Sunday 31 August 2008

رمضان كريم

كل سنة وانت طيبين...البوكس اهو خرج يلم الشياطين...بس شياطين الجن، لكن بقى شياطين الانس ح يفضلوا مطلوقين..دي اجابة على سؤال مواطن مصري، وكأن ربنا عامل لنا رمضان عشان يورينا ان فيه بني ادمين اوسخ من ابليس
انا ما باحبش اتفرج على التلفزيون في رمضان بس السنة ح اتفرج ان شاء الله على مسلسل ناصر بالرغم من ان مجدي كامل هو اللي عامل عبد الناصر ومشعلق حواجبه كأن فيه حد بيقرصه..هو عبد الناصر عمره شعلق حواجبه؟


ايا كان عبد الناصر، ومهما الناس اختلفت معاه وانا منهم بشدة، بس لما توصل الدراما انها تمجد فاروق والسادات والتتر يعملوا مسلسل لجنكيز خان والام بي سي تعمل مسلسل لصدان،مش ناقص غير يعملوا مسلسل يمجدوا يزيد وابو جهل، يبقى لا بقى
عبد الناصر سيدهم وتاج راسهم كلهم كفاية الكلمتين دول اللي عمر ما حاكم مصري في التاريخ من ايام الملك مينا لحد النهاردة ما قال زيهم ابدا...ولا حتى جاب سيرة الفقرا من ساعة ما مؤخرته تخنت على الكرسي لحد ما خلعوهاله من الكرسي عشان يدفنوه

على فكرة...ده انا لاحظت ان ولا حتى المعارضة اتكلمت كده
:) بس لاحظتوا انه بيقول قاصاد..حبيبي مبيوء زينا..لا عمره كان خواجه ولا عمره حاول يعمل خواجة

استخدم عقلك لو سمحت

لما ربنا وزع الارزاق ماحدش عجبه رزقه، ولما ربنا وزع الامخاخ كل واحد عجبه مخه
على حيث كده الاصول ان كل واحد مدام عاجبه مخه يقدر برضه ان التاني عاجبه مخه ويسيبه يعجبه مخه وهو يحب مخه وانا احب الكبدة وانت تحب الفشة كده يعني
افتح الميل اول ما اصحى الاقي ميلات عناوينها "استخدم عقلك لو سمحت" جاية من كافة البشريات
شمال ويمين مؤمنين وملحدين مسلمين ومسيحيين
وكل واحد فيهم نازل عليا انا بالذات يطلبوا مني استخدم عقلي لو سمحت
وكل واحد فيهم مقتنع تماما ان الناس اللي هو بيبعت لهم الميلات دي وانا منهم لو استخدم عقله ح يبقى امور زيه كده، اي زيه بقى مسلم مسيحي لا ديني
اجي بقى افتح ميلات استخدم عقلك لو سمحت الاقيهم لازم يستفزوا الواحد..تصدقوا بلا اله الا الله، حتى اللي بيقولوا لا اله الا الله زيي بيستفزوني
هو انا عشان استخدم عقلي لازم اشتم في الباقيين؟ طب انا مسلمة والحمد لله اللي بيبعتوا لي يقنعوني بالاسلام دول هدفهم ايه؟ طب انا مسلمة والحمد لله اللي بيبعتوا لي يقنعوني ان الاديان هجص او اني ابقى مسيحية متوقعين مني ايه؟ وليه كلهم ميلاتهم معتمدة في الاساس على انهم يطلعوا غيرهم غلط مش يثبتوا ان وجهة نظرهم صح؟
انا عايزة مجموعة استخدم عقلك دول يقعدوا كلهم مع بعض فاودة واقفل عليهم من برة واسيبهم اسبوع
يستاهلوا بعض..يارب يشيلوني من لستة ميلاتهم، انا ما باحبش استخدم عقلي انا باستخدم كريم نيفيا

هو فيه ايه ع الصبح؟

ايه الجنان ده؟ حماس وفتح مختلفين على التوقيت الشتوي والصيفي، وجماعة فتح الاندلس ظهرت في المغرب
ومصر بتزرع قمح في اوغندا؟
وح تأكله لمين؟ ح تبيعه في استراليا عشان يصدروه لكوريا الجنوبية يقوم يغطي احتياجات الشعب التبتي من القمح فتختفي ازمة طوابير العيش عندنا؟
هي الاخبار مالها كلها النهاردة عاملة زي وراح اول ما شافه راح مطلع المطوة وضرب عليه بالنار قام مات غرقان ومن ساعتها كل ما يشوفه على القهوة يطلع يجري؟
هو انا شاربة ايه؟ انا شاربة لبن دلوقت..خالي الدسم..ان خالك ايه؟ خخخخخخخ بايخة عارفة
بس يعني هي تلات اخبار ورا بعض كده مناخيرهم في كعب رجلهم وركبتهم في قفصهم الصدري وع الصبح وقبل ما انام يعني استحملوني ما جراش حاجة
يعني يجرفوا الطمي وييبيعوا الصحرا ويروحوا يزرعوا في اوغندا؟
على كده بقى المصانع هنا بتتخصخص عشان يعملوا مصانع قطاع عام في جزر القمر لخدمة الشعب الجزري القمري
جدر البطاطا اللي كان السبب يا ضنايا

فتح الاندلس؟

فيه خلية اسمها فتح الاندلس؟ ده ايه الامل اللي هم فيه ده؟ احنا عارفين نفتح ازازة بيبسي؟ احنا اخرنا نفتح التلاجة نشرب بق مية ونقفلها تاني
عموما فيه تفسير للاحلام في ابن سيرين وفيه في ابن فرويد، وعلى كل حال ياريت يغطوا...قفاهم وهم نايمين وما يتعشوش مسقعة..الزيت بيقفل على المراوح وبيأثر على خلايا المخ فتتحول الى خلية فتح الاندلس

ههههههه لا حماس وفتح بيهزروا ياخوانا انتوا اخدتوا الموضوع جد

لا لا مش معقول يعني..يعني الكلام ده بجد:

وفي غزة، طرأ خلاف جديد بين الحكومة الفلسطينية وبين الحكومة المقالة بشأن بدء العمل بالتوقيت الشتوي، وفيما أعلنت الأولى بدء العمل بهذا التوقيت أول أيام شهر رمضان، أعلنت الثانية بدء العمل به ليل الجمعة - السبت.

هههههههههه
هي دي كمان فيها خلاف ما بين الحكومة المقالة والحكومة الزبالة؟
يا جماعة انتوا دمكوا تقيل على فكرة...الجماعة بيهزروا..انتي ما بتضحكيشي ليه؟ ماية دي وللا مش ماية؟
على فكرة انا من ساعة ماوعيت على الدنيا ما شفتش في حياتي اللي حماس وفتح بيعملوه ده، الناس خيبتها السبت والحد وهم خيبتهم تمن ايام في الاسبوع

تعذيب اهالي المحلة


دلوقت فيه واحد مش عارفة اذا كان عايزني اقول اسمه وللا لا بس هو بعت لي الميل ده:

يانوارة فية موضوع اكبر من موضع عاملات مصنع الحناوى فية لغاية دلوقتى معتقلين من اهالى المحلة فية 47 واحد معتقلين بدون اى اسباب عايزين يشيلوهم موضع المحلة والاضراب الناس دية اتعرضوا لتعذيب لدرجة انى فية حد منهم جالوة ارتجاج فى المخ اتعرضوا لتعذيب بالكهرباء وهاليهم وحريمهم اتاخدوا عشان يسلموة نفسهم لدرجة انى واحد منهم عند اخت معوقة خدوها عشان يسلم نفسة واللنيابة رفضة انهم يتعرضوا على الطب الشرعى عشان الاصابات اللى اتصابوا بيها الناس دية معتقلين على ذمة قضية باطلة من شهر ابريل على حس موضع الاضراب وفية جلسة لمحاكمتة شهر 9 كام هاعرف واقولك http://www.youtube.com/watch?v=i10zenk_WKkالفيديو ده فية شهادة لاهالى المعتقلين
ياريت تحاولى تنشرى المضوع ده على قد ماتقدرى
ودي شهادة اهالي المحلة حاجة فظيعة والله العظيم لو اللي بيحكمونا مطاريد الجبل كان بقى عندهم رحمة اكتر من كده

وكمان التعذيب في مصر نشروا عن الموضوع ده، ياريت بقى حد يهتم بالموضوع ده، مافيش غير حسام الحملاوي بس والتعذيب في مصر اللي انا شفتهم اتكلموا في الموضوع ده
احنا مش مفروض ننسى المحلة...عشان القصة ما خلصتش يعني نزلوا شهاداتهم نعمل لهم بانرات اي حاجة
انا كمان لما بس اخلص اللي في ايدي ح افرغ الشهادات بتاعتهم

Saturday 30 August 2008

نائب رئيس الطائفة الانجلية في مصر

الدكتور القس اندريه زكي
زكي وهو زكي والله العظيم تلاتة كتب مقال في الاهرام النهاردة مش ح اعمل له لنك لان الاهرام متخلف والحاجة اللي بتعدي عليها يوم يبقى لازم تدفع لها فلوس عشان تدخل تشوفها في الارشيف...حكومة بقى تقول ايه

بس انا مش ح اعمل له لنك انا ح انقله:

الجذور التاريخية للمسيحيين العرب
وهم النقاء العرقي والثقافي

د. القس اندريه زكي
نائب رئيس الطائفة الانجيلية في مصر

يرى البعض ان هناك تعارضا ظاهرا بين كلمة مسيحي ومصطلح عربي، ويرى البعض الاخر ان الجذور التاريخية لمسيحيي الشرق الاوسط تعود الى الفينيقية والفروعونية، وهناك من يؤمن بما يسمى النقاء العرقي، وتعد هذه القضية من القضايا الشائكة، وتثير عددا من المشكلات التاريخية والعرقية، كما انها تستدعى بطريقة انتقائية تسهم سلبيا في السلام الاجتماعي والعيش المشترك.
ان الدراسات التاريخية تؤكد وجود المسيحيين العرب منذ فجر المسيحية، لاسيما النص الواضح في سفر الاعمال بالعهد الجديد، الذي يؤكد وجود اشخاص ناطقين باللغة العربية في يوم الخمسين، حيث ان احدى اللغات التي سمعت في ذلك اليوم هي اللغة العربية، كما تؤكد مصادر تاريخية متعددة ان المسيحية كانت موجودة وفاعلة في شبه الجزيرة العربية قبل الاسلام.
اعمال الرسل 2 : 8 - 111 "فكيف نسمع نحن كل واحد منا لغته التي ولد فيها، فرتيون وماديون وعيلاميون والساكنون ما بين النهرين واليهودية وكبدوكية وبندس واسيا وفريجية وبمفيلية ومصر ونواحي ليبية التي نحو القيروان والرومانيون المستوطنون يهود ودخلاء كريتيون وعرب نسمعهم يتكلمون بالسنتنا بعظائم الله"
ان الامر الشائك في هذه القضية يعود الى الجذور التاريخية لمسيحيي هذه المنطقة فكما اشرت في مقدمة هذا المقال الى ان البعض يعتقد ان اصول الموارنة تعود الى الفينيقيين، كما تعود اصول الاقباط الى الفراعنة، وهذا الامر صحيح جزئيا فيما يتعلق بالاقباط، لكن عددا من الدراسات يشير الى ان سكان هذه المنطقة هم خليط من الساميين والحاميين والقوقازيين، فيما يتعلق بالسلالة والعرق، فسواء كانوا عربا ام من سلالة الفراعنة او الفينيقيين فانه من المعتقد ان سكان هذه المنطقة جميعا لهم اصول مختلطة.
اما النقطة الثالثة والشائكة في هذا الامر فهي علاقة العروبة بالاسلام، ومكان المسيحيين العرب، وهنا يرى البعض ان العروبة هي الاسلام، وبالتالي يتم اقصاء المسيحيين من الانتماء العربي، بينما يرى البعض العروبة هي نتاج تفاعل بين الاديان الموجودة (اليهودية، المسيحية، الاسلام)، فالعروبة في صياغتها الحالية هي نتاج الاديان والثقافة والتاريخ والجغرافيا، كما انها تشمل تاريخ كل شعب من شعوب هذه المنطقة، فعرب اليوم ليسوا هم عرب الجاهلية، وان الهوية العربية ليست هوية ميتافيزيقية لكنها هوية فسيولوجية متغيرة متأثرة بعوامل الجغرافيا والتاريخ والثقافة. من هذا المنطلق فان قضية النقاء العرقي قضية غير حقيقية ووهمية، فلا يوجد على ارضنا ولا في تاريخنا نقاء عرقي او ثقافي.
وفي اطار الحوارات الدائرة حول الجذور التاريخية للاقباط، فاني ارى اهمية التمسك بالمنهج العلمي في هذه الامور، مع ضرورة ادارك التلقيح العرقي والثقافي. فالمسلمون والمسيحيون اليوم هم نتاج حركة تاريخ وثقافة وجغرافيا، كما انهم شركاء ماض، وصانعو مستقبل.
-----------
انتهى مقال القس الهي يارب يسعد ايامه بحق الايام المفترجة اللي احنا فيها
عندي سؤال بقى..هي ايه حكاية البحث في الجذور دي؟ عشان تعمل ايه يعني؟ يعني انت مثلا عملت دي ان ايه وطلع جدك توت عنخ امون...نعم؟ فيه حاجة يعني؟ ايه؟ افندم؟ ايه النتائج المترتبة على الكلام ده الا اذا كنت عايز تعمل صهيونية مصرية؟ فاكر ان كده ح تبقى زي اسرائيل؟ لا اتليس
صهيونية مصرية ح تبقى بالفول والبصارة برضه وح يفضل الحال على ماهو عليه زي ما انت كده شرابة خرج مالكش سعر ولا وزن ولا قيمة
عشان مش مهم انت حفيد توت الفرعوني وللا عمرو العربي وللا ساويرس اليوناني
المهم انت بتعمل ايه عشان يبقى لك قيمة واكيد قيمتك مش ح تبقى في انك تبص للمواطنين اللي زيك على انهم "شيء آخر"
انبي تعوض عليا عوض الصابرين يا رب

الاضواء,ساعات بتحرق,مش لازم تلمع طول الوقت,بنصح بسلاح التلميذ

الجملة دي كتبها مالك امبارح بالليل على التويتر
مكيفاني قوي الجملة دي...مكيفاني موت، مخلياني حاسة ان لو مالك ما قالش في حياته غير الجملة دي يبقى ده كفيل باني لما اجي اكلمه اقوم اقف
والله العظيم انا مش منحازة عشان هو مش بيعرفني غير عشان مصلحتي وبيفرض مصلحتي عليا غصب عني، دي حاجة ودي حاجة تانية
بس ركز في الجملة اللي عاملة زي السهم الناري دي:

الاضواء,ساعات بتحرق,مش لازم تلمع طول الوقت,بنصح بسلاح التلميذ

اوجز فانجز صحيح...يسلم المخ اللوذعي يا شهيد مالك

فصل 32 عاملة من مصنع الحناوي للدخان

يا نهار اسود...يا ناس حرام عندي شغل وعندي مذاكرة
ما كل الناس بتاخد اجازة..الفساد ما بياخدش اجازة ولو مرة في السنة؟ مش ح نعرف نشوف اشغالنا واكل عيشنا يعني؟
التلاجة بتفصل والفساد ما بيفصلش

نص الخبر من عند يساري مصري

نقلاً عن مركز هشام مبارك

قام مصنع الحناوى للدخان بدمنهور بفصل 32 عاملة من المصنع ومنعهم من الدخول للعمل صباح اليوم بسبب قيامهم بالشهادة فى مكتب العمل يوم الخميس الماضى لصالح احدى العاملة صفاء قنديل والتىاتهمها صاحب المصنع بتمزيق أوراق العمل بسبب رفضها التوقيع على اقرار بالتنازل عن مستحقاتها المالية التى تحصلت عليها بموجب حكم قضائى، وعندما ذهبت العاملات يوم الخميس للشهادة مع زميلاتهم امتنع مكتب العمل عن سماعهن فتظاهرت العاملات امام المكتب وحضرت قوة من الشرطة ولم تبارح العاملات المكتب الا بعد سماع اقوالهن وعندما توجهن للمصنع بعد سماع اقوالهن امتنع المصنع عن السماح لهن بالدخول تحت زعم قيام صاحب المصنع بفصلهن وبعد أن تظاهرن سمح لهم بالدخول للعمل يوم الخميس، وعندما توجهوا للعمل اليوم تم منع 32 عاملة بالاضافة الى صفاء من دخول العمل وكانت هناك قوات من الشرطة تحاصر المصنع وقد قامت هذه القوات بالاعتداء بالضرب علىازهار يوسف مسلم وهناء احمد ثابت، كما تعرضت العاملات للسب ايضا، وعلى اثر ذلك قام محامو مركز هشام مبارك بتقديم شكوى للمحامى العام لنيابات دمنهور لاثبات الحالة بشأن الفصل التعسفى، والتحقيق فى وقائع تعدى الشرطة على العاملات، وتم احالة التحقيق الى النيابة الكلية التى استمعت الى العاملات، وجارى سماع اقوال الشركة التى اتهمت العاملات بالتجمهر والاضراب عن العمل والصياح بالجهر ضد صاحب العمل بالسب والقذف والخروج يوم الخميس فى اوقات العمل دون اذن او تفتيش ، ومازال التحقيق مستمرا.


احنا ح نسكت؟ ح نسكت على خراب 32 بيت؟

احنا عايزين نجيب اسماء العاملات دول ونروح لهم ونصور معاهم

ياااااااااااا استعنا ع الشقا بالله...انا مش باعرف اشتغل في الصيام بابقى في عالم الاموات..والله انا ما دلوعة انا عندي انيميا والله يخرب بيت السجاير والقهوة بقى

يا معين يا رب

لازم نتصرف بسرعة

ياااااااااااا جاااااااااااااااااااااابررررررررررررررررررررررررررررر


امال بيقولوا حلوا مشكلة طوابير العيش ليه؟

ما الناس اهي بتموت لسة في طوابير العيش
انا عايزة افهم هي كلمة "حلينا" يعني ايه بالنسبة للحكومة المصرية؟ حلينا دي يعني خلاص..ما عدناش نتكلم في الكلام البايخ ده تاني بقى، واللي يموت يموت بقى ربنا يتولاه ما توجعوش دماغنا
هو ده الحل اللي احسن من الحبل

بذمة النبي ده كلام واحد عاقل؟

وتابعت الأيام الفلسطينية مقالة بعنوان "'أوروبا المحجبة'.. مقال لا سامي" للكاتب الإسرائيلي كوبي نيف، وقالت:

"إيتان هابر هو صحافي عتيق. لعشرات السنين كان المراسل العسكري والمحلل الأمني لـ "يديعوت احرونوت" وبعد ذلك مستشار رئيس الوزراء اسحق رابين، رئيس مكتبه وكاتب خطاباته. وللجمهور الغفير يذكر أساساً كمن أعلن بأسى وصدمة عن موت اسحق رابين برصاص مغتال يهودي."

وتابع نيف يقول: "هابر كتب أمس مقالا تحت عنوان 'القارة المحجبة'، وهاكم مقاطع منه: 'في الأيام القريبة سيعود من إجازاتهم في الخارج عشرات آلاف الإسرائيليين... بعد أن يعود الأطفال إلى المدارس وتستعاد الذكريات من الإجازة في الخارج، هاكم أيضاً ما سيطرح على الشاشة: حجب، الكثير من الحجب، حجب سوداء من قماش بسيط، حجب من قماش فاخر باهظ الثمن، حجب طويلة وقصيرة. أوروبا تلبس الحجاب على وجهها... في المحلات الكبرى والغالية يطلب زبائن مسلمون أثرياء إخراج كل الزبائن الآخرين من المحل ويشترون نصف المحل، أحيانا بمئات آلاف الدولارات.'"

وتابع نقلاً عن هابر: "'محمد يشتري أوروبا... علينا أن نستوعب في داخلنا الفهم في أن المال يشتري (تقريباً) كل شيء وبالأساس ضمير أوروبا... ربما ليس في هذا الجيل، ولكن بالتأكيد في الجيل القادم من شأن أوروبا أن تصبح فرعا لبلدان إفريقيا والشرق الأوسط... سيداتي وسادتي، أوروبا 'محجبة.'"

وقال: "يصعب عليّ أن اصدق بأن مقالا لا ساميا بهذه الفظاظة يمكنه أن ينشر منذ نهاية الحرب العالمية الثانية في صحيفة في العالم الغربي، الذي نريد نحن جدا أن نكون جزءا منه. أما عندنا فعلى رؤوس الإشهاد."

وأضاف: "لماذا لا سامي؟ هيا نستبدل في مقال هابر العرب باليهود والحجاب بالجبة، وانظروا ماذا يخرج لنا: 'بعد أن يعود الأطفال إلى المدرسة وذكريات الإجازة في الخارج تطفو من جديد هاكم ما سينشر على الشاشة: الجباب، الكثير من الجباب، جباب سوداء من قماش بسيط، جباب من قماش فاخر باهظ الثمن، جباب طويلة وقصيرة. أوروبا ترتدي الجباب على رأسها... في المحلات الكبرى والغالية يطلب الزبائن اليهود الأثرياء إخراج كل الزبائن الآخرين من المحل ويشترون نصف المحل، أحيانا بمئات آلاف الدولارات.'"

وأكمل قائلاً: "رابينوبيتش يشتري أوروبا... علينا أن نستوعب الفهم في أن المال يشتري (تقريباً) كل شيء. ولا سيما ضمير أوروبا... ربما ليس في هذا الجيل، ولكن بالتأكيد في الجيل القادم من شأن أوروبا أن تصبح فرعا للشرق الأوسط وشرقي أوروبا... سيداتي سادتي، أوروبا 'تتجبب.'"

وقال: "يوجد فارق بين مقال يربط الموقف الحميم لرئيس فرنسا الحالي تجاه إسرائيل، بالقياس إلى الموقف البارد لسلفه، وارتفاع عدد المقترعين المسلمين في فرنسا، وبين مقال مثل مقال هابر الذي يستخلص من سبعين حجابا، وأمير نفط واحد رآه في "هورودس" لنفترض، بأن المسلمين (محمد) أو اليهود (رابينوبيتش) يسيطرون على أوروبا، والعياذ بالله."

وختم: "من صحافي قديم ونزيه كإيتان هابر، أتوقع أن يعترف بخطأه ويعتذر عليه أمام قرائه من يهود وعرب على حد سواء.
----
من حيث قديم فهو قديم وابن قديمة..فين النزاهة بقى؟ ومحمد؟ مالهم ومال محمد؟ يعني انا عمري ما شفت ناس قاعدة تفكر طول الوقت في واحد مات من الف وربعميت سنة وحارقهم كل الحرقة دي انا عايزة افهم هو عمل لهم ايه؟ هو عمل ايه لاي حد في الدنيا؟ غايظهم وشاغل بالهم قوي كده ليه؟ ده مسلمين كتير ما بيفكروش فيه كل الوقت ده... لا حول ولا قوة الا بالله يعني صعبنا على نيف؟ مش بعيد بكرة نصحى نلاقي اولمرت طالع بيقول: يا اخوانا مش كده..اعتبروهم قطط وكلاب

ام زينب

بئر الحكمة
بالنوسبة لي على الاقل، النهاردة قالت باختصار: ياااه انا باكره المثكفين دول قوي...نصابين وينطبق عليهم جملة: يكولون مالا يفعلون...مرضى

يا سلااااااااااااااااااااااااااااام يا ام زينب

انا فعلا لازم افتح مدونة لام زينب واكتب وراها كل حكمها النافذة العميقة
في اي حتة في الدنيا المثقف هو اللي بيعمل في المجالات الي بيتقال عليها ثقافية، اي حاجة يعني مؤثرة في ثقافة الناس، وبتأثر فيهم وتشكل مفاهيمهم من اول الكتب ام جلد تخين دي لحد الرقصة ام جيبة ومزامير
في مصر، المثقف هو الشخص اللي ما لقالوش شغلانة فقرر يشتغل مثقف، هو اللي عنده عقدة نقص فيقرر انه يقول كلمتين ماحدش فاهمهم، هو الشخص اللي امه ما كانتش واخدة بالها منه ولا بتسمعه لانها كانت بتحب اخواته اكتر منه او عشان عددهم كان كبير، فيحب يلفت النظر ليه بانه يضرب ابقاق في الهجايص مش مبنية على اي منطق ولا اي ثقافة بس تعمل صدمة، زي انه مثلا يطلع يقول: على الفكرة البول طعمه احلى بكتير من عصير العنب؟ ليه البول مضطهد وبيفضلوا عليه عصير العنب؟ على الفكرة البول هو الانسان والانسان هو البول، البول منا والينا
انا احب البول بالرغم من تحفظاتي الايديولوجية على قيمة البول كمكون حضاري في نسيج الذهنية الاجتماعية المترسخة في عمق الفولكلور الريفي واختلافه عن تلك التراهات المتجسدة في اهازيج الصعيد القديمة
مكونات الثقافة: 1- انك تتكلم بالظبط زي الفقرة اللي فوق دي بالظبط
2- انك تقعد على القهوة كتير وما تقراش حاجة خالص
3- انك تمارس الطبقية الفكرية، بحيث انك تتعامل مع اللي قدامك على انه ما بيفهمش اكيد وانت اللي بتفهم وتضرب اسامي كتب: قريت كتاب الانسان المتبول في خضم السفر الكوني المتأطر لعبد الفتاح عز الدين قمر
4- بقت قديمة حكاية عدم الحموم دي، وما بقتش شرط
5- انك تبقى بيض مسلوق بس ممشش
حاول تستبضن على قد ما تقدر
6- انك تصحى الصبح وانت بيض مسلوق ممشش وتقرر ان كل المساهمين في تكوين ثقافة البلد او الامة وصناعتها من اول امرؤ القيس لحد النهاردة حمير وبهايم ومش مبدعين
لو حد سألك طب فين ابداعك انت يا عم المبدع؟ اضرب اي كلام مش مفهوم، صدقني ح يتكسفوا يقولوا لك ايه الطراش ده...اقله ح يسكته
7- حاول تقول ان السينما المصرية كيك، حاول تشتم بقى كل المطربين الجداد والقدامى وتتكلم عن تهافتهم وتسطيحهم لازمة الوجد الانسانية في ميدان التحرير
8 - بص هو مبدئيا الثقافة لا تعتمد على قراية ولا سماع مزيكا ولا تعمق في ثقافتك الوطنية التاريخية والحاضرة...الثقافة بتعتمد على عنصر المفاجأة...في كل حاجة
رأيك مفاجأة: زي انك تقول مثلا ان هند رستم وهدى سلطان مش مزز ولا حاجة، دول بينضحوا بالرجولة النفسية
او انك تتعوج على شغل الناس، يعني واحد يبقى باذل كل الجهد في فيلم حلو ما يصحش انك تقول على فيلم حلو، عيب، المفروض كل الافلام والمسرحيات والاشعار والروايات اللي انت بتشوفها وبتقراها وحشة ده اساسي، طبعا اقصد العربي، الاجنبي ، اي اجنبي، خصوصا اللي اخدت جوايز لازم تقول عليها حلوة حتى لو مش طايقها، ما يصحش تقول: اخد جايزة على ايه ده؟ ده بيض...
واحد عامل اي عمل ابداعي، خصوصا بقى لو حاجة التاريخ بيتغنى بيها، او كل الناس بتقول عليها عظيمة، حاول انك تقول عليها كلام مش مفهوم بس يتفهم منه انك مش عاجبك يعني الراجل ده وخلاص، بس طبعا برضه ده ما ينفعش يتقال على اي حد بيكتب بالانجليزي، وانت طبعا ح تقول انك قريته مترجم، بس اوعى تقراه، انت ح تضيع وقت؟ انت وراك قهوة، ومؤخرات نسائية رايحة جاية يا عم
لبسك مفاجأة: مش مفاجأة قوي هو عموما لازم يبقى معفن يعني
ريحتك مفاجأة: مش ح اوصيك بقى
تعبيراتك مفاجأة: يعني زي ان يبقى بني ادم قاعد قدامك وتقول عليه: زكي ده حد حقيقي
يعني ايه حد حقيقي؟ وليه بتقول عليه حد؟ مع ان حد دي بتتقال للي الواحد مش عارف هو مين: حد دخل الاودة؟ حد فسا في الاسانسير وخلا ريحته قبر؟ حد تف عليا من الشباك؟ لكن انت عارف انه زكي، وعارف كمان ان اسمه زكي، وعارف انه حقيقي، يعني ايه حقيقي؟ مش خيالي يعني..غالبا كده، طب بتقول عليه حد ليه؟ ماحدش ح يجرؤ يسألك يا حمار، لانهم متفاجئين
وهكذا اشتغل على المنوال ده...ياللا قوم ياعم بدل ما انت قاعد فاضي وربنا يخلي لنا البطالة والعطالة ووسط البلد

Friday 29 August 2008

تمت

مش قادر يا نفسية مش قادر
انا اصلي لما باكتب البوست مش بارجع اقراه تاني ويطلع زي ما يطلع يعني باكتب باللا وعي
بس بما اني كتبت بلغة سبيس تون قلت ابص كده انا عاملة ايه؟
ايه ده؟
انا كنت مجنونة وانا باكتب الكلام ده؟ وانتوا سايبيني كده؟ بتاخدوني على قد عقلي يعني؟ مهبوشة انا ح تجوزوها هنومة يا قناوي يابني؟ ما هزأتنويش ليه على اللي انا كاتباه؟
ايها الاخوة الصياديون
من الافضل ان تأتوا الى مصر لتتعلموا اللهجة العامية لانني عدم اللامؤاخذة ما اقدرش اعمل في البشريات كده عشان ربنا ما يعذبنيش واحنا داخلين على شهر مفترج
تمت

مقتطفات من خطاب أوباما

لم أسمع خطاب أوباما وعليه فإنني لا يمكن أن أحكم على الخطاب دون سماعه كاملا، إلا أن ذكرياتنا مع أوباما منذ أن تم ترشيحه وحتى الآن ليست بالذكريات السعيدة. مجمل القول أن أوباما..فلتعذرني الترجمة الإلكترونية..ح يموت يبقى رئيس، سوف يقتل نفسه ليصبح أول رئيس أسود يدخل البيت الأبيض، ومستعد لارتداء عقل أبيض والتضحية بالعقل والقلب الأسود في سبيل نصرة الجلد، الحقيقة أن ما أورده موقع الجزيرة من مقتطفات لخطاب أوباما لم تكن مشجعة على الأطلاق، بل تنضح بالتهديد والوعيد من جانب، وبالغطرسة والتكبر من جانب آخر
التهديد والوعيد جاء في هذه الصيغة:
بوصفي قائدا (للجيوش) لن أتردد أبدا في الدفاع عن هذا البلد، ولكن سأرسل جنودنا للمخاطرة بحياتهم فقط من أجل مهمة واضحة وبالتزام مقدس بأن تكون معهم جميع التجهيزات الضرورية للقتال وأن يحصلوا على إسعافات ومساعدات يستحقونها بعد عودتهم".
ومنذ متى كان الدفاع عن البلاد خارج حدود البلاد؟ هذا المقتطف يعني أن السيد أوباما مستعد لشن غزوات استعمارية أخرى شريطة أن يوفر سبل الراحة والأمان وعلب البيرة وقطع الشيكولاتة للجيش الأمريكي حتى لا يعاني ما عاناه في العراق حيث أن بيرة في العراق ساخنة كما أن الشيكولاتة فقدت تحت هدم بيت من البيوت التي سقطت من جراء القنابل العنقودية، وعليهم أن يؤمنوا مكانا لاحتياجات الجيش بعيدا عن قنابلهم
أما المقتطف الآتي:
وأكد أوباما أمام 75 ألف شخص أن الذي جعل من أميركا بلدا ليس كالدول الأخرى هو العمل الجاد، وأشار إلى أن الحلم الأميركي يتحقق بالتضحيات والتجمع في العائلة الأميركية الكبرى للتأكد من أن الجيل الجديد سيتمكن بدوره من مواصلة هذا الحلم.

ومن قال أن أمريكا بلدا ليس كالدول الأخرى؟ وما هو الحلم الأمريكي؟ أنا

لا أرى إلا كابوسا مريعا. ماهو الخلل العصبي المسئول عن جنون العظمة

الأمريكي الذي يصور للأمريكيين أن الولايات المتحدة بلدا ليس كبقية

الدول (كانت هذه ملحوظة مشتركة بين كل الخارجين من معتقل جوانتانامو:

أنت أمريكي إذن فلست كسائر البشر)، نعم هي ليس كبقية الدول من حيث أن

كل دولة لها تاريخ وأمريكا ليس لها تاريخ، أو أن تاريخها الحقيقي

مسروق، كما أن كل دولة هي دولة، أما أمريكا فهي شركة متعددة الجنسيات

يرزح فيها المواطن الأمريكي تحت نير الكريدت كارد الذي يجبره على العمل

كالكلب صباح مساء ليسدد الفواتير التي لا تسدد أبدا


كما أن كل الناس تعتز ببلادها وتشعر أنها غير بقية الدول، والطبيعي أن

كل دولة لا تشبه الدول الأخرى، فلماذا يتحول أوباما من عنصرية اللون إلى

عنصرية القطر؟


أي حلم؟ أنا أريد أن يشرح لي عاقل تفاصيل هذا الحلم,..خير اللهم اجعله

خير؟


بالنسبة لمصرية عربية مسلمة الحلم الأمريكي هو عبارة عن أطعمة سريعة

تصيب المرء بالإمساك، وليل مضاء على شاشات التلفزيون يصور بغداد

وأفغانستان وهما مشتعلتان، ومساكين عزل مقيدة أيديهم وأقدامهم

ومكممة أفواههم ومغماة أعينهم لا لشيء سوى أنهم ينتمون إلينا: الأمة

المجذومة



هل هذا هو الحلم الذي يريد أن يحافظ عليه الفلاحون والبسطاء في أمريكا

يا ريتشارد؟ خيبك الله


أخبرني مواطن مصري بأن أوباما لم ينسنا من صالح وعوده، فقد وعد بأن

يغير أنظمتنا، كثر الله خيره، وأكثر من أمثاله في الجحيم المقيم، من

قال له أننا ننتظر منه أن يغير لنا أنظمتنا؟ نحن لا نطلب أكثر من أن

يرفع عنا قبضته وكما يقول المثل المصري: يا نحلة لا تقرصيني ولا عايز عسل

منك


ربما يدخل أوباما البيت الأبيض وسيكون أول صاحب جلد أسود يدخل البيت

الأبيض


لكنه لن يكون أول صاحب جلد أسود وعقل أبيض


وربما يقتل، برغم كل ألاعيبه البهلوانية ليضحك البيض ويسعدهم، قبل أن

يدخل البيت الأبيض


لكن أوباما ميت قبل أن يقتل، قتلته المحفوظات الأمريكية والنظام

الأمريكي الذي نزع منه أبسط قواعد المنطق وأبسط المشاعر الإنسانية


رحم الله الفقيد ولآله الصبر والسلوان ولي أنا قطعة شيكولاتة لو سحمتم


افففف

انا زهقت من سبيس تون

يبدو أنني سأضطر للكتابة باللغة العربية من الآن فصاعدا

لأنني اكتشفت من خلال العداد أن هناك من المقيمين بالخارج من يترجمون الصفحة إلى اللغة الإنجليزية، وبالطبع الترجمة الإلكترونية لن تتمكن من ترجمة اللهجة العامية المصرية، لذلك فسأضطر إلى التحدث هكذا مثل سبيس تون من الآن فصاعدا، وعليكم أن تتحملوني، وقد أعظر من فنظر...يييي اقصد أعذر من أنذر
أما عن أخباري الجديدة فإنني أطلب منكم أن تشددوا الدعاء لي لأنني مقدمة على عمل أظنه سيكون فيه خيرا كثيرا، وانشغالي بالعمل سيرحمكم من تلقيماتي المتتالية والمتتابعة لذلك فإن الدعاء لي سيكون في صالح من يحبون المدونة ومن يكرهونها إذ أن الأخارى سيتخلصون من العبء الذي أثقلوا به كاهلهم وهو قراءة مدونة يكرهونها
إلا أنني مصرة على إكمال ترجمة جلد أسود أقنعة بيضاء إن شاء الله، لكنني سأنشغل الفترة القادمة
فعليكم الانتظار قليلا
وسأكمل الترجمة إن شاء الله بالعامية وسيقوم أبو أمير بترجمة العامية إلى الفصحى
وأظن أن بهذا سيكون قد تخطاني العيب وقزح
ماذا قال أوباما اليوم في خطبته؟ هل من مجيب يابن حلزة؟

اهو بيقولوا لكوا ما تروحوش لندن

يعني انا لما قلت ماحدش فيكو يقضي اجازة الكريسماس في لندن السنة دي كان معايا حق وللا لا؟
اهو اهل الشاب اللي اتقتل في انجلترا بيقول ان الواد قبل ما يموت بعت لهم يقول لهم الجو عدائي ضد العرب جدا وانه خايف على نفسه
عشان ميت مرة حذرتكوا من المرواح والمجي على لندن كتير...يا اخي انت وهو اعملوا شوبينج من باغي انشالله من المانيا ولو انها ذوقها بلدي قوي في اللبس
مش لازم لندن كل ست شهور يعني
ولما الملكة تبعت لكوا ابقوا اتحججوا باي حاجة عشان ما تجرحوش مشاعرها
الا بقى المسئولين البريطانيين بقوا عاملين زي المسئولين المصريين ليه؟
ومن جانبه، نفى النائب عن هاستينجز مايكل فوستر ان تكون بلدته مدينة عنصرية. وأضاف قائلا "إن العنصرية أبعد ما تكون عن أذهان غالبية السكان ولكن هناك أقلية من الأفراد الذين يلقون تشجيع الجماعات المتطرفة".
!!!!
وده ايه ده؟ ده ناقص يقول ان الواد هو اللي غلطان عشان شكله مستفز


هم خدوا دورة تدريبية عندنا وللا حاجة؟

Thursday 28 August 2008

يا مظاهراتك يا مارينا


يا جمالي، بنات مارينا ردا على الشيخ الآثم اللي اتجرأ واتريق على مهند وقال لهم بدل ما انتوا قاعدين تهبلوا ما تشوفوا لكوا حاجة تعملوها قوم عملوا مظاهرة....ايون مظاهرة وهم لابسين صور مهرند ولما شباب مارينا اللي مسميينهم شباب المارينز شاف البنات الجدعان بنات مصر اللي يشرفوا، بنات مصر اللي عايزين سرايا صفرا يترموا فيها بعد ما يتكتفوا في السرير عشان يتعالجوا بالكهربا عاملين المظاهرة دي قام تضامن معاهم شباب المارينز اسم الله عليهم اللي مش ح اقول بقى لو قامت حرب، لو حد فقع جيصة عالية شوية ح يغمى عليهم وحسب موقع العربية نت
ان من بين الفتيات اللاتي حركن مظاهرات مهند على الشواطيء حفيدة احد الضباط الاحرار، و"شخص مقرب جدا جدا من الرئيس المصري الراحل جمال عبد الناصر، وابنة أحد رجال الاعمال المهمين حاليا في مصر، وحفيدة سياسي حالي كبير. وشارك شباب في المظاهرات مرتدين صور البطلة "نور" وسلاسل تحمل صورتها وأساور في أيديهم تحمل اسمها.

لا وايه مدرسة الفيوتشر وطيبة وعدوهم انهم يستضيفوا مهرند
يعني معلش يعني، زمان لما استضافوا نباتات بشناب وللا ابطال الجريء والجميلات في مصر كانوا جايين تبع مهرجان
مش مدارس بتربي النشء هي اللي جايبالهم مهرند يلعبوا بيه
انبي تعوض عليا عوض الصابرين يارب
جاتها نيلة اللي عايزة خلف...دي تربية ايه دي يا ربي

استر يا رب

والله لسة بدري والله يا شهر الصيام
احم..انا باحب رمضان قوي والله العظيم بس ده خلاص التلات الجاي في الحر ده
امال ح نعمل ايه السنة الجاية...ياااااااااااااارررررررررررب اموت قبل ما ييجي السنة الجاية
انتوا عاملين ايه في الحر ده؟ انا دماغي ساح ولساني طالع لبرة ربنا يستر بقى
ان شاء الله ان شاء الله قبل رمضان بيوم ربنا ح يحسن الجو
ان شاء الله

طب قدر ان مصر موافقة على تهديدات اسرائيل

يعني ابو الغيط قال ان مصر مش موافقة على تهديدات اسرائيل للبنان
لا وايه...بلغت اسرائيل بالكلام ده
وطبعا اسرائيل دلوقت بتقرقض في ضوافرها وركبها بتخبط في بعض ومش عارفة تنام ولا تاكل ولا تشرب ولا تفقر عند حائط المبكى عشان ابو الغيط قالهم: انتوا نوتي نوتي نوتي
طيب ما مصر من سنتين كانت موافقة على ضرب لبنان ايه اللي حصل؟
طيب السنة دي مش موافقة على ضرب لبنان ايه اللي ح يحصل؟
ليه يا ابو الغيظ بتحطنا في مواقف بايخة وتضحك علينا الامم؟ مش كفاية البتاع ده؟

يعني تقولوا لنا اخصوهم وبعدين تقولوا لنا يا بلطجية




والله يساري مصري فكرني بحملة: الاخصاء هو الحل، وح تعاكس ح نخصيك
اللي اتعملت ايام التحرش الجنسي واهي التدوينات اللي لقيتها ومش لاقية البوستر بتاع ح تعاكس ح نخصيك
بس بصوا التدوينة الجامدة دي
ودي تدوينة بتشرح لينا ازاي عدم اللامؤاخذة نخصي الرجالة المتحرشين
ودي تدوينة من ابو المدونين بيقود ثورة الاخصاء
ويوم ما واحدة تسمع كلامكوا تقولوا لها يا بلطجية وازاي تتصل بابوها
اذا كانت ح تنضرب يبقى تعمل اي حاجة..مش انتوا اللي قلتوا لنا كده؟


اعتذار واجب

انا كنت زمان كتبت بوست عنوانه المدونة لا ترحب بالمعاقين ذهنيا، وانا ح ادور عليه واغير عنوانه لان فعلا استخدام اللفظ ده غلط كبير مني ومن اي حد بيستخدم كلمة معوق ذهنيا او عته منغولي عشان يشتم حد او يتهمه بالغباء. الغباء غباء، عادة بيبقى بارادة الانسان. لكن الاعاقة مش شتيمة وما يصحش اني كنت استخدمها في شتيمة وانا فعلا كنت غلطانة وفظة وقليلة الادب كمان اني استخدمت الكلمة دي لان المعوق ذهنيا مش غبي، ده عنده اعاقة زي اي اعاقة ومش كونه انه ممكن ما ياخدش باله بانه بيستخدم بالطريقة اللا انسانية دي، ده مش معناه اننا ما نراعيهوش زي ما بنراعي اي مصاب باعاقة تانية بس الفرق بينه وبين المعوق ذهنيا انه واعي وفاهم اللي بيتقال حواليه، حاجة فظة فعلا انا ربنا يسامحني على قلة ادبي وفظاظتي وغلاظتي دي انا اسفة لكل ام او اب عندهم ابن من ذوي الاحتياجات الخاصة وممكن اكون جرحتهم بالكلمة دي واسفة لكل واحد من المعاقين ذهنيا اني استخدمته عشان اشتم بيه واحد مضايقني

الحقيقة اللي لفت نظري للموضوع ده مينا وهو بيكلمني النهاردة وقال لي ان فيه واحدة كانت عايزة ترفع قضية على عدد من الصحفيين اللي لما يحبوا يشتموا حد يستخدموا كلمة عته منغولي ومعاقين ذهنيا وقال لي المعاقين دول انسان ولهم حقوق وما يصحش اننا نستخدمهم بالشكل ده ومينو معاه حق وانا شاكرة له انه لفت نظري الواحد بيئذي من غير ما ياخد باله والصحاب برضه لهم لازمة
يا حضرة الظابط ياللي مراقب المدونة لو سمحت هاتلي بهيج ده من تحت الارض عشان يبقى مينا يصدقني

Wednesday 27 August 2008

اعمل راجل في حتة تانية


احنا ح نلبس كده

وكده

وكده

وح نشيل ده

وده كمان

ومش ح نلبس على كيف حد ولا نتصرف بالطريقة اللي حد تاني يمليها علينا واللي عايز يعمل راجل يعمل راجل على حسني مبارك وعلى رجال الاعمال مش علينا وماحدش ح يربينا ويعلمنا نتكلم ازاي ونقول ايه اللي عايز يربي يبقى يربي نفسه واللي تسمح لحد انه يتعرض لها وتسكت تستاهل اللي يجرا لها
سوا من اللي بيقولوا لها انت السعودية اللي ملبساكي او اللي بيقولوا لها انت لبسك مش اخلاقي...سوا اللي بيتحرشوا بيها جنسيا او اللي عايزين ينزلوا يضربوها في حادثة عربية بعد ما دفعت لهم الفلوس
واللي ح يشتم ح نشتمه ونشتم اللي خلفوه واللي يتشدد له وبالطريقة اللي تعجبنا وتفش غلنا
واللي ح يضرب بايده ح نضربه بالجزمة وباكتر من الجزمة
ومش من حق حد يصورني وانا ماشية في الشارع وللا حتى باتخانق في الشارع من غير اذني
واذا مافيش حكومة ولا ناس يدافعوا عنا قصاد البلطجية اللي ماليين الشارع من حقنا ندافع عن نفسنا باي اسلوب وبكل وسيلة ممكنة مدام البلد عدمت الرجالة اللي عندهم نخوة تدفعهم انهم يدافعوا عن ست بتتبهدل في الشارع وكمان لما تدافع عن نفسها يصوروها ويشهروا بيها
-----
ملحوسة: الفيديو ده بقاله مدة على اليوتيوب...ايه اللي طلعه دلوقت؟

البلطجة حق ذكوري...زي رئاسة الجمهورية كده

هي دي كمان قضاء ورئاسة جمهورية عشان تبقى بتاعة الرجالة بس؟
فيديو انتشر على المدونات ومش ح انشره ولا ح ادي له لنك عشان انا مش منضمة للحملة اللي ضد البنت دي
الفيديو ما صورش غير البنت وهي بتشتم ومطلعة عصايا، لكن من كلامها سامعينها بتقول: انت عايز تضربني انت؟ انت تضربني؟ لو راجل وراضع من ...امك خليك واقف
وبعدين رايحة جاية مش عارفة تعمل ايه وراحت ماسكة الموبايل وعملت نفسها ان ابوها ظابط شرطة وباين جدا انها كدابة عشان تخوفه وبتقول: خبطت له العربية ودفعت له الفلوس وواقف يبلطج عليا في الشارع

طيب...الشوم والعصيان بقوا من المعدات الاساسية اللي في عربيات الشباب، وشباب والله ولاد ناس والمفروض انهم متربيين احسن تربية، ولما تكلمهم يقول لك: ماهي البلد بقت ماشية بالبلطجة ولو استنيت القسم يمكن انا اللي البس قضية مخدرات
متهيالي اي حد بيمشي في الشارع زي اي مواطن بيشوف كتير شباب ماسكين شوم لبعض وكل واحد فيهم بيقول للتاني: انت عارف انت بتكلم مين؟ انا اخفيك...انا اوديك ورا الشمس
وهو اصلا بيهوبص في الكلام عشان يخوف التاني

المشاهد دي بتعدي عادي وماحدش بيصورها. لكن لما بنت عملت كده اتصورت واتوزع الفيديو على الناس، مش بس اتصورت، ده اللي صور ما رضيش يصور قلة ادب الواد اللي كان عايز يضربها بعد ما دفعت له فلوس الخبطة، على اساس ان ده طبيعي يعني، راجل وعايز يضرب ست فيها ايه دي؟ عادي ده دوره في الحياة، دوره في الحياة انه يفشل في كل حاجة، يفشل في انه يشتغل ولما يشتغل يبقى شبشب في رجل المدير ويفشل انه يقف قصاده، يفشل في ان الظابط لما يوقفه ويقول له بطاقتك يالا يقول له انت مش من حقك تعاملني كده، يفشل في انه يدافع عن الف واحد ماتوا في عبارة وينزل يعتصم في الشارع وللا حتى يتضامن مع اهالي الضحايا، يفشل في انه يدافع عن بلده اللي بقت مداس لاسرائيل وامريكا ورجال الاعمال والشركات المالتي ناشونال
وينجح بس في انه ينزل يضرب ست في الشارع ولما هي ترد عليه بنفس طريقته تبقى سافلة وكلبة وبنت ستين في سبعين
لان الست دورها في الحياة انها تبقى مفشة يفش الراجل فيها غله وفشله وعجزه وخيبته
امال يعني احنا ربنا خلقنا ليه؟
صح؟

اذا كلنا متفقين على ان سياسة البلطجة اللي عمت الشارع المصري سياسة مرفوضة شكلا وموضوعا
يبقى انا مستعدة كل يوم اتحفكم بفيديو لاتنين شباب ماسكين الشوم والكرابيج لبعض
مش بس لبعض
دول بيقلعوا الحزام وينزلوا يضربوا العيال الصغيرة اللي بتسوق العربيات الكارو عشان اتجرأ ومشي قدامه
بس قبل ما نحارب البلطجة نشوف مصدرها
مصدرها غياب القانون وان زي ما بعض الشباب قالوا لي: انا لو استنيت القسم ياخد لي حقي في حادثة عربية ح اخرج شايل قضية مخدرات ده الى جانب احساس المصريين المتنامي بالفشل والاحباط والعجز والسلبية اللي بيخليهم يستضعفوا لهم عيل صغير سايق عربية كارو او واحدة ست وينزلوا ضرب وقلة ادب
انا مرة كنت واقفة في الاشارة، عادي الاشارة حمرا وانا واقفة فيها حاجة دي؟ فيها جريمة يعني؟ قام الراجل اللي ورايا خبطني في ضهر عربيتي، حلو، والله حلو لاني بصيت في المرايا وقلت معلش تلاقيه زهقان من ان الاشارة واقفة بقالها كتير...الله يسامحه..لازم نشيل بعضينا يا حورية، وطنشت ولا كأن فيه حاجة حصلت ولا حتى بصيت له من الشباك
فيها حاجة؟
اه طلع فيها، عشان حبيب امه نزل من العربية وقعد يبلطج عليا وعايز يتخانق معايا ويضربني
انا خفت وسكت لانه راجل وممكن يضربني فعلا وانا مش معايا شومة ومش من عادتي اني اطلع التليفون وامثل اني باكلم اللواء اركان حرب، اصلا كان ح يبان عليا اني كدابة
طيب لما بنت يوم بعد يوم تتعرض للموقف ده، والله اعلم يمكن سبق لها وانضربت زي ما واحدة صاحبتي انضربت من راجل وسخ قبل كده مع انه هو اللي خابطها وده بيحصل كتير على فكرة، قوم البنت اللي في الفيديو دي قررت انها مدام ماحدش بياخد لها حقها تاخد حقها بايدها
اشمعنى لما الرجالة بيعملوا كده يبقوا معذورين وكمان جدعان ويمشوا يفتخروا في كل حتة انه: ثبته...خليته واقف ح يشخ على روحه
ولما بنت تعمل كده تبقى سافلة، انا صاحبتي لما انضربت في الشارع من راجل هو اللي كان خابطها
اولا: ماحدش اتدخل عشان يحوش عنها يا رجالة مصر
اتفو
ثانيا: راحت القسم والراجل اتهمها بانها هي اللي ضربته وعور نفسه عليها
ثالثا: الظباط بصوا لها وضحكوا وعرفوا ان الراجل كداب لان البت اصلا سفيفة وهو قد الطور وعملوا محضر صلح وما اخدولهاش حقها
ها؟

ماحدش يروح لندن تاني بقى

ده مش اول ملون مسلم يتقتل لاسباب عنصرية
قبل كده ولد باكستاني اسمه محمد حسن ومعاه جنسية بريطانية وبيدرس في بريطانية اتقتل في لندن ولاسباب عنصرية برضه
وكل مرة يقولوا اللي قتلوه كانوا سكرانين عشان يخففوا عنهم العقوبة
يعني كمان القضاء عنصري
ماحدش لندن تاني بقى
ايه اللي حصل لهم اتجننوا؟ دي امريكا جنة بقى على كده

نورت يا قطن اسرائيل يا حلاوة عليك يا خليل

مش ممكن، مش معقول، مش ممكن يكونوا بقالهم اربع سنين بيخربوا بيوت الفلاحين في القطن عشان يستوردوا القطن من اسرائيل، مش ممكن اول سنة يطلعوه مدود وتاني سنة اصفر وتالت سنة من غير ثمرة ورابع سنة ينزل سعره الارض عشان نستورد قطن من اسرائيل
لا لا لا
انتوا بتضحكوا عليا
انتو بتغرغرو بيا
انتوا بتستغلوا سذاجتي وبراءتي وقلة خبرتي ومراهقتي وتقولوا لي كلام ما بيحصلش
قولوا لي ان الكلام ده ما حصلش
قولوا لي موقع مصراوي بيهرج تهريج زبالين

انا اتخنقت فعلا

دلوقت زغلول النجار بيقول الكلام ده
الكلام ده بيقوله انه عرفه من مصدر غير مباشر...يعني ايه مصدر غير مباشر؟ يعني ايه؟ فيه حاجة في الدنيا اسمها كده؟ ايه المصدر المباشر يعني؟ وايه المصدر غير المباشر اللي هو عرف بيه؟ جات له رؤيا مثلا؟
ولما هو عرف الخبر ده على وجه اليقين ما اتقدمش ليه بطلب للنيابة للتحقيق في مقتل وفاء قسطنطين؟
يعني ماهو يا اما متأكد من حاجة زي دي ويقدم بلاغ بصفته مواطن او يوعز لمحامي انه يقدم بلاغ عن اختفاء وفاء قسطنطين او انه وصله خبر يقين ان وفاء قسطنطين اقتلت والنيابة تحقق واول حاجة ح تعملها النيابة انها ح تبعت على عنوان وفاء قسطنطين وتشوف اذا كانت اقتلت وللا عايشة وزي الحصان
مش كده برضه؟
مش ده المسلك القانوني الطبيعي يعني؟ وللا يطلع في الاعلام يتهم ناس بالقتل ومش عايز كمان يقول مصدره؟ طيب يقدم بلاغ للنائب العام وللا للنيابة وبعدين يعمل ضجة اعلامية وانا مستعدة ابقى اول واحدة انضم للحملة دي، بس يجول لي حاجة واحدة م اللي ربنا كتبها علينا...يعمل اي حاجة قانونية تقول انه مش بيضرب بمب في الهوا..صح؟ مش ده العقل اللي ربنا عرفوه بيه؟ وللا ح يفضل يتكلم كده من غير اي ادلة ومن غير اي خطوات قانونية تأكد انه متأكد من كلامه لحد ما يفقد مصداقيته خالص؟ وبعد كده بقى نصيحة للصحف والمواقع الالكترونية ماحدش ياخد من الراجل ده اي تصريحات عشان طول النهار يقول في اتهامات خطيرة وكل اسانيده: انا عرفت بس مش ح اقول مين عشان اللي قال لي حلفني بالطلاق وع المصحف اني ما اجيبش سيرته وربنا حليم ستار وربنا ما يجعلنا من خرابين البيوت
يحلوا عنا بكلام المصاطب ده بقى يا اما يجيب دليل على كلامه او يطلب التحقيق فيه

Tuesday 26 August 2008

عود احمد المسلماني

اولا نحب نهني اهالي كفر العلو باستلام الشقق، واحلى تحية لشباب ابناء مصر وصحبتهم ومجالهم اللي فضلوا ورا الموضوع لحد ما اتحل، وبعد ربنا ما حدش حل الموضوع ده غيرهم على فكرة

ثانيا: والله اللي رجعني لعقلي هو احمد المسلماني، طبعا طبعا ما سمعتش كلامكوا ولا غيرت جو ولا بطلت قراية جرايد ومتابعة اخبار، طبعا يعني اظن ده كان متوقع وللا ايه؟ وللا فيه حد كان لا سمح الله مغشوش فيا؟

امبارح احمد المسلماني ادا بونيتين خلاني اصقف له في الشغل وهو بيتكلم: البونية الاولانية مفادها: ساويرس ما بيردش ليه؟
ما بيردش ليه علينا؟ اسرائيل عمالة كل يوم تبعت لنا ملابس جوزنا الداخلية واحنا نسأله ايه ده يا راجل ما يردش علينا. لو كان اخرس زي احمد عز وهشام طلعت كنا قلنا معلش اهي عاهة ونصيبنا كده
انما يعني اسم الله عليه ما بيبطلش رغي وكلام وتصريحات ومقالات، مرة يقول الحكومة المصرية دي احسن حكومة جات مصر، ومرة يقول الحجاب مش لبس مصري ده بيعمل فتنة طائفية، انا عايزة افهم يعني هو اللي لابس جيبة كتان وصندل بصباع وحالق زلبطة وحاطط كحل ابو شرطة زي الفراعنة يعني؟ اشمعنى الجينز والتي شيرت اللي هو لابسهم - ما بيلبسش بدل كتير هو - لبس مصري يعني؟ واذا كان وفقا لمجلس الوزراء حوالي 83 في المية من ستات مصر لابسين زي معين، باي منطق انا اطلب اني افرض عليهم يغيروا الزي ده عشان فيه 17 في المية مش لابسينه بدعوى اني ما اعملش تمييز ولا افرق بين المواطنين؟ يعني لو انا اسبانية مسلمة مثلا، اطلب من كل الاسبانيات انهم يلبسوا حجاب زيي عشان اسبانيا دي اصلا كانت بتاعة المسلمين وهم كلهم لازم يلبسوا زيي عشان ما يبقاش فيه تمييز؟ لو كان ولابد زي موحد للمواطنين عشان نتجنب الفتنة الطائفية - ولو اني مش مقتنعة بان اللبس بيعمل فتنة..الفقر ورجال الدين هم اللي بيعملوا فتنة - يبقى السبعتاشر في المية هم اللي يلبسوا زي 83 في المية مش العكس.
ومرة تانية كتب مقال يدافع عن محمد دحلان ويقول عليه راجل وطني!!!! يعني اسم الله عليه اهو عشرة في لسانه وبيتكلم ويكتب ويرد ويعمل كل حاجة
طب ما بيردش على الفانلات اللي بتجيلنا من اسرائيل ليه؟ اشمعنى دي اكل فيها سد الحنك؟
اللي بيدافع عن ساويرس بمنظور طائفي، رغم اني مستهبلاه لان راس المال مالوش دين، الا اني عاذراه، لكن ان فيه ناس بتدافع عنه عشان شكله حلو ودمه خفيف ومش منشي زي بقية رجال الاعمال وصعيدي؟
بالذمة دي اسباب موضوعية تخليه يتعامل مع اسرائيل وكمان يشغل وزير الدفاع بتاعها موظف عنده؟ ولما نكلمه ما يردش؟
البونية التانية اللي اداها المسلماني في خبر بخصوص ان الحزب الوطني بيوزع كراتين رمضان
!!!!
آه...يعني احنا بنتقلع ملط وبندفع ضرايب تجوعنا عشان يرجعوها لنا صدقات، بيتصدقوا علينا بفلوسنا
ما شاء الله
اللهم قوي ايمانكم يا آل الحزب الوطني
طبعا احمد المسلماني ما شرشحش زيي كده
بس قال، هو الحزب الحاكم مهمته يعمل تنمية ويخلي الناس تشتغل وما تشحتش وللا مهمته يعمل الناس شحاتة؟
والاجابة اظن معروفة يعني وسهلة، اكيد اسهل من اجابة اسئلة كادر المدرسين
شغلتهم يعملوا الناس شحاتة، وشحاتة بفلوسها كمان وهي دي عبقرية الحزب الوطني
يدوا فلوس البلد لرجال الاعمال وما يدفعوهمش اي تبرعات خالص
وياخدوا من المواطنين ضرايب، وبعد ما ياخدوا اللي فيه القسمة على اساس انهم العاملين عليها، يرجعوها صدقات، ليه؟ عشان عايزين ياخدوا ثواب
وبكرة يطلع لهم فتوى بان فيه قصر في الجنة باسم الحزب الوطني
هي دي التجارة مع الله وللا بلاش
الا والنبي عايزة حد يفتي لي: فيه قسم في الصدقات اسمه قسم الجلا جلا؟

Monday 25 August 2008

انا زهقانة

زهقانة مش عارفة كده فجأتن، عايزة اهدا شوية، انا في حياتي كمية اغبيا مالهمش عد، وغباء استراتيجي، والغباء الاستراتيجي ده له علاقة بان واحد يبقى غبي وموهوب في الغباوة وعنده خيالات واوهام عن نفسه انه المعي الزمان، ياااااه دول عددهم كتير قوي، وغالبا بيبقوا رجالة، نو اوفنس يعني، وكمية ناس انانية ما بتفكرش غير في نفسها بعدد النمل اللي في القاهرة مدينة النمل، وانا احصابي تحبت
محتاجة افصل واقعد لوحدي خالص
واقرا حاجات مالهاش علاقة بدلوقت ولا بهنا

Sunday 24 August 2008

اسرائيل تصادر كل وثائق القدس

كده بلطجة الاسلامية والمسيحية وحطهم في عربية روري ومشيت
الظاهر بقى تمهيدا لمحو الاثار الاسلامية والمسيحية من بيت المقدس، ماهم نازلين حفر ومش لاقيين حاجة، فيعملوا ايه؟ طيب بقى القدس دي مش بتاعة حد
ملحوسة: انتوا مش ملاحظين ان الدنيا بتمشي بسرعة قوي
يعني لسة من مافيش كانت الناس بتتكلم عن فلسطين عربية
وبعدين بشوية صغيرين قوي بقوا يقولوا حدود سبعة وستين
وبعدين بقوا يقولوا دولة فلسطينية
وبعدين طب يا اخوانا الحفر...بطلوا حفر ح تهدوا المسجد الاقصى
واخر حاجة: يا نهار اسود طب هاتوا الورق طاه
في الحلقة القادمة: لو سمحت...الا البنطلون

هو اوباما ليه اختار راجل كبير كده نائب ليه؟

وايه بايدن حلو بايدن وحش بايد دليل الخيبة؟
اللي قريته ان بايدن ده من دعاة تقسيم العراق لسنة وشيعة واكراد، الله ايه الحلاوة دي احنا كنا ناقصينك يا سي بايدن ما احنا عندنا مجانين يكفونا تلات قرون لقدام ونصدر منهم كمان

Saturday 23 August 2008

السيد مدير الامن/ قسم الانترنت/ غرفة المدونات

دلوقت يا باشا حضراتكوا كنتوا وعدتوني هنا في المدونة دي انكم شغلتكوا المراقبة بس مش انكوا تدخلوا تضايقوني وتضايقوا السادة القراء
والدليل اهو
تفضل الباشا بايضاح بعد ما واحد زميله عمل حركة وسخة واظن انه قال لي ان الزميل ده اتنقل ده حتى الباشا الجديد المؤدب ده وعدني ان ماحدش ح يعمل هاكينج تاني على الجهاز بتاعي اهو هنا
وكمان ابدى اعجابه بمدونتي المتواضعة
طيب...امال بهيج بيعمل ايه عندي يا باشا؟ ها؟ وللا دي تعليمات جديدة؟
لو تعليمات جديدة ياريت تنبهونا عشان نبقى عارفين لان الاستاذ بهيج عمل زيارة صغيرة لمدونة مينا
ده عشان الوحدة الوطنية يعني؟ وللا انتوا صدقتوا انه خطيبي بجد؟ لا يا باشا حضرتك احنا بنهزر يعني مافيش حاجة
ثم ايه الفايدة العايدة الزايدة من ان بهيج يجبرني اعمل مودريشن ما انتوا عارفين اني بانزل كل التعليقات ما عدا تعليقاته
امال فين ح الظابط الذوق المؤدب؟ رفدتوه وللا رقيتوه وللا اتحرق في مجلس الشورى؟

اللي يسكت على ده يبقى يخرس بقية عمره





















Friday 22 August 2008

يا ترى مين شريك ابراهيم نفخو

على فكرة انا ما اتصدمتش، مع اني الانسانة المصدومة، بس انا كنت عارفة ان براهيم نفخو اللي ما جابش كوباية شاي على حسابه في الاهرام واللي طلع الاهرام مديون بستة مليار وقال ايه عايزين الدولة تتحمل ديون الاهرام كنت عارفة انه ح يطلع، مش بس كده، ده احنا ح نتحمل ديون الاهرام، احسن يا مصر، احسن
خليكي كده لحد ما تطربق على دماغك
دلوقت احنا لو صحينا الصبح ما لقيناش لا ساويرس ولا عز ولا دياب ولا هشام ولا بهجت زي ما صحينا في يوم من الايام ما لقيناش ممدوح سماعين واللي قبلها واللي قبل اللي قبلها مين ح يتحمل خسايرنا، قصدي انهيارنا في البورصة وفلس بنوكنا؟ مين؟ جمال بتاع لسيه باسيه لسيه فير؟ وللا الرئيس ح يؤمر بان الخساير تبقى على نفقه الدولة؟ هو بيدفع حاجة من جيبه؟ طيب لما براهيم نفخو طلع منها، دلوقت لما ياخد التلاتة مليار بتوعه ويخلع هو كمان برة البلد ويسيبوا كلهم المركب بتغرق يا قبطان، القبطان ح يروح فين هو راخر؟ ح يهرب هو عياله ويسيبونا؟ لا ولا يهرب ولا حاجة
عارفين ليه؟ عشان ح تعدي زي ما اللي قبلها عدى
على فكرة موضوع مجلس الشورى مش ح يعدي، ده عدا خلاص صباح الخير، النهاردة الريس كان في موقع الحدث وكان بيقول لهم يخلص على نوفمبر وقالوا له حاضر!
كركركركركر
انا مش ح اسأل ح نعمل ايه لاننا مش ح نعمل حاجة، كله بيعدي وح يعدي
شي عجيب كيف ماشي؟ وخشخش من دون خشخاش؟ ولشو اهبل ولشو غاشي؟ والفيلم مكفى وفاهمينه وشايفينه من دون شاشة؟

هي الصحف الاسرائيلية مالها اليومين دول

عشان بس ساويرس ما يروحش يمسك في رقبة الدستور زي المرة اللي فاتت، الدستور بتترجم مقالات الصحف الاسرائيلية اللي بتفضح علاقته باسرائيل، وناقل الفضيحة ليس بفاضح، ييجي حد يقول لي من زمان اقول له اصله طلع في التلفزيون وانكر وانا صدقته، ييجي حد يقول لي يا هابلة، اقول لك اشكرك الله يكرم اصلك
السؤال بقى، لما ده من زمان، ايه اللي حصل ما بين ساوريس وما بين الشركة الاسرائيلية مخلياها تفضحه في الجرايد بالطريقة دي وتوصل لنا معلومة انه له اسهم كتير عندهم مش بس كده ده طالب زيادة اسهم؟
ايه اللي خلا الرقاصة تبعت لنا فانلة جوزنا على البيت؟
ده تاني مقال الصحف الاسرائيلية تكتبه عن ساوريس

«معاريف»: ساويرس من كبار مستثمري شركة بلوريدج التي كان يعمل فيها باراك مستشارًا براتب شهري
«معاريف»: ساويرس من كبار مستثمري شركة بلوريدج التي كان يعمل فيها باراك مستشارًا براتب شهري PDF تصدير لهيئة طباعة ارسال لصديق
كتب - محمد عطية:

تحت عنوان «قضية باراك: وزير الدفاع الإسرائيلي يعمل مستشارا بالأجرة لأحد مموليه» أشار تقرير لصحيفة معاريف العبرية أمس إلي أن «هناك تفاصيل جديدة عن العلاقة بين إيهود باراك وزوجته والجمعية التي أقامتها الأخيرة وبين عدد من رجال الأعمال علي رأسهم نجيب ساويرس المصري وريتشارد جرسون الأمريكي» ممن وصفتهم بمموليه.


وأشار التقرير الذي أعده بن كاسبيت - المحلل السياسي بمعاريف - إلي أنه وفقا لشخصيات قريبة من باراك وزوجته فإن «ساويرس يعد أحد ذوي الشأن وكبار المستثمرين في شركة بلوريدج والتي يملكها الأمريكي ريتشارد جرسون والتي عمل بها باراك كمستشار مقابل راتب شهري كان يحصل عليه نتيجة عمله في الشركة» مشيرًا إلي أنه يعتبر احد ممولي باراك.

وأضافت الصحيفة أنه «رغم نفي باراك أمس أنه كان يعمل في شركة بلوريدج العالمية للاتصالات أو في أي شركة أخري يملكها جرسون إلا إنها علمت رغم ذلك بأن باراك كان يعمل كمستشار للشركة وانه كان يتقاضي راتبًا شهريًا لفترة طويلة عمل فيها بالشركة» دون تحديد زمن تلك الفترة، مؤكدة أن «ريتشارد جرسون صاحب الشركة كان أحد ممولي باراك وقام بعدة مفاوضات لامتلاك خدمات شركة طوروس والتي تملكها زوجه وزير الدفاع الإسرائيلي الحالي».

------------
طيب نعم نعمل لهم ايه احنا دلوقت يعني؟
ياخدوه بالسلامة يشبعوا بيه وبفلوسنا انشالله تنزل عليهم بالسم الهاري

المركب بتغرق يا قبطان....المركب بتغرق يا قبطان

المركب بتغرق يا قبطان
ح نعمل ايه؟
المركب بتغرق يا قبطان
احنا بقى نعمل حسابنا على اي حاجة بقى، ونستعد، ما اعرفش نستعد ازاي، بس اهو نستعد وخلاص
انا زعلانة، زعلانة من كل الناس، منهم كلهم، من اللي فاتوا ومن اللي موجودين ومن اللي جايين كمان
وزعلانة من نفسي كمان
المركب بتغرق يا قبطان

وما خفي كان اعظم

الخبر ده جالي على الميل ما صدقتوش، شفته على المصريون طبعا ما صدقتوش ما بقاش الا المصريون كمان اللي الواحد ياخد منها اخبار لحد ما شفته في الدستور........وما خفي كان اعظم
اتفضلوا:

ساويرس طلب مساعدة إيهود باراك لزيادة أسهمه بشركة اتصالات إسرائيلية وجهاز الأمن الداخلي رفض PDF تصدير لهيئة طباعة ارسال لصديق

كتب - محمد عطية:

أشار تقرير لصحيفة معاريف العبرية أمس إلي أن الفترة الماضية شهدت قيام إيهود باراك وزير الدفاع الإسرائيلي وزعيم حزب العمل بتل أبيب بـ«محاولات حثيثة» من أجل إقناع إيهود أولمرت رئيس الحكومة الإسرائيلية والأجهزة الأمنية بتل أبيب وعلي رأسها جهاز الأمن الداخلي - الشاباك - بالموافقة والسماح لنجيب ساويرس رجل الأعمال المصري وصاحب شركة أوراسكوم تليكوم للاتصالات بزيادة نسبة أسهمه من شركة بارتنر الإسرائيلية والمتخصصة في مجال الاتصالات.

ك لكن كل هذه الجهود باءت بالفشل».
وأكدت الصحيفة الإسرائيلية أن «خلال الفترة ما بين عامي 2005 و2006 امتلكت شركة أوراسكوم تليكوم المصرية جزءًا من أسهم شركة «اتشيسون» الصينية للاتصالات والتي تمتلك بدورها 51% من الأسهم المالية لشركة بارتنر الإسرائيلية» مضيفة في تقريرها أن «أورواسكوم والتي تملك الآن 19.3% من أسهم الشركة الصينية أي 9% من الشركة الإسرائيلية تريد أن تزيد من حجم أسهمها إلي 23% في الشركة الصينية لتصل بذلك أكثر من 10 % من أسهم بارتنر» حسب التقرير.

وأشارت الصحيفة إلي أنه «وفقا للقانون الإسرائيلي لا يمكن السماح لشركة أجنبية ومن بينها المصرية بامتلاك أكثر من 10 % من أسهم أي شركة اتصالات إسرائيلية إلا بعد حصول الشركة الأجنبية علي تصريح خاص بالموافقة من قبل الأجهزة الأمنية الإسرائيلية وعلي رأسها جهاز «الشاباك»، مضيفة أن «الأوساط الأمنية رفضت صفقة ساويرس».

وأكدت «معاريف» أنه «منذ الرفض الأمني للصفقة لم يعد لدي وزير الدفاع الإسرائيلي إلا بذل مجهودات من أجل الضغط علي الحكومة الإسرائيلية وأجهزتها الأمنية للموافقة علي الصفقة»، مشيرة إلي أنه «بعد توجه ساويرس إلي باراك قام الأخير بالتوجه إلي أولمرت ويوفال ديسكين رئيس الشاباك بصدد التصديق علي الصفقة» مؤكدة أن «أولمرت من جانبه سعي فيما سعي إليه باراك مجريا محادثات مع وزير الاتصالات الإسرائيلي آرييل اطياس ورئيس الشابا

-------------

"احنا مصريين احنا مصريين مافيش حاجة تفرق بينا.." يا سلاااااااااااااااااااااااااااااااام
يا سلاااااااااااااااااااااااااااااااااااااااااااااااااااااااااااااااااااااااام
طب ادفعوا بقى ترميمات مجلس الشورى، كحك بقى كحك، واحد يموت الف واحد ويخلع، واحد يدور على النسوان وينط على دي وعلى دي بفلوسنا ويتعمل له قرار من النائب العام مخصوص، واحد كمان رايح يوسط ايهود باراك عشان يعمل شركة اتصالات وهم اللي قالوا له امشي من هنا اجري العب بعيد
طب ادفعوا بقى
ادفعوا اي حاجة يعني احنا قرونا وصلت لعنان السماء بجد يعني....عورنا السحاب
ايه؟ ايه؟ ايه؟
على فكرة موضوع التأميم عمال يكبر في دماغي
يا جااااااااااااااااااااااااااااااااااااااااااااااابرررررررررررررررررررررر
عايزين نأممهم اللي سارحين بفلوسنا شوية على الرقاصات وشوية على اسرائيل
يا جاااااااااااااااااااااااااااااابررررررررررررررررر انت رحت في انهي داهية

لازم يتأمموا...عمالة تكبر في دماغي...اهي اهي..كبرت قوي


لااااااااااااااااااااااااااازم يتأمموااااااااااااااا

Thursday 21 August 2008

يخرب بيت الشعب الشيوعي

أنا ح ابتدي اصدق كلام صحابي الشيوعيين اللي بيقولوا ان المصريين شيوعيين بالفطرة

بس الحقيقة انا شفت يساريين وشيوعيين بعدد شعر راسي اللي لنيني واللي ماوي واللي تروتسكي وفيه بقى يسار ديمقراطي واشتراكي ثوري

انما حركة شيوعيون كحيانون من اجل التفييس دي الحقيقة ما شفتهاش قبل النهاردة

خليني بس قبل ما اتكلم اطلب منكوا تبصوا لي، ايوة كده، بصيتوا؟ طيب: انتوا كحيانين..لا لا ما تدورش وشك، انتوا كحيانين

انت حضرتك يا عم الفييس انت وهو صباعك طالع من الشراب زي الكحيت وبتشبرق بضرايبك على رجال الاعمال؟ بتتصدق عليهم يعني؟

دلوقت جمال من تمن سنين طلع في التلفزيون وقال لسيه باسية لسيه فير

يعني ايه؟ دي كلمة بالفرنصاوي معناها: دعه يعمل دعه يمر. يعني ايه؟ يعني فيه ناس جات وقالت الدولة مش بابا ولا ماما، الدولة دي شغلتها بس حماية الامن الداخلي والامن الخارجي والمرافق العامة زي الطرق والكباري، فيه ناس قالت طب والتعليم الاساسي، قالوا زي بعضه التعليم الاساسي بس، بحيث تبقى بتفك الخط، وناس قالت والتأمين الصحي، ناس زي انجلترا قالت زي بعضه وناس تانية قالت واحنا مالنا ده شغل اصحاب العمل يقتطعوا جزء من الرواتب ويعملوا تأمين صحي للي بيشتغلوا عندهم. غير كده الثروة كلها في ايد التجار اللي هم رجال الاعمال، الزراعة والصناعة والتجارة الدولة مالهاش دعوة بيها اللي عليها انها تعمل تسهيلات ضريبية وبنكية للي عايز يشتغل ويزرع ويصنع ويتاجر ولسيه باسيه لسيه فير. آه طب ونظام الحكم. نظام الحكم بقى تبع اللي بيزرع وبيصنع، يعني اهل مكة ادرى بشعابها ومن حقهم مدام هم اللي ماسكين الثروة انهم يبقوا في مكان اللي بيسن القوانين او على الاقل ورا الشخص اللي بيسن القوانين عشان يعرف يعمل ويمر براحته بس ده يبقى على حسابهم برضه. يعني مدام ح ياخدوا تسهيلات ويسنوا قوانين ويلعبوا يا مدرسة الالعاب والدولة مالهاش غير انها تشرف يبقى كل حاجة هم يدفعوها ما عدا الشرطة والجيش، حتى المجالس النيابية اللي هم قاعدين فيها او على الاقل وكلاءهم قاعدين فيهم، الحملات الانتخابية، المشاريع الكبرى، وكمان المشاريع الصحية الكبرى، وملاجئ الايتام واي حاجة بقى، هم مسئولين عن كل حاجة زي المجتمع الامريكي ده مجتمع قايم على التبرعات كله على بعضه، كل حاجة فيه بلا استثناء قايمة على التبرعات ما عدا وزارة الدفاع طبعا دي كل المواطنين بيدفعوا فيها ضرايب. رجال الكونجرس والسينات الامريكي كلهم يا رجال اعمال يا ممولين من رجال اعمال، الرئيس الامريكي نفسه يا رجل اعمال يا ممول من رجل اعمال، وكل حاجة ماشية كده، لما الكونجرس يتحرق اللي ممولينه هم اللي ح يدفعوا تكاليفه، المواطن الامريكي ضرايبه للشارع اللي بيمشي فيه والاتوبيس او المترو اللي بيركبه والمدرسة لحد الصف الثامن والجيش والشرطة. غير كده هو مش مسئول عن اي حاجة بتوع البزنس هم المسئولين عن البلد

جم ناس تانية قالوا: لا...ليه يعني اعمل الشعب شحات وناس تبقى هي اللي بتتبرع؟ حتى لو تسهيلات وثروة البلد بس في النهاية يبقى فيه ناس معاها فلوس وناس عادية ويبقى بيمدوا ايدهم لرجال الاعمال؟ لا،البزنس ده بيدخل فيه مصالح ووساخات وممكن رجل الاعمال اللي في المجلس النيابي او اللي متمول من رجال الاعمال يلعبوا بالبلد والناس عشان يخدموا نفسهم واللي بيدفعوه باليمين ياخدوا قده عشر مرات بالشمال، يبقى احنا عملنا ايه؟ لا، الدولة دي رب الاسرة وهي اللي تمسك المصروف، لو افترضنا الثروة قد الكبشة دي، لو فيه ناس اخدت زيادة، يبقى اكيد فيه ناس ح تاخد اقل، طب وليه؟ الدولة توزع بالعدل على الناس، وهي اللي تبقى في ايدها الثروة هي اللي تمسك الزراعة والصناعة والتجارة وحتى لو فيه مشاريع صغيرة هي اللي تحط خطتها وهي اللي تحدد تبقى في انهي مجال ويبقى مداها ايه ولو كبر المشروع يبقى في الحالة دي المشروع دخل في اطار الثروة القومية ويتأمم، وكل الناس تدفع ضرايب وتشارك في كل حاجة، والدولة هي اللي تعلم وتعالج وتحط القوانين لانها هي المنتخبة من الشعب وهي بتمثل الشعب كله والمفروض تخدم مصالح الشعب كله، وفي الحالة دي المجلس النيابي ده ممكن يدخله راجل حافي وللا هدومه مقطعة لانه انتخب من الشعب، ومش ح يبقى ممول من حد ده يدخل حملة انتخابية فقرانة وكحيانة لان الدولة اللي مسئولة عن الانتخابات، وهي اللي بتصرف على المجلس النيابي وهي اللي بتصرف على كل حاجة من مصادر الثروات اللي هي متحكمة فيها

ماشي؟ طيب انا مش شيوعية ولا رأسمالية، انا احب النظام، احب اعرف راسي من رجليا. يا احنا دولة رأسمالية يبقى في الحالة دي المجلسين التشريعيين اللي فيهم اعضاء يا اما هم رجال اعمال يا اما ممولين من رجال اعمال مسئولية رجال الاعمال اللي بياخدوا تسهيلات بنكية وقروض واسهم البورصة بتاعتي كلها في جيبهم لان المفروض اني ضرايبي للجيش والشرطة والطرق اللي مليانة مطبات دي

يا اما المجلس التشريعي ده بتاع الدولة يبقى من بكرة نأمم رجال الاعمال ونعزلهم من مناصبهم ونرجع كلمة "دولة اشتراكية" في الدستور تاني

انما بروح اهالينا قاعدين زي الكحيت نصرف على رجال الاعمال وهم ما بيقوموش باي مسئولية؟ امال التسهيلات دي على اي اساس؟

لا بيعملوا تعليم ولا بيعملوا صحة وبيمولوا حملاتهم الانتخابية وينجحوا فيها ومش عايزين يبقوا مسئولين عن المجلسين التشريعيين اللي هم استحوذوا عليه بفلوسهم اللي جاية اصلا من التسهيلات اللي عملتها لهم الدولة

يا يرمموا هم المجلس يا الدولة تأمم فلوسهم

انما السمك لبن تمر هندي ده ما ينفعش احنا رأسمالية لما نيجي لتسهيلات رجال الاعمال واشتراكية لما نيجي لمصارف الضرايب؟ ده انهي مخ ده؟ انهي مخ؟ انهي مخخخخخخخخخخخخخ؟

يا جاااااااااااااااااابرررررررررررررررر

عايزين نعمل حملة عشان الشورى والشعب ما يترمموش على حسابنا
احنا كنا بنيناه ومش احنا اللي حرقناه يبقى عشان ايه نرممه بفلوسنا؟
شدوا حيلكوا معايا
يا جااااااااااااااااااااااااابرررررررررررررررررررررررررررررررر

فين التعابين

هي اسرائيل ح تفضل تحفر كده وهي ناكشة شعرها زي المجنونة وعمالة تقول فين التعابين؟ طب احنا مالنا مخضوضين من الحفر كده ما تحفر من هنا للصبح اصلا واحد مجنون فيهم طالع يقول العجل الاحمر لسة ما ظهرش، عجل ايه؟ وابو رجل مسلوخة ايه؟ ايه جو حواديت جدتي ده؟ فيه دولة تبقى متأسسة على تخاريف ام عبده الدادا؟ ده انا لما الدادات كانوا بيحكوا لي الحكايات دي ماما كانت بتزعق لهم، يقوموا يعملوا بيها دولة؟
-----
على فكرة موضوع الحريقة ده ح يعدي زي ما اللي قبله عدى، ولو ما عداش عادي كأن مافيش حاجة حصلت انا مستنياكوا تيجي تتفوا على وشي لما تغرقوا وشي تفافة، ووالله ح ابقى سعيدة ومبسوطة بالتفافة اللي انا متأكدة انها مش ح تنزل على وشي
-----
حزب الله متفهم لنقض الجماعة السلفية لحلفها اللي التزمت بيه. انا بافتكر حلف الفضول اللي سيدنا الحسين نادى بيه لما اختلف مع احد الولاة ناسية مين وعبد الله بن الزبير تضامن معاه كان معمول مع كفار، والكفار ما نقضهوش، الناس معادن برضه. بس حزب الله متفهم بامارة ايه يعني؟
عموما الاخوان بيقولوا ان حزب الله بيحاول يأمن الجبهة الداخلية لانه متوقع حرب مع اسرائيل وعشان كده بيحاول "يتقي شر" الجماعة السلفية على حد تعبير المليجي
هي المنطقة داخلة على حرب تاني وللا ايه؟ لا والمرة دي اسرائيل مبلطجة بتدخل نفسها في السياسة الداخلية وبتقول لهم انا مش عاجبني التفاهمات دي
ياللا واحنا مالنا احنا ناس في حالنا احنا اللي بيضربنا على خدنا الايمن بنديله قفانا واشياء اخرى
وبرررررررررضه تفوا في وشي ان ما عداش موضوع الحريقة ده زي ما عدت اللي قبلها واللي قبل اللي قبلها وعلى رأي زياد الرحباني:
- بلكي بينقطع البنزين بها اليومين
- مش راح ينقطوا الاجرين (الرجلين يعني)
شي عجيب كيف ماشي وخشخش من دون خشخاش ولشو اهبل ولشو غاشي؟

بوست راااااااااااااااائع

من عند جو غانم، كنت ح اخده كله تاني عندي بس خفت بقى ابقى باقطع عليه في المدونة ويقول لي انت بتاخدي البضاعة تبيعيها عندك عشان تلطشي مني الزباين
:)
بس فيه مقتطف ما قدرتش ما اخدوش واللي عايز يقرا التدوينة كلها يدوس عليه عشان يشوف التدوينة كاملة:

نــحـن الــمــُـوقـعـون أدنـاه و الـمـمـثـلـون لـلـطـوائـف الـمـذكـورة فـي ذيـل هـذا الـخـطـاب . نـعـتـرف هـنـا بـصـدق و أمـانـة أن كـل طـرف مـنـّـا يـنـظـر لـلاّخـر بـعـيـن الـكـره و الـحـقـد و يــتـمـنـّـى فـنـاءه عـن سـطـح الأرض الاّن قـبـل الـغـد . كـمـا أنّ كـلّ مـنـّـا يـعـتـبـر الاّخـر كـافـر زنـديـق
وخـنـزيـر عـلـى هـيـئـة بـشـري ّ .. ولأنـنـا عـجـزنـا تـمـامـا ً عـن الـقـضـاء عـلـى بـعـضـنـا الـبـعـض لأسـبـاب نـجـهـلـهـا جـمـيـعـا ً رغـم أنـنـا لـم نــوفــّـر جـهـداً فـي سـبـيـل ذلـك مـنـذ أكـثـر مـن ألـف عـام حـتـى الاّن .

و لأن كـل كـرهـنـا و مـؤامـراتـنـا و دسـائـســنــا لـم تــُـجــد ِ نـفـعـا ً .

لـذلـك ارتـأيـنـا الاّن أن نـعـقـد هـدنـة و وثـيـقـة عـدم اعـتـداء مـؤقـتـة . و أن نـعـيـش بـسـلام فـي أوطـانـنـا , لا يـتـدخـّـل أحـدنـا في شؤون الاّخـر .

و أن نــُـبـقـي الـكـُـره فـي الـقـلـوب و نـواظـب عـلـى اسـتـذكـاره بـعـد كـل صــلاة , كـي لا يــُـمـحـى تــراثـنـا و كـي لا يـكـون وجـودنـا عـلـى هـذه الأرض ضـربـا ً مـن الـعـبـث . و لأنـنـا جـمـيـعـاً لا نـسـتـطـيـع الـمـحـافـظـة عـلـى عـقـائـدنـا و أديـانـنـا دون حـقـد عـلـى الاّخـر , لـذلـك
سيـكـون الـحـقـد شـأن ٌ داخـلـي فـي كـلّ طـائـفـة . تــتــكـفــّـل هـذه الـوثـيـقـة بـعـدم إشـهـاره فـي وجـه الـغـيـر , و عـدم مـمـارسـتـه كـواقـع مـُـعـاش بـيـن أبـنـاء الـوطـن الـواحـد . إلـى أن يـأتـي يـوم تـسـتـطـيـع فـيـه
طـائـفـة مـنــّـا سـحـق كـل الـطـوائــف الأخـرى بـطـرفـة عـيـن , و تـرث َ وحـدهـا الأرض بـعـد ذلـك ... و عـلـى هـذا نــُـوقــّـع .. مـع خـالـص حـقـدنـا

يعني هم يحرقوا بعض واحنا نرممهم

يا نهار ذل بقى كفاية كده فعلا، الرئيس مبارك امر بترميم مجلس الشورى على حسابنا، على نفقة الدولة، لا احا بجد فعلا يعني، يعني هم يحرقوا ورق بعض ويتناحروا واحنا اللي ندفع لهم التكاليف؟
ايه الوساخة دي
زمان كنت باقول اننا عاملين زي الرقاصة اللي بتصرف على البلطجي، بس احنا كده فعلا عاملين زي الرقاصة اللي بتصرف على اخوها المعتوه اللي بيضربها كل يوم وبتسكت عشان هو اهبل وبيعملها على روحه وهي اللي بتغير له اخر الليل
ده ايه القرف ده يا ربي

Wednesday 20 August 2008

وايه لازمة السلفيين في الدنيا اصلا؟

ايوة انا عرفت من امبارح ان الوثيقة بين حزب الله والجماعة السلفية اتجمدت عشان دعي الاسلام نفخ فيها
شمس النهار كانت داخل تقول لي كده وانا كنت عارفة من امبارح وسبحان الله ما زعلتش
مش بس عشان بلدي كانت بتتحرق مع دمي كمان بس عشان فعلا السلفيين دول مالهمش اي لازمة في الحياة
انا مش باتكلم عن السلفيين يعني ابن القيم وابن كثير وابن تيمية اللي بصرف النظر عن التحفظات اللي الاخيرين بيثيروها الا انهم في الاول وفي الاخر كان لهم لازمة في الحياة، بيعملوا حاجة يعني
ابن كثير صحيح كان بيكتب: اليهود والنصارى عليهم لعائن الله المتتابعة، لكن ابن كثير مؤرخ، وباحث، وكان بيرصد كل الروايات بموضوعية حتى اللي تختلف معاه تماما، اهي دي لازمة في الحياة، حتى لما بيكتب في التفسير "عليهم لعائن الله المتتابعة" فده كان في ظرف تاريخي سيء جدا اوحش من اللي احنا فيه دلوقت
ابن تيمية انا مش باحب اللي بيهاجموه لان الراجل الحقيقة اولا حفظ لنفسه خط الرجعة وقال ما معناه انا في زمن استثنائي وطبيعي احكامي تبقى استثنائية ثانيا تراجع - لما كبر - عن اراء كتير قوي من اللي السلفيين بتوع دلوقت مصممين يتمسكوا بيها بالرغم من ان صاحبها نفسه تراجع عنها ثالثا له اراء تانية كويسة رابعا كان بيجاهد التتار، اهي دي لازمة ولازمة كبيرة قوي
طب السلفيين دلوقت ايه لازمتهم في الحياة؟ ايه؟ يوم ما ربنا فتح عليهم وحبوا يجاهدوا بقوا يفجرونا احنا في الصعيد، يوم ما ربنا هداهم وقرروا يبطلوا يفجروا في الصعيد وراجعوا نفسهم قالوا: احنا كنا غلطانين ده حتى كمان الحسين بن علي كان غلطان مش بس كده ده لا يجوز الثورة على الحكام وان كان ظالما مش بس كده ده يزيد كان راجل تقي وورع ومصلي وصايم وما عملش حاجة وحشة في حياته غير بس موضوع قتل الحسين..بس يعني انتوا ح تمسكوها له بقى؟
غير انه بالصلاة ع النبي، مخ ايه ولسان ايه وينطبق عليهم تماما "أتأمرون الناس بالبر وتنسون أنفسكم"، اولا مافيش مخ خالص، مطلسم يعني، وده مش ناتج عن ان ربنا خلقه غبي، ربنا ما بيخلقش اغبيا الانسان هو اللي بيعمل نفسه غبي بارادته لما يتهياله ان مافيش بني ادم في الدنيا بيفهم غيره وانه هو الوحيد اللي بيفهم وما عندوش اي استعداد يسمع غيره اطلاقا لان غيره ده اكيد حقير وما بيفهمش. ثانيا: دول اكتر ناس تدخل تقول لي ما تلمي لسانك، لمي لسانك وكفاك فحشا وبذاءة يا عاهرة يا فاجرة، وينزلوا على كل الناس: يا اولاد الزواني، واي راجل يختلف معاهم يقول له: يا لوطي. يعني هي الشتيمة لما بقت بالفصحى ما بقتش بذاءة؟ قوم يرد عليك ويقول لك ايه: هذه غيرة محمودة على الدين!!!! طب ده مخ؟ ده مخ؟ ده مخ؟ حد يرد عليا
بيفكروني بالشيخ بتاع أتتنابذون بهذه الالقاب وتريدون ان تدخلون الجنية يا اخي...
ده في مصر
في الخليج حدث ولا حرج، مش دول بتوع يجوز الاستعانة بالكافر على المسلم اذا كان المسلم مفسد في الارض؟
مش دول بتوع ما تدعوش للمقاومة في لبنان عشان خطرهم اكبر من خطر اسرائيل؟
مش دول اللي كل همهم دلوقت وشغلهم الشاغل في الحياة الستات ما تسوقش عربية عشان دي فتنة؟
فتنة؟
طيب والشتايم في الناس عشان دينهم ومذهبهم مش فتنة؟
لما يسلطوا علينا في مصر كام واد عاطل مش لاقي له شغلانة ويعملوه مولانا وشيخ وهو حتة حمار ما يسواش تلاتة نكلة في سوق الجزم ويدوله فلوس عشان يفضل يقول: النصارى عليهم لعائن الله المتتابعة، عباد الصليب الانجاس
طيب طيب
طب الامريكان دول ايه؟ وللا صليب الامريكان اترش عليه السكر وهم بس المسيحيين بتوعنا عشان شبهنا تف عليهم الكلب؟ لا ييجوا لحد امريكا ويتنحوا
يعني هو المسيحي لازم يبقى ابيض وبيتكلم انجليزي عشان يبقى دحة؟ ولما الناس تطلع من هدومها وتقول يا امريكا الحقينا يقولوا عليهم خونة؟ هو مين اللي كفرهم في عيشتهم؟ وموالسين مع الامن وماسكين جوامع كتير وهاتك يا صويت في الميكروفنات على النصارى عباد الصليب لما هججوا الناس من بلدها
هي دي عيشة؟
ويعني في لبنان ما يفرقوش كتير، سايبين اسرائيل على حدودهم وماسكين في حزب الله اللي بيقاوم
لا والبجاحة يقولوا ايه: حزب الله مستأثر بالمقاومة!
يعني حزب الله طبق الحدود وحطها تحت المخدة قبل ما ينام؟ ما يتفضلوا يشتروا سلاح بفلوس السعودية اللي نازلة ترف عليهم ويطلعوا على الحدود يورونا مرجلتهم
انا عايزة اعرف، لو صحينا الصبح ما لقيناش السلفيين في العالم، سافروا المريخ مثلا، ايه اللي ح ينقص من الدنيا غير وجع الدماغ والغباوة؟