعني مثلا انا باقولك اهو كل المحرك بتاعي الواجب، وحاقولك مالك مصطفى قال لي ايه عشان اوضح لك الصورة
المهم كنا في كارلتون يوم 24 عددنا كان كبير قوي، مش حافتكر كل الناس، بس كان انا وفاطمة عابد واسماء علي ومالك مصطفى ومالك عدلي وجيمي (محمد جمال) ومعاه واحد صاحبه انا ناسياه، وطاهر تقريبا، ومعاه حد، واظن نديم اكس.. مش متأكدة، اصل قعدت مع نديم في كارلتون في نفس المكان بعد كده فمش عارفة اختلط عليا المشهد ولا لا؟ عشان انا ذاكرتي بصرية، المهم يعني، عدد كويس، بتاع 14 او 15 واحد... وكلنا نازلين بكرة
اه.. قبلها الصبح رحت زرت مولانا الحسين، وانا قبل الثورة ما كنتش زويرة لمولانا ولا حاجة، كل فين وفين لما اروح، اللي بيزوره كتير قوي بابايا.. انا كان ممكن اقعد سنتين تلاتة ما ازورش مولانا الحسين.. كنت اكتر بازور ست السيدة نفيسة، وما كنتش بازور الست السيدة زينب الا كل فيييييييييييييييييييييييييييييين، وكنت باخاف منها عشان هي شديدة، بعدين بقى عرفت ان شدتها دي حنية.. حابقى احكي لكوا ازاي بقيت ازور مولانا كتير، بعدين، المهم اليوم ده، يوم 24 الصبح، لسبب مجهول مش عارفة ايه اللي حدفني على هناك؟ انا ما كنتش رايحة ازور بالقصد، كنت في مشوار وتقريبا خفت الصلاة تروح عليا دخلت صليت.. على ما اذكر يعني، زي ما قلت لك انا ذاكرتي بصرية، اني افتكر مشهد وقفتي قدام مولانا يوميها؟ ابدا، ولا فاكرة اي حاجة، اللي فاكراه كات عليا وانا سايقة العربية وطالعة من عنده، لدرجة اني مش عارفة، هل انا زورته فعلا؟ ولا عديت عليه من برة وسلمت؟ مش فاكرة حاجة خااااااااااااااااااااااااااالص في الزيارة دي، كل اللي فاكراه اني مشيت اقول للناس نازلين بكرة يوم 25؟ والناس تقول لي: ايوه نازلين.. وواحد بدقن وجلابية قصيرة قال لي: النزول بكرة حرام... والله العظيم والله على ما اقول شهيد
كنا فين؟
اه كنا في كارلتون
المهم قعدنا نضحك ونتريق على الثورة ام ايفينت.. ايوووون.. احنا نازلين الايفينت وبنحشد له وبندعي له وبنتريق عليه وعلى نفسنا، هل كان عندنا امل ان بكرة ثورة.. ابداااااااااااااااااااااااااااااا خاااااااااااااااااااااالص، كنا حاسين اننا نازلين بكرة ننضرب ويتقبض علينا ونتشبح زي يوم 6 ابريل 2008 وخلاص، وعمالين نحلل نفسنا نفسيا ونقول على نفسنا اننا لقينا تونس عملت ثورة قمنا بنقلدها، اصل احنا نحب نعمل زي اخواتنا الكبار، وفاطمة تقول: لو قامت الثورة بكرة ده انا حاضحك ضحك؟ نقول لعيالنا ايه؟ عملنا ثورة بإيفينت على الفيس بوك؟ وانا اقولها: يابنتي احنا نازلين بكرة ننضرب ونخش السجن، ولا حد من الشعب ده حيعبرنا.. هو فيه حد بيقعد على الفيس بوك غير العيال الاندال اللي كلهم يعملوا اتندينج وننزل ما نلاقيش غيرنا احنا وننضرب؟
فجأة مالك مصطفى قال كده:
حتحصل ثورة، وناس كتير حتنزل، وناس حتنضرب، وناس حيتقبض عليها كتير، وناس كتير حتموت، وحيبقى فيه تضحيات كتير، والجيش حينزل، ومبارك حيمشي، والجيش حيقعد شوية لحد ما يظبطها مع الاخوان، وحتبقى زي تركيا
انا بقى لحد يوم 28 يناير الصبح كنت باكره الجيش.. بعدين حبيته حابقى اقول لكوا ظروف محبتي له، المهم ساعتها قلت له: جيش ايه؟ انا مش عايزة الجيش ده انا باكرهه.. بس الاخوان مش وحشين يا مالك، هم حيبقوا فترة انتقالية لحد ما المجتمع يعرف انه مش محتاج سلطة ويحكم نفسه بنفسه، بعدين تركيا مش وحشة
مالك ابتسم وسكت
اصل هو بقى مش بيقول كل حاجة.. في حاجات مالك مصطفى بيعرفها مش بيقولها كلها، بيقول جزء منها، والباقي بيسكت عنه، لما يبتسم ويسكت كده يبقى عنده كلام مش عايز يقوله دلوقت... اصلا مالك مش بيضحك ولا بيكشر، اقصد يعني مش بيفرح قوي ويزعل قوي زي انا وجيمي كده، انا وجيميهود الناس كانت بتفتكرنا اخوات عشان ردود افعالنا شبه بعضها، يعني نفرح يبقى عندنا امل ان خلاص بقى، مافيش خوف تاني مافيش ظلم تاني، لما نزعل يبقى كله باااااااااظ كله رااااااااااااح.. مالك اللي هو.. عارف لكي لا تأسوا على ما فاتكم ولا تفرحوا بما آتاكم.. هو كده، حتى ما بيضحكش، مافيش حد بيضحكه غير انا طبعا عشان هبلي، بس حتى لما يضحك يضحك على جوه كده مش يقهقه، مالك عدلي هو كمان كده، بس بيبقى طول الوقت على وشه ابتسامة ساخرة، اللي هو تحس كده ماشي يقول ام اي حاجة في الدنيا.. بس هم مش كده، يعني هم مش حاسين ان ام اي حاجة في الدنيا، هم بس مش بيحبوا يبينوا انهم متألمين
يوم 28 الصبح فاطمة قالت لي يمكن الجيش ينزل، مالك مصطفى بيقول كده، قلت لها: لا.. الجيش لا انا باكرهه، ده جيش مبارك
هو انا ايه اللي جابني ليوم 28؟ لسه بدري.. احنا كنا في 24
طبعا يعني اسماء علي ما كانتش مصدقة خالص موضوع ان بكرة ثورة، بس نازلة عشان الواجب برضه، واسماء دي بقى مالهاش فيه، في واجب يتعمل لازم تعمله، عيانة بقى، عندها شغل، عندها مصيبة، عليها واجب بتبقى دحيحة.. تنزل وتفضل في الليلة لحد ما يشيلوها مرابعة
المهم يعني قلت لمالك يعني حيبقى فيه ضرب وكده؟ قال لي: حيبقى فيه تضحيات كتير، بس اللي ضحى مش هو اللي حياخدها، منطقي يا نوارة، من امتى اللي بيضحي بياخد مكاسب؟ قلت له: واحنا حنعمل ايه؟ قال لي: حنعمل اللي مفروض نعمله وفقا لاختيااراتنا.. بصي يا نوارة عشان نبقى واضحين مع بعض، اللي ناوي يمن على الناس بانه بيضحي من بكرة يعمل سويتش لاختياراته، احنا مش واخدين الاختيارات دي عشان نبقى بنضحي عشان الناس.. احنا واخدين اختياراتنا في الحياة عشان احنا عايزين يبقى شكلنا حلو قدام نفسنا وقدام نفسنا وبس، وده شكل من اشكال المجد الشخصي، ومجد شخصي فوقي كمان، احنا مش شايفين ان اي حد يستحق انه يقيمنا غير نفسنا، ومش هاممنا غير شكلنا احنا قدام نفسنا، وشايفين نفسنا اكبر من اي وظيفة حتى لو كانت رئيس جمهورية واغلى من اي فلوس، عشان كده لا عايزين منصب ولا فلوس، مش عشان زهاد ولا حاجة.. عشان الالاطة واكلانا وشايفين ان مقامنا اكبر من كده، مقامنا اننا نبقى راضيين عن نفسنا... اللي اختار الاختيار ده مش من حقه يمن على حد ولا يقول انه بيضحي، هو مبسوط وهو بيستحمل، وراضي عن نفسه وهو بيتخلى، واحنا لنا اختيار وحنكمل اختيارنا للاخر، وفيه ناس مش حتستحمل وحتغير اختياراتها، مش مهم... هم احرار على فكرة، ماحدش يقدر يطلب من حد انه يستحمل حاجة مش قادر يستحملها، واللي بيستحمل بيستحمل عشان نفسه مش عشان غيره
صحيت الصبح، ودعت امي وقلت لها يمكن يتقبض عليا، وما تخافيش مش حتحتاسي، خدي دي نمر المحامين واديتها نمر احمد سيف الاسلام ومالك عدلي وخالد علي وجمال عيد وقلت لها اي حاجة تحصل لي تكلمي دول وهم حيقوموا باللازم وما تقلقيش
ونزلت

Wednesday 26 September 2012

فضفضات

المدونة وحشتني... واكاونت اوشة اخت مليجي على التويتر وحشني.. حسبي الله ونعم الوكيل في اللي هيك عليه وعلى حساباتي الهي يولعوا بجاز وسخ دنيا وآخرة ومش مسامحاهم لا دنيا ولا آخرة
هيييييييييييييييه... فيييين ايام المدونة والله، فين ايام ما كنت بامسك مبارك وافضل اقوله يا عوووكل يا مسيطني، ولا احمد ابو الغيط، فاكرين؟ والنبي وحشني، فاكرين؟ اللي كان متابع المدونة يعني، قبل الثورة كنت باكتب في اليوم عشر بوستات، المدونة بقت مهجورة بسبب الثورة، منكوا لله خربتوا البلد، المدونة دي كانت جميلة حبيبتي كده حبيبتي، وحتى اللي كانوا بيعلقوا عليها كان ناس ذوق ذوق ذوق.. واتصاحبت عليهم كده، فانا بقى قرفانة من الصنيطر ده.. اصل مش عايزة ارد على المقاطيع اللي بيخشوا على الخط.. انا مش فاهمة هم عايزين ايه؟ هم مش خدوا البلد؟ امال يعني لا عايزين يسيبوا لنا الصنيطر نحط همنا على هم بعض، ولا عايزين يسيبوا لنا الحيطان نشخبط عليها ونطلع عليها غلبنا.. وعم تاكلي اللقمة بتمي واكلك قدامك يا عمي
خدوا البلد، وخدوا الناس، وخدوا الثورة كمان وعملوها بتاعتهم
الا انا بقى قبل الثورة دي كنت قريت اربع كتب معينين كده اثروا في حياتي آخر تلات حاجات، مذكرات مالكوم اكس، ومذكرات مانديلا، وجلد اسود اقنعة بيضاء بتاع فرانتس فانون، ومعذبو الارض برضه بتاع فرانتس فانون، ده غير قبل كده كنت قريت الفتنة الكبرى وقعدت اقول لو كنت عايشة ايام سيدنا الحسين ما كنتش عمري اسيبه كده يتدبح وانا اعمل عبيطة، يا ريتني كنت عايشة اياميها عشان اروح اموت معاه.. فضلت اقول كده لحد ما اتقتل تحت عيني الف حسين وانا واقفة جنبه وانا ولا حتى مت.. ولا حتى مت.. نرجع للكتب بقيت اقول للناس هنا على المدونة يقروها.. فقروها بقى وقامت الثورة، وراح واخدها الاخوان، اقولهم طب خدها الاخوان ليه؟ يقولوا لي اصل الامريكان عايزين الاخوان، طب الامريكان عايزين الاخوان تقوم امريكا تمشي كلامها عليا؟ انا ماحدش يمشي كلامه عليا غير رشا عزب ودعاء سلطان بس.. غير كده ماحدش يفرض عليا رأيه، وانا مش بامشي كلام رشا ودعاء عليا خوف ولا حاجة.. انا بس مش ميالة للمشاكل، ولو ميالة للمشاكل فاحسن ما اعملش مشاكل مع رشا ودعاء، ليه؟ لان الانسان افضل له يخليه محترم.. ولو عارف انه حيعمل حاجة حتخليه مش محترم يبقى ما يعملهاش بقى
:D
هو نوع من انواع احتراس النفس بس
المهم.. فين بقى، ايام ما كنا زمان وبتاع، وكنا مع بعضينا، والواد جابر يعمل بانرات، وجيمي يعمل كوميكس، ومالك عدلي ومالك مصطفى يعملوا دورات تدريبية، وعلاء يتفلسف وكده يعني، ولا يوم 24 يناير، كنا قاعدين بتاع 14 واحد نضحك ونهزر، دلوقت مالك عدلي بيقول لي مافيش 4 من ال14 دول بيكلم بعضه... عشان الاحداث الكتير اللي حصلت في الثورة وكده يعني.. 
انا بحب اصحابي على فكرة، مش ممكن ازعل من حد صاحبي واخاصمه عشان موقف سياسي مهما كان، صاحبي يعني، فببقى مش عارفة ازاي الناس بتتخانق وتقاطع بعضها عشان موقف سياسي مختلفين عليه، وهم صحاب اصلا، افهم يتقاطعوا عشان واحد قل اصله مع التاني، واحد علق مزة التاني منه، واحد سلم التاني، لكن خناقة على موقف سياسي يتقاطعوا؟ مش مهم على فكرة
مش مهم خالص، ما احنا تعبنا وطلع تلاتينا والاخون خدوها... عشان امريكا عايزاهم
ههههههههههههههههههههههههههههههههههههه اما حتة دين نتفة نكتة.. قال نمشي مبارك عشان بتاع امريكا تقوم امريكا جايبة لنا الاخوان.. طب احنا نعمل ايه في امريكا دي؟ نطلعها من الباب تنط لنا من الشباك نحط سلك على الشباك تطلع لنا من البلاعة... واهي البلاعة اتفتحت وطلعت كائنات خارج التاريخ في منتهى القبح والبشاعة خلتنا نترحم على مبارك 
الصراحة ما كنتش مصدقة بقى في الاول.. يالهوي على الاخوان وعلى اللي عملته عشانهم، ياما الواحد اتمرمط في الشوارع عشان حسن مالك وخيرت الشاطر دول، وياما شتمنا وحيد حامد
الا وحيد حامد ده يستاهل يتشتم على مسلسل الجماعة ده.. الراجل ده ضحك علينا وكان حسن الظن بيهم، قال انا كنت باشتمه عشان بيشتم الاخوان، هو كده بيشتمهم؟ ده بعد اللي شوفناه منهم اتضح ان الراجل ده بيشتغل لحساب الاخوان وكان بيجمل صورتهم، ما قالناش كل ده ليه؟ ويقولك المسلسل كانت بيتعمل له المونتاج بحضور امن الدولة.. كده امن دولة؟ يبقى امن الدولة اخوان هو راخر
الواحد حاول محاولات التنين مع الاخوان دول.. اصل بصراحة مش عارفة اصدق، مصدومة حمبلواظ خالص
ومرسي ده ايه ده؟ هاه؟ ايه ده؟
هو عايز ايه الراجل ده؟ هم الاخوان عايزين ايه اكتر من اللي هم واخدينه ده كله؟ ما ياكلوا دراعنا.. ومرسي ده اخد دعم ما اخدوش عبد الناصر بجلالة قدره.. واللي عصر لمونة عشان ينتخبه - الحمد لله انا ما عصرتش لمونة - واللي قعد يدعمه في الاول عشان يرفع من روحه المعدنية - وانا لما نجح كنت من اللي بيدعموه عشان مدام خلاص بقى نصيبنا يبقى نعيش بقى ونحاول نعمر- ونروح له الاتحادية كل ما يخش الحمام لوحده، ونفضل نقوله: حلوة البطة حلوة البطة حلوة البطة.. يا صلاة الزين يا صلاة الزين يا صلاة الزين.. والاخوان عاملين لنا زي جورج سيدهم: الواد خلي بالك منه لو يزعل طبطب على كتفه..وما تقعدوش بقى تحبطوه احسن يتعقد ويطلع له حبوب في وشه
واخرتها ايه؟
طبق الاصل العلقة الاولانية، لا قلم زاد ولا قلم نقص... والامن المركزي هو هو، والشرطة هي هي، وامن الدولة وكافة شيء، والفقر هو هو، والسجق المدني هو هو
ملحوسة كده ظغيورة: احنا عملنا الثورة يوم 25 بالذات عشان ده كان عيد الشرطة واحنا اصلا عاملين الثورة على الدولة البوليسية... وعلى فكرة ماحدش جاب سيرة شرع الله ولا دياولو... الناس عملت ثورة عشان اللي بيحصل دلوقت حالا اهو وانا باكلمكوا، بقى كده يا اخوان نروح نعمل ثورة نرجع نلاقيكوا مغيرين الكالون؟

Friday 21 September 2012

كلوا عيش كلوا عيش

انا مش بارضى اضيع وقت في الهري على التويتر او في الكتابة كتير على مقال التحرير في الموضوع ده لانه موضوع تافه ومعمول له الهياج ده بالمخصوص عشان يشتت انتباهنا عن الحاجات المهمة زي الدستور والتشريعات واعادة هيكلة الداخلية والتدخل الامريكي في المنطقة وتحويل مصر لراس حربة تخوض معارك نيابة عن السعودية وكل الهلاك اللي احنا فيه ده
بس انا مش قادرة اسكت اكتر من كده لاني مبقوقة
فقلت افضفض على المدونة
اخوة الاسلام اللي بياكلوا عيش من ورا الرسول قال ايه بينصروه.... انتوا زبالة قوي، ورمة قوي، وعرة قوي، وبهايم قوي، وواطيين قوي، ومرضى قوي، وما عندكوش لا انسانية ولا مخ ولا احساس، البني ادم يبقى ما بيحسش بس يبقى بيفهم، او ما بيفهمش بس يبقى بيحس، انتوا البعدا لا احساس ولا فهم
انا مكسوفة منكوا ومحرجة منكوا وعمري في حياتي ما اتكسفت ولا احرجت الا في مرات قليلة جدا في حياتي كلها
ايه القرف ده؟ انتوا مقززين كده ليه؟
قال خالد عبد الله اللي بيشتغل مع امن الدولة من ايام ما كان بالشورت وقبل ما يعمل زبيبة الصلاة اللي طابعها بالكي دي على اورته ينشر فيلم تافه، ويفرج الناس عليه، ويتولى كبره بدل ما يحمي سمع وبصر الناس، ولا حد كان دريان بالفيلم ولا سامع بيه اساسا، ومافيش حد تطاول على سيدنا النبي الا اللي نشر الفيديو وفرج الناس عليه... وانتوا تمشوا ورا خالد عبد الله
طبعا ماهو اكل عيش بقى
وحزب النور يحشد مظاهرات، والاحزاب تطلع بيانات، وكل من عامل جريمة وقاتل قتيل يمسح نجاسته في الفيلم عشان ياخد بنط، كل عيش يابني، كل عيش من ورا سيدنا النبي ماهو كريم حيقول لكوا ما تاكلوش؟ واعملوا اغاني وافلام وندوات واقفشوا الابيج.. ايه يا جرابيع يا جعانين ده؟ ايه ده؟
وده اكل عيش عالمي بقى.. ماهو الهياج الهيستيري ده بيشجع اي جرنال برة عايز يبيع انه ينزل شتيمة في سيدنا النبي وينزل رسوم وافلام ويعيش.. ماهو عنده معاتيه بيوزعوا له المنتج بتاعه مهما كانت تفاهته، وبصراحة عداهم العيب.. اي حد مكانهم حيقول: بقى بتغيظكم الافلام والرسوم؟ طب افلام وصور ورسوم افلام وصور ورسوم افلام وصور ورسوم واعلى ما في خيلكم اركبوه.. ورونا اخركم
اخركم ايه؟
ابو العينين المتهم في معركة الجمل يعمل مؤتمر يدين... وحسن نصر الله اللي واقف مع بشار يعمل تحذير لامريكا، واللي بيهجموا على الكنايس ويشتموا عقائد الناس عايزين يطلعوا قوانين لتجريم ازدراء الاديان مع ان لو القانون ده طلع هم اول ناس حتتعلق من رموشها بتوع النصارى عباد الصليب واليهود القردة الخنازير والتريقة على غاندي عشان بيسجد لبقرة وهدم تمثال بوذا.. هي دي مش اديان؟ وانتوا عمركوا احترمتوا حد عشان عايزين الناس تحترمكوا؟ هو في حد بيسب الاديان للناس غيركوا يا بتوع اختي كاميليا واختي وفاااااج ضاعت وفاج وسارحين في الشوارع ورا حريم الناس.. والسعودية.. الا فين السعودية صحيح؟ عاملة عبيطة يعني المرة دي، وايران اللي بتبعت سلاح لبشار اللي طلع حنجرة الراجل من زوره راحوا ضربوا السفارة السويدي... و"فداك ابي وامي يا رسول الله"... يا نهار اسود على الكدب
بس ماحدش يقدر ينكر ريادة مصر بصراحة.. احنا مسئولين مسئولية مباشرة عن المهزلة اللي حاصلة في العالم الاسلامي كله، حتة مخبر بتلاتة نكلة يعرض في برنامجه فيلم تافه كل الجنان ده يحصل
هيلا بيلا على السفارات.. اي سفارات بقى واهي ناس بتاكل عيش، وناس بتفك عن نفسها، كل اللي متضايق من حاجة ينزل يتخانق، وناس تموت فطيس، وبعد ما يموتوا عشان نزلوا في الكمين اللي معمول لهم يتشتموا ويتقال عليهم مسجلين خطر، وبمنتهى الندالة والجبن والخسة كل اللي حرضهم وسخنهم يتبرأ منهم ويدينهم
انتوا مش محتاجين افلام مسيئة ولا رسوم تريقة.. انتوا نفسكوا تريقة على نفسكوا، شخصيات كاريكاتيرية عبثية مخلولة مخبولة تثير الضحك والشفقة
من اقل من اسبوعين لما كنت بانزل على التويتر اي مدائح في سيدنا النبي او سيدنا الحسين او السيدة زينب كان اللي بياكلوا من ورا السعودية بيشتموني ويقولوا لي يا شيعية يا بنت الحشاش، بس طبعا بما ان الدفاع عن الرسول دلوقت بقى اكل عيش فلما نزلت مدائح في ستنا السيدة زينب من يومين ماحدش قال لي يا شيعية يا بنت الحشاش... عملوا لي ريتويت
وما يغيظنيش غير "فداك ابي وامي يا رسول الله"! ايه الكدب ده؟ انتوا كدابين ليه؟ طب فين ابوك امك ايام ما الناس كانت بتتقتل في الشارع في 9/9 عند السفارة الاسرائيلي ولا في 9/10 عند ماسبيرو ولا في احداث محمد محمود ولا في احداث مجلس الوزرا ولا في بورسعيد ولا في شارع منصور ولا في العباسية؟ طب كنت انزل انت وخلي ابوك وامك في البيت... مش ناس مظلومة ومساكين وبيتقتلوا في الشارع دول؟ ولا عشان انت متخيل ان سيدنا محمد مات فبتضرب ابقاق فداك ابي وامي والكلام الماسخ ده؟ طب سيدنا محمد ما ماتش.. سيدنا محمد مع المساكين، هو نفسه اللي قال كده: اللهم أحيني مسكينا وأمتني مسكينا واحشرني في زمرة المساكين.. انزل موت عشان المساكين، وبلاش امك وابوك يا سيدي... فين بقى؟ فين يا منافق يا كداب يا فنجري البق؟ فين؟
ولاد سيدنا النبي ما بيتكلموش في الكلام ده، وما بيزعلوش من الشتيمة، وما بياكلوش عيش، بياكلوا ضرب وشتيمة بس، ويصبروا... ولاد سيدنا النبي بيفضلوا قاعدين مع المستضعفين والغلابة كده وفي الاحزان مدعيين وفي الافراح منسيين... ده العادي بتاعهم، وهم قليلين قوي، مش كتير في الدنيا
يا عالم رمم وزبالة وجهلة ياللي ماسكين في حادثة كعب بن الاشرف وسابين تاريخ الرسول كله.. طب كعب بن الاشرف ده كان في حالة حرب وراح يحرض بالمال والسلاح والشعر على قتل المسلمين في عز الحرب... ده ايه دخله بالموضوع؟ انتوا كدابين ومنافقين ولا جهلة؟ ولا بتتعمدوا تعملوا جهلة؟ كعب بن الاشرف ما طلعلوش سرية عشان كان بيقول شعر، والا بقى ليه كل اللي شتم الرسول والقرآن اورد شتايمهم ما طلعلهمش سرية.. كعب بن الاشرف طلع له سرية عشان كان ممول حرب
ها... كلموني بقى عن احترام الاديان كده والقانون اللي عايزين تطلعوه في القلل المنتحرة لتجريم ازدراء الاديان؟ هاه؟ كلموني اكتر كده عن فرحتكوا برواية وفيلم دافنشي كود ورواية وفيلم ملائكة وشياطين اللي كلهم شتيمة في الكاثوليكية؟ يعني لو رواية زي دي اتعملت على الاسلام كنتوا فرحتوا بيها كده؟ كلموني كده عن فرحتكوا برواية عزازيل اللي كلها شتيمة في الكنيسة الارثودكسية؟ يعني لو رواية زي دي اتعملت على الاسلام حتعملوا ايه؟ طب كلموني اكتر بقى عن وغدي غنيم والحويني وخالد عبد الله وحتى عمرو خالد اللي بيسبوا الدين للناس؟
يعني وغدي غنيم غني عن التعريف وعن شتايمه في اديان الناس وسبه لهم ولمقدساتهم ولرموزهم الدينية واخرتها يطلع يقول للمسيحيين احنا لسانا عفيف ومحترمين مش زيكوا يا شراميط يا انجاس.. حيعمل ايه ده لو القانون ده طلع
طب الحويني اللي بيقول الاسلام دين والشيعة دين اخر وبيحلل السب والشتم في سبيل الله هو وعبد الله بدر اللي بيحلل الخوض في اعراض الناس من القرآن والسنة، حيعمل ايه ده لما قانون ازدراء الاديان يطلع؟
طب خالد عبد الله اللي عامل زي المرا اللتاتة وما وراهوش غير سيرة الناس خصوصا سير الحريم... حيعمل ايه ده لما اي قانون في الدنيا يتطبق عليه؟ ده مفروض يتشمط بتهمة ازدراء الانسانية والذوق العام
طب بلاش ازدراء الاديان التانية
خلينا في ازدراء الدين الاسلامي
ده واحد لما سمع خالد عبد الله بيقول كده بيقسم لي انه نفسه انقطع وبقى حاسس انه حيقع ميت
طب كلموني عن وغدي غنيم اللي قال على سيدنا النبي: سيدنا محمد اللي غايظهم وفارسهم وكايدهم راجل واتجوز وخلف وكان بيعدي على زوجاته في الليلة بغسل واحد مش زيكوا! 
ده اسلوب حد يرضى انه يتكلم بيه عن ابوه اللي خلفه حتى؟ ترضى انت حد يقول على ابوك وامك الكلام ده بالاسلوب ده؟ اقولها لك عشان تتخيلها: ابوك راجل جامد وامك كانت مبسوطة قوي معاه... هاه؟ حلو الكلام ده عن الناس اللي خلفوك مش عن النبي بتاعك؟
طب كلموني كده عن ابو اسحاق الحويني اللي قال ان سيدنا النبي وشيخنا ابو بكر كانوا سبابين... عشان يحلل السب والشتم لنفسه؟
طب كلموني كده عن الشيخ الرئيس محمد مرسي اللي قال ان الاخوان بيكدبوا اقتداء بالمنهج الشرعي للاسلام؟
طب كلموني كده عن صبحي صالح اللي قال ربنا عايزنا نتاجر بالدين؟
يعني كل الناس دي تزدري الاسلام والنبي وهم الخواجات اللي وقعوا من قعر القفة يعني؟ مش بني ادمين دول يعني ومن حقهم يلغوصوا هم كمان زي ما انتوا بتلغوصوا؟
طب انتوا امتى احترمتوا اي حد سوا دينكوا ولا دين غيركوا؟ ده انتوا يوم ما مسيحي بيعمل معاكوا دقة جدعنة يا اما بتطلعوا عليه اشاعة انه مسلم ومخبي يا اما بتقولوا له في وشه: انت طيب قوي ما تسلم احسن انت خسارة في النار! 
ده انتوا يوم ما بتشتموا حد بتقولوا عليه يهودي.. احساسك ايه لما حد ييجي يشتم حد يقول عليه: انت ايه يا اخي؟ مسلم؟
ده عمرو خالد طلع يقول على غاندي: كلنا بنحترم غاندي.. لكن تخيل هذا الشخص العظيم لما تعدي بقرة يسجد لها.. يبقى تحمد ربنا انك مسلم!
طب تخيل يعني الكلمة دي اتقالت على اي حد انت بتحبه مسلم من حد مش مسلم.. تخيل مثلا واحد قال: كلنا بنحترم عمر بن الخطاب.. بس هذا الشخص العظيم اول ما يشوف مكعب اسود يفضل يلف حواليه
ماهو كل واحد يقدر يطلع للناس شتايم... وده عمرو خالد المؤدب المتربي اللي بيراعي مشاعر الناس، ولا داعي بقى لذكر التانيين بيقولوا ايه؟
واياك ثم اياك حد يطلع لي ويقول لي العبارة الشهيرة: الاسلام بريء من مش عارف ايه...
اشمعنى الاسلام هو الوحيد اللي بريء من افعال اتباعه؟ انتوا بتحكموا كده على الناس؟
يعني انتوا بتقولوا ان اليهودية بريئة من افعال اسرائيل؟ ولا بتقعدوا تشتموا في اليهودية وتقولوا عليها ديانة عنصرية وتتريقوا على التلمود والتوراة وتطلعوا منها ايات خارج سياقها وتتريقوا عليها؟ ترضوا حد يعمل كده في القرآن؟ انتوا بتقولوا البوذية بريئة من قتل المسلمين في بورما؟ ولا نزلتوا شتيمة في البوذية وتريقة على تمثال بوذا؟ بلاش الاديان التانية.. المذاهب الاخرى من الدين الاسلامي، انتوا مثلا بتقولوا ان بشار بيقتل الناس عشان هو طاغية؟ ولا بتقولوا هو كده عشان علوي؟ انتوا مش بتعمموا على اديان الناس اللي بيتعمل من اتباعها؟ ومش اللي بيحصل دلوقت بس... ده بتعمموا اللي حصل من التاريخ.. وحياة "وااااااه اندلسااااااااااه" واللي حصل في الاندلس يلصق بالديانة المسيحية كلها، اول ما بتتخانقوا مع الناس بتشتموا في دينهم؟ ما بتعملوش كده ابدا؟ طب اشمعنى اسرائيل وحشة عشان اليهودية وحشة ومسلمين بورما بيتقتلوا عشان البوذية وحشة وبشار بيقتل الناس عشان العلوية وحشة والاسلام بس هو الوحيد اللي بريء من كل اللي احنا بنعمله يعني؟ انا عمري ما قريت ولا سمعت بان سيدنا النبي كان بيتريق على اديان حد ولا كان بيجيب ايات من كتب الناس ويتريق عليها، يا اما لو حتعمل كده، ودي حرية بحث وتداول معلومات وتعبير عن الرأي بصرف النظر عن الاسلوب، يبقى تقبل يتعمل كده في القرآن... انا بصراحة مش حاستحمل، انت تستحمل براحتك، بس انا مش حاستحمل مش حامسك اللي عمل كده في القرآن واولع له في سفارته، لو عامل فيديو مش حاتفرج لو كاتب كتاب مش حاقراه، وخلاص، انا مالي بقى، انا مش باعمل كده في حد وما احبش اني اعرض نفسي لحد بيعمل في ديني كده وخلاص.. لكن مش امشي الكون على مزاجي، الكون له رب ممشيه زي ما هو شايف انه صح، وانا ما اتفرجتش على الفيلم ده.. كل اللي شوفته منه بالظبط دقيقتين لما جوزي دور عليه عشان يشوفه للفضول، وحتى لما فتحه قلت له ليه كده يا محمد، مش عايزة انا اشوف، شوفنا دقيقتين بالعدد... ورحنا قافلين، جه محمد في محاولة اخرى عايز يشوف استنى لما قمت وفتحه وهو لوحده برضه ما عملش اكتر من دقيقتين وقفل في نفس النقطة اللي قفلنا فيها اول مرة وما قدرش يكمل
اللي شاف وكمله عرف يكمله ازاي؟ انتوا مرضى؟ مبسوطين يعني؟
خلاص.. مش شرط مرضى، الناس طبائع، انا مثلا مش باقدر اكمل فيديوهات وجدي غنيم خصوصا الفيديو اللي كان بيشتم فيه واحد ميت ولسه ما اندفنش ويشتم دين الناس ويجرح مشاعرهم، فيه مسيحيين عرفوا يكملوا للاخر، انا ما عرفتش اكمل للاخر، وكل شوية يعملوا لي منشن على التويتر ويقولوا لي يرضيكي كده يا نوارة؟ واتخانق معاهم واقولهم لو سمحتوا ماحدش يفرجني على الكائن القميء ده بيقلب لي اليوم كله، وانا عمري ما كملت للاخر وغدي غنيم ده.. على طول من اول دقيقتين واقفل، بس بيملا الاودة طاقة سلبية بهلته بس
طيب انت قادر تتفرج، وقادر تعمل كده في الناس، يبقى تستحمل الناس لما يعملوا فيك اللي انت بتعمله فيهم
بس اللي انا اعرفه ان ربنا قال: ولا تسبوا الذين يدعون من دون الله فيسبوا الله عدوا بغير علم
وانا مش باشوفكوا غير بتسبوا اديان الناس وتتريقوا عليها.. وماحدش منهم ضربنا ولا قتلنا عشان بنسب له الدين.. بيضربونا ويقتلونا عشان اسباب تانية.. عشان بترول، عشان احتلال، عشان سيطرة، وبالمناسبة لما بيضربونا ويقتلونا مش بنقف لهم ولا بنتجنن عليهم ولا بنحرق لهم سفارات ولا بنولع في ابوهم
ماحدش قتل سفير امريكي عشان امريكا احتلت افغانستان والعراق... ماحدش ولع في سفارة اي دولة من دول الناتو لما راحوا افغانستان، ماحدش ولع في سفارة فرنسا لما ساعدت اسرائيل في تطوير سلاحها النووي، ماحدش حدف سفارة روسيا بالطوب عشان بتبعت سلاح لبشار يموت الناس
الناس تموت، والفقرا يجوعوا، والغلابة يتسرقوا، والستات تتعرى ويتقال ايه اللي نزلها عادي... طب انتوا ايه اللي فرجكوا على الفيلم؟

Wednesday 19 September 2012

امسح في الحيطة كمان، رسمي بيجيبلك جنان، عمري ما حانسالك زمان، كنت فار في الميدان

محمد الملط كتب على التويتر الكلام ده تعليقا على مسح داخلية الاخوان للجرافيتي اللي في محمد محمود... بس هو قال نعجة في الميدان، وانا فاكرة انهم كانوا فيران في الميدان، وربنا، او عرس، لا ده حتى العرس دلوقت اتشجعت وبقت تطلع تبص لنا وتنزل تحت العربيات تاني، طب ده ايام محمد محمود لما فيه شوية منهم نزلوا "يتفرجوا" علينا عكس اوامر المرشد كانوا بيقفوا عند هارديز واول ما يسمعوا صوت فرقعة عربية يطلعوا يجروا، ده دول الشجعان اللي في الاخوان اللي بيقولك انا نزلت محمد محمد 
:D
الشجعان دول كانوا بينزلوا يقولوا لنا امشوا، بس ما كانوش بيستحملوا كتير.. كانوا بيطلعوا يجروا على طول.. مش فاهمة ايه اللي في الدنيا حلو للدرجة يعني عشان ماسكين في الدنيا قوي كده.. بيخافوا على نفسهم قوي يا عيني هههههههههههه
امبارح الداخلية بتاعة الاخوان مسحت الجرافيتي اللي في محمد محمود، والشباب رجعوا رسموا تاني، بس هم مسحوا الساعة واحدة ونص بالليل.. وانا مش فاهمة احنا كنا فين؟ ما نزلناش رنيناهم علقة ليه؟ احنا نرسم الجرافيتي ونفضل نرابط بقى في محمد محمود، اصلا كده كده فيه ناس مجاذيب محمد محمود بتبقى موجودة دايما اللي بيبقى قريبه او صاحبه مات جنبه بيفضل يحوم حوالين المكان لحد دلوقت، انا عارفة انكوا عارفين، انا باكتب للتاريخ... لو جم تاني صفارة على التويتر وننزل ناكلهم علقة
الاخوان بيمسحوا صور الشهدا اللي في محمد محمود عشان مش عايزين حد يفكرهم بندالتهم وخستهم وجبنهم وتواطؤهم على القتل.. محمد محمود مقدس يا اخوان، فيه ارواح احسن ناس، وفي يوم حنقعد كلنا ونكتب استشهاد كل واحد كان بيبقى ازاي، وحنكتب الحاجات اللي شوفناها، الحاجات اللي بتطير وتنور وروايح المسك والعطور اللي كانت بتبقى طالعة من الجثث وفي المشرحة، الاخوان عايزين يكتبوا التاريخ ويقولوا انهم هم اللي عملوا الثورة، ودلوقت ابتدوا يتصرفوا على الاساس ده وبيشوهوا المعلومات، وبيعملوا خطاب اعلامي يروجوا فيه لانهم هم اللي عملوا الثورة
واحنا ما حيلتناش الا الذاكرة المحفورة بالدم... لازم كل يوم نفكرهم بجبنهم وخيانتهم من اول قعدتهم مع عمر سليمان واحنا في الميدان.. لا.. من اول ما قالوا احنا مش نازلين يوم 25 واللي حينزل حيبقى بيشارك بشكل فردي وبيعبر عن نفسه عشان يستنوا يشوفوا ايه الشيستم، لو مشيت يبقى شاركوا من اول يوم لو ما مشيتش يبقى ما شاركوش، احنا شغلتنا نكتب التاريخ ونرسمه ونقوله ونغنيه ونمثله وندور بيه في الشوارع عشان نفكر الناس بيه... ما بقاش الا الاخوان اللي عايزين يمثلوا دور رجالة... لا احنا لازم طول الوقت نفكرهم انهم عمرهم في حياتهم ما كانوا رجالة ولا للحظة واحدة... ده حتى لما اتفتح عليهم السجن مرسي اتصل بالجزيرة وبلغ عن نفسه وعن صحابه عشان ما يخرجوش من السجن.. الباب مفتوح وخايفين يخرجوا، لا ومرسي بيملي الاسامي على الهوا عشان لو حد نقص يخلي مسئوليته هو هههههههههه 
يا ريت كل واحد شارك في الثورة يكتب يومياته من اول لحظة.. وقبل كده نبهت ان الاخوان عندهم بالفعل مشروع لاعادة كتابة التاريخ وحيكتبوه ويدرسوه في المدارس مدام مسكوا البلد انهم هم اللي عملوا الثورة... لازم النملة في جحرها يوصلها خبر ان الاخوان بيخافوا من كل حاجة واي حاجة الا ربنا
نكتب التاريخ بصدق وبالحق من اول  لحظة، لو انت حتكتب من اول يوم 25 انا مستعدة اكتب من 2006 وفيه غيري مستعد يكتب من قبل كده بكتير
اللي مش عارف يكتب يصور فيديو وينزله.. اللي مش بيعرف يتكلم قدام كاميرا يعمل سلسلة رسومات عن ذكرياته في الثورة وينشرها ويرسمها على الحيطان، وكل ما حيمسحوا حنرسم تاني
بيمسحوا الجرافيتي بتاعنا ليه؟  ده حتى شفيق قال انه حيسيبنا نرسم جرافيتي ونسمع حمزة نمرة انسان جواه وجوايا
:D
هو فين؟ والنبي وحشني.... ايه؟

ده فيديو مصوراه نازلي حسين.. وعمالة تقطع في قلب العمال وهم بيمسحوا