Friday 15 August 2008

قالك نون...يبقى القسيس بيسحر

عمرو عزت كتب بوست قلب عليا المواجع. البوست باختصار بيتكلم عن الحفلة المزعومة اللي عملتها جريدة البديل لواحدة قلعت الحجاب
على فكرة انا موضوع ده غايظني قوي، غايظني موت، غايظني طحن ومخليني عايزة اشنق كل الرجالة، ما عدا ابويا طبعا عشان ده ابويا وانا باحبه
بس انا عايزة اعرف هم الرجالة دول فاكرينا ايه؟ ها؟ مين قالهم اننا فاتحين دماغنا كنيف لكل اللي معدي يعمل فيه زي الناس؟
لو واحدة لبست الحجاب يبقى اكيد اللي لبسها الحجاب السعودية او عمرو خالد
لو واحدة قلعت الحجاب يبقى اكيد اللي قلعها الحجاب واحد يساري او واحد مسيحي
السعودية بتلبس الستات الحجاب عشان بتدفع لهم فلوس
وعمرو خالد عشان ساحر النساء - انا مش فاهمة ده ساحر النساء من انهي ناحية ده؟ يعني كمان بيستعمونا؟- اما اليساري فبيقلع البنت الحجاب بعد ما يفقدها اعز ما تلك
والمسيحي بيقلع البنت الحجاب بعد ما يعمل لها عمل عند القسيس اللي بيسحر
(لاحظ ان دائما دور البطولة في مسرحية الحجاب مسند لراجل)
وفيه ناس مؤمنة بموضوع القسيس اللي ما وراهوش حاجة غير يسحر للبنات المسلمات اكتر ماهم مؤمنين بربنا نفسه
مرة واحدة في العشوائيات قالت لي: يا ابلة القسيس بيسحر...طبعا لما شافت الاستياء على وشي انبرت: لا يا ابلة السحر حقيقة ومذكور في الكرآن...مش قالك نون والكلم وما يسطرون؟ ماهو بيقول لك ايه؟ نون...صح؟ وكلم وما يسطرون يسطرون بايه؟ بالكلم، والسحر بيبقى بالكلم الاحمر، يبقى القسيس بيسحر وللا ما بيسحرش؟
ردوا بقى..ردوا يا متعلمين يا بتوع المدارس
فيه كام سؤال بيمغصوا في نفسيتي للاخوة الرجالة من كل الاطياف والديانات
انتوا عمركوا في حياتكوا ما قابلتوا ست بتفكر من دماغها ابدا؟ كل الستات يعني ما بتعرفش تاخد اي قرار في حياتها الا بتأثير من حد يا اما من السعودية يا اما من القسيس اللي بيسحر؟
ايه رأيكوا في عقل الستات؟ ليه شايفينه اقل من عقولكوا ولازم كل تصرف حتى اللبس والقلع يبقى بتأثير من راجل؟
تاني سؤال، ممكن اعرف ايه علاقة وجود الطرحة على الراس من عدمها بالبنطلون الرجالي اللي بالمناسبة العقل الرجالي لا يبرحه ابدا في اي ساعة من ساعات الليل او النهار؟
مالكوا انتوا ست لابسة حجاب وللا قالعاه؟ انا عمري ما شفت ست بتعلق على حجاب ست او انها مش لابسة حجاب، بالرغم من انهم بيقولوا الستات بيعلقوا على لبس بعض، آه، ممكن تقول الالوان مش لايقة، شكلها بيئة لكن مالهاش دعوة محجبة وللا مش محجبة
ثم محجبة وللا ماشية في الشارع بشراب، ما ينفعش يبقى ده اختيارها هي بدماغها هي؟
افففففففففففففففففففففففففففففففففف
----
ملحوظة: عشان ماحدش يفهم غلط، انا قلت حفلة البديل المزعومة، البديل ما عملتش حفلة لحد، بنت في البديل قلعت الحجاب وبعدين موقع المصريون كتب تخريف والبديل كذبته
عمرو عزت كان في البوست بيتكلم عن عدم مصداقية موقع المصريون، بس انا اللي غاظني الفكرة من اساسها اللي اتبنى عليها كل الخبر في موقع المصريون: الست ما بتتصرفش من دماغها

No comments: