Tuesday 5 August 2008

يا سلام على نظرية المؤامرة وعظمتها

لاااااااااااا انا الاحداث اللي بتحصل في العالم فعلا ح تزيدني خبل على خبلي
اول ما ستارباكس نزل عندنا وفي الدول العربية انا قلت فيها ان...اكيد السلسلة دي فيها حاجة واصحابها عارفين انها ح تخسر قريب قوي في امريكا واوروبا والدول المتغدمة وعشان كده بيزيحوه علينا الحداية ما ترميش كتاكيت
خصوصا ان العرب المقيمين في اوروبا والدول المتغدمة - اللي عندهم كرامة ودم يعني - مش بيتعاملوا مع ستارباكس لانهم عارفين زي ما كل العالم عارف ان كل سنت بتدفعه بيروح اسرائيل
حتى خالي لما جه من امريكا (هو عايش هناك بقاله اكتر من اربعين سنة) جاله استحبس وازبهلال: ايه ده؟ انتوا بتتعاملوا مع ستارباكس؟ ده مافيش عربي في امريكا بيتعامل معاه الا اذا كان عربي مهزأ وصهيوني
وطبعا حتى خالي ضحك على نظرية المؤامرة بتاعتي ان اكيد السلسلة دي فيه مشكلة فيها وح تخسر قريب وعشان كده فتحوا فروع عندنا
زي الاجهزة لما بتبوظ والادوية اللي ماحدش ح ياخدها تاني لانهم اكتشفوا انها بتجيب بري بري
وروحي يا ايام وتعالي يا ايام ويثبت النهاردة ان ستارباكس بيخسر خسائر مروعة في استراليا وان الاقبال عليه في امريكا بيقل بعد ما كان زاد في الفترة الاخيرة
واسحبوا شهر كده....ربنا يديكوا العمر ويقصف عمري انا عشان انا اتخنقت وح تلاقوه بيخسر في اوروبا كمان
ومافيش حد شايله غير الفروع اللي عند البقر من امثالنا
طب انا ساعة ما كانت بتنتابني الشكوك دي ما رضيتش اقولها وكتمت في قلبي ونفسيتي وقلت بلاش اكتبها احسن يعلموا على مدونتي ويعلقوا عليها يافطة: خش برجلك اليمين واقرا اية الكرسي المهبوشة جوة
بس بعد الخبر ده انا ح البس طرطور بنجوم واهلة وامسك سبحة واقعد على باب الحسين واستشارة الجواز بربع جنيه واستشارة الطلاق بخمسين قرش وانادي على الناس باساميهم وهم معديين من قدامي من غير ما اعرفهم زي الدراويش بتوع علي زين العابدين اللي كل مال اروح هناك يلبشوا لي جتتي: الله ينور يا نوارة

No comments: